Category: សង្គម និងសេដ្ឋកិច្ច

  • ទប់ទឹកភ្នែកមិនជាប់!! ទស្សនាវីដេអូអប់រំខ្លី រឿង «ទឹកភ្នែកសម្ងាត់ឪពុកខ្ញុំ» សម្ដែងដោយ យ៉ែម សំអូន

    ទប់ទឹកភ្នែកមិនជាប់!! ទស្សនាវីដេអូអប់រំខ្លី រឿង «ទឹកភ្នែកសម្ងាត់ឪពុកខ្ញុំ» សម្ដែងដោយ យ៉ែម សំអូន

    យ៉ែម សំអូន នៅតែស្ថិតនៅជាតារាលំដាប់ជួរមុខដដែល ដោយខណៈនេះលោកបានបង្ហាញទស្សនីយភាពវីដេអូអប់រំមួយមានចំណងជើងថា «ទឹកភ្នែកសម្ងាត់ឪពុកខ្ញុំ» រួមសម្ដែងជាមួយប្អូនៗយុវតីជំនាន់ក្រោយ ដោយលោកសម្តែងជាឪពុកពិការម្នាក់ ត្រូវបានកូនស្រីបណ្ដូលចិត្តសុំទិញទូរស័ព្ទ រហូតដល់រូបលោកទៅធ្វើការសំណង់ ខំប្រឹងធ្វើការទាំងត្រដរ ដើម្បីយកលុយទិញសម្ភារ និងទូរស័ព្ទទំនើបឱ្យកូន តែលទ្ធផលបែរជាត្រូវដេកស្លាប់ម្នាក់ឯងយ៉ាងអាណោចអាធ័ម។

    ជាការពិតណាស់ បើទោះបីជាវីដេអូខ្លីនេះជាការសម្តែងក៏ពិតមែន ក៏ប៉ុន្តែវីដេអូនេះពិតជាបានចូលរួមចំណែកយ៉ាងធំ ដើម្បីដាស់តឿនដល់ស្មារតីកូនៗដែលតែងតែចង់បានរបស់របរទំនើបពីឪពុកម្តាយ បើទោះជាដឹងថា របស់អស់ទាំងនោះ ឪពុកម្តាយស្ទើរតែគ្មានសមត្ថភាពទិញផ្តល់ឱ្យក្ដី។ ខណៈបានទស្សនាហើយមនុស្សជាច្រើនបានស្រក់ទឹកភ្នែកអួលដើមក តែម្ដង។

    គួរបញ្ជាក់ផងដែរថា វីដេអូនេះមិនមែនគ្រាន់តែចង់បង្ហាញឱ្យទស្សនិកជនបានឃើញពីសភាពកម្សត់ និងការលះបង់ដ៏ធំធេងរបស់ឪពុកចំពោះកូនប៉ុណ្ណោះទេ តែជាកម្លាំងលើកទឹកចិត្តបងប្អូនឱ្យបង្កើត និងបង្កើនសេចក្តីស្រឡាញ់ ការដឹងគុណូបការៈ និងកតញ្ញូតាធម៌ចំពោះអ្នកមានគុណ ទាន់ពួកគាត់នៅមានដង្ហើម។

    ចង់ដឹងថា រឿងអប់រំខ្លីមួយនេះមានអត្ថន័យល្អយ៉ាងណានោះ សូមទស្សនាវីដេអូខាងក្រោមនេះ៖

  • ស្រ្តីក្នុងវិស័យ ICT មានឱកាសខ្ពស់ជាងបុរស

    ស្រ្តីក្នុងវិស័យ ICT មានឱកាសខ្ពស់ជាងបុរស

    មនុស្សនៅកម្ពុជាជាច្រើនយល់ឃើញថាជំនាញបច្ចេកវិទ្យាព័ត៌មាន (ICT) ជាជំនាញសម្រាប់បុរសសិក្សា ហើយកូនស្រីមិនគួរសិក្សាលើជំនាញទេ តែជាក់ស្តែងជំនាញនេះ​ជាជំនាញដែលកំពុងមានសក្តានុពលសម្រាប់ស្រ្តីនាពេលបច្ចុប្បន្ន។

    នៅសាលាខ្លះក្នុងមួយថ្នាក់រៀនស្ទើរតែគ្មានមនុស្សស្រីម្នាក់ផងដែលសិក្សាជំនាញ ICT តែទោះជាយ៉ាងនេះក្តី​ ស្រ្តីក្នុងវិស័យព័ត៌មានវិទ្យានៅតែមានចំនួនកើនឡើងខ្លះបើទោះបីជាស្ត្រីមិនសូវបានលើកទឹកចិត្តឱ្យ​សិក្សាជំនាញនេះក៏ដោយ។ ម្យ៉ាងវិញទៀត បច្ចុប្បន្ននេះក៏មានកម្មវិធីកុំព្យូទ័រមួយចំនួន​ផលិតដោយស្នាដៃស្រ្តី ឬ​ក៏មានការចូលរួមយ៉ាងសំខាន់ពីស្រ្តីផងដែរ។

    កញ្ញា ហេង សុវណ្ណមុនីនុត ស្ត្រីម្នាក់ក្នុងវិស័យបច្ចេកវិទ្យាព័ត៌មាន និងធ្លាប់ជានិស្សិតដែលទទួលបានពានរង្វាន់ផ្នែក​បច្ចេកវិទ្យានៅបរទេសផង បានលើកឡើងថា ស្រ្តីមានលក្ខណៈពិសេសជាច្រើន​ក្នុងវិស័យបច្ចេកវិទ្យាព័ត៌មាន (ICT) តែកត្តាដែលនាំឱ្យស្ត្រី​នៅក្នុង​ផ្នែកនេះ​មិនសូវមានចំនួនច្រើនដោយសារតែហេតុផលមួយចំនួន​ដូចជា៖ ទី1មុខវិជ្ជា ICT ជាមុខវិជ្ជាដែលលំបាកសិក្សា ព្រោះវាត្រូវការមុខវិជ្ជា​គណិតវិទ្យា ត្រូវការសិក្សាពីកូដ ឬភាសាជាច្រើនផ្សេងទៀត។ ទី2 និស្សិតស្រីមួយចំនួនអាចគិតថាជំនាញនេះជាជំនាញរបស់មនុស្សប្រុស ហើយស្របពេលដែលមិនសូវ​មាន​ការជំរុញផង គាត់ក៏សម្រេចចិត្តមិនជ្រើសរើសយក​ជាអាជីពនេះតែម្តង។ ចំណុចទី3 និស្សិតស្រីអាចគិតថា មុខវិជ្ជានេះមានទីផ្សារការងារចង្អៀត ហើយគេត្រូវការតែប្រុសៗ ក្រោយពេលគាត់បញ្ចប់ការសិក្សា គាត់​អាចបានប្រាក់ខែតិចជាងប្រុសៗជា-ដើម។ ចំណុចទី4 គឺ​​ស្រ្តីអាចយល់ថា ​មុខវិជ្ជានេះ​មានភាពនឿយហត់ខ្លាំងដែលអាចធ្វើឱ្យគាត់ឆាប់ចាស់ ឬ​បាត់បង់ភាពស្រស់ស្អាតជាដើម។

    កញ្ញា ហេង សុវណ្ណមុនីនុត បាននិយាយថា ៖ “​តាមពិតទៅជំនាញ​នេះមិនមែន​សម្រាប់តែមនុស្សប្រុស​ដូចការគិតរបស់អ្នកគ្រប់គ្នានោះទេ ហើយគ្មានមុខវិជ្ជាណាដែល​គេហាមមិនឱ្យមនុស្សស្រីរៀនដែរគ្រាន់តែមុខវិជ្ជា​មួយចំនួន ​មនុស្សក្នុងសង្គមគេបែងចែកថា សម្រាប់ប្រុស ឬសម្រាប់ស្រីតែប៉ុណ្ណោះ។ តែឥឡូវនេះគ្រប់គ្នាគេគិតពីសមភាពយេនឌ័រ ហេតុនេះ​មនុស្សប្រុស និងមនុស្សស្រី មានសិទ្ធស្មើគ្នាក្នុងការសិក្សា​គ្រប់មុខវិជ្ជាដោយគ្មានការបែងចែកនោះទេ”។

    យុវតីឆ្នើមផ្នែកបច្ចេកវិទ្យាខាងលើបានលើកឡើងផងដែរថា ពេលខ្លះបើទោះបីជា​សម័យបច្ចុប្បន្ន​មិនហាមឃាត់ ឬផ្តល់ឱកាសសម្រាប់ស្ត្រីឱ្យសិក្សាផ្នែកបច្ចេកវិទ្យាឱ្យបានច្រើនក៏ដោយ តែស្ត្រីនៅមាន​បញ្ហាប្រឈមមួយចំនួន​ផងដែរ។ ទី1គឺផ្នត់គំនិតរបស់និស្សិត ផ្ទាល់​ដែលគាត់បែងចែកខ្លួនឯង ឬគិតថា ខ្លួនឯងមិនសមនឹងសិក្សា​មុខវិជ្ជាព័ត៌មានវិទ្យា ព្រោះគាត់មើលឃើញការឱ្យតម្លៃពីសង្គមខាងក្រៅខ្លាំងពេក។ មួយវិញទៀត គឺស្ត្រីមិនសូវត្រូវបានលើកទឹកចិត្តប៉ុន្មាននោះទេតែពេលខ្លះគាត់ត្រូវស្ថិតក្នុងកាលៈទេសៈដែលពិបាកប្រឈមគឺ ការរិះគន់របស់អ្នកជុំវិញខ្លួន ដូចជា​អាណាព្យាបាល លោកគ្រូ-អ្នកគ្រូ​នៅវិទ្យាល័យ មិត្តភក្តិ ឬមនុស្សជាច្រើនផ្សេងទៀតក្នុងសង្គមជាដើម ដែលធ្វើឱ្យប៉ះពាល់ដល់អារម្មណ៍របស់ពួកគាត់ ឬងាយនឹងបោះបង់​នៅពេលជួបឧបសគ្គកើតឡើង។

    ចំពោះលក្ខខណ្ឌល្អសម្រាប់ស្រ្តីក្នុងវិស័យបច្ចេកវិទ្យាព័ត៌មានវិញ កញ្ញា សុវណ្ណមុនីនុត បាននិយាយថា ៖ “​តាមពិត​ស្ថានភាពជាក់ស្តែងរបស់ស្រ្តីក្នុង​វិស័យ ICT មិនដូចពួកគាត់គិតនោះទេ វាខុសពីការគិតរបស់មនុស្សគ្រប់គ្នា ព្រោះ​ស្រ្តីមិនត្រឹមតែអាចសិក្សាបានល្អទេ តែថែមទាំង​អាចមាន​ឱកាសការងារខ្ពស់ជាងមនុស្សប្រុសទៀតផង”។

    កញ្ញាបន្ថែមទៀតថា បើនិយាយពី​ការងារ ដោយសារតែមនុស្សប្រុស​មានចំនួនច្រើន ហើយការងារខ្លះគឺគេត្រូវការស្រ្តី ហេតុនេះស្រ្តីអាចមានទីផ្សារទូលាយខ្លាំងជាង។ ម្យ៉ាងវិញទៀត ក្រុមហ៊ុនជាច្រើនក៏កំពុងលើកទឹកចិត្តឱ្យស្រ្តី​សិក្សាក្នុងវិស័យបច្ចេវិទ្យាព័ត៌មាននេះផងដែរ។ លើសពីនេះទៅទៀត បើប្រៀបធៀបជាមួយបុរស ស្រ្តីក្នុងផ្នែកបច្ចេកវិទ្យាអាចទទួលបានប្រាក់ចំណូលច្រើនជាងបុរស ស្របពេលដែលពួកគាត់ក៏មានឱកាសច្រើនដើម្បីធ្វើការផ្លាស់ប្តូរ​ការសិក្សានៅបរទេស ការចែករំលែក ឬការអញ្ជើញទៅចូលរួមការជួបជុំជាអន្តរជាតិនានាព្រោះកម្មវិធីជាច្រើនកំណត់តែម្តងថាអ្នកអាចចូលរួមបានចាំបាច់ត្រូវតែជាស្ត្រី។

    សាស្ត្រាចារ្យ​ផ្នែក​ព័ត៌មានវិទ្យា កញ្ញា សុខ ស៊ីគៀង បានលើកឡើងថា ​ស្ត្រីក្នុងវិស័យបច្ចេកវិទ្យាមានសារៈសំខាន់ខ្លាំងណាស់ ព្រោះមានតែស្ត្រីទេដែលយល់ពី​បញ្ហាស្ត្រី ដែលជាចំណែក​ដ៏សំខាន់ណាស់ក្នុងការប្រើប្រាស់បច្ចេកវិទ្យាព័ត៌មានដើម្បីដោះស្រាយបញ្ហាក្នុងសង្គម តែពេលបច្ចុប្បន្ននេះ​ការ​បណ្តុះបណ្តាលបច្ចេកវិទ្យាសម្រាប់ក្មេងស្រីមិនទាន់មានលក្ខណៈទូលំទូលាយខ្លាំងនៅឡើយដែលជាកត្តាធ្វើឱ្យនិស្សិតដែលជ្រើសរើសជំនាញបច្ចេកវិទ្យាព័ត៌មាននៅមានកម្រិត។ ទោះជាយ៉ាងនេះក្តី​នៅក្នុងសង្គម ទាំងវិស័យសាធារណៈ និង​វិស័យ​ឯកជន សុទ្ធតែត្រូវការវត្តមានស្ត្រីក្នុងវិស័យ​ព័ត៌មានវិទ្យានេះ ដើម្បីធ្វើការងារសំខាន់ៗជាច្រើន។

    កញ្ញា សុខ ស៊ីគៀង បាននិយាយថា ៖ “​តាមពិតស្ត្រីមានសមត្ថភាពខ្លាំងមិនចាញ់បុរសនោះទេ ហើយពេលខ្លះស្ត្រីក៏អាចមានភាពល្អិតល្អន់ជាងបុរសទៀតផង តែអ្វីដែលជាបញ្ហានោះគឺ​ស្ត្រីមិនទាន់ទុកចិត្តលើខ្លួនឯងថា ខ្លួនមានសមត្ថភាពដូចបុរស។ តែទោះជាយ៉ាងនេះក្តី ពីមួយឆ្នាំទៅមួយឆ្នាំ គ្រប់ភាគីទាំងអស់​បានចូលរួមចំណែកដើម្បី​ជំរុញឱ្យមានមនុស្សស្រីកាន់តែច្រើននៅក្នុងផ្នែកដ៏សំខាន់នេះតាមរយៈការជំរុញឱ្យមានការអប់រំ និងប្រកួតប្រជែង​ល្អៗ ដើម្បីឱ្យស្រ្តីបានបញ្ចេញសមត្ថភាពរបស់ខ្លួន”៕

  • ក្រុមហ៊ុនអចលនទ្រព្យចិន បោះទុន$ 700លាននៅភាគខាងត្បូងរាជធានីភ្នំពេញ

    ក្រុមហ៊ុនអចលនទ្រព្យចិន បោះទុន$ 700លាននៅភាគខាងត្បូងរាជធានីភ្នំពេញ

    គម្រោងអចលនទ្រព្យដ៏ធំមួយនឹងលេចចេញជារូបរាងឡើងនៅភាគខាងត្បូងរាជធានីភ្នំពេញបន្ទាប់ពីក្រុមហ៊ុនមកពីប្រទេសចិនមួយបានសម្រេចបោះទុនវិនិយោគលើគម្រោងអគារស្នាក់នៅខ្ពស់ជាងគេបំផុត ជាអគារស្នាក់នៅរបស់អភិជនជាន់ខ្ពស់នៅកម្ពុជា។

    ក្រុមហ៊ុនអចលនទ្រព្យដ៏ធំរបស់ប្រទេសចិន អ & អេហ្វ ប្រផឹធី (R & F PROPERTIES) បានបោះទុនវិនិយោគ 700លានដុល្លារលើគម្រោងអគារស្នាក់នៅ អ&អេហ្វ ក្លូរីនេះ (R & F Glory) នៅភាគខាងត្បូងទីក្រុងភ្នំពេញដែលបាននិងកំពុងសាងសង់លើផ្ទៃដីសរុបជិត 8ហិកតា មានកម្ពស់ 57ជាន់ ស្មើនឹង 174ម៉ែត្រដែលក្នុងនាមជាអគារស្នាក់នៅលំដាប់ខ្ពស់ជាងគេទីមួយនៅជាយទីក្រុងភ្នំពេញដើម្បីឆ្លើយតបចំពោះជីវភាពស្នាក់នៅរបស់ប្រជាជនភ្នំពេញនាពេលអនាគត។

    លោក ស៊ូ វិនសូវ (XU WENSHUI) អគ្គនាយកគ្រប់គ្រងក្រុមហ៊ុន អ & អេហ្វ ប្រផឹធី ប្រចាំប្រទេសកម្ពុជាបានឱ្យដឹងថា៖ គម្រោងអគារស្នាក់នៅខ្ពស់ជាងគេបំផុតនៅរាជធានីភ្នំពេញនេះ មានកម្ពស់  57ជាន់ ស្មើនឹង 174ម៉ែត្រ ដែលជាអគារស្នាក់នៅរបស់អភិជនជាន់ខ្ពស់នៅកម្ពុជា។

    លោក ស៊ូ វិនសូវ បានបញ្ជាក់ថា គម្រោងអគារស្នាក់នៅដ៏ទំនើបនេះ គឺដោយសារមើលឃើញពីសក្តានុពលដ៏ធំធេងនៃកំណើនប្រជាជនដែលជំរុញដល់ការអភិវឌ្ឍសេដ្ឋកិច្ចរីកចម្រើននៃប្រទេសកម្ពុជាទាំងមូល ពិសេសការកើនឡើងនៃតម្រូវការលំនៅឋានក្នុងរាជធានីភ្នំពេញ និងតំបន់ជុំវិញ។

    កញ្ញា ឱក សុគន្ធកញ្ញា ដែលត្រូវបានតែងតាំងជាអ្នកនាំពាក្យសម្រាប់គម្រោងសាងសង់អគារស្នាក់នៅ អ&អេហ្វ ក្លូរី (R & F Glory)នៅ បានបញ្ជាក់ថា គម្រោងសាងសង់អគារស្នាក់នៅនេះនឹងត្រូវបានសាងសង់ឡើងប្រកបដោយគុណភាព និងមានភាពខុសប្លែកពីគេបំផុតនៅទីក្រុងភ្នំពេញ ហើយនៅក្នុងចំណោមលក្ខណៈសម្បត្តិដ៏លេចធ្លោនេះ ក៏នឹងមានការបំពាក់បរិក្ខារដ៏ប្រណីតៗ និងសម្បូរបែបសម្រាប់ទាក់ទាញអតិថិជនផងដែរ។

    លោក WANG ZHI HAO ប្រធានក្រុមប្រឹក្សាភិបាលនៃ(R & F PROPERTIES(CAMBODIA)  CO.,LTD បានបង្ហាញថា ក្រុមហ៊ុន (R & F PROPERTIES) ត្រូវបានបង្កើតឡើងនៅឆ្នាំ1994 ជាក្រុមហ៊ុនល្អបំផុតទាំង10 នៅក្នុងប្រទេសចិន។ ក្រុមហ៊ុនបានយកចិត្តទុកដាក់លើការស្ថាបនាអគារស្នាក់នៅលំដាប់កំពូល ចាប់ពីក្រុងក្វាងចូវ រហូតដល់ទូទាំងប្រទេសចិន និងនៅលើពិភពលោកអស់រយៈពេល24ឆ្នាំមកហើយ។

    លោកបន្តថា បច្ចុប្បន្នក្រុមហ៊ុន (R & F PROPERTIES) បានស្ថាបនាគម្រោងក្នុងប្រទេសម៉ាឡេស៊ី អូស្ត្រាលី អង់គ្លេស និងនៅប្រទេសកម្ពុជា ហើយបានសាងសង់អគារចំនួន 220ទីតាំងនៅក្នុងទីក្រុងប្រមាណជា70 នៅទួទាំងពិភពលោក។ R & F PROPERTIES បានឈានចូលក្នុងប្រទេសកម្ពុជាជាផ្លូវការនៅខែឧសភា ឆ្នាំ2017 ដោយបាននាំមកគម្រោងទី1 ដែលកែប្រែជីវភាពស្នាក់នៅក្នុងភ្នំពេញ គឺR & F CITY ជាបុរីសួនអន្តរជាតិមួយ ដែលមានទំហំ 560ពាន់ម៉ែត្រការ៉េ នាំមុខបុរីស្នាក់នៅកំពូលៗក្នុងភ្នំពេញ និងគម្រោងទី2 គឺគម្រោងអគារស្នាក់នៅ អ&អេហ្វ ក្លូរីនេះ (R & F Glory) បាន និងកំពុងសាងសង់ក្នុងនាមជាអគារស្នាក់នៅលំដាប់ខ្ពស់ជាងគេទីមួយនៅតំបន់ជាយទីក្រុងភ្នំពេញ ដើម្បីឆ្លើយតបចំពោះជីវភាពស្នាក់នៅរបស់ប្រជាជនដែលកាន់តែច្រើនឡើងក្នុងភ្នំពេញនាពេលអនាគត៕

  • ​ ចុងឆ្នាំ​2018នេះ កសិដ្ឋាន​ផលិត​ទឹកដោះគោ​ខេត្តព្រះវិហារ នឹង​ដំណើរការ

    ​ ចុងឆ្នាំ​2018នេះ កសិដ្ឋាន​ផលិត​ទឹកដោះគោ​ខេត្តព្រះវិហារ នឹង​ដំណើរការ

    រាជបណ្ឌិត្យសភាកម្ពុជា RAC (Royal Academy of Cambodia)បានបញ្ជាក់ថា ក្រុមហ៊ុន​មួយ​គ្រោង​នឹង​បើក​កសិដ្ឋាន​ចិញ្ចឹមគោយកទឹកដោះគោ ​វេច​ខ្ចប់ និងដាក់​​លក់​នៅលើ​ទីផ្សារ​កម្ពុជានៅស្រុក​ឆែប​ ខេត្តព្រះវិហារ ជាគម្រាងរបស់រាជបណ្ឌិត្យសភា ដែលគម្រាងនេះ​នឹង​ចាប់ដំណើរការ​នៅ​អំឡុង​ខែធ្នូ ​ឆ្នាំ​2018។

    លោក​បណ្ឌិតសភាចារ្យ សុខ ទូច ប្រធាន RAC បាន​មាន​ប្រសាសន៍​ថា ក្រុមហ៊ុន​មួយ​បាន​មក​សហការ​ជាមួយ​លោក ដោយគ្រោង​ដឹក​ជញ្ជូន​គោ​ញីមក​ពី​ប្រទេស​ថៃ​(កសិដ្ឋានចិញ្ចឹមគោយកទឹកដោះនៅខេត្តស្រះកែវ)ចំនួន 200ក្បាលជា​​​ពូជ​គោដា​ណឺ​ម៉ាក(Danmark)មក​សាកល្បង​ចិញ្ចឹម​នៅ​ក្នុង​កសិដ្ឋាន​នៅ​ខេត្តព្រះវិហារដើម្បី​ផលិត​ទឹកដោះ​ ​វេច​ខ្ចប់ និង​ផ្គត់ផ្គង់​ទីផ្សារ​ក្នុងស្រុក។ ការ​នាំ​យក​ពូជ​គោ​ញី​មក​ដាក់​ក្នុង​កសិដ្ឋាន​នោះ គឺ​អាច​ធ្វើឡើងនៅ​ក្នុង​អំឡុង​ខែធ្នូ ​ឆ្នាំ​2018នេះ ដោយ​រង់​ចាំ​តែការ​ដាំ​ស្មៅសម្រាប់ផ្គត់ផ្គង់​ឱ្យ​វា​ស៊ី​បានគ្រប់គ្រាន់​ប៉ុណ្ណោះ។

    លោក​បណ្ឌិតពន្យល់​ថា៖ «ក្នុង​មេគោ ​1​ក្បាលបើ​ផ្ដល់​ចំណី​ឱ្យ​វា​បាន​ត្រឹមត្រូវ គឺ​វា​អាច​ផ្ដល់​ទឹកដោះ​បាន​ពី ​20​ទៅ ​30​លី​ត្រ​ក្នុង​​ថ្ងៃហើយ​ប្រសិនបើ​កសិករ ​1​គ្រួសារ​ចិញ្ចឹម​គោ​​10​ក្បាលគឺ​អាច​រក​ចំណូល​បាន​ប្រមាណ​ជា ​100​ដុល្លារ​អា​មេ​រិ​កក្នុង ​1​ថ្ងៃ​ៗពីព្រោះ​ក្រុមហ៊ុន​អាច​ទទួល​ទិញ​ទឹកដោះគោឆៅថ្លៃ​ប្រមាណ​ 2,000​រៀលក្នុង​1​លី​ត្រ»​។

    ​ បណ្ឌិត សុខ ទូច បន្ដ​ថា៖ «ក្រុមហ៊ុន​ផលិត​ទឹកដោះគោ​នៅ​ខេត្តព្រះវិហារ​នេះគ្រោង​ចំណាយ​​ប្រាក់​វិនិយោគ​ប្រមាណ​ 2.5​លាន​ដុល្លារ​អា​មេ​រិ​កក្នុង​ការ​ទិញ​មេគោ និងស្ពែម ​Sperm របស់​គោបា​មក​បង្កាត់​ពូជ​ក្នុងស្រុកព្រមទាំង​ទិញ​ម៉ាស៊ីន​សម្រាប់​វេច​ខ្ចប់​ផលិតផល​ទឹកដោះគោដែល​ចេញពី​កសិដ្ឋាន​បញ្ជូន​ទៅ​លក់​តាម​ទីផ្សារទៀតផង»។

    លោកបណ្ឌិត​អះអាង​ថា ប្រសិនបើ​ការ​សាកល្បង​លើ​មេគោ​ចំនួន ​200​ក្បាល​នេះ​ទទួល​បាន​ជោគជ័យ ជំហាន​បន្ដ​ក្រុមហ៊ុន​មាន​គម្រោង​បង្កើត​ធនាគារ​គោដោយ​បង្កាត់​ពូជ ​និង​ទិញ​មេគោ​ជា​ច្រើន​មក​ប្រវាស់​ឱ្យ​ប្រជាពលរដ្ឋ​នៅ​តំបន់​ជុំវិញទីនោះ​ជា​អ្នក​ចិញ្ចឹម រីឯ​ក្រុមហ៊ុន​ជា​អ្នក​ដើរ​ប្រមូល​ទិញ​ទឹកដោះគោ​ស្រស់​ពី​កសិករហើយ​វេច​ខ្ចប់​សម្រាប់​នាំ​យក​ទៅ​លក់​នៅ​ទីផ្សារ​ជាបន្ត។

    សូមបញ្ជាក់ថាគម្រោងបង្កើត​តំបន់​ឧទ្យាន​ចិញ្ចឹម​ និង​ផលិត​ទឹកដោះ​គោស្រស់​ដំបូង​បង្អស់នេះនឹងបង្កើតឡើង​នៅក្នុង​​ទឹកដីឧទ្យាន​រាជបណ្ឌិត្យ​សភាកម្ពុជា​ តេជោ​សែន​ឫស្សីត្រឹប ​​នៅលើ​ទឹកដី​ស្រុក​ឆែប នៃ​ខេត្តព្រះវិហារ។ ​គម្រោង​មួយ​នេះត្រូវ​បាន​ ​សម្តេច ហ៊ុន សែន ​​គាំទ្រ និងថែមទាំងបាន​ផ្តល់ជាថវិកាចំនួន 10ម៉ឺនដុល្លារក្នុងការចូលរួមទិញមេគោដើម្បីចិញ្ចឹម និង​អំពាវនាវ​ឱ្យសប្បុរស​ជននានា​ចូល​រួម​ក្នុង​កិច្ចការ​នេះទៀតផង​។

    ឧទ្យានជាតិមួយនេះ(ឧទ្យាន​រាជបណ្ឌិត្យ​សភាកម្ពុជា​ តេជោ​សែន​ឫស្សីត្រឹប)​មាន​ផ្ទៃដី​សរុប​ចំនួន​ 11,435​ហិកតាត្រូវ​បាន​បង្កើត​ឡើង​ដោយព្រះរាជក្រឹត្យនៅឆ្នាំ2014។​ ​តំបន់នេះ​មានលក្ខណៈ​ពិសេស​ច្រើនយ៉ាង ​ដូចជាមានធនធានជីវៈចម្រុះ​ដែលជា​ភាពកម្រនៃធម្មជាតិរុក្ខជាតិ និងសត្វ ​មរតកវប្បធម៌ប្រវត្តិសាស្ត្រកម្ពុជា មជ្ឈមណ្ឌល​ផលិត​ដែក​ខ្មែរបុរាណ​ដែល​អាចមាន​អាយុកាល​ជាងមួយ​ពាន់ឆ្នាំ​ ក៏ដូចជាទឹក​ជ្រោះព្រះនិម្មិត ប្រាសាទព្រះវិហារជាដើម ដែលវា​អាចឱ្យ​ទាញ​ប្រយោជន៍យ៉ាង​ច្រើនសម្រាប់​សហគមន៍ និងទាក់ទាញ​ភ្ញៀវទេសចរទៀតផង៕

  • តារាជើងចាស់ ស៊ិន ឧត្តមផល្លា បញ្ចេញមតិចំពោះ «ការស្លៀកពាក់សិចស៊ី» របស់តារាសិល្បៈ

    តារាជើងចាស់ ស៊ិន ឧត្តមផល្លា បញ្ចេញមតិចំពោះ «ការស្លៀកពាក់សិចស៊ី» របស់តារាសិល្បៈ

    ប្រធានបទ «ការស្លៀកពាក់សិចស៊ី» របស់តារាសិល្បៈស្រី កំពុងមានការចាប់អារម្មណ៍ខ្លាំងពីសំណាក់មហាជន និងមិត្តសិល្បករជាច្រើន ហើយយ៉ាងណាមិញ តារាចម្រៀង និងសម្ដែងជើងចាស់ អ្នកនាង ស៊ិន ឧត្តមផល្លា ក៏បានធ្វើការចាប់អារម្មណ៍ចំពោះបញ្ហានេះដែរ ស្របពេលក្រសួងវប្បធម៌ និងវិចិត្រសិល្បៈកំពុងមានវិធានការក្ដៅក្នុងការដាក់ពិន័យចំពោះតារារូបណាដែលបង្ហាញភាពសិចស៊ីហួសហេតុពេកលើបណ្ដាញសង្គម។

    ផ្អែកលើគណនីហ្វេសប៊ុក ផ្លូវការរបស់អ្នកនាងស៊ិន ឧត្តមផល្លា បានសរសេរសាររៀបរាប់ថា «ឱ! ប្រទេសកម្ពុជារបស់ខ្ញុំអើយ កាលណាបានជឿនលឿនដូចប្រទេសគេទៅ? អ្នកនិយមស្លៀកពាក់បែបសុភាពរាបសារ ក៏សុភាពរាបសាទៅតាមបែបផែនរបស់ពួកគាត់ទៅ អ្នកនិយមស្លៀកពាក់បែបសិចស៊ី ក៏តាមបែបផែនរបស់ពួកគាត់ដែលនិយមទៅ សំខាន់គេចេះស្លៀកពាក់ទៅតាមពេលវេលា កាលៈទេសៈស្ថានភាព និងទីកន្លែងដែលគួរស្លៀកពាក់ ឬមិនគួរ ហេតុអីក៏ប្រទេសមួយនេះ ហាក់ដូចជាគាបសង្កត់ផ្លូវចិត្តរបស់មនុស្សគ្រប់គ្នាខ្លាំងម្ល៉េះ? រកតែគេធ្វើអ្វីទៅតាមចិត្តគេមិនបាន! តើមានអារម្មណ៍ថា ខ្លោចចិត្តទេដែលកើតនៅលើប្រទេសមួយនេះ?»។

    គួរបញ្ជាក់ដែរថា អ្នកនាង ស៊ិន ឧត្តមផល្លា បានធ្វើការបញ្ជាក់ពីការបង្ហោះសារមួយនេះថា អ្នកនាងមិនបានចង់ល្បីនោះទេ គឺគ្រាន់តែវាជាអារម្មណ៍ពិតរបស់អ្នកស្រី តែប៉ុណ្ណោះ មិនបានចង់ក្លាយខ្លួនជាជនល្បីនោះទេ។

    ចុះប្រិយមិត្តទាំងអស់គ្នាវិញ យល់ឃើញយ៉ាងណាដែរ?៕

  • ទីផ្សារ​អា​ផាត​មិន​ស្ងប់ស្ងាត់ តែ​នៅតែមាន​សញ្ញា​វិជ្ជមាន

    ទីផ្សារ​អា​ផាត​មិន​ស្ងប់ស្ងាត់ តែ​នៅតែមាន​សញ្ញា​វិជ្ជមាន

    លោក​ឧកញ៉ា នួន រិទ្ធី អគ្គនាយក​ក្រុមហ៊ុន Khmer Foundation Appraisal (KFA) បាន​មានប្រសាសន៍ប្រាប់​សារព័ត៌មាន ឡា​រ៉ែ​ន​ពាណិជ្ជ​ថា ទីផ្សារ​អា​ផាត​មិន​នៅតែមាន​សញ្ញា​វិជ្ជមាន មិន​ស្ងប់ស្ងាត់​ដូច​ការលើកឡើង​កន្លង​មក​នោះទេ ដោយ​ទីផ្សារ​នេះ​ពុំមានសញ្ញា​ណាមួយ​គួរឱ្យ​បារម្ភ​នោះឡើយ ព្រោះ​តម្រូវការ​ការិយាល័យ​ទំនើប​នៅ​រាជធានី​ភ្នំពេញ ពិសេស​ការិយាល័យ​នៅតាម​បណ្ដា​អគារខ្ពស់ៗកំពុង​កើនឡើង​ខ្លាំង ដោយសារ​កំណើន​នៃ​ការវិនិយោគ និង​មាន​ក្រុមហ៊ុនថ្មីៗបង្កើតឡើង​កាន់តែច្រើន។ លោក​ឧកញ៉ា​បាន​មានប្រសាសន៍ថា៖ “ទីផ្សារ​អា​ផាត​មិន​មិនបាន​មើលឃើញថា អ៊ូអរ​គគ្រឹកគគ្រេង​ដូច​ការទិញ​លក់​នៅលើ​ទីផ្សារ​អចលនទ្រព្យ​ដូចជាដីធ្លី ផ្ទះសំបែង ដីឡូត៍ បុរី​លំនៅឋាន ឬ​បុរី​បែបទំនើបៗមែន តែ​តាម​ការសង្កេត​វិញ នៅ​រាជធានី​ភ្នំពេញ​គឺជា​គោលដៅ​ដំបូង​បំផុត​សម្រាប់​អា​ផាត​មិនដែល​ការជួល​មាន​ភាគរយ​ខ្ពស់ គឺ​នៅ​កន្លែងនីមួយៗចន្លោះ​ពី70% ទៅ80% ដូចជា​តំបន់​បឹងត្របែក​រក​ជួល​មិនបាន​ផង‟។

    លោក​ឧកញ៉ា នួន រិទ្ធី អគ្គនាយក​ក្រុមហ៊ុន Khmer​ Foundation Appraisal (KFA)

    ស្របគ្នា​នេះដែរ កញ្ញា​លីម សុខា​ដាវី​ន ប្រធាន​ផ្នែក​លក់​នៃ​ក្រុមហ៊ុន FURI Real Estate បានឱ្យដឹងថា សព្វថ្ងៃ​តម្រូវការ​ការិយាល័យ​បែប​ប្រណីត​នៅតាម​អគារខ្ពស់ៗ មាន​កំណើន​យ៉ាងខ្លាំង​ក្នុង​រាជធានីភ្នំពេញ ជាពិសេស​នៅ​កណ្តាល​រាជធានី​ភ្នំពេញ​តែម្ដង ស្រប​ពេលដែល​ទីក្រុង​ភ្នំពេញ​ពុំមាន​ដី​ច្រើន​ដើម្បី​សាងសង់​ការិយាល័យ។ ម្យ៉ាងវិញទៀត​ការិយាល័យ​ប្រភេទ​នេះ​បាន​ទាក់ទាញ​ការវិនិយោគ និង​សកម្មភាព​អាជីវកម្ម​ជាច្រើន​ផងដែរ។

    កញ្ញា​បានបន្តថា ជាក់ស្ដែង​គម្រោង​លក់ការិយាល័យ​ចាប់ពី​ជាន់​ទី13 ដល់​ជាន់​ទី28 ចំនួន 250យូ​នី​ត ដែល​ក្រុមហ៊ុន​ចាប់ផ្ដើម​លក់​កាលពីដើមឆ្នាំ​រហូតមក​ទល់​ពេលនេះ បាន​លក់ដាច់​អស់​ជាច្រើន​ប្រមាណ 90%ហើយ។ កញ្ញា​បន្តថា អតិថិជន​ដែល​សម្រេច​ទិញ​បន្ទប់​ការិយាល័យ​ពី​ក្រុមហ៊ុន FURI Real Estate មាន​ទាំង​ជនជាតិខ្មែរ និង​ជនបរទេស ដោយ​ក្នុងនោះ​អ្នកវិនិយោគ​ជនជាតិ​ចិន​ជាច្រើន​បាន​ទិញ ការិយាល័យ​សម្រាប់​បម្រើ​ការងារ​របស់ខ្លួន។

    បើតាម​លោក​ឧកញ៉ា នួន រិទ្ធី បានឱ្យដឹងថា ទន្ទឹមនឹង​វិស័យ​មួយ​នេះ​ទទួលបាន​ទំនុកចិត្ត​ពី​សំណាក់​អតិថិជន​ដោយ​បានមក​ទទួលយក​សេវា​រស់នៅ ឬ​ជួល​អា​ផាត​មិន​ធ្វើជា office ហើយ​នោះ យើង​មើលឃើញ​សេវា​ប្រកួតប្រជែង​មួយទៀត​គឺ ខុន​ដូ។ ខុន​ដូក៏មាន​ការវាយលុក​ទីផ្សារ​ទិញ-លក់-ជួល​ខ្លាំង​ដែរ ទាំង​ការលក់ និង​ការជួល​ដែល​ប្រកួតប្រជែង​នឹង​អា​ផាត​មិន តែ​ការ​រស់នៅក្នុង​ខុន​ដូ និង​អា​ផាត​មិន វា​មិនជា​ខុសគ្នា​ប៉ុន្មាន​ទេ គ្រាន់តែ​អា​ផាត​មិនជា​គោលដៅ​សម្រាប់តែ​អ្នក​ដែល​គាត់​មាន​ប្រាក់​វិនិយោគ គាត់​ធ្វើ​ដើម្បី​ជួល តែ​មិន​លក់​ទេ។

    លោក​ឧកញ៉ា​បាន​បញ្ជាក់ថា បច្ចុប្បន្ន​មានការផ្គត់ផ្គង់​ពី​ខុន​ដូ​ច្រើន វា​ក៏​ធ្វើឱ្យមាន​ការប៉ះពាល់​ដល់​អា​ផាត​មិន​ដែរ។ រូបភាព​ជារួម កំណើន​ភ្ញៀវ​ចូល​ស្នាក់​នៅក្នុង​ខុន​ដូ​ក៏​កើនឡើង​ច្រើន​ដែរ ធ្វើឱ្យ​ការផ្គត់ផ្គង់​វា​លឿន​ដែរ​ដែល​អាច​ប្រកួតប្រជែង​គ្នា​បាន។ ការផ្គត់ផ្គង់​យើង​រហ័ស ធ្វើឱ្យ​អគារខ្ពស់ៗក្នុង​ទីក្រុង​ភ្នំពេញ​ដែលមាន​ប្រមាណ​ជា 1,000អគារ ចាប់ពី​ជាន់​ទី9 ឡើងទៅ រហូត​ដល់ទី 45ជា​ជាន់​ចុងក្រោយ​សម្រាប់​ការ​ស្នាក់នៅ និង​ធ្វើជា​ការិយាល័យ ហើយ​ឥឡូវ​មានការ​បន្ត​សាងសង់​ជាន់​ទី55 ដល់ទី62 ក៏​កំពុង​ចាប់ផ្តើម​សាងសង់​បន្តទៀត​ដែរ។

    មួយរយៈ​ចុងក្រោយ​នេះ គ្រប់គ្នា​មើលឃើញថាវិស័យ​មួយ​នេះ​ហាក់ដូច​ជាមាន​ភាព​នៅ​ទ្រឹង​ដោយសារតែ​អ្នកប្រើប្រាស់​មាន​កម្រិត​ក្នុងការ​ប្រើប្រាស់​អា​ផាត​មិន និង​ខុន​ដូ ដូច្នេះ​យើង​មើលឃើញថា​ខុន​ដូ និង​អា​ផាត​មិន​ភាគច្រើន​បាន​កើតឡើង​ច្រើន​នៅ​តំបន់​ខណ្ឌទួលគោក ខណ្ឌចំការមន និង​ខណ្ឌ7មករា​ដែល​វា​មាន​កម្រិត​ខ្ពស់ និង​កម្រិត​មធ្យម។

    លោក​ឧកញ៉ា​បាន​ពន្យល់​បន្ថែមថា យើង​មើលឃើញថា កម្រិត​នេះ គឺ​វា​មានតម្លៃ​ជួល ចាប់ពី400 ទៅ600ដុល្លារ​ក្នុង​មួយ​បន្ទប់​គេង។ វា​អាស្រ័យ​ទៅតាម​ទីតាំងនិង​កន្លែង​ដែរ ខ្លះ​គាត់​ធ្វើ​អា​ផាត​មិនមែន តែ​ទីតាំង​គាត់​មិន​អំណោយផល ដោយ​ពុំមាន​ផ្នែក​នៃ​ទីក្រុង​ទំនើប និង​ការផ្គត់ផ្គង់​បែប lifestyle មិន​សម្បូរបែប ក៏​មិន​ទទួលបាន​ជោគជ័យ​ដែរ។ អ៊ីចឹង​យើង​មើល​តែ​ទៅលើ​ជ្រុង​ណាមួយ​មិន​បានទេ គឺ​យើង​ត្រូវ​មើល​ជារួម។ ដូច្នេះ​ក្នុង​ការធ្វើ​អា​ផាត​មិន ឬ​ខុន​ដូ គេ​ត្រូវ​ជ្រើសរើស​ទីតាំង​ដែល​នៅ​ជិត​កន្លែង​ប្រជុំជន ទីតាំង​ជិត​មណ្ឌល​ពាណិជ្ជកម្ម ជិត​មន្ទីរពេទ្យ សាលារៀន ជិតកន្លែងធ្វើការ ជាដើម ទើប​ជា​កន្លែង​គោលដៅ​ដែល​គេ​ចូលចិត្ត​ស្នាក់នៅ ដូចជា​តំបន់​បឹង​កេងកង ទួល​ទំពូង ទួលគោក មិនមាន​ការលំបាក​ច្រើន​ទេ​សម្រាប់​ខុន​ដូ ឬ​អា​ផាត​មិនដែល​ស្ថិតនៅក្នុង​តំបន់​ទាំងនោះ។

    ការជួល​ក៏​មិនមាន​តម្លៃ​ខ្ពស់​ពេក​ដែរ គឺ​នៅមាន​តម្លៃ​សមរម្យ​នៅឡើយ ពោល​ពុំមាន​ការកើនឡើង​ទេ។ ថ្មីៗនេះ តម្រូវការ​ភាគច្រើន គឺ​ពី​ខាង​ជនជាតិ​ចិន​ដែល​គាត់​ជួលច្រើនៗប្រមាណ​ជា 60បន្ទប់​ឡើងទៅ។ ដោយសារ​ការផ្គត់ផ្គង់​មាន​ច្រើន ដូច្នេះ​តម្លៃ​នៅ​ទ្រឹង វា​មិនបាន​ឡើងថ្លៃ​ទេ ហើយក៏​មិន​ខុសគ្នា​ច្រើន​ដែរ គឺមាន​តុល្យភាព​នៅឡើយ តែ​នៅ​ថ្ងៃ​អនាគត​នឹងមាន​តម្រូវការ​ច្រើន​ខាង​អា​ផាត​មិន និង​ខុន-​ដូ​នេះ។ យើង​ក៏​ឃើញ​មាន​គម្រោង​អគារធំៗកំពុង​សាងសង់​ដែលមាន​ច្រើន​បន្ទប់​ដែល​មកទល់​បច្ចុប្បន្ន​មាន​ចំនួន​ច្រើន​ម៉ឺន ដល់​សែន​យូ​នី​ត​ឯណោះ បើ​សរុប​ចំនួន​បន្ទប់​ខុន​ដូ និង​អា​ផាត​មិន​ចូលគ្នា។

    បើ​គិត​ទៅលើ​ចំនួន​ជា​យូ​នី​ត​នោះ​គាត់​ពុំបាន​សិក្សា​ទៅលើ​ស​ន្ទ​ស្សន៍​នេះ​ទេ តែបើ​គិត​ជា (over view) លើសពី​ទិដ្ឋភាព​រួម ពាក់ព័ន្ធ​នឹង​អចលនទ្រព្យ យើង​មើល​ទៅតាម​ការបណ្តាក់ទុន​ដែល​មកដល់​បច្ចុប្បន្ន​មាន​របាយការណ៍​ខ្លះ​ថា យើង​មាន​ជាង 20ម៉ឺន​បន្ទប់​ហើយ។

    លោក​ឧកញ៉ា​បានបញ្ជាក់​ទៀតថា ជាធម្មតា អ្វីដែល​កំពុងតែ​មានកំ​ណើ​ន និង​មានការ​ចាប់អារម្មណ៍ គេ​តែងតែ​លើកឡើង ដូចជា​ការសាងសង់​បុរី គេហដ្ឋាន​បែប​សម័យថ្មី និង​សំណង់ផ្សេង។ល។ វា​ឆ្លុះបញ្ចាំង​ពីអ្វី​ដែល​កំពុង​ប្រតិបត្តិការ និង​ការលក់ តែ​វិស័យ​ខុន​ដូ និង​អា​ផាត​មិន​នេះ​វា​ពាក់ព័ន្ធ​នឹង​ការវិនិយោគ​ប្រើ​រយៈពេល​វែង ហើយ​អ្នក​ជួល​ស្នាក់នៅ​ក៏​មិនមែន​ដើម្បី​ចំណេញ​ដែរ។ អ្វីដែល​មានការ​លើកឡើង​នៅលើ​សារព័ត៌មាន​ពី​វិស័យ​ណាមួយនោះ​គឺជា​ការ​បង្ហាញថា វិស័យ​នោះ​មានការ​រីកចម្រើនតែ​សួរថា តើ​វា​មាន​ចីរភាព​ទេ​ការរីកចម្រើន​ហ្នឹង។

    ដូចជា​វិស័យ​អា​ផាត​មិនដែល​យើង​ថា​ស្ងាត់តែបើ​យើង​មើលទៅ ឃើញ​មាន​ការជួល មាន​អតិថិជនពេញៗ ជាការ​អភិវឌ្ឍ​ប្រកបដោយ​ចីរភាព តែ​យើង​មិនបាន​ចាប់អារម្មណ៍ ព្រោះ​យើង​បាន​ផ្តោត​តែ​លើ​អ្វីដែល​ពេញនិយម ផ្តោតលើ​អ្វីដែល​មាន​ផលចំណេញ​ខ្លាំង និង​អ្វីដែល​ទាក់ទាញ​ប៉ុណ្ណោះ។

    ជាការ​ប្រមើលមើល​ទៅលើ​វិស័យនេះ​ទៅ​ថ្ងៃ​ខាងមុខ លោក​ឧកញ៉ា​មានជំនឿថា វិស័យនេះ​នៅតែ​បន្ត​ការរីកចម្រើន ព្រោះ​កម្ពុជា​កំពុងតែ​ទាក់ទាញ​ការវិនិយោគ​ពី​បរទេស។ យោងទៅលើ​យុទ្ធសាស្ត្រ​របស់​រដ្ឋាភិបាល និង​ដោយសារ​កត្តា​សុខសន្តិភាព ស្ថិរភាព​នយោបាយ និង​កំណើនសេដ្ឋកិច្ច​ដ៏​រឹងមាំ​របស់​កម្ពុជា។ លោក​បន្តថា ចំនួន​អ្នកវិនិយោគ​អន្តរជាតិ​ជាច្រើន​បាននិងកំពុង​ចូលមក​កាន់​កម្ពុជា ហើយ​នៅពេល​ពួកគេ​ចូលមក ពួកគេ​ត្រូវការ​កន្លែង​ស្នាក់នៅ ហេតុនេះ​តម្រូវការ​អា​ផាត​មិនបាន​កើន​ឡើងជា​ស្វ័យប្រវត្តិ។

    លោក​ឧកញ៉ា​បន្តថា៖ “ខ្ញុំ​នៅតែមាន​សុទិដ្ឋិនិយមពី​ទីផ្សារ​អា​ផាត​មិន​នៅ​កម្ពុជា ហើយ​នៅតែ​គិតថា ចំនួន​អា​ផាត​មិនដែល​បាន​ដាក់ចូល​ទីផ្សារ​នៅពេល​បន្តបន្ទាប់​នេះ នៅតែ​មិនទាន់​អាចឆ្លើយតប​បាន​នឹង​តម្រូវការ​នៅឡើយ‟។ លោក​បន្តថា “កម្ពុជា​ជា​ផ្នែក​មួយ​នៃ​សហគមន៍​សេដ្ឋកិច្ច​អាស៊ាន​រហូតដល់​ឆ្នាំ2030 ទាំង​ទេសចរណ៍ ទាំង​ការវិនិយោគ ដែល​កម្ពុជា​កំពុង​ក្លាយជា​គោលដៅ​នៃ​ការវិនិយោគ​របស់​អ្នកវិនិយោគ​អន្តរជាតិ​ស្រាប់ ពេលនោះ​តម្រូវការ​អា​ផាត​មិន និង​ខុន​ដូ​នៅតែមាន​សញ្ញា​វិជ្ជមាន‟៕

  • Ronaldo បដិ​សេធ​លើ​ករណី​រំលោភ​តារា​បង្ហាញម៉ូដម្នាក់​នៅអាមេរិក​​កាលពីឆ្នាំ​2009

    Ronaldo បដិ​សេធ​លើ​ករណី​រំលោភ​តារា​បង្ហាញម៉ូដម្នាក់​នៅអាមេរិក​​កាលពីឆ្នាំ​2009

    ស្ត្រី​អាមេរិកម្នាក់ បាន​​ចេញមុខ​ជា​សា​ធារណៈ​ដើម្បី​ចោទ​ប្រកាន់​ថា តារា​បាល់​ទាត់​ដ៏ឆ្នើម Cristiano Ronaldo បាន​រំលោភ​រូប​​នាង​នៅ​ឯ​សណ្ឋា​គារ​1​ ក្នុង​ទីក្រុង Las Vegas កាលពី​​រយៈ​ពេល​ 9​ឆ្នាំមុន​។ នាង Kathryn Mayorga វ័យ​ 34ឆ្នាំ បាន​ប្រាប់​ទស្ស​នា​វដ្តី​អាល្លឺម៉ង់ Der Spiegel ថា​ នាង​បាន​ជួប​ខ្សែ​ប្រយុទ្ធ​អន្តរ​ជាតិ​ព័រ​ទុយ​ហ្គាល់​រូបនេះ ក្នុង​ទីក្រុង Las Vegas នៅ​ឯ​ក្លិប​រាត្រី​មួយ កាលពី​ខែមិថុនា ឆ្នាំ​2009​។ ក្រោយ​មក នៅ​​ឯ​បន្ទប់​របស់​គេក្នុង​សណ្ឋា​គារ Palms Place នាង​បាន​ចោទ​ប្រកាន់​ថា Cristiano Ronaldo បាន​​រំលោភ​រូប​នាង ហើយ​បន្ទាប់​មកបាន​សុំ​អភ័យ​ទោស​នាង​វិញ​។

    មេធាវី​របស់ Ronaldo កាលពីថ្ងៃ​សុក្រ បាន​បញ្ជាក់​ថា ពួក​គេ​នឹង​ប្តឹង​ទស្ស​នាវដ្តី​របស់​អាល្លឺ​ម៉ង់ សម្រាប់​ការ​ចេញ​ផ្សាយ​ការ​ចោទ​ប្រកាន់​មិនផ្លូ​វការ​នេះ​។ Ronaldo វ័យ​ 33​ឆ្នាំ បាន​ច្រាន​ចោល​ការ​ចោទ​ប្រកាន់​នេះ ដោយ​ចាត់​ទុក​ថា ជា​​ព័ត៌​មាន​មិន​​ពិត ហើយ​រូប​គេ​បាន​បញ្ជាក់​ថា ករណី​ផ្លូវ​ភេទ​នេះ គឺ​ជា​ការ​ព្រម​ព្រៀង​ទាំង​សង​ខាង​។ មាន​​ព័ត៌​មាន​ចេញ​ផ្សាយ​ថា រូប​គេ​បាន​យល់​ព្រម​បង់​ប្រាក់​ឱ្យនាង Mayorga ចំនួន​287,000ផោន (ស្មើ​នឹង​37.4​ម៉ឺន​ដុល្លារ​អាមេរិក) ដើម្បី​រា​រាំង​មិន​ឱ្យ​រូប​​នាង​ប្តឹង​ពី​បទ​ឧក្រិដ្ឋ ដែលអាច​នឹង​​ធ្វើ​ឱ្យ​រូប​គេ​ជាប់​គុក​1​ជីវិត និង​រារាំង​មិន​ឱ្យ​នាង​និយាយ​រឿង​នេះ​ជា​សា​ធារណៈ​។ ប៉ុន្តែ បច្ចុប្បន្ន​មេ​ធាវី​​របស់​នាង កំពុង​តែ​ព្យា​យាម​លុប​ចោល​សំណង​​នោះ ហើយ​នាង​បាន​និយាយ​​ករណី​នេះ​ជា​លើក​ទី​1​។ ឯក​សារ​ផ្នែក​ច្បាប់​មួយ បង្ហាញពីការ​​ចោទ​ប្រកាន់​ផ្សេង​ៗ​ប្រឆាំង​នឹង Ronaldo ដែល​​ជា​អតីត​តារាឆ្នើម​របស់​ក្លិប Manchester United​។

    ឯក​សារ​ពី​តុលា​ការ​ដែល​ត្រូវ​បាន​ដាក់​ដោយ​មេធាវី​របស់​នាង បាន​សរសេរ​ថា៖ «Cristiano Ronaldo បាន​ទាញ​ជន​រង​​​គ្រោះ​ចូល​ក្នុង​បន្ទប់​ដេក និង​ទៅ​លើ​គ្រែ ហើយ​រូប​គេ​បានព្យា​យាម​ចាប់​បង្ខំ​ឱ្យ​នាង​រួម​ភេទ​ ទោះ​បី​នាង​ឆ្លើយ​ថា ទេ ក៏ដោយ​»​៕

    ប្រភព​ពី៖ The Straits Times

  • Hamiltonឈ្នះ​ការ​ប្រណាំង​នៅ​រុស្ស៊ី ដើម្បី​បន្ថែមពិន្ទុនាំ​មុខ​លើ​តារាង​ជើង​ឯក

    Hamiltonឈ្នះ​ការ​ប្រណាំង​នៅ​រុស្ស៊ី ដើម្បី​បន្ថែមពិន្ទុនាំ​មុខ​លើ​តារាង​ជើង​ឯក

    កីឡាករ​​ប្រណាំង​រថយន្ត Lewis Hamilton បាន​បង្កើន​ការ​នាំមុខ​របស់​គេ​នៅ​លើ​តារាង​ជើង​ឯក​ពិភព​លោក​ផ្នែក​បើករថយន្ត​ប្រណាំង​នៅឆ្នាំ​នេះ រហូត​ដល់​​ 50​ពិន្ទុ នៅពេល​ដែល​រូប​គេ​ដណ្តើម​បាន​ជ័យជម្នះ​​មួយ ក្រោម​ការ​​ជួយ​ពី​សំណាក់​​ក្រុម​បច្ចេក​ទេស​របស់ Mercedes ក្នុង​ព្រឹត្តិការណ៍ Russian Grand Prix កាលពីថ្ងៃ​អាទិត្យ​។

    ម្ចាស់​ការ​ពារ​ជើង​​ឯក​ពិភពលោក 4​សម័យ​​កាល​រូបនេះបាន​ចាប់​ផ្តើមការ​ប្រណាំង​ដោយ​ស្ថិតនៅលើ​លេខ​រៀង​ទី​2 តែត្រូវ​បាន​ជួយ​​ដោយ​​មិត្ត​រួម​ក្រុម Mercedes គឺ Valtteri Bottas ដែល​បាន​អនុ​ញ្ញាត​ឱ្យ​រូប​គេ​បើក​វ៉ា ហើយ​បន្ទាប់​មក បាន​ការ​ពារ​រូប​គេ​​មិន​ឱ្យ​រង​នូវការ​​ជែងវ៉ា​ពី​សំណាក់​កីឡាករ Sebastian Vettel របស់​ក្រុម Ferrari​ ទៀតផង។ ប្រធា​នា​ធិបតី​រុស្ស៊ី លោក Vladimir Putin ដែល​​បាន​អង្គុយ​ក្បែរ​លោក Bernie Ecclestone អតីត​ប្រធាន F1 ក្រោយពី​បាន​​ធ្វើ​ដំណើរ​ទៅ​ដល់​ទីលាន​ប្រណាំង Sochi Autodrom បានមើល​ឃើញកីឡាករ​អង់គ្លេស Hamilton ប្រើប្រាស់​យុទ្ធ​សាស្ត្រ​ដ៏គួរ​ឱ្យកត់សម្គាល់​របស់​ក្រុម Mercedes និង​បាន​បើក​វ៉ា​លើ Vettel ​ក្នុង​ល្បឿន​យ៉ាងល្អ​។

    Bottas បាន​ចាប់​​ផ្តើម​​ការ​ប្រណាំង​ដោយ​ស្ថិតក្នុង​លេខ​រៀង​នាំមុខ​​គេ​លើ​ទីលាន និងមិន​​មាន​ទឹកមុខ​រីក​រាយ​ឡើយ​ក្នុង​ពេល​ត្រូវ​បាន​ចោទ​សួរ​ទាក់​ទង​នឹង​ការ​ស្តាប់​ការ​បញ្ជា​របស់​ក្រុម​ដែល​​បាន​​រា​រាំង​​មិន​ឱ្យ​រូបគេ​ឈ្នះ​ការ​ប្រណាំង ខណៈ​ដែល​រូប​គេ​បានបញ្ចប់​​ក្នុង​ថិរ​វេលា​2.545​វិនាទី​ពីក្រោយ​កីឡាករ Hamilton ដែល​​ហាក់​មិន​ស្រណុក​ក្នុង​ខ្លួន​ឡើយ​​ចំពោះ​ស្ថាន​ភាពនេះឡើយបន្ទាប់​ពីការ​ប្រណាំង​។

    Vettel បាន​បញ្ចប់​ក្នុង​ចំណាត់​ថ្នាក់​លេខ​3 ហើយ​​កីឡាករ​អាល្លឺ​ម៉ង់​រូបនេះ បាន​ឃើញ Hamilton កាន់​តែ​បន្ថែម​ការនាំមុខ​របស់​គេ​នៅលើ​​តារាង​ពិន្ទុ​រួម​៕

    ប្រភព​ពី៖ Channel News Asia

  • ម៉ៃ សុគន្ធ ចេញមុខគាំទ្រកូនស្រីលោក ថៃ នរៈសត្យា ថា «ចង់ឱ្យគាត់ចងក្បិនស្លៀកសារុងមុជទឹកសមុទ្រមែន?»

    ម៉ៃ សុគន្ធ ចេញមុខគាំទ្រកូនស្រីលោក ថៃ នរៈសត្យា ថា «ចង់ឱ្យគាត់ចងក្បិនស្លៀកសារុងមុជទឹកសមុទ្រមែន?»

    គ្រប់គ្នាស្រាប់តែភ្ញាក់ព្រើត ខណៈដែលតារាប្រុសលោក ម៉ៃ សុគន្ធ ចេញមុខគាំទ្រកូនស្រីលោក ថៃ នរៈសត្យា គឺកញ្ញា ថៃ នារីសុជាតា ក្រោយពេលមានការចែករំលែកនូវរូបភាពសិចស៊ីព្រមជាមួយការបញ្ចេញសាររិះគន់លើនាងថា ឪពុកចេញលិខិតព្រមានគេមិនទាន់បានប៉ុន្មានផង បែរជាកូនស្រីខ្លួនឯងហ៊ានសិចស៊ីជ្រុលបែបនេះ។

    ជាការពិតណាស់ តារាចម្រៀងពូកែទើស លោក ម៉ៃ សុគន្ធ ម្តងនេះបែរជាបង្ហាញអារម្មណ៍ប្រឆាំងនឹងការរិះគន់ដោយគាំទ្រកញ្ញា ថៃ នារីសុជាតា ថានេះជាសិទ្ធឯកជនរបស់បុគ្គល ហើយពុំមែនជាការសម្តែង ឬច្រៀងបង្ហាញលើឆាកនោះទេ។

    លោក ម៉ៃ សុគន្ធ បាននិយាយថា «មិនកាន់ជើងទេ តែលោកអ្នករិះគន់ទាំងឡាយដូចលើសពេកហើយ រួមទាំងអ្នកសិល្បៈខ្លះដែលរិះគន់កូនស្រីលោក ថៃ នរៈសត្យា សួរថា​ កូនស្រីគាត់ជាអ្នកសិល្បៈមែន? ហើយគាត់ស្លៀកឈុតហែលទឹកហ្នឹងនៅលើឆាកតន្រ្តីមែន? ហើយចង់ឱ្យគាត់ចងក្បិនស្លៀកសារុងមុជទឹកសមុទ្រមែន»។

    ម្ចាស់បទ «មហាទើស» រូបនេះ បានបន្ដទៀតថា «អ្វីដែលបានឃើញ ខ្ញុំទទួលស្គាល់ថា គាត់ថតសិចស៊ីមែន តែនេះជារូបភាពអំឡុងពេលទៅកម្សាន្តនៅសមុទ្រ ឬកន្លែងលេងទឹក! ចង់សួរថាពេលដែលដើរលេងសមុទ្រហ្នឹងចង់ឱ្យគាត់ស្លៀកពាក់ក្បិន ឬចងសារុងចុះងូតទឹកសមុទ្រមែនទេ? ម្យ៉ាងទៀតបើចង់រិះគន់កូនគាត់ថា សិចស៊ីដូចជាលើសពេកហើយ ព្រោះបើសិនជាសិចស៊ីលើឆាកតន្រ្តីទើបជាការខុស តែនេះដើរលេងសមុទ្រតើ ហេតុអ្វីចាំបាច់លើកមករិះគន់»៕

  • កក្រើកទៀតហើយ! ក្រុម Plugger សម្ដែងចម្រៀងរ៉ុកលាយបញ្ចូលល្ខោនខោលធ្វើឱ្យគណៈកម្មការស្រក់ទឹកភ្នែក

    កក្រើកទៀតហើយ! ក្រុម Plugger សម្ដែងចម្រៀងរ៉ុកលាយបញ្ចូលល្ខោនខោលធ្វើឱ្យគណៈកម្មការស្រក់ទឹកភ្នែក

    នារាត្រីនៃវគ្គពាក់កណ្ដាលផ្ដាច់ព្រ័ត្រក្នុងកម្មវិធីប្រកួតប្រជែងទេពកោសល្យលំដាប់ថ្នាក់ពិភពលោក Cambodian’s got talent បេក្ខភាពក្រុមចម្រៀងបែបរ៉ុកដែលមានឈ្មោះថា Plugger ទទួលបានប៊ូតុងមាសពីគណៈកម្មការកិត្តិយសគឺលោក ឆន សុវណ្ណរាជ ហើយក្រុមក៏ទទួលបានសិទ្ធិទៅកាន់វគ្គផ្ដាច់ព្រ័ត្រតែម្ដង ដោយមិនចាំបាច់រង់ចាំការបោះឆ្នោតគាំទ្រពីសំណាក់មហាជននោះឡើយ។

    ដោយឡែកការសម្ដែងរបស់ក្រុមខាងលើនេះ បានលើកយកពីឈុតល្ខោនខោលខ្លីមួយ អមដោយវង់ភ្លេងពិណពាទ្យខ្មែរ និងអ្នកពោលខោលម្នាក់ដែលមានសំឡេងក្រអួនក្រអៅ ដែលរៀបរាប់ពីការអភិរក្ស និងស្រឡាញ់ល្ខោនខោលខ្មែរ រហូតធ្វើឱ្យមហាជន និងគណៈកម្មការគ្រប់រូបរំជួលអារម្មណ៍ ក្ដុកក្ដួលក្នុងចិត្ត ជាពិសេសគឺអ្នកនាង ខាត់ សុឃីម ទប់អារម្មណ៍មិនជាប់ ក៏ស្រក់ទឹកភ្នែកខណៈដែលកំពុងតែទស្សនាការសម្ដែង។ ការសម្ដែងនេះ មានការលាយបញ្ចូលគ្នារវាងវង់ភ្លេងពិណពាទ្យខ្មែរ និងចង្វាក់រ៉ុកដែលញ៉ាំងឱ្យកម្មវិធីទាំងមូលកក្រើកឆាកតែម្ដង។

    អ្នកនាង ខាត់ សុឃីម ជាគណៈកម្មការ បានពោលឡើងថា អ្នកនាងពិតជារំភើបហួសនឹងថ្លែង ព្រោះមិននឹកស្មានថា បានឃើញទស្សនីយភាពបុរាណបូកសម័យ ជាពិសេសគឺបែបរ៉ុក ដែលមានភាពអស្ចារ្យ និងបង្ហាញពណ៌សម្បុរជាជាតិខ្មែរ បានល្អដល់កម្រិតនេះទេ។ អ្នកនាងបន្ដថា កាន់តែរំភើបខ្លាំងជាងនេះទៅទៀតគឺ សាច់រឿងល្ខោនខោលខ្លី តែបង្កប់អត្ថន័យជ្រាលជ្រៅសម្រាប់កូនខ្មែរគ្រប់ជំនាន់ និងការថែរក្សា ស្រឡាញ់វប្បធម៌បុរាណ ដែលកន្លងមកធ្លាប់ត្រូវគេមិនឱ្យតម្លៃ ហើយពោលពាក្យថា អ្នកបុរាណជាអ្នកស្រែ មិនទាន់សម័យដូចគេ។

    បន្ទាប់ពីបានទស្សនាការសម្ដែងចប់ហើយ ទស្សនិកជនទាំងអស់ បានក្រោកឈរឡើងគោរព និងសម្ដែងការស្រឡាញ់ចំពោះក្រុមមួយនេះ  ដូច្នេះចង់ដឹងថា ទិដ្ឋភាពនាពេលនោះរំជើបរំជួលបែបណានោះ សូមទស្សនាវីដេអូខាងក្រោមនេះ ៖