សង្គម និងសេដ្ឋកិច្ច - La Reine Media

មកស្គាល់មុខអ្នកដាក់ឈ្មោះ « ពែកមី » តារារូបណាដាក់ឱ្យ…រហូតល្បីដល់សព្វថ្ងៃនេះ

នៅលើវិថីសិល្បះមានតារាជាច្រើនដួងដែលមានសមត្តិភាពផ្សេងៗគ្នា ដូចជា តារាកំប្លែង តារាបង្ហាញម៉ូត តារាសម្តែងនឹងពិធីករ ក្នុងនោះផងដែលក៏មានតារាមួយចំនួនដែលបានប្រើប្រាស់ឈ្មោះពិត នឹងតារាខ្លះទៀតបានប្រើប្រាស់ឈ្មោះមិនពិត ហេតុផលដែលពួកគេប្រើប្រាស់ឈ្មោះមិនពិតនោះគឺដើម្បីទាក់ទាញប្រជាប្រិយភាពពីអ្នកគាំទ្រ។

ជាក់ស្ដែងដូចនាយ ពែកមី តារាកំប្លែកដ៍ល្បីល្បាញ ប្រចាំបុស្តិ៍ ស៊ីធីអិន តែឯឈ្មោះពិតរបស់លោក ពុំសូវមានមហាជនណាបានស្គាល់នោះទេ។ « ពែកមី »គ្រាន់តែជាឈ្មោះ ដែលត្រូវបានគេដាក់ឱ្យលោកនៅពេលប្រឡូកក្នុងសិល្បៈប៉ុណ្ណោះ ហើយលោកក៏មិនដែលបង្ហាញមុខអ្នកដែលបានដាក់ឈ្មោះឱ្យលោក រហូតល្បីបែបនេះដែរ។

នៅពេលថ្មីនេះជាខួបរយៈពេល10ឆ្នាំដែលលោកចូលសិល្បៈ លោកបានបង្ហោះវីដេអូ រំឭកដល់គុណ និងអរគុណដល់សិល្បៈករជាច្រើនដែលបានជួយលោក។ តាមការរៀបរាប់របស់លោក ឈ្មោះ « ពែកមី » មិនមែនលោកគ្រូ ឬអ្នកគាំទ្រដាក់ឱ្យនោះទេ តែគឺសិល្បៈករជើងចាស់មួយរូបនិងជាគណៈកម្មការកម្មវិធីប្រកួតជ្រើសរើសតារាកំប្លែង នោះគឺអ្នកនាង សុខ ចាន់ធីតា ហៅ កាតុ ដែលជាអ្នកដាក់ឱ្យ រហូតដល់មានឈ្មោះប្លែកពីគេនិងល្បីដល់សព្វថ្ងៃនេះ។

សូមជម្រាបផងដែរថា តារាកំប្លែង ដែលមានដើមកំណើត នៅខេត្តស្វាយរៀង នាយ ពែកមី ដែលមានឈ្មោះពិតថា” ចែម ចាន់តារា ” បានចាប់អាជីពជាតារាកំប្លែង បន្ទាប់ពីលោក បានប្រឡងជាប់ជាតារាកំប្លែង ប្រចាំនៅស្ថានីយ ទូរទស្សន៍ ស៊ី ធី អ៊ីន ដោយសារតែលោកមាន សមត្ថភាពក្នុងការលេងកំប្លែង និងពូកែ លេងពាក្យ សម្ដីនិយាយមិនចេះទាល់ ធ្វើឲ្យលោកបានទទួលការគាំទ្រ ច្រើនពីទស្សនិកជន ហើយបច្ចុប្បន្នលោក ក៏បានក្លាយខ្លួនជាតារាកំប្លែងមួយរូប ដែលមានភាពលេចធ្លោ ជាងគេ នៅស្ថានីយទូរទស្សន៍ ស៊ី ធី អ៊ីន ទៀតផង៕

January 2, 2019

Fan Bingbing បង្ហាញឯកសារបញ្ជាក់ Fan ChengCheng មិនមែនជាកូនប្រុសខ្លួនទេ

តាមរយៈសារព័ត៌មាន Mthai បានចេញផ្សាយនៅថ្ងៃទី2 ខែមករា ឆ្នាំ 2019 នេះបានឱ្យដឹងថា ខណៈនេះតារាសម្ដែងស្រី Fan Bingbing បានបង្ហាញភស្ដុតាង ដែលបញ្ជាក់ថា Fan ChengCheng គឹជាប្អូនប្រុសបង្កើតរបស់ខ្លួន និងឯកសារបណ្ដឹងអ្នកសារព័តមានចិន។

ដោយឡែកនៅពេលថ្មីៗនេះ តារាសម្ដែងស្រីដ៏ល្បីរបស់ប្រទេសចិនរូបនេះ បានដាក់ពាក្យបណ្ដឹងទៅតុលាការ ប្ដឹងអ្នកកាសែតចិនមួយរូបដែលបានសរសេរ និងទម្លាយព័ត៌មានអាស្រូវនេះ ដែលមានឈ្មោះ វាំង ធានហ្វើយ ឱ្យសងជំងឺចិត្ត 6 ម៉ឺនយ័ន និងចេញមុខសុំទោសរូបនាងជាសាធារណៈផងដែរ។ Fan Bingbing បានផ្ដល់បទសម្ភាសន៍ឱ្យអ្នកសារព័ត៌មានចិនថា Fan ChengCheng គឺជាកូនពៅរបស់ម្ដាយខ្លួន និងសឹងតែមិនរស់ទៀតផង ដោយសារតែបិះនិងរលូត ក៏ប៉ុន្ដែ ទម្រាំតែធំចម្រើនវ័យបានដូចសព្វថ្ងៃនេះ នាងខំធ្វើការប្រលូកចូលសិល្បៈ ដើម្បីឧបត្ថម្ភក្រុមគ្រួសារ រួមទាំងម្ដាយយ៉ាងលំបាកវេទនា។

សូមជម្រាបផងដែរថា Fan Bingbing បានបង្ហាញឯកសារដែលអាចបញ្ជាក់បានថា សំបុត្រឯកសារពេទ្យ និងភស្ដុតាងមួយចំនួនទៀត គឺអាចឱ្យដឹងថា Fan Bingbing គឺជាបងស្រី ក៏ដូចជាម្ដាយទី 2 របស់ Fan ChengCheng និងជាអ្នកទំនុកបម្រុងក្រុមគ្រួសាររបស់នាង៕

January 2, 2019

តើអ្នកចាំបាច់ត្រូវ “បន្ទោបង់” រាល់ថ្ងៃឬ?

រឿងបន្ទោបង់(បត់ដៃ បត់ជើង)នឹងគិតវាជារឿងតូចតាចក៏ថាបាន តែបើសិនជាការបន្ទោបង់ដំណើរការមិនប្រក្រតីវិញនោះ វាអាចធ្វើឱ្យយើងមិនស្រួលសប្បាយខ្លួន មិនស្រួលពោះ និងអាចរំខានទៅដល់ការទទួលទានអាហារ ការរំលាយអាហារ និងមានក្ដីទុក្ខវេទនាពីអាការ “ទល់លាមក” ឬកើតរោគ “ឫសដូងបាត” ទៀតផង។ តែការណ៍នឹងធ្វើឱ្យរាងកាយមានប្រព័ន្ធបន្ទោបង់ដែលល្អក៏អាចជារឿងលំបាកដែរសម្រាប់មនុស្សជាច្រើន។

អ្នកជំនាញខាងផ្នែកប្រព័ន្ធរំលាយអាហារបានបញ្ជាក់ថា “រាងកាយរបស់មនុស្សយើងមានភាពស្មុគស្មាញ ការធ្វើការងាររបស់អវយវៈផ្សេងៗរបស់មនុស្សម្នាក់ៗអាចនឹងមានភាពខុសប្លែកគ្នាបន្តិចបន្តួច មិនថាតែរឿងការគេងសម្រាកលង់លក់ ការបន្ទោបង់ទាំងធំ និងតូច ជារឿងដែលមើលទៅហាក់ដូចជាធម្មតាសម្រាប់មនុស្សជាច្រើននោះ អាចនឹងក្លាយជារឿងលំបាកសម្រាប់មនុស្សមួយចំនួនបាន ជាពិសេសរឿង “បន្ទោបង់”។ អ្នកខ្លះអាចមានអារម្មណ៍ថា ក្នុង 1ថ្ងៃត្រូវបន្ទោបង់យ៉ាងតិច 1ដង ព្រោះបើសិនជាពេញមួយថ្ងៃ មិនបន្ទោបង់សោះនោះ នឹងមានអារម្មណ៍ទើសទាល់ណែនៗពោះ និងអាចហុចផលឱ្យនៅថ្ងៃបន្ទាប់មកធ្វើឱ្យពិបាកបន្ទោបង់ ឬបន្ទោបង់ពិបាកខ្លាំង រហូតអាចកើតអាការទល់លាមកទៀតផង តែអ្នកខ្លះកន្លងមក 2 – 3ថ្ងៃទើបបត់ជើងម្ដង តែក៏បន្ទោបង់បានយ៉ាងងាយស្រួលដោយមិនមានអារម្មណ៍ថាពិបាកអ្វីឡើយ ដូច្នេះហើយទើបរឿងរបស់ការបន្ទោបង់សម្រាប់មនុស្សម្នាក់ៗហាក់ដូចជាខុសប្លែកពីគ្នា និងច្រើនបែបច្រើនយ៉ាងតាមការធ្វើការរបស់ប្រព័ន្ធបន្ទោបង់ រួមទាំងដំណើរជីវិត អាហារការហូបចុកផ្សេងៗជាដើមផងដែរ”។

ចំនួនដងនៃការបន្ទោបង់ដែលស័ក្តិសមរបស់មនុស្សម្នាក់ៗក៏ហាក់ដូចជាខុសប្លែកពីគ្នាខ្លាំងដែរ។ តាមរយៈរបាយការណ៍ពីការសិក្សាស្រាវជ្រាវជាច្រើនបានរកឃើញថា ការបន្ទោបង់ដែលល្អដល់សុខភាពរាងកាយខ្លាំងបំផុត នឹងស្ថិតក្នុងចំនួនតាំងពី3ដងក្នុងមួយថ្ងៃ រហូតទៅដល់3ដងក្នុងមួយសប្ដាហ៍ និងតិចជាង 40%ដែលបានរកឃើញថា មានអ្នកបន្ទោបង់មួយថ្ងៃ 1ដង។

យ៉ាងណាក៏ដោយ ចំនួនដងរបស់ការបន្ទោបង់អាចពាក់ព័ន្ធនឹងអាការរបស់រោគឆ្លងប្រភេទខ្លះដែរ ដូចជា រោគរាករូស(ដែលធ្វើឱ្យមានការបន្ទោបង់ច្រើនដង) មហារីក(បន្ទោបង់ចេញមកជាឈាម) ឬបើសិនជាគ្មានការបន្ទោបង់សោះ ក៏អាចជាសញ្ញាដាស់តឿនរបស់រោគដែលពាក់ព័ន្ធនឹងប្រព័ន្ធបន្ទោបង់ដូចគ្នា។

តើចាំបាច់ត្រូវតែបន្ទោបង់ឱ្យបានក្នុងមួយថ្ងៃ 1ដងឬទេ?
អ្នកស្រាវជ្រាវខាងវិទ្យាសាស្ត្រមកពីស្ថាប័នវិទ្យាសាស្ត្ររបស់ប្រទេសអូស្ត្រាលីបានបញ្ជាក់ថា “ការបន្ទោបង់ឱ្យបានមួយថ្ងៃ 1ដងមិនមែនជារឿងចាំបាច់ទេ តែបើបន្ទោបង់តិចជាង3ដងក្នុងមួយសប្ដាហ៍ អាចនឹងបង្កឱ្យកើតគ្រោះថ្នាក់ឡើងបាន ដូចជាកើតរោគឫសដូងបាត ឬរន្ធគូទកើតមានរបួសដោយសារលាមកមានទំហំធំ និងរឹងរហូតធ្វើឱ្យមានឈាមចេញមកជាដើម”។

“អាការទល់លាមកអាចកើតឡើងបានពីច្រើនមូលហេតុ តាំងពីបណ្ដាលមកពីការព្យាបាលរបស់ជំងឺមួយចំនួន(ដោយសារផលប៉ះពាល់ពីថ្នាំប្រភេទខ្លះ ) និងមូលហេតុដែលច្បាស់លាស់បំផុតនោះគឺ ការញ៉ាំអាហារដែលមានជាតិកាកសរសៃតិចជ្រុលពេក។

គន្លឹះល្អៗក្នុងការធ្វើឱ្យការបន្ទោបង់ល្អប្រក្រតី
ងាយៗបំផុតគឺ បន្ថែមអាហារដែលមានជាតិកាកសរសៃឱ្យបានច្រើនឡើងនៅក្នុងពេលបាយម្ដងៗ ដូចជា បន្លែ ផ្លែឈើ ធញ្ញជាតិ សណ្ដែក និងញ៉ាំទឹកឱ្យបានច្រើនឡើង។ ការហាត់ប្រាណជាប្រចាំក៏ធ្វើឱ្យប្រព័ន្ធបន្ទោបង់ធ្វើការយ៉ាងមានប្រសិទ្ធភាពខ្លាំងឡើងដូចគ្នាដែរ។ បើចាប់ផ្ដើមមានអាការទល់លាមក តឹងណែនពោះ ចង់បត់ជើង លោកអ្នកអាចញ៉ាំទឹកឱ្យច្រើនឡើង ឬញ៉ាំអាហារដែលមានប្រូបៃអូទិកស៍ ដូចជា ទឹកដោះគោជូរ យ៉ាអួរ និង គីមឈី ក៏អាចជួយបានដូចគ្នាដែរ៕

January 2, 2019

វិធីងាយៗក្នុងការលេបថ្នាំគ្រាប់ ឱ្យកាន់តែងាយស្រួលឡើង

មនុស្សជាច្រើនមានបញ្ហាជាមួយការលេបថ្នាំគ្រាប់ មិនថាតែកូនក្មេង ឬមនុស្សធំពេញវ័យហើយនោះឡើយ អ្នកខ្លះដល់ថ្នាក់ក្អួតចេញមកវិញបន្ទាប់ពីខំព្យាយាមលេបគ្រាប់ថ្នាំឱ្យបានទៀតផង ហើយអ្នកខ្លះទៀតដល់ថ្នាក់ត្រូវយកថ្នាំគ្រាប់ទាំងនោះទៅដាក់ក្នុងទឹកឱ្យរលាយ ឬកិនជាម្សៅ និងជួនកាលថែមទាំងដកស្រោមកាប់ស៊ូលចេញយកតែម្សៅថ្នាំខាងក្នុងមកលាយជាមួយទឹកដើម្បីលេបក៏មាន។

វិធីលេបថ្នាំគ្រាប់យ៉ាងងាយៗ
ការសិក្សាស្រាវជ្រាវ ពីមហាវិទ្យាល័យ Heidelberg នៅក្នុងប្រទេសអាល្លឺម៉ង់ បានណែនាំបង្ហាញពីតិចនិកងាយៗក្នុងការជួយឱ្យយើងលេបថ្នាំគ្រាប់បានយ៉ាងងាយស្រួលដូចតទៅ ៖
1. ចាក់ទឹកចូលទៅក្នុងដបប្លាស្ទិក ឬដបទឹកភេសជ្ជៈ។
2. ដាក់គ្រាប់ថ្នាំនៅលើអណ្ដាត ឬអាចដាក់ទៅជិតគល់អណ្ដាតក៏បាន។
3. ប្រើបបូរមាត់ទាំងខាងលើ និងខាងក្រោមពាំមាត់ដបឱ្យជាប់ និងជិតកុំឱ្យទឹក ឬខ្យល់ហៀរចេញទៅក្រៅមាត់បាន។
4. លើកគូទដបទឹកឡើងឱ្យទឹកហូរចូលទៅក្នុងមាត់ ហើយក្នុងពេលដែលទឹកកំពុងហូរចូលមាត់នោះ ចូរបន្ថែមកម្លាំងបឺតទឹកចូលទៅក្នុងមាត់ដំណាលគ្នាផង។ កុំឱ្យមានខ្យល់ចូលទៅក្នុងអំឡុងពេលញ៉ាំទឹក។

អ្នកដែលធ្វើការសាកល្បងលេបថ្នាំដោយវិធីនេះប្រមាណជា140នាក់បានរកឃើញថាការលេបថ្នាំដោយវិធីនេះ (បិទភ្នែកខណៈ ពេលលេបថ្នាំផង) ជួយឱ្យការលេបថ្នាំគ្រាប់កាន់តែងាយស្រួលឡើងជាង 60% បើប្រៀបធៀបនឹងការលេបថ្នាំគ្រាប់ដោយញ៉ាំទឹកពីកែវ។

ក្រៅពីនេះនៅមាន 1វិធីទៀតដែលអាចជួយឱ្យការលេបថ្នាំគ្រាប់កាន់តែងាយស្រួលឡើង និងទទួលជោគជ័យដែលស័ក្តិសមជាមួយថ្នាំគ្រាប់ប្រភេទកាប់ស៊ូល នោះគឺ៖
1. ដាក់ថ្នាំគ្រាប់កាប់ស៊ូលនៅលើអណ្ដាត។
2. ក្រេបទឹកចូលទៅក្នុងមាត់មួយក្អឹក តែបៀមទុកសិន កុំអាលលេប។
3. ឱនមុខ ឱ្យចង្កាចង្អុលមកដើមទ្រូង។
4. រួចលេបទឹកចូលទៅដំណាលគ្នានឹងថ្នាំខណៈពេលកំពុងឱនមុខនោះ។ ភាគច្រើនថ្នាំគ្រាប់កាប់ស៊ូល ច្រើនតែមានទម្ងន់ស្រាល និង អណ្ដែតលើទឹក នៅពេលយើងឱនមុខ ហើយលេបថ្នាំដែលកំពុងអណ្ដែតលើទឹកនោះ វានឹងធ្វើឱ្យការលេបថ្នាំគ្រាប់កាប់ស៊ូលក្លាយជារឿងដែលកាន់តែងាយស្រួលឡើង។ វិធីនេះអាច បង្កើនប្រសិទ្ធភាពក្នុងការលេបថ្នាំបានច្រើន ដល់ទៅ 89% បើប្រៀបធៀបនឹងការញ៉ាំទឹក ដើម្បីលេបថ្នាំពីកែវទឹកដោយវិធីធម្មតា។

ក្រៅពីវិធីទាំង2ខាងលើ ដែលជួយឱ្យការលេបថ្នាំគ្រាប់ក្លាយជារឿងងាយស្រួលហើយនោះ បើសិនជាសាកល្បងធ្វើហើយនៅតែមិនបានផលទៀត ចូរសាកល្បងញាត់គ្រាប់ថ្នាំចូលទៅក្នុងនំទន់ៗ ដូចជា ចាហួយ ឬនំអាកោជាដើមមុននឹងដួសជាដុំតូចៗ ហើយលេប ចូល ទៅទាំងដុំ ឬក៏កិនថ្នាំឱ្យម៉ដ្ឋ ហើយលាយជាមួយនំទន់ៗ ឬហាន់គ្រាប់ថ្នាំជាបំណែកតូចៗ ហើយលេបម្ដង 1បំណែកៗក៏អាចជួយឱ្យការលេបថ្នាំប្រព្រឹត្តទៅបានងាយស្រួលដែរ៕

January 2, 2019

ទ្រនំពីរផ្សេងគ្នា.. EXO Kai និង BLACKPINK Jennie គឺកំពុងស្រឡាញ់គ្នា

តាមរយៈសារព័ត៌មានកម្សាន្ដ Koreaboo នៅពេលមុននេះបន្ដិច បានឱ្យដឹងថា ខណៈនេះខាងផលិតកម្មSM ដែលជាផលិតកម្មធំផ្នែកចម្រៀង Kpop បានចេញការបញ្ជាក់អំពីទំនាក់ទំនងស្នេហារបស់សមាជិកក្រុម EXO តារាចម្រៀង Kai និងសមាជិកក្រុមចម្រៀងស្រី BLACKPINK នាង Jennie។

ក្រោយពីត្រូវអ្នកប្រម៉ាញ់រូបភាពចាប់បានថា តារាចម្រៀងស្រី Jennie កំពុងមានទំនាក់ទំនងស្នេហាក្រៅសិល្បៈជាមួយ លោក Kai ដែលជាសមាជិកក្រុម EXO នោះ ភ្លាមៗរឿងដ៏ក្ដៅគគុកមួយនេះ បានធ្វើឱ្យផ្ទុះពេញបណ្ដាញសង្គមតែម្ដង។ ខាងផលិតកម្ម YG Entertainment ដែលជាអ្នកគ្រប់គ្រងរបស់តារាស្រីក្រុម BLACKPINK មិនមានការបញ្ជាក់ណាមួយឱ្យច្បាស់ការនោះទេ តែខាងផលិតកម្មSM បានបង្ហោះប្រាប់អ្នកគាំទ្រថា « ពួកគេបានចែករំលែកអារម្មណ៍ឱ្យគ្នាទៅវិញទៅមក ក្នុងដំណើររួមគ្នា »។

សូមជម្រាបថា បើទោះបីជាខាងផលិតកម្មធំទាំងពីរកំពុងប្រកួតប្រជែងទីផ្សារសិល្បៈគ្នាយ៉ាងក្ដៅគគុកក៏ដោយ សង្ឃឹមអ្នកទាំងអស់គ្នានឹងទទួលយករឿងមួយនេះ ត្រូវយល់ពីអារម្មណ៍របស់ពួកគាត់ ព្រោះពួកគាត់ក៏ជាមនុស្សដូចពួកយើង ពួកគាត់ក៏ចេះមានស្នេហា យើងដឹងហើយគ្មាននរណាម្នាក់អាចហាមអារម្មណ៍រស់ខ្លួនឯងបានទេ ដូចនេះបើយើងពិតជាស្រលាញ់ពួកគាត់ មិនចង់ឱ្យពួកគាត់ពិបាកចិត្ត ចង់ឃើញពួកគាត់មានក្ដីសុខ ត្រូវតែលើកទឹកចិត្តនិងគាំទ្រពួកគាត់គ្រប់រូបភាព។ នេះបើតាមសម្ដីអ្នកគាំទ្ររបស់តារាចម្រៀងទាំងពីរនេះបាននិយាយ៕

January 2, 2019

គួរត្រៀមអ្វីខ្លះដើម្បីអភិវឌ្ឍជីវិតសម្រាប់ឆ្នាំថ្មី?

ពីមួយឆ្នាំទៅមួយឆ្នាំ ពេលវេលាចេះតែដើរទៅមុខ ស្របពេលមនុស្សខ្លះក៏បានអភិវឌ្ឍកាន់តែខ្លាំងឡើងៗពីមួយឆ្នាំទៅមួយឆ្នាំទៅដែរ តែមនុស្សខ្លះទៀតនៅទ្រឹងដដែល ហើយជួបនឹងបញ្ហា និងឧបសគ្គក្នុងជីវិតកាន់តែច្រើនឡើងៗទៅវិញ។

លោក កែវ ឡង់ឌី អគ្គនាយកក្រុមហ៊ុន ស្រមោច Trading Solution បានលើកឡើងថា ប្រសិនបើចង់ឱ្យមានការអភិវឌ្ឍបានល្អ លុះត្រាតែយើងកំណត់គោលបំណងឱ្យបានជាក់លាក់សម្រាប់ជីវិត។ រយៈពេលពីមួយឆ្នាំទៅមួយឆ្នាំមានការប្រែប្រួលលឿនណាស់ ហើយពេលវេលាក៏មិនរង់ចាំមនុស្សដែរ ហេតុនេះប្រសិនបើយើងមិនព្យាយាមឱ្យបានខ្លាំងក្លាទេ យើងប្រាកដជាស្តាយក្រោយមិនខាន។ សម្រាប់ឆ្នាំថ្មីនេះអ្នកគ្រប់គ្នាគួរតែរៀបចំគោលដៅដោយប្រើប្រាស់ SMART GOAL មានន័យថាគោលដៅចាំបាច់ត្រូវតែមានភាពឆ្លាតវៃ។

ពាក្យថា SMART នេះគឺជាការបញ្ចូលគ្នានូវពាក្យសំខាន់ៗជាច្រើនដែលជាធាតុផ្សំធ្វើឱ្យយើងសម្រេចគោលដៅបាន។ ចំណុចដំបូង គឺគោលដៅត្រូវតែមានភាពច្បាស់លាស់ (Specific) ព្រោះប្រសិនបើគ្មានភាពច្បាស់លាស់ទេ យើងនឹងអាចវង្វេង ហើយបោះបង់ចោលក្នុងពេលណាមួយ ដោយសារតែគោលដៅរបស់យើងមិនផ្តោតចំចំណុចណាមួយឱ្យជាក់លាក់។ ចំណុចសំខាន់មួយទៀត គឺគោលដៅត្រូវតែអាចវាស់វែងបាន (Measurable) ព្រោះប្រសិនបើយើងដាក់គោលដៅវែងឆ្ងាយពេក នោះយើងនឹងត្រូវរត់តាមគោលដៅនោះទាំងអស់សង្ឃឹម ហើយនឿយហត់បំផុត ព្រោះមិនបានដឹងពីចំណុចបញ្ចប់ដែលយើងចង់ទៅដល់នោះ។

លោក កែវ ឡង់ឌី បាននិយាយថា៖ “គោលដៅមិនមែនចេះតែកំណត់នោះទេ ព្រោះប្រសិនបើមិនកំណត់ឱ្យបានត្រឹមត្រូវ និងមានការតាំងចិត្តឱ្យបានច្បាស់លាស់ទេនោះ យើងនឹងក្លាយជាអ្នកកុហកខ្លួនឯងម្តងហើយម្តងទៀតមិនខាន។ អ្នកខ្លះកំណត់គោលដៅច្រើនរាប់មិនអស់ ហើយគាត់មិនអាចសម្រេចទាំងអស់ ព្រោះគាត់អនុវត្តបានតែក្នុងរយៈពេលខ្លី ហើយឈោងចាប់គោលដៅផ្សេងៗទៀត”។

ស្ថាបនិកក្រុមហ៊ុនខាងលើបានលើកឡើងផងដែរថា ដើម្បីធានាថាការកំណត់គោលដៅអាចទទួលបានជោគជ័យ មនុស្សម្នាក់ៗត្រូវកំណត់គោលដៅដោយធានាថា គោលដៅនោះអាចទៅរួច (Attainable) ព្រោះប្រសិនបើយើងកំណត់វាធំហួសហេតុពេករហូតមិនអាចទៅរួច នោះយើងបានត្រឹមតែឈឺចាប់ ឬសោកសៅឥតប្រយោជន៍តែប៉ុណ្ណោះ។ ដូចជាមិនអាចនៅពេលដែលកំពុងធ្វើជាគណនេយ្យករសុខៗ ក៏ស្រាប់តែទៅដាក់គោលដៅថាចង់ធ្វើជាវិស្វករពូកែនោះទេ ព្រោះវាខុសគ្នាឆ្ងាយពេក តែអ្នកទាំងអស់គ្នាអាចដាក់គោលដៅណាដែលផ្តល់ភាពអភិវឌ្ឍដល់យើងបច្ចុប្បន្ន ឬបន្ថែមភាពល្អប្រសើរដល់ការរស់នៅឱ្យកាន់តែខ្លាំងឡើងជាដើម។ ចំណុចចុងក្រោយគឺអ្នកកំណត់គោលដៅក៏ចាំបាច់ត្រូវកំណត់ពេលវេលាជាក់លាក់ពីគម្រោងលម្អិតនីមួយៗ (Time Based)ផងដែរ ដើម្បីជាការលើកទឹកចិត្តឱ្យយើងម្នាក់ៗមានថាមពលកាន់តែខ្លាំង។ នៅពេលយើងកំណត់ពេលវេលាជាក់លាក់នៃគោលដៅល្អិតៗរួចហើយ យើងអាចនឹងដឹងយ៉ាងច្បាស់ពីពេលវេលា និងដំណាក់កាលដែលយើងនឹងសម្រេចបានឆ្ពោះទៅគោលដៅដែលយើងបានកំណត់ទុកមិនខាន។

លោក Christopher Lee ស្ថាបនិកអង្គការ HEDC អន្តរជាតិ បានលើកឡើងថា មនុស្សម្នាក់ៗចាំបាច់ត្រូវតែថ្លឹងថ្លែងពីភាពជោគជ័យ និងសុភមង្គលឱ្យបានច្បាស់លាស់ ប្រសិនបើចង់ចាប់ផ្តើមឱ្យជីវិតកាន់តែប្រសើរឡើង។ ហេតុនេះពេលកំណត់គោលដៅ ឬដាក់ផែនការជីវិតក៏ត្រូវតែយល់ឱ្យច្បាស់ថា ជីវិតមនុស្សមិនមែនត្រូវការតែផ្នែកណាមួយ ដូចជាហិរញ្ញវត្ថុ ឬត្រូវការតែភាពជោគជ័យនោះទេ តែវាត្រូវរួមបញ្ចូលគ្នានូវក្តីស្រឡាញ់ សុខភាពល្អ ចំណេះដឹង និងសុភមង្គលពិតប្រាកដផងដែរ។ ការគិតគូរខ្លាំងពេកលើបញ្ហាហិរញ្ញវត្ថុ អាចជោគជ័យតែផ្នែកខ្លះក្នុងជីវិត តែអាចធ្វើឱ្យយើងបាត់បង់ផ្នែកជាច្រើនផ្សេងទៀតដែលជីវិតត្រូវការ។

លោក Christopher lee បាននិយាយថា៖“ក្រោយពេលគិតគូរបានល្អិតល្អន់ហើយ វិធីសំខាន់ដែលធ្វើឱ្យយើងទទួលបាននូវអ្វីដែលយើងចង់បាននោះ គឺការអនុវត្ត តែការធ្វើឱ្យក្តីស្រមៃក្លាយជាការពិតនោះ ក៏ទាមទារឱ្យមានវិធីសាស្រ្តល្អដើម្បីសម្រេចវាឱ្យបានផងដែរ”។

អ្នកជំនាញខាងអភិវឌ្ឍន៍ធនធានមនុស្សខាងលើបានលើកឡើងថា ពេលខ្លះយើងគិតថា ទាល់តែយើងជឿលើគោលដៅរបស់យើងទើបយើងអាចសម្រេចវាបាន តែពេលខ្លះប្រសិនបើអ្នកមិនទាន់ជឿលើគោលដៅក៏អាចសម្រេចបានដែរ ដែលនោះគឺការផ្តោត ព្រោះនៅពេលមនុស្សណាម្នាក់ផ្តោតសំខាន់ ហើយចង់បានរបស់ណាមួយយ៉ាងជាក់លាក់នោះ យើងនឹងព្យាយាមស្វែងរកវិធីគ្រប់បែបយ៉ាងដើម្បីធ្វើវាឱ្យបាន បើទោះបីជារឿងខ្លះយើងមិនដែលជឿថា យើងអាចធ្វើវាបានក៏ដោយ។ ភាពស្មោះត្រង់ជាមួយគោលដៅ ហើយស្រឡាញ់គោលដៅនោះឱ្យបានខ្លាំងបំផុតតាមអាចធ្វើទៅបាន អាចជំរុញយើងឱ្យមានថាមពលកាន់តែខ្លាំងដើម្បីសម្រេចវា៕

January 2, 2019

លោក Emery បារម្ភពីភាពទន់ខ្សោយនៅតំបន់ការពាររបស់ Arsenal ទោះផ្តួល Fulham

លោក Unai Emery អ្នកចាត់ការទូទៅរបស់ក្រុម Arsenal បានសម្តែងនូវការរីករាយចំពោះតំបន់ប្រយុទ្ធរបស់ក្រុមលោក ក្រោយពីបានយកឈ្នះលើក្រុម Fulham ក្នុងលទ្ធផល 4-1 កាលពីថ្ងៃអង្គារ ប៉ុន្តែបានទទួលស្គាល់ថា តំបន់ការពាររបស់ពួកគេត្រូវមានការកែសម្រួលលើចំណុចជាច្រើន។

គ្រាប់បាល់ស៊ុតបញ្ចូលទីទាំងនោះបានជួយឲ្យក្រុម Arsenal ដណ្តើមបានជ័យជម្នះដ៏ងាយលើក្រុម Fulham ដែលមិនបានបង្ហាញពីទម្រង់លេងមិនបានល្អឡើយពេលលេងក្រៅដី ហើយជ័យជម្នះនេះពិតជាសំខាន់សម្រាប់ក្រុមរបស់លោក Emery ក្នុងការរក្សាការជឿជាក់របស់ខ្លួន ក្រោយពីបានចាញ់ក្រុម Liverpool យ៉ាងខកចិត្តក្នុងលទ្ធផល 5-1។ ប៉ុន្តែ លោក Emery បានបញ្ជាក់ថា គ្រាប់បាល់ មិនបានបង្ហាញពីទម្រង់លេងរបស់ក្រុមទាំងមូលឡើយ។

កីឡាករ Ryan Sessegnon បានខ្ជះខ្ជាយឱកាស2លើកយ៉ាងល្អក្នុងការជួយឱ្យ ក្រុមភ្ញៀវមានគ្រាប់បាល់នាំមុខមុននៅរយៈពេល 20នាទីដំបូង ហើយការរកបានគ្រាប់បាល់នាំមុខមុន នឹងផ្តល់ការលំបាកដល់ក្រុម Arsenal។ ប៉ុន្តែ ផ្ទុយទៅវិញ ការទន់ខ្សោយក្នុងតំបន់ការពាររបស់ក្រុម Fulham បានអនុញ្ញាតឱ្យខ្សែបម្រើ Granit Xhaka រកបានគ្រាប់បាល់ ក្រោយពីការបញ្ជូនបាល់ពីសំណាក់កីឡាករ Alex Iwobi នៅនាទី ទី25 ហើយក្រុម Arsenal កម្របានជួបបញ្ហាណាស់ បន្ទាប់ពីគ្រាប់បាល់នោះ។

លោក Emery បានឲ្យដឹងថា៖ «ការប្រជែងរបស់យើងនាពេលបច្ចុប្បន្ន គឺការធ្វើឲ្យតំបន់ការពារមានភាពល្អប្រសើរឡើង។ យើងពិតជារីករាយជាមួយនឹងកីឡាករនៅតំបន់ប្រយុទ្ធ តាមរយៈការស៊ុតបាល់បញ្ចូលទីជាច្រើនដូចនៅថ្ងៃនេះអ៊ីចឹង»។

គ្រូបង្វឹករូបនេះបានបន្ថែមទៀតថា៖ «ប៉ុន្តែ យើងត្រូវការតុល្យភាពបន្ថែមទៀតនៅតំបន់ការពារ យើងត្រូវតែធ្វើការ ត្រៀមសម្រាប់ពាក់កណ្តាលរដូវកាលចុងក្រោយ ហើយយើងត្រូវតែលេងឲ្យបានល្អផ្នែកបច្ចេកទេស»៕

ប្រភពពី៖ Channel News Asia

January 2, 2019

ឆ្នាំ2018 ក្រសួងពាណិជ្ជកម្មរកចំណូលបានច្រើន តែត្រូវសម្រួលការធ្វើពាណិជ្ជកម្ម និងរក្សាបរិយាកាសវិនិយោគឱ្យល្អ

ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជំរុញឱ្យក្រសួងពាណិជ្ជកម្មខិតខំធ្វើកំណែទម្រង់លើវិស័យជាច្រើនទៀត ដើម្បីសម្រួលការធ្វើការពាណិជ្ជកម្ម និងរក្សាបាននូវបរិយាកាសវិនិយោគល្អក្នុងប្រទេសកម្ពុជា។ ព្រោះថា ក្រសួងពាណិជ្ជកម្មពិតជាបានចូលរួមចំណែកយ៉ាងសកម្មក្នុងការរក្សាបាននូវកំណើនសេដ្ឋកិច្ចកម្ពុជាក្នុងរង្វង់ប្រហែល 7% ក្នុងមួយឆ្នាំ។ ជាក់ស្តែង ប្រាក់ចំណូលជិត 82លានដុល្លារ ជាទឹកប្រាក់ដែលក្រសួងពាណិជ្ជកម្មកម្ពុជារកបានក្នុងឆ្នាំ2018 ពីអគ្គនាយកដ្ឋានកាំកុងត្រូល និងសេវាសាធារណៈ។

របាយការណ៍ក្រសួងពាណិជ្ជកម្មកម្ពុជាបានបង្ហាញថា អគ្គនាយកដ្ឋានកាំកុងត្រូលដែលជាសេនាធិការបស់ក្រសួងពាណិជ្ជកម្ម រកបានចំណូល 28.75លានដុល្លារពីសេវាត្រួតពិនិត្យគុណភាពទំនិញ ដែលតួលេខនេះកើនឡើង 12.92% បើធៀបនឹងឆ្នាំមុន។ ក្រសួងក៏រកបានប្រាក់ចំណូលប្រមាណ 52.78លានដុល្លារពីសេវាសាធារណៈផងដែរ។ របាយការណ៍នេះក៏បានបង្ហាញផងដែរពីការចំណាយរបស់ក្រសួងដែលមានចំនួន 27.11លានដុល្លារ។

របាយការណ៍បានបង្ហាញទៀតថា ក្រុមហ៊ុន Green Trade ដែលគ្រប់គ្រងដោយរដ្ឋ រកប្រាក់ចំណូលបាន 2.89លានដុល្លារ ខណៈការចំណាយទៅវិញរបស់ក្រុមហ៊ុននេះមានចំនួន 2.75លានដុល្លារ ដែលធ្វើឱ្យប្រាក់ចំណេញបានពីក្រុមហ៊ុនរដ្ឋមួយនេះក្នុងឆ្នាំ2018 មានចំនួន 13,7000ដុល្លារប៉ុណ្ណោះ។ ក្រុមហ៊ុននេះបានធ្វើពាណិជ្ជកម្មជាមួយក្រុមហ៊ុន COFCO មកពីប្រទេសចិនដែលបាននាំចេញអង្ករចំនួន 1,000 តោនទៅចិន និងបានលក់ឱ្យអង្គការ WFP ចំនួន 3,700 តោន ក្នុងឆ្នាំ2018។

ឯកឧត្ដមឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងសង្កត់ធ្ងន់ថា “ខ្ញុំសូមលើកទឹកចិត្ត និងផ្តល់នូវការគាំទ្រដល់ឯកឧត្តម ប៉ាន សូរស័ក្តិ និងថា្នក់ដឹកនាំក្រសួងពាណិជ្ជកម្មទាំងអស់ឱ្យបន្តនូវកិច្ចខិតខំប្រឹងប្រែងធ្វើកំណែទម្រង់លើវិស័យជាច្រើនទៀតសំដៅសម្រួលដល់ការធ្វើពាណិជ្ជកម្ម និងរក្សាបាននូវបរិយាកាសវិនិយោគល្អនៅកម្ពុជាក្នុងរបត់ថ្មីនៃការប្រែប្រួលប៉ូលសេដ្ឋកិច្ចពិភពលោក និងពាណិជ្ជកម្មអន្តរជាតិ”។

ឯកឧត្តមបន្តថា ក្នុងឆ្នាំ2018នេះ តាមការប៉ាន់ស្មានជាបឋមរបស់រដ្ឋាភិបាល អត្រាកំណើនសេដ្ឋកិច្ចរបស់កម្ពុជានឹងសម្រេចបានក្នុងរង្វង់ 7.3% ដែលកំណើននេះទទួលបានពីការកើនឡើងយ៉ាងរឹងមាំនៃវិស័យសំណង់ ការបន្តកើនឡើងនៃវិស័យកាត់ដេរ និងការនាំចេញកំណើនជាមធ្យមទទួលបានពីវិស័យកសិកម្ម ការងើបឡើងយ៉ាងខ្លាំងនៃវិស័យទេសចរណ៍ និងកំណើននៃវិស័យលក់ដុំ-លក់រាយ ព្រម-ទាំងវិស័យបន្ទាប់បន្សំដទៃទៀតផងដែរ។

ទាក់ទងនឹងវិស័យពាណិជ្ជកម្ម កម្ពុជាបានបើកទីផ្សារ និងនាំចេញទំនិញទៅកាន់ 147ប្រទេស ក្នុងទំហំធំជាង 60% នៃផ.ស.ស (ផលិតផលក្នុងស្រុកសរុប) និងនាំចូលទំនិញមកបម្រើការផលិត និងប្រើប្រាស់ពី 135ប្រទេសក្នុងទំហំប្រមាណ 65% នៃផ.ស.ស ផងដែរ។

សភាពាណិជ្ជកម្មកម្ពុជាបានឱ្យដឹងថា ប្រាក់ចំណូលដែលក្រសួងពាណិជ្ជកម្មកម្ពុជារកបានក្នុងឆ្នាំ2018នេះ គឺជាប្រភពដ៏សំខាន់ក្នុងការជំរុញសេដ្ឋកិច្ចជាតិ ដែលជាផ្នែកមួយនៃចំណូលពន្ធ។ ឯកឧត្តម លឹម ហេង អនុប្រធានសភាពាណិជ្ជកម្មកម្ពុជាថ្លែងថា៖“វាផ្ដល់ប្រយោជន៍កាន់តែច្រើនដល់សេដ្ឋកិច្ចរបស់យើង ក្រសួងពាណិជ្ជកម្ម គឺជាអ្នកដើរតួនាទីដ៏សំខាន់ក្នុងការទាក់ទាញក្រុមវិនិយោគិន និងជំរុញលំហូរចូលពាណិជ្ជកម្មពីក្រៅប្រទេស និងពាណិជ្ជកម្មនៅក្នុងប្រទេស”។

ឯកឧត្តម លឹម ហេង បានបន្តថា៖ ”ប្រាក់ចំណូលបានពីសេវាសាធារណៈ មានន័យថា លំហូរចូលក្រុមហ៊ុនចុះបញ្ជីបានកើនឡើង ដូច្នេះនិន្នាការសេដ្ឋកិច្ចរបស់យើងរក្សាបានកាន់តែប្រសើរឡើងៗ ដោយសារប្រតិបត្ដិករនៅក្នុងវិស័យនេះគោរពតាមច្បាប់”។

អ្នកតាមដានស្ថានការណ៍សេដ្ឋកិច្ចកម្ពុជា លោកអគ្គនាយកក្រុមហ៊ុន ហ្វ័រតេ បានប្រាប់ឡារ៉ែនពាណិជ្ជឱ្យដឹងថា ចំនួនប្រាក់ចំណូល គឺជាសញ្ញាល្អសម្រាប់ក្រសួងពាណិជ្ជកម្ម ប៉ុន្តែក្រសួងគួរតែជំរុញបនែ្ថមទៀតនូវសេវាសាធារណៈឱ្យកាន់តែមានប្រសិទ្ធភាពបន្ថែមទៀត ដើម្បីបង្កើនទំនុកចិត្តសម្រាប់សាធារណជន។ ព្រោះចំណូលវាមិនមែនជាសូចនាករសម្រាប់បញ្ជាក់នូវកំណើនសេដ្ឋកិច្ចនោះទេ វាគ្រាន់តែជាចំណូលបន្ទាប់បន្សំ មិនអាចធ្វើជារង្វាស់រង្វាល់មួយបានទេ”។

លោក យក់ ចំរើនឫទ្ធិ អគ្គនាយកក្រុមហ៊ុនហ្វ័រតេបានបញ្ជាក់ប្រាប់ថា៖ “ប្រាក់ចំណូលដែលក្រសួងពាណិជ្ជកម្មរកបាន វាគ្រាន់តែជាការគួបផ្សំ តែវាមិនមែនជាការជំរុញនូវកំណើនសេដ្ឋកិច្ចទេក្រសួងគួរតែធ្វើការងារប្រមូលចំណូលឱ្យបានច្រើន ឱ្យគ្រប់ជ្រុងជ្រោយ ព្រោះចំណូលទទួលបានពីសេវាសាធារណៈ ជាចំណូលបន្ទាប់បន្សំ ដូច្នេះត្រូវជំរុញការប្រមូលចំណូលឱ្យមានប្រសិទ្ធភាពបន្ថែមទៀត”។

លោកអគ្គនាយកបានបន្ថែមថា៖ “ដើម្បីជំរុញសេដ្ឋកិច្ចជាតិ ក្រសួងពាណិជ្ជកម្មត្រូវរកដៃគូផ្លាស់ប្តូរពាណិជ្ជកម្មឱ្យបានច្រើន ការរកទីផ្សារក៏ជាការជួយរកប្រភពចំណូល និងការជំរុញផ្នែកសេដ្ឋកិច្ចរបស់ប្រទេសជាតិដែរ។ ការងារស្នូលរបស់ក្រសួងពាណិជ្ជកម្ម គឺត្រូវរកការផ្លាស់ប្តូរពាណិជ្ជកម្ម ទីផ្សារ និងដៃគូឱ្យបានច្រើន បើយើងបើកចំហទីផ្សារបានច្រើន យើងមានទំនាក់ទំនងដៃគូពាណិជ្ជកម្មកាន់តែច្រើន និងមានពាណិជ្ជកម្មកាន់តែធំ ចំណូលក៏កាន់តែធំ ដែលអាចជួយជំរុញកំណើនសេដ្ឋកិច្ចជាតិបានកាន់តែខ្លាំង”៕

January 2, 2019

សាច់ក្រកសៀមរាបមិនមែន ល្បីតែក្នុងស្រុកខ្មែរទេ តែនៅបរទេសក៏មានតម្រូវការខ្ពស់ដែរ

នៅពេលគេនិយាយពីរឿងសាច់ក្រក គេតែងនឹកឃើញដល់សាច់ក្រកសៀមរាប ដោយគេនាំគ្នានិយាយថា វាមានរសជាតិឆ្ងាញ់លើសពីសាច់ក្រកមកពីខេត្តផ្សេងៗទៀតនៅកម្ពុជាយើង ហើយនៅពេលគេធ្វើដំណើរទៅកម្សាន្ត និងត្រឡប់មកពីខេត្តសៀមរាបវិញ គេតែងទិញយកមកទុកទទួលទាននៅផ្ទះ ហើយខ្លះថែមទាំងទិញសម្រាប់ផ្ញើទៅបងប្អូននៅក្រៅប្រទេសទៀតផង។

លោក យ៉ែម ស្រ៊ុន អ្នកគ្រប់គ្រងទូទៅនៃសិប្បកម្ម លី ធាងសេង ដែលមានទីតាំងនៅភូមិវិហារចិន សង្កាត់ស្វាយដង្គុំ ក្រុងសៀមរាប មានប្រសាសន៍ថា សិប្បកម្មរបស់លោកចាប់ផ្តើមឡើង តាំងពីសម័យក្រោយឆ្នាំ1979 មកម៉្លេះប៉ុន្តែកាលនោះបង្កើតឡើងជាលក្ខណៈគ្រួសារ មិនទាន់មានការផលិតក្នុងទ្រង់ទ្រាយធំដូចសព្វថ្ងៃនេះទេ។ រហូតឆ្នាំ80ប្លាយ ទើបក្រុមគ្រួសារសម្រេចចិត្តចុះបញ្ជីនៅក្រសួងពាណិជ្ជកម្មជាផ្លូវការ និងពង្រីកចង្វាក់ផលិតកម្មឱ្យបានកាន់តែច្រើន សម្រាប់ចែកចាយនៅលើទីផ្សារទូទាំងប្រទេស។

ទីផ្សារដែលទទួលបានការកុម្ម៉ង់ទិញច្រើនជាងគេនាពេលបច្ចុប្បន្ននេះ គឺទីក្រុងភ្នំពេញ និងបន្ទាប់មកគឺ ប្រជាពលរដ្ឋដែលនៅតាមបណ្តាខេត្តផ្សេងៗទៀត ដែលពួកគាត់ទិញសម្រាប់ទុកទទួលទានជាលក្ខណៈក្រុមគ្រួសារ ឬយកទៅលក់បន្តនៅតាមទីប្រជុំជនផ្សេងៗ ហើយប្រជាជនមួយចំនួនទៀតបានទិញផ្ញើបងប្អូននៅក្រៅប្រទេស មានដូចជាប្រទេសអាមេរិក បារាំង ជប៉ុន កូរ៉េ កាណាដា អូស្ត្រាលីជាដើម។

អ្នកមើលការខុសត្រូវក្នុងសិប្បកម្មខាងលើបន្តថា ក្នុងមួយថ្ងៃមានអតិថិជនកុម្ម៉ង់ទិញប្រហែលជា100គីឡូក្រាមគិតជាមធ្យម ទាំងសាច់ក្រកធ្វើពីសាច់គោ និងសាច់ក្រកធ្វើពីសាច់ជ្រូក គឺមានការកុម្ម៉ង់ទិញប្រហាក់ប្រហែលគ្នា។

អ្វីដែលធ្វើឱ្យសាច់ក្រកសៀមរាបមានការគាំទ្រច្រើននៅលើទីផ្សារដូចនេះ គឺដោយសារផលិតផលមានគុណភាពល្អ ទិញសាច់ស្រស់ៗមកផលិត មិនទិញសាច់ក្លាស្សេ ឬសាច់សល់ និងផលិតឡើងដោយដាក់តែសាច់សុទ្ធៗ មិនលាយខ្លាញ់ និងសម្រិតសម្រាំងគុណភាព អនាម័យ មិនលាយជាមួយម្សៅ ឬដាក់ថ្នាំរក្សាគុណភាពឱ្យទុកបានយូរ នាំឱ្យប៉ះពាល់សុខភាពអ្នកបរិភោគនោះទេ។ សម្រាប់ប្រជាពលរដ្ឋដែលទិញទុកយូរ អាចយកទៅដាក់ក្នុងទូទឹកកកក្នុងកន្លែងកក នឹងអាចរក្សាទុកបានដល់ទៅ 1ឆ្នាំ និងបើទុកក្នុងកន្លែងត្រជាក់ធម្មតា អាចរក្សាទុកបានដល់ 1ខែ ប៉ុន្តែយ៉ាងណាក៏ដោយ ការក្លាស្សេសាច់ក្រកទុកយូរពេក ក៏មិនសូវមានរសជាតិឆ្ងាញ់ដូចញ៉ាំភ្លាមៗនោះទេ។

លោក ស្រ៊ុន បានបង្ហើបឱ្យដឹងពីវិធីសាស្ត្រធ្វើសាច់ក្រកនេះថា គ្មានអ្វីដែលលំបាកនោះទេ គ្រាន់តែយើងទិញសាច់ល្អៗមកពីផ្សារ ហើយយកមកលាងទឹកសម្អាតឱ្យស្អាត រួចទុកចោលឱ្យស្ងួតទឹកល្អហើយសឹមយកទៅដាក់ក្នុងម៉ាស៊ីនកិនសាច់ឱ្យម៉ដ្ឋ បន្ទាប់មកទើបយើងចាប់ផ្តើមលាយគ្រឿងទេសចូល ដែលរួមមាន អំបិល ស្ករ ប៊ីចេង បន្ថែមរសជាតិដោយខ្ទឹមសតិចតួច ដែលគិតថាសមល្មមមានរសជាតិឈ្ងុយឆ្ងាញ់ ហើយទើបយកមកច្រកក្នុងពោះវៀនជ្រូកដែលលាងស្អាតរួចជាស្រេច ឬថង់ច្រកដែលគេផលិតពីពពុះសណ្តែក(អាចហូបបាន) រួចយកទៅដាក់ចូលឡសម្ងួតឱ្យស្ងួតល្អ ដែលគេអាចប្រើឡធម្មជាតិដុតដោយធ្យូងក៏បាន ឬសម្ងួតក្នុងឡអគ្គិសនីក៏បានដែរ ប៉ុន្តែមិនត្រូវប្រើភ្លើងខ្លាំងបង្ខំឱ្យឆាប់ស្ងួតនោះទេ ពោលគឺត្រូវដុតភ្លើងតិចៗដែលជាទូទៅគេត្រូវប្រើពេលសម្ងួតដល់ទៅ 3ថ្ងៃឯណោះ ទើបអាចយកទៅលក់នៅលើទីផ្សារបាន និងអាចរក្សាទុកបានច្រើនថ្ងៃទៀតផង។ លោកបានបញ្ជាក់ថា បច្ចុប្បន្នសិប្បកម្មផលិតសាច់ក្រក លី ធាង សេង មានបុគ្គលិក-កម្មករប្រមាណជា3 ទៅ 4នាក់ប៉ុណ្ណោះ ដោយអាចផលិតសាច់ក្រកលក់បានជាង 100គីឡូក្រាមជារៀងរាល់ថ្ងៃ។

នៅថ្ងៃអនាគត សិប្បកម្មខាងលើនឹងពង្រីកឱ្យកាន់តែធំថែមទៀត ដោយសម្រិតសម្រាំងទៅលើគុណភាព អនាម័យ និងសោភណភាពសម្បកវេចខ្ចប់ជាដើម ដើម្បីដាក់លក់នៅក្នុងផ្សារទំនើប និងសម្រាប់នាំចេញទៅលក់នៅទីផ្សារបរទេសថែមទៀត។

អតិថិជនដែលទិញយកទៅលក់បន្តម្នាក់ អ្នកស្រី ពឹង ស៊ូលី ជាអាជីវករនៅក្នុងផ្សារទីរួមខេត្តក្រចេះបានលើកឡើងថា ដោយសារសាច់ក្រកសៀមរាបមានរសជាតិឆ្ងាញ់ និងមានការគាំទ្រពីអតិថិជនស្រាប់ អ្នកស្រីបានទិញយកទៅលក់បន្តនៅទីនោះ ហើយក៏មានការកុម្ម៉ង់ទិញច្រើនគួរសមដែរ ដោយក្នុងមួយថ្ងៃអ្នកស្រីអាចលក់ចេញបានប្រមាណជា 10គីឡូក្រាមគិតជាមធ្យម។ អ្នកស្រីបន្ថែមថា តាមពិតទៅ អ្នកទិញសាច់ក្រកនេះមិនមែនសុទ្ធតែជាអ្នកខេត្តក្រចេះទេ ប្រជាពលរដ្ឋនៅខេត្តជិតៗនោះ ដូចជារតនគីរី ស្ទឹងត្រែង កំពង់ចាមជាដើម ក៏មានការកុម្ម៉ង់ទិញតាមអនឡាញជារៀងរាល់ថ្ងៃផងដែរ៕

January 2, 2019

វិស័យអចលនទ្រព្យ និងសាងសង់ ពេញមួយឆ្នាំ 2018 ទទួលបានទុនវិនិយោគជាង$5ពាន់លាន

ការសាងសង់នៅកម្ពុជា ពេញមួយឆ្នាំ2018នេះ មានប្រមាណជា 2,867គម្រោង ជាមួយនឹងទុនវិនិយោគប្រមាណជាង 5,200លានដុល្លារអាមេរិក(5,228,992.522)ដែលគម្រោងសំណង់ទាំងនោះសាងសង់លើផ្ទៃដីចំនួន 11,427,190ម៉ែត្រការ៉េ។ នេះបើយោងតាមរបាយការណ៍សន្និបាតរបស់ក្រសួងរៀបចំដែនដី នគរូបនីយកម្ម និងសំណង់។

របាយការណ៍បានបញ្ជាក់ថា គម្រោងសំណង់នៅឆ្នាំ2018 មានការថយចុះជិត 19% បើធៀបនឹងឆ្នាំ2017 ដែលមានគម្រោងសាងសង់រហូតដល់ទៅ 3,052គម្រោង ជាមួយទុនវិនិយោគប្រមាណ 6,428,794.179ដុល្លារអាមេរិក។

របាយការណ៍នេះក៏បានឱ្យដឹងផងដែរថា គម្រោងសាងសង់ទាំងនេះស្ថិតក្រោមសមត្ថកិច្ចរបស់ក្រសួងមានចំនួន 245គម្រោង មានទុនវិនិយោគប្រមាណ 4,829,173.854ដុល្លារ ហើយស្ថិតក្រោមសមត្ថកិច្ចសាលារាជធានី-ខេត្តចំនួន 2,622គម្រោង ជាមួយទុនវិនិយោគប្រមាណ 399,818,668ដុល្លារ។

សំណង់លំនៅឋានសរុបក្នុងឆ្នាំ2018 មានចំនួន2.420គម្រោង ជាមួយទុនវិនិយោគប្រមាណ 1, 835,416.912ដុល្លារ ស្មើនឹង 18,471ខ្នង ហើយអគារខ្ពស់ៗចាប់ពី 5ជាន់ឡើងនៅរាជធានីភ្នំពេញក្នុងឆ្នាំ2018 មានចំនួន 110អគារ។ ដោយឡែកបណ្ដុំលំនៅឋានមានលក្ខណៈបុរីនៅរាជធានីភ្នំពេញក្នុងឆ្នាំ2018 មានចំនួន 28ទីតាំង។

តាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ដដែល បានអះអាងថាគិតចាប់ពីឆ្នាំ2000 ដល់ខែវិច្ឆិកា ឆ្នាំ2018 ក្រសួងបានចេញលិខិតអនុញ្ញាតសាងសង់បានចំនួន43,136គម្រោង ដែលមានផ្ទៃក្រឡាសំណង់សរុបចំនួន 114,297,621ម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ 43,370,423.378ដុល្លារ។ ជាមួយគ្នានោះដែរក្រសួងរៀបចំដែនដី នគរូបនីយកម្ម និងសំណង់ក៏ប្រមូលបានចំណូលប្រមាណ 390,476,442.711រៀល ឬស្មើនឹងជិត 98លានដុល្លារអាមេរិកដែលចំណូលនេះបានមកពីសេវាសុរិយោដី សេវាសំណង់ពីការជួលទីតាំងរោងចក្រ សហគ្រាស និងបានពីពន្ធលើការផ្ទេរអចលនទ្រព្យដែលប្រមូលនៅអង្គភាពពន្ធដារ។

ដោយឡែកលោកប្រធានសមាគមអ្នកវាយតម្លៃ និងភ្នាក់ងារអចលនវត្ថុ បានបញ្ជាក់អំពីការចុះបញ្ជីនៃគម្រោងសាងសង់ខាងលើថា ចំនួនគម្រោងនៃអចលនទ្រព្យខាងលើ វាគ្រាន់តែជាតួលេខនៃការចាប់ផ្តើមគម្រោងតែប៉ុណ្ណោះ ពីព្រោះគម្រោងនីមួយៗជួនកាលម្ចាស់គម្រោងបានចុះបញ្ជីរួចហើយ តែគាត់ពុំបានសាងសង់ភ្លាមៗទេ គាត់អាចសាងសង់នៅខែក្រោយ ឬឆ្នាំក្រោយ ឬពេលវេលាណាមួយសមស្របសម្រាប់គាត់។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុទើបជាប់ឆ្នោតថ្មី បានមានប្រសាសន៍ពីបញ្ហានេះថា៖ “ដូច្នេះតាមទស្សនៈរបស់ខ្ញុំ ការចុះបញ្ជីគ្រាន់តែជាតួលេខនៃការចាប់ផ្តើម បើគាត់ចុះបញ្ជីហើយគាត់មានបំណងឆន្ទៈពិតប្រាកដដើម្បីវិនិយោគ ហើយគាត់ថាសាងសង់ ឬចាប់ផ្តើមនៅពេលណាយើងមិនដឹងច្បាស់ទេ”។

លោកបានបន្តទៀតថា តួលេខនៃការចុះបញ្ជីច្រើន ឬតិច គ្រាន់តែជាតួលេខចាប់ផ្តើមតែអ្វីពិតប្រាកដ គឺការអនុវត្តគម្រោង។ បើយើងមានតួលេខដែលចុះបញ្ជីមានចំនួនប៉ុន្មាន? ឧទាហរណ៍ចំនួន100 ហើយយើងអនុវត្តបាន90 ដូច្នេះនៅសល់តែ10ទេ។ ហេតុនេះការចុះបញ្ជីជាបំណង តែផុតពីនេះគាត់ចាប់ផ្តើមនៅពេលណា យើងត្រូវមើលលើការអនុវត្ត ព្រោះគម្រោងខ្លះអាចត្រូវពន្យារពេល វាអាស្រ័យលើពេលវេលាជាក់ស្តែង និងបើឱ្យតួលេខចុះបញ្ជីឆ្នាំហ្នឹង ត្រូវនឹងតួលេខអនុវត្តគម្រោងឆ្នាំហ្នឹងតែម្តង វាមិនត្រូវទេ។

លោក សុខនីម បានបន្ថែមថា យើងមិនមានការព្រួយបារម្ភពីតួលេខដែលខុសគ្នាតិចតួចនោះទេ យើងទទួលស្គាល់ថា វាអាចមានគម្រោងដែលអាចចុះបញ្ជីហើយ តែត្រូវបានពន្យារពេល តែក៏បានសាងសង់ជាបន្ត ដូចដែលយើងបានមើលឃើញពីការកើនឡើងក្នុងវិស័យនេះ និងគម្រោងដែលបានចុះបញ្ជីហើយ និងបានបញ្ចប់គម្រោង តែខ្លះក៏នៅបន្តគម្រោងពុំទាន់បញ្ចប់ក៏មានដែរ៕

January 2, 2019

Category: សង្គម និងសេដ្ឋកិច្ច