Category: សង្គម និងសេដ្ឋកិច្ច

ភ្នំពេញ ៖ មន្ត្រីជាន់ខ្ពស់របស់រាជរដ្ឋាភិបាលកម្ពុជាបានអះអាងថា ការវិនិយោគរបស់ចិននៅកម្ពុជាមានកំណើនខ្ពស់គួរឱ្យកាត់សម្គាល់ ជាក់ស្ដែង ក្នុងរយៈពេលមួយទសវត្សរ៍ចុងក្រោយនេះ ប្រទេសចិននៅតែជាប្រភពទុនវិនិយោគធំជាងគេទី១នៅកម្ពុជា ជាពិសេសនៅក្នុងឧស្សាហកម្មដែលប្រើបច្ចេកវិទ្យទំនើប មានតម្លៃបន្ថែមខ្ពស់ រួមទាំងការវិនិយោគបង្កើតតំបន់សេដ្ឋកិច្ចពិសេសផងដែរ។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានថ្លែងឱ្យដឹងថា ក្នុងរយៈពេល១ឆ្នាំចុងក្រោយនេះ ចិនបានបណ្ដាក់ទុនវិនិយោគនៅកម្ពុជារហូតដល់ ៣,៥ពាន់លានដុល្លារអាមេរិក ដែលស្មើនឹងប្រមាណ ៦០,៤៤ភាគរយនៃប្រភពទុនសរុបដែលកម្ពុជាទទួលបាន។ រូបភាពទាំងនេះបានបង្ហាញថា ចិននៅតែជាប្រភពទុនដ៏សំខាន់សម្រាប់ការវិនិយោគនៅក្នុងប្រទេសកម្ពុជា។

យោងតាមរបាយការណ៍របស់ក្រុមប្រឹក្សាអភិវឌ្ឍន៍បានបង្ហាញថា ក្នុងរយៈពេល១ឆ្នាំពេញ កម្ពុជាទទួលបានទុនវិនិយោគសរុបប្រមាណ ៧,៥ពាន់លានដុល្លារអាមេរិកពីគម្រោងវិនិយោគសរុបចំនួន៣៩១គម្រោង ។ ក្នុងចំណោមចំនួន ៧,៥ពាន់លានដុល្លារអាមេរិកនោះ មានទុនវិនិយោគពីប្រទេសចិនចំនួន ៦០,៤៤ភាគរយទៅហើយ ឬប្រមាណ ៣,៥ពាន់លានដុល្លារអាមេរិក ។ ក្រៅពីនេះ ជាទុនវិនិយោគរបស់វិនិយោគិនក្នុងស្រុកដែលមានទំហំប្រមាណ ២,៤២ពាន់លានដុល្លារអាមេរិក ឬប្រមាណ ៣២,៣១ភាគរយ និងទុនមកពីប្រទេសសិង្ហបុរី ២,៦៥ភាគរយ ម៉ាឡេស៊ី ១,៣ភាគរយ ។ ក្រៅពីនោះមានមកពីប្រទេសវៀតណាម ថៃ កូរ៉េខាងត្បូង សហរដ្ឋអាមេរិក ឥណ្ឌាជាដើម ។

ក្នុងគោលបំណងទាក់ទាញការវិនិយោគពីចិនបន្ថែម ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានអំពាវនាវយ៉ាងទូលាយអំពីស្ថានភាពវិនិយោគ ច្បាប់ និងបទប្បញ្ញត្តិពាក់ព័ន្ធនឹងការវិនិយោគរបស់កម្ពុជាដែលមានភាពបើកចំហ តម្លាភាព និងភាពអាច់ប៉ាន់ប្រមាណទុកជាមុនបាន ដែលទាំងអស់នេះសុទ្ធតែជាឱកាសទទួលបានផលចំណេញពីការវិនិយោគក្នុងអត្រាខ្ពស់បំផុតសម្រាប់វិនិយោគិនបរទេសនៅលើទឹកដីកម្ពុជា៕

ភ្នំពេញ ៖ មន្រ្តីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បច្ចុប្បន្ននេះ មានបុគ្គលមួយចំនួន ក្រោមលេសធ្វើទង្វើមនុស្សធម៌ បាន និងកំពុងដើរប្រមូលស្នាមមេដៃ រៀបចំឯកសារ និងឈរឈ្មោះធ្វើជាអ្នកតំណាងឱ្យគ្រួសារប្រជាពលរដ្ឋដើម្បីដាក់ពាក្យស្នើសុំដីធ្លីពីអាជ្ញាធរមានសមត្ថកិច្ច ឬពីរាជរដ្ឋាភិបាល ដោយលើកហេតុផលថា គ្រួសារទាំងនោះជាគ្រួសារក្រីក្រ និងគ្មានដីធ្លីសម្រាប់សាងសង់លំនៅឋាន ក៏ដូចជាបង្កបង្កើនផល។ បុគ្គលជាមេខ្យល់ទាំងនោះ តែងធ្វើការរ៉ៃអង្គាស ឬដាក់លក្ខខណ្ឌឱ្យប្រជាពលរដ្ឋដែលចូលរួមដាក់ពាក្យសុំដីបង់ប្រាក់ទៅឱ្យពួកគេ ដោយអះអាងថាយកទៅធ្វើសោហ៊ុយ “រត់ការ” ដើម្បីស្នើសុំដីពីអាជ្ញាធរមានសមត្ថកិច្ច។

មន្រ្តីដដែលបានបញ្ជាក់ថា ការស្នើសុំបែបនេះ គឺខុសទាំងស្រុងនឹងលក្ខខណ្ឌ និងនីតិវិធីដែលច្បាប់និងលិខិតបទដ្ឋានគតិយុត្តជាធរមានបានអនុញ្ញាត ហើយធ្វើឱ្យប៉ះពាល់ដល់បំណងដ៏ពិសិដ្ឋរបស់រាជរដ្ឋាភិបាលចំពោះប្រជាពលរដ្ឋដែលក្រីក្រ និងត្រូវការដីពិតប្រាកដ។ ក្នុងន័យនេះ ដើម្បីទទួលបានដីពិតប្រាកដ និងដើម្បីចៀសវាងចាញ់ការបោកប្រាស់ពីសំណាក់ជនខិលខូច គ្រួសារដែលក្រីក្រ ឬដែលគ្មានឬខ្វះដីពិតប្រាកដ ត្រូវដាក់ពាក្យដោយផ្ទាល់នៅសាលាឃុំ សង្កាត់ ដើម្បីស្នើសុំដីតាមលក្ខខណ្ឌនិងនីតិវិធីនៃកម្មវិធីសម្បទានដីសង្គមកិច្ច ដែលអនុវត្តដោយរដ្ឋបាលឃុំ សង្កាត់ និងក្រសួងរៀបចំដែនដី នគរូបនីយកម្ម និងសំណង់។

ជនដែលបានចាប់ផ្តើម និង / ឬកំពុងធ្វើសកម្មភាពប្រមូលស្នាមមេដៃពីប្រជាពលរដ្ឋដើម្បីដាក់លិខិតស្នើសុំដីរដ្ឋ គប្បីបញ្ឈប់ជាបន្ទាន់ ព្រោះទង្វើទាំងនេះមិនត្រឹមតែជាទង្វើខុសច្បាប់ដែលអាចប្រឈមនឹងការចោទប្រកាន់តាមផ្លូវតុលាការប៉ុណ្ណោះទេ ប៉ុន្តែវាធ្វើឱ្យប៉ះពាល់ដល់នយោបាយដ៏ត្រឹមត្រូវ និងចេតនាដ៏ល្អរបស់រាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ តាមរយៈការដាក់ចេញ និងអនុវត្តនូវគោលនយោបាយស្តីពីសម្បទានដីសង្គមកិច្ចចាប់តាំងពីឆ្នាំ២០០៣ មក។ ក្នុងន័យនេះ គ្រួសារប្រជាពលរដ្ឋដែលគ្មានដី ឬខ្វះខាតដីពិតប្រាកដ អាចទៅដាក់ពាក្យស្នើសុំដីសម្បទានសង្គមកិច្ចនៅរដ្ឋបាលឃុំ សង្កាត់ដែលជាទីលំនៅអចិន្រ្តៃយ៍របស់ខ្លួន ដើម្បីរដ្ឋបាលឃុំ សង្កាត់ និងក្រសួងរៀបចំដែនដី នគរូបនីយកម្ម និងសំណង់ មានលទ្ធភាពរៀបចំផែនការកម្មវិធីសម្បទានដីសង្គមកិច្ចតាមលក្ខខណ្ឌនិងនីតិវិធីជាធរមាន។

យោងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ គិតពីចាប់ផ្តើមអនុវត្តរហូតដល់ដំណាច់ខែមិថុនា ឆ្នាំ២០២៤ នេះ តាមរយៈកម្មវិធីសម្បទានដីសង្គមកិច្ចគ្រប់ប្រភេទ រាជរដ្ឋាភិបាលសម្រេចផ្តល់ដីសរុបទំហំប្រមាណ ១,៣លានហិកតា ជូនប្រជាពលរដ្ឋសរុបជិត ៥០ម៉ឺនគ្រួសារ និងសាងសង់ផ្ទះជូនប្រជាពលរដ្ឋសរុបចំនួន ៨ ១៤១ខ្នង៕

ភ្នំពេញ៖ រដ្ឋមន្ត្រីក្រសួងរ៉ែ និងថាមពល បានអះអាងថា ប្រភពអគ្គិសនីនៅកម្ពុជាត្រូវបានអភិវឌ្ឍកើនឡើងពី ១៥០មេហ្គាវ៉ាត់ នៅឆ្នាំ១៩៩៨ រហូតដល់ ៤ ៨១៤មេហ្គាវ៉ាត់នៅឆ្នាំ២០២៤ ដែលស្មើនឹងកំណើន ​៣២ដង ហើយនឹងអាចបន្តកើនឡើងលើស ១ម៉ឺនមេហ្គាវ៉ាត់នៅមុនឆ្នាំ២០៣០ បន្ទាប់ពីរាជរដ្ឋា​ភិបាលអនុម័តលើគម្រោងថាមពលចំនួន ២៣គម្រោង ដែលមានអានុភាពសរុប ៥ ៩៥០មេហ្គាវ៉ាត់។

នៅក្នុងពិធីបើកការដ្ឋានសាងសង់រោងចក្រផលិតអគ្គិសនីដើរដោយឧស្ម័នធម្មជាតិរបស់ក្រុមហ៊ុន រ៉ូយ៉ាល់ គ្រុប នៅខេត្តកោះកុងកាលពីពេលកន្លងទៅ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងថា ការចែកចាយអគ្គិសនីរបស់ប្រព័ន្ធបណ្តាញជាតិអាចគ្របដណ្តប់លើភូមិចំនួន ៩៩,១៥% និងបានភ្ជាប់ឱ្យលំនៅឋាន ៣,៥៩លានផ្ទះ ត្រូវជា ៩៦,៥១% នៃផ្ទះសរុបទូទាំងប្រទេស រួចហើយ ដោយគម្រោងវិនិយោគលើវិស័យថាមពលថ្មីៗមួយចំនួនទៀតអាចនឹងលេចចេញជារូបរាង និងចាប់ដំណើរការផលិតអគ្គិសនីនៅមុនឆ្នាំ២០៣០។

ឯកឧត្តម កែវ រតនៈ បានគូសបញ្ជាក់ថា ៖ «បច្ចុប្បន្ន យើងកំពុងបន្តអភិវឌ្ឍ ពង្រឹង និងពង្រីកសមត្ថភាពព្រមទាំងគុណភាពនៃការផ្គត់ផ្គង់ថាមពលអគ្គិសនីក្រោមការយកចិត្តទុកដាក់ក្នុងនាមជាប្រព័ន្ធបណ្តាញជាតិ ហើយយើងក៏បានយកចិត្តទុកដាក់ដោះស្រាយឱ្យមានការផ្គត់ផ្គង់អគ្គិសនីដល់ភូមិដាច់ស្រយាលជាបណ្តើរៗផងដែរ តាមរូបភាពធ្វើការអភិវឌ្ឍប្រព័ន្ធផ្គត់ផ្គង់អគ្គិសនីខ្នាតតូច ប្រើប្រាស់ថាមពលពន្លឺព្រះអាទិត្យផ្តុំជាមួយប្រព័ន្ធអាគុយស្តុកថាមពល»។

សូមបញ្ជាក់ថា រាជដ្ឋាភិបាលកម្ពុជា បានអនុម័តគម្រោងប្រភពផ្គត់ផ្គង់ថាមពលអគ្គិសនីចំនួន ២៣ ដែលមានតម្លៃវិនិយោគសរុបចំនួន ៥,៧៩ពាន់លានដុល្លារអាមេរិក ដោយក្នុងនោះមានគម្រោងថាមពលពន្លឺព្រះអាទិត្យ ចំនួន១២គម្រោង អានុភាពសរុបចំនួន ១ ៩៥០មេហ្គាវ៉ាត់ គម្រោងថាមពលខ្យល់ ចំនួន ៦គម្រោង អានុភាពសរុបចំនួន៩០០មេហ្គាវ៉ាត់ គម្រោងជីវម៉ាស (Biomass) ផ្តុំជាមួយថាមពលពន្លឺព្រះអាទិត្យ ចំនួន១គម្រោង អានុភាព ៥០+៤០មេហ្គាវ៉ាត់ ។

បន្ថែមលើនេះ គម្រោងវារីអគ្គិសនីព្រែកល្អាងចំនួន១គម្រោង អានុភាព១១០មេហ្គាវ៉ាត់ គម្រោងស្តុកថាមពលដោយប្រព័ន្ធអាគុយស្តុកថាមពល ទំហំ ១ ០០០មេហ្គាវ៉ាត់ គម្រោងស្តុកថាមពលវារីអគ្គិ​សនីបូមទឹកស្តុកទុកស្ទឹងតាតៃ លើទំហំ ១ ០០០មេហ្គាវ៉ាត់ និងគម្រោងផលិតអគ្គិសនីដើរដោយឧស្ម័នធម្មជាតិ (LNG) ចំនួន ១គម្រោង អានុភាព ៩០០មេហ្គាវ៉ាត់ របស់ក្រុមហ៊ុន រ៉ូយ៉ាល់ គ្រុប ដែលទើបតែបើកការដ្ឋានសាងសង់កាលពីសប្តាហ៍មុននេះ៕

ភ្នំពេញ៖ យោងតាមសេចក្ដីជូនដំណឹងរបស់ក្រសួងទេសចរណ៍ចុះថ្ងៃទី២២ ខែតុលា ឆ្នាំ២០២៤បានឱ្យដឹងថា កម្ពុជា ដែលមានក្រសួងទេសចរណ៍ជាសេនាធិការ នឹងរៀបចំពិព័រណ៍ម្ហូបអាហារ កម្ពុជា-ចិន (Cambodia-China Gastronomy Week) ចាប់ពីថ្ងៃទី២៦ ដល់ថ្ងៃទី២៧ ខែតុលា ឆ្នាំ ២០២៤ នៅខេត្តសៀមរាប ដោយមានស្តង់តាំងបង្ហាញសរុបប្រមាណ១០០ស្តង់ ។

ក្រៅពីនេះក៏មានសិក្ខាសាលាម្ហូបអាហារ (Gastronomy Conference) ក្រោមប្រធានបទ “Good Food for All” ក្រោមវត្តមានវាគ្មិនល្បីៗមកចែករំលែកបទពិសោធស្តីពីម្ហូបអាហារកម្ពុជា និងចិនផងដែរ។

សេចក្តីប្រកាសពត៌មានដដែលបានឱ្យដឹងទៀតថា៖ ព្រឹត្តិការណ៍នេះរៀបចំឡើងក្នុងគោលបំណងជំរុញការផ្សព្វផ្សាយពីមុខម្ហូប និងសក្តានុពលទេសចរណ៍ដ៏សម្បូរបែបរបស់កម្ពុជាឱ្យកាន់តែទូលំទូលាយទៅកាន់ទីផ្សារអន្តរជាតិ ជាពិសេសទីផ្សារចិន ព្រមទាំងពង្រឹងទំនាក់ទំនង និងកិច្ចសហប្រតិបត្តិការល្អក្នុងវិស័យទេសចរណ៍រវាងផ្នែករដ្ឋ-ឯកជន កម្ពុជា-ចិន និងបន្តជំរុញយុទ្ធនាការផ្សព្វផ្សាយ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ព្រមទាំងចូលរួមជំរុញយុទ្ធនាការ «ឆ្នាំទស្សនាសៀមរាប ២០២៤» សំដៅទាក់ទាញទេសចរ និងវិនិយោគិនចិនឱ្យមកទស្សនា និងវិនិយោគនៅកម្ពុជាឱ្យបានកាន់តែច្រើនថែមទៀត។

ជាមួយគ្នានេះ ក្រសួងទេសចរណ៍ ក៏បានអំពាវនាវដល់ប្រតិបត្តិករទេសចរណ៍ គ្រប់សមាគមទេសចរណ៍ផ្នែករដ្ឋ ឯកជន ស្ថាប័នពាក់ព័ន្ធ សារព័ត៌មានជាតិ-អន្តរជាតិ និងសាធារណជន ចូលរួមផ្សព្វផ្សាយអំពីពិព័រណ៍ម្ហូបអាហារកម្ពុជា-ចិន (Cambodia-China Gastronomy Week) ខាងលើនេះឱ្យបានទូលំទូលាយ សំដៅទាក់ទាញការចូលរួមឱ្យបានច្រើនកុះករ ព្រមទាំងបង្កើនចំណាប់អារម្មណ៍ភ្ញៀវទេសចរ និងវិនិយោគិនចិនឱ្យមកទស្សនា និងវិនិយោគនៅព្រះរាជាណាចក្រកម្ពុជាកាន់តែច្រើនថែមទៀត។ សូមកុំភ្លេចចូលរួមនៅក្នុងកម្មវិធីពិព័រណ៍ទាំងអស់គ្នា ដើម្បីគាំទ្រ និងជំរុញវិស័យទេសចរណ៍កម្ពុជា៕