Category: សង្គម និងសេដ្ឋកិច្ច

កុំបាច់ទៅណាឆ្ងាយ ទទួលយកបទពិសោធន៍ក្រេបចន្ទទឹកឃ្មុំនៅក្នុងទឹកដីខេត្តសៀមរាបម្ដងមើល៍!
ខេត្តសៀមរាប គឺជាគោលដៅទេសចរណ៍ជាលក្ខណៈគ្រួសារល្អដាច់គេ ហើយមិនត្រឹមតែប៉ុណ្ណោះទេខេត្តមួយនេះក៏សម្បូរកន្លែងរ៉ូមែនទិកសម្រាប់គូស្វាមីភរិយាថ្មោងថ្មីផងដែរ។ ឧទ្យានបុរាណអង្គរ គឺជាទីពោរពេញទៅដោយពេលវេលារ៉ូមែនទិក ប៉ុន្តែមិនមានការរំពឹងថា អាចនឹងគេចផុតពីការរំខានរបស់ហ្វូងមហាជននោះទេ នៅឯប្រាសាទអង្គរវត្ត ឬក៏នៅប្រាសាទបាយ័ន និងប្រាសាទតាព្រហ្ម។ តែទោះជាយ៉ាងណា បើសិនជាអ្នកពេញចិត្តក្នុងការដើរផ្សងព្រេង ឬលំហែកាយនៅក្នុងព្រៃ ស្វែងរកប្រាសាទបាក់បែក នោះអ្នកនឹងរកឃើញទីតាំងប្រភេទនេះរាប់រយកន្លែងនៅខាងក្រៅឧទ្យានបុរាណអង្គរនេះ។ ជាជម្រើសអ្នកអាចជិះបាឡុង ឬឧទ្ធម្ភាគចក្រ ដើម្បីទស្សនាទេសភាពដ៏ស្រស់ត្រកាលពីលើប្រាសាទ បើទោះជាការហោះហើរលើប្រាសាទអង្គរវត្ត ត្រូវបានដាក់កំហិតក៏ដោយ។ នៅក្នុងលេខនេះទស្សនាវដ្តី ឡារ៉ែន សូមណែនាំទីឋានសួគ៌រាត្រីទឹកឃ្មុំទាំង5 នៅក្នុងទឹកដីខេត្តសៀមរាបមានដូចជា៖
1- អាហារពេលល្ងាចប្រកដដោយភាពរ៉ូមែនទិកក្នុងផ្ទះបុរាណបែបប្រពៃណីខ្មែរ

ទីក្រុងអង្គរមានជម្រើសជាច្រើនសម្រាប់ម្ហូបខ្មែរ និងម្ហូបអន្តរជាតិ ចម្អិនដោយចុងភៅជំនាញៗ ហើយបើអ្នកចង់បានភាពរ៉ូមែនទិក អ្នកអាចកក់ទុកនូវសេវាកម្មអាហារពេលល្ងាចប្រកបដោយភាពរ៉ូមែនទិក ជាលក្ខណៈប្រពៃណីខ្មែរ គឺរឹតតែមានភាពអស្ចារ្យឡើង ដោយកន្លែងទាំងនេះ មានច្រើនណាស់នៅក្នុងទឹកដីដ៏អច្ឆរិយៈមួយនេះ។
2- ការថតរូបនៅឯប្រាសាទអង្គរវត្តជាមួយអ្នកឯកទេសថតរូប

អ្នកអាចថតរូបអនុស្សាវរីយ៍នៅក្នុងទីក្រុងអង្គរ ជាមួយអ្នកឯកទេសថតរូប ដែលមានជំនាញខ្ពស់ក្នុងការផ្ដិតយករូបភាពបែបរ៉ូមែនទិកជាលក្ខណៈគូស្វាមីគូភរិយា ឬជាមួយអ្នកជាទីស្រឡាញ់របស់អ្នកយ៉ាងផ្អែមល្ហែមបំផុត។
3- ម្ហូបទេសចរណ៍របស់អ្នកស្រុកសៀមរាប

បើសិនជាអ្នកកំពុងស្វែងរកម្ហូបបែបប្រចាំតំបន់ដ៏អស្ចារ្យនោះ ម្ហូបប្លែកៗនៅក្នុងខេត្តសៀមរាបគឺជម្រើសដ៏ល្អបំផុត ជាម្ហូបបែបខ្មែរ និងមានការច្នៃប្រឌិតពីមួយជំនាន់តមកមួយជំនាន់ប្រចាំគ្រួសារ ពិសេសជាងគេនោះគឺ “នំបញ្ចុកព្រះដាក់”។ មិនតែប៉ុណ្ណោះអ្នកអាចសិក្សាស្វែងយល់ពីសិល្បៈនៃការចម្អិនម្ហូបខ្មែរថែមទៀតផង។
4- សម្រាកកាយជាមួយនឹងការស្ប៉ាបែបខ្មែរ

ក្រោយពេលដើរលេងកម្សាន្ដនៅក្នុងទីក្រុងអង្គរ អ្នកប្រហែលជាអស់កម្លាំងខ្លាំងណាស់។ ដូច្នេះអ្នកអាចរកកន្លែងស្ប៉ាដ៏ល្អបំផុត ដែលមានជាច្រើនទីតាំងនៅម្ដុំផ្សាររាត្រី ដែលសុទ្ធសឹងតែអ្នកមានជំនាញផ្នែកម៉ាស្សា និងចាប់សរសៃយ៉ាងល្អបំផុត។
5- ការហាត់ Yoga ជាមួយគូស្នេហ៍ក្រោមបរិយាកាសដ៏រ៉ូមែនទិក

អ្នកអាចចំណាយពេលហាត់ Yoga ជាមួយគូស្នេហ៍របស់អ្នក ហើយនៅក្នុងអំឡុងពេលក្រេបទឹកឃ្មុំ អ្នកថែមទាំងអាចទទួលយកនូវបទពិសោធន៍ថ្មីដូចជា៖
– ស្នាក់នៅក្នុងបន្ទប់បែបបុរាណធំទូលាយ និងទំនើបទាន់សម័យ
– ស្ប៉ារយៈពេល60នាទីសម្រាប់មនុស្សពីរនាក់
– អាហារពេលព្រឹកប្រចាំថ្ងៃ អាហារពេលល្ងាចក្រោមពន្លឺភ្លើងទៀនសម្រាប់មនុស្ស2នាក់
– ហាត់ Yoga ជាលក្ខណៈឯកជនសម្រាប់មនុស្ស2នាក់ នៅមុខប្រាសាទអង្គរវត្តនាពេលព្រឹកព្រលឹម
– ការប្រទានពរជ័យពីព្រះសង្ឃ
– ទទួលទានអាហារសុខភាព
– ការសម្មាធិកាត់បន្ថយភាពតានតឹង (Sound Healing Session)
– ជិះម៉ូតូកងបីដើរលេងកម្សាន្តនៅក្នុងទីក្រុងសៀមរាប12ម៉ោងក្នុងមួយថ្ងៃ៕
January 10, 2019
ហេតុផលសំខាន់ ដែលគូស្វាមីភរិយា ត្រូវការធ្វើដំណើរកម្សាន្ដ
ការធ្វើដំណើរកម្សាន្ដមិនត្រឹមតែធ្វើឱ្យអ្នកមានអារម្មណ៍ស្រស់ថ្លាប៉ុណ្ណោះទេ ថែមទាំងធ្វើឱ្យអ្នកមានសុខភាពល្អទៀតផង។ ហើយបើទើបតែរៀបអាពាហ៍ពិពាហ៍ហើយថ្មីថ្មោង ការចំណាយពេលវេលាដើរកម្សាន្ដ គឺជាការបង្កើតនូវភាពស្និទស្នាល និងទំនាក់ទំនងល្អរវាងអ្នកទាំងពីរ។ អ្នកបានធ្វើការងារសន្សំប្រាក់ទុកសម្រាប់កសាងគ្រួសារអស់រយៈពេលជាយូរមកហើយ ដូច្នេះ មានហេតុផលសំខាន់ជាច្រើនដែលលោកអ្នកគួរធ្វើដំណើរកម្សាន្ដទៅកាន់កន្លែងណាមួយ ទោះមិនបានញឹកញាប់ ក៏យូរៗបានដើរលេងម្ដងដែរ។ តើមានហេតុផលអ្វីខ្លះ ដែលការធ្វើដំណើរកម្សាន្ដរបស់គូស្វាមីល្អសម្រាប់សុខភាព?
1. បង្កើនទំនាក់ទំនងស្អិតរមួត
នៅពេលដែលបានធ្វើដំណើរកម្សាន្ដជាមួយមនុស្សជាទីស្រឡាញ់ នោះមានន័យថាអ្នកកំពុងតែបង្កើនភាពជិតស្និត ផ្អែមល្អែមជាមួយពួកគេថែមមួយកម្រិតទៀត។ ជាទូទៅ ក្រោយពេលរៀបការ គូស្វាមីភរិយាតែងជ្រើសរើសទីតាំងសម្រាប់ក្រេបចន្ទទឹកឃ្មុំ ក៏ប៉ុន្ដែក៏មានអ្នកខ្លះទៀត ចង់មានដំណើរកម្សាន្ដទាំងគ្រួសារតែម្ដង ព្រោះដើម្បីឱ្យមានភាពស្និទស្នាលនឹងគ្នារវាងគ្រួសារទាំងពីរខាង ឱ្យកាន់តែស្អិតរមួតខ្លាំងឡើង។
2. រំសាយអារម្មណ៍ស្មុគស្មាញ និងភាពនឿយហត់
អ្នកធ្លាប់តែរស់នៅ និងទទួលសំពាធពីកន្លែងការងារ ពីការសិក្សា ឬពីក្រុមគ្រួសារ រហូតដល់មានគ្រួសារថ្មី នឹងត្រូវប្រឈមជាមួយពេលវេលាមើលថែទាំសមាជិកក្នុងគ្រួសារថែមទៀត សឹងតែធ្វើឱ្យអ្នកគ្មានពេលវេលាគ្រប់គ្រាន់ក្នុងការធ្វើដំណើរកម្សាន្ដឡើយ។ ដំណើរកម្សាន្ដអាចជួយឱ្យអ្នកស្រស់ស្រាយ និងមានគំនិតក្នុងការដោះស្រាយរឿងរ៉ាវជាច្រើន។ នៅពេលអារម្មណ៍ស្រឡះ ភាពនឿយហត់ក៏បានរសាយ ធ្វើឱ្យអ្នកមានអារម្មណ៍ល្អប្រសើរឡើងវិញ។
3. ទទួលបានគំនិតថ្មីៗ និងគំនិតច្នៃប្រឌិតល្អៗ
ដើរលេងច្រើន ឃើញអ្វីដែលប្លែកច្រើន អាចឱ្យអ្នកមានគំនិតច្នៃប្រឌិតថ្មីៗ តាមរយៈតំបន់ប្លែកៗ ព្រោះថាពេលដែលអ្នកឃើញអ្វីដែលថ្មីសន្លាង ដែលអ្នកមិនធ្លាប់បានឃើញពីមុនមក អាចបណ្ដុះគំនិតអ្នកឱ្យកាន់តែមានច្រើនឡើងថែមទៀត។ ជាពិសេសគោលគំនិតនៃការបង្កើតមុខរបរ សម្រាប់គូស្វាមីភរិយានឹងត្រូវចាប់ដៃគ្នារកប្រាក់ចំណូល។
4. សប្បាយចិត្តសុខភាពល្អ
ពេលដែលអ្នកសប្បាយចិត្ដ អារម្មណ៍ល្អនោះមានន័យថា អ្នកក៏មានសុខភាពល្អដែរ។ ដំណើរកម្សាន្ដធ្វើឱ្យសុខភាពខួរក្បាលរបស់អ្នកបានល្អ និងធ្វើឱ្យរូបរាងនៅថេរជានិច្ច។
5. បង្កើតទំនាក់ទំនងសង្គមល្អ
ពេលដែលអ្នកទៅដើរលេងកម្សាន្ដនៅតំបន់ផ្សេងៗ អាចជួយឱ្យអ្នកមានទំនាក់ទំនងល្អជាមួយមនុស្សនៅក្នុងសង្គម ពីព្រោះថានៅពេលដែលអ្នកប្រាស្រ័យទាក់ទងមនុស្សនៅក្នុងសង្គមច្រើនប្រាកដណាស់ថា អ្នកនឹងទទួលបានពីបទសោធន៍ជីវិតថ្មីៗ និងងាយស្រួលជំរុញការបង្កើ់តមុខជំនួញ។
6. ធ្វើឱ្យអារម្មណ៍ស្រស់ស្រាយ
ការកម្សាន្ដជួយអ្នកបំបាត់ភាពខ្វល់ខ្វាយ ស្ដ្រេស និងតប់ប្រមល់ជាដើម។ ដូច្នេះអ្នកគួរតែចំណាយពេលរបស់អ្នកខ្លះ ធ្វើដំណើរកម្សាន្ដឱ្យបានច្រើន ដើម្បីសុខភាពរបស់អ្នក ក៏ដូចជាមានប្រយោជន៍ចំពោះខ្លួននាពេលខាងមុខផងដែរ៕
January 10, 2019
ម៉ែក្មេក 5ប្រភេទ ដែលកូនប្រសារស្រីដូចយើង រាងចាល!!
នៅពេលដែលសង្គ្រាមរវាងម៉ែក្មេក និងកូនប្រសារស្រីមិនមែនជារឿងកំប្លុកកំប្លែង ដែលនិពន្ធលើកយកល្អមើល ហើយដាក់បញ្ចាំងនៅក្នុងរឿងភាគក្នុងទូរទស្សន៍នោះ អ្នកគ្រូឆវី សូមលើកយកអត្ថបទដ៏ល្អមួយ ដើម្បីមកស្រាយបញ្ហានេះជូនសម្ព័ន្ធភាពទាំង3 គឺម៉ែក្មេក កូនប្រសារស្រី និងកូនប្រុសអ្នកម៉ែ ដែលត្រូវបំពេញតួនាទីជាស្វាមីគំរូ និងជាកូនប្រុសដ៏សែនល្អ ឱ្យបានដឹងពីចិត្តគំនិតរបស់គ្នាទៅវិញទៅមក ដូចជាយើង (ម៉ែក្មេក) ស្អប់បែបនេះ! ឬនាង(រូបអ្នកផ្ទាល់)ចូលចិត្តបែបណា? ជាដើម នោះមកជម្រាបជូន ដែលអ្នកគ្រូឆវី ធានាថា អត្ថបទនេះ ម៉ែក្មេកទាំងឡាយក៏អាចអានបាន កូនប្រសារស្រីក៏អានបាន ហើយជាពិសេសបំផុត កូនប្រុសអ្នកម៉ែក៏គួរតែអានដែរ ហើយសូមឱ្យអានទាំងអស់គ្នា… គិតថា អ្នកគ្រូ ឆវី សុំអង្វរឱ្យអានទៅចុះ!
1. មហាកំពូលការពារទ្រព្យ
ម៉ែក្មេកមហាកំពូលការពារទ្រព្យ ចូលចិត្តធ្វើខ្លួនជាអ្នកត្រួតពិនិត្យជាប់ជានិច្ច ដែលបើសិនជាការពារតែទ្រព្យសម្បត្តិរបស់ខ្លួនឯងនោះ វាប្រហែលជាមិនមែនជាបញ្ហាអីទេ តែនេះមានក្ដីព្យាយាមយ៉ាងខ្លាំងក្លាក្នុងការតាមដានត្រួតពិនិត្យទ្រព្យសម្បត្តិរបស់អ្នកផ្សេងទៀតផង ជាពិសេសបំផុតទ្រព្យសម្បត្តិរបស់កូនប្រុសសំណព្វចិត្តខ្លួនតែម្ដង។ អ្នកស្រីម្ដាយក្មេកតែងតែវិតក្កកង្វល់ថា កូនប្រសារស្រីនឹងធ្វើខ្លួនជាសត្វឈ្លើង មកជញ្ជក់បឺតយកប្រាក់ដែល កូនប្រុសខ្លួនខំរកបានមកដោយក្ដីលំបាកលំបិន ទាំងនៅចាំតាមដានស៊ើបមើលថា កូនប្រសារស្រីរបស់ខ្លួនចេះធ្វើការរកស៊ីអត់? ឬមានប្រាក់ចំណូលប៉ុន្មាន? ឬចាយវាយខ្ចះខ្ជាយឬអត់? ដែលប្រាកដណាស់ថា ទាំងអស់នេះពិតជាសាងនូវភាពធុញថប់តានតឹង និងរំខានចិត្តកូនប្រ-សារស្រីមិនស្ទើរឡើយ ហើយម៉ែក្មេកខ្លះទៀត កើតអាការធ្ងន់ធ្ងរដល់ថ្នាក់សុំខ្លួនធ្វើជាអ្នកទុកដាក់លុយកាក់ឱ្យកូនប្រុសខ្លួនឯងក៏មានដែរ… អូយ ឈឺក្បាល!
វិធីទប់ទល់ៈ បើសិនចង់ចាត់ការម៉ែក្មេក ប្រភេទនេះឱ្យរាបដូចកន្ទេលនោះ អ្នកគ្រូឆវី សូមណែនាំថា អ្នកនាងត្រូវតែធ្វើជាកូនប្រសារ ដែលរឹងប៉ឹង ឈរលើដៃជើង និងកម្លាំងរបស់ ខ្លួនឯង។ និយាយប្រកាសឱ្យឮដល់ត្រចៀកម៉ែក្មេកតែម្ដងទៅថា នាងខ្ញុំធ្វើការរកលុយចាយដោយខ្លួនឯងណា៎ ហើយនាងខ្ញុំនឹងកូនប្រុសរបស់អ្នកស្រី ក៏ចាយលុយដោយឡែកពីគ្នាដែរដែលរឿងនេះបើសិនជាតម្រូវឲលារបញ្ជីចំណាយចំណូលបង្ហាញប្រាប់ផង ក៏រឹតតែល្អទៅទៀត។ ធ្វើគ្រប់វិធីដើម្បីបង្ហាញឱ្យឃើញថា អ្នកនាងមិនបានមកតោងកូនប្រុស គាត់ស៊ីនោះទេ។ នៅពេលដឹងបែបនេះហើយ អ្នកស្រីម្ដាយក្មេកក៏នឹងលែងហ៊ានមកលូកលាន់ ឬចេះដឹងរឿងលុយរឿងកាក់របស់អ្នកនាងទៀតហើយ ឬនិយាយឱ្យស្រួលស្ដាប់គឺ ធ្វើឱ្យគាត់លែងខ្វល់បារម្ភពីរឿងហ្នឹងតែម្ដង ដើម្បីឱ្យលែងមានបញ្ហាសម្រាប់ជីវិតអាពាហ៍ពិពាហ៍របស់អ្នកនាង និងស្វាមីហ្នឹងឯង។
2. ស៊ូស៊ីថៃហៅ មកចាប់កំណើត
ពីដំបូងប្រុងហៅថា ហ៊ីទ្លែរមកចាប់កំណើតព្រោះភ្លេចគិតទៅថា ម៉ែក្មេកជាមនុស្សស្រីអីុចឹងមានតែ ស៊ូស៊ីថៃហៅ ទើបស័ក្តិសមជាង។ ចា៎ស ប្រហែលជាមិនពិបាកស្មានទេ មែនទេថាម៉ែក្មេកប្រភេទនេះជាមនុស្សបែបណា ខ្លីៗងាយៗត្រូវចំអត្ថន័យតែម្ដងនោះគឺ “ផ្ដាច់ការ” ដោយក្នុងពាក្យថា ផ្ដាច់ការនេះបានរួបរួមចរិតនិស្ស័យដ៏មហាសែនយ៉ាប់ជាច្រើននៅក្នុងនោះ មានតាំងពីអាត្មានិយម គ្មានហេតុផលចេះដឹង រឿងប្ដីប្រពន្ធគេ មិនទទួលយកគំនិត យោបល់ គេគិតថាខ្លួនឯងត្រូវរហូត ចូលចិត្តចង្អុលបញ្ជាសម្លុតគំរាមកំហែង។ល។ ចំណុចអាក្រក់ច្រើនបែបនេះ បើចង់ប្រាប់ថា គឺជាម៉ែក្មេកដែលគួរឱ្យភ័យខ្លាចជាទីបំផុតនោះ ក៏ប្រហែល មិនជាខុសប៉ុន្មានដែរ។ ជាពិសេសបំផុត បើចាប់ដៃគូគ្នាជាមួយកូនប្រុសទន់ជ្រាយផងនោះ រឿងនេះអាចប្រកាសបានតែម្ដងថា ជីវិត ជាកូនប្រសារស្រីមានតែខ្ទេចខ្ទី ហើយនិងខ្ទេចខ្ទី តែប៉ុណ្ណោះ។ ហ៊ឺ…។
វិធីទប់ទល់ៈ វិធីដោះយករួចខ្លួនពីម៉ែក្មេកកំ- ពូលផ្ដាច់ការបែបនេះគឺ អ្នកនាងត្រូវធ្វើជាកូនប្រ-សារស្មារតីមាំមួន។ ភាពនឹងធឹង និងដាច់ខាតនឹងធ្វើឱ្យអ្នកនាងយកឈ្នះដោយមិនពិបាកឡើយ។ អាចនឹងត្រូវសុខចិត្ត ឬបង្ខំចិត្តធ្វើការតមាត់ ត-ក ដើម្បីជំទាស់ចិត្តគ្នាខ្លះទៅចុះ តែបើសិនជា ប្រាកដក្នុងចិត្តថា បានធ្វើនូវរឿងដែលត្រឹមត្រូវ និងគួរធ្វើហើយនោះ សូមកុំភិតភ័យញាប់ញ័រឱ្យ សោះ ព្រោះបើសិនជាអ្នកនាងភ្លេចខ្លួនបណ្ដោយតាម ឬឱនក្បាលចុះញ៉មសូម្បីតែបន្តិចនោះ វានឹងក្លាយជាចំណុចប្ដូរផ្លាស់ជីវិតរបស់អ្នកនាងភ្លាមតែម្ដង។ ចូរចាំទុកថា កុំព្រមចុះចាញ់ ឬបន្ទន់ឥរិយាបថតាំងពីដំបូង ព្រោះវានឹងមានន័យថា បើសុខចិត្តធ្វើចាញ់តាំងពីដំបូងនោះ វាច្បាស់ជាមានលើកក្រោយៗទៀតជាមនិខាន…។ (សូមរង់ចាំតាមដានភាគបន្ត…)
January 10, 2019
ធនាគារជាតិប្រកាសបញ្ឈប់ប្រតិបត្តិករឥណទានជនបទចំនួន 4 នៅដើមឆ្នាំនេះ
ធនាគារជាតិនៅកម្ពុជាធ្លាប់បានធ្វើការប្រកាសព័ត៌មាន និងព្រមានធ្ងន់ៗរួចមកហើយចំពោះគ្រឹះស្ថានមីក្រូហិរញ្ញវត្ថុណាដែលបានបង្កើនតម្លៃសេវារបស់ខ្លួនពីប្រជាពលរដ្ឋដែលទៅខ្ចីប្រាក់ និងលក្ខខណ្ឌមួយចំនួនទៀតដែលធនាគារជាតិបានកំណត់ថា អាចប្រឈមនឹងការបញ្ឈប់ប្រតិបត្តិការ ឬមានវិធានការផ្លូវច្បាប់នានា។
បន្ទាប់ពីធនាគារជាតិនៃកម្ពុជា បានសម្រួលឱ្យកាន់តែមានលក្ខណៈប្រសើរឡើងសម្រាប់ប្រជាជននៅទូទាំងប្រទេសដោយការកំណត់ពិតានការប្រាក់រួចមក ធនាគារជាតិនៃកម្ពុជាបានមើលឃើញថាមានគ្រឹះស្ថានមីក្រូហិរញ្ញវត្ថុមួយចំនួនបែរជាបង្កើនតម្លៃសេវាផ្សេងៗរបស់ខ្លួនដើម្បីទាញយកប្រយោជន៍ពីប្រជាជនទៅវិញ។ ជាវិធានការទប់ស្កាត់ មន្ត្រីជាន់ខ្ពស់នៃធនាគារជាតិនៃកម្ពុជាធ្លាប់បានព្រមានហើយថា អាចនឹងចាត់វិធានការធ្ងន់ធ្ងរបំផុតចំពោះគ្រឹះស្ថានណាដែលកេងយកចំណេញច្រើនហួសហេតុពេកពីប្រជាជន។
នៅដើមឆ្នាំ2019 នេះធនាគារជាតិនៃកម្ពុជាបានចេញសេចក្តីប្រកាសព័ត៌មានស្តីពីការបញ្ឈប់ប្រតិបត្តិករដែលជាគ្រឹះស្ថានឥណទានជនបទចំនួន 4 គឺ៖
ទី1- គ្រឹះស្ថាន វីរៈជន កសិករ ម.ក
ទី2- គ្រឹះស្ថាន វឌ្ឍករសិករ ម.ក
ទី3- ឥណទានខ្មែរ ដើម្បីការអភិវឌ្ឍន៍ ម.ក
ទី4 ខេ ភី ភី ឌី ហ្វាយនែន ម.ក
គួរបញ្ជាក់ថា ការបញ្ឈប់ប្រតិបត្តិការរបស់គ្រឹះស្ថានជនបទទាំង4 នេះ ធនាគារជាតិនៃកម្ពុជាមិនទាន់បានបញ្ជាក់មូលហេតុនៅឡើយទេ គ្រាន់តែបានជូនដំណឹងដល់សាធារណជន និងអាជ្ញាធរពាក់ព័ន្ធឱ្យបានជ្រាបជាព័ត៌មានតែប៉ុណ្ណោះ៕
January 10, 2019
សិស្សស្រីតែងខ្លួនឈុតបុរាណចូលប្រលង បង្កឱ្យភ្ញាក់ផ្អើលអស់ទាំងគ្រូនិងមិត្តរួមថ្នាក់
ពិតជាមានរឿងប្លែកៗកើតនៅក្នុងសង្គម ដែលនៅថ្ងៃទី 9 ខែមករា ឆ្នាំ 2019 នេះសារព័ត៌មានថៃ kapook បានចេញផ្សាយឱ្យដឹងថា សិស្សស្រីម្នាក់តែងខ្លួនក្នុងឈុតបុរាណថៃ ចូលប្រលងនៅក្នុងថ្នាក់បង្កឱ្យមានភាពភ្ញាក់ផ្អើលអស់មណ្ឌុលប្រលង។
តាមការបង្ហោះរបស់ហ្វេសប៊ុកមានឈ្មោះ Keem Phanthong បានឱ្យដឹងថា ខណៈដែលមិត្តភ័ក្តនៅក្នុងសាលារៀនស្លៀកសម្លៀកបំពាក់របស់សាលាតាមធម្មតាមកប្រលង ភ្លាមៗស្រាប់តែគ្រប់គ្នាភ្ញាក់ព្រឺត នៅពេលបានឃើញនាងមកប្រលងក្នុងសម្លៀកបំពាក់ឈុតបុរាណថៃ ព្រមទាំងមានបួងសក់ និងពាក់មកុដ ហាក់បីដូចជា គ្រូកំពុងចូលរូប។ សិស្សស្រីរូបនេះ ត្រូវបានមិត្តរួមថ្នាក់ថតរូបឱ្យបង្ហោះឱ្យដឹងថា « ទីនេះសាលារៀន Prakhonchai Pittayakhon តែងខ្លូនមកប្រលងមធម្យៗ តែសប្ដាហ៍ក្រោយគឺមិនធានាទេ»។
សិស្សស្រីដែលបានរៀបរាប់ខាងលើ ត្រូវបានអ្នកសារព័ត៌មានទម្លាយអត្តសញ្ញាណឱ្យដឹងថា នាងមានឈ្មោះ ពិយៈធិតា ម៉ាលីគុន ឬហៅក្រៅ នាង ហ្វីមល៍ រៀនថ្នាក់ទី 10 នៃសាលារៀន Prakhonchai Pittayakhon ហើយនាងគឺជាអ្នករបាំ និងជាអ្នកចម្រៀងប្រចាំសាលា។ នាងថា នាងមិនបានប្ដូរឈុតដោយសារតែ នាងត្រូវប្រលងផ្នែកមុខវិជ្ជាតម្រង់ទិស និង ផ្នែករបាំក្នុងថ្ងៃតែមួយ៕
January 10, 2019
តួស្រីក្នុងរឿង« កំណត់ហេតុនាងនាថ »ជួបគ្រោះថ្នាកចរាចរណ៍ថរយន្ដបុកគ្នា របួសជើងឆ្វេង
ដូចប្រិយមិត្តបានស្គាល់ហើយថា តារាឯកស្រីនៅក្នុងភាពយន្ដខ្នាតធំរឿង « កំណត់ហេតុនាងនាថ » ជាតារាសម្តែងកូនកាត់ខ្មែរ-ឥស្លាម នាងបានជួបគ្រោះជួបគ្រោះថ្នាកចរាចរណ៍ដោយសាររថយន្ដបុកគ្នា។
តារាសម្តែងកូនកាត់ខ្មែរ-ឥស្លាម កញ្ញា ណា តាហ្សាបានជួបគ្រោះថ្នាកចរាចរណ៍កាលពីវេលាម៉ោង12រំលងអាធ្រាតជិតចូល1យប់ឈានចូលថ្ងៃទី9 ខែមករា ។ ហេតុការណ៍យប់មិញនេះដែរ កើតឡើងនៅម្តុំ ស្រុកកគរ ខេត្តពោធិ៍សាត់
តារាសម្តែងកូនកាត់ខ្មែរ-ឥស្លាមបានប្រាប់អ្នកសារព័ត៌មានថា ខ្ញុំពិតជានៅភ័យមិនបាត់ចំពោះហេតុការណ៍គ្រោះថ្នាក់យប់មិញ។ វាហាក់នៅជាប់នៅនឹងភ្នែករបស់ខ្ញុំដោយឡាន 1បាំងកន្លះបានបែកកង់ជ្រុលចង្កូតបុកជាមួយឡានក្រុងរបស់ខ្ញុំដែលធ្វើដំណើរផ្ទុយទិសគ្នាពីភ្នំពេញទៅកាន់ប៉ោយប៉ែត ចាំទៅថៃបន្តក៏ជួបគ្រោះថ្នាក់នេះតែម្តង”។
តារាសម្ដែងស្រីរូបនេះបានបន្ដថា ពេលនេះរូបនាងមានសុវត្ថិភាពល្អ មិនមានរងរបួសធ្ងន់ធ្ងរដល់អាយុជីវិតទេ គ្រាន់តែខកខានធ្វើដំណើរទៅប្រទេសថៃទៀតបានដោយបានបាត់ លិខិតឆ្លងដែន និងកំពុងស្នើរសុំដល់អ្នករើសបានសុំជួយទំនាក់ទំនងប្រគល់ឱ្យរូបនាងវិញផង។ នាងថា ទឹកដោះម្ដាយថ្លៃទើបរួចផុតពីគ្រោះថ្នាក់ដល់ជីវិត គ្រាន់តែរបួសត្រង់ជើងខាងឆ្វេងតិចតួចប៉ុណ្ណោះ តែរាងនៅភ័យព្រោះមិនធ្លាប់ជួបពីមុន ហើយនេះជាលើកទី1ក្នុងជីវិត។ ពេលនេះនាងកំពុងនៅក្នុងក្រុងប៉ោយប៉ែត រង់ចាំបន្តដំណើរទៅថៃព្រោះមិនអាចអាក់ខានការកុម្មង់ឥវ៉ាន់របស់នាងឡើយ៕
January 10, 2019
នៅទីបំផុតអ្នកនាង លី ច័ន្ទសីហា ទម្លាយរឿងលែងលះស្វាមី
ក្នុងពិធីខួបមួយឆ្នាំរបស់កូនស្រីអ្នកនាងលី ច័ន្ទសីហា គេឃើញអ្នកនាងប្រារព្ធពិធីជាទ្រង់ទ្រាយធំ ដោយក្នុងពិធីទាំងមូលមានសុទ្ធតែវត្តមានតារាល្បីៗបង្ហាញខ្លួន។ តែអ្វីដែលភ្ញាក់ផ្អើលបំផុតនោះគឺ តារាសម្ដែងល្បីល្បាញអ្នកនាង លី ច័ន្ទសីហា បានប្រកាសជាចំហរហើយថា អ្នកនាងពិតជាលែងលះជាមួយស្វាមីប្រាកដមែន ដោយអ្នកនាងបានដើរតួជាម្ដាយផងឳពុកផងរបស់កូនស្រីតែម្នាក់ឯង តាំងពីកូនស្រីសម្រាលបានប៉ុន្មានខែ។ អ្នកនាងបានថ្លែងបែបនេះ ក្នុងពិធីខួបកំណើតកូនស្រី គម្រប់មួយឆ្នាំកាលពីថ្ងៃទី9 ខែមករា ឆ្នាំ2019នេះដែលមានវត្តមានតារាល្បីៗចូលរួម។
អ្នកនាងលី ច័ន្ទសីហា និយាយថា ជីវិតប្ដីប្រពន្ធរបស់អ្នកនាងមានរឿងមិនចុះសម្រុងគ្នាជាយូរមកហើយ ដោយមានស្ថានភាពឈ្លោះបែកៗក៏ច្រើនលើកដែរ មុននឹងឈានដល់ការលះលែងគ្នា។ ប៉ុន្តែដោយសារតែអ្នកនាង ក៏មិនចង់អោយរឿងនេះខ្ចរខ្ចាយ ទើបអ្នកនាងព្យាយាមលាក់បាំង ហើតខំពង្រឹងជំហរក្នុងនាមជាម្ដាយម្នាក់សម្រាប់កូនស្រី។ យ៉ាងណាមិញអ្នកនាងថា មិនទន់ជ្រាយទេ ហើយផ្ទុយទៅវិញអ្នកនាងចិញ្ចឹមបីបាច់កូនស្រីអោយមានវាសនាល្អបំផុត បើទោះជាក្នុងពេលនេះ កូនស្រីរបស់អ្នកនាងគ្មានឳពុកឃុំគ្រង។
សូមជម្រាបថា ក្នុងនោះអ្នកនាងក៏ប្រកាសថា នឹងបន្តអាជីពសម្ដែងឱ្យខ្លាំងដូចដើមផងដែរ នៅពេលអ្នកនាងធូរខ្លួនបន្តិចពីការមើលថែកូនស្រី៕

January 10, 2019
ក្រសួងសេដ្ឋកិច្ច និងហិរញ្ញវត្ថុផ្សព្វផ្សាយពីការលើកទឹកចិត្តផ្នែកពន្ធដារ សម្រាប់ SME
«ការលើកទឹកចិត្តផ្នែកពន្ធដារសម្រាប់សហគ្រាសធុនតូច និងមធ្យម(SME)ក្នុងវិស័យអាទិភាព» សម្រាប់អាជីវកម្ម សហគ្រាសចំនួន 6ប្រភេទត្រូវបានក្រសួងសេដ្ឋកិច្ច និងហិរញ្ញវត្ថុ រៀបចំឡើងនូវសិក្ខាសាលាមួយកាលពីថ្ងៃទី8 ខែមករា ឆ្នាំ2019 តាមរយៈការផ្សព្វផ្សាយអនុក្រឹត្យលេខ124 អនក្រ.បក ចុះថ្ងៃទី2 ខែតុលា ឆ្នាំ2018 ដោយក្នុងនោះរាជរដ្ឋាភិបាលក៏បានបង្កើតមូលនិធិអភិវឌ្ឍន៍ជំនាញធនាគារសហគ្រាសធុនតូច និងមធ្យម មូលនិធិអភិវឌ្ឍន៍សហគ្រិនភាព និងមជ្ឈមណ្ឌលលើកកម្ពស់សហគ្រិនភាពផងដែរ។
ការផ្សព្វផ្សាយនេះ គឺក្រសួងសេដ្ឋកិច្ច និងហិរញ្ញវត្ថុមានគោលបំណងឱ្យសាធារណជន ជាពិសេសម្ចាស់សហគ្រាសធុនតូច និងមធ្យមបានជ្រាបជាព័ត៌មាន និងអាចចាប់យកនូវអត្ថប្រយោជន៍ពីការលើកទឹកចិត្តផ្នែកពន្ធដារ ដែលរាជរដ្ឋាភិបាលបានដាក់ចេញនេះ ដើម្បីលើកកម្ពស់ការអភិវឌ្ឍសហគ្រាសធុនតូច និងមធ្យម (SME) ដែលជាចលករមួយដ៏សំខាន់ក្នុងការអភិវឌ្ឍវិស័យសេដ្ឋកិច្ចបង្កើតការងារបន្ថែម និងបង្កើនសមត្ថភាពផលិតកម្មក្នុងស្រុក។
វិស័យអាទិភាពសម្រាប់ផ្តល់ការលើកទឹកចិត្តផ្នែកពន្ធដារចំពោះអាជីវកម្ម សហគ្រាសចំនួន 6ប្រភេទ រួមមាន៖1- ផលិតផលកសិកម្ម ឬកសិ-ឧស្សាហកម្ម។ 2- ការផលិត និងកែច្នៃម្ហូបអាហារ។ 3-កម្មន្តសាលដែលផលិតទំនិញប្រើប្រាស់ក្នុងស្រុក កែច្នៃកាកសំណល់ និងផលិតទំនិញសម្រាប់វិស័យទេសចរណ៍។ 4-កម្មន្តសាលផលិតនូវផលិតផលសម្រេច ឬផ្នែក ឬគ្រឿងផ្គុំដើម្បីផ្គត់ផ្គង់ឱ្យកម្មន្តសាលដទៃទៀត។ 5-ស្រាវជ្រាវ និង អភិវឌ្ឍបច្ចេកវិទ្យាព័ត៌មាន រួមទាំងការផ្គត់ផ្គង់សេវាគ្រប់គ្រងតាមប្រព័ន្ធបច្ចេកវិទ្យាព័ត៌មាន ដែលមានលក្ខណៈនវានុវត្តន៍។ 6-សហគ្រាសដែលស្ថិតក្នុងតំបន់ប្រមូលផ្តុំសហគ្រាសធុនតូច និងមធ្យម និងសហគ្រាសដែលអភិវឌ្ឍតំបន់នេះ ។
សហគ្រាសធុនតូច និងមធ្យម ក្នុងវិស័យដូចបានរៀបរាប់ខាងលើអាចទទួលបាននូវការលើកទឹកចិត្តដូចជា៖
1-លើកលែងពន្ធលើប្រាក់ចំណូលចំនួន 3ឆ្នាំ ដោយគិតចាប់ពីថ្ងៃដែលចុះបញ្ជីពន្ធដារសម្រាប់សហគ្រាសចុះបញ្ជីថ្មី ឬចាប់ពីថ្ងៃដែលសហគ្រាសមកធ្វើបច្ចុប្បន្នកម្មសម្រាប់សហគ្រាសដែលបានចុះបញ្ជីពន្ធដាររួចហើយ ចាប់ពីពេលអនុក្រឹត្យនេះចូលជាធរមាន។
2- លើកលែងពន្ធលើប្រាក់ចំណូលរយៈពេល 5ឆ្នាំ ដោយគិតចាប់ពីថ្ងៃដែលចុះបញ្ជីពន្ធដារសម្រាប់សហគ្រាសចុះបញ្ជីថ្មី ឬ ចាប់ពីថ្ងៃដែលសហគ្រាសមកធ្វើបច្ចុប្បន្នកម្មសម្រាប់សហគ្រាសដែលបានចុះបញ្ជីពន្ធដាររួចហើយ ចាប់ពីពេលអនុក្រឹត្យនេះចូលជាធរមាន ដែលបានបំពេញលក្ខខណ្ឌណាមួយ ដូចខាងក្រោម៖ ប្រើវត្ថុធាតុដើមក្នុងស្រុក ចាប់ពី 60%ឡើងទៅ ឬបង្កើនចំនួននិយោជិតបន្ថែមយ៉ាងតិច20% ឬមានទីតាំងក្នុងតំបន់ប្រមូលផ្តុំសហគ្រាសធុនតូច និងមធ្យម (SME Cluster)។
3- លើកលែងការបង់ប្រាក់រំដោះពន្ធលើប្រាក់ចំណូល និងពន្ធអប្បរមា ក្នុងរយៈពេលលើកលែងពន្ធលើប្រាក់ចំណូល។
4-លើកទឹកចិត្តចំណាយដែលអាចកាត់កងបាន ដូចខាងក្រោម៖ ក៖ អនុញ្ញាតកាត់កងចំណាយ 200% ចំពោះចំណាយលើការប្រើប្រាស់បញ្ជីគណនេយ្យតាមប្រព័ន្ធបច្ចេកវិទ្យាព័ត៌មាន។ ខ៖ អនុញ្ញាតកាត់កងចំណាយ 200% ចំពោះចំណាយលើការបណ្តុះបណ្តាលការកាន់បញ្ជីគណនេយ្យ ឬការបណ្តុះបណ្តាលជំនាញបច្ចេកទេសដល់និយោជិត និងគ៖ អនុញ្ញាតកាត់កងចំណាយ150% ចំពោះចំណាយវិនិយោគលើម៉ាស៊ីន ឬឧបករណ៍បច្ចេកវិទ្យា ដែលមានលក្ខណៈនវានុវត្តន៍ សម្រាប់បម្រើ និងលើកកម្ពស់ផលិតភាពផលិតកម្ម។
ក្នុងការទទួលបានការលើកទឹកចិត្តដូចបានរៀបរាប់ខាងលើ សហគ្រាសធុនតូច និងមធ្យម ត្រូវកាន់បញ្ជីគណនេយ្យ និងដាក់លិខិតប្រកាសពន្ធលើប្រាក់ចំណូលប្រចាំឆ្នាំ ទៅតាមកាលកំណត់ជូនរដ្ឋបាលសារពើពន្ធ ទោះបីជាត្រូវបានលើកលែងពន្ធលើប្រាក់ចំណូល និងត្រូវដាក់លិខិតប្រកាសបង់ពន្ធអាករដទៃទៀតតាមច្បាប់ និងបទប្បញ្ញតិ្តស្តីពីពន្ធដារជាធរមាន។ ផ្ទុយទៅវិញ សហគ្រាសធុនតូច និងមធ្យម ដែលមិនបានបំពេញលក្ខខណ្ឌដូចបានកំណត់ នៅក្នុងអនុក្រឹត្យនេះ ឬខកខានមិនបានបំពេញកាតព្វកិច្ចសារពើពន្ធនានា ដូចមានចែងក្នុងច្បាប់ និងបទប្បញ្ញត្តិស្តីពីពន្ធដារ ការលើកទឹកចិត្តដែលបានផ្តល់ជូននឹងត្រូវបានដកហូតវិញ ។
ក្រសួងសេដ្ឋកិច្ច និងហិរញ្ញវត្ថុ បានថ្លែងអំណរគុណចំពោះការផ្តល់ធាតុចូលល្អៗបន្ថែមទៀតសម្រាប់ជាការគិតគូរបន្ត ព្រមទាំងបានស្នើឱ្យវិស័យឯកជន សមាគមនានានៃសហគ្រាសធុនតូច និងមធ្យម និងភាគីពាក់ព័ន្ធធ្វើការស្វែងយល់ និងជួយផ្សព្វផ្សាយបន្តអំពីគោលនយោបាយលើកទឹកចិត្តនេះ ដើម្បីឱ្យសហគ្រាសប្រភេទតូច និងមធ្យមទាំងអស់ មានឱកាសចាប់យកអត្ថប្រយោជន៍ដូចមានចែងនៅក្នុងអនុក្រឹត្យខាងលើ ឱ្យបានជាអតិបរមា៕
January 10, 2019
Man City លត់ក្រុម Burton ចាស់ដៃ ដើម្បីទៅវគ្គផ្តាច់ព្រ័ត្រនៃ League Cup
ខ្សែប្រយុទ្ធ Gabriel Jesus បានស៊ុតបាល់បញ្ចូលទី 4គ្រាប់ ខណៈដែលក្រុម Manchester City បានធ្វើដំណើរទៅកាន់វគ្គផ្តាច់ព្រ័ត្រនៃពាន League Cup ឬ Carabao Cup តាមរយៈការយកឈ្នះលើក្រុម Burtonរបស់ក្របខ័ណ្ឌ League Oneក្នុងលទ្ធផល 9-០ នាកីឡដ្ឋាន Etihad កាលពីថ្ងៃពុធ។
ការប្រកួតដែលមានប្រៀបតែលើក្រុមម្ខាងក្នុងវគ្គពាក់កណ្តាលផ្តាច់ ជើងទី1 ត្រូវបានកាត់សេចក្តី ខណៈដែលខ្សែបម្រើ Kevin De Bruyne បានរកគ្រាប់បាល់បើកឆាក ក្រោយពីលេងបានត្រឹមតែ 5នាទី ខណៈដែល Jesus បានបន្ថែមគ្រាប់បាល់ 2គ្រាប់ទៀត ហើយ OleksandrZinchenko បានបន្ថែម 1គ្រាប់ទៀត នៅមុនពេលសម្រាកតង់ទី1។
Jesus រកបានគ្រាប់បាល់ 2គ្រាប់ទៀត ក្នុងចន្លោះពេល 13នាទីក្នុងតង់ទី2 ខណៈដែលកីឡាករ Phil Foden និង Kyle Walker ក៏បានរកគ្រាប់បាល់បញ្ចូលទីផងដែរ នៅមុនពេល Riyad Mahrez បំពេញជ័យជម្នះដ៏ធំសម្រាប់ក្រុមខ្លួន។
វាជាការដណ្តើមបានជ័យជម្នះដ៏ធំបំផុតសម្រាប់ក្រុម Man City បើគិតចាប់តាំងពីពួកគេបានផ្តួលក្រុម Huddersfield 10-1 កាលពីឆ្នាំ1987 និងបានធានាថា ការប្រកួតជើងទី2 គ្រាន់តែការប្រកួតបង្គ្រប់កិច្ចប៉ុណ្ណោះ។
លោក Guardiola គ្រូបង្វឹករបស់ក្រុម Man City បានឱ្យដឹងថា៖ «ពិតណាស់ យើងស្ថិតក្នុងវគ្គផ្តាច់ព្រ័ត្ររួចជាស្រេច។ យើងត្រូវតែលេងការប្រកួតជើងទី2 ហើយយើងនឹងលេងដោយប្រុងប្រយ័ត្ន។ យើងពិតជារីករាយណាស់ក្នុងការទៅវគ្គផ្តាច់ព្រ័ត្រម្តងទៀត»។ គ្រូបង្វឹករូបនេះបានបន្ថែមទៀតថា៖ «វាមិនងាយស្រួលនោះឡើយក្នុងការលេងក្នុងការប្រកួតបែបនេះ។ យើងបាននិយាយពីមុនពេលការប្រកួតឱ្យចាត់ទុកជាការប្រកួតសំខាន់ ហើយយើងបានចាប់ផ្តើមយ៉ាងល្អ»៕
ប្រភពពី៖ Channel News Asia
January 10, 2019
ស្លៀកពាក់មិនសមរម្យ និងបង្ហាញក្បាច់រាំស្រើបស្រាលដាក់កុមារ ត្រូវប៉ូលីសថៃចាប់ខ្លូន និងបិទហាងបណ្ដោះអាសន្ន
តាមរយៈសារព័ត៌មានថៃ Mgronline បានចេញផ្សាយនៅពេលថ្មីៗនេះ បានឱ្យដឹងថា អាហារដ្ឋានល្បីឈ្មោះនៅក្នុងផ្សារ ហួនុម មានឈ្មោះថា « สถานีมีหอย » ( កន្លែងមានគ្រំ ) ដែលជាហាងលក់នូវប្រភេទអាហារតំបន់ភូមិភាគឦសាន គ្រឿងសមុទ្រគ្រប់ប្រភេទ និងជាពិសេសប្រភេទពួក គ្រំ ងាវ អយស្ទើ លៀស និងខ្យង ត្រូវបានមន្ត្រីប៉ូលីសថៃ ហាមឃាត់ និងប្រកាសបិទហាងបណ្ដោះអាសន្ន ក្រោយពីបុគ្គលិកហាងដែលជាភេទទី3 បានបង្ហាញក្បាច់រាំលើកអាហារយ៉ាងស្រើបស្រាលដាក់កុមារ រហូតដល់អតិថិជនមិនពេញចិត្តដាក់ពាក្យប្ដឹង។
ជាទូទៅគេមើលឃើញថា នៅក្នុងហាងល្បីឈ្មោះខាងលើនេះ មានបុគ្កលិកជាបុរសភេទី 3 ស្លៀកពាក់មិនសមរម្យប៉ុន្មានទេ បានបញ្ចេញក្បាច់រាំតាមចង្វាក់ភ្លេងយ៉ាងស្រើបស្រាល លើកអាហារជូនភ្ញៀវដែលបានមកពិសានៅក្នុងហាង ។ ហាងនេះចាប់ផ្ដើមបើកដំណើរការណ៍នៅអំឡុងខែ មេសា ឆ្នាំ 2015 និងបានកែប្រែរបៀបនៃការលក់ឱ្យមានភាពទាក់ទាញតាមរយៈក្រុមបុរសភេទទី 3 នៅអំឡុង 1 ឆ្នាំចុងក្រោយនេះទេ។
បើតាមប្រភេទព័ត៌មានបានបញ្ជាក់ទៀតថា បុរសភេទី 3 ចំនួន 5 នាក់ត្រូវបានប៉ូលីសថៃណែនាំខ្លួន និងមិនឱ្យប្រព្រឹត្តអំពើបែបនេះដាក់កុមារបន្ដទៀត៕

January 10, 2019