សង្គម និងសេដ្ឋកិច្ច - La Reine Media

សាច់គោដែលឆ្ងាញ់ និងមានតម្លៃខ្ពស់ជាងគេបង្អស់លើពិភពលោក

គោ Wagyu ដែលមានរសជាតិឆ្ងាញ់ជាងគេ និងថ្លៃជាងគេបង្អស់លើពិភពលោកត្រូវបានជប៉ុនចាត់ទុកថាជាវត្ថុប្រចាំប្រទេស។

សាច់គោ Wagyu ល្បីឈ្មោះទូទាំងសកលលោក ព្រោះតែសាច់របស់វាឆ្ងាញ់ខ្លាំង ដោយសាច់ និងខ្លាញ់ប្រទាក់ក្រឡាគ្នាគ្មានគូប្រៀប។ ក៏ប៉ុន្តែ តម្លៃរបស់សាច់គោប្រភេទនេះក៏មិនថោកនោះដែរ។ សាច់គោ Wagyu របស់អាម៉េរិកមានតម្លៃប្រហែលតែពី 20 ទៅ 30 ដុល្លារ/គីឡូក្រាម ខណៈសាច់គោ Wagyu របស់ជប៉ុនមានតម្លៃរហូតដល់ពី 200 ទៅ 600 ដុល្លារ/គីឡូក្រាម។

Wagyu ពិតជាទំនិញដ៏សែនថ្លៃ ហើយវាត្រូវបានមេចុងភៅល្បីៗក្នុងពិភពលោកចាត់ទុកថាជាប្រភេទសាច់ដែលឆ្ងាញ់បំផុតដែលមនុស្សអាចទិញបានដោយប្រាក់។ ប៉ុន្តែ មូលហេតុអ្វីខ្លះដែលបានធ្វើឱ្យ Wagyu មានតម្លៃខ្ពស់កប់ពពកដូច្នេះ?

ប្រភពផ្គត់ផ្គង់ដែលមានមិនច្រើន តម្រូវការទីផ្សារខ្ពស់ខ្លាំង និងគុណភាពសាច់ល្អឯក បាននាំឱ្យសាច់គោ Wagyu របស់ជប៉ុន មានតម្លៃខ្ពស់កប់ពពក។ ប៉ុន្តែ ក្រៅពីនេះក៏នៅមានកត្តាផ្សេងៗជាច្រើនទៀតដែលរួមចំណែកធ្វើឱ្យសាច់គោប្រភេទនេះសម្រេចបានកិត្តិនាមខាងលើ។

1-របបអាហាររបស់គោ Wagyu ៖ ម្ចាស់កសិដ្ឋានជ្រើសរើសតែចំណីគុណភាពល្អ មានតម្លៃថ្លៃសម្រាប់ឱ្យគោស៊ី។

2-កសិដ្ឋាន ៖ ដើម្បីឱ្យសាច់គោ Wagyu មានគុណភាពល្អ ម្ចាស់កសិដ្ឋានត្រូវមានកន្លែងចិញ្ចឹមធំទូលាយ ដែលគោអាច «ហាត់ប្រាណ» បានស្រួល និង «លេងសប្បាយ» ដោយសេរី។

3-ពេលវេលាធំធាត់ ៖ គោ Wagyu ដែលត្រូវបានចាត់ទុកថា «ល្មម» គឺត្រូវមានទម្ងន់ចាប់ពី 680 គីឡូក្រាម និងមានអាយុចាប់ពី 400 ទៅ 450 ថ្ងៃ។

4-ភាពផ្ដាច់មុខ ៖ ជប៉ុនបានកំណត់បរិមាណនៃការនាំចេញនូវអ្វីៗគ្រប់យ៉ាងដែលទាក់ទងនឹងគោ Wagyu ធ្វើឱ្យពូជគោនេះមិនសូវមានវត្តមានក្នុងពិភពលោក។

5-ភោជនីយដ្ឋានលំដាប់កំពូល ៖ អាហារដែលចម្អិនពីសាច់គោ Wagyu របស់ជប៉ុន គឺមាននៅតែក្នុងភោជនីដ្ឋានលំដាប់កំពូលៗប៉ុណ្ណោះ ព្រោះតែតម្លៃរបស់វាថ្លៃហួសពេក៕

April 20, 2023

ប្រតិភូកីឡាស៊ីហ្គេមវៀតណាមធ្វើពិធីចេញដំណើរមកកម្ពុជា

«ពិធីបញ្ចេញទ័ព» របស់ប្រតិភូកីឡាវៀតណាមដែលចូលរួមព្រឹត្តិការណ៍ស៊ីហ្គេមលើកទី 32 ត្រូវបានធ្វើឡើងនៅឯមជ្ឈមណ្ឌលជាតិហ្វឹកហាត់កីឡាហាណូយ កាលពីព្រលប់ថ្ងៃទី 19 មេសា។

នៅក្នុងពិធីនេះ ឧបនាយករដ្ឋមន្ត្រីវៀតណាម Le Minh Khai បាននិយាយថា «លើកនេះមិនមានអំណោយផលល្អដូចស៊ីហ្គេមលើកទី 31 ប៉ុន្តែ ដោយវៀតណាមមានសមត្ថភាពផ្នែកកីឡានៅក្នុងតំបន់ និងតែងតែស្ថិតក្នុងក្រុមនាំមុខគេចាប់ពីស៊ីហ្គេមទី 22 យើងនឹងសម្រេចបានគោលដៅដែលបានកំណត់ ឬអាចខ្ពស់ជាងនេះ»។

លោក Dang Ha Viet អគ្គនាយកនៃអគ្គនាយកដ្ឋានកីឡា និងជាប្រធានប្រតិភូកីឡាវៀតណាមនៅស៊ីហ្គេមលើកទី 32 បាននិយាយថា ក្រុមវៀតណាមមានសមាជិក 1,003 នាក់ ក្នុងនោះមាន 702 នាក់ជាអត្តពលិក, 189 នាក់ជាគ្រូបង្វឹក, 10 នាក់ជាអ្នកជំនាញ។ ក្រុមវៀតណាមនឹងប្រកួត 30 វិញ្ញាសាក្នុងចំណោម 36 វិញ្ញាសា។ យោងតាមលោក Dang Ha Viet ក្រុមកីឡាវៀតណាមប្ដេជ្ញាចិត្តដណ្ដើមមេដាយមាសឱ្យបានពី 89 ទៅ 120 គ្រឿង។

ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 នឹងចាប់ផ្ដើមជាផ្លូវការពីថ្ងៃទី 05 ឧសភា ដល់ 17 ឧសភា 2023 នៅរាជធានីភ្នំពេញ, ខេត្តសៀមរាប ខេត្តព្រះសីហនុ ខេត្តកំពត និងខេត្តកែប។ ស៊ីហ្គេមលើកនេះនឹងមានសមាជិកក្រុមកីឡាសរុបចំនួន 12,404 នាក់។

នៅស៊ីហ្គេម 2023 កម្ពុជាលើកយកវិញ្ញាសាចំនួន 37 មកដាក់ឱ្យប្រកួត ក្នុងនោះមាន 36 វិញ្ញាសាមានមេដាយ និងមួយវិញ្ញាសាសម្រាប់សម្ដែង គឺ Teqball (បាល់ទាត់លើតុ)។

តាមផែនការ ក្រុមកីឡាជាច្រើនរបស់វៀតណាមនឹងធ្វើដំណើរមកកម្ពុជានៅព្រឹកថ្ងៃទី 03 ឧសភា ខណៈក្រុមមួយចំនួននឹងត្រូវឆាប់ចេញដំណើរ ដោយសារតែមានវិញ្ញាសាខ្លះត្រូវប្រកួតមុន ក្នុងនោះមានបាល់ទាត់ និងប្រណាំងទូកក្ដោងជាដើម។ល។

April 20, 2023

រថយន្តអគ្គិសនី Toyota bZ3 បញ្ចូលថាមពលពី 30% ឡើងដល់ 80% ក្នុងរយៈពេលតែ 27 នាទី

Toyota បានទទួលការបញ្ជាទិញជាង 5,000 គ្រឿងពីអតិថិជនសម្រាប់រថយន្តអគ្គិសនីម៉ូដែល bZ3 នៅប្រទេសចិន ក្នុងថ្ងៃបើកលក់ដំបូងនៅថ្ងៃទី 16 មេសាកន្លងទៅ។

រថយន្តអគ្គិសនី Toyota bZ3 ដែលត្រូវបានផលិតដោយក្រុមហ៊ុន FAW-Toyota គឺជាម៉ូដែលទីពីររបស់ Toyota នៅក្នុងត្រកូល bZ ហើយក៏ជាម៉ូដែលអគ្គិសនីដំបូងរបស់ក្រុមហ៊ុននេះដែលមានតម្លៃចាប់ពី 24,700 ដល់ 29,000 ដុល្លារអាម៉េរិក។

Toyota bZ3 ត្រូវបានផលិតដោយយោងតាមមូលដ្ឋាន e-TNGA របស់ Toyota និងប្រើប្រព័ន្ធបញ្ជូនកម្លាំងរបស់ BYD មានដូចជាថ្ម Blade LFP និងម៉ូទ័រអគ្គិសនីរបស់ Fudi Motor ដែលជាក្រុមហ៊ុនបុត្រសម្ព័ន្ធមួយរបស់ BYD។

រថយន្តអគ្គិសនី Toyota bZ3 នេះផ្ដល់ជម្រើសពីរសម្រាប់ការធ្វើដំណើរ គឺមួយប្រភេទអាចបើកបរបាន 517 គីឡូម៉ែត្រ និងមួយទៀតអាចបើកបរបាន 616 គីឡូម៉ែត្រ។ កំណែស្ដង់ដាបំពាក់ម៉ូទ័រ 130 kW, ថ្ម 49.92 kWh ខណៈដែលកំណែ Long Range បំពាក់ម៉ូទ័រកម្លាំង 180 kW និងថ្ម 65.28 kWh។

Toyota bZ3 បំពាក់បច្ចេកវិទ្យាអាចបញ្ចូលថាមពលលឿន DC ដោយមានថ្ម Blade ដែលអាចបង្កើនថាមពលអគ្គិសនីពី 30% ឱ្យឡើងដល់ 80% ក្នុងរយៈពេល 27 នាទី។ រថយន្តនេះអាចបង្កើនល្បឿនពី 0-100 គីឡូម៉ែត្រ/ម៉ោងដោយប្រើពេលតែ 7.5 វិនាទី និងអាចបើកដល់ល្បឿន 160 គីឡូម៉ែត្រ/ម៉ោង។

Toyota bZ3 មានទំហំប៉ុន Tesla Model 3 ដោយមានបណ្ដោយ 4,725 មម, ទទឹង 1,835 មម, កម្ពស់ 1,475 មម។ Toyota bZ3 ត្រូវបានផលិតនៅឯរោងចក្ររបស់ FAW-Toyota ក្នុងទីក្រុង Tianjin របស់ប្រទេសចិន៕

April 19, 2023

ចង់បានសំបុត្រចូលមើលការប្រកួតកីឡានៅស៊ីហ្គេមដោយមិនគិតថ្លៃ ត្រូវធ្វើបែបណា?

ដើម្បីទទួលបានសំបុត្រចូលទស្សនាការប្រកួតកីឡាស៊ីអាស៊ីអាគ្នេយ៍លើកទី 32 នាពេលឆាប់ៗនេះ មិត្តអ្នកអានអាចចូលទៅយកបានតាមរយៈកម្មវិធីទូរស័ព្ទ Seagames2023 និងនៅតាមទីតាំងប្រកួត។ នេះបើតាម ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី 32 ឆ្នាំ 2023 (CAMSOC)។

យោងតាមព័ត៌មានផ្លូវការ កម្មវិធីទូរស័ព្ទឈ្មោះ Seagames2023 នឹងមានការដាក់ជូននូវសំបុត្រសម្រាប់ចូលទស្សនាការប្រកួតកីឡាស៊ីហ្គេមដោយមិនគិតថ្លៃ។ មិត្តអ្នកអានអាចទាញយកកម្មវិធីទូរស័ព្ទឈ្មោះ Seagames2023 បានពីក្នុង https://www.facebook.com/2023seagames ដែលជាទំព័រ Facebook ផ្លូវការរបស់ CAMSOC និងពីគេហទំព័រ www.cambodia2023.com របស់ CAMSOC។

ទន្ទឹមនឹងមធ្យោបាយខាងលើ មិត្តអ្នកអានក៏អាចទៅកាន់កន្លែងប្រកួតផងដែរ ដើម្បីចុះឈ្មោះទទួលយកសំបុត្រ។ អគ្គលេខាធិការរបស់ CAMSOC បានឱ្យដឹងថា ការផ្ដល់ជូនសំបុត្រចូលទស្សនាការប្រកួតកីឡាស៊ីហ្គេមនៅកម្ពុជា នឹងចាប់ផ្ដើមពីថ្ងៃទី 20 ឬ 21 មេសា 2023។

ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី 32

ស៊ីហ្គេមលើកទី 32 នឹងប្រារព្ធឡើងចាប់ពីថ្ងៃទី 05 ដល់ 17 ឧសភា 2023 នៅកម្ពុជា។ បាល់ទាត់បុរសនឹងជាវិញ្ញាសាដែលត្រូវចាប់ផ្ដើមការប្រកួតមុនគេ ពោលគឺពីថ្ងៃទី 29 មេសា។

ក្រុមជម្រើសជាតិ U-22 កម្ពុជា ស្ថិតក្នុងពូល A ជាមួយ ឥណ្ឌូណេស៊ី មីយ៉ាន់ម៉ា ហ្វ៊ីលីពីន និងទីម័រខាងកើត។ សម្រាប់ពូល B វិញ រួមមាន វៀតណាម ថៃ ម៉ាឡេស៊ី សិង្ហបុរី និងឡាវ៕

=> ដើម្បីបានលឿន មិត្តអ្នកអានអាចចូលទៅកាន់តំណភ្ជាប់នេះ (សម្រាប់ iOS) និងតំណភ្ជាប់នេះ (សម្រាប់ Android) ដើម្បីទាញយកកម្មវិធីទូរស័ព្ទដៃរ Seagames2023។

April 19, 2023

U-22 ថៃ ទទួលព័ត៌មានល្អមុនពេលមកកម្ពុជា ៖ កំពូលកីឡាករ Jonathan Khemdee នឹងបង្ហាញមុខនៅស៊ីហ្គេមលើកទី 32

ក្លឹប Ratchaburi បានយល់ព្រមឱ្យខ្សែការពារ Jonathan Khemdee មកប្រកួតឱ្យក្រុមបាល់ទាត់ជម្រើសជាតិវ័យក្រោម 22 ឆ្នាំរបស់ប្រទេសនៅស៊ីហ្គេមលើកទី 32 នាពេលខាងមុខ។

ក្នុងបញ្ជីឈ្មោះកីឡាករ 29 នាក់របស់ U-22 ថៃ ដែលត្រៀមខ្លួនសម្រាប់ស៊ីហ្គេមនៅកម្ពុជា Jonathan Khemdee ត្រូវបានចាត់ទុកថាជាខ្សែការពារមិនអាចជំនួសបានរបស់ក្រុមជម្រើសជាតិថៃ។ កន្លងមក បើទោះជាមានឈ្មោះក្នុងបញ្ជីកោះហៅ ប៉ុន្តែ គ្រូបង្វឹកថៃ Issara Sritaro នៅតែមិនទាន់ប្រាកដថា នឹងមានវត្តមានរបស់កំពូលកីឡាកររូបនេះនៅស៊ីហ្គេម។

ក៏ប៉ុន្តែ ចុងក្រោយ ដំណឹងល្អសម្រាប់ U-22 ថៃ ក៏បានលេចឡើង នៅពេលក្លឹបចំនួនបី គឺ Ratchaburi FC, Samut Prakan City និង Chonburi FC បានយល់ព្រមអនុញ្ញាតឱ្យកីឡាកររបស់ខ្លួនមកប្រកួតនៅស៊ីហ្គេមលើកទី 32។ នេះមានន័យថា Jonathan Khemdee របស់ក្លឹប Ratchaburi ប្រាកដជាបង្ហាញវត្តមាននៅលើវាលស្មៅរបស់កម្ពុជា។

ទោះយ៉ាងណាក៏ដោយ Jonathan Khemdee ទំនងជាមិនអាចធ្វើដំណើរមកកម្ពុជានៅថ្ងៃទី 20 មេសា ដំណាលគ្នានឹងក្រុមជម្រើសជាតិថៃ តែអាចធ្លាក់ទៅដល់ថ្ងៃទី 26 មេសា ព្រោះជាប់ប្រកួតក្នុងវគ្គពាក់កណ្ដាលផ្ដាច់ព្រ័ត្រនៅ League Cup។ លើសពីនេះ បើសិនជាក្លឹប Ratchaburi ឡើងដល់វគ្គផ្ដាច់ព្រ័ត្រ វត្តមានរបស់ Jonathan Khemdee ក៏អាចយឺតជាងនេះ។

Jonathan Khemdee (ឆ្វេង) ប្រាកដជាបង្ហាញវត្តមាននៅស៊ីហ្គេមលើកទី 32

Jonathan Khemdee ដែលមានស្រុកកំណើតនៅប្រទេសដាណឺម៉ាក គឺជាកីឡាករឆ្នើមដែលពិបាករកមនុស្សមកជំនួសបាននៅក្នុងតំណែងខ្សែការពារ។ កីឡាករកើតឆ្នាំ 2002 នេះ បានចូលរួមប្រកួតនៅវគ្គផ្ដាច់ព្រ័ត្រ U-23 អាស៊ី ឆ្នាំ 2022 និងទាត់ជាកីឡាករជម្រើសដំបូងនៅវគ្គផ្ដាច់ព្រ័ត្រស៊ីហ្គេមលើកទី 31 ដែលថៃបានប៉ះវៀតណាមកាលពីឆ្នាំមុន ក៏ដូចជាទើបតែបានបង្ហាញភាពលេចធ្លោនៅ Doha Cup 2022 ដោយរកបានពីរគ្រាប់ក្នុងបីប្រកួតរបស់ថៃនៅពានរង្វាន់នេះ។

https://www.youtube.com/watch?v=-r2WIWdBH6c

ថៃចាញ់វៀតណាម 0-1 ក្នុងវគ្គផ្ដាច់ព្រ័ត្រនៅស៊ីហ្គេមលើកទី 31

នៅស៊ីហ្គេមលើកនេះ U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ នៅក្នុងជុំចុងក្រោយនៃវគ្គចែកពូល ក្រុមដំរីប្រយុទ្ធនឹងត្រូវប៉ះម្ចាស់ជើងឯក U-22 វៀតណាម ដែលនេះអាចនិយាយបានថា គឺជាការប្រកួតដណ្ដើមមេដាយមាសឡើងវិញកាលពីមួយឆ្នាំមុន ជាទីដែលថៃបានចាញ់វៀតណាម 0-1 ក្នុងវគ្គផ្ដាច់ព្រ័ត្រ៕

April 19, 2023

មហាសេដ្ឋីបច្ចេកវិទ្យាដប់រូបដែលមានទ្រព្យច្រើនជាងគេនៅប្រទេសចិន

មហាសេដ្ឋីបច្ចេកវិទ្យាជាច្រើននាក់របស់ប្រទេសចិន ទទួលបានជោគជ័យដោយសារពាណិជ្ជកម្មអនឡាញ និងបណ្ដាញសង្គម ក្នុងនោះ អគ្គនាយកប្រតិបត្តរបស់ ByteDance ដែលជាក្រុមហ៊ុនមេរបស់បណ្ដាញសង្គម TikTok ជាប់ចំណាត់ថ្នាក់លេខមួយ។

បញ្ជីចំណាត់ថ្នាក់មហាសេដ្ឋីបច្ចេកវិទ្យាដែលមានទ្រព្យច្រើនជាងគេនៅប្រទេសចិនត្រូវបានបង្កើតឡើងដោយយោងទៅតាមបញ្ជីចំណាត់ថ្នាក់មហាសេដ្ឋី 2023 របស់ទំព័រ Bloomberg គិតត្រឹមថ្ងៃទី 16 មេសា 2023។

ទី 01 ៖ Zhang Yiming (42.3 ពាន់លានដុល្លារអាម៉េរិក)

Zhang Yiming អាយុ 40 ឆ្នាំ ដែលជាអគ្គនាយកប្រតិបត្តិរបស់ក្រុមហ៊ុន ByteDance រកស៊ីមានបានក៏ដោយសារជោគជ័យរបស់បណ្ដាញសង្គម។ ទ្រព្យសម្បត្តិរបស់ Yiming ភាគច្រើនគឺផ្សារភ្ជាប់ទៅនឹងភាគហ៊ុននៅ ByteDance។ ក្រុមហ៊ុនមេរបស់ TikTok នេះ ត្រូវបានកំណត់តម្លៃ 220 ពាន់លានដុល្លារអាម៉េរិក និងរកបានប្រាក់ចំណូល 80 ពាន់លានដុល្លារក្នុងឆ្នាំ 2022។

ទន្ទឹមនឹង TikTok ក្រុមហ៊ុន ByteDance ក៏មាន FlipChat ដែលជាគូប្រជែងរបស់ WeChat, កម្មវិធីផ្ញើសារ Duoshan និង Douyin និងកំណែ TikTok សម្រាប់តែទីផ្សារប្រទេសចិនផងដែរ។

ទី 02 ៖ Ma Huateng (40.3 ពាន់លានដុល្លារ)

Ma Huateng (Poney Ma) អាយុ 51 ឆ្នាំ ជាសហស្ថាបនិក និងជា CEO របស់ Tencent ដែលនៅពីក្រោយកម្មវិធីផ្ញើសារ WeChat ដែលមានអ្នកប្រើប្រាស់ប្រចាំខែជាង 1.3 ពាន់លាននាក់។

បច្ចុប្បន្ន Tencent មានមូលធនទីផ្សារប្រហែល 439 ពាន់លានដុល្លារអាម៉េរិក និងមានភាគហ៊ុន 30% នៅក្នុងធនាគារ WeBank និងក្រុមហ៊ុនអភិវឌ្ឍហ្គេមជាច្រើនផ្សេងទៀត។

ទី 03 ៖ Jack Ma (34 ពាន់លានដុល្លារអាម៉េរិក)

លោក Jack Ma អាយុ 58 ឆ្នាំ គឺជាសហស្ថាបនិក និងជាអតីត CEO របស់ Alibaba ដែលជាក្រុមហ៊ុនពាណិជ្ជកម្មអនឡាញខ្នាតយក្សនៅប្រទេសចិន។ Alibaba បច្ចុប្បន្នមានមូលធនទីផ្សារប្រហែល 245 ពាន់លានដុល្លារ។ Jack Ma ក៏មានភាគហ៊ុននៅក្នុង Ant Group, Beijing Enlight Media និង Hyayi Brothers ជាដើម។ល។

ក្រៅពីនេះ ក្នុងបញ្ជី Top 10 ស្ដីពីមហាសេដ្ឋីបច្ចេកវិទ្យាដែលមានទ្រព្យច្រើនជាងគេនៅប្រទេសចិន ក៏មាន ៖

ទី 04 ៖ William Ding អាយុ 51 ឆ្នាំ ជាស្ថាបនិក និងជា CEO របស់ NetEase មានទ្រព្យ 27.9 ពាន់លានដុល្លារអាម៉េរិក។

ទី 05 ៖ Colin Huang អាយុ 43 ឆ្នាំ ជាស្ថាបនិក និងជាអតីត CEO របស់ PDD Holdings ដែលជាក្រុមហ៊ុនមេរបស់ Pinduoduo និងមានទ្រព្យ 24.2 ពាន់លានដុល្លារអាម៉េរិក។

ទី 06 ៖ Zhang Zhidong អាយុ 51 ឆ្នាំ ជាសហស្ថាបនិករបស់ Tencent និងមានទ្រព្យ 16.3 ពាន់លានដុល្លារអាម៉េរិក។

ទី 07 ៖ Lei Jun អាយុ 53 ឆ្នាំ ជាស្ថាបនិក និងជាប្រធានក្រុមហ៊ុន Xiaomi មានទ្រព្យ 11.7 លានដុល្លារអាម៉េរិក។

ទី 08 ៖ Gong Hongjia អាយុ 58 ឆ្នាំ ជាសហស្ថាបនិករបស់ Hangzhou Hikvision Digital Technology និងមានទ្រព្យ 11.6 ពាន់លានដុល្លារអាម៉េរិក។

ទី 09 ៖ Robain Li អាយុ 54 ឆ្នាំ ដែលជាសហស្ថាបនិក និង CEO របស់ Baidu មានទ្រព្យ 9.76 ពាន់លានដុល្លារអាម៉េរិក។

ទី 10 ៖ Richard Liu (Liu Qiangdong) អាយុ 50 ឆ្នាំ ជាស្ថាបនិករបស់ JD.com និងមានទ្រព្យ 9.5 ពាន់លានដុល្លារអាម៉េរិក។

April 19, 2023

កម្ពុជាមិនគិតថ្លៃហូបចុក ស្នាក់នៅ និងធ្វើដំណើររបស់ក្រុមកីឡាចូលរួមស៊ីហ្គេមលើកទី 32

ម្ចាស់ផ្ទះកម្ពុជាបានសម្រេចមិនគិតថ្លៃហូបចុក ស្នាក់នៅ និងធ្វើដំណើររបស់ក្រុមកីឡានៃបណ្ដាប្រទេសចូលរួមព្រឹត្តិការណ៍ស៊ីហ្គេមលើកទី 32 ដែលតាមគម្រោងនឹងមានសមាជិកប្រមាណ 12,000 នាក់។

«ប្រតិភូកីឡាទាំង 11 ក្រុងដែលចូលរួមនឹងមិនត្រូវបានគិតថ្លៃអ្វីទាំងអស់ដែលទាក់ទងនឹងការហូបចុក ការស្នាក់នៅ និងការធ្វើដំណើរ» នេះបើតាមគណៈកម្មការរៀបចំព្រឹត្តិការណ៍ស៊ីហ្គេមលើកទី 32 (32^nd SEA Games)។

ការមិនគិតថ្លៃខាងលើនេះរាប់បញ្ចូលទាំងប្រតិភូកីឡាដែលស្នាក់នៅក្នុងសណ្ឋាគារខាងក្រៅភូមិកីឡានៅក្នុងអំឡុងពេលចូលរួមព្រឹត្តិការណ៍ស៊ីហ្គេមផងដែរ។

ក្រៅពីនេះ កម្ពុជាក៏សម្រេចមិនយកថ្លៃសំបុត្រចូលទស្សនាការប្រកួតកីឡានៅស៊ីហ្គេមលើននេះ។ បណ្ដាទីភ្នាក់ងារសារព័ត៌មានក្នុងតំបន់ក៏មិនត្រូវបង់ថ្លៃសម្រាប់ការផ្សាយបន្តផ្ទាល់តាមទូរទស្សន៍។ ប្រកាសនេះត្រូវបានផ្សាយនៅលើគេហទំព័រផ្លូវការរបស់ 32^nd SEA Games ។

យោងតាមប្រភពព័ត៌មាន ស៊ីហ្គេមលើកទី 32 នឹងត្រូវបានធ្វើឡើងនៅកម្ពុជាចាប់ពីថ្ងៃទី 05 ឧសភា ដល់ 17 ឧសភា ឆ្នាំ 2023។ នេះគឺជាលើកដំបូងដែលកម្ពុជាទទួលធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាអាស៊ីអាគ្នេយ៍។ តាមគម្រោង ស៊ីហ្គេមលើកនេះនឹងមានសមាជិកចូលរួមប្រមាណ 12,000 នាក់ មកពីបណ្ដាប្រទេសក្នុងតំបន់អាស៊ីអាគ្នេយ៍។

នៅមុនការសម្រេចចិត្តមិនយកថ្លៃ សេវាហូបចុក ស្នាក់នៅដែលកម្ពុជាគ្រោងនឹងយកពីបណ្ដាក្រុមប្រតិភូកីឡាដែលចូលរួមព្រឹត្តិការណ៍ស៊ីហ្គេម គឺ 50 ដុល្លារអាម៉េរិក/ថ្ងៃ/ម្នាក់។ ដូច្នេះ តាមការគណនា ម្ចាស់កម្ពុជានឹងត្រូវចំណាយប្រាក់ប្រមាណ 600,000 ដុល្លារអាម៉េរិក/ថ្ងៃ ឬប្រហែលនឹង 7.8 លានដុល្លារអាម៉េរិក ក្នុងរយៈពេល 13 ថ្ងៃនៃព្រឹត្តិការណ៍នេះ ក្នុងនោះ ប្រហែល 3.5 លានដុល្លារសម្រាប់ថ្លៃស្នាក់នៅ និងហូបចុក៕

April 19, 2023

កាលបរិច្ឆេទការប្រកួត «បាល់ទះនារី» វគ្គចែកពូលនៅស៊ីហ្គេមលើកទី 32

ការប្រកួតបាល់ទះនារីក្នុងព្រឹត្តិការណ៍ស៊ីហ្គេមលើកទី 32 នឹងត្រូវធ្វើឡើងចាប់ពីថ្ងៃទី 09 ឧសភា ដល់ថ្ងៃទី 14 ឧសភា ឆ្នាំ 2023 នៅកម្ពុជា។

ការប្រកួតបាល់ទះក្នុងផ្ទះបុរស នារី របស់ស៊ីហ្គេមលើកនេះនឹងចាប់ផ្ដើមជាផ្លូវការនៅថ្ងៃទី 03 ឧសភា នៅឯពហុកីឡដ្ឋានជាតិអូឡាំពិករបស់កម្ពុជា។ ក្នុងនោះ ក្រុមជម្រើសជាតិបុរសនឹងប្រកួតពីថ្ងៃទី 03 ឧសភា ដល់ថ្ងៃទី 08 ឧសភា ខណៈដែលក្រុមជម្រើសជាតិនារីនឹងប្រកួតពីថ្ងៃទី 09 ឧសភា ដល់ 14 ឧសភា។

វិញ្ញាសាបាល់ទះបុរស នារី នៅស៊ីហ្គេម 2023 នេះ មាន 7 ក្រុមចូលរួម រួមមាន ក្រុមម្ចាស់ផ្ទះកម្ពុជា ថៃ វៀតណាម សិង្ហបុរី ឥណ្ឌូណេស៊ី ម៉ាឡេស៊ី និង មីយ៉ាន់ម៉ា។ ដោយឡែក ហ្វ៊ីលីពីនមានតែក្រុមនារីប៉ុណ្ណោះដែលនឹងមានសិទ្ធិចូលរួមប្រកួត ចំណែកក្រុមបុរសត្រូវបានជម្រុះព្រោះតែកំហុសឆ្គងរបស់ហ្វ៊ីលីពីនក្នុងការចុះឈ្មោះ។

ខាងក្រោមនេះគឺជាកាលបរិច្ឆេទការប្រកួត «បាល់ទះនារី» វគ្គចែកពូលនៅស៊ីហ្គេមលើកទី 32 ៖

April 18, 2023

ក្រុមហ៊ុនថ្មីចំនួនប្រាំបណ្ដាក់ទុកវិនិយោគសរុបជាង 100 លានដុល្លារអាម៉េរិកនៅកម្ពុជា

ក្រុមហ៊ុនចំនួនប្រាំដែលទើបតែទទួលបានវិញ្ញាបតបត្រចុះបញ្ជីវិនិយោគពីក្រុមប្រឹក្សាអភិវឌ្ឍន៍កម្ពុជា នឹងបណ្ដាក់ទុនសរុបចំនួន 103.3 លានដុល្លារអាម៉េរិកនៅក្នុងវិស័យកសិកម្ម ឧស្សាហកម្មកាត់ដេរ និងបច្ចេកវិទ្យានៅក្នុងខេត្តក្រចេះ ព្រះវិហារ ភ្នំពេញ តាកែវ និងកំពង់ស្ពឺ ផ្ដល់ការងារជូនពលរដ្ឋកម្ពុជាប្រមាណជាង 1,100 កន្លែង។

ក្រុមហ៊ុនទាំងនេះរួមមាន ៖

EASTERN RUBBER (CAMBODIA) CO., LTD ៖ គម្រោងបង្កើតកសិដ្ឋានចិញ្ចឹមគោពូជ និងគោសាច់ខ្នាតធំដែលមានទីតាំងវិនិយោគស្ថិតស្រុកស្នួល ខេត្តក្រចេះ ក្នុងទុនវិនិយោគប្រមាណ 73.4 លានដុល្លារអាម៉េរិក និងអាចបង្កើតការងារបានចំនួន 79 កន្លែង។

RITHY RUBBER (CAMBODIA) CO., LTD ៖ គម្រោងបង្កើតកសិដ្ឋានដាំដំណាំកសិ-ឧស្សាហកម្ម (ដើមកៅស៊ូ) និងសាងសង់រោងចក្រកែច្នៃ ដែលមានទីតាំងវិនិយោគស្ថិតនៅតំបន់ប្រើប្រាស់ដោយចីរភាពនៃដែនជម្រកសត្វព្រៃបឹងពែរ នៅឃុំរមណី ស្រុករវៀង ខេត្តព្រះវិហារ ក្នុងទុនវិនិយោគប្រមាណ 12 លានដុល្លារអាម៉េរិក និងអាចបង្កើតការងារបានចំនួន 158 កន្លែង។

GE NEW ENERGY TECHNOLOGY (CAMBODIA) CO., LTD ៖ គម្រោងបង្កើតរោងចក្រផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅភូមិតានួន សង្កាត់កំបូល ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ 7 លានដុល្លារអាម៉េរិក និងអាចបង្កើតការងារបានចំនួន 205 កន្លែង។

JINGMAOGUOJI (CAMBODIA) GARMENT CO., LTD ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ ក្នុងទុនវិនិយោគប្រមាណ 5.7 លានដុល្លារអាម៉េរិក និងអាចបង្កើតការងារបានចំនួន 475 កន្លែង។

EBELNO (CAMBODIA) CO., LTD ៖ គម្រោងបង្កើតរោងចក្រផ្គុំដំឡើងសម្ភារៈអេឡិចត្រូនិក ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.2 លានដុល្លារអាម៉េរិក និងអាចបង្កើតការងារបានចំនួន 251 កន្លែង។

April 18, 2023

កំណែថ្មីបំផុតរបស់បញ្ញានិម្មិត ChatGPT ធ្វើរោគវិនិច្ឆ័យពូកែជាងវេជ្ជបណ្ឌិតទៅទៀត

ពេលប្រើប្រាស់កម្មវិធី GPT-4 បណ្ឌិត Isaac Kohane ដែលជាអ្នកវិទ្យាសាស្ត្រកុំព្យូទ័រនៅ Harvard និងជាវេជ្ជបណ្ឌិតមានបទពិសោធន៍ច្រើនក្នុងវិស័យវេជ្ជសាស្ត្រ មានការភ្ញាក់ផ្អើលខ្លាំងនៅពេលបានឃើញសមត្ថភាពរបស់បច្ចេកវិទ្យាបញ្ញានិម្មិត (AI) ដែលអភិវឌ្ឍដោយ OpenAI ។

GPT-4 គឺជាកំណែថ្មីបំផុតក្នុងចំណោមរូបមន្ត AI ដែលកំពុងត្រូវបានប្រើដើម្បីដំណើរការ ChatGPT និង Bing Chat ថ្មីរបស់ក្រុមហ៊ុន Microsoft។ ធៀបទៅនឹង GPT-3.5 មុននេះ GPT-4 «មានការច្នៃប្រឌិតខ្ពស់ជាង និងកម្រិតនៃការសហការក៏ខ្ពស់ជាងពេលណាទាំងអស់» ព្រមទាំងអាច «ដោះស្រាយបញ្ហាលំបាកបានយ៉ាងសុក្រឹត» នេះបើតាម OpenAI ។

ដើម្បីបញ្ជាក់អំពីសមត្ថភាពរបស់ GPT-4 វេជ្ជបណ្ឌិត Isaac Kohane ថ្មីៗនេះបានសហការជាមួយមិត្តរួមការងារពីរនាក់ដើម្បីពិសោធនៅក្នុងបរិស្ថានវេជ្ជសាស្ត្រ។ លទ្ធផលនៃការពិសោធបានធ្វើឱ្យក្រុមអ្នកវិទ្យាសាស្ត្រមានការភ្ញាក់ផ្អើល។

«ខ្ញុំពិតជាភ្ញាក់ផ្អើលណាស់នៅពេលនិយាយថា៖ GPT-4 ពូកែជាងវេជ្ជបណ្ឌិតជាច្រើនដែលខ្ញុំធ្លាប់បានដឹង» លោក Isaac Kohane បានឱ្យដឹងនៅក្នុងសៀវភៅ «បដិវត្តន៍ AI ក្នុងវេជ្ជសាស្ត្រ» ដែលជិតត្រូវបានបោះពុម្ពដូច្នេះ។

បណ្ឌិត Isaac Kohane ជាអ្នកវិទ្យាសាស្ត្រកុំព្យូទ័រនៅ Harvard និងជាវេជ្ជបណ្ឌិតមានបទពិសោធន៍ច្រើនក្នុងវិស័យវេជ្ជសាស្ត្រ

ក្នុងសៀវភៅខាងលើ Isaac Kohane ឱ្យដឹងថា GPT-4 (ដែលត្រូវបានបង្កើតឡើងកាលពីខែមីនា 2023 ក្នុងទម្រង់សាកល្បងសម្រាប់អ្នកប្រើប្រាស់បង់ប្រាក់) ឆ្លើយត្រូវជាង 90% នូវសំណួរក្នុងសម័យប្រឡងយកវិញ្ញាបនបត្រប្រកបអាជីពជាគ្រូពេទ្យរបស់សហរដ្ឋអាម៉េរិក។

ដូច្នេះ GPT-4 មានសមិទ្ធផលល្អជាងឆ្ងាយធៀបនឹងរូបមន្តបញ្ញានិម្មិតមុនៗរបស់ OpenAI មានដូចជា GPT-3 និង GPT-3.5។ លើសពីនេះ វាថែមទាំងពូកែជាងវេជ្ជបណ្ឌិតមួយចំនួនដែលទទួលបានវិញ្ញាបនបត្រប្រកបរបរជាគ្រូពេទ្យនៅសហរដ្ឋអាម៉េរិកទៅទៀត។

GPT-4 នៅមានសមត្ថភាពលើសពីអ្វីដែលបានរៀបរាប់ខាងលើ។ ក៏ប៉ុន្តែ វាមិនទាន់ល្អ ត្រឹមត្រូវឥតខ្ចោះនៅឡើយ ព្រោះនៅតែមានកំហុសខ្លះដែលត្រូវការមនុស្សកែប្រែបន្ថែមទៀត៕

April 18, 2023

Category: សង្គម និងសេដ្ឋកិច្ច