Category: សង្គម និងសេដ្ឋកិច្ច

អាល្លឺម៉ង់ ផ្តួល តួកគី ដើម្បីឈ្នះសិទ្ធិធ្វើជាម្ចាស់ផ្ទះ Euro ឆ្នាំ2024
អាល្លឺម៉ង់ កាលពីថ្ងៃព្រហស្បតិ៍ បានឈ្នះការប្រជែងក្នុងការធ្វើជាម្ចាស់ផ្ទះព្រឹត្តិការណ៍ជើងឯកអឺរ៉ុប ឆ្នាំ2024 ខណៈដែល សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA បានគាំទ្រការដេញថ្លៃមួយដែលត្រូវបានចាត់ទុកថា មានសុវត្ថិភាពជាងសំណើមួយពីសំណាក់ប្រទេសតួកគី។
បញ្ហានយោបាយ ការបង្រួបបង្រួមជាតិ និងការគោរពសិទ្ធិមនុស្សក្នុងប្រទេសតួកគី បានក្លាយជាកត្តាកាត់សេចក្តីយ៉ាងសំខាន់ ក្នុងយុទ្ធនាការក្នុងការធ្វើជាម្ចាស់ផ្ទះព្រឹត្តិការណ៍កីឡាបាល់ទាត់អន្តរជាតិរបស់អឺរ៉ុប។
ទីបំផុត លទ្ធផលមិនមានភាពប្រកៀកប្រកិតគ្នាឡើយ ខណៈដែលអាល្លឺម៉ង់ ដែលជាបេក្ខភាពឈានមុខគេ បានឈ្នះការបោះឆ្នោតក្នុងចំណោមសមាជិកគណៈកម្មាធិការប្រតិបត្តិរបស់ UEFA តាមរយៈលទ្ធផល 14-4 ដោយអវត្តមាន1សំឡេង។
UEFA បានបញ្ជាក់ថា សំណើដេញថ្លៃរបស់អាល្លឺម៉ង់ បានឆ្លើយតបគ្រប់ចំណុចទាំងអស់ ក្នុងការធ្វើជាម្ចាស់ផ្ទះព្រឹត្តិការណ៍មួយប្រកបដោយភាពជោគជ័យ ចាប់តាំងពីកីឡដ្ឋាន រហូតដល់ហេដ្ឋារចនាសម្ព័ន្ធនានា និងសណ្ឋាគារ។
ក្រោយពីបេក្ខភាពដែលឈ្នះសិទ្ធិត្រូវបានប្រកាសឲ្យដឹងនៅទីស្នាក់ការរបស់ UEFA នៅប្រទេសស្វ៊ីស លោក Reinhard Grindel ប្រធានសហព័ន្ធកីឡាបាល់ទាត់អាល្លឺម៉ង់ បានឲ្យដឹងថា៖ «យើងនឹងប្រឹងឲ្យអស់ពីសមត្ថភាពក្នុងការបំពេញតាមការរំពឹងទុករបស់យើង»។
អាល្លឺម៉ង់ បានធ្វើជាម្ចាស់ផ្ទះ World Cup ឆ្នាំ2006 ប៉ុន្តែ មិនធ្លាប់បានធ្វើជាម្ចាស់ផ្ទះព្រឹត្តិការណ៍ Euro ក្នុងនាមជាប្រទេសមានការបង្រួបបង្រួមឡើយ ខណៈដែលអាល្លឺម៉ង់ ខាងលិចបានធ្វើជាម្ចាស់ផ្ទះយុទ្ធនាការនេះ ក្នុងឆ្នាំ1988 ពោលគឺរយៈពេល១ឆ្នាំ នៅមុនពេលជញ្ជាំងទីក្រុងប៊ែរឡាំង បានដួលរលំ៕
ប្រភពពី៖ Channel News Asia
September 28, 2018
Hamilton សម្លឹងរកការនាំមុខរបស់ខ្លួន តាមរយៈការឈ្នះការប្រណាំងនៅរុស្ស៊ី
ម្ចាស់ការពារតំណែងជើងឯក Lewis Hamilton និងក្រុម Mercedes នឹងសម្លឹងរកការបន្ថែមការគ្រប់គ្រងរបស់ពួកគេក្នុងព្រឹត្តិការណ៍ប្រណាំងរថយន្តជើងឯកពិភពលោក Formula 1 នៅឆ្នាំនេះ តាមរយៈការកត់ត្រាជ័យជម្នះជាលើកទី5 ក្នុងរយៈពេល5ឆ្នាំក្នុងការប្រណាំង Russian Grand Prix។
មិនមានក្រុមផ្សេងណាបានភ្លក្សរសជាតិនៃជ័យជម្នះមួយឡើយ បើគិតចាប់តាំងពីព្រឹត្តិការណ៍នេះ បានចាប់ផ្តើមនៅលើអតីតលានព្រឹត្តិការណ៍អូឡាំពិករបស់រុស្ស៊ីមួយនេះ កាលពីឆ្នាំ2014 ខណៈដែល Hamilton បានឈ្នះកាលពីឆ្នាំ2015 កីឡាករ Nico Rosberg បានឈ្នះកាលពីឆ្នាំ2016 ហើយ Valtteri Bottas បានឈ្នះកាលពីឆ្នាំមុន។
ស្របពេលដែលកំពុងតនាំមុខ 40ពិន្ទុលើកីឡាករ Sebastian Vettel របស់ក្រុម Ferrari ក្នុងការប្រជែងពាន Hamilton ដែលជាម្ចាស់ជើងឯកពិភពលោក 4សម័យកាល នឹងសម្លឹងរកការធ្វើដំណើរទៅកាន់ប្រណាំង6លើកចុងក្រោយនៃរដូវកាលនេះ ទាំងការជឿជាក់ ក្រោយពីបានកត់ត្រាជ័យជម្នះ4លើក ក្នុងចំណោមការប្រណាំង5លើកចុងក្រោយ។
ប៉ុន្តែ ទោះបីជាយ៉ាងណា លោក Toto Wolff ប្រធានក្រុម Mercedes បានធ្វើការប្រពានប្រឆាំងនឹងការជឿជាក់ពេក ខណៈដែលពួកគេឈានចូលដំណាក់កាលដ៏សំខាន់បំផុតនៃការប្រជែងយកពានពិភពលោក។ ការដណ្តើមបានជ័យជម្នះរបស់ Hamilton ក្នុងប្រទេសសិង្ហបុរី អាចនឹងធ្វើឲ្យរូបគេស្ថិតក្នុងទីតាំងដ៏មានប្រៀប ក្រោយពីរូបគេបានប្រើប្រាស់ល្បឿនដ៏អស្ចារ្យក្នុងការប្រណាំងដណ្តើមលេខរៀង។ ប៉ុន្តែ លោក Wolff បានសង្កត់ធ្ងន់ថា ក្រុមជាគូប្រជែង Ferrari នឹងក្លាយជាការគំរាមដ៏ធំបំផុតក្នុងរាល់ការប្រណាំងទាំងអស់។ ការប្រណាំងនៅថ្ងៃអាទិត្យនេះនឹងចាប់ផ្តើមនៅម៉ោង 6:10ល្ងាច៕
ប្រភពពី៖ Channel News Asia
September 28, 2018
វិធីសម្រកខ្លាញ់ក្បាលពោះ សម្រាប់អនាគតកូនកំលោះ ដោយវិធីទាំង5យ៉ាង
កុំថាតែនារីដែលត្រូវយកចិត្តទុកដាក់ខ្ពស់ចំពោះការថែរក្សាសម្ផស្ស និងរូបរាងកាយនៅមុនថ្ងៃរៀបការចូលមកដល់ សូម្បីតែបុរសក៏ត្រូវយកចិត្តទុកដាក់ដូចគ្នាដែរ។ ការត្រៀមខ្លួនមុនពេលរៀបការ ជារឿងសំខាន់ខ្លាំងណាស់ ក្នុងការផ្ដល់នូវកម្លាំងចិត្តដល់ខ្លួនឯង។ បុរសដែលមានក្បាលពោះធំៗ គួរតែសម្រកខ្លាញ់ចេញខ្លះ ដើម្បីធ្វើឱ្យរូបរាងរបស់អ្នកស្រស់សង្ហាឡើងនៅថ្ងៃពិសេសរបស់អ្នកមកដល់។ មិនចំណាយពេលច្រើននោះទេ វិធីទាំង5យ៉ាងនេះនឹងប្រាប់លោកអ្នកពីការសម្រកខ្លាញ់ពីរាងកាយ និងខ្លាញ់ក្បាលពោះបានយ៉ាងមានប្រសិទ្ធភាព និងលឿនបំផុត។
1. ចៀសវាងគ្រឿងស្រវឹង និងភេសជ្ជៈផ្អែមៗ
ចំណុចដែលប្រសើរបំផុតគឺងាកមកទទួលទានទឹកសុទ្ធ ឬទឹករ៉ែ ដែលជួយបំពេញជាតិទឹកនៅក្នុងរាងកាយ និងជួយបណ្ដេញសារធាតុពុលនៅក្នុងរាងកាយផងដែរ។ ទឹក ជួយធ្វើឱ្យស្បែកមានសំណើម ការទទួលទានទឹកក្នុងមួយថ្ងៃ 8កែវ ឬទទួលទានតាមរយៈការចែកទម្ងន់ខ្លួននឹង2 បានធ្វើឱ្យរាងកាយទទួលបានជាតិទឹកមកបំពេញគ្រប់គ្រាន់ ដែលជាហេតុនាំឱ្យមានសុខភាពល្អ។ ក្រៅពីទឹកសុទ្ធហើយនោះ លោកអ្នកក៏អាចទទួលទានដូចជា ទឹកក្រូចឆ្មារ ទឹកក្រូចស្រស់ ឬទឹកឌីថក់ (Detox Water) ក៏បាន។
2. បន្ថយបរិមាណអាហារ តែអាចទទួលទានញឹកញាប់
អ្នកជំនាញខាងផ្នែកសម្រកជាតិខ្លាញ់បានប្រាប់ថា បុរសគួរតែទទួលទានបន្លែផ្លែឈើឱ្យបានច្រើនជាងសាច់ពណ៌ក្រហម។ ការទទួនទានអាហារ3ពេលក្នុងមួយថ្ងៃ គឺជារឿងត្រឹមត្រូវ តែមិនអាចជួយដល់ការសម្រករាងបាននោះទេ។ លោកអ្នកអាចបន្ថយបរិមាណអាហារ តែទទួលទានឱ្យបានញឹកញាប់ហើយងាកមកទទួលទានដូចជា ផ្លែឈើ សណ្ដែកបន្លែស្រស់ ឬអាហារសម្រន់ដែលជាប្រភេទគ្រាប់ធញ្ញជាតិ ស្រូវសាលី បន្លែអន្លក់ និងផ្លែប៉ោមជាដើម។
3. ទទួលទានទឹកបន្លែជំនួសអាហារជាតិខ្លាញ់
ក្រុមអ្នកជំនាញបានផ្ដល់អនុសាសន៍ឱ្យប្រើប្រាស់ទឹកបន្លែឆៅមួយចំនួន ដែលអាចជួយអ្នកក្នុងការសម្រកទម្ងន់បានយ៉ាងរហ័សដូចជា៖
ទឹកត្រសក់ : អាចជាទឹកត្រសក់ស្រស់កិនភ្លាមៗ ឬក្លាស្សេឱ្យត្រជាក់ក៏បាន។ វាដើរតួនាទីយ៉ាងសំខាន់ ជាប្រភេទថ្នាំបញ្ចុះទឹកនោមបែបធម្មជាតិមួយ ដែលយកជាតិពុល និងកោសិកាខ្លាញ់ចេញពីរាងកាយបានយ៉ាងល្អ។ ទឹកត្រសក់ជួយបំបែកជាតិខ្លាញ់ ដែលមានទំហំធំៗបាន ដោយធ្លាក់ចុះទៅជាបំណែកតូចៗតាមរយៈទឹកនោម។ វាបានជួយបង្កើនល្បឿនក្នុងការរំលាយអាហាររបស់រាងកាយ និងជួយក្នុងការសម្រកទម្ងន់។
ទឹកការ៉ុត : គឺជាប្រភពដ៏ល្អនៃរបបអាហារជាតិសរសៃ។ ការកើនឡើងនៃកម្រិតអាហារកាក់សរសៃ វាបានជំរុញកម្រិតខ្ពស់នៃអ័រម៉ូន Testosterone ដែលជួយកាត់បន្ថយជាតិខ្លាញ់ក្នុងរាងកាយ។ ការទទួលទានទឹកការ៉ុតធម្មតាមិនត្រឹមតែអាចជួយក្នុងការសម្រកទម្ងន់ក្នុងអត្រាលឿនជាងមុននោះទេ តែថែមទាំងជួយពង្រឹងយន្តការការពារខ្លួនរបស់រាងកាយទៀតផង។ ការទទួលទានទឹកការ៉ុត បន្ទាប់ពីហាត់ប្រាណជារៀងរាល់ថ្ងៃរួច អាចជួយឱ្យអ្នកមិននឹកឃ្លានអាហារខុសពេលរហូតដល់ម៉ោងអាហារថ្ងៃត្រង់។
ទឹកស្ពៃក្តោប : គឺជាបន្លែដែលមានកាឡូរីទាបបំផុត។ នេះគឺជាផ្នែកមួយនៃទឹកផ្លែឈើ បន្លែដែលល្អបំផុតសម្រាប់ការសម្រកទម្ងន់ វាមាន16កាឡូរី វាមានកម្រិតខ្ពស់នៃជាតិសរសៃ និងអាចរក្សាទុកបានយូរសម្រាប់ការទទួលទាននៅពេលក្រោយ។
ទឹកម្រះ : ទោះបីជាយើងដឹងពីប្រភេទបន្លែបៃតង គឺល្អសម្រាប់សុខភាព តែទឹកម្រះ មិនមែនជាអ្វីដែលមនុស្សភាគច្រើនចង់ទទួលទាននោះទេ។ ទោះជាយ៉ាងណា វាមានសារធាតុប្រឆាំងអុកស៊ីតកម្ម ដែលមានវត្តមាននៅក្នុងទឹកភេសជ្ជៈនេះធ្វើឱ្យរាងកាយរបស់អ្នកនឹងប្រសើរឡើងក្នុងការរំលាយអាហារ ជួយបង្កើនការរំលាយអាហារ ជំរុញការបញ្ចុះទម្ងន់ និងបង្ការការប្រមូលផ្តុំនៃកោសិកាជាតិខ្លាញ់ដែលលើសនៅក្នុងរាងកាយ។
ទឹកប្រទាលកន្ទុយក្រពើ : អាចនឹងមិនមានរសជាតិល្អបំផុតនោះទេ តែវាផ្តល់នូវប្រសិទ្ធភាពបានឆាប់រហ័ស បន្ទាប់ពីការទាត់បាល់ ដើម្បីជួយរំលាយអាហាររបស់អ្នកបានលឿន។ ការទទួលទានទឹកប្រទាលកន្ទុយក្រពើឱ្យបានទៀងទាត់ មិនត្រឹមតែរួមចំណែកដល់ការសម្រកទម្ងន់ប៉ុណ្ណោះទេ ប៉ុន្តែថែមទាំងផ្តល់ឱ្យអ្នកនូវសក់មានសុខ-ភាពល្អ និងស្បែកស្រស់ស្អាតថែមទៀតផង។
4. ទទួលទានអាហារដែលសម្បូរទៅ
ដោយសារធាតុអូមេហ្គា3រាងកាយមិនអាចផលិតសារធាតុអូមេហ្គា3បានទេ ដូច្នេះអ្នកត្រូវតែទទួលទានអាហារ ដែលមានសារធាតុនេះ។ អាស៊ីតខ្លាញ់នេះអាចជួយបំបែកជាតិខ្លាញ់នៅក្នុងរាងកាយបានយ៉ាងល្អ។ យោងតាមវិទ្យាស្ថានសុខភាពជាតិបានឱ្យដឹងថា ខ្លាញ់ត្រីក៏អាចជួយកាត់បន្ថយកម្រិតជាតិស្ករនៅក្នុងឈាមបានដែរ។ ជាតិស្ករក្នុងឈាមខ្ពស់ផលិតអាំងស៊ុយ-លីន ដែលធ្វើឱ្យពិបាកក្នុងការចំហេះជាតិខ្លាញ់។ សារធាតុអូមេហ្គា3មាននៅក្នុងត្រីសាល់ឌីន, ត្រីសាល់ម៉ុន, ត្រីសំប៉ែត, គ្រាប់វាល់ណាត់, គ្រាប់កប្បាស និងកូនស្ពៃក្តោបតូច។
5. ហាត់ប្រាណជាប្រចាំ
ចំណាយពេលវេលាប្រហែល30-45នាទី ជារៀងរាល់ថ្ងៃ ដើម្បីធ្វើការហាត់ប្រាណយ៉ាងហោចណាស់3-4ថ្ងៃក្នុងមួយសប្ដាហ៍។ ត្រូវត្រៀមខ្លួនហាត់ប្រាណឱ្យបាន2ខែមុនថ្ងៃរៀបការចូលមកដល់។ ការហាត់ប្រាណកាច់ក្បាលពោះ បានបំបែកជាតិខ្លាញ់ និងជួយបណ្ដេញជាតិពុលចេញពីរាងកាយ ព្រមទាំងធ្វើឱ្យបែកញើសស្រួលខ្លួនថែមទៀតផង។ ចំណុចសំខាន់មួយទៀត លោកអ្នកត្រូវសម្រាកឱ្យបានគ្រប់គ្រាន់ផងដែរ។ ដូច្នេះនៅពេលគេងបានឆ្អែត រាងកាយនឹងដុតជាតិកាល់ឡូរីបានយ៉ាងច្រើននៅពេលភ្ញាក់ឡើង ហើយក៏ជួយដល់ការរំលាយអាហារបានយ៉ាងល្អប្រសើរផង។ ត្រូវចាំថា ជាតិកាល់ឡូរីច្រើនគឺជាប្រភពធ្វើឱ្យកើនសារធាតុខ្លាញ់នៅក្បាលពោះ៕
September 28, 2018
ម៉ានិត ជោគជ័យបើកសម្ពោធស្នាដៃពីរ អាល់ប៊ុមចម្រៀង « សមុទ្រ » និងសៀវភៅប្រលោមលោករឿង « កូនទី ៦ »
តារាចម្រៀង និងជាអ្នកនិពន្ធសៀវភៅវ័យក្មេងមួយរូបគឺលោក ម៉ុង ម៉ានិត កំពុងតែជោគជ័យខ្លាំង ដោយការនិពន្ធសៀវភៅរឿងដូចជា «បេសកម្មមួយ» «ផ្ទះកណ្តាលបឹង» ជាដើម សុទ្ធសឹងតែទទួលបានការគាំទ្រខ្លាំងពីសំណាក់ ប្រិយមិត្តទស្សនិកជន ជាពិសេសមិត្តៗយុវវ័យ ។ យ៉ាងណាមិញ បន្ទាប់ពីខកខានមិនបាន បញ្ចេញអាល់ប៊ុមចម្រៀង អស់រយៈពេលជាច្រើនឆ្នាំរួចមក ពោលគឺរយៈពេលបីឆ្នាំមកហើយ នៅទីបំផុត ម៉ានិត ក៏បានត្រឡប់មកជាថ្មី ជាមួយនឹងការបញ្ចេញនូវ អាល់ប៊ុមបទចម្រៀងទោល ដែលមានឈ្មោះថា «សមុទ្រ» កំពុងទទួលបានការចាប់អារម្មណ៍ខ្លាំង។
នៅក្នុងថ្ងៃសម្ពោធអាល់ប៊ុម « សមុទ្រ » និងសៀវភៅប្រលោមលោករឿង « កូនទី ៦ » នាថ្ងៃម្សិលមិញនេះ លោក ម៉ានិត បានប្រាប់អ្នកសារព័ត៌មានឡារ៉ែនថា នេះគឺជាស្នាដៃនិពន្ធចម្រៀង និងតន្ត្រីចុងក្រោយគេបង្អស់ បន្ទាប់ពីលោកបានផ្អាកពីសិល្បៈចម្រៀងអស់រយៈពេល 3 មកហើយ ដោយលោកចង់មានពេលវេលាសម្រាក និងស្វែងរកអត្តសញ្ញាណនៃការផលិតចម្រៀងរបស់លោក ឱ្យប្រកបដោយព្រលឹងនិងគុណភាពនៃចម្រៀងខ្មែរ។ លោកបានបន្ដទៀតថា ប៉ុន្មានឆ្នាំចុងក្រោយនេះ លោកបានងាកមកចាប់អារម្មណ៍និពន្ធរឿងប្រលោមជាច្រើនរឿង រហូតដល់ជក់ចិត្តស្ទើតែមិនចង់ដកខ្លួនបាន។ លោកក៏ជាតារាមួយដួង ដែលបានអភិវឌ្ឍន៍ខ្លួន ពីតារាចម្រៀងដ៏ល្បីល្បាញ ទៅជាអ្នកនិពន្ធសៀវភៅវ័យក្មេង ហើយមានកេរ្តិ៍ឈ្មោះល្បីខ្លាំងទៀតផង។
យ៉ាងណាមិញ នៅថ្ងៃសៅរ៍ ទី 29 ខែកញ្ញា ឆ្នាំ 2018 ក៏មានការប្រគំតន្រ្តីបើកឆាកអាល់ប៊ុកទោលរបស់តារាប្រុសរូបនេះផងដែរ ។ សូមជម្រាបថា ម៉ានិត ជាតារាចម្រៀងមួយដួង ដែលមានភាពល្បីល្បាញ និងតែងតែទទួលបានការគាំទ្រ ពីសំណាក់ទស្សនិកជន ពិសេសមិត្តៗយុវវ័យ ខណៈរាល់បទចម្រៀងរបស់លោក ភាគច្រើនសុទ្ធសឹង ជាបទមនោសញ្ចេតនាស្នេហាយុវវ័យ៕

September 28, 2018
ស្រ្តីជនភៀសខ្លួនខ្មែរ ដែលមានរូបថតល្បីល្បាញទូទាំងពិភពលោក និងមានរូបសំណាកនិមិត្តរូប បានមរណភាពហើយ
ស្រ្តីខ្មែរម្នាក់ដែលគេធ្លាប់ឃើញតាមរយៈរូបថតស្ត្រីបីកូនក្នុងទសវត្សរ៍ ឆ្នាំ1979 ក្នុងឈុតសំលៀកបំពាក់ពណ៌ខ្មៅ បីកូនក្នុងដៃ ឈរអមដោយកូនប្រុសស្រីនៅសង្ខាង ក្នុងទឹកមុខស្លេកស្លាំងស្គមស្គាំងគួរឲ្យសង្វេគនោះ បានទទួលមរណភាពហើយ ក្នុងជន្មាយុ៨៦ឆ្នាំ ដោយរោគាពាធ កាលពីថ្ងៃអង្គារ៍ 1រោច ខែភទ្របទ ឆ្នាំច សំរឹទ្ធិស័ក ព.ស2562 ត្រូវនឹងថ្ងៃទី25 ខែកញ្ញា ឆ្នាំ2018 នៅពែរីញើ ប្រទេសបារាំង។ នេះបើយោងតាមគណនីហ្វេសប៊ុករបស់ព្រះតេជគុណ ព្រះនាម Choothmuny Huy បង្ហោះកាលពីថ្ងៃទី27 ខែកញ្ញា ឆ្នាំ2018 ម្សិលមិញ។
បើតាមការបង្ហើបរបស់គណនី Yong Seng Yeath បានរៀបរាប់ថា ស្រ្តីជនភៀសខ្លួនខ្មែរ ឈ្មោះ⁣ តោង អូន នៅក្នុងរូបថតដ៏ល្បីល្បាញនៅក្នុងពិភពលោកនាឆ្នាំ (1979) គឺពេលនេះបានទទួលអនិច្ចកម្មហើយ កាលពីថ្ងៃទី 25/09/2018 ក្នុងជន្មាយុ ៨៦ ឆ្នាំ (Chemin du Sans Souci Boulazac , Perigueux, France)។ ក្មេងប្រុសដែលបីនោះឈ្មោះ សំណាង ( 39 ឆ្នាំ រស់នៅប្រទេសបារាំង) ។ ក្មេងប្រុសឈរនៅខាងឆ្វេងដៃ ឈ្មោះសារឿន (47ឆ្នាំ រស់នៅប្រទេសបារាំង) ។ក្មេងស្រីដែលឈរនៅស្ដាំដៃឈ្មោះ សុភាព(42 ឆ្នាំ រស់នៅប្រទេសបារាំង)។ ផ្ទាំថ្មចម្លាក់: ស្ថិតនៅរដ្ឋ ម៉ាស្សាជូសេត សហរដ្ឋអាមេរិក ។
សូមទស្សនារូបភាព និងរូបសំណាកខាងក្រោមនេះ៖
September 28, 2018
ក្រសួងវប្បធម៌ និងវិចិត្រសិល្បៈ នឹងបើកឱ្យសាធារណៈជនទូទៅចូលទស្សនា វត្ថុបុរាណ នៅអភិរក្សដ្ឋានអង្គរ ខេត្តសៀមរាប
តាមរយៈគេហទំព័រផ្លូវការណ៍របស់ក្រសួងព័ត៌មាន បានឱ្យដឹងថា លោក គឹម សុធិន ប្រធាននាយកដ្ឋានគាំពារ និងអភិរក្សសំណង់បុរាណ នៃក្រសួងវប្បធម៌ និងវិចិត្រសិល្បៈ បានឱ្យដឹងនាព្រឹកថ្ងៃទី25 ខែកញ្ញា ឆ្នំា2018 នេះថា ដើម្បីអបអរថ្ងៃប្រារព្ធខួបបេតិកភណ្ឌអឺរ៉ុប នាពេលខាងមុខនេះ ក្រសួងវប្បធម៌ និងវិចិត្រសិល្បៈ នឹងបើកទូលាយឱ្យសាធារណជនទាំងអស់ ចូលទស្សនា និងសិក្សាឈ្វេងយល់ពីវត្ថុបុរាណដែលត្រូវបានរក្សាទុកនៅអភិរក្សដ្ឋានអង្គរ នាថ្ងៃទី29 ខែកញ្ញា ឆ្នាំ2018 ខាងមុខនេះ ចាប់ពីម៉ោង 8ព្រឹក ដល់ម៉ោង 4រសៀល។
សូមគោរពអញ្ជើញទស្សនារូបភាពខាងក្រោមនេះ៖
September 28, 2018
នេះជាមូលហេតុដែល Steve Jobs សម្រេចបង្កើត iPhone ឡើង
ក្រុមហ៊ុនបច្ចេកវិទ្យាយក្សអាមេរិក Apple ទើបតែប្រកាសបង្ហាញ iPhone ជំនាន់ថ្មី 3ម៉ូដែលផ្សេងគ្នា គឺ iPhone Xs, Xs Max និង XR ដែលសុទ្ធសឹងតែជាកំពូលស្មាតហ្វូន ជាពិសេសគឺតម្លៃខ្ពស់ស្ទើរនឹកស្មានមិនដល់។
គិតមកដល់បច្ចុប្បន្នក្រុមហ៊ុន Apple បានបញ្ចេញលក់ iPhone ជាច្រើនលានគ្រឿង និងកំពុងតែល្បីល្បាញយ៉ាងខ្លាំងនៅក្នុងពិភពស្មាតហ្វូន និងស្ទើរតែគ្រប់គ្រងទីផ្សារបានទាំងមូល។ ទាំងនេះគឺជាគំនិតច្នៃប្រឌិត និងជាមរតកដ៏អស្ចារ្យរបស់លោក Steve Jobs បិតាស្ថាបនិក Apple និងជាអ្នកបង្កើត iPhone ផងដែរ។
តើលោកអ្នកមានដឹងទេថា ហេតុអ្វីបាន ជា Steve Jobs សម្រេចចិត្តបង្កើត iPhone ទាំងដែលលោកមិនដែលមានបំណងចង់បង្កើតវាឡើងផងនោះ?
យោងតាមសៀវភៅជីវប្រវត្តិរបស់ Steve Jobs ដែលសរសេរឡើងដោយលោក Walter Isaacson បានឱ្យដឹងថា លោកJobs បង្កើត iPhone ឡើងដោយសារតែលោកខឹងនឹងបុគ្គលិកម្នាក់របស់ក្រុមហ៊ុន Microsoft។ តើដើមចមនៃរឿងនោះយ៉ាងណាដែរ?
យោងតាមការបញ្ជាក់នៅក្នុងសៀវភៅជីវប្រវត្តិរបស់ Steve Jobs បានឱ្យដឹងថា នៅថ្ងៃមួយមានបុគ្គលិករបស់ក្រុមហ៊ុន Microsoft ម្នាក់បានអញ្ចើញលោកស្រី Laurene Powell ដែលត្រូវជាភរិយារបស់លោក Steve Jobs ទៅចូលរួមនៅក្នុងកម្មវិធីខួបកំណើតមួយនៅគេហដ្ឋានរបស់គេផ្ទាល់ដោយលោក Steve Jobs ក៏បានទៅចូលរួមជាមួយដែរ។ ខណៈដែលកម្មវិធីកំពុងតែសប្បាយរីករាយ បុរសដែលបម្រើការងារនៅក្នុងក្រុមហ៊ុន Microsoft បាននិយាយបែបឌឺដង និងចំអែចំអន់ដាក់ Steve Jobs ថា ក្រុមហ៊ុន Microsoft កំពុងតែបង្កើតឧបករណ៍មួយដ៏អស្ចារ្យប្រើ Touch Screen ដែលមិនទាន់មានក្រុមហ៊ុនណាផលិតឡើងនៅឡើយ ជាពិសេសគឺមិនភ្ជាប់មកជាមួយនូវប៊ិច (Stylus) ទៀតផង។
សំដីនោះបានធ្វើឱ្យ Jobs ខឹងយ៉ាងខ្លាំង និងថែមទាំងបាននិយាយទៅកាន់ភរិយាខ្លួនថា លោកនឹងធ្វើឱ្យគេ (បុគ្គលិកបម្រើការងារនៅ Microsoft) ស្គាល់ថា អ្វីទៅ ជាTablet ពិតប្រាកដ។ លុះព្រឹកឡើង Jobs បានទៅដល់ក្រុមហ៊ុន និងបានប្រកាសប្រជុំបុគ្គលិកកំពូលៗឱ្យផលិតឧបករណ៍ថ្មីមួយដែលប្រើ Touch Screen តែមិនប្រើប៊ិច និងប៊ូតុងឡើយដោយទុកពេលឱ្យ 6ខែ។
ថ្ងៃកំណត់បានមកដល់ ទីបំផុតក្រុមការងារបានបង្កើតឧបករណ៍ថ្មីដូចអ្វីដែល Jobs ចង់បានប៉ុន្តែឧបករណ៍នោះធំមិនដូច iPhone ឡើយ តែវាជា iPad។ ក្រោយពីសម្រេចចិត្តរួច Jobs បានកែប្រែឧបករណ៍នោះឱ្យទៅជា iPhone វិញ និងបានប្រកាសដាក់បង្ហាញនូវថ្ងៃទី29 ខែមិថុនា ឆ្នាំ2007 ដែលជាថ្ងៃកែប្រែប្រវត្តិសាស្ត្រសម្រាប់ Apple ហើយក៏ជាថ្ងៃចាប់ផ្ដើមនៃភាពជោគជ័យនៅលើទីផ្សារស្មាតហ្វូនផងដែរ៕
September 28, 2018
យុទ្ធសាស្ត្រច្បាស់លាស់ក្នុងការចែកចាយនឹងធ្វើឱ្យអាជីវកម្មរឹងមាំ
ការធ្វើអាជីវកម្ម និងជំនួញចាំបាច់ត្រូវមានស្តង់ដារច្បាស់លាស់ ពីព្រោះថា បើយើងធ្វើតាមគំរូល្អ វានឹងនាំឱ្យយើងល្អ និងមានស្តង់ដារល្អ បើយើងធ្វើតាមគំរូមធ្យម នឹងនាំឱ្យយើងទទួលបានស្តង់ដារមធ្យម និងមានស្តង់ដារកម្រិតមធ្យមដែរ។
ដូច្នេះជាទូទៅ មុននឹងសហគ្រិនបើកអាជីវកម្មពួកគាត់តែងតែមានផែនការអាជីវកម្មច្បាស់លាស់មានសហគ្រាសស្អាត និងមានស្តង់ដារល្អ ប៉ុន្តែក៏មិនត្រូវភ្លេចថា ផែនការទីផ្សារក៏សំខាន់ផងដែរដើម្បីជួយឱ្យពួកគាត់រក្សាអតិថិជន និងបង្កើនការលក់របស់ពួកគាត់បាន និងរឿងសំខាន់មួយទៀត គឺការចែកចាយផលិតផល បន្ថែមពីនេះផែនការម៉ាឃីតធីង(Maketing)គឺជាយុទ្ធសាស្ត្រដែលរួមបញ្ចូលទាំងតម្លៃ ភាពជាក់ស្តែង និងវត្ថុបំណងច្បាស់លាស់។ នេះជាការបញ្ជាក់របស់លោក សោម សម្បត្តិនាយកប្រតិបត្តិក្រុមហ៊ុនថ្នាំពណ៌ជាតិ(Cam-paint)។
ការរកស៊ីក៏ដោយ ធ្វើការក៏ដោយ ត្រូវមានគោលដៅច្បាស់លាស់ ហើយចំពោះការបើកអាជីវកម្មយុទ្ធសាស្ត្រចែកចាយ គឺជារឿងសំខាន់មួយក្នុងមុខរបរ និងត្រូវបានចាត់ទុកថាជាកិច្ចការដ៏សំខាន់នៅក្នុងក្រុមហ៊ុន។ អាជីវកម្មដែលកំពុងរកស៊ីត្រូវជំរុញការចែកចាយនេះឱ្យបានថេរដែលជាការរក្សាអតិថិជន និងរក្សាចំនួននៃការលក់ ដើម្បីឱ្យក្រុមហ៊ុនអាចឈរជើងលើទីផ្សារបាន។ យុទ្ធសាស្ត្រការចែកចាយទំនិញ ឬផលិតផលត្រូវបានបែងចែកជា 2ចំណុចសំខាន់៖
ទី1-យុទ្ធសាស្ត្របញ្ឈរៈ រៀបចំចែកចាយដោយខ្លួនឯង(ដូចជាគ្រប់ស្ថានីយប្រេងឥន្ធនៈ សុទ្ធតែក្រុមហ៊ុនប្រេងជាអ្នកធ្វើការចែកចាយដោយខ្លួនឯងទាំងអស់)
ទី2-យុទ្ធសាស្ត្របែងចែកបន្តៈ បើយើងមិនអាចជួលផ្ទះបើកសាខា ឬមិនចង់ឱ្យក្រុមហ៊ុនមានលក្ខណៈធំពេក ត្រូវឱ្យគេចែកចាយផលិតផលបន្តពីយើងទៅគ្រប់សាខា ដោយយើងចែកភាគរយនៃការចំណេញពោលគឺចែកគ្នាចំណេញទាំងអស់គ្នា។
សូមបញ្ជាក់ថា យុទ្ធសាស្រ្តក្នុងការចែកចាយ គឺជាការចែកចាយឆ្ពោះទៅរកលទ្ធភាពទទួលបានផលិតផល ឬភាពងាយស្រួលសម្រាប់អតិថិជនក្នុងការរកទិញផលិតផល។ យុទ្ធសាស្ត្រចែកចាយ ដែលពេញនិយមជាងគេគឺ ការចែកចាយទៅកាន់ដេប៉ូ ឬឈ្មួញកណ្ដាលឱ្យលក់បន្ត។ យុទ្ធសាស្រ្តធ្វើយ៉ាងណាដើម្បីឱ្យសាធារណជនបានមើលឃើញពីផលិតផលរបស់យើងបានគ្រប់ទីកន្លែងទាំងអស់។ ការធ្វើបែបនេះគឺជាការសម្រួលដល់អតិថិជនផងដែរ។
លោក សោម សម្បត្តិ បានបញ្ជាក់ថា ក្នុងយុទ្ធសាស្ត្រនៃការចែកចាយចាំបាច់ត្រូវមានធាតុផ្សំចំនួន 4ទៀតជាជំនួយ។
សោម សម្បត្តិ នាយកប្រតិបត្តិក្រុមហ៊ុនថ្នាំពណ៌ជាតិ(Cam-paint)
ទី1-រកអ្នកផ្គត់ផ្គង់៖ យើងត្រូវមានផលិតផលឱ្យល្អ។ មានន័យថា បើយើងផលិតខ្លួនឯងយើងត្រូវរកវត្ថុធាតុដើមដែលល្អ ដើម្បីយើងផលិតបានទំនិញ ឬផលិតផលដែលល្អ ព្រោះថា បើយើងមានផលិតផលល្អ និងមានអ្នកផ្គត់ផ្គង់ចែកចាយពូកែ ទើបទំនិញ ឬផលិតផលរបស់យើងលក់ដាច់។
ទី2-វិធីសាស្រ្តក្នុងការលក់៖ យើងមានផលិតផលល្អ យើងត្រូវការលក់ ព្រោះមានតម្រូវការ។ ជួនកាលយើងមានផលិតផលល្អមែន តែយើងលក់មិនបាន ព្រោះខ្វះទីផ្សារដើម្បីលក់។ ជួនកាលទៀត មានផលិតផលល្អហើយ តែយើងមិនចេះធ្វើទីផ្សារ ក៏ផលិតផលនោះមិនអាចលក់បានដែរ ដូច្នេះយើងត្រូវការមានក្រុមលក់ពូកែ និងវិធីសាស្ត្រលក់ដែលល្អ។
ទី3-ការគ្រប់គ្រងថវិកា៖ ត្រូវចេះគ្រប់គ្រងលុយកាក់ក្នុងនាមយើងជាសហគ្រិន មិនអាចថាមិនចេះគ្រប់គ្រងបានទេ។ បើមិនចេះត្រូវរៀន រៀនឱ្យមានចំណេះចេះគ្រប់គ្រងថវិកា។ បើយើងតាំងចិត្តហើយមិនអាចថាមិនចេះនោះទេ មិនចេះមកពីយើងមិនទាន់រៀន។ ការចេះគ្រប់គ្រងថវិកា ដើមទុន ប្រាក់ចំណូល-ចំណាយ-ចំណេញ គឺជារឿងសំខាន់សម្រាប់អាជីវកម្មមួយ។
ទី4-ធនធានមនុស្ស៖ អ្នកណាដែលត្រូវអភិវឌ្ឍ? គឺខ្លួនយើងហ្នឹងឯងដែលត្រូវពង្រឹងឱ្យខ្លាំង ព្រោះបើយើងខ្លាំង ធនធានមនុស្សពូកែៗនឹងមកធ្វើការជាមួយយើង។ បើយើងមិនខ្លាំង មិនល្អ គេមិនមកធ្វើការឱ្យយើងទេ។ ប្រសិនបើគេជាអ្នកខ្លាំង ក៏គេមិនមកធ្វើការឱ្យយើងដែរ។ ប៉ុន្តែនៅពេលដែលយើងខ្លាំងកូនចៅយើងក៏ប្រឹងប្រែងតាមយើងដើម្បីឱ្យខ្លួនគេខ្លាំងដែរ ពេលនោះទើបយើងមានក្រុមហ៊ុនមួយដែលខ្លាំងដែរ។
ប៉ុន្តែអ្វីដែលសំខាន់ជាងគេក្នុងដំណាក់កាលដំបូង អ្នកត្រូវស្គាល់ឱ្យបានច្បាស់ពីសេវាកម្ម ឬផលិតផលនៃអាជីវកម្មរបស់អ្នក។ បន្ទាប់មកអ្នកអាចបង្ហាញពីអត្ថប្រយោជន៍អ្វីខ្លះដែលអ្នកបានផ្តល់ឱ្យអតិថិជន ដូចជាតម្លៃដែលមានភាពខុសប្លែកពីដៃគូប្រកួតប្រជែងរបស់អ្នកជាដើម។ ការកំណត់គោលដៅអតិថិជនឱ្យបានច្បាស់លាស់ក៏ជារឿងសំខាន់។ មិនថាអាជីវកម្មរបស់អ្នកស្ថិតក្នុងវិស័យអ្វីនោះទេការលក់ផលិតផល ឬការផ្តល់សេវាកម្ម ត្រូវការការ-ស្វែងយល់ឱ្យបានច្បាស់ពីទីផ្សារ។ ដូចនេះ នៅក្នុងផែនការម៉ាឃីតធីងតម្រូវឱ្យអ្នកស្គាល់យ៉ាងលម្អិតពីទីផ្សាររបស់អ្នក ហើយអ្នកក៏ត្រូវយល់ឱ្យច្បាស់ពីភាពខុសប្លែករបស់គូប្រកួតប្រជែងរបស់អ្នកផងដែរ៕
September 28, 2018
អ្នកវិភាគថា កម្ពុជាគួរធ្វើពិពិធកម្មលើវិស័យផ្សេងទៀតដើម្បីរក្សាស្ថិរភាពសេដ្ឋកិច្ចយូរអង្វែង
ដើម្បីរក្សាកំណើនសេដ្ឋកិច្ចកម្ពុជាឱ្យបានឋិតថេរ និងយូរអង្វែងទៅមុខទៀត អ្នកវិភាគសេដ្ឋកិច្ចបានអះអាងថា កម្ពុជាគួរធ្វើពិពិធកម្មដោយបង្វែរទិសអភិវឌ្ឍន៍ទៅលើវិស័យមួយចំនួនទៀតឱ្យកាន់តែខ្លាំងឡើង ពិសេសវិស័យកសិកម្ម និងវិស័យទេសចរណ៍ ដែលជាវិស័យមានសក្តានុពលស្រាប់នៅក្នុងប្រទេសសមាជិកអាស៊ានមួយនេះ។
អ្នកវិភាគសេដ្ឋកិច្ចកម្ពុជាលោក ង៉ែត ជូ បានអះអាងថា ប្រសិនបើគេធ្វើការអង្កេតមើលក្នុងរយៈពេលខ្លី ឬរយៈពេលមធ្យមទៅមុខទៀត ឃើញថាវិស័យកាត់ដេរសម្លៀកបំពាក់ និងស្បែកជើង វិស័យធនាគារ វិស័យអចលនទ្រព្យ និងសំណង់នៅតែមានសក្តានុពលនៅឡើយ ខណៈដែលវិនិយោគិនបរទេសពិសេសជនជាតិចិនចូលមកវិនិយោគច្រើនលើសលប់ លើវិស័យទាំង2 នៅរយៈពេលប៉ុន្មានឆ្នាំចុងក្រោយនេះ ប៉ុន្តែប្រសិនជាគេសង្កេតមើលក្នុងរយៈពេលវែងឃើញថា វិស័យនេះហាក់មានភាពមិនទៀងទាត់ ដោយសារការនាំចេញទំនិញផ្សេងៗពិសេសផលិតផលឧស្សាហកម្មកាត់ដេរ សម្លៀកបំពាក់ ស្បែកជើង និងអង្ករជាដើម ទៅកាន់ទីផ្សារសហគមន៍អឺរ៉ុបមានភាពមិនទៀងទាត់ ឬកម្ពុជាត្រូវផុតកូតានាំចេញណាមួយ ហើយវិស័យសំណង់ក៏អាចនឹងកើនឡើងដល់ចំណុចកំពូលដែរ ដែលធ្វើឱ្យវិស័យទាំង2 នេះមានភាពថមថយចុះបន្តិចម្តងៗក្នុងរយៈពេលវែងទៅថ្ងៃអនាគត។ ករណីនេះលោកបានស្នើដល់រដ្ឋាភិបាលគួរតែធ្វើពិពិធកម្ម និងអភិវឌ្ឍន៍វិស័យផ្សេងមួយចំនួនទៀត ដើម្បីរក្សាស្ថិរភាពយូរអង្វែង ពិសេសវិស័យកសិកម្ម និងវិស័យទេសចរណ៍ដែលមានសក្តានុពលយូរអង្វែងស្រាប់ សម្រាប់ជួយជ្រោមជ្រែងសេដ្ឋកិច្ច នៅពេលដែលវិស័យកាត់ដេរ និងសំណង់មានការថមថយចុះក្នុងរយៈពេលវែងទៅថ្ងៃអនាគត។ លោកថា រដ្ឋាភិបាលគួរធ្វើការអភិវឌ្ឍវិស័យកសិកម្មឱ្យកាន់តែរីកចម្រើនខ្លាំងថែមទៀត ដើម្បីចែកចាយផលិតផលនៅលើទីផ្សារក្នុងស្រុកឱ្យបានកាន់តែច្រើន កាត់បន្ថយការនាំចូល និងនាំផលិតផលរបស់កម្ពុជាទៅកាន់ទីផ្សារអន្តរជាតិឱ្យបានកាន់តែច្រើនផងដែរ។
លោក ង៉ែត ជូ អ្នកវិភាគសេដ្ឋកិច្ចកម្ពុជា
ផ្អែមតាមរបាយការណ៍ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក3 បានព្យាករថាកំណើនសេដ្ឋកិច្ចកម្ពុជានៅឆ្នាំ2018នឹងកើនឡើងលើសពី 7ភាគរយខណៈដែលធនាគារអភិវឌ្ឍន៍អាស៊ី(ADB) រកឃើញថា មានកំណើនត្រឹមតែ7% ប៉ុណ្ណោះ។
លោកបណ្ឌិត Seung Hyun Hong អ្នកឯកទេសនាំមុខរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក3 ដែលហៅកាត់ថា AMRO បានមានប្រសាសន៍ថា សេដ្ឋកិច្ចកម្ពុជានៅតែរក្សាបានកំណើន7.2% នៅឆ្នាំ2018 ពោលគឺកើនឡើងខ្ពស់ជាងអត្រា7% កាលពីឆ្នាំ2017 ដែលបានមកពីការរីកចម្រើនរបស់វិស័យសំណង់ វិស័យកាត់ដេរ និងវិស័យទេសចរណ៍នៅកម្ពុជា។ របាយការណ៍ដែលចេញផ្សាយកាលពីពាក់កណ្តាលខែកញ្ញា បានគូសបញ្ជាក់ថា ដោយសារមានកំណើនសេដ្ឋកិច្ចនេះ បានធ្វើឱ្យរដ្ឋាភិបាលអាចបង្កើនការចំណាយសាធារណៈទៅលើប្រាក់បៀវត្សរ៍របស់មន្ត្រីសាធារណៈកាន់តែច្រើនឡើង។
យ៉ាងណាក៏ដោយ ប្រទេសកម្ពុជាមានអត្រាអតិផរណាបានកើនឡើងដល់3.1% នៅឆ្នាំ2018 ដោយសារតែតម្លៃថាមពល។ ហើយដើម្បីដោះស្រាយបញ្ហានេះ លោកបានផ្តល់អនុសាសន៍ឱ្យប្រទេសកម្ពុជាត្រូវការពង្រឹងគោលនយោបាយក្នុងកំណែទម្រង់រចនាសម្ព័ន្ធស្ថិរភាពហិរញ្ញវត្ថុ និងផ្តល់អាទិភាពលើធនធានសាពើរពន្ធឆ្ពោះទៅរកការចំណាយដែលលើកកម្ពស់កំណើនដើម្បីរក្សាកំណើនសេដ្ឋ-កិច្ចដ៏រឹងមាំ។ ដោយឡែកបំណុលសាធារណៈពីក្រៅប្រទេសនៅតែគ្រប់គ្រងបានល្អប្រសើរ ដែលបានឆ្លុះបញ្ចាំងពីលំហូរវិនិយោគពីបរទេសកើនឡើងខ្ពស់ជាងឱនភាពថវិកាចរន្ត។
ជាលទ្ធផលទុនបម្រុងអន្តរជាតិបានកើនឡើងដល់ 10ពាន់លានដុល្លារនៅចុងឆ្នាំ2018 នេះបើប្រៀបធៀបនឹងរយៈពេលដូចគ្នាកាលពីឆ្នាំ2017 ដែលមានត្រឹមតែ 8ពាន់8រយលានដុល្លារ។ ចំពោះស្ថានភាពវិស័យហិរញ្ញវត្ថុវិញ គឺនៅរក្សាបានភាពរឹងមាំដោយបានអនុវត្តបទប្បញ្ញត្តិនានា ព្រមទាំងការកំណត់ដើមទុនអប្បបរមាថ្មី និងអត្រាសន្ទនីស្សន៍ បានជួយឱ្យមានភាពប្រសើរឡើងនៃវិស័យហិរញ្ញវត្ថុ ប៉ុន្តែកម្ពុជាត្រូវការបន្តកំណែទម្រង់បទប្បញ្ញត្តិនានា ដើម្បីស្របទៅតាមស្តង់ដារអន្តរជាតិ។
ចំពោះកំណើនសេដ្ឋកិច្ចដែលមានតួលេខខុសគ្នារវាងADB 7% និងAMRO 7.2% សម្រាប់ឆ្នាំ2018នេះ ត្រូវបានអ្នកវិភាគអះអាងថា គ្រាន់តែជាតួលេខលម្អៀងប៉ុណ្ណោះ មិនមានអ្វីគួរភ្ញាក់ផ្អើលនោះទេ ដោយសាររបាយការណ៍ស្រាវជ្រាវធ្វើឡើងទៅតាមប្រភពផ្សេងៗគ្នា លុះត្រាតែខុសគ្នា 0.5% ឡើងទៅទើបបង្កឱ្យមានការភ្ញាក់ផ្ញើល និងមិនអាចទទួលយកបាន សរុបទៅរបាយការណ៍របស់ស្ថាប័នទាំង2 នេះ សុទ្ធតែអាចទទួលយកបានទាំងអស់៕
September 28, 2018
អ្នកលេងបណ្ដាញសង្គមផ្ទុះការរិះគន់ឈុតតំណាងជាតិខ្មែរក្នុងកម្មវិធី Mister Grand International 2018
តាមរយៈបណ្ដាញសង្គមហ្វេសប៊ុក គេបានមើលឃើញថា Mister Grand International 2018 ដែលទើបបញ្ចប់មុននេះនៅក្នុងប្រទេសថៃ មិនដឹងថាបេក្ខភាពតំណាងឱ្យប្រទេសកម្ពុជា គឺលោក Greg Gregg Dalde ត្រូវបានជ្រើសចេញពីប្រភពណានោះឡើយ ប៉ុន្តែបែឃើញវត្តមានរបស់លោកតំណាងអោយជាតិខ្មែរទាំងមូលនៅក្នុងកម្មវិធីទៅវិញ ជាហេតុបណ្ដាលឱ្យមហាជនខ្មែររិះគន់ និងប្រតិកម្មខ្លាំងបំផុត ដោយឡើកលើងថា មិនដឹងជាឈុតក្នុងរចនាបទអ្វីឱ្យពិតប្រាកដ ទោះកែច្នៃក៏មិនត្រូវ។
អ្នកលេងហ្វេសប៊ុកជាច្រើន បានប្រតិកម្មចំពោះការចូលប្រកួតរបស់បេក្ខភាពតំណាងឱ្យប្រទេសកម្ពុជាខាងលើ ដោយម្នាក់ៗបានចោទសួរថា តើឈុតតំណាងខ្មែររបស់លោក Greg Gregg Dalde ស្រង់ចេញពីណា? បើក្បិនមិនចំក្បិន មកុដក៏មិនចំមកុដ តើនោះជាជនជាតិអ្វីឱ្យពិតប្រាកដ? ជាពិសេសក្នុងពេលដែលឈុតតំណាងជាតិរបស់គេសុទ្ធតែមានរចនាបទឆ្លុះបញ្ចាំងពីជាតិគេ ប៉ុន្តែអ្នករៀបចំឈុតឱ្យបេក្ខភាពខ្មែរ គឺធ្វើឈុតឱ្យដូចបាយឡុកបាយឡ ដែលអ្នករិះគន់ចោទថា គឺបណ្ដាលមកពីក្រសួងពាក់ព័ន្ធខ្វះប្រសិទ្ធិភាពចាត់ការចំពោះក្រុមហ៊ុនដែលយកឈ្មោះកម្ពុជាទៅជាន់ឈ្លី។
គួរបញ្ជាក់ផងដែរថា ការពិតណាស់ គេមិនបានដឹងប្រភពបុរសឈ្មោះ Greg Gregg Dalde ដែលត្រូវបានគណកម្មការជ្រើសឱ្យឈរឈ្មោះជាតំណាងកម្ពុជា មានប្រភពមកពីណាទេ មិនទាំងចេះខ្មែរមួយម៉ាត់ ថែមទាំងស្លៀកឈុត ប្រពៃណីខ្មែរ មិនដឹងជាស្អីៗ ដែលមិនខុសពីយកមុខខ្មែរទៅបំបាក់លើឆាកអន្តរជាតិ។ អ្នកលេងបណ្ដាញសង្គមបានទទូចឱ្យក្រសួងពាក់ព័ន្ធមានវិធានការចំពោះរឿងនេះ ប្រសិនបើនៅតែបណ្ដោយឱ្យក្រុមហ៊ុនឯកជន បន្តរំលងចំណាត់ការទៀតនោះ ហើយប្រើឈ្មោះកម្ពុជាដោយយកបេក្ខជនប៉ាតណាប៉ាតណី ហើយថែមទាំងច្នៃឈុតឱ្យស្លៀកមិនត្រូវរចនាបទខ្មែរ ប្រាកដណាស់នឹងនាំឱ្យកម្ពុជាបាក់មុខលើឆាកអន្តរជាតិ៕
September 28, 2018