នៅទូទាំងតំបន់អាស៊ីអាគ្នេយ៍ឧស្សាហកម្មអាកាសចរណ៍មានការរីកចម្រើនយ៉ាងឆាប់រហ័សគួរឲ្យកត់សម្គាល់ ដែលក្នុងនោះរួមមានទាំងប្រទេសកម្ពុជាយើងផងដែរ ក្នុងរយៈពេលប៉ុន្មានឆ្នាំថ្មីៗនេះ។ ប៉ុន្តែអ្វីដែលជាមូលដ្ឋានគ្រឹះអំពីរបៀបនៃការប្រើប្រាស់បច្ចេកវិទ្យាថ្មីៗ ដើម្បីសម្រួលដល់ការងារអាកាសយានដ្ឋានក្នុងតំបន់ ត្រូវធ្វើការត្រៀមខ្លួនជានិច្ចសម្រាប់កំណើនជាបន្តបន្ទាប់នេះ ទើបជារឿងលំបាក និងជាបញ្ហាប្រឈមនៅឡើយ ពិសេសសម្រាប់ប្រទេសកម្ពុជាយើង ដែលជាប្រទេសកំពុងមានការអភិវឌ្ឍ។ នេះបើតាមការឱ្យដឹងពីអ្នកនាំពាក្យរបស់រដ្ឋលេខាធិការដ្ឋានអាកាសចរស៊ីវិល។
ឯកឧត្តម ស៊ិន ចាន់សិរីវុត្ថា បានប្រាប់ឡារ៉ែនពាណិជ្ជថា ឧស្សាហកម្មអាកាសចរណ៍កម្ពុជាកំពុងទទួលបានកំណើនគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ហើយរាជរដ្ឋាភិបាលកម្ពុជាកំពុងពិចារណាការវិនិយោគលើការប្រើប្រាស់បច្ចេកវិទ្យា ដោយផ្តោតលើបដិវត្តន៍ឧស្សាហកម្មកម្រិត(4.0) ឬដែលគេហៅថាការប្រើប្រាស់បច្ចេកវិទ្យាឌីជីថល ឬ IT នៅក្នុងស្ថាប័នជាតិនីមួយ។
ដោយឡែកនៅក្នុងវិស័យអាកាសចរណ៍ស៊ីវិលរបស់យើង ក៏កំពុងតែរៀបចំ និងសម្របសម្រួលខ្លួនផងដែរ ទៅក្នុងគោលនយោបាយបែបនេះ សម្រាប់ផែនការយុទ្ធសាស្ត្រមួយចំនួន ដែលមានន័យថាកម្ពុជាយើងកំពុងទទួលយកនូវផែនការឧស្សាហកម្ម 4.0 នេះហើយ។
ឯកឧត្តម បានបញ្ជាក់ថា ទោះបីជាយើងមានការរីកចម្រើនលើវិស័យអាកាសចរណ៍ក៏ពិតមែនប៉ុន្តែវាមិនទាន់មានលក្ខណៈស្វ័យប្រវត្តិ ដោយការប្រើប្រាស់បច្ចេកវិទ្យាឌីជីថលនៅឡើយទេ ដោយសារតែយើងប្រទេសយើងមិនទាន់បានទទួលការប្រើប្រាស់បច្ចេកវិទ្យាឌីជីថលនេះ ឱ្យបានទូលំទូលាយ ជាក់ស្តែងដូចជាបញ្ហាក្រុម Hacker ក៏យើងបានជួបប្រទះច្រើនសឹងតែគ្រប់ស្ថាប័ន ដែលប្រទេសយើងនៅមិនទាន់អាចដោះស្រាយបាន។ ប្រសិនបើយើងមិនមានជំនាញការពារសម្រាប់ក្រុម Hacker ទេនោះ ពួកគេនឹង Hack ចូលគេហទំព័រ ឬ របៀបនៃការគ្រប់គ្រងរបស់ស្ថាប័នយើង។ ដូច្នេះមានន័យថា ការប្រើប្រាស់បច្ចេកវិទ្យាយើងនៅមានកម្រិត និង អាចប្រើបានតែលើផ្នែកខ្លះតែប៉ុណ្ណោះ។
ឯកឧត្តមអ្នកនាំពាក្យបន្តទៀតថា បញ្ហាប្រឈមដែលយើងត្រូវជួបប្រទះមាន3ករណី ដោយករណីទី1 គឺកត្តាធនធានមនុស្សរបស់យើងនៅលើវិស័យនេះនៅមានកម្រិត ដែលយើងមិនទាន់រកឃើញអ្នកដែលខ្លាំង និង មានជំនាញពិតប្រាកដលើបញ្ហានេះនៅឡើយនោះទេ។ ករណីទី2 គឺផ្នែកហិរញ្ញវត្ថុ ដោយសារតែយើងត្រូវការជាចាំបាច់នូវថវិកាដើម្បីចំណាយលើការងារមានចំនួនច្រើននៅឡើយ និង ករណីទី3 គឺការធានាសន្តិសុខសុវត្ថិភាព ព្រោះយើងមានការព្រួយបារម្ភ នឹងសុវត្ថិភាព នៃការប្រើប្រាស់ប្រព័ន្ធនេះឱ្យបានល្អ ចៀសវាងមានការរំខានពីក្រុម Hacker។ សូម្បីតែអ្នកប្រើប្រាស់ក៏ត្រូវផ្តល់វគ្គបណ្តុះបណ្តាលជូនពួកគាត់ផងដែរ។ មិនតែប៉ុណ្ណោះឯកឧត្តម បញ្ជាក់បន្ថែមថា បច្ចុប្បន្នយើងកំពុងចាប់ផ្តើមអនុវត្តផែនការយុទ្ធសាស្ត្ររបស់យើង ប៉ុន្តែយើងក៏ត្រូវការពេលវេលាច្រើនដែរ។ ការអនុវត្តផែនការនេះ តម្រូវឱ្យមានការចូលរួមពីក្រសួងប្រៃសណីយ៍ និង ទូរគមនាគមន៍ ផ្តល់នូវភាពជាចាំបាច់ ដែលនឹងជំរុញឱ្យមានការរីកចម្រើនលើបច្ចេកវិទ្យាឌីជីថល និងមានការរួមចំណែកពីក្រសួងទេសចរណ៍ដែលបានចូលរួមអនុវត្តក្នុងបដិវត្តន៍ឧស្សាហកម្ម4.0នេះ ដើម្បីឲ្យវិស័យអាកាសចរណ៍ ស៊ីវិលនៅកម្ពុជាមានភាពរីកចម្រើន។ ទាក់ទងនឹងថវិការដ្ឋវិញ រដ្ឋាភិបាលមិនអាចផ្តល់ថវិកាឱ្យបានគ្រប់ស្ថាប័នបាននោះទេ ហើយក្រសួងសេដ្ឋកិច្ច និងហិរញ្ញវត្ថុគឺជាអាណាព្យាបាលនៃក្រសួងសាមីនីមួយៗ ដូច្នេះក្រសួងត្រូវមានការប្រុងប្រយ័ត្នជានិច្ចរាល់ការចំណាយ លើវិស័យបច្ចេកវិទ្យាដែលត្រូវការចាយវាយខ្ពស់ ក្រសួងសេដ្ឋកិច្ចត្រូវតែធ្វើការត្រួតពិនិត្យយ៉ាងដិតដល់ជាមុនសិន មុននឹងសម្រេចថា តើក្រសួងណាខ្លះដែលមានអាទិភាពចំណាយមុនគេ។ នេះជាមូលហេតុដែលយើងមិនទាន់អាចអនុវត្តផែនការនេះបាន។
ឯកឧត្តម បានឱ្យដឹងទៀតថា ការអភិវឌ្ឍសម្រាប់បច្ចេកវិទ្យាមិនសំដៅលើគ្រប់ផ្នែកទេ គឺមានវាច្រើនហើយមានការចាំបាច់ណាស់ ដូច្នេះយើងត្រូវវិនិយោគតែផ្នែកណាមួយដែលចាំបាច់ខ្លាំងជាមុនសិន ដូចជាការគ្រប់គ្រងទិន្នន័យប្រចាំថ្ងៃ ការចុះបញ្ជីយន្តហោះ ការត្រួតពិនិត្យជើងហោះហើរជាដើម ដែលស្ថាប័នយើងនៅប្រើការកត់ត្រា ជាការសរសេរនៅឡើយ។ ប៉ុន្តែការប្រើប្រាស់បច្ចេកវិទ្យាព័ត៌មានបានដំណើរការជាបណ្តើរហើយៗ នៅឡើយតែផ្នែកផ្សេងៗទៀតប៉ុណ្ណោះដែលនៅមានបញ្ហាប្រឈមច្រើន។ រីឯការវិនិយោគលើបច្ចេកវិទ្យាគ្រប់គ្រងចរាចរណ៍ផ្លូវអាកាស (Air Traffic Management) ឬ ATM គ្រាន់តែជាផ្នែកតូចមួយប៉ុណ្ណោះនៃវិស័យបច្ចេកវិទ្យាព័ត៌មាន IT ដោយផ្ទាល់ ។
សូមបញ្ជាក់ថា កាលពីឆ្នាំមុនក្រុមហ៊ុនអាកាសយានដ្ឋានកម្ពុជាបានបញ្ចប់គម្រោងដំឡើងដើមទុនចំនួន 100 លានដុល្លារ នៅអាកាសយានដ្ឋានអន្តរជាតិភ្នំពេញ និងអាកាសយានដ្ឋានសៀមរាប។ លើសពីនេះទៅទៀតរាជរដ្ឋាភិបាលមានគម្រោងរៀបចំពង្រីកសាងសង់ព្រលានយន្តហោះថ្មីចំនួន2រួចមកហើយ ដែលស្ថិតលើផ្ទៃដីសរុប 2,600 ហិកតាហើយដែលនឹងធ្វើឱ្យព្រលានយន្តហោះនៅកម្ពុជា យើងក្លាយទៅជាព្រលានយន្តហោះធំទី9លើពិភពលោក។ ហើយយើងក៏បានទទួលយកការប្រើប្រាស់បច្ចេកវិទ្យានោះទៅប្រើហើយ តែការប្រើបច្ចេកវិទ្យានោះត្រូវសម្រេចទៅលើអ្នកវិនិយោគនៃព្រលាននោះ។
ស្របពេលជាមួយគ្នានេះដែរ ភាពប្រកួតប្រជែងគ្នានៃវិស័យបច្ចេកវិទ្យាអាកាសចរណ៍កំពុងរីកចម្រើនដែលមានការតភ្ជាប់ការវិភាគទិន្នន័យធំៗ និងប្រព័ន្ធអុីនធើណិត ដែលកំពុងក្លាយទៅជាចំណុចសំខាន់សម្រាប់ក្រុមហ៊ុនបច្ចេកវិទ្យាដែលមានអាកាសយានដ្ឋាននៅអាស៊ីអាគ្នេយ៍ គួរតែមានការយល់ដឹង រួមទាំងកម្ពុជាផងដែរ។ ឧស្សាហកម្មអាកាសចរណ៍មិនខុសប្លែកគ្នាទេ ហើយកំពុងស្ថិតនៅចំកណ្តាលនៃការផ្លាស់ប្តូរសម័យឌីជីថលដោយខ្លួនឯង។
ខណៈពេលដែលការពង្រីកព្រលានយន្តហោះ និងការផ្តួចផ្តើមនៃការអភិវឌ្ឍមានសារៈសំខាន់ដើម្បីធានាថា ប្រទេសកម្ពុជាមានសមត្ថភាពគ្រប់គ្រាន់ក្នុងការទ្រទ្រង់កំណើនចរាចរណ៍អ្នកដំណើរនាពេលអនាគត។ ជារឿយៗវាមានភាពស្មុគស្មាញនិងអាចចំណាយពេលវេលាច្រើនឆ្នាំ។ ដែលជាកត្តាបណ្តាលឱ្យអ្នកដំណើរនៅតែបន្តដាក់សម្ពាធលើផ្នែកសុវត្ថិភាព និងប្រសិទ្ធភាពនៃប្រតិបត្តិការនៅព្រលានយន្តហោះ ដែលមានស្រាប់នៅក្នុងប្រទេស។
ឯកឧត្តម អ្នកនាំពាក្យជឿជាក់ថា អ្វីដែលជាដំណោះស្រាយអាចសម្រេចបានខ្ពស់បំផុតសម្រាប់បញ្ហាទាំងអស់នេះ នឹងក្លាយទៅជាគុណសម្បត្តិសម្រាប់ប្រទេសកម្ពុជា ពីព្រោះយើងអាចដើរតួជាអ្នកដោះស្រាយបណ្តោះអាសន្នដើម្បីជួយប្រទេសកម្ពុជាឱ្យមានការគ្រប់គ្រងកើនឡើងនៃចរាចរណ៍ផ្លូវអាកាសខណៈដែលព្រលានយន្តហោះកំពុងដំណើរការពង្រីកការសាងសង់។ លើសពីនេះទៀតពួកគេអាចទ្រទ្រង់កំណើនអ្នកដំណើររយៈពេលយូរអង្វែងនៅក្នុងប្រទេស និងចៀសវាងផលប៉ះពាល់សក្តានុពលលើប្រតិបត្តិការ និងមុខងាររបស់ព្រលានយន្តហោះ។
ឯកឧត្តម បានអះអាងបញ្ជាក់ថា ក្រុមហ៊ុនអាកាសចរណ៍នៅកម្ពុជាក៏ត្រូវចាប់ផ្តើមប្រើបច្ចេកវិទ្យាឆ្លាតវៃដើម្បីទទួលបានប្រាក់សន្សំ ស្របពេលដែលអាជីវកម្មអាកាសចរណ៍នៅតំបន់អាស៊ីប៉ាស៊ីហ្វិកកាន់តែមានការប្រកួតប្រជែងនោះ។ ដំណោះស្រាយវិស័យអាកាសចរណ៍ដែលបានព្យាករ និងសេវាកម្មប្រសិទ្ធភាពនៃការហោះហើរអាចកាត់បន្ថយលើការចំណាយប្រតិបត្តិការ និងបង្កើនបទពិសោធហោះហើរទាំងមូលសម្រាប់ក្រុមហ៊ុនអាកាសចរណ៍នៅក្នុងប្រទេសកម្ពុជា៕
