Category: សង្គម និងសេដ្ឋកិច្ច

Lukaku សង្ឃឹមថា ការជួបអតីតក្រុម Everton សង្គ្រោះទម្រង់លេងរបស់គេ
ខ្សែប្រយុទ្ធ Romelu Lukaku នឹងស្ថិតក្រោមការត្រួតពិនិត្យយ៉ាងយកចិត្តទុកដា នៅពេលដែលរូបគេប៉ះជាមួយនឹងអតីតក្លិបរបស់គេ Everton នៅថ្ងៃអាទិត្យ ចុងសប្តាហ៍នេះ ដោយសម្លឹងរកចាប់ផ្តើមរដូវកាលមួយ ដែលកំពុងតែផ្តល់ការខកចិត្តដល់រូបគេ និងក្រុម Manchester United របស់គេ។
ខ្សែប្រយុទ្ធអន្តរជាតិបែលហ្ស៊ិករូបនេះ ត្រូវបានរិះគន់យ៉ាងខ្លាំង ក្រោយពីក្រុម Man United បានរងបរាជ័យក្នុងលទ្ធផល 1-0 នៅលើទឹកដីខ្លួនឯងក្រោមស្នាដៃក្រុម Juventus កាលពីពាក់កណ្តាលសប្តាហ៍នេះ ដើម្បីការមិនអាចរកគ្រាប់បាល់បញ្ចូលទីរបស់គេរហូតដល់ទៅ៨ប្រកួត។
Lukaku វ័យ 25ឆ្នាំ ដែលត្រូវបានទិញដោយក្លិប Man United ពីក្លិប Everton ក្នុងតម្លៃខ្លួន 75លានផោន (ស្មើនឹង 96លានដុល្លារអាមេរិក) កាលឆ្នាំ2017 នៅតែស្ថិតក្នុងភាពមុតស្រួចក្នុងការប្រកួតអន្តរជាតិ ក្រោយពីការស៊ុតបាល់បញ្ចូលទី5 គ្រាប់សម្រាប់ប្រទេសរបស់គេ ក្នុងការប្រកួតអន្តរជាតិ4 លើកនៅរដូវកាលនេះ។
ក្នុងដំណាក់កាលដូចគ្នានេះ កាលពីរដូវកាលមុន រូបគេបានស៊ុតបាល់បញ្ចូលទី5 គ្រាប់ ក្នុងការប្រកួត3 លើកសម្រាប់ក្រុមជម្រើសជាតិបែលហ្ស៊ិក ប៉ុន្តែរូបគេក៏បានស៊ុតបាល់បញ្ចូល 11គ្រាប់ក្នុងការបង្ហាញខ្លួន 13លើកសម្រាប់ក្លិបរបស់គេផងដែរ។ គ្រាប់បាល់របស់ Lukaku សម្រាប់ក្រុម Man Utd បានធ្លាក់ចុះគួរឲ្យកត់សម្គាល់នៅរដូវកាលនេះ ក្រោយពីរូបគេរកបានត្រឹមតែ4គ្រាប់គត់ក្នុងការប្រកួត 13លើកសម្រាប់ក្រុមរបស់លោក Jose Mourinho។
លោក Mourinho បានទទួលស្គាល់ក្រោយពីការប្រកួតជាមួយនឹងក្រុម Juventus ថា Lukaku ពិតជាធ្លាក់ចុះទម្រង់លេង ប៉ុន្តែ កាលពីថ្ងៃសុក្រ ក្នុងសន្និសីទសារព័ត៌មាននៅមុនពេលការប្រកួតរបស់លោក លោកបានលើកទឹកចិត្តឲ្យ Lukaku ស្វែងរកទម្រង់លេងដ៏ល្អរបស់គេត្រឡប់មកវិញ។ ការប្រកួតនេះនឹងចាប់ផ្តើមនៅម៉ោង 11យប់៕
ប្រភពពី៖ Channel News Asia
October 27, 2018
ស្ទង់មតិអចលនទ្រព្យកម្ពុជាឆ្នាំ2018៖ ភ្នំពេញនៅតែស្ថិតក្នុងលំដាប់កំពូល
ខណៈដែលការអភិវឌ្ឍអចលនទ្រព្យនៅរាជធានីភ្នំពេញកំពុងផ្ទុះខ្លាំង ទីតាំងសំខាន់ៗដូចជាខេត្តព្រះសីហនុ និងខេត្តសៀមរាបក៏បានបង្ហាញពីចំនួនគម្រោងអចលនទ្រព្យដែលកំពុងកើនឡើងផងដែរ ខណៈពេលដែលសេដ្ឋកិច្ចប្រទេសកម្ពុជាមានភាពរីកចម្រើន មានស្ថិរភាពនយោបាយ បានធ្វើឱ្យការវិនិយោគលើវិស័យអចលនទ្រព្យនៅកម្ពុជាកើនឡើង 20% ក្នុងឆ្នាំ2018នេះ។
ទោះជាយ៉ាងណាក៏ដោយ យោងទៅតាមការស្ទង់មតិអំពីអចលនទ្រព្យប្រចាំឆ្នាំរបស់ក្រុមហ៊ុនអចលនទ្រព្យ Realestate.com.kh បានឱ្យដឹងថា រាជធានីភ្នំពេញនៅតែមានការបញ្ជាទិញភាគច្រើនលើតម្រូវការអចលនទ្រព្យ។ នៅឆ្នាំនេះមានអតិថិជនជាង 2,000នាក់បានស្នើសុំឱ្យ Realestate.com.kh ចាត់ចំណាត់ថ្នាក់ទីក្រុង ឬខេត្តដែលអចលនទ្រព្យកំពុងផ្ទុះខ្លាំងដែលពួកគេទំនងជានឹងទិញអចលនទ្រព្យនៅទីតាំងទាំងនោះ ដោយក្នុងនោះអតិថិជន 75%បាននិយាយថា ពួកគេកំពុងទិញ និងដោះដូរអចលនទ្រព្យនៅក្នុងរាជធានីភ្នំពេញ។
លោក Tom Osullivan អគ្គនាយកក្រុមហ៊ុនគេហទំព័រ Realestate.com.kh បានមានប្រសាសន៍ឱ្យដឹងថា វិស័យអចលនទ្រព្យបានធ្វើឱ្យមានការចាប់អារម្មណ៍ច្រើន ទាំងបុរី ខុនដូ និងផ្ទះវីឡាផ្សេងៗដោយមានអតិថិជនមកទស្សនាការតាំងពិព័រណ៍ និងកក់ផ្ទះ ខុនដូ វីឡា មួយចំនួនផងដែរ។ លោកបន្តថា អនាគតវិស័យអចលនទ្រព្យរបស់ប្រទេសកម្ពុជានឹងកាន់តែរីកចម្រើនបន្តទៀត ពោលគឺមិនចាញ់ប្រទេសជិតខាងឡើយ នេះក៏ដោយសារតែក្រុមហ៊ុនអចលនទ្រព្យកំពុងមានការរីកដុះដាលឡើងច្រើន ហើយវិស័យនេះក៏មានអ្នកចាប់អារម្មណ៍វិនិយោគច្រើនផងដែរនោះ ទើបធ្វើឱ្យក្រុមហ៊ុនអចលនទ្រព្យភាគច្រើនកំពុងតែទទួលជោគជ័យខ្លាំង។
លោក Osullivan បានបញ្ជាក់បន្ថែមថា សម្ទុះនៃភាពរីកចម្រើនផ្នែកវិស័យអចលនទ្រព្យនៅកម្ពុជា បច្ចុប្បន្នមានភាពជោគជ័យច្រើន មិនថាភ្ញៀវជាតិ ឬអន្តរជាតិទេ ដោយភ្ញៀវជាតិភាគច្រើនចាប់អារម្មណ៍លើផ្ទះវីឡាច្រើន ឯភ្ញៀវបរទេសចាប់អារម្មណ៍លើខុនដូ ដោយសារតែការរចនាម៉ូដ និងស្ថិតលើទីតាំងប្រណីតគួរជាទីចាប់អារម្មណ៍ ទើបធ្វើឱ្យមានការកក់ និងទិញកើនឡើងប្រមាណ 20% ក្នុងឆ្នាំ2018នេះ។
ក្នុងការស្ទង់មតិចំពោះអ្វីដែលគួរឱ្យចាប់អារម្មណ៍បានរកឃើញថា ទោះបីជាកាលពីឆ្នាំមុនតម្រូវការអចលនទ្រព្យបានកើនឡើងនៅក្រុងព្រះសីហនុមែន តែមានតែ 9%នៃអ្នកចូលរួមការស្ទាបស្ទង់មតិប៉ុណ្ណោះដែលបាននិយាយថា ពួកគេចង់ទិញដីនៅទីនោះ។ លើសពីនេះទៅទៀតតម្រូវការអចលនទ្រព្យនៅក្នុងខេត្តដែលជាមណ្ឌលទេសចរណ៍សំខាន់ៗដូចជាខេត្តសៀមរាបវិញ បានទាក់ទាញចំណាប់អារម្មណ៍របស់អ្នកស្ទង់មតិត្រឹមតែ 5%ប៉ុណ្ណោះ។
សម្រាប់រាជធានីភ្នំពេញត្រូវបានគេមើលឃើញថា ខណ្ឌសែនសុខ គឺជាទីតាំងដែលមានតម្រូវការអចលនទ្រព្យខ្ពស់បំផុត។ 14%នៃអ្នកដែលស្វែងរកទិញអចលនទ្រព្យនៅក្នុងរដ្ឋធានី គឺចង់ទិញនៅក្នុងខណ្ឌសែនសុខ។ នេះគឺជាកំណើន 4% បើធៀបនឹងឆ្នាំមុន។ ខណ្ឌមួយទៀតដែលគេមើលឃើញពីតម្រូវការអចលនទ្រព្យកើនឡើងដែរនោះ គឺខណ្ឌពោធិ៍សែនជ័យដែលមានជាង 9% នៃអ្នកដែលមានដើមទុនកំពុងស្វែងរកទិញ។
លោក តេង រិទ្ធី ស្ថាបនិក និងជានាយកក្រុមហ៊ុនវិនិយោគអចលនទ្រព្យបានព្យាករថា និន្នាការនៃការទិញផ្ទះថ្មីនឹងមិនស្ថិតនៅក្នុងរាជធានីទៀតទេ។ លោកបានបន្ថែមថា នៅឯខេត្តផ្សេងទៀតក៏ត្រូវបានគេមើលឃើញពីកំណើននៃតម្រូវការផ្ទះសំបែងកាន់តែច្រើនដែរនៅឆ្នាំខាងមុខ ព្រោះគ្រួសារវ័យក្មេងជាច្រើនដែលចង់ទិញផ្ទះ ពួកគេចង់រស់នៅក្នុងខេត្តរបស់ពួកគេជាជាងផ្លាស់ទីមករដ្ឋធានី។
អ្នកទិញអចលនទ្រព្យសំខាន់ៗនៅតែជាប្រជាជនក្នុងស្រុក បន្ទាប់មកគឺជនជាតិបរទេសដែលមកពីប្រទេសក្នុងតំបន់អាស៊ី ដូចជាចិន វៀតណាម កូរ៉េ ថៃ សិង្ហបុរី និងតៃវ៉ាន់។ល។ លើសពីនេះទៅទៀតការចាប់អារម្មណ៍ពីសំណាក់ជនជាតិអឺរ៉ុបក៏កំពុងត្រូវបានបង្ហាញឱ្យឃើញផងដែរ។
ក្រៅពីទីតាំងសំខាន់ៗទាំង2 ខាងលើហើយនោះ ទីផ្សារអចលនទ្រព្យដែលកំពុងមានហាងឆេងខ្លាំងដែរនោះ គឺខេត្តកំពត ខេត្តកែប តំបន់ប៉ោយប៉ែត ខេត្តបាត់ដំបង និងកំពង់ចាមក៏មានតម្រូវការកើនឡើងផងដែរ។ ការស្ទង់មតិនៅឆ្នាំនេះបានបង្ហាញថា 11% នៃអ្នកទិញអចលនទ្រព្យទាំងអស់កំពុងស្វែងរកទិញនៅទីតាំងផ្សេងក្រៅពីភ្នំពេញ ក្រុងព្រះសីហនុ ឬខេត្តសៀមរាប ដែលទីតាំងអចលនទ្រព្យនៅក្នុងខេត្តផ្សេងទៀតទាំងនោះសុទ្ធតែមានសក្តានុពលគួរឱ្យចាប់អារម្មណ៍របស់គេទាំងអស់។
ព័ត៌មានដាច់ដោយឡែកមួយទៀតពាក់ព័ន្ធនឹងការកើនឡើងនៃតម្លៃអចលនទ្រព្យនៅក្នុងប្រទេសកម្ពុជានេះដែរ លោក ច្រឹក សុខនីម អគ្គនាយកក្រុមហ៊ុន Century 21 មេគង្គបានមានប្រសាសន៍ថា នៅរយៈពេល 5ឆ្នាំទៅមុខទៀត តម្លៃដីធ្លីនៅកម្ពុជានឹងកើនឡើងចន្លោះពី10 ទៅ15%ឯណោះ បើគិតជាមធ្យម ដោយសារតែកម្ពុជាជាទីតាំងមានសក្តានុពលជាងគេបង្អស់នៅក្នុងតំបន់អាស៊ី។ ដោយសារតែទីតាំងមានសក្តានុពលនេះហើយ ទើបបច្ចុប្បន្នគេសង្កេតឃើញថា អ្នកជំនួញបរទេសធំៗបានចូលមកបណ្តាក់ទុនវិនិយោគយ៉ាងច្រើនលើវិស័យអចលនទ្រព្យនេះ ដែលជាចំណែកដ៏សំខាន់ក្នុងការជួយលើកកម្ពស់សេដ្ឋកិច្ចពលរដ្ឋ និងសេដ្ឋកិច្ចជាតិ។ លើកកម្ពស់សេដ្ឋកិច្ចនៅត្រង់ថា នៅពេលដែលវិនិយោគិនបរទេសចូលមកទិញដីប្រជាពលរដ្ឋ វានឹងធ្វើឱ្យប្រជាពលរដ្ឋមានប្រាក់ និងមានលទ្ធភាពទិញផ្ទះ ឬដីបន្ថែមទៀត ដែលធ្វើឱ្យវិស័យដីធ្លីចេះតែរីកចម្រើនទៅមុខថែមទៀតជាលំដាប់។ ក្រៅពីនេះរដ្ឋាភិបាលនៅមិនទាន់កំណត់តំបន់អភិវឌ្ឍន៍នៅឡើយទេ ហើយនៅពេលដែលគម្រោងអភិវឌ្ឍន៍បែឆ្ពោះទៅទិសខាងណាមួយ តម្លៃដីនៅតំបន់នោះនឹងឡើងថ្លៃខ្លាំងតែម្តង៕
លោក ច្រឹក សុខនីម អគ្គនាយកក្រុមហ៊ុន Century 21
October 27, 2018
អាថ៌កំបាំងរក្សាសម្រស់ស្បែកមុខសម្រាប់កូនក្រមុំវ័យ25ឆ្នាំឡើង
ភាពស្រស់ស្អាតគឺជារឿងសំខាន់សម្រាប់នារីគ្រប់រូប ជាពិសេសក្រមុំៗ ដែលកំពុងត្រៀមខ្លួនក្លាយជាកូនក្រមុំ កាន់តែត្រូវការគន្លឹះក្នុងការថែរក្សាសម្រស់ខ្លាំងឡើងតែម្ដង។ ដើម្បីឱ្យខ្លួនអ្នកអាចក្លាយជាកូនក្រមុំដែលស្រស់ស្អាតបំផុតក្នុងថ្ងៃរៀបមង្គលការរបស់ខ្លួន តើអ្នកមានពេលវេលាគ្រប់គ្រាន់ក្នុងការថែរក្សាសម្រស់ស្បែកមុខហើយឬនៅ? តើស្បែកមុខរបស់អ្នកមើលទៅស្រស់ថ្លា សម៉ដ្ឋរលោងឬនៅ? អ្នកត្រូវត្រៀមខ្លួនជាស្រេចក្នុងការរៀបចំស្បែកមុខមុនថ្ងៃរៀបការចូលមកដល់ណា៎។ ពេលវេលារៀបមង្គលការរបស់អ្នកកាន់តែកៀកហើយ អ្នកមានពេលវេលាខ្លីណាស់សម្រាប់ត្រៀមខ្លួន ណាមួយត្រូវរៀបចំគម្រោងការសម្រាប់កម្មវិធីអាពាហ៍ពិពាហ៍ ចែកធៀបការ និងត្រូវទទួលបងប្អូនញាតិមិត្តមកចូលរួម និងជួយនៅក្នុងកម្មវិធីទៀត។ ដើម្បីកុំឱ្យខកខានយូរ ទស្សនាវដ្ដី ឡារ៉ែន សូមប្រាប់ពីអាថកំបាំងរក្សាសម្រស់ស្បែកមុខសម្រាប់កូនក្រមុំ ក្នុងរយៈពេល7ថ្ងៃ គឺសម្រាប់កូនក្រមុំមានវ័យ25ឆ្នាំឡើង។
ការថែរក្សាស្បែកមុខរបស់កូនក្រមុំវ័យ25ឆ្នាំឡើង
កូនក្រមុំក្នុងវ័យនីមួយៗ មានបញ្ហាស្បែកមុខខុសៗគ្នា កូនក្រមុំដែលមានអាយុនៅក្នុងអំឡុង25ឆ្នាំឡើងទៅនោះ អាចមានបញ្ហារឿងមុខមុន និងស្បែកមុខខ្លាញ់កើតឡើងភាគច្រើនដោយសារតែការផ្លាស់ប្ដូរអ័រម៉ូននៅក្នុងរាងកាយ។ នារីៗមួយចំនួនទៀត ភ្នាសស្បែកមុខ និងការលូតលាស់របស់ភ្នាសស្បែកមុខមានសភាពប្រែប្រួលខ្លាំង ក៏ជាបញ្ហាដែរ។ ស្បែកមុខដែលធ្លាប់មានសភាពតឹងណែន និងស្រស់ថ្លាបានផ្លាស់ប្រែទៅជាជ្រីវជ្រួញ និងជាំខ្មៅទៅតាមសភាពវ័យ។ ដូច្នេះហើយ នៅក្នុងផលិតផលមួយចំនួនដែលអាចជួយកម្ចាត់កោសិកាស្បែកខូច និងអាចជួយបំប៉នពង្រឹងកោសិកាស្បែកមុខ និងភ្នាសស្បែកមុខឱ្យលូតលាស់មកតឹងណែនឡើងវិញបាននោះ គឺមានបញ្ចូលនូវសារធាតុផ្សំពី AHA និង BHA ដែលវាបានជួយស្បែកមុខឱ្យស តឹងណែន ម៉ដ្ឋរលើបរលោង និងស្រស់ផូរផង់។ យ៉ាងណាមិញ អ្នកក៏មិនអាចចោលការប្រើប្រាស់ឡេការពារកម្ដៅថ្ងៃពីកាំរស្មី UV ព្រះអាទិត្យផងដែរ ព្រោះកម្ដៅថ្ងៃ និងពន្លឺអំពូលភ្លើងមួយចំនួន ដូចជា អេក្រង់កុំព្យូទ័រ ក៏បានបំផ្លាញកោសិកាស្បែកមុខ និងធ្វើឱ្យមុខជាំខ្មៅផងដែរ។ កាន់តែខ្វះមិនបានទៀតនោះគឺ ផលិតផលដែលមានផ្សំពីសារធាតុធ្វើឱ្យស្បែកមុខស ដែលអាចប្រើប្រាស់ដឹងលទ្ធផលក្នុងរយៈពេល1-2សប្ដាហ៍ ដោយមិនមានការប៉ះពាល់ចំពោះស្បែកមុខរបស់អ្នកឡើយ។ ផលិតផលនេះ អ្នកត្រូវព្យាយាមប្រើប្រាស់ឱ្យបានជាប់ជាប្រចាំ ទាំងបរិវេណស្បែកមុខ និងស្បែកក។
ការថែរក្សាស្បែកមុខ និងវិធីត្រៀមខ្លួនជាកូនក្រមុំកក្នុងរយៈពេល7ថ្ងៃ មុនពេលរៀបការ
នៅក្នុងអំឡុងពេល7ថ្ងៃ ឬមួយសបា្ដហ៍មុនពេលរៀបអាពាហ៍ពិពាហ៍ អាចចាត់ទុកថា ជារឿងសំខាន់សម្រាប់កូនក្រមុំទាំងឡាយដែលត្រូវយកចិត្តទុកដាក់ថែរក្សាស្បែកខ្លួន និងស្បែកមុខជាពិសេសតែម្ដង។ បើទោះបីជាត្រូវធ្វើតិច ឬច្រើន សម្រាប់ថែទាំសុខភាពស្បែកមុខ ដោយវិធីផ្សេងៗគ្នាទៅតាមប្រភេទស្បែក ក៏អ្នកត្រូវត្រៀមខ្លួនថែរក្សាសុខភាពស្បែកតាមរយៈគន្លឹះដូចខាងក្រោមនេះ ៖
7ថ្ងៃមុនពេលរៀបការ
ធ្វើការម៉ាសស្បែកមុខ15នាទីជាប្រចាំថ្ងៃតែបើស្បែកមុខរបស់អ្នកឡើងមុនច្រើន និងមានរន្ធរោមធំៗ ហើយមានស្លាកស្នាមច្រើនមិនងាយជាសះស្បើយ អ្នកត្រូវទៅពិភាក្សាជាមួយអ្នកជំនាញខាងស្បែក ដោយអាចនឹងត្រូវចាក់បន្ថែមវីតាមីនដល់ស្បែកមុខ និង ហ្វីលល័រ (Filler) ស្បែកមុខឱ្យមើលទៅតឹងណែន និងរលើបរលោងជាដើម។
6ថ្ងៃមុនពេលរៀបការ
សាកល្បងគូសចិញ្ចើម ឬជ្រើសរើសម៉ូដចិញ្ចើមឱ្យសមនឹងទម្រង់មុខរបស់អ្នក។ ធ្វើឡាស៊ែរកម្ចាត់រោម តែប្រសិនបើអ្នកមិនធ្លាប់ធ្វើឡាស៊ែរទេ អាចប្រើប្រាស់ផលិតផលបករោមមុខ ដោយធ្វើការម៉ាស្សាមុខ និងបករោមតូចៗចេញពីលើស្បែកមុខក៏បាន។
5ថ្ងៃមុនពេលរៀបការ
បំប៉នស្បែកមុខរបស់អ្នក ដើម្បីឱ្យស្បែកមុខឡើងសស្អាតម៉ដ្ឋរលោងនាថ្ងៃរៀបមង្គល-ការចូលមកដល់ ដោយទទួលយកនូវការចាក់វីតាមីនបំប៉នស្បែកមុខ ការធ្វើ IPL treatment រួមមាន AHA និងការអ៊ុតស្បែកមុខជាមួយកាំរស្មី LED ដើម្បីឱ្យស្បែកមុខកាន់តែរលុបស្លាកស្នាម និងសភ្លឺរលោង។
4ថ្ងៃមុនពេលរៀបការ
ប្រសិនបើមុខមានប្រតិកម្ម គឺហាមច្របាច់ កេះ ឬញេចគ្រាប់មុន ឬកន្ទួលតូចៗ ដែលមាននៅលើស្បែកមុខឱ្យសោះ ត្រូវប្រញាប់ចាក់ថ្នាំបំបាត់មុន ជាមួយគ្រូពេទ្យជំនាញជាបន្ទាន់។
3ថ្ងៃមុនពេលរៀបការ
ចំពោះការសម្អាតស្បែកមុខឱ្យស្អាតសម្រាប់កូនក្រមុំ ក៏ត្រូវតមការផាត់មុខមួយរយៈពេលសិន ដើម្បីឱ្យស្បែកមុខទទួលសារធាតុគីមីបិទបាំងពីគ្រឿងសម្អាង ហើយងាកមកព្យាយាមបំប៉នស្បែកមុខឱ្យស្រស់ស្អាតឡើងវិញ។ ពេលវេលានៅសល់តែ3ថ្ងៃមុនពេលរៀបការតែប៉ុណ្ណោះ រឿងសំខាន់ដែលអ្នកត្រូវធ្វើគឺការបណ្ដឹងស្បែកមុខ និងបំបាត់រន្ធរោម ដែលអាចនិយាយបានថា ជាគន្លឹះសំខាន់មួយសម្រាប់កូនក្រមុំ។អ្នកអាចជ្រើសរើសការបណ្ដឹងស្បែកមុខតាមបែបបុរាណ និងធម្មជាតិ ឬធ្វើម៉ាស្សាជាមួយអ្នកជំនាញក៏បាន។
2ថ្ងៃមុនពេលរៀបការ
ធ្វើម៉ាសមុខរយៈពេល30នាទីជារៀងរាល់ថ្ងៃ ដើម្បីឱ្យស្បែកមុខទន់រលោង។
1ថ្ងៃមុនពេលរៀបការ
ក្រោយបិទម៉ាសជាប្រចាំ រយៈពេល30នាទីហើយ អ្នកត្រូវលាងស្បែកមុខឱ្យស្អាត ហើយប្រើក្រែមលាបបំប៉នស្បែកមុខ ឬសេរ៉ូមសម្រាប់ជំនួយស្បែកមុខក្នុងរយៈពេល30នាទីនាពេលព្រឹក និងមុនពេលចូលគេង។ ថ្ងៃនេះអ្នកត្រូវសម្រាកឱ្យបានគ្រប់គ្រាន់ ហាមធ្វើកិច្ចការទាំងឡាយ អ្នកត្រូវឆាប់ចូលគេង ដើម្បីក្រោមនៅថ្ងៃស្អែកជាមួយនឹងទឹកមុខស្រស់ស្រាយ និងស្រស់ស្អាតបំផុត ស្វាគមន៍ថ្ងៃដ៏វិសេសរបស់អ្នក។
ថ្ងៃរៀបការមកដល់
អ្នកធ្លាប់បានដឹងហើយថា កូនក្រមុំទាំងអស់នៅពេលថ្ងៃរៀបការចូលមកដល់ ត្រូវក្រោកតាំងពីព្រលឹម ហើយរឿងដំបូងដែលអ្នកត្រូវធ្វើនោះគឺ ត្រូវកក់សក់ និងប្រើក្រែមបន្ទន់សក់ឱ្យរួចជាស្រេច។ ហើយមុនពេលជាងជំនាញចាប់ផ្ដើមធ្វើការផាត់មុខរបស់អ្នក អ្នកត្រូវប្រើប្រាស់ផលិតផលលាបការពារមុខដែលមានសារធាតុ Intensive Moisturizer ជាមុនសិន រួចសឹមលាងចេញ ហើយផ្ដើមធ្វើការផាត់មុខតាមក្រោយដើម្បីការពារស្បែកមុខរបស់អ្នក និងការពារប្រតិកម្មចាញ់គ្រឿងសម្អាង។ ការបន្ថែមភាពស្រស់ស្អាតសម្រាប់កូនក្រមុំ គឺស្ថិតនៅលើថ្វីដៃជាងជំនាញរបស់អ្នកហើយ សូមរីករាយជាមួយថ្ងៃរៀបអាពាហ៍ពិពាហ៍ដ៏មានអត្ថន័យនៅក្នុងជីវិតរបស់អ្នក៕
October 26, 2018
ជម្រើសរើសម៉ូដសម្លៀកបំពាក់កូនកំលោះសម័យថ្មី
បងៗបុរសៗ សូមពិនិត្យមើលបន្តិចមើល៎ ម៉ូដសម្លៀកបំពាក់សម្រាប់កូនកំលោះសម័យថ្មី តើម៉ូដមួយណាស័ក្តិសមនឹងរូបអ្នក? កុំឱ្យចាញ់កូនក្រមុំរបស់បងៗណា៎ សូមលេងម៉ូដសម្លៀកបំពាក់សម្រាប់ថ្ងៃដ៏មានអត្ថន័យរបស់អ្នកដូចមាននៅក្នុងទំព័រ ទស្សនាវដ្តី ឡារ៉ែន ហើយមាននៅក្នុងទំព័រនេះស្រាប់ ដើម្បីឱ្យថ្ងៃពិសេសរបស់អ្នក អ្នកអាចក្លាយជាតួឯកប្រុសដ៏ស្រស់សង្ហានៅក្នុងក្រសែភ្នែកនារីៗទាំងពួង ជាពិសេសគឺ ធ្វើឱ្យកូនក្រមុំរបស់អ្នកញញឹមពេញចិត្តនឹងរូបអ្នកតែម្តង។ រឿងអីមិនញញឹម មិនពេញចិត្ត បើកូនកំលោះសង្ហាយ៉ាងនេះនោះ សង្ហាក៏សង្ហា ទាន់សម័យក៏ទាន់សម័យ សមជាបុរសនៅក្នុងក្តីស្រមៃរបស់នារីសម័យថ្មីពិតៗ៕

October 26, 2018
អ្នកនាង ចន ច័ន្ទលក្ខិណា សម្ដែងក្ដីមិនពេញចិត្តចំពោះកម្មវិធី Miss Grand International 2018
កម្មវិធីប្រកួតបវរកញ្ញាអន្ដរជាតិ Miss Grand International 2018 បានបញ្ចប់នៅយប់ថ្ងៃទី 25 ខែតុលា ឆ្នាំ 2018 នេះ នៅប្រទេសមីយ៉ាន់ម៉ា និងបានរកឃើញម្ចាស់មកុដហើយ គឺបានទៅលើបេក្ខនារីឈ្មោះ Clara Sosa មកពីប្រទេសប៉ារ៉ាហ្គាយ។
ភ្លាមៗស្រាប់តែអ្នកនាង ចន ច័ន្ទលក្ខិណា ជាប្រធានសមាគមសិល្បៈករខ្មែរ បានបង្ហោះសារមិនពេញចិត្តជាខ្លាំងចំពោះការប្រកួតមួយនេះ ដោយអ្នកនាងបានរៀបរាប់ថា « កម្មវិធី្រឡងបវរកញ្ញា បោកប្រាស់ និង ថោកទាប Auto Vote ជាប់ Popular vote hashashas WTF Bye Bye ហើយការប្រឡងអន្តរជាតិដ៏សែនអយុត្តិធម៌ »។ សារនេះបានសម្ដែងឱ្យឃើញ អ្នកនាងពិតជាអាក់អន់ស្រពន់ចិត្តចំពោះកម្មវិធីលំដាប់លោក ដែលគ្មានភាពយុត្តិធម៌ទាល់សោះ។
នៅក្នុងនោះ ក៏គេមើលឃើញមានអ្នកលេងហ្វេសប៊ុកជាច្រើននាក់ដែលសម្ដែងក្តីមិនពេញ ចំពោះការប្រកួតនេះ និងគាំទ្រសម្ដីលោកស្រីប្រធានថា « មែនហើយបង គួរណាក៏លើកទឹកចិត្តឱ្យពានប្រជាប្រិយភាពគាត់មួយក៏អស់ចិត្ត ហើយក្រឡាចូល top10 ក៏របូតឱ្យវៀតណាមទៀត បានចូល top10 ក៏អស់ចិត្តដែរ តែលូវចប់ »។ និងមានអ្នកខ្លះទៀតបានបញ្ចេញមតិថា « យើងធ្លាក់មិនចម្លែកទេ តែកុំនាំគ្នាឡាំប៉ាជេរអ្នករៀបចំកម្មវិធីគេ។ ការមិនទទួលស្គាល់ការពិតរបស់ខ្លួន ប្រុងលើករបស់ដែលខ្វះគុណភាពគឺវានាំមកនូវភាពអាម៉ាស់យ៉ាងដូច្នេះ។ ចាញ់ទៅហើយ ចង់ឡាំប៉ាដើម្បីអ្វីទៀត? មិនសុខចិត្តរឿងអី? »៕

October 26, 2018
Arsenal ផ្តួល Sporting ខណៈ Chelsea និង Betis ឈ្នះដូចគ្នា
ខ្សែប្រយុទ្ធ Danny Welbeck បានដណ្តើមយកប្រៀបលើការធ្វេសប្រហែសក្នុងតំបន់ការពារ ដើម្បីដណ្តើមយកជ័យជម្នះក្នុងលទ្ធផល 1-០ សម្រាប់ក្រុម Arsenal នៅលើទឹកដីក្រុម Sporting Lisbon ក្នុងក្របខ័ណ្ឌ Europa League កាលពីថ្ងៃព្រហស្បតិ៍ ស្របពេលដែលក្រុមម្ចាស់ជើងឯកទ្វីបអឺរ៉ុប 7សម័យកាល AC Milan បានចាញ់លើទឹកដីខ្លួនឯង ក្រោមស្នាដៃក្រុម Real Betis។
ក្រុមកាំភ្លើងធំរបស់លោក Unai Emery បច្ចុប្បន្នបានកត់ត្រាជ័យជម្នះ 11លើកជាប់ៗគ្នា ក្នុងរាល់យុទ្ធនាការទាំងអស់ ដែលជាកំណត់ត្រាដ៏ល្អបំផុតរបស់ក្លិបនេះចាប់តាំងពីឆ្នាំ2007 ខណៈដែលជ័យជម្នះនេះ បានធ្វើឱ្យពួកគេខិតចូលកាន់តែកៀកក្នុងការឈានទៅវគ្គ 32ក្រុមចុងក្រោយនៃក្របខ័ណ្ឌ Europa League។
ស្របពេលជាមួយគ្នានេះ AC Milan របស់លោក GennaroGattuso បានបាត់បង់ពិន្ទុជាលើកទី1 របស់ពួកគេ ក្នុងពូល F ខណៈដែលគ្រាប់បាល់ស៊ុតបញ្ចូលទីពីសំណាក់ Antonio Sanabria និង Giovani Lo Celso ដែលខ្ចីជើងពីក្លិប Paris Saint-Germain មកនោះបានជួយឱ្យក្រុម Betis ដណ្តើមបានជ័យជម្នះ 2-1 ក្នុងប្រទេសអ៊ីតាលី។
ក្នុងការប្រកួត 1គូទៀតក្នុងទីក្រុងឡុងដ៍ឯណោះវិញ ខ្សែបម្រើ Ruben Loftus-Cheekបានបង្ហាញថ្វីជើងនៅថ្ងៃនៃការបង្ហាញខ្លួនក្នុងជម្រើសដំបូងដ៏កម្រសម្រាប់ក្រុមChelsea តាមរយៈការស៊ុតបាល់បញ្ចូលទី 3គ្រាប់ក្នុងពេលពួកគេដណ្តើមបានជ័យជម្នះក្នុងលទ្ធផល 3-1 លើក្រុម BATE របស់បេឡារុស ក្នុងការប្រកួតក្របខ័ណ្ឌEuropa League ស្របពេលដែលក្រុម Arsenal បន្តកំណត់ត្រាឈ្នះជាប់ៗគ្នារបស់ពួកគេរហូតដល់ទៅ 11លើកនៅលើទឹកដីក្រុម Sporting Lisbon។
Loftus-Cheek ដែលជាសមាជិកនៃក្រុមជម្រើសជាតិអង់គ្លេស ក្នុងយុទ្ធនាការWorld Cup នៅរុស្ស៊ីបានចូលលេងក្នុងជម្រើសទាំង 11នាក់ដំបូងជាលើកទី2 នៅរដូវកាលនេះក្រោមការដឹកនាំរបស់លោកMaurizio Sarri និងស៊ុតបាល់បញ្ចូលទីបាន 2គ្រាប់ក្រោយពីលេងបានត្រឹមតែ 8នាទីដំបូង ខណៈដែលChelsea បានគ្រប់គ្រងការលេងស្ទើរតែទាំងស្រុងនៅកីឡដ្ឋាន Stamford Bridge។
ខ្សែបម្រើរូបនេះ បានបំពេញគ្រាប់បាល់ទី3 របស់គេតាមរយៈការស៊ុតបាល់ពីជ្រុងម្ខាង ខាងក្រៅប្រអប់គ្រោះថ្នាក់ នៅនាទីទី54 បើទោះបីក្រុម BATE បានរកគ្រាប់បាល់ 1គ្រាប់វិញ ក្រោយពីការស៊ុតបាល់ពិន័យពីចម្ងាយរបស់កីឡាករ Aleksei Riosក៏ដោយ៕
ប្រភពពី៖ Channel News Asia
October 26, 2018
តោះជ្រើសរើសរ៉ូបកូនក្រមុំ សម្រាប់ថ្ងៃពិសេសរបស់អ្នក!
ថ្ងៃពិសេសរបស់អ្នកជិតមកដល់ហើយមែនទេ? សូមជ្រើសរើសរ៉ូបបែបសម័យថ្មីសម្រាប់ពិធីជប់លៀងនាពេលល្ងាចថ្ងៃរៀបអាពាហ៍ពិពាហ៍របស់អ្នកឱ្យរួចជាស្រេច ដើម្បីឱ្យរូបអ្នកមានភាពជឿជាក់ និងទទួលបាននូវភាពស្រស់ស្អាតដូចនៅក្នុងក្តីស្រមៃរបស់អ្នកពិតៗ។ សូមក្រឡេកមកមើលគំរូនៃម៉ូដរ៉ូបពណ៌សសម្រាប់ពិធីជប់លៀងពេលល្ងាច ដែលមាននៅក្នុងទំព័រម៉ូដសម្លៀកបំពាក់របស់ ឡារ៉ែន ហើយជ្រើសរើសម៉ូដរ៉ូបដែលអ្នកស្រឡាញ់ពេញចិត្ត សម្រាប់លេងម៉ូដនៅក្នុងថ្ងៃរៀបអាពាហ៍ពិពាហ៍របស់អ្នកនាពេលខាងមុខនេះដូចតទៅ៕

October 26, 2018
ម្ចាស់មកុដ Miss Grand International 2018 ដួលសន្លប់ភ្លាមៗ ខណៈបានឮការប្រកាសឈ្មោះ
ពិតជាភ្ញាក់ផ្អើលក្នុងព្រឹត្តិការណ៍វគ្គផ្ដាច់ព្រ័ត្រ Miss Grand International 2018 ដែលបានធ្វើឡើងនៅក្នុងប្រទេសមីយ៉ាម៉ា កាលពីយប់ថ្ងៃទី25 ខែតុលា តំណែងស្រីស្អាតបានទៅលើបេក្ខនារីមកពីប្រទេសប៉ារ៉ាហ្គាយ ខណៈដែលនាងគ្រាន់តែត្រូវបានប្រកាសថាលើកមកុដ ក៏ដួលសន្លប់តែម្ដង។
ភ្លាមៗបវរកញ្ញារូបនេះត្រូវគេមើលឃើញក្រុមការងារជួយសង្គ្រោះមួយសន្ទុះទើបអាចក្រោកឈរ ដើម្បីមកទទួលមកុដ ដែលមានអ្នកឈរត្រៀបត្រាចាំប្រគល់ឱ្យនាងបាន។ ព្រឹត្តិការណ៍ដែលបានធ្វើប្រកាសថា ការបញ្ចប់ការប្រកួតនាយប់នោះ មានបេក្ខនារីតែមួយចំនួនប៉ុណ្ណោះទទួលបានពានកិត្តិយស បន្ថែមពីលើបេក្ខនារីមកពីប្រទេស5រូបដែលបានទទួលចំណាត់ថ្នាក់លេខ5 លេខ4លេខ3 លេខ2 និងម្ចាស់មកុដ។ យោងតាមការប្រកាស បេក្ខនារីដែលទទួលបានតំណែងជា Miss Evening Gown ឬអ្នកគ្រងឈុតរាត្រីសមោសបានស្អាត បានទៅលើប្រទេសថៃ។ ម្ចាស់ពាន Best In Social Media ឬតារាដែលមានទំនាក់ទំនងល្អ បានទៅលើបេក្ខនារីមកពីប្រទេសឥណ្ឌូនេស៊ី។
គួរបញ្ជាក់ផងដែរថា បេក្ខនារីចំណាត់ថ្នាក់លេខ5 បានទៅលើបេក្ខនារីមកពីជប៉ុន លេខ4បានទៅលើបេក្ខនារីមកពីប្រទេសព័រតូរីកូ លេខ3បានទៅលើប្រទេសឥណ្ឌូនេស៊ី លេខ2បានទៅលើស្រីស្អាតមកពីឥណ្ឌា និងលេខ1ម្ចាស់មកុដបានទៅលើបេក្ខនារីមកពីប្រទេសប៉ារ៉ាហ្គាយ ដោយគ្រាន់តែពិធីករប្រកាសថានាងគឺជាអ្នកគ្រងមកុដស្រាប់តែដួលសន្លប់តែម្ដង ដោយកម្មវិធីត្រូវរង់ចាំការសម្រួលជួយសង្គ្រោះអស់រយៈពេលច្រើនម៉ោង ទើបនាងអាចដើរមកលើកពានបាន៕
https://youtu.be/MOqIIMJfYGQ
October 26, 2018
តារាស្រីម្ចាស់បទស្រៀវស្រាវ « អ៊ុយៗៗ អៈៗៗ » កំពុងល្បីលើបណ្ដាញហ្វេសប៊ុក ចេញមុខសុំទោសមហាជនទាំងឡាយ
តាមរយៈសារព័ត៌មានថៃ ដែលចេញផ្សាយមុននេះបន្ដិចបានឱ្យដឹងថា បទចម្រៀងដែលបានបង្ហាញសំនៀង និងកាយវិការស្រៀវស្រាវនៅលើបណ្ដាញសង្គមហ្វេសប៊ុក ដែលគ្រប់គ្នាបានស្ដាប់ឭថា « អ៊ុយៗៗ អៈៗៗ » នោះ ខណៈកំពុងរងការរិះគន់ពីសំណាក់មហាជនថៃយ៉ាងខ្លាំង ដោយបានលើកឡើងថា ចម្រៀងមួយបទនេះ បង្ហាញភាពអសីលធម៌ក្នុងសង្គម និងបំពានប្រពៃណីបុរាណ នៃចម្រៀងលូកធុង និង ម៉ឡាំ ដែលដូនតាថៃបានខិតខំថែរក្សាអស់រយៈពេលរាប់រយឆ្នាំ។
បទចម្រៀងនេះមានចំណងជើងថា « ครางชื่ออ้านแน » ដែលជាការបកស្រាយរបស់តារាចម្រៀងប្រុស ស៊ីចាន់ វីស៊ី ( ศรีจันทร์ วีสี ) រួមគ្នាជាមួយស្រី តា ផេននៈផា ( ต้าร์ เพ็ญนภา ) ដែលវគ្គបញ្ចប់នៃបទចម្រៀងនេះ បានបង្ហាញពីសំឡេងស្រៀវស្រាវរោលរាលយ៉ាងខ្លាំង។ ខណៈនេះដែរ តារាស្រី តា ផេននៈផា បានចេញមុខធ្វើបទសម្ភាសន៍ជាមួយអ្នកសារព័ត៌មាន និងធ្វើការសុំទោសដល់មហាជនចំពោះការមិនពេញចិត្តបទចម្រៀងមួយនេះ។ នាងថា ដំបូងឡើយដែលបានឃើញបទចម្រៀងនេះ នាងក៏មានអារម្មណ៍ថា វាមានលក្ខណៈចម្លែកហើយថ្មីបន្ដិច ទើបនាងខិតខំព្យាយាមច្រៀង និងប្រើសំឡេងឱ្យត្រូវមេឡូឌីរបស់ចម្រៀង។ តែដល់ពេលដាក់អារម្មណ៍ច្រៀង ក៏មិននឹកស្មានថា ក្លាយជារឿងរ៉ាវដ៏ក្ដៅនៅលើបណ្ដាញសង្គមបែបនេះដែរ។
តារាស្រីវ័យ 28 ឆ្នាំរូបនេះបានបញ្ជាក់ថា នាងខ្ញុំសូមលើកដៃសំពះសុំទោស ចំពោះការមិនពេញចិត្តចំពោះបទចម្រៀងនេះ ព្រោះថា នាងខ្ញុំព្យាយាមច្រៀងបទនេះ ដើម្បីកម្សាន្ដអារម្មណ៍សប្បាយរបស់អ្នកគាំទ្រ ខណៈរាំលេងតាមបទចម្រៀងតែប៉ុណ្ណោះ ពុំមានបំណងអ្វីផ្សេងនោះឡើយ។ ដោយឡែកអ្នកនិពន្ធបទនេះ ក៏បានបញ្ជាក់ដែរថា បទនេះបានសរសេរឡើងតាំងពីឆ្នាំ 2017 មកម្លេះ ដោយមើលឃើញថា អ្នកបណ្ដាញសង្គមចូលចិត្តនិយាយបង្អាប់រឿង គ្មានគូស្រករ ( អត់លិទ ) ទើបលោកនឹកឃើញសាច់រឿងនេះ លើកមកសរសេរតែប៉ុណ្ណោះ ៕
October 26, 2018
Verstappen ត្រៀមផ្តល់ការខកចិត្តដល់ Hamilton នៅម៉ិកស៊ិក ថ្ងៃអាទិត្យនេះ
កីឡាករប្រណាំងរថយន្ត Max Verstappen ត្រៀមខ្លួនរួចរាល់ក្នុងការផ្អាកពិធីជប់លៀងរបស់កីឡាករ Lewis Hamilton តាមរយៈការដណ្តើមបានជ័យជម្នះសម្រាប់ក្រុម Red Bull ក្នុងព្រឹត្តិការណ៍ Mexican Grand Prix នៅចុងសប្តាហ៍នេះ។ កីឡាករហូឡង់វ័យក្មេងរូបនេះ បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា រូបគេជឿជាក់ថា ការប្រណាំងនេះនឹងផ្តល់ឱ្យក្រុមរបស់គេនូវឱកាសដ៏ល្អបំផុតក្នុងការដណ្តើមបានជ័យជម្នះ 1ផ្សេងទៀត នៅមុនពេលបញ្ចប់រដូវកាលនេះ។
Verstappen បានឱ្យដឹងថា៖ «យើងអាចនឹងមិនបោះបង់ចោលឱកាសដ៏ល្អក្នុងការប្រកួតជម្រុះឡើយ ប៉ុន្តែ យើងកំពុងតែធ្វើការងារយ៉ាងល្អក្នុងការប្រណាំងនេះ ហេតុនេះ ខ្ញុំរំពឹងទុកថា ព្រឹត្តិការណ៍នេះនឹងមានភាពល្អប្រសើរសម្រាប់យើងជាងក្នុងការប្រណាំងនៅទីក្រុង Austin។ Lewis នៅតែចង់ឈ្នះ ប៉ុន្តែ ខ្ញុំគិតថា រឿងនោះនឹងមិនផ្លាស់ប្តូរអ្វីឡើយ»។
ប្រសិនបើ Verstappen ទទួលជ័យជម្នះ កីឡាករ Hamilton នឹងក្លាយជាម្ចាស់ជើងឯកដោយស្វ័យប្រវត្តិ ប៉ុន្តែ រូបគេនឹងស្រេកឃ្លានក្នុងការឈ្នះពានពិភពលោក តាមរយៈការឈ្នះការប្រណាំងនៅម៉ិកស៊ិក។ កីឡាករ Verstappen បានបន្ថែមទៀតថា៖ «ខ្ញុំគិតថា រថយន្តរបស់យើងល្អទាំងបច្ចេកទេស និងក្នុងស្ថានភាពឌីណាមិកអាកាស»។
1st place Lewis Hamilton (GBR) Mercedes AMG F1 W09 with 2nd place Valtteri Bottas (FIN) Mercedes AMG F1 and 3rd place Max Verstappen (NLD) Red Bull Racing RB14.
07.10.2018. Formula 1 World Championship, Rd 17, Japanese Grand Prix, Suzuka, Japan, Race Day.
– www.xpbimages.com, EMail: [email protected] – copy of publication required for printed pictures. Every used picture is fee-liable. © Copyright: Batchelor / XPB Images
Hamilton ត្រូវតែយកឈ្នះលើកីឡាករ Sebastian Vettel របស់ក្រុម Ferrari ចំនួន 5ពិន្ទុ ដើម្បីឈ្នះពានពិភពលោកជាលើកទី5 របស់គេ និងស្មើជាមួយនឹងកំណត់ត្រារបស់កីឡាករ Juan Manuel Fangio ដែលធ្វើឱ្យម្ចាស់ជើងឯកពិភពលោក 7សម័យកាល Michael Schumacher ក្លាយជាមនុស្សតែម្នាក់គត់ដែលឈ្នះពានច្រើនជាងរូបគេ។ ការប្រណាំងនៅថ្ងៃអាទិត្យនេះ នឹងចាប់ផ្តើមនៅម៉ោង2:10ទៀបភ្លឺ៕
ប្រភពពី៖ France24
October 26, 2018