Category: សង្គម និងសេដ្ឋកិច្ច

ដេននី ក្វាន់ សម្ញែងភាពស្រស់ស្អាតនៅប្រទេសថៃទៀតហើយ
ដូចប្រិយមិត្តបានជ្រាបដឹងកន្លងមកហើយថា អ្នកនាង ដេននី ក្វាន់ មិនត្រឹមតែមានអាជីពជាតារាសម្ដែងប៉ុណ្ណោះទេ នាងថែមទាំងមានជំនួញផ្ទាល់ខ្លួនកំពុងកាក់កបខ្លាំងទៀតផង ។ ក្រៅពីការងារសិល្បៈ អ្នកជំនួញស្រីរូបនេះតែងចេញចូលក្រៅប្រទេសជាញឹកញាប់ ពិសេសគឺប្រទេសថៃតែម្ដង ហើយពេលឡើងព្រលានយន្ដម្ដងៗកញ្ញាតែងតែតុបតែងខ្លួនយ៉ាងស្អាតឥតខ្ចោះ ។
ខណៈនេះនាងត្រូវបានរួចផុត ពីបម្រាមសិល្បៈហើយ តារាស្រីរូបនេះអាចមានលទ្ធភាពបង្ហាញវត្តមាន តាមរយៈការថតសម្តែងដូចដើមឡើងវិញ។ ប៉ុន្តែទោះបីជាយ៉ាងនេះក៏ពិតមែន តែអំឡុងពេលនេះ កញ្ញា ដេននី ក្វាន់ ហាក់ពុំសូវខ្វាយខ្វល់ រឿងសិល្បៈដូចមុនទៀតឡើយ នាងផ្ដោតសំខាន់ជាងគេទៅលើការលក់ផលិតផលរក្សាសម្រស់ និងការងារសប្បុរសធម៌ជួយសង្គមច្រើនជាង។ ស្រពពេលអាជីពរកស៊ីកាន់ តែកាក់កប និងទទួលបានការគាំទ្រ ពីអតិថិជនអាចរកចំណូល ក្នុងមួយថ្ងៃៗបានរហូតខ្ទង់រាប់ពាន់ដុល្លារនោះ នៅពេលថ្មីៗនេះ នាងកាន់តែបញ្ចេញភាពហ៊ឺហារ សម្ញែងភ្នែកមហាជនឱ្យបានឃើញ ដោយការប្រើប្រាស់សម្ភារៈនិយមទំនើបៗ និងមានតម្លៃថ្លៃផងដែរ។ មិនតែប៉ុណ្ណោះ ជារឿយៗស្រីស្រស់ ដេននី ក្វាន់ ក៏បានចំណាយលុយខ្ទង់រាប់ពាន់ដុល្លារ ដើម្បីចេញទៅដើរកមន្សាន្ត និងទិញរបស់មានតម្លៃថ្លៃ ពីក្រៅប្រទេសប្រើប្រាស់ទៀតផង។
តារាស្រីស្អាតរូបនេះ តែងតែមានការចាប់អារម្មណ៍ពីជីវិតឯកជនរបស់នាងគ្រប់ពេលវេលា ដែលមហាជនភាគច្រើនទទួលស្គាល់ចំពោះភាពជោគជ័យ លើមុខជំនួញរកស៊ីក្រៅអាជីពសិល្បៈ៕
November 2, 2018
កូនក្រមុំត្រូវតែស្រស់ស្អាតប្លែក និងតុបតែងយ៉ាងស្រស់ស្អាតបំផុត
ថ្ងៃរៀបអាពាហ៍ពិពាហ៍ចូលមកដល់ហើយ កូនក្រមុំទាំងអស់ពិតជារំភើបខ្លាំងណាស់មែនទេ! កំុភ្លេចណា៎ តុបតែងមុខរបស់អ្នកឱ្យស្រស់ស្អាតបំផុតនៅក្នុងថ្ងៃដ៏សំខាន់របស់អ្នក សូមឱ្យជាងផាត់មុខតុបតែងមុខមាត់របស់អ្នកឱ្យក្លាយជាកូនក្រមុំដ៏ស្អាត និងទាន់សម័យបំផុត ជាមួយនឹងពណ៌ម្សៅក្រែមបែបស្រទន់ និងមិនបំពោកម្សៅក្រាស់ពេកនោះទេ ដើម្បីឱ្យអ្នកអាចក្លាយជាកូនក្រមុំដ៏ស្រស់សោភាបែបធម្មជាតិ និងបែបសម័យថ្មី និងបានបង្អួតពីសម្រស់ផ្ទៃមុខរបស់អ្នកទៅដល់មនុស្សទាំងអស់នៅក្នុងវិធីរបស់អ្នកជាពិសេសបង្ហាញសម្រស់ដ៏ផូរផង់របស់អ្នកដល់កូនកំលោះរបស់អ្នកតែម្តង។ សូមពិនិត្យមើលគំរូនៃការតុបតែងមុខរបស់កូនក្រមុំសម័យថ្មីដូចតទៅ៕

November 1, 2018
និស្សិតកម្ពុជាផ្នែកគីមីចំណីអាហារមានគំនិតច្នៃប្រឌិតអាចផលិតបបរ “កូនឆ្លាត” សម្រាប់ក្មេងតូច
ក្នុងដំណាក់កាលដែលការអប់រំកាន់តែមានលក្ខណៈទូលំទូលាយ កូនខ្មែរកាន់តែច្រើនចាប់ផ្តើមមានស្នាដៃលើនវានុវត្តន៍ប្លែកៗសម្រាប់ជាប្រយោជន៍ដល់សង្គម និងជំរុញឱ្យកម្ពុជាមានសហគ្រាសធុនតូច និងមធ្យមកាន់តែច្រើន។ ក្នុងចំណោមស្ថាបនិកសំខាន់ៗទាំងអស់នៅកម្ពុជា កូនខ្មែរមួយក្រុមដែលបានអភិវឌ្ឍខ្លួនចេញពីកម្មវិធី Techno Innovatin Challenge បានបង្កើតសមិទ្ធផលយ៉ាងល្អមួយសម្រាប់កម្ពុជា គឺបបរសម្រាប់ទារក ដែលមានសារធាតុចិញ្ចឹម និងគុណភាពខ្ពស់មិនចាញ់អាហារទារកនាំចូលពីបរទេសឡើយ។ សហស្ថាបនិកនៃក្រុមអ្នកផលិតផលិតផល “កូនឆ្លាត” កញ្ញា ជា ស្រីស្រស់ បានលើកឡើងថា មូលហេតុសំខាន់ដែលនាំឱ្យកញ្ញា និងក្រុមការងារកញ្ញាក៏បានជួបជាមួយអ្នកណែនាំជំនាញ (mentor) ដែលគាត់បានបង្ហាញផ្លូវយ៉ាងច្រើនដើម្បីឱ្យផលិតផលមួយនេះត្រូវបានកែច្នៃស្របតាមបច្ចេកទេសនិងមានសុវត្ថិភាពខ្ពស់សម្រាប់អភិវឌ្ឍឱ្យទៅជាបបររបស់កុមារតូច។ កញ្ញាបានបង្ហាញផងដែរថា ចេកមានសារធាតុ Nutrition ខ្ពស់ ហេតុនេះវាអាចជួយដល់សុខភាពកុមារបានច្រើន ប្រសិនបើយើងច្នៃវាជាមួយនឹងបន្លែបៃតងឱ្យបានត្រឹមត្រូវស្របតាមលក្ខណៈបច្ចេកទេសចំណីអាហារ។ បបរទារក ដែលមានឈ្មោះថា “កូនឆ្លាត” នេះ ត្រូវបានច្នៃឡើងសម្រាប់ទារកដែលមានអាយុចាប់ពី6ខែ ដល់2ឆ្នាំ ជាមួយនឹងការពិសោធត្រឹមត្រូវស្របតាមចំណង់ចំណូលចិត្តកុមារនៅកម្ពុជា។ មុននឹងចេញជាផលិតផលមួយមុខៗឡើង ក្រុមរបស់កញ្ញាបានធ្វើតេស្តសាកល្បង និងស្រាវជ្រាវយ៉ាងល្អិតល្អន់ថា កុមារកម្ពុជាភាគច្រើនចូលចិត្តរសជាតិបែបណា ដើម្បីធានាថាផលិតផលដែលផលិតឡើងដោយកូនខ្មែរនេះត្រូវជាមួយនឹងលក្ខខណ្ឌគ្រប់យ៉ាងរបស់កុមារនៅកម្ពុជា។
សហស្ថាបនិកសំខាន់មួយរូបទៀតគឺ កញ្ញា លីនចរិយា បានលើកឡើងថា ការផលិតបបរកូនឆ្លាតនេះ គឺមានការសិក្សា និងជំនួយបច្ចេកទេសពីអ្នកជំនាញនៅប្រទេសសិង្ហបុរីផងដែរ ដែលធានាថាវាមានសារៈសំខាន់សម្រាប់ជួយឱ្យកុមារលូតលាស់ធំធាត់បានល្អ។ ក្រៅពីការជួយដល់កុមារហើយ បបរកូនឆ្លាត ក៏ជួយដល់អាណាព្យាបាលរបស់ក្មេងជាពិសេសអ្នកម្តាយកុំឱ្យខាតពេលវេលា និងមានការលំបាកច្រើនពេកក្នុងការធ្វើអាហារសម្រាប់ក្មេងតូចផងដែរ។ កញ្ញាបានបញ្ជាក់ថា ពីមុនម្តាយឪពុកក្មេងតូចត្រូវចំណាយពេលវេលាយូរដើម្បីចម្អិនបន្លែ និងប្រមូលគ្រឿងផ្សំដែលមានសារៈសំខាន់ចំពោះសុខភាពរបស់កូន តែបបរកូនឆ្លាតអាចជួយពួកគាត់ឱ្យកាន់តែងាយស្រួលឡើង ព្រោះគាត់អាចប្រើប្រាស់បបរដែលត្រូវបានវេចខ្ចប់យ៉ាងមានអនាម័យ និងសុវត្ថិភាព និងងាយស្រួលទុកដាក់។ លើសពីនេះទៅទៀតបបរមួយកញ្ចប់អាចចម្អិនអាហារឱ្យកូនតូចបាន 3ដង និងរក្សាបាននូវសារធាតុចិញ្ចឹមគ្រប់គ្រាន់ដែលកុមារត្រូវការថែមទៀតផង។
កញ្ញា លីន ចរិយា បាននិយាយថា៖ “លក្ខណ:ពិសេសសំខាន់មួយរបស់បបរកុមារ កូនឆ្លាត គឺមានតម្លៃធូរថ្លៃ ដែលអាចធ្វើឱ្យឪពុកម្តាយចំណាយតិច និងចំណេញច្រើន បើប្រៀបធៀបជាមួយនឹងការទិញអាហារកំប៉ុងពីខាងក្រៅ ព្រោះផលិតផលនេះផលិតចេញពីគ្រឿងផ្សំដែលមានគុណភាពល្អក្នុងប្រទេស និងជាផលិតផលរបស់ខ្មែរ ដែលមិនចាំបាច់ចំណាយច្រើនលើការនាំចូល និងការចំណាយផ្សេងៗទៀត”។
កញ្ញា ចរិយា បានលើកឡើងបន្ថែមទៀតថា ផលិតផលបបរសម្រាប់ទារកក្មេងឆ្លាតនេះត្រូវបានត្រួតពិនិត្យយ៉ាងហ្មត់ចត់ និងជាប់ក្នុងការប្រកួតប្រជែងសំខាន់ៗទាំងក្នុងប្រទេស និងក្រៅប្រទេស។
គួរបញ្ជាក់ថា កាលពីឆ្នាំ2017 ក្រុមរបស់កញ្ញាទទួលបានចំណាត់ថ្នាក់លេខ3 ក្នុងកម្មវិធី Techno Innovation Challenge នៃវិទ្យាស្ថានបច្ចេកវិទ្យាកម្ពុជា ហើយពេលថ្មីៗនេះផលិតផលរបស់កូនខ្មែរមួយក្រុមនេះបានទទួលចំណាត់ថ្នាក់លេខ2 ក្នុងកម្មវិធីគម្រោងអាជីវកម្មដើម្បីធ្វើឱ្យពិភពលោកកាន់តែប្រសើរ (Business plan for better world- young social entrepreneur) ដែលរៀបចំដោយមូលនិធិអន្តរជាតិសិង្ហបុរី៕
November 1, 2018
វីឡាថ្មីនាយ ចឺម សង់ជិតរួចរាល់បាន75% ទៅហើយ
តាមរយៈបណ្ដាញទំនាក់ទំនងសង្គមហ្វេសប៊ុកនៅពេលថ្មីនេះ នាយ ចឺម អតីតអ្នកកំប្លែងក្រុមនាយ ពែកមី និងជាតារាចម្រៀងប្រចាំផលិតកម្មសាន់ដេ បានបង្ហោះរូបជាច្រើនសន្លឹកនៅលើគណនីផ្ទាល់ខ្លួន ដែលស្ដែងឱ្យដឹងថា វីឡាថ្មី ដែលមានទីតាំងស្ថិតនៅឃុំមហាឫស្ស៊ី ស្រុកគងពិសី ខេត្តកំពង់ស្ពឺ គ្រោងចំណាយទឹកប្រាក់បុកគ្រិះអស់ជាង 14 ម៉ឺនដុល្លារសហរដ្ឋអាមេរិក របស់នាយ ចឹម នោះ មានសភាពជិតរួចរាល់ហើយ ។
ថ្វីបើនៅមានវ័យក្មេងខ្ចីក៏ពិតមែន ប៉ុន្តែតារាចម្រៀងនាយ ចឺម ដែលជាអតីតតារាកំប្លែង ទទួលបានការគាំទ្រខ្លាំងពីសំណាក់ទស្សនិកជន ហើយសម្រាប់ការគាំទ្រដ៏លើសលប់នេះ បានធ្វើឱ្យនាយ ចឺម គេចចេញពីភាពក្រ រហូតក្លាយជាអ្នកមានទ្រព្យសម្បត្តិស្ដុកស្ដម ជួយទំនុកបម្រុងក្រុមគ្រួសារសព្វបែបយ៉ាង ប៉ុន្តែអ្វីដែលនឹងស្មានមិនដល់ក្នុងឆាកជីវិតរបស់នាយនោះ គឺថ្មីៗនេះលោកយាយជាទីស្រឡាញ់របស់នាយ បានទទួលមរណៈភាពទៅហើយ ។
នាយ ចឺម បានសរសេរសារនៅលើហ្វេសប៊ុកថា «ចៅមកមិនទាន់ដង្ហើមយាយ សូមអោយវិញ្ញាខ័ណ្ឌលោកយ៉ាយទៅកាន់សុខគតិភព ចៅស្រលាញ់លោកយ៉ាយ ចៅកំពុងតែប្រឹងរកលុយដើម្បីសង់ផ្ទះអោយធំនឹងបានយកលោកយ៉ាយទៅនៅជាមួយ ឪពុកម្តាយចៅ ឥឡូវចៅសង់ផ្ទះបាន75%ហើយ លោកយាយទៅចោលចៅបាត់ លោកយាយអត់ចាំនៅផ្ទះថ្មីជាមួយចៅទេ» ៕
November 1, 2018
ភ័យប្រហោងពោះ !! រឿង អាងនរក ( The Pool ) ធ្វើឱ្យទស្សនិកជនទប់ស្មារតីមិនជាប់
ជាប់នៅក្នុងអាងទឹកហួតហែងមួយដែលមានជម្រៅ6ម៉ែត្រ គ្មានទឹក គ្មានជណ្តើរនិងគ្មានច្រកចេញរួច គូស្នេហ៍មួយគូត្រូវតស៊ូដើម្បីរួចផុតពីស្ថានភាពអាក្រក់នេះ។ គ្រប់យ៉ាងអាចនឹងងាយស្រួលជាងនេះ ប្រសិនបើសត្វដ៏កំណាចមួយមិនបានចៃដន្យធ្លាក់ចូលក្នុងអាងនេះដែរ។
ភាពយន្ដខ្នាតធំរយៈពេលប្រម៉ាណ 91 នាទីនោះ បានបង្ហាញពីហេតុការណ៍ស្លន់ស្លោរលស់ព្រលឹង ខណៈដែលកំពុងជាប់នៅក្នុងអាងទឹកនរកគ្មានច្រកចេញ។ ទឹកមុខសម្ដែងរបស់លោក ខេន ធីរៈដេត ធ្វើឱ្យអ្នកទស្សនាអាណិតរហូតដល់ស្រក់ទឹកភ្នែក និងភ័យបុកពោះជំនួស។ គ្រប់សកម្មភាពសង្គ្រោះជីវិតខ្លួនឯងឱ្យរួចផុតពីអាងទឹក មានឧបសគ្គមួយរយជំពូក ស្រៀវប្រហោងពោះម្ដងៗ ខណៈដែលឡើងទៅខ្ពស់យ៉ាងភ្លត់ស្នៀត និងប្រថុយគ្រោះថ្នាក់ ។ ចំណងបញ្ហាកាន់តែតានដោះស្រាយមិនចេញ លុះចុងក្រោយមានតែការលះបង់ជីវិតរបស់សត្វចិញ្ចឹមខ្លួនឯង ដែលវាមានក្ដីស្រឡាញ់និងភក្ដីភាពចំពោះម្ចាស់ខ្លួន។
ចង់ដឹងថា គូស្នេហ៍មួយគូនេះរួចជិវិតចេញពីអាងទឹកនរក 6 ម៉ែត្របានដោយវិធីណានោះ សូមកុំភ្លេចទស្សនាទាំងអស់គ្នា៕
https://youtu.be/1pRniNriUTI
November 1, 2018
ខេមរៈ សិរីមន្ដ បង្ហាញក្ដីស្រឡាញ់ចំពោះអ្នកគាំទ្រ ដល់ថ្នាក់ហ្វេនៗសរសើរពីអត្តចរិតរួសរាយ
គេកត់សម្គាល់ឃើញថា អំឡុងពេលចុងក្រោយនេះ កំពូលតារាចម្រៀងប្រចាំផលិតកម្មរស្មីហង្សមាស លោក ខេមរៈ សិរីមន្ដ បានទម្លាយរឿងរ៉ាវជាច្រើនដែលពាក់ព័ន្ធជាមួយក្រុមគ្រួសារ និងស្ថានភាពរបស់ប្អូនស្រីលោក គឺកញ្ញា ខេមរៈ ស្រីពៅ ឱ្យមហាជនបានជ្រាបផងដែរ។ ទន្ទឹងនឹងនោះ អ្នកគាំទ្រលោកជាច្រើនបានសម្ដែងក្ដីចាប់អារម្មណ៍យ៉ាងខ្លាំងចំពោះជីវិតឯជនភាពរបស់លោក និងបានសម្ដែងក្ដីស្រឡាញ់ ព្រួបារម្ភ សួរសុខទុក្ខ ទៅកាន់លោកទៀតផង។
ដោយឡែក បច្ចុប្បន្ននេះតារាប្រុសរូបស្រស់សង្ហារូបនេះ មានភាពមមាញឹកខ្លាំងនៅក្នុងការងារសិល្បៈ និងបានលេចមុខនៅក្នុងតន្ត្រីតូចធំជាច្រើន ។ មិនត្រឹមតែប៉ុណ្ណោះ បើក្រឡេកទៅមើលអ្នកគាំទ្ររបស់លោកវិញ ក៏កាន់តែច្រើនឡើងមិនថានៅក្នុង និងរស់នៅក្រៅប្រទេសនោះទេ។ ជាក់ស្តែង រាល់ពេលដែលលោកឡើងច្រៀងម្តងៗ តែងតែមានអ្នកគាំទ្រស្រែកច្រៀងតាមសឹងតែគ្រប់បទ។ យ៉ាងណាមិញ កាលពីពេលថ្មីៗនេះ អ្នកគាំទ្ររបស់លោកបានបង្ហោះវីដេអូមួយ ដែលបានបង្ហាញពីសកម្មភាព និងអត្តចរិតដ៏រួសរាយរបស់លោក នៅពេលដែលជួបហ្វេនម្តងៗ។
ដោយក្នុងនោះលោកបាន អោប និងបញ្ចេញនូវស្នាមញញឹមជាមួយនឹងកាយវិការសំពះ ទៅកាន់មនុស្សគ្រប់គ្នា ធ្វើឱ្យពួកគេកាន់តែរំភើបចិត្ត នៅពេលដែលឃើញលោក បង្ហាញភាពរាក់ទាក់ទៅកាន់អ្នកគាំទ្របែបនេះ ទោះបីទើបតែមកពីច្រៀងហត់យ៉ាងណាក្តី៕
November 1, 2018
SME កម្ពុជា ត្រូវពង្រឹងខ្លួនលើកត្តា4ជាចម្បងដើម្បីប្រកួតប្រជែងទីផ្សារ
ប្រទេសកម្ពុជាត្រូវការពង្រឹងលើចំណុច4ជាចម្បងសម្រាប់សហគ្រាសខ្នាតតូច និងមធ្យម (SME) ដែលកត្តាទាំង4 នោះរួមមាន ការពង្រឹងសមត្ថភាពគុណភាព ការផ្ដល់ប្រភពទុន និងមានទីផ្សារច្បាស់លាស់ ដើម្បីពង្រីកលទ្ធភាពចូលរួមការប្រកួតប្រជែងលើទីផ្សារក្នុង និងក្រៅប្រទេស។ នេះបើតាមការលើកឡើងរបស់នាយិការប្រតិបត្តិមជ្ឈមណ្ឌលពាណិជ្ជកម្មអន្តរជាតិក្នុងជំនួបពិភាក្សាការងារជាមួយសម្ដេចនាយករដ្ឋមន្ត្រី ហ៊ុន សែន នៅឯប្រទេសស្វ៊ីស។
លោកស្រី អារ៉ាន់ឆា ហ្គុនហ្សាឡេស (Arancha Gonzalez) នាយិកាប្រតិបត្តិមជ្ឈមណ្ឌលពាណិជ្ជកម្មអន្តរជាតិ (International Trade Center) បានលើកឡើងថា៖ “ដើម្បីជំរុញសហគ្រាសធុនតូច និងមធ្យមSMEឱ្យកាន់តែរឹងមាំឡើង កម្ពុជាត្រូវគិតដល់កត្តាចំនួន 4ចម្បង”។
លោកស្រី អារ៉ានឆា លើកឡើងថា ទាក់ទងនឹងបញ្ហានេះ ដើម្បីជំរុញសហគ្រាសធុនតូច និងមធ្យមឱ្យកាន់តែរឹងមាំ កម្ពុជាត្រូវឈរលើកត្តា 4ចំណុច ក្នុងនោះទី1 ត្រូវធ្វើយ៉ាងណាឱ្យសហគ្រាស SME មានសមត្ថភាពល្អអាចឆ្លើយតបទៅនឹងតម្រូវការទីផ្សារ។ ទី2 គុណភាពនៃផលិតផលដើម្បីនាំចេញ។ ទី3 ការទទួលបាននូវប្រភពទុន និងឥណទាន និងទី4 ទាក់ទិននឹងទីផ្សារដែលតម្រូវឱ្យមានទីផ្សារពិតប្រាកដច្បាស់លាស់ ក្នុងការទទួលយកផលិតផលដែលផលិតដោយ SME។
លោកស្រីបានបញ្ជាក់ទៀតថា នៅខែវិច្ឆិកាខាងមុខនេះ លោកស្រីនឹងអញ្ជើញ SME របស់កម្ពុជាទៅចូលរួមតាំងពិព័រណ៍នៅទីក្រុងស៊ាងហៃ ប្រទេសចិន ហើយនៅខែក្រោយនេះដែរ លោកស្រីនឹងធ្វើអង្កេតពីការប្រឈមរបស់SMEក្នុងប្រទេសកម្ពុជាថា តើនឹងមានបញ្ហាប្រឈមអ្វីខ្លះ? ដើម្បីរិះរកវិធីសាស្រ្តក្នុងការជួយដល់ប្រទេសកម្ពុជា ពីព្រោះថា កម្ពុជាពិតជាមានសមត្ថភាពច្រើនក្នុងការកសាង និងពង្រីកនូវសក្តានុពលរបស់ខ្លួនដើម្បីពង្រីងសមត្ថភាពឱ្យកាន់តែមានភាពប្រកួតប្រជែងប្រកបដោយភាពរឹងមាំ ពិសេសការជួយដល់ SME ដែលជាចលករជំរុញឱ្យវិស័យពាណិជ្ជកម្មកាន់តែខ្លាំងក្លាឡើង។
លោកឧកញ៉ា តែ តាំងប៉រ ប្រធានសម្ព័ន្ធសហគ្រាសធុនតូច និងមធ្យមកម្ពុជា ធ្លាប់បានលើកឡើងថា SME របស់កម្ពុជា អាចផ្គត់ផ្គង់ទីផ្សារក្នុងស្រុកគ្រប់គ្រាន់ ខណៈសហគ្រាសមួយចំនួនកំពុងចុះបញ្ជីទទួលស្គាល់កម្រិតស្ដង់ដារ ដើម្បីប្រកួតប្រជែងទីផ្សារក្នុងតំបន់អាស៊ាន។ លោកក៏បានស្នើឱ្យរដ្ឋាភិបាលកាត់បន្ថយការនាំចូលផលិតផលសម្រេចពីបរទេសដែលហូរចូលមកទីផ្សារកម្ពុជា និងជួយរកទីផ្សារបន្ថែមទៀតដើម្បីជួយឱ្យសហគ្រាសធុនតូច និងមធ្យមមានការរីកចម្រើន។
លោកជំទាវឧកញ៉ា កែវ មុំ នាយិកាក្រុមហ៊ុនលីលីផលិតនំស្រួយបានមានប្រសាសន៍ថា ចំណុចទាំង4ដែលលោកស្រីCEOមជ្ឈមណ្ឌលពាណិជ្ជកម្មអន្តរជាតិបានលើកឡើងនោះ វាសុទ្ធតែជាកត្តាធំៗដែលពាក់ព័ន្ធនឹងសហគ្រាសធុនតូច និងមធ្យមនៅកម្ពុជាហើយជាចំណុចដែលSME របស់កម្ពុជាខ្វះសឹងតែទាំងអស់ បើមានក៏មានក្នុងស្ថានភាពភាគរយតិចបំផុត។ បានន័យថា មានភាពទន់ខ្សោយដែលធ្វើឱ្យឧស្សហកម្មក្នុងស្រុកពិបាកក្នុងការលូតលាស់។ តែសម្រាប់ក្រុមហ៊ុនលីលី មានភាគរយនៃចំណុចទាំង4 ខ្ពស់បន្តិច ដែលធ្វើឱ្យក្រុមហ៊ុនយើងមានការលូតលាស់គួរសម។
លោកជំទាវនាយិកាបានឱ្យដឹងថា ចំណុចទី1ដែលពាក់ព័ន្ធនឹងការពង្រឹងសមត្ថភាពឱ្យល្អដើម្បីអាចឆ្លើយតបទៅនឹងតម្រូវការទីផ្សារនោះ គឺវាទាក់ទងនឹងធនធានមនុស្សដែលត្រូវការការបណ្តុះបណ្តាល។ ចំណុចទី2 ទាក់ទងនឹងគុណភាពនៃផលិតផលដើម្បីនាំចេញ គឺយើងមានការបណ្តុះបណ្តាលក្នុងការត្រួតពិនិត្យផលិតផលដែលត្រូវបានផលិតឡើងតាមស្ដង់ដារ ISO និងទទួលស្គាល់គុណភាពពីបណ្ដាអង្គការមួយចំនួនទៀតដូចជាអង្គការAPO UNIDO និង JICA ជាដើម។
លោកជំទាវឧកញ៉ា កែវ មុំ បានបញ្ជាក់បន្ថែមថាទី3 ការទទួលបាននូវប្រភពទុន និងឥណទាន វាជាការលំបាកសម្រាប់សហគ្រាសធុនតូច និងមធ្យមនៅកម្ពុជា ព្រោះSMEយើងនៅមានការធ្វើអាជីវកម្មជាលក្ខណៈគ្រួសារ ហេតុដូច្នេះហើយទើបពួកគាត់ពិបាកនឹងរកប្រភពទុនជាកម្ចីពីធនាគារជាដើមដែលគេត្រូវការដីធ្លី ឬអចលនទ្រព្យ ឬជាសហគ្រាសមានកេរ្តិ៍ឈ្មោះ ដែលគេទទួលស្គាល់ច្រើន។ ចំណុចទី4 គឺផ្សារពិតប្រាកដក្នុងការទទួលយកផលិតផលដែលផលិតដោយ SME កម្ពុជា។ សម្រាប់ SME យើង បើខ្វះ3ចំណុចខាងលើ តើយើងនឹងបានផលិតផលបែបណាដើម្បីរកទីផ្សារ? ដូច្នេះយើងក៏ពិបាកនឹងចូលទីផ្សារដែរ។ តែសម្រាប់ក្រុមហ៊ុនលីលី និងក្រុមហ៊ុនមួយចំនួនមានភាគរយចំណុចទាំង3ខាងលើរាងខ្ពស់ជាងគេបន្តិច ទើបធ្វើឱ្យសហគ្រាសមួយចំនួននោះ រួមទាំងក្រុមហ៊ុនលីលីផងអាចរកទីផ្សារ និងអាចនាំចេញទៅទីផ្សារក្រៅប្រទេសបាន។
លោកជំទាវនាយិកាបានឱ្យដឹងថា អ្វីដែលរដ្ឋាភិបាលគួរជំរុញសម្រាប់SME គឺត្រូវជួយលើ3ចំណុច(សមត្ថភាពល្អ គុណភាពនៃផលិតផល និងប្រភពទុន)ឱ្យបានខ្លាំង នោះទីផ្សារពិតប្រាកដមិនពិបាករកឡើយ តែអ្វីៗជាដំបូង និងជាសំខាន់នោះគឺសហគ្រាសទាំងអស់ត្រូវតែខិតខំពីខ្លួនឯងជាមុនសិន ហើយកែប្រែនូវចំណុចខ្វះខាតដើម្បីដើរឱ្យទាន់នូវអ្វីដែលគេខំបង្ហាញឱ្យយើងដឹងនូវចំណុចខ្វះខាត និងឱ្យសមនឹងឆន្ទៈដែលរដ្ឋាភិបាលបានជំរុញក្នុងវិស័យសហគ្រាសធុនតូច និងមធ្យមឱ្យរីកចម្រើនលូតលាស់៕
November 1, 2018
លោក ម៉ា ដូណា ចេញមុខបកស្រាយពីបញ្ហាបែកបាក់ទំនាក់ទំនងស្នេហាជាមួយគូស្នេហ៍
កាលពីពេលថ្មីនេះ លោកណុប ហេងទ្រី ដែលជាសង្សាររបស់លោកម៉ា ដូណា បានបង្ហោះសារបែកគ្នាទៅវិញហើយ ដែលធ្វើឱ្យមានការភ្ញាក់ផ្អើលនៅលើបណ្ដាញសង្គម និងពិភពសិល្បៈ។ គូស្នេហ៍លោក ម៉ាដូណា កន្លងមកធ្លាប់តែសម្ញែងភាពស្អិតរមួតជាងស្ករតាំងម៉ែ រហូតដល់មហាជនជាច្រើនសរសើរលោកថា ជាគូស្នេហ៍នេះពិតជាផ្អែមល្ហែមបំផុតនៅក្នុងពិភពសិល្បៈ ហើយទោះបីជាពួកគេជាប្រុសនឹងប្រុសក៏ដោយ។
គួរបញ្ជាក់ផងដែរថា ភាពផ្អែមល្ហែមនេះក៏បានបញ្ចប់ទៅវិញ ដោយលោកហេងទ្រី បានប្រកាសនៅក្នុងវីដេអូទាំងទឹកភ្នែករហេមរហាមអណ្ដកអណ្ដឺតថា លោក ម៉ា ដូណា មានអ្នកទាំងបី។ បន្ទាប់ពីបានទស្សនាវីដេអូ និងព័ត៌មានមួយចំនួនចេញផ្សាយពីការបែកបាក់ទំនាក់ទំនងស្នេហាខ្លួនហើយនោះ នៅគណនីហ្វេសប៊ុករបស់លោកម៉ាដូណា បាននិយាយរៀបរាប់ទាំងទឹកភ្នែកថា “ពាក្យថាបែក នរណាដែលថាមិនឈឺចាប់ ព្រោះអ្វីៗវាកើតឡើងភ្លាមៗវាពិបាកធ្វើចិត្តណាស់ ខ្ញុំមិនចង់បង្ហាញវីដេអូមួយនេះទេ តែដោយសារការចោទរបស់អ្នកថា ខ្ញុំមានថ្មីបោះបង់អ្នក ចោទខ្ញុំពិតជាមិនអាចទទួលពាក្យនេះបានឡើយ តែពេលនេះខ្ញុំត្រូវតែបកស្រាយ ដើម្បីការពារកេរ្ត៍ឈ្មោះខ្ញុំព្រោះមានសារព័ត៌មាន នឹងមិត្តភ័ក្តក៏ដូច friend ក្នុងFacebook ជាច្រើនតែងតែចោទសួរខ្ញុំថា តើបងមានអ្នកទីបីបោះបង់ហេងមែនអត់ »។
តារាសម្ដែងបែបកំប្លែងរូបនេះ បានឆ្លើយបន្ដថា « សម្រាប់ខ្ញុំឆ្លើយថាអត់ ព្រោះខ្ញុំស្រលាញ់គាត់ខ្លាំងណាស់ខ្ញុំមិនអាចចោរគាត់ទេ ទោះខ្ញុំមិនបានឃើញការបង្ហោះរបស់គាត់ ដោយសារខ្ញុំបាន block Facebook គាត់តែខ្ញុំត្រូវការពារខ្លួននឹងកេរ្ត៍ឈ្មោះចំពោះការចោទនេះ ណាមួយមិនចង់ឱ្យពុកម៉ែបងប្អូនមានការយល់ច្រឡំថាខ្ញុំបោះបង់គាត់ទៅមានអ្នកថ្មីឡើយ សង្ឃឹមថាអ្នកនឹងយល់នឹងឈប់បង្ហោះទៀតទៅព្រោះខ្ញុំឈឺចាប់ណាស់ ដោយក្តីករុណា សូមកុំខ្ពើមសំរាប់បុរសស្រលាញ់ភេទដូចគ្នា ជួយបើកចិត្តឱ្យទូលាយក្នុងសង្គមដល់តូចមួយនេះផង។ ជួយshares អោយគាត់បានឃើញវិឌេអូនេះផង»៕
November 1, 2018
ក្រុមហ៊ុនចិនដ៏ធំមួយគ្រោងបោះទុនជាង 80លានដុល្លារកែច្នៃសំរាមនៅកម្ពុជា
ដើម្បីចូលរួមកែលម្អសោភណភាព លើកកម្ពស់បរិស្ថាននៅកម្ពុជា ឱ្យកាន់តែប្រសើរឡើងក្រុមហ៊ុនដ៏ធំរបស់ចិនមួយគ្រោងបោះទុនវិនិយោគក្នុងទឹកប្រាក់ 86លានដុល្លារអាមេរិកដើម្បីកែច្នៃសំរាមនៅកម្ពុជាឱ្យទៅជាថាមពលអគ្គិសនីសម្រាប់ប្រើប្រាស់ជាប្រយោជន៍ក្នុងសង្គមទាំងមូល។
តំណាងក្រុមហ៊ុន Shandong Wangeng Energy Technology Co.,LTD បានលើកឡើងថា ក្នុងគម្រោងផែនការទុនវិនិយោគដែលក្រុមហ៊ុនគ្រោងចំណាយខាងលើ មានបំណងកែច្នៃសំរាមនៅកម្ពុជាឱ្យក្លាយទៅជាកម្លាំងថាមពលប្រើប្រាស់ជាប្រយោជន៍សង្គមទាំងមូល ដែលអាចបង្កើត ថាមពលអគ្គិសនីដោយកង្ហារខ្យល់ថាមពលអគ្គិសនីដោយជីវឧស្ម័ន ថាមពលអគ្គិសនីដោយជីវម៉ាស់ជាដើម។
អ្នកតំណាងខាងលើបានបន្តថា ក្រុមហ៊ុនក៏បានលើកឡើងអំពីការដុតសំរាមដោយប្រើបច្ចេកវិទ្យាក្នុងការកែច្នៃធនធានដែលមានការគិតគូរពីបរិស្ថាន និងអាចមានលទ្ធភាពបន្ថយឈានដល់ចំណុចសូន្យ ចំពោះផលប៉ះពាល់ឧស្ម័នបញ្ចេញចោលទៅបរិយាកាស ដើម្បីចៀសវាងឱ្យបាន100% កុំឱ្យប៉ះពាល់ដល់សុខភាពមនុស្ស ក៏ដូចជាភាវៈមានជីវិតនៅលើផែនដីដែរ ដោយគោលដៅក្នុងការបង្កើតក្រុមហ៊ុនកែច្នៃសំរាមនេះគ្រោងធ្វើនៅក្នុងខេត្តចំនួន2 ក្នុងប្រទេសកម្ពុជា គឺខេត្តព្រះសីហនុ និងខេត្តសៀមរាប។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានថ្លែងគាំទ្រគម្រោងខាងលើ ដោយបានលើកឡើងថា ការគិតគូរពីការងារគ្រប់គ្រងសំរាម និងកាក-សំណល់ និងការកែច្នៃ គឺជាគោលដៅសំខាន់ដែលក្រសួងត្រូវជំរុញឱ្យមានការអនុវត្តស្របតាមបច្ចេកវិទ្យាទំនើបដែលជាលទ្ធភាពយើងអាចធ្វើបាន។ ឯកឧត្តមក៏បានស្នើឱ្យមានការគិតគូរអំពីតម្លៃនៃការលក់ថាមពលដែលបំប្លែងពីសំរាម និងអគ្គិសនីដែលផលិតបានមកត្រូវលក់នៅកន្លែងណា ព្រោះវាជាផ្នែកមួយដើម្បីចូលរួមក្នុងវិស័យបរិស្ថាន។
លោករដ្ឋមន្ត្រីបានបញ្ជាក់ថា ក្រសួងបរិស្ថានបាន និងកំពុងយកចិត្តទុកដាក់កម្រិតគោលនយោបាយក្នុងការរៀបចំកែលម្អប្រព័ន្ធគ្រប់គ្រងសំណល់រឹង សំរាម ការរៀបចំក្រុង ការរៀបចំទីលានចាក់សំរាម ជំរុញការកែច្នៃ និងការប្រើប្រាស់ឡើងវិញតាមរយៈការសហការជាមួយក្រុមហ៊ុនទទួលទិញអេតចាយ ក្រុមហ៊ុនវិនិយោគ និងដៃគូអភិវឌ្ឍន៍នានាដើម្បីធ្វើយ៉ាងណាឱ្យ សុខភាព សោភណភាពនៃការអនុវត្តប្រកបដោយប្រសិទ្ធភាព និងការរស់នៅរបស់ប្រជាជនកាន់តែល្អប្រសើរឡើង។
ពាក់ព័ន្ធករណីនេះលោក នេត្រ ភក្ត្រា អ្នកនាំពាក្យក្រសួងបរិស្ថានមានប្រសាសន៍ថា នេះគ្រាន់តែជាព័ត៌មានបឋមប៉ុណ្ណោះ ក្រុមហ៊ុនមិនទាន់មានផែនការជាក់លាក់នៅឡើយទេក្នុងជំនួបជាមួយឯកឧត្តមរដ្ឋមន្ត្រីកាលពីសប្តាហ៍មុន ដោយសារក្រុមហ៊ុនទើបចូលជូបពិភាក្សាជាមួយថ្នាក់ដឹកនាំកម្ពុជាជាលើកដំបូងប៉ុណ្ណោះ មិនទាន់សុំច្បាប់វិនិយោគជាផ្លូវការនៅឡើយ៕
November 1, 2018
លោក ដួង វីរៈសិទ្ធ ប្រកាសស្វែងរក លោក ឆៃ ឆាយា ម្ចាស់បទ«មួយរាត្រីនឹកតែអូន »
ពិតជាមិនធម្មតាឡើយ លោក ដួង វីរៈសិទ្ធ តែងទទួលបានប្រជាប្រិយភាពដោយការជ្រើសរើសយកបទចម្រៀងចាស់ៗមកសម្រួលតន្ត្រីច្រៀងឡើងវិញដោយភ្ជាប់នូវការរក្សានូវទំនុកច្រៀងរបស់រៀមច្បងម្ចាស់ដើម ហើយកត់សម្គាល់ឃើញថា បទនីមួយៗយកទៅ Cover ឡើងវិញនោះ ភាគច្រើនត្រូវចិត្តត្រូវថ្លើមអ្នកគាំទ្រគ្រប់វ័យតែម្ដង មិនថាចាស់ឬក្មេងទេ ជក់ចិត្តស្ដាប់ចម្រៀងដ៏ផ្អែមស្រទន់របស់លោកជានិច្ច។
ជាក់ស្ដែងថ្មីៗ ម្ចាស់ពានកំពូលតារាចម្រៀងកម្ពុជា I am a Singer Cambodia រូបនេះ បានបញ្ចេញបទចម្រៀង Cover ថ្មីសន្លាង ជាបទរបស់លោក ឆៃ ឆាយា មានចំណងជើងថា « មួយរាត្រីនឹកតែអូន »។ តាមរយៈការបង្ហោះភ្ជាប់ ជាមួយរូបភាព និងឃ្លីវីដេអូ Cover នៃបទនេះ លោក វីរៈសិទ្ធ ក៏បានបញ្ចេញសារប្រកាសស្វែងរក និងចង់ជួបម្ចាស់សំនៀងដើម លោក ឆៃ ឆាយា ផងដែរថា «មកវិញហើយម្តងទៀត…បទចម្រៀងនេះខ្ញុំបកស្រាយឡើងវិញ ព្រោះតែស្រឡាញ់ស្នាដៃរបស់គាត់ ហើយខ្ញុំពិតជាចង់ដឹងណាស់ថាម្ចាស់ស្នាដៃនៅទីណាពេលនេះគាត់យ៉ាងហើយ… ខ្ញុំចង់ជួបចង់ឃើញគាត់បើបងប្អូនស្គាល់រឺដឹងដំណឹងគាត់សូមជួយប្រាប់ខ្ញុំផងសូមអរគុណ….my idol ឆៃ ឆាយា…..»។
សូមបញ្ជាក់ថា តារាចម្រៀងប្រុសលោក ឆៃ ឆាយា គឺឈ្មោះពិត ប៉ា សុទ្ធី ជាតារាចម្រៀងជើងចាស់ ប៉ុន្តែបច្ចុប្បន្នពុំមាននណាម្នាក់ដឹងទេថា តារាជើងចាស់រូបនេះសព្វថ្ងៃ កំពុងស្នាក់នៅស្រុកខ្មែរ ឬក្រៅប្រទេសនៅឡើយទេ៕
October 31, 2018