ស្គាល់ពីប្រភេទស្បែក
តើអ្នកណាដែលមិនចង់បានស្បែកមុខដែលមានសភាពភ្លឺរលោងស្រស់ស្អាតនោះ? ដូច្នេះត្រូវចាប់ផ្តើមដោយការស្គាល់ពីប្រភេទស្បែករបស់ខ្លួនឯងជាមុនសិន បន្ទាប់មកអ្នកនឹងបានដឹងថា តើត្រូវថែរក្សាវាយ៉ាងដូចម្តេច?
1. ស្បែកស្ងួត (Dry Skin) ជាប្រភេទស្បែកដែលមើលទៅមានសភាពគ្រើម របក ឬបែកស្រកាជាដើម។
2. ស្បែកមានជាតិប្រេង (Oily Skin) មើលទៅមានសភាពរលើប មានខ្លាញ់ច្រើន ហើយក៏អាចមានរន្ធញើសធំៗដែរ។
3. ស្បែកចម្រុះ (Combination Skin) គឺជាប្រភេទស្បែកដែលមានសភាពស្ងួតនៅលើចំណុចខ្លះដូចជាថ្ពាល់ តែមានខ្លាញ់ត្រង់កន្លែងផ្សេងៗដូចជា ថ្ងាស ច្រមុះ និងចង្ការ។
4. ស្បែកងាយប្រតិ្តកម្ម (Sensitive Skin) អាចនឹងឆាប់មានការឈឺចាប់ រោល ឬរម៉ាស់ បន្ទាប់ពីអ្នកបានប្រើផលិតផលផ្សេងៗ។
5. ស្បែកធម្មតា (Normal Skin) ស្បែកមុខមានសភាពស្មើគ្នា ងាយប្រតិកម្ម មិនស្ងួតពេក និងមិនមានជាតិប្រេងខ្លាំង។
ការសម្អាត
បន្ទាប់ពីស្គាល់ពីប្រភេទស្បែកខ្លួនឯងហើយអ្នកត្រូវគិតទៅដល់ការសម្អាត ហើយវិធីនៃការសម្អាតគឺត្រូវធ្វើទៅតាមប្រភេទស្បែកផងដែរ ដូចជា ៖
ស្បែកធម្មតា និងស្បែកចម្រុះ : កុំចេះតែចាប់យកសាប៊ូប្រភេទណាក៏បានមកលាងសម្អាតមុខ ហើយក៏មិនចាំបាច់ទាល់តែទិញផលិតផលថ្លៃៗនោះទេ អ្នកគ្រាន់តែស្វែងរកផលិតផលណាដែលត្រូវជាមួយប្រភេទស្បែករបស់អ្នកទៅគឺបានហើយ។ សម្រាប់អ្នកមានស្បែកចម្រុះគួរប្រើហ្វូមលាងមុខ2ប្រភេទ ឱ្យត្រូវទៅតាមកន្លែងណាដែលស្ងួត និងកន្លែងណាដែលមានជាតិប្រេង។ ប្រើទឹកច្រើន និងក្តៅតិចៗ ដើម្បីសម្អាតស្បែករបស់អ្នកជាការល្អបំផុត។
ស្បែកស្ងួត : ប្រើហ្វូមលាងមុខប្រភេទស្រាលគ្មានជាតិអាល់កុល ឬក្លិន ព្រោះគ្រឿងផ្សំទាំងនេះអាចបណ្តាលឱ្យស្បែកកាន់តែស្ងួត។ លាងស្បែកមុខថ្នមៗ ប្រើទឹកច្រើន និងក្តៅតិចៗ ដើម្បីសម្អាត។ កុំប្រើទឹកក្តៅខ្លាំងពេក ព្រោះវាអាចនាំយកជាតិប្រេងចេញពីស្បែកមុខកាន់តែលឿនឡើង។ ក្នុងមួយសប្តាហ៍អ្នកគួរដុសខាត់កម្ចាត់ស្បែកចាស់ៗចោលតែម្តង ដើម្បីឱ្យស្បែកមើលទៅស្រស់ថ្លាជាងមុន។
ស្បែកខ្លាញ់ : ប្រើហ្វូមលាងមុខដែលគ្មានជាតិប្រេង លាងសម្អាតដោយប្រើទឹកឱ្យច្រើន(ទឹកក្តៅឧណ្ហៗ)។ អ្នកក៏អាចប្រើ Toner បន្ទាប់ពីសម្អាតមុខរួច ព្រោះវាអាចជួយកាត់បន្ថយជាតិប្រេង ប៉ុន្តែក៏ត្រូវប្រយ័ត្នដែរ ព្រោះស្បែករបស់អ្នកអាចនឹងមានអាការរម៉ាស់បាន។
សម្រាប់អ្នកមានស្បែកងាយប្រតិកម្ម : ស្បែកបែបនេះគួរតែសម្អាតថ្នមៗ ជាមួយទឹកក្តៅតិចៗ ហើយត្រូវចាំជានិច្ចថា រាល់ពេលធ្វើឱ្យស្ងួតគឺត្រូវផ្តិត មិនមែនជូននោះទេ។ ការខាត់ស្បែកអាចធ្វើឱ្យស្បែករម៉ាស់ ដូច្នេះគួរព្យាយាមកុំប្រើផលិតផលណាដែលមានជាតិអាល់កុល សាប៊ូ អាស៊ីត ឬក្លិន ហើយងាកមករកមើលផលិតផលណាដែលផ្សំពីប្រទាលកន្ទុយក្រពើ ផ្កា Chamomile ឬតែប៉ៃតងវិញប្រសើរជាង។ សារធាតុផ្សំកាន់តែតិចនៅក្នុងផលិតផលដែលអ្នកប្រើ គឺកាន់តែល្អសម្រាប់ស្បែករបស់អ្នក។
ពេលណាត្រូវលាងសម្អាតស្បែកមុខ?
អ្នកអាចធ្វើឱ្យស្បែករបស់អ្នកកាន់តែស្ងួត ដោយការលុបលាងមុខច្រើនដងពេក ដូច្នេះការលាងសម្អាតមុខ (ដោយហ្វូមលាងមុខ) ត្រឹមតែម្តងក្នុងមួយថ្ងៃគឺចាត់ទុកថា គ្រប់គ្រាន់ហើយ។ នាពេលព្រឹក ត្រូវលាងសម្អាតផ្ទៃមុខរបស់អ្នកជាមួយទឹកក្តៅឧណ្ហៗ។ ប្រើកន្សែងពោះគោទន់ៗ ដើម្បីផ្តិតជាតិទឹកចេញឱ្យស្ងួត។ នៅពេលយប់លាងសម្អាតវាជាមួយហ្វូម ឬទឹកសម្អាតស្បែកមុខដែលអាចជួយកម្ចាត់រាល់មេរោគ និងគ្រឿងសម្អាងបានយ៉ាងល្អ។ ប្រសិនបើអ្នកធ្វើលំហាត់ប្រាណ លេងកីឡា អ្នកអាចលាងសម្អាតម្តងទៀត បន្ទាប់ពីបញ្ចប់សកម្មភាពទាំងនោះដោយហ្វូមលាងមុខប្រភេទស្រាល។
ផ្តល់សំណើមដល់ស្បែក
មិនថាស្បែកចាស់ ស្បែកខ្ចី ស្បែកស្ងួត ឬស្បែកប្រេង ស្បែកធម្មតា ឬស្បែកចម្រុះនោះទេ គឺសុទ្ធតែត្រូវការសំណើមដូចគ្នាទាំងអស់ ដូច្នេះសូមកុំបោះបង់ចោលការផ្តល់សំណើមដល់ស្បែករបស់អ្នកឱ្យសោះ។
លាបឡេការពារស្បែក
សូមចាំថា ការផ្តល់សំណើមប្រហែលជាអាចការពារស្បែកអ្នកបានមួយរយៈពីកម្តៅថ្ងៃ ប៉ុន្តែ ឡារ៉ែន សូមរំឭកថា ស្បែករបស់អ្នកអាចទ្រាំទ្រជាមួយកម្តៅថ្ងៃបានត្រឹមតែ15នាទីប៉ុណ្ណោះ បើលើសពីនេះវាពិតជាបំផ្លាញស្បែកអ្នកមិនខាន មិនថាអ្នកនៅក្មេង ឬជាមនុស្សចាស់នោះទេ ដូច្នេះកុំភ្លេចឡេការពារកម្តៅថ្ងៃឱ្យសោះណា៎៕
