Category: សង្គម និងសេដ្ឋកិច្ច

តំបន់ជ្រោយចង្វារនឹងក្លាយជាទីក្រុងរណប Smart City មុនគេក្នុងប្រទេសកម្ពុជា
ក្រុមហ៊ុនសំណង់ធំជាងគេនៅកម្ពុជា OCIC បានប្រកាសបោះទុនវិនិយោគក្នុងទឹកប្រាក់ជាង 3,000លានដុល្លារអាមេរិក ដើម្បីបង្កើតទីក្រុងរណបជ្រោយចង្វារអភិវឌ្ឍន៍ជាទីក្រុងពាណិជ្ជកម្ម និងជាទីក្រុង Smart City មុនគេនាពេលអនាគតឆាប់ៗខាងមុខ។
លោក ទូច សំណាង អគ្គនាយករងក្រុមហ៊ុន OCIC បានមានប្រសាសន៍ឱ្យដឹងថា ទីក្រុងនេះនឹងរៀបចំឡើងតាមបែប Smart City ដោយប្រព័ន្ធហេដ្ឋារចនាសម្ព័ន្ធត្រូវបានរៀបចំជាពិសេស ដូចជាខ្សែភ្លើងនឹងត្រូវកប់នៅក្រោមដីទាំងអស់ អំពូលភ្លើងនឹងប្រើប្រាស់ប្រភេទអំពូល LED មានការបំពាក់កាមេរ៉ាសុវត្ថិភាព និងប្រព័ន្ធទឹកកខ្វក់ទាំងអស់ដែលចេញពីទីក្រុងនេះនឹងត្រូវឆ្លងកាត់ការចម្រោះឱ្យស្អាតទាំងអស់មុននឹងបង្ហូរចេញ។ លោកបន្តថា ការវិនិយោគទីក្រុងបែបស្មាតស៊ីធីនេះត្រូវចំណាយប្រាក់ច្រើន ប៉ុន្តែដើម្បីនិរន្តរភាពបរិស្ថាន និងភាពសុខសាន្ត ក៏ដូចជាផាសុកភាពរបស់ប្រជាពលរដ្ឋ គឺជាអ្វីដែលក្រុមហ៊ុន OCIC ត្រូវផ្តោតជាពិសេស។
អគ្គលេខាធិការរងនៃគណៈស្ថាបត្យករកម្ពុជា និងជាស្ថាបត្យករអាស៊ាន លោក ទួស សាភឿនបានមានប្រសាសន៍ថា ទីក្រុងឆ្លាតវៃតម្រូវឱ្យមានផែនការធំទូលាយសម្រាប់ទីក្រុងទាំងមូល មិនមែនត្រឹមតែជាទីក្រុងរណបនោះទេ។ ទីក្រុងឆ្លាតវៃគួរតែមានចន្លោះបៃតង ដូចជាសួនច្បារដែលព័ទ្ធជុំវិញអគារសាធារណៈ ដើម្បីឱ្យមនុស្សអាចសម្រាក និងទទួលបានខ្យល់អាកាសបរិសុទ្ធ។
លោកបានបន្ថែមថា ទីក្រុងឆ្លាតវៃអាចកើតឡើងបាន លុះត្រាតែមានមេដឹកនាំពូកែដែលធ្វើការលើផែនការមេដ៏ទូលំទូលាយក្នុងការអភិវឌ្ឍទីក្រុងពោល គឺមានផែនការមេតាមផ្លូវច្បាប់ច្បាស់លាស់ដែលគ្រប់គ្រងលើ ការប្រើប្រាស់ដី សំណុំបែបបទ ការរចនា ឬ ការប៉ុនប៉ងគ្រប់គ្រងលើការអភិវឌ្ឍទីក្រុងជាដើម។ តំបន់នីមួយៗត្រូវតែកំណត់ឱ្យបានច្បាស់ថា តំបន់ណាមួយជាតំបន់លំនៅឋាន ពាណិជ្ជកម្ម ឬឧស្សាហកម្មដែលនឹងអាចពង្រីកឱកាសនៅក្នុងការអភិវឌ្ឍទីក្រុង និងអាចជួយសម្រួលដល់ការរស់នៅរបស់ប្រជាជននៅក្នុងទីក្រុងកាន់តែប្រសើរឡើង។
តាមការព្យាកររបស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា គិតត្រឹមឆ្នាំ2030 ខាងមុខ ប្រជាជនជិត 8លាននាក់ត្រូវគេរំពឹងថា នឹងរស់នៅក្នុងទីក្រុង ហើយភាគច្រើននៃពួកគេនឹងមករស់នៅក្នុងទីក្រុងភ្នំពេញ។
ឯកឧត្តម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់មានប្រសាសន៍ពន្យល់ថា ការសាងសង់អគារធំៗ និងការគិតគូរពីបញ្ហាបរិស្ថានជាការងាររបស់យើង ដែលត្រូវផ្តោតការយកចិត្តទុកដាក់លើអ្វីដែលគេឱ្យឈ្មោះថា Smart City ព្រោះទីក្រុងបែបឆ្លាតវៃនេះទាមទារការគិតគូរច្រើនណាស់ ដើម្បីសម្រេចបាននូវស្តង់ដារទីក្រុងមួយដែលមានភាពទាក់ទាញ និងផ្តល់ភាពសុខសាន្តដល់ប្រជាពលរដ្ឋ។
លោកបានបន្តថា ការសាងសង់អគារត្រួវតែធ្វើឡើងដោយមានទីធ្លាបៃតង កន្លែងលេងកម្សាន្ត ការទាញយកពន្លឺព្រះអាទិត្យមកប្រើជំនួស ឬកាត់បន្ថយការប្រើប្រាស់ថាមពលអគ្គិសនី ការដាំដើមឈើក្នុងអគារ និងប្រព័ន្ធចម្រោះទឹកកខ្វក់ជាដើម។ ទាំងអស់នេះសុទ្ធតែជារឿងចាំបាច់ ដើម្បីធានានិរន្តរភាពនៃការអភិវឌ្ឍ ដោយត្រូវគោរពនូវពាក្យស្លោកដែលថា ការអភិវឌ្ឍត្រូវដើរទន្ទឹមគ្នានឹងការអភិរក្ស៕
October 1, 2018
អ្នកគាំទ្រក្ដុកក្ដួល !! ខេមរៈ ស្រីពៅ កំពុងវះកាត់ដ៏គ្រោះថ្នាក់មួយ
តាមរយៈបណ្ដាញសង្គមហ្វេប៊ុករបស់កំពូលតារាចម្រៀង លោកខេមរៈ សិរីមន្ត បានបង្ហោះរូបភាពប្អូនស្រីខ្លួន កញ្ញាខេមរៈ ស្រីពៅ កំពុងមានបញ្ហាជម្ងឺធ្ងន់ធ្ងរ និងកំពុងដេកសម្រាកព្យាបាលនៅលើគ្រែ កំពុងតែត្រៀមវះកាត់ជំងឺគ្រោះថ្នាក់មួយ។
បន្ថែមពីការរៀបរាប់ពីស្ថានភាពជម្ងឺរបស់ប្អូនស្រីរបស់លោក លោកខេមរៈ សិរីមន្ត បានបន្តសរសេរៀបរាប់ក្នុងបណ្តាញសង្គមហ្វេសប៊ុករបស់លោកថា៖ «ជាច្រើនឆ្នាំមកនេះប្អូនស្រីដ៏កម្សត់ម្នាក់នេះ មិនដែលចង់ឃើញ Fan ដែលគាំទ្រគាត់ពិបាកចិត្ត ព្រោះតែស្ថានភាពជំងឺរបស់គាត់ឡើយ គាត់ចង់ឃើញFan គាត់រីករាយគ្រប់ពេលវេលា តែក្នុងនាមខ្ញុំជាបងប្រុសរបស់គាត់ ចង់ប្រាប់បងប្អូនទាំងអស់គ្នាថានៅពេលខាងមុខនេះគាត់ត្រូវឆ្លងកាត់ការវះកាត់ដ៏គ្រោះថ្នាក់មួយ ខ្ញុំជាបងប្រុសជូនពរប្អូនឲ្យ ឆ្លងផុតពេលវេលាដ៏លំបាកនេះ បើបងប្អូនស្រលាញ់ និងគាំទ្រគាត់សូមជូនពរគាត់ឲ្យឆ្លងផុតគ្រោះនេះផង ដើម្បីគាត់មានសុខភាពល្អមកបំពេញការងារសិល្បៈវិញណា»។
បន្ទាប់ពីបានអាចសារមួយនេះហើយ បានធ្វើឱ្យអ្នកគាំទ្រជាច្រើនសម្តែងសេចក្តីអាណិតក្តុកក្តួល និងរន្ធត់ចិត្តជាខ្លាំង ដោយមិននឹកស្មានថានាងខំលាក់បាំងអ្នកគាំទ្រ ទាំងដែលខ្លួនមានជំងឺយ៉ាងធ្ងន់ធ្ងរបែបនេះ មិនអាចចូលសិល្បៈបាន។ សូមជម្រាបផងដែរថា មានអ្នកគាំទ្រជាច្រើននាក់ បានបួងសួង និងជូនពរតារាស្រីឱ្យឆាប់ជាសះស្បើយ៕
September 30, 2018
ឈុតតំណាងជាតិរបស់កញ្ញាឯកផែនដី «មាតាធម្មជាតិ» រចនាដកស្រង់ចេញពីទម្រង់នៃរូបចម្លាក់
តាមរយៈទំព័ររបស់ បវកញ្ញាផែនដី ឬ Miss Earth Cambodia បានឱ្យដឹងថា ឈុតសម្លៀកបំពាក់ប្រពៃណីជាតិរបស់កញ្ញាឯកផែនដីកម្ពុជា 2018 កញ្ញា កែវ សេងលីហួរ បានបង្ហាញរូបរាង និងត្រៀមខ្លួនទៅបង្ហាញនៅលើឆាកអន្ដរជាតិហើយ។
ប្រភពដដែលបានបន្ដថា ទម្រង់បែបបទនៃការរចនាសម្លៀកបំពាក់ប្រពៃណីជាតិដ៏ប្រណិតនេះ ត្រូវបានរចនាឡើងដោយ Madam Botiques Amy ក្រោមប្រធានបទ “មាតាធម្មជាតិ”។ ការរចនាត្រូវបានគ្របដណ្តប់នូវអត្ថន័យដ៏ជ្រាលជ្រៅ ដែលផ្តោតសំខាន់ទៅលើ និមិត្តរូបនៃក្តីសង្ឃឹម និង ការគោរពរបស់មនុស្សទូទាំងសកល។
ឈុតសម្លៀកបំពាក់ដ៏ល្អប្រណិតនេះ ត្រូវបានបំផុសគំនិតដកស្រង់ចេញពីទម្រង់នៃរូបចម្លាក់ ដែលត្រូវបានចារលើផ្ទាំងសិលានៃប្រសាទដ៏ល្បីល្បាញរបស់ព្រះរាជាណាចក្រកម្ពុជា។ រួមបញ្ជូលជាមួយនិងទ្រង់ទ្រាយក្បូរក្បាច់ដ៏ល្អអនេកនៃដើមឈើ ដែលត្រូវបានចារឆ្លាក់លើប្រាសាទអង្គរវត្ត ក៏ដូចជាទម្រង់នៃការរចនាតាំងពី ក្រោយសម័យអង្គរ សតវត្សន៍ទី15 បួករួមជាមួយគំនិតច្នៃប្រឌិត សហ័ស្សសម័យនៃស្នាដៃកូនខ្មែរនាពេលបច្ចុប្បន្ននេះ បង្កើតចេញជាឈុត “មាតាធម្មជាតិ” នេះឡើង។
គួរបញ្ជាក់ដែរថា បែនផែននៃការរចនាត្រូវបានប្រើប្រាស់នូវគំនិតកែច្នៃចេញពីវត្ថុធាតុដើមក្នុងស្រុក ដែលមានដូចជាសំពត់សូត្រ ផាមួង រួមជាមួយនិងការរចនាធ្វើដោយ ខ្មុក ដែលជាស្នាដៃរចនារបស់កូនខ្មែរយើងដែលមានជំនាញច្បាស់លាស់៕
September 29, 2018
ងិន ម៉ានីយ៉ា ចេញមុខប្រតិកម្មចំពោះព័ត៌មានកូនស្រី
ព័ត៌មានរូបភាពសិចស៊ីរបស់អតីត Freshie កញ្ញា ថៃ នារីសុជាតា (Fi yata) កូនស្រីលោកអនុរដ្ឋលេខាធិការក្រសួងវប្បធម៌ និងអ្នកស្រី ងិន ម៉ានីយ៉ា គេមើលឃើញថាកំពុងផ្ទុះកក្រើករឿងអាស្រូវសិចស៊ីបង្ហាញសាច់សខ្ចីពាសពេញបណ្ដាញសង្គម ស្របពេលដែរលោក ថៃ នរៈសត្យា បានចេញវិធានការពិន័យចំពោះតារាសិចស៊ីលើបណ្ដាញសង្គម។ យ៉ាងណាមិញ ក្រោយមានេព័ត៌មានអាស្រូវដល់កូនស្រីរបស់ខ្លួន អ្នកស្រី ងិន ម៉ានីយ៉ា បានបង្ហោះសារឆ្លើយតបទៅកាន់ពាក្យរិះគន់ ដោយអ្នកស្រីបានសរសេរថា៖
“សួស្ដីថ្ងៃសៅរ៍ទី29.09.2018 សួស្តីបងប្អូនប្រិយមិត្តទាំងអស់នៅក្នុងប្រទេសកម្ពុជានិងនៅក្រៅប្រទេសជាទីគោរពរាប់អាន ប៉ុន្មានថ្ងៃនេះខ្ញុំដូចជាឃើញគេជេរកូនខ្ញុំមិនចេះឆ្អែតសោះ។ អញ្ចឹងបានជាថាអំពើល្អគេមើលមិនសូវឃើញតែបើអំពើមិនគប្បីម្នាក់ម្នាក់ Share ដាច់ដៃចោល ហាហា មានទាំងអ្នកឆ្លៀតឱកាសតែៗស្ករៗអ្នកមិនដឹងខ្យល់អីក៏ត្រដរ Comment ដែរ។ តើអំពើល្អពួកអ្នកឯងដែលគាំទ្រដល់ថ្នាក់ហ្នឹងទេ? មានចាំក្មេងស្រីម្នាក់នេះទេ នៅពេលដែលតារាថៃផុសរូបកម្ពុជាអាក្រក់ មើលងាយកម្ពុជា។ តើមានអ្នកណាចេញមុខតតាំងឈ្លោះយកកិត្តិយសឲ្យប្រទេសកម្ពុជាមកវិញបាន ទាំងខ្លួនឯងកំពុងរស់នៅប្រទេសគេ តើពួកអ្នកមានដែល ផ្ដល់កម្លាំងចិត្តផ្ដល់កិត្តិយសដល់ក្មេងស្រីម្នាក់នេះទេ? គឺតិចណាស់ៗព័ត៌មានក្នុងស្រុកចុះផ្សាយ។ ពេលដែលកូនខ្ញុំត្រឡប់មកវិញពួកអ្នកឯងមានបានទៅអរសាទរនាងទេក្រៅពីខ្ញុំនិងគ្រួសារខ្ញុំប៉ុន្មាននាក់នេះ?ហើយខ្ញុំចង់សួរថាតើពួកអ្នកមានបើកភ្នែកមើលទេនេះកូនខ្ញុំស្លៀកហូលផាមួងទៅសំពះលោកនៅវត្តមានយកមកចុះផ្សាយទេ? តែសម្រាប់កូនខ្ញុំស្លៀកឈុតងូតទឹកនៅមាត់សមុទ្រ បែរជាអ្នកឯងយកមកចុះផ្សាយព្រោងព្រាត?ដើម្បីតែផលប្រយោជន៍ពួកអ្នកឯងហ៊ានវាយប្រហារក្មេងស្រីម្នាក់តើក្នុងក្បាលមានខួរជាមនុស្សទេ?
ខ្ញុំក៏អ្នកកាសែត សារព័ត៌មានម្នាក់ដែរតាំងពីពួកអ្នកឯងមិនទាន់កើតក្បាលមកម្ល៉េះ ពួកអ្នកឯងស្គាល់ ជំនាន់កាសែត 4 ទំព័រសខ្មៅ 2 សន្លឹកនោះទេ?? មានឈ្មោះថាភ្នំពេញថ្មី មិនស្គាល់ទេ ព្រោះអ្នកឯងមិនទាន់កើតមកនៅឡើយមែនទេ? ខ្ញុំស្គាល់វិជ្ជាជីវៈនេះច្បាស់លាស់ណាស់ ហើយក៏មិនយកវិជ្ជាជីវៈនេះទៅជាន់ឈ្លីនរណាម្នាក់ដើម្បីជាផលប្រយោជន៍ ខ្លួនឯងដែរហើយគ្រួសារមួយនេះក៏បានជួយប្រទេសនេះច្រើនដែរ។ សូមកុំឱ្យក្មេងមានអារម្មណ៍ថាស្អប់ប្រទេសខ្លួនឯងស្អប់ប្រជាជនខ្លួនឯងស្អប់ជាតិសាសន៍ខ្លួនឯង។ មានអ្នកខ្លះឆ្លៀតឱកាសពេលនេះសងសឹកនិង share សរសេរពាក្យបញ្ឈឺបញ្ឆិតបញ្ឆៀងព្រោះតែពួកគេធ្វើមិនបានផលប្រយោជន៍ពីកូនខ្ញុំ បោកក្មេងមិនបានមែនទេមនុស្សចាស់? ហើយមានអ្នកខ្លះថា កូនខ្ញុំមានកូនអត់ប្តី? អញ្ចឹងបានន័យថាអ្នកឯងមិនស្គាល់គ្រួសារខ្ញុំច្បាស់នៅឡើយទេកុំប្រកាច់ចេញមុខនិយាយផ្ដេសផ្ដាស កូនខ្ញុំរៀបការក្រាបក្បាលដល់កន្ទេលត្រឹមត្រូវ ទទួលភ្ញៀវ 100 តុនៅកោះពេជ្រគិតតែខ្លួនឯងវិញទៅសងគុណឪពុកម្ដាយហើយឬនៅតិចផើមអត់ប្ដីណា ហាហា។ អ្វីដែលចង់និយាយគឺមានច្រើនទៀតប៉ុន្តែខ្ញុំគិតថានិយាយត្រឹមប៉ុណ្ណេះសិនបានហើយចាំមើលបន្តទៀតបងប្អូនតើមានអ្វីន្លះទៀតខ្ញុំតបស្នងវិញទេ? អរគុណនិងស្វាគមន៍ចំពោះការ Like & Share Comment របស់បងប្អូន”៕
September 29, 2018
តារាសិល្បៈ ចុះចែកសម្ភារៈសិក្សាច្រើនពាន់ដុល្លារ ដល់សាលាដាច់ស្រយាលមួយ
បើទោះស្ថានភាពផ្លូវឆ្ងាយ និងពិបាក តែក្រុមតារាមហាហង្ស រួមមានអ្នកនាង ភិន សុដាលីស លោក អូន ឧស្សាហ៍ លោក ភឹម តារាវិបុល លោកសួន រ៉ានីរ៉ាស៊ីនី និងក្រុមការងារផលិត ក្រោមការកដឹកនាំរបស់លោក អ៊ិន សុភិន នៅតែបានទៅដល់ទីតាំងចែកអំណោយដែលស្ថិតនៅភូមិតាម៉ៅ ឃុំស្រក ស្រុកកំពង់សៀម ខេត្តកំពង់ចាម តាមការគ្រោងទុក នៅពីថ្ងៃទី29 កញ្ញា ដើម្បីទៅប្រគល់ជូននូវតុកៅអី និងសម្ភារៈសិក្សា ជូនដល់លោកគ្រូអ្នកគ្រូ និងសិស្សានុសិស្ស។ នេះជាការផ្ដល់ជូននូវអំណោយជាទ្រង់ទ្រាយធំ ដែលជាមូលនិធិរបស់ក្រុមមហាងហង្ស ជូនដល់សហគមន៍ដាច់ស្រយាល ប៉ុន្តែមិនមែនជាលើកទីមួយនោះទេ។
លោក អ៊ិន សុភិន និយាយថា ដោយសារតែមានសំណើរពីខាងសហគមន៍ដោយផ្ទាល់ សុំឱ្យផលិតកម្មមហាហង្សជួយបំពេញកង្វះខាតដល់សាលាបឋមសិក្សាតាម៉ៅ ដែលស្ថិតនៅភូមិឃុំខាងលើ ទើបលោក និងក្រុមការងារឈានដល់ការប្រគល់ជូននូវកញ្ចប់ថវិកាសម្រាប់ទិញជាតុកៅអី និងសម្ភារៈសិក្សាសរុបទឹកប្រាក់អស់ប្រមាណជាង 4ពាន់ដុល្លារ ដោយរាប់បញ្ចូលទាំងការផ្ដល់ជាអំណោយបន្ថែមនៅថ្ងៃចុះប្រគល់ផ្ទាល់ផង គឺអស់ប្រមាណជា 6ពាន់ដុល្លារ។ ថវិកាដែលបានប្រគល់ជូនជាកញ្ចប់នេះ បានពីការកាត់ផលចំណេញរបស់ផលិតកម្មមហាហង្ស និងមួយផ្នែកតូចបានពីការរួមចំណែកពីតារាសិល្បៈ និងពីសប្បុរសជននានា។ នេះជាលើកទីពីរហើយ ដែលមូលនិធិរបស់ផលិតកម្មមហាហង្សបានធ្វើអំណោយជាទ្រង់ទ្រាយច្រើនពាន់ដុល្លារក្នុងកិច្ចការសង្គម បន្ទាប់ពីលើកទីមួយ ក៏បានផ្ដល់ជូនដល់មណ្ឌលកុមារកំព្រាមួយកន្លែង។ យ៉ាងណាមិញ លោកថាខ្លួននឹងមានគម្រោងជួយដល់សាលាបឋមសិក្សាតាម៉ៅ បន្តទៀត ដើម្បីសម្រួលដល់ការលំបាកដែលសាលាជួបប្រទះ។
អ្នកនាង ភិន សុដាលីស និយាយថា ជាលើកទីមួយ ដែលអ្នកនាងបានបង្ហាញខ្លួនប្រគល់អំណោយមកកាន់តំបន់ដាច់ស្រយាល ហើយបានបានជួបជាមួយនឹងក្មេងៗដោយផ្ទាល់នៅក្នុងសហគមន៍។ តំបន់ដែលអ្នកនាងបានទៅដល់នេះ មានចម្ងាយឆ្ងាយពីទីប្រជុំជនយ៉ាងខ្លាំង ទើបអ្នកនាងសម្ដែងក្ដីបារម្ភ ប្រសិនបើក្មេងៗបានបញ្ចប់ការសិក្សាថ្នាក់ទី6ហើយ ហើយមិនមានលទ្ធភាពអាចទៅបន្តការសិក្សានៅទីរួមខេត្ត ដោយសារតែជីវភាព។ អ្នកនាងថាបើក្នុងតំបន់នោះ មានការអភិវឌ្ឍន៍អោយមានអនុវិទ្យាល័យ និងវិទ្យាល័យតែម្ដង នោះទើបជាការប្រសើរសម្រាប់ក្មេងៗ ដែលខ្វះលទ្ធភាពហើយមិនត្រូវការចេញឆ្ងាយពីតំបន់ដែលខ្លួនរស់នៅ។
បន្ថែមពីការប្រគល់តុកៅអី និងចែកជូននូវសម្ភារៈសិក្សាដល់លោកគ្រូអ្នកគ្រូ និងសិស្សក្មេងៗជាង200នាក់ ក្រុមតារាមហាហង្ស ក៏បាននិយាយលេងធ្វើឱ្យក្មេងៗបានសើចសប្បាយផងដែរ៕
September 29, 2018
ចិញ្ចឹមគោយកទឹកដោះ ទទួលបានប្រាក់ចំណេញច្រើនជាងចិញ្ចឹមគោយកសាច់
ការប្រកបរបរកសិកម្ម ឬការចិញ្ចឹមសត្វ ទាមទារឱ្យកសិករមានបច្ចេកទេស និងចេះបត់បែនតាមទីផ្សារ ទើបទទួលបានជោគជ័យលើការងាររបស់ខ្លួន។ ឧទាហរណ៍ដូចជាកសិករម្នាក់ ដោយមើលឃើញថា ទឹកដោះគោស្រស់មានតម្រូវការកាន់តែច្រើនឡើងៗ នៅលើទីផ្សារ បានធ្វើឱ្យគ្រួសារគាត់ផ្អាកចិញ្ចឹមគោយកសាច់ ហើយងាកមកចិញ្ចឹមគោយកទឹកដោះវិញម្តង ដោយទទួលបានប្រាក់ចំណេញកើនឡើងទ្វេដង។
លោកពូ យុន វុត្ថា កសិករចិញ្ចឹមគោយកទឹកដោះនៅក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញមានប្រសាសន៍ថា គ្រួសារលោកពូបានចាប់យករបរថ្មីតាមរយៈការចិញ្ចឹមគោយកទឹកដោះនេះអស់រយៈពេល 5ឆ្នាំមកហើយ ដែលធ្វើឱ្យជីវភាពបានធូរធារច្រើន រហូតអាចផ្គត់ផ្គង់កូនឱ្យរៀនបានខ្ពស់គ្រប់ៗគ្នា ហើយថែមទាំងសន្សំប្រាក់សង់ផ្ទះវីឡាស្រស់ស្អាតមួយសម្រាប់រស់នៅទៀតផង។
លោកពូមានប្រសាសន៍ថា ដើមឡើយលោកបានទិញគោញីចំនួន 1ក្បាលពីអង្គការដែលគេចិញ្ចឹមនៅក្បែរផ្ទះក្នុងតម្លៃ 1,500ដុល្លារ ហើយបានយកមកចិញ្ចឹមយកទឹកដោះសាកល្បងដំបូង។ គោមួយក្បាលនោះមានកូនមួយរួចហើយ ហើយត្រូវបានម្ចាស់ដើម(អង្គការ)កំពុងចិញ្ចឹមយកទឹកដោះស្រាប់ផងដែរ។ លុះពេលចិញ្ចឹមទៅ និងអនុវត្តតាមការណែនាំរបស់មន្ត្រីជំនាញអង្គការនោះ លោកក៏ទទួលបានជោគជ័យ ដោយទទួលបានផលទឹកដោះគោស្រស់លក់រាល់ថ្ងៃ ហើយខិតខំចិញ្ចឹមបន្តយកទឹកដោះគោស្រស់បណ្តើរ ថែបំប៉នឱ្យវាបង្កើតកូនឱ្យបានកាន់តែច្រើនបន្ថែមបណ្តើរៗទៀត រហូតដល់បានចំនួន 10ក្បាលមកទល់សព្វថៃ្ង ដោយក្នុងនោះមានញី 9ក្បាល និងគោឈ្មោលបង្កាត់ពូជតែ 1ក្បាលប៉ុណ្ណោះ។
លោកថា ការចិញ្ចឹមគោយកទឹកដោះមានភាពងាយស្រួលដូចការចិញ្ចឹមយកសាច់ដែរ ប៉ុន្តែគ្រាន់តែត្រូវចំណាយប្រាក់ទិញកន្ទក់អង្ករ និងកន្ទក់ពោតសម្រាប់ឱ្យវាស៊ីប្រចាំថ្ងៃ ដើម្បីបំប៉នកម្លាំងរបស់វា។ ក្នុងមួយថ្ងៃគោមួយក្បាលត្រូវស៊ីកន្ទក់អង្ករអស់ 2គីឡូក្រាម សម្រាប់ជំនួយសាច់ និងស៊ីកន្ទក់ពោត2គីឡូក្រាមផងដែរដើម្បីជំនួយឱ្យវាមានទឹកដោះច្រើន ដោយសរុបប្រាក់ចំណាយអស់ប្រមាណជា2ដុល្លារក្នុងមួយថ្ងៃ ប៉ុន្តែវាអាចផ្តល់ផលទឹកដោះមកវិញច្រើនដែរ ដោយក្នុងមួយក្បាលផ្តល់ទឹកដោះស្រស់ចំនួន 8លីត្រជារៀងរាល់ថ្ងៃ ដែលមានម៉ូយមកទិញជាប្រចាំរាល់ថ្ងៃដូចគ្នា ដោយលក់បោះដុំក្នុងមួយលីត្រថ្លៃ 1ដុល្លារ ប៉ុន្តែបើលក់រាយមួយលីត្រថ្លៃ 1.5ដុល្លារ ហើយមានប៉ុន្មានក៏ម៉ូយយកទាំងអស់ដែរ។
លោកពូ យុន វុត្ថា និងគ្រួសារ
លោកពូបានបន្តថា បច្ចុប្បន្នគ្រួសារលោកពូផលិតទឹកដោះគោមិនសូវបានច្រើនទេ ដោយសារមានគោចំនួនតែ 4ក្បាលប៉ុណ្ណោះដែលផ្តល់ទឹកដោះប្រចាំថ្ងៃ គោមួយចំនួនទៀតទើបនឹងកើតបានជាងមួយឆ្នាំ ដូច្នេះវាមិនទាន់អាចផ្តល់ទឹកដោះបានឡើយទើបជាហេតុធ្វើឱ្យការផ្គត់ផ្គង់ទឹកដោះគោមិនមានភាពទូលំទូលាយនៅលើទីផ្សារ បានត្រឹមតែលក់ឱ្យម៉ូយតែម្នាក់ប៉ុណ្ណោះ នៅផ្សារបឹងកេងកងសម្រាប់យកចែកចាយបន្ត និងមួយចំនួនទៀតលក់ឱ្យអ្នកស្គាល់គ្នា នៅក្នុងភូមិ ឬអ្នកភ្នំពេញមកទិញទុកហូបប្រចាំគ្រួសាររបស់គេ សម្រាប់ជំនួយកម្លាំងពិសេសជំនួយដល់ការលូតលាស់ឆ្អឹង និងធ្វើឱ្យឆ្អឹងឱ្យកាន់តែរឹងមាំ។
សម្រាប់គោបង្កាត់ពូជមកពីក្រៅប្រទេសនេះ វាមានសមត្ថភាពផ្តល់ទឹកដោះបានចំនួន 10ខែក្នុងមួយឆ្នាំ ដោយគិតចាប់ពីវាបង្កើតកូនបានមួយខែកន្លះគេអាចច្របាច់យកទឹកដោះរហូតដល់ 5ខែក្រោយហើយគេយកវាទៅដាក់បាសាជាថ្មី តែនៅតែអាចច្របាច់យកទឹកដោះបន្តបាន 5ខែទៀតទើបឈប់ដើម្បីឱ្យវាផលិតទឹកដោះឱ្យបានច្រើនទុកចិញ្ចឹមកូនក្នុងពោះរបស់វាម្តង និងរហូតទាល់តែវាបង្កើតកូនបានមួយខែកន្លះម្ដងទៀតទើបគេចាប់ផ្តើមច្របាច់យកទឹកដោះសាជាថ្មី។ កសិករខាងលើបន្តថា សម្រាប់ការចិញ្ចឹមគោជាលក្ខណៈគ្រួសារនេះគេមិនចាំបាច់ប្រើបចេ្ចកទេស ឬម៉ាស៊ីនច្របាច់យកទឹកដោះ ដូចកសិកដ្ឋានធំៗនោះទេ គឺគ្រាន់តែយកដៃច្របាច់បានហើយ ប៉ុន្តែត្រូវលាងសម្អាតជាមុនដែរដោយត្រូវសម្អាតទាំងដៃមនុស្ស សម្អាតទាំងដោះគោ ដើម្បីធានាថា វាគ្មានមេរោគឆ្លងទៅដល់អ្នកបរិភោគ។ សម្រាប់អ្នកបរិភោគភាគច្រើន គេយកទៅក្លាសេ្សឱ្យត្រជាក់ហើយទើបហូប ខ្លះទៀតយកទៅស្ទីមឱ្យឆ្អិនជាមុនសិនទើបហូបជាក្រោយ ប៉ុន្តែយកល្អ គួរយកទៅក្លាសេ្សឱ្យត្រជាក់បានហើយ ទើបវានៅរក្សាគុណភាពល្អ និងផ្តល់វីតាមីនបានខ្ពស់។
លោកពូ វុត្ថា បានបន្ថែមទៀតថា ដោយសារគោពូជថ្មីដែលគេយកពីស្រុកក្រៅមកបង្កាត់ជាមួយពូជគោក្នុងស្រុកនេះអាចមានសមត្ថភាពផ្តល់ទឹកដោះរាល់ថ្ងៃ ហើយអាចលក់សាច់បានទៀតនៅពេលដែលវាចាស់ទៅ។ នៅពេលគោចាប់ផ្តើមដោយឈ្មោលដំបូង គឺវាអាចផ្តល់ទឹកដោះបានហើយ តែនៅបានចំនួនតិចនៅឡើយ លុះដល់វាបានកូន2 ទើបវាមានទឹកដោះពេញលេញ ដោយគោមួយក្បាលអាចផ្តល់ទឹកដោះបាន 8លីត្រ ព្រឹក 4លីត្រ និងល្ងាច 4លីត្រហើយផ្តល់ទឹកដោះឱ្យរហូតដល់វាកូនលើកទី5 ឬកូនទី6 ទើបវាថយទឹកដោះទៅវិញបណ្តើៗ នៅពេលនោះគេអាចលក់វាចេញទៅឱ្យម៉ូយដែលទិញយកទៅកាប់សាច់លក់បានហើយ។
លោកពូបានរំឭកឱ្យដឹងថា ដើមឡើយលោកពូជាអ្នករត់ម៉ូតូឌុប រកចំណូលសឹងតែមិនគ្រប់ការចំណាយប្រចាំថ្ងៃផង ហើយដោយសារការចិញ្ចឹមគោយកទឹកដោះនេះហើយទើបធ្វើឱ្យគ្រួសារបានធូរធារពង្រីកមុខរបរបន្ថែម ដូចជាដាំផ្ការាសី ដាំត្របែកលក់ និងចិញ្ចឹមជ្រូកនៅក្បែរផ្ទះថែមទៀតដែលអាចរកចំណូលបានច្រើនគួរសមជាប្រចាំ មានលទ្ធភាពផ្គត់ផ្គង់ការសិក្សាកូនរហូតដល់រៀនចប់បាក់ឌុប និងចប់មហាវិទ្យាល័យ មានការងារធ្វើខ្លះៗហើយ និងថែមទាំងសន្សំលុយធ្វើផ្ទះវីឡាបាននៅថែមទៀត ហើយលោកពូរំពឹងថា ទៅថ្ងៃខាងមុខគ្រួសារលោកពូនឹងនៅតែចិញ្ចឹមគោយកទឹកដោះលក់ឱ្យបានកាន់តែច្រើនថែមទៀត ដើម្បីបន្ថែមចំណូលឱ្យបានកាន់តែច្រើនសម្រាប់ផ្គត់ផ្គង់ជីវភាពក្នុងគ្រួសារឱ្យកាន់តែប្រសើរឡើងទៀត៕
September 29, 2018
កត្តាអ្វីខ្លះដែលធ្វើឱ្យមនុស្សមានវិបត្តិផ្លូវចិត្តធ្ងន់ធ្ងរ?
ដោយសារតែការអប់រំនៅមានកម្រិតប្រជាជនកម្ពុជាត្រូវរស់នៅក្នុងសង្គមដែលហ៊ុមព័ទ្ធដោយបញ្ហាប្រឈមជាច្រើន មិនថាការសិក្សា ការធ្វើការងារ ការរកស៊ី ទំនាក់ទំនងក្នុងសង្គម ស្នេហា គ្រួសារ ឬការប្រើប្រាស់បច្ចេកវិទ្យាសុទ្ធតែអាចបង្កបញ្ហាស្មុគ្រស្មាញដែលនាំឱ្យមានវិបត្តិផ្លូវចិត្ត។
លោកសាស្រ្តាចារ្យវេជ្ជបណ្ឌិត យឹម សុបុត្រាឯកទេសវិកលវិទ្យា ប្រធានផ្នែកជំងឺផ្លូវចិត្ត និងបំពានដោយគ្រឿងញៀន នៃមន្ទីរពេទ្យមិត្តភាពកម្ពុជាសូវៀតបានលើកឡើងថា មានបញ្ហាច្រើនណាស់ក្នុងការរស់នៅដែលសុទ្ធតែនាំឱ្យមានជំងឺផ្លូវចិត្ត។ ពេលខ្លះទម្លាប់នៃការរស់នៅងាយៗប្រចាំថ្ងៃ ដែលយើងធ្លាប់ធ្វើដោយមិនដឹងខ្លួន សុទ្ធតែជាកត្តាដែលរុញច្រានឱ្យមានជំងឺផ្លូវចិត្ត ឬបញ្ហាធ្លាក់ទឹកចិត្តបាន។ កត្តាទាំងអស់នេះអាចធ្វើឱ្យប៉ះពាល់ដល់ការរស់នៅ ការធ្វើការងារ ការធ្វើអាជីវកម្ម និងអាចឈានរហូតដល់ក្លាយជាវិកលចរិត ឬសម្លាប់ខ្លួនថែមទៀតផង។ កត្តាសំខាន់ទី1 ដែលនាំឱ្យមានជំងឺផ្លូវចិត្តគឺ កត្តាសង្គមសាស្រ្ត ដែលកត្តានេះកើតចេញពីចំណុចខាងក្រៅខ្លួន មួយចំនួនដូចជា ការច្រណែននៅពេលអាណាព្យាបាលមិនបានទិញសម្ភារឱ្យស្មើគ្នា ការបាត់បង់លុយកាក់ពីការរកស៊ី ឬបាត់បង់ឱកាសល្អណាមួយ។
លោកវេជ្ជបណ្ឌិត យឹម សុបុត្រា បាននិយាយថា៖ “មានអ្នកខ្លះបាត់បង់លុយកាក់តិចតួច តែគាត់បែរជាសម្លាប់ខ្លួន។ កត្តានេះមកពីគិតរឿងលុយកាក់តិចតួចនោះសំខាន់ខ្លាំងសម្រាប់ជីវិតគាត់។ ហេតុនេះនៅពេលដែលគាត់គ្រប់គ្រងផ្លូវចិត្តមិនបានល្អ គាត់អាចនឹងប្រឈមបញ្ហាផ្លូវចិត្តខ្ពស់ ហើយធ្វើឱ្យជីវិតគាត់មានបញ្ហា”។
អ្នកជំនាញចិត្តសាស្រ្តខាងលើបានលើកឡើងផងដែរថា បញ្ហាសង្គមមួយចំនួនទៀតដែលហួសពីការស្មានរបស់យើងក៏អាចធ្វើឱ្យយើងក្លាយជាមនុស្សមានបញ្ហាផ្លូវចិត្តដែរ ដូចជាបញ្ហាគ្រោះធម្មជាតិដែលបានបំផ្លេចបំផ្លាញដល់លំនៅឋាន ឬទ្រព្យសម្បត្តិ និងបញ្ហាសង្គ្រាម ឬវិបត្តិសង្គមផ្សេងៗផងដែរ។ កត្តាសំខាន់ទី2 ដែលនាំឱ្យមានបញ្ហាផ្លូវចិត្តគឺ កត្តាជីវសាស្រ្ត ហើយកត្តានេះត្រូវបានបែងចែកជា2ប្រភេទផងដែរ គឺកត្តាជីវសាស្រ្តខាងក្រៅ និងកត្តាជីវសាស្ត្រខាងក្នុងខ្លួន។
មនុស្សជាច្រើនប្រហែលជាបានឃើញហើយនៅក្នុងបណ្តាញសង្គម Facebook ដែលមានអ្នកខ្លះប្រើប្រាស់គ្រឿងញៀនរហូតដល់វិកលចរិត។ យើងរាល់គ្នាតែងតែហៅគាត់ថា បែកថ្នាំ តែស្ថានភាពពិតប្រាកដ គឺមកពីកត្តាជីវសាស្រ្តដែលកើតចេញពីធាតុពុលនៅក្នុងគ្រឿងញៀនទៅបំពុលខួរក្បាលយើងធ្វើឱ្យបាត់បង់ស្មារតី។ ចំណែកឯអ្នកខ្លះទៀតផឹកស្រារហូតដល់បាត់បង់ស្មារតី បង្កគ្រោះថ្នាក់ និងបង្កបញ្ហាជាច្រើនផ្សេងទៀត។ កត្តាទាំងអស់នេះក៏មកពីជាតិពុលនៅក្នុងស្រាធ្វើឱ្យខូចខួរក្បាលក៏មានដែរ។
លោក វេជ្ជបណ្ឌិត យឹម សុបុត្រា បាននិយាយថា៖ “យើងឃើញហើយមនុស្សមួយចំនួនផឹកស្រាច្រើនលើសកម្រិតនៅតាមសហគមន៍។ ពេលនិយាយទៅគាត់ថាគាត់ផឹកស្រាយូរហើយគ្រប់កម្មវិធីមិនដែលឃើញឆ្កួតទេ ហេតុនេះគាត់ក៏បន្តវារហូតដល់ដំណាក់កាលញៀនដែលមិនអាចអត់ផឹកបានគឺត្រូវតែផឹករាល់ថ្ងៃរហូតធ្វើឱ្យគាត់ពុលខ្លាំងទៅជាមានបញ្ហាផ្លូវចិត្តបាន”។
អ្នកជំនាញចិត្តសាស្រ្តដដែលបានលើកឡើងផងដែរថា កត្តាជីវសាស្ត្រមួយទៀតដែលគ្រប់គ្នានឹកស្មានមិនដល់គឺការប្រើប្រាស់ឱសថ ក៏អាចធ្វើឱ្យយើងក្លាយជាមនុស្សមានបញ្ហាផ្លូវចិត្តដែរ។ ប្រជាជនជាច្រើនចូលចិត្តទិញថ្នាំប្រើដោយមិនបានប្រឹក្សាជាមួយគ្រួពេទ្យ ពេលខ្លះគេងមិនលក់គឺតែងទៅទិញ ថ្នាំងងុយដេកមកលេបខ្លួនឯងជាការស្រេច ព្រោះចំណាយតិច តែបញ្ហានេះយូរៗទៅក៏ធ្វើឱ្យគាត់មានបញ្ហាដែរ។ សារធាតុគីមីនៅក្នុងថ្នាំទាំងអស់នោះអាចធ្វើឱ្យខួរក្បាលមិនមានតុល្យភាព ហើយបង្កទៅជាជំងឺបាន។
ចំពោះសុភាពនារីវិញ បញ្ហាដែលគ្រប់គ្នានឹកស្មានមិនដល់ថាអាចធ្វើឱ្យមានបញ្ហាផ្លូវចិត្តដែរ គឺការញាំុតែសម្រកទម្ងន់។ តែប្រភេទនេះប្រសិនបើមានស្តង់ដារផលិតត្រឹមត្រូវមិនមានបញ្ហានោះទេ តែប្រសិនបើវាផលិតមិនត្រឹមត្រូវនឹងអាចធ្វើឱ្យបង្កបញ្ហាសម្រាប់ខួរក្បាល។ ផលិតផលតែខ្លះពេលទទួលទានទៅ មិនឃ្លានអាហារ ហើយមិនងងុយដេក បន្ទាប់មកក៏ស្រកទម្ងន់ តែបើគិតទៅវាមិនខុសពីសារធាតុមេតំហ្វេតាមីនទេ ដែលធ្វើឱ្យមនុស្សមិនឃ្លាន មិនងងុយ ហើយស្រកគីឡូនោះ។ បញ្ហានេះគឺជាកត្តាជីវសាស្ត្រយ៉ាងសំខាន់ដែលត្រូវយកចិត្តទុកដាក់ ហើយកុំធ្វេសប្រហែសឱ្យសោះ ព្រោះក្នុងខួរក្បាលក្នុងសារធាតុគីមីច្រើនណាស់ ហើយវាមានប្រភេទផ្សេងៗគ្នា។ លោកថា នៅពេលសប្បាយមានខួរក្បាលមានគីមីសប្បាយ កើតទុក្ខមានគីមីកើតទុក្ខ ព្រួយបារម្ភមានគីមីប្រភេទផ្សេង ហើយជាឧទាហរណ៍ ប្រសិនបើមនុស្សម្នាក់ធ្លាក់ទឹកចិត្ត មានន័យថាគាត់ខ្វះជាតិេសរ៉ូតេនីន ហេតុនេះគ្រូពេទ្យត្រូវតែប្រើប្រាស់ថ្នាំដើម្បីបង្កើនសារធាតុនេះឡើងវិញឱ្យមានតុល្យភាព។ ទាំងអស់នេះជាកត្តាផ្លូវចិត្តដែលកើតចេញពីកត្តាខាងក្រៅខ្លួន ចំណែកឯកត្តាក្នុងខ្លួនវិញ គឺអាចបណ្តាលមកពីជំងឺប្រចាំកាយដូចជាជំងឺស្រ្តូក ជំងឺទឹកនោមផ្អែម ឬជំងឺបេះដូងជាដើម។
លោកវេជ្ជបណ្ឌិត បានសង្កត់ធ្ងន់ថាកត្តាចុងក្រោយដែលនាំឱ្យមានបញ្ហាផ្លូវចិត្ត គឺកត្តាចិត្តសាស្រ្តដែលកើតចេញពីការប្រើប្រាស់គំនិតរបស់មនុស្សម្នាក់ៗ និងឥរិយាបថនៃការគិតរបស់ពួកគេ។ ជាករណីជាក់ស្តែងប្រសិនបើការសិក្សាមិនល្អ មានវិបត្តិស្នេហា ឬមានបញ្ហាផ្សេងៗកើតឡើងចំពោះជីវិតគាត់ ហើយគាត់មិនមានទម្លាប់នៃការគិតវិជ្ជមាន ឬស្ថានភាពផ្លូវចិត្តរបស់គាត់មិនរឹងមាំ គាត់អាចនឹងធ្វើឱ្យស្ថានភាពផ្លូវចិត្តធ្លាក់ចុះដុនដាបក្លាយជាវិបត្តិធ្ងន់ធ្ងរបាន៕
September 29, 2018
ទស្សនាចរព្រះវិហារបុរាណ « វត្តឈៀងថង » វិចិត្រកម្មប្រណិតដាច់គេនៅខេត្ត ហ្លួងប្រៈបាង
« ពុទ្ធបដិមាមាស » ជាឯកលក្ខណភាពព្រះពុទ្ធរូបសិល្បៈប្រទេសឡាវ ដែលបានកំពុងទាក់ទងភ្ញៀវទេសចរណ៍ជាច្រើននាក់ នាព្រះវិហារបុរាណ វត្តឈៀងថង។
ជនជាតិឡាវមានជំនឿថា ពុទ្ធបដិមាមាស មួយអង្គនេះ បានអណ្ដែតតាមផ្ទៃទឹកទន្លេមកពីប្រទេសភូមា ទើបបានឱ្យឈ្មោះថា « ប្រៈម៉ាន » មកពីពាក្យ ព្រះ+ភូមា ។ អារាមឈៀងថង គឺជាព្រះវិហារបុរាណដែលជាប់ជាសម្បត្តិបេក្ខភណ្ឌពិភពលោកនៅខេត្ត ហ្លួងប្រៈបាង ព្រោះវត្តនេះ មានវ័យចំណាស់ និងមានវិចិត្រកម្មក្បាច់បិទសន្លឹកទឹកមាស ពេញតួព្រះវិហារយ៉ាងប្រណិតផងដែរ។ រីឯដំបូលមាន 3 ថ្នាក់ ហើយអែនចុះក្រោម ប្រៀបបានដូចទៅនឹងស្លាបបក្សី ដែលជាភាពច្នៃប្រឌិតមិនអាចកាត់ថ្លៃបាន។ គំនូរបុរាណនៅក្នុងព្រះវិហារ សុទ្ធតែបិទដោយសន្លឹកទឹកមាស បានរំលេចនូវពន្លឺមាសពេញក្នុងអារាមតែម្ដង។
ចង់ដឹងថា ព្រះវិហារបុរាណមួយនេះមានភាពប្រណិតដល់កម្រិតណានោះ សូមទស្សនារូបភាពទាំងអស់នេះ៖
September 28, 2018
ប្រយ័ត្ន!! ជំងឺគ្រោះថ្នាក់អាក្រក់ កើតចំពោះបុគ្គលិកធ្វើការក្នុងការិយាល័យ
តើជំងឺកើតមានចំពោះបុគ្គលិកធ្វើការក្នុងការិយាល័យ (Office Syndrome) ជាអ្វី? បើតាមការបញ្ជាក់របស់គ្រូពេទ្យជំនាញសុខភាពពិភពលោកបានប្រាប់ថា ក្រុមអាការរោគអូសហ្វីសស៊ីនដ្រូន (Office syndrome) គឺជាអាការដែលកើតឡើងពីចំពោះមនុស្សពេញវ័យកំពុងធ្វើការងារ ដែលកំពុងតែអង្គុយធ្វើការងារនៅក្នុងការិយាល័យពេញមួយថ្ងៃ ដោយមិនមានការហាត់ប្រាណជាប្រចាំថ្ងៃ និងមានសភាពបរិស្ថានជុំវិញកន្លែងធ្វើការងារពោរពេញដោយបរិយាកាសអាប់អួរ និងចំហាយផ្សែងពុលពីគ្រឿងម៉ាស៊ីនដែលអ្នកមិនអាចមើលឃើញនឹងភ្នែកទទេ ធ្វើឱ្យកើតមានអាការឈឺក្នុងខ្លួនខុសប្រក្រតីផ្សេងៗជាដើម។
អាការនៃជំងឺអូសហ្វីសស៊ីនដ្រូន (Office syndrome) រួមមានដូចជា ៖
1. ប្រតិកម្មសាច់ដុំដៃ និងឈឺចុកចាប់តាមអវយវៈផ្សេងៗ។
2. ឈឺខ្នង ឬចុករោយតាមបរិវេណផ្នែកខាងក្រោយនៃរាងកាយជាញឹកញាប់ ដោយសារអង្គុយធ្វើការពេញមួយថ្ងៃ 8ម៉ោង ធ្វើឱ្យសាច់ដុំដើមក ស្មា និងចង្កេះ ឡើងរឹងជាប់នៅពេលវេលាយូរ។
3. ខ្យល់អាកាសចេញចូលក្នុងការិយាល័យមិនគ្រប់គ្រាន់ ខួរក្បាលបានទទួលអុកស៊ីហ្សែ៊នមិនគ្រប់គ្រាន់ បណ្ដាលឱ្យមានអាការឈឺភ្នែក ស្ពឹកភ្នែក និងមុខស្លក់ឡើងខ្មៅជាដើម។
4. អាការអាចធ្ងន់ធ្ងរឡើង និងអាចហុចផលអាក្រក់ដល់សភាពរាងកាយខ្លាំងឡើងដូចជា ធ្វើឱ្យឈឺក្បាល កើតប្រកាំង រលាកសន្លាក់ឆ្អឹងកងខ្នង ប៉ះពាល់ដល់ប្រព័ន្ធប្រសាទធ្ងន់ធ្ងរ និងអាចវង្វេងស្មារតីក៏មានដែរ។
5. កើតមានអាការចាញ់អាកាសធាតុ ងាយទទួលជំងឺឱកាសនិយម និងពិបាកដកដង្ហើម រហូតឈានដល់រលាកផ្លូវដង្ហើម។
វិធីការពារ និងព្យាបាល
លោកគ្រូពេទ្យជំនាញបានបញ្ជាក់ពីវិធីការពារជំងឺអូសហ្វីសស៊ីនដ្រូននេះថា ការការពារដែលអាចធ្វើទៅបាននោះគឺ ការផ្លាស់ប្ដូរឥរិយាបទរស់នៅ ដោយការមានអនាម័យ និងការទទួលយកអុកស៊ីហ្សែ៊នឱ្យដល់ខួរក្បាលបានយ៉ាងគ្រប់គ្រាន់។ ប្រសិនបើអាការមិនប្រសើរឡើងទេនោះ គឺចាំបាច់ត្រូវប្រើថ្នាំដើម្បីបន្ថយអាការដែលកើតឡើង និងត្រូវទទួលការវះកាត់ក៏មានដែរពោលគឺអាស្រ័យទៅលើស្ថានភាពរបស់អ្នកជំងឺ។ នាពេលបច្ចុប្បន្ននេះ ខាងមន្ទីរពេទ្យ បានធ្វើការអប់រំណែនាំចំពោះអ្នកជំងឺពីក្រុមអ្នកធ្វើការងារច្រើនម៉ោង ឱ្យមានទម្លាប់ហាត់ប្រាណនាពេលព្រឹកព្រលឹម មុនពេលចូលធ្វើការរយៈពេល15-20នាទី និងពេលចេញពីធ្វើការ 20នាទី ស្ថិតក្នុងបរិវេណការិយាល័យ៕
September 28, 2018
អស់បញ្ហារឿងគេងលក់មិនគ្រប់គ្រាន់ ជាមួយ15វិធីជួយឱ្យឆាប់គេងលក់
ដូចដែលយើងបានដឹងច្បាស់ហើយថា ការគេងលក់គឺជាចំណែក 1ភាគ3នៃជីវិតប្រចាំថ្ងៃរបស់យើង ដូច្នេះហើយទើបយើងត្រូវតែគេងលក់សម្រាកឱ្យបានមួយថ្ងៃពី6 – 8ម៉ោង ទើបហុចផលល្អដល់រាងកាយ តែបើអ្នកមានបញ្ហាក្នុងការគេង ដូចជា គេងមិនសូវលក់ ឬពិបាកក្នុងការគេងលក់ ចូរសាកល្បងធ្វើតាម “វិធីធ្វើឱ្យគេងលក់‟ របស់យើងលមើល៍ ធានាថាអ្នកនឹងលង់លក់សប្បាយយ៉ាងពិតប្រាកដ។
1. ហាត់ប្រាណជាប្រចាំ ឬមួយសប្ដាហ៍ 3ដងម្ដងៗយ៉ាងតិចកន្លះម៉ោង តែមិនគួរហាត់ប្រាណមុនពេលគេងឡើយ។
2. មិនគួរគេងលក់នៅពេលថ្ងៃ ឬពេលល្ងាចនោះទេ ព្រោះនឹងធ្វើឱ្យខួរក្បាលយល់ច្រឡំថា រាងកាយបានគេងលក់រួចហើយ លុះដល់ពេលត្រូវគេងមែនទែន ក៏នឹងធ្វើឱ្យពិបាកគេងលក់ តែបើចង់គេងសម្រាកពេលថ្ងៃខ្លាំងមែនទែននោះ ចូរគេងមួយស្រឡេតមិនឱ្យលើសកន្លះម៉ោងបានហើយ។
3. តមភេសជ្ជៈ តែ កាហ្វេ សូកូឡា និងភេសជ្ជៈដែលមានជាតិកាហ្វេអីុន និងបារី។
4. តមអាហារពេលយប់ជ្រៅ និងមិនគួរញ៉ាំទឹកច្រើននៅពេលព្រលប់ទេ ព្រោះជាប្រក្រតីរាងកាយមិនបញ្ចេញទឹករំលាយអាហារនៅពេលយប់ឡើយ។
5. មិនគួរធ្វើកិច្ចការងារណាដែលធ្វើឱ្យផ្លូវចិត្តបានទទួលការជំរុញមុនពេលគេង ដូចជា មើលកុន អានសៀវភៅ ជជែកគ្នា រឿងដែលធ្វើឱ្យអារម្មណ៍តឹងតែង ជំរុញផ្លូវចិត្តឱ្យរំភើបញាប់ញ័រខំប្រឹង និងធុញថប់ឡើយ។
6. តមលេងឧបករណ៍អេឡិចត្រូនិក ទូរស័ព្ទស្មាតហ្វូនមុនពេលចូលគេង ព្រោះឧបករណ៍ទាំងនោះមានផលធ្វើឱ្យពិបាកគេងលក់ ដោយសារតែពន្លឺពណ៌ផ្ទៃមេឃក្នុងអេក្រង់ ធ្វើឱ្យរាងកាយបានដឹងថា មិនទាន់ងងឹត និងបញ្ចេញសារធាតុ មេឡាតូនីន ធ្វើឱ្យពិបាកគេងលក់ ហើយយើងថែមទាំងទទួលបានព័ត៌មានចូលមកជាប់ជានិច្ច ធ្វើឱ្យខួរក្បាលមិនបានសម្រាក និងគេងលក់មិនបានពេញលេញ រលកខួរក្បាលមិនស្រឡះ ធ្វើឱ្យគេងលក់មិនស្កប់។
7. ព្យាយាមរៀបចំពេលវេលាសម្រាប់ការសម្រាក ដើម្បីបន្ធូររាងកាយ និងខួរក្បាលឱ្យស្រឡះមុនចូលគេង ដូចជា ស្ដាប់បទភ្លេងដែលជួយសម្រួលឱ្យគេងលក់បានកាន់តែស្រួលឡើង ឬអង្គុយតាំងសមាធិ សូត្រមន្តឱ្យផ្លូវចិត្តបានស្ងប់សប្បាយ ធូរស្រាល ឬនឹកដល់ធម្មជាតិ។
8. សម្រួលបន្ទប់គេងឱ្យស័ក្តិសមទាំងសីតុណ្ហភាព ពន្លឺ និងភាពស្រទន់ស្រួលខ្លួន។
9. គ្រែមានទុកសម្រាប់គេង មិនគួរធ្វើកិច្ចការងារផ្សេងៗលើគ្រែ ដូចជាទូរស័ព្ទ ញ៉ាំអាហារ ឬអានសៀវភៅឡើយ។
10. ពេលផ្ដេកខ្លួនគេងហើយ ចូរឈប់គិតរឿងដែលតានតឹង មិនសប្បាយចិត្ត ដូច្នេះមុនពេលគេង ចូរសរសេរកត់ត្រាអ្វីដែលមិនសប្បាយចិត្តចូលទៅក្នុងក្រដាសថា អ្វីដែលយើងកែខៃបាន និងអ្វីដែលយើងកែខៃមិនបាន ព្រោះការសរសេរដែលច្បាស់លាស់នឹងធ្វើឱ្យខួរក្បាលស្រឡះឡើង ផ្លូវចិត្តសប្បាយឡើង។
11. មិនគួរញ៉ាំទឹកច្រើនក្រោយពេលបាយល្ងាច ព្រោះនឹងធ្វើឱ្យភ្ញាក់ឡើងបត់ជើងតូច និងដាច់ចង្វាក់ការកំពុងគេងលក់ស្រួលដូច្នេះមុននឹងចូលគេងគួរចូលបន្ទប់ទឹកឱ្យរួចរាល់ ឬបើចាំបាច់ត្រូវភ្ញាក់ឡើងចូលបន្ទប់ទឹកក៏មិនចាំបាច់កង្វល់ដែរ ចូរត្រឡប់មកគេងវិញយ៉ាងមានអារម្មណ៍ធូរស្រាល។
12. មិនគួរមានអារម្មណ៍កង្វល់ ឬតានតឹងនៅពេលគេងមិនលក់នោះទេ បើការចូលគេងកន្លងទៅ 30នាទីហើយនៅតែមិនទាន់លក់ទៀត ចូររកកិច្ចការងារបន្ធូរអារម្មណ៍ធ្វើ រហូតទាល់តែមានអារម្មណ៍ថាងងុយ សឹមចូលទៅគេងវិញម្ដងទៀត។
13. កុំវិតក្កកង្វល់ ហើយមើលនាឡិកាញឹកញាប់ ព្រោះវានឹងក្លាយជាការដាក់សម្ពាធលើខ្លួនឯង ធ្វើឱ្យមានអារម្មណ៍តានតឹង និងគេងមិនលក់នៅទីបំផុត។
14. បើអ្នកគេងជាមួយលោកអ្នកជាមនុស្សគេងស្រមុក និងធ្វើឱ្យលោកអ្នកពិបាកនឹងគេងលក់ ចូរលោកអ្នករកអ្វីមកបិទត្រចៀកនិងនាំដៃគូរបស់អ្នកទៅជួបគ្រូពេទ្យ ដើម្បីព្យាបាលអាការគេងស្រមុក តែបើលោកអ្នកនៅតែគេងមិនលក់ទៀត ចូរចែកគ្រែគ្នាគេងបណ្ដោះអាសន្ន ដើម្បីឱ្យលោកអ្នកបានគេងលក់សម្រាកយ៉ាងគ្រប់គ្រាន់។
15. គួរភ្ញាក់ពីដំណេកឱ្យទៀងពេលវេលារៀងរាល់ថ្ងៃ ទោះជាលោកអ្នកចូលគេងនៅម៉ោងប៉ុន្មានក៏ដោយ ព្រោះនឹងធ្វើឱ្យចរន្តការគេងលក់របស់លោកអ្នកមានតុល្យភាព និងមិនគួរភ្ញាក់ពីដំណេកក្រោយម៉ោង 8ព្រឹកឡើយព្រោះរាងកាយមនុស្សមានសម្ព័ន្ធជាមួយព្រះអាទិត្យរះ និងលិច៕
September 28, 2018