Category: សង្គម និងសេដ្ឋកិច្ច

ផលិតកររឿង « ព្រាយ » ក្តុកក្តួលស្រក់ទឹកភ្នែកចង់លើកស្ទួយក្បាច់គុនល្បុក្កតោ
ពិធីសម្ពោធភាយន្ដ « ព្រាយ » ដែលបានធ្វើឡើងក្រោមវត្តមានតារាសិល្បៈច្រើនដួងនៅថ្ងៃទី11 ខែធ្នូឆ្នាំ លោក ស៊ុម ភារិន ចាងហ្វាងផលិតកម្មបដិហារ្យភាពយន្តបានសម្រក់ទឹកភ្នែក និងរំពឹងពីការរីកចម្រើនវិស័យភាពយន្ដខ្មែរលាយបញ្ចូលវប្បធម៌ខ្មែរ ឆ្ពោះទៅមុខប្រកបដោយគុណភាព។
ជាក់ស្ដែង ផលិតកររូបនេះ បានបញ្ជាក់ទាំងទឹកភ្នែករលីងរលោងថា មនុស្សតិចណាស់ដែលចាប់អារម្មណ៍ថា លោកបានយំហូរទឹកភ្នែក ក្នុងពេលការសម្ដែងល្បុក្កតោត្រូវបានសម្ដែង ដោយលោកបានទាំងយកដៃជូតទឹកភ្នែកផង ដោយសារតែអាណិតអាសូរចំពោះកីឡាករកីឡាការិនីដែលប្រឹងសម្ដែងនោះពេល ដែលខ្លះទម្រាំតែចេះក្បាច់គុនដាវ និងក្បាច់ល្បុក្កតោបានប៉ុណ្ណឹង គឺត្រូវលះបង់យ៉ាងលំបាក ប៉ុន្តែសម្រាប់ការគាំទ្រវិញ គឺមិនសូវមាន។
លោកចាត់ទុកថា កីឡាករកីឡាការិនីល្បុក្កតោ ដែលប្រឹងសម្ដែងនៅថ្ងៃសម្ពោធភាពយន្តរបស់ខ្លួន ថាសុទ្ធតែបុគ្គលដែលមានឆន្ទៈ ដោយមិនខុសពីលោកដែលប្រឹងទាំងលំបាកដែលសុខចិត្តលះបង់លុយកាក់ និងពេលវេលាមកផលិតកុននោះទេ ទើបដល់ឈុតកីឡាករកីឡាការិនីកាន់ដាវកាប់គ្នាលើឆាក ធ្វើឱ្យលោកស្រក់ទឹកភ្នែកកណ្ដាលចំណោមមហាជន ព្រោះតែគិតដល់ការប្រឹងប្រែងរបស់ខ្លួន ដែលដូចគ្នានឹងការប្រឹងប្រែងរបស់កីឡាករល្បុក្កតោម្នាក់។
គួរបញ្ជាក់ផងដែរថា ភាពយន្ត« ព្រាយ » នឹងប្រកាសលក់សំបុត្រព្រមគ្នានៅថ្ងៃទី13 ធ្នូ នៅភ្នំពេញ និងសៀមរាប ព្រមទាំងតាមបណ្ដារោងផ្សេងៗ ដូចជាបាត់ដំបង និងកំពង់ចាមជាដើម៕
December 12, 2018
ម៉ាឡេស៊ីវាយបកដើម្បីតាមស្មើវៀតណាម ក្នុង Suzuki Cup វគ្គផ្តាច់ព្រ័ត្រ ជើងទី1
ក្រុមបាល់ទាត់ជម្រើសជាតិម៉ាឡេស៊ីបានវាយបកបន្ទាប់ពីការដេញតាមពីក្រោយក្រុមជម្រើសជាតិវៀតណាម 2គ្រាប់ ដើម្បីទទួលបានលទ្ធផលស្មើ2-2 នៅក្នុងការប្រកួតជើងទី1 នៃព្រឹត្តិការណ៍ AFF Suzuki Cup វគ្គផ្តាច់ព្រ័ត្រ កាលពីថ្ងៃអង្គារ។
ទោះបីជាយ៉ាងណា ក្រុមជម្រើសជាតិវៀតណាម នឹងឈានទៅកាន់ការប្រកួតជើងទី2 នៅថ្ងៃសៅរ៍នេះ ក្នុងទីក្រុងហាណូយ ក្នុងនាមជាក្រុមមានក្តីសង្ឃឹមច្រើនក្នុងការឈ្នះពាន ក្រោយពីរកបានគ្រាប់បាល់ក្រៅដី 2គ្រាប់ ខណៈដែលក្រុមជម្រើសជាតិទាំង2 នឹងត្រូវប្រកួតគ្នាដើម្បីឈ្នះពានប្រចាំតំបន់មួយនេះជាលើកទី2 ។
ក្រោយពីបានចាប់ផ្តើមយ៉ាងរឹងមាំពីសំណាក់ក្រុមម្ចាស់ផ្ទះ ក្រុមជម្រើសជាតិវៀតណាម បានរកគ្រាប់បាល់នាំមុខ 2គ្រាប់យ៉ាងឆាប់រហ័សនៅត្រឹមនាទីទី25 ។
កីឡាករ Phan Van Duc បានទម្លុះតំបន់ការពាររបស់ក្រុមជម្រើសជាតិម៉ាឡេស៊ី នៅពេលដែលរូបគេបានទទួលបាល់ពីការបញ្ជូនរបស់ Doan Van Hau និងបានបញ្ជូនទៅឱ្យកីឡាករ Nguyen Huy Hung ដែលការស៊ុតបាល់របស់គេ បានផ្លាតចូលទីរបស់អ្នកចាំទី FarizalMarlias តែម្តង។
កីឡាករ Pham DucHuy បានជួយឱ្យក្រុមខ្លួននាំមុខ 2-០ ភ្លាមៗបន្ទាប់ពីនោះ នៅពេលដែលការស៊ុតបាល់ពីចម្ងាយរបស់គេ បានរត់ចូលទីរបស់ Farizal យ៉ាងល្អ។
ប៉ុន្តែ ក្រុមជម្រើសជាតិម៉ាឡេស៊ី បានវាយបកវិញក្នុងការប្រកួតនៅនាទីទី9 នៅមុនពេលសម្រាកតង់ទី1 នៅពេលដែល ShahrulSaad បានរកគ្រាប់បាល់បំប៉ោងសំណាញ់ទី ក្រោយពីការស៊ុតបាល់ Free-kick របស់ SaymerKutty។ ម៉ាឡេស៊ី បានតាមស្មើវិញនៅនាទីទី60 ខណៈដែល Safawi Rashid បានស៊ុតបាល់ពិន័យ Free-kick ចូលទីយ៉ាងល្អ៕
ប្រភពពី៖ Reuters
December 12, 2018
ភាពយន្ដ «ព្រាយ» បង្ហាញប្លង់ភ័យរន្ធត់សាហាវខ្លាំងពេក រហូតដល់ជាប់បម្រាមក្រសួង
យោងតាមការបង្ហោះរបស់ផេចបដិហារ្យភាពយន្ត បានសរសេរថា នាយកដ្ឋានភាពយន្ត មិនអនុញ្ញាតឱ្យក្មេងអាយុក្រោម15ឆ្នាំ ចូលទស្សនាភាពយន្តរឿង«ព្រាយ»នោះទេ ដោយនាយកដ្ឋានក៏មិនឱ្យអ្នកមានជំងឺបេះដូងចូលទស្សនាដូចគ្នាផងដែរ ព្រោះតែអះអាងថាភាពយន្តនេះមានឈុតឆាកច្រើនបង្ហាញពីភាពរន្ធត់ខ្លាំង ហើយអាចបណ្ដាលឱ្យអ្នកមានជំងឺបេះដូងមានបញ្ហាជាយថាហេតុតនៅក្នុងរោងកុន។
លោក ស៊ុម ភារិន ម្ចាស់ផលិតកម្មបដិហារ្យបានអះអាងថា អ្វីដែលខាងនាយកដ្ឋានភាពយន្តដាក់បម្រាម រូបលោកមិនមានប្រតិកម្មនោះទេ ផ្ទុយទៅវិញលោកក៏គាំទ្រមិនឱ្យក្មេងក្រោម15ឆ្នាំ និងអ្នកមានបញ្ហាបេះដូងចូលទស្សនានោះដែរ ដោយលោកបញ្ជាក់ថា មិនអាចគ្រាន់តែចង់បានផលចំណេញហើយមិនគិតពីផលប៉ះពាល់។ លោកអះអាងថា ក្នុងភាពយន្តរឿង«ព្រាយ»នេះត្រូវបានសម្រិតសម្រាំង និងផលិតឡើងដោយយកចិត្តទុកដាក់លើគុណភាពរឿងយ៉ាងខ្លាំង ទើបលោកនៅតែរំពឹងថានឹងមានអ្នកទស្សនាចាប់អារម្មណ៍ ព្រោះតែភាពយន្តទាំងមូល គឺផ្ដោតលើគុណភាព ស្ដង់ដារ និងពោរពេញដោយឈុតភ័យរន្ធត់។
យ៉ាងណាមិញបើដឹងថាខ្លួនមានបញ្ហាបេះដូង ហើយចង់ទស្សនាក៏ទាមទារឱ្យមានមនុស្សពីរនាក់នៅទស្សនាជាមួយផងដែរ ដើម្បីការពារកុំឱ្យមានរឿងកើតឡើង។ ជាមួយនឹងបកស្រាយ ភាពយន្តមួយនេះ ពិតជាពោរពេញដោយប្លង់សាហាវៗ និងគួរឱ្យភ័យរន្ធត់ប្រាកដមែន ប៉ុន្តែគេនៅតែរំពឹងថាការដាក់បញ្ចាំងផ្លូវការនៅថ្ងៃទី13 ខែធ្នូ ខាងមុខនេះ នឹងកញ្ជ្រោលអ្នកចូលចិត្តភាពយន្តរន្ធត់ៗ ឱ្យសម្រុកទៅទស្សនាស្របគ្នានឹងឱកាសជិតដាច់ឆ្នាំ គឺមានមនុស្សចូលចិត្តលម្ហែកាយច្រើនជាពិសេសអ្នកចូលចិត្តមើលកុនខ្មែរ៕
December 11, 2018
ស្ត្រី 1នាក់ក្នុងចំណោម 5នាក់ប្រឈមនឹងអំពើហិង្សា
បញ្ហាអំពើហិង្សាលើស្ត្រីនៅតែជាចំណុចប្រឈមដ៏ស្រួចស្រាល់មួយក្នុងសង្គមកម្ពុជា បើទោះបីជាបញ្ហានេះត្រូវបានក្រសួង និងស្ថាប័នជំនាញធ្វើការផ្សព្វផ្សាយ និងទប់ស្កាត់យ៉ាងយកចិត្តទុកដាក់ក៏ដោយ។
ស្ត្រីបច្ចុប្បន្ន ត្រូវបានគេមើលឃើញថាមានសមត្ថភាពក្នុងការបំពេញវិជ្ជាជីវៈ និងចូលរួមចំណែកយ៉ាងសំខាន់ក្នុងការអភិវឌ្ឍសង្គមតាមរយៈការបំពេញការងារក្នុងស្ថាប័នសំខាន់ៗទាំងរដ្ឋនិងឯកជន ក៏ដូចជាការបង្កើតសហគ្រាសធុនតូច និងមធ្យមជាដើម។ស្ត្រីបានចាប់ផ្តើមមានតួនាទីយ៉ាងសំខាន់ក្នុងការសម្រេចចិត្តលើការងារធំៗក្នុងស្ថាប័ននានាតែបញ្ហាដែលជាឧបសគ្គសម្រាប់ស្ត្រីកម្ពុជា គឺបញ្ហាអំពើហិង្សាដែលនៅតែកើតមាននៅឡើយបើទោះបីជាវាបានថយចុះខ្លះហើយក៏ដោយ។
យោងតាមរបាយការណ៍របស់អង្គការWorld Vision បានបញ្ជាក់ឱ្យដឹងថា ស្ត្រី 1នាក់ក្នុងចំណោម5នាក់កំពុងប្រឈមនឹងបញ្ហាអំពើហិង្សា ហេតុនេះការចូលរួមចំណែកផ្សព្វផ្សាយព័ត៌មាននិងការយល់ដឹងពីអំពើហិង្សា គឺជាចំណុចសំខាន់មួយក្នុងការជំរុញឱ្សស្ត្រីកាន់តែមានលទ្ធភាពពេញលេញក្នុងការចូលរួមចំណែកអភិវឌ្ឍសង្គមប្រកបដោយសក្តានុពលខ្ពស់៕
December 11, 2018
ញាក់សាច់!! តូតា បង្អួតរាងសិចស៊ី ធ្វើឱ្យប្រុសៗឈាមច្រមុះទៀតហើយ
តាមរយៈបណ្ដាញទំនាក់ទំនងសង្គមអ៊ីនស្ដាក្រាមរបស់តារាស្រីបបូរមាត់សិចស៊ី ម៉ាក់ សែនសូនីតា ឬតូតា បានបង្ហោះរូបភាពជាច្រើនសន្លឹកក្នុងឈុតប៊ីគីនីយ៉ាងសិចស៊ីស្រៀវស្រាល ខណៈដែលនាងបានធ្វើដំណើរកម្សាន្ដទៅកាន់ឆ្នេរសមុទ្រកោះរ៉ុងជាមួយគូស្នេហ៍ និងក្រុមគ្រួសារនាង។
ការបង្អួតពីសម្រស់ និងរូបរាងដ៏សិចស៊ីរបស់តារាស្រីរូបនេះបានធ្វើឱ្យមហាជនជាអ្នកគាំទ្រលាន់មាត់សរសើរនាងនៅក្នុង Comment ជាច្រើនថា តូតា ពិតជាស្រស់ស្អាតមិនចាញ់តារាបរទេសប៉ុន្មានឡើយ(ហ៊ឹស!) និងមានបុរសៗមិនតិចនាក់ទេដែលក្នក់ក្នាញ់នឹងសម្រស់របស់តារាស្រីរូបនេះ តែគួរឱ្យស្តាយណាស់ នាងមានគូស្នេហ៍រួចហើយ(ស្រឡះសាធុ!)។ តូតា ធ្លាប់ប្រាប់ថានាងមិនខ្លាច នឹងលេងខ្លួនសិចស៊ីទេ ព្រោះជាការស្លៀកពាក់ពេលដើរលេងជាលក្ខណៈឯកជន។ កន្លងទៅ តូតា ធ្លាប់បានប្រាប់ថា នាងមិនខ្វល់ចំពោះការរិៈគន់ទេ ព្រោះនាងតុបតែងខ្លួនសិចស៊ីតែក្នុងកម្មវិធីក្រៅសិល្បៈប៉ុណ្ណោះ ៕
December 11, 2018
ពិព័រណ៍សៀវភៅឆ្នាំនេះមានមនុស្សចូលរួមច្រើនជាងឆ្នាំមុន
ពិព័រណ៍សៀវភៅឆ្នាំនេះមានប្រជាជនកម្ពុជាគ្រប់ស្រទាប់វណ្ណៈចូលរួមច្រើនជាងឆ្នាំមុន ព្រោះចាប់ផ្តើមពីព្រលឹមថ្ងៃទី1 នេះ មានមនុស្សចូលរួមប្រជ្រៀតគ្នាស្ទើរដើរមិនរួច ស្របពេលដែលស្តង់សៀវភៅរបស់ក្រុមហ៊ុនមួយចំនួនបានពង្រីកខ្លួនកាន់តែធំឡើង តែនៅតែមានភាពមមាញឹក។
ប្រជាជន ជាពិសេសយុវជនបានចាប់ផ្តើមគាំទ្រដោយចូលរួមទស្សនាសៀវភៅយ៉ាងសម្បូរបែប និងទិញសៀវភៅជាច្រើនក្បាលពីអ្នកនិពន្ធផ្ទាល់ដើម្បីជាការគាំទ្រដល់អ្នកនិពន្ធផង និងដើម្បីអានទទួលយកចំណេះដឹងផ្ទាល់ខ្លួនផង។
ជាស្ថានភាពជាក់ស្តែង នៅឆ្នាំ2018 នេះមានទាំងកំណើនអ្នកនិពន្ធដែលបានបោះពុម្ពផ្សាយស្នាដៃថ្មីៗ រួមទាំងអ្នកគាំទ្រកាន់តែច្រើនឡើងៗ ស្ថានភាពនេះនឹងក្លាយជាចរន្តវិជ្ជមានសម្រាប់ប្រជាជនកម្ពុជាក្នុងការលើកកម្ពស់ការអាន និងផ្តល់តម្លៃដល់ការអប់រំតាមរយៈការអានឱ្យកាន់តែមានសម្ទុះខ្លាំងឡើងពីមួយឆ្នាំទៅមួយឆ្នាំ៕
December 11, 2018
នាយករដ្ឋមន្រ្តីកម្ពុជាអំពាវនាវដល់អ្នកវិនិយោគវៀតណាមឱ្យមកមើលសក្ដានុពលវិនិយោគនៅកម្ពុជា
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអំពាវនាវដល់អ្នកវិនិយោគវៀតណាមដែលមិនទាន់បានមកកម្ពុជា ឱ្យអញ្ជើញមកសិក្សាឈ្វេងយល់ពីសក្ដានុពល និងកាលានុវត្តភាពវិនិយោគនៅកម្ពុជា ព្រមទាំងសម្រេចចិត្តបណ្ដាក់ទុនវិនិយោគដើម្បីទាញយកប្រយោជន៍ជាអតិបរមាពីកិច្ចសហប្រតិបតិ្តការទ្វេភាគីរវាងវៀតណាម និងកម្ពុជា។
សម្ដេចនាយករដ្ឋមន្ត្រី ក៏បានជម្រាបជូនក្រុមអ្នកធុរកិច្ច និងអ្នកវិនិយោគទាំងអស់អំពីសក្ដានុពលវិនិយោគ និងឧត្តមភាពសំខាន់ៗរបស់កម្ពុជាដែលក្នុងនោះរួមមាន៖
ទី1-ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច។
ទី2-កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជា«រោងចក្រនៃអាស៊ី» ហើយម្យ៉ាងទៀតកម្ពុជាក៏ស្ថិតនៅចំណុចកណ្តាលនៃតំបន់មេគង្គ ដែលជាតំបន់មានកំណើនសេដ្ឋកិច្ច និងការតភ្ជាប់ខ្ពស់ជាងគេ។
ទី3-កម្លាំងពលកម្មដែលមានភាពសម្បូរបែប និងវ័យក្មេងដែលក្នុងនោះប្រជាជនដែលមានអាយុត្រឹម 35ឆ្នាំចុះមានចំនួនដល់ទៅ72% នៃចំនួនប្រជាជនសរុប គួបផ្សំនឹងការកើនឡើងនៃចំនួនប្រជាជនដែលមានចំណូលមធ្យម និងជាវណ្ណៈកណ្តាលនឹងបង្កើតកាលានុវត្តភាពសម្រាប់កម្ពុជា។
ទី4-កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ។
ទី5-ទំនិញផលិតនៅកម្ពុជាមិនមែនផ្គត់ផ្គង់សម្រាប់តែទីផ្សារនៅកម្ពុជាដែលមានប្រជាជនប្រមាណតែជាង 15លាននាក់ប៉ុណ្ណោះទេ ប៉ុន្តែអាចផ្គត់ផ្គង់ទៅក្នុងទីផ្សារអនុតំបន់មេគង្គដែលមានអតិថិជនប្រមាណ 250លាននាក់ ក្នុងទីផ្សារអាស៊ានដែលមានអតិថិជនប្រមាណ 630លាននាក់ និងទីផ្សារនៅក្នុងតំបន់នៃកិច្ចព្រមព្រៀងភាពជាដៃគូសេដ្ឋកិច្ចទូលំទូលាយតំបន់(RCEP)ដែលមានអតិថិជនប្រមាណ 3ប៊ីលាននាក់ ព្រមទាំងលទ្ធភាពចូលទីផ្សារធំដទៃទៀតក្នុងពិភពលោកទៀតផង។
ទី6-កម្ពុជា និងវៀតណាមបានចុះកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពាក់ព័ន្ធនឹងពន្ធលើប្រាក់ចំណូលនៅថ្ងៃទី31 ខែមីនា ឆ្នាំ2018 នៅទីក្រុងហាណូយ ។
គួរបញ្ជាក់ដែរថា ទំហំពាណិជ្ជកម្មសរុបរវាងកម្ពុជា និងវៀតណាមក្នុងឆ្នាំ2017 សម្រេចបានចំនួនប្រមាណ 2.13ពាន់លានដុល្លារអាមេរិក កើនឡើងប្រមាណ30% ធៀបនឹងឆ្នាំ2016។ យ៉ាងណាមិញ ការនាំចេញពីប្រទេសកម្ពុជាទៅប្រទេសវៀតនៅមានទំហំតូចនៅឡើយ។ ជាក់ស្តែងការនាំចេញរបស់កម្ពុជាទៅប្រទេសវៀតណាមក្នុងឆ្នាំ2017 មានចំនួន 342លានដុល្លារអាមរិក ធៀបនឹងការនាំចូលរបស់កម្ពុជាពីវៀតណាម ក្នុងឆ្នាំ2017 មានចំនួនប្រមាណ 1.8ពាន់លានដុល្លារអាមេរិក។
ក្នុងក្របខ័ណ្ឌនៃការវិនិយោគផ្ទាល់ពីវៀតណាម រហូតដល់ខែវិច្ឆិកា ឆ្នាំ2018 ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនវៀតណាមចំនួន 75គម្រោងក្នុងទុនវិនិយោគសរុបចំនួនប្រមាណ 2.4ពាន់លានដុល្លារអាមេរិកដែលផ្តោតសំខាន់លើវិស័យកសិកម្ម និងហេដ្ឋារចនាសម្ព័ន្ធ៕
December 11, 2018
កម្ពុជាសង្ឃឹមដំណាំម្រេចមានទីផ្សារល្អ ខណៈកំពុងរៀបចំចូលក្នុងគោលនយោបាយជាតិ
ក្រសួងពាណិជ្ជកម្ម បានរៀបចំផលិតផលម្រេចឱ្យទៅជាគោលនយោបាយមួយរបស់រាជរដ្ឋាភិបាល ដើម្បីផ្ដល់តម្លៃក្នុងការលក់ និងជួយដល់កសិករដាំម្រេចផ្ទាល់ ជាពិសេសសមាគម និងសហគមន៍ម្រេចនៅតាមមូលដ្ឋាន និងអ្នកធ្វើការក្នុងវិស័យម្រេចឱ្យមានទំនុកចិត្ដក្នុងការចាប់ដៃគូលក់ម្រេចនៅលើទីផ្សារក្នុង និងក្រៅប្រទេស។ នេះបើតាមការឱ្យដឹងពីមន្រ្តីជាន់ខ្ពស់របស់ក្រសួងពាណិជ្ជកម្ម។
ឯកឧត្តមម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម ថ្លែងថា នៅពេលដែលម្រេចត្រូវបានដាក់បញ្ចូលក្នុងគោលនយោបាយជាតិរួចហើយវានឹងងាយស្រួលក្នុងការនាំចេញទៅកាន់ទីផ្សារក្រៅប្រទេស ហើយអាចជួយអភិវឌ្ឍកសិករអ្នកដាំដុះម្រេចនិងម្ចាស់អាជីវកម្មម្រេចនេះបានកាន់តែលឿនឡើង។ទន្ទឹមនេះក្រសួងពាណិជ្ជកម្មនឹងជួយផ្សព្វផ្សាយ ស្វែងរកដៃគូ និងការគាំទ្រពីស្ថាប័នជាតិនិងអន្ដរជាតិលើវិស័យម្រេចរបស់កម្ពុជាទៀតផង។
ឯកឧត្តមបានបញ្ជាក់ថាមុននឹងរាជរដ្ឋាភិបាលដាក់បញ្ចូលម្រេចក្នុងគោលនយោបាយជាតិត្រូវតែមានការពិភាក្សាជាមួយភាគីពាក់ព័ន្ធឱ្យរួចរាល់ជាមុនសិន ដើម្បីឈានទៅធ្វើការរៀបចំជាឯកសារដាក់ឆ្លងទៅប្រមុខរាជរដ្ឋាភិបាលហើយឆ្លងសេចក្ដីសម្រេច និងអនុម័តក្នុងកិច្ចប្រជុំពេញអង្គនៃគណៈរដ្ឋមន្រ្ដី ដូច្នេះអ្នករកស៊ីលើវិស័យដំណាំម្រេចនៅកម្ពុជាអាចនឹងមានទីផ្សារល្អ នាពេលខាងមុខ។
លោករដ្ឋលេខាធិការរូបនេះបានសង្កត់ធ្ងន់ដែរថាគោលនយោបាយម្រេចនេះកំពុងតែពិភាក្សាជាចុងក្រោយជាមួយអន្ដរក្រសួង សមាគម សហគមន៍និងសហព័ន្ធម្រេច ដើម្បីឈានទៅបញ្ចប់ និងប្រមូលយកធាតុចូលពីគ្រប់ភាគីពាក់ព័ន្ធបន្ទាប់មករៀបចំឯកសារដាក់ជូនប្រមុខរាជរដ្ឋាភិបាលនាពេលឆាប់ៗនេះ។
លោកឧកញ៉ា សុង សារ៉ន ប្រធានសហព័ន្ធម្រេចនិងគ្រឿងទេសកម្ពុជាបានឱ្យដឹងថា ការរៀបចំបង្កើតគោលនយោបាយថ្នាក់ជាតិសម្រាប់ផលិតផលម្រេចនេះគឺបានឆ្លុះបញ្ចាំងពីការខិតខំប្រឹងប្រែងដោះស្រាយរួមគ្នាលើបញ្ហាប្រឈមនាពេលបច្ចុប្បន្ននិងពេលអនាគតដើម្បីប្រមូលនូវធាតុចូលក្នុងការផ្ដល់នូវឱកាសប្រមូលធាតុចូល កត្ដាប្រឈមនិងបង្កើនការនាំចេញម្រេចនៅលើទីផ្សារអន្ដរជាតិ ព្រមទាំងលើកកម្ពស់គុណភាពម្រេចកម្ពុជាផងដែរ។
លោកឧកញ៉ាបានស្វាគមន៍ចំពោះការរៀបចំយន្ដការរបស់រាជរដ្ឋាភិបាលក្នុងការដាក់បញ្ចូលម្រេចក្នុងគោលនយោបាយជាតិដែលនឹងជំរុញឱ្យមានការនាំចេញម្រេចជាផ្លូវការដែលសហព័ន្ធម្រេចអាចមានឱកាសពិភាក្សារួមគ្នាលើចំណុចត្រូវដោះស្រាយបន្ទាន់រយៈពេលខ្លី មធ្យមនិងរយៈពេលវែង ដើម្បីធានាបាននូវការដោះស្រាយបញ្ហាប្រឈមឬការនាំចេញម្រេចទៅកាន់ទីផ្សារអន្ដរជាតិឱ្យទទួលបានជោគជ័យ។
សូមបញ្ជាក់ថា គោលនយោបាយម្រេចនេះនឹងកំណត់រយៈពេល 5ឆ្នាំចាប់ពីឆ្នាំ2018 ដល់ឆ្នាំ2023ដើម្បីអនុម័តជាផ្លូវការលើគោលនយោបាយម្រេច មុននឹងយកទៅប្រើប្រាស់ជាផ្លូវការដែលរាជរដ្ឋាភិបាលនឹងចូលរួមជួយជ្រោមជ្រែងលើផលិតផលម្រេចនេះឱ្យមានទីផ្សារត្រឹមត្រូវ និងលើកកម្ពស់តម្លៃឱ្យមានស្ថិរភាព៕
December 11, 2018
លោក Pochettino៖ Spurs អាចផ្តល់ការខកចិត្តដល់ Barcelona បាន
Tottenham Hotspur អាចផ្តួលក្រុម Barcelona នាកីឡដ្ឋាន Nou Camp នៅរាត្រីនេះបាន ដើម្បីឈ្នះកៅអីមួយក្នុងក្របខ័ណ្ឌ Champions League វគ្គ 16ក្រុមចុងក្រោយ។ នេះបើយោងតាមការបញ្ជាក់របស់លោកគ្រូបង្វឹក Mauricio Pochettino។
Spurs ត្រូវតែធ្វើឱ្យបានស្មើ ឬដណ្តើមយកលទ្ធផលល្អប្រសើរជាងក្រុម Inter Milan ដែលត្រូវប្រកួតលើទឹកដីខ្លួនឯងជាមួយនឹងក្រុម PSV Eindhoven ដើម្បីទៅវគ្គ 16ក្រុមចុងក្រោយ ដែលដំបូងឡើយហាក់ដូចមិនអាចទៅរួចឡើយ ក្រោយពីរកបានត្រឹមតែ 1ពិន្ទុគត់ពីការប្រកួតបើកឆាក 3លើករបស់ពួកគេក្នុងពូល នៅមុនពេលដណ្តើមបានជ័យជម្នះលើទឹកដីខ្លួនឯងជាប់ៗគ្នាលើក្រុម PSV និង Inter។
លោក Ernesto Valverde គ្រូបង្វឹកនៃក្រុមបដិបក្ខរបស់លោក Pochettino បាននិយាយកាលពីថ្ងៃចន្ទថា លោកនឹងត្រូវផ្លាស់ប្តូរកីឡាករជាច្រើននៅក្នុងក្រុម Barca ដែលបានឈ្នះកៅអីទៅវគ្គបន្តរួចជាស្រេចក្នុងនាមជាក្រុមឈរលេខ1ក្នុងពូល ប៉ុន្តែគ្រូបង្វឹកសញ្ជាតិអាហ្សង់ទីនរបស់ក្រុម Tottenham វិញ មិនចាត់ទុកថា រឿងនោះជាចំណុចមានប្រៀបឡើយ។
លោក Pochettino បានប្រាប់សន្និសីទសារព័ត៌មានមួយកាលពីថ្ងៃចន្ទថា៖ «យើងនឹងត្រៀមខ្លួនរួចរាល់ក្នុងការប្រកួតក្នុងលក្ខខណ្ឌដ៏ល្អបំផុតដែលយើងអាច។ ខ្ញុំពិតជាមានសុទិដ្ឋិនិយម ខ្ញុំគិតថា យើងអាចមកទីនេះ ក្នុងកម្រិតដ៏ខ្លាំងបំផុតរបស់យើង ហើយយើងត្រូវតែត្រៀមឱ្យបានរួចរាល់ និងគិតអំពីការប្រកួតដែលយើងនឹងលេង មិនមែនលើអ្វីដែល Barca នឹងធ្វើឡើយ។
គ្រូបង្វឹករូបនេះបានបន្ថែមទៀតថា៖ «ក្រុម Barcelona ជាក្រុមដ៏អស្ចារ្យមួយជាមួយនឹងកីឡាករ 24នាក់ ដែលមានគុណភាពដ៏អស្ចារ្យ។ ដើម្បីក្លាយជាក្រុមខ្លាំងបំផុតមួយក្នុងពិភពលោក អ្នកត្រូវការក្រុមមួយដែលអាចបង្ហាញពីគុណភាព ហើយពួកគេមានរាល់ចំណុចខ្លាំងទាំងអស់នោះ»។ ការប្រកួតនេះនឹងចាប់ផ្តើមនៅម៉ោង 3ទៀបភ្លឺ៕
December 11, 2018
Liverpool ទទួលការជឿជាក់ពី Maneនៅមុនពេលប៉ះ Napoli រាត្រីនេះ
ខ្សែប្រយុទ្ធ Sadio Mane បានត្រៀមខ្លួនរួចរាល់ហើយសម្រាប់ការចូលលេងក្នុងជម្រើស 11នាក់ដំបូងនៃការប្រកួតក្របខ័ណ្ឌ Champions League group វគ្គចែកពូលនៅរាត្រីនេះ ជាមួយនឹងក្រុម Napoli។ នេះបើយោងតាមអ្នកចាត់ការទូទៅលោក Juergen Klopp ដែលបានអំពាវនាវឱ្យអ្នកគាំទ្រនៃក្រុមម្ចាស់ផ្ទះផ្តល់នូវបរិយាកាសដ៏រំភើបមួយ។
ខ្សែប្រយុទ្ធអន្តរជាតិសេណេហ្គាល់ Mane ដែលបានជាសះស្បើយពីរបួសប្រអប់ជើងក្នុងពេលប្រកួតជាមួយនឹងក្រុម Everton នោះ បានវិលមកចូលលេងវិញក្នុងនាមជាកីឡាករបម្រុងនៅតង់ទី2 ក្នុងពេលក្រុម Liverpool យកឈ្នះលើក្រុម Bournemouth ក្នុងលទ្ធផល 4-០ ដើម្បីឡើងទៅឈរនៅលើកំពូលតារាងនៃក្របខ័ណ្ឌ Premier League កាលពីថ្ងៃសៅរ៍។
លោក Klopp បានប្រាប់សន្និសីទសារព័ត៌មានកាលពីថ្ងៃចន្ទថា៖ «Sadio អាចដោះស្រាយជាមួយនឹងបញ្ហារបួសនេះយ៉ាងឆាប់រហ័ស។ វាហាក់បង្ហាញថា គេជាសះស្បើយហើយក្នុងពេលប្រកួតនៅ Bournemouth។ ហេតុនេះ វាជារឿងដ៏គួរឱ្យរំភើបមួយ។ វាជាព័ត៌មានល្អដែលយើងអាចពិចារណាទៅលើរូបគេបាន»។ ស្របពេលជាមួយគ្នានេះ លោក Klopp បានអំពាវនាវឱ្យក្រុម Liverpool បង្ហាញពីទម្រង់លេង «យ៉ាងពិសេស» នៅពេលដែលពួកគេជួបជាមួយនឹងក្រុម Napoli ក្នុងការប្រកួតកាត់សេចក្តីនៃក្របខ័ណ្ឌ Champions League នៅរាត្រីនេះ។
ក្រុមរបស់លោក Klopp ត្រូវតែផ្តួលក្រុម Napoli នាកីឡដ្ឋាន Anfield ដើម្បីទទួលបានឱកាសក្នុងការឆ្លងផុតពីវគ្គចែកពូល ទៅកាន់វគ្គចាញ់ធ្លាក់។ ការដណ្តើមបានជ័យជម្នះក្នុងលទ្ធផល 1-០ ឬការឈ្នះតាមរយៈការរកបានគ្រាប់បាល់នាំមុខ 2គ្រាប់ នឹងធ្វើឱ្យក្រុមហង្សក្រហមមួយនេះបានទៅវគ្គបន្ត។
Napoli កំពុងតែស្ថិតក្នុងចំណាត់ថ្នាក់លេខ2 នៅលើតារាង Serie A និងមិនស្គាល់ចាញ់សោះក្នុងការប្រកួតក្របខ័ណ្ឌ Champions League ពូល C ក្រោយពីបានផ្តួលក្រុម Liverpool 1-០ នៅពេលដែលពួកគេបានជួបគ្នាក្នុងប្រទេសអ៊ីតាលី កាលពីខែតុលា។ ការប្រកួតនេះនឹងចាប់ផ្តើមនៅម៉ោង 3ទៀបភ្លឺ៕
December 11, 2018