សង្គម និងសេដ្ឋកិច្ច - La Reine Media

សិង្ហបុរីបើកឡើងវិញ «ដំណើរទេសចរណ៍មិនគិតថ្លៃ» ពីព្រលានយន្តហោះ Changi

ភ្ញៀវដែលធ្វើដំណើរឆ្លងកាត់ទឹកដី Changi រយៈពេលខ្លីបំផុតត្រឹម 5.5 ម៉ោង អាចចូលរួមដំណើរទេសចរណ៍មិនគិតថ្លៃនៅសិង្ហបុរី។

ព្រលានយន្តហោះ Changi រួមនឹងក្រុមហ៊ុនអាកាសចរណ៍ Singapore Airlines និងនាយកដ្ឋានទេសចរណ៍ សិង្ហបុរី បានសហការគ្នាក្នុងការបើកឡើងវិញកម្មវិធី «ទេសចរណ៍សិង្ហបុរីដោយមិនគិតថ្លៃ» ចាប់ពីដើមខែមេសា ក្រោយពីការផ្អាកមួយរយៈពេលដោយសារវិបត្តិកូវីដ-19។

កម្មវិធីមិនគិតថ្លៃខាងលើនឹងមានដំណើរកម្សាន្តចំនួនបួនសម្រាប់ភ្ញៀវ រួមមាន City Sights Tour, Heritage Tour, Jewel Tour (មានតាំងពីមុនកូវីដ និងបានកែលំអ) រួមនឹង Tour ថ្មី Changi Precinct។ អ្នកដឹកនាំដំណើរកម្សាន្តទាំងនេះសុទ្ធតែនិយាយភាសាអង់គ្លេស។

ដំណើរកម្សាន្តរយៈពេល 2.5 ម៉ោងនេះ បម្រើដល់ភ្ញៀវដែលឆ្លងកាត់សិង្ហបុរីយ៉ាងតិច 5.5 ម៉ោង។ គោលដៅរបស់កម្មវិធីដំណើរកម្សាន្តមិនគិតថ្លៃនេះគឺធ្វើឡើងដើម្បីបង្កើនការយល់ដឹងរបស់ភ្ញៀវអន្តរជាតិចំពោះសិង្ហបុរី និងដើម្បីទាក់ទាញភ្ញៀវមកទស្សនាច្រើនដង។ គណៈកម្មការរៀបចំដំណើរកម្សាន្តខាងលើគ្រោងនឹងបង្កើនចំនួន Tour នេះឱ្យឡើងដល់ 9 នាពេលខាងមុខ។ កាលពីឆ្នាំ 2019 ភ្ញៀវជាង 80,000 នាក់បានចូលរួមដំណើរកម្សាន្តដោយមិនគិតថ្លៃនេះ។

ដំណើរកម្សាន្តដោយមិនគិតថ្លៃ Changi Precinct Tour នឹងនាំភ្ញៀវទៅកាន់តំបន់ភាគខាងកើតជុំវិញអាកាសយានដ្ឋាន Changi ស្វែងយល់ពីជីវភាពរបស់ប្រជាជនក្នុងតំបន់កណ្ដាលរបស់ Tampines ភូមិឋាន និងឆ្នេរសមុទ្រ Changi។

ដំណើរ Jewel Tour នឹងនាំភ្ញៀវទៅទស្សនាទីតាំងល្បីឈ្មោះមួយចំនួនមានដូចជា ជ្រលងព្រៃ Shiseido, Vortex HSBC Rain (ជ្រោះទឹកធ្លាក់ក្នុងផ្ទះខ្ពស់ជាងគេលើលោក – 40 ម៉ែត្រ)។ល។

ចំណែក City Sight Tour វិញ នឹងនាំទៅកាន់ខណ្ឌដែលនៅកណ្ដាលទីក្រុងសិង្ហបុរី។ ភ្ញៀវនឹងបានចូលមើលសារមន្ទីរជាតិ និងស្ពាន Anderson។ រថយន្តដឹកភ្ញៀវក្នុងដំណើរកម្សាន្តនេះក៏ត្រូវឆ្លងកាត់ឆកសមុទ្រ Marina ផងដែរ។

ដំណើរកម្សាន្ត Heritage Tour នឹងចូលទស្សនាសារមន្ទីរ និងវត្តសារីរិកធាតុព្រះពុទ្ធ (Buddha Tooth Relic Temple & Museum) ទីក្រុងនាវា ទីក្រុងអារ៉ាប់ និងច្រកផ្លូវ Haji។

ដំណើរកម្សាន្តទាំងនេះក៏នាំភ្ញៀវទៅកាន់ទីតាំងពិសេសមួយចំនួនផ្សេងទៀតដើម្បីស្វែងយល់អំពីការរីកចម្រើនរបស់ប្រទេសសិង្ហបុរី។

ដើម្បីចូលរួមដំណើរកម្សាន្តដោយមិនគិតថ្លៃនេះ ភ្ញៀវត្រូវតែមានកាតឡើងយន្តហោះ លិខិតឆ្លងដែន និងការបញ្ជាក់អំពីការកក់ដំណើរកម្សាន្ត។ ភ្ញៀវអាចចុះឈ្មោះដោយការស្កេនកូដ QR នៅឯបញ្ជរ Free Singapore Tour ឬ គេហទំព័រកក់ដំណើរកម្សាន្ត៕

April 8, 2023

ក្រុមហ៊ុន Geely ដាក់បង្ហាញឡានហោះអគ្គិសនីធំបំផុតនៅប្រទេសចិន

ឡានហោះអគ្គិសនីគំរូដែលហោះឡើង និងចុះចតដោយត្រង់ AE200 ដែលមានស្លាបប្រវែង 14.5 ម៉ែត្រ កាលពីថ្ងៃទី 06 មេសា ត្រូវបានដាក់បង្ហាញជាលើកដំបូងនៅក្នុងខេត្ត Sichuan ភាគនិរតីប្រទេសចិន។

ឡានហោះមានមនុស្សបើក AE200 ត្រូវបានអភិវឌ្ឍតែឯងដោយ Aerofugia ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតរថយន្តចិន Geely។ កាលពីថ្ងៃទី 06 មេសា ឡានហោះនេះត្រូវបានដាក់បង្ហាញជាលើកដំបូងនៅទីក្រុង Chengdu របស់ខេត្ត Sichuan។

AE200 គឺជាឡានហោះអគ្គិសនីប្រភេទហោះឡើង និងចុះចតត្រង់ ធំជាងគេបង្អស់ និងបានធ្វើការសាកល្បងហោះហើរលើកដំបូងនៅប្រទេសចិន។ ឡានហោះនេះមានកម្ពស់ 3.5 ម៉ែត្រ បណ្ដោយ 9.5 ម៉ែត្រ និងស្លាបមានប្រវែង 14.5 ម៉ែត្រ អាចដឹកមនុស្សបានប្រាំនាក់។

ដងខ្លួនរបស់ឡានហោះនេះធ្វើអំពីវត្ថុធាតុ composite ដែលជួយកាត់បន្ថយសំឡេងរំខាន។ ក្នុងអនាគត AE200 អាចហោះហើរលើកម្ពស់ចាប់ពី 300 ដល់ 1,000 ម៉ែត្រ និងហោះបានចម្ងាយពី 200 ដល់ 300 គីឡូម៉ែត្រ ក្នុងល្បឿន 250 គីឡូម៉ែត្រ/ម៉ោង។

នៅពេលមានវត្តមានក្នុងទីផ្សារជាផ្លូវការ ឡានហោះអគ្គិសនី AE200 នឹងត្រូវបានដាក់ឱ្យដំណើរការហោះហើររវាងទីក្រុង និងទីក្រុង៕

April 8, 2023

ខ្សែបម្រើ McTominay របស់ស្កុតឡែនលេចធ្លោលើវាលស្មៅក៏ព្រោះតែមានស្រីស្នេហ៍ដ៏ស្រស់ស្អាត

កីឡាករខ្សែបម្រើ Scott Francis Mctominay ត្រូវបានមនុស្សមួយចំនួនចាត់ទុកថា «បុរសមានសំណាង» ពេលអ្នកគាំទ្រសរសើរថា មានមិត្តស្រីដ៏ស្រស់ស្អាតឈ្មោះ Cam Reading។

កីឡាករខ្សែបម្រើរូបនេះគឺជាតារាបាល់ទាត់មួយរូបនៅក្នុងការប្រកួតឈ្នះអេស្ប៉ាញ 2-0 របស់ស្កុតឡែន ដោយស៊ុតបញ្ចូលទីបានពីរគ្រាប់ ជួយឱ្យក្រុមរបស់ស្កុតឡែននាំមុខគេនៅវគ្គសន្សំពិន្ទុនៅ Euro 2024។

McTominay ក៏ស៊ុតបញ្ចូលទីរបស់ក្រុមជម្រើសជាតិប្រទេសស៊ីប (Cyprus) បានពីរគ្រាប់កាលពីថ្ងៃទី 01 មេសា ធ្វើឱ្យគាត់លេចធ្លោជាងគេនៅក្នុងសប្ដាហ៍កន្លង ដោយរកបានបួនគ្រាប់តែឯង។

ក្នុងពេលដែល McTominay កំពុងរកគ្រាប់បាល់ដែលដណ្ដើមបាន 6 ពិន្ទុឱ្យស្កុតឡែន មិត្តស្រី Cam Reading របស់គាត់កំពុងសម្សាន្ត និងលើកទឹកចិត្តគាត់ពីមាត់សមុទ្រនៅឌូដៃ។

ស្រីស្អាត Cam Reading បានបង្ហោះរូបថតមួយចំនួនស្ដីពីដំណើរកម្សាន្តរបស់ខ្លួនកាលពីចុងសប្ដាហ៍មុន ហើយកីឡាករ McTominay ក៏ចូលបញ្ចេញមតិ ដោយសរសេរថា «អូនស្អាតណាស់ ទេពកញ្ញារបស់បង»។

នៅលើបណ្ដាញសង្គម កាលពីពេលថ្មីៗនេះ Cam Reading បានបង្ហោះរូបថតជាច្រើនសន្លឹកដ៏គួរឱ្យចាប់ចិត្ត។ រូបថតទាំងនេះក៏ទទួលបានការចាប់អារម្មណ៍ ក៏ដូចជាការសរសើរច្រើនពីអ្នកលេងបណ្ដាញសង្គម។

Cam Reading កំពុងតែលើកទឹកចិត្ត និងគាំទ្រមិត្តប្រុស McTominay ពីចម្ងាយ និងបានឱ្យដឹងថា នាងពិតជាមានមោទកភាពចំពោះខ្សែបម្រើរូបនេះ បន្ទាប់ពីរកបានពីរគ្រាប់ជូនស្កុតឡែននៅពេលប្រកួតជាមួយក្រុមប្រទេសស៊ីប។ Cam Reading សរសេរថា «ជ័យជម្នះពីរគ្រាប់ដ៏អស្ចារ្យ! មិនអាចមានមោទកភាពណាខ្លាំងជាងនេះ»។

សូមទស្សនារូបថតថតដ៏ស៊ិចស៊ីមួយចំនួនរបស់ Cam Reading ដែលជាមិត្តស្រីរបស់ខ្សែបម្រើជនជាតិស្កុតឡែន ៖

April 8, 2023

U-22 ថៃ ជួបការលំបាកក្នុងការប្រមូលកម្លាំងដែលខ្លាំងបំផុតនៅស៊ីហ្គេមលើកនេះ

កាលបរិច្ឆេទប្រកួតរបស់វិញ្ញាសាបាល់ទាត់នៅស៊ីហ្គេមលើកទី 32 មិនជាន់គ្នានឹង FIFA Days ហើយការប្រកួតនៅពានរង្វាន់ជើងឯកបាល់ទាត់ជាតិថៃ Thai League 1 កំពុងធ្វើឡើង ដូច្នេះ U-22 ថៃ ទំនងជាពិបាកក្នុងការប្រមូលកីឡាករខ្លាំងៗបំផុតមកទាត់នៅកម្ពុជា។

វិញ្ញាសាបាល់ទាត់បុរសនៅស៊ីហ្គេមលើកទី 32 នឹងធ្វើឡើងចាប់ពីថ្ងៃទី 29 មេសាដល់ 16 ឧសភា ខណៈដែល Thai League 1 ត្រូវប្រកួតរហូតដល់ថ្ងៃទី 12 ឧសភាទើបចប់។ ដោយសារតែមិនជាន់នឹងកាលបរិច្ឆេទ FIFA Days ដូច្នេះបណ្ដាក្លឹបនៅប្រទេសថៃមិនអាចត្រូវបានតម្រូវឱ្យបញ្ចេញកីឡាករក្នុងឱកាសនេះ។

សហព័ន្ធកីឡាបាល់ទាត់ថៃ (FAT) និងគណៈកម្មការរៀបចំ Thai League មានគោលការណ៍ផ្ដល់អាទិភាពឱ្យបណ្ដាពានរង្វាន់ចាប់ពីថ្នាក់ទ្វីបអាស៊ីឡើងទៅ។ បណ្ដាក្លឹបនឹងគាំទ្រដល់ក្រុម U-23 ច្រើនជាង នៅពេល FAT ត្រូវការប្រមូលកីឡាករទៅប្រកួតវគ្គជម្រុះ U-23 អាស៊ី ឬវគ្គជម្រុះ Olympic។ ហេតុនេះហើយ ទើប FAT ត្រូវចរចាជាមួយក្លឹបនីមួយៗដើម្បីសូមឱ្យផ្ដល់កីឡាករ។

គ្រូបង្វឹកថៃ Issara Sritaro សង្ឃឹមថា នឹងកោះហៅបានបណ្ដាកីឡាករសំខាន់ៗ មានដូចជា ខ្សែការពារ Chatmongkol Rueangthanarot, Jonathan Khemdee, ខ្សែបម្រើ Airfan Doloh, Channarong Promsrikaew ឬខ្សែប្រយុទ្ធ Teerasak Poeiphimai សម្រាប់ការប្រកួតនៅកម្ពុជា។ ប៉ុន្តែ កំពូលខ្សែប្រយុទ្ធ Suphanat Mueanta ដែលបច្ចុប្បន្នទាត់ឱ្យក្លឹប Buriram United មានភាគរយនៃអវត្តមានរហូតដល់ 99%។ គ្រូបង្វឹក U-22 ថៃ និយាយថា «Suphanat នឹងទៅកាន់អឹរ៉ុបដើម្បីហាត់ បន្ទាប់ពី Thai League 1 បានបញ្ចប់»។

កំពូលខ្សែប្រយុទ្ធ Suphanat Mueanta ទំនងជាពិបាកចូលរួមប្រកួតនៅស៊ីហ្គេមលើកនេះ

ទោះជាយ៉ាងណាក៏ដោយ គ្រូបង្វឹកថៃឱ្យដឹងថា បានពិភាក្សាជាមួយថ្នាក់ដឹកនាំក្លឹប Buriram និងសង្ឃឹមថា ក្លឹបនេះនឹងយល់ព្រមឱ្យ Suphanat ចូលប្រកួតនៅស៊ីហ្គេមចាប់ពីវគ្គពាក់កណ្ដាលផ្ដាច់ព្រ័ត្រ។

នៅស៊ីហ្គេមលើកនេះ បណ្ដាក្រុម U-22 ត្រូវបានអនុញ្ញាតឱ្យចុះឈ្មោះកីឡាករផ្លូវការត្រឹមតែ 20 នាក់ប៉ុណ្ណោះ។ ថៃដាក់គោលដៅដណ្ដើមមេដាយមាសឱ្យបាននៅស៊ីហ្គេមលើកទី 32 ក្រោយពីឈរមើលវៀតណាមគ្រប់គ្រងតំណែងជើងឯកពីរឆ្នាំជាប់គ្នា។ នៅកម្ពុជា ក្រុមបាល់ទាត់ជម្រើសជាតិថៃស្ថិតក្នុងពូល B ដែលនឹងត្រូវប្រកួតជាមួយសិង្ហបុរីនៅថ្ងៃទី 30 មេសា, ប៉ះម៉ាឡេស៊ីនៅថ្ងៃទី 06 ឧសភា, ប៉ះឡាវថ្ងៃទី 08 ឧសភា និងវៀតណាមនៅថ្ងៃទី 11 ឧសភា ឆ្នាំ 2023៕

April 7, 2023

រថយន្តក្រុងបើកបរស្វ័យប្រវត្តដំបូងគេលើពិភពលោកត្រៀមដំណើរការឆាប់ៗនេះ

រថយន្តក្រុងសាធារណៈបើកបរស្វ័យប្រវត្តដំបូងគេលើពិភពលោកនឹងត្រូវបានដាក់ឱ្យដំណើរការនៅប្រទេសស្កុតឡែនចាប់ពីខែឧសភា 2023 ។

រថយន្តក្រុងបើកបរស្វ័យប្រវត្តរបស់សាជីវកម្មដឹកជញ្ជូន Stagecoach នឹងចាប់ផ្ដើមដំណើរការនៅលើកំណាត់ផ្លូវប្រវែង 22.5 គីឡូម៉ែត្រ រួមមានស្ពានខ្សែកាប Forth Road ដ៏ល្បីឈ្មោះនៅ Edinburgh នៅថ្ងៃទី 15 ឧសភា។ រថយន្តប្រភេទនេះប្រាំគ្រឿងនឹងដំណើរការជារៀងរាល់ថ្ងៃ ដែលអាចដឹកអ្នកដំណើរបានប្រហែល 10,000 នាក់/សប្ដាហ៍។ យោងតាម Interesting Engineering នេះគឺជាលទ្ធផលនៃការធ្វើតេស្តជោគជ័យកាលពីខែមករា 2023 និងទទួលបានជំនួយផ្នែកហិរញ្ញវត្ថុពីរដ្ឋាភិបាលអង់គ្លេស។

Stagecoach បានឱ្យដឹងថា រថយន្តរបស់ពួកគេនឹងបើកបរក្នុងល្បឿនអតិបរមា 80 គីឡូម៉ែត្រ/ម៉ោង នៅលើផ្លូវល្បឿនលឿន។ ថ្វីបើរថយន្តនេះបើកបរដោយស្វ័យប្រវត្ត ប៉ុន្តែក៏មានបុគ្គលិកពីរនាក់ស្ថិតនៅក្នុងរថយន្ត ក្នុងនោះ ម្នាក់អង្គុយលើកៅអីអ្នកបើកបរដើម្បីតាមដានប្រព័ន្ធគ្រប់គ្រង និងម្នាក់ទៀតមានភារកិច្ចជួយដល់អ្នកដំណើរ។

គម្រោងនេះស្ថិតក្នុងគំនិតផ្ដួចផ្ដើម CAVForth Initiative របស់រដ្ឋាភិបាលអង់គ្លេស ដែលចាប់ផ្ដើមកាលពីឆ្នាំ 2019។

ក្រៅពីរថយន្តក្រុងសាធារណៈបើកបរស្វ័យប្រវត្តិ Stagecoach ក៏បង្ហាញរថយន្តក្រុងអគ្គិសនី 122 គ្រឿងដែលនឹងដំណើរការនៅក្នុងបណ្ដាញចផ្លូវរាចរណ៍សំខាន់ៗរបស់ចក្រភពអង់គ្លេសនៅក្នុងរយៈពេល 12 ខែទៀត។ ថ្មីៗនេះ Stagecoach បានណែនាំរថយន្តក្រុងដែលដំណើរការដោយអគ្គិសនីទាំងស្រុងនៅក្នុងទីក្រុងមួយចំនួន មានជាអាទិ៍ Perth, Aberdeen, Inverness និង Dunfermline នៅប្រទេសស្កុតឡែន ដែលជាទឹកដីភាគខាងជើងរបស់ចក្រភពអង់គ្លេស៕

April 7, 2023

គ្រូបង្វឹកឥណ្ឌូណេស៊ី «ដេកមិនលក់ បក់មិនល្ហើយ» ពេល Ronaldo មិនទាន់ប្រាកដថា ទាត់នៅស៊ីហ្គេម

គ្រួបង្វឹក Indra Sjafri ទទួលស្គាល់ថា លោកមិនទាន់ទទួលបានចម្លើយពី Ronaldo Kwateh បន្ទាប់ពីបានកោះហៅកម្លាំងបន្ថែម 7 នាក់ទៀតពីក្រុម U-20 ឱ្យឡើងមកកាន់ U-22 ដើម្បីចូលរួមប្រកួតនៅស៊ីហ្គេមលើកទី 32 ដែលនឹងធ្វើឡើងនៅកម្ពុជានាពេលខាងមុខ។

ថ្មីៗនេះ ទំព័រ Bola Times របស់ឥណ្ឌូណេស៊ី បានធ្វើឱ្យមានការភ្ញាក់ផ្អើលនៅពេលសរសេរថា «Ronaldo Kwateh មិនទទួលយកការកោះហៅមកកាន់ក្រុម U-22 ឥណ្ឌូណេស៊ី តើគាត់មិនចាប់អារម្មណ៍ដល់ការប្រកួតនៅស៊ីហ្គេម 2023?»។

កន្លងទៅថ្មីៗនេះ ដើម្បីត្រៀមខ្លួនសម្រាប់ការដណ្ដើមមេដាយមាសនៅស៊ីហ្គេមលើកទី 32 គ្រូបង្វឹករបស់ U-22 ឥណ្ឌូណេស៊ីលោក Indra Sjafri បានពិភាក្សាជាមួយគ្រូបង្វឹក Shin Tae Yong ដើម្បីធ្វើការកោះហៅកីឡាករ 7 នាក់នៅ U-20 ឱ្យឡើងមកកាន់ U-22 របស់ប្រទេសនេះ ក្នុងនោះមាន Ronaldo Kwateh, Hokky Caraka, Daffa Fasya, Muhamamad Ferrari, Doni Tri Pamungkas, Ahmad Maulana និង Marselino Ferdinan។

ក៏ប៉ុន្តែ ទំព័រ Bola Times ដកស្រង់សម្ដីរបស់លោក Indra Sjafri ឱ្យដឹងថា រហូតមកដល់ពេលនេះ លោកមិនទាន់ទទួលបានការឆ្លើយតបណាមួយពី Ronaldo Kwateh នៅឡើយ ក្រោយពីបានកោះហៅឱ្យមកកាន់ U-22 ឥណ្ឌូណេស៊ី ដើម្បីត្រៀមធ្វើដំណើរមកកម្ពុជា។

Ronaldo Kwateh គឺជាកីឡាករវ័យក្មេងជាងគេដែលធ្លាប់បានចូលរួមប្រកួតនៅស៊ីហ្គេមលើកទី 31 នៅវៀតណាម។ Ronaldo Kwateh ធ្លាប់ចូលប្រកួតនៅពានរង្វាន់ជើងឯកថ្នាក់ជាតិឥណ្ឌូណេស៊ីពេលមានអាយុទើបតែ 16 ឆ្នាំ។ បច្ចុប្បន្ន កីឡាកររូបនេះកំពុងទាត់ឱ្យក្លឹប Bodrumspor នៅប្រទេសតួកគី។

ទន្ទឹមនឹង Ronaldo Kwateh កីឡាករបីរូបផ្សេងទៀតដែលកំពុងទាត់ឱ្យក្លឹបបរទេស និងត្រូវបានកោះហៅ ក៏មិនទាន់មានការឆ្លើយតបនៅឡើយដែរ ព្រោះកំពុងបំពេញការងាររបស់ពួកគេ។ ក៏ប៉ុន្តែ យោងតាមសហព័ន្ធបាល់ទាត់ឥណ្ឌូណេស៊ី (PSSI) បច្ចុប្បន្នមានកីឡាករបីនាក់ក្នុងចំណោម 7 នាក់នៅក្រុម U-20 ដែលត្រូវបានកោះហៅ បានមកដល់ប្រទេសកាលពីថ្ងៃទី 02 មេសា រួមមាន Hokky Caraka, Made Tito Wiratama និង Daffa Fasya៕

April 7, 2023

បុគ្គលិកផ្នែកលាងចានបង្កការភ្ញាក់ផ្អើល ព្រោះជិះឡានទំនើបទៅធ្វើការរាល់ថ្ងៃ

(ប្រទេសចិន) – ស្ត្រីម្នាក់ធ្វើឱ្យអ្នកលេងបណ្ដាញសង្គមត្រូវបើកភ្នែកធំៗ ព្រោះនៅតែទៅបំពេញការងារជាអ្នកលាងចានឱ្យភោជនីយដ្ឋានមួយនៅទីក្រុង Chengdu បើទោះគ្រួសារមានជីវភាពធូរធារ និងមានទាំងរថយន្តប្រណិត Bentley។

នៅក្នុងវីដេអូដែលត្រូវបានចែករំលែកតគ្នាលើបណ្ដាញសង្គមនៅប្រទេសចិន ស្ត្រីវ័យកណ្ដាលម្នាក់ មានសក់ស្កូវ ពាក់អៀម និងស្រោមដៃកៅស៊ូ ឈានជើងចេញពីរថយន្ត Bentley Mulsanne ពណ៌ខ្មៅដែលចតនៅខាងមុខហាងស៊ុបមួយក្នុងទីក្រុង Chengdu ខេត្ត Sichuan កាលពីថ្ងៃទី 01 មេសា។

«នៅផ្ទះធុញណាស់។ ខ្ញុំមានអារម្មណ៍មិនល្អបើសិនមិនបានលាងចានមួយថ្ងៃ» ស្ត្រីខាងលើបកស្រាយពីមូលហេតុដែលគាត់នៅតែធ្វើជាអ្នកលាងចាន។

ម្ចាស់ហាងស៊ុបនេះបានឱ្យដឹងថា គ្រួសារបុគ្គលិករូបនេះមានជីវភាពធូរធារ ហើយអ្នកស្រីចង់មកធ្វើការដើម្បីកំដរពេលវេលា។ អ្នកបើកបរដែលជាកូនស្រីរបស់ស្ត្រីខាងលើនិយាយថា មិនអាចឃាត់ម្ដាយធ្វើអ្វីដែលគាត់ចង់ ទើបជួយបើកឡានជូនគាត់ទៅធ្វើការ និងមកទទួលគាត់ជារៀងរាល់ថ្ងៃ។

អ្នកលេងបណ្ដាញសង្គមសម្ដែងការកោតសរសើរចំពោះភាពឧស្សាហ៍ «អ្នកមានលាងចាន» ខាងលើ ហើយអ្នកខ្លះចាត់ទុកថា អ្នកស្រីគឺជាគំរូល្អ ជាប្រភពកម្លាំងចិត្ត៕

April 7, 2023

យន្តហោះអវកាសបំពាក់ម៉ាស៊ីនរ៉ុក្កែតដំបូងគេលើលោក ទទួលបានជោគជ័យក្នុងការហោះហើរសាកល្បង

Dawn Aerospace ដែលជាក្រុមហ៊ុនអវកាសមានទីស្នាក់ការកណ្ដាលនៅនូវែលសេឡង់ សម្រេចបានជំហានសំខាន់មួយនៅពេលយន្តហោះគន្លងគោចរកម្រិតទាប Mk-II Aurora របស់ពួកគេ បានហោះឡើងដោយជោគជ័យជាមួយនឹងម៉ាស៊ីនរ៉ុក្កែត។

កាលពីថ្ងៃទី 05 មេសា ក្រុមហ៊ុន Dawn Aerospace ដែលមានការិយាល័យនៅនូវែលសេឡង់ ហូឡង់ និងសហរដ្ឋអាម៉េរិក ប្រកាសថា សម្រេចបានការហោះហើរសាកល្បងម៉ាស៊ីនរ៉ុក្កែតដំបូងរបស់យន្តហោះអវកាស Mk-II Aurora។ ជើងហោះហើរត្រូវបានធ្វើឡើងពីថ្ងៃទី 29 ដល់ 31 មីនា 2023 ដោយហោះចេញពីព្រលានយន្តហោះ Glentanner។ Dawn Aerospace គឺជាមួយក្នុងចំណោមក្រុមហ៊ុនអវកាសឯកជនដែលរីកចម្រើនឆាប់រហ័សជាងគេលើពិភពលោក ដោយមានផ្កាយរណប 11 គ្រឿងកំពុងធ្វើសកម្មភាពលើគន្លងតារាវិថី។

នៅមុនការធ្វើតេស្តនេះ Mk-II Aurora បានហោះហើរដោយប្រើប្រាស់ម៉ាស៊ីនយន្តហោះ។ ការសាកល្បងកាលពីសប្ដាហ៍កន្លងគឺជាការហោះហើរដំបូងដែលប្រើប្រាស់ម៉ាស៊ីនរ៉ុក្កែតផ្ទាល់ខ្លួនរបស់ Dawn Aerospace។ យោងតាម Dawn Aerospace ការធ្វើតេស្តនេះដំណើរការដោយរលូន។ ក្នុងជើងហោះហើរដំបូងៗ យន្តហោះនេះហោះឡើងដល់កម្ពស់ 1,829 ម៉ែត្រ និងល្បឿន 314 គីឡូម៉ែត្រ/ម៉ោង ប្រហាក់ប្រហែលនឹងលទ្ធផលនៃការធ្វើតេស្តមុននោះដែលប្រើម៉ាស៊ីនយន្តហោះប្រភេទប្រតិកម្មរហ័ស។

Mk-II Aurora គឺជាយន្តហោះអវកាសបញ្ជាពីចម្ងាយ និងអាចបំពេញបេសកកម្មហោះហើរទៅកាន់ទីអវកាសក្បែរគន្លងតារាវិថី ហើយចុះចតលើផ្លូវរត់នៅព្រលានយន្តហោះ ដូចទៅនឹងយន្តហោះប្រតិកម្មរហ័សធម្មតា។

យន្តហោះអវកាស Mk-II Aurora របស់ក្រុមហ៊ុន Dawn Aerospace

ក្នុងអនាគត យន្តហោះអវកាសនេះនឹងអាចដឹកទំនិញឡើងទៅកាន់គន្លងគោចរកម្រិតទាបរបស់ផែនដីជាច្រើនជើងក្នុងមួយថ្ងៃ។ បន្ទាប់ពីបានជោគជ័យក្នុងកម្មវិធី Mk-II Aurora ក្រុមហ៊ុន Dawn Aerospace មានផែនការផលិត Mk-III ដែលមានពីរជាន់ ក្នុងនោះជាន់ទីពីរអាចផ្ដាច់ខ្លួន អាចដឹកទំនិញទម្ងន់មួយតោន ឬដឹកផ្កាយរណបទម្ងន់ 250 គីឡូក្រាមឡើងទៅកាន់គន្លងគោចរកម្រិតទាបរបស់ផែនដី។ យោងតាម CEO Stefan Powell Mk-III នឹងត្រូវបានផលិតឡើងដើម្បីអាចប្រើប្រាស់ឡើងវិញបាន 96%។

ការធ្វើតេស្តលើកក្រោយ Mk-II Aurora នឹងហោះហើរខ្ពស់ជាងការសាកល្បងលើកនេះ។ ក្នុងសកម្មភាពពាណិជ្ជកម្មនាពេលអនាគត យន្តហោះអវកាសនេះនឹងហោះដល់កម្ពស់ 100 គីឡូម៉ែត្រ ហើយនឹងអាចក្លាយជាយានដំបូងគេដែលហោះហើរបានពីរជើងក្នុងមួយថ្ងៃ៕

April 7, 2023

អតីតគ្រូបង្វឹកបាល់ទាត់ U-22 ថៃ «ខ្លាច» ម៉ាឡេស៊ី គ្រាដែលឥណ្ឌូណេស៊ី «ខ្លាច» កម្ពុជា

អតីតគ្រូបង្វឹករបស់ក្រុមបាល់ទាត់ជម្រើសជាតិថៃ Wittaya Laohakul បានបង្ហើបឱ្យដឹងអំពីក្រុមដែលអាចជាបេក្ខភាពលំដាប់កំពូលសម្រាប់មេដាយមាសនៅស៊ីហ្គេមលើកទី 32 ក្នុងពេលដែល គ្រូបង្វឹករបស់ឥណ្ឌូណេស៊ី បែរជាខ្លាចចាញ់កម្ពុជាទៅវិញ។

យោងតាមទំព័រ Siam Sport នៅប្រទេសថៃ អតីតគ្រូបង្វឹក Wittaya Laohakul អះអាងថា ខ្លួនលោកមិនបារម្ភទេនៅពេល U-22 ថៃ ត្រូវប៉ះ U-22 វៀតណាមយ៉ាងឆាប់នៅវគ្គចែកពូល។ ប៉ុន្តែ លោកយល់ថា U-22 ម៉ាឡេស៊ី ទើបជាគ្រោះថ្នាក់ដែលក្រុមថៃត្រូវតែប្រុងប្រយ័ត្នជាងគេ។

«…បេក្ខភាពទីមួយសម្រាប់មេដាយមាសរបស់វិញ្ញាសាបាល់ទាត់បុរសគឺ ក្រុមជម្រើសជាតិម៉ាឡេស៊ី។ ព្រោះថា ក្រុមបាល់ទាត់វ័យក្មេងនេះបានត្រៀមខ្លួនយ៉ាងហ្មត់ចត់ក្នុងរយៈពេលវែងមុននោះ» លោក Laohakul វាយតម្លៃខ្ពស់ទៅលើក្រុម U-22 ម៉ាឡេស៊ី។

អតីតគ្រូបង្វឹកថៃ Wittaya Laohakul បញ្ជាក់ថា វៀតណាមក៏ជាគូប្រកួតដែលគួរឱ្យញញើត ហើយ «ហ្វូងដំរីចម្បាំង» ត្រូវតែប្រយ័ត្នប្រយែងតាំងពីវគ្គចែកពូល។

ដោយឡែក គ្រូបង្វឹក Indra Sjafri របស់ U-22 ឥណ្ឌូណេស៊ីវិញ ក៏បានព្រមានដល់ក្រុមកូនសិស្សរបស់លោកអំពី U-22 កម្ពុជា បើទោះស្ថិតក្នុងពូលដែលភាគច្រើនជាក្រុមខ្សោយៗ រួមមាន ឥណ្ឌូណេស៊ី កម្ពុជា មីយ៉ាន់ម៉ា ហ្វ៊ីលីពីន និងទីម័រខាងកើត ក៏ដូចជា ឥណ្ឌូណេស៊ីត្រូវបានរំពឹងថា នឹងអាចឡើងដល់វគ្គពាក់កណ្ដាលផ្ដាច់ព្រ័ត្រ នៅពេលនាំមុខគេនៅក្នុងពូល។

ក្នុងចំណោមបណ្ដាក្រុមជម្រើសជាតិដែល U-22 ឥណ្ឌូណេស៊ី ត្រូវប្រកួត U-22 កម្ពុជាគឺជាក្រុមដែលគ្រូបង្វឹក Indra Sjafri មានការប្រុងប្រយ័ត្នជាងគេ។ «នៅវគ្គចែកពូលរបស់យើងមានក្រុមម្ចាស់ផ្ទះ។ ប៉ុន្មានឆ្នាំមកនេះ កម្ពុជាមានការរីកចម្រើនខ្លាំង ក្នុងនោះកីឡាករមានគុណភាពខ្ពស់ជាងមុនឆ្ងាយ»។

ទោះជាយ៉ាងណាក៏ដោយ គ្រូបង្វឹក Indra Sjafri នៅតែដាក់គោលដៅឡើងឱ្យដល់វគ្គផ្ដាច់ព្រ័ត្រនៅស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។

គ្រូបង្វឹក Indra Sjafri របស់ U-22 ឥណ្ឌូណេស៊ី

ពូល A នៃវិញ្ញាសាបាល់ទាត់បុរសនៅស៊ីហ្គេមលើកនេះនឹងត្រូវប្រកួតនៅឯកីឡដ្ឋានជាតិមរតកតេជោ ក្នុងខណ្ឌជ្រោយចង្វារ រាជធានីភ្នំពេញ ខណៈដែលពូល B នឹងត្រូវប្រកួតនៅកីឡដ្ឋានព្រីនស៍ក្នុងខណ្ឌសែនសុខ រាជធានីភ្នំពេញ ដោយចាប់ផ្ដើមពីថ្ងៃទី 29 មេសា៕

April 7, 2023

ចិនធ្វើតេស្តរ៉ុក្កែតចុះចតបញ្ឈរត្រង់លើសមុទ្រដោយជោគជ័យ

ប្រទេសចិន ថ្មីៗនេះបានទទួលជោគជ័យក្នុងការសាកល្បងរ៉ុក្កែតចុះចតឈរត្រង់នៅលើសមុទ្រ ដូចទៅនឹងរ៉ុក្កែតរបស់ក្រុមហ៊ុនអាម៉េរិក SpaceX។

វិទ្យាស្ថានវិទ្យាសាស្ត្រចិន (CAS) កាលពីថ្ងៃទី 06 មេសា ឱ្យដឹងថា បច្ចេកវិទ្យានេះនឹងជាគ្រឹះសម្រាប់ការអនុវត្តនាពេលអនាគត រួមទាំងគ្រឹះសម្រាប់ការសាកល្បងក្នុងអវកាសជាន់ទាបដែលអាចកកែច្នៃឡើងវិញ ក៏ដូចជាការអភិវឌ្ឍវិស័យទេសចរណ៍អវកាស។

ក្រុមហ៊ុនពាណិជ្ជកម្ម CAS Space ដែលជាកម្មសិទ្ធិរបស់ CAS បង្ហើបឱ្យដឹងថា ស្ថាប័ននេះបានទទួលជោគជ័យក្នុងការបាញ់បង្ហោះរ៉ុក្កែតពីដីគោក ហើយចុះចតលើសមុទ្រ Haiyang នៃខេត្ត Shandong។

រ៉ុក្កែតនេះហោះឡើងដល់កម្ពស់ជាង 1,000 ម៉ែត្រ ហើយទម្លាក់ខ្លួនបន្តិចម្ដងៗដោយប្រើប្រាស់ម៉ាស៊ីនរុញច្រានបញ្ច្រាស។ ក្នុងដំណាក់កាលចុងក្រោយ ល្បឿនរបស់រ៉ុក្កែតថយចុះមកនៅត្រឹមជិត 2 ម៉ែត្រ/វិនាទី។ CAS និយាយថា ការសាកល្បងនេះត្រូវបានធ្វើឡើងក្នុងរយៈពេល 10 នាទី។

រ៉ុក្កែតត្រូវបានបាញ់បង្ហោះពីដីគោក ហើយចុះចតបញ្ឈរត្រង់លើសមុទ្រ Haiyang នៃខេត្ត Shandong

យោងតាមវិស្វករនៅ CAS Space រ៉ុក្កែតដែលមានបណ្ដោយ 2.1 ម៉ែត្រនេះ មានអង្កត់ផ្ចិត 0.5 ម៉ែត្រ ទម្ងន់ 93 គីឡូក្រាម និងបំពាក់ម៉ាស៊ីនរុញច្រានចំនួនពីរគ្រឿងដែលមានកម្លាំង 550 newton៕

April 7, 2023

Category: សង្គម និងសេដ្ឋកិច្ច