Category: សង្គម និងសេដ្ឋកិច្ច

អស់ទ្រាំ!! លោកស្រី ងិន ម៉ានីយ៉ា ទម្លាយរូបថតអាពាហ៍ពិពាហ៍កូនស្រី ក្រោយរងការរិះគន់មិនសំចៃមាត់
កន្លងមកថ្មីៗនេះ គេមើលឃើញមានអ្នកហែកហួរថា «កូនស្រីមានកូន តែប្តីមិនដឹងនៅឯណា» ដោយប្រើប្រាស់ពាក្យមិនសមរម្យដល់កូនស្រីរបស់លោកស្រី ងិន ម៉ានីយ៉ា គឺកញ្ញា ថៃ នារីសុជាតា ដែលពាក្យអស់ទាំងនោះ ធ្វើឱ្យលោកស្រីអត់ទ្រាំមិនបាន ក៏បង្ហាញរូបភាព និងសារតបតទៅវិញនៅលើបណ្ដាញសង្គមហ្វេសប៊ុក។ ដោយលោកស្រីអះអាងថា កូនស្រីបានរៀបអាពាហ៍ពិពាហ៍តាមផ្លូវច្បាប់ត្រឹមត្រូវ មិនមែនមានកូនអត់ខាន់ស្លាទេ តែជាអកុសល ពួកគេបានចែកផ្លូវគ្នាវិញតែប៉ុណ្ណោះ។
សាររបស់ភរិយាឯកឧត្ដម ថៃ នរៈសត្យា រដ្ឋលេខាធិការក្រសួងវប្បធម៌ និង វិចិត្រសិល្បៈ បានបង្ហោះនាពេលថ្មីនេះថា « ម្នាក់ៗមានកូនប្រុសកូនស្រីដែលតែងនិយាយមើលងាយវាយប្រហារគេសាហាវៗណាស់។ ដូចកូនប្រុសខ្ញុំអ៊ីចឹង ទោះបីគ្នាកែខ្លួនហើយ ក៏នៅតែនាំគ្នាលើកយកមកហែកហួរគ្មានការពិចារណា ឯកូនស្រីខ្ញុំក៏រៀបការត្រឹមត្រូវ ថាក្មេងចុះមិនដឹងខ្យល់ មានមនុស្សចាស់ខ្លះក៏មិនដឹងខ្យល់ដែរ។ សូមជម្រាបថា ចៅប្រុសខ្ញុំ មិនមែនកូនអត់ខាន់ស្លាទេ សូមជ្រាប គ្រាន់តែពួកគេបានបែកចែកផ្លូវគ្នាប៉ុណ្ណោះ។ សូមកុំភ្លេចថា អ្នកឯងក៏មានកូនប្រុសកូនស្រីដែរណា ប្រយ័ត្នកម្មពៀរ ព្រោះកម្មពៀរមិនទៅណាឆ្ងាយទេ សងវិញលឿនៗណាស់ មុនធ្វើអីគិតមុខក្រោយ និងគ្រលាស់អណ្ដាតឱ្យបានសព្វគ្រប់សិនចាំបើកប្រហោងមាត់និយាយដើមគេ។ ចង់ឃើញរូបថតកូនស្រីខ្ញុំរៀបការទេ? សង្ឃឹមថា អស់លោកអ្នកដែលចូលរួមមិនទាន់ភ្លេច កាលហ្នុងក៏មានអ្នកសារព័ត៌មានចូលរួមយ៉ាងច្រើនដែរ»។
គួរបញ្ជាក់ផងដែរថា ក្រោយពីផ្ទុះព័ត៌មានរបស់កូនពាសពេញបណ្ដាញសង្គមហ្វេសប៊ុកកន្លងមក លោកស្រី ងិន ម៉ានីយ៉ា បានបង្ហាញទឹកចិត្តព្រួយបារម្ភ និងការពារចំពោះកូនស្រី បើទោះបីជាមានអ្នកលេងបណ្ដាញសង្គមជាច្រើនបានប្រើប្រាស់ពាក្យពេចន៍មិនសមរម្យ តែអ្នកម្ដាយរូបនេះ តែងតែចេញមុខជំនួសកូនស្រីជានិច្ច។ ពិតជាគួរឱ្យកោតគោរពមែន!៕
October 2, 2018
មករៀននៅភ្នំពេញ ត្រូវត្រៀមអ្វីខ្លះ?
បន្ទាប់ពីបុកពោះបារម្ភរឿងលទ្ធផលនៃការប្រឡងមធ្យមសិក្សាទុតិយភូមិរួចហើយ ការផ្លាស់ទីមកសិក្សានៅរាជធានីភ្នំពេញបានក្លាយជាចំណុចព្រួយបារម្ភ និងជម្រើសដ៏តឹងតែងមួយសម្រាប់សិស្សានុសិស្សនៅតាមបណ្តាខេត្ត ជាពិសេសអ្នក-រស់នៅតំបន់ឆ្ងាយពីរាជធានីភ្នំពេញ។
បើគិតតាមស្ថិតិនិស្សិតដែលបានបញ្ចប់ការសិក្សានៅកម្រិតឧត្តមសិក្សាឃើញថាមាននិស្សិតត្រឹមតែជាង 20%ប៉ុណ្ណោះ ដែលបានបញ្ចប់ដោយជោគជ័យ ខណៈសិស្សមិនតិចទេសម្រេចចិត្តមិនបន្តការសិក្សានៅឧត្តមសិក្សា។ បញ្ហាទាំងអស់នេះត្រូវបានគេមើលឃើញថា អាចកើតឡើង ដោយសារកត្តាជីវភាព កង្វះព័ត៌មាន និងឧបសគ្គតូចៗជាច្រើនផ្សេងទៀតដែលរុញច្រានឱ្យពួកគេមិនអាចបន្ត ឬសម្រេចចិត្តមិនបន្តការសិក្សានៅមហាវិទ្យាល័យ។ ចំពោះបញ្ហាកង្វះព័ត៌មានសិស្សមួយចំនួនមិនដឹងពីការសម្រេចចិត្តជ្រើសរើសមុខវិជ្ជាសិក្សា ការត្រៀមខ្លួនដើម្បីផ្លាស់ប្តូរបរិយាកាស និងតំបន់នៃការរស់នៅក្នុងពេលសិក្សាជាដើម។
លោក លី ពិសិដ្ឋ អតីតនិស្សិតដែលមកពីខេត្តសៀមរាបបានលើកឡើងថា ពីដំបូងគាត់មានការរារែកចំពោះការសម្រេចចិត្តបន្តការសិក្សានៅរាជ-ធានីភ្នំពេញ ព្រោះគាត់គិតថា ការរស់នៅរាជធានីភ្នំពេញលំបាកខ្លាំង ហើយត្រូវចំណាយច្រើន និងមិនស្គាល់ពីទីតាំងភូមិសាស្រ្តច្បាស់លាស់។ ម្យ៉ាងវិញទៀតពេលនេះមហាវិទ្យាល័យក៏មានច្រើនគួរសមដែរនៅទីរួមខេត្ត ហេតុនេះក៏ចង់សាកល្បងរៀននៅខេត្តដែរ តែចុងបញ្ចប់លោកក៏បានសម្រេចចិត្តចូលមកសិក្សានៅរាជធានីភ្នំពេញ ព្រោះចង់ជម្នះការលំបាក និងភាពរារែក របស់ខ្លួនឯង។ ពេលមកសិក្សានៅភ្នំពេញដំបូងបញ្ហាដែលជួបញឹកញាប់ជាងគេគឺ វង្វេងផ្លូវ ព្រោះមិនស្គាល់ទីតាំងច្បាស់លាស់ ហើយការធ្វើដំណើរក៏បារម្ភច្រើនរឿងប៉ូលិសផាក ព្រោះមិនធ្លាប់ជិះក្នុងទីក្រុង។ ពេលនោះ ចង់ទៅណាក៏ត្រូវពឹងមិត្តភក្តិ ឬទៅជាមួយគេទើបអាចទៅបាន។ លោក លី ពិសិដ្ឋ បាននិយាយថា៖ “ចំពោះការជ្រើសរើសសាលាវិញក៏ជាបញ្ហាមួយដែរ ព្រោះដំបូងឡើយមានជម្រើសច្រើន ឮតែគេថា សាលានេះល្អ ឬសាលានោះល្អតែមិនដឹងថាសាលានោះ នៅកន្លែងណា ហើយទៅដាក់ពាក្យតាមណាឡើយ។ ហេតុនេះបើមានបំណងមកសិក្សានៅភ្នំពេញ ប្អូនៗគួរតែចំណាយពេលវេលាមកស្នាក់នៅ និងស្គាល់សាលាឱ្យបានច្រើនបន្តិចដើម្បីងាយស្រួលរក ហើយមិនពិបាកក្នុងការសម្រេចចិត្ត បើជិតដល់ពេលបិទឈប់ទទួលពាក្យ ហើយមានអ្នកខ្លះបង្ខំចិត្តជ្រើសយកសាលាណាដែលមិនទាន់បិទ ឬចូលរៀនទាំងមិនពេញចិត្តក៏មាន”។
អតីតនិស្សិតខាងលើបានលើកឡើងផងដែរថាចំពោះកន្លែងស្នាក់នៅក៏ជាចំណុចមួយផងដែរដែលត្រូវគិតគូរ ព្រោះប្រសិនបើយើងស្វែងរកកន្លែងស្នាក់នៅមិនល្អអាចធ្វើឱ្យមានបញ្ហាប៉ះពាល់ដល់ការសិក្សាផងដែរ។ កន្លែងស្នាក់នៅ គួរជ្រើសរើសកន្លែងណាដែលមិនសូវមានតម្លៃខ្ពស់ពេកព្រោះមករៀន មិនមែនមកសោយសុខទេ តែក៏គួរស្វែងរកកន្លែងណាដែលមានសុវត្ថិភាព ហើយឆ្ងាយពីអ្នកផឹកស៊ីឡូឡា។ ប្រសិនបើជ្រើសរើសកន្លែងស្នាក់នៅមិនល្អ យើងអាចប្រឈមនឹងការរំខានច្រើន ហើយធ្វើឱ្យយើងមិនសូវសប្បាយចិត្តនៅពេលមកដល់ផ្ទះ ហើយចង់ស្រាវជ្រាវបន្ថែម តែអារម្មណ៍មិនមូល។
បង្ហាញពីចំណុចត្រូវត្រៀមខ្លួនពេលមកសិក្សានៅភ្នំពេញ និស្សិតឆ្នាំទី3 យុវតី ឡាយ សុភាវត្តី បានលើកឡើងថា ការមកសិក្សានៅភ្នំពេញ គឺជាជម្រើសមួយក្នុងការដើរចូលស្ថាប័នសិក្សាដែលពោរពេញដោយការប្រកួតប្រជែង ហេតុនេះការសិក្សាត្រៀមគឺជារឿងសំខាន់។ ការលើកឡើងបែបនេះមិនមែនមានន័យថា អ្នកសិក្សានៅតាមបណ្តាខេត្តមិនមានការប្រកួតប្រជែងនោះទេ តែភាគច្រើននៅរាជធានីភ្នំពេញ មាននិស្សិតមកពីគ្រប់ខេត្តក្រុងទាំងអស់ ហេតុនេះប្រសិនបើចង់ចាប់យកឱកាសអាហារូបករណ៍ ឬចូលសាលាជំនាញតឹងតែងដូចជា សាលាតិចណូ ឬសាលាពេទ្យជាដើម ចាំបាច់ត្រូវតែរៀនត្រៀមឱ្យបានមុនពេលប្រឡងប្រជែង។ ម្យ៉ាងវិញ ទៀតសិស្សានុសិស្ស ក៏គួរតែស្វែងយល់ឱ្យបានច្បាស់ពីព័ត៌មានតាមសាកលវិទ្យាល័យនីមួយៗឱ្យបានច្បាស់លាស់ជាមុន ដើម្បីកុំឱ្យចាញ់បោកសាលាមួយចំនួនដែលសន្សាឱ្យអាហារូបករណ៍ តែត្រូវបង់នេះ បង់នោះច្រើនជាដើម។
យុវតីខាងលើបានលើកឡើងផងដែរថា ថ្វីត្បិតតែការសិក្សានៅទីក្រុងមានឱកាសច្រើន មានសាកលវិទ្យាល័យច្រើន និងមានភាពទំនើបជាងនៅខេត្តក៏ដោយ តែសិស្សចាំបាច់ត្រូវមានការត្រៀមខ្លួនឱ្យបានល្អ ព្រោះបើមិនរៀនត្រៀមឱ្យបានល្អទេនោះ យើងនឹងមិនអាចទាញយកឱកាសល្អនោះបានទេ តែផ្ទុយមកវិញអាចចាញ់បោកគេ ឬទទួលយកឱកាសដែលអាចប៉ះពាល់ដល់អនា-គតក៏ថាបាន។ ក្រៅពីនេះ សិស្ស-និស្សិតដែលចង់ធ្វើការងារក្នុងពេលសិក្សាក៏ចាំបាច់ត្រូវប្រុងប្រយ័ត្នផងដែរ ចំពោះក្រុមហ៊ុនមួយចំនួនដែលបច្ចុប្បន្ននេះកំពុងទាក់ទាញឱ្យធ្វើការតាមអនឡាញ និងរកគ្នាបន្តបន្ទាប់ដើម្បីទទួលបានកម្រៃ។ មានសិស្សមិនតិចទេដែលលង់ខ្លួនមិនបានទាំងចំណូលហើយថែមទាំងខាតបង់លុយកាក់អស់រាប់រយដុល្លារទៀតផង៕
October 2, 2018
ទស្សនាវីដេអូភាពយន្ដឯកសារខ្លី «ព្រះវិហារវ័យចំណាស់ វត្តឧណ្ណាលោម» បេតិកភណ្ឌកម្ពុជា
វត្តឧណ្ណាលោម ជាវត្តមួយស្ថិតនៅក្នុងទីក្រុងភ្នំពេញ។ វត្តនេះស្ថិតនៅតាមបណ្ដោយមហាវិថីសុធារស ហើយក៏ជាវត្តមួយដែលមានវ័យចំណាស់ផងដែរ។ បើតាមពាក្យ ឧណ្ណា (មានន័យថា ‘ប្រជុំចិញ្ចើម’) + លោម (មានន័យថា ‘រោម’) សរុបគឺ រោមប្រជុំចិញ្ចើម។
នៅក្នុងវត្តនេះមានចេតិយដាក់ព្រះឧណ្ណាលោមរបស់ព្រះថេរមួយព្រះអង្គ វាបានពាក់ព័ន្ធក្នុងប្រវត្តិសាស្ត្រកាលពីជំនាន់ចម្បាំងស្ដេចកន និងចៅពញាចន្ទរាជា។ បើតាមសៀវភៅដែលជាស្នាព្រះហស្ដ របស់សម្តេចសង្ឃ ជួន ណាត ដែលត្រូវបានគេចែកជូនដល់ពុទ្ធសាសនិកជន ពេលដែលវិហារថ្មីមួយត្រូវបានសម្ពោធក្នុងវត្តឧណ្ណាលោម ក្នុងឆ្នាំ1936 បានពិពណ៌នាថា ស្តេចព្រះបរមរាជាពញាយ៉ាត បានធ្វើការប្តូរទីតាំងព្រះរាជវាំង ពីទួលបាសាណ ក្នុងខេត្តកំពង់ចាម មកទីក្រុងភ្នំពេញក្នុងឆ្នាំ1434 ហើយព្រះអង្គបានសាងសង់វិហារ ព្រះពុទ្ធសាសនា ចំនួន 7 ដែលក្នុងនោះរួមមាន វត្តឧណ្ណាលោម ដែលអារាមទាំងអស់ត្រូវបានបញ្ចុះសីមាទាំងអស់ក្នុងឆ្នាំ 1442 ក្រោមស្នាព្រះហស្ត ព្រះបាទសម្តេចពញាយ៉ាត មួយផងក្នុងទីក្រុងថ្មីនេះ ។
យ៉ាងណាមិញ វីដេអូរយៈពេលខ្លីនេះ បានឆ្លុះបង្ហាញអំពីការកសាងទីក្រុងតាមរយៈទំនៀមទម្លាប់ និងសាសនាព្រះពុទ្ធ ដែលនិពន្ធរឿងដោយ លោក សេង វិសុទ្ធ។
ចង់ដឹងថា តើវីដេអូភាពយន្ដឯកសារមួយនេះទាក់ទាញដល់កម្រិតណានោះ សូមគោរពអញ្ជើញទស្សនាដូចតទៅ ៖
https://youtu.be/d0x3dIrTEjM
October 2, 2018
Wilder ចាត់ទុក Joshua ជាមនុស្សកំសាកញី នៅមុនពេលប៉ះជាមួយ Fury
កីឡាករប្រដាល់ Deontay Wilder ដែលជាម្ចាស់ខ្សែក្រវាត់ទម្ងន់ធ្ងន់ពិភពលោករបស់ស្ថាប័ន WBC បានចាត់ទុកកីឡាករអង់គ្លេស Anthony Joshua «ជាមនុស្សកំសាកញី» សម្រាប់ការមិនអាចឈានដល់ការប្រកួត1 រវាងកីឡាករទាំង2 ពោលគឺក្នុងរយៈពេលប៉ុន្មានម៉ោងមុនពេលកីឡាករអាមេរិករូបនេះប៉ះជាមួយគូប្រកួតនាពេលខាងមុខរបស់គេគឺ Tyson Fury ក្នុងសន្និសីទសារព័ត៌មានមួយកាលពីថ្ងៃចន្ទ។ អង្គភាព Matchroom Boxing ដែលជាអ្នករៀបចំការប្រកួតរបស់ Joshua មិនបានឆ្លើយតបភ្លាមៗ ដើម្បីបកស្រាយឡើយ។
Wilder និង Fury បានចាប់ផ្តើមដំណើរផ្សព្វផ្សាយពីការប្រកួតរបស់ពួកគេក្នុងទីក្រុងឡុងដ៍ សម្រាប់ការប្រកួតនាថ្ងៃទី1 ខែធ្នូ ក្នុងទីក្រុង Los Angeles ខណៈពួកគេនឹងត្រូវប្រជែងយកសិទ្ធិទៅប្រកួតជាមួយនឹងកីឡាករ Joshua ដែលជាម្ចាស់ខ្សែក្រវាត់ IBF, WBA និង WBO នៅឆ្នាំ2019។
Joshua បានស្ថិតក្នុងការចរចាជាមួយនឹងក្រុមការងាររបស់ Wilder កាលពីដើមឆ្នាំនេះ ដើម្បីរៀបចំការប្រកួតមួយដែលនឹងផ្តល់ឱកាសសម្រាប់កីឡាករទាំង2 ក្នុងការក្លាយជាស្តេចប្រដាល់ទម្ងន់ធ្ងន់ ដែលគ្មានគូប្រជែងនៅក្នុងពិភពលោក។ ប៉ុន្តែទោះបីជាយ៉ាងណា ការពិភាក្សានានាបានទទួលបរាជ័យ ខណៈដែលកីឡាករទាំង2 បានស្តីបន្ទោសគ្នាទៅវិញទៅមកសម្រាប់ការបរាជ័យនេះ។
Joshua បានឡើងប្រកួតជាមួយនឹងកីឡាកររុស្ស៊ី Alexander Povetkin ជំនួសវិញនៅសង្វៀន Wembley កាលពីខែមុន ដោយរូបគេបានយកឈ្នះដើម្បីកត់ត្រាការមិនស្គាល់ចាញ់សោះជាលើកទី22 របស់គេ។ តែទោះបីជាយ៉ាងណា Wilder និង Fury បានបង្កើតឱ្យមានការចាប់អារម្មណ៍ផ្សេងៗ តាមរយៈការប្រកាសពីការប្រកួតរបស់ពួកគេ។ Wilder បានឱ្យដឹងកាលពីថ្ងៃចន្ទថា៖ «ហេ Joshua ខ្ញុំ និង Fury នឹងត្រូវប្រកួតគ្នាដើម្បីស្វែងរកអ្នកដែលខ្លាំងបំផុតក្នុងពិភពលោក ដើម្បីស្វែងរកអ្នកជាម្ចាស់ជើងឯក ដែលមានតែ1 ឈ្មោះតែ1។ ពេលខ្លះ អ្នកកំសាកពេកហើយក្នុងការបង្កើតឱ្យមានការប្រកួតនេះ»៕
ប្រភពពី៖ Channel News Asia
October 2, 2018
ដាំផ្កាម្លិះលើដីកន្លះហិកតា បេះផ្កាលក់បានពី10 ទៅ20ម៉ឺនរៀលរៀងរាល់ថ្ងៃ
ម្លិះជាផ្កាមួយប្រភេទដែលប្រជាជនខ្មែរនិយមចូលចិត្តយកទៅថ្វាយព្រះនៅរៀងរាល់ថ្ងៃសិល ឬយកធ្វើកម្រងផ្កា ក៏ដូចជាប្រើប្រាស់ក្នុងកម្មវិធីបុណ្យផ្សេងៗ ដូចជាឡើងគេហដ្ឋាន បុកគ្រឹះសាងសង់សំណង់ និងកម្មវិធីធំៗជាច្រើនទៀតរាប់មិនអស់ ដែលធ្វើឱ្យទីផ្សារផ្កាដ៏ក្រអូបប្រហើរមួយនេះមានតម្រូវការគ្រប់រដូវកាលមិនថា រដូវវស្សា ឬរដូវប្រាំងឡើយ។
លោកអ៊ំ រស់ សារ៉ុម កសិករដាំផ្កាម្លិះនៅក្នុងភូមិកោះក្របី ដែលបច្ចុប្បន្នត្រូវរដ្ឋាភិបាលកាត់បញ្ចូលមកក្នុងភូមិសាស្ត្រសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ មានប្រសាសន៍ថា គ្រួសារលោកអ៊ំក៏ដូចជាប្រជាពលរដ្ឋក្នុងភូមិកោះក្របីស្ទើរតែទាំងអស់ដែរបានចាប់យកមុខរបរដាំផ្កាម្លិះ តៗគ្នាតាំងពីដូនតាមកម៉្លេះក្រោយឆ្នាំ1979មក។ លោកអ៊ំមានប្រសាសន៍ថា ដើមឡើយប្រជាពលរដ្ឋក្នុងភូមិបានដាំផ្កាផ្សេងៗច្រើនប្រភេទទៀត ដូចជាផ្កាចន្ធូ ចំប៉ា ចំប៉ី និងរំដួល ជាដើម តែក្នុងចំណោមផ្កាទាំងនោះមានតែផ្លាម្លិះប៉ុណ្ណោះ ដែលមានទីផ្សារច្រើនជាងគេ ទើបពួកយើងនាំគ្នាដាំផ្កាម្លិះតៗគ្នាមករហូតមកទល់បច្ចុប្បន្ន។
លោកអ៊ំ រស់ សារ៉ុម កសិករដាំផ្កាម្លិះ
លោកអ៊ំបន្តថា សម្រាប់គ្រួសារលោកអ៊ំ ក៏មិនខុសពីគ្រួសារដទៃទៀតដែរ បានចាប់យករបរដាំផ្លាម្លិះនេះនៅលើដីទំហំជាងកន្លះហិកតាអស់រយៈពេលជាង 20ឆ្នាំមកហើយ ហើយវានៅតែផ្តល់ផលនៅឡើយ មិនទាន់ងាប់ដើមទៅវិញទេ ដែលជាធម្មតានៅខែវស្សានេះ គេអាចបេះបានចន្លោះពី4 ទៅ 5គីឡូក្រាមក្នុងមួយថ្ងៃ ប៉ុន្តែដោយសាររដូវវស្សាដើមម្លិះផ្តល់ផ្កាច្រើន បានធ្វើឱ្យតម្លៃរាងធ្លាក់ចុះច្រើន មួយគីឡូក្រាមបានតែ 25,000រៀលប៉ុណ្ណោះ សម្រាប់ម៉ូយបោះដុំដែលមកប្រមូលទិញដល់ផ្ទះ។ ប៉ុន្តែផ្កានេះអាចឡើងថ្លៃខ្លាំងនៅរដូវរងារដែលត្រជាក់ខ្លាំង ដោយយើងអាចលក់បាន 1គីឡូក្រាមថ្លៃដល់ទៅ15 ទៅ20ម៉ឺនរៀលឯណោះ ដោយសារនៅរដូវនោះផ្កាមិនសូវឱ្យផល ក្នុងមួយថ្ងៃយើងប្រមូលបានតែមួយគីឡូក្រាមជាងប៉ុណ្ណោះ។
លោកអ៊ំបានបន្តទៀតថា ការដាំផ្កានេះមិនសូវរំខានដល់សមាជិកគ្រួសារនោះទេ ពេលព្រឹកគ្រាន់តែនាំគ្នាពីរនាក់ប្តីប្រពន្ធទៅបេះផ្កា រយៈពេលជាងមួយម៉ោង ហើយយកមកថ្លឹងលក់ ឬអង្គុយដោតធ្វើជាកម្រងផ្កាជាងមួយម៉ោងទៀត ក៏យើងអាចលក់បានលុយប្រហែលជា10ម៉ឺនរៀលដែរក្នុងមួយថ្ងៃ ដែលអាចជួយឱ្យគ្រួសារមានជីវភាពធូរធារមួយកម្រិតមានប្រាក់សម្រាប់ចំណាយចាយវាយផ្សេងៗប្រចាំថ្ងៃ ដោយសារផ្កានេះវាផ្តល់ផលរាល់ថ្ងៃជាប្រចាំដែរ។ ដើមផ្កាម្លិះនេះមានលក្ខណៈងាយស្រួលដាំ និងថែទាំខ្លាំងណាស់ គឺដាំបានតែ2 ទៅ 3ខែ វានឹងចាប់ផ្តើមឱ្យផលជាបណ្តើរៗហើយ ហើយវាអាចរស់បានរហូតដល់30 ទៅ40ឆ្នាំ ឯណោះទើបវាងាប់ដើមទៅវិញ ឬបើសិនដើមវាចាស់ខ្លាំង យើងអាចកាប់ដើមនោះចោលមួយសា ហើយវានឹងលាស់មែកថ្មីៗចេញមកដូចយើងដាំថ្មីឡើងវិញអ៊ីចឹង និងអាចផ្តល់ផលយូរអង្វែងថែមទៀតផង។
ផ្កាម្លិះដែលប្រមូលផលបាន
ចំពោះបច្ចេកទេសនៃការដាំដុះ គឺមិនមានការលំបាកអ្វីខ្លាំងនោះទេ ដោយសារមានគេផ្សាំកូនដើមម្លិះលក់ មួយដើមតម្លៃតែ 1,500រៀលប៉ុណ្ណោះ។ ប៉ុន្តែមុននឹងដាក់ដាំ កសិករត្រូវភ្ជួរដីហាលចោលឱ្យស្ងួតដើម្បីសម្លាប់មេរោគមាននៅក្នុងដី និងសម្លាប់ពូជស្មៅឱ្យងាប់អស់ជាមុនសិន ងាយស្រួលនៅពេលដាំស្មៅមិនសូវដុះឡើងច្រើនមកបឺតដណ្ដើមយកជីវជាតិពីក្នុងដីដែលនាំឱ្យដំណាំផ្កាម្លិះលូតលាស់មិនសូវបានល្អ។ លោកអ៊ំបញ្ជាក់ថា នៅពេលគេភ្ជួរដីរួច កសិករត្រូវលើកដីជារងដែលមានគម្លាតឆ្ងាយពីគ្នាប្រវែង 1.8ម៉ែត្រចន្លោះពីរងមួយទៅរងមួយទៀត ហើយត្រូវដាក់ដាំជាជួរៗគម្លាតពីដើមមួយទៅដើមមួយទៀតចម្ងាយ 1ម៉ែត្រពីគ្នា។
លោកអ៊ំបន្តថា នៅពេលដាំរួច គេមិនលំបាកមើលថែទាំទេ គ្រាន់តែស្រោចទឹកមួយសប្តាហ៍ 2 ទៅ 3ដងដើមផ្កាម្លិះនឹងលូតលាស់ល្អឡើងមិនខាន តែបើសិនជាមេឃភ្លៀងគេមិនបាច់ស្រោចទឹកទេ រហូតបានអាយុ 3 ទៅ 4ខែ ផ្កាវានឹងឱ្យផល អាចឱ្យយើងបេះលក់បានបណ្តើរៗហើយ ហើយគេគ្រាន់តែបន្តជម្រះស្មៅនិងដាក់ជីឱ្យវាលូតលាស់រឹតតែល្អឡើង និងបានផលច្រើនប៉ុណ្ណោះ។ ប៉ុន្តែយ៉ាងណា ផ្កាម្លិះក៏ប្រឈមនឹងសត្វល្អិតបំផ្លាញច្រើនដែរ ជាពិសេសសត្វដង្កូវចូលស៊ីផ្កាតែម្តង ដែលតម្រូវឱ្យកសិករត្រូវចំណាយលុយទិញថ្នាំសម្លាប់សត្វល្អិត មកបាញ់លើផ្កាជាប្រចាំផងដែរ។
ចំណែកអ្នកមីង ពៅ លីណា ដែលកំពុងក្រងផ្កានេះលក់ទៅឱ្យម៉ូយក៏មានប្រសាសន៍ដែរថា ដោយសារអំណោយផលពីធម្មជាតិធ្វើឱ្យដីក្នុងភូមិកោះក្របីដែលនៅជិតមាត់ទន្លេនេះមានសភាពក្តៅ ហើយសើម មានជីវជាតិល្អ ទើបគេអាចដាំផ្កាម្លិះនេះបានដោយងាយស្រួល សម្រាប់ចែកចាយនៅលើទីផ្សារមិនថាតែនៅក្នុងក្រុងភ្នំពេញនោះទេ គឺអាចចែកចាយផ្ញើទៅឱ្យម៉ូយនៅទូទាំងប្រទេសទៀតផង ដែលនេះជាកត្តាមួយដែលជួយឱ្យជីវភាពប្រជាពលរដ្ឋក្នុងភូមិមានភាពល្អប្រសើរស្ទើរគ្រប់ៗគ្នា។
អ្នកមីង ពៅ លីណា កំពុងដោត និងក្រងផ្កាម្លិះ
គួរបញ្ជាក់ដែរថា ប្រជាពលរដ្ឋនៅក្នុងភូមិកោះក្របីខាងលើ មិនមែនប្រកបតែរបរដាំផ្កាម្លិះតែមួយមុខនោះទេ ពោលគឺនៅមានដាំដំណាំហូបផ្លែច្រើនប្រភេទទៀត ដូចជាចេក ស្វាយ ល្មុត មៀនខ្មែរដែលមានរសជាតិឆ្ងាញ់ មានក្លិនក្រអូប និងដំណាំបន្លែបង្ការជាច្រើនប្រភេទទៀតផងដែរ៕
October 2, 2018
សម្រាលកូនហើយ អ្នកនាង គង់ ចាន់ស្រីមុំ បង្ហាញរាងសិចស៊ីគ្មានស្នាមសង្វារ
នៅលើបណ្ដាញសង្គមហ្វេសប៊ុកគេមើលឃើញថា អ្នកម្ដាយសម័យថ្មី គង់ ចាន់ស្រីមុំ ទើបតែសម្រាលកូនស្រីបាន 3ខែប៉ុណ្ណោះ តែបានបង្ហាញពីរូបរាងសិចស៊ីដ៏ស្រឡូន គ្មានស្នាមសង្វារអ្វីបន្ដិចឡើយ ។ ការបង្ហាញរូបភាពក្នុងឈុតប៊ីគីនីនេះ បានធ្វើឱ្យមិត្តៗនារីចាប់អារម្មណ៍ចំពោះគន្លឹះនៃការថែរក្សារូបរាងកាយ វិធីការពារ និងវិធីបំបាត់ស្នាមសង្វារលើស្បែកពោះ និងដងខ្លួនជាខ្លាំង។ តែយ៉ាងណាមិញ តារាស្រីរូបនេះបានប្រកាសថា ខ្លួននឹងចែករំលែកបទពិសោធមួយនេះ។
អ្នកនាង គង់ ច័ន្ទស្រីមុំ បានបង្ហោះរូបភាពជាច្រើនសន្លឹកក្នុងឈុតប៊ីគីនីដោយបានរៀបរាប់ថា «សន្យាថា នឹងប្រាប់ពីការសម្រករាងដោយធម្មជាតិ ក្រោយសម្រាលកូនណា៎។ ការថែរក្សារាងក្រោយពេលសម្រាលកូន គឺជារឿងពិបាក តែការអត់ធ្មត់ និងព្យាយាម គឺជាគោលដៅ។ សំណាងហើយដែលបានឡេសង្វារអូនជួយខ្លះ មិនអ៊ីចឹងទេ បានផែនទីពិភពលោកបាត់»។ ម៉ាក់នាងតូច ម៉ូម៉ូ រូបនេះបានព្យាយាមសម្រកទម្ងន់អស់ជាច្រើនគីឡូ ក្រោយពេលសម្រាលកូនរួច ហើយអ្នកនាងថែមទាំងសន្យាថា នឹងចែករំលែកនូវបទពិសោធក្នុងការសម្រករាង ក្រោយពេលសម្រាលកូនរួចទៀតផង ។ បើទោះបីជាពេលនេះនាងសម្រករាងមិនទាន់បានដូចបំណងក្តី ប៉ុន្តែលទ្ធផលដែលនាងទទួលបាន គឺជិតបានមួយរយភាគរយហើយ ។
គួរបញ្ជាក់ផងដែរថា អ្នកគាំទ្រគ្រប់គ្នាភ្ញាក់ផ្អើលមិនស្ទើរទេ ខណៈដែលបានឃើញរូបរាងរបស់អ្នកនាង គង់ ចាន់ស្រីមុំ ក្រោយពេលសម្រាលកូនហើយ ពោលគឺ សិចស៊ីបញ្ចេញសាច់សខ្ចី ស្រស់ស្អាតដូចស្រីក្រមុំអីចឹង ហើយនៅតែទាក់ចិត្តស្វាមីឱ្យកាន់តែចាប់អារម្មណ៍ខ្លាំងថែមទៀត៕
October 2, 2018
វិស័យសេដ្ឋកិច្ចសំខាន់ៗចំនួន 12 ក្នុងសហប្រតិបត្តិការកម្ពុជា-ចិនមានតម្លៃជាង80លានដុល្លារ
ទឹកប្រាក់ដែលមានតម្លៃសរុបជាង 80លានដុល្លារអាមេរិកត្រូវបានចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការរវាងកម្ពុជាចិនលើវិស័យចំនួន12 កាលពីថ្ងៃទី13 ខែកញ្ញា ឆ្នាំ2018នៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិនក្នុងវេទិកាវិនិយោគធុរកិច្ច និងទេសចរណ៍នៅក្នុងពិធីតាំងពិព័រណ៍ពាណិជ្ជកម្មចិនអាស៊ានលើកទី15 ដែលរៀបចំឡើងដោយក្រសួងពាណិជ្ជកម្មកម្ពុជាសហការជាមួយលេខាធិការដ្ឋានពិព័រណ៍ចិន-អាស៊ាន។
អនុស្សរណៈទាំងនេះគ្របដណ្តប់លើកិច្ចសហប្រតិបត្តិការក្នុងវិស័យសំខាន់ៗដូចជា ការធ្វើធុរកិច្ចពាណិជ្ជកម្ម ការបណ្តុះបណ្តាលធនធានមនុស្សផ្នែកមគ្គុទេសក៍(អ្នកនាំភ្ញៀវទេសចរ) និងផ្នែកវិស្វកម្ម(ផ្លូវដែកល្បឿនលឿន ទំនប់វារីអគ្គិសនី និងប្រព័ន្ធធារាសាស្ត្រ) ការស្ថាបនាផ្លូវយន្តហោះ ការបង្កើតមហាវិទ្យាល័យស្រាវជ្រាវឧស្សាហកម្ម និងការកសាងមជ្ឈមណ្ឌលបណ្តុះបណ្តាលទេសចរណ៍Sino-ASEAN។
ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មបានបញ្ជាក់ថា នេះជាការឆ្លុះបញ្ចាំងពីការប្តេជ្ញាចិត្តរបស់កម្ពុជាក្នុងការចូលរួមកសាង “វិថីសូត្រសមុទ្រសតវត្សរ៍ទី21‟ និងគាំទ្រការអនុវត្ត “ផ្លូវនិងខ្សែក្រវាត់‟ ដើម្បីជំរុញការធ្វើសមាហរណកម្មសេដ្ឋកិច្ចទៅក្នុងតំបន់តាមរយៈវិស័យពាណិជ្ជកម្មវិនិយោគ និងទេសចរណ៍នៅក្នុងទីក្រុងណាននីងដ៏ស្រស់ឆើតឆាយនៃខេត្តក្វាងស៊ី។
លោកជំទាវ យ៉ាន ហ្ស៊ីចាន (Yan Zhichan) អនុប្រធាននៃរដ្ឋបាលតំបន់ស្វយ័តខេត្តក្វាងស៊ីបានគូសបញ្ជាក់ពីវឌ្ឍនភាពនៃកិច្ចសហប្រតិបត្តិការរវាងខេត្តក្វាងស៊ី និងកម្ពុជាលើវិស័យសេដ្ឋកិច្ច និងពាណិជ្ជកម្ម និងបានបង្ហាញជំនឿថា ការចុះអនុស្សរណៈយោគយល់គ្នានេះ នឹងជួយពង្រឹងកិច្ចសហប្រតិបត្តិការគ្រប់ជ្រុងជ្រោយដើម្បីឈានទៅកសាងវិថីសូត្រសមុទ្រដែលជាគំនិតផ្តួចផ្តើមដ៏មានសារៈសំខាន់បំផុតមួយក្នុងការអភិវឌ្ឍសេដ្ឋកិច្ច និងវប្បធម៌បែបទំនើបរវាងប្រទេសចិន និងពិភពលោកជាពិសេសជាមួយបណ្ដាប្រទេសក្នុងអាស៊ាន។
គួរបញ្ជាក់ដែរថា រៀងរាល់ព្រឹត្តិការណ៍ពិព័រណ៍ចិន-អាស៊ានតែងមានពិធីចុះហត្ថលេខាលើគម្រោងវិនិយោគ និងអនុស្សរណៈជាច្រើនរវាងវិនិយោគិន និងពាណិជ្ជករកម្ពុជា-ចិន ខណៈដែលគម្រោងវិនិយោគធំៗជាច្រើនរបស់ក្រុមហ៊ុនចិនបានមកវិនិយោគនៅក្នុងប្រទេសកម្ពុជាដែលមានដូចជាគម្រោងសាងសង់ស្ពានឆ្លងទន្លេមេគង្គ គម្រោងសាងសង់តំបន់សេដ្ឋកិច្ចពិសេសក្រុងព្រះសីហនុគម្រោងសាងសង់ផ្លូវល្បឿនលឿន គម្រោងសាងសង់ទំនប់វារីអគ្គិសនី និងគម្រោងសាងសង់ហេដ្ឋារចនាសម្ព័ន្ធដទៃផ្សេងៗទៀត ដែលទាំងអស់នេះសុទ្ធតែបង្ហាញឱ្យឃើញអំពីភាពស៊ីចង្វាក់គ្នានៃគោលនយោបាយរបស់ប្រទេសទាំង2 ដោយឈរលើកិច្ចសហប្រតិបត្តិការឈ្នះ-ឈ្នះដើម្បីតភ្ជាប់សមាហរណកម្មសេដ្ឋកិច្ចទៅក្នុងពិភពលោក។
សូមជម្រាបថា ទឹកប្រាក់វិនិយោគពីប្រទេសចិនមកកម្ពុជាបានកើនឡើងពី 900លានដុល្លារអាមេរិកនៅក្នុងឆ្នាំ2016 ដល់ 1.6ប៊ីលានដុល្លារអាមេរិកនៅក្នុងឆ្នាំ2017 ហើយនៅក្នុងរយៈពេល 7ខែនៃឆ្នាំ2018នេះ បានកើនឡើងដល់ 2.8ប៊ីលានដុល្លារអាមេរិក។ ទន្ទឹមគ្នានេះ ទំហំពាណិជ្ជកម្មទ្វេភាគីរវាងកម្ពុជា និងចិនបានកើនឡើងដល់ 5,8ប៊ីលានដុល្លារសហរដ្ឋអាមេរិកនៅក្នុងឆ្នាំ2017 គឺបានកើនឡើង 22%បើធៀបនឹងឆ្នាំ2016៕
October 2, 2018
រលាកឆ្នាំងអ៊ុត លាបថ្នាំដុសធ្មេញ បានឬទេ?
របួសដោយសាររលាកឆ្នាំងអ៊ុត ជាឧប្បត្តិហេតុដែលនរណាៗក៏មិនចង់ឱ្យកើតឡើងចំពោះខ្លួនឯងដែរ ព្រោះពេលត្រូវរលាកឆ្នាំងអ៊ុតនេះ វាទាំងឈឺផ្សា និងរមាស់ តែមិនអាចអេះបានឡើយ ខ្លាចក្លាយជាសម្លាកស្នាមលើខ្លួនរហូត និងអ្នកខ្លះថែមទាំងដឹងមកទៀតថា ពេលដែលត្រូវរលាកបែបនេះ គេឱ្យយកទឹកឃ្មុំ ឬថ្នាំដុសធ្មេញមកលាបពីលើកន្លែងរលាកនោះ ដូច្នេះឥឡូវនេះយើងនាំគ្នាមកមើលចម្លើយថា ការពិតទៅ តើវិធីហ្នឹងអាចប្រើបានឬទេ? ហើយតើនឹងមានវិធីមើលថែទាំរបួសរលាកឆ្នាំងអ៊ុតនេះយ៉ាងណា ដើម្បីឱ្យឆាប់ជា?
អាការរបស់មុខរបួសដែលរលាកដោយឆ្នាំងអ៊ុត
ស្បែកឡើងក្រហម ឈឺផ្សាក្ដៅ អ្នកខ្លះស្បែកអាចមានឡើងពងបែកទៀតផង។
វិធីបឋមព្យាបាលដំបូង
1. ស្រោចទឹកលើកន្លែងរលាកនោះ ឬត្រាំក្នុងទឹកស្អាតយ៉ាងតិចបំផុត 10នាទី ឬរហូតទាល់តែអាការឈឺក្ដៅផ្សានេះរលាយបាត់អស់។ ហាមប្រើទឹកកក ឬទឹកត្រជាក់ខ្លាំងជាដាច់ខាត។
2. ផ្ដិតមុខរបួសឱ្យស្ងួត មិនត្រូវរុំបិទមុខរបួសឡើយ។
3. លាបដោយថ្នាំសម្រាប់ព្យាបាលរបួសរលាកភ្លើង ឬរលាកទឹកក្ដៅ។
4. បើឈឺ ចូរលេបថ្នាំបំបាត់ការឈឺចាប់។
5. បើមុខរបួសមានពងបែក ចូរលាងមុខរបួសដោយទឹកស្អាត បិទដោយបង់បិទរបួស និងលាងសម្អាតមុខរបួសមួយថ្ងៃម្ដង
ចំណុចគួរប្រយ័ត្ន
* កុំ! ប៉ះ ឬចាប់មុខរបួសដោយមិនចាំបាច់។
* កុំ! ចោះ ជោះ ឬធ្វើឱ្យពងទឹកលើមុខរបួសរលាកឆ្នាំងអ៊ុត ឬទឹកក្ដៅនោះបែកឱ្យសោះ។
* កុំ! យកសម្ភារក្នុងផ្ទះបាយ ដូចជាម្សៅគ្រីម ថ្នាំដុសធ្មេញ ទឹកត្រី ខ្លាញ់ ឬប្រេង ម្សៅ ឬសាប៊ូ ជាដើម មកលាបមុខរបួស ព្រោះវានឹងធ្វើឱ្យមុខរបួសឆ្លងមេរោគ។
មុខរបួសភ្លើងឆេះ រលាកទឹកក្ដៅនៅលើខ្លួនប្រាណ ឬដៃ ជើង
មុខរបួសដែលបណ្ដាលពីភ្លើងឆេះ ឬទឹកក្ដៅរលាកនៅលើដៃ ឬជើង ភាគច្រើនជាមុខរបួសកម្រិតទី2 ឬទី3 ដែលត្រូវតែបានទទួលការមើលថែទាំយ៉ាងដិតដល់អំពីគ្រូពេទ្យ ព្រោះអាចក្លាយកើតជាស្លាកស្នាម និងពិការនៅពេលក្រោយ។
វិធីបឋមព្យាបាល
1. ឱ្យជនរងគ្រោះគេងរាបស្មើនៅលើដី។
2. យកទឹកស្អាតមកស្រោចលើកន្លែងដែលរលាកច្រើនៗ និងយូររយៈពេលយ៉ាងតិច 10នាទី ឬរហូតទាល់តែអាការឈឺក្ដៅផ្សាថមថយចុះ។
3. ដោះគ្រឿអលង្ការ ដូចជា ចិញ្ចៀន ខ្សែដៃ ឬនាឡិកាចេញ។
4. បិទ ឬរុំមុខរបួសដោយក្រណាត់ ឬស្បៃស្អាត។
5. បើរលាកនៅលើដៃ អាចប្រើស្រោមដៃផ្លាស្ទិកហ៊ុមបាន។
6. រួចនាំទៅមន្ទីរពេទ្យជាបន្ទាន់។
ចំណុចហាមឃាត់!
ហាម! យកទឹកកក ឬទឹកត្រជាក់ខ្លាំងមកស្រោចលើកន្លែងរលាក។
ហាម! ទាញវត្ថុ ឬកម្ទេចកម្ទីដែលស្អិតជាប់ជាមួយមុខរបួសចេញ។
ហាម! ចាប់ ឬប៉ះមុខរបួសបើមិនចាំបាច់។
ហាម! ធ្វើឱ្យពងទឹកលើមុខរបួសរលាកភ្លើង ឬទឹកក្ដៅនោះបែក។
ហាម! លាបម្សៅក្រមួន ឡេ ទឹកត្រី ថ្នាំដុសធ្មេញ ឬវត្ថុផ្សេងៗ ក្រៅតែពីទឹកម្យ៉ាងប៉ុណ្ណោះ។
ហាម! ដោះខោអាវ តែបើចាំបាច់ ចូរប្រើវិធីកាត់ចេញដោយកន្ត្រៃ។
ហាម! ប្រើក្រណាត់ដែលមានរោម ឬសំលីមកបិទមុខរបួស៕
October 1, 2018
វិធីថែរក្សា “អវយវៈដែលដាច់ចេញពីខ្លួន” ដើម្បីទុកឱ្យពេទ្យតភ្ជាប់ឡើងវិញ
វិវឌ្ឍនាការក្នុងយុគសម័យនេះមិនដូចកាលពីសម័យមុនដែលបើមានអវយវៈណាមួយដាច់ចេញពីខ្លួនហើយ គឺដាច់ទៅតែម្ដង មិនអាចបណ្ដុះកោសិកាឱ្យដុះឡើង និងប្រើការបានដូចដើមវិញឡើយ តែការនឹងតភ្ជាប់អវយវៈណាមួយដែលដាច់ទៅហើយឱ្យត្រឡប់មកប្រើការបានដូចដើមវិញ ក៏មិនមែនជារឿងងាយដូចការគិតដែរ ព្រោះនៅមានបច្ច័យច្រើនយ៉ាងដែលជាអ្នកកំណត់ថា ការវះកាត់តភ្ជាប់អវយវៈផ្សេងៗនោះនឹងសម្រេចបានដោយជោគជ័យឬអត់។ ខាងក្រោមនេះជាចំណេះដឹងត្រួសៗចំពោះរឿងនេះដែល ឡារ៉ែន ចង់ឱ្យមិត្តអ្នកអានបានជ្រាបខ្លះៗ…។
ការវះកាត់តភ្ជាប់អវយវៈ
វេជ្ជបណ្ឌិតជំនាញខាងផ្នែកវះកាត់តភ្ជាប់អវយវៈបានអធិប្បាយថា ការវះកាត់តអវយវៈ មានន័យថា ការវះកាត់ភ្ជាប់អវយវៈដូចជា ដៃ ជើង ដៃ ម្រាម និងអវយវៈភេទ ក្រោយពីអវយវៈទាំងនោះត្រូវបានធ្វើឱ្យដាច់ចេញពីគ្នា ឬដាច់ចេញពីគ្នាត្រឹមតែមួយផ្នែកណាដោយពេទ្យនឹងធ្វើការតភ្ជាប់សរសៃឈាម ឬសាងសរសៃឈាមឡើងថ្មី ដើម្បីឱ្យឈាមហូរទៅចិញ្ចឹមសាច់ភ្នាសផ្នែកដែលនៅចុងអវយវៈដែលតនោះឱ្យនៅតែធ្វើការងារបានដូចប្រក្រតី។
អវយវៈដែលអាចវះកាត់តភ្ជាប់មកវិញដូចដើមបាន មានដូចជា ម្រាមដៃ ម្រាមជើង ម្រាមតែមួយ ឬច្រើនម្រាម ប្រអប់ដៃ ដៃទាំងមូល និងជើង។
វិធីជួសង្រេ្គាះអ្នករបួសដាច់អវយវៈ
1. យកក្រណាត់ស្អាត ឬស្បៃរុំរបួសមកសង្កត់បិទមុខរបួសឱ្យណែន ដើម្បីឃាត់ឈាមព្រោះនៅពេលដាច់អវយវៈណាមួយ ឈាមនឹងហូរចេញមកច្រើន ត្រូវប្រញាប់ឃាត់ឈាមមុនពេលអ្នករបួសមានអាការគាំងបាត់ស្មារតីបណ្ដាលមកពីការខ្វះឈាម។
2. សង្កេតមើលថា តើនៅមានផ្នែកណាមួយរបស់អវយវៈនៅជាប់នឹងរាងកាយអ្នករបួសឬទេ? បើនៅមិនទាន់ដាច់ចេញពីរាងកាយទាំងអស់ទេ ត្រូវចាប់ទ្រឱ្យអវយវៈនោះឡើងឱ្យស្ថិតក្នុងលក្ខណៈដើម កុំទាញទៅមកដែលនាំឱ្យសាច់ភ្នាសនៅត្រង់កន្លែងដាច់រយះនោះកាន់តែខូចខាតធ្ងន់ធ្ងរឡើង។
3. អំឡុងពេលដែលអ្នករបួសកំពុងបានទទួលការឃាត់ឈាម គួរប្រញាប់ទាក់ទងទៅមន្ទីរពេទ្យ សួរបញ្ជាក់ឱ្យប្រាកដក្នុងចិត្តថា មានពេទ្យដែលជួយវះកាត់តអវយវៈនៅប្រចាំការក្នុងមន្ទីរពេទ្យនោះ ឬទេ ដើម្បីកុំឱ្យត្រូវដឹកអ្នករបួសទៅមន្ទីរពេទ្យណាផ្សេងទៀតចុះឡើង។
4. រក្សាទុកអវយវៈដែលដាច់នោះឱ្យត្រឹមត្រូវតាមវិធី។
វិធីរក្សាអវយវៈដែលដាច់ ដើម្បីយកទៅឱ្យពេទ្យតភ្ជាប់ឡើងវិញ
យកអវយវៈដែលដាច់នោះដាក់ក្នុងថង់ប្លាស្ទិកដែលស្អាត ចងមាត់ថង់ឱ្យណែន កុំឱ្យវត្ថុរាវ (ទឹក) ចូលទៅក្នុងថង់បាន បន្ទាប់ពីនោះយកទៅដាក់ត្រាំក្នុងប្រអប់ ឬធុង ឬថង់ដែលមានដាក់ទឹកកក និងទឹកនៅខាងក្នុង ដោយឱ្យអវយវៈនោះទាំងមូលស្ថិតនៅក្នុងទឹកត្រជាក់នោះទាំងអស់។ សីតុណ្ហភាពដែលស័ក្តិសមក្នុងការត្រាំអវយវៈដាច់នោះគឺ 4 អង្សា C។
មិនគួរដាក់ត្រាំអវយវៈដែលដាច់នោះនៅក្នុងទឹកត្រជាក់ដោយផ្ទាល់ ដោយមិនច្រកចូលក្នុងថង់ប្លាស្ទិកជាមុនសិននោះទេ។
តើអាចត្រាំអវយវៈដែលដាច់នោះនៅក្នុងទឹកត្រជាក់បានយូរប៉ុនណា?
អវយវៈធំៗ ដូចជា ជើង ដៃ ឬប្រអប់ដៃទាំងមូល អាចធន់នឹងការខ្វះឈាមនៅក្នុងថង់ក្នុងទឹកត្រជាក់ ដែលមានសីតុណ្ហភាព 4 អង្សា C បានយូរដល់ទៅ 6-8ម៉ោង។ ចំណែកអវយវៈតូចៗ ដូចជាម្រាមដៃជាដើមនោះ អាចធន់ទ្រាំនឹងការខ្វះឈាមបានយូរដល់ទៅ24ម៉ោងមុននឹងត្រូវពេទ្យយកមកវះកាត់តភ្ជាប់ឡើងវិញ។
អវយវៈដែលត្រាំទឹកត្រជាក់មកហើយនោះពិតជាអាចតភ្ជាប់ឡើងវិញបានមែនឬ?
ទោះជាការជ្រើសរើសយកការថែរក្សាអវយវៈដែលដាច់ទុកឱ្យពេទ្យយកមកវះកាត់តភ្ជាប់ឡើងវិញ គឺជារឿងដែលល្អគួរធ្វើក៏ពិតមែន តែក៏មិនប្រាកដច្បាស់ជាប់ជានិច្ចថា ពេទ្យនឹងអាចវះកាត់តភ្ជាប់អវយវៈនោះឱ្យត្រឡប់មកប្រើការបានល្អដូចដើមវិញដែរ ព្រោះវាអាស្រ័យលើសភាពរបស់អវយវៈដែលដាច់នោះផងដែរថា តើសាច់ភ្នាស សរសៃឈាម សាច់ដុំផ្សេងៗមានភាពខូចខាតច្រើនតិចប៉ុនណា? (ដូចជា ករណីរបស់ដៃដែលត្រូវម៉ាស៊ីនកិនសាច់ជ្រូកធ្វើឱ្យខូចខាត បើសិនជាខូចខាតខ្លាំងជ្រុលពេល ក៏ពិបាកក្នុងការវះកាត់ដែរ) ការថែរក្សាអវយវៈដែលដាច់នោះធ្វើបានត្រឹមត្រូវតាមវិធីឬទេ? ភាពស្អាតគ្មានមេរោគប្រឡាក់ប្រឡូសរបស់អវយវៈដែលដាច់នោះមុនធ្វើការវះកាត់តភ្ជាប់ (ដូចជា អវយវៈដែលដាច់នោះធ្លាក់ចូលទៅក្នុងទឹកជ្រាំក្រោយពេលជួបគ្រោះថ្នាក់) ជាដើម៕
October 1, 2018
ប្រយ័ត្ន!! ទឹកស៊ីជើង ជំងឺដ៏គ្រោះថ្នាក់បំផុត ក្នុងអំឡុងរដូវភ្លៀង
អ្វីទៅជាជំងឺទឹកស៊ីជើង?
“ទឹកស៊ីជើង” ជាអាការជំងឺសើស្បែកដែលបានជួបប្រទះជាញឹកញាប់នៅពេលមានទឹកជំនន់។ មូលហេតុនៃការកើតរោគមួយប្រភេទនេះ គឺកើតចេញពីការឆ្លងរោគ និងការមិនមានអនាម័យចំពោះស្បែកជើង ដោយប្រកាន់ភ្ជាប់នូវទម្លាប់មិនសម្អាតស្បែកប្រអប់ជើងមិនបានស្អាតល្អ។ ជើងដែលសើមទឹក ឬផ្អាប់ដោយសារជាតិញើសរយៈពេលយូរ បណ្ដាលឱ្យស្បែកងាយឡើងកន្ទួលក្រហម រហូតដល់ក្លាយទៅជាផ្សិតមានសភាពរមាស់ និងរបេះរបកបាននៅលើបរិវេណបាតជើង។
វិធីព្យាបាលជំងឺទឹកស៊ីជើង
ការព្យាបាលដំបូង គឺប្រើប្រាស់ថ្នាំបំបាត់រមាស់ និងអាលែកស៊ីលាបពីលើស្បែកប្រអប់ជើងដើម្បីឱ្យស្បែកមានសភាពល្អឡើងវិញ មិនមានអាការរមាស់ និងបំបាត់ការប្រេះរលាត់សាច់ស្បែក។ ករណីដែលស្បែករមាស់ដល់ថ្នាក់អាប់សែហើយនោះ គឺបណ្ដាលមកពីស្បែករហែកឆ្លងបាក់តេរីរហូតដល់ថ្នាក់ឡើងផ្សិត ដូច្នេះអ្នកគួរតែប្រញាប់ទៅមន្ទីរពេទ្យដើម្បីឱ្យវេជ្ជបណ្ឌិតធ្វើការព្យាបាលជាបន្ទាន់ ព្រោះអាការបែបនេះអាចនឹងពិបាកព្យាបាល ហើយចំណាយពេលយូរ និងអស់ថវិកាច្រើនទៀតផង។
វិធីការពារជំងឺទឹកស៊ីជើង
• បន្ទាប់ពីប៉ះជាមួយនឹងទឹកកខ្វក់ ទឹកមានមេរោគ អ្នកត្រូវលាងសម្អាតជើងនឹងសាប៊ូឱ្យបានស្អាត ឬសម្អាតជើងជាមួយទឹកក្ដៅឧណ្ហៗក៏បានរួចជូតឱ្យស្ងួត ដោយកន្សែងពោះគោទន់ៗ។
• ប្រសិនបើមានរបួសនៅបរិវេណស្បែកបាត់ជើង ឬប្រអប់ជើង អ្នកត្រូវលាងសម្អាតរបួសដោយទឹកអំបិល និងទឹកថ្នាំសម្លាប់មេរោគ។
• ហាមប្រើប្រាស់របស់រួមជាមួយអ្នកដទៃដូចជា កន្សែងជូតខ្លួន ស្រោមជើង និងស្បែកជើងជាដើម។
• ហាមអេះ ឬកេះបរិវេណសាច់ដែលមានរបួស ព្រោះមេរោគចេញពីរបួសអាចធ្វើឱ្យឆ្លងទៅកាន់ស្បែកនៅបរិវេណដទៃទៀតបាន។
• ប្រើប្រាស់ស្រោមជើង និងស្បែកជើងដែលស្ងួត មិនសើមផ្អាប់ជានិច្ច៕
October 1, 2018