Category: សង្គម និងសេដ្ឋកិច្ច

ក្រុមគ្រួសាររបស់ម្ចាស់ក្លិប Leicester ទៅកាន់កន្លែងធ្លាក់ឧទ្ធម្ភាគចក្រ
ក្រុមគ្រួសាររបស់មហាសេដ្ឋីថៃដែលជាម្ចាស់ក្លិប Leicester City ក្នុងក្របខ័ណ្ឌ Premier League បានធ្វើការឧទ្ទិសកុសលដល់រូបលោក កាលពីថ្ងៃចន្ទ នៅកន្លែងដែលឧទ្ធម្ភាគចក្ររបស់លោកបានធ្លាក់ដែលបណ្ដាលឱ្យលោកស្លាប់បាត់បង់ជីវិតភ្លាមៗនៅនឹងកន្លែង ខណៈដែលក្រុមអ្នកស៊ើបអង្កេតបានចាប់ផ្តើមត្រួតពិនិត្យទៅលើប្រអប់ខ្មៅរបស់ឧទ្ធម្ភាគចក្រមួយនេះ។
កូនប្រុស និងភរិយារបស់លោក Vichai Srivaddhanaprabha ត្រូវបានគេឃើញនៅទីនោះ បានដាក់កម្រងផ្កាដ៏ធំមួយ ស្របពេលដែលមានកម្រងផ្កាជាច្រើនផ្សេងទៀតពីអ្នកគាំទ្រ នៅខាងក្រៅកីឡដ្ឋាន ក្នុងនោះរាប់បញ្ចូលទាំងផ្កា កន្សែងបង់កកីឡាបាល់ទាត់ និងរូបតំណាងឱ្យព្រះពុទ្ធទៀតផង។ លោក Aiyawatt Srivaddhanaprabha ដែលជាកូនប្រុសរបស់លោក Vichai គឺជានាយកប្រតិបត្តិក្នុងក្រុមហ៊ុន King Power របស់ឪពុកខ្លួន ហើយក៏ជាអនុប្រធានប្រតិបត្តិរបស់ក្លិបកីឡាបាល់ទាត់ Leicester ដែលលោក Vichai បានទិញកាលពីឆ្នាំ2010 ផងដែរ។ ក្រុមអ្នកស៊ើបអង្កេតលើឧប្បត្តិហេតុខាងអាកាស ក៏បានបញ្ជាក់កាលពីថ្ងៃចន្ទផងដែរថា ពួកគេបានបើកឧបករណ៍ថតទិន្នន័យរបស់ឧទ្ធម្ភាគចក្រនោះ ដែលរងកម្តៅដ៏ក្តៅ ក្នុងពេលឧទ្ធម្ភាគចក្របានផ្ទុះឆេះ។
អង្គភាពស៊ើបអង្កេតផ្នែកឧប្បត្តិហេតុផ្លូវអាកាស Air Accidents Investigation Branch បានឱ្យដឹងក្នុងសេចក្តីថ្លែងការណ៍មួយថា៖ «នៅថ្ងៃនេះ ក្រុមត្រួតពិនិត្យរបស់យើង នឹងចាប់ផ្តើមធ្វើការពិនិត្យទៅលើឧបករណ៍ថតទិន្នន័យនោះ»។ មនុស្ស 5នាក់បានស្លាប់កាលពីថ្ងៃសៅរ៍ ក្នុងនោះរាប់បញ្ចូលទាំងបុគ្គលិក 2នាក់របស់លោក Vichai គឺនាង NursaraSuknamai និងលោក KavepornPunpareលោក Eric Swaffer ដែលជាអ្នកបើកឧទ្ធម្ភាគចក្រ និងមិត្តស្រីរបស់ខ្លួនគឺនាង Izabela RozaLechowicz ដែលក៏ជាអ្នកបើកយន្តហោះផងដែរ៕

ប្រភពពី៖ Channel News Asia
October 30, 2018
ស្លៀកពាក់បុរាណថៃ ចូលរួមពិធីបុណ្យគម្រប់ខួប 230 ឆ្នាំនៃវត្តបុរាណ វត្តពោធិ៍ជ័យ
វត្តពោធិ៍ជ័យ (ថៃ៖ วัดโพธิ์ชัย, សរសេរ៖ វ័ដពោធិ៍ជ័យ, អាន៖ វ៉ាត់.ភោ.ឆៃ) គឺជាវត្តល្បីមួយ ដែលមានទីតាំងនៅលេខ873 ផ្លូវប្រច័ក្សសិល្បាគម សង្កាត់នៃមឿង ខណ្ឌហ្នងខាយ ខេត្តហ្នងខាយ។ ជាព្រះអារាមហ្លួង ថ្នាក់ត្រី ប្រភេទសាមញ្ញ សង្កាត់និកាយមហានិកាយ។
ភ្ញៀវទេសចរជាច្រើនបានទៅលេងហ្នងខាយ កន្លងទៅនេះក៏បានឈៀងចូលទៅលេង និងថ្វាយបង្គំព្រះនៅក្នុងព្រះវិហារវត្តនេះ។ តាមប្រវត្តិឱ្យដឹងថា ពីដើមឡើយវត្តនេះមានឈ្មោះថា វត្តភីភីវ (ថៃ៖ วัดผีผิว) ដែលជាកន្លែងដុតខ្មោច ឬសព ហើយដែលក្រោយមកបានប្ដូរឈ្មោះមកជាវត្តពោធិ៍ជ័យ នេះវិញ។
អ្វីដែលសំខាន់នោះគឺថា ព្រះវិហារវត្តនេះ គឺជាទីតម្កល់ព្រះបដិមារនាម ព្រះសៃ ដ៏ល្បីល្បាញ។ ព្រះបដិមារព្រះសៃ (ថៃ៖ หลวงพ่อพระใส) នេះ ចាត់សាងឡើងដោយព្រះរាជបិតារបស់ព្រះចៅជ័យជេដ្ឋាធិរាជ ក្ស័ត្រិយ៍នៃអតីតនគរលានជាង (លាវ) រួមនិងព្រះបដិមារពីរព្រះអង្គទៀត គឺ ព្រះសុក (ថៃ៖ พระสุก) និងព្រះសើម (ថៃ៖ พระเสริม)។ ចម្បាំងរវាងប្រទេសថៃ និងលាវ ត្រូវបានថៃយកព្រះបដិមារទាំងបីមកតាំងនៅប្រទេសថៃ ហើយដែល ព្រះសុក ត្រូវបានលិចចូលក្នុងទន្លេមេគង្គ ខណៈដែលដឹកជញ្ជូនយកមកក្រុងទេព (បាងកក) ចំណែកឯព្រះសើមវិញ ក៏ត្រូវបានយកមកដាក់នៅវត្តបទុមវនារាម ឯក្រុងទេពមហានគរ។
គួរបញ្ជាក់ផងដែរថា នៅថ្ងៃទី 1 ខែវិច្ឆិកា ឆ្នាំ 2018 ក៏បានប្រារព្ធពិធីធ្វើបុណ្យគម្រប់ខួបព្រះវិហារបុរាណ វត្តពោធិ៍ជ័យ 230 ឆ្នាំ នាវេលាម៉ោង 10 ព្រឹក រហូតដល់ម៉ោង 22 យប់ ដែលតម្រូវឱ្យភ្ញៀវទេសចរស្លៀកបែបបុរាណថៃផងដែរ។ កុំភ្លេចទៅចូលរួមទាំងអស់គ្នាណា៎ !៕

October 30, 2018
ភាពយន្ដទសវត្សរ៍ឆ្នាំ 70 ជាសហផលិតកម្មកម្ពុជានិងថៃ ដ៏មានគុណភាពកំពុងរក្សាទុកក្នុងប្រទេសថៃ
តាមរយៈគណនីផេចហ្វេសប៊ុករបស់ក្រុមព្រះសូរិយា បានឱ្យដឹងថា ថ្មីៗនេះទើបតែរកឃើញខ្សែភាពយន្ត «ជីវិតផ្សងព្រេង» ដែលបានកប់បាត់រយះពេលជាង40ឆ្នាំមកហើយ ។ រឿងនេះសហផលិតកម្មកម្ពុជានិងថៃ ដែលបានផលិតនៅឆ្នាំ1970។ នៅមានភាពយន្ដមួយចំនួនទៀតរវាងប្រទេសទាំងពីរ ដែលមានគុណភាពល្អកំពុងរក្សាទុកនៅក្នុងប្រទេសថៃ។
នៅក្នុងនោះដែរ ក៏មានភាពយន្ដល្បីរន្ធឺ «ស្នេហ៍ឆ្លងវេហា» ជាភាពយន្តដែលបាត់ទៅជាង 47 ឆ្នាំមុន ដែលស្ទើរតែមិនជឿថា នៅតែរក្សាបាននៅគុណភាពល្អទាំងស្រុងនៅក្នុងប្រទេសថៃ ។ ស្នេហ៍ឆ្លងវេហា ឬ รักข้ามขอบฟ้า ជាភាពយន្តដែលផលិតឡើងពីសហផលិតកម្មកម្ពុជានិងថៃ ដែលបាននាំសម្តែងដោយ លោក ជា យុទ្ធថន និងលោកស្រី ឌី សាវ៉េត ( តារាខ្មែរ ) លោក សម្បត្តិ មេថានី និងលោកស្រី អរញ្ញយ៉ា ណាមវង្ស ( តារាថៃ ) សម្តែងរួមគ្នាដោយអមជាមួយបទចម្រៀង ស្នេហ៍ឆ្លងវេហា ដែលច្រៀងដោយ លោកតា ស៊ិនស៊ីសាមុត និង លោកស្រី ឌី សាវ៉េត ខណៈពេលចាក់បញ្ចាំងក្នុងប្រទេសកម្ពុជា ចំណែកប្រទេសថៃអមដោយបទ รักข้ามขอบฟ้า ដែលបកស្រាយដោយលោក សម្បត្តិ និងលោកស្រី អរញ្ញយ៉ា ។
យ៉ាងណាមិញ តាមការបញ្ជាក់របស់សារព័ត៌មានថៃ ឱ្យដឹងផងដែរថា ភាពយន្ដជាសហផលិតកម្មកម្ពុជានិងថៃ បានផលិតនិងសម្ដែងរួមគ្នាជាច្រើនរឿង កំពុងរក្សាបាន និងដាក់បញ្ចាំងនៅក្នុងប្រទេសថៃ ដែលមានដូចជា រឿង ពស់កេងកង , រឿង ខ្យងស័ង្ខ , រឿង ពស់កេងកង ភាគ 2 , រឿង នាងផ្តិលមាស, រឿង នាងសក់ក្រអូប , រឿង ធីតាឃ្លោកទិព្វ …ជាដើម ។ ភាពយន្ដវ័យចំណាស់របស់កម្ពុជាទាំងនេះ មានខ្លះបានបាត់បង់នៅក្នុងភ្លើងសង្គ្រាម ហើយខ្លះទៀតក៏កំពុងស្រាវជ្រាវឯកសារដើម្បីយកមករក្សា និងអភិរក្សទុកឡើងវិញ។ ភាពល្បីល្បាញនៃវប្បធម៌ភាពយន្តខ្មែរនៅលើទឹកដីប្រទេសថៃ នៅខណះដែលកម្ពុជាបានបោះជំហានយ៉ាងវែងទៅមុខលើវិស័យភាពយន្តមុនប្រទេសថៃ។ នេះអាចនិយាយបានថា ប្រទេសថៃ យកភាពយន្តខ្មែរជាគ្រូ សម្រាប់អភិវឌ្ឈភាពយន្តរបស់គេ៕
October 30, 2018
លោក ហ្វៃ សំអាង គ្រោងផលិតរឿងថ្មី 2 ទៀតបន្ដបន្ទាប់ពីរឿង «កូនពស់កេងកង»
កក្រើកទៀតហើយជាមួយស្នាដៃដ៏អស្ចារ្យរបស់កំពូលអ្នកដឹកនាំរឿង លោក ហ្វៃ សំអាង តាមរយៈរឿង «កូនពស់កេងកង» ត្រៀមចូលខ្លួនមកអង្រួនដួងចិត្តទស្សនិកជនលើកញ្ចក់ទូរទស្សន៍ហង្សមាសជាមួយការថតចំណាយដើមទុនខ្ពស់ព្រមទាំងកម្រិតបច្ចេកទេសទំនើបៗ។ រឿងភាគល្អឯកមួយនេះ ត្រូវបានទស្សនិកជនចាត់ទុកថា ជារឿងភាគដំបូងយ៉ាងពិសេសសម្រាប់លើកមុខមាត់វិស័យភាពយន្តខ្មែរឱ្យកាន់តែល្បីរន្ទឺ។
តារាច្រើនជំនាន់បានមកជួបជុំគ្នាដើម្បីសម្ពោធជាផ្លូវការរឿង«កូនពសកេងកង»ដែលចាក់បញ្ចាំងជាផ្លូវការនាស្ថានីយទូរទស្សន៍ហង្សមាសនៅថ្ងៃទី 5 ខែវិច្ឆិកា ចាប់ពីថ្ងៃចន្ទ ដល់ពុធ។ ក្នុងពិធីសម្ពោធរឿងនេះ មានវត្តមានតារាក្នុងសាច់រឿងច្រើនដួងបានចូលរួមដូចជាអ្នកដឹកនាំរឿងល្បីឈ្មោះលោក ហ្វៃ សំអាង អ្នកស្រី ប៉ុល ពិសី អ្នកនាង ចន ច័ន្ទលក្ខិណា អ្នកនាង លី ម៉ារីណា អ្នកនាង ស្វែង សុជាតា កញ្ញា តូតា កញ្ញា ឌុច លីដា កញ្ញា ម៉ៃយ៉ា លោក ញ៉ែម សុគន្ឋ លោក ម៉េង ប៊ុនឡូ ព្រមទាំងតារាកិត្តិយសជាច្រើនទៀត។ រឿង «កូនពស់កេងកង» មានចម្រៀងតាក់តែងនិពន្ធថ្មីដោយលោក ហ្វៃ សំអាង ចំនួន17បទដោយច្រៀងដោយតារាចម្រៀងហង្សមាសល្បីៗ។ លើសពីនេះ ក៏លេចឭថាស្នាដៃរបស់អ្នកដឹកនាំរឿងល្បីរូបនេះ ត្រូវបានស្ថានីយទូរទស្សន៍ថៃដ៏ល្បីមួយចង់ទាក់ទងទិញផ្តាច់មុខយកទៅបញ្ចាំងនៅស្រុកថៃ។ ប៉ុន្តែត្រូវបានលោក ហ្វៃ សំអាង ច្រានចោលក្រោយចុះសិទ្ធិប្រគល់ឱ្យហង្សមាសដាច់ មុននឹងខាងថៃទំនាក់ទំនងមក។
គួរបញ្ជាក់ផងដែរថា លោក ហ្វៃ សំអាង គ្រោងផលិតរឿងថ្មី2ទៀត ដោយលោកមិនទាន់បង្ហាញថា ជារឿងអ្វីហើយក៏នឹងបញ្ចាំងលើកញ្ចក់ទូរទស្សន៍ហង្សមាសដដែល។ រឿង«កូនពស់កេងកង»បានបង្ហាញពីសម័យកាល3មាន លង្វែក ឧដ្តុង ចតុមុខជាមួយការគ្រងសម្លៀកបំពាក់តាមប្រពៃណីខ្មែរសម័យបុរាណ ការទៅវត្តអារាម ការពូនភ្នំខ្សាច់។ អ្វីដែលសំខាន់ក៏មានការបញ្ចូលសត្វមួយចំនួនថតសម្តែងជាមួយតួដូចជាពស់ថ្លាន់ ពស់វែក តុកកែជាដើម ព្រមទាំងបញ្ចូលតួអង្គកំប្លែងល្បីៗជាច្រើនដួងចូលរួមលើកមុខមាត់ខ្សែភាពយន្តដ៏ល្អនេះ៕
October 30, 2018
តារាចម្រៀងកូរ៉េ CL លូកដៃកាន់តែជ្រៅក្នុងសិល្បៈអាមេរិក
ថ្មីៗនេះ កំពូលតារាចម្រៀង CL បានបង្ហាញខ្លួននៅក្នុងបទ “Dopeness” ដែលសម្តែងជាមួយនឹងក្រុមតន្ត្រីអាមេរិក “The Black Eyed Peas” រហូតធ្វើឱ្យអ្នកគាំទ្ររបស់នាងក្នុងប្រទេសកូរ៉េ លាន់មាត់ថា នាងកាន់តែមានមុខមាត់ខ្លាំងនៅក្នុងសិល្បៈរបស់អាមេរិកមែនទែនហើយ។
កាលពីថ្ងៃទី26 ខែតុលា ឆ្នាំ 2018 ជាថ្ងៃនៃការចេញអាល់ប៊ុមចម្រៀងដំបូងរបស់តារាស្រីរូបនេះ ជាមួយនិងសិល្បៈករអាមេរិកដ៏ល្បី។ នៅក្នុងនោះអតីតសមាជិកក្រុម 2NE1 នាង Park Bom បានបង្ហោះវីដេអូអនុសាវរីយ៍ចម្រៀងរួមជាមួយ CL និង សរសេរសារថា “Fighting! 2NE1 CL looking forward to it so much!” ដែលតារាស្រីរូបនេះពិតជាចង់ឱ្យគ្រប់ គ្នាដឹងថា អតីតមិត្តរួមក្រុម CL ពេលនេះកំពុងតស៊ូប្រយុទ្ធយ៉ាងខ្លាំងក្នុងវិថីសិល្បៈនៅពេលដែលនាងចេញសម្តែងទោលក្រោយពីរំសាយ 2NE1 ។ ការបង្ហាញវត្តមានរបស់ CL ក្នុងសិល្បៈអាមេរិកក្នុងគ្រានេះ បានធ្វើឱ្យអតីតមិត្តរួមក្រុមមានភាពស្ញប់ស្ញែងចំពោះសមត្ថភាពនាងយ៉ាងខ្លាំង។
ក្រុមអ្នកគាំទ្រពិតជារីករាយណាស់បន្ទាប់ពីបានឃើញអតីតសមាជិក 2NE1 ទាំងពីរ នៅតែបង្ហាញក្តីស្រឡាញ់ដ៏ធំធេងចំពោះគ្នាហើយពួកគេតែងតែបង្ហាញការគាំទ្រជានិច្ច ចំពោះអតីតតារាស្រី 2NE1។ គួររំឭកដែរថា នៅថ្ងៃទី20 ខែ មករា ឆ្នាំ2017 ក្រុមចម្រៀងស្រីល្បីទូទាំងពិភពលោក 2NE1 បានប្រកាសរំលាយក្រុម និងបានបញ្ចេញវីដេអូចម្រៀងចុងក្រោយ ដោយគ្មានវត្តមានរបស់សមាជិកក្រុមនាង Minzy ឡើយ ៕
October 30, 2018
រកឃើញម្ចាស់ជយលាភីរឿងខ្លីមូលនិធិក្រុមប្រឹក្សាអាជ្ញាកណ្តាល (ACF) ក្នុងមហោស្រពភាពយន្តខ្លីចតុមុខ 2018
នៅថ្ងៃទី27 ខែតុលា ឆ្នាំ2018 ក្នុងព្រឹត្តិការណ៍មហោស្រពភាពយន្តខ្លីចតុមុខ នាសាលចតុម្មុខ បានរកឃើញម្ចាស់ជយលាភីកុនខ្លីទាំង 3 រឿង និងមានការប្រគល់រង្វាន់ជូនពី មូលនិធិក្រុមប្រឹក្សាអាជ្ញាកណ្តាល (ACF) ដែលជាអង្គការគាំទ្រ ទាំងបច្ចេកទេសច្បាប់ និងហិរញ្ញវត្ថុដល់ក្រុមប្រឹក្សាអាជ្ញាកណ្តាល ក្នុងការដោះស្រាយវិវាទការងារឱ្យបានឆាប់រហ័ស និងឯករាជ្យ រួមជាមួយក្រុមភាពយន្តឈូករ័ត្នគណៈកម្មការរៀបចំការប្រកួតប្រជែងភាពយន្តខ្លី ។
ក្នុងការប្រកាសនោះមានភាពយន្តខ្លីចំនួនប្រាំបានទទួលពានរង្វាន់ក្នុងនោះមានដូចជារឿង អ្នកណាជួយខ្ញុំ ទទួលបានរង្វាន់លើកទឹកចិត្ត 60 ម៉ឺនរៀល វីដេអូស្តីពីការចូលរួមចំណែករបស់ក្រុមប្រឹក្សាអាជ្ញាកណ្តាលក្នុងវិស័យការងារកម្ពុជា ទទួលបានពានរង្វាន់លើកទឹកចិត្ត 60ម៉ឺនរៀល រឿងខឹងខុសខឹងខាត ជយលាភីលេខ3 ទទួលបាន 2លានរៀល សំឡេងវិទ្យុជ័យលាភីលេខ2 ទទួលបាន 2លាន80ម៉ឺនរៀល និងរឿងបន្ទប់ជួល ជយលាភីលេខ1 ទទួលបាន 4លានរៀល។
សូមបញ្ជាក់ថា នេះគឺជារដូវកាលទី2ហើយរបស់ មូលនិធីក្រុមប្រឹក្សាអាជ្ញាកណ្តាល ដែលមានបំណងលើកកំពស់ការយល់ដឹងដល់សាធារណជន ចំពោះយន្តការដោះស្រាយវិវាទប្រកបដោយសន្តិវិធី ដើម្បីពង្រឹងទំនាក់ទំនងវិជ្ជាជីវៈ និងរួមចំណែកដល់កំណើនសេដ្ឋកិច្ចជាតិ។ ហើយការប្រកួតប្រជែងនេះ ក៏មានការសហការណ៍ជាមួយក្រសួងការងារ និងបណ្តុះបណ្តាលវិជ្ជាជីវៈ ទីភ្នាក់ងារការអភិវឌ្ឍអន្តរជាតិរបស់សហរដ្ឋអាមេរិក (USAID) និងភ្នាក់ងារសហប្រតិបត្តិការអភិវឌ្ឍអន្តរជាតិនៃប្រេសស៊ុយអ៊ែត(SIDA) ក្រុមហ៊ុន GAP Inc. និងមូលនិធិ Levi Strauss ៕

October 30, 2018
«កូនអើយម្ដាយខ្មោច» លាន់មាត់ថា ល្អមើលខ្លាំង និងកំពុងកើបលុយពីការលក់សំបុត្រ
ខណៈបានទស្សនាភាពយន្ដខ្នាតធំរឿង«កូនអើយម្ដាយខ្មោច» មហាជនជាច្រើនលាន់មាត់ថា រឿងនេះហាក់បីដូចជាភាយន្ដល្អរបស់ផលិតកម្ម ខេមប្រូ កាលពីមុន ដែលមានដូចជា រឿង «ផ្ទះខ្មោចទិញ» រឿង « ព្រាយកណ្ទោងខៀវ» និងរឿង«ខ្មោចដើមចេកជ្វា» ជាដើម ។ មិនតែប៉ុណ្ណោះ «កូនអើយម្ដាយខ្មោច» ត្រូវបានគេអះអាងថា កំពុងកើបលុយតាមរោងតាំងពីបើកលក់សំបុត្រ។
លោក ហេង តុលា ផលិតករជើងចាស់ធ្លាប់បានធ្វើពិភពសិល្បៈទទួលស្គាល់ពីស្នាដៃរាប់មិនអស់រួចមកហើយនៅក្នុងផលិតកម្ម ខេមប្រូ ខណៈដែលលោកចូលប្រឡូកខ្លាំងក្នុងការផលិតកុនដាក់រោងភាពយន្ដធំៗ។ ស្នាដៃថ្មីរបស់លោកមួយនេះ បានធ្វើឱ្យគេនឹកដល់ស្នាដៃចាស់ៗរបស់លោក ហេង តុលា ឡើងវិញ ខណៈដែលក្រោយដឹងថា លោកគឺជាអ្នកផលិតរឿង«ផ្ទះខ្មោចទិញ» និងរឿង«ខ្មោចដើមចេកជ្វា» គឺរឹតតែធ្វើឱ្យភាពយន្តរឿង«កូនអើយម្ដាយខ្មោច»ទទួលបានការគាំទ្រ។
សូមជម្រាបថា នៅមិនដឹងថា ភាពយន្តមួយនេះ ទទួលបានផលចំណេញ ឬយ៉ាងណានោះទេ ដោយសារតែលោក ហេង តុលា ថាបានចំណាយខ្ពស់ និងថាការត្រលប់មកផលិតរឿងមួយនេះ គឺចង់ឱ្យមហាជននឹកឃើញស្នាដៃចាស់ៗរបស់លោកជាថ្មី ច្រើនជាងចង់បានផលចំណេញ។ ហើយតារាសម្ដែងក្នុងភាពយន្តនេះ ក៏ញញឹមបិទមាត់មិនជិតនោះទេ ជាពិសេសនោះគឹកញ្ញា រូហ្សា ដែលមិនធ្លាប់សម្ដែងសោះ តែបែមកបានដើរតួឯក និងក្លាយជាតារាសម្ដែងមានក្រេឌីតតែម្ដង ដោយសារតែភាពយន្តនេះកំពុងផ្ទុះនាពេលនេះ៕
October 28, 2018
ធ្លាយដំណឹង តារាកំប្លែង នាយ តាក់ស៊ី មានជំងឺធ្ងន់ និងបានទៅបួសនៅភ្នំគូលេន
តារាកំប្លែង ប្រចាំស្ថានីយទូរទស្សន៍ CTN នាយ តាក់ស៊ី បានធ្វើឱ្យទស្សនិកជន មានការងឿងឆ្ងល់យ៉ាងខ្លាំង បន្ទាប់ពីបានឃើញ នាយ តាក់ស៊ី មានរាងស្គមស្គាំង ដូចជាគ្មានកម្លាំងក្នុងខ្លួនសោះ។
នៅលើបណ្ដាញសង្គមហ្វេសប៊ុក គេមើលឃើញ នាយ តាក់ស៊ី មានជំងឺប្រចាំកាយលើសជាតិស្ករខ្លាំង បណ្ដាលឱ្យស្រកគីឡូជាច្រើន ទើបបានជាស្គមបែបនេះ។ លោកក៏បានសរសេរសារមួយឃ្លា តបទៅកាន់អ្នកគាំទ្រថា « បាទប្អូនគឺជាតិស្ករឡើងខ្លាំងពេកបានជាបងស្រកសាច់ ហើយមួយទៀតបងកោសក់ គឺបងទៅបួសនៅភ្នំគូលេនដើម្បីសងគុណឪពុកម្តាយ គឺបងអត់មានរឿងអីទេប្អូនសូមអគុណ» ។
គួរបញ្ជាក់ដែរថា ឥឡូវនេះនាយ តាក់ស៊ី ក៏កំពុងតែពិនិត្យនឹងព្យាបាលជំងឺលើសជាតិស្ករ តែលោកនូវតែមិនចោលអាជីពសិល្បៈកំប្លែងរបស់លោកនោះទេ ព្រោះលោកចង់ឱ្យទស្សនិកជនមានភាពសប្បាយរីករាយនៅពេលដែលលោកឡើងសម្ដែងម្តងៗ ។ មិនត្រឹមតែប៉ុណ្ណឹងនោះទេតារាកំប្លែង នាយ តាក់ស៊ី ក៏សូមអរគុណដល់ទស្សនិកជននិង អ្នកគាំទ្ររូបលោក ដែលបានបារម្ភពីសុខភាពរបស់លោក គាត់គ្មានតបស្នងទៅទស្សនិកជនវិញទេ ក្រៅពីចំណងដៃទស្សនីយភាព និងម្រាមដៃដប់សំពះអរគុណទៅកាន់ទស្សនិកជនប៉ុណ្ណោះ ៕
October 28, 2018
បវរកញ្ញា ឌី លីកា វិលមកកម្ពុជាទាំងស្នាមញញឹម និងមានទំនុកចិត្តខ្លាំង
ព្រឹត្តិការណ៍វគ្គផ្ដាច់ព្រ័ត្រ Miss Grand International 2018 ត្រូវបានបញ្ចប់ក្នុងប្រទេសមីយ៉ាម៉ា កាលពីយប់ថ្ងៃទី25 ខែតុលា តំណែងមកុដបវរកញ្ញាស្រីស្អាតបានទៅលើបេក្ខនារីមកពីប្រទេសប៉ារ៉ាហ្គាយ នាងមានឈ្មោះថា Clara Sosa ។ តែយ៉ាងណាមិញ បវរកញ្ញា ឌី លីកា ដែលជាបេក្ខភាពតំណាងប្រទេសកម្ពុជា ក៏បានខិតខំប្រឹងអស់ពីសមត្ថភាព និងទទួលបានកម្លាំងចិត្តពីអ្នកគាំទ្ររបស់ខ្លួនយ៉ាងភ្លូកទឹកភ្លូកដីដែរ បើទោះជានាងមិនជាប់ជយលាភីក៏ដោយ។
ផ្អែកលើគណនីហ្វេសប៊ុក Miss Grand Cambodia ប៉ុន្មានម៉ោងមុន បានបង្ហោះរូបបវរកញ្ញា ឌី លីកា បានត្រឡប់មកមាតុភូមិវិញ ដោយស្នាមញញឹមមកកាន់អ្នកគាំទ្រ ក្នុងនោះក៏មានស្វាគមន៍យ៉ាងកក់ក្ដៅពីសំណាក់ក្រុមគ្រួសារ និងអ្នកគាំទ្រផងដែរ។ នៅក្នុងផេចហ្វេសប៊ុកដដែលបានរៀបរាប់ថា «សូមស្វាគមន៍មកកាន់មាតុប្រទេសដ៏បវរនៃយើង មាតុភូមិដែលពោរពេញដោយសាមគ្គីភាព ភាតរភាព ការរួបរួម ជួយជ្រោមជ្រែងគ្នាទៅវិញទៅមក។ ទឹកដីដែលប្រកបដោយភាពរីករាយ គាំទ្រដើម្បីបុព្វហេតុខ្មែរនៅលើវេទិកាអន្តរជាតិ។ សូមថ្លែងអំណរគុណនូវភាពកក់ក្តៅ និងកម្លាំងចិត្តដ៏មហិមានៃប្រជាជនកម្ពុជា » ។
ជាមួយគ្នានោះដែរ ឌី លីកា ក៏បានថ្លែងថា « ជាថ្មីម្តងទៀត នាងខ្ញុំសូមគោរពថ្លែងអំណរគុណចំពោះការយកចិត្តទុកដាក់ពីសំណាក់ ក្រុមហ៊ុនអាកាសចរ Emirates ដែលបានយកចិត្តទុកដាក់ និងសម្រួលដល់ការធ្វើដំណើរទៅបំពេញកាតព្វកិច្ចនៃនាងខ្ញុំ។ សូមថ្លែងអំណរគុណអ្នកបង Malen , អ្នកបង Solida, ប្រធានផ្នែកគ្រប់គ្រងនៅអាកាសយានដ្ឋានអន្តរជាតិភ្នំពេញ និងសហការី , ប្រធានផ្នែកគ្រប់គ្រងនៅអាកាសយានដ្ឋានអន្តរជាតិយ៉ាងហ្គន និងសហការី ដែលអនុគ្រោះចំពោះការលើសគីឡូដល់ទៅ 20kg របស់នាងខ្ញុំទាំងទៅនិងដំណើរមកវិញ។ កុំភ្លេចណាប្រិយមិត្ត ប្រសិនមានបំណងធ្វើដំណើរទៅកាន់ទីក្រុង YANGON ឬDUBAI អ្នកនឹងទទួលបាននូវភាពរីករាយ ក៏ដូចជាផាសុកភាពនៃការធ្វើដំណើរ ជាមួយយន្តហោះដ៏ទំនើបទាន់សម័យ ម្ហូបអាហារក៏ឆ្ងាញ់ ថែមទាំងស្នាមញញឹមនិងភាពរាក់ទាក់ដ៏កក់ក្តៅពីសំណាក់ក្រុមបាហុនិកានៃក្រុមហ៊ុនអាកាសចរ Emirates »៕

October 28, 2018
តារាសម្ដែង នៅ សូនីតា កាន់តែបើកចំហរបណ្ដើរផលិតករ ទិត្យ ថាវរិទ្ធិ
លោក ទិត្យ ថាវរិទ្ធិ ដែលមហាជនជាច្រើនបានស្គាល់លោកថាជា អ្នកដឹកនាំ និងផលិតកម្មវិធីនៅទូរទស្សន៍បាយ័ន ត្រូវបានអ្នកសិល្បៈបានលើកឡើងអំពីទំនាក់ទំនងដែលអាចឈានដល់រឿងស្នេហារវាងលោក និងតារាសម្តែងស្រស់សោភា នៅ សូនីតា ។ យ៉ាងណាមិញ គេតែងប្រទះឃើញអ្នកទាំងពីរទៅណាមកណាជាមួយគ្នាជាមួយគ្នា។ ជាក់ស្ដែងថ្មីៗនេះ ក្នុងពិធីមង្គលការមួយ គេឃើញតារាសម្ដែងកញ្ញា នៅ សូនីតា និងផលិតករល្បីឈ្មោះ លោក ទិត្យ ថាវរិទ្ធិ បណ្ដើរគ្នាយ៉ាងបើកចំហរតែម្ដង បន្ទាប់ពីអ្នកទាំងពីរត្រូវបានបណ្ដាញសារព័ត៌មានក្នុងស្រុកសរសេរបានស្រឡាញ់ពេញចិត្តគ្នាជាគូស្នេហ៍។
សកម្មភាពបណ្ដើរគ្នារបស់អ្នកទាំងពីរមិនមែនជាលើកទីមួយនោះទេ ប៉ុន្តែអាចចាត់ទុកថាការបើកចំហរមួយថ្មី ដោយសារតែមានព័ត៌មានពីចង្កោមអ្នកសិល្បៈថា ស្រឡាញ់គ្នាយ៉ាងផុសផុលទៅហើយ ស្រាប់តែអ្នកទាំងពីរបណ្ដើរគ្នាជាលក្ខណៈឯកជន ក្នុងកម្មវិធីមួយចំនួន។ រាល់កម្មវិធីដែលរៀបចំដោយផលិតករប៉ុស្ដិ៍បាយ័ន លោក ទិត្យ ថាវរិទ្ធិ រមែងជ្រើសយកតារាសម្ដែង កញ្ញា នៅ សូនីតា ធ្វើជាតួឯកផង ដូចជាក្នុងព្រឹត្តិការណ៍សម្ដែងរឿងអច្ឆរិយអង្គរកាលមុនជាដើម។ យ៉ាងណាមិញ អ្នកទាំងពីរ ជាពិសេសកញ្ញា នៅ សូនីតា មិនដែលទទួលស្គាល់ថានាង និងផលិតកររូបនេះ ពិតជាស្រឡាញ់ពេញចិត្តគ្នានៅឡើយទេ បើទោះជាសកម្មភាព និងទង្វើររបស់នាង និងលោក ទិត្យ ថាវរិទ្ធិ មិនអាចគេចក្រសែភ្នែកមហាជន និងអ្នកសិល្បៈបាន។
អ្នកតាមដានជីវិតឯកជនរបស់អ្នកទាំងពីរបានសរសើរថា លោកទិត្យ ថាវរិទ្ធិ គឺជាបុរសសំណាង និងសម្បូរស្នេហ៍ ដោយសារតែលោកក្រោយមានព័ត៌មានបាក់បែកជាមួយតារាស្រីមួយចំនួន រួមទាំងអ្នកនាង លី ម៉ារីណា និង អ្នកនាង ស៊ឹម សូលីកា ស្រាប់តែមកជំពប់ព័ត៌មានស្នេហាជាមួយស្រីស្អាត នៅ សូនីតា ដែលជាតារាសិល្បៈសម្បូរបុរសមានទ្រព្យប្រជែងស្នេហ៍ តែបែរជានាងសម្រេចចិត្តទទួលយកលោកជាគូស្នេហ៍ដោយហ៊ានទាំងបណ្ដើរមិនខ្វល់ពីការតាមប្រមាញ់នោះ។ អ្នកទាំងពីរត្រូវគេអះអាងថា បើហ៊ានបើកចំហរស្នេហាដោយឈប់លក់បាំង ពិតជាគូស្នេហ៍ដែលទទួលបាននូវការសរសើរមិនអន់នោះទេ ដោយសារតែនាងក៏ជាតារាល្បី ហើយលោកទិត្យ ថាវរិទ្ធិ ក៏ជាផលិតករសម្បូរស្នាដៃ។ អ៊ីចឹងហើយទើបដំណឹងស្នេហារបស់អ្នកទាំងពីរ ប្រសិនបើគ្មានការក្លែងក្លាយមែន នោះពិតជាល្អបំផុតសម្រាប់គូស្នេហ៍មួយគូនេះ៕
October 28, 2018