សង្គម និងសេដ្ឋកិច្ច - La Reine Media

Top 10 កីឡាករបាល់ទាត់ដែលមានទ្រព្យសម្បត្តិច្រើនជាងគេលើពិភពលោក

មិត្តអ្នកអានប្រហែលជាមានការភ្ញាក់ផ្អើលនៅពេលដឹងថា Cristiano Ronaldo និង Lionel Messi មិនមែនជាកីឡាករបាល់ទាត់ដែលមានទ្រព្យសម្បត្តិច្រើនជាងគេ ហើយកីឡាករមិនមានឈ្មោះល្បីបែរជាឈរលើកំពូលតារាងចំណាត់ថ្នាក់នេះ ប៉ុន្តែនោះគឺជាការពិត។

ទី 1 ៖ Faiq Bolkiah

កីឡាករខ្សែបម្រើ Faiq Bolkiah (Faiq Jefri Bolkiah) កើតឆ្នាំ 1998 នៅទីក្រុង Los Angeles រដ្ឋ California សហរដ្ឋអាម៉េរិក លេងឱ្យក្លឹប Maritimo និងមានទ្រព្យសម្បត្តិសរុប 20 ពាន់លានដុល្លារអាម៉េរិក។

មូលហេតុដែល Faiq Bolkiah មានទ្រព្យច្រើនជាងគេគឺដោយសារជាព្រះរាជនត្តា (ចៅស្ដេច) របស់រាជាណាចក្រព្រុយណេ។ ចំណែកបិតារបស់ Faiq Bolkiah គឺជារាជបុត្រា Jefri Bolkiah ដែលជាកំពូលអ្នកមានក្នុងវិស័យរ៉ែប្រេង។

តាំងពីតូច Faiq Bolkiah ត្រូវបានបណ្ដុះបណ្ដាលនៅក្នុងក្លឹបបាល់ទាត់ AFC Newbury, Arsenal ជាដើម។ ក្រោយពីបានចាកចេញពីកន្លែងហ្វឹកហាត់ Leicester City នៅអង់គ្លេស Faiq Bolkiah ក៏បានទៅចូលរួមជាមួយក្លឹបបាល់ទាត់ Maritimo នៅព័រទុយហ្គាល់។ ប៉ុន្តែ គាត់បានទាត់ក្នុងនាមជាកីឡាករជម្រើសដំបូងនៅតាមបណ្ដាពានរង្វាន់សម្រាប់ក្រុម U-21 និងមិនធ្លាប់បានទាត់នៅ Premier League។

កីឡាករ Faiq Bolkiah គឺជាព្រះរាជនត្តា (ចៅស្ដេច) របស់រាជាណាចក្រព្រុយណេ

ទី 2 ៖ Cristiano Ronaldo

ឈ្មោះពេញ ៖ Cristiano Ronaldo dos Santos Aveiro

ឆ្នាំកំណើត ៖ 1985

ស្រុកកំណើត ៖ Runchal, Madeira, ព័រទុយហ្គាល់

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Al-Nassr របស់អារ៉ាប៊ីសាអូឌីត

ទ្រព្យសម្បត្តិសរុប ៖ ជាង 650 លានដុល្លារអាម៉េរិក

ទី 3 ៖ Lionel Messi

ឈ្មោះពេញ ៖ Lionel Andres Messi

ឆ្នាំកំណើត ៖ 1987

ស្រុកកំណើត ៖ Rosario, Santa Fe, អាហ្សង់ទីន

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Paris Saint-Germain

ទ្រព្យសម្បត្តិសរុប ៖ 600 លានដុល្លារអាម៉េរិក

ទី 4 ៖ David Beckham

ឈ្មោះពេញ ៖ David Robert Joseph Beckham

ឆ្នាំកំណើត ៖ 1975

ស្រុកកំណើត ៖ Leytonstone, ក្រុងឡុងដ៍, ចក្រភពអង់គ្លេស

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ បានចូលនិវត្តន៍

ទ្រព្យសម្បត្តិសរុប ៖ 450 លានដុល្លារអាម៉េរិក

ទី 5 ៖ Neymar

ឈ្មោះពេញ ៖ Neymar da Silva Santos Junior

ឆ្នាំកំណើត ៖ 1992

ស្រុកកំណើត ៖ Mogi das Cruzes, Sao Paulo, ប្រេស៊ីល

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Paris Saint-Germain

ទ្រព្យសម្បត្តិសរុប ៖ 200 លានដុល្លារអាម៉េរិក

ទី 6 ៖ Zlatan Ibrahimovic

ឈ្មោះពេញ ៖ Zlatan Ibrahimovic

ឆ្នាំកំណើត ៖ 1981

ស្រុកកំណើត ៖ Malmo, ស៊ុយអែត

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ A.C. Milan

ទ្រព្យសម្បត្តិសរុប ៖ 190 លានដុល្លារអាម៉េរិក

ទី 7 ៖ Wayne Rooney

ឈ្មោះពេញ ៖ Wayne Mark Rooney

ឆ្នាំកំណើត ៖ 1985

ស្រុកកំណើត ៖ អង់គ្លេស

តួនាទី ៖ អតីតកីឡាករខ្សែប្រយុទ្ធ និងខ្សែបម្រើ

ក្លឹបបច្ចុប្បន្ន ៖ គ្រូបង្វឹកក្លឹប D.C. United

ទ្រព្យសម្បត្តិសរុប ៖ 180 លានដុល្លារអាម៉េរិក

ទី 8 ៖ Gareth Bale

ឈ្មោះពេញ ៖ Gareth Frank Bale

ឆ្នាំកំណើត ៖ 1989

ស្រុកកំណើត ៖ វ៉ែលស៍, ចក្រភពអង់គ្លេស

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ ចូលនិវត្តន៍

ទ្រព្យសម្បត្តិសរុប ៖ 150 លានដុល្លារអាម៉េរិក

ទី 9 ៖ Paul Pogba

ឈ្មោះពេញ ៖ Paul Labile Pogba

ឆ្នាំកំណើត ៖ 1993

ស្រុកកំណើត ៖ បារាំង

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ Juventus F.C របស់អ៊ីតាលី

ទ្រព្យសម្បត្តិសរុប ៖ 125 លានដុល្លារអាម៉េរិក

ទី 10 ៖ Andre Iniesta

ឈ្មោះពេញ ៖ Andre Iniesta Lujan

ឆ្នាំកំណើត ៖ 1984

ស្រុកកំណើត ៖ អេស្ប៉ាញ

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ Vissel Kobe របស់ជប៉ុន

ទ្រព្យសម្បត្តិសរុប ៖ 123 លានដុល្លារអាម៉េរិក

April 18, 2023

«សង្គ្រាមតម្លៃ» របស់ Tesla ធ្វើឱ្យ Xpeng ផ្ដោតលើរថយន្តអគ្គិសនីប្រភេទ «ធូរថ្លៃ»

ក្រុមហ៊ុនផលិតរថយន្តអគ្គិសនីចិន Xpeng សង្ឃឹមថា ការកាត់បន្ថយចំណាយក្នុងការផលិតនឹងជួយឱ្យក្រុមហ៊ុនដែលមានអាយុ 8 ឆ្នាំមួយនេះរកបានប្រាក់ចំណេញ។ នេះគឺជាការអះអាងរបស់សហប្រធាន Brian Gu ដែលបាននិយាយនៅមុនព្រឹត្តិការណ៍ពិព័រណ៍រថយន្តសៀងហៃ។

Brian Gu ឱ្យដឹងថា Xpeng មានផែនការកាត់បន្ថយចំណាយ 25% សម្រាប់ប្រព័ន្ធរុញច្រាន រួមទាំងថ្មផ្ទុកថាមពល និងសំច័យបាន 50% នៅក្នុងបណ្ដាមុខងារបើកបរឆ្លាតវៃ នៅចុងឆ្នាំ 2024។ លោកបន្ថែមថា គិតត្រឹមបច្ចុប្បន្ន ប្រព័ន្ធថ្មផ្ទុកថាមពល និងមុខងារបើកបរឆ្លាតវៃកាន់កាប់ជាងពាក់កណ្ដាលនៃការចំណាយក្នុងការផលិតរថយន្តអគ្គិសនីរបស់ Xpeng។

កាលពីឆ្នាំមុន ដោយសារតែបរិមាណរថយន្តដែលបានលក់មិនបានសមតាមបំណង Xpeng ក៏ត្រូវកំណត់ពេលវេលានៃការរកបានប្រាក់ចំណេញទៅឆ្នាំ 2025។

យោងតាមលោក Brian Gu វត្ថុធាតុសម្រាប់ផលិតថ្មផ្ទុកថាមពលកាន់តែមានតម្លៃទាប ជួយកាត់បន្ថយការចំណាយក្នុងការផលិតនៅក្នុងឆ្នាំនេះ និងឆ្នាំក្រោយ។ ក្រុមហ៊ុន Xpeng ក៏កំពុងព្យាយាមកាត់បន្ថយការប្រើប្រាស់រ៉ាដា ឈីប សេនស៊ើរ និងកាមេរ៉ាឡាសែរនៅក្នុងបណ្ដាមុខងារបើកបរស្វ័យប្រវត្ត។

ខាងក្នុងរោងចក្រផលិតរថយន្តអគ្គិសនីរបស់ Xpeng

He Xiaopeng ដែលជាអគ្គនាយកប្រតិបត្តិរបស់ក្រុមហ៊ុន Xpeng បានឱ្យដឹងថា ក្រុមហ៊ុននេះកំពុងផ្ដោតលើថ្នាលផលិតថ្មីដែលហៅថា SEPA2.0 ដែលជួយបង្កើនប្រសិទ្ធភាពការងារ និងកាត់បន្ថយការចំណាយក្នុងការផលិត។

សកម្មភាពការងារក្នុងរោងចក្រផលិតរថយន្តអគ្គិសនីរបស់ក្រុមហ៊ុនចិន Xpeng

Xpeng នឹងបង្ហាញរថយន្តម៉ូដែលថ្មីដែលត្រូវបានអភិវឌ្ឍលើថ្នាល SEPA2.0 នោះគឺរថយន្តប្រភេទកីឡាពហុមុខងារ ដើម្បីប្រកួតប្រជែងនឹង Model Y របស់ Tesla នៅក្នុងពិព័រណ៍រថយន្តសៀងហៃដែលនឹងបើកឱ្យចូលទស្សនាចាប់ពីថ្ងៃទី 18 មេសា។ Xpeng មិនបានប្រកាសអំពីតម្លៃរបស់ម៉ូដែលរថយន្តនេះ ប៉ុន្តែ លោក Gu និយាយថា Xpeng នឹងផ្ដោតលើការអភិវឌ្ឍរថយន្តអគ្គិសនីដែលមានតម្លៃទាប ចាប់ពី 21,800 ដុល្លារដល់ 50,900 ដុល្លារ ហើយក្រុមហ៊ុននឹងបញ្ចេញរថយន្តមួយម៉ូដែលទៀតនៅចុងឆ្នាំនេះ។

រថយន្តអគ្គិសនីមួយគ្រឿងរបស់ក្រុមហ៊ុនចិន Xpeng

ការផ្ដោតលើរថយន្តអគ្គិសនីតម្លៃទាបរបស់ Xpeng ក៏ដូចជាបណ្ដាក្រុមហ៊ុនផលិតរថយន្តអគ្គិសនីទាំងឡាយនៅលើពិភពលោក ត្រូវបានធ្វើឡើង ក្រោយពី Tesla បើកយុទ្ធនាការ «សង្គ្រាមតម្លៃ» ចាប់ពីដើមឆ្នាំ 2023៕

April 18, 2023

ឧត្ថម្ភាគចក្រដឹកទំនិញដែលធំ និងធ្ងន់ជាងគេបង្អស់លើពិភពលោក

(រុស្ស៊ី) – ឧទ្ធម្ភាគចក្រ Mi-26 អាចដឹកទំនិញទម្ងន់ 20 តោន និងអាចហោះបានចម្ងាយ 750 គីឡូម៉ែត្រ ត្រូវបានប្រើប្រាស់ទាំងក្នុងវិស័យយោធា ទាំងវិស័យស៊ីវិល។

ពិភពលោកបច្ចុប្បន្ន មានឧទ្ធម្ភាគចក្រមួយប្រភេទដែលអាចដឹកទាំងយន្តហោះចម្បាំង។ យោងតាមរបាយការណ៍របស់ណាតូ (NATO) Mi-26 របស់រុស្ស៊ី គឺជាឧទ្ធម្ភាគចក្រធំជាងគេបង្អស់លើសកលលោក។ ឧទ្ធម្ភាគចក្រនេះ មានតួនាទីដឹករថក្រោះ រថពាសដែកទម្ងន់ 13 តោន និងមីស៊ីលប្លោងជាដើម ទៅកាន់មូលដ្ឋានទ័ពនៅឆ្ងាយៗ។

ជាក់ស្ដែង Mi-26 គឺជាឧទ្ធម្ភាគចក្រដែលធ្ងន់ជាងគេលើពិភពលោក ក្រៅពីគំរូដំបូង V-12 ដែលបានបង្ហាញខ្លួនមុននោះ។ ដំណើរការអភិវឌ្ឍ Mi-26 ត្រូវបានធ្វើឡើងនៅដើមទសវត្សរ៍ឆ្នាំ 1970 បន្ទាប់ពីដឹងច្បាស់ថា V-12 មិនអាចដឹកទំនិញធុនធ្ងន់បាន។

ឧទ្ធម្ភាគចក្រ Mil Mi-26 ធៀបនឹងយន្តហោះ Boeing 737

Mi-26 ដែលមានបណ្ដោយ 40 ម៉ែត្រ ទម្ងន់ហោះហើរ 56 តោន កាប៊ីនផ្ទុកទំនិញទំហំ 3.2 ម៉ែត្រ និងមានចំណុះ 110 ម៉ែត្រគូប ត្រូវបានផលិតដោយរោងចក្រផលិតឧទ្ធម្ភាគចក្រ Mil Moscow របស់ប្រទេសរុស្ស៊ី។ ជើងហោះហើរដំបូងរបស់ Mi-26 ត្រូវបានធ្វើឡើងកាលពីខែធ្នូ 1977។ គិតត្រឹមឆ្នាំ 2015 Mil Moscow ផលិត Mi-26 បាន 316 គ្រឿង។

ឧទ្ធម្ភាគចក្រ Mil Mi-26 អាចដឹកយន្តហោះដឹកអ្នកដំណើរ

ឧទ្ធម្ភាគចក្រនេះអាចដឹកទំនិញបាន 20 តោន បើទោះវាមានទម្ងន់ទទេជិតស្មើនឹង Mi-6។ Mi-26 ដែលផ្ទុកទំនិញពេញអាចហោះបានចម្ងាយ 750 គីឡូម៉ែត្រ។ វាក៏អាចហោះហើរជាបន្តបន្ទាប់ក្នុងល្បឿនពី 240-270 គីឡូម៉ែត្រ/ម៉ោង។ បើមិនមានទំនិញ Mi-26 អាចហោះបានចម្ងាយ 2,350 គីឡូម៉ែត្រ។

April 18, 2023

ក្រុមជម្រើសជាតិគុនខ្មែរវៀតណាម ប្ដេជ្ញាដណ្ដើមមេដាយមាសនៅស៊ីហ្គេមកម្ពុជា

នៅក្នុងវិញ្ញាសាប្រកួតក្បាច់គុនខ្មែរនៅស៊ីហ្គេមលើកទី 32 ក្រុមកីឡាករជម្រើសជាតិផ្នែកប្រដាល់គុនខ្មែររបស់ប្រទេសវៀតណាម កំពុងត្រៀមខ្លួនសម្រាប់ការដណ្ដើមមេដាយមាស ដោយមានការជ្រោមជ្រែងពីម្ចាស់ជើងឯកពិភពលោកនៃវិញ្ញាសាគុនមួយថៃ ង្វៀន ត្រឹន យុយ ញឹត។

(គឺជាម្ចាស់ជើងឯកពិភពលោក WMF Muay Thai ប្រាំសម័យកាល និងជាម្ចាស់មេដាយ SEA Games 4 សម័យកាលនៅ Muay Thai)

នៅស៊ីហ្គេមលើកទី 32 ម្ចាស់ផ្ទះកម្ពុជានឹងបញ្ចូលវិញ្ញាសាថ្មីមួយចំនួន ក្នុងនោះមានបីវិញ្ញាសាដែលជាអត្តសញ្ញាណវប្បធម៌ជាតិរបស់កម្ពុជា រួមមាន គុនល្បុក្កតោ គុនខ្មែរ និងអុកចត្រង្គ។ ក្នុងចំណោមវិញ្ញាសាទាំងបីនេះ គុនខ្មែរត្រូវបានគេចាប់អារម្មណ៍ជាងគេ ព្រោះតែមានប្រទេសជិតខាងមួយរបស់កម្ពុជា ចាត់ទុកថា គុនខ្មែរគឺជារបស់ពួកគេ។

ង្វៀន ត្រឹន យុយ ញឹត (Nguyễn Trần Duy Nhất) គឺជាម្ចាស់ជើងឯកពិភពលោក WMF Muay Thai ប្រាំជំនាន់ និងជាម្ចាស់មេដាយស៊ីហ្គេមចំនួនបួនជំនាន់ក្នុងវិញ្ញាសាគុនមួយថៃ

នៅស៊ីហ្គេមដែលកម្ពុជាធ្វើជាម្ចាស់ផ្ទះ វិញ្ញាសាគុនខ្មែរមាន 7 ក្រុមត្រូវចូលរួមប្រកួតដើម្បីដណ្ដើមមេដាយចំនួន 19 គ្រឿង។ ប្រទេសវៀតណាមក៏បានបង្កើតក្រុមជម្រើសជាតិគុនខ្មែរ និងកំពុងត្រៀមខ្លួនសម្រាប់ការចូលរួមប្រកួតនៅស៊ីហ្គេមលើកនេះ ដោយមានការជួយជ្រោមជ្រែងពីកីឡាករប្រដាល់ ង្វៀន ត្រឹន យុយ ញឹត (Nguyễn Trần Duy Nhất) ដែលជាម្ចាស់ជើងឯកពិភពលោកនៃវិញ្ញាសាគុនមួយថៃ។ ម្ចាស់ជើងឯករូបនេះបានក្លាយជាជំនួយការគ្រូបង្វឹករបស់ក្រុមគុនខ្មែរជម្រើសជាតិវៀតណាម។

ការប្រកួតក្នុងវិញ្ញាសាគុនខ្មែរនៅស៊ីហ្គេមលើកទី 32

ដោយមានវត្តមានរបស់ ង្វៀន ត្រឹន យុយ ញឹត ក្រុមគុនខ្មែរជម្រើសជាតិវៀតណាម កំពុងតែមានការប្ដេជ្ញាចិត្តខ្ពស់ក្នុងការដណ្ដើមមេដាយមាសនៅឯព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ដែលនឹងធ្វើឡើងនៅកម្ពុជា នាពេលដ៏ខ្លីខាងមុខ៕

April 18, 2023

ក្រុមហ៊ុនវៀតណាមនាំចេញរថយន្តអគ្គិសនី VinFast ជិតពីរពាន់គ្រឿងទៅកាន់អាម៉េរិកខាងជើង

VinFast ប្រកាសថា បាននាំចេញរថយន្តអគ្គិសនីម៉ូដែល VF 8 លើកទីពីរចំនួន 1,879 គ្រឿងទៅកាន់សហរដ្ឋអាម៉េរិក និងកាណាដា កាលពីយប់ម្សិលមិញ។

កប៉ាល់ Silver Queen ដែលដឹករថយន្តអគ្គិសនី VinFast VF 8 ចំនួន 1,879 គ្រឿង កាលពីយប់ថ្ងៃទី 16 មេសា បានចាកចេញពីកំពង់ផែ MPC Port ដើម្បីទៅកាន់អាម៉េរិកខាងជើង។ តាមគម្រោង ក្រោយការធ្វើដំណើរជាង 20 ថ្ងៃ កប៉ាល់នេះនឹងចូលចតនៅកំពង់ផែ Benicia (សហរដ្ឋអាម៉េរិក) ដើម្បីប្រគល់រថយន្ត 1,098 គ្រឿងសម្រាប់ទីផ្សារអាម៉េរិកនៅក្នុងខែឧសភា ហើយបន្តដឹក 781 គ្រឿងទៀតទៅកាន់កាណាដា ដែលគ្រោងនឹងប្រគល់ជូនអតិថិជននៅក្នុងខែមិថុនាឆ្នាំ 2023។

នេះគឺជាជើងទីពីរដែលរថយន្តអគ្គិសនី VinFast VF 8 របស់ក្រុមហ៊ុនវៀតណាមត្រូវបាននាំចេញទៅកាន់ទីផ្សារអាម៉េរិកខាងជើង។ ចំពោះទីផ្សារអឺរ៉ុប VinFast នឹងនាំចេញជើងដំបូងនៅពាក់កណ្ដាលខែកក្កដា 2023 ក្នុងបរិមាណប្រហែល 700 គ្រឿង។

បច្ចុប្បន្ន ក្រៅពីទីផ្សារវៀតណាម VinFast ក៏បានបើកហាង និងរោងបម្រើសេវាកម្មចំនួនជាង 30 នៅសហរដ្ឋអាម៉េរិក កាណាដា អាល្លឺម៉ង់ បារាំង ហូឡង់ ដើម្បីត្រៀមសម្រាប់ការលក់រថយន្តអគ្គិសនីឆ្លាតវៃដែលនាំចេញពីប្រទេសវៀតណាម។

April 17, 2023

Ronaldo រងរបួស នាំឱ្យឥណ្ឌូណេស៊ីចួបបញ្ហាធំនៅមុនព្រឹត្តិការណ៍ស៊ីហ្គេម

ខ្សែប្រយុទ្ធ Ronaldo Kwateh រងរបួស ធ្វើឱ្យក្រុមបាល់ទាត់បុរសជម្រើសជាតិអាយុក្រោម 22 ឆ្នាំរបស់ឥណ្ឌូណេស៊ី ប្រឈមនឹងការខូចប្រយោជន៍ធំនៅស៊ីហ្គេមលើកទី 32។

កាលពីព្រលប់ថ្ងៃទី 16 មេសា U-22 ឥណ្ឌូណេស៊ីមានការប្រកួតមិត្តភាពជើងទីពីរជាមួយនឹងក្រុម U-22 លីបង់ នៅក្នុងដំណើរឆ្ពោះទៅកាន់ព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023 (ស៊ីហ្គេមលើកទី 32)។ ជាលទ្ធផល ក្រុមបាល់ទាត់របស់ដែនដីសម្បូរកោះសងសឹកបានជោគជ័យបន្ទាប់ពី Putra Beckham ស៊ុតបញ្ចូលទីបានមួយគ្រាប់ នាំឱ្យឥណ្ឌូណេស៊ីឈ្នះ 1-0។

ក៏ប៉ុន្តែ កូនសិស្ស និងគ្រូបង្វឹក Indra Sjafri របស់ឥណ្ឌូណេស៊ី បានទទួលដំណឹងអាក្រក់មួយស្ដីពីស្ថានភាពរបួសរបស់ខ្សែប្រយុទ្ធសំខាន់ Ronaldo Kwateh។ U-22 ឥណ្ឌូណេស៊ីមានហានិភ័យបាត់បង់កំពូលថ្វីជើងកើតឆ្នាំ 2004 រូបនេះនៅស៊ីហ្គេមលើកនេះ។

Ronaldo Kwateh បានរងរបួសនៅនាទីទី 35 ក្នុងគ្រាឥណ្ឌូណេស៊ីកំពុងប្រកួតជាមួយលីបង់។ កំពូលថ្វីជើងរូបនេះបានប៉ះទង្គិចនឹងផ្ទាំងផ្សាយពាណិជ្ជកម្មពេលកំពុងប្រឹងសង្គ្រោះបាល់។ Ronaldo Kwateh ក៏ត្រូវបានក្រុមគ្រូពេទ្យលើកដាក់លើហ្វ្រង់កា នាំចេញទៅព្យាបាល។ ករណីរបួសរបស់ Ronaldo Kwateh ធ្វើឱ្យគ្រូបង្វឹករបស់ឥណ្ឌូណេស៊ីព្រួយបារម្ភខ្លាំង ព្រោះថា ស៊ីហ្គេមនៅកម្ពុជាជិតចូលមកដល់ហើយ។

«ខ្ញុំបានចួប Ronaldo។ ប៉ុន្តែ ខ្ញុំមិនទាន់បានទទួលរបាយការណ៍លំអិតស្ដីពីស្ថានភាពរបស់គាត់។ សង្ឃឹមថាគ្រប់យ៉ាងមិនគួរឱ្យបារម្ភពេកទេ» គ្រូបង្វឹក Indra Sjafri និយាយដូច្នេះ និងបន្ថែមថា ស្ថានភាពរបួសរបស់ Ronaldo អាចត្រូវបានបញ្ជាក់នៅល្ងាចថ្ងៃទី 17 មេសានេះ។

នៅស៊ីហ្គេមលើកទី 32 ក្រុម U-22 ឥណ្ឌូណេស៊ីស្ថិតក្នុងពូល A ជាមួយក្រុមម្ចាស់ផ្ទះកម្ពុជា ហ្វ៊ីលីពីន មីយ៉ាន់ម៉ា និងទីម័រខាងកើត។ តាមគម្រោង U-22 ឥណ្ឌូណេស៊ីនឹងធ្វើដំណើរមកកាន់កម្ពុជានៅថ្ងៃទី 26 មេសា បីថ្ងៃមុនការប្រកួតបើកឆាកជាមួយក្រុមហ្វ៊ីលីពីន៕

April 17, 2023

ភាពយន្តស្ដីពី Mario រកប្រាក់ចំណូលបានជាង 500 លានដុល្លារ ក្រោយចាក់បញ្ចាំងរយៈពេលខ្លី

កំពូលខ្សែភាពយន្តគំនូរជីវចល «The Super Mario Bros. Movie» ទទួលបានសមិទ្ធផលល្អនៅឯបញ្ជរលក់សំបុត្រ នៅពេលរកចំណូលបានជាង 508.7 លានដុល្លារអាម៉េរិក ក្រោយការបញ្ចាំងបានជាងមួយសប្ដាហ៍។

មុននេះពីរថ្ងៃ «The Super Mario Bros. Movie» រកប្រាក់ចំណូលបាន 260.3 លានដុល្លារអាម៉េរិកនៅអាម៉េរិកខាងជើង និង 248.4 លានដុល្លារនៅតាមបណ្ដាប្រទេស និងដែនដីផ្សេងទៀត។ សមិទ្ធផលនេះបានជួយឱ្យ «Super Mario Bros. Movie» បំបែកកំណត់ត្រាស្ដីពីខ្សែភាពយន្តបំប្លែងពីហ្គេមអេឡិចត្រូនិកដែលរកបានប្រាក់ចំណូលខ្ពស់ជាងគេនៅគ្រប់សម័យកាល ដោយបាន «ផ្ដួល» Warcraft (439 លានដុល្លារ) ដែលបង្កើតឡើងកាលពីឆ្នាំ 2016។ ភាពយន្តនេះក៏បានយកឈ្នះលើ «Ant-Man and the Wasp: Quantumania» ក្លាយជាអ្នកនាំមុខគេនៅបញ្ជរលក់សំបុត្រនៅទូទាំងសកលលោក គិតចាប់ពីដើមឆ្នាំនេះ។

«Super Mario Bros. Movie» ត្រូវបានផលិតឡើងដោយផលិតកម្ម Nintendo សហការជាមួយ Illumination និង Universal។ Shigeru Miyamoto ដែលជាស្ថាបនិករបស់បណ្ដាហ្គេម Super Mario Bros ក៏ចូលរួមផលិតភាពយន្តខាងលើ។ ចំណែក Aaron Horvath និង Michael Jelenic ដែលជាអ្នកនៅពីក្រោយភាពជោជ័យរបស់ «Teen Titans Go!» គឺជាអ្នកដឹករឿង។ «Super Mario Bros. Movie» ត្រូវបាននិពន្ធដោយ Matthew Fogel។

ខ្លឹមសារនៃសាច់រឿង «Super Mario Bros. Movie» និយាយពីបងប្អូន Mario និង Luigi ដែលជួបប្រទះការលំបាកនៅពេលសម្រេចចិត្តបើកក្រុមហ៊ុនជួសជុលទូយោទឹកនៅ Brooklyn (សហរដ្ឋអាម៉េរិក)។ ថ្ងៃមួយ ពេលកំពុងរកវិធីជួសជុលលូទឹកក្រោមដីរបស់ទីក្រុង ពួកគេក៏ត្រូវស្រូបចូលទៅក្នុងបំពង់អាថ៌កំបាំង នាំទៅកាន់ទឹកដីចម្លែកមួយ។ Mario វង្វេងទៅដល់រាជាណាចក្រផ្សិត ជាទីដែលគាត់បានជួបមិត្តថ្មី Toad និងព្រះនាង Peach។ ចំណែក Luigi ត្រូវនាំទៅដល់តំបន់ងងឹត ជាទឹកដីដែលគ្រប់គ្រងដោយស្ដេចបីសាចអណ្ដើត Bowser។ Mario ក៏សហការជាមួយព្រះនាង Peach ដើម្បីស្វែងរកវិធីប្រឆាំងនឹងសត្រូវ និងរំដោះប្អូនប្រុស។

តួអង្គសំខាន់ៗរបស់រឿង «Super Mario Bros. Movie»

ភាពយន្តគំនូរជីវចលនេះប្រើប្រាស់ទុន 100 លានដុល្លារអាម៉េរិក។ ក្រុមអ្នកជំនាញវាយតម្លៃថា ខ្ទង់ប្រាក់នេះគឺសមស្រប។ បណ្ដាផលិតកម្មមានដូចជា Pixar និង Disney ជាដើម តែងចំណាយច្រើនជាងនេះទ្វេដងសម្រាប់គម្រោងដូចទៅនឹងប្រភេទភាពយន្តរបស់ «Super Mario Bros. Movie» ។

«Super Mario Bros. Movie» ត្រូវបានផលិតឡើងដោយផលិតកម្ម Nintendo សហការជាមួយ Illumination និង Universal

«Super Mario Bros. Movie» គឺជាភាពយន្តគំនូរជីវចលដែលមានការគាំទ្រច្រើនជាងគេលំដាប់ទីពីរលើពិភពលោក នៅឯបញ្ជរលក់សំបុត្រចូលទស្សនាក្នុងរោងកុន គិតចាប់ពីឆ្នាំ 2019 ដោយយកឈ្នះលើ «Demon Slayer the Movie: Mugen Train (494 លានដុល្លារអាម៉េរិក) និងឈរពីក្រោយ «Minions: The Rise of Gru» របស់ Illumination (942.5 លានដុល្លារ)។ ក្រុមអ្នកវិភាគនិយាយថា «Super Mario Bros. Movie» ប្រាកដជានឹងមានវគ្គពីរ៕

April 17, 2023

ក្រុមបាល់ទាត់ U-22 ឥណ្ឌូណេស៊ី ស្ដារកិត្តិយសឡើងវិញនៅមុនស៊ីហ្គេមនៅកម្ពុជា

ក្រុមបាល់ទាត់ជម្រើសជាតិអាយុក្រោម 22 ឆ្នាំរបស់ឥណ្ឌូណេស៊ី (U-22 ឥណ្ឌូណេស៊ី) ដណ្ដើមបានជ័យជម្នះលើ U-22 លីបង់ ក្រោយពីបានចាញ់កាលពីថ្ងៃទី 13 មេសា 2023។

ព្រលប់ថ្ងៃទី 16 មេសា U-22 ឥណ្ឌូណេស៊ី មានការប្រកួតមិត្តភាពជាលើកទីពីរជាមួយនឹងក្រុមលីបង់។ ក្នុងការប្រកួតលើកទីមួយ U-22 ឥណ្ឌូណេស៊ីបានទទួលបរាជ័យក្នុងលទ្ធផល 1-2។ ក៏ប៉ុន្តែ ក្នុងការប្រកួតលើកទីពីរនេះ កូនសិស្ស និងគ្រូបង្វឹក Indra Sjafri របស់ឥណ្ឌូណេស៊ី ដណ្ដើមបានជ័យជម្នះ 1-0។

U-22 ឥណ្ឌូណេស៊ីស្ថិតនៅក្នុងពូល A ជាមួយនឹងក្រុមម្ចាស់ផ្ទះកម្ពុជា, មីយ៉ាន់ម៉ា, ហ្វ៊ីលីពីន និងទីម័រខាងកើត នៅស៊ីហ្គេមលើកទី 32។ ក្រុមជម្រើសជាតិឥណ្ឌូណេស៊ីនឹងបើកឆាកប្រកួតជាមួយ U-22 ហ្វ៊ីលីពីននៅឯពហុកីឡដ្ឋានជាតិអូឡាំពិកនៅរាជធានីភ្នំពេញ នៅថ្ងៃទី 29 មេសា ឆ្នាំ 2023។

April 17, 2023

ស្ថានីយអវកាសចិនកែច្នៃអុកស៊ីសែនឡើងវិញបាន 100%

ស្ថានីយអវកាសចិន Tiangong ដែលបច្ចុប្បន្នជាកន្លែងធ្វើការរបស់ក្រុមអវកាសចរនៃយានអវកាស Shenzhou 15 អាចកែច្នៃប្រភពផ្គត់ផ្គង់អុកស៊ីសែនបាន 100% តាមរយៈប្រព័ន្ធរបស់ស្ថានីយនេះ។

ព័ត៌មានថ្មីខាងលើត្រូវបានលើកឡើងក្នុងសន្និសីទបច្ចេកវិទ្យាចក្រវាលដែលបានធ្វើឡើងនៅក្នុងខេត្ត Heilongjiang ភាគឦសានប្រទេសចិន។ នេះបើតាមទំព័រ Interesting Engineering ចុះផ្សាយកាលពីថ្ងៃទី 15 មេសា។

ជាបច្ចេកវិទ្យាសំខាន់សម្រាប់បេសកកម្មអវកាសមានមនុស្សរបស់ចិន ប្រព័ន្ធកែច្នៃអុកស៊ីសែនឡើងវិញនេះគាំទ្រដល់ភាវរស់ និងគ្រប់គ្រងបរិស្ថាន បង្កើតបានជាលក្ខខណ្ឌអំណោយផលជាមូលដ្ឋានសម្រាប់ជីវិត ទន្ទឹមនឹងការកសាងបរិស្ថានធ្វើការដែលគួរឱ្យចង់រស់នៅសម្រាប់អ្នកអវកាស ដោយវាធានាបាននូវសុវត្ថិភាព និងសុខភាព។

ប្រព័ន្ធថ្មីខាងលើនេះរួមមាន ប្រព័ន្ធតូចៗចំនួន 6 ដែលមានតួនាទី ៖ ផលិតអុកស៊ីសែនដោយការបំបែកទឹកទៅជាអុកស៊ីសែន និងអ៊ីដ្រូសែន, បំបាត់កាបូន និងឧស្ម័នពុល, សម្អាតទឹកនោម, សម្អាតទឹក, ផលិតទឹកដោយប្រើប្រាស់ CO2 និងអ៊ីដ្រូសែន។

មេបញ្ជាការរបស់ក្រុមហោះហើរនៃយានអវកាស Shenzhou 15 លោក Fei Junlong និយាយថា លោកមានមោទកភាពនៅពេលបានឃើញការរីកចម្រើនរបស់បច្ចេកវិទ្យាគាំទ្រដល់ភាវរស់របស់ប្រព័ន្ធកែច្នៃអុកស៊ីសែន។ លោក Fei Junlong បន្ថែមថា មានអារម្មណ៍ល្អនៅពេលធ្វើការ និងរស់នៅលើស្ថានីយអវកាសបានជាង 100 ថ្ងៃ៕

April 17, 2023

U-22 របស់មីយ៉ាន់ម៉ា ឈ្នះក្រុមថៃនៅមុនព្រឹត្តិការណ៍ស៊ីហ្គេមលើកទី 32

ក្រុមបាល់ទាត់ជម្រើសជាតិ U-22 មីយ៉ាន់ម៉ា ដណ្ដើមបានជ័យជម្នះលើ Bangkok FC (ថៃ) នៅក្នុងដំណើរហ្វឹកហាត់ត្រៀមខ្លួនសម្រាប់ការប្រកួតនៅក្នុងព្រឹត្តិការណ៍កីឡាអាស៊ីអាគ្នេយ៍លើកទី 32 ដែលកម្ពុជាធ្វើជាម្ចាស់ផ្ទះ។

ដើម្បីត្រៀមខ្លួនសម្រាប់ស៊ីហ្គេម ថ្មីៗនេះ ក្រុម U-22 មីយ៉ាន់ម៉ា មានដំណើរហ្វឹកហាត់នៅប្រទេសថៃ។ ក្នុងដំណើរនេះ ក្រុមរបស់មីយ៉ាន់ម៉ាក៏បានទាត់មិត្តភាពជាមួយនឹងក្រុមថៃ គឺ Bangkok FC។ នៅទីនេះ មីយ៉ាន់ម៉ាបានឈ្នះ 1-0 លើគូប្រកួត។ ជ័យជម្នះមួយគ្រាប់របស់មីយ៉ាន់ម៉ាត្រូវបានបង្កើតឡើងក្នុងនាទីទី 40 ។

ក្រៅពីការប្រកួតខាងលើ U-22 របស់មីយ៉ាន់ម៉ានឹងមានការប្រកួតមួយចំនួនទៀត មុនពេលឈានចូលដល់ព្រឹត្តិការណ៍ស៊ីហ្គេមនៅកម្ពុជា។

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំរបស់មីយ៉ាន់ម៉ា ស្ថិតក្នុងពូល A ជាមួយនឹងម្ចាស់ផ្ទះកម្ពុជា ឥណ្ឌូណេស៊ី ហ្វ៊ីលីពីន និងទីម័រខាងកើត នៅក្នុងព្រឹត្តិការណ៍ស៊ីហ្គេមលើកនេះ។ នេះគឺជាពូលដែលត្រូវបានគេជឿថា «ស្រណុកជាង» បើធៀតនឹងពូល B ដែលសម្បូរក្រុមជើងខ្លាំង រួមមាន ថៃ វៀតណាម មីយ៉ាន់ម៉ា សិង្ហបុរី និងឡាវ។

នៅស៊ីហ្គេមលើកទី 32 នេះ គូប្រជែងធំបំផុតដែលមីយ៉ាន់ម៉ាត្រូវប្រឈមមុខ នោះគឺ U-22 របស់កម្ពុជា និង U-22 របស់ឥណ្ឌូណេស៊ី។

April 12, 2023

Category: សង្គម និងសេដ្ឋកិច្ច