Category: សង្គម និងសេដ្ឋកិច្ច

អាជ្ញាធរពន្ធដារចិនបង្គាប់មិនឱ្យចាក់បញ្ចាំងរឿង Fan Bingbing ខណៈកំពុងមានករណីគេចពន្ធលើសលប់
តាមរយៈសារព័ត៌មាន The Startime ដែលទើបតែចេញផ្សាយមុនបន្ដិចបានឱ្យដឹងថា អាជ្ញាធរពន្ធដារចិនបានចេញសេចក្ដីប្រកាសថា កំពូលតារាសម្ដែងចិនអ្នកនាង ហ្វាន ពីងពីង (Fan Bingbing) ត្រូវបានបង្គាប់បង់ពន្ធចូលរដ្ឋវិញ និងពិន័យជាប្រាក់រាប់រយលានយ័នពីបទគេចពន្ធ ព្រមទាំងពិន័យមិនឱ្យចាក់បញ្ចាំរឿងរបស់នាងឡើយ។
អាជ្ញាធរពន្ធដារចិន បានបង្ហើបឱ្យដឹងថា តារាសម្ដែងស្រីរូបនេះ បានគេចមិនព្រមបង់ពន្ធក្នុងទឹកប្រាក់ប្រមាណ 95.8 លានដុល្លារ និងជាប់ពិន័យពន្ធដារ 255 លានយ័នផងដែរ។ អ្នកនាង ហ្វាន ពីងពីង មិនបានបង្ហាញខ្លួនជា សាធារណអស់រយៈពេលជាច្រើនខែមកហើយ ខណៈមានពាក្យចចាមអារ៉ាមជាច្រើនថា កំពូលតារាសម្ដែងរូបនេះ ត្រូវបានអាជ្ញាធរចិនចាប់ខ្លួនពីបទគេចពន្ធ។ ចំណែកឯ ទីកន្លែងដែលអ្នកនាង Fan កំពុងស្ថិតនៅក៏ពុំទាន់ត្រូវបានគេឱ្យដឹងនៅឡើយដែរ។
គួររំឭកដែរថា អ្នកនាង Fan Bingbing មិនបានបង្ហាញខ្លួនជាសាធារណៈ តាំងតែពីខែមិថុនាមកម្ល៉េះ ពោលគឺបន្ទាប់ពីអ្នកនាងបានបង្ហោះរូបភាព នៅលើបណ្ដាញទំនាក់ទំនងសង្គមថា អ្នកនាងបានធ្វើដំណើរទៅកាន់មន្ទីរពេទ្យកុមារមួយកន្លែង ស្ថិតនៅក្នុងតំបន់ទីបេ។ បន្ថែមពីលើនេះ អត្ថបទមួយចុះផ្សាយដោយប្រព័ន្ធផ្សព្វផ្សាយរដ្ឋ Securities Daily កាលពីថ្ងៃទី6 ខែកញ្ញា ហើយដែលក្រោយមកត្រូវបានលុបចោលវិញភ្លាមៗបានអះអាងថា អ្នកនាង Fan កំពុងស្ថិតនៅក្រោមការឃ្លាំមើលរបស់អាជ្ញាធរចិន និងកំពុងប្រឈមមុខ ការកាត់ទោសពីបទគេចពន្ធ។
សូមជម្រាបបន្ថែមថា រឿងរបស់ Fan Bingbing ដែលសម្ដែងនៅហូលីវូតត្រៀមនឹងរៀបបញ្ចាំងមានដូចជារឿង «X-Men» និងរឿង «Iron Man» ដែលរំពឹងកើបចំណូលបានពីអ្នកគាំទ្រចិនបានដល់ទៅ 62 លានដុល្លារសហរដ្ឋអាមេរិច៕
October 3, 2018
Osakaត្រួសត្រាយផ្លូវឆ្ពោះទៅកាន់ជុំទី 3 នៃពាន China Open
កីឡាការិនីវាយកូនបាល់ Naomi Osaka កំពុងតែស្រេកឃ្លានក្នុងការបន្តដំណើរទៅមុខពី «ការចងចាំផ្អែមលាយល្វីង» នៃការឈ្នះពានក្នុងព្រឹត្តិការណ៍ US Open កាលពីខែមុន ហើយកីឡាការិនីរូបនេះ បានបង្ហាញពីទម្រង់លេងដ៏រឹងមាំក្នុងយុទ្ធនាការ China Open កាលពីថ្ងៃអង្គារ។
តារាឆ្នើមស្រីវ័យក្មេងរបស់ជប៉ុនរូបនេះ បានយកឈ្នះលើកីឡាការិនីអាមេរិក Danielle Collins យ៉ាងងាយស្រួលក្នុងលទ្ធផល 6-1 និង6-0 ក្នុងរយៈពេលត្រឹមតែ 53នាទី នៅលើទីលានរឹងក្នុងទីក្រុងប៉េកាំង ដើម្បីឈានទៅប្រកួតជុំទី3។ ជាមួយគ្នានេះ ទម្រង់លេងយ៉ាងល្អរបស់កីឡាការិនីចិន Wang Qiang បានបន្ត ក្រោយពីនាងបានយកឈ្នះលើកីឡាការិនីឡេតូនី Jelena Ostapenko ដែលជាម្ចាស់ជើងឯក French Open ឆ្នាំ2017 ក្នុងលទ្ធផល 6-០ និង6-០។ Ostapenko ដែលមានចំណាត់ថ្នាក់លេខ12 ប្រចាំព្រឹត្តិការណ៍ បានត្រូវការការព្យាបាលដៃខាងឆ្វេងរបស់គេ អំឡុងពេលនៃការប្រកួត ប៉ុន្តែជ័យជម្នះបានកើតឡើងពីការបង្ហាញទម្រង់លេងយ៉ាងល្អរបស់ Qiang នៅចំពោះមុខអ្នកគាំទ្ររបស់ខ្លួន។
Osaka វ័យ 20ឆ្នាំ ដែលការឈ្នះពានតែ1 ក្នុងកម្មវិធី Grand Slam របស់នាងត្រូវបានរំខានដោយជម្លោះរបស់កីឡាការិនី Serena Williams ជាមួយនឹងអាជ្ញាកណ្តាលក្នុងទីក្រុងញូវយ៉កនោះ នឹងត្រូវប៉ះជាមួយនឹងកីឡាការិនី Julia Goerges ក្នុងវគ្គបន្ទាប់ ក្នុងរដ្ឋធានីរបស់ចិន។ កេរិ៍្តឈ្មោះ Osaka កំពុងតែមានភាពល្បីល្បាញ ហើយមន្ត្រីរៀបចំការប្រកួតកាលពីថ្ងៃអង្គារ បានបញ្ជាក់ថា នាងបានទទួលសិទ្ធិរបស់នាងក្នុងព្រឹត្តិការណ៍ WTA Finals Singapore ជាលើកទី1៕
ប្រភពពី៖ Channel News Asia
October 3, 2018
ទស្សនីយភាពវីដេអូអប់រំខ្លី «ស្នាមក្រែម» បង្កប់អត្ថន័យជ្រាលជ្រៅដល់ហូរទឹកភ្នែកដោយមិនដឹងខ្លូន
វីដេអូ បែបអប់រំខ្លី មានចំណងជើងថា «ស្នាមក្រែម» បង្ហាញពីជីវិតរបស់គ្រួសារមួយ ដែលធ្លាប់តែមានសុភមង្គល និងពោរពេញ ទៅដោយក្ដីស្រឡាញ់ តែត្រូវរលាយបាត់បង់ ដោយសារតែការសប្បាយភ្លើតភ្លើន ជាកំហុសឆ្គងធ្វើឲ្យបាត់បង់សុភមង្គល និងក្ដីសុខដែលធ្លាប់តែមានកន្លងមក។ យ៉ាងណាមិញ វីដេអូអប់រំខ្លីនេះកំពុងតែទទួលបានការចាប់អារម្មណ៍ ជាពិសេសគឺមានការគាំទ្រខ្លាំងគួរឲ្យកត់សម្គាល់។
អ្នកនាង ស្វែង សុជាតា ដែលមានតួនាទីជាម្តាយ បានសម្តែងអារម្មណ៍ភ័យបុកពោះក្នុងទឹកមុខស្រពោននៅពេលកូនស្រីជាទីស្រឡាញ់រស់នៅក្បែររហូត បានបាត់ពីទ្រូងភ្លាមៗធ្វើឱ្យអ្នកនាងមានចិត្តបារម្ភពន់ពេក។ តារាស្រីជើងចាស់ និងសម្បូរបទពិសោធន៍សម្តែងដ៏ជំនាញ បានឱ្យប្រាប់ដឹងថា ករណីដែលអ្នកនាងស្លន់ស្លោ រឿងដើររកកូនស្រីជាការថតសម្តែងនៅក្នុងរឿង «ស្នាមក្រែម»ក្នុងរឿងថ្មីមួយ ដែលជារឿងបែបមនោសញ្ចេតនាកប់ជ្រៅមានលក្ខណៈអប់រំក្នុងសង្គមយើងផងដែរ។ អ្នកនាងថា កូនស្រីក្នុងសាច់រឿងបានបាត់ចេញពីផ្ទះ ក្រោយទទួលយកមិនបានពេលឃើញឪពុកដោយចៃដន្យ កំពុងលបលួចមានស្រីថ្មី ក៏ទប់ចិត្តលែងបាន ហើយរត់ចេញពីផ្ទះគ្មានប្រាប់នរណាម្នាក់ឡើយ បង្កឲ្យមានការភ័យព្រួយពីអ្នកនៅក្នុងផ្ទះគ្រប់គ្នា ជាពិសេសអ្នកនាង ត្រូវជាម្តាយតែម្តង។
តារាដែលលេចធ្លោនៅក្នុងវីដេអូអប់រំនេះ រួមមាន អ្នកនាង ស្វែង សុជាតា លោក ជា សំណាង និងកុមារី ជូលី ដោយអ្នកទាំងបី បានរំលេចឈុតឆាកក្នុងរឿងរ៉ាវគ្រួសារយ៉ាងទាក់ទាញបំផុត ពាក់ព័ន្ធនឹងស្នាមក្រែម។ យ៉ាងណាមិញ រឿងរ៉ាវទាំងអស់នេះ ត្រូវបានអ្នកនាង ស្វែង សុជាតា ស្រាយបំភ្លឺឱ្យទស្សនិកជនជ្រាប៕
October 3, 2018
ព្រៃកោងកាង « ធុងប៉្រូងថង» តំបន់ទេសចរណ៍ដីទំនាបមិនគួររំលង!!
តាមរយៈគេហទំព័រកម្សាន្ដ Kapook បានឱ្យដឹងថា ព្រៃកោងកាង ធុងប៉្រូងថង ( ทุ่งโปรงทอง ) មានទីតាំងស្ថិតនៅជុំវិញមាត់ច្រាំងទន្លេ ប្រៈសែ ក្បែរតំបន់ទំនាបសមុទ្រ ប្រៈសែ ស្រុកក្លែង ខេត្តរៈយ៉ង។ នៅតំបន់ទេសចរណ៍ធម្មជាតិមួយនេះ មានព្រៃកោងកាងលាតសន្ធឹងល្វឹងល្វើយ និងមានស្ពានធ្វើអំពីឈើ ដែលអាចដើរឆ្លងពីព្រៃមួយទៅព្រៃមួយ និងអាចដើរព័ទ្ធជុំវិញព្រៃបាន។
ចំណែកស្ពានដែលភ្ញៀវទេសចរអាចធ្វើដំណើរកម្សាន្ដទស្សនាសត្វស្លាប និងកូនព្រៃដើមកោងកាងបាននោះ មានប្រវែង 2 .6គីឡូម៉ែត្រ ក្នុងនោះភ្ញៀវទេសចរអាចថតរូបផ្ដិតយកទេសភាពស្អាតៗនៅក្បែរខ្លួនបានផងដែរ ។ តែដោយឡែក ស្ពានដែលមានប្រវែងវែងបំផុត និងអាចដើរឆ្លងទៅកាន់ព្រៃកោងកាងនីមួយៗ បើចង់បន្ដដំណើរត្រូវផ្ដល់ដំណឹងទៅអ្នកអនុរក្សព្រៃជាមុនសិន ដើម្បីធ្វើដំណើរជាមួយអ្នកនាំផ្លូវ។
បន្ថែមលើសពីនោះ ភ្ញៀវទេសចរអាចបន្ដដំណើរនៅលើទូកដើម្បីទស្សនាព្រៃកោងកាងទាំងមូលក៏បានផងដែរ។ កាន់តែពិសេសជាងនេះទៅទៀត កន្លែងតំបន់ទេសចរណ៍ធម្មជាតិមួយនេះ ត្រូវបានបើកឱ្យចូលទស្សនាទាំងភ្ញៀវជាតិ និងអន្ដរជាតិដោយឥតគិតថ្លៃ ចាប់ពីវេលាម៉ោង 6ព្រឹក ដល់ម៉ោង 6ល្ងាច។ តែចំពោះការជិះទូកវិញ ត្រូវបានបង់ថ្លៃទៅតាមចំនួនមនុស្ស ។
ដើម្បីកុំឱ្យខកខាន សូមទស្សនាវីដេអូទេសភាពព្រៃកោងកាង «ធុងប៉្រូងថង» ដែលធំជាងគេនៅប្រទេសថៃ ៖
October 3, 2018
តើគួរគ្រប់គ្រងលំហូរសាច់ប្រាក់បែបណាដើម្បីកុំឱ្យគ្រួសារជួបហានិភ័យ?
ការចំណាយប្រាក់ក្នុងគ្រួសារ ជាទូទៅគេតែងគិតថា គឺជារឿងសាមញ្ញមួយ ដោយមិនបានកំណត់ថាការចាយវាយនោះធ្វើឡើងទៅតាមតម្រូវការចាំបាច់នោះទេ ពេលដែលមានលុយហើយតែងទិញនេះទិញនោះទៅតាមចំណង់ចង់បានរបស់ខ្លួន លុះពេលទិញហើយអស់លុយពីខ្លួន មើលឃើញសម្ភារមិនសូវសំខាន់ទើបមានអារម្មណ៍ស្តាយក្រោយ។
លោក ប៉ិច ប៉ូឡែន នាយកប្រតិបត្តិនៃក្រុមហ៊ុន Westline Education Group មានប្រសាសន៍ថា មនុស្សភាគច្រើនមិនបានបណ្តុះផ្នត់គំនិតរបស់ខ្លួន និងកូនរបស់ខ្លួនឱ្យយល់ដឹងពីសារៈសំខាន់នៃការសន្សំប្រាក់នោះទេ ជួនកាលទិញទំនិញអ្វីមួយពួកគាត់ធ្វើឡើងទៅតាមចំណង់ចង់បានតែប៉ុណ្ណោះ មិនបានគិតពីតម្រូវការចំបាច់នោះទេ ដែលករណីបានធ្វើឱ្យហិរញ្ញវត្ថុក្នុងគ្រួសារជួបការលំបាកនៅពេលដែលមានតម្រូវការប្រើប្រាស់លុយ ដូចជាត្រូវដល់ខែបង់ថ្លៃសាលាកូន ចំណាយសម្រាប់កម្មវិធីប្រពៃណី ត្រូវដល់ពេលបង់ថ្លៃជួល បង់ប្រចាំខែថ្លៃទិញផ្ទះ ថ្លៃទឹកភ្លើង ឬនៅពេលជួបបញ្ហាសុខភាព ឬចំណាយថ្លៃថ្នាំពេទ្យជាដើមនោះ ទើបដឹងថាមានតម្រូវការចំបាច់ប្រើប្រាស់លុយ ហើយជួលកាលអាចជួបការខ្វះខាតទើបដឹងថាលំបាក។
លោកថា ក្នុងយុគសម័យជឿនលឿននេះ មានមនុស្សមិនតិចទេដែលចង់ធ្វើខ្លួនឡូយឆាយបង្អួតគេ រហូតហ៊ានទិញរថយន្ត ម៉ូតូ ទូរស័ព្ទដៃបង់រំលស់ទៀតផង ហើយខំរកលុយទុកសម្រាប់តែគ្រប់ចាយពីមួយខែទៅមួយខែ មិនគិតពីការសន្សំទុកទៅថ្ងៃអនាគតទេ ដោយពួកគាត់គិតថា បង់រំលស់យូរៗ សម្ភារ ឬវត្ថុនោះប្រាកដជាក្លាយជាកម្មសិទ្ធិផ្ទាល់ខ្លួនមិនខាន។ លោកថា ការគិតបែបនេះគឺមិនខុសនោះទេប្រសិនបើយើងយកសម្ភារឬវត្ថុនោះមកប្រើជាប្រយោជន៍ដើម្បីរកប្រាក់ធ្វើជាចំណូលចូលគ្រួសារវិញ ឧទាហរណ៍អ្នកទិញរថយន្តទំនើបគាត់ជិះដើម្បីធ្វើការផង ឆ្លៀតពេលទំនេរពីការងារផងគាត់អាចរត់តាក់ស៊ីបានលុយបន្ថែមពីការងារត្រឡប់ចូលគ្រួសារវិញបាន ប៉ុន្តែអ្នកខ្លះមិនគិតដូច្នោះទេ ពេលបានរថយន្តថ្មីចូលចិត្តដើរលេងជួបមិត្តភក្តិ ចំណាយពេលវេលាមិនបានប្រយោជន៍ ហើយថែមទាំងចំណាយប្រាក់កាន់តែច្រើនថែមទៀតដែលកត្តានេះធ្វើឱ្យគ្រួសារអាចជួបហានិភ័យ។
លោកថា ប្រសិនបើយើងចង់សន្សំប្រាក់ ត្រូវចេះដាក់សម្ពាធលើខ្លួនឯងកុំឱ្យចាយច្រើនពេក ហើយគួរពិចារណាលើការទិញធានារ៉ាប់រងសម្រាប់ការសិក្សាឱ្យកូន ព្រោះថា សន្សំម្តងបន្តិចៗ ភ្លេចៗខ្លួនកូនរៀនចប់បាក់ឌុប កូនមានញ្ចប់ថវិកាសម្រាប់ការសិក្សានៅមហាវិទ្យាល័យតែម្តង ហើយនៅពេលយើងមានគ្រោះថ្នាក់ណាមួយមានធានារ៉ាប់រងជាអ្នកជួយគ្រួសារយើងវិញ។ ម្យ៉ាងទៀតបើអ្នកចង់ទិញផ្ទះបង់រំលស់ក៏បាន តែត្រូវគិតថា ទិញផ្ទះបង់រំលស់គឺមិនខុសពីការទិញបំណុលគេនោះទេ ត្រូវសងគេរាប់ឆ្នាំទើបអស់ ដូច្នេះគិតថា ទិញផ្ទះបែបណាដើម្បីចំណេញ អាចចំណេញបានបើសិនទិញផ្ទះមកសម្រាប់រស់នៅផង សម្រាប់រកស៊ីបានចំណូលមកវិញខ្លះផង ឬទិញទុកយូៗទៅផ្ទះអាចនឹងឡើងថ្លៃលក់វិញបានប្រាក់ចំណេញថែមទៀតផង។
វិធីសាស្ត្រងាយៗដើម្បីឱ្យជីវភាពគ្រួសារមានការរីកចម្រើន មនុស្សម្នាក់ៗត្រូវដឹងខ្លួនឯងថា ការចំណាយចៀសវាងកុំចាយច្រើនជាងចំណូល ឧទាហរណ៍ថា សម្រាប់គ្រួសារមានកូន 2នាក់មានចំណូលប្រហែលជា1,000ដុល្លារក្នុងមួយខែ ត្រូវគិតគូរឱ្យបានច្បាស់លាស់លើការចំណាយប្រចាំខែទៅវិញរាប់ចាប់តាំងពីការចំណាយលើអាហារពេលព្រឹក ការចំណាយលើការផ្តល់ឱ្យកូនចាយប្រចាំថ្ងៃ ចំណាយបង់ថ្លៃសាលាឱ្យកូន ចំណាយលើម្ហូបអាហារ ចំណាយទឹកភ្លើង ចំណាយលើថ្នាំសង្កូវ ឬថ្លៃថែទាំសុខភាព ចំណាយលើការចាក់សាំងម៉ូតូ-ឡាន និងចំណាយបង់ថ្លៃផ្ទះប្រចាំខែ និងចំណាយផ្សេងៗមួយចំនួនទៀតថា តើប្រាក់ខែ1,000ដុល្លារនោះគ្រប់គ្រាន់ទេ បើសិនរកឃើញថា មិនគ្រប់គ្រាន់ គួរតែកាត់បន្ថយចំណាយខ្លះៗ ធ្វើយ៉ាងណាឱ្យសល់បានខ្លះ ទោះជាលំបាកក៏ដោយ អនុវត្តយូរៗទៅប្រាកដជាក្លាយជាទម្លាប់ មិនសល់បានច្រើនក៏ត្រូវឱ្យសល់ខ្លះៗដែរ ដើម្បីសន្សំទុកទៅថ្ងៃមុខ បើមិនដូច្នេះទេពេលខ្លួនចាស់ធ្វើការលែងកើតរកចំណូលមិនបានប្រាកដជាលំបាកមិនខាន។ តែបើសន្សំលុយបានហើយ គួរគិតគូរយកទៅដាក់ធនាគារដើម្បីបានការប្រាក់ ឬយកទៅចងការឱ្យគេ ហើយបើសិនមានលទ្ធភាព គួរបង្កើតមុខរបរណាមួយដែលអាចមានលទ្ធភាពរកប្រាក់ចំណូលប្រចាំថ្ងៃឱ្យយើងបានមកវិញជាប្រចាំនោះទើបជាការប្រសើរ។
ជាចុងក្រោយលោកផ្តាំផ្ញើថា សម្រាប់មេគ្រួសារម្នាក់ គួរកុំរង់ចាំបន្ទោសកូនថា គិតតែចាយគិតតែសុំលុយ តែត្រូវធ្វើជាគំរូឱ្យកូនវិញ ព្យាយាមចំណាយក្នុងគ្រួសារទៅតាមតម្រូវការចាំបាច់ពិតៗ ឬចំណាយលើអ្វីដែលបានផលចំណេញមកវិញ ដើម្បីឱ្យកូនបានមើលឃើញថា ជារឿងល្អ និងត្រឹមត្រូវ និងព្យាយាមប្រាប់កូន ពន្យល់កូនអំពីសារៈសំខាន់នៃការចាយលុយ យូរៗទៅកូនប្រាកដជាយល់ និងដឹងពីសារៈសំខាន់នៃហិរញ្ញវត្ថុគ្រួសារមិនខាន៕
October 3, 2018
វិធីព្យាបាលបឋម នៅពេលសត្វល្អិតចូលក្នុងត្រចៀក
សត្វល្អិតធំតូចមួយចំនួនដែលនៅក្នុងផ្ទះរបស់អ្នក ក្រៅពីបង្កភាពរំខានដល់អ្នក និងគ្រួសារហើយនោះ ពេលខ្លះពួកវាបានលួចចូលទៅក្នុងត្រចៀករបស់អ្នក ឬសមាជិកក្នុងគ្រួសារទៀត នៅពេលកំពុងគេងលក់ដោយមិនដឹងខ្លួន ហើយវាមិនព្រមចេញមកវិញដោយស្រួលៗនោះទេ។ ដូច្នេះហើយ ប្រសិនបើសត្វល្អិតចូលក្នុងត្រចៀក អ្នកត្រូវមានវិធីសាស្ត្រី ដើម្បីធ្វើឱ្យវាចេញមកវិញដោយត្រឹមត្រូវ ដោយមិនប៉ះពាល់ដល់សុខភាពត្រចៀក ឬបណ្ដាលឱ្យត្រចៀកមានបញ្ហា។ ថ្ងៃនេះទស្សនាវដ្ដី ឡារ៉ែន សូមជម្រាបពីវិធីព្យាបាលបឋម នៅពេលសត្វល្អិតចូលក្នុងត្រចៀកដូចខាងក្រោមនេះ។
នៅពេល សត្វល្អិតចូលត្រចៀក អ្នកគួរព្យាបាលបឋមដោយវិធីណា?
• ពិតប្រាកដណាស់គឺហាមប្រើសំឡីត្បាល់ត្រចៀក ធាងឈើ ឬវត្ថុត្បាល់ច្រៀកផ្សេងៗដើម្បីរុកចូលត្បារយកសត្វល្អិតចេញពីត្រចៀកព្រោះការធ្វើបែបនេះ អាចក្លាយជាការរុញឱ្យសត្វល្អិតកាន់តែចូលទៅក្នុងត្រចៀកកាន់តែជ្រៅហើយមានគ្រោះថ្នាក់ចំពោះក្រដាសត្រចៀក និងភ្នាស់កណ្ដាលបាន។
• ប្រសិនបើប្រាកដចិត្តថា ពិតជាមានសត្វល្អិតក្នុងត្រចៀកមែន ត្រូវឱ្យផ្អៀងត្រចៀកម្នាងនោះ (ត្រចៀកដែលសត្វចូល) ចុះទៅក្រោម និងផ្អៀងចុះសន្សឹមៗ ថ្នមៗ ដើម្បីឱ្យសត្វល្អិតនោះ វាចេញមកក្រោមវិញ ហើយចេញទៅក្រៅរន្ធត្រចៀក។
• វិធីសាស្ត្រមួយទៀត គឺត្រូវឱ្យត្រចៀកនោះងើយឡើងទៅលើ ហើយយកប្រេងលាបខ្លួនរបស់ទារក ឬប្រេងបន្លែ ប្រេងអូលីវ ប្រេងល្ង ឬថ្នាំសម្រាប់បន្តក់ត្រចៀក (ដែលជ្រើស-យកតែមួយប៉ុណ្ណោះ) បន្ដក់ចូលក្នុងត្រចៀកហើយទាញស្លាបត្រចៀកខាងក្រោយ ដើម្បីឱ្យរន្ធត្រចៀកបើកកាន់តែធំ ដើម្បីឱ្យប្រេងហូរចូលបានត្រង់។ បន្ទាប់មកត្រូវផ្អៀងត្រចៀកចុះមកវិញ ដើម្បីឱ្យសត្វល្អិតដែលស្លាប់ ឬនៅរស់ក្នុងត្រចៀក ហូរចេញមកក្រៅវិញ។
• ប្រសិនបើមានអាការផ្សេងៗ ដូចជា ឈឺភ្នាស់ត្រចៀក ចុកក្នុងត្រចៀក ហឹងត្រចៀក ឬមានឈាមមកតាមត្រចៀក និងមានអាការមិនប្រក្រតីផ្សេងៗ សូមកុំទាន់ប្រញាប់រុកវត្ថុអ្វីចូលក្នុងត្រចៀកឱ្យសោះ ត្រូវប្រញាប់ទៅរកគ្រូពេទ្យជំនាញជាបន្ទាន់។
វិធីបង្ការមិនឱ្យសត្វល្អិតចូលត្រចៀក
• ឧស្សាហ៍ និងយកចិត្តទុកដាក់សម្អាតអនាម័យកន្លែងគេង និងបរិវេណជុំវិញកន្លែងគេង កុំបណ្ដោយឱ្យមានសភាពរញ៉េរញ៉ៃ មិនមានសណ្ដាប់ធ្នាប់ រហូតក្លាយជាជម្រកលាក់ខ្លួនរបស់សត្វល្អិតផ្សេងៗ។
• ហាមប្រើសំឡីត្បារត្រចៀកសម្អាតត្រចៀករាល់ថ្ងៃ ព្រោះវាអាចបណ្ដាលឱ្យមានការរលាកភ្នាស់ត្រចៀក និងដាច់រោមការពារត្រចៀកជាដើម។
• ប្រើប្រាស់ថ្នាំបាញ់សម្លាប់សត្វល្អិត ឬកម្ចាត់សត្វល្អិតនៅក្នុងបន្ទប់ និងបរិវេណផ្ទះរបស់អ្នកជាប្រចាំ។
• បន្ទប់គេងត្រូវមានពន្លឺគ្រប់គ្រាន់។
• តាមការពិតក្នុងត្រចៀករបស់លោកអ្នកមានប្រព័ន្ធសម្អាតតាមលក្ខណៈធម្មជាតិរួចទៅហើយ ដែលមិនចាំបាច់ឱ្យលោកអ្នកត្រូវពិបាកក្នុងការសម្អាតវានោះទេ។ យ៉ាងណាក៏ដោយប្រសិនបើអាចម៍ត្រចៀកកើនឡើងច្រើនខុសធម្មតា ឬបង្កជាការឈឺចាប់ផ្សេងៗនោះ សូមប្រញាប់ទៅរកគ្រូពេទ្យជាបន្ទាន់ កុំព្យាយាមធ្វើការសម្អាតវាដោយខ្លួនឯងឱ្យសោះ៕
October 2, 2018
ភ្ញាក់ផ្អើល!! គណនីហ្វេសប៊ុកមួយទម្លាយថា អតីត Freshie boy ប្រាក់ លីហួរ ដើរបោកប្រាស់គេ
គណនីហ្វេសប៊ុកមួយមានឈ្មោះ Kit Chanthla បានបង្ហោះរូបភាព និងវីដេអូដែលអះអាងថា ខ្លួនបានទិញទូរស័ព្ទពីអតីត Freshie boy ចំណាត់ថ្នាក់លេខ2 ឆ្នាំ2016 ឈ្មោះ ប្រាក់ លីហួរ ប៉ុន្តែត្រូវបានអតីតតារារូបនេះបោកប្រាស់ ដែលខណៈនេះលេខទូរស័ព្ទរបស់តារាប្រុសម្នាក់នេះ មិនអាចទាក់ទងបាន និងបានប្លុកលេខទូរស័ព្ទរបស់ខ្លួន ចោលទៀតផង។
ប្រភពគណនីខាងលើបានសរសេរសារយ៉ាងវែងអន្លាយថា «ជាតារាល្បីមួយរូបដែរ ថោកទាបមិនគួរបោកប្រាស់ខ្ញុំអ៊ីចឹងសោះ មិនដឹងថាគាត់បោកប្រាស់មនុស្សប៉ុន្មាននាក់មកហើយទេ។ ទិញទូរស័ព្ទពីគាត់តម្លៃ 600ដុល្លារ មួយទឹក…គឺចង់បានទូរស័ព្ទ iPhone 8 Plus តែបែរជាទូរស័ព្ទនោះជា iPhone 6s Plus ដូរសម្បកឡើង iPhone8 Plus ទៅវិញ ពេលណាត់ជួបបែរជាគេចមុខ ហើយបិទទូរស័ព្ទទៀត លេខទូរស័ព្ទបុរសម្នាក់នេះ Tel: 010222260»។
បើបងប្អូនអ្នកទាក់ទងបាន សូមជួយឱ្យគាត់ចេញមុខដោះស្រាយជាបន្ទាន់…បើមិនអ៊ីចឹងទេ ខ្ញុំនឹងប្តឹងពីបទឆបោកលក់ទូរស័ព្ទក្លែងក្លាយ….បើសងលុយរួចខ្លួន…មុខមាត់ស្អាតបាត តែមិនគួរដើរបោកប្រាស់គេអ៊ីចឹងសោះ PrakLyhour F ជួយ Like share comment ពឹងលើបងប្អូនហើយ…ដើម្បីកុំឱ្យតារាម្នាក់នេះដើរបោកគេទៀត….នាំឱ្យខូចតារាល្អៗនៅស្រុកខ្មែរ ខ្ញុំជឿថា មនុស្សម្នាក់នេះមិនមែនបោកតែខ្ញុំម្នាក់ទេ…គ្រាន់តែគេផ្សេងៗមិនហ៊ាន post ខ្លាចមានរឿង….ខ្ញុំ post ដើម្បីឱ្យចេញមុខដោះស្រាយ បំភ្លឺការពិត គឺខ្ញុំមានភស្តុតាងទាំងអស់។ ម្តងគេ ម្តងយើង 41 41…ខ្ញុំនឹងធ្វើការ Live ផ្ទាល់សូមបងប្អូនជួយវិភាគទាំងអស់គ្នា»។
គួរបញ្ជាក់បន្ថែមថា ផ្អែកលើការខមមិនរបស់គណនីហ្វេសប៊ុកមួយ បានបង្ហើបឱ្យដឹងថា តារារូបនេះត្រូវបានខាងក្រុមហ៊ុន Freshie ដកតំណែងចេញពីបញ្ជីឈ្នោះ Freshie ជាយូរហើយ ដោយសារតែធ្លាប់មានករណីមិនល្អ ដែលបុគ្គលម្នាក់នេះ បានធ្វើខុសចំពោះលក្ខខណ្ឌរបស់ក្រមហ៊ុន៕
October 2, 2018
ការព្យាបាលជំងឺមហារីកសុដន់ដោយប្រើអ័រម៉ូនបំបាត់
អ័រម៉ូនប្រភេទខ្លះអាចប្រឆាំងនឹងកោសិកាជំងឺមហារីកមិនឱ្យលូតលាស់ឡើងបាន ហើយក្នុងពេលតែមួយនោះ អ័រម៉ូន ក៏អាចជួយព្យាបាលជំងឺមហារីកបានដោយការប្រើវិធីសាស្ត្រម្យ៉ាងហៅថា “អ័រម៉ូនបំបាត់”។ សូមស្វែងយល់ទាំងអស់គ្នា។
អ័រម៉ូនបំបាត់ គឺជាអ្វី?
អ័រម៉ូន ដែលផលិតឡើងមកពីក្រពេញអ័រម៉ូនបានធ្វើតួនាទីជាសារធាតុគីមីបញ្ជូនទៅរាងកាយដែលមានន័យថា ប្រសិនបើរាងកាយកំពុងទទួលរងនូវផលប៉ះពាល់ផ្សេងៗក៏ដោយ ក៏ប្រព័ន្ធប្រសាទតំបន់កណ្ដាល ឬ CNS នឹងបញ្ជូនសញ្ញាទៅកន្លែងអ័រម៉ូនប្រភេទខ្លះ ដើម្បីឱ្យអ័រម៉ូននោះបានបញ្ជូនបន្ដទៅតាមសរសៃឈាម ហើយនៅពេលដែលអ័រម៉ូនវាហូរទៅពេញរាងកាយហើយ នោះកោសិកាគោលដៅ នឹងអាចទទួលរំញោចពីអ័រម៉ូនទាំងនោះបាន។ ចំពោះកោសិកាទទួលការបញ្ជូនសញ្ញា នឹងកើតជាដំណើរការប្រតិកម្មទៅតាមហ្សែ៊ន ដើម្បីទទួលអ័រម៉ូនដូចពោលខាងលើ។ ប្រសិនបើដំណើរការជួបប្រទះឃើញ កោសិកាមហារីកជាអ្នកទទួលសញ្ញាវិញហើយធ្វើឱ្យអ័រម៉ូនអាចចូលទៅតោងជាប់បានគេត្រូវប្រើវិធីសាស្ត្រដូចជា ថ្នាំបំបាត់ ការវះកាត់ ឬការប្រើកាំរស្មីបាញ់បំបាត់ ដើម្បីបញ្ឈប់ដំណើររបស់អ័រម៉ូនជាបន្ទាន់ ដែលអាចរាងរាំងការកកើតនៃចំនួនកោសិកាមហារីក។ វិធីសាស្ត្រខាងលើនេះ គេឱ្យឈ្មោះថា “អ័រម៉ូនបំបាត់” ឬ Hormonal therapy គឺជាវិធីព្យាបាលជំងឺមហារីកដ៏មានប្រសិទ្ធភាពមួយ។
អ័រម៉ូនប្រភេទណា ដែលអាចព្យាបាលជំងឺមហារីកសុដន់បាន?
មានវិធីសាស្ត្រជាច្រើនប្រើប្រាស់ក្នុងការព្យាបាលជំងឺមហារីកសុដន់ដែលបង្កឡើងដោយអ័រម៉ូន វាត្រូវការបង្អាក់ដំណើរការធ្វើការរបស់សម្បុកស៊ុតញី បង្អាក់ដំណើរកកើតអ័រម៉ូនអេស្ត្រូសែន និងបង្អាក់ដំណើរវិវឌ្ឍរបស់អេស្ត្រូសែន។
គោលដៅទូទៅនៃវិធីសាស្ត្រព្យាបាលនេះគឺ សង្កត់ការបញ្ចេញអ័រម៉ូនអេស្ត្រូសែន ដែលជាអ័រម៉ូនកើតពីសម្បុកស៊ុតញី ក្នុងស្ត្រីវ័យកណ្ដាលមុនពេលអស់រដូវ ឬកើតចេញពីសរសៃយាវផ្សេងៗដូចជា សរសៃយាវខ្លាញ់ ឬស្បែក។ អ័រម៉ូនអេស្ត្រូសែន ជាកត្តាលីករបំបែកខ្លួនរបស់កោសិកាមហារីកសុដន់។
តើការប្រើប្រាស់អ័រម៉ូនបំបាត់ ព្យាបាលជំងឺមហារីកសុដន់បានដោយរបៀបណា?
វិធីសាស្ត្រប្រើអ័រម៉ូនបំបាត់ ដើម្បីចាត់ការជាមួយជំងឺមហារីកសុដន់ប្រភេទកើតឡើងពីអ័រម៉ូន គឺមានវិធី3យ៉ាងដូចជា ៖
1. ការព្យាបាលបន្ថែមសម្រាប់ជំងឺមហារីកសុដន់ដំណាក់កាលដំបូង
ការបាញ់កាំរស្មីបំបាត់ ឬការប្រើប្រាស់ថ្នាំដើម្បីបញ្ជូនចូលពេញរាងកាយ គឺជាវិធីសាស្ត្រព្យាបាលបន្ថែមទូទៅ ក្រោយពីធ្វើការវះកាត់មហារីកសុដន់។ គ្រូពេទ្យជំនាញបានរកឃើញថា ស្ត្រីដែលទទួលការព្យាបាលបែបនេះ រមែងតែងមិនកើតជំងឺមហារីកសុដន់ឡើងវិញទេ សូម្បីតែរោគមហារីកផ្សេងៗទៀតផងដែរ។ យ៉ាងហោចណាស់ក្នុងរយៈពេល15ឆ្នាំចុងក្រោយនេះ ការព្យាបាលជំងឺមហារីកសុដន់ គ្រូពេទ្យជំនាញខាងផ្នែកដើមទ្រូង បានសម្រេចចិត្តជ្រើសយកវិធីព្យាបាលដែលប្រើប្រាស់រយៈពេលបន្ថែម ក្នុងការតាមដានរោគជំងឺឱ្យបានច្បាស់លាស់ក្នុងដំណាក់កាលដំបូង។
2. ការព្យាបាលជំងឺមហារីកសុដន់ដំណាក់កាល
ធ្ងន់ធ្ងរ ឬកំពុងតែរីកធំដោយការប្រើប្រាស់ថ្នាំបំបាត់មុនពេលវះកាត់ ការប្រើប្រាស់ថ្នាំបំបាត់មុនពេលវះកាត់ជំងឺមហារីសុដន់ គឺជាវិធីប្រើអ័រម៉ូនបំបាត់ ដើម្បីព្យាបាលមុនពេលដំណើរការវះកាត់ នៅពេលបច្ចុប្បន្ននេះ នៅមានការសិក្សាចំពោះការប្រើប្រាស់វិធីនេះជាបន្ដទៀត ព្រោះចំពោះស្ត្រីដែលស្ថិតក្នុងវ័យអស់រដូវ គឺនៅមិនទាន់មានការប្រើវិធីសាស្ត្រអ័រម៉ូនបំបាត់នៅឡើយទេ។
ផលប៉ះពាល់
ផលប៉ះពាល់នៃការប្រើប្រាស់វិធីអ័រម៉ូនបំបាត់នេះ គឺអាស្រ័យទៅលើប្រភេទថ្នាំ ឬការព្យាបាលដែលអ្នកជំងឺទទួលយក ដែលសង្កេតឃើញមានដូចជា ៖
– មានអាការគ្រុនក្ដៅ
– ទ្វារមាសមានសភាពស្ងួត
– មានបញ្ហាប្រព័ន្ធបន្តពូជ ចំពោះស្ត្រីដែលស្ថិតក្នុងវ័យមិនទាន់អស់រដូវ។ល៕
October 2, 2018
លោក Mourinho៖ មិនបារម្ភពីការងាររបស់លោក មុនពេលប៉ះ Valencia រាត្រីនេះ
លោក Jose Mourinho អ្នកចាត់ការទូទៅរបស់ក្រុម Manchester United ជឿជាក់ថា កីឡាករដែលធ្លាក់ទម្រង់លេងរបស់លោកមួយចំនួន មានការឈឺចាប់ជាងកីឡាករផ្សេងទៅទៀត ខណៈដែលពាក្យចចាមអារ៉ាមផ្សេងៗកំពុងតែកើនឡើងយ៉ាងច្រើនថា ពេលវេលារបស់គ្រូបង្វឹកសញ្ជាតិព័រទុយហ្គាល់រូបនេះនៅកីឡដ្ឋាន Old Trafford នឹងឈានដល់ទីបញ្ចប់ឬយ៉ាងណា?។
ការរងបរាជ័យជាលើកទី3 ក្នុងការប្រកួត 7លើកនៃក្របខ័ណ្ឌ Premier League នៅលើទឹកដីក្រុម West Ham កាលពីថ្ងៃសៅរ៍ បានធ្វើឱ្យក្រុម Man United ដេញតាមពីក្រោយក្រុមកំពុងនាំមុខលើតារាង Manchester City និងLiverpool ដល់ទៅ 9ពិន្ទុ។
នៅមុនពេលការប្រកួតក្របខ័ណ្ឌ Champions League ជាមួយនឹងក្រុម Valencia នៅរាត្រីនេះ លោក Mourinho បានបញ្ជាក់ថា លោកមិនបារម្ភចំពោះការងាររបស់លោកឡើយ ប៉ុន្តែបានបដិសេធក្នុងការបញ្ជាក់ថា លោកបានជួបប្រជុំជាមួយនឹងអនុប្រធានប្រតិបត្តិរបស់ក្លិប គឺលោក Ed Woodward កាលពីរយៈពេលប៉ុន្មានថ្ងៃមុន ឬយ៉ាងណាឡើយ។
លោក Mourinho ក៏បានការពារកីឡាកររបស់លោកផងដែរពីការចោទប្រកាន់ផ្សេងៗទាក់ទងនឹងការមិនព្យាយាមឱ្យបានគ្រប់គ្រាន់ ប៉ុន្តែលោកជឿជាក់ថា កីឡាករខ្លះកំពុងតែធ្លាក់ចុះទម្រង់លេង មានការឈឺចាប់ជាងកីឡាករផ្សេងទៅទៀត។
លោក Mourinho បានឱ្យដឹងថា៖ «ខ្ញុំគិតថា កីឡាករខ្លះមានការខ្វល់ខ្វាយជាងកីឡាករផ្សេងទៅទៀត ក្រោយពីរយៈពេល 20ឆ្នាំក្នុងកីឡាបាល់ទាត់ ខ្ញុំនៅតែជាក្មេងដូចកាលពីមុន។ ខ្ញុំនៅតែខ្វះនូវបទពិសោធ ប៉ុន្តែខ្ញុំមិនជឿជាក់ថា កីឡាករម្នាក់មិនស្មោះត្រង់នោះឡើយ»។ ការប្រកួតនេះនឹងចាប់ផ្តើមនៅម៉ោង 2ទៀបភ្លឺ៕
ប្រភពពី៖ Channel News Asia
October 2, 2018
ប្រាក់ចំណូលពីការលក់សំបុត្រទស្សនាអង្គរ កើនដល់ជាង 85.5លានដុល្លារស្មើនឹងកំណើន 13%
ការលក់សំបុត្រនៅឧទ្យានបុរាណអង្គរក្នុងរយៈពេល 9ខែនៃឆ្នាំនេះធ្វើឱ្យរដ្ឋាភិបាលរកបានប្រាក់ចំណូលប្រមាណ 85.5លានដុល្លារអាមេរិក ពោលគឺកើនឡើង13% ដោយឡែកគ្រាន់តែនៅក្នុងខែកញ្ញាតែមួយមានភ្ញៀវ 156,865នាក់បានទិញសំបុត្រចូលទស្សនាប្រាសាទអង្គរ ដែលចំនួននេះបានកើនឡើង8.3% បង្កើតប្រាក់ចំណូលបាន 6. 8លានដុល្លារពីការលក់សំបុត្រ។
យោងរបាយការណ៍របស់ស្ថាប័ន អង្គរ អ៊ិនធើប្រាយបានឱ្យដឹងថា ចាប់ពីខែមករា ដល់ខែកញ្ញាមានភ្ញៀវទេសចរជាង 1.9លាននាក់បានមកទស្សនាប្រាសាទអង្គរដែលតួលេខនេះកើនឡើងប្រហែល8.5% ធៀបនឹងរយៈពេលដូចគ្នាកាលពីឆ្នាំមុន និងប្រាក់ចំណូលសរុបចំនួន 3.80លានដុល្លារដែលបានបង្កើតក្នុងរយៈពេល 9ខែនៃឆ្នាំនេះត្រូវបានបរិច្ចាគដល់មន្ទីរពេទ្យគន្ធបុប្ផា។
លោក ហូ វណ្ឌី អគ្គលេខាធិការនៃសម្ព័ន្ធភាពទេសចរណ៍ជាតិកម្ពុជា បានមានប្រសាសន៍ថា ការកើនឡើងនៃចំនួនភ្ញៀវទេសចរជាតិ និងអន្តរជាតិនៅឧទ្យានអង្គរ គឺជាសញ្ញាមួយបង្ហាញថា កំណើនវិស័យទេសចរណ៍របស់កម្ពុជាមានភាពខ្លាំងក្លា។
យ៉ាងណាក៏ដោយលោក វណ្ឌី បានបញ្ជាក់ថា ទោះបីជាចំនួនភ្ញៀវទេសចរបរទេស និងការលក់សំបុត្រនៅអង្គរកំពុងកើនឡើងក៏ដោយ ក៏មានសេចក្តីរាយការណ៍ពីប្រតិបត្តិករទេសចរណ៍ក្នុងស្រុកសណ្ឋាគារ និងអ្នកលក់វត្ថុអនុស្សាវរីយ៍មួយចំនួនបានបង្ហាញពីការធ្លាក់ចុះនៃចំណូលដែរ។
ពួកគេនិយាយថា ភ្ញៀវទេសចរជាច្រើនកំពុងជ្រើសរើសយកការចំណាយពេលតិចនៅក្នុងខេត្តសៀមរាប និងប្រទេសកម្ពុជាដែលបានបណ្តាលឱ្យមានការធ្លាក់ចុះប្រាក់ចំណូលសម្រាប់ពួកគេ។ អាជីវករទាំងនេះនិយាយថា ភ្ញៀវទេសចរឥឡូវនេះកំពុងស្នាក់នៅប្រទេសកម្ពុជាជាមធ្យមត្រឹមតែ 3ថ្ងៃប៉ុណ្ណោះ។
អគ្គលេខាធិការនៃសម្ព័ន្ធភាពទេសចរណ៍ជាតិកម្ពុជារូបនេះ បានស្នើថា រដ្ឋាភិបាលគួរពិនិត្យមើលបញ្ហានេះដោយបន្ថែមថា៖ ការទាក់ទាញភ្ញៀវទេសចរឱ្យស្នាក់នៅរយៈពេលយូរនៅក្នុងប្រទេសមានសារៈសំខាន់ដើម្បីបង្កើនជីវភាពរស់នៅរបស់អ្នកដែលពឹងផ្អែកលើឧស្សាហកម្មទេសចរណ៍៕
October 2, 2018