Category: សង្គម និងសេដ្ឋកិច្ច

ដឹងទេថា មកទល់ដំណាច់ឆ្នាំ2018នេះ កម្ពុជាទទួលបានហិរញ្ញប្បទានពីចិនចំនួនប៉ុន្មាន?
បច្ចុប្បន្នហេដ្ឋារចនាសម្ព័ន្ធជាច្រើននៅកម្ពុជាដូចជាផ្លូវជាតិសំខាន់ៗ ស្ពានថ្នល់ ផ្លូវរថភ្លើងជាដើមភាគច្រើនជាជំនួយហិរញ្ញប្បទានរបស់រដ្ឋាភិបាលចិន ដែលរឿងនេះត្រូវបានគេសួរថា តើកត្តាអ្វីខ្លះ បានជាចិនផ្តល់ជំនួយដល់កម្ពុជាច្រើនដូច្នេះ?
តាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រហូតមកទល់ពាក់កណ្តាលខែធ្នូ ឆ្នាំ2018នេះ ទំហំហិរញ្ញប្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិនមានចំនួន 5,800លានដុល្លារសហរដ្ឋអាមេរិក ដែលក្នុងនោះឥណទានសម្បទានមានចំនួនសរុប 4,400លានដុល្លារអាមេរិក និងហិរញ្ញប្បទានក្នុងក្របខ័ណ្ឌនៃកិច្ចសហប្រតិបត្តិការសេដ្ឋកិច្ច និងបច្ចេកទេសចំនួនប្រមាណ 1,400លានដុល្លារអាមេរិក។
កម្ចីនេះបានផ្តល់ជាបន្តបន្ទាប់ក្នុងគម្រោងកែលម្អហេដ្ឋារចនាសម្ព័ន្ធនានា និងវិស័យមួយចំនួនទៀត ឧទាហរណ៍ដូចជា កាលពីសប្តាហ៍មុននេះឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងថ្មីមួយទៀតជាមួយលោក Deng Boqing អនុប្រធានទីភ្នាក់ងារចិនសម្រាប់កិច្ចសហប្រតិបត្តិការនៃសាធារណរដ្ឋប្រជាមានិតចិន។
កិច្ចព្រមព្រៀងទាំង2នេះរួមមាន 1.កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសដែលមានហិរញ្ញប្បទាន 200លានយន់។ ថវិកាហិរញ្ញប្បទានឥតសំណងនេះ នឹងត្រូវប្រើប្រាស់សម្រាប់អនុវត្តគម្រោងលើកកម្ពស់ជីវភាពប្រជាជន និងគម្រោងសាងសង់ហេដ្ឋារចនាសម្ព័ន្ធសំខាន់ៗ និង2.កិច្ចព្រមព្រៀងក្របខ័ណ្ឌ ស្តីពីឥណទានសម្បទានជាប្រាក់យន់ចិនសម្រាប់អភិវឌ្ឍន៍អាងទឹករក្សាក្នុងខេត្តព្រះវិហារដែលមានទឹកប្រាក់ឥណទានចំនួន 622លានយន់។
ពាក់ព័ន្ធករណីនេះ លោក ង៉ែត ជូ អ្នកវិភាគសេដ្ឋកិច្ចសង្គមបានមានប្រសាសន៍ថា ធម្មតាទេ ប្រទេសដែលកំពុងអភិវឌ្ឍន៍ តែងត្រូវការប្រើប្រាស់កម្ចីសម្រាប់យកមកកសាងប្រទេស សាងសង់ហេដ្ឋារចនាសម្ព័ន្ធផ្សេងៗដើម្បីឱ្យប្រទេសមានការ-រីកចម្រើនទៅមុខឆាប់រហ័ស តែយ៉ាងណាសូមឱ្យការប្រើប្រាស់កម្ចីទាំងនោះប្រកបដោយតម្លាភាព និងប្រសិទ្ធភាព ដើម្បីផលប្រយោជន៍របស់ប្រជាជន និងសង្គមជាតិទាំងមូល ហើយមុនប្រើប្រាស់កម្ចីត្រូវសិក្សាគម្រោងអាទិភាពជាមុន ដើម្បីប្រើប្រាស់ថវិកានោះឱ្យចំគោលដៅពិតប្រាកដ។លោកទទួលស្គាល់ថា បច្ចុប្បន្នកម្ពុជាបានប្រើប្រាស់កម្ចីពីប្រទេសចិនច្រើនជាងគេ ច្រើនជាងកម្ចីពីប្រទេសអឺរ៉ុប ហើយប្រើប្រាស់កម្ចីពីប្រភពតែមួយនេះ វាជារឿងមិនសូវល្អប៉ុន្មានទេសម្រាប់ប្រទេសកម្ពុជា។ យកល្អ គួរខ្ចីឱ្យបានច្រើនប្រភពទើបយើងមានជម្រើសក្នុងការចរចាការប្រាក់ និងលក្ខខណ្ឌនៃការសងត្រឡប់ទៅវិញផ្សេងៗទៀត។
បច្ចុប្បន្ន សម្រាប់ប្រទេសកម្ពុជា ការប្រើកម្ចីត្រូវបានគេរកឃើញថា មានប្រមាណជាង 30% ធៀបជាមួយGDPនៅក្នុងប្រទេស ដែលចំនួននេះកម្ពុជាមិនមានហានិភ័យក្នុងការសងត្រឡប់ទៅវិញនោះទេ។
អ្នកតាមដានសង្គមបានលើកឡើងថា កត្តាដែលចិនផ្តល់កម្ចីមកកម្ពុជាច្រើនបែបនេះ គឺដោយសារចិនចាត់ទុកកម្ពុជាជាដៃគូមិត្តភាពមិនអាចខ្វះបានក្នុងការអភិវឌ្ឍប្រទេសទាំង2ឱ្យកាន់តែរីកចម្រើនឡើង។ ការផ្តល់កម្ចីលើការសាងសង់ហេដ្ឋារចនាសម្ព័ន្ធនេះ គឺផ្តោតទៅលើគោលនយោបាយខ្សែក្រវាត់មួយ ផ្លូវមួយក្នុងការតភ្ជាប់បណ្តាញដឹកជញ្ជូនឆ្លងកាត់ប្រទេសផ្សេងៗក្នុងតំបន់អាស៊ី ដែលរួមទាំងកម្ពុជាយើងផងដែរ។
គួរបញ្ជាក់ថា ចំនួនកម្ចីដែលចិនផ្តល់ឱ្យ អាចចាត់ទុកថាជាចំនួនច្រើនសម្រាប់ប្រទេសកម្ពុជា ប៉ុន្តែចំនួននេះ មិនច្រើនទេសម្រាប់រដ្ឋាភិបាលចិនដែលផ្តល់មកឱ្យកម្ពុជា៕
December 28, 2018
FA ចោទប្រកាន់លោក Emery ក្រោយទាត់ដបទឹកសុទ្ធពេលប្រកួតជាមួយ Brighton
លោក Unai Emery អ្នកចាត់ការទូទៅរបស់ក្រុម Arsenal ត្រូវបានចោទប្រកាន់ពីបទប្រព្រឹត្តមិនសមរម្យដោយសហព័ន្ធកីឡាបាល់ទាត់អង់គ្លេស (FA) ក្រោយពីបានទាត់ដបទឹកបរិសុទ្ធទៅកាន់អ្នកគាំទ្រ អំឡុងពេលក្រុមខ្លួនបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Brighton ក្នុងការប្រកួតក្របខ័ណ្ឌ Premier League កាលពីថ្ងៃ Boxing Day។
អ្នកនាំពាក្យម្នាក់របស់សហព័ន្ធកីឡាបាល់ទាត់អង់គ្លេស បានបញ្ជាក់កាលពីថ្ងៃព្រហស្បតិ៍ថា៖ «លោក Unai Emery អ្នកចាត់ការទូទៅរបស់ក្រុម Arsenal ត្រូវបានចោទប្រកាន់ ក្រោយពីការប្រកួតជាមួយនឹងក្រុម Brighton កាលពីថ្ងៃទី២៦ ខែធ្នូ ឆ្នាំ២០១៨»។
អ្នកនាំពាក្យរបស់ FA ដដែលបានបន្ថែមទៀតថា៖ «វាត្រូវបានគេចោទប្រកាន់ថា សកម្មភាពទាត់ដបទឹកបរិសុទ្ធរបស់លោក អំឡុងពេលនៃការប្រកួតនោះ គឺជាការប្រព្រឹត្តមិនសមម្យ។ លោកមានពេលវេលារហូតដល់ម៉ោង៦ល្ងាច ថ្ងៃទី២ ខែមករា ដើម្បីឆ្លើយតបទៅនឹងការចោទប្រកាន់នេះ»។ លោក Emery សញ្ជាតិអេស្ប៉ាញ បានដើរទៅនិយាយទៅកាន់អ្នកគាំទ្រម្ចាស់ផ្ទះដែលនៅក្បែរដបទឹកដែលបានធ្លាក់ភ្លាមៗ ក្រោយពីហេតុការណ៍នេះ និងបានដើរទៅនិយាយម្តងទៀតក្នុងពេលបញ្ចប់ការប្រកួតនាកីឡដ្ឋាន Amex។
លោក Emery ដែលបាននិយាយកាលពីថ្ងៃព្រហស្បតិ៍ នៅមុនពេលការប្រកាសរបស់ FA និងមុនពេលក្រុម Arsenal ធ្វើដំណើរទៅជួបក្រុម Liverpool នៅចុងសប្តាហ៍នេះ បានបញ្ជាក់ថា លោកបានសង្ឃឹមថា ការសុំការអភ័យទោសរបស់លោក នឹងគូសខ្សែបន្ទាត់មួយពីក្រោមហេតុការណ៍នេះ។ គ្រូបង្វឹករូបនេះបាននិយាយថា៖ «ខ្ញុំបាននិយាយកាលពីថ្ងៃម្សិលមិញពីការសុំអភ័យទោសរបស់ខ្ញុំ។
ខ្ញុំបានទាត់ដបទឹកដោយការអស់សង្ឃឹម ប៉ុន្តែ មិនមែនសំដៅទៅលើអ្នកគាំទ្រឡើយ។ ខ្ញុំបានទាត់សម្រាប់តែខ្ញុំ ហើយវាបានធ្លាក់ក្បែរអ្នកគាំទ្រ ហើយខ្ញុំបានសុំអភ័យទោសរបស់ខ្ញុំទៅកាន់ពួកគេ។ វាគ្មានការសន្ទនាណាផ្សេងឡើយ»៕
ប្រភពពី៖ Channel News Asia
December 28, 2018
វិទ្យាស្ថាន ពាណិជ្ជសាស្ត្រ អេស៊ីលីដា សម្ពោធអគារស្តង់ដារអន្តរជាតិថ្មីសម្រាប់និស្សិតកម្ពុជា និងបរទេស
ការអប់រំផ្នែកពាណិជ្ជសាស្ត្រ និងហិរញ្ញវត្ថុ ជាផ្នែកដ៏សំខាន់មួយដែលកម្ពុជាកំពុងត្រូវការស្របពេលដែលវិស័យធនាគារ-ហិរញ្ញវត្ថុ និងពាណិជ្ជកម្មកំពុងមានការរីកចម្រើនយ៉ាងខ្លាំង។ ដោយមើលឃើញពីសារៈសំខាន់នៃការបណ្តុះបណ្តាលធនធានមនុស្សលើវិស័យទាំងអស់នេះ វិទ្យាស្ថាន ពាណិជ្ជសាស្ត្រ អេស៊ីលីដា ដែលជាក្រុមហ៊ុនបុត្រសម្ព័ន្ធមួយរបស់ធនាគារ អេស៊ីលីដា ភីអិលស៊ី បានធ្វើការសម្ពោធជាផ្លូវការនូវអគារថ្មីស្របតាមស្តង់ដារអន្តរជាតិរបស់ខ្លួនដើម្បីផ្តល់ឱកាសឱ្យសិស្ស-និស្សិតនៅកម្ពុជា និងប្រទេសមានឱកាសសិក្សាប្រកបដោយគុណភាពខ្ពស់។
អគារសិក្សាដ៏ទំនើប និងធំទូលាយនេះមានទីតាំងស្ថិតនៅអគារលេខ1397 មហាវិថីមិត្តភាព ភ្នំពេញ-ហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ។ ពិធីសម្ពោធដាក់ឱ្យប្រើប្រាស់ជាផ្លូវការនេះប្រព្រឹត្តឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាតំណាងដ៏ខ្ពស់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងអញ្ជើញចូលរួមជាភ្ញៀវកិត្តិយសដោយលោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងភ្ញៀវកិត្តិយសសំខាន់ៗជាច្រើនផ្សេងទៀត។
បណ្ឌិត ផុន ណារិន នាយកវិទ្យាស្ថាន ពាណិជ្ជសាស្ត្រ អេស៊ីលីដា បានលើកឡើងថា វិទ្យាស្ថានពាណិជ្ជសាស្ត្រ អេស៊ីលីដា មានការរីកចម្រើនកើនឡើងជាលំដាប់ ដែលមិនអាចកាត់ផ្តាច់បានពីការលូតលាស់នៃកំណើនសេដ្ឋកិច្ចកម្ពុជាប្រកបដោយចីរភាព។ ទន្ទឹមនឹងនេះ ក្នុងរយៈពេល 2ទសវត្សរ៍ចុងក្រោយនេះ ទីផ្សារការងារកម្ពុជា និងសកលបានត្រូវការជាចាំបាច់នូវធនធានមនុស្សប្រកបដោយសមត្ថភាពខ្ពស់។ ជាឱកាសដ៏វិសេសវិសាលនេះ ធនាគារអេស៊ីលីដា ភីអិលស៊ី បានបោះទុនវិនិយោគលើវិស័យអប់រំ ដោយបានសាងសង់អគារវិទ្យាស្ថាន ពាណិជ្ជសាស្ត្រ អេស៊ីលីដា ដែលជាក្រុមហ៊ុនបុត្រសម្ព័ន្ធ ក្នុងគោលបំណងបំពេញតម្រូវការចាំបាច់នៃកំណើនសិស្ស-និស្សិត និងសិក្ខាកាម ជាការរួមចំណែកនៅក្នុងវិស័យអប់រំ ចែករំលែកនូវបទពិសោធជោគជ័យ ចំណេះជំនាញសីលធម៌ និងពង្រឹងគុណភាពអប់រំស្របតាមគោលនយោបាយរបស់រាជរដ្ឋាភិបាល និងក្រសួងអប់រំយុវជន និងកីឡា នៃព្រះរាជាណាចក្រកម្ពុជា។
វិទ្យាស្ថាន ពាណិជ្ជសាស្ត្រ អេស៊ីលីដា ត្រូវបានសាងសង់ឡើងស្របតាមស្តង់ដាអន្តរជាតិ មានលក្ខណៈទំនើប ស្រស់ស្អាត និងត្រូវបានគូសប្លង់ដោយក្រុមហ៊ុន HSNK របស់ប្រទេសកូរ៉េខាងត្បូង ដែលជាស្ថាបត្យករល្បីល្បាញលំដាប់ថ្នាក់អន្តរជាតិ។ វិទ្យាស្ថាន ពាណិជ្ជសាស្ត្រ អេស៊ីលីដាសាងសង់ដោយក្រុមហ៊ុន(Main Contractor) PISNOKA ដែលជាក្រុមហ៊ុនក្នុងស្រុកដោយសហការជាមួយក្រុមហ៊ុនសាងសង់ចំនួន4 និងក្រុមហ៊ុនផ្គត់ផ្គង់គ្រឿងសង្ហារិម និងសម្ភារការិយាល័យ និងអគ្គិសនីចំនួន17 ទៀត។ សរុបរួមមាន 22ក្រុមហ៊ុន ទាំងក្នុងស្រុក និងបរទេស ដោយប្រើប្រាស់រយៈពេលសាងសង់ 600ថ្ងៃ និងថវិកាចំនួន 36,726,888ដុល្លារអាមេរិក (រួមទាំងតម្លៃដី)។ វិទ្យាស្ថាន ពាណិជ្ជសាស្ត្រ អេស៊ីលីដា មានបំពាក់ទៅដោយឧបករណ៍សម្ភារការិយាល័យ លិក្ខូបករណ៍តាមបន្ទប់រៀនទំនើប និងទាន់សម័យ ព្រមទាំងមានប្រព័ន្ធការពារសន្តិសុខ ការសន្សំសំចៃថាមពលប្រើប្រាស់ ការបង្ការអគ្គិភ័យ បណ្តាញត្រួតពិនិត្យ និងប្រព័ន្ធទូរគមនាគមន៍ ហើយនិងប្រព័ន្ធគាំទ្របច្ចេកវិទ្យាព័ត៌មានគ្រប់អគារទាំងអស់។ អគារទាំងនេះសាងសង់លើផ្ទៃដីទំហំ 75,750ម៉ែត្រការ៉េ ដែលរួមមានអគារសិក្សា2 កម្ពស់ 5ជាន់ មានបន្ទប់រៀនចំនួន 8បន្ទប់ ដែលអាចទទួលនិស្សិតបានពី 6,000 ទៅ 7,000នាក់ (សរុប 3វេនសិក្សា) អគាររដ្ឋបាល1 កម្ពស់ 3ជាន់ ដែលនៅក្នុងអគារនោះមានអាហារដ្ឋាន 1កន្លែង បណ្ណាល័យ1 កម្ពស់ 3ជាន់ អន្តេវាសិកដ្ឋាន1 កម្ពស់ 4ជាន់ មាន 47បន្ទប់ ដែលអាចទទួលនិស្សិតស្នាក់នៅសរុបចំនួន 137នាក់ ទីធ្លាសម្រាប់ចតយានយន្តធំទូលាយ ទីលានបាល់ទាត់ទំហំ 8,088ម៉ែត្រការ៉េ បាល់បោះ និងបាល់ទះទំហំ 1,438ម៉ែត្រការ៉េ។
ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ចំពោះការកសាងវិទ្យាស្ថានពាណិជ្ជសាស្ត្រអេស៊ីលីដាស្របតាមបទដ្ឋានអន្តរជាតិ ដូចសាកលវិទ្យាល័យនានានៅតាមបណ្តាប្រទេស ក្នុងតំបន់មួយចំនួនដោយមានជាអគារសិក្សាទំនើប និងប្រណីត បន្ទប់សិក្សាបំពាក់ដោយឧបករណ៍គ្រប់គ្រាន់ មានបណ្ណាល័យធំទូលាយ និងទំនើបទាន់សម័យ ទីធ្លាវិទ្យាស្ថានមានលក្ខណៈធំទូលាយ មានសួនច្បារ ទីលានបាល់ទាត់ បាល់បោះ និងបាល់ទះ។ វិទ្យាស្ថាន ពាណិជ្ជសាស្ត្រ អេស៊ីលីដា អាចត្រូវបានចាត់ទុកថាជាមជ្ឈមណ្ឌលសម្រាប់អភិវឌ្ឍន៍ធនធានមនុស្សប្រកបដោយគុណភាពខ្ពស់ និងស្របតាមគោលនយោបាយរបស់រាជរដ្ឋាភិបាល និងក្រសួងអប់រំ យុវជន និងកីឡា និងជាជម្រើសដ៏ល្អមួយសម្រាប់សិស្ស-និស្សិត និងសិក្ខាកាមទាំងក្នុង និងក្រៅប្រទេសសម្រាប់បន្តការសិក្សាដើម្បីទទួលបានចំណេះជំនាញ និងបទពិសោធការងារច្បាស់លាស់៕

December 28, 2018
ផ្លូវល្បឿនលឿនភ្នំពេញ-បាវិត បានបញ្ចប់ការសិក្សាហើយ តែមិនទាន់ច្បាស់ពេលសាងសង់
ក្រុងបាវិត ក៏ជាប៉ូលសេដ្ឋកិច្ចសំខាន់មួយដែរក្នុងចំណោមប៉ូលសេដ្ឋកិច្ចសំខាន់ៗ និងធំៗនៅកម្ពុជា។ តំបន់នេះក៏ជាបណ្តុំរោងចក្រសហគ្រាស និងច្រកមួយដ៏សំខាន់ក្នុងការផ្លាស់ប្តូរទំនិញរបស់អ្នកវិនិយោគធំៗនៅកម្ពុជាដែរ។ ការតភ្ជាប់តំបន់សេដ្ឋកិច្ចតាមព្រំដែនមករាជធានីភ្នំពេញ ជាយុទ្ធសាស្ត្រដ៏សំខាន់មួយរបស់រាជរដ្ឋាភិបាលដើម្បីជំរុញឱ្យមានការអភិវឌ្ឍកាន់តែប្រសើរឡើងនូវចរន្តសេដ្ឋកិច្ច និងការវិនិយោគ។ ក្រៅពីនេះ ការតភ្ជាប់ប្រព័ន្ធដឹកជញ្ជូនក៏ជាផ្នែកមួយផងដែរក្នុងការគាំទ្រដល់កម្មវិធីអភិវឌ្ឍន៍វិស័យឧស្សាហកម្ម និងការកាត់បន្ថយគម្លាតរវាងតំបន់ប្រជុំជន និងតំបន់ជនបទ។ ថ្មីៗនេះក្រសួងសាធារណការ និងដឹកជញ្ជូនបានបញ្ជាក់ថា ផ្លូវល្បឿនលឿនដែលតភ្ជាប់រាជធានីភ្នំពេញទៅកាន់ក្រុងបាវិត(ព្រំដែនកម្ពុជា-វៀតណាម)ត្រូវបានសិក្សារួចរាល់ហើយដោយអ្នកជំនាញ និងត្រៀមផងដែរសម្រាប់ការចេញសកម្មភាពស្ថាបនាក្រោមខ្ទង់ថវិកាប្រមាណ 3,800លានដុល្លារអាមេរិក។
ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ផ្លូវល្បឿនលឿនដ៏សំខាន់មួយខ្សែនេះ គឺទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ទទួលបានសិទ្ធិពីរាជរដ្ឋាភិបាលក្នុងការសិក្សាលើគម្រោងផ្លូវទាំងមូលដែលមានប្រវែង 160គីឡូម៉ែត្រ ដោយក្នុងនោះក្រោយពីការសិក្សាចប់សព្វគ្រប់ហើយ អ្នកជំនាញបានបញ្ជាក់ថា ផ្លូវល្បឿនលឿនពីភ្នំពេញ ទៅបាវិតនេះត្រូវចំណាយថវិកា 3,800លានដុល្លារអាមេរិក។ ឯកឧត្តមបានបញ្ជាក់ទៀតផងដែរថា ថវិកាសម្រាប់សាងសង់ផ្លូវនេះអាចចំណាយច្រើនជាងការសាងសង់ផ្លូវល្បឿនលឿនដទៃទៀត ព្រោះស្ថានភាពផ្លូវមានលក្ខណៈស្មុគស្មាញ។
ឯកឧត្តមរដ្ឋមន្ត្រី មានប្រសាសន៍ថា៖ “ផ្លូវនេះត្រូវចំណាយច្រើន ដោយសារតែផ្លូវដែលត្រូវសាងសង់មានស្ថានភាពលិចទឹក ហើយកាត់តាមបឹង និងតំបន់លិចទឹករហូតដល់ទៅ 80គីឡូម៉ែត្រឯណោះ”។
បើតាមឯកឧត្ដមរដ្ឋមន្ត្រីក្រសួងសាធារណការនិងដឹកជញ្ជូនបានឱ្យដឹងថា ផ្លូវល្បឿនលឿនពីរាជធានីភ្នំពេញទៅកាន់ក្រុងបាវិតនេះ នឹងចំណាយថវិកាច្រើនជាងផ្លូវទៅខេត្តព្រះសីហនុ។ ឯកឧត្តមបានបង្ហាញការប្រៀបធៀបថា ផ្លូវទៅខេត្តព្រះសីហនុមានប្រវែងដល់ទៅ 190គីឡូម៉ែត្រ ត្រូវចំណាយថវិកាតែប្រមាណ 2,000លានដុល្លារប៉ុណ្ណោះ តែចំពោះផ្លូវទៅបាវិតវិញ ត្រឹមតែ160គីឡូម៉ែត្រប៉ុណ្ណោះតែត្រូវចំណាយថវិកាដល់ទៅជិត 4ពាន់លានដុល្លារ។
ចំពោះកំណត់ពេលការសាងសង់វិញ ឯកឧត្តមរដ្ឋមន្ត្រីបានបញ្ជាក់ថា រាជរដ្ឋាភិបាលនៅមិនទាន់សម្រេចថានឹងធ្វើការសាងសង់នៅពេលណា ឬយ៉ាងណានោះទេ ព្រោះផ្លូវនេះត្រូវចំណាយថវិកាជាតិច្រើនពេក ដូច្នេះត្រូវរង់ចាំការស្វែងរកដៃគូវិនិយោគឯកជនសម្រាប់កសាងផ្លូវនេះជាមុនសិន។ ក្រៅពីនេះរាជរដ្ឋាភិបាលក៏បានអនុញ្ញាតឱ្យទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) សិក្សាពីគម្រោងសំខាន់ៗមួយចំនួនទៀតនៅរាជធានីភ្នំពេញ និងតំបន់សំខាន់ៗទៀតផងដែរ ដូចជាគម្រោងពង្រីកផ្លូវជាតិលេខ1 និងផ្លូវរថភ្លើងលើអាកាសជាដើម៕
December 28, 2018
កម្ពុជាទទួលបានអ្នកដំណើរប្រមាណ 10លាននាក់តាមអាកាសយានដ្ឋានអន្តរជាតិទាំង3
អាកាសយានដ្ឋានអន្តរជាតិចំនួន3 របស់កម្ពុជា(អាកាសយានដ្ឋានអន្តរជាតិភ្នំពេញ សៀមរាប និងក្រុងព្រះសីហនុ) នៅក្នុងឆ្នាំ2018នេះ ទទួលបានអ្នកធ្វើដំណើរឆ្លងកាត់បានប្រមាណ 10លាននាក់ ដែលចំនួននេះមានការកើនឡើង 2លាននាក់ បើប្រៀបធៀបទៅនឹងឆ្នាំ2017។
លោក Eric Delobel នាយកប្រតិបត្តិនៃក្រុមហ៊ុនអាកាសយានដ្ឋានកម្ពុជា បានថ្លែងក្នុងពិធីអបអរសាទរការទទួលបានអ្នកដំណើរចំនួនប្រមាណ 10លាននាក់តាមអាកាសយានដ្ឋានអន្តរជាតិទាំង3នោះថា៖ “នេះជាមោទនភាពមួយរបស់ប្រទេសកម្ពុជាដែលបានបម្រើសេវាកម្មជូនអ្នកដំណើរចំនួន10លាននាក់តាមរយៈអាកាសយានដ្ឋានអន្តរជាតិទាំង3 ដែលនេះជាកំណត់ត្រាដំបូងបំផុតដែលមានការកើនឡើងចំនួន 2លាននាក់ ធៀបនឹងឆ្នាំ2017 ដែលមានតែ 8លាននាក់”។
លោកបានបន្តថា នៅឆ្នាំ1995 ពេលក្រុមហ៊ុន Cambodia Airport ត្រូវបានផ្តល់ការទុកចិត្តឱ្យធ្វើ-ការអភិវឌ្ឍអាកាសយានដ្ឋានអន្តរជាតិភ្នំពេញ គឺមានអ្នកដំណើរប្រមាណត្រឹមតែ 5ម៉ឺននាក់ប៉ុណ្ណោះ ដែលតិចជាងដល់ទៅ 20ដង បើធៀបនឹងបច្ចុប្បន្ន។
ឯកឧត្តម វ៉ាន់ ណូរ៉ាក់ អគ្គនាយកអាកាសយានដ្ឋានអន្តរជាតិកម្ពុជាបានមានប្រសាសន៍ថា៖“នេះជាការតភ្ជាប់កាន់តែប្រសើរឡើង និងកាន់តែជោគជ័យដែលយើងបានច្របាច់បញ្ចូលគ្នារវាងអាកាសយានដ្ឋានទាំង3 ឱ្យក្លាយទៅជាសហគមន៍តែមួយ គឺមានអ្នកដំណើរ 10លាននាក់សម្រាប់ដោយទំនាក់ទំនងដ៏ជិតស្និទ្ធ និងរឹងមាំរវាងដៃគូពាក់ព័ន្ធរបស់អាកាសយានដ្ឋាននីមួយៗអស់រយៈពេលជាង 23ឆ្នាំចុងក្រោយនេះ”។
ឯកឧត្តមបានបញ្ជាក់បន្តថា៖ “យើងបានសហការបង្កើតស្តង់ដារ ជាពិសេសទំនាក់ទំនងសន្តិសុខ និងសុវត្ថិភាព ក៏ដូចជាការគាំពារបរិស្ថានផងដែរជាមួយក្រសួងទេសចរណ៍ក្នុងការផ្សព្វផ្សាយ ប្រទេសកម្ពុជាដែលជាគោលដៅសម្រាប់អ្នកដំណើរ។ បច្ចុប្បន្នអាកាសយានដ្ឋានអន្តរជាតិទាំង3 កំពុងបម្រើសេវាកម្មជាង 60គោលដៅ។ ព្រលានយន្តហោះមិនត្រឹមតែជាស្ថានីយធ្វើដំណើរ និងការមកដល់របស់ភ្ញៀវប៉ុណ្ណោះទេ តែថែមទាំងជាអ្នករៀបចំប្រព័ន្ធផ្សេងៗនៅ Runways Aprons ផងដែរ”។
លោក Eric Delobel បានលើកឡើងថា ចំនួនអ្នកដំណើរមានការកើនឡើងនេះ គឺដោយសារមានការចូលរួមចំណែកពីរដ្ឋាភិបាល ក្រសួងទេសចរណ៍ រដ្ឋលេខាធិការអាកាសចរស៊ីវិល គយ និងរដ្ឋាករ អគ្គនាយកដ្ឋានអន្តោប្រវេសន៍ និងភ្នាក់ងារឯកជនដែលតែងតែគាំទ្រជាប្រចាំ បានសហការគ្នាក្នុងការបង្កើតបទដ្ឋានស្តង់ដារ ជាពិសេសទាក់ទងនឹងសន្តិសុខសុវត្ថិភាព និងការសហការគាំពារបរិស្ថានផងដែរ។
គួរបញ្ជាក់ដែរថា របាយការណ៍ 10ខែរបស់ក្រសួងទេសចរណ៍បានបង្ហាញឱ្យដឹងពីការមកដល់របស់ភ្ញៀវអន្តរជាតិដែលកើនដល់770,000 នាក់នៅក្នុងខេត្តតំបន់ឆ្នេរ ដែលកើនឡើង26,9% ធៀបនឹងរយៈពេលដូចគ្នាពីឆ្នាំមុន។ បច្ចុប្បន្នអាកាសយានដ្ឋានអន្តរជាតិទាំង3 កំពុងបម្រើសេវាកម្មជាង60គោលដៅនៅទូទាំងពិភពលោក ធ្វើយ៉ាងណាឱ្យមានអ្នកដំណើរឆ្លងកាត់បានច្រើន ដោយតែធ្វើកិច្ចពិភាក្សាជាប្រចាំជាមួយក្រុមហ៊ុនអាកាសចរណ៍នានា ដើម្បីធ្វើឱ្យអាកាសយានដ្ឋានអន្តរជាតិទាំង3នេះ ក្លាយជាប្រតិបត្តិករ ដែលទុកចិត្តបានសម្រាប់បម្រើសេវាកម្មជូនដល់អ្នកដំណើរទាំងក្នុងស្រុក និងអន្តរជាតិ៕
December 28, 2018
Serena សម្លឹងរកការស្តារមុខមាត់ ក្រោយពីភាពចម្រូងចម្រាស់ក្នុង US Open
កីឡាការិនីវាយកូនបាល់ Serena Williams នឹងមិនធ្វើការពិភាក្សាទៅលើហេតុការណ៍ដែលបានផ្ទុះឡើង អំឡុងពេលនៃការប្រកួតព្រឹត្តិការណ៍ US Open វគ្គផ្តាច់ព្រ័ត្រ ដែលនាងបានរងបរាជ័យក្រោមស្នាដៃរបស់កីឡាការិនី Naomi Osaka នៅខែកញ្ញា និងកំពុងតែជ្រើសរើសយក «ការធ្វើរឿងកាន់តែធំ និងកាន់តែល្អប្រសើរ»។ នេះបើយោងទៅតាមការបញ្ជាក់របស់កីឡាការិនីអាមេរិករូបនេះទៅកាន់អ្នកយកព័ត៌មាន ក្នុងទីក្រុងអាប៊ូដាប៊ី កាលពីថ្ងៃព្រហស្បតិ៍។
ក្នុងការបង្ហាញខ្លួននៅលើទីលានជាលើកទី1របស់នាង ចាប់តាំងពីការប្រកួតវគ្គផ្តាច់ព្រ័ត្រដ៏ចម្រូងចម្រាស់ក្នុងទីក្រុងញូវយ៉ក Williams បានចាញ់ក្នុងការប្រកួតបែបកម្សាន្តរបស់នាង ក្រោមស្នាដៃបងស្រីរបស់ខ្លួនគឺ Venus ក្នុងលទ្ធផល 4-6 6-3 និង10-8 ក្នុងរាជធានីអ៊េមីរ៉ាតអារ៉ាប់រួម ហើយបច្ចុប្បន្ននាងនឹងត្រូវធ្វើដំណើរទៅកាន់ទីក្រុង Perth ដើម្បីប្រកួតក្នុងព្រឹត្តិការណ៍ Hopman Cup រួមជាមួយនឹងមិត្តរួមជាតិរបស់នាងគឺ Frances Tiafoe។
នៅពេលដែលត្រូវបានចោទសួរថា ការប្រកួត US Open វគ្គផ្តាច់ព្រ័ត្រ គឺជាប្រធានបទមួយដែលនឹងចង់គេចផុត ក្នុងពេលរដូវកាលថ្មីនេះចាប់ផ្តើម ឬយ៉ាងថា Serena បានឆ្លើយថា៖ «ខ្ញុំមិនចង់គេចផុតពីអ្វីឡើយ។ ខ្ញុំគ្រាន់តែមិនមានពេលក្នុងការនិយាយពីបញ្ហានោះ។ ខ្ញុំបាននិយាយពីវា គ្រប់គ្រាន់បាននិយាយពីបញ្ហានោះអស់រយៈពេលជាច្រើនខែមកហើយ ហើយវាជារឿងដ៏ល្អបំផុតក្នុងការធ្វើដំណើរទៅកាន់រឿងកាន់តែធំ និងកាន់តែល្អប្រសើរ»។
សមិទ្ធផលកាន់តែធំ និងកាន់តែល្អប្រសើរ ពិតជាស្ថិតក្នុងចិត្តរបស់ Serena ខណៈដែលនាងបានទទួលស្គាល់ថា ការប្រជែងឲ្យតាមស្មើកំណត់ត្រារបស់នាង Margaret Court នៃការឈ្នះពាន Grand Slam 24លើក គឺជាគោលដៅរបស់នាងក្នុងឆ្នាំ2019៕
ប្រភពពី៖ Channel News Asia
December 28, 2018
ផ្អែមល្ហែមយ៉ាងនេះ !! នៅ ស៊ីនឿន បង្ហើបប្រវត្តិស្នេហាជាមួយគូដណ្ដឹង អានហើយលើសជាតិស្ករ
តារាចម្រៀងនៅទ្រនំហង្សមាស លោក នៅ ស៊ីនឿន ក៏បានរៀបរាប់ឱ្យដឹងពីប្រវត្តិស្នេហ៍ដែលនាំឱ្យលោក និងគូដណ្ដឹងបានទាក់ទងគ្នារហូតឈានដល់ថ្ងៃដ៏មង្គល នឹងប្រកាសរៀបការរហូតដល់ចុងឆ្នាំ2019។
លោកបានរៀបរាប់ក្នុងថ្ងៃភ្ជាប់ពាក្យយ៉ាងអធឹកអធមកាលពីថ្ងៃទី27 ខែធ្នូ ថា ហេតុផលដែលនាំឱ្យលោក និងកញ្ញា ដូមីនិក ស្រឡាញ់គ្នា គឺដោយសារតែកាលពីដើមឆ្នាំ2018 ក្នុងពេលដែលឡើងទៅច្រៀងលើកដំបូងនៅលើទឹកដីសហរដ្ឋអាមេរិក ក៏បានជួបនាង ហើយសារតែសម្រស់ និងភាពរួសរាយរាក់ទាក់របស់នាង ក៏ធ្វើឱ្យលោកកត់សម្គាល់ និងតាមសុំស្គាល់។ លោកថាខ្លួនរមែងឆាតសួរសុខទុក្ខ និងបង្កបរិយាកាសរីករាយឱ្យនាងជាប្រចាំ រហូតដល់អំឡុងខែមេសាក្នុងឆ្នាំ2018ដដែល លោកក៏មានឱកាសទៅច្រៀងនៅលើទឹកដីសហរដ្ឋអាមេរិកម្ដងទៀត ហើយក៏កាន់តែជិតស្និទ្ធិជាមួយនាង និងឈានដល់ការចែចូវដល់ចាស់ទុំតែម្ដង។
លោកនិយាយថាខ្លួនស្គាល់នាងតែប៉ុន្មានខែប៉ុណ្ណោះ ក៏ហ៊ានសារភាពថាស្រឡាញ់ និងចង់បាននាងជាភរិយា ហើយក្នុងពេលជួបនាងម្ដងទៀតនៅអាមេរិក ក៏សុំស្ដីដណ្ដឹងនាងតែម្ដង ដោយសារតែមាននិស្ស័យ និងការដក់អារម្មណ៍ខ្លាំងឡើង។ យ៉ាងណាមិញ បើទោះជាបានស្រឡាញ់ និងយល់ចិត្តគ្នាមិនចាញ់ពីអ្នកស្រឡាញ់គ្នាច្រើនឆ្នាំយ៉ាងនេះក្ដី តែលោកប្រកាសថារហូតគម្រប់មួយឆ្នាំនៃការភ្ជាប់ពាក្យទើបសម្រេចចិត្តរៀបការ។ នោះគឺដោយសារតែនាងចង់ទុកពេលបង្កើនជំនាញសាឡនរបស់នាងឱ្យកាន់តែស្ទាត់សិន ស្របគ្នាដែលនាងទើបតែមានវ័យ21ឆ្នាំ ដោយចង់រៀបការក្នុងវ័យ22ឆ្នាំច្រើនជាង៕

December 28, 2018
លោកស្រី ហ៊ុន ស៊ីណាត ដាក់មួយម៉ាត់ទំនងជា ទេព បូព្រឹក្ស ចត់បាយ “ថ្លៃម្ល៉េះ ធូរថ្លៃខ្លះទៅ”
នៅពេលមុននេះបន្ដិចនៅលើបណ្ដាញសង្គមហ្វេសប៊ុករបស់ លោកស្រី ហ៊ុន ស៊ីណាត ប្អូនស្រីសម្តេចតេជោ ហ៊ុន សែន បានមានប្រសាសន៍ប្រតិកម្មចំពោះករណី រងការប្រមាថរបស់តារាចម្រៀង ទេព បូព្រឹក្ស ដែលទាមទារជំងឺចិត្តចំនួន 10 ម៉ឺនដុល្លារ ។ ប្អូនស្រីបង្កើតប្រមុខរាជរដ្ឋាភិបាលលាន់មាត់ថា ជំងឺចិត្តនោះថ្លៃជាងស្បែកជើងជនជាតិអ៊ីរ៉ុងគប់ក្បាល ចច ប៊ូស។
លោកស្រី ហ៊ុន ស៊ីណាត បានសរសេរសារយ៉ាងដូច្នេះថា «អុញ! ជះស្រាបៀរសោះ ទារជំងឺបានថ្លៃជាងការដេញថ្លៃស្បែកជើង ជនជាតិអ៊ីរាក់គប់ក្បាល់ចច ប៊ូស ប្រធានាធិបតីទី 41 របស់អាមេរិកទៅទៀតវើយ។ បើយកការផ្អើលនេះ ទៅជួយការងារសង្គម មិនដឹងល្អយ៉ាងណាទេ មើលទៅម្នាក់ៗ មិនជួយសម្រួលគ្នាទេ ម្នាក់ៗមានតែដុតឱ្យខ្លោចរោចឱ្យឆៅ។ ហៅអ្នកជះស្រាបៀរ មកសុំទោសទៅ នេះហើយទឹកប្ដូរនិស្ស័យ វាបែបនេះឯង ម្យ៉ាងទៀត អ្នកទារជំងឺចិត្តនោះទៀត ថ្លៃជាងស្បែកជើងជនជាតិអ៊ីរាក់ គប់ក្បាល ចច ប៊ូស ថ្លៃម្ល៉េះ ធូរថ្លៃខ្លះទៅ »៕

December 28, 2018
លោក ថៃ នរៈសត្យា ថា៖« រឿងធំ និងរឿងល្បីមិនដូចគ្នាទេ »
មុននេះបន្ដិចរដ្ឋលេខាធិការក្រសួងវប្បធម៌ និងវិចិត្រសិល្បៈ និងជាអ្នកនាំពាក្យ ថៃ នរៈសត្យា បានបង្ហោះនៅលើបណ្ដាញសង្គមហ្វេសប៊ុក ដែលឆ្លើយតបបញ្ជាក់អំពីរឿងធំ និងរឿងល្បី ពោលគឺមិនដូចគ្នាទេ។
លោករៀបរាប់ថា វាជាបំណងល្អដែលគ្រាន់តែមិនស្ថិតក្នុងក្បាលអន់ខ្សោយប៉ុណ្ណោះ។ ខ្ញុំចង់ប្រៀបធៀបថា : គ្រប់ការប្រយុទ្ធលើលោកនេះ រួមទាំងសង្គ្រាមលោកលើកទី១ និងលើកទី២ផងនោះ មិនដែលចប់ទៅដោយការប្រយុទ្ធហែកហួរគ្នាទេ ! វារមែងរលត់ទៅដោយការសម្រុះសម្រួលណាមួយមិនខាន។ ក៏ដូចជាសង្គ្រាមកន្លងទៅនៅកម្ពុជាដែរ តើវាជាការចប់ដោយការប្រយុទ្ធស៊ីសាច់ហុតឈាមឬ ?។ ក្រោយថ្ងៃរំដោះជាតិជាប្រវត្តិសាស្ត្រនាថ្ងៃ៧មករា ក៏ពិតមែនតែសង្គ្រាមទ្រង់ទ្រាយធំបានរលត់ទៅជាបណ្តោះអាសន្ន តែសង្គ្រាមឆ្មក់នៅតែបន្តឆក់យកជីវិតមនុស្ស សត្វ និងបំផ្លិចបំផ្លាញប្រទេសដ៏កម្សត់នេះជាបន្តបន្ទាប់រហូតដល់ឆ្នាំ 1998 ទើបទទួលបានសន្តិភាពពេញលេញលើផ្ទៃប្រទេស ដោយសារការអនុវត្តន៍នយោបាយ ឈ្នះឈ្នះ របស់ប្រមុខរាជរដ្ឋាភិបាលកម្ពុជាបច្ចុប្បន្ន ដែលប្រកាន់យកអាវុធចចារគ្នាជាមូលដ្ឋាន ដោយមិនប្រើអាវុធប្រល័យគ្នាទេ ។ ខ្ញុំចង់យកបញ្ហាខាងលើនេះមកជាឧបករណ៍ ទើបខ្ញុំឱ្យតម្លៃថាវាមិនមែនជារឿងធំដែលប៉ះពាស់ដលើសុវត្ថិភាពប្រទេសជាតិ និងសន្តិសុខសង្គមនោះឡើយ ! ។
លោក បញ្ជាក់ថា រឿងធំ និងរឿងល្បីមិនដូចគ្នាទេ ! អារឿងតូវប៉ុនបាតដៃក៍វាអាចល្បីដែរ អាចល្បីខាងល្អ ខាងគុណធម៌ ក៏អាចល្បីខាងមិនល្អ ខាងអគុណធម៌ដែរ ! ដូចនេះហើយដែលខ្ញុំបានវាយតំលៃថាវាមិនមែនជារឿងធំនោះ ពោលគឺជារឿងដែលអាចនិយាយគ្នាបាន បើភាគីជម្លោះទាំងសងខាងមានសុឆន្ទ:ក្នុងការដោះស្រាយគ្នា។ ខ្ញុំមិនបាននិយាយកាន់ជើង ដោយលម្អៀងទៅខាងណាឡើយ ហើយខ្ញុំក៏បានបន្ទោសចំពោះជនដែលមិនចេះគ្រប់គ្រងខ្លួនហើយបញ្ចេញកំហឹងទៅលើគេនោះដែរ ប៉ុន្តែការបញ្ចេញមតិប្រមាថមកលើខ្ញុំពីសំណាក់ជនមួយចំនួនណានោះ វាគ្រាន់តែជាកម្រិតគំនិតនៃបុគ្គលម្នាក់ៗក្នុងការប្រីសិទ្ធរបស់ពួកគាត់ប៉ុណ្ណោះ រួមទាំងបណ្ឌិតម្ទេសខ្មាំងពីរបីផ្លែផងដែរ។
ខ្ញុំសុំអរគុណចំពោះបងប្អូនជនរួមជាតិ និងបណ្តា Facebook’s friends នៅគ្រប់ច្រកល្ហកនៃពិភពលោក ដែលបានផ្តល់តម្លៃសម្តីរបស់ខ្ញុំក្នុង វិចារណញ្ញាណ និងហេតុ-ផល ។ សូមទាំងអស់គ្នាមេត្តាទទួលពីខ្ញុំនូវ ការគោរពជូនពរ សុខសប្បាយ សុវត្ថិភាព និង សំណាងល្អតទៅ….” ទំពក់វាទៅ ទើបព្នៅវាម៉ោ ” ថនស.27.2018 ៕
December 27, 2018
ជនបង្កហេតុជះស្រាបៀគប់កំប៉ុងមកលើកញ្ញា ទេព បូព្រឹក្ស ឆ្លើយតបថាខ្លួនស្រវឹង
តាមរយៈការបង្ហោះបញ្ជាក់ពីលោក ហេង ឡុង បានឱ្យដឹងថា នាព្រឹកថ្ងៃទី27 ខែធ្នូ ឆ្នាំ 2018 ក្រុមមេធាវីស្ម័គ្រចិត្តរបស់ កញ្ញាទេពបូព្រឹក្ស បានជួបផ្ទាល់ជាមួយនឹងជនបង្កឈ្មោះ ឆេងរស្មី ដែលជាអ្នកគប់កំប៉ុងមកលើកញ្ញា។ ទាំងជនបង្កនិងទាំងម្ចាស់ហាងបានឆ្លើយថាខ្លួនស្រវឹង តើបងប្អូនទាំងអស់គ្នាទទួលយកបានទេ បើគ្រាន់តែពួកគាត់ឆ្លើយដោះសារថា ស្រវឹងបែបនេះ? តើភាពឈឺចាប់និងខ្មាស់គេប៉ុណ្ណារហូតហ៊ានទៅដល់ធ្វើការ live យំស្រែកតាម facebook ដើម្បីសុវត្ថិភាពផ្ទាល់ខ្លួននិងឱ្យមហាជនជួយរកយុត្តិធម៌? សំណូមពររបស់ភាគីទេពបូព្រឹក្សមាន3 ចំណុចដូចខាងក្រោម៖
ទី1. ធ្វើសន្និសីទកាសែតសុំទោសជាសាធារណៈ
ទី2. សំណងរដ្ឋប្បវេណីខូចខាតកិត្តិយសចំនួន ១០ម៉ឺនដុល្លារ
ទី3.ធ្វើកិច្ចសន្យាចំពោះមុខអាជ្ញាធរមិនគុំគួនសងសឹកគ្នាបញ្ចប់ទំនាស់ដោយសន្តិវិធី។ ភាគីជនបង្កបានដកឃ្លាដើម្បីពិចារណាទៅលើសំណូមពរទាំងបីរបស់ជនរងគ្រោះ។ អរគុណសំរាប់បងប្អូនដែលគាំទ្រនិងចូលរួមឈឺចាប់ជាមួយកញ្ញា ទេព បូព្រឹក្ស អរគុណសម្រាប់ការស៊ែរចែករំលែកជូនមហាជនជ្រាបជាពត៌មាន។
គួររំលឹកផងដែលថាកាលពីរាត្រីថ្ងៃទី25 ខែធ្នូ ឆ្នាំ2018 មានករណីអំពើហិង្សារជះស្រាបៀរ និងគប់កំប៉ុងទៅលើតារាចម្រៀង ទេព បូព្រឹក្ស នៅចំណុចភោជនីយដ្ឋាន “សមុទ្រ” នៅតាមបណ្ដោយផ្លូវ 118 សង្កាត់ទឹកល្អក់ទី1 ខណ្ឌទួលគោក រាជធានីភ្នំពេញ។ ក្នងនោះផងដែលក្រោយពីបានដាក់ពាក្យបណ្តឹង ទេព បូព្រឹក្ស បានបញ្ជាក់ថា កញ្ញាបានដាក់ពាក្យបណ្តឹងទៅលើបុគ្គល4រូប គឺ បុរសដែលបានជះស្រាមកខ្លួន, ម្ចាស់ហាង “សមុទ្រ” , អ្នករៀបចំកម្មវិធី និង បុគ្គលមួយរូបដែលអះអាងថាជាម្តាយរបស់ជនបង្កដែលបានទះកំផ្លៀងមកលើអ្នករាំរបស់ខ្លួនរហូតដល់ទៅ3កំផ្លៀង និងទាមទារសំណង10ម៉ឺនដុល្លារអាមេរិក។ ដោយសំណងនោះកញ្ញាបានបញ្ជាក់ថា នឹងយកទៅបរិច្ចាគឱ្យទៅគន្ធបុប្ផា និងកុមារកំព្រាជាដើម៕
December 27, 2018