សង្គម និងសេដ្ឋកិច្ច - La Reine Media

រយៈពេល 9ខែ ឆ្នាំ2018 កម្ពុជារកចំណូលពីវិស័យជលផលបានត្រឹមតែ 32ម៉ឺនដុល្លារ

ទិន្នន័យបង្ហាញថា ការនាំចេញផលនេសាទបានចំនួនជាង 11,030តោន ក្នុងចំណោមនោះផលិតផលកែច្នៃមានចំនួន 3,970តោន ដែលធ្វើឱ្យកម្ពុជាប្រមូលប្រាក់ចំណូលពីសេវានានាក្នុងវិស័យជលផលបានជាង 32ម៉ឺនដុល្លារក្នុងរយៈពេល9ខែនៃឆ្នាំ2018។ នេះបើយោងតាមរបាយការណ៍ក្រសួងកសិកម្ម។

រដ្ឋាភិបាលកំណត់ទិសដៅនាំចេញផលិតផលនេសាទ 20,000តោនក្នុងឆ្នាំ2018។ តួលេខនៃរបាយការណ៍បានបង្ហាញថា នៅក្នុងវិស័យជលផល កម្ពុជាបាននាំចេញផលិតផលនេសាទស្រស់ជាង10,000តោន កើនឡើង 200តោន ធៀបនឹងរយៈពេលដូចគ្នាកាលពីឆ្នាំមុន។ ខណៈរបាយការណ៍បានបង្ហាញតម្លៃនៃការប្រមូលចំណូលបានពីតម្លៃសេវាពីវិស័យជលផលបាន 321,304ដុល្លារ។

ផែនការប្រចាំឆ្នាំរបស់រដ្ឋាភិបាលនឹងត្រូវប្រមូលចំណូល 752,249ដុល្លារពីសេវានានាក្នុងវិស័យជលផល តែនៅឆ្នាំនេះបានធ្លាក់ចុះពី 315ដុល្លារធៀបនឹងឆ្នាំមុន។ នេះបើយោងតាមរបាយការណ៍។

លោក ស្រី វុឌ្ឍី អ្នកនាំពាក្យក្រសួងកសិកម្មបានឱ្យដឹងថា ប្រាក់ចំណូលពីវិស័យជលផល គឺជាផ្នែកមួយនៃចំណូលសម្រាប់ថវិកាជាតិ ដែលបានពីការផាកពិន័យ ឬតម្លៃសេវាពីការធ្វើជំនួញនៅក្នុងវិស័យនេះ។

ក្រសួងកសិកម្មបង្ហាញថា ករណីនេសាទខុសច្បាប់បានធ្លាក់ចុះប្រហែល 12%នៅក្នុងឆមាសទី1នៃឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ ក្នុងការបង្ក្រាបការនេសាទខុសច្បាប់នេសាទ អួនចាប់ត្រីរាប់រយគីឡូម៉ែត្រ និងឧបករណ៍នេសាទអគ្គិសនីចំនួន 244គ្រឿងត្រូវបានរឹបអូសហើយត្រីជិត 20,000គីឡូក្រាមត្រូវបានដោះលែង។

លោកស្រី Saray Samadee អ្នកសម្របសម្រួលគម្រោងទីភ្នាក់ងារ USAID បាននិយាយនៅក្នុងសេចក្តីថ្លែងការណ៍មួយថា ច្រកទន្លេមេគង្គត្រូវបានចាត់ទុកថាជាច្រករបៀងដ៏សំខាន់មួយក្នុងការធ្វើបំផ្លាស់ទីរបស់ត្រី និងត្រូវបានគេចាត់ទុកថា នៅក្នុងនោះមានទាំងប្រភេទត្រីដែលជិតផុតពូជទៀតផង។ ការធ្វើបំផ្លាស់ទីរបស់ត្រីនៅតាមទន្លេមេគង្គជួយទ្រទ្រង់ការនេសាទទឹកសាបធំបំផុតរបស់ពិភពលោក និងចិញ្ចឹមជីវិតប្រជាជនរាប់លាននាក់។

លោកស្រីបានមានប្រសាសន៍បន្ថែមថា៖ «វិធីសាស្ត្រគ្រប់គ្រងយុទ្ធសាស្ត្រដែលមានលក្ខណៈជាយុទ្ធសាស្ត្រ គឺជាវិធីចាំបាច់ដើម្បីភ្ជាប់ការគ្រប់គ្រងទីជម្រកសំខាន់ កាត់បន្ថយការគំរាមកំហែង និងការពារធនធានជលផលដ៏សំខាន់នេះ»។

លោក អេង ជាសាន អគ្គនាយករដ្ឋបាលជលផលបានមានប្រសាសន៍ថា បឹងទន្លេសាប គឺជាបឹងមួយក្នុងចំណោមបឹងដែលមានផលិតភាព និងចម្រុះជាងគេបំផុតនៅក្នុងពិភពលោក។ លោកមានប្រសាសន៍ថា ត្រីជិត 900ប្រភេទត្រូវបានគេកត់ត្រានៅក្នុងអាងទន្លេមេគង្គដែលក្នុងនោះមាន 165 ប្រភេទដែលជាប្រភេទត្រីដែលធ្វើការបំផ្លាស់ទី។

លោក ជាសាន មានប្រសាសន៍ថា រដ្ឋាភិបាលក៏បានដាក់ស្តុកត្រីប្រភេទដែលជិតផុតពូជនៅក្នុងតំបន់អភិរក្ស ហើយគ្រោងនឹងធ្វើឱ្យប្រសើរឡើងនូវការត្រួតពិនិត្យការជួញដូរខុសច្បាប់ខណៈដោយបង្កើននូវការយល់ដឹង៕

November 6, 2018

Mayweather នឹងប្រកួតជាមួយកីឡាករប្រដាល់សេរី Tenshin នៅជប៉ុន

កីឡាករប្រដាល់សកល Floyd Mayweather នឹងប្រកួតជាមួយកីឡាករប្រដាល់សេរី និងយុទ្ធគុនចម្រុះ TenshinNasukawa ក្នុងប្រទេសជប៉ុននៅថ្ងៃទី31 ខែធ្នូ ក្រោយពីបានចុះហត្ថលេខាលើកិច្ចសន្យាមួយជាមួយនឹងក្រុមហ៊ុនរៀបចំការប្រកួតយុទ្ធគុនចម្រុះ។

អតីតម្ចាស់ខ្សែក្រវាត់ពិភពលោក 5ប្រភេទទម្ងន់ផ្សេងគ្នា Mayweather បានផ្តួលកីឡាករ Conor McGregor របស់អង្គភាព UFC ក្នុងការប្រកួតប្រដាល់សកលកាលពីខែសីហា ឆ្នាំ2017 ដើម្បីបន្ថែមកំណត់ត្រាឈ្នះរបស់រហូតដល់ទៅ 50លើក មិនដែលចាញ់។

រូបគេបាននិយាយកាលពីពេលថ្មីៗនេះ អំពីការប្រកួតដ៏គួរឱ្យចាប់អារម្មណ៍មួយជាមួយនឹងកីឡាករ KhabibNurmagomedov របស់ UFC និងកីឡាករ Manny Pacquiao។ រូបមន្ត និងលក្ខខណ្ឌសម្រាប់ការប្រកួតរបស់គេជាមួយនឹង Nasukawa មិនទាន់សម្រេចនៅឡើយទេ។ កីឡាករសញ្ជាតិអាមេរិកវ័យ 41ឆ្នាំរូបនេះដែលមិនធ្លាប់បានប្រកួតសោះ បើគិតចាប់តាំងពីចាកចេញពីការចូលនិវត្តន៍ដើម្បីជួបជាមួយនឹង McGregor បានឱ្យដឹងថា៖ «ខ្ញុំធ្វើអ្វីដែលខុសពីគេ ខ្ញុំចង់បង្ហាញពីទេពកោសល្យរបស់ខ្ញុំនៅខាងក្រៅសហរដ្ឋអាមេរិក និងស្ថិតក្នុងការប្រកួតដ៏ពិសេស។ ខ្ញុំចង់ផ្តល់ឱ្យមនុស្សជាច្រើននូវអ្វីដែលពួកគេចង់បានដូចជា ឈាម ញើស និងទឹកភ្នែក»។

Mayweather បានបញ្ជាក់ថា ប្រភេទទម្ងន់ និងលក្ខខណ្ឌសម្រាប់ការប្រកួតនេះ នឹងត្រូវពិភាក្សានៅរយៈពេលប៉ុន្មានសប្តាហ៍ខាងមុខទៀត។ កីឡាករជប៉ុន Nasukawa វ័យ 20ឆ្នាំ ប្រកួតទាំងក្នុងប្រដាល់សេរី និងយុទ្ធគុនចម្រុះសម្រាប់អង្គភាព RIZIN Fighting Federation ដែលជាក្រុមហ៊ុន Mayweather បានចុះហត្ថលេខា។

Nasukawa ដែលមានកំណត់ត្រាឈ្នះ 27លើក មិនដែលចាញ់ក្នុងប្រដាល់សេរី និង៤លើកមិនដែលចាញ់នៅក្នុង MMA នោះ បានឱ្យដឹងថា៖ «វាពិតជាសំណើដ៏គួរឱ្យភ្ញាក់ផ្អើលមួយ ប៉ុន្តែខ្ញុំបានទទួលយកដោយគ្មានការស្ទាក់ស្ទើរឡើយ»៕

ប្រភពពី៖ BBC

November 6, 2018

ចិញ្ចឹមទា ទទួលបានប្រាក់ចំណូលខ្ពស់ ព្រោះអាចលក់បានទាំងស៊ុត និងសាច់

កសិករដែលប្រកបរបរចិញ្ចឹមទាជាច្រើនគ្រួសារនៅក្នុងខេត្តកណ្តាលកំពុងតែមានភាពសប្បាយរីករាយ ដោយសារតែមុខរបរនេះអាចធ្វើឱ្យជីវភាពរស់នៅរបស់ពួកគាត់មានភាពល្អប្រសើរឡើងកាន់តែខ្លាំងដោយពួកគាត់អាចប្រមូលស៊ុតទាលក់បានរៀងរាល់ថ្ងៃ និងថែមទាំងអាចចាប់ទាលក់ជាសាច់បានទៀតផងនៅពេលដែលវាលែងសូវផ្តល់ស៊ុត។

កំពុងអង្គុយមើលហ្វូងសត្វទានៅក្នុងរោង អ៊ំស្រី សំបូរ កសិករចិញ្ចឹមសត្វទានៅក្នុងភូមិសាឡុង ឃុំសាឡុង ស្រុកខ្សាច់កណ្តាល ខេត្តកណ្តាលបានមានប្រសាសន៍ឱ្យដឹងថា ដោយមើលឃើញថាមុខរបរនេះអាចរកប្រាក់បាន កូនប្រុសរបស់គាត់ក៏បានចាប់ផ្តើមធ្វើរោងចិញ្ចឹមសត្វទានៅលើផ្ទៃដីជិតកន្លះហិកតាដោយបំបែកជារោងចិញ្ចឹមចំនួន2 ដោយរោងទី1 មានសត្វទាសរុបចំនួន 2,080ក្បាល ផ្តល់ស៊ុតប្រមាណជា1,700គ្រាប់ជារៀងរាល់ថ្ងៃ ហើយរោងទី2 ចិញ្ចឹមសត្វទាចំនួន 1,700ក្បាល ផ្តល់ស៊ុតជាមធ្យមប្រមាណជា 1,350គ្រាប់ជារៀងរាល់ថ្ងៃផងដែរ ដែលរោងទី2នេះមានទាចិញ្ចឹមយកស៊ុតច្រើនជាងរោងទី1។

អ៊ំស្រីបញ្ជាក់ថា សម្រាប់ពងទា អ៊ំមិនបាច់ដឹកយកទៅលក់នៅផ្សារទេ គឺមានម៉ូយគេដើរប្រមូលទិញដល់កសិដ្ឋានតែម្តង ដោយលក់ក្នុងតម្លៃបោះដុំក្នុងមួយគ្រាប់ចន្លោះពី350 ទៅ450រៀល ទៅតាមពងតូច ឫពងធំ ហើយមានប៉ុន្មានក៏ម៉ូយរាប់យកទាំងអស់ដែរ។ អ៊ំស្រីបានបញ្ជាក់ទៀតដែរថា ម៉ូយដែលមកទទួលម៉ៅទិញស៊ុតទាដល់ទីតាំងនេះ ក៏បានដឹកចំណីសម្រាប់សត្វទាពីក្រុមហ៊ុនយកមកឱ្យដល់កសិដ្ឋានរបស់អ៊ំស្រីផងដែរ ដោយចំណីទាមួយបាវថ្លៃ 48,000រៀល ហើយកាត់កងគ្នារវាងថ្លៃស៊ុតដែលលក់ចេញនឹងថ្លៃចំណីដែលទិញចូលនេះ។ សម្រាប់សត្វទាចំនួន 2,080ក្បាលនោះ ជាមធ្យមគេត្រូវផ្តល់ចំណីឱ្យវាប្រមាណជា 9បាវក្នុងមួយថ្ងៃ ហើយសម្រាប់រោងកសិដ្ឋានទី2 ដែលមានចំនួន 1,700ក្បាលនោះ គេត្រូវផ្តល់ចំណីឱ្យវាស៊ីអស់ចំនួន 6បាវក្នុងមួយថ្ងៃ។

អ៊ំស្រីអ្នកចិញ្ចឹមទាដដែលបានបញ្ជាក់ថា ការចិញ្ចឹមទាយកពងនេះ គេមិនមែនចិញ្ចឹមវាតាំងពីតូចមកទេពោលគឺម្ចាស់កសិដ្ឋានត្រូវដើរប្រមូលទិញទា ឬឱ្យម៉ូយប្រមូលទិញទាក្រមុំៗដែលជិតផ្តល់ស៊ុត ឬចាប់ផ្តើមផ្តល់ស៊ុតមកឱ្យគាត់ក្នុងតម្លៃមួយក្បាល 18,000រៀល ទៅ19,000រៀល ដើម្បីចៀសវាងកុំឱ្យខាតកម្លាំងពលកម្ម ចំណាយពេលចិញ្ចឹមវាយូរ និងអស់លុយទិញចំណីយូរខែឱ្យវាស៊ី ទម្រាំសត្វទាផ្តល់ផលត្រឡប់មកវិញ និងចិញ្ចឹមបានប្រហែលជា 1ឆ្នាំ ឬជាង1ឆ្នាំ គេចាប់ផ្តើមចាប់មេទាទាំងនោះលក់ចេញទៅវិញក្នុងមួយក្បាលតម្លៃ 10,000-10,500រៀលយកដើមខ្លះមកវិញ។

អ៊ំស្រីបានប្រាប់ឱ្យដឹងដែរថា មុននឹងទិញមេទាមកចិញ្ចឹម គេត្រូវធ្វើរោងឱ្យរូចជាស្រេច ដែលត្រូវចំណាយលុយច្រើនគួរសមដែរ ទៅតាមរោងតូច ឬរោងធំ ហើយបើសិនជាមានស្រះទឹកនៅក្បែរផងរឹតតែប្រសើរទៅទៀត ព្រោះថា សត្វទា វាចូលចិត្តលេងទឹក ឬចុះរកចំណីនៅក្នុងស្រះ ប៉ុន្តែយ៉ាងណាក៏ដោយ កសិករនៅក្នុងភូមិ-ឃុំខាងលើមិនសូវជាបណ្តោយឱ្យទាចុះលេងទឹកក្នុងស្រះនោះទេ ព្រោះថាទាអាចទម្លាក់ស៊ុតចោលនៅក្រៅរោង នាំឱ្យលំបាកដើរប្រមូល ឬត្រូវបាត់បង់អស់មួយចំនួន។

លោក នាង ម៉ាប់ ឈ្មួញកណ្តាលដែលចិញ្ចឹមទាខ្លួនឯងផង យកចំណីពីរោងចក្រមកផ្គត់ផ្គង់ឱ្យកសិករចិញ្ចឹមទាផង និងប្រមូលទិញពងទាពីកសិករក្នុងភូមិផងនោះ មានប្រសាសន៍ថា ក្នុងមួយថ្ងៃគាត់ដើរប្រមូលទិញពងទាបានចំនួនប្រមាណជា 30,000គ្រាប់ពីម្ចាស់កសិដ្ឋានជាង10កន្លែងក្នុងភូមិ-ឃុំខាងលើ ហើយស៊ុតទាំងនេះត្រូវបានកាត់កងជាមួយតម្លៃចំណីដែលកសិករទទួលទិញពីគាត់វិញ ហើយនៅសល់ប៉ុន្មានទើបផ្តល់ជាលុយបន្ថែម។ លោកថា រយៈពេល 2ឆ្នាំចុងក្រោយនេះ កសិករក្នុងភូមិមានជីវភាពធូរធារដោយសារតែការចិញ្ចឹមទា ធ្វើឱ្យពួកគាត់អាចយកលុយពីធនាគារមករកស៊ី ឬធ្វើផ្ទះ ហើយយកលុយចំណេញពីការលក់ស៊ុតទាទៅសងធនាគារវិញបានយ៉ាងងាយស្រួល។

លោកថា ការចិញ្ចឹមទាទើបតែមានការរីករាលដាលច្រើនឡើងក្នុងរយៈពេល 2ឆ្នាំចុងក្រោយនេះទេខណៈកាលពីប៉ុន្មានឆ្នាំមុន ស៊ុតទាត្រូវបាននាំចូលពីក្រៅប្រទេសក្នុងចំនួនដ៏ច្រើន ដោយស៊ុតទាដែលនាំចូលពីក្រៅប្រទេសមកនេះមិនសូវមានគុណភាព និងមិនសូវមានរសជាតិឆ្ងាញ់ ទើបអតិថិជនខ្មែរយើងមិនសូវគាំទ្រ ហើយងាកមកគាំទ្រស៊ុតទារបស់កសិករក្នុងស្រុកវិញ។ ចំណែកស៊ុតទាដែលលោកប្រមូលបានពីកសិករទាំងអស់ លោកបានយកទៅលក់បន្តឱ្យម៉ូយនៅក្នុងក្រុងភ្នំពេញ និងលក់ឱ្យម៉ូយនានានៅក្នុងខេត្តជិតៗ។

ចំពោះការចិញ្ចឹមសត្វទានេះ លោកក៏មិនបានចិញ្ចឹមវាតាំងពីតូចដែរ គឺលោកបានប្រមូលទិញសត្វទាដែលធំស្រាប់ពីកសិករតាមជនបទ នៅតាមខេត្តនានា ដូចជាខេត្តកំពង់ចាម ព្រៃវែង និងខេត្តស្វាយរៀងជាដើមមកចិញ្ចឹមយ ស៊ុត តែម្តង។ ហើយការចិញ្ចឹមទាយកស៊ុតនេះ គេមិនចាំបាច់ដាក់ឈ្មោលឱ្យជាន់ឡើយ ដោយសារស៊ុតអត់ឈ្មោលនេះវាមានទំហំធំជាងស៊ុតមានឈ្មោលជាន់ គ្រាន់តែថា ស៊ុតទាដែលអត់ឈ្មោលនេះ គេមិនអាចយកទៅភ្ញាស់បានតែប៉ុណ្ណោះ។

គួរបញ្ជាក់ដែរថា កសិករនៅក្នុងឃុំសាឡុងនេះចិញ្ចឹមសត្វទាជាលក្ខណៈទ្រង់ទ្រាយធំមានចំនួន 70គ្រួសារ និងមានកសិដ្ឋានសរុបចំនួន 90កសិដ្ឋានហើយក្នុងមួយកសិដ្ឋានមានទាចាប់ពីចំនួន 1,000ក្បាលឡើងទៅ៕

November 5, 2018

ក្រុមហ៊ុនចិនដ៏ធំមួយគ្រោងបោះទុនជាង 80លានដុល្លារកែច្នៃសំរាមនៅកម្ពុជា

ដើម្បីចូលរួមកែលម្អសោភណភាព លើកកម្ពស់បរិស្ថាននៅកម្ពុជា ឱ្យកាន់តែប្រសើរឡើងក្រុមហ៊ុនដ៏ធំរបស់ចិនមួយគ្រោងបោះទុនវិនិយោគក្នុងទឹកប្រាក់ 86លានដុល្លារអាមេរិកដើម្បីកែច្នៃសំរាមនៅកម្ពុជាឱ្យទៅជាថាមពលអគ្គិសនីសម្រាប់ប្រើប្រាស់ជាប្រយោជន៍ក្នុងសង្គមទាំងមូល។

តំណាងក្រុមហ៊ុន Shandong Wangeng Energy Technology Co.,LTD បានលើកឡើងថា ក្នុងគម្រោងផែនការទុនវិនិយោគដែលក្រុមហ៊ុនគ្រោងចំណាយខាងលើ មានបំណងកែច្នៃសំរាមនៅកម្ពុជាឱ្យក្លាយទៅជាកម្លាំងថាមពលប្រើប្រាស់ជាប្រយោជន៍សង្គមទាំងមូល ដែលអាចបង្កើត ថាមពលអគ្គិសនីដោយកង្ហារខ្យល់ថាមពលអគ្គិសនីដោយជីវឧស្ម័ន ថាមពលអគ្គិសនីដោយជីវម៉ាស់ជាដើម។

អ្នកតំណាងខាងលើបានបន្តថា ក្រុមហ៊ុនក៏បានលើកឡើងអំពីការដុតសំរាមដោយប្រើបច្ចេកវិទ្យាក្នុងការកែច្នៃធនធានដែលមានការគិតគូរពីបរិស្ថាន និងអាចមានលទ្ធភាពបន្ថយឈានដល់ចំណុចសូន្យ ចំពោះផលប៉ះពាល់ឧស្ម័នបញ្ចេញចោលទៅបរិយាកាស ដើម្បីចៀសវាងឱ្យបាន100% កុំឱ្យប៉ះពាល់ដល់សុខភាពមនុស្ស ក៏ដូចជាភាវៈមានជីវិតនៅលើផែនដីដែរ ដោយគោលដៅក្នុងការបង្កើតក្រុមហ៊ុនកែច្នៃសំរាមនេះគ្រោងធ្វើនៅក្នុងខេត្តចំនួន2 ក្នុងប្រទេសកម្ពុជា គឺខេត្តព្រះសីហនុ និងខេត្តសៀមរាប។

ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានបានថ្លែងគាំទ្រគម្រោងខាងលើ ដោយបានលើកឡើងថា ការគិតគូរពីការងារគ្រប់គ្រងសំរាម និងកាកសំណល់ និងការកែច្នៃ គឺជាគោលដៅសំខាន់ដែលក្រសួងត្រូវជំរុញឱ្យមានការអនុវត្តស្របតាមបច្ចេកវិទ្យាទំនើបដែលជាលទ្ធភាពយើងអាចធ្វើបាន។ ឯកឧត្តមក៏បានស្នើឱ្យមានការគិតគូរអំពីតម្លៃនៃការលក់ថាមពលដែលបំប្លែងពីសំរាម និងអគ្គិសនីដែលផលិតបានមកត្រូវលក់នៅកន្លែងណា ព្រោះវាជាផ្នែកមួយដើម្បីចូលរួមក្នុងវិស័យបរិស្ថាន។

លោករដ្ឋមន្ត្រីបានបញ្ជាក់ថា ក្រសួងបរិស្ថានបាន និងកំពុងយកចិត្តទុកដាក់កម្រិតគោលនយោបាយក្នុងការរៀបចំកែលម្អប្រព័ន្ធគ្រប់គ្រងសំណល់រឹង សំរាម ការរៀបចំក្រុង ការរៀបចំទីលានចាក់សំរាម ជំរុញការកែច្នៃ និងការប្រើប្រាស់ឡើងវិញតាមរយៈការសហការជាមួយក្រុមហ៊ុនទទួលទិញអេតចាយក្រុមហ៊ុនវិនិយោគ និងដៃគូអភិវឌ្ឍន៍នានាដើម្បីធ្វើយ៉ាងណាឱ្យ សុខភាព សោភណភាពនៃការអនុវត្តប្រកបដោយប្រសិទ្ធភាព និងការរស់នៅរបស់ប្រជាជនកាន់តែល្អប្រសើរឡើង។

ពាក់ព័ន្ធករណីនេះលោក នេត្រ ភក្ត្រា អ្នកនាំពាក្យក្រសួងបរិស្ថានមានប្រសាសន៍ថា នេះគ្រាន់តែជាព័ត៌មានបឋមប៉ុណ្ណោះ ក្រុមហ៊ុនមិនទាន់មានផែនការជាក់លាក់នៅឡើយទេក្នុងជំនួបជាមួយឯកឧត្តមរដ្ឋមន្ត្រីកាលពីសប្តាហ៍មុន ដោយសារក្រុមហ៊ុនទើបចូលជូបពិភាក្សាជាមួយថ្នាក់ដឹកនាំកម្ពុជាជាលើកដំបូងប៉ុណ្ណោះ មិនទាន់សុំច្បាប់វិនិយោគជាផ្លូវការនៅឡើយ៕

November 5, 2018

រន្ធត់ណាស់!! លោក ឆាយ វីរៈយុទ្ធ កំពុងតែច្រៀងសុខៗ ស្រាប់កម្លាំងខ្យល់បោករលំឆាកបាក់ខ្ទេចខ្ទី

នៅរាត្រីថ្ងៃទី 4 ខែវិច្ឆិកា ឆ្នាំ 2018 នេះដោយសារតែមានភ្លៀង លាយលំខ្យល់ខ្លាំងពេក ធ្វើឱ្យដួលរំលំឆាកLEDនៅខាងក្រោយ ស្របពេលកម្មវិធីកំពុងផ្សាយផ្ទាល់កម្មវិធីតន្ត្រីមួយ ក្នុងខេត្តកំពង់ស្ពឺ នេះបើតាមការបង្ហោះរូបភាព និងវីដេអូនៅលើបណ្ដាញសង្គមហ្វេសប៊ុក គឺមើលឃើញថា កំឡុងពេលបទចម្រៀងរបស់លោកឆាយ វីរៈយុទ្ធ កំពុងច្រៀង និងរាំជាមួយក្រុមរាំផងនោះ ភ្លាមៗស្រាប់តែមានកម្លាំងខ្យល់ខ្លាំងបោកបក់មក បណ្ដាលឱ្យឆាកតន្ត្រីរង្គើ និងមានសភាពមិនប្រក្រតី។

កម្លាំងខ្យល់ខ្លាំងពេកបានធ្វើឱ្យឆាកLEDនៅខាងក្រោយនោះ ស្រាប់តែដួលរលំស្តែងៗតែម្តង ធ្វើឱ្យក្រុមរាំរបស់លោកភ័យស្លន់ស្លោតែម្តង តែមិនមានបង្កឱ្យមានអ្នករងរបួសនោះទេ គ្រាន់តែកម្មវិធីនោះត្រូវផ្អាកដោយសារសម្រួលបញ្ហាបច្ចេកទេស។ កាន់តែជាក់ច្បាស់ សូមទស្សនារូបភាពខាងក្រោ៖

November 5, 2018

បងប្រុសតារាចម្រៀងស្រី Ariana Grande ប្រកាសរៀបការជាមួយកំឡោះសង្ហាពីររូប

តាមរយៈសារព័ត៌មាន Teenee ដែលទើបចេញផ្សាយនៅពេលថ្មីៗនេះ បានឱ្យដឹងថា បងប្រុសច្បងរបស់តារាចម្រៀងស្រី Ariana Grande គឺលោក Frankie Grande បានប្រកាសប្រាប់អ្នកសារព័ត៌មានថា លោកនឹងរៀបការជាមួយកំឡោះសង្ហាពីរូប ដែលបានទាក់ទងគ្នាអស់រយៈពេលជាង 3 ខែរួចមកហើយ ហើយពួកយើងទាំងបីនាក់ ស្រឡាញ់គ្នាយ៉ាងពិតប្រាកដមែន។

លោក Frankie Grande មានវ័យ 35 ឆ្នាំ បានប្រាប់អ្នកសារព័ត៌មាន Us Weekly បុរសសង្ហាដែលលោកគ្រោងរៀបការជាមួយនោះមាន លោក Mike Pophis ជាវេជ្ជបណ្ឌិត និងលោក Daniel Sinasohn គឺជាមេធាវី ។ លោកបានប្រាប់ទៀតថា អ្នកទាំងពីរគឺជាសង្សារប្រុសរបស់ខ្ញុំ ដែលបានស្រឡាញ់គ្នាអស់រយៈពេលជាង 3ខែមក ក៏ប៉ុន្ដែត្រូវបានបិទបាំង និងលាក់លៀមមិនឱ្យអ្នកណាដឹងទេ ពោលគឺនៅក្នុងតែចង្កោមមនុស្សប្រុសស្រឡាញ់ភេទដូចគ្នា។ បើគិតចាប់ពីការផ្ដើមទំនាក់ទំនងស្គាល់នៅលើបណ្ដាញសង្គម ពួកយើងបានទាក់ទងគ្នាជាក្រុមអស់រយៈពេល 5 ខែមកហើយដែរ។

យ៉ាងណាមិញ តារាចម្រៀងស្រី Ariana Grande បានប្រាប់អ្នកសារព័ត៌មានថា នាងគោរពចំពោះការសម្រេចចិត្តរបស់បងប្រុសនាង បើទោះបីជាគេស្ថិតនៅក្នុងក្រុមមនុស្សស្រឡាញ់ភេទដូចគ្នាក៏ពិតមែន ព្រោះនាងបានទទួលក្ដីស្រឡាញ់ពីបងប្រុសរូបនេះ តាំងពីអាយុ 10 ឆ្នាំមកម្លេះ រហូតធ្វើឱ្យនាងគិតថា នាងគ្មានអារម្មណ៍រើសអើងចំពោះក្ដីស្រឡាញ់បែបនេះឡើយ៕

November 5, 2018

Sterling និង Morata រកបាន 2គ្រាប់ដូចគ្នា ខណៈ Man City និង Chelsea ឈ្នះរៀងៗខ្លួន

ខ្សែប្រយុទ្ធ Raheem Sterling បានស៊ុតបាល់បញ្ចូលទី 2គ្រាប់ ក្រោយពីបានយល់ព្រមបន្តកុងត្រាថ្មីរយៈពេល 5ឆ្នាំជាមួយនឹងក្លិប Manchester City ខណៈដែលក្រុមម្ចាស់ការពារតំណែងជើងឯកមួយនេះ បានផ្តួលក្រុម Southampton យ៉ាងចាស់ដៃក្នុងលទ្ធផល 6–1 កាលពីថ្ងៃអាទិត្យ ដើម្បីវិលទៅកាន់កំពូលតារាងនៃក្របខ័ណ្ឌ Premier League វិញ។

ខ្សែប្រយុទ្ធ Sergio Aguero ដែលរកបានគ្រាប់បាល់ក្នុងការប្រកួតលីកចំនួន 150គ្រាប់ David Silva និង Leroy Sane ក៏បានរកគ្រាប់បាល់បញ្ចូលទីផងដែរ ខណៈដែលក្រុមរបស់លោក Pep Guardiola បានរក្សាការមិនស្គាល់ចាញ់របស់ខ្លួនក្នុងការការពារពានរបស់ពួកគេ។ ខណៈដែលលោកបានបញ្ជាក់ថា នឹងមានការអភិវឌ្ឍទៅកាន់កម្រិតមួយទៀតពីសំណាក់ខ្សែប្រយុទ្ធអន្តរជាតិអង់គ្លេស។

លោក Guardiola បានប្រាប់បណ្តាញសារព័ត៌មាន BBC ថា៖ «យើងលេងបានយ៉ាងល្អឥតខ្ចោះ ដោយគ្មាន និងពេលមានបាល់»។ ស្របពេលជាមួយគ្នានេះ លោក Maurizio Sarri អ្នកចាត់ការទូទៅរបស់ក្រុម Chelsea ជឿជាក់ថា Alvaro Morata អាចនឹងក្លាយជាខ្សែប្រយុទ្ធដ៏មុតស្រួចដែលក្រុមរបស់លោកត្រូវការ ក្រោយពីបានស៊ុតបាល់បញ្ចូលទី 2គ្រាប់ក្នុងពេលពួកគេយកឈ្នះលើក្រុម Crystal Palace 3–1 កាលពីថ្ងៃអាទិត្យ។

លោក Sarri បានឱ្យដឹងថា៖ «រូបគេមានភាពទន់ខ្សោយបន្តិចទៅលើស្មារតី ប៉ុន្តែ រូបគេនៅវ័យក្មេង ដែលខ្ញុំគិតថា គេអាចអភិវឌ្ឍខ្លួនយ៉ាងឆាប់រហ័ស។ ខ្ញុំគិតថា Alvaro ក៏មានសក្តានុពលដ៏អស្ចារ្យលើផ្នែករាងកាយ និងបច្ចេកទេសផងដែរ»៕

ប្រភពពី៖ Sport24

November 5, 2018

ផលិតកម្ម LD លាតត្រដាងរឿង«កូនក្រក»ពាក់ព័ន្ធជាមួយជំនឿអាគមរបស់ អារ៉ា ស្មាច់

អបិយជំនឿលើមន្តអាគមនៃការចិញ្ចឹមកូនក្រក ក្នុងសង្គមខ្មែរ និងប្រទេសជិតខាង បានក្លាយទៅជាប្រធានបទជជែកវែកញែកពីអ្នកមានជំនឿជាបន្តបន្ទាប់។ រឿងកូនក្រកនេះ ក៏ធ្លាប់ផ្ទុះកក្រើកក្នុងសង្គមខ្មែរ អំឡុងប្រមាណ19ឆ្នាំមុន ពោលគឺ ករណីមេចោរចាប់ជំរិតល្បីឈ្មោះដែលគេហៅថា អារ៉ាស្មាច់ នៅតែធ្វើឱ្យមហាជនជាច្រើនមានការខ្លាចរអានៅឡើយ ព្រោះតែ អារ៉ាស្មាច់ ប្រើមន្តអាគមកូនក្រក។

យ៉ាងណាមិញ មហាជនមួយចំនួនបានជ្រាបដឹងខ្លះៗ ថាតើជំនឿពាក់ព័ន្ធនឹងកូនក្រក មានសភាពកើតឡើងដោយរបៀបណាខ្លះ? ក្រោយផលិតកម្ម LD បញ្ចេញឈុតវីដេអូប៉ុន្មាននាទី ជុំវិញរឿង «កូនក្រក» បង្ហោះឡើងនៅលើបណ្តាញសង្គម បានធ្វើឱ្យកក្រើកតែម្តង ដោយសារតែមានសន្ទុះអ្នកតានដានឡើងឥតឈប់ឈរ ក៏ដូចជាលក្ខណៈរឿងមានឈុតវះពោះតួស្រីស្តែងៗគួរស្រៀវបំផុត ហើយគ្រាន់តែឮថា ជារឿងពាក់ព័ន្ធជាមួយ អារ៉ា ស្មាច់ អ្នកណាក៏ចង់ទស្សនាដែរ។

ដើម្បីចង់ដឹងថា រឿងរ៉ាវ «កូនក្រក» ដែលដឹកនាំ និងនិពន្ឋដោយនាយពាក់មីមានភាពអស្ចារ្យកម្រិតណា និងរន្ធត់បែបណា សូមរង់ចាំចូលរួមទស្សនា រឿង «កូនក្រក» ដែលនឹងចាក់បញ្ចាំងជាផ្លូវការចាប់ពីថ្ងៃទី9 ខែវិច្ឆិកា ឆ្នាំ2018នេះតទៅ នៅគ្រប់រោងគុនទំនើបនានា ទាំងភ្នំពេញ និងខេត្តសៀមរាប៕

November 5, 2018

រដ្ឋាភិបាលកំពុងចាប់ផ្តើមពិភាក្សាថវិកាជាតិឆ្នាំ2019 ខណៈសេដ្ឋកិច្ចមានកំណើនថេរ

គណៈរដ្ឋមន្ត្រីនឹងធ្វើការពិភាក្សាអំពីថវិកាជាតិឆ្នាំ2019 ដែលមានចំនួនទឹកប្រាក់ប្រមាណ6.44ពាន់លានដុល្លារសម្រាប់ការបែងចែកថវិកាឆ្នាំ2019 ជា5ផ្នែក គឺរដ្ឋបាលទូទៅ សន្តិសុខជាតិ និងការពារជាតិសុខុមាលភាពសង្គម សេដ្ឋកិច្ច និងមូលនិធិគ្រាអាសន្ន។

យោងតាមសេចក្តីព្រាងថវិកាចំនួនទឹកប្រាក់615.88លានដុល្លារនឹងត្រូវចំណាយទៅលើការងាររដ្ឋបាលទូទៅ ទឹកប្រាក់ចំនួន1.1ពាន់លានដុល្លារសម្រាប់ផ្នែកសន្តិសុខ និងការពារជាតិ ទឹកប្រាក់ចំនួន1.81ពាន់លានដុល្លារសម្រាប់សុខុមាលភាពសង្គម ចំនួន1.65ពាន់លានដុល្លារសម្រាប់វិស័យសេដ្ឋកិច្ច និង1.25ពាន់លានដុល្លារសម្រាប់មូលនិធិសង្គ្រោះបន្ទាន់។

សម្រាប់គម្រោងថវិកាជាតិឆ្នាំ2019 ប្រមាណ6.44ពាន់លានដុល្លារនេះបានបង្ហាញថា តួលេខនេះមានការកើនឡើង7% បើប្រៀបធៀបទៅនឹងឆ្នាំ2018។ ថវិកាសម្រាប់ឆ្នាំ2018 មានចំនួនតែ 6.03ពាន់លានដុល្លារ ខណៈថវិកាក្នុងឆ្នាំ2017 មានចំនួនត្រឹមតែ 5.23ពាន់លានដុល្លារប៉ុណ្ណោះ។

ឆ្លើយបញ្ជាក់ទៅនឹងសំណួររបស់កាសែតឡារ៉ែនពាណិជ្ជដែលសួរថា បច្ចុប្បន្នយើងមានកំណើនសេដ្ឋកិច្ចថេរ តើវាទាក់ទងនឹងការចំណាយថវិកាជាតិប្រចាំឆ្នាំដែលមានកំណើនជារៀងរាល់ឆ្នាំដែរឬទេ? អ្នកសេដ្ឋកិច្ចបានឆ្លើយថា វាពិតជាចូលទៅក្នុងប្រព័ន្ធសេដ្ឋកិច្ចជាតិខ្លះដែរ គឺការចំណាយផលិត ដូច្នេះការចំណាយធំក៏រួមចំណែកមួយផ្នែកដែរក្នុងការជួយដល់កំណើនផ្នែកសេដ្ឋកិច្ច។

លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រង ហ្វ័រតេ (Forte) បញ្ជាក់ថា ឧបមាថាយើងចំណាយក្នុងការសាងសង់ផ្លូវថ្នល់ ហេដ្ឋារចនាសម្ព័ន្ធសេដ្ឋកិច្ចជាតិនេះជាផលិតផលរបស់សង្គមហើយប្រាក់ដែលចំណាយជាថវិកាជាតិ វាចាក់បញ្ចូលទៅក្នុងប្រព័ន្ធសេដ្ឋកិច្ចជាតិយើង។

លោកបញ្ជាក់ថា នេះគេចាត់ទុកថា វាជាការគាស់សេដ្ឋកិច្ចឱ្យឡើងមួយដែរ នៅប្រទេសដទៃ នៅពេលរដ្ឋមើលឃើញថា ទំហំនៃការវិនិយោគរបស់ឯកជនតិច រដ្ឋក៏នឹងចំណាយទុនទៅលើការវិនិយោគឱ្យច្រើនដើម្បីឱ្យមានចរន្តកំណើនសេដ្ឋកិច្ចថេរ។ តែស្រុកយើង ការវិនិយោគឃើញមានសភាពថេរដែរ ដោយរដ្ឋាភិបាលទទួលកំណើនបានមិនខ្ពស់ តែវាជាផ្នែក1 ព្រោះយើងមានចំណាយចរន្តខ្ពស់(ដូចជាការដំឡើងប្រាក់បៀវត្សរ៍មន្ត្រីរាជការ)។

ទោះបីជាការបើកកិច្ចពិភាក្សាលើថវិកាឆ្នាំ2019ស្របនឹងស្ថានភាពដែលកម្ពុជាមានកំណើនសេដ្ឋកិច្ចថេរផងនោះក្តី ក៏របាយការណ៍របស់ UNCTAD បានបង្ហាញដែរថា ការវិនិយោគផ្ទាល់ពីបរទេសសម្រាប់កម្ពុជាមានការកើនឡើង18% ក្នុងឆ្នាំ2017ដល់កម្រិតខ្ពស់បំផុត 2.8ពាន់លានដុល្លារដែលធ្វើឱ្យកម្ពុជាស្ថិតនៅក្នុងចំណោមប្រទេសអភិវឌ្ឍន៍តិចតួច 5លើពិភពលោកទទួលបានកំណើននៃការវិនិយោគផ្ទាល់ពីបរទេស FDI ខ្ពស់ជាងគេ។

សម្តេចនាយកដ្ឋមន្ត្រី ហ៊ុន សែន ក្នុងកិច្ចប្រជុំកំពូលអ្នកដឹកនាំវិនិយោគសកលនៃវេទិកាវិនិយោគពិភពលោកឆ្នាំ2018 នៅក្រុងហ្សឺណែវ ប្រទេសស្វីសបានបញ្ជាក់ថា បច្ចុប្បន្នកម្ពុជាកំពុងអភិវឌ្ឍចក្ខុវិស័យ និងយុទ្ធសាស្ត្ររបស់ខ្លួនដើម្បីជំរុញការវិនិយោគផ្ទាល់ពីបរទេស (FDI) នៅក្នុងប្រទេស។

យុទ្ធសាស្ដ្រនេះត្រូវបានផ្អែកលើការពង្រីកមូលដ្ឋានផលិតកម្មហេដ្ឋារចនាសម្ព័ន្ធទន់ និងរឹង ការកាត់បន្ថយថ្លៃអគ្គិសនី ការសម្រួលពាណិជ្ជកម្ម ការអភិវឌ្ឍធនធានមនុស្សរបស់ប្រទេស ការទទួលយកបច្ចេកវិទ្យាថ្មី ការធ្វើឱ្យប្រសើរឡើងនូវវិស័យហិរញ្ញវត្ថុ និងការធ្វើកំណែទម្រង់ប្រព័ន្ធច្បាប់ និងស្ថាប័នរបស់ប្រទេស។

លោក យក់ ចំរើនឬទ្ធិ បានឱ្យដឹងថា ការដែលគេចាត់ទុកថា ប្រទេសកម្ពុជាជាប្រទេសមួយក្នុងចំណោមប្រទេសអភិវឌ្ឍន៍តិចតួច 5លើពិភពលោកដែលទទួលបានកំណើននៃការវិនិយោគផ្ទាល់ពីបរទេសខ្ពស់ជាងគេនោះ គឺគេសំដៅលើប្រទេសកម្ពុជាជាប្រទេសអភិវឌ្ឍន៍តិចតួច តែយើងបានឈរក្នុងលេខរៀងទី5 ដោយសារយើងមានកំណើនវិនិយោគច្រើន។

លោកបញ្ជាក់ថា បើតាម WB (World Bank) បានសរសេរក្នុងរបាយការណ៍របស់ខ្លួនថា ប្រទេសកម្ពុជាមានតួលេខឈរនៅលេខរៀងទី5 មានកំណើនផលិតផលក្នុងស្រុកសរុប (ផ.ស.ស. ឬ Gross Domestic Product ឬ GDP) មានស្ថិរភាពក្នុង 1ឆ្នាំ7% ដែលប្រទេសគេអត់មានទេ។ ប្រទេសយើងមានផ.ស.សខ្ពស់។ ដូចជារដ្ឋាភិបាលក៏មានគោលដៅជំរុញការវិនិយោគដូច្នេះដែរ ហេតុដូចនេះហើយទើបមានកំណើនអ្នកវិនិយោគិនចិនមកវិនិយោគនៅកម្ពុជាច្រើន។

លោកបញ្ជាក់ថា ពោលគឺយើងត្រូវទាក់ទាញការវិនិយោគឱ្យបានច្រើន ព្រោះតែកាលណាខ្វះទុនក្នុងស្រុក យើងត្រូវតែទាក់ទាញវិនិយោគពីក្រៅស្រុក។ លោកយល់ថា៖ “សំខាន់គឺការវិនិយោគទុនបរទេស FDI មកក្នុងស្រុកដែលបានជួយដល់ប្រព័ន្ធសេដ្ឋកិច្ច និងកំណើនផលិតកម្មរបស់យើង បង្កើនដល់វិស័យទេសចរណ៍ ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រងជាដើម”។

លោកយល់ថា ការកើនឡើងនៃវិនិយោគិនចិនដែលមកវិនិយោគ គឺពួកគេបានជួយបង្កើនចំណូលដល់ពលរដ្ឋ គេមកវិនិយោគដែលធ្វើឱ្យប្រជាពលរដ្ឋខ្មែរមានការងារធ្វើ ហើយការចំណាយក្នុងការវិនិយោគវាចូលទៅដល់ប្រព័ន្ធសេដ្ឋកិច្ចរបស់យើងផងដែរ។

លោក យក់ ចំរើនឬទ្ធិ ក៏បានឱ្យដឹងដែរថា ការវិនិយោគរបស់បរទេស គឺជាគន្លឹះនៃវឌ្ឍនភាពសេដ្ឋកិច្ចជាតិ និងការសម្រេចគោលដៅអភិវឌ្ឍន៍ប្រកបដោយនិរន្តរភាពតាមគោលការណ៍របស់អង្គការសហប្រជាជាតិ (SDGs) ដោយឡែកចាប់តាំងពីឆ្នាំ2004 ដល់ឆ្នាំ2014 អត្រាភាពក្រីក្រនៅក្នុងប្រទេសកម្ពុជាត្រូវបានកាត់បន្ថយពី53% ដល់13.5% ហើយបើគិតពីឆ្នាំ2014 មកដល់បច្ចុប្បន្នតួលេខនេះអាចនឹងប្រែប្រួលក្រោម13.5%៕

November 5, 2018

Khachanov ផ្តួល Djokovic ដើម្បីឈ្នះពានក្នុងទីក្រុងប៉ារីស

កីឡាករវាយកូនបាល់ Karen Khachanov បានបង្កើតឱ្យមានការភ្ញាក់ផ្អើលដ៏ធំមួយក្នុងកីឡាវាយកូនបាល់ឆ្នាំនេះ តាមរយៈការផ្តួលជើងខ្លាំង Novak Djokovic ក្នុងលទ្ធផល 7-5 និង 6-4 ក្នុងព្រឹត្តិការណ៍ Paris Masters វគ្គផ្តាច់ព្រ័ត្រ ដើម្បីបញ្ចប់ការគ្រប់គ្រងរបស់កីឡាករសញ្ជាតិស៊ែប៊ីរូបនេះក្នុងវិញ្ញាសាផ្នែកបុរស កាលពីថ្ងៃអាទិត្យ។

កីឡាករវ័យ 22ឆ្នាំរបស់រុស្ស៊ីរូបនេះ ត្រូវបានគេចាត់ទុកថា ជាកីឡាករដ៏មានទេពកោសល្យទើបតែរះម្នាក់ក្នុងកីឡានេះ ហើយរូបគេបានបង្ហាញពីភាពខ្លាំងរបស់គេតាមរយៈការផ្តួលតារាឆ្នើមសញ្ជាតិស៊ែប៊ី ដោយបានកត់ត្រាជ័យជម្នះ 22លើកជាប់ៗគ្នា ក្នុងរយៈពេល 3ខែកន្លងមកនេះ។ Djokovic ត្រូវបានរំពឹងទុកថា នឹងបានធ្វើការអបអរចំពោះការវិលត្រឡប់របស់គេមកកាន់ចំណាត់ថ្នាក់លេខ1 វិញនៅថ្ងៃចន្ទនេះតាមរយៈការឈ្នះពានក្នុងទីក្រុងប៉ារីសជាលើកទី5 នេះ ប៉ុន្តែរូបគេបានរងបរាជ័យក្នុងរយៈពេល 1ម៉ោង និង37នាទី។

Khachanov ដែលមានកម្ពស់ខ្ពស់ជាង និងមានមាឌធំជាងនោះ បានដណ្តើមយកប្រៀបទៅលើការចាញ់អាកាសធាតុរបស់ Djokovic ក្រោយពីការជួបបញ្ហាជំងឺផ្តាសាយក្នុងរយៈពេល 1សប្តាហ៍។ ទោះបីជាយ៉ាងណា កីឡាករសញ្ជាតិស៊ែប៊ីរូបនេះ ក៏អស់កម្លាំងពីការយកឈ្នះលើកីឡាករ Roger Federer ទាំងភាពស្វិតស្វាញអស់រយៈពេល 3ម៉ោងក្នុងវគ្គពាក់កណ្តាលផ្តាច់ព្រ័ត្រ ខណៈដែលរូបគេមិនអាចទប់ទល់នឹងកម្រិតនៃការលេងយ៉ាងល្អរបស់កីឡាករ Khachanov បានឡើយ៕

ប្រភពី៖ Channel News Asia

November 5, 2018

Category: សង្គម និងសេដ្ឋកិច្ច