Category: សង្គម និងសេដ្ឋកិច្ច

លោក Wenger រំពឹងទុកថា នឹងវិលទៅកាន់ការងារគ្រូបង្វឹកវិញនៅខែមករា
លោក Arsene Wenger អតីតអ្នកចាត់ការទូទៅរបស់ក្រុម Arsenal រំពឹងទុកថា នឹងបានវិលទៅធ្វើការវិញនៅត្រឹមឆ្នាំថ្មីខាងមុខនេះ ដោយនិងបានទទួលនូវការស៊ើបសួរផ្សេងៗមកពីទូទាំងពិភពលោក។ នេះបើយោងតាមការអះអាងរបស់លោកប្រាប់កាសែតអាល្លឺម៉ង់ Bild។
លោក Wenger ដែលបានចាកចេញពីក្លិប Arsenal កាលពីខែឧសភា ក្រោយពីបានដឹកនាំអស់រយៈពេល22ឆ្នាំ បានបញ្ជាក់ថា លោកមិនបានដឹងថាការងាររបស់ពួកគេបន្ទាប់ពីនោះជាការងារអ្វីឡើយ ប៉ុន្តែ លោកមានអារម្មណ៍ថា លោកបានសម្រាកគ្រប់គ្រាន់ និងត្រៀមខ្លួនរួចរាល់ក្នុងការធ្វើការម្តងទៀត។
គ្រូបង្វឹកសញ្ជាតិបារាំងរូបនេះបានប្រាប់កាសែតអាល្លឺម៉ង់ ក្នុងកិច្ចសម្ភាសន៍មួយដែលត្រូវបានចេញផ្សាយកាលពីថ្ងៃពុធថា៖ «ខ្ញុំជឿជាក់ថា ខ្ញុំនឹងចាប់ផ្តើមធ្វើការម្តងទៀតនៅថ្ងៃទី1 ខែមករា។ ខ្ញុំមិនទាន់ដឹងថា នៅកន្លែងណានៅឡើយទេ»។
លោក Wenger វ័យ 68ឆ្នាំ ដែលបានដឹកនាំក្លិបជប៉ុន Nagoya Grampus Eight នៅមុនពេលចូលរួមជាមួយនឹង Arsenal នោះ បានប្រាប់បន្តថា៖ «មានសហព័ន្ធ និងក្រុមបាល់ទាត់ជម្រើសជាតិជាច្រើន ហើយវាក៏អាចនឹងស្ថិតក្នុងប្រទេសជប៉ុនផងដែរ»។ គ្រូបង្វឹករូបនេះបានបន្ថែមទៀតថា៖ «សម្រាប់រយៈពេល 22ឆ្នាំរបស់ខ្ញុំជាមួយនឹង Arsenal ខ្ញុំមានបទពិសោធដ៏ធំក្នុងកម្រិតផ្សេងៗគ្នា។ មានការស៊ើបសួរជាច្រើនមកពីទូទាំងពិភពលោក»។
លោក Wenger បានឈ្នះពានក្របខ័ណ្ឌ Premier League 3លើកនៅជាមួយក្លិប Arsenal ប៉ុន្តែ ឆ្នាំចុងក្រោយរបស់លោកនៅក្នុងក្លិបស្ថិតក្នុងទីក្រុងឡុងដ៍ភាគខាងជើងនេះ មានភាពត្រដាបត្រដួសខ្លាំង៕
ប្រភពពី៖ Channel News Asia
October 18, 2018
កូរ៉េផ្តល់កម្ចី 66.57លានដុល្លារសម្រាប់សាងសង់មន្ទីរពេទ្យក្នុងសាកលវិទ្យាល័យវេជ្ជសាស្ត្រ
រដ្ឋាភិបាលកូរ៉េថ្មីៗនេះបានជូនដំណឹងដល់រដ្ឋាភិបាលកម្ពុជាឱ្យបានដឹងថា មូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ច (EDCF) បានសម្រេចផ្តល់កម្ចីប្រមាណ 66.57លានដុល្លារ ដល់កម្ពុជាដើម្បីអនុវត្តគម្រោងសាងសង់មន្ទីរពេទ្យដើម្បីបណ្តុះបណ្តាលដល់និស្សិតពេទ្យក្នុងសាកលវិទ្យាល័យសុខាភិបាល (UHS)។
មូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) ត្រូវបានបង្កើតឡើងដោយរដ្ឋាភិបាលកូរ៉េនៅឆ្នាំ 1987 ដើម្បីលើកកម្ពស់ការផ្លាស់ប្តូរសេដ្ឋកិច្ច ក្នុងពិភពលោកដែលកំពុងអភិវឌ្ឍន៍ និងជួយអភិវឌ្ឍប្រទេសនានាដើម្បីសម្រេចបាននូវឧស្សាហូបនីយកម្ម និងរក្សាឱ្យបាននូវស្ថិរភាពសេដ្ឋកិច្ច ដោយការផ្តល់ឥណទានរយៈពេលវែង ដែលមានការប្រាក់ទាប។ បច្ចុប្បន្ន មូលនិធិនេះត្រូវបានគ្រប់គ្រងដោយធនាគារ Korea Eximbank ដែលជាភ្នាក់ងារផ្តល់ប្រាក់កម្ចីខាងក្រៅប្រទេសកូរ៉េខាងត្បូង។
គម្រោងនេះមានគោលបំណងសំខាន់ គឺបណ្តុះបណ្តាលអ្នកជំនាញវិជ្ជាជីវៈសុខាភិបាល ឱ្យក្លាយជាធនធានសំខាន់សម្រាប់ប្រទេសតាមរយៈការបណ្តុះបណ្តាលជំនាញដែលមានស្តង់ដារខ្ពស់លើសេវាសុខភាព ដោយក្នុងមន្ទីរពេទ្យដែលគ្រោងនឹងបង្កើតសម្រាប់ការបណ្តុះបណ្តាលនោះមានគ្រែអ្នកជំងឺសម្រាប់បង្រៀនរហូតដល់ទៅ 200គ្រែ ជាមួយនឹងបរិក្ខារដែលបំពាក់ដោយបច្ចេកវិទ្យា និងប្រព័ន្ធព័ត៌មានវិទ្យាទំនើប។
កង្វះខាតមន្ទីរពេទ្យសម្រាប់ការបណ្តុះបណ្តាលបានធ្វើឱ្យកម្ពុជាត្រូវការជាចាំបាច់នូវការអប់រំពីប្រព័ន្ធសម្រាប់មន្ទីរពេទ្យទាំងមូល កម្មវិធីសិក្សាសម្រាប់គ្រប់គ្រង និងបំបែកជាគ្លីនិក រួមទាំងការបណ្តុះបណ្តាលវេជ្ជបណ្ឌិតដែលព្យាបាលអ្នកជំងឺនៃគ្លីនិកដែលមានអ្នកជំងឺច្រើន និងនិស្សិតវេជ្ជសាស្ត្រដែលកំពុងសិក្សាក្នុងសាកលវិទ្យាល័យវេជ្ជសាស្ត្រសុខាបាល។
នៅពេលដែលមន្ទីរពេទ្យសម្រាប់បណ្តុះបណ្តាលនៃសាកលវិទ្យាល័យវេជ្ជសាស្ត្រសុខាភិបាលត្រូវបានបង្កើតឡើងក្រោមជំនួយរបស់ EDCF អ្នកជំនាញផ្នែកសុខាភិបាលនឹងត្រូវបានបណ្តុះបណ្តាល និងអភិវឌ្ឍចំណេះដឹងបានកាន់តែប្រសើរជាមួយនឹងប្រព័ន្ធច្បាស់លាស់ប្រកបដោយគុណភាពខ្ពស់។
ការបង្កើតមន្ទីរពេទ្យនេះ ក៏ត្រូវបានគេរំពឹងទុកដែរថាអាចនឹងជួយដល់ប្រជាជនកម្ពុជាឱ្យទទួលបានផលប្រយោជន៍ជាច្រើនពីសេវាកម្មសុខាភិបាលទំនើប ឧបករណ៍ដែលមានបច្ចេកវិទ្យាខ្ពស់ និងប្រព័ន្ធគ្រប់គ្រងព័ត៌មានទាន់សម័យ។
រដ្ឋាភិបាលកូរ៉េបានផ្តល់កម្ចីសរុបប្រមាណ 766លាន តាមរយៈ EDCF ដើម្បីជួយដល់គម្រោងចំនួន 22 នៅកម្ពុជា ចាប់តាំងពីឆ្នាំ 2001មក៕
October 18, 2018
កត្តាអ្វីខ្លះដែលធ្វើឱ្យបរទេសបណ្តាក់ទុនវិនិយោគនៅកម្ពុជាកាន់តែច្រើន?
រយៈពេលជាង 2ទសវត្សរ៍ចុងក្រោយនេះ គេសង្កេតឃើញថា វិនិយោគិនបរទេសបានចូលមកបណ្តាក់ទុនរកស៊ីនៅកម្ពុជាកាន់តែច្រើនឡើងៗដែលនេះជាចលករដ៏សំខាន់មួយក្នុងការរុញច្រានកំណើនសេដ្ឋកិច្ចកម្ពុជាឱ្យកាន់តែរឹងមាំឡើងបន្ថែមទៀតពីមួយឆ្នាំទៅមួយឆ្នាំ។ សួរថា តើមានកត្តាអ្វីខ្លះបានជាបរទេសសម្រេចចូលមកបណ្តាក់ទុនរកស៊ីនៅកម្ពុជាកាន់តែច្រើនឡើងៗដូច្នេះ?
បើគេក្រឡេកមើលពីទីតាំងភូមិសាស្ត្រ កម្ពុជាស្ថិតនៅលើទីតាំងមួយដ៏ល្អក្នុងតំបន់អាស៊ានដែលមានភាពអំណោយផលក្នុងការសាងសង់រោងចក្រសហគ្រាសសម្រាប់ផលិតទំនិញនានាដើម្បីនាំចេញទៅលក់នៅទីផ្សារក្នុងតំបន់ និងនៅសហគមន៍អន្តរជាតិនានា។ ការផលិតទំនិញនៅកម្ពុជាមិនមែនសម្រាប់តែផ្គត់ផ្គង់ក្នុងទីផ្សាកម្ពុជាដែលមានប្រជាជនប្រមាណតែជាង 15លាននាក់នេះប៉ុណ្ណោះទេគឺសម្រាប់ការនាំចេញទៅលក់នៅប្រទេសក្នុងអនុតំបន់ទន្លេមេគង្គដែលមានប្រជាជនប្រមាណជា 250លាននាក់ និងលក់នៅលើទីផ្សារអាស៊ានដែលមានប្រជាជនជាង 630លាននាក់ និងទីផ្សារអឺរ៉ុបដែលមានប្រជាជនជាង740លាននាក់ដែលកំពុងក្លាយជាសក្តានុពលទីផ្សារដ៏ខ្លាំងមួយ ដោយសារកម្ពុជានៅតែទទួលបានកូតានាំទំនិញទៅកាន់អឺរ៉ុបដោយមិនគិតពន្ធ។
ចំណែកកម្លាំងពលកម្មវិញ កម្ពុជាមានមនុស្សវ័យក្មេងក្រោមអាយុ 35ឆ្នាំ ប្រមាណជា 72ភាគរយដែលអាចបំពេញការងារពលកម្មបានច្រើន ងាយស្រួលក្នុងការរើសបុគ្គលិក-កម្មករចូលធ្វើការដែលមានប្រាក់បៀវត្សរ៍កម្រិតមធ្យម បើប្រៀបធៀបជាមួយបណ្តាប្រទេសមួយចំនួនទៀតនៅក្នុងតំបន់អាស៊ី។ ជាមួយគ្នានេះ រដ្ឋាភិបាលកម្ពុជាបាន និងកំពុងប្រឹងប្រែងកែប្រែកម្លាំងពលកម្មសុទ្ធសាធទៅជាកម្លាំងពលកម្មជំនាញ ជាគោលដៅយុទ្ធសាស្រ្តក្នុងការ-បំពេញការងារបានល្អ និងលឿនជាងមុន អាចកាត់-បន្ថយការចំណាយលើពលកម្ម បានមួយចំណែកផងដែរ។ ជាមួយគ្នានេះកម្ពុជាក៏បានប្រឹងប្រែងអភិវឌ្ឍធនធានមនុស្សឱ្យកាន់តែពូកែខ្លាំងឡើង ពិសេសចំណេះដឹងផ្នែកបច្ចេកទេសក្នុងយុគសម័យបច្ចេកវិទ្យា ដើម្បីសម្រួលដល់ការងារមួយចំនួនឱ្យកាន់-តែមានប្រសិទ្ធភាព និងប្រសិទ្ធផលច្រើនឡើង។
ក្រៅតែពីចំណុច 2ខាងលើ កម្ពុជាបាន និងកំពុងអភិវឌ្ឍហេដ្ឋារចនាសម្ព័ន្ធតាមរយៈការបង្កើតផ្លូវល្បឿនលឿន ប្រព័ន្ធផ្លូវរថភ្លើងតភ្ជាប់ពីខេត្តមួយទៅខេត្តមួយ ដូចជាផ្លូវដឹកជញ្ជូនពីភ្នំពេញឆ្ពោះទៅខេត្តមាត់សមុទ្រដែលមានកំពង់ផែទឹកជ្រៅ និងខេត្តជាប់ព្រំដែនប្រទេសជិតខាងដែលមានសក្តានុពលសេដ្ឋកិច្ចមួយចំនួនទៀត ដើម្បីសម្រួលដល់ការធ្វើដំណើររបស់ប្រជាជន និងការដឹកជញ្ជូនទំនិញបានលឿន កាត់បន្ថយពេលវេលា និងកាត់បន្ថយការចំណាយថ្លៃដឹកជញ្ជូនទៀតផង។
អ្វីដែលសំខាន់នោះ កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ ដោយសមភាពរវាងអ្នកវិនិយោគកម្ពុជា និងអ្នកវិនិយោគបរទេស។ ការបើកចំហគ្រប់វិស័យដែលរួមមានទាំងវិស័យធនាគារ វិស័យធានារ៉ាប់រង និងវិស័យទូរគមនាគមន៍ ដែលជាទូទៅប្រទេសជាច្រើននៅក្នុងពិភពលោកមិនអនុញ្ញាតឱ្យវិនិយោគិនបរទេសវិនិយោគ 100% ដោយគ្មានការចូលរួមពីសំណាក់អ្នកវិនិយោគក្នុងស្រុកលើវិស័យទាំងនោះឡើយ។ កម្ពុជានៅមានសក្តានុពលយ៉ាងច្រើនក្នុងការអភិវឌ្ឍវិស័យហិរញ្ញវត្ថុ រួមមានការបន្តបង្កើនភាពស៊ីជម្រៅនៃអន្តរការី-កម្មហិរញ្ញវត្ថុ ការលើកកម្ពស់វិស័យធានារ៉ាប់រង និងការអភិវឌ្ឍទីផ្សារមូលបត្រ។
យ៉ាងណាក៏ដោយ តម្លៃភ្លើងអគ្គិសនី និងកត្តាច្បាប់ដែលនៅមិនទាន់រឹងមាំនៅឡើយនោះ គឺជាកត្តារារាំងខ្លះៗដល់ការធ្វើវិនិយោគពីក្រៅប្រទេសនេះដែរ ពិសេសប៉ះពាល់ដល់សហគ្រាសខ្នាតតូច និងមធ្យមដែលពួកគាត់ជួបការលំបាក បាត់បង់ប្រាក់ចំណេញមួយចំនួន ដោយសារតែតម្លៃអគ្គិសនីនៅកម្ពុជាមានតម្លៃខ្ពស់ជាងប្រទេសជិតខាង ដូចជាប្រទេសថៃ និងប្រទេសវៀតណាម ជាដើម។ តែទោះជាយ៉ាងណា កម្ពុជាកំពុងសាងសង់ទំនប់វារីអគ្គិសនីដោយខ្លួនឯង ដែលគេរំពឹងថា តម្លៃភ្លើងអគ្គិសនីនឹងអាចចុះថោកដូចប្រទេសជិតខាង ដែលធ្វើឱ្យចំនួនវិនិយោគិនបរទេសនឹងចូលមកបណ្តាក់ទុនរកស៊ីនៅកម្ពុជាកាន់តែច្រើនឡើង។ បច្ចុប្បន្ន វិនិយោគិនចិនឈរលំដាប់លេខរៀងនាំមុខគេ ឯវិនិយោគិនជប៉ុនក៏កំពុងសម្លឹងឃើញ និងចូលមកដាក់ទុនវិនិយោគនៅកម្ពុជាកាន់តែច្រើនឡើងជាបណ្ដើរៗផងដែរ។ ជាមួយគ្នានេះ ពាណិជ្ជករអឺរ៉ុបក៏មកបណ្តាក់ទុនច្រើនដែរ ដែលបច្ចុប្បន្ននេះមានក្រុមហ៊ុនមកពីអឺរ៉ុបកំពុងវិនិយោគប្រមាណ 52គម្រោងដែលមានទឹកប្រាក់សរុបចំនួន 1.1ប៊ីលានដុល្លារ ក្នុងនោះការវិនិយោគក្នុងវិស័យឧស្សាហកម្ម និងកម្មន្តសាលចំនួន274លានដុល្លារ។
គូរបញ្ជាក់ថា នៅឆមាសទី1 ឆ្នាំ2018នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន 106គម្រោង ដែលក្នុងនោះមានគម្រោងថ្មីចំនួន97 និងគម្រោងពង្រីកផលិតកម្មចំនួន9 មានទុនវិនិយោគសរុបនៃគម្រោងដែលត្រូវបានអនុម័តទាំងនោះមានចំនួនប្រមាណជា 3,500លានដុល្លារអាមេរិក ដែលអាចបង្កើតការងារបានចំនួនប្រមាណជិត 10ម៉ឺនកន្លែងឯណោះ។
បើគេធ្វើការប្រៀបធៀបឆមាសទី1 ឆ្នាំ2018 និងរយៈពេលដូចគ្នាកាលពីឆ្នាំ2017 កម្ពុជាមានការកើនឡើងចំនួន 19គម្រោង ខណៈដែលទំហំទុនវិនិយោគមានការកើនឡើងចំនួន 14% ជាពិសេសការវិនិយោគលើវិស័យកសិកម្ម និងកសិ-ឧស្សាហកម្មមានការកើនឡើងខ្លាំងរហូតដល់ទៅ77%។ ការវិនិយោគក្នុងវិស័យឧស្សាហកម្ម និងកម្មន្តសាលមានការកើនទ្បើង22% ដែលក្នុងនោះគម្រោងរោងចក្រកាត់ដេរសម្លៀកបំពាក់មានការកើនទ្បើងចំនួន8គម្រោង ពី15គម្រោងក្នុងឆមាសទី1 ឆ្នាំ2017 មក23គម្រោងក្នុងឆមាសទី1 ឆ្នាំ2018។ យោងតាមការព្យាកររបស់មូលនិធិរូបិយវត្ថុអន្តរជាតិ(IMF) បានឱ្យដឹងថា សេដ្ឋកិច្ចរបស់កម្ពុជានឹងមានកំណើនក្នុងអត្រា 7.25%ក្នុងឆ្នាំ2018នេះ ដែលអត្រាកំណើននេះនឹងរក្សាបានក្នុងឆ្នាំខាងមុខបន្តទៀត៕
October 18, 2018
តារាស្រីអ៊ិស្លាមក្នុងរឿង កំណត់ហេតុនាងនាថ ប្រកាសលែងខ្វល់ពីការរិះគន់លើភាពសិចស៊ី
ជនជាតិខ្មែរអ៊ិស្លាមរស់នៅកម្ពុជាជាច្រើន បានធ្វើការរិះគន់តារាសម្ដែងស្រីខ្មែរ-អ៊ិស្លាម គឺកញ្ញា ណាតាហ្សា ជាជនជាតិខ្មែរអ៊ិស្លាមដំបូងគេដែលបានលេងខ្លួនស៊ិចស៊ី ដោយបានចោទថា នាងកំពុងធ្វើឱ្យវប្បធម៌ទំនៀមទម្លាប់របស់នារីអ៊ិស្លាមរងការប៉ះពាល់ ក្នុងពេលដែលប្រពៃណីរបស់ជាតិសាសន៍នេះសម្រាប់នារីៗ សូម្បីតែបង្ហាញសាច់ដៃ សាច់ជើង និងសក់ក្បាលក៏មិនបានផង។
កញ្ញា ណាតាហ្សា បាននិយាយថា នាងពិតជាដឹងថា ខ្លួនមានកំហុសដែលហ៊ានទទួលថតស៊ិចស៊ី ក្នុងឈុតប៊ីគីនី ក្នុងពេលដែលនាងជាជនជាតិអ៊ិស្លាមមួយរូប ដែលមានប្រពៃណីតឹងរ៉ឹង ប៉ុន្តែនាងនិយាយថាស្ថានភាពសិល្បៈមិនអាចឱ្យនៅតែរក្សាជំហរបិទបាំង រម្យទមតែមួយមុខបានទេ គឺត្រូវតែមានសុភាពខ្លះ ស៊ិចស៊ីខ្លះ ដើម្បីតម្រូវចិត្តផលិតករ និងទស្សនិកជនដែលចង់បានចំណីអារម្មណ៍ប្លែកៗ។ កញ្ញាបន្ថែមថា ដែលខ្លួនសម្រេចចិត្តថតស៊ិចស៊ី មិនមែនដើម្បីផ្គើនជនជាតិអ៊ិស្លាមដែលបានហាមប្រាមនោះទេ ប៉ុន្តែគ្រាន់តែចង់បង្ហាញថា បំណាច់នឹងដើរចូលក្នុងរង្វង់សិល្បៈទៅហើយ អ្វីដែលអ្នកសិល្បៈគ្រប់ជាតិសាសន៍ធ្វើបាន រូបនាងក៏អាចធ្វើបានដែរ។ នាងនិយាយថា «នៅពេលយើងថតស៊ិចស៊ីអ៊ីចឹងៗ គឺមិនមែនតែសហគមន៍អ៊ិស្លាមទេដែលរិះគន់ គឺសូម្បីតែបងប្អូនជនជាតិខ្មែរយើងក៏រិះគន់ដែរ ប៉ុន្តែបើអាល័យតែខ្វល់បែបហ្នឹង យើងចូលសិល្បៈមិនកើតទេ បើសិល្បៈ វាត្រូវបត់បែនអ៊ីចឹង!»។ យ៉ាងណាមិញ នាងថា បើក្រុមផលិតករតម្រូវឱ្យនាងថតស៊ិចស៊ីខ្លាំង ដូចជាចំហល្វែងលើ និងល្វែងក្រោមជាដើម ក៏នាងមិនហ៊ានដែរ តែបើជាទម្រង់សិល្បៈ គឺនាងគួរតែអាចទទួលសម្ដែងបាន។ នាងបន្ដថា នាងឈប់ខ្វល់ជុំវិញប្រតិកម្មដែលបានលើកឡើងនោះហើយ ដោយសាររតែនាងគឺជាតារាសិល្បៈ ដែលត្រូវតែបត់បែនតាមបរិយាកាសការងារ ហើយមិនអាចបន្តរុំកាយជិតៗតាមអ្វីដែលជាលក្ខខណ្ឌរបស់ជនជាតិអ៊ិស្លាមបានទេ។
គួរបញ្ជាក់ផងដែរថា តារាស្រី ណាតាហ្សា ជាតារាសម្ដែងស្រីដែលមានឈ្មោះល្បីតាមរយៈខ្សែភាពយន្ដខ្នាតធំរឿង « កំណត់ហេតុនាងនាថ» ដែលជាវណ្ណកម្មរបស់ផលិតកម្ម ឥន្ទ្រានិម្មិត ហ្វីលម៍ ក្នុងឆ្នាំ2016។ សព្វថ្ងៃនេះ តារាស្រីរូបនេះ កំពុងតែក្ដោបបានទីផ្សាសិល្បៈយ៉ាងមមាញឹកនៅក្នុងដៃ៕
October 18, 2018
សហភាពអឺរ៉ុបនៅតែជាដៃគូសេដ្ឋកិច្ចដ៏សំខាន់របស់ប្រទេសកម្ពុជា
សហភាពអឺរ៉ុបគឺជាដៃគូសេដ្ឋកិច្ចដ៏សំខាន់មួយសម្រាប់ប្រទេសកម្ពុជាដែលមានការនាំចេញនូវផលិតផលសម្លៀកបំពាក់ និងស្បែកជើងចូលទៅកាន់ទីផ្សារអឺរ៉ុបដែលជាប្រភពចំណូលដ៏ធំបំផុត និងជាធាតុផ្សំដ៏សំខាន់នៃកំណើនដ៏ខ្លាំងក្លារបស់កម្ពុជានៅក្នុងប៉ុន្មានឆ្នាំថ្មីៗនេះ។
លោក George Edgar ឯកអគ្គរដ្ឋទូតសហភាពអឺរ៉ុបបានថ្លែងថា៖“ទំនាក់ទំនងសេដ្ឋកិច្ចដ៏រឹងមាំជាមួយសហភាពអឺរ៉ុបបានធ្វើឱ្យប្រទេសកម្ពុជាមានការរីកចម្រើនយ៉ាងឆាប់រហ័ស”។ ការផ្លាស់ប្តូរសេដ្ឋកិច្ចគឺជាកត្តាជំរុញនូវកំណើន។ ពាណិជ្ជករសហភាពអឺរ៉ុបបានបង្កើតការងារនៅកម្ពុជា ដោយពួកគេមានទស្សនវិស័យយូរអង្វែងក្នុងការជំរុញការច្នៃប្រឌិត និងលើកកម្ពស់ការអនុវត្តច្បាប់សង្គម និងការគិតគូរខ្ពស់ដល់បរិស្ថាន។
លោកបានបញ្ជាក់ថា៖ អាជីវកម្មរបស់សហភាពអឺរ៉ុប គឺជាដៃគូរឹងមាំ និងអាចទុកចិត្តបានសម្រាប់ប្រទេសកម្ពុជា “ការចូលទៅកាន់ទីផ្សារអឺរ៉ុបបានជំរុញឱ្យមានការរីកចម្រើនយ៉ាងឆាប់រហ័សនៃឧស្សាហកម្មនាំចេញរបស់កម្ពុជា ជាពិសេសសម្លៀកបំពាក់ និងស្បែកជើង”។ លោក Edgar បាននិយាយថា ជាមួយគ្នានេះដែរការនាំចេញរបស់កម្ពុជាទៅកាន់សហភាពអឺរ៉ុបបានកើនឡើងយ៉ាងឆាប់រហ័ស។ ការចូលទៅកាន់គម្រោងអ្វីៗទាំងអស់ក្រៅពីអាវុធ EBA (Everything-but-arms) បានអនុញ្ញាតឱ្យប្រទេសកម្ពុជាទទួលបានអត្ថប្រយោជន៍ប្រកួតប្រជែងកំណើនសេដ្ឋកិច្ច និងបង្កើតការងារ។
លោក ថាស៊ីឡូ ប្រ៊ីនហ្សើ (Tassilo Brinzer) អនុប្រធានសភាពាណិជ្ជកម្មអឺរ៉ុបប្រចាំនៅប្រទេសកម្ពុជាបានលើកឡើងថា ក្រុមហ៊ុនអឺរ៉ុបបានបង្កើតការងារជាច្រើននៅក្នុងព្រះរាជាណាចក្រកម្ពុជា និងផ្តល់ប្រាក់ខែល្អ “បរិយាកាសអាជីវកម្មនៅទីនេះគឺល្អ ដូច្នេះយើងកំពុងព្យាយាមទាក់ទាញការវិនិយោគនៅអឺរ៉ុបកាន់តែច្រើននៅក្នុងប្រទេស”។ លោកបានបន្ថែមថា មានប្រហែលជា 500ក្រុមហ៊ុនមកពីសហភាពអឺរ៉ុបកំពុងតែមានវត្តមាននៅកម្ពុជា។ ជារៀងរាល់ឆ្នាំ សហភាពអឺរ៉ុបតែងតែចង់ឱ្យមានការឆ្លើយតបពីបញ្ហាដែលជួយសម្រួលដល់ការធ្វើពាណិជ្ជកម្មនៅកម្ពុជា ដូចជាបញ្ហាអភិបាលកិច្ច បញ្ហាបរិស្ថាន ព្រមទាំងលក្ខខណ្ឌការងារល្អផងដែរ។
លោក ថាស៊ីឡូ បាននិយាយថា កម្ពុជាជាប្រទេសមានកំណើនសេដ្ឋកិច្ចល្អមួយក្នុងចំណោមបណ្ដាប្រទេសដទៃទៀតក្នុងតំបន់។ ក៏ប៉ុន្តែជាមួយនឹងការលូតលាស់សេដ្ឋកិច្ចយ៉ាងឆាប់រហ័សនេះ រដ្ឋាភិបាលគួរគិតគូរបន្ថែមទៀតលើបរិយាកាសធុរកិច្ចសម្រាប់ដៃគូវិនិយោគ។ ក្នុងនោះការបើកប្រាក់-បំណាច់អតីតភាពការងារ 2ដងក្នុងមួយឆ្នាំ ក៏ជាការលំបាកដល់អ្នកវិនិយោគដែរ។
យ៉ាងណាក៏ដោយ សភាពាណិជ្ជកម្មអឺរ៉ុបដែលជាតំណាងក្រុមហ៊ុនរបស់អឺរ៉ុបបានបញ្ជាក់ថា ខ្លួនបាន និងកំពុងគាំទ្រលើការតាក់តែងគោលនយោបាយរបស់រដ្ឋាភិបាលកម្ពុជា ដើម្បីសម្របសម្រួលដល់ការវិនិយោគឱ្យកាន់តែល្អប្រសើរ។ នេះមិនមែនសម្រាប់តែការវិនិយោគពីអឺរ៉ុបទេ តែសម្រាប់ទាក់ទាញការបណ្ដាក់ទុនពីគ្រប់វិនិយោគិនបរទេស រួមទាំងក្រុមហ៊ុនក្នុងស្រុកផងដែរ។
ជាការកត់សម្គាល់ ប្រជាពលរដ្ឋកម្ពុជាភាគច្រើនស្គាល់សហភាពអឺរ៉ុបត្រឹមតែជាសហគមន៍ ដែលផ្ដល់ជំនួយធំជាងគេបង្អស់ និងជាទីផ្សារនាំចូលផលិតផលដ៏ចម្បងរបស់កម្ពុជាប៉ុណ្ណោះ ក៏ប៉ុន្តែលើសពីម្ចាស់ជំនួយអភិវឌ្ឍន៍ និងជាទីផ្សារនាំចូលផលិតផលប្រមាណ 45%របស់កម្ពុជា អឺរ៉ុបក៏ជាដៃគូវិនិយោគលំដាប់ទី3 នៅប្រទេសកម្ពុជា បន្ទាប់ពីចិន និងកូរ៉េដែរ។
សូមបញ្ជាក់ថា សហភាពអឺរ៉ុបគឺជាគោលដៅនាំចេញនាំមុខគេរបស់កម្ពុជាដែលមានចំនួន 40%នៃការនាំចេញសរុប។ ទាំងនេះបានកើនឡើងយ៉ាងខ្លាំងក្នុងប៉ុន្មានឆ្នាំថ្មីៗនេះដោយកើនឡើង 227% ចន្លោះពីឆ្នាំ2011 និងឆ្នាំ2016 និងឈានដល់ 5ពាន់លានដុល្លារគិតជាតម្លៃកាលពីឆ្នាំទៅមិញ។ បច្ចុប្បន្នកម្ពុជាស្ថិតនៅលំដាប់ទី2 ក្នុងចំណោមអ្នកទទួលផលពី EBA ទាក់ទងនឹងបរិមាណជួញដូរ។
គិតរហូតមកដល់ពេលនេះ ក្រុមហ៊ុនរបស់អឺរ៉ុបកំពុងឈរជើងរកស៊ីនៅកម្ពុជាមានប្រមាណជា 500ក្រុមហ៊ុនជាមួយនឹងទុនវិនិយោគប្រមាណ4ពាន់លានដុល្លារ ហើយអាចបន្តកើនឡើងបន្ថែមទៀតក្នុងរយៈពេលពី3 ទៅ5ឆ្នាំខាងមុខ។ ការវិនិយោគរបស់អឺរ៉ុបនៅកម្ពុជាគឺវិស័យសំណង់ កម្មន្តសាលកសិកម្ម ផលិតផលព្រៃឈើ អាកាសចរណ៍ ធនាគារ ថាមពល បច្ចេកវិទ្យា និងការដឹកជញ្ជូនជាដើម។ នេះបើតាមការឱ្យដឹងពីសភាពាណិជ្ជកម្មអឺរ៉ុបប្រចាំប្រទេសកម្ពុជា៕
October 18, 2018
ថមមី នៅតែស្រឡាញ់ សួស វីសា ពេញបេះដូង
សួស វីសា ជាតារាដែលកំពុងមានរាសីឡើង ព្រមទាំងមានឱកាសគ្រងតំណែងក្នុងកម្មវិធី The Voice Kids Cambodia រដូវកាលទី2 ជំនួស សុគន្ធ នីសា ទៀតផង។ កាលពីមុនកញ្ញា សួស វីសា តែងប្រកាសខ្លួនថា នៅទំនេរ មិនទាន់ជំពាក់ស្នេហ៍ជាមួយអ្នកណាម្នាក់ទេ តែក្រោយមកបានលេចឮដំណឹងល្ហៀងៗឡើងថា នាងកំពុងបង្ហាត់ភ្លើងស្នេហ៍ជាមួយលោក ថមមី តែត្រូវបាននាងច្រានចោលទៀតថា «មិនមែនជាការពិតទេ» តែសម្រាប់លោក ប៊ុនថុល ប៊ុនថង ហៅថមមី បានទទួលស្គាល់ថា លោកពិតជាមានទំនាក់ទំនងស្នេហ៍ជាមួយកញ្ញា វីសា មែន ហើយអ្វីដែលលោកកាន់រំភើបចិត្តខ្លាំង នោះ គឺនៅពេលឃើញ សួស វីសា លេចមុខមាត់ និងល្បីរន្ធឺខ្លាំងនៅហង្សមាស។
ពាក់ព័ន្ធនឹងរឿងដ៏រសើបដែលអ្នកគាំទ្រកំពុងអន្ទះសាចង់ដឹងគ្រប់គ្នានេះ ត្រូវបានលោកប៊ុនថុល ប៊ុនថង ហៅថមមីនិយាយទាំងរីករាយប្រាប់អ្នកសារព័ត៌មានថា «ខ្ញុំ និងគាត់ (វីសា) ជួបគ្នារាល់ថ្ងៃតើបង ខ្ញុំស្រឡាញ់វីសា មែន ហើយរឿងខ្ញុំ និងគាត់ ចាស់ទុំទាំងសងខាងសុទ្ធតែបានដឹងឮទាំងអស់គ្នាហ្នឹង គ្មានអ្នកណាជំទាស់រឿងពួកយើងទាក់ទងគ្នាទេ គ្រាន់តែថា ពួកយើងមិនទាន់គិតគូររឿងរៀបការ»។ តែថ្មីៗនេះស្រាប់តែលោកពោលថា «ចំពោះរឿងនេះ ខ្ញុំសុំមិននិយាយ ព្រោះមិនទាន់ដល់ពេល តែដល់ពេលគង់តែដឹងទាំងអស់គ្នាទេ»។ ការបកស្រាយរបស់លោក បានបញ្ជាក់ឱ្យឃើញថា ព្រោះតែស្រឡាញ់ទើបលោកនៅតែព្យាយាមបិទបាំងពីទំនាក់ទំនងស្នេហ៍ជាមួយ សួស វីសា។
គួរបញ្ជាក់ដែរថា តារាសម្ដែងប្រុសរូបនេះ ដែលត្រូវបានគេដឹងថា គឺជាតារាភាពយន្តមួយរូបដែលមានទីផ្សារសិល្បៈកាក់កបខ្លាំងនាពេលបច្ចុប្បន្នបានរៀបរាប់យ៉ាងហូរហែពីការងារសិល្បៈរបស់លោក ដែលក្នុងនោះលោកនិយាយថា «បច្ចុប្បន្នការងារសិល្បៈរបស់ខ្ញុំ មានភាពមមាញឹកយ៉ាងខ្លាំង បន្ទាប់ពីបានបញ្ចប់ការសម្តែងរឿង «មន្តស្នេហ៍អនុសេនីយ៍» និងរឿង «បញ្ចប់ស្នេហ៍ត្រឹមអូន»។ តារាប្រុសដែលក្តាប់តំណែងតួឯកបានស្ទើរតែគ្រប់រឿងរូបនេះ បានបន្ថែមថា «បច្ចុប្បន្នមានស្ថានីយទូរទស្សន៍ចំនួន 3ទៀតបានទាក់ទងមកឱ្យខ្ញុំចូលរួមសម្តែង ដែលខណៈនេះខ្ញុំកំពុងស្ថិតក្នុងការពិចារណា»។ លើសពីនេះ លោកក៏កំពុងធ្វើជាពិធីករក្នុងកម្មវិធីកម្សាន្តមួយឱ្យស្ថានីយទូរទស្សន៍ប៉ុស្តិ៍លេខ 5ផងដែរ»៕
October 18, 2018
បវរកញ្ញាវៀតណាម Hoang Thuy សម្ញែងដងខ្លួនស្រឡូន និងត្រោមដណ្ដើមមកុដ Miss Universe 2019
តាមរយៈសារព័ត៌មាន Kenh 14 ដែលទើបតែចេញផ្សាយមុននេះបន្ដិចបានឱ្យដឹងថា បេក្ខភាពកញ្ញា Hoang Thuy ត្រូវបានជ្រើសរើសឱ្យក្លាយជាបេក្ខភាពតំណាងប្រទេសវៀតណាមទៅប្រកួតនៅក្នុងកម្មវិធីបវរកញ្ញាចក្រវាឡ Miss Universe 2019 ។
នារីរូបនេះ ធ្លាប់ជាតារាបង្ហាញម៉ូដដែលមានរាងស្រឡូនស្អាត និងមានកម្ពស់ខ្ពស់ ហើយនាងទើបតែបានបញ្ចប់ការបង្ហាញម៉ូដឈុតប៊ីគីនី នៅក្នុងទីក្រុង ប៉ារីស ប្រទេសបារាំងផងដែរ ។ តារាស្រីរូបនេះ បានប្រាប់អ្នកសារព័ត៌មានថា នាងបានព្យាយាមសម្រករាងអស់ 6 គីឡូក្រាមមកហើយ ដើម្បីត្រៀមខ្លួនចូលរួមប្រកួតនៅក្នុងឆ្នាំ 2019 ខាងមុខនេះ។ នាងបន្ដថា នាងមានភាពជឿជាក់ចំពោះខ្លួនឯង និងអាចប្រើប្រាស់ភាសាអង់គ្លេសបានយ៉ាងប្រសើផងដែរ។
គួរបញ្ជាក់ផងដែរថា បវរកញ្ញារូបស្រស់សោភាមួយនេះ មានបំណងធំជាងគេគឺ នាងចង់ជួបជាមួយតារាចម្ដែងស្រី Gemma Chan និងកំពូលកីឡាករបាល់ទាត់ David Beckham ។ ចង់ដឹងថា រូបសម្រស់នាងស្អាតសល់កម្រិតណានោះ សូមទស្សនារូបភាពខាងក្រោមនេះ៖
October 17, 2018
អង្ករកម្ពុជា បានឈ្នះការប្រកួតអង្ករល្អជាងគេលើពិភពលោកឆ្នាំ2018
ក្រោយពីមានរៀបចំការប្រកួតដើម្បីស្វែងរកអង្ករដែលមានគុណភាពល្អជាងគេ ជាអង្ករជាប់ចំណាត់ថ្នាក់លេខ1 ប្រចាំឆ្នាំ2018 តាមប្រភេទអង្ករស អង្ករក្រអូប និងអង្ករក្រអូបប្រណីតរួចមកនោះ សហព័ន្ធស្រូវអង្ករកម្ពុជាបានរកឃើញនូវអង្ករល្អជាងគេប្រចាំឆ្នាំ2018 និងបាននាំយកទៅដាក់ចូលរួមប្រកួតប្រជែងក្នុងកម្មវិធីប្រកួតអង្ករល្អបំផុតលើពិភពលោកដែលរៀបចំឡើងនៅប្រទេស វៀតណាម។
ជាលទ្ធផលនៃការប្រកួតអង្ករដែលបានជាប់ចំណាត់ថ្នាក់លេខ1 ដល់3 របស់កម្ពុជាសម្រាប់យកទៅចូលរួមការប្រកួត រួមមាន៖
1) អង្ករក្រអូបប្រណីត(Premium Aromatic Rice)របស់ក្រុមហ៊ុន City Rice Import Export Co. LTD។
2) អង្ករក្រអូបធម្មតា(Fragrant Rice) របស់រោងម៉ាស៊ីនថ្មគោល ThmorKol Rice Mill។
3) អង្ករសគ្រាប់វែង (Long Grain White Rice)របស់ក្រុមហ៊ុន VongBunheng Import Export Co.Ltd។
សូមរំឭកថា ការប្រកួតដើម្បីស្វែងរកអង្ករដែលមានគុណភាពល្អជាងគេជាលើកទី3នេះ ត្រូវបានប្រព្រឹត្តទៅក្រោមអធិបតីភាពរបស់លោកឧកញ៉ា វង្ស ប៊ុនហេង អនុប្រធានសហព័ន្ធស្រូវអង្ករកម្ពុជាតំណាងរបស់ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជាដោយមានការចូលរួមវាយតម្លៃពីគណៈកម្មការដែលមានសមាសភាពចូលរួមពីចុងភៅនៃសហព័ន្ធចុងភៅកម្ពុជា តំណាងក្រុមហ៊ុនត្រួតពិនិត្យគុណភាព (CCIC, OMIC) តំណាងវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា កាឌី (CARDI) និងសមាជិកសហព័ន្ធស្រូវអង្ករកម្ពុជាផងដែរ។
ការប្រកួតនេះមានការដាក់សំណាកអង្ករចូលរួមប្រកួតពីវិទ្យាស្ថានកាឌី (CARDI) និងសមាជិកសហព័ន្ធស្រូវអង្ករកម្ពុជាដែលជាសហគមន៍កសិកម្មរោងម៉ាស៊ីនកិនស្រូវ និងអ្នកនាំចេញចំនួន22 និងមានសំណាកអង្ករសរុបចំនួន 28ប្រភេទ។
សម្រាប់ការវាយតម្លៃ គឺផ្តោតលើលក្ខណសម្បត្តិអង្ករនៅមុនពេលចម្អិន (សភាព បាក់ ទំហំ ពណ៌) និងក្រោយចម្អិន (ភាពភ្លឺរលោង ភាពស្អិតល្មួត រសជាតិ ក្លិន និងភាពងាយស្រួលក្នុងការបរិភោគ)។
ក្រោយពីបានរកឃើញអង្ករល្អជាងគេប្រចាំឆ្នាំសម្រាប់យកទៅប្រកួតប្រជែងក្នុងកម្មវិធីប្រកួតអង្ករល្អបំផុតលើពិភពលោកនៅប្រទេសវៀតណាមកាលពីថ្ងៃទី10 ដល់ថ្ងៃទី12 ខែតុលាកន្លងមក អង្ករកម្ពុជាបានឈ្នះការប្រកួតជាអន្តរជាតិនេះ។ នេះបើតាមការឱ្យដឹងពីសហព័ន្ធស្រូវអង្ករកម្ពុជា។
លោក មូល សារិទ្ធិ អគ្គលេខាធិការសហព័ន្ធស្រូវអង្ករកម្ពុជាបានឱ្យដឹងថា កម្ពុជាបានឈ្នះពានរង្វាន់អង្ករល្អបំផុតលើពិភពលោកប្រចាំឆ្នាំ2018នេះ(Worlds Best Rice2018)នៅក្នុងសន្និសីទស្រូវ-អង្ករពិភពលោកលើកទី10(10th World Rice Conference)ដែលរៀបចំដោយ The Rice Trader រយៈពេល3ថ្ងៃ(ពីថ្ងៃទី10-12ខែតុលា)នៅទីក្រុងហាណូយ ប្រទេសវៀតណាម។
សូមបញ្ជាក់ថា កម្ពុជាធ្លាប់គ្រងពានរង្វាន់អង្ករល្អជាងគេបំផុតក្នុងពិភពលោករយៈពេល 3ឆ្នាំជាប់ៗគ្នា គឺឆ្នាំ2012-2013 និងឆ្នាំ2014 ហើយសម្រាប់ឆ្នាំក្រោយមកទៀត គឺ2015-2016 តែសម្រាប់ឆ្នាំ2017 កម្ពុជាទទួលចំណាត់ថ្នាក់លេខ2 ហើយសម្រាប់ឆ្នាំ2018នេះ កម្ពុជាបានគ្រងពានរង្វាន់អង្ករល្អជាងគេបំផុតក្នុងពិភពលោកជាថ្មីម្តងទៀត៕

October 17, 2018
ចង់ដឹងទេថា “អាការស្រមៃថា ទូរស័ព្ទដៃញ័រ‟ បណ្ដាលមកពីមូលហេតុអ្វី?
តើធ្លាប់ដែរឬទេ ពេលដែលយើងកំពុងអង្គុយ ឬកំពុងដើរ ហើយស្រាប់តែមានអារម្មណ៍ថា ទូរស័ព្ទដៃនៅក្នុងហោប៉ៅញ័រដូចជាមានគេទូរស័ព្ទចូល ឬមានសញ្ញាប្រាប់ពី Application ផ្សេងៗ ប៉ុន្តែលុះពេលទាញយកមកមើល ស្រាប់តែគ្មានអ្វីទាំងអស់! អាការចម្លែកនេះ ហៅថា “អាការស្រមៃថាទូរស័ព្ទញ័រ‟ ឬ “Phantom Vibration Syndrome (PSV)‟ ដូច្នេះថ្ងៃនេះ ឡារ៉ែន សូមនាំមិត្តអ្នកអានមកស្គាល់ពីអាការស្រមៃថាទូរស័ព្ទដៃញ័រនេះទាំងអស់គ្នា…។
អាការស្រមៃថាទូរស័ព្ទដៃញ័រ គឺ…
ជាអាការស្រមើស្រមៃមួយបែបដែលច្រើនតែកើតឡើងនៅលើអ្នកដែលមានទម្លាប់ និងចូលចិត្តដាក់ឱ្យទូរស័ព្ទដៃញ័រនៅពេលមានគេទូរស័ព្ទចូល រឹតតែបើសិនជាកំពុងរង់ចាំទូរស័ព្ទ ឬដំណឹងពីនរណាម្នាក់ផងនោះ ក៏នឹងកើតក្ដីវិតក្កកង្វល់ ឬនឹកទន្ទឹងរង់ចាំ រហូតធ្វើឱ្យប្រព័ន្ធប្រសាទ និងការទទួលដឹងភ្ញាក់រឭកខ្លាំងជាងប្រក្រតី គួបផ្សំនឹងការប៉ះពាល់របស់រាងកាយខណៈដែលអ្នកកម្រើករាងកាយផងនោះ អាចធ្វើឱ្យយល់ច្រឡំថា ទូរស័ព្ទដៃញ័រព្រោះមានគេតេចូលមក ឬមានសញ្ញារបស់សារអ្វីម្យ៉ាង។
តើអាការស្រមៃថាទូរស័ព្ទដៃញ័រ ជាជំងឺគ្រោះថ្នាក់ដែរឬទេ?
មិនមែនជាជំងឺ ឬរោគ ឬភាពខុសប្រក្រតីខាងរាងកាយអ្វីឡើយ វាគ្រាន់តែជាទង្វើ ឬសញ្ជាតិ-ញាណមួយរូបបែបដែលមាននៅក្នុងខ្លួនមនុស្សដើម្បីឆ្លើយតបនឹងអ្វីដែលចូលមកជំរុញយ៉ាងភ្លាមៗទាន់ហន់ ហើយថែមទាំងជាសញ្ញាដាស់តឿនថា អ្នកកំពុងតែញៀនការប្រើប្រាស់ទូរស័ព្ទដៃ ឬតិចណូឡូជីគ្មានខ្សែមួយនេះប៉ុណ្ណោះ។
វិធីកែបញ្ហាការស្រមៃថាទូរស័ព្ទដៃញ័រ
* ប្ដូរការផ្ដល់សញ្ញាតឿនប្រាប់ការហៅចូល ឬសញ្ញាប្រាប់ថាមានសារចូល ទៅជា “សំឡេង‟ ជំនួសការ “ញ័រ‟។
* ប្ដូរកន្លែងទុកទូរស័ព្ទដៃពីកន្លែងចាស់ដែលធ្លាប់តែទុកនៅក្នុងហោប៉ៅខោ ទៅទុកនៅក្នុងកាបូបផ្សេងវិញ ដូចជាកាបូបស្ពាយជាដើមជំនួសវិញ វានឹងជួយកាត់បន្ថយការចង់ទាញយកទូរស័ព្ទមកលេងបាន។
* សាកល្បងទុកទូរស័ព្ទឱ្យឆ្ងាយពីខ្លួន។
* សាកល្បងបិទទូរស័ព្ទដៃក្នុងអំឡុងពេលថ្ងៃបើសិនជាគ្មានធុរៈអ្វីសំខាន់ ឬមុនពេលចូលគេង។
ទោះជា “អាការស្រមៃថាទូរស័ព្ទដៃញ័រ‟ គ្រាន់តែជាអាការចម្លែកមួយដែលបណ្ដាលមកពីតិចណូឡូជីក៏ដោយ ក៏ប៉ុន្តែនាពេលបច្ចុប្បន្ននេះ អ្នកស្រាវជ្រាវបានរកឃើញថា អាការនេះបានសាយភាយក្នុងរង្វង់ដ៏ធំទូលាយយ៉ាងឆាប់រហ័សដោយសារតែមនុស្សភាគច្រើនតែងប្រើពេលទំនេរនៅជាមួយនឹងទូរស័ព្ទដៃច្រើនឡើង រហូតអាចបង្កឱ្យកើតការញៀនធ្លាប់បាន ដូច្នេះ បើសាកល្បងទុកចន្លោះពេលប្រើទូរស័ព្ទដៃឱ្យឆ្ងាយពីគ្នាខ្លះ អាការនោះអាចនឹងបាត់ទៅវិញបាននៅទីបំផុត៕
October 17, 2018
កាណាដាបន្តកិច្ចព្រមព្រៀងស្តីពីការសម្រួលពាណិជ្ជកម្មដល់កម្ពុជា
បន្ទាប់ពីផុតសុពលភាពកាលពីថ្ងៃទី30 ខែកញ្ញា ឆ្នាំ2018 កន្លងទៅថ្មីៗនេះ ប្រទេសកាណាដាបានឯកភាពជាថ្មីឡើងវិញទៀតដល់កម្ពុជា លើកិច្ចព្រមព្រៀងស្តីពីការសម្រួលពាណិជ្ជកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង2។
ការឯកភាពបន្តកិច្ចព្រមព្រៀងនេះធ្វើឡើងនៅក្នុងជំនួបពិភាក្សាការងារទ្វេភាគីរវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជាមួយលោកជំទាវ ដូនីកា ប៉ូទី (Donica Pottie) ឯកអគ្គរដ្ឋទូតកាណាដា ប្រចាំព្រះរាជាណាចក្រកម្ពុជាកាលពីម្សិលមិញ។
លោកជំទាវ ដូនីកា ប៉ូទី ឯកអគ្គរដ្ឋទូតនៃប្រទេសកាណាដាបានសម្តែងការកោតសរសើរ ចំពោះគោលនយោបាយរដ្ឋាភិបាលកម្ពុជាក្នុងការលើកទឹកចិត្តដល់អ្នកវិនិយោគបរទេសដែលចូលមកបណ្តាក់ទុនរកស៊ីនៅកម្ពុជា។ លោកជំទាវក៏បានលើកទឹកចិត្តរដ្ឋាភិបាលកម្ពុជាបន្តប្រឹងប្រែង និងប្រកាន់និយាមការងារនេះបន្តទៀត ដើម្បីនាំមកនូវភាពឈ្នះ-ឈ្នះ ដល់គ្រប់តួអង្គពាក់ព័ន្ធ សម្រាប់ឧស្សាហកម្មមួយនេះ ហើយលោកជំទាវនឹងពិនិត្យលទ្ធភាពជួយកៀងគរវិនិយោគិនកាណាដាឱ្យចូលមកបណ្តាក់ទុនលើការកែច្នៃវត្ថុធាតុដើមសំខាន់ៗ ដើម្បីបម្រើការអភិវឌ្ឍឧស្សាហកម្មវាយនភណ្ឌ និងការធ្វើទំនើបកម្មវិស័យកសិកម្ម នៅកម្ពុជា។
ឯកឧត្តមរដ្ឋមន្ត្រី ប៉ាន សូរស័ក្តិ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការគាំទ្រវិស័យវាយនភណ្ឌ តាមរយៈការបន្តស្វែងរកទីផ្សារសក្តានុពលបន្ថែម និងការបង្កើនប្រាក់បៀវត្សរ៍អប្បបរមាជូនកម្មករ-និយោជិត ចាប់ពី 140ដុល្លារ ក្នុងឆ្នាំ2016 ដល់ 170ដុល្លារ ក្នុងឆ្នាំ2018 ហើយគ្រោងនឹងបង្កើនឱ្យបាន 182ដុល្លារ នៅដើមឆ្នាំ2019 ខាងមុខថែមទៀត។
ឯកឧត្តម ប៉ាន សូរស័ក្តិ បានគូសបញ្ជាក់ថា រាជរដ្ឋាភិបាលកម្ពុជាបានអនុលោមតាមកាតព្វកិច្ចការងារដែលអង្គការ ILO បានកំណត់តាំងពីឆ្នាំ1999 និងបានគាំទ្រការអនុវត្តគម្រោងធ្វើឱ្យប្រសើរឡើងនៃរោងចក្រកម្ពុជា (Better Factory Cambodia) ដើម្បីលើកស្ទួយលក្ខខណ្ឌការងារ និងការប្រកួតប្រជែងក្នុងវិស័យនេះ។
សូមជម្រាបថា កាលពីឆ្នាំ2017 ទំហំពាណិជ្ជកម្មទ្វេភាគីរវាងកម្ពុជា និងកាណាដា សម្រេចបានទឹកប្រាក់សរុប 1.04ប៊ីលានដុល្លារអាមេរិក ជាមួយអត្រាកំណើនប្រចាំឆ្នាំ គិតជាមធ្យម 11%។ ក្នុងនោះ ទឹកប្រាក់នាំចេញពីកម្ពុជាទៅកាណាដាមានចំនួន 1ប៊ីលានដុល្លារអាមេរិក និងនាំចូលមានចំនួន 40លានដុល្លារអាមេរិក។ ចំពោះផលិតផលសក្តានុពលនាំចេញរបស់កម្ពុជា រួមមាន៖ សម្លៀកបំពាក់ ស្បែកជើង គ្រឿងផ្គុំយានយន្ត គ្រឿងសង្ហារិម ប្លាស្ទិក ផលិតផលក្មេងលេង និងទំនិញកសិកម្មជាដើម៕

October 17, 2018