សង្គម និងសេដ្ឋកិច្ច - La Reine Media

មហោស្រពភាពយន្តខ្លីចតុមុខ 2018 ប្រកាសបើកមហោស្រពភាពយន្តខ្លីទាំង 77 ភាពយន្ត

នៅព្រឹកថ្ងៃទី22 ខែតុលា ឆ្នាំ2018 គណៈកម្មការមហោស្រពភាពយន្តខ្លីចតុមុខ បានបើកពិធីសម្ពោធការប្រកួតមហោស្រពភាពយន្តខ្លីចតុមុខ ( CSFF ) នៅបរិវេណមជ្ឈមណ្ឌលបណ្តុះបណ្តាលជំនាញ និងទទួលថតភាពយន្តនៅកម្ពុជា (CFC)ដែលមានការចូលរួមពីវត្តមានវាគ្មិនកិត្តិយសដូចជា លោក លោក ជៀប សុវិជ្ជា ប្រធាន CFC និងជាគណៈកម្មការផ្តល់ពិន្ទុភាពយន្តដែលដាក់ប្រកួតនៅក្នុងមហោស្រពភាពយន្តខ្លីចតុមុខ និង លោក គាំ វុត្ថា ប្រធានមហោស្រពភាពយន្តខ្លីចតុមុខ លើកទី7 ព្រមទាំង កញ្ញា អាត សុធាវី គណៈកម្មការមានបទពិសោធន៏ជាច្រើនឆ្នាំក្នុងវិស័យភាពយន្ត។

ប្រធានមហោស្រពភាពយន្តខ្លីចតុមុខ លោក គាំ វត្ថា បានថ្លែងបញ្ជាក់ប្រាប់អ្នកសារព័ត៌មានថា មហោស្រពនឹងប្រព្រឹត្តធ្វើឡើងក្នុងរយៈពេល 4ថ្ងៃ ដែលនឹងមានការចាក់បញ្ចាំងភាពយន្តចំនួន77 ចំណងជើង មកពីចំនួន 18 ប្រទេស ជុំវិញពិភពលោក។ ចាក់ បញ្ចាំងភាពយន្តដែលជាប់ជម្រើសនៅតាមទីតាំងផ្សេងៗគ្នាចំនួន7 ក្នុងរាជធានីភ្នំពេញ នៅថ្ងៃទី26 ខែតុលា និងបើកឱ្យទស្សនានៅថ្ងៃទី 27 ខែតុលា ដែលរួមមាន រោងភាពយន្ត Major Cineplex នៅផ្សារទំនើបសូរិយ៉ា រោងភាពយន្តLegend Cinemaបីសាខាមានដូចជា(អ៊ីឌិន, ស្ទឹងមានជ័យ និង ស៊ីធីម៉ល វិទ្យាស្ថានភាសារបារាំងនៅកម្ពុជា និង Prim Cineplex។

គួរបញ្ជាក់ផងដែរថា កុនខ្លីដែលទទួលបានទាំងអស់មានចំនួន 301 រឿង ដែលមានកុនផលិតដោយកូនខ្មែរប្រមាណ 39 រឿង។ នៅក្នុងនោះ ក៏មានការចាក់បញ្ចាំងភាពយន្តដែលជាប់ជម្រើសដល់វគ្គផ្ដាច់ព្រ័ត្រទាំង 6 រឿងរបស់ខ្មែរ ផងដែរ ។ ចូលរួមទស្សនាគឺដោយសេរី និង មិនគិតថ្លៃ (កន្លែងមានកំណត់) គ្រាន់តែទស្សនិកជនទៅទទួលសំបុត្រសម្រាប់ចូលរួមទស្សនាភាពយន្តមុនពេលចាក់បញ្ចាំងមួយម៉ោងនៅតាមបញ្ជរសំបុត្ររបស់មហោស្រព ៕

October 22, 2018

ដាំខ្ទឹមធ្វើពូជ បានចំណូលខ្ពស់ជាងលក់ស្លឹក

កសិករមួយចំនួនដែលរស់នៅក្នុងឃុំត្រើយស្លា ស្រុកស្អាង ខេត្តកណ្តាល បានងាកមកចាប់យករបរថ្មីមួយទៀតហើយ គឺដាំខ្ទឹមយកពូជលក់ និងទុកសម្រាប់ដាំដុះខ្លួនឯងនៅជំនាន់ក្រោយៗជាជាងចំណាយប្រាក់ទិញពូជពីប្រទេសជិតខាង ដើម្បីកុំឱ្យចំណាយប្រាក់ច្រើនក្នុងគ្រួសារ នៅពេលមានតម្រូវការដាំដុះលើកក្រោយៗទៀត។

លោក ហង់ ម៉េងហួរ កសិករដាំខ្ទឹមម្នាក់នៅភូមិលេខ3 ឃុំត្រើយសា្ល ស្រុកស្អាង ខេត្តកណ្តាលបានប្រាប់ឱ្យដឹងថាក្រៅពីដាំខ្ទឹមយកស្លឹកលក់ហើយគ្រួសារលោកក៏ដូចជាកសិករមួយចំនួនទៀតដែរបានឆ្លៀតដាំទុកធ្វើពូជលក់ និងសម្រាប់ទុកដាំបន្តនៅពេលក្រោយៗទៀតផងដែរ ព្រោះពូជលក់បានថ្លៃ និងចំណេញច្រើនជាងលក់ស្លឹក។ គ្រួសារលោកបានចាប់យករបរដាំខ្ទឹមទុកធ្វើពូជនេះអស់រយៈពេលជាង 5ឆ្នាំមកហើយ នៅលើដីចំនួន 2កន្លែងមានទំហំជិតមួយហិកតាកន្លះ ក្នុងនោះពាក់កណ្តាលដាំសម្រាប់លក់គល់ និងស្លឹក និងពាក់កណ្ដាលទៀតដាំសម្រាប់ទុកធ្វើពូជលក់ និងសម្រាប់ទុកដាំបន្តខ្លួនឯង។

លោកបានបន្តថា មូលហេតុដែលលោកដាំយកស្លឹកលក់ពាក់កណ្តាល និងដាំទុកសម្រាប់ធ្វើពូជលក់ពាក់កណ្តាលនេះ គឺដើម្បីជួយយឹតយោងតម្លៃគ្នាទៅវិញទៅមក មានន័យថាប្រសិនបើស្លឹកខ្ទឹមធ្លាក់ថ្លៃ បានខ្ទឹមពូជជួយទប់មិនឱ្យខាតខ្លាំង ព្រោះពូជខ្ទឹមមិនចេះខាតទេហើយក៏មិនបាច់ទៅដើររកទិញពូជរបស់គេមកដាំដែរ ប្រសិនបើតម្លៃខ្ទឹមស្លឹកបានថ្លៃដូចសព្វថ្ងៃ 1គីឡូក្រាម 4,000 ទៅ5,000រៀល យើងអាចលក់ពូជបាន 1គីឡូក្រាមរហូតដល់ទៅ12.000 ទៅ15.000រៀលឯណោះ ហើយបើស្លឹកខ្ទឹមបានថ្លៃជាងនេះ ការលក់ពូជខ្ទឹមកាន់តែបានថ្លៃទៅទៀតតាមហ្នឹងដែរ ដែលមានពេលខ្លះយើងអាចលក់បាន 1គីឡូក្រាមដល់ទៅ 25.000 ឬ30.000រៀលក៏មានដែរ និយាយរួមខ្ទឹមពូជមិនចេះខាតទេ។

ចំណែកឯលោក សុខ លន់ ជាមន្ត្រីនគរបាល និងជាអ្នកដាំខ្ទឹមពូជជាង 20ឆ្នាំមកនៅក្នុងភូមិទួលអំពិលលាស់ ឃុំក្រាំងយ៉ូវ ស្រុកស្អាង បាននិយាយដែរថា លោកតែងឆ្លៀតពេលទំនេរពីការងារជាមន្ត្រីនគរបាលរដ្ឋបាលប៉ុស្តិ៍ក្រាំងយ៉ូវមកជួយដាំខ្ទឹមភរិយាយកពូជលក់ដែរ ដែលរបរនេះអាចជួយឱ្យជីវភាពគ្រួសាររបស់លោកកាន់តែប្រសើរឡើង។ អ្នកជំនាញដាំខ្ទឹមពូជរូបនេះបានបន្តថា លោកមានដីជាងកន្លះហិកតាសម្រាប់ដាំខ្ទឹម ប៉ុន្តែមិនដាំយកស្លឹកនោះទេ គឺដាំទុកធ្វើពូជលក់ ព្រោះបានចំណេញច្រើនជាង។

ជាមួយគ្នានេះដែរ លោកក៏បានប្រាប់ឱ្យដឹងអំពីវិធីសាស្ត្រក្នុងការដាំផងដែរថា ការដាំខ្ទឹមយកស្លឹក និងដាំខ្ទឹមយកពូជលក់នេះមិនខុសគ្នាទេ គ្រាន់តែការដាំខ្ទឹមទុកធ្វើពូជត្រូវប្រើរយៈពេលយូរជាងគឺចាប់ពី 2ខែកន្លះ ទៅ3ខែទើបគេដក ដែលខុសពីដាំខ្ទឹមយកស្លឹកលក់ គេប្រើរយៈពេលតែ 1ខែកន្លះ ទៅ 1ខែ 20ថ្ងៃប៉ុណ្ណោះ គឺគេអាចដកលក់បានហើយ។

លោក សុខ លន់ បានបន្ថែមដែរថា ក្រោយពីដករួច គេត្រូវយកវាទៅហាលថ្ងៃ និងសំដិលទុកឱ្យស្ងួតទើបយកទៅរក្សាទុកដើម្បីការពារកុំឱ្យវារលួយ។ ក្រោយពីរក្សាទុកបានប្រមាណ 1ខែកន្លះ ទៅ2ខែ គឺអាចយកទៅដាំជាថ្មីបានហើយ។ លោកបានបញ្ជាក់ប្រាប់ផងដែរថា ពូជខ្ទឹមនេះ កាលពីដើមឡើយគឺកសិករយើងនាំចូលពីប្រទេសជិតខាង ពិសេសពីប្រទេសថៃ និងប្រទេសវៀតណាម ហើយពេលខ្លះត្រូវឈ្មួញក្រឡុកតម្លៃស្រេចតែចិត្តគេទៀតផង ដូច្នោះហើយទើបធ្វើឱ្យលោកងាកមកដាំខ្ទឹមទុកធ្វើពូជសម្រាប់លក់ឱ្យកសិករក្នុងស្រុកដើម្បីកាត់បន្ថយការនាំចូល និងសម្រួលដល់ការលំបាករបស់បងប្អូនកសិករក្នុងស្រុក កុំឱ្យពិបាកទៅទិញឆ្ងាយ ហើយវាថែមទាំងជួយឱ្យជីវភាពគ្រួសាររបស់លោកកាន់តែប្រសើរឡើងផងដែរ។

លោក អ៊ុក សុខគុណ ប្រធានការិយាល័យកសិកម្មស្រុកស្អាងមានប្រសាសន៍ថា ស្រុកស្អាង គឺជាតំបន់ធ្វើកសិកម្មផលិតដំណាំកសិផលច្រើនជាងគេនៅក្នុងខេត្តកណ្តាលសម្រាប់ផ្គត់ផ្គង់បន្លែក្នុងស្រុក និងនាំចេញទៅលក់នៅលើទីផ្សារនានា ពិសេសទីផ្សារក្នុងក្រុងភ្នំពេញតែម្តង ដែលបន្លែទាំងអស់នោះមានដូចជាស្ពៃចង្កឹះ ស្ពៃតឿ ស្ពៃក្តោប ស្លឹកគូឆាយ ត្រសក់ ននោង ត្រឡាច មើមខ្ញី ម្រះ និងខ្ទឹមជាដើម។ តែទោះជាយ៉ាងនេះក្ដី ក៏កសិករនៅក្នុងភូមិមិនទាន់មានផែនការច្បាស់លាស់ក្នុងការដាំដុះដើម្បីផ្គត់ផ្គង់តាមតម្រូវការទីផ្សារនៅឡើយ ភាគច្រើននៅពេលដំណាំបន្លែណាមួយបានថ្លៃខ្ពស់ គឺពួកគាត់នាំគ្នាដាំដំណាំនោះស្ទើរគ្រប់គ្នា ជួនកាលប្រមូលផលដំណាលៗគ្នាក្នុងពេលតែមួយ ធ្វើឱ្យបន្លែនោះជន់ច្រើននៅលើទីផ្សារលក់មិនដាច់ នាំឱ្យតម្លៃធ្លាក់ចុះខ្លាំង និងភ្លាមៗតែម្ដង។

ដោយឡែករបរដាំខ្ទឹមនេះ កន្លងមកកសិករតែងចំណាយថវិកាទិញពូជពីប្រទេសជិតខាងដូចជាថៃ និងវៀតណាមសម្រាប់យកមកដាំយកស្លឹក និងគល់លក់ ប៉ុន្តែបច្ចុប្បន្នពួកគាត់ចេះទុកពូជសម្រាប់ដាំខ្លួនឯងខ្លះៗហើយ។ លោកបញ្ជាក់ថា ការដាំទុកពូជនេះកសិករមិនមានផែនការ និងជំនាញច្បាស់លាស់នៅឡើយទេ នៅពេលណាស្លឹកខ្ទឹមធ្លាក់ថ្លៃខ្លាំង គឺគាត់ទុកពូជតែម្តង ដែលនេះជាកត្តាធ្វើឱ្យពូជខ្ទឹមមិនសូវសម្បូរសម្រាប់យកទៅដាំបន្តនៅជំនាន់ក្រោយៗទៀត។ លោកថា យកល្អកសិករត្រូវចេះដាំដាច់ដោយឡែកចេញពីគ្នា បើដាំសម្រាប់យកដើម ឬស្លឹកលក់ គេមិនចាំបាច់ថែទាំច្រើនទេ តែបើដាំយកពូជត្រូវមានការថែទាំច្បាស់លាស់ រាប់ចាប់តាំងពីការធ្វើដី ធ្វើស្មៅ ការប្រើប្រាស់ជី ធ្វើយ៉ាងណាឱ្យខ្ទឹមលូតលាស់ល្អមានដើម ឬមើមធំៗ ទើបទុកធ្វើពូជយកទៅដាំនៅជំនាន់ក្រោយៗទៀតបានល្អ៕

October 22, 2018

តើប្រព័ន្ធអនុគ្រោះពន្ធ EBA មានភាពចាំបាច់យ៉ាងណាចំពោះកម្ពុជា?

ប្រព័ន្ធអនុគ្រោះពន្ធ EBA ឬ Everything But Arms (ប្រែថាអ្វីៗគ្រប់យ៉ាងលើកលែងតែអាវុធ) គឺជាកម្មវីធីផ្តល់ភាពអនុគ្រោះផ្នែកពន្ធគយលើទំនិញនាំចូលពីប្រទេសនានាដែលត្រូវបានចាត់លំដាប់ថ្នាក់ថាជា “ប្រទេសអភិវឌ្ឍន៍តិចតួច” ឬហៅថា “ប្រទេសក្រីក្រ”។ ប្រព័ន្ធនេះត្រូវបានសហគមន៍អឺរ៉ុបដាក់ឱ្យអនុវត្តកាលពីឆ្នាំ2011 ដល់ប្រទេសក្រីក្រចំនួន49 នៅទូទាំងពិភពលោកដែលក្នុងនោះមានប្រទេសកម្ពុជាមួយផងដែរ។

ចាប់តាំងពីកម្ពុជាទទួលបានប្រព័ន្ធអនុគ្រោះពន្ធនេះមក គេសង្កេតឃើញថា អ្នកវិនិយោគបរទេសបានចូលមកបណ្តាក់ទុនរកស៊ីនៅកម្ពុជាលើវិស័យផ្សេងៗជាច្រើន ជាពិសេសវិស័យវាយនភណ្ឌកាត់ដេរសម្លៀកបំពាក់ និងស្បែកជើង ដែលបានជួយផ្តល់ការងារដល់ពលរដ្ឋខ្មែរយ៉ាងច្រើន និងបានជួយជំរុញឱ្យសេដ្ឋកិច្ចប្រទេសកម្ពុជាឆ្លងផុតពីប្រទេសក្រីក្រមានចំណូលទាប មកជាប្រទេសមានចំណូលមធ្យមកម្រិតទាប។

ទិន្នន័យរបស់ធនាគារពិភពលោកបានបង្ហាញថា បើនិយាយចំពោះតែទីផ្សារអឺរ៉ុបវិញ មានចំនួនដល់ទៅ 4,126ពាន់លានដុល្លារ ដែលភាគច្រើនលើសលប់(94,84%)គឺជាផលិតផលសម្រេចមានតម្លៃស្មើនឹង 4,079ពាន់លានដុល្លារ។ ចំពោះផលិតផលដែលកម្ពុជានាំចេញទៅកាន់ទីផ្សារអឺរ៉ុប គឺជាផលិតផលសម្លៀកបំពាក់ និងស្បែកជើងដែលមានតម្លៃដល់ទៅជាង 3.531ពាន់លានដុល្លារ ឬស្មើនឹង85.58ភាគរយនៃតម្លៃទំនិញសរុបដែលកម្ពុជាបាននាំចូលទៅកាន់ទីផ្សារអឺរ៉ុប។ ចំពោះប្រទេសនៅក្នុងទីផ្សារអឺរ៉ុបដែលកម្ពុជាបាននាំចេញទំនិញចូលទៅនោះ រួមមានកាណាដា សហរដ្ឋអាមេរិក ចក្រភពអង់គ្លេស អាល្លឺម៉ង់ ជាដើម ជាទីផ្សារធំបំផុតដែលទទួលលក់ទំនិញពីកម្ពុជា ជាពិសេសផលិតផលសម្លៀកបំពាក់ និងស្បែកជើងដែលផ្តល់ផលវិជ្ជមានសម្រាប់ជញ្ជីងពាណិជ្ជកម្មកម្ពុជា(ចំណេញកម្ពុជា)។

ចំណែកប្រទេសចិនវិញបាននាំចូលទំនិញមានតម្លៃដល់ទៅជាង 4,550លានដុល្លារមកកម្ពុជា បន្ទាប់មកគឺប្រទេសថៃមានតម្លៃ 1,910លានដុល្លារ និងប្រទេសវៀតណាមមានតម្លៃជាង 141លានដុល្លារក្នុងឆ្នាំ2016 ខណៈដែលកម្ពុជានាំចូលទៅវិញមានចំនួនតិចតួចបំផុតដែលធ្វើឱ្យមានផលអវិជ្ជមានសម្រាប់ជញ្ជីងពាណិជ្ជកម្មកម្ពុជា(កម្ពុជាមិនសូវចំណេញ)។

ធនាគារពិភពលោក(WB)បានប្រកាសថា សេដ្ឋកិច្ចកម្ពុជានៅតែរក្សាកំណើនរឹងមាំដដែលនៅរយៈពេល 6ខែដំបូងនៃឆ្នាំ2018 ដោយសារសេដ្ឋកិច្ចមួយផ្នែកធំបានមកពីការរួមចំណែកយ៉ាងធំធេងនៃកំណើននាំចេញផលិតផលកាត់ដេរសម្លៀកបំពាក់ ស្បែកជើង និងផលិតផលសម្រាប់ការធ្វើដំណើរ ដូចជាកាបូប វ៉ាលីស ដែលត្រូវបាននាំចេញទៅទីផ្សារសហគមន៍អឺរ៉ុប និងអាមេរិកខាងជើង ហើយ WB បានបង្ហាញពីការព្រួយបារម្ភនៅក្នុងរបាយការណ៍បច្ចុប្បន្នភាពអំពីកម្ពុជា កាលពីពេលថ្មីៗថា ការសើរើប្រព័ន្ធអនុគ្រោះពន្ធនេះមកលើប្រទេសកម្ពុជា គឺជាហានិភ័យចម្បងសម្រាប់សេដ្ឋកិច្ចរបស់ប្រទេសនេះទាំងមូល។

លោកបណ្ឌិត ចាប សុថារិទ្ធ សមាជិកក្រុមប្រឹក្សាភិបាលវិទ្យាស្ថានខ្មែរសម្រាប់សហប្រតិបត្តិការ (CICP) បានមានប្រសាសន៍ថា ប្រសិនបើកម្ពុជាបាត់បង់ការអនុគ្រោះពន្ធនេះលើរាល់ទំនិញនាំចូលទៅកាន់សហគមន៍អឺរ៉ុប កម្ពុជានឹងត្រូវបំពេញកាតព្វកិច្ចបង់ពន្ធរហូតដល់ទៅ 11ភាគរយសម្រាប់ផលិតផលសម្លៀកបំពាក់ និងអត្រាផ្សេងពីនេះទៀតទៅតាមប្រភេទទំនិញនីមួយ។ ហើយប្រសិនបើសហគមន៍អឺរ៉ុបតម្រូវឱ្យកម្ពុជាបង់ពន្ធមែននោះនឹងធ្វើឱ្យទំនិញនាំចូលពីកម្ពុជាជួបការលំបាកក្នុងការប្រកួតប្រជែងតម្លៃជាមួយទំនិញនាំចូលពីប្រទេសផ្សេងទៀត ដែលនឹងនាំឱ្យប៉ះពាល់ដោយផ្ទាល់ដល់ប្រជាពលរដ្ឋខ្មែរដែលកំពុងបម្រើការងារក្នុងវិស័យកាត់ដេរ និងវិស័យជាច្រើនទៀត ដោយសារវិនិយោគិនបរទេសនឹងឈប់ប្រកបធុរកិច្ចក្នុងប្រទេសកម្ពុជា ហើយនឹងងាកទៅរកប្រទេសផ្សេងណាមួយទៀតដែលនៅទទួលបានប្រព័ន្ធអនុគ្រោះពន្ធ EBA សម្រាប់នាំចេញទំនិញគ្រប់ប្រភេទទៅកាន់អឺរ៉ុបលើកលែងតែអាវុធនេះវិញម្ដង។ ទោះជាយ៉ាងនេះក្តី ក៏កម្ពុជានៅមានទីផ្សារច្រើនទៀត ដូចជាប្រទេសចិន ជប៉ុន អង់គ្លេស និងប្រទេសអឺរ៉ុបមួយចំនួនទៀតដែលមិនមែនជាសមាជិកសហគមន៍អឺរ៉ុប។

លោក Jean-Gaetan GUILLEMAUD ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុន Zuelling Pharma បានមានប្រសាសន៍ខ្លីៗថា អ្នកធុរកិច្ចអឺរ៉ុប មានការទទួលខុសត្រូវខ្លាំងផ្នែកសង្គម ដោយសារតែវិនិយោគិនអឺរ៉ុបបានចូលរួមចំណែកសំខាន់ក្នុងការផ្តល់ការងារផ្តល់សុខុមាលភាពការងារ និងសង្គម និងជួយលើកកម្ពស់សិទ្ធិ ជីវភាពកម្មករ និងសេដ្ឋកិច្ចខ្មែរផងដែរ។ ហើយថា វិនិយោគិនអឺរ៉ុបមិនត្រឹមតែផ្តល់ការងាររយៈពេលវែងប៉ុណ្ណោះទេ ប៉ុន្តែថែមទាំងផ្តល់ការងារប្រកបដោយចីរភាព តាមរយៈការបញ្ជូនពលរដ្ឋទៅសិក្សាជំនាញនៅក្រៅប្រទេស ដូចជាប្រទេសថៃសិង្ហបុរីជាដើមទៀតផង។ លោកថា ក្រុមហ៊ុនមកពីបណ្តាប្រទេសសហគមន៍អឺរ៉ុបមានចំនួនជាង 500 កំពុងវិនិយោគនៅកម្ពុជា។

ចំណែកលោក គីលីយ៉ង់ ប្លេស នាយកប្រតិបត្តិសភាពាណិជ្ជកម្មអឺរ៉ុបប្រចាំនៅកម្ពុជាក៏បានមានប្រសាសន៍ដែរថា ការដកប្រព័ន្ធអនុគ្រោះពន្ធ EBA ពីកម្ពុជាមិនមែនជានីតិវិធីមួយដែលអាចប្រញាប់ប្រញាល់ធ្វើបានទេ លុះត្រាតែមានការជជែកគ្នាឱ្យបានច្រើន មុនមានការសម្រេចដក ឬផ្អាកបណ្តោះអាសន្នលើប្រព័ន្ធអនុគ្រោះពន្ធមួយនេះ។

ជាមួយគ្នានេះ សភាពាណិជ្ជកម្មអន្តរជាតិធំៗចំនួន 5ស្ថាប័ននៅអឺរ៉ុប ដែលក្នុងនោះមានសភាពាណិជ្ជកម្មអឺរ៉ុបនៅកម្ពុជា សភាពាណិជ្ជកម្ម និងឧស្សាហកម្មបារាំងប្រចាំនៅកម្ពុជា (CCFIC) ក្រុមអ្នកធុរកិច្ចអាល្លឺម៉ង់ប្រចាំនៅកម្ពុជា (ADW) សភាពាណិជ្ជកម្មអឺរ៉ុបខាងជើងប្រចាំនៅកម្ពុជា (Nordcham) សមាគមអ្នកធុរកិច្ចអុីតាលីនៅកម្ពុជាដែលជាតំណាងប្រទេសចំនួន9 នៅអឺរ៉ុប កាលពីពេលថ្មីៗនេះបានសរសេរលិខិតរួមគ្នាមួយច្បាប់ជូនលោកស្រី Cecila Malmstrom ស្នងការទទួលបន្ទុកពាណិជ្ជកម្មគណៈកម្មការអឺរ៉ុបក្នុងខ្លឹមសារមិនឯកភាពទៅនឹងបំណងចង់ដកប្រព័ន្ធអនុគ្រោះពន្ធ EBA ចេញពីប្រទេសកម្ពុជា។

លិខិតរួមរបស់ស្ថាប័នធុរកិច្ចអន្តរជាតិដែលជាតំណាងក្រុមហ៊ុនចំនួន 335 និងមាននិយោជិតជាង 5ម៉ឺននាក់បានសម្តែងនូវក្តីកង្វល់យ៉ាងខ្លាំង-ក្លាអំពីដំណើរការឆ្ពោះទៅរកការដកហូតការអនុគ្រោះពន្ធផ្នែកពាណិជ្ជកម្មក្រោមរបប EBA ដែលប្រែថាអ្វីៗគ្រប់យ៉ាងលើកលែងតែអាវុធចេញពីប្រទេសកម្ពុជា និងបារម្ភពីផលវិបាកដែលការដកហូតនេះដែលនឹងបង្កផលប៉ះពាល់យ៉ាងខ្លាំងក្លាដល់ប្រយោជន៍ពាណិជ្ជកម្មយូរអង្វែងទាំងរបស់សហភាពអឺរ៉ុប និងរបស់ប្រទេសកម្ពុជា៕

October 22, 2018

រាជនីចិត្តធម៌ ដេននី ក្វាន់ ប្រកាសចង់ជួយសាលារៀនដែលមានសិស្សក្រីក្រ

នេះពុំមែនទើបជាលើកទីមួយនោះទេ សម្រាប់រាជនីចិត្តធម៌កញ្ញា ដេននី ក្វាន់ ដែលតែងលេចមុខក្នុងសកម្មភាព មនុស្សធម៌ជួយដល់សង្គម តាមរយៈការចុះចែកអំណោយ និង សម្ភារៈជួយដល់ប្រជាពលរដ្ឋ ជួបការខ្វះខាត ចាស់ជរា និងកុមារមាក្រីក្រនៅតាមសហគមន៍ និងបណ្តាខេត្តមួយចំនួន។ ទង្វើនេះល្អនេះកំពុងទទួលបានការគាំទ្រ និងលើកសរសើរពីសំណាក់មហាជនយ៉ាងច្រើន។

ហើយថ្មីៗនេះ ដេននី ក្វាន់ បានប្រកាសនៅបណ្ដាញសង្គមហ្វេសប៊ុករបស់ខ្លូន ក្នុងការផ្ដល់ជំនួយដល់សិស្សក្រីក្រមួយចំនួន ។ នាងបានរៀបរាប់នៅលើបណ្ដាញសង្គមហ្វេសប៊ុករបស់ខ្លួនថា « តើមានមិត្តណាដឹងថាសាលារៀនណាសម្បូរសិស្សក្រីក្រទេ ? បើដឹងជួយប្រាប់ផងព្រោះចង់ទិញសំភារៈសិក្សាចែកជូនដល់ពួកគាត់ »។

សូមជម្រាបដែរថា ពីតារាសម្ដែងស្រីសិចស៊ីមិនសំចៃដៃ រហូតបានក្លាយជាតារាទី1 ដែលក្រសួងវប្បធម៌ សម្រេចដាក់ពិន័យ1ឆ្នាំ មិនឱ្យមានសកម្មភាពក្នុងវិស័យសិល្បៈ តែនាងបានប្រែមុខមាត់ថ្មីដែលមហាជនគាំទ្រទទួលស្គាល់ចំពោះទឹកចិត្តសប្បុរស និងអំពើល្អជាច្រើន រួមផ្សំទស្សនៈដែលនាងធ្លាប់បានយល់ឃើញថា ពីភាពក្រលំបាករបស់មនុស្សម្នាក់ៗ ដែលបានកើតមកលើលោកនេះហើយ គឺមានវាសនាខុសៗគ្នា ពោលគឺមនុស្សម្នាក់ៗកើតមក ពុំមាននរណាម្នាក់ចង់ជួបនូវភាពក្រលំបាកលំបិន ខ្វះមុខខ្វះក្រោយ រស់ក្នុងសភាពវេទនាឡើយ។ សំខាន់បើមានធនធានសមរម្យអាចចែករំលែកបាន សូមជួយចែករំលែកតាមលទ្ធភាព ព្រោះសុទ្ធតែជាមនុស្សរស់នៅ ក្នុងសង្គមតែមួយ និងជាជាតិសាសន៍ តែមួយដូចគ្នា៕

October 22, 2018

មូលហេតុមួយចំនួនដែលប្រទេសហ្វាំងឡង់មានប្រព័ន្ធអប់រំល្អបំផុតក្នុងពិភពលោក

ជាទូទៅមនុស្សគ្រប់គ្នាលើពិភពលោក តែងតែឃើញសហរដ្ឋអាមេរិកស្ថិតនៅក្នុងលំដាប់ខ្ពស់បំផុតនៃតារាងប្រទេសដែលមានការអប់រំល្អជាងគេលើពិភពលោក តែបច្ចុប្បន្ននេះប្រទេសដែលស្ថិតនៅលំដាប់ខ្ពស់បំផុតនោះគឺហ្វាំងឡង់។

ក្នុងដំណើរនៃការកសាងសមត្ថភាព និងពង្រឹងប្រសិទ្ធភាពអប់រំរបស់ខ្លួន ប្រទេសហ្វាំងឡង់មានលក្ខណៈពិសេសជាច្រើនដែលជាមេរៀនល្អៗសម្រាប់ការអនុវត្តនៅបណ្តាប្រទេសជាច្រើនផ្សេងទៀតលើពិភពលោក។ ខាងក្រោមនេះជាចំណុចមួយចំនួនដែលប្រទេស ហ្វាំងឡង់អនុវត្តទទួលបានជោគជ័យលើការអភិវឌ្ឍវិស័យអប់រំរបស់ខ្លួន។

1.គ្មានការកម្រិតសមត្ថភាពសិស្សដោយស្តង់ដារណាមួយនោះទេ
ការបង្រៀនសិស្សដោយផ្តោតតែលើបន្ទាត់ត្រង់ភ្លឹងមិនមែនជាវិធីល្អនោះទេក្នុងការបង្កើតភាពច្នៃប្រឌិតសម្រាប់យុវជនជំនាន់ថ្មីដែលរស់នៅក្នុងពិភពលោកអភិវឌ្ឍយ៉ាងលឿនជារៀងរាល់ថ្ងៃ។ វិបត្តិភាគច្រើននៃការអប់រំលើពិភពលោក គឺសិស្សពីមួយជំនាន់ទៅមួយជំនាន់ត្រូវបានកម្រិតការយល់ដឹង ឬធ្វើតាមតែអ្វីដែលបានកំណត់ទុក ហើយបង្កើតតែរឿងដដែលៗសម្រាប់សង្គម។ ហេតុនេះការបណ្តុះបណ្តាលសម័យថ្មីគឺជាការបណ្តុះបណ្តាលដែលផ្តល់ព័ត៌មានសម្រាប់ការពិចារណា និងជាការបើកច្រកច្នៃប្រឌិតសម្រាប់កុមារ ដោយការផ្តល់នូវមូលដ្ឋានគ្រឹះអប់រំសម្រាប់ជាមូលដ្ឋានដល់ពួកគេក្នុងការយល់ឃើញរឿងសំខាន់ៗជាច្រើនដែលមានប្រយោជន៍សម្រាប់មនុស្សទូទៅ។

នៅប្រទេសហ្វាំងឡង់គ្មានស្តង់ដារនៃការធ្វើតេស្តសិស្សនោះទេ ហើយសំណួរភាគច្រើនដែលដាក់ឱ្យសិស្សធ្វើ ក៏កម្រជាសំណួរបិទណាស់ មានន័យថា សិស្សអាចមានឱកាសច្រើនក្នុងការបង្ហាញពីគំនិត និងការយល់ឃើញរបស់ខ្លួនបានយ៉ាងទូលំទូលាយលើសន្លឹកកិច្ចការប្រឡងរបស់ខ្លួន ហើយគ្រូក៏ព្យាយាមទទួលយកនូវចំណុចវិជ្ជមានទាំងអស់នោះ ដោយផ្តល់ពិន្ទុទៅតាមភាពជាក់ស្តែងនៃលទ្ធផលដែលសិស្សបានធ្វើនោះ។ ការធ្វើបែបនេះគឺជាការជំរុញឱ្យមានការអភិវឌ្ឍលក្ខណៈពិសេសរៀងៗខ្លួនបានយ៉ាងល្អ ដែលកត្តាទាំងអស់នេះជំរុញឱ្យធនធានមនុស្សនៅក្នុងប្រទេសនេះមានគុណភាពខ្ពស់ ហើយអាចបម្រើការងារនៅគ្រប់វិស័យប្រកបដោយសក្តានុពលរៀងៗខ្លួន។

2. គ្រូបង្រៀនមានគណនេយ្យភាពត្រឹមត្រូវ
បញ្ហាគ្រូបង្រៀនគឺជាចំណោទមួយដែលកើតមានឡើងក្នុងប្រទេសមួយចំនួន ព្រោះមានរឿងច្រើនណាស់ដែលគេសំដៅមុខព្រួញទៅរកគ្រូបង្រៀនហើយដាក់បន្ទុកកំហុសទាំងអស់នោះទៅលើពួកគាត់ខណៈស្ថានភាពជាក់ស្តែងមានកត្តារួមផ្សំច្រើនដែលនាំឱ្យកើតមានបញ្ហាក្នុងការអប់រំ។ នៅប្រទេសហ្វាំងឡង់ គ្រូបង្រៀនត្រូវបានជ្រើសរើសយ៉ាងតឹងតែងក្នុងកម្រិតស្តង់ដារខ្ពស់ ហើយមានការតាមដានការអនុវត្តដោយប្រព័ន្ធត្រឹមត្រូវបំផុត ដើម្បីធានាថាពួកគាត់អាចមានសមត្ថភាពទូលំទូលាយសម្រាប់ផ្តល់ការអប់រំពិតប្រាកដសម្រាប់សិស្សដែលមានលក្ខណៈពិសេសរៀងៗខ្លួន។

គ្រូបង្រៀនចាំបាច់ត្រូវតែមានសញ្ញាបត្របរិញ្ញាបត្រជាន់ខ្ពស់ និងមានជំនាញច្បាស់លាស់ កំណត់ដោយការធ្វើតេស្តសាកល្បងពីភាពប៉ិនប្រសប់របស់គាត់មុននឹងអនុញ្ញាតឱ្យបង្រៀន។ បន្ទាប់មកបញ្ចូលគាត់ទៅក្នុងប្រព័ន្ធនៃការបណ្តុះបណ្តាលយ៉ាងយកចិត្តទុកដាក់ ដើម្បីកាត់បន្ថយកំហុសក្នុងការបង្រៀន។

3. ផ្តល់ការយកចិត្តទុកដាក់ពីភាពជាក់ស្តែងនៃចំណេះដឹងសម្រាប់ការរស់នៅ
សាលាជាច្រើនលើពិភពលោកដែលផ្តល់តម្លៃខ្លាំងលើការកើនឡើងនៃពិន្ទុប្រឡងលើមុខវិជ្ជាមួយចំនួនដូចជាគណិតវិទ្យា ឬវិទ្យាសាស្ត្រជាដើមហើយពួកគេបែរជាភ្លេចរឿងសំខាន់ៗជាច្រើនដែលជាគុណតម្លៃនៃការអប់រំពិតប្រាកដគឺសុភមង្គល ផាសុកភាព បញ្ហាសុខភាព និងការស្វែងយល់ពីបរិស្ថានជាដើម។ នេះជាបញ្ហាដែលសាលាចាំបាច់ត្រូវតែធ្វើកំណែទម្រង់ ខណៈពេលដែលប្រទេសហ្វាងឡង់បានធ្វើវារួចជាយូរយារណាស់មកហើយ។

កម្មវិធីដែលប្រទេសហំ្វាងឡង់បានដាក់ចុះសម្រាប់ប្រព័ន្ធអប់រំគឺការសិក្សាពីគុណតម្លៃនៃការរស់នៅជាក់ស្តែងរបស់មនុស្ស។ ពួកគេផ្តល់តម្លៃខ្លាំងលើការរៀបចំបរិស្ថានសាលារៀន ផាសុកភាព និងការជំរុញឱ្យសិស្សមានការពិចារណាលើបញ្ហាដែលនាំឱ្យពួកគេក្លាយជាមនុស្សម្នាក់ដែលមានគុណតម្លៃសម្រាប់អនាគតប្រទេសរបស់គេ។

តាំងពីទសវត្សរ៍ឆ្នាំ 1980 ប្រព័ន្ធអប់រំហ្វាំងឡង់បានផ្តោតការយកចិត្តទុកដាក់លើចំណុចមួយចំនួនដូចជា៖
– ការអប់រំត្រូវតែជាកន្លែងដែលធ្វើឱ្យមានតុល្យភាពក្នុងសង្គម មិនមែនវិសមភាពនោះទេ។
– សិស្សទាំងអស់ទទួលបានអាហារដោយឥតគិតថ្លៃសិស្សចាំបាច់ត្រូវមានចំណេះដឹងលើការរក្សាសុខភាព។
– មានកម្មវិធីប្រឹក្សាផ្នែកចិត្តសាស្ត្រក្នុងសាលា។
– មានការជំរុញ និងបណ្តុះបណ្តាលជាលក្ខណៈឯកជន មានន័យថា សិស្សម្នាក់ៗអាចទទួលបានការយកចិត្តទុកដាក់ដោយទទួលបានជំនួយលើការអភិវឌ្ឍនូវអ្វីដែលខ្លួនចង់ធ្វើ ឬគម្រោងផ្សេងៗដែលកើតចេញពីសមត្ថភាពផ្ទាល់ខ្លួន។

4. មានកិច្ចការផ្ទះតិច តែមានការងារខាងក្រៅច្រើន
យោងតាមរបាយការណ៍របស់ស្ថាប័ន ORCD បានបញ្ជាក់ថា សិស្សនៅក្នុងប្រទេសហ្វាំងឡង់ភាគច្រើនចំណាយពេលវេលាដើម្បីសិក្សាខាងក្រៅផ្ទះ ឬក្នុងសង្គមជាក់ស្តែងច្រើនជាងធ្វើកិច្ចការងារនៅក្នុងផ្ទះ។ បើប្រៀបធៀបជាមួយសិស្សទូទៅនៅលើពិភពលោក សិស្សនៅហ្វាំងឡង់ចំណាយពេលត្រឹមតែកន្លះម៉ោងប៉ុណ្ណោះជារៀងរាល់យប់ដើម្បីធ្វើកិច្ចការងារផ្ទះ។

សិស្សនៅក្នុងប្រទេសហ្វាំងឡង់ភាគច្រើនមានពេលវេលាគ្រប់គ្រាន់ដើម្បីស្វែងរក (explore) ហេតុផលពិតប្រាកដនៃអ្វីដែលគេកំពុងសិក្សា ហើយអាចអភិវឌ្ឍសមត្ថភាពរបស់ខ្លួនដោយគ្មានសម្ពាធ ខណៈពួកគេមានទាំងសម្ភារ និងការតម្រង់ទិសល្អពីគ្រូបង្រៀននៅសាលា៕

October 22, 2018

ចិននឹងជួយសាងសង់ផ្លូវក្រវាត់ក្រុងទី3 តម្លៃសរុបជាង 250លានដុល្លារ

គម្រោងសាងសង់ផ្លូវក្រវាត់ក្រុងទី3 ដែលរត់កាត់ក្នុងភូមិសាស្ត្ររាជធានីភ្នំពេញ ពីផ្លូវជាតិលេខ4 មកផ្លូវជាតិលេខ3 ផ្លូវជាតិលេខ2 និងបញ្ចប់នៅផ្លូវជាតិលេខ1 ជាជំនួយរបស់ចិនដែលមានតម្លៃសរុប259លានដុល្លារអាមេរិក គ្រោងនឹងសាងសង់នៅពេលឆាប់ៗ ខាងមុខនេះ។

មន្ត្រីជំនាញមកពីមន្ទីរសាធារណការក្រុងបានឱ្យដឹងថា តាមសេចក្ដីប្រកាសព័ត៌មាន របស់ក្រសួងសេដ្ឋកិច្ច និងហិរញ្ញវត្ថុ និងធនាគារ នីហរ័ណ អាហរ័ណចិន បានយល់ព្រមផ្តល់ឥណទានសម្បទាន ក្នុងរង្វង់ទឹកប្រាក់ប្រមាណ 259លានដុល្លារអាមេរិក ដើម្បីសាងសង់ផ្លូវក្រវាត់ក្រុងទី3 នឹងគ្រោងសាងសង់ឆាប់ៗនេះហើយដែលកិច្ចព្រមព្រៀងនេះ ត្រូវបានចុះហត្ថលេខា កាលពីថ្ងៃទី10 ខែកក្កដា ឆ្នាំ2018កន្លងមក។

លោកបានបញ្ជាក់ថា ក្រុមហ៊ុនសំណង់ សៀងហៃ ជាអ្នកទទួលខុសត្រូវក្នុងការងារសាងសង់ផ្លូវក្រវាត់ក្រុងទី3 នេះ និងដោយមានការត្រួតពិនិត្យបច្ចេកទេសពីក្រុមហ៊ុនក្វាងចូវ វ៉ាន់អានមកពីប្រទេសចិន។

គម្រោងសាងសង់ផ្លូវក្រវាត់ក្រុងទី3 មានស្ថានភាពបត់បែន បែកខ្នែងខ្វាត់ខ្វែង និងមានប្រវែងសរុប 47,6គីឡូម៉ែត្រ ជាប្រភេទផ្លូវ 4គន្លង ដែលមួយគន្លង មានទទឹង 3,50ម៉ែត្រ និងមានទទឹងតួផ្លូវសរុប 25ម៉ែត្រ។ ចំណែកផ្លូវទោចក្រយានយន្តមាន 2គន្លង មួយគន្លងមានទទឹងប្រវែង 2,25ម៉ែត្រ។

ផ្លូវនេះនឹងត្រូវសាងសង់ចាប់ពីផ្លូវជាតិលេខ4 ម្តុំអូរដឹម ត្រង់គីឡូម៉ែត្រលេខ 14+105 ទៅចំណុចបញ្ចប់ភ្ជាប់នឹងផ្លូវជាតិលេខ1 ត្រង់គីឡូម៉ែត្រលេខ 24+840 ដោយត្រូវកាត់តាមផ្លូវជាតិលេខ3 ត្រង់ចំណុចគីឡូម៉ែត្រលេខ21+200 កាត់ផ្លូវជាតិលេខ2 ត្រង់ចំណុចគីឡូម៉ែត្រ លេខ22+800និងកាត់ផ្លូវជាតិលេខ21 ត្រង់ចំណុចគីឡូម៉ែត្រលេខ 18+400 និងមានផ្លូវបែកខ្នែងប្រវែង5,375ម៉ែត្រ៕

តាមរយៈគម្រោងសាងសង់ផ្លូវក្រវាត់ទីក្រុងទី3 នេះ ជាការពង្រីកផ្លូវក្រវាត់ក្រុងថ្មី ពាក់ព័ន្ធនឹងវិស័យអចលនទ្រព្យ ដែលកំពុងតែមានកំណើនខ្លាំងក្លា ទាមទារឱ្យពង្រីកទំហំក្រុងបន្ថែមទៀត ដើម្បីពង្រីកទំហំវិនិយោគឱ្យកាន់តែច្រើន។ គេក៏រំពឹងដែរថា ផ្លូវក្រវាត់ក្រុងដ៏ធំមួយនេះ នឹងជំរុញទាំងចំនួន និងតម្លៃអចលនទ្រព្យនៅក្នុងតំបន់នោះឱ្យកើនឡើងថែមទៀត៕

October 22, 2018

សាកលវិទ្យាល័យបៀលប្រាយបង្កើតកម្មវិធីផ្តល់ឱកាសការងារដល់និស្សិតរាប់ពាន់នាក់

សាកលវិទ្យាល័យបៀលប្រាយ បានសហការជាមួយក្រុមហ៊ុនឯកជនជាច្រើនបង្កើតពិព័រណ៍ការងារនៅទីតាំងសាកលវិទ្យាល័យក្នុងរាជធានីភ្នំពេញ ដើម្បីផ្តល់ឱកាសដល់និស្សិតកម្ពុជាឱ្យទទួលបានការងារដែលខ្លួនស្រឡាញ់ពេញចិត្ត និងសម្រេចក្តីស្រមៃរបស់ខ្លួន។

លោក អ៊ីន វីរជ័យ សាកលវិទ្យាធិការរងជាន់ខ្ពស់ទទួលបន្ទុកកិច្ចការសាធារណៈនៃសាកលវិទ្យាល័យបៀលប្រាយ បានលើកឡើងថា នេះជាលើកទី5 ហើយដែលសាកលវិទ្យាល័យបៀលប្រាយបានរៀបចំពិព័រណ៍ការងារនេះឡើង ហើយក្នុងពិព័រណ៍នៅឆ្នាំនេះក្រុមហ៊ុនដែលចូលរួមមានការកើនឡើង ស្របពេលដែលនិស្សិតដែលចាប់អារម្មណ៍ក៏មានការកើនឡើងជាងឆ្នាំមុនៗផងដែរ។ នេះជាឱកាសដ៏ពិសេសមួយដែលសាកលវិទ្យាល័យបៀលប្រាយរៀបចំឡើងសម្រាប់ផ្តល់ឱកាសឱ្យនិស្សិតអាចដាក់ពាក្យធ្វើការងារដោយផ្ទាល់ជាមួយក្រុមហ៊ុនធំៗដែលនៅកម្ពុជា។

លោក អ៊ីន វីរជ័យ បានមានប្រសាសន៍ថា៖ «នៅក្នុងពិព័រណ៍ការងារឆ្នាំ 2018 នេះយើងបានរៀបចំយ៉ាងហ្មត់ចត់ ដោយនិស្សិតអាចមានឱកាសជួបផ្ទាល់ៗជាមួយតំណាងក្រុមហ៊ុនដែលជ្រើសរើសបុគ្គលិក មានរៀបចំសិក្ខាសាលាដែលមានអ្នកជំនាញចូលរួមពាក់ព័ន្ធនឹងការងារ និងមានបន្ទប់សម្ភាសការងារនៅនឹងកន្លែងផងដែរ»។

លោកសាកលវិទ្យាធិការរង បានបន្ថែមទៀតថា ការរៀបចំកម្មវិធីយ៉ាងមានសារៈសំខាន់នេះ បានឆ្លើយតបទៅនឹងតម្រូវការសំខាន់របស់និស្សិតដែលស្វែងរកការងារធ្វើ និងក្រុមហ៊ុននានាដែលកំពុងត្រូវការបុគ្គលិកផងដែរ។ ហើយជារៀងរាល់ឆ្នាំក្រុមហ៊ុននីមួយៗអាចជ្រើសរើសបុគ្គលិកបានច្រើន ដែលមានបុគ្គលិកខ្លះប្រកបដោយគុណភាព និងសមត្ថភាពខ្ពស់ ព្រោះគាត់បានជ្រើសរើសបុគ្គលិកចេញពីគ្រឹះស្ថានអប់រំតែម្តង។

គួរបញ្ជាក់ផងដែរថា ពិព័រណ៍ការងារឆ្នាំ2018 ត្រូវបានរៀបចំឡើងនៅសាកលវិទ្យាល័យបៀលប្រាយ ដោយមានការចូលរួមពីដៃគូក្រុមហ៊ុន និងសហគ្រាសល្បីៗជាច្រើន ដើម្បីផ្តល់ឱកាសដល់និស្សិត និង បុគ្គលិកសិក្សារាប់ពាន់នាក់ក្នុងការបង្កើតទំនាក់ទំនង និងសិក្សាស្វែងយល់អំពីផលិតផល សេវាកម្ម បច្ចេកវិទ្យាថ្មីៗ បទពិសោធ និងការអនុវត្តជាក់ស្តែង តាមរយៈវេទិកាបទបង្ហាញនៃវាគ្មិនល្បីៗ មកពីក្រុមហ៊ុនទាំងអស់ដែលចូលរួមក្នុងព្រឹត្តិការណ៍នៃពិព័រណ៍ការងារនេះ។ អ្វីដែលពិសេសជាងនេះទៅទៀត គឺនិស្សិតទាំងអស់នឹងទទួលបានឱកាសការងារតាមរយៈការសម្ភាសដោយផ្ទាល់នៃថ្នាក់ដឹកនាំមន្រ្តីគ្រប់គ្រងធនធានមនុស្សមកពីក្រុមហ៊ុនល្បីៗ ចំនួន 27៕

October 22, 2018

Hamilton ត្រូវរង់ចាំសម្រាប់ការឈ្នះពាន ខណៈ Raikkonen ឈ្នះការប្រណាំងនៅអាមេរិក

កីឡាករ Lewis Hamilton ត្រូវបានបង្ខំឱ្យរង់ចាំសម្រាប់ការឈ្នះពានពិភពលោកជាលើកទី5 នៅពេលដែលរូបគេបានបញ្ចប់ក្នុងចំណាត់ថ្នាក់លេខ3 ក្នុងព្រឹត្តិការណ៍ប្រណាំងរថយន្ត US Grand Prix កាលពីថ្ងៃអាទិត្យ ខណៈដែលកីឡាករ Kimi Raikkonen របស់ក្រុម Ferrari ដណ្តើមបានជ័យជម្នះជាលើកទី1ក្នុងរយៈពេលច្រើនជាង 5ឆ្នាំ។

គូប្រជែងដណ្តើមពាន Sebastian Vettel របស់ក្រុម Ferrari បានស្ថិតក្នុងចំណាត់ថ្នាក់លេខ4 ដែលមានន័យថា ការប្រជែងពានពិភពលោក នឹងត្រូវកាត់សេចក្តីក្នុងប្រទេសម៉ិកស៊ិក នៅចុងសប្តាហ៍ក្រោយជំនួសវិញ។ បច្ចុប្បន្ន Hamilton កំពុងនាំមុខលើ Vettel ចំនួន 70ពិន្ទុ ហើយស្របពេលដែលមានពិន្ទុនៅសល់ចំនួន 754ពិន្ទុទៀតដែលត្រូវដណ្តើមយកក្នុងការប្រណាំង 3លើកចុងក្រោយ រូបគេអាចឈ្នះពានពិភពលោកជាលើកទី5 តាមរយៈការបញ្ចប់ក្នុងចំណាត់ថ្នាក់លេខ7 នៅប្រទេសម៉ិកស៊ិក ប្រសិនបើ Vettel ទទួលជ័យជម្នះ។ ប្រសិនបើ Vettel មិនអាចដណ្តើមបានជ័យជម្នះទេនោះ Hamilton នឹងក្លាយជាម្ចាស់ជើងឯក។ កីឡាករ Max Verstappen របស់ក្រុម Red Bull បានបញ្ចប់ក្នុងចំណាត់ថ្នាក់លេខ2 កាលពីថ្ងៃអាទិត្យ ក្រោយពីចេញដំណើរពីលេខរៀងទី18។

Hamilton ដែលបានចាប់ផ្តើមប្រណាំងដោយចេញដំណើរពីលេខរៀងទី1 និងសម្លឹងរកការឈ្នះជាលើកទី6 របស់គេនៅលើផ្លូវ Circuit of the Americas បានឱ្យដឹងថា៖ «សូមអបអរសាទរចំពោះ Kimi និងអបអរដល់ Max ផងដែរ។ នេះគឺជាការប្រណាំងដ៏ល្អបំផុតដែលយើងអាចធ្វើបាននៅថ្ងៃនេះ ហើយវាពិតជាអស្ចារ្យណាស់ដែលយើងត្រូវតែធ្វើការប្រណាំងដ៏ស្វិតស្វាញ»។ Raikkonen ដែលការឈ្នះជាលើកចុងក្រោយរបស់គេ បានកើតឡើងក្នុងព្រឹត្តិការណ៍ Australian Grand Prix ឆ្នាំ2013 នោះ មិនបានបង្ហាញពីការរំភើបខ្លាំងឡើយ៕

ប្រភពពី៖ Channel News Asia

October 22, 2018

អ្នកគាំទ្រទស្សទាយសមត្ថភាពកុមារា ទេព ពិសិដ្ឋ ជាអ្នកលើកពានកម្មវិធី The Voice Kids Cambodia រដូវកាលទី2

កាន់តែកក្រើកនិងលេចធ្លោរនូវការបង្ហាញសមត្ថភាពច្រៀងរបស់ប្អូនប្រុស ទេព ពិសិដ្ឋ នារាត្រីថ្ងៃទី20 ខែតុលា ឆ្នាំ2018 ក្នុងកម្មវិធីប្រឡងចម្រៀងកុមារលំដាប់ថ្នាក់ពិភពលោក The Voice Kids Cambodia រដូវកាលទី2 ក្នុងវគ្គ Live Show សប្ដាហ៍ទី 1 នេះ ។

មកដល់វគ្គនេះ គេកត់សម្គាល់ឃើញថា បេក្ខភាពដែលប្រកួតប្រជែងសុទ្ធសឹងតែមានសមត្ថភាពខ្ពស់ក្នុងការបកស្រាយបទចម្រៀងក្រោមការបង្ហាត់យ៉ាងយកចិត្តទុកដាក់ពីសំណាក់គ្រូបង្វឹករៀងៗខ្លួន។ ដោយឡែកកុមារា ទេព ពិសិដ្ឋ បានឡើងមកបញ្ចេញសមត្ថភាពលើឆាក ក្នុងវគ្គ Live Show បកស្រាយចម្រៀងមួយបទក្រោមចំណងជើងថា «Sorry មួយលានដង» ដែលជាសំនៀងដើមរបស់កំពូលតារាចម្រៀង ខេមរៈ សិរីមន្ដ ធ្វើឱ្យអង្រួនអារម្មណ៍ទស្សនិកជន និងគណៈកម្មការស្លុងតាមបទចម្រៀងព្រោះតែសម្លេងដ៏ពិរោះរណ្ដំរបស់ក្មេងប្រុសម្នាក់នេះ។

កុមារមានវ័យ 14ឆ្នាំ រូបនេះ ត្រូវបានអ្នកគាំទ្រមើលឃើញពីសមត្ថភាពច្រៀងតុងខ្ពស់បានល្អ និងការរក្សាសំឡេងឱ្យនៅតែមានទឹកដមមិនប្រែប្រួល ទើបជាហេតុនាំឱ្យគ្រប់គ្នាទស្សទាយថា ក្មេងប្រុសរូបនេះ ច្បាស់ជាក្លាយជាអ្នកលើកពានរង្វាន់ The Voice Kids Cambodia រដូវកាលទី2 ជាក់ជាមិនខាន។ គួរបញ្ជាក់ផងដែរថា ទេព ពិសិដ្ឋ ជាកូនក្រុមរបស់គ្រូបង្វឹក ឱក សុគន្ធកញ្ញា និងរំពឹងថា ប្អូនទទួលបានសារគាំទ្រយ៉ាងច្រើនសន្ធឹកសន្ធាប់ពីសំណាក់មហាជនគ្រប់រូប៕

October 22, 2018

ផលិតកម្មទីក្រុងភាពយន្ដ ថោន ចេញសេចក្ដីប្រកាសបកស្រាយថតរឿងចងព្យួរសាកសពសិប្បនិមិត្តនៅកំពង់ភ្លុក បានបង្កភាពភ្ញាក់ផ្អើល

បន្ទាប់ពីមានការស្នើសុំរបស់ លោក គុជស៊ាក់ សិរីវត្ថានា ជាអាជ្ញាធរ ឃុំកំពង់ភ្លុក ស្រុកប្រាសាទបាគង ខេត្តសៀមរាប ទៅកាន់ផលិតកម្មថោន ឱ្យបញ្ជាក់ចំពោះរឿងសាកសពសិប្បនិមិត្តដែលត្រូវបានគេយកទៅចងព្យួរជាប់នឹងដើមឈើ ដែលមហាជនមានការភ្ញាក់ផ្អើល ក៏ដូចជាតក់ស្លុត និងភ័យខ្លាចយ៉ាងខ្លាំង ខណៈនេះខាងផលិតកម្មបានចេញសេចក្ដីបញ្ជាក់ និងប្រកាសថា នោះគ្រាន់តែជាការសម្ដែងភាពយន្ដតែប៉ុណ្ណោះ ។

ផលិតកម្មទីក្រុងភាពយន្ដ ថោន បានធ្វើសេចក្ដីប្រកាស និងអំពាវនាវដល់សាធារណជនទាំងអស់ កុំឱ្យមានការយល់ច្រឡំ និងមានការភ័យខ្លាចអ្វីទាំងអស់ ហើយក្រុមការងារ ក៏បានយកសាកសពសិប្បនិមិត្តទាំងនោះ មករក្សាទុកវិញអស់ហើយ បន្ទាប់ពីបានថប់ចប់សព្វគ្រប់។

ដើម្បីឱ្យកាន់តែជាក់ច្បាស់ សូមអានសាររបស់ ផលិតកម្មថោន ខាងក្រោមនេះ ៖

October 21, 2018

Category: សង្គម និងសេដ្ឋកិច្ច