គ្រឹះស្ថានមីក្រូហិរញ្ញវត្ថុដែលជាប្រតិបត្តិករផ្តល់សេវាហិរញ្ញវត្ថុដល់ប្រជាពលរដ្ឋកម្ពុជាបានបង្ហាញពីការអនាគតប្រកបដោយនិរន្តរភាពសម្រាប់ឆ្នាំ2019ខាងមុខថា វិស័យនេះនឹងនៅតែបន្តមានកំណើនដែលអាចចាត់ទុកថា មានស្ថិរភាពក្នុងការផ្តល់កម្ចីហិរញ្ញវត្ថុដែលជាតម្រូវការរបស់ពលរដ្ឋក្នុងការប្រកបរបរអាជីវកម្ម។
លោកឧកញ៉ា ហួត អៀងតុង អគ្គនាយកប្រតិបត្តិ នៃគ្រឹះស្ថានមីក្រូហិរញ្ញវត្ថុ ហត្ថាកសិករ បានប្រាប់ឡារ៉ែនពាណិជ្ជថា៖ “វិស័យមីក្រូហិរញ្ញវត្ថុប្រចាំឆ្នាំ2018នេះ មិនឃើញមានឥទ្ធិពលអវិជ្ជមានណាមួយគួរឱ្យកត់សម្គាល់ទេ យើងមានបញ្ហាតិចតួចអំពីកម្ចីឥណទាន និងការសងត្រឡប់ ដែលមានការរអាក់រអួលតិចតួច តែវានៅតែវិលមកជាធម្មតាវិញ ដោយសារតែស្ថានភាពសេដ្ឋកិច្ចរបស់ប្រទេសយើងមានស្ថិរភាពពេញលេញ ធ្វើឱ្យប្រជាពលរដ្ឋប្រកបរបររកស៊ីបានយ៉ាងសុខស្រួល”។
លោកឧកញ៉ាបានបន្តថា៖ “ដូច្នេះសម្រាប់ឆ្នាំ2018នេះ យើងឃើញថា វិស័យមីក្រូហិរញ្ញវត្ថុនៅកម្ពុជាមានការរីកចម្រើនគួរឱ្យកត់សម្គាល់។ យើងមានកំណើនក្នុងវិស័យនេះ តែមិនទាន់មានតួលេខជាក់លាក់ថាចំនួនប៉ុន្មានឱ្យប្រាកដនៅឡើយទេ ព្រោះកំពុងតែប្រមូលទិន្នន័យមកបូកសរុប“។
លោកឧកញ៉ាបានបញ្ជាក់ទៀតថា ការប្រមើលមើលរបស់ខ្ញុំអាចនិយាយបានថា សម្រាប់ឆ្នាំ2019ខាងមុខ សេដ្ឋកិច្ចរបស់ប្រទេសយើងនៅបន្តរីកចម្រើន។ ព្រោះតាមការវិភាគរបស់អ្នកសេដ្ឋកិច្ចមួយចំនួន គេនៅតែវិភាគឃើញថា សេដ្ឋកិច្ចរបស់យើងនៅតែរឹងមាំ ខ្ញុំក៏មើលឃើញដូច្នេះដូចគ្នាដែរ ហេតុនេះវិស័យមីក្រូហិរញ្ញវត្ថុ ក៏ដូចវិស័យសេដ្ឋកិច្ចទាំងមូលដែរយើងនៅតែរីកចម្រើនដដែលសម្រាប់ឆ្នាំខាងមុខ។
លោកឧកញ៉ា ហួត អៀងតុង បានមានប្រសាសន៍ទៀតថា យើងអាចនិយាយថា ប្រជាពលរដ្ឋគាត់ចេះគិតគូរបានច្រើននៅក្នុងពេលបច្ចុប្បន្ននេះ។ ការរីកចម្រើននៃវិស័យមីក្រូហិរញ្ញវត្ថុមិនទាក់ទងនឹងការផ្សព្វផ្សាយរបស់យើងទេ ទើបបានទទួលការរីកចម្រើននោះ។ ការរីកចម្រើននៃវិស័យមីក្រូហិរញ្ញវត្ថុនេះ គឺដោយសារតម្រូវការរបស់ប្រជាពលរដ្ឋមានការកើនឡើង។
លោកឧកញ៉ាបានបន្តទៀតថា ការផ្សព្វផ្សាយរបស់យើង ជាការពិត គឺគ្រាន់តែឱ្យប្រជាពលរដ្ឋបានជ្រាប និងយល់ដឹងពីសេវាកម្មរបស់យើង ឱ្យគាត់បានប្រើប្រាស់សេវាកម្មនេះដើម្បីផលប្រយោជន៍នៃអាជីវកម្មរបស់ពួកគាត់តែប៉ុណ្ណោះ។ ប៉ុន្តែសំខាន់បំផុតគឺសេចក្តីត្រូវការរបស់គាត់ បើគាត់មិនមានសេចក្តីត្រូវការទេ ទោះយើងផ្សព្វផ្សាយយ៉ាងណាក៏គាត់នឹងមិនទទួលយកដែរ។ ដូច្នេះការរីកចម្រើននៃវិស័យមីក្រូហិរញ្ញវត្ថុ គឺដោយសារប្រជាពលរដ្ឋគាត់មានតម្រូវការក្នុងការពង្រីកមុខរបរ និងអាជីវកម្មគាត់បន្ថែមហ្នឹងឯង។
លោក យុន សុវណ្ណា នាយកប្រតិបត្តិសមាគមមីក្រូហិរញ្ញវត្ថុកម្ពុជាបានប្រាប់ឡារ៉ែនពាណិជ្ជថា៖“វិស័យមីក្រូហិរញ្ញវត្ថុក្នុងឆ្នាំ2018 ហាក់ដូចជាមិនមានបញ្ហាអ្វីធំដុំគួរឱ្យកត់សម្គាល់ទេ យើងមានការរីកចម្រើននៅក្នុងកម្ចីឥណទានមានកំណើនប្រហែល30% បើប្រៀបធៀបនឹងឆ្នាំកន្លងទៅ ដោយមានអតិថិជនប្រមាណជាជិត 2លានគ្រួសារ”។
លោកនាយកប្រតិបត្តិសមាគមក៏បានឱ្យដឹងដែរថា បើគិតពីកំណើនវិញ យើងអាចវាយតម្លៃបានថាយើងនឹងអាចបញ្ចប់តួលេខកំណើនក្នុងវិស័យមីក្រូហិរញ្ញវត្ថុត្រឹម 20%-30%ប៉ុណ្ណោះ ព្រោះយើងមិនទាន់បានសរុបតួលេខពិតប្រាកដទេ។ យើងនឹងបញ្ចប់តួលេខសរុបនៅចុងឆ្នាំ ហើយយើងនឹងធ្វើសន្និបាតបូកសរុបនៅដំណាច់ខែមករា ឬដើមខែកុម្ភៈឆ្នាំ2019។
លោកបានបញ្ជាក់ថា៖ “យើងធ្លាប់មានបញ្ហារឿងការប្រមូលត្រឡប់នូវកម្ចីឥណទាន តែយើងក៏បានទទួលជាប្រក្រតីឡើងវិញដែរ កម្រិតកម្ចីដែលសង(យ៉ាងយូរត្រឹម30ថ្ងៃ)បានថយចុះទាបវិញនៅអំឡុងខែវិច្ឆិកា ធ្វើឱ្យហានិភ័យនៅសល់តិច ប្រហែលជា1.5%-1.6% ប្រហាក់ប្រហែលនឹងឆ្នាំ2017ដែរ។ បើប្រៀបធៀបឥណទានរបស់យើងទៅនឹងឥណទានក្នុងតំបន់ គុណភាពឥណទានរបស់យើងមានភាពល្អប្រសើរជាងគេច្រើន”។
លោក យុន សុវណ្ណា បានប្រាប់ឡារ៉ែនពាណិជ្ជទៀតថា៖ “ក្នុងការប្រមើលមើលទៅឆ្នាំខាងមុខ(2019)ក្នុងវិស័យមីក្រូហិរញ្ញវត្ថុ គឺអាចមានកំណើនត្រឹមប្រមាណ 20%ប៉ុណ្ណោះ ព្រោះទំហំឥណទានដែលមានកំណើនសម្រាប់ពលរដ្ឋ 2លាននាក់វាមានភាពទូលំទូលាយស្រាប់ហើយ បើគិតជាមធ្យមវាមានការឡើងដល់ចំណុចមួយដែលយើងយល់ថា ខ្ពស់ហើយ។ ដូច្នេះកំណើនឆ្នាំបន្ទាប់នេះនឹងមិនឡើងខ្ពស់ទេ គឺអាចនៅត្រឹមរង្វង់ 20% ប្រសិនបើស្ថានភាពសេដ្ឋកិច្ចនៅបន្តរីកចម្រើន និងល្អប្រសើរដូចបច្ចុប្បន្ន។
លោក សុវណ្ណា ក៏បានបញ្ជាក់ពីហានិភ័យដែរថា សម្រាប់វិស័យមីក្រូហិរញ្ញវត្ថុនេះ យើងអាចព្យាករទៅឆ្នាំខាងមុខបានថា វាអាចមានកំណើនប៉ុណ្ណឹង គឺដោយសារវាអាចមានឥទ្ធិពលពីភាពតានតឹងនៃជម្លោះពាណិជ្ជកម្មរវាងប្រទេសមហាអំណាចទាំង2 អាមេរិក និងចិន ដែលអាចមានទាំងផលអាក្រក់ និងផលល្អសម្រាប់សេដ្ឋកិច្ចរបស់យើង។ ម្យ៉ាងទៀតនោះគឺការដែលយើងមានបញ្ហាពាក់ព័ន្ធនឹង EBA ប្រព័ន្ធនៃការអនុគ្រោះពន្ធពីសហភាពអឺរ៉ុប អាចធ្វើឱ្យយើងមានបញ្ហាខាងសេដ្ឋកិច្ច និងហិរញ្ញវត្ថុដែលមិនអាចឱ្យយើងប៉ាន់ប្រមាណមុនបាន៕
