សង្គម និងសេដ្ឋកិច្ច - La Reine Media

លោក Southgate៖ តំបន់ប្រយុទ្ធរបស់អង់គ្លេស បង្ហាញពីភាពខ្លាំង ក្រោយផ្តួលអេស្ប៉ាញ

លោក Gareth Southgate ជឿជាក់ថា តំបន់ប្រយុទ្ធរបស់ក្រុមបាល់ទាត់ជម្រើសជាតិអង់គ្លេស បានឆ្លើយតបទៅនឹងការរិះគន់ផ្សេងៗ កាលពីថ្ងៃចន្ទ តាមរយៈការស៊ុតបាល់បញ្ចូលទី 3គ្រាប់ ក្នុងការប្រកួតដ៏រំភើបនៃតង់ទី1 នៅពេលប្រកួតជាមួយនឹងក្រុមជម្រើសជាតិអេស្ប៉ាញ។

ខ្សែប្រយុទ្ធ Raheem Sterling បានស៊ុតបាល់បញ្ចូលទី 2គ្រាប់នៅចន្លោះគ្រាប់បាល់របស់ខ្សែប្រយុទ្ធ Marcus Rashford ស្របពេលដែល Harry Kane ក៏បានបង្ហាញពីទម្រង់លេងយ៉ាងល្អផងដែរ ខណៈដែលរូបគេបានជួយឱ្យមិត្តរួមក្រុមរបស់គេរកបានគ្រាប់បាល់ 2គ្រាប់យ៉ាងល្អ ក្នុងពេលអង់គ្លេស បានយកឈ្នះ 3-2 ក្នុងទីក្រុងSeville។ ក្រុមជម្រើសជាតិអេស្ប៉ាញ មិនធ្លាប់បានរបូតគ្រាប់បាល់ 3គ្រាប់នៅលើទឹកដីខ្លួនឯងឡើយ នៅមុនពេលតង់ទី1 ហើយស្របពេលដែលខ្សែបម្រើ PacoAlcacer បានវាយបក 1គ្រាប់វិញ ជ័យជម្នះរបស់ក្រុមជម្រើសជាតិអង់គ្លេស បានមានសុវត្ថិភាព នៅត្រឹមពេលដែលខ្សែការពារ Sergio Ramos បានតែតបាល់បញ្ចូលទីនៅវិនាទីចុងក្រោយនៃការប្រកួតនេះ។ Sterling, Rashford និង Kane សុទ្ធសឹងបានរងនូវការរិះគន់នានាក្នុងរយៈពេលប៉ុន្មានសប្តាហ៍ចុងក្រោយនេះ។ Sterling មិនធ្លាប់បានរកគ្រាប់បាល់បញ្ចូលទីសោះសម្រាប់ក្រុមជម្រើសជាតិអង់គ្លេស ក្នុងរយៈពេល 3ឆ្នាំ ស្របពេលដែលការមិនអាចរកបានគ្រាប់បាល់ក្នុងការប្រកួតអន្តរជាតិរបស់ Kane បច្ចុប្បន្នបន្តរហូតដល់ទៅ 7ប្រកួត។

ជាមួយគ្នានេះ Rashford បានខ្ជះខ្ជាយឱកាសមាស 2លើក នៅពេលប្រកួតជាមួយនឹងក្រុមជម្រើសជាតិក្រូអាស៊ី កាលពីថ្ងៃសុក្រ។ លោក Southgate បានឱ្យដឹងថា៖ «កីឡាករទាំង 3នាក់បានយល់ចំពោះសំណួរដែលត្រូវបានចោទសួរ ហើយរាល់កីឡាករទាំង3នាក់ បានឆ្លើយតបវិញជាមួយនឹងការបង្ហាញពីទម្រង់លេងយ៉ាងរឹងមាំ»៕

ប្រភពពី៖ Worldsoccertalk

October 17, 2018

Halep ទទួលបានចំណាត់ថ្នាក់លេខ1 ក្នុងពិភពលោករយៈពេល 2ឆ្នាំជាប់ៗគ្នា

កីឡាការិនីវាយកូនបាល់ Simona Halep ដែលជាម្ចាស់ជើងឯក French Open នឹងបញ្ចប់ឆ្នាំនេះ ក្នុងនាមជាកីឡាការិនីមានចំណាត់ថ្នាក់លេខ1 ក្នុងពិភពលោកសម្រាប់រដូវកាលទី2 ជាប់ៗគ្នា។ នេះបើយោងតាមការប្រកាសរបស់សហព័ន្ធកីឡាវាយកូនបាល់ផ្នែកនារីហៅកាត់ថា WTA កាលពីថ្ងៃចន្ទ។

កីឡាការិនីសញ្ជាតិរ៉ូម៉ានី វ័យ 27ឆ្នាំរូបនេះ បានផ្តួលកីឡាការិនី Sloane Stephens ក្នុងព្រឹត្តិការណ៍ French Open ដើម្បីឈ្នះពានក្នុងកម្មវិធី Grand Slam ជាលើកទី1 របស់គេ កាលពីខែមិថុនា ហើយ និងបានចំណាយរយៈពេល 40សប្តាហ៍ដោយស្ថិតនៅលើកំពូលតារាង នៅចុងរដូវកាលនេះ។ Halep បានឱ្យដឹងក្នុងសេចក្តីប្រកាសព័ត៌មានរបស់ WTA ថា៖ «ការបញ្ចប់រដូវកាលនេះ ក្នុងនាមជាកីឡាការិនីមានចំណាត់ថ្នាក់លេខ1 ក្នុងពិភពលោកកាលពីឆ្នាំមុន គឺជាកិត្តិយសដ៏ធំមួយសម្រាប់ខ្ញុំ។ ការរក្សាបានចំណាត់ថ្នាក់នេះជាលើកទី2 ក្នុងឆ្នាំ2018 គឺជាការសម្រេចបាននូវសមិទ្ធផលដ៏ពិសេសមួយ ជាពិសេស ក្រោយពីការឈ្នះពាន Grand Slam ជាលើកទី1 របស់ខ្ញុំ នៅឆ្នាំនេះ»។

Halep ត្រូវបានគ្រោងធ្វើការប្រកួតក្នុងទីក្រុងម៉ូស្គូ នៅសប្តាហ៍នេះ នៅមុនពេលបញ្ចប់រដូវកាលរបស់នាងក្នុងព្រឹត្តិការណ៍ WTA Finals នៅប្រទេសសិង្ហបុរី ប៉ុន្តែបានជួបបញ្ហារបួសត្រង់ខ្នងរបស់នាង កាលពីដើមខែនេះ ដែលនាំឱ្យមានភាពមិនច្បាស់ចំពោះការចូលរួមក្នុងព្រឹត្តិការណ៍ទាំង 2លើក៕

ប្រភពពី៖ Channel News Asia

October 17, 2018

Griezmann រកបាន 2គ្រាប់ ដើម្បីធ្វើឱ្យលោក Loew កាន់តែលិចលង់ក្នុងបញ្ហា

ខ្សែប្រយុទ្ធ Antoine Griezmann បានស៊ុតបាល់បញ្ចូលទី 2គ្រាប់ក្នុងតង់ទី2 ខណៈដែលក្រុមម្ចាស់ជើងឯកពិភពលោកបារាំង បានធ្វើការវាយបកដេញតាមពីក្រោយ ដើម្បីផ្តួលក្រុមជម្រើសជាតិអាល្លឺម៉ង់ ក្នុងលទ្ធផល 2-1 ក្នុងយុទ្ធនាការ UEFA Nations League កាលពីថ្ងៃអង្គារ និងបានបង្កើតឱ្យមានភាពស្រពេចស្រពិលជុំវិញអនាគតរបស់លោក Joachim Loew។

ខ្សែបម្រើ Toni Kroos បានស៊ុតបាល់ប៉េណាល់ទីនៅនាទីទី14 សម្រាប់ក្រុមជម្រើសជាតិអាល្លឺម៉ង់ ប៉ុន្តែ Griezmann បានបង្កើតឱ្យមានការវាយបកដ៏គួរឱ្យរំភើបមួយ ក្នុងការប្រកួតលើកទី1 រវាងក្រុមទាំង2 នាកីឡដ្ឋាន Stade de France ចាប់តាំងពីការប្រកួតមិត្តភាពកាលពីខែវិច្ឆិកា ឆ្នាំ2015 ដែលត្រូវបានរំខានដោយសារតែការវាយប្រហារបែបភេរវកម្មជាបន្តបន្ទាប់ក្នុងរដ្ឋធានីរបស់បារាំង។ គ្រូបង្វឹកនៃក្រុមជម្រើសជាតិបារាំង លោក Didier Deschamps បានប្រើប្រាស់ក្រុមដ៏ខ្លាំងមួយដែលបានចូលលេងក្នុង World Cup វគ្គផ្តាច់ព្រ័ត្រ ខណៈដែល Presnel Kimpembe ជាកីឡាករថ្មីតែម្នាក់ដែលបានចូលជំនួសខ្សែការពារ Samuel Umtiti។ ការរងបរាជ័យ 3-០ របស់ក្រុមអាល្លឺម៉ង់ ក្រោមស្នាដៃក្រុមជម្រើសជាតិហូឡង់ កាលពីថ្ងៃសៅរ៍ បានធ្វើឱ្យលោក Loew ផ្លាស់ប្តូរកីឡាករ 5នាក់ ខណៈដែលលោកបានបន្ថែមល្បឿនក្នុងតំបន់ប្រយុទ្ធ ជាមួយនឹងការដាក់បញ្ចូល Leroy Sane និង Serge Gnabry។ ទោះបីជាយ៉ាងណា ក្រោយពីការប្រកួតកាលពីថ្ងៃអង្គារ លោក Loew នៅតែមានការរឹងទទឹង និងបានកោតសរសើរចំពោះការបង្ហាញពីទម្រង់លេងរបស់ក្រុមខ្លួន។

លោក Loew បានឱ្យដឹងថា៖ «ខ្ញុំពិតជាខកចិត្តចំពោះលទ្ធផលនេះ បើទោះបីខ្ញុំត្រូវតែនិយាយថា ការបរាជ័យនេះ គឺមានលក្ខណៈផ្សេងគ្នាពីលទ្ធផលកាលពីថ្ងៃសៅរ៍ក៏ដោយ»។ គ្រូបង្វឹករូបនេះបានបន្ថែមទៀតថា៖ «មិនមែនដោយសារតែលទ្ធផលនេះឡើយ ប៉ុន្តែ ដោយសារតែការបង្ហាញពីទម្រង់លេង។ ខ្ញុំពិតជារីករាយជាមួយនឹងទម្រង់លេងរបស់ក្រុម។ ខ្ញុំគិតថា យើងបានស្ថិតក្នុងកម្រិតស្មើគ្នាមួយ ជាមួយនឹងក្រុមដ៏ខ្លាំងបំផុតក្នុងពិភពលោក»៕

ប្រភពពី៖ Sport24

October 17, 2018

Kyrgios ភ្ញាក់ផើ្អលចំពោះក្តីស្រឡាញ់របស់អ្នកគាំទ្ររុស្ស៊ី

កីឡាករវាយកូនបាល់ Nick Kyrgios បានបញ្ជាក់ថា រូបគេមានការភ្ញាក់ផ្អើលក្នុងពេលទទួលបានការអបអរពីសំណាក់អ្នកគាំទ្រម្ចាស់ផ្ទះ នៅពេលដែលរូបគេបានផ្តួលកីឡាកររុស្ស៊ី Andrey Rublev ក្នុងលទ្ធផល 6-3 4-6 និង6-4 ក្នុងការប្រកួតជុំទី1 នៃព្រឹត្តិការណ៍ Kremlin Cup កាលពីថ្ងៃអង្គារ។

កីឡាករសញ្ជាតិអូស្ត្រាលីដែលមានចំណាត់ថ្នាក់លេខ5 ប្រចាំព្រឹត្តិការណ៍នៅទីក្រុងម៉ូស្គូរូបនេះ បានវាយកូនបាល់យ៉ាងល្អចំនួន 24លើកដើម្បីឈ្នះការជួបគ្នាជាលើកទី1 របស់គេជាមួយនឹង Rubvlev វ័យ20ឆ្នាំ។ Kyrgios បានឱ្យដឹងថា៖ «ខ្ញុំពេញចិត្តក្នុងការលេងនៅលើទីលានក្នុងសាល ហើយយើងបានលេងជាមួយ Andrey ជាច្រើនលើកក្នុងពេលរូបគេស្ថិតក្នុងវ័យក្មេង។ រូបគេនឹងមានអាជីពដ៏អស្ចារ្យមួយ»។ កីឡាកររូបនេះបានបន្ថែមទៀតថា៖ «ខ្ញុំពិតជាមានការភ្ញាក់ផ្អើលខ្លាំងណាស់ដែលមនុស្សជាច្រើនបានអបអរដល់ខ្ញុំនៅទីនេះ។ វាពិតជាល្អណាស់។

ជាធម្មតា នៅពេលដែលខ្ញុំមិនស្ថិតនៅផ្ទះ ខ្ញុំមិនមែនជាមនុស្សគួរឱ្យស្រឡាញ់បំផុតឡើយ ប៉ុន្តែ វាជារឿងដ៏ល្អមួយក្នុងការស្តាប់ឮសំឡេងអបអរ។ ខ្ញុំមានអារម្មណ៍ហាក់ដូចនៅផ្ទះខ្លួនឯងអ៊ីចឹង»។ Kyrgios វ័យ 23ឆ្នាំ ដែលបានធ្លាក់ទៅកាន់ចំណាត់ថ្នាក់លេខ37 លើតារាងពិភពលោក ក្រោយពីធ្លាក់ចុះទម្រង់លេងនៅឆ្នាំនេះ នឹងត្រូវប៉ះជាមួយនឹងកីឡាករ Mirza Basic ក្នុងវគ្គ 16នាក់ចុងក្រោយ ក្រោយពីកីឡាករសញ្ជាតិបូស្នីរូបនេះ បានផ្តួលកីឡាករទុយនីស៊ី MalekJaziri ក្នុងលទ្ធផល 7-6 (7/4) និង6-2៕

ប្រភពពី៖ Channel News Asia

October 17, 2018

កញ្ញា ឌី លីកា និងបវរកញ្ញា Miss Grand បង្ហាញដងខ្លូនក្នុងឈុតប៊ីគីនីយ៉ាងសិចស៊ី

កន្លងទៅថ្មីៗនេះ Miss Grand របស់កម្ពុជាកញ្ញា ឌី លីកា បានទទួលការជ្រើសរើសជាប់លេខមួយ ដោយទទួលបានការ Like និង Share ច្រើនជាងគេ ប៉ុន្តែមិនទាន់ចប់នោះទេត្រូវប្រកួតនៅវគ្គ TOP 10 និងវគ្គផ្តាច់ព្រ័ត្រទៀត។ ខណៈនៅថ្ងៃទី 17 ខែតុលា នេះ ជាថ្ងៃកំណត់ដែលកម្មវិធី Miss Grand International តម្រូវឱ្យបេក្ខភាពនារីតំណាងប្រទេសនីមួយៗមកពីជុំវិញពិភពលោក បង្ហាញខ្លួនជាថ្មីម្តងទៀតក្នុងឈុតប៊ីគីនី ឬ ឈុតហែលទឹក ។

ការបង្ហាញខ្លួនក្នុងឈុតប៊ីគីនី ឬ ឈុតហែលទឹកនេះ បេក្ខនារីតំណាងប្រទេសទាំង 10នេះ សុទ្ធតែបង្ហាញដោយភាពជឿជាក់បំផុត ជាមួយរូបរាងកាយដ៏ស្រស់ស្អាត និង សមសួនមួយបែបម្នាក់ ហើយសម្រាប់កញ្ញា ឌី លីកា Miss Grand Cambodia ប្រចាំឆ្នាំ 2018 ក៏មិនខុសពីបវរកញ្ញាទាំងនោះដែរ ដោយកញ្ញាបានបង្ហាញខ្លួនយ៉ាងមានទំនុកចិត្ត ការជឿជាក់ចំពោះរូបរាងកាយដ៏ស្រឡូន និង ស្រស់ស្អាតរបស់ខ្លួន ជាមួយនឹងស្ទីលថតដ៏គួរឱ្យទាក់ទាញថែមទៀត ។

គួរបញ្ជាក់ផងដែរថា ការប្រលងបវរកញ្ញានេះ Miss Grand តំណាងប្រទេសកម្ពុជាកញ្ញា ឌី លីកា មិនត្រឹមតែត្រូវស្លៀកពាក់ឈុតតំណាងជាតិតែមួយមុខនោះទេ កញ្ញា ឌី លីកា ត្រូវស្លៀកពាក់ឈុតហែលទឹក និងឈុតផ្សេងៗបន្ដបន្ទាប់ទៀត។ ចង់ដឹងថា នាងមានសម្រស់សោភា និងដងខ្លូនស្រឡូនប៉ុនណានោះ សូមទស្សនារូបភាពខាងក្រោម ៖

October 17, 2018

ពលរដ្ឋពេញវ័យនៅកម្ពុជាចំនួន 67% កំពុងប្រើប្រាស់សេវាហិរញ្ញវត្ថុ

អត្រានៃប្រជាជនពេញវ័យដែលប្រើប្រាស់សេវាហិរញ្ញវត្ថុ បច្ចុប្បន្ននេះមានការកើនឡើងខ្ពស់ រហូតដល់67% បើធៀបនឹងកាលពីពេលមុនដែលមានត្រឹមតែក្រោម10%ប៉ុណ្ណោះ។ នេះបើយោងតាមការលើកឡើងរបស់អគ្គទេសាភិបាលធនាគារជាតិនៃកម្ពុជា។

ឯកឧត្តម ជា ចាន់តូ បានឱ្យដឹងថា បច្ចុប្បន្នវិស័យមីក្រូហិរញ្ញវត្ថុនៅកម្ពុជាបាននិងកំពុងរួមចំណែកកាត់បន្ថយភាពក្រីក្រ និងលើកស្ទួយជីវភាពរបស់ពលរដ្ឋ ហើយការកើនឡើងជាលំដាប់នេះ បានឆ្លុះបញ្ចាំងតាមរយៈកំណើននៃប្រជាជនពេញវ័យដែលកំពុងប្រើប្រាស់សេវាហិរញ្ញវត្ថុ។

ឯកឧត្តមក៏បានបញ្ជាក់ទៀតថា កំណើនរហូតដល់ 67%នៃការប្រើប្រាស់សេវាហិរញ្ញវត្ថុរបស់ប្រជាជនពេញវ័យនៅកម្ពុជានេះ មានការកើនឡើងខ្ពស់មែនទែន បើធៀបនឹងរយៈពេលដូចគ្នាកាលពី 1ទសវត្សរ៍កន្លងទៅដែលមានមិនដល់ 10%ផង។ លើសពីនេះកំណើនប្រជាជនដែលកំពុងប្រើប្រាស់សេវាហិរញ្ញវត្ថុក៏ឆ្លុះបញ្ចាំងពីកម្រិតនៃការយល់ដឹងរបស់ពលរដ្ឋមកលើវិស័យនេះផងដែរ។

វិស័យហិរញ្ញវត្ថុដែលបានរីកចម្រើនយ៉ាងឆាប់រហ័សនេះ គឺដោយសារតែបច្ចុប្បន្ន វិស័យធនាគារក៏ដូចជាវិស័យហិរញ្ញវត្ថុមិនមែនធនាគារដែលក្នុងនោះរួមមាន៖ វិស័យមូលបត្រ វិស័យធានារ៉ាប់រង និងសោធន បានរួមចំណែកផ្តល់សេវាហិរញ្ញវត្ថុ ព្រមទាំងពង្រឹងការជឿជាក់ និងមានភាពច្បាស់លាស់ចំពោះអនាគតរបស់ប្រជាជនដែលជាមូលដ្ឋានគ្រឹះក្នុងការពង្រឹងសិទ្ធិសេរីភាព និងលទ្ធិប្រជាធិបតេយ្យនៅកម្ពុជា។

ឯកឧត្តម អគ្គទេសាភិបាលបន្តទៀតថា វិស័យមីក្រូហិរញ្ញវត្ថុកំពុងរីកចម្រើន ដោយក្នុងនោះទ្រព្យសកម្មក្នុងវិស័យនេះកើនរហូតដល់ 14%នៃទ្រព្យសកម្មរបស់គ្រឹះស្ថានធនាគារ ឥណទានបានកើនដល់ 19,2%នៃឥណទានគ្រឹះស្ថានធនាគារ និងប្រាក់បញ្ញើកើនដល់ 11,1%នៃប្រាក់បញ្ញើគ្រឹះស្ថានធនាគារ។

ជាក់ស្ដែងវិស័យធនាគារ និងមីក្រូហិរញ្ញវត្ថុបានរីកចម្រើនឥតឈប់ឈរ។ ការរីកចម្រើននេះ បានផ្ដល់ការងារដល់ពលរដ្ឋជាច្រើន ខណៈបច្ចុប្បន្នប្រជាពលរដ្ឋជាង 6ម៉ឺននាក់បានចូលបម្រើការងារក្នុងវិស័យធនាគារ និងគ្រឹះស្ថានមីក្រូហិរញ្ញវត្ថុ។ ជាការកត់សម្គាល់ក្នុងរយៈពេល 2ទសវត្សរ៍ចុងក្រោយ វិស័យនេះបានរួមចំណែកបង្កើតការងារដោយផ្ទាល់ និងដោយប្រយោលសម្រាប់សេដ្ឋកិច្ចនៅទូទាំងប្រទេស។

ឯកឧត្តមបញ្ជាក់ថា តាមរយៈការផ្តល់ការងារដោយផ្ទាល់ បច្ចុប្បន្នគ្រឹះស្ថានធនាគារ និងមីក្រូហិរញ្ញវត្ថុបានផ្តល់ការងារចំនួន 61.000កន្លែងដែលចំនួននេះបានកើនឡើងប្រមាណ 8ដង ធៀបនឹង 10ឆ្នាំមុន គឺជាមធ្យមផ្តល់ការងារថ្មីក្នុងមួយឆ្នាំប្រមាណ5,000នាក់ ឬកើនក្នុងអត្រា 20%ក្នុងមួយឆ្នាំ។ វិស័យធនាគារបានចូលរួមបង្កើតការងារដោយប្រយោលតាមរយៈការគាំទ្ររបស់វិស័យធនាគារក្នុងការបង្កើត ឬពង្រីកអាជីវកម្មនៅក្នុងវិស័យនានានៃសេដ្ឋកិច្ច។ វិស័យធនាគារនឹងបន្តផ្តល់ឱកាសការងារដោយផ្ទាល់ និងប្រយោលយ៉ាងច្រើនថែមទៀតនាពេលខាងមុខក្នុងស្ថានភាពដែលសេដ្ឋកិច្ចកម្ពុជាបន្តមានកំណើនខ្ពស់រឹងមាំ។

ឯកឧត្តម អគ្គទេសាភិបាលបានបញ្ជាក់ថា៖ “គិតត្រឹមពាក់កណ្តាលឆ្នាំ2018នេះ ទ្រព្យសកម្មវិស័យធនាគារមានទំហំប្រមាណ 160%នៃផលិតផលក្នុងស្រុកសរុប(ផ.ស.ស)។ ចំពោះឥណទានក្នុងវិស័យឯកជនមានកម្រិត 100%នៃផ.ស.ស ហើយប្រាក់បញ្ញើមានកម្រិត 93%នៃផ.ស.ស”។

ឯកឧត្តម ជា ចាន់តូ អគ្គទេសាភិបាលនៃធនាគារជាតិនៃកម្ពុជា ក្នុងកិច្ចប្រជុំជាមួយបុគ្គលិកគ្រឹះស្ថានហិរញ្ញវត្ថុមួយ

បើធៀបក្នុងរយៈពេល 15ឆ្នាំមុន ទ្រព្យសកម្មវិស័យធនាគារបានកើនឡើង 44ដង។ ចំណែកឥណទានកើនឡើង 87ដង និងប្រាក់បញ្ញើកើនឡើង 42ដង។ ចំណែកទុនបម្រុងអន្តរជាតិវិញបានបន្តពូនជ្រំជាលំដាប់ដែលបច្ចុប្បន្នអាចធានាការនាំចូលទំនិញ និងសេវាបានប្រមាណរយៈពេល 6ខែ ស្មើនឹង 2ដងនៃកម្រិតប្រទេសដែលកំពុងអភិវឌ្ឍន៍គួរមានដល់ 3ខែ។

គួរបញ្ជាក់ផងដែរថា វិស័យមីក្រូហិរញ្ញវត្ថុបានផ្ដល់ឥណទានដល់ប្រជាជនចំនួន 1.8លាននាក់ និងមានអ្នកដាក់ប្រាក់បញ្ញើ 1.6លាននាក់ ព្រមទាំងបានផ្ដល់ការងារដល់ប្រជាជនប្រមាណ 3ម៉ឺននាក់ ហើយឥណទានរបស់មីក្រូហិរញ្ញវត្ថុ បានផ្ដល់ទៅលើវិស័យសេដ្ឋកិច្ចនានារួមមាន៖ វិស័យកសិកម្ម30% ក្រុមគ្រួសារ30.5% វិស័យពាណិជ្ជកម្ម18.8% វិស័យសេវាកម្ម10% និងវិស័យផ្សេងៗទៀត10% ផងដែរ៕

October 17, 2018

ភ្ញាក់ផ្អើល !! លោកស្រី សាក់ស៊ី ស្បោង បង្ហាញវត្តមានចូលរួមគោរពវិញ្ញាណក្ខន្ធព្រះបរមរតនកោដ្ឋ

យោងតាមហ្វេសប៊ុកផេចរបស់ក្រុមព្រះសុរិយា បានបញ្ចេញរូបភាពជាច្រើនសន្លឹករបស់ លោកស្រី សាក់ ស៊ីស្បោង ក៏ដូចជាបានផ្ដល់នូវព័ត៌មាន ត្រួសៗមួយចំនួន ដើម្បីឱ្យមហាជនបានជ្រាបដឹង។ លោកស្រី សាក់ ស៊ីស្បោង បានចាកចេញពីប្រទេសកម្ពុជា អស់រយៈពេលជាច្រើនឆ្នាំមកហើយ បន្ទាប់ពីលោកស្រីបានលាឈប់ពីការសម្ដែង តាំងពីជំនាន់ មុនសម័យខ្មែរក្រហមមកម្ល៉េះ។ ទស្សនិកជន ក៏ដូចជាមហាជននៅក្នុងប្រទេសកម្ពុជា បានគិតស្មាន និងសន្និដ្ឋានថា លោកស្រី សាក់ ស៊ីស្បោង ប្រហែលជាបាត់បង់ជីវិត នៅក្នុងសម័យ ខ្មែរក្រហមបាត់ទៅហើយ ក៏ប៉ុន្តែអ្វីដែលគួរឱ្យភ្ញាក់ផ្អើល គឺលោកស្រីនៅមានជីវិត និងបានមកលេងប្រទេសកម្ពុជា ជាពិសេសនោះ គឺមកគោរពវិញ្ញាណក្ខន្ធ ព្រះបរមរតនកោដ្ឋទៀតផង។

ហ្វេសប៊ុកផេចរបស់ក្រុមព្រះ សុរិយា បានសរសេរថា «នរណាមិនស្គាល់សាក់ស៊ី ស្បោង! អតីតកាល និងបច្ចុប្បន្នភាព នៃអតីតតារាភាពយន្ត សាក់ស៊ី ស្បោង តារាសម្តែងបែបអន្តរជាតិ និយមសម្តែងតួកាច ឆ្នាស់ឆ្នើម ស៊ីវិល័យដោយរស់រវើក។ ខ្សែភាពយន្តល្បីៗ របស់លោកស្រីរួមមាន រឿង «អប្សរា» រឿង «រស់ដោយសប្បាយ» រឿង «ព្រះប្រជាកុមារ» រឿង«វិលវិញណាបង» រឿង«លោហិតវាសនា» និង រឿង«សែនទារុណ» ជាដើម។ មកដល់ពេលនេះមហាជនជាច្រើន នៅតែចងចាំលោកស្រី ប៉ុន្តែក៏មានមហាជនខ្លះគិតថា លោកស្រីបានត្រូវខ្មែរក្រហមសម្លាប់បាត់ទៅហើយ។ ផ្ទុយទៅវិញ ចំពោះការបាត់ដំណឹង និងការពុំបង្ហាញខ្លួនជាច្រើនឆ្នាំកន្លងមកនេះ ដោយសារតែលោកស្រីរស់នៅឆ្ងាយពីមាតុប្រទេស ហើយឈប់សំរាកពីវិស័យភាពយន្ត សព្វថ្ងៃលោកស្រី បានតាំងចិត្តសាងធម៌ក្រោមពុទ្ធឱវាទ យ៉ាងខ្ជាប់ខ្ជួន»។

ហ្វេសប៊ុកផេចរបស់ក្រុមព្រះ សុរិយា បានប្រាប់ឱ្យដឹងបន្ថែមទៀតថា «លោកស្រី អញ្ជើញមកប្រទេសកម្ពុជា ក្នុងគោលបំណងដ៏សំខាន់ គឺមកថ្វាយបង្គំព្រះបរមចេតិយ នៃសម្តេចព្រះបរមរតនកោដ្ឋ និងផ្សាយនូវមហាកុសលថ្វាយព្រះចមក្សត្រ ដែលព្រះអង្គមានគុណ បំណាច់ច្រើនលើសលប់សម្រាប់ មាតុប្រទេសកម្ពុជា។ លោកស្រីបានធ្វើដំណើរ អស់រយៈចម្ងាយជាង១ម៉ឺនគីឡូ ដើម្បីមកចូលរួមព្រះរាជពិធី ជាមួយអង្គព្រះមហាក្សត្រ ព្រះករុណាព្រះបរមនាថ សម្តេចព្រះមហាក្សត្រី ព្រះវររាជមាតា ជាតិខ្មែរ រួមទាំង ព្រះរាជវង្សានុវង្ស និងប្រជាជាតិខ្មែរទាំងមូល ក្នុងព្រះនគរកម្ពុជា»៕

October 17, 2018

គួច ខេវិន និយាយរឿងចម្លងវប្បធម៌បរទេសទាំងងងឹតងងល់ និងតើក្រសួង និងស្ថាប័នណាខ្លះ គួរទទួលខុសត្រូវ?

លោក គួច ខេវិន ត្រូវបានគេស្គាល់លោកថា ជាអ្នកផលិតកម្មវិធីកម្សាន្ត របស់ស្ថានីយ៍ទូរទស្សន៍ដ៏ល្បីឈ្មោះ ដែលថ្មីៗនេះលោកបានសម្ដែងអារម្មណ៍អរគុណ ចំពោះអ្នកគាំទ្រ និងបញ្ចេញទស្សនៈ ទាក់ទងនិងការថែរក្សាតម្លៃ មរតក បេតិកភណ្ឌ និងវប្បធម៌របស់ជាតិ ដោយសង្កត់ធ្ងន់ថា តើអ្នកបានធ្វើអ្វីខ្លះដើម្បីរក្សា «វប្បធម៌» ជាតិខ្មែរ?

លោក គួច ខេវិន បានសរសេរបង្ហោះ នៅលើបណ្តាញសង្គមហ្វេសប៊ុកផ្ទាល់ខ្លួនថា «ខ្ញុំបាទសូមអរគុណជាអនេក ដល់មិត្តក្នុង Facebook ដែលតែងតែគាំទ្រ រៀងរាល់កម្មវិធីទូរទស្សន៍ ដែលខ្ញុំផលិត ហើយនិងបានជួយ Share និង Like…។ ជាក់ស្តែងដូចជារដូវបុណ្យភ្ជុំកន្លងមក ដែលមានក្រុមត្រកូល ខាត់ មានអ្នក Share និងចូលរួមតាមដានជាង 21k… ក្នុងពេលតែ3ថ្ងៃជាមួយនឹង ភ្លេង បុរាណខ្មែរ យ៉ាងពីរោះរណ្តំចិត្ត»។

លោក គួច ខេវិន បានលើកឡើងបន្តទៀតថា «ខ្មែរពិតជាសំបូរហូរហៀរ ទៅដោយមរតក បេតិកភណ្ឌ និងវប្បធម៌ ក៏ដោយសារ តែភាពហូរហៀនេះ ហើយទើបបានជាធ្វើឱ្យខ្មែរពិបាកថែ ពិបាករក្សា…ពិបាកចែកចាយឱ្យកូនចៅ ជំនាន់ក្រោយៗ រួចក៏ទុកឱ្យគេលួច គេប្លន់ ឱ្យគេរើសយកទៅធ្វើជាសម្បត្តិ របស់គេទៅវិញ។ ចំណែកខ្លួនជាម្ចាស់មរតក ដ៏សំបូរបែប ក៏បណ្តែតបណ្តោយកូនចៅ ឱ្យទៅលួចចម្លងវប្បធម៌ ជាតិគេទាំងងងឹតងងល់មកពង្វក់ខ្មែរ តជំនាន់ហើយថែមទាំងនៅតែអួតក្អេងក្អាង ខុសទំនង…»។

អ្នកផលិតកម្មវិធីកម្សាន្តរូបនេះនិយាយថា «ប្រសិនជាមាន មនសិកា ជាខ្មែរពិតតែបន្តិចបន្តួច រួចលួចក្រឡេកមើលពួក ដែលធ្លាប់លួច ធ្លាប់ប្លន់ ធ្លាប់រើសយក មរតកវប្បធម៌ខ្មែរ ទៅថែ ទៅរក្សា ទៅការពារ ទៅលើកស្ទួយនោះ អ្នកនឹងមិនក្លាយទៅជាខ្មែរដែលត្រូវបណ្តាសាររបស់ បុព្វបុរស មហានរគ នោះឡើយ ។ ជំនួសឱ្យពាក្យសោកស្តាយ តើអ្នកបានធ្វើអ្វីខ្លះដើម្បីរក្សា «វប្បធម៌» ជាតិខ្មែរ? ប្រឈមទៅនឹងភាពធ្លាក់ដុនដាប ដល់កម្រិតមួយដែលមិនល្អ នៃវប្បធ៌មរបស់ខ្មែរតើក្រសួង និងស្ថាប័នណាខ្លះ គួរទទួលខុសត្រូវ និងបញ្ឈប់ភាពលង់លក់ដ៏អាក្រក់ ទាំងកណ្តាលថ្ងៃត្រង់បែបនេះ?»៕

October 17, 2018

កុំបារម្ភរឿងអត់ការងារធ្វើ តែគួរពង្រឹងសមត្ថភាពឱ្យឆ្លើយតបនឹងទីផ្សារការងារ

គ្មានខ្សែមិនអាចរកការងារធ្វើបាន រៀនហើយខ្លាចមិនបានប្រាក់ខែច្រើន ឬមនុស្សច្រើនណាស់រកការងារមិនបានធ្វើ ជាអ្វីដែលយុវជនជាច្រើនកំពុងបារម្ភ និងមានភាពស្ទាក់ស្ទើរក្នុងការបន្តការសិក្សានៅសាកលវិទ្យាល័យ ជាពិសេសគឺសិស្សមកពីបណ្តាខេត្តនានា។

លោក ងួន ប៊ុននិត អគ្គនាយកក្រុមហ៊ុនធនធានមនុស្ស Idea plus បានលើកឡើងថា មុននឹងដើរចូលមហាវិទ្យាល័យ និស្សិតមួយចំនួនមិនទាន់ដឹងថាខ្លួនចង់បានអ្វីពិតប្រាកដ ខណៈអ្នកខ្លះទៀតបារម្ភខ្លាចរកការងារធ្វើមិនបាន ហើយមិនហ៊ានសម្រេចចិត្តបន្តការសិក្សានៅមហាវិទ្យាល័យ។ តាមពិតយុវជន ឬជាសិស្ស-និស្សិតមិនគួរបារម្ភខ្លាំងពេកទេថាគ្មានការងារធ្វើ ព្រោះមានក្រុមហ៊ុនជាច្រើនកើតឡើងជារៀងរាល់ថ្ងៃ ហើយម្ចាស់ក្រុមហ៊ុនទាំងអស់នោះពេលខ្លះក៏កំពុងតែមានបញ្ហារកបុគ្គលិកធ្វើការមិនបានផងដែរ។ អ្វីដែលយុវជនត្រូវធ្វើគឺសិក្សាឱ្យបានច្បាស់លាស់ពីចំណង់ចំណូលចិត្តពិតប្រាកដរបស់ខ្លួន និងតម្រូវការទីផ្សារ ដើម្បីអភិវឌ្ឍសមត្ថភាពឱ្យស្របទៅនឹងទីផ្សារការងារជាក់ស្តែងដែលកំពុងមានតម្រូវការខ្ពស់។ ការជ្រើសរើសជំនាញត្រឹមត្រូវជាចំណុចវិជ្ជមានក្នុងការជំរុញឱ្យសិស្សក្លាយជាអ្នកមានអាជីពច្បាស់លាស់ ព្រោះនៅពេលដែលយើងមានសមត្ថភាពច្បាស់លាស់ នឹងមិនខ្វះទេស្ថាប័នដែលគេចង់បាន ហើយកុំបារម្ភឱ្យសោះពីបញ្ហាគ្មានការងារធ្វើ។

លោក ងួន ប៊ុននិត បាននិយាយថា៖ “យុវជនបច្ចុប្បន្ន មិនទាន់មានចំណេះដឹងទូលំទូលាយនៅឡើយពីការជ្រើសរើសជំនាញសិក្សា ហើយស្គាល់ជំនាញតិច ដែលធ្វើឱ្យគាត់ជ្រើសរើស ជំនាញដដែលៗ និងពេលខ្លះក៏ជ្រើសរើសប៉ះជំនាញដែលគេមិនសូវមានទីផ្សារ ដែលធ្វើឱ្យពួកគាត់រកការងារមិនបានធ្វើ”។

អ្នកជំនាញទីផ្សារខាងលើបានលើកឡើងផងដែរថា មុននឹងទទួលបានការងារលុះត្រាតែយើងមានសមត្ថភាពខ្លាំងជាមុនសិន ហេតុនេះប្រសិនបើយើងរវល់តែខ្វល់ខ្វាយពីបញ្ហាគ្មានការងារធ្វើ ហើយមិនព្រមប្រឹងប្រែង នោះច្បាស់ណាស់ថា យើងមិនអាចស្វែងរកការងារបាន។ ហេតុនេះសូមពង្រឹងសមត្ថភាពឱ្យខ្លាំងជាមុនសិន ហើយព្យាយាមស្វែងយល់ឱ្យស៊ីជម្រៅពីជំនាញដែលគេត្រូវការនៅថ្ងៃអនាគត ដូចជាការសិក្សាលើជំនាញបច្ចេកទេស ឬចាប់យកជំនាញទៅតាមវិស័យដែលកំពុងមានការអភិវឌ្ឍខ្លាំង ហើយត្រូវការមនុស្សជាចាំបាច់។ តែទោះជាយ៉ាងណាក៏ដោយ ការជ្រើសរើសជំនាញដែលត្រូវតាមទីផ្សារ ក៏ចាំបាច់ទាល់តែជំនាញនោះយើងពេញចិត្តដែរ ព្រោះប្រសិនបើយើងគិតតែទីផ្សារ ហើយយើងគ្មានទេពកោសល្យសោះ ក៏យើងមិនអាចក្លាយជាអ្នកខ្លាំងបានដែរ។

ការហាត់រៀនក្រៅម៉ោងសិក្សាក៏ធ្វើឱ្យសិស្សមានសមត្ថភាពខ្លាំងដែរ

ស្របជាមួយគ្នាដែរ បុគ្គលិកក្រុមហ៊ុនឯកជនមួយ លោក ឈឹម សុភី ដែលជាអ្នកមានបទពិសោធធ្វើការងារតាំងពីនៅសិក្សាមហាវិទ្យាល័យ និងច្រើនវិស័យនោះ បានលើកឡើងថា និស្សិតជាច្រើនតែងតែបានឃើញសិស្សច្បងមួយចំនួន ឬអ្នកស្គាល់គ្នាក្នុងតំបន់របស់គាត់មិនមានការងារធ្វើ ឬធ្វើការងារមិនត្រូវជំនាញ ច្រើនជាងអ្នកដែលមានការងារល្អធ្វើធ្វើឱ្យពួកគាត់វាយតម្លៃថាទីផ្សារការងារមានលក្ខណៈចង្អៀត ឬចាំបាច់ទាល់តែមានខ្សែជាដើមទើបអាចរកការងារល្អបានធ្វើ។ តាមពិតទៅ ស្ថានភាពជាក់ស្តែងនៃពិភពការងារមិនចង្អៀតខ្លាំងពេកដូចពួកគាត់ធ្លាប់គិតនោះទេ។ រូបភាពដែលពួកគាត់ធ្លាប់ឃើញនោះគឺអាចមកពីបញ្ហាសង្គមមួយចំនួនដែលនៅហ៊ុមព័ទ្ធជុំវិញបញ្ហាអប់រំ និងការងារ។ ជាឧទាហរណ៍និស្សិតកាលពីប៉ុន្មានឆ្នាំមុនមិនសូវខ្វល់ច្រើនពីការងារស្ម័គ្រចិត្ត ឬចាប់អារម្មណ៍លើការធ្វើការងារដោយចាប់ផ្តើមពីប្រាក់ខែតិចតួចនោះទេ ខណៈអ្នកខ្លះក៏សំដៅប្រាថ្នាចង់បានការងាររដ្ឋ ដែលធ្វើឱ្យគាត់នៅរង់ចាំឱកាសទាំងអស់នោះជាច្រើនឆ្នាំ ខណៈក្រុមហ៊ុនឯកជនជាច្រើនកំពុងត្រូវការអ្នកដែលមានសមត្ថភាពបម្រើការងារ តែរកមនុស្សដែលមានបទពិសោធធ្វើការងារមិនបាន។

លោក ឈឹម សុភី បាននិយាយថា៖ “កុំខ្វល់ច្រើនពេកថាអត់ការងារធ្វើ បើទោះបីជាសិស្សដែលទើបនឹងប្រឡងបាក់ឌុបចប់ថ្មីៗមិនទទួលបានពិន្ទុខ្ពស់ ឬមិនទាន់ខ្លាំងក៏ដោយ ក៏មិនទាន់ហួសពេលនៅឡើយដែរ ព្រោះយើងនៅសល់ពេល4ឆ្នាំទៀត។ កុំរារែក ហើយខ្លាចការខិតខំប្រឹងប្រែង ព្រោះពិភពការងារជាក់ស្តែងវាមិនលំបាកដូចក្នុងសាលានោះទេ”។

បុគ្គលិកដែលប្រឡូកការងារច្រើនវិស័យខាងលើបានលើកឡើងផងដែរថា ការងារមិនខ្វះទេ តែអ្វីដែលលំបាកគឺរកខ្លួនឯងឱ្យឃើញថា តើយើងចង់ធ្វើអ្វីឱ្យពិតប្រាកដ ហើយការងារប្រភេទណាដែលពិតជាជំរុញជីវិតឱ្យយើងមានភាពរីករាយ និងមានថាមពលខ្លាំងមិននឿយណាយ។ ការងារមួយចំនួនវាអាចមិនត្រូវនឹងជំនាញរបស់យើងទាំងស្រុងនោះទេ តែយើងអាចរៀនពីវាបាន ហេតុនេះការចូលថ្នាក់ឧត្តមសិក្សាគ្រាន់តែជាចំណុចចាប់ផ្តើមតូចមួយប៉ុណ្ណោះសម្រាប់ការអភិវឌ្ឍខ្លួនឯងពេញមួយជីវិត។ ឱ្យតែមានការតាំងចិត្តខ្ពស់ ហើយហ៊ានអភិវឌ្ឍខ្លួនឯង ភាពថ្កុំថ្កើង នឹងនៅជាមួយយើង ហេតុនេះសូមក្លាហានស្វែងរកអ្វីដែលខ្លួនស្រឡាញ់ពិតប្រាកដ ហើយជ្រើសរើសមុខវិជ្ជានោះដើម្បីចាប់ផ្តើម មុននឹងឈានដល់ការប្រឡូកក្នុងពិភពការងារហាត់ការ ឬស្វែងរកបទពិសោធ ដើម្បីពង្រឹងអាជីពនាថ្ងៃអនាគត៕

October 17, 2018

ស្ពៃតឿ: បន្លែដែលទីផ្សារក្នុងស្រុកត្រូវការខ្លាំងជាប្រចាំរៀងរាល់ថ្ងៃ

ស្ពៃតឿជាប្រភេទបន្លែបៃតងមួយដែលស្ត្រីមេផ្ទះអាចយកទៅច្នៃធ្វើម្ហូបបានច្រើនមុខ ដូចជាយកទៅស្រុសធ្វើជាអន្លក់ក៏បាន ឬធ្វើជាបន្លែសម្រាប់ស្ល-ស្ងោរ ឬសម្រាប់ឆាបានដោយងាយស្រួល និងថែមទាំងមានរសជាតិឆ្ងាញ់ទៀតផង ដោយហេតុនេះហើយទើបធ្វើឱ្យបន្លែប្រភេទនេះក្លាយជាតម្រូវការមួយសម្រាប់គ្រប់ៗក្រុមគ្រួសារ ដែលជាកត្តាធ្វើឱ្យវាត្រូវបានគេស្គាល់ និងលក់ដាច់ខ្លាំងនៅលើទីផ្សារ។

អ្នកស្រី ហេង ង៉ោ កសិករនៅភូមិពោធិលើ ឃុំត្រើយស្លា ស្រុកស្អាង ខេត្តកណ្តាលបានប្រាប់ឱ្យដឹងថាដោយសារតែស្ពៃតឿមានតម្រូវការច្រើននៅលើទៅផ្សារ គ្រួសារគាត់ក៏បានងាកមកដាំបន្លែប្រភេទនេះ ជំនួសបន្លែផ្សេងៗទៀតអស់រយៈពេលប្រមាណជាជាង 2ឆ្នាំមកហើយ។

អ្នកស្រីបន្តថា ស្ពៃតឿទោះបីជាសម្បូរយ៉ាងណា ក៏មិនភ័យរឿងលក់មិនចេញដែរ គ្រាន់តែធ្លាក់ថ្លៃបន្តិចប៉ុណ្ណោះ មិនដូចបន្លែប្រភេទខ្លះ នៅពេលសម្បូរខ្លាំងលក់មិនចេញដល់ថ្នាក់ចាក់ចោលនោះទេ ហើយម៉ូយថែមទាំងមកទទួលទិញដល់ចម្ការទៀតផង មិនពិបាកចំណាយពេល និងចំណាយលុយដឹកជញ្ជូនទៅអង្គុយលក់នៅផ្សារឡើយ។

កសិករខាងលើដដែលបានបន្ថែមទៀតថា នៅរដូវប្រាំងគេអាចលក់ស្ពៃតឿចេញបានក្នុងតម្លៃ1គីឡូក្រាម 4,000រៀល ទៅ5,000រៀលឯណោះហើយនៅរដូវវស្សាលក់បានតម្លៃចន្លោះពី1,800រៀល ទៅ2,500រៀលដែរក្នុងមួយគីឡូក្រាម ប៉ុន្តែនៅពេលសម្បូរខ្លាំងវាអាចធ្លាក់ថ្លៃចុះដល់ 1គីឡូក្រាមបានត្រឹមតែ 500 ទៅ600រៀលក៏មានដែរ គ្រាន់តែថា វាធ្លាក់ថ្លៃមិនយូរទេ 1ថ្ងៃ ឬ2ថ្ងៃក្រោយមក វានឹងឡើងថ្លៃវិញហើយ ដូច្នេះហើយទើបគ្រួសារគាត់ និងគ្រួសារអ្នកភូមិផ្សេងៗទៀតចេះតែនាំគ្នាដាំដុះបន្លែស្ពៃតឿនេះជាបន្តបន្ទាប់មកទល់បច្ចុប្បន្ន។

ចំណែកឯអ្នកស្រី ជួប សុខវ៉ន កសិករម្នាក់ទៀតនៅឃុំស្វាយប្រទាលដែលដាំបន្លែស្ពៃតឿនេះដែរបានប្រាប់ដែរថា ស្ពៃតឿ ឬឈ្មោះមួយទៀតហៅថាស្ពៃកាឆាយនេះ ងាយស្រួលដាំជាងប្រភេទបន្លែមួយចំនួនទៀត ហើយក៏មិនសូវជាលំបាកថែទាំ ដូចបន្លែសាលាដ ឬខាត់ណានោះដែរ ពិសេសវាប្រើពេលត្រឹមតែ1ខែប៉ុណ្ណោះក៏អាចកាត់លក់បានហើយ។ អ្នកស្រីក៏បានប្រាប់ពីរបៀបដាំដុះផងដែរថា មុនដំបូងយើងត្រូវភ្ជួរដី ហើយឆូតជារងដោយមិនចាំបាច់ហាលដីចោលនោះទេ រួចហើយយកចំបើងស្ងួតមកគ្របពីលើរង រួចយកគ្រាប់មកបាចព្រោះ និងស្រោចទឺក1ថ្ងៃ 3ដង។ លុះក្រោយពីបន្លែដុះឡើងមកហើយ គឺយើងត្រូវបន្ថយការស្រោចទឹកមកនៅត្រឹមស្រោច 2ដង និងស្រោច1ដង ក្នុង1ថ្ងៃវិញ។ នៅពេលកូនស្ពៃតឿអាយុបាន15 ទៅ20ថ្ងៃហើយ បើសិនជានៅក្នុងរដូវភ្លៀងវិញនោះ គេមិនចាំបាច់ស្រោចទឹកទេ គ្រាន់តែមើលថែទាំសម្អាតស្មៅ និងដាក់ជី ព្រមទាំងបាញ់ថ្នាំការពារកុំឱ្យសត្វល្អិតចង្រៃមកស៊ីបំផ្លាញប៉ុណ្ណោះជាការស្រេច ហើយស្ពៃតឿវានឹងលូតលាស់ល្អឡើងដោយខ្លួនឯងមិនខាន។ អ្នកស្រីក៏បានលើកឡើងដែរថា ប្រសិនជាស្ពៃតឿមានតម្លៃស្ថិតត្រឹមតែ 2,000រៀល ទៅ2,500រៀលនោះ គឺវានឹងប្រសើរណាស់ទៅហើយ មិនបាច់ដល់ទៅ4,000 ឬ5,000រៀលក៏បានដែរ ព្រោះថាតម្លៃនេះ យើងអាចចំណេញបានគួរសមហើយ តែបើទោះជាតម្លៃឡើងចុះមិនទៀងទាត់ក៏ដោយ ក៏ពួកយើងនៅតែបន្តដាំស្ពៃតឿដែរ ព្រោះវាជាបន្លែដែលទីផ្សារត្រូវការជាប្រចាំរៀងរាល់ថ្ងៃ និងជាមុខរបរប្រចាំគ្រួសារទៅហើយ។

ប្រធានការិយាល័យកសិកម្មស្រុកស្អាង លោក អ៊ុក សុគន្ធ បានឱ្យដឹងថា ស្រុកស្អាងគឺជាស្រុកមួយដែលជាប់ចំណាត់ថ្នាក់លេខ1ក្នុងការផលិតបន្លែក្នុងចំណោមស្រុក-ខេត្តទាំងអស់ទូទាំងប្រទេសកម្ពុជាព្រោះគ្រាន់តែឃុំស្វាយប្រទាលមួយ ក្នុង1ថ្ងៃយើងផលិតបន្លែគ្រប់ប្រភេទសម្រាប់ផ្តត់ផ្គង់លើទីផ្សារក្នុងស្រុកបានប្រមាណពី10 ទៅ15តោនដែរ។ ជាមួយគ្នានេះ លោកបានអំពាវនាវឱ្យកសិករផ្លាស់ប្តូរទម្លាប់ការដាំដុះបែបតាមចិត្តចង់ មកបង្កើនការដាំដុះបន្លែបែបសុវត្ថិភាព និងបន្លែសរីរាង្គឱ្យបានកាន់តែច្រើនឡើងដើម្បីកាត់បន្ថយការប្រើប្រាស់ជី ក៏ដូចជាថ្នាំគីមីពុលហួសកម្រិតដែលនាំឱ្យប៉ះពាល់ដល់សុខភាពរបស់យើងជាអ្នកដាំដុះ ក៏ដូចជាអ្នកបរិភោគដែរ ហើយក៏ដើម្បីប្រកួតប្រជែង និងកាត់បន្ថយការហូរចូលបន្លែគីមីពីប្រទេសជិតខាងផងដែរ៕

October 17, 2018

Category: សង្គម និងសេដ្ឋកិច្ច