តោះ!មកលេងម៉ូដសក់បែបកូនក្រមុំសម័យថ្មីម្តងមើល៎! ស្តាយល៍បែបស្អាតៗ ទាន់សម័យ ហើយសាមញ្ញទៀត មិនសាំុញ៉ាំច្រើននោះទេ តែមានភាពទាក់ទាញ់ និងស្អាតពេញចិត្តតែម្តង គឺស័ក្តិសមនឹងម៉ូដរ៉ូបកូនក្រមុំនាពេលរាត្រី ដើម្បីទទួលភ្ញៀវកិត្តិយសទាំងអស់លៀងសាយភោជន៍តែម្តង។ ដូច្នេះ អនាគតកូនក្រមុំទាំងអស់សូមត្រៀមម៉ូដសក់ ដែលអ្នកស្រឡាញ់ពេញចិត្តឱ្យហើយណា៎៕
ការជ្រើសរើសជំនាញសិក្សានៅមហាវិទ្យាល័យជារឿងសំខាន់ណាស់សម្រាប់មនុស្សម្នាក់ៗ ព្រោះវាជាជំហានឆ្ពោះទៅរកច្រកទ្វារអភិវឌ្ឍន៍ខ្លួនឯងសម្រាប់អនាគតដ៏វែងឆ្ងាយ។ ទោះជាយ៉ាងនេះក្តី មានមនុស្សមិនតិចទេដែលភ្លេចខ្លួន ឬជ្រើសរើសជំនាញខុស ដែលធ្វើឱ្យពួកគេខាតបង់ទាំងថវិកា ពេលវេលា និងមានការស្តាយក្រោយ។
ការជ្រើសរើសជំនាញខុស ជាទូទៅគេសំដៅលើការជ្រើសរើសជំនាញមិនស្របទៅនឹងចំណង់ចំណូលចិត្ត ឬមិនស្របទៅនឹងទេពកោសល្យពិតប្រាកដដែលបុគ្គលនោះមានពីកំណើត។ ហេតុនេះ អ្នកសិក្សាមិនអាចសិក្សាបានល្អ មិនពេញចិត្តជាមួយនឹងជីវិតការងារ ហើយឈានដល់ការបោះបង់ ឬទ្រាំធ្វើការងារនោះទាំងធុញថប់ ដែលធ្វើឱ្យពួកគេមិនអាចអភិវឌ្ឍខ្លួនបានល្អឡើយ។
លោក អីុន វីរជ័យ សាកលវិទ្យាធិការរងជាន់ខ្ពស់ទទួលបន្ទុកកិច្ចការសាធារណៈនៃសាកលវិទ្យាល័យបៀលប្រាយ បានលើកឡើងថា និស្សិតមួយចំនួន គាត់ជ្រើសរើសជំនាញត្រឹមត្រូវរួចទៅហើយ តែពេលដែលគាត់ធ្វើការងារផង សិក្សាផង គាត់ភ្លេចខ្លួន ហើយផ្លាស់ប្តូរគោលជំហររបស់គាត់ទៅតាមតម្រូវការការងារជាក់ស្តែងនោះក៏មាន។ការជ្រើសរើសជំនាញដោយមិនបានមើលពីចក្ខុវិស័យជីវិតវែងឆ្ងាយនេះអាចប៉ះពាល់ដល់ការអភិវឌ្ឍសមត្ថភាពការងាររបស់គាត់ ព្រោះថា ប្រសិនបើគាត់ធ្វើការងារស្របតាមការស្រឡាញ់ និងទេពកោសល្យពីធម្មជាតិ គាត់អាចមានភាពរីករាយក្នុងការធ្វើការងារនៅថ្ងៃអនាគតហើយគាត់មានហេតុផលច្បាស់លាស់ក្នុងការធ្វើការងារដោយក្តីពេញចិត្ត មិនមែនទៅធ្វើការងារឱ្យចប់តែម៉ោងនោះទេ។ ម្យ៉ាងវិញទៀត នៅពេលពួកគាត់ធ្វើការងារដោយក្តីពេញចិត្ត គាត់អាចមានឱកាស និងគំនិតអភិវឌ្ឍន៍ជាច្រើនដែលអាចធ្វើឱ្យមានលក្ខណៈកាន់តែប្រសើរឡើង ហើយឈានទៅរកកន្លែងកាន់តែប្រសើរឡើងជាលំដាប់។
លោក អីុន វីរជ័យ បានមានប្រសាសន៍ថា៖ “មាននិស្សិតខ្លះជ្រើសរើសជំនាញសិក្សាតាមស្ថានភាពជាក់ស្តែងដែលគាត់កំពុងជួបប្រទះ។ អ្នកខ្លះជ្រើសរើសជំនាញរដ្ឋបាល ព្រោះគាត់កំពុងធ្វើការងាររដ្ឋបាលឱ្យគេនៅក្នុងក្រុមហ៊ុនមួយ តែទេពកោសល្យពិតប្រាកដរបស់គាត់ជាវិស្វករ។ ហេតុនេះដំណាក់កាលនេះធ្វើឱ្យគាត់បាត់បង់ឱកាសសម្រេចក្តីស្រមៃរបស់ខ្លួន”។
លោកសាស្ត្រាចារ្យខាងលើបានលើកឡើងផងដែរថា ដើម្បីបញ្ចៀសខ្លួនពីការសម្រេចចិត្តខុស ឬសម្រេចចិត្តត្រឹមត្រូវហើយផ្លាស់ប្តូរទៅរកជម្រើសខុសវិញនោះ និស្សិតចាំបាច់ត្រូវស្វែងរកក្តីស្រមៃរបស់ខ្លួនឱ្យឃើញពិតប្រាកដ ព្រោះនៅពេលពួកគាត់ដឹងថា ជីវិតគាត់ត្រូវដើរទៅគោលដៅណា នោះគាត់នឹងមិនអាចភ្លេចខ្លួនបានទេ។ ម្យ៉ាងវិញទៀត បើទោះបីជានិស្សិតអាចភ្លេចខ្លួនមួយរយៈ និងសម្រេចចិត្តខុសក៏ដោយ ក៏ថ្ងៃណាមួយគាត់អាចនឹងនឹកឃើញពីក្តីស្រមៃរបស់គាត់ដដែល ដែលធ្វើឱ្យគាត់ត្រូវតែផ្លាស់ប្តូរខ្លួនចេញពីកន្លែងដែលគាត់កំពុងស្ថិតនៅ ហើយសិក្សាបន្ថែម ឬឈោងចាប់ចំណុចខ្ពស់ពិតប្រាកដដែលគាត់បានកំណត់ទុកនៅក្នុងជីវិត។
ស្របជាមួយគ្នានេះដែរ លោក សោម ច័ន្ទសុធា សហស្ថាបនិកក្រុមយុវជនដែលធ្វើការងារស្រាវជ្រាវពីការអប់រំ បានលើកឡើងថា និស្សិតមិនតិចទេដែលជ្រើសរើសជំនាញខុស ព្រោះពេលគាត់ចាប់ផ្តើមជ្រើសរើសជំនាញគាត់ស្តាប់សំឡេងខាងក្រៅច្រើនជាងសំឡេងក្នុងខ្លួនរបស់គាត់ផ្ទាល់។ និស្សិតខ្លះស្តាប់រៀមច្បងដែលបានចេញធ្វើការងារទទួលលទ្ធផលល្អ ហើយក៏សម្រេចចិត្តជ្រើសរើសជំនាញតាមគេ និស្សិតខ្លះទៀតបារម្ភពីទីផ្សារការងារជ្រុល ហើយសម្រេចចិត្តជ្រើសរើសមុខវិជ្ជាណាដែលគាត់គិតថា ងាយស្រួលរកការងារធ្វើ បើទោះបីជាគាត់មិនស្រឡាញ់ក៏ដោយ។ មាននិស្សិតខ្លះទៀតទទួលយោបល់គេច្រើនពេក រហូតភ្លេចគិតពីការស្រឡាញ់របស់ខ្លួន បន្ទាប់មកធ្វើឱ្យគាត់សម្រេចចិត្តតាមរយៈការមើលឃើញតែខាងក្រៅ ដែលធ្វើឱ្យគាត់ស្តាយក្រោយ នៅពេលគាត់មិនទទួលបានលទ្ធផលល្អក្នុងការសិក្សា ហើយលំបាកស្វែងរកការងារធ្វើ។ ផ្ទុយមកវិញ មាននិស្សិតមិនច្រើនទេដែលជម្នះអ្វីគ្រប់យ៉ាងដើម្បីសម្រេចក្តីស្រមៃរបស់ខ្លួន ដោយអ្នកខ្លះថែមទាំងជំទាស់ជាមួយគំនិតអាណាព្យាបាលរហូតសម្រេចជោគជ័យក្នុងអាជីពរបស់គេផងក៏មាន។ ទោះជាយ៉ាងនេះក្តី អ្នកជ្រើសរើសជំនាញខុស ក៏មិនប្រាកដថាហួសពេលមួយជីវិតនោះដែរ ព្រោះជីវិតសិក្សាក្នុងមហាវិទ្យាល័យមានរយៈពេលត្រឹមតែ 4-5ឆ្នាំប៉ុណ្ណោះ តែស្ថានភាពជាក់ស្តែងយើងត្រូវប្រើចំណេះដឹងពេញមួយជីវិត ហេតុនេះគ្មានទេពាក្យថា ហួសពេលសម្រាប់អ្នកចង់សម្រេចក្តីស្រមៃរបស់ខ្លួននោះ។
លោក សោម ច័ន្ទសុធា បាននិយាយថា៖ “មានវិធីជាច្រើនដែលនិស្សិតអាចស្តារស្ថានការណ៍បានក្រោយពេលជ្រើសរើសជំនាញខុស។ អ្នកខ្លះដឹងខ្លួនទាន់ ពេលគាត់កំពុងសិក្សាមហាវិទ្យាល័យ គាត់អាចផ្លាស់ប្តូរជំនាញបាន ស្របពេលដែលអ្នកខ្លះទៀតសុខចិត្តផ្លាស់ប្តូរជំនាញ បើទោះបីជាខាតឆ្នាំក៏ដោយ តែសម្រាប់អ្នកសិក្សាចប់ហើយ គាត់ក៏អាចនៅតែមានជម្រើសផ្លាស់ប្តូរជីវិតឱ្យប្រសើរឡើងបានដែរ”។
លោក សុធា បន្ថែមថា សម្រាប់អ្នករៀនចប់ហើយស្តាយក្រោយ មានច្រើនគួរសមដែរនៅក្នុងសង្គមយើង តែបើទោះបីជាស្តាយក្រោយ ក៏គ្មានបានលទ្ធផលអ្វីមកវិញដែរ ហេតុនេះអ្វីដែលត្រូវធ្វើ គឺព្យាយាមស្តារស្ថានការណ៍ឱ្យល្អប្រសើរឡើងវិញទើបជារឿងល្អ។ ជម្រើសទីមួយ យកចំណេះដឹងដែលគាត់បានបញ្ចប់ការសិក្សាថ្នាក់បរិញ្ញាបត្រនោះទៅធ្វើការងារដើម្បីស្វែងរកចំណូល ហើយត្រឡប់ចូលសាលាម្តងទៀតដើម្បីរៀនជំនាញដែលគាត់ស្រឡាញ់។ ប្រសិនបើគាត់សម្រេចចិត្តបែបនេះ គាត់អាចទ្រាំលំបាកតែ 2-3ឆ្នាំ តែគាត់អាចរីករាយបានយូរអង្វែង។ ចំពោះជម្រើសមួយផ្សេងទៀត គឺសិក្សាពេលកំពុងធ្វើការងារ គ្រាន់តែជម្រើសនេះវាទាមទារឱ្យគាត់អត់ធ្មត់បន្តិច។ មានមនុស្សមួយចំនួនគាត់សម្រេចចិត្តបោះបង់មុខវិជ្ជាដែលគាត់សិក្សានោះចោល ហើយចាប់យកការងារក្នុងក្តីស្រមៃ បើទោះបីជាគាត់ទទួលបានមុខតំណែងតូចក៏ដោយ។ នៅពេលគាត់ធ្វើការងារ គាត់ចាំបាច់ត្រូវស្វែងរកចំណេះដឹងបន្ថែមដើម្បីអភិវឌ្ឍជាប់ជានិច្ច ព្រោះជាធម្មតា បើទោះបីជាការងារបង្រៀនមនុស្សក៏ដោយ តែអ្នកធ្វើការងារក៏ចាំបាច់ត្រូវតែមានក្បួនខ្នាតត្រឹមត្រូវដែរ ហេតុនេះការស្វែងរកវគ្គខ្លីៗដើម្បីបំពេញចំណុចខ្វះខាតក៏អាចធ្វើឱ្យគាត់សម្រេចក្តីស្រមៃបានដូចគ្នាដែរ។ ពេលខ្លះគាត់អាចអភិវឌ្ឍខ្លួនក្លាយជាអ្នកគ្រប់គ្រងល្អថែមទៀតផង ព្រោះគាត់បានរៀនលម្អិតពីការងារជាក់ស្តែងតាំងពីតំណែងតូចបំផុត រហូតដល់តំណែងខ្ពស់។ ហេតុនេះ ចំពោះអ្នកជ្រើសរើសជំនាញខុសហើយ ចូរកុំអស់សង្ឃឹម នៅមានវិធីជាច្រើនដែលអាចធ្វើឱ្យអ្នកសម្រេចក្តីស្រមៃបាន ប្រសិនបើអ្នកពិតជាមានការតស៊ូពិតប្រាកដមែននោះ៕
ក្នុងពិធីបិទមហោស្រពភាពយន្ដខ្លីចតុមុខ នៅថ្ងៃទី 30 ខែតុលា ឆ្នាំ 2018 នេះ បានរកឃើញម្ចាស់ជយលាភីរឿងខ្លីដែលល្អឯក និងមានគុណភាពប្រចាំឆ្នាំ 2018 នេះហើយ ដោយមានការសម្រេចចិត្តបោះឆ្នោតពីសំណាក់មហាជនអ្នកទស្សនា និងការវិនិច្ឆ័យយ៉ាងយុត្តិធម៌ពីសំណាក់គណៈកម្មការបីរូបដូចជា លោក លោក ជៀប សុវិជ្ជា ប្រធាន CFC និងជាគណៈកម្មការផ្តល់ពិន្ទុភាពយន្តដែលដាក់ប្រកួតនៅក្នុងមហោស្រពភាពយន្តខ្លីចតុមុខ និង លោក ភិជិត រិទ្ធា ផលិតករឯករាជ្យ ព្រមទាំង កញ្ញា អាត សុធាវី គណៈកម្មការមានបទពិសោធន៏ជាច្រើនឆ្នាំក្នុងវិស័យភាពយន្ត។
ភាពយន្តខ្លីទាំង 6 ចំណងជើងជាជម្រើសភាពយន្តប្រចាំឆ្នាំ 2018 ដែលទទួលបានការគាំទ្រលើសគេ ជាពិសេសគឺភាពយន្តផលិតដោយយុវវ័យជំនាន់ថ្មីមានអាយុមិនលើស 30ឆ្នាំឡើយ ហើយក៏ជាផលិតករវ័យក្មេងកំពុងជំរុញឱ្យវិស័យភាពយន្តខ្មែរមានសន្ទុះទៅមុខ។ យ៉ាងណាមិញ ខណៈប្រកាសលទ្ធផលនារាត្រីថ្ងៃម្សិលមិញនេះ មហាជនជាច្រើនមានសភាពបុកពោះ ញាប់ញ័រដៃជើង និងរន្ធត់នៅក្នុងអារម្មណ៍ជាខ្លាំង ទាំងក៏សប្បាយរីករាយបំផុត ខណៈដែលពិធីករទាំងពីររូបបានប្រកាសថា រឿង « ខ្យល់ខែកុម្ភៈ » ជាម្ចាស់ពានរង្វាន់ជយលាភីសម្រាប់មហោស្រពភាពយន្ដខ្លីលើកទី 7 នេះ។
យុវផលិតករ មុនី កណ្ណដារង្គ ជាអ្នកដឹកនាំរឿង « ខ្យល់ខែកុម្ភៈ » បានថ្លែងប្រាប់ថា លោកពិតជាមានក្ដីរំភើបក្រៃលែង ដែលភាពយន្ដខ្លីរបស់លោកបានជាប់ជាជយលាភីនៅក្នុងរាត្រីនេះ ហើយក៏នឹកស្មានមិនដល់ថា មានការគាំទ្រយ៉ាងពេញទំហឹងបែបនេះសោះ។ អ្នកដឹកនាំវ័យ 28 ឆ្នាំរូបនេះ ក៏បានលើកឡើងដែរថា ការដែលលោកសម្រេចចិត្តយករឿងខ្លីរបស់លោកមកដាក់ប្រកួតនៅក្នុងមហោសព្រភាពយន្ដខ្លីចតុមុខនេះ គឺលោកមានគោលបំណងចង់ឱ្យរឿងលោកបានបញ្ចាំងនៅលើផ្ទាំងសំពត់សគ្រប់រោងកុន ដែលជាទូទៅមានតែរឿងកុនធំៗប៉ុណ្ណោះ ទើបបានបញ្ចាំងនៅលើផ្ទាំងសំពត់សបែបនេះ ។
លោកបន្ដបញ្ជាក់ដែរថា មហោស្រពភាពយន្ដខ្លីចតុមុខ ពិតជាបានសាងឱកាសឱ្យកូនខ្មែរជំនាន់ក្រោយ មានឱកាសក្លាយជាផលិតករវ័យក្មេង និងជំរុញឱ្យវិស័យភាពយន្ដខ្មែរកាន់តែមានគុណភាព និងរីកចម្រើនបន្ដទៅមុខ។ លោកពិតជាអរគុណចំពោះការគាំទ្រពីសំណាក់មហាជនទាំងអស់ និងគណៈកម្មការកិត្តិយសទាំងបី ដែលមានធ្វើឱ្យលោកបានសម្រេចក្ដីបំណងដ៏វិសេសវិសាលមួយនេះ៕
និន្នាការនៃការប្រើប្រាស់បណ្តាញអុីនធើណិតនៅកម្ពុជាមានការកើនឡើងខ្លាំងក្នុងរយៈពេលជាងមួយទសវត្សរ៍ចុងក្រោយនេះ ប៉ុន្តែយុវជនមួយចំនួនមិនបានប្រើប្រាស់សម្រាប់ជាប្រយោជន៍នោះទេ ពោលគឺបានត្រឹមប្រើប្រាស់សម្រាប់ការកម្សាន្តទៅវិញ ដែលនេះជាកត្តាធ្វើឱ្យខាតបង់ពេលវេលា និងការចំណាយថវិកាខុសគោលដៅជាដើម។
លោកបណ្ឌិត ឡាយ សុខហេង សាស្ត្រាចារ្យសាកលវិទ្យាល័យភូមិន្ទភ្នំពេញមានប្រសាសន៍ថា យោងតាមគំនូសដ្យាក្រាមបង្ហាញថា ការប្រើប្រាស់ប្រព័ន្ធអុីនធើណិតនៅកម្ពុជា ភាគច្រើននៅក្នុងស្រទាប់យុវវ័យ និងបុគ្គលិកបំពេញការងារតាមស្ថាប័ននានា ចំណែកមនុស្សដែលមានវ័យចំណាស់មិនសូវមានចំណាប់អារម្មណ៍ក្នុងការប្រើប្រាស់បណ្តាញអុីនធើណិតនេះប៉ុន្មានទេ។
លោកថា ការប្រើបណ្តាញអុីនធើណិតអាចទទួលបានគុណសម្បត្តិ និងគុណវិបត្តិត្រឡប់មកវិញដូចគ្នា ប្រសិនបើយើងមិនបានប្រើប្រាស់ដោយយកចិត្តទុកដាក់ទេនោះ។ ការប្រើប្រាស់ឱ្យកើតជាគុណប្រយោជន៍ គឺស្ថិតនៅត្រង់ថាបណ្តាញអុីនធើណិតត្រូវបានគេប្រើប្រាស់សម្រាប់ធ្វើការស្រាវជ្រាវប្រភពព័ត៌មានផ្សេងៗ ពិសេសព័ត៌មានសេដ្ឋកិច្ចដែលអាចឱ្យយើងសម្រេចចិត្តមុននឹងចាប់ផ្តើមធ្វើអាជីវកម្មណាមួយ។ សម្រាប់និស្សិត ឬសិស្សវិញ ពួកគាត់អាចប្រើប្រាស់ដើម្បីស្រាវជ្រាវឯកសារបន្ថែមលើមេរៀនរបស់ខ្លួន កសិករអាចមើលតម្រូវការទីផ្សារ មុននឹងសម្រេចចិត្តប្រកបរបរដាំដុះដំណាំណាមួយដើម្បីឱ្យច្បាស់ថាក្រោយពេលប្រមូលកសិផលរួច នឹងមានតម្រូវការប្រើប្រាស់ច្រើន។
ទន្ទឹមនឹងនេះ បើសិនជាយើងមិនបានប្រុងប្រយ័ត្នទេនោះ បណ្តាញអុីនធើណិតនឹងផ្តល់ជាគុណវិបត្តិមកយើងវិញដូចគ្នា។ ឧទាហរណ៍ថា នៅពេលឃើញព័ត៌មានសេដ្ឋកិច្ចណាមួយហើយ យើងមិនបានស្រាវជ្រាវបន្ថែមឱ្យបានច្បាស់ទាក់ទងទៅនឹងប្រភព ឬស្ថាប័នអ្នកសរសេរព័ត៌មាននោះវាជាហេតុធ្វើឱ្យយើងមិនដឹងថា តើព័ត៌មាននោះអាចគួរឱ្យទុកចិត្តបានកម្រិតណា មុននឹងយកមកពិចារណាធ្វើការវិភាគដោយខ្លួនឯងបន្ថែម។ ប្រសិនបើគ្រាន់តែឃើញព័ត៌មានហើយមិនបានវិភាគឱ្យបានច្បាស់ វាធ្វើឱ្យយើងអាចសម្រេចចិត្តខុស នាំឱ្យខាតបង់ថវិកាក្នុងការធ្វើកិច្ចការអ្វីមួយនោះបាន។ ដោយឡែកសម្រាប់យុវជន បើសិនជាគាត់មើលពីព័ត៌មានសិក្សា ព័ត៌មានរកការងារ គឺជារឿងល្អប្រសើរណាស់ ប៉ុន្តែបើគាត់បែរជាបើកមើលរឿងដែលមិនល្អ រឿងអាសអាភាសផ្សេងៗជាដើមវិញនោះ វានឹងជះឥទ្ធិពលមិនល្អដល់សីលធម៌សង្គម នាំយកឥទ្ធិពលខាងក្រៅដែលមិនល្អនោះមកបង្កជាបញ្ហាក្នុងសង្គមជាតិ។ ជួនកាលបង្ហោះរូបមិនល្អរបស់បុគ្គលណាម្នាក់ នាំឱ្យប៉ះពាល់ដល់កិត្តិយស និងកេរ្តិ៍ឈ្មោះរបស់គេធ្ងន់ធ្ងរ រហូតដល់មានការប្ដឹងផ្ដល់គ្នា ឬបើរឿងនោះជាការពិតវិញ អាចធ្វើឱ្យបុគ្គលម្នាក់នោះលែងហ៊ានដើរចេញជួបមហាជនខាងក្រៅក៏មាន។
លោកបន្តថា នៅប្រទេសមួយចំនួន រដ្ឋាភិបាលរបស់គេហាមឃាត់ដល់ក្រុមហ៊ុនផ្តល់សេវាកម្មអុីនធើណិតមិនឱ្យបង្ហោះរឿងអាសអាភាសនោះទេ ព្រោះថា យុវវ័យតែងមានការភ្លើតភ្លើន មិនចេះពិចារណា បណ្ដាលឱ្យទៅបង្កផលអាក្រក់នៅក្នុងសង្គម ឬមានគំនិតអវិជ្ជមានផ្សេងៗក៏មាន។ ករណីនេះលោកស្នើចង់ឱ្យរដ្ឋាភិបាលគិតគូរអំពីផលប៉ះពាល់លើការប្រើប្រាស់បណ្តាញអុីនធើណិតនេះ និងបើសិនមានច្បាប់ហាមឃាត់ការបង្ហោះរូបអាសអាភាសក៏ជាការប្រសើរផងដែរ ដែលការណ៍នេះជាចំណែកនៃការលើកកម្ពស់សីលធម៌សង្គមឱ្យកាន់ល្អប្រសើរឡើង។
តាមរបាយការណ៍របស់ក្រសួងប្រៃសណីយ៍ និងទូរគមនាគមន៍បានបង្ហាញថា ក្នុងរយៈពេល8ខែនៃឆ្នាំ2018នេះ ចំនួនអ្នកប្រើប្រាស់អុីនធើណិតកើនឡើងជាង 12លាននាក់ ក្នុងចំណោមប្រជាជនខ្មែរជាង15លាននាក់ដែលធ្វើឱ្យទីផ្សារវិស័យនេះរីកធំទូលាយ និងបានរាលដាលទៅដល់តំបន់ជនបទដាច់ស្រយាល ជួយដល់ការតភ្ជាប់ទំនាក់ទំនងការងារការពង្រីកសេវាអាជីកម្ម និងការសិក្សាស្រាវជ្រាវផងដែរ។
និន្នាការនៃការកើនឡើងនៃចំនួនអ្នកប្រើប្រាស់បណ្តាញសង្គមជាពិសេស Facebook បានជំរុញឱ្យការប្រើប្រាស់ប្រព័ន្ធអុីនធើណិតកើនឡើងខ្លាំងផងដែរ ខណៈការពង្រីកបណ្តាញខ្សែកាប្លិ៍អុបទិកក្រោមបាតសមុទ្រ និងការពង្រីកបណ្តាញសេវាក្រុមហ៊ុនឯកជននានា កាន់តែមានវិសាលភាពធំឡើងៗពីមួយឆ្នាំទៅមួយឆ្នាំ។
គួរបញ្ជាក់ផងដែរថា នៅកម្ពុជាការប្រើប្រាស់បណ្តាញអុីនធើណិតជាមធ្យមកើនឡើងប្រមាណពី20% ទៅ25%ក្នុងឆ្នាំៗ ដែលត្រូវបានគេរំពឹងថាចំនួនអ្នកប្រើប្រាស់អុីនធើណិតនឹងកើនឡើងប្រមាណជិត 13លាននាក់នៅចុងឆ្នាំ2018៕
នេះចាត់ទុកថាមានរាសីឡើងខ្ពស់ត្រដែត ទើបលោក ជ័យ សុវ៉ាត ទទួលបានការចាប់អារម្មណ៍ខ្លាំងជាមួយនឹងបទ«តួចិត្តអាក្រក់»ក្រោយការបង្ហោះភ្លាមតារាចម្រៀងរបស់ផលិតកម្មសាន់ដេរូបនេះ ទទួលបានការកោតសរសើពីសំណាក់មហាជនជាច្រើននាក់ ជាពិសេសត្រង់ចំនុចរួមបញ្ចូលល្ខោនខោលខ្មែរតែម្ដង។
បទចម្រៀងថ្មីរបស់លោកត្រូវបានគេសរសើរមិនដាច់ពីមាត់ថា ជាបទនិពន្ធថ្មីដែលមានពីរោះទាំងសាច់ភ្លេង អត្ថន័យ ដោយចម្រៀងមួយបទនេះ ក៏ត្រូវនឹងសំឡេងរបស់លោក ហើយអ្វីដែលពិសេសគឺសាច់រឿងMV ជាការដកស្រង់ចេញពីវគ្គមួយក្នុងល្ខោនខោលរឿងរាមកេរ្តិ៍ ដែលតម្រូវឱ្យលោកហ្វឹកហាត់ខ្លួនឯងក្នុងការសម្ដែង។ ម្នាក់ៗបានហៅបទ«តួចិត្តអាក្រក់»របស់លោកថា ជាបទចាក់ដោតអារម្មណ៍អ្នកស្ដាប់ភាគច្រើន ជាពិសេសគឺការផលិតសាច់រឿងដោយបំផុសគំនិតស្រឡាញ់វប្បធម៌ខ្មែរ ដែលគ្រាន់តែឃើញសាច់រឿងភ្លាម ក៏ចង់ទស្សនា និងស្ដាប់បទចម្រៀងមួយនេះភ្លែតតែហ្មង។
អ្នកលេងបណ្ដាញសង្គមបាននាំគ្នាធ្វើការស៊ែរបន្ដ រហូតត្រូវគេឃើញបង្ហោះពាក្យថា ពីរោះណាស់! មានន័យណាស់! អមដោយការសរសើរថា លោក ជ័យ សុវ៉ាត គឺជាអាយដល ក្នុងចិត្តរបស់គេ ដែលកាន់តេធ្វើឱ្យបទចម្រៀងមួយនេះ ទទួលបានការចាប់អារម្មណ៍ខ្ពស់បន្ថែមទៀត។ នៅមិនទាន់ដឹងថា ម្ចាស់បទចម្រៀង គឺលោក ជ័យ សុវ៉ាត នឹងមានមោទកភាពចំពោះស្នាដៃមួយនេះយ៉ាងណានោះទេ ប៉ុន្តែគេជឿជាក់ថា លោកពិតជារំភើបចិត្តដែលបទ «តួចិត្តអាក្រក់»ដែលលោកសម្រិតសម្រាំងជាមួយសាន់ដេ ក្លាយជាបទដែលមានការចាប់អារម្មណ៍ភ្លាមៗនៅក្នុងបណ្ដាញហ្វេសប៊ុក និងយូធូបនាពេលនេះ៕
គេនៅចាំបានថា មុននឹងទទួលបាននូវពន្លឺយុត្តិធម៌ សម្រាប់តារាចម្រៀង វ៉ាន់ នីឡា កន្លងមកអតីតសង្សាររបស់នាង គឺលោក គុយ សិទ្ធិសក្តិ ដែលកំពុងតែស្ថិតនៅក្រៅសំណាញ់ច្បាប់ បើទោះបីជាទទួលបានការដាស់ទោស ទៅហើយក៏ដោយ និងធ្លាប់បានផ្ញើរសារគំរាមកំហែង ប្រើពាក្យសំដីអសុរោះ មើលងាយលើរូបនាងជាខ្លាំង អាងអំណាចជាកូនមន្រ្តីធំ ធ្វើឱ្យនាងគិតថា ហាក់បីដូចជាអស់សង្ឃឹម នៅក្នុងរឿងនេះម្ដងម្កាលផងដែរ។
សំណុំរឿងតារាចម្រៀងវ័យក្មេងរូបសម្រស់ស្រស់ប្រិមប្រិយ កញ្ញា សុខ ចិន្ដា ហៅ វ៉ាន់ នីឡា នឹងត្រូវសាលាឧទ្ធរណ៍ប្រកាសសាលដីកា នៅថ្ងៃទី31 ខែតុលា ឆ្នាំ2018 នេះហើយ ពាក់ព័ន្ធករណីប្រើប្រាស់អំពើហិង្សាដោយចេតនា និងចែកចាយរូបភាពអាសអាភាស ដែលបានប្រព្រឹត្តិដោយអតីតសង្សារជាមន្ដ្រីនគរបាលក្រសួងមហាផ្ទៃ កាលពីឆ្នាំ2018។ យ៉ាងណាមិញនាងបាន ប្រាប់អ្នកសារព័ត៌មានថា «ស្អែកនេះ ( ថ្ងៃទី 31 តុលា ) សាលាឧទ្ធរណ៍ នឹងប្រកាសសាលដីកា លើសំណុំរឿងរបស់នាងខ្ញុំ ហើយនាងខ្ញុំក៏សូមអំពាវនាវ ដល់សាលាឧទ្ធរណ៍ ជួយបន្ដផ្ដល់យុត្តិធម៌ដល់នាងខ្ញុំ ដូចសាលាដំបូងរាជធានីភ្នំពេញដែរ»។
គួររំឭកផងដែរដា ប៉ុន្មានខែមុនពាក់ព័ន្ធជាមួយនឹងការកាត់សេចក្ដីរបស់តុលាការនេះ វ៉ាន់ នីឡា បានសរសេរនៅក្នុងសង្គមហ្វេសប៊ុក របស់នាងថា «សួស្ដីអ្នកទាំងអស់គ្នា នេះគឺជាដំណឹងល្អ ! តុលាការបានប្រកាសសាលក្រមរួចហើយ នៅសាលាដំបូងរាជធានីភ្នំពេញ។ 1-ផ្តន្ទាទោស គុយសិទ្ធិសក្តិ ចំនួន1ឆ្នាំ, 2-សំណងជំងឺចិត្ត200លានរៀល»។
វ៉ាន់ នីឡា បានបន្តទៀតថា «នាងខ្ញុំសូមអរគុណបងប្អូន ប្រជាពលរដ្ឋខ្មែរទាំងក្នុង និងក្រៅប្រទេស។ អរគុណសមាគមមិត្តសិល្បៈស្ម័គ្រចិត្តជួយសង្គម, ក្រុមគ្រួសារតារាកម្ពុជា លោកមេធាវី នួន បូរ៉ា និងលោកមេធាវី ជា សុខចាន់ ក៏ដូចជាបងប្អូនសិល្បករ ដែលបានផ្តិតមេដៃលើញត្តិចំនួន600នាក់ជាង តាមរយៈលោកជំទាវរដ្ឋមន្ត្រី ក្រសួងវប្បធម៌ ដើម្បីជំរុញចំណាត់ការ របស់ក្រសួងមហាផ្ទៃ។ នាងខ្ញុំសូមថ្លែងអំណរគុណមែនទែន។ នាងខ្ញុំនឹងផ្តល់ព័ត៌មានកលម្អិត នាពេលបន្តិចទៀតនេះ»៕
ការធ្វើជាភ្នាក់ងារអចលនទ្រព្យ អ្នកខ្លះគេអាចរកប្រាក់កម្រៃបានច្រើន ប៉ុន្តែអ្នកខ្លះមិនអាចរកកម្រៃជើងសាបានទាល់តែសោះក៏មានដែរ ដោយសារតែអ្នកធ្វើការប្រភេទនេះមួយចំនួនមិនបានចូលរៀនវគ្គបណ្តុះបណ្តាលដើម្បីអភិវឌ្ឍសមត្ថភាពខ្លួនជាមុន ពោលគឺធ្វើតាមៗគ្នាតាមទម្លាប់បែបសម័យបុរាណប៉ុណ្ណោះ។ ដូច្នេះតើធ្វើដូចម្តេចទើបការងារប្រភេទនេះទទួលបានប្រាក់កម្រៃជើងសាខ្ពស់ត្រឡប់មកវិញ?
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យCPL មានប្រសាសន៍ថា ដើម្បីធ្វើការជាភ្នាក់ងារអចលនទ្រព្យដែលអាចរកប្រាក់កម្រៃជើងសាបានច្រើន លុះត្រាតែបុគ្គលម្នាក់ៗខិតខំអភិវឌ្ឍខ្លួនជាមុនតាមរយៈការចូលរួមវគ្គបណ្តុះ-បណ្តាលជំនាញក្នុងវិស័យអចលនទ្រព្យនេះ។ បន្ទាប់ពីមានសមត្ថភាពហើយនោះ ត្រូវធ្វើការឱ្យមានលក្ខណៈ Professional មានន័យថា ត្រូវមានចំណេះដឹង ជំនាញវិជ្ជាជីវៈពិតប្រាកដទើបមានការទុកចិត្តពីអតិថិជនក៏ដូចជាម្ចាស់ផ្ទះ ឬម្ចាស់ដីដែលចង់លក់ចេញនោះដែរ។
ជាឧទាហរណ៍ បើសិនជាអតិថិជនម្នាក់មកសួរយើងអំពីផលិតផល ឬសួរអំពីដី/ផ្ទះដែលយើងកំពុងដាក់លក់ ហើយយើងឆ្លើយមិនបានច្បាស់លាស់ ពេលខ្លះគេសួរនាំអំពីសក្តានុពលទីតាំងដី ឬផ្ទះនោះ យើងឆ្លើយមិនរួច សួរនាំអំពីប្រព័ន្ធផ្លូវច្បាប់ យើងឆ្លើយរួចខ្លះ មិនរួចខ្លះ នោះគេហៅថា ជាអ្នកកួកជេដែលមិនមានជំនាញវិជ្ជាជីវៈច្បាស់លាស់ និងដែលចេះតែលក់តៗគ្នាតាមទម្លាប់ពីបុរាណ ដែលការធ្វើបែបនេះ អ្នកខ្លះអាចលក់បាន តែអ្នកខ្លះទៀតលក់មិនបាន នាំឱ្យខាតបង់ទាំងការចំណាយចាយវាយប្រចាំថ្ងៃ ខាតបង់ពេលវេលា បាក់ទឹកចិត្តលែងចង់ប្រកបរបរនេះ និងថែមទាំងដើរនិយាយប្រាប់គេកុំឱ្យធ្វើការផ្នែកនេះទៀតផងក៏មានដែរ។
លោកថា ភ្នាក់ងារអចលនទ្រព្យមិនមែនរង់ចាំតែលក់ដើម្បីគ្រាន់តែទទួលបានកម្រៃជើងសាមកវិញតែមួយមុខនោះទេ ប៉ុន្តែខ្លួនគេត្រូវមានសមត្ថភាពក្នុងការរកប្រាក់ចំណេញទៅឱ្យម្ចាស់អចលនទ្រព្យ ម្ចាស់ដី ម្ចាស់ផ្ទះខុនដូ ឬរកប្រាក់ចំណេញទៅឱ្យអតិថិជនវិញផងដែរ។ ជាឧទាហរណ៍ បុរសម្នាក់គាត់មានដីទំហំប្រហែល10ហិកតា ហើយក្នុងមួយម៉ែត្រការ៉េតម្លៃ 1,000ដុល្លារ ជាដីនៅក្នុងក្រុងដែលគាត់លក់យូរឆ្នាំមកហើយ តែលក់មិនចេញសោះ ដោយសារមានតម្លៃថ្លៃពេក សរុបជាទឹកប្រាក់រហូតដល់ទៅ100លានដុល្លារឯណោះ ពិបាករកម៉ូយដាក់ណាស់។ ប៉ុន្តែសម័យនេះ នៅពេលមានដីធំ គឺកាន់តែមានសក្តានុពលខ្លាំងក្នុងការធ្វើផ្ទះលក់ និងទទួលបានផលចំណេញច្រើនជាងលក់ដីនោះទាំងមូលទៀតផង។ ដូច្នេះក្នុងនាមជាអ្នកលក់ យើងត្រូវផ្តល់យោបល់នេះទៅឱ្យម្ចាស់ដី អំពីការសាងសង់នេះជាមួយនឹងគម្រោងផែនការច្បាស់លាស់ដែលអាចជឿទុកចិត្តបាន ដូច្នេះម្ចាស់ដី នឹងបង្វែរពីការលក់ដីមកជាសាងសង់ផ្ទះលក់វិញមិនខាន ព្រោះទទួលបានកម្រៃ ឬប្រាក់ចំណេញច្រើនជាងលក់ដីទៀតផង ហើយនៅពេលដែលម្ចាស់ដីរកប្រាក់ចំណេញបានច្រើន ប្រាកដជាម្ចាស់ដីផ្តល់ប្រាក់កម្រៃដល់យើងកាន់តែច្រើនលើសពី3% ដែលយើងចង់បានទៅតាមផ្លូវច្បាប់នោះផងដែរ។ ហើយនៅពេលម្ចាស់គម្រោងទទួលបានប្រាក់ចំណេញ គាត់នឹងនឹកឃើញយើងរហូតនៅពេលដែលគាត់មានគម្រោងថ្មីៗទៀត គាត់ប្រាកដជារត់មករកយើង ព្រោះយើងជាអ្នករកលុយឱ្យគាត់។
មួយវិញទៀត ក្នុងនាមជាភ្នាក់ងារអចលនទ្រព្យក៏ត្រូវចេះឆ្លាតដើម្បីប្រយោជន៍ខ្លួនឯងផងដែរ ឧទាហរណ៍ថា នៅពេលដែលយើងលក់ដីឡូតិ៍ ឬលក់ផ្ទះបានមួយល្វែងទៅឱ្យអតិថិជនម្នាក់ យើងប្រាកដជាបានកម្រៃជើងសាពីម្ចាស់ដីឡូតិ៍ ឬផ្ទះល្វែងនោះមិនខានប៉ុន្តែនៅពេលដែលអតិថិជនដដែលនាំបងប្អូនកូនក្មួយមកទិញបន្ត ហើយគេទាររកកម្រៃជើងសាដែរនោះ តើយើងត្រូវធ្វើដូចម្តេចបើយើងជាឈ្មួញកណ្តាលនាំផលិតផលទៅលក់ឱ្យគេនិងនាំគេមកទិញផលិតផលដដែលនោះ? ដូច្នេះយើងត្រូវរៀបចំឱ្យមានប្រព័ន្ធស្តង់ដារដែលអាចជឿទុកចិត្តបានទាក់ទងនឹងកម្រៃជើងសាអ្នកនាំមកផ្ទាល់បានប៉ុន្មានភាគរយ និងអ្នកនាំមកប្រយោលបានប៉ុន្មានភាគរយចែកគ្នាឱ្យច្បាស់ ឱ្យបានផលចំណេញទាំងអស់គ្នានោះប្រាកដជាអាចធ្វើការស្វែងរកប្រាក់កម្រៃជើងសារជាមួយគ្នាបានយូរ មានទំនុកចិត្តលើគ្នា និងមានចិត្តរីករាយជាមួយគ្នាទៀតផង។
ពាក់ព័ន្ធករណីថៅកែសង់ផ្ទះល្វែងលក់ ឬពុះដីឡូតិ៍លក់ ត្រូវគិតពីប្រយោជន៍របស់អតិថិជន គិតពីកេរ្តិ៍ឈ្មោះខ្លួនឯង កុំគិតតែពីប្រាក់ចំណេញតែមួយមុខខ្លាំងពេក។ បើសិនជាមានគម្រោងផ្ទះល្វែងលក់ ឬពុះដីឡូតិ៍លក់ត្រូវគិតទៅដល់ភាពសុខដុមរមនា គិតទៅដល់ផាសុកភាពក្នុងការរស់នៅរបស់អតិថិជន ដូចជាទុកចំណីផ្លូវធំទូលាយ មានផ្លូវសម្រាប់ថ្មើជើងចែកដាច់ដោយឡែកពីផ្លូវបើកបររថយន្ត មានដាំដើមឈើសម្រាប់ផ្តល់ម្លប់ត្រជាក់ និងបរិស្ថានបៃតង មានទីតាំងសម្រាប់សង់រោងបុណ្យ ឬរោងការ មានទីធ្លាសម្រាប់ហាត់ប្រាណ និងសាងសង់សួនច្បារសម្រាប់កុមារលេងឱ្យបានធំទូលាយ ហើយនៅពេលដែលយើងគិតគូរពីប្រយោជន៍របស់អតិថិជនយើងហើយ យើងនឹងបានផលប្រយោជន៍មកវិញតាមរយៈការផ្តល់ទំនុកចិត្តពីសំណាក់អតិថិជន ហើយអតិថិជននឹងមកទិញគម្រោងយើងវិញ តាមរយៈការបង្កើតគម្រោងគំរូខាងលើ។ បើសិនជាធ្វើដូច្នោះបាន នោះគម្រោងយើងនឹងមានកេរ្តិ៍ឈ្មោះបោះសំឡេង បង្កើតគម្រោងលក់ក្រោយៗទៀតនឹងមិនខ្វះអ្នកទិញនោះទេ។
លោកថា មកទល់ពេលនេះ មានម្ចាស់គម្រោងផ្ទះល្វែងមួយចំនួនធ្វើដូចខាងលើខ្លះៗហើយ ប៉ុន្តែមិនទាន់មានគ្រប់គ្រាន់នោះទេ ពោលគឺមានត្រឹមតែសួនច្បារ ឬទីតាំងហាត់ប្រាណប៉ុណ្ណោះ មិនទាន់មានទីតាំងសម្រាប់សង់រោងការ ឬរោងបុណ្យរួមនៅឡើយ ហើយករណីនេះលោកបានជំរុញដល់ម្ចាស់គម្រោងគួរគិតគូរធ្វើឡើងដើម្បីធ្វើជាគំរូសម្រាប់ដល់គម្រោងក្រោយៗធ្វើតាមទៀត ដែលជាគោលដៅប្រកួតប្រជែងដែលអាចនាំឱ្យចំណេញទាំងអស់គ្នា ចំណេញទាំងម្ចាស់គម្រោង ចំណេញទាំងអតិថិជនរស់នៅក្នុងគម្រោងបុរីនោះផងដែរ៕
ស្របតាមគោលនយោបាយរបស់រាជរដ្ឋាភិបាលកម្ពុជា និងការកើនឡើងនូវទំនាក់ទំនងផ្នែកសេដ្ឋកិច្ច និងហិរញ្ញវត្ថុរវាងប្រទេសចិន និងកម្ពុជា ធនាគារជាតិនៃកម្ពុជាបានបង្ហាញការគាំទ្ររបស់ខ្លួន ក្នុងការប្រើប្រាស់ប្រាក់យន់តាមរយៈប្រព័ន្ធធនាគារដើម្បីសម្រួលដល់ពាណិជ្ជកម្មទ្វេភាគី ការវិនិយោគ និងទេសចរណ៍ជាដើមឱ្យកាន់តែមានប្រសិទ្ធភាព។ នេះបើតាមមន្រ្ដីជាន់ខ្ពស់ធនាគារជាតិនៃកម្ពុជា បានបង្ហាញការគាំទ្រនេះក្នុងវេទិកាស្តីពី រូបិយប័ណ្ណយន់នៅកម្ពុជា។
ឯកឧត្តម ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា បានចូលរួមជាអធិបតីបើកវេទិកាស្តីពីរូបិយប័ណ្ណយន់នៅកម្ពុជា ដែលរៀបចំឡើងដោយធនាគារចិនសាខាភ្នំពេញបានថ្លែងថា វេទិកានេះ មានគោលបំណងបង្ហាញ និងពិភាក្សាអំពីការប្រើប្រាស់ប្រាក់យន់ នៅក្នុងតំបន់អាស៊ាន និងកម្ពុជាព្រមទាំងអត្ថប្រយោជន៍នៃប្រាក់យន់ចំពោះសេដ្ឋកិច្ចខណៈដែលទំនងទំនង និងកិច្ចសហប្រតិបត្តិការរវាងកម្ពុជា និងចិនកាន់តែមានការរីកចម្រើនជាលំដាប់។
ឯកឧត្តមបានគូសបញ្ជាក់ថា កន្លងមកធនាគារជាតិនៃកម្ពុជាបានអនុញ្ញាតឱ្យធនាគារប្រទេសចិន2 ធ្វើជាធនាគារផាត់ទាត់ប្រាក់យន់ គឺធនាគារBOC និងធនាគារICBC និងធនាគារពាណិជ្ជនៅកម្ពុជា13ផ្សេងទៀតធ្វើប្រតិបត្តិការជាប្រាក់យន់ ហើយតាមរយៈនេះ វិនិយោគិន ពាណិជ្ជករ និងអ្នកទទួលចំណូលជាប្រាក់យន់ អាចទូទាត់ ខ្ចី និងដាក់ប្រាក់បញ្ញើជាប្រាក់យន់ ក្នុងប្រព័ន្ធធនាគារដែលអនុញ្ញាតឱ្យធនាគារជាតិនៃកម្ពុជាអាចគ្រប់គ្រងចរាចរណ៍ប្រាក់យន់បានល្អប្រសើរ និងរួមចំណែកជំរុញកំណើនពាណិជ្ជកម្ម ការវិនិយោគ និងទេសចរណ៍មកពីប្រទេសចិន។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានថ្លែងប្រាប់សារព័ត៌មានក្នុងស្រុកថា លោកគាំទ្រចំពោះការដាក់ឱ្យទូទាត់ប្រាក់យន់របស់ចិននៅក្នុងប្រព័ន្ធធនាគារដោយសារតែជាសញ្ញាល្អសម្រាប់ជំរុញកំណើនសេដ្ឋកិច្ច ពាណិជ្ជកម្មរបស់ប្រទេសកម្ពុជានៅគ្រាដែលវិនិយោគិនចិន និងការធ្វើពាណិជ្ជកម្មរបស់ចិន-កម្ពុជា កំពុងរីកចម្រើនយ៉ាងខ្លាំងក្លា។
ចំណែកលោក ចាន់ សុផល អ្នកវិភាគផ្នែកសេដ្ឋកិច្ចធ្លាប់បានលើកឡើងថា លំហូរចូលប្រាក់យន់នេះជាសញ្ញាវិជ្ជមានក្នុងការជំរុញសេដ្ឋកិច្ចកម្ពុជា។ លោកថា ចំពោះវិស័យសេដ្ឋកិច្ចនៅកម្ពុជា ការទូទាត់ប្រាក់យន់នេះ មិនមានជាបញ្ហាខាតបង់អ្វីឡើយ មានតែចំណេញដល់សេដ្ឋកិច្ចកម្ពុជា ជួយជំរុញឲឱ្យកាន់តែមានភាពងាយស្រួលក្នុងការដោះដូររូបិយប័ណ្ណក្នុងការប្រកបអាជីវកម្មផ្សេងៗ។
តាមធនាគារជាតិនៃកម្ពុជាបានឱ្យដឹងថា វេទិកានេះក៏នឹងមានគោលបំណងបង្ហាញ និងពិភា
ក្សាអំពីការប្រើប្រាស់ប្រាក់យន់នៅក្នុងតំបន់អាស៊ាន និងកម្ពុជា ព្រមទាំងអត្ថប្រយោជន៍នៃប្រាក់យន់ចំពោះសេដ្ឋកិច្ចផងដែរ៕
ក្រុមហ៊ុនអចលនទ្រព្យ CPL ដែលជាក្រុមហ៊ុនមានវ័យចំណាស់ជាងគេមួយនៅកម្ពុជាបានរៀបចំសិក្ខាសាលាមួយដែលមានអ្នកចូលរួម ជាង 250នាក់កាលពីចុងសប្តាហ៍មុននេះដើម្បីផ្តល់ឱកាសឱ្យអ្នកកួកជេ មិនមានក្រុមហ៊ុនច្បាស់លាស់អាចក្លាយជាដៃគូរពេញសិទ្ធិជាមួយក្រុមហ៊ុននេះ។
លោកឱកញ៉ា ចេង ខេង អគ្គនាយកក្រុមហ៊ុន CPL មានប្រសាសន៍ថា គោលបំណងនៃសិក្ខាសាលានេះ គឺចង់កៀងគរប្រមែប្រមូលអ្នកកួកជេដីធ្លី នៅទូទាំងប្រទេសកម្ពុជាទាំងអ្នកមានអាជីពច្បាស់លាស់ និងមិនមានអាជីពច្បាស់លាស់ បានចូលសហការធ្វើជាដៃគូជាមួយក្រុមហ៊ុនCPL ដើម្បីក្លាយជាអ្នកលក់អចលនទ្រព្យអាជីព និងមានក្រុមហ៊ុនច្បាស់លាស់ ប្រកបដោយទំនុកចិត្តខ្ពស់ទៅដល់អតិថិជន។
លោកបញ្ជាក់ថា អ្នកណាក៏អាចរកប្រាក់កម្រៃជើងសាពីរបរលក់ដីនេះបានដែរ មិនថាតែមន្រ្តីរាជការ សមត្ថកិច្ច គ្រូបង្រៀន គ្រូពេទ្យ បុគ្គលិកអង្គការក្រៅរដ្ឋាភិបាល និងបុគ្គលិកក្រុមហ៊ុនឯកជននានានោះឡើយ។
លោកថា សម្រាប់អ្នកកំពុងបំពេញការងារ សុទ្ធតែមានជំនាញរៀងខ្លួនដើម្បីបំពេញការងារទទួលបានប្រាក់ខែ ប៉ុន្តែគ្រាន់តែពួកគាត់រៀនជំនាញផ្នែកលក់បន្ថែម តាមរយៈសិក្ខាសាលារបស់ក្រុមហ៊ុនCPL ដែលរៀបចំឡើងជាបន្តបន្ទាប់ ទៅតាមដំណាក់កាលនីមួយៗនោះពួកគាត់ និងមានសមត្ថភាពបន្ថែមក្នុងការលក់អចលនទ្រព្យ ទទួលបានប្រាក់កម្រៃបន្ថែមច្រើនលើការងារដែលយើងមានស្រាប់។
លោកបន្តថា នៅពេលដែលពួកគាត់បានចូលសិក្ខាលា និងចុះឈ្មោះរៀននៅក្នុងក្រុមហ៊ុន CPL ក្រុមហ៊ុននឹងផ្តល់ផលិតផលដីធ្លី ទាំងនៅក្នុងទីក្រុងភ្នំពេញ ឬតាមបណ្តាខេត្តនានា ដើម្បីឱ្យគាត់លក់បន្ត ពេលលក់បាននឹងទទួលបានកម្រៃជើងសា បន្ថែមច្រើនជាងប្រាក់ខែច្រើនដង។ ដូចគ្នានេះដែរបើសិនជាឈ្មួញជើងសា អ្នកគក់ជេរដីធ្លីមានដីលក់ ក្រុមហ៊ុននឹងជួយលក់វិញដែរ ពេលបានកម្រៃជើងសានឹងចែកគ្នាដោយតម្លាភាពជាទីបំផុត៕
កីឡាករប្រណាំងរថយន្ត Sebastian Vettel ជឿជាក់ថា ការប្រជែងដណ្តើមពានពិភពលោករបស់ខ្លួន បានចាប់ផ្តើមជួបការបរាជ័យតាំងពីក្នុងការប្រណាំងនៅសិង្ហបុរី មកម្ល៉េះ ដែលនៅពេលនោះក្រុម Ferrari បានបាត់បង់ភាពខ្លាំងរបស់ខ្លួន នៅពេលប្រជែងជាមួយនឹងក្រុម Mercedes របស់កីឡាករ Lewis Hamilton។
កីឡាកររូបនេះបានឱ្យដឹងថា៖ «ខ្ញុំគិតចាប់តាំងពីនៅសិង្ហបុរីរួចទៅហើយថា យើងមិនមានល្បឿនដើម្បីរក្សាការប្រជែងជាមួយនឹងក្រុម Mercedes សម្រាប់ការប្រណាំងនាពេលខាងមុខឡើយ។ បន្ទាប់មក រឿងរ៉ាវផ្សេងទៀតបានកើតឡើង ដែលវាមិនបានជួយអ្វីដល់យើងឡើយ»។ Vettel បានបន្ថែមទៀតថា៖ «យើងមិនអាចរកបានពិន្ទុផ្សេងៗ ដោយសារតែកំហុសដែលយើងបានធ្វើ និងកំហុសដែលខ្ញុំបានធ្វើ»។ Vettel បានលើកឡើងបែបនេះ ក្រោយពីការប្រណាំងក្នុងព្រឹត្តិការណ៍ Mexican Grand Prix របស់គេកាលពីថ្ងៃអាទិត្យ ដោយរូបគេបានបញ្ចប់ក្នុងចំណាត់ថ្នាក់លេខ2 បន្ទាប់ពីកីឡាករ Max Verstappen របស់ក្រុម Red Bull ខណៈដែលលទ្ធផលនេះ បានផ្តល់ពានពិភពលោកទៅឱ្យ Hamilton ដែលបានបញ្ចប់ក្នុងចំណាត់ថ្នាក់លេខ4 បន្ទាប់ពី Kimi Raikkonen របស់ក្រុម Ferrari។
ក្រោយពីបានអបអរដល់គូប្រជែងសញ្ជាតិអង់គ្លេសរបស់ខ្លួន ចំពោះការផ្តួលរូបគេដើម្បីឈ្នះពានពិភពលោកជាលើកទី5 ក្នុងប្រទេសម៉ិកស៊ិក ម្ចាស់ជើងឯកពិភពលោក4 សម័យកាលរូបនេះ ពិតជានិយាយដោយស្មោះត្រង់អំពីកំហុសរបស់គេ និងក្រុមរបស់គេ។ មនុស្សជាច្រើនជឿជាក់ថា ដំណាក់កាលដ៏សំខាន់បំផុត គឺនៅពេលដែលរូបគេបានបាត់បង់ការនាំមុខក្នុងការប្រណាំង German Grand Prix ដែលជាកន្លែង Hamilton បានបន្តប្រជែងដើម្បីការឈ្នះដ៏រំភើបមួយ៕
ប្រភពពី៖ Channel News Asia