សកម្មភាពសេដ្ឋកិច្ចកម្ពុជានៅតែរក្សាភាពរឹងមាំក្នុងឆ្នាំ2018នេះជាមួយការព្យាករកំណើនក្នុងរង្វង់7% ប៉ុន្តែមានបញ្ហាខ្លះដែលកម្ពុជាត្រូវយកចិត្តទុកដាក់ខ្លាំង នោះគឺទុនដែលពូនផ្ដុំក្នុងអចលនទ្រព្យ។ នេះជាការមើលឃើញរបស់មន្ត្រីជំនាញរបស់មូលនិធិរូបិយប័ណ្ណអន្តរជាតិ IMF (International Monetary Fund)ដែលបានផ្ញើរបាយការណ៍ស្ថានភាពទៅស្ថាប័នរដ្ឋាភិបាល។
IMF បានឱ្យដឹងថា ភាពរឹងមាំនៃកំណើនសេដ្ឋកិច្ចក្នុងវិស័យនេះត្រូវបានគាំទ្រដោយតម្រូវការខ្លាំងក្លាពីក្រៅប្រទេស និងគោលនយោបាយហិរញ្ញវត្ថុសាធារណៈដែលត្រូវបានពង្រីក ខណៈអតិផរណាស្ថិតនៅក្រោម2.5%។
របាយការណ៍បានបញ្ជាក់ថា “កម្ពុជារីកចម្រើនគួរឱ្យកត់សម្គាល់ឆ្ពោះទៅរកគោលដៅអភិវឌ្ឍន៍ប្រកបដោយនិរន្តរភាព ដោយសារកំណែទម្រង់ និងកំណើនសេដ្ឋកិច្ចគួរឱ្យចាប់អារម្មណ៍ក្នុងរយៈពេលប៉ុន្មានឆ្នាំមកនេះ។ ចំណូលប្រជាជនបានកើនឡើងលឿន អត្រាភាពក្រីក្របានថយចុះ ហើយសេដ្ឋកិច្ចបានចាប់ផ្តើមធ្វើពិពិធកម្មបន្តិចម្តង”។
ប៉ុន្តែទន្ទឹមនឹងនេះ IMFបានទាក់ទាញការយកចិត្តទុកដាក់ខ្លាំងចំពោះលំហូរទុន ដែលបានពូនផ្តុំនៅក្នុងវិស័យអចលនទ្រព្យ។ IMFឱ្យដឹងថា ឥណទានក្នុងវិស័យធនាគារបានប្រមូលផ្តុំក្នុងវិស័យអចលនទ្រព្យ និងសំណង់ដែលត្រូវបានព្យាករកំណើនក្នុងរង្វង់20% ក្នុងឆ្នាំ2018នេះ។
IMFបានពន្យល់ដូច្នេះថា កង្វល់ជុំវិញគុណភាពឥណទាន ការពឹងផ្អែកមូលធនក្រៅប្រទេស ការពូន-ផ្តុំក្នុងវិស័យអចលនទ្រព្យ និងការឱ្យខ្ចីក្រៅច្បាប់ដោយអ្នកអភិវឌ្ឍន៍អចលនទ្រព្យ អាចបង្កហានិភ័យសម្រាប់ស្ថិរភាពវិស័យហិរញ្ញវត្ថុ និងម៉ាក្រូសេដ្ឋកិច្ចរបស់កម្ពុជា។
IMFជំរុញឱ្យកម្ពុជាដាក់ចេញនូវវិធានការមួយចំនួនបន្ថែមទៀត បើទោះបីជាកន្លងមកធនាគារជាតិនៃកម្ពុជាបានរឹតបន្តឹងវិធានការមួយចំនួនរួចមកហើយក៏ដោយ។ អ្នកជំនាញIMF ណែនាំឱ្យរដ្ឋាភិបាលបង្កើនការត្រួតពិនិត្យចំពោះការផ្តល់កម្ចីសម្រាប់វិស័យអចលនទ្រព្យ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនពិគ្រោះយោបល់ (EMC)បានបញ្ជាក់ថា៖ “ជារួមការផ្តល់ហិរញ្ញប្បទានទៅក្នុងវិស័យអ្វីមួយ គឺមិនមែនហិរញ្ញប្បទានជាអ្នកកំណត់កំណើនរបស់វិស័យមួយនោះច្បាស់លាស់ទេ អ្វីដែលជាកំណត់កំណើនរបស់វិស័យហ្នឹង គឺអាស្រ័យទៅលើតម្រូវការជាក់ស្តែងរបស់ទីផ្សារ។ ហិរញ្ញប្បទាន ឬការផ្តល់កម្ចីគ្រាន់តែជាការគាំទ្រទៅលើវិស័យនោះប៉ុណ្ណោះ។ ការsupport នេះកាលណាវាពូនផ្តុំខ្លាំង វាអាចក្លាយទៅជាហានិភ័យ នេះវាជារឿងធម្មតា។ ម្យ៉ាងទៀតនៅក្នុងទីផ្សារអចលនទ្រព្យជារឿយៗជាធម្មតាដល់ដំណាក់កាលមួយវាមានការរីកចម្រើនយឺត ឬវាអាច 4-10ឆ្នាំកើតមានវិបត្តិម្តងអុីចឹងទៅ។ គ្រាន់តែស្ថានភាពបច្ចុប្បន្នវាអាចដល់វដ្តរបស់វាហើយ គួបផ្សំនឹងហិរញ្ញប្បទានពូនផ្តុំក្នុងវិស័យនេះពេកទៅ វាអាចហួសនឹងសមត្ថភាពទិញនៃតម្រូវការជាក់ស្តែងទីផ្សារ”។
លោកបានបញ្ជាក់បន្ថែមថា នេះគ្រាន់តែជាការព្រួយបារម្ភប៉ុណ្ណោះ បើយើងសិក្សាលម្អិតវាអាចតិចឬច្រើន វាអាចកើតឡើងនៅក្នុងទីផ្សារគេហដ្ឋាន ខុនដូ។ល។ ព្រោះវាទាក់ទងនឹងអ្នកទិញបរទេស ដូច្នេះសក្តានុពលរបស់វាជារឿងមួយផ្សេង។ ការវិភាគរបស់IMF មិនមែនជារឿងខុសអ្វីទេ គ្រាន់តែជាការឱ្យជាសញ្ញាថា ជាហានិភ័យ ជាការដាស់ចំណាប់អារម្មណ៍ពីអ្នកប្រឡូកក្នុងវិស័យនេះ និងស្ថាប័នពាក់ព័ន្ធឱ្យសិក្សាឱ្យបានលម្អិតពីបញ្ហានេះឱ្យបានស៊ីជម្រៅ។
លោក ង៉ែត ជូ បានពន្យល់ថា ជារឿងសមហេតុសមផលដែលIMFបានលើកឡើងពីកម្ចីក្រៅច្បាប់ដោយអ្នកអភិវឌ្ឍន៍អចលនទ្រព្យ ការពឹងផ្អែកមូលធនក្រៅប្រទេស ការពូនផ្តុំក្នុងវិស័យអចលនទ្រព្យ និងវាអាចនឹងបង្កហានិភ័យសម្រាប់ស្ថិរភាពវិស័យហិរញ្ញវត្ថុ។
លោកបញ្ជាក់ទៀតថា “ធម្មតា ទោះបីជាប្រភពទុនក្នុងស្រុកក្តី ក្រៅស្រុកក្តីដែលចូលមកក្នុងវិស័យអចលនទ្រព្យ តែកាលណាវិស័យណាកើតមានវិបត្តិ វាអាចជះឥទ្ធិពលចំពោះលើវិស័យហិរញ្ញវត្ថុផងដែរ ពីព្រោះថា កម្ចីហិរញ្ញប្បទានសម្រាប់ការអភិវឌ្ឍវិស័យអចលនទ្រព្យ ក៏គាត់ទទួលបានពីធនាគារដែរ ដើម្បីយកសាច់ប្រាក់នោះមកអភិវឌ្ឍគម្រោង ដូច្នេះបើការអភិវឌ្ឍគាត់មានបញ្ហា ទីផ្សារគាត់មានបញ្ហា គាត់លក់មិនចេញ ឬអ្នកទិញគាត់មិនមានលទ្ធភាពបង់ឱ្យគ្រប់ និងបង់ឱ្យទាន់ពេលវេលា នោះវិបត្តិអាចនឹងកើតមានឡើង”។
លោក ង៉ែត ជូ បានអះអាងថា ចំពោះលំហូរទុនដែលពូនផ្តុំក្នុងវិស័យអចលនទ្រព្យ វាតែងកើតមានឡើងនូវវិបត្តិ (វាអាចវិវឌ្ឍយឺត ឬនៅទ្រឹង)ដូចកាលពីឆ្នាំ2007-2008 និងឆ្នាំ2011-2012 វាបានងើបឡើងមកវិញ ដែលនេះជារឿងធម្មតា តែក្នុងខណៈពេលដែលវដ្តហ្នឹងជិតមកដល់ ហើយលំហូរទុនពូនផ្តុំខ្លាំងតែលើវិស័យអចលនទ្រព្យ ដូច្នេះការព្រួយបារម្ភជារឿងត្រឹមត្រូវ ដែលយើងអាចរិះរកវិធីដើម្បីទប់ស្កាត់ដើម្បីកុំឱ្យមានវិបត្តិ កុំឱ្យវាកើតឡើងធ្ងន់ធ្ងរ ឬកុំឱ្យវិបត្តិនោះអូសបន្លាយពេលយូរនាំឱ្យខូចប្រយោជន៍៕
