Category: សង្គម និងសេដ្ឋកិច្ច

Murray ធ្លាក់ចេញពី Australian Open ក្រោយពីការវាយបកដ៏រំភើប
កីឡាករវាយកូនបាល់ Andy Murray បានចាកចេញទាំងការបើកចំហទ្វារឲ្យមានការវិលត្រឡប់មួយទៅកាន់ទីលាន Melbourne Park ក្រោយពីបានរងបរាជ័យក្រោមស្នាដៃរបស់កីឡាករ Roberto Bautista Agut ក្នុងការប្រកួតដ៏ស្វិតស្វាញចំនួន 5សិត ក្នុងជុំទី1 នៃព្រឹត្តិការណ៍ Australian Open កាលពីថ្ងៃចន្ទ។
ក្រោយពីបានបញ្ជាក់ថា យុទ្ធនាការនេះអាចនឹងក្លាយជាយុទ្ធនាការចុងក្រោយក្នុងនាមជាកីឡាករអាជីព ដោយសារតែមានបញ្ហាឈឺចាប់ត្រង់ចង្កេះ Murray បានលេងជាមួយនឹងការខិតខំព្យាយាមអស់ពីសមត្ថភាពរបស់គេ តាមរយៈការវាយបកពីការតាមក្រោយ 2សិត មុនពេលចាញ់ទៅវិញក្នុងលទ្ធផល 6-4, 6-4, 6-7 (5) 6-7 (4) និង6-2 នៅក្រោមពន្លឺភ្លើង នៅលើទីលាន Melbourne Arena។
អតីតកីឡាករមានចំណាត់ថ្នាក់លេខ1 លើពិភពលោករូបនេះ បានធ្វើឲ្យការប្រកួតរបស់គេស្ថិតក្នុងភាពស្វិតស្វាញ ខណៈដែលរូបគេបានបង្ខំឲ្យការប្រកួតឈានដល់សិតកាត់សេចក្តី និងបន្ទាប់មកបានធ្វើឲ្យអ្នកគាំទ្រសង្ឃឹមថា រូបគេអាចនឹងបង្កើតឲ្យមានការរំភើបម្តងទៀតនៅអូស្ត្រាលី។
ម្ចាស់ជើងឯក Grand Slam 3 សម័យកាលរូបនេះ បាននិយាយនៅលើទីលានប្រកួតថា៖ «ខ្ញុំប្រហែលជានឹងជួបអ្នកទាំងអស់គ្នាម្តងទៀត ខ្ញុំនឹងធ្វើរាល់អ្វីៗទាំងអស់តាមដែលអាចធ្វើបាន។ ប្រសិនបើខ្ញុំចង់ធ្វើម្តងទៀត ខ្ញុំនឹងត្រូវតែមានការវះកាត់ដ៏ធំមួយ ដែលមិនមានការធានាថា ខ្ញុំអាចវិលទៅប្រកួតបានវិញឡើយ ប៉ុន្តែ ខ្ញុំនឹងខំប្រឹងឲ្យអស់ពីសមត្ថភាព» ៕
January 15, 2019
ហេតុផលសំខាន់3យ៉ាង ដែលអ្នកត្រូវដឹងពាក់ព័ន្ធនឹងកម្រិតសម្ពាធឈាម
អ្នកត្រូវវាស់សម្ពាធឈាមគ្រប់ពេលដែលទៅជួបគ្រូពេទ្យ តែថ្មីៗនេះគោលការណ៍ក្នុងការវិនិច្ឆ័យរោគសម្ពាធឈាមមានការប្រែប្រួលជាលើកដំបូងក្នុងជុំ14ឆ្នាំ។ តាមរយៈគោលការណ៍ថ្មីនេះបានចង្អុលបញ្ជាក់ថា អ្នកណាក៏ដោយដែលមានកម្រិតសម្ពាធឈាមច្រើនជាង130/80 នឹងត្រូវពិចារណាថា កើតជំងឺលើសឈាម តែកម្រិតសម្ពាធឈាមធម្មតា មិនប្រែប្រួលទេគឺ 120/80ដដែល ដែលតួលេខខាងលើបញ្ជាក់ពីសម្ពាធឈាម ស៊ីស្តូលិក (នៅពេលបេះដូងបាញ់ឈាមចូលទៅក្នុងសរសៃឈាម) និងតួលេខខាងក្រោម គឺកម្រិតសម្ពាធឈាម ដៃអេស្តូលិក (នៅពេលបេះដូងបន្ធូរខ្លួនមកវិញ)។
កាលពីពេលមុននេះ កម្រិតសម្ពាធឈាមស៊ីស្តូលិក ស្ថិតក្នុងចន្លោះ 120 – 139 នឹងមិនត្រូវបានវិនិច្ឆ័យថា កើតជំងឺលើសឈាមទេ រហូតទាល់តែខ្ពស់ជាង 140/90…តែសម្រាប់គោលការណ៍ថ្មីវិញ អ្នកដែលមានកម្រិតសម្ពាធឈាមស៊ីស្តូលិកក្នុងចន្លោះ 130 – 139 ឬកម្រិតសម្ពាធឈាមដៃអេស្តូលិកស្ថិតក្នុងចន្លោះ 80 – 89 នឹងត្រូវពិចារណាថា កើតជំងឺលើសឈាមរយៈទី1 ខណៈដែលកម្រិតសម្ពាធឈាម 140/90 នឹងឈានចូលជំងឺលើសឈាមរយៈទី2 និងកម្រិតសម្ពាធឈាម 180/120 នឹងក្លាយជាជំងឺលើសឈាមកម្រិតគ្រោះថ្នាក់។
កម្រិតសម្ពាធឈាម គឺជាអ្នកបញ្ជាក់ប្រាប់ពីសុខភាពដែលសំខាន់ខ្លាំងសម្រាប់ខ្លួនអ្នក និងគ្រូពេទ្យទាំងឡាយ។ ទោះជាការប្រែប្រួលនេះនឹងសាងនូវភាពច្របូកច្របល់បន្តិចមែន តែក៏មានតម្លៃសម្រាប់ការរៀនយល់ដឹងអំពីកម្រិតសម្ពាធឈាមរបស់ខ្លួនឯងដែរ។
1. ជំងឺលើសឈាមគ្មានអាការបង្ហាញឡើងឱ្យឃើញច្បាស់លាស់ជានិច្ចនោះទេ : ក្នុងករណីដែលកម្រិត ជំងឺលើសឈាមអាចហុចផលឱ្យមានអាការតឹងណែនក្នុងទ្រូង ពិបាកដកដង្ហើមឈឺក្បាល ឬមានហូរឈាមច្រមុះ ប៉ុន្តែក្នុងករណីភាគច្រើនបែរជាមិនបង្ហាញអាការណាមួយសោះទៅវិញ ដែលនេះហើយគឺជាឃាតករលាក់មុខដ៏ពិតប្រាកដនោះ។ យ៉ាងណាក៏ដោយ វិធីដែលល្អបំផុតនោះ លោកអ្នកគួរពិនិត្យកម្រិតសម្ពាធឈាមនៅពេលយប់ ដើម្បីឱ្យឃើញច្បាស់ពិតប្រាកដ មុននឹងចូលទៅទទួលការព្យាបាល។
2. ជំងឺលើសឈាម គឺជាដើមហេតុរបស់ជំងឺបេះដូង : និងបើសិនបណ្ដោយទុកចោលមិន ព្យាបាល វានឹងធ្វើឱ្យអវយវៈផ្សេងទៀតខូចខាតទៅតាមដែរ។ ជំងឺលើសឈាម គឺជាបច្ច័យប្រថុយប្រថានសម្រាប់ជំងឺជាច្រើន ដូចជា ជំងឺបេះដូង ជំងឺសរសៃឈាមខួរក្បាល សភាវគាំងបេះដូង អាការចេញឈាមនៅក្នុងខួរក្បាល និងគាំងក្រលៀន អាចនឹងត្រូវចូលទៅទទួលការលាងក្រលៀននៅទីបំផុត។ សួរថា ហេតុអ្វីបានហុចផលប៉ះពាល់ធ្ងន់ធ្ងរដល់ថ្នាក់ហ្នឹង? ព្រោះថាគ្រប់ពេលដែលបេះដូងធ្វើការបឺតបាញ់ឈាមក៏នឹងបឺតបាញ់ដោយកម្លាំងរុញច្រានខ្លាំង ដែលមានន័យថា បេះដូងត្រូវធ្វើការខ្លាំងធ្វើឱ្យសាច់ដុំបេះដូងក្រាស់ៗ និងបឺតបាញ់ឈាមបានយ៉ាងមានប្រសិទ្ធភាពកាន់តែពិបាកជាងមុនហ្នឹងឯង។
3. អ្នកអាចព្យាបាលជំងឺលើសឈាមបានតាមរយៈការផ្លាស់ប្ដូររបៀបរបបរស់នៅរបស់ខ្លួនឯងតាំងពីដំបូងៗ : នៅពេលកម្រិតសម្ពាធឈាមរបស់អ្នកស្ថិតក្នុងកម្រិត 120-129/80 លោកអ្នកមិនទាន់ចាំបាច់ប្រញាប់ប្រញាល់ចូលទៅទទួលការព្យាបាលទេ តែគ្រូពេទ្យរបស់អ្នកអាចនឹងណែនាំឱ្យអ្នកផ្លាស់ប្ដូរឡាយហ្វ៍ស្តាយល៍មួយចំនួនដូចជា ការទទួលទានអាហារ ការតមភេសជ្ជៈអាល់កុល ឬបន្ថែមលំដាប់ការហាត់ប្រាណជាដើម។ ពេលតួលេខចាប់ផ្ដើមខ្ពស់ឡើង ការផ្លាស់ប្ដូររបៀបរបររស់នៅក៏ក្លាយជារឿងចាំបាច់ រួមទាំងលោកអ្នកអាចញ៉ាំថ្នាំរួមជាមួយផង តែគោលបំណងរបស់គោលការណ៍ថ្មីនេះ គឺដើម្បីការពារភាពធ្ងន់ធ្ងរដែលអាចកើតឡើងដោយការសង្កត់ធ្ងន់លើការព្យាបាលតាំងពីដំបូងៗ។
អ្នកជំងឺអាចគ្រប់គ្រងកម្រិតសម្ពាធឈាមរបស់ខ្លួនបានដោយការជ្រើសរើសទទួលទានអាហារដែលមានប្រយោជន៍ និងឧស្សាហ៍ហាត់ប្រាណជាប់ជាប្រចាំ។ ក្រៅពីនេះលោកអ្នកនៅគួរហាត់រៀនវាស់កម្រិតសម្ពាធឈាមដោយខ្លួនឯងនៅផ្ទះផងដែរ។ យ៉ាងណាក៏ដោយ បើលោកអ្នកមានចំណុចងឿងឆ្ងល់ ឬសង្ស័យពាក់ព័ន្ធនឹងសម្ពាធឈាម ឬវិធីវាស់នោះ ក៏គួរតែប្រឹក្សាជាមួយគ្រូពេទ្យ៕
January 14, 2019
ការរៀបផែនការមើលថែទាំសុខភាពសមាជិកក្នុងគ្រួសារ
ការរៀបចំផែនការមើលថែទាំសុខភាពខ្លួនឯង និងសមាជិកគ្រួសារគឺជារឿងដែលមានគុណតម្លៃជាទីបំផុត ព្រោះក្រៅពីជារឿងដែលជួយជំរុញឱ្យយើងខ្លួនឯង និងសមាជិកក្នុងគ្រួសារកើតភាពក្លៀវក្លាស្វាហាប់ក្នុងការមើលថែទាំសុខភាពហើយនោះ វាថែមទាំងជារឿងដែលជួយឱ្យកើតមានសម្ពន្ធភាពដ៏ល្អរវាងសមាជិកគ្រប់គ្នាក្នុងក្រុមគ្រួសារ កើតសេចក្តីស្រឡាញ់ក្នុងក្រុមគ្រួសារ ដែលនឹងជួយដោះស្រាយបញ្ហាផ្សេងៗបានយ៉ាងល្អ និងនាំឆ្ពោះទៅរកការមានគុណភាពជីវិតដែលល្អនាពេលអនាគតបានថែមទៀតផង។
គុណតម្លៃរបស់ការរៀបផែនការមើលថែទាំសុខភាពរបស់សមាជិកក្នុងគ្រួសារពាក្យថា “សុខភាពល្អ” នៅលើមនុស្សម្នាក់នោះអាចនឹងខុសប្លែកពីគ្នាតាមតែសភាវសង្គម ឬរូបបែបរបស់ជីវិតដែលខុសប្លែកពីគ្នា តែជារួមទៅសុខភាពល្អយ៉ាងហោចណាស់ក៏ត្រូវតែមានន័យពីភាពឥតខ្ចោះរបស់ទាំងរាងកាយ និងផ្លូវចិត្ត ដោយរឿងដែលកើតឡើងនេះនឹងកើតបានដោយសារការមើលថែទាំយកចិត្តទុកដាក់លើប្រព័ន្ធផ្សេងៗដែលជាផ្នែកដ៏សំខាន់របស់រាងកាយ។
ការដែលនឹងមានសុខភាពល្អបាននោះ មិនថាតែជាសុខភាពរបស់ខ្លួនឯង ឬសមាជិកក្នុងគ្រួសារនោះឡើយ មិនមែនជារឿងដែលកើតឡើងបានដោយភាពចៃដន្យនោះទេ តែចាំបាច់ត្រូវមានការរៀបផែនការក្នុងការមើលថែទាំសុខភាពជាមុនដែលនឹងជួយឱ្យកើតផលល្អដូចតទៅនេះ ៖
– អាចនឹងកំណត់វិធីការ ឬជ្រើសរើសរូបបែបដែលស័ក្តិសមជាមួយដំណើរការនៃជីវិតរបស់យើងខ្លួនឯង ឬសមាជិកក្នុងក្រុមគ្រួសារបានយ៉ាងស័ក្តិសម។
– អាចនឹងកំណត់អំឡុងពេលក្នុងការមើលថែទាំសុខភាពបានយ៉ាងស័ក្តិសម អាចនឹងមានកិច្ចការងារហាត់ប្រាណនៅពេលព្រឹក ឬចំពោះគ្រួសារខ្លះអាចនឹងមានពេលទំនេរនៅពេលល្ងាចក៏អាចនឹងកំណត់កិច្ចការងារបង្កើនសុខភាពនៅពេលល្ងាចក៏បាន ឬអាចនឹងកំណត់អំឡុងពេលក្នុងការពិនិត្យសុខភាពរបស់សមាជិកក្នុងគ្រួសារប្រចាំឆ្នាំបានយ៉ាងស័ក្តិសម។
– ជាការប្រុងប្រយ័ត្នសុខភាពទាំងរបស់ខ្លួនឯង និងសមាជិកគ្រួសារ មិនឱ្យឈឺថ្កាត់ដោយជំងឺផ្សេងៗ ជាការសាងសុខភាព ដែលនឹងល្អជាងត្រូវមកជួសជុលសុខភាព ឬព្យាបាលនៅពេលក្រោយ។
– ជួយក្នុងការរៀបផែនការរឿងសេដ្ឋកិច្ច និងហិរញ្ញវត្ថុក្នុងគ្រួសារបានយ៉ាងល្អប្រសើរ ដោយសារតែមិនចាំបាច់ត្រូវចាយវាយប្រាក់ទៅលើការព្យាបាលខ្លួន។
– ធ្វើឱ្យគុណភាពជីវិតទាំងរបស់ខ្លួនឯង និងសមាជិកក្នុងក្រុមគ្រួសារល្អប្រសើរឡើង។
គោលការណ៍ក្នុងការរៀបផែនការថែទាំសុខភាពរបស់សមាជិកក្នុងក្រុមគ្រួសារ
– ពិនិត្យមើលរូបបែបការរស់នៅរបស់សមាជិកក្នុងក្រុមគ្រួសារថា តើយ៉ាងណាដែរ? ដោយសារតែការមើលថែទាំសុខភាពរបស់សមាជិកគ្រួសារនេះ មិនមែនជាការធ្វើឡើងដោយសមាជិកណាម្នាក់តែម្នាក់នឹងទទួលបានជោគជ័យនោះទេ ប៉ុន្តែត្រូវអាស្រ័យលើការសហការរួមដៃពីសមាជិកក្នុងគ្រួសារទាំងមូលជាសំខាន់។
– តាមរយៈព័ត៌មានដែលទទួលបាន នាំមកកំណត់ជាផែនការក្នុងការមើលថែទាំសុខភាពរបស់សមាជិកក្នុងគ្រួសារ ដែលអាចធ្វើឡើងចំពោះសមាជិកណាម្នាក់ ឬអាចនឹងធ្វើឡើងជារួមទាំងអស់។
– នៅពេលកំណត់ផែនការក្នុងការមើលថែទាំសុខភាពរបស់សមាជិកគ្រួសារបានហើយ ត្រូវដំណើរការទៅតាមនោះ និងវាយតម្លៃជាដំណាក់ៗថា តើសមាជិកទាំងអស់ក្នុងគ្រួសារអាចប្រតិបត្តិការតាមផែនការនោះបានដែរឬទេ ឬក៏យ៉ាងណា?
សូមរៀបចំផែនការក្នុងការមើលថែទាំងសុខភាពផ្លូវកាយ និងផ្លូវចិត្តឱ្យបានល្អទាំងខ្លួនអ្នកផ្ទាល់ និងសមាជិកជាទីស្រឡាញ់នៅក្នុងគ្រួសាររបស់អ្នកឱ្យបានល្អ និងស័ក្តិសមជាមួយនឹងស្ថានភាពជាក់ស្តែងនៃគ្រួសាររបស់អ្នក ដើម្បីទទួលបាននូវជីវិត ដែលប្រកបដោយគុណភាពល្អនាពេលបច្ចុប្បន្ន និងនាពេលអនាគតខាងមុខ៕
January 14, 2019
5ឆ្នាំទៅ 10ឆ្នាំទៀត បច្ចេកវិទ្យាមិនទាន់ប៉ះពាល់ខ្លាំងដល់ធនធានមនុស្សក្នុងវិស័យហិរញ្ញវត្ថុទេ
វិស័យហិរញ្ញវត្ថុនៅកម្ពុជាកំពុងមានស្ថានភាពល្អប្រសើរ ស្របពេលដែលគ្រឹះស្ថានមីក្រូហិរញ្ញវត្ថុ និងធនាគារបានពង្រីកខ្លួនកាន់តែធំឡើងៗជាមួយសាខាស្ទើរគ្រប់ទីកន្លែងទាំងតំបន់ជនបទ និងទីក្រុង។ ជាមួយនឹងការពង្រីកទីផ្សាររបស់គ្រឹះស្ថានហិរញ្ញវត្ថុនេះធនធានជាច្រើនបានក្លាយជាតម្រូវការចាំបាច់សម្រាប់ផ្គត់ផ្គង់ឱ្យដំណើរការរបស់ស្ថាប័នធំៗ ដែលក្នុងនោះធនធានមនុស្សក៏ជាផ្នែកមួយមិនអាចខ្វះបានផងដែរសម្រាប់សម័យបច្ចេកវិទ្យា។
ទន្ទឹមនឹងភាពវិជ្ជមាននៃការអភិវឌ្ឍនេះ ធនធានមនុស្សផ្នែកធនាគារក៏ត្រូវបានគេមើលឃើញថាអាចនឹងប្រឈមបញ្ហាជាច្រើនផងដែរនៅពេលដែលបដិវត្ដន៍ឧស្សាហកម្មថ្មីចូលមកដល់ ដែលម៉ាស៊ីនចាប់ផ្តើមចូលជំនួសផ្នែកខ្លះៗនៃធនាគារ និងគ្រឹះស្ថានហិរញ្ញវត្ថុ ដែលជាចរន្តមួយប៉ះពាល់ដល់ធនធានមនុស្សដែលកំពុងសិក្សានេះ។ បើទោះបីជាយ៉ាងនេះក្តី អ្នកជំនាញនៅតែមើលឃើញថាកម្ពុជានៅត្រូវការអ្នកជំនាញហិរញ្ញវត្ថុជាច្រើនផ្សេងទៀតដើម្បីបំពេញតម្រូវការនៅក្នុងស្រុកបើទោះបីជាបច្ចេកវិទ្យាត្រូវបានគេដាក់ឱ្យប្រើប្រាស់នៅតាមធនាគារ និងគ្រឹះស្ថានមីក្រូហិរញ្ញវត្ថុជាច្រើននៅកម្ពុជាក៏ដោយ។
បណ្ឌិត ផុន ណារិន នាយកវិទ្យាស្ថាន ពាណិជ្ជសាស្ត្រ អេស៊ីលីដា បានឱ្យដឹងថា បច្ចុប្បន្ននេះធនាគារ និងមីក្រូហិរញ្ញវត្ថុត្រូវការបុគ្គលិកច្រើនគួរសមដែរដើម្បីបម្រើការងារលើវិស័យនេះ បើទោះបីជាមានវត្តមានបច្ចេកវិទ្យាក្នុងវិស័យហិរញ្ញវត្ថុ (FINTECH)ក៏ដោយ។ ជាក់ស្តែងបើគិតត្រឹមតែធនាគារអេស៊ីលីដា ភីអិលស៊ី តែមួយ កាលពីមិនទាន់រៀបចំប្រព័ន្ធ Fintechធនាគារត្រូវការជ្រើសរើសបុគ្គលិកបន្ថែមចន្លោះពី20ភាគរយ ទៅ30ភាគរយជារៀងរាល់ឆ្នាំ។ ប្រសិនបើគិតពីចំនួនមធ្យមសម្រាប់បុគ្គលិក 1ម៉ឺននាក់ ហើយយើងត្រូវការជាមធ្យមប្រហែល 25ភាគរយនោះយើងត្រូវការបុគ្គលិកប្រមាណ 2,500នាក់បន្ថែម។ ក្រោយពេលមានវត្តមាន Fintech យើងនៅតែបន្តជ្រើសរើសបុគ្គលិកច្រើនដដែល គ្រាន់តែមានការថយចុះបន្តិចប៉ុណ្ណោះ។
លោកបណ្ឌិត ផុន ណារិន បាននិយាយថា៖ “បើគិតពីធនាគារនៅទូទាំងប្រទេស ប្រសិនបើតម្រូវការធនធានមនុស្សកើនឡើងត្រឹមតែ 5ភាគរយនោះ មានន័យថា តម្រូវការទីផ្សារផ្នែកហិរញ្ញវត្ថុនៅត្រូវការបុគ្គលិកថ្មីពីចន្លោះ 4,000នាក់ ទៅ 5,000នាក់”។
អ្នកគ្រប់គ្រងស្ថាប័នអប់រំទាក់ទងនឹងវិស័យហិរញ្ញវត្ថុ និងពាណិជ្ជកម្មខាងលើបានលើកឡើងផងដែរថា បើតាមទស្សនៈរបស់លោកផ្ទាល់រយៈពេល5ឆ្នាំ ទៅ10ឆ្នាំទៀត Fintechមិនអាចវាយលុកខ្លាំងលើទីផ្សារការងារផ្នែកហិរញ្ញវត្ថុនៅក្នុងគ្រឹះស្ថានមីក្រូហិរញ្ញវត្ថុ និងធនាគារនៅកម្ពុជានោះទេ ព្រោះបច្ចុប្បន្ននេះមានហេតុផលសំខាន់ៗមួយចំនួនដែលធ្វើឱ្យយើងនៅតែប្រតិបត្តិការធនាគារបែបប្រពៃណីនៅកម្ពុជា។ ចំណុចសំខាន់ទី1 គឺបច្ចុប្បន្ននេះមានតែធនាគារធំៗចំនួន 2-3ប៉ុណ្ណោះដែលប្រើប្រាស់បណ្តាញបច្ចេកវិទ្យាក្នុងវិស័យធនាគារនេះសម្រាប់ប្រតិបត្តិការធនាគាររបស់ខ្លួន ហេតុនេះយើងត្រូវចំណាយពេលវេលាយូរបន្ថែមទៀតដើម្បីឱ្យធនាគារកាន់តែច្រើនឡើងប្រើប្រាស់ Fintech។ ចំណុចទី2 គឺប្រជាជន ឬអតិថិជនបច្ចុប្បន្នភាគច្រើនមិនទាន់ទុកចិត្តទាំងស្រុង 100ភាគរយលើប្រព័ន្ធបច្ចេកវិទ្យានោះទេហេតុនេះទើបប្រជាជននៅចូលចិត្តប្រើប្រាស់ប្រព័ន្ធធនាគារបែបប្រពៃណីនៅឡើយ។ ចំណុចសំខាន់ម្យ៉ាង-ទៀតនោះគឺ គ្រឹះស្ថានមីក្រូហិរញ្ញវត្ថុមួយចំនួនដែលកំពុងប្រែខ្លួនទៅជាធនាគារក៏ស្ថិតក្នុងកម្រិតមួយនៅឡើយចំពោះបញ្ហាបច្ចេកវិទ្យានេះ ហេតុនេះទើបមិនទាន់អាចទៅលឿនបានទេ។ ជារួមបើមើលតាមទំនោររបស់ស្រុកយើងសព្វថ្ងៃនេះឃើញថា 10ឆ្នាំទៀត ផលប៉ះពាល់របស់ Fintechមកលើធនធានមនុស្សផ្នែកធនាគារមានប្រមាណត្រឹមតែ 10ភាគរយ ទៅ20ភាគរយតែប៉ុណ្ណោះ។
លោកសាស្ត្រាចារ្យ ជី គឹមអុី ព្រឹទ្ធបុរសនៃមហាវិទ្យាល័យ វិទ្យាសាស្ត្រ និងបច្ចេកវិទ្យា នៃសាកលវិទ្យាល័យបៀលប្រាយ បានបញ្ជាក់ថា តាមប្រវត្តិនៃការធ្វើបដិវត្តន៍ឧស្សាហកម្ម គេត្រូវចំណាយពេលមួយសតវត្សរ៍ដើម្បីធ្វើឱ្យបានពេញលេញ ហេតុនេះសម្រាប់កម្ពុជាយើងក៏ត្រូវការពេលវេលាផងដែរ។ លើវិស័យណាក៏ដោយ យើងចាំបាច់ត្រូវដើរបន្តិចម្តងៗតាមរយៈការជំរុញការបណ្តុះបណ្តាលលើផ្នែកបច្ចេកវិទ្យា និងបណ្តុះបណ្តាលឱ្យយល់ច្បាស់ពីការផ្លាស់ប្តូររបៀបធ្វើការងារដោយបញ្ចូលបច្ចេកវិទ្យាបន្តិចម្តង។ ក្រោយពេលដែលយើងបណ្តុះបណ្តាលបាននូវធនធានមនុស្សខ្លាំងហើយទើបយើងអាចអនុវត្តការងារបានដោយរលូន ព្រោះបើទោះបីជាយើងប្រើប្រាស់បច្ចេកវិទ្យាក៏ដោយក៏ត្រូវការមនុស្សជាអ្នកគ្រប់គ្រងដែរ។
លោក ជី គឹមអុី បាននិយាយថា៖ “ពិភពលោកចាប់ផ្តើមធ្វើស្វ័យប្រវត្តិកម្ម (automation) លើផ្នែកផលិតកម្ម និងសេវាកកម្ម តែចរន្តនេះអាចធ្វើទៅមិនសូវជាបានស្រុះគ្នានោះទេ វាទាមទារឱ្យមានការចំណាយពេលវេលាដើម្បីត្រៀមទាំងធនធាន និងការអប់រំឱ្យបានល្អជាមុនសិន”។
អ្នកជំនាញខាងលើបានបញ្ជាក់ផងដែរថា បន្តិចម្តងៗកម្ពុជាអាចនឹងអនុវត្តបានល្អលើការប្រើប្រាស់បណ្តាញបច្ចេកវិទ្យាទាំងផ្នែកផលិតកម្ម ពាណិជ្ជកម្ម និងហិរញ្ញវត្ថុ តែមិនមែនក្នុងពេលត្រឹមតែ 4-5ឆ្នាំទៀតទេ តែវាអាចត្រូវការពេលវេលាច្រើនឆ្នាំទៀតដែរដើម្បីបញ្ជ្រាបប្រព័ន្ធថ្មីៗទាំងអស់នេះឱ្យបានគ្រប់ទីកន្លែង។ ម្យ៉ាងវិញទៀត បើទោះបីជាការធ្វើស្វ័យប្រវត្តិកម្មប៉ះពាល់ដល់ការងារមនុស្សក៏ដោយ តែមនុស្សក៏នៅតែមានឱកាសធ្វើការងារបានល្អដដែល គ្រាន់តែផ្លាស់ប្តូរពីការងារចាស់ទៅការងារថ្មីៗតែប៉ុណ្ណោះ៕
January 14, 2019
រិទ្ធ អូមេហ្គា អ្នកដឹកនាំសម្ដែងនៅផលិតកម្មថោនត្រូវគេគំរាមបាញ់សម្លាប់
ជារឿងភ្ញាក់ផ្អើល ខណៈដែលអ្នកដឹកនាំសម្ដែងនៅផលិតកម្មថោន រិទ្ធ អូមេហ្គា បានLive វីដេអូកាលពីយប់មិញថា ក្មេងពាលមួយក្រុមបានកាប់បុគ្គលិកលោកបែកមួកសុវត្ថិភាពជាពីរ ក្រោយចេញពីធ្វើការនៅកោះពេជ្រ វេលាម៉ោង3ទៀបភ្លឺនាថ្ងៃទី12 ខែមករា ឆ្នាំ2019កន្លងទៅថ្មីៗនេះ។ លោកថា បើសិនជាគាត់គ្មានមួកសុវត្ថិភាពការពារទេនោះប្រហែលជាស្លាប់ហើយពេលនេះ។
លោក រិទ្ធ អូមេហ្គា ថាជនបង្កហេតុខាងលើបានគំរាមបាញ់សម្លាប់លោកថែមទៀតផង ដោយពួកគេបានបោះពាក្យសម្ដីមកលើកូនចៅថា«ពួកហែងត្រៀមធាតុត្រៀមកោដ្ឋឲ្យហើយទៅ»។ លោកថា រឿងកើតឡើងចំពោះលោកនិងកូនចៅកើតឡើងដោយសារតែការប្រជែងរឿងរកស៊ី។ អ្នកដឹកនាំសម្ដែងមួយនេះ បញ្ជាក់ថា « មួយទៀត ឮអ្នកឯងថាចង់បាញ់ខ្ញុំបំបាក់ជើងមែន? អាងអី? អ្នកឯងកំពុងមើលងាយសមត្ថកិច្ចមើលងាយរាជជរដ្ធាភិបាល នឹង ច្បាប់ក្នុងប្រទេសកម្ពុជាហើយ នឹងថ្នាក់ដឹកនាំហើយ។ ប្រយ័ត្នពាក្យសម្តីអ្នកឯង នឹងទង្វើអ្នកឯង សូមកុំបំពានមកខ្ញុំនឹងហាងខ្ញុំទៀត ខ្ញុំរកស៊ីសុំតែម៉ាសុខ នឹងរកស៊ីដោយសុច្ចរឹត ប្រឹងបង្កើតអ្វីដែលជាគំនិតខ្លួនឯង។ ខ្ញុំបានដាក់ពាក្យបណ្តឹងបង្កក់ហើយៗ បើខ្ញុំ នឹងគ្រួសារខ្ញុំមានបញ្ហាអីកើតឡើងគឺខាងអ្នកឯងជាអ្នកបង្ក។ ព្រោះខ្ញុំជាប្រជាពលរដ្ធស្លូតត្រង់ តែងតែជួយការងារសង្គម នឹងសប្បុរសធម៌ មិនដែលដើរបង្ករជំលោះអ្នកណា រឺចារឹកពាលចង់សំលាប់អ្នកណាដូចអ្នកឯងទេ។ សំខាន់ប្រទេសមានច្បាប់ !!! »។
គួរបញ្ជាក់ផងដែរថា បន្ទាប់ពីជួបហេតុការណ៍ដូច្នេះ រិទ្ធ អូមេហ្គា និងកូនចៅបានទៅដាក់ពាក្យប្ដឹងជនល្មើសរួចរាល់ហើយដើម្បីចាត់ការទៅតាមផ្លូវច្បាប់ ដោយខាងលោក បានថតរថយន្ត និងសកម្មភាពជនបង្ករហេតុទុកជាភ័ស្ដតាងផងដែរ។ រិទ្ធ អូមេហ្គា បានរៀបរាប់ថា ចំពោះអត្តសញ្ញាណមេធំនៅពីក្រោយការគំរាមបាញ់សម្លាប់នេះលោក សុំលាក់សិនគ្រប់យ៉ាងនឹងបង្ហាញក្នុងពេលឆាប់ព្រោះរឿងនេះបានទៅដល់ដៃសមត្ថកិច្ចហើយ៕
January 14, 2019
ក្រូចថ្លុងកោះទ្រង់ ខេត្តក្រចេះមានទីផ្សារខ្លាំង បន្ទាប់ពីទទួលបានឈ្មោះជាផលិតផលសម្គាល់ភូមិសាស្ត្រ
ក្រោយពីទទួលបានវិញ្ញាបនបត្របញ្ជាក់ផលិតផលសម្គាល់ភូមិសាស្ត្រ(GI)កាលពីខែមិថុនាឆ្នាំមុន ក្រូចថ្លុងកោះទ្រង់ ខេត្តក្រចេះទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរជាតិ ទាំងក្នុងតំបន់ និងនៅតាមបណ្តាខេត្តនានា។
ក្រូចថ្លុងកោះទ្រង់ ខេត្តក្រចេះ ជាផលិតផលសម្គាល់ភូមិសាស្ត្រទី3 បន្ទាប់ពីម្រេចខេត្តកំពត និងស្ករត្នោតកំពង់ស្ពឺ។ ក្រូចថ្លុងកោះទ្រង់ ខេត្តក្រចេះ គឺជាផលិតផលដំណាំហូបផ្លែប្រពៃណី ហើយវាមានសក្តានុពលខ្ពស់ក្នុងការលើកកម្ពស់ប្រាក់ចំណូលប្រជាជនក្នុងតំបន់ និងជួយបង្កើនចំនួនភ្ញៀវទេសចរទៅកាន់រមណីយដ្ឋានកោះទ្រង់ ខេត្តក្រចេះទៀតផង។
ចាប់តាំងពីក្រូចថ្លុងកោះទ្រង់ ត្រូវបានទទួលស្គាល់ជាផលិតផលសម្គាល់ភូមិសាស្ត្រមក ប្រជាពលរដ្ឋនៅក្នុងសង្កាត់កោះទ្រង់ ខេត្តក្រចេះចាប់ផ្តើមពង្រីកការដាំដុះបន្ថែមទៀតដើម្បីផ្គត់ផ្គង់ និងបំពេញតម្រូវការទីផ្សារ។ នេះបើយោងតាមលោកស្រី គាន រីណា ប្រធានសមាគមអ្នកដាំក្រូចថ្លុងកោះ-ទ្រង់ក្រចេះ។
លោកស្រី រីណា មានប្រសាសន៍ថា សព្វថ្ងៃសមាគមរបស់លោកស្រីមានសមាជិកចំនួន 226គ្រួសារ ដែលមានក្រូចថ្លុងប្រមាណជាង 1ម៉ឺនដើម ដោយឡែកក្រូចថ្លុងដែលកំពុងផ្តល់ផលមានប្រមាណតែជាង 2ពាន់ដើមប៉ុណ្ណោះ។
លោកស្រី រីណា បន្ថែមទៀតថា ទនិ្នផលរបស់ក្រូចថ្លុងកោះទ្រង់ អាស្រ័យលើអាយុកាលរបស់ដើមក្រូចដោយលោកស្រីពន្យល់ថា ដើមក្រូចថ្លុងដែលលូតលាស់ថ្មីៗ ផ្តល់ផលឆ្នាំដំបូងបានប្រមាណតែ4 ទៅ10ផ្លែតែប៉ុណ្ណោះ ដោយឡែកដើមក្រូចថ្លុងដែលមានអាយុកាលចាប់ពី2 ទៅ3ឆ្នាំ ទិន្នផលនឹងទទួលបានប្រមាណពី50 ទៅ50ផ្លែក្នុងមួយដើម ហើយចាប់ពី 3ឆ្នាំឡើងទៅ ទន្និផលនឹងទទួលបានកាន់តែច្រើនឡើងដែរ។
លោកស្រីបានបន្តថា៖“ឥឡូវនេះមានការទទួលស្គាល់ច្រើនលើរសជាតិរបស់ក្រូចថ្លុងកោះទ្រង់ហើយក្រោយពីទទួលបានផលិតផលសម្គាល់ភូមិសាស្ត្រ កាន់តែមានការទទួលស្គាល់ថែមទៀតពីសំណាក់អ្នកនិយមទទួលទានក្រូចថ្លុងកោះទ្រង់ ឯតម្លៃវិញ ក្រូចថ្លុងមួយផ្លែមានតម្លៃប្រមាណជា 14,000រៀល ឬ3.5ដុល្លារអាមេរិក”។
លោកស្រី រីណា បានបញ្ជាក់ថា ក្រូចថ្លុងកោះទ្រង់ភាគច្រើនគេយកមកលក់នៅភ្នំពេញ ហើយឥឡូវការផ្គត់ផ្គង់នៅមានកម្រិតនៅឡើយ ដោយសារក្រូចថ្លុងកោះទ្រង់ផ្លែតាមរដូវ ដោយរដូវប្រមូលផលក្រូចថ្លុងកោះទ្រង់ គឺចាប់ពីខែតុលា ដល់ខែធ្នូ ហើយបើផុតពីរដូវប្រមូលផល រសជាតិក៏មិនសូវឆ្ងាញ់ដូចរដូវប្រមូលផលដែរ។
លោកស្រីមានប្រសាសន៍ថា នៅពេលនេះយើងកំពុងធ្វើការពង្រីកការដាំដុះបន្ថែមទៀត ដោយសារតែឃើញក្រូចថ្លុងរបស់យើងទទួលបានការគាំទ្រច្រើនពីសំណាក់មហាជន។ កាលពីមុន កសិករមានការពិបាកលក់បន្តិច ប៉ុន្តែឥឡូវនេះមានការបញ្ជាទិញច្រើន ដែលសឹងតែគ្មានក្រូចថ្លុងលក់ឱ្យគេទៀតផង។ ជាទូទៅ ការទិញក្រូចថ្លុងកោះទ្រង់ភាគច្រើនគឺគេយកទៅបរិភោគជាលក្ខណៈគ្រួសារ ដោយឡែកក៏មានអាជីវករមួយចំនួនចាប់ផ្តើមទាក់ទងមកទំនាក់ទំនងសមាគមដើម្បីម៉ៅទិញយកទៅលក់បន្តផងដែរ។
លោក ប៊ុន បាន ប្រធានសហគមន៍អេកូទេសចរណ៍កោះទ្រង់ បានថ្លែងថា រមណីយដ្ឋានកោះទ្រង់មិនត្រឹមតែជាតំបន់កសិ-ទេសចរណ៍ប៉ុណ្ណោះទេប៉ុន្តែវាថែមទាំងមានឆ្នេរខ្សាច់វែង លាតសន្ធឹងប្រមាណជាង 4គីឡូម៉ែត្រទៀតផង។
លោកបានបន្ថែមថា៖“យើងថែមទាំងមានសមាគមផលិតបន្លែសម្រាប់ផ្គត់ផ្គង់សហគមន៍ផ្ទះសំណាក់ ដើម្បីទទួលភ្ញៀវទេសចរ លើកលែងតែបន្លែមួយចំនួនដែលពិបាករក។ យើងមានដំណាំហូបផ្លែតាមរដូវកាលដូចជា ក្រូចថ្លុង ខ្នុរ ផ្លែទឹកដោះគោជាដើម”។
លោកថា៖“យើងបានចងក្រងជាសហគមន៍សមាគម និងជាក្រុមតូចៗដើម្បីបម្រើសេវាកម្មទេសចរណ៍ ដូចជារទេះសេះ រទេះគោ រ៉ឺម៉កកង់បី កង់ ទូកជិះកម្សាន្ត និងផ្ទះស្នាក់នៅ ជាដើម យើងបង្កើតមុខរបរបានជាច្រើន និងកាត់បន្ថយការធ្វើចំណាកស្រុករបស់ប្រជាពលរដ្ឋក្នុងស្រុកទៀតផង។
លោក បាន បានបន្តថា ទេសចរជាច្រើនបានទៅលេងរមណីយដ្ឋានកោះទ្រង់ ដោយនៅឆ្នាំ2018 ទេសចរជាតិដែលបានទៅទស្សនារមណីយដ្ឋានកោះទ្រង់មានជាង 17,000នាក់ និងភ្ញៀវបរទេសមានជាង 300នាក់បានមកកម្សាន្តឆ្នេរខ្សាច់។
ដោយឡែកលោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានថ្លែងថាបច្ចុប្បន្នកម្ពុជាមានផលិតផលកសិកម្មជាង 20មុខទៀតដែលអាចនឹងទទួលបានវិញ្ញាបនបត្រផលិតផលសម្គាល់ភូមិសាស្ត្រនាពេលអនាគត ដូចជា អំបិលកំពត ទុរេនកំពត សូត្រភ្នំស្រុក ខេត្តបន្ទាយមានជ័យ ស្រូវសែនក្រអូបខេត្តបាត់ដំបង និងប្រហុកខេត្តសៀមរាបជាដើម៕
January 14, 2019
តារាសម្ដែងលីលី ចេញវីដេអូប្រកាសស្វែងរកស្ត្រីដែលខ្លួនជួយសម្រាលកូនកណ្តាលផ្លូវ
នៅលើបណ្តាញសង្គមហ្វេសប៊ុកនៅរាត្រីថ្ងៃទី 12 ខែមករា នេះ មានការសរសើរមិនដាច់ពីមាត់ ក្រោយពេលបានឃើញស្រីស្អាតម្នាក់ជួយបង្កើតកូនឱ្យស្ត្រីអនាថាម្នាក់ នៅតាមដងផ្លូវត្រូវប្រជាពលរដ្ឋធ្វើដំណើរ នៅតាមដងផ្លូវ ស្ថិតនៅតាមបណ្តោយផ្លូវ៣១៥កែង និងផ្លូវ៥១៦ ជាប់និងផ្សារធីខេ ក្នុងសង្កាត់បឹងកក់១ ខណ្ឌទួលគោក។ ឃើញហេតុការនេះភ្លាមៗ ម្នាក់ៗបាននាំគ្នា ជួយសង្គ្រោះបឋម រហូតជួយបង្កើតបានសម្រេច។ ក្រោយពីផ្ទុះរឿងដ៏ប្រពៃនេះ ពេលនេះបានដឹងច្បាស់ហើយថា កញ្ញាស្រស់ស្អាតម្នាក់នោះគឺជាតារាសម្ដែង លីលី ជាតួសំខាន់នៅក្នុងរឿង «កាំបិតមុខ2» របស់ផលិតកម្មមហាហង្ស ដែលត្រៀមដាក់បញ្ចាំងឆាប់ៗនេះ។
ហើយថ្មីៗតារាស្រីខាងលើនេះ ក៏បានចេញវីដេអូប្រកាសស្វែងរក ស្ត្រីអនាថាខាងលើ ដោយរៀបរាប់ថា »នាងខ្ញុំ លីលី សូមប្រកាសស្វែងរកដំណឹងបងស្រីដែលនាងខ្ញុំបានជួយសម្រាលកូនយប់មិញនៅតាមចញ្ចើមផ្លូវផង ដោយសារតែអាណិតនិងឃើញបងស្រីខ្វះខាតផងនោះ។ នាងខ្ញុំ លីលី និងម្ចាស់ផលិតកម្ម មហាហង្ស លោក អ៊ិន សុភិន និងតួសំដែងក្នុង រឿង “កាំបិតមុខ2” បានមានបំណងធ្វើមូលនិធិសប្បុរសធម៌ ដើម្បីយកទៅជួយបងស្រីនិងកូនស្រី។ បើពុកម៉ែបងប្អូនណាមាន បំណងចង់ជួយចូលមូនិធិទៅកាន់បងស្រី អាចទំនាកទំនងមកកាន់ហ្វេសប៊ុកនាងខ្ញុំផ្ទាល់Lyly Yaka Il ឬក៏អាចទំនាក់ទំនង តាមរយៈផលិតកម្ម មហាហង្ស ក៏បាន។ នេះគឺលេខទូរស័ព្ទ នាងខ្ញុំផ្ទាល់ 086223355 060223355 ហើយសូមឱ្យបងប្អូនជួយធ្វើការ share បន្តផង»៕

January 14, 2019
ឆ្នាំ2018 ផ្សារមូលបត្រកម្ពុជា CSX បានបង្ហាញភាពរីកចម្រើន និងរឹងមាំ
ដោយសារការជួញដូរដ៏រឹងមាំនៅចុងបញ្ចប់ឆ្នាំ2018 ផ្សារមូលបត្រកម្ពុជា CSX (The Cambodia Securities Exchange) ទទួលបានក្នុងកម្រិតខ្ពស់បំផុតគឺ 48,098ពិន្ទុ កើនឡើង40% បើធៀបនឹងឆ្នាំ2017 សម្រាប់មូលធនូបនីយកម្មទីផ្សារ (Market capitalization) ចំនួន 44,292លានដុល្លារអាមេរិក (1.77ពាន់ពាន់លានរៀល)។ក្នុងនោះកំណើនភាគច្រើនបានពីកំពង់ផែស្វយ័តក្រុងព្រះសីហនុ Sihanoukville Autonomous Port (PAS)។ នេះបើយោងតាមសេចក្តីប្រកាសព័ត៌មានរបស់ CSX។
នៅក្នុងសេចក្តីប្រកាសព័ត៌មានរបស់ CSX បានឱ្យដឹងថា សន្ទស្សន៍នេះបានកើនឡើង 9.81ពិន្ទុ ឬ 2.08% ជាមួយនឹងភាគហ៊ុនចំនួន19,602ភាគហ៊ុនត្រូវបានជួញដូរក្នុងតម្លៃសរុប 26,553.98 ដុល្លារ។ តម្លៃជួញដូរប្រចាំថ្ងៃជាមធ្យមបានកើនឡើង101% ដល់26,701ដុល្លារ ពី10,660លានរៀល។
ផ្សារហ៊ុនដែលមានក្រុមហ៊ុនចុះបញ្ជីចំនួន5 និងមូលបត្របំណុលសាជីវកម្មមួយបានកើនឡើង 4ភាគហ៊ុនក្នុងចំណោមភាគហ៊ុន5 នៅចុងឆ្នាំធៀបនឹងឆ្នាំមុនជាពិសេសកំពង់ផែស្វយ័តព្រះសីហនុ ឬPAS ដែលគ្រប់គ្រងដោយរដ្ឋដែលកើនឡើង98.04% ដល់ចំនួន 10,100រៀល ពី5,100រៀលសម្រាប់មូលបត្រទីផ្សារចំនួន 11,029.62ដុល្លារអាមេរិក និងភាគហ៊ុនសរុបចំនួន 4,386ត្រូវបានធ្វើចរាចរណ៍។
កាលពីសប្តាហ៍មុន CSX បានមើលឃើញបរិមាណជួញដូរធំជាងគេជាមួយភាគហ៊ុនPAS ចំនួនជាង 2លានដុល្លារដែលផ្លាស់ប្តូរដៃតាមរយៈវិធីសាស្ត្រជួញដូរដែលបានចរចា។ ភាគហ៊ុន PAS ចំនួន 2.14លានហ៊ុន ឬភាគហ៊ុន2.5% ត្រូវបានទិញដោយក្រុមហ៊ុន Kobe-Osaka International Port Corp (KOI) ដែលជាប្រតិបត្តិករកំពង់ផែ Hanshin មកពីទីភ្នាក់ងារសហប្រតិបត្តិការអន្តរជាតិជប៉ុន (JICA)។
ពីមួយឆ្នាំទៅមួយឆ្នាំអង្គភាពនៃអាជីវកម្មដែលមានទំនាក់ទំនងជាមួយរដ្ឋាភិបាល គឺកំពង់ផែ ស្វយ័តភ្នំពេញ (PPAP) បានកើនឡើងជិត 50% ស្មើនឹង 7,680រៀលក្នុងមួយហ៊ុនគិតចាប់ពី 5,140 រៀល ហើយរដ្ឋាករទឹកស្វយ័តក្រុងភ្នំពេញ (PWSA) បានកើនឡើង 8.81% ខ្ពស់ជាង 4,200រៀល។ កំណើននេះបានធ្វើឱ្យ PPAP និងPWSA មូលធនកម្មទីផ្សារមានចំនួន 279ដុល្លារ និង12,090.71 ដុល្លារ។
តំបន់សេដ្ឋកិច្ចពិសេសភ្នំពេញដែលជាតំបន់អភិវឌ្ឍន៍ឧស្សាហកម្មរបស់ភ្នំពេញបានឃើញថាភាគហ៊ុនបានជួញដូរក្នុងតម្លៃខ្ពស់ជាង 2.84% ដល់ជិត 2,900រៀលធៀបនឹងឆ្នាំមុនសម្រាប់មូលធនកម្មទីផ្សារ 1,135.36ដុល្លារ។
ផ្ទុយទៅវិញក្រុមហ៊ុនកាត់ដេរ Grand Twins International (កម្ពុជា) ភីអិលស៊ីបានធ្លាក់ចុះ 8.09% ស្មើនឹង 4,320រៀល ពី 4,700 រៀលកាលពីឆ្នាំមុនដោយមានទុនវិនិយោគ 2,019.30ដុល្លារ។
ផ្សារមូលបត្រកម្ពុជាបានឱ្យដឹងថា ចំនួននៃគណនីជួញដូរបានកើនឡើងដល់ 20,525គណនី ពី8,973នៅដើមឆ្នាំ ដោយ84% ជារបស់វិនិយោគិនក្នុងស្រុក។ 17% នៃម្ចាស់គណនីជួញដូរបានចុះបញ្ជីប្រព័ន្ធពាណិជ្ជកម្មចល័ត (MTS) ដែលត្រូវបានដាក់ឱ្យដំណើរការនៅពាក់កណ្តាលឆ្នាំ2018 ដើម្បីឱ្យវិនិយោគិនអាចដាក់ការបញ្ជាទិញ និងពិនិត្យមើលតុល្យភាពរបស់ពួកគេពីគ្រប់ទីកន្លែងដោយបានឱ្យដឹងបន្ថែមថា 59%នៃការបញ្ជាទិញភាគហ៊ុនត្រូវបានដាក់តាម MTS។
កាលពីមុន CSXបានឱ្យដឹងថា ការកើនឡើងនៃការចូលរួមពីការលក់រាយត្រូវបានជំរុញដោយការកើនឡើងនៃការអប់រំរបស់វិនិយោគិនកំណើនសេដ្ឋកិច្ចកម្ពុជា និងទិន្នផលភាគលាភជាមធ្យមពី4 ទៅ5% ក្នុងឆ្នាំ2017។
អ្នកជំនាញទីផ្សារមូលបត្រនៃគណៈកម្មការផ្សារមូលបត្រកម្ពុជា បានប្រាប់ឡារ៉ែនពាណិជ្ជឱ្យដឹងថា មូលធនូបនីយកម្មទីផ្សាររបស់ផ្សារមូលបត្រកម្ពុជាកើនឡើងខ្លាំងនៅឆ្នាំ2018 កន្លងមកនេះ មកពីចំណុចធំ2 គឺទី1-ដោយសារទំនុកចិត្តរបស់វិនិយោគិននាំឱ្យមានការជួញដូរលើទីផ្សារកើនឡើងដូច្នេះធ្វើឱ្យមានការកើនឡើងតម្លៃភាគហ៊ុនដែលធ្វើឱ្យសកម្មភាពជួញដូរប្រចាំថ្ងៃ និងមួយរយៈពេលចុងឆ្នាំមានភាពប្រសើរឡើង។ ទី2-ការបោះផ្សាយភាគហ៊ុនបន្ថែមរបស់ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP)បានលក់ភាគហ៊ុនបន្ថែមចំនួន 14លានហ៊ុន(Shares)ទៅឱ្យវិនិយោគិនជាស្ថាប័នចំនួន2 គឺក្រុមហ៊ុន JWD Infologistics Plc ដែលជាក្រុមហ៊ុនឡូជីស្ទិករបស់ប្រទេសថៃ និងក្រុមហ៊ុន Bok Seng Group ដែលជាក្រុមហ៊ុនឡូជីស្ទិករបស់ប្រទេសសិង្ហបុរី ក៏ជាហេតុផលដែលជំរុញឱ្យមូលធនូបនីយកម្មទីផ្សាររបស់ផ្សារមូលបត្រកម្ពុជាកើនឡើងខ្លាំងដែរ។ អ្នកជំនាញដដែលបានបន្ថែមថា “ដូច្នេះការកើនឡើងរបស់ CSX ឆ្នាំ2018 បានបង្ហាញពីភាពរីកចម្រើន និងរឹងមាំរបស់វិស័យមូលបត្រនៅកម្ពុជា”។
អ្នកជំនាញទីផ្សារមូលបត្រក៏បានឱ្យដឹងទៀតដែរថា៖ ដើម្បីជំរុញឱ្យផ្សារមូលបត្រកម្ពុជាកាន់តែមានភាពរីកចម្រើនសម្រាប់ឆ្នាំ2019នេះ យើងរំពឹងទុកថានឹងមានការកើនឡើងថែមទៀត ដោយយើងនឹងមានក្រុមហ៊ុនបោះផ្សាយភាគហ៊ុនបន្ថែម។ ជាមួយគ្នានេះយើងនឹងខិតខំធ្វើការងារមួយចំនួនដូចជាបង្កើនភាពទាក់ទាញ ជំរុញការយល់ដឹង និងផ្សព្វផ្សាយឱ្យកាន់តែទូលំទូលាយដើម្បីឱ្យក្រុមហ៊ុនកាន់តែច្រើនមកចុះឈ្មោះក្នុងផ្សារហ៊ុនដើម្បីធ្វើឱ្យមានការទាក់ទាញទីផ្សារបន្ថែម។
ម្យ៉ាងទៀតទាំងគណៈកម្មការមូលបត្រ ទាំងទីផ្សារភាគហ៊ុនបានយកចិត្តទុកដាក់ទៅលើការបង្កើនរយៈពេលប្រតិបត្តិការទីផ្សារ ដោយពង្រីកម៉ោងជួញដូរពី3-5ម៉ោង ដល់7ម៉ោងតែម្ដងក្នុង1ថ្ងៃយើងក៏បានកសាងមូលដ្ឋានបទដ្ឋានគតិយុត្ត ការលើកទឹកចិត្តផ្នែកពន្ធសម្រាប់វិនិយោគិនក្នុងវិស័យមូលបត្រ និងបង្កើនភាពទាក់ទាញដល់វិនិយោគិនជាតិ និងអន្តរជាតិជាដើម។
អ្នកជំនាញទីផ្សារមូលបត្រដដែលបានឱ្យដឹងទៀតថា បច្ចុប្បន្នផ្សារមូលបត្រកម្ពុជាទទួលបានការចាប់អារម្មណ៍កាន់តែច្រើនពីសាធារណជនក្នុងស្រុក និងបរទេសដែលជំរុញឱ្យទំហំនៃការជួញដូរ និងតម្លៃរបស់មូលបត្រកើនឡើងជាបន្តបន្ទាប់ជាពិសេសចាប់ពីអំឡុងត្រីមាសទី3 នៃឆ្នាំ2018មក។ កំណើនមូលធនូបនីយកម្មទីផ្សាររបស់ផ្សារមូលបត្រកម្ពុជាពេលនេះក៏អាចបញ្ជាក់ពីទំនុកចិត្តរបស់វិនិយោគិនចំពោះផ្សារមូលបត្រកម្ពុជាផងដែរ។
“សម្រាប់ឆ្នាំ2019នេះ សកម្មភាពនៃការទិញលក់នៅក្នុងផ្សារមូលបត្រកម្ពុជានឹងរឹតតែបង្ហាញសញ្ញាវិជ្ជមានបន្ថែមទៀត។ ប៉ុន្តែសម្រាប់តម្លៃវិញអាចនិយាយថាអាចនឹងមានការប្រែប្រួលព្រោះវាអាស្រ័យទៅលើស្ថានភាពរបស់ក្រុមហ៊ុននីមួយៗ តែយើងរំពឹងថា ឆ្នាំ2019នេះ គឺជាឆ្នាំដ៏ជោគជ័យសម្រាប់ទីផ្សារមូលបត្របន្តទៀត”៕
January 14, 2019
ប្រទេសជប៉ុនត្រូវការកម្លាំងពលកម្មបន្ថែមទៀតពីកម្ពុជា ក្នុងឆ្នាំ2019
ឧស្សាហកម្មជប៉ុននឹងមានតម្រូវការកម្លាំងពលកម្មបន្ថែមទៀតពីប្រទេសជាដៃគូក្នុងការបញ្ជូនពលករទៅកាន់ប្រទេសជប៉ុន ក្នុងនោះកម្ពុជាក៏ជាដៃគូមួយដែរ ដែលគ្រោងនឹងបញ្ជូនពលករ-ពលការិនីបន្ថែមទៅធ្វើការនៅប្រទេសជប៉ុនផងដែរ។ នេះបើតាមព័ត៌មានឱ្យដឹងក្នុងជំនួបកិច្ចពិភាក្សាការងារជាមួយនឹងមន្រ្តីតំណាងពីប្រទេសជប៉ុន និងរដ្ឋមន្រ្តីក្រសួងការងារ។
ក្នុងជំនួបពិភាក្សាការងាររវាងលោក មីគី វ៉ាតាណាបេ (Miki Watanabe) ប្រធានគណៈកម្មាធិការអចិន្រៃ្តយ៍សភាកិច្ចការបរទេស និងការពារជាតិនៃរដ្ឋសភាជប៉ុននៅទីស្តីការក្រសួង ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា នៅពេលខាងមុខនឹងមានក្រុមហ៊ុនជប៉ុនមកបើកជាបន្តបន្ទាប់ដើម្បីបណ្តុះបណ្តាល និងងាយស្រួលបញ្ជូនកម្មសិក្សាការីពីកម្ពុជាទៅប្រទេសជប៉ុន ខណៈដែលរដ្ឋាភិបាលជប៉ុនបានកែប្រែច្បាប់ថ្មី។
ឯកឧត្តមរដ្ឋមន្រ្តីបានបញ្ជាក់ថា ក្រុមហ៊ុនខាងលើ គឺជាក្រុមហ៊ុនចម្រុះខាងផ្នែកឧស្សាហកម្ម និងផ្នែកសេវាកម្ម ដែលបច្ចុប្បន្ន ក្រុមហ៊ុននេះបានគ្រប់គ្រងបុគ្គលិកប្រមាណ 2ម៉ឺននាក់នៅប្រទេសជប៉ុន កំពុងត្រូវការកម្លាំងបន្ថែមទៀត។ ប្រទេសជប៉ុនបានចាប់ផ្តើមរៀបចំបង្កើតឱ្យមានគម្រោងថ្មីសម្រាប់បង្កើនលំហូរនៃកម្លាំងពលកម្មពីប្រទេសផ្សេងៗ និងសម្រាប់អនុវត្តនៅអំឡុងខែមេសា ឆ្នាំ2019ខាងមុខនេះ ដើម្បីដោះស្រាយបញ្ហាកង្វះកម្លាំងពលកម្មជំនាញនៅប្រទេសជប៉ុន។
ឯកឧត្តម អ៊ិត សំហេង បានបញ្ជាក់បន្ថែមថា៖ ដើម្បីអនុវត្តគម្រោងថ្មីនេះបាន នាពេលខាងមុខរដ្ឋាភិបាលប្រទេសទាំង2 (កម្ពុជា-ជប៉ុន) ពិសេសក្រសួងការងារកំពុងរៀបចំឱ្យមានការចុះកិច្ចព្រមព្រៀងសហប្រតិបត្តិការជាមួយក្រសួងពាក់ព័ន្ធរបស់ប្រទេសជប៉ុន ដើម្បីអនុវត្តនូវប្រព័ន្ធថ្មី និងច្បាប់ថ្មីរបស់ភាគីជប៉ុន។ គិតមកដល់ពេលនេះ កម្ពុជាមានកម្មសិក្សាការីចេញទៅធ្វើការនៅប្រទេសជប៉ុនចំនួន ប្រមាណជាង 9ពាន់នាក់។
ឯកឧត្តមបន្តថា ជាមួយគ្នានេះ ប្រទេសជប៉ុនបាននិងកំពុងរៀបចំឱ្យមានសេចក្តីព្រាង និងកិច្ចព្រមព្រៀងសហប្រតិបត្តិការជាមួយបណ្តាប្រទេសដែលបញ្ជូនពលករទាំងអស់ និងបានអនុញ្ញាតឱ្យបញ្ជូនទាំងកម្មសិក្សាការីបច្ចេកទេស និងអ្នកធ្វើការជំនាញបច្ចេកទេសទៅកាន់ប្រទេសជប៉ុនផងដែរ។ ក្រសួងការងារ និងបណ្តុះបណ្តាលវិជ្ជាជីវៈបានសហការជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឱ្យមានកិច្ចព្រមព្រៀងសហប្រតិបត្តិការជាមួយគ្នា ក្នុងគោលបំណងដើម្បីបង្កើនទីផ្សារការងារ និងឱកាសការងារដល់ប្រជាជនកម្ពុជា។
សូមបញ្ជាក់ថា នៅក្នុងចំណោមប្រទេសជាដៃគូរបស់ប្រទេសជប៉ុនដែលបានបញ្ជូនពលករទៅធ្វើការនៅទីនោះមានចំនួន 15ប្រទេសហើយ។ ក្នុងចំណោមប្រទេសដែលបានបញ្ជូនពលករទៅប្រទេសជប៉ុនពីលេខ1 រហូតដល់15 ប្រទេសកម្ពុជាឈរនៅលេខរៀងទី7៕
January 14, 2019
ដូចការគ្រោងទុក ឆ្នាំ2019 ក្រុមហ៊ុន Air China ចាប់ផ្តើមហោះហើរត្រង់មកកម្ពុជា
ក្រុមហ៊ុនអាកាសចរណ៍ Air China បានចាប់ផ្តើមហោះហើរត្រង់ពីទីក្រុងប៉េកាំងរបស់ប្រទេសចិនមកកាន់ទីក្រុងភ្នំពេញ ដូចការគ្រោងទុកនៅខែមករា ឆ្នាំ2019 នេះហើយ បន្ទាប់ពីមានការពន្យារពេលកាលពីពេលកន្លងមក។ ជើងហោះហើរត្រង់នេះ គឺជាការចាប់ផ្តើមនៃការហោះហើរដោយផ្ទាល់ដំបូងនៃការតភ្ជាប់ទីក្រុងប៉េកាំងមកកាន់ទីក្រុងភ្នំពេញ ដែលមានការហោះហើរ 3ជើងក្នុង1សប្តាហ៍ (ថ្ងៃច័ន្ទ ថ្ងៃពុធ និងថ្ងៃសៅរ៍)
យោងតាមហ្វេសប៊ុកផ្លូវការ Cambodia Airports បានចុះផ្សាយនៅថ្ងៃទី8 ខែមករា ឆ្នាំ2019កន្លងមកនេះបានលើកឡើងថា “[ក្រុមហ៊ុនអាកាសចរណ៍ថ្មី] សូមស្វាគមន៍មកកាន់ជើងហោះហើរដំបូងរបស់ Air China ដែលបានមកដល់កាលពីម្សិលមិញនៅក្នុងអាកាសយានដ្ឋានអន្តរជាតិភ្នំពេញ។
លោក ខែក នរិន្ទដា ប្រធានទំនាក់ទំនងសាធារណៈនៃអាកាសចរណ៍កម្ពុជា ធ្លាប់បានបញ្ជាក់ឱ្យដឹងថា ក្រុមហ៊ុនអាកាសចរណ៍ Air China នឹងប្រតិបត្តិការយន្តហោះចំនួន3 ដែលមានបំពាក់ទង់ជាតិចិន ដោយហោះហើរត្រង់ពីទីក្រុងប៉េកាំង មកទីក្រុងភ្នំពេញចំនួន 3លើកក្នុង 1សប្តាហ៍ចាប់ពីថ្ងៃទី7 ខែមករា ឆ្នាំ2019 នេះ។ នៅពេលក្រុមហ៊ុនដាក់ឱ្យដំណើរការហើយនោះ ចំនួនយន្តហោះនឹងកើនឡើងអាស្រ័យលើតម្រូវការ។
មន្ត្រីអាកាសចរណ៍ស៊ីវីលបានឱ្យដឹងថា អាកាសយានដ្ឋានអន្តរជាតិខេត្តព្រះសីហនុបច្ចុប្បន្នគ្រប់គ្រងជើងហោះហើរពី15 ទៅ 20ដងក្នុងមួយសប្ដាហ៍។ អាកាសយានដ្ឋានអន្តរជាតិខេត្តសៀមរាបមានជើងហោះហើរពី60 ទៅ70លើក និងរាជធានីភ្នំពេញមានជើងហោះហើរលើសពី 80លើក។ លោកបានប៉ាន់ប្រមាណថា ប្រហែលពាក់កណ្តាលនៃជើងហោះហើរនៅក្នុងអាកាសយានដ្ឋានសំខាន់ៗចំនួន3 របស់ប្រទេសកម្ពុជាកំពុងតែមានជើងហោះហើរមកពីប្រទេសចិន ឬហោះទៅកាន់ប្រទេសចិន។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានឱ្យដឹងថា ទោះបីសព្វថ្ងៃមានការហោះហើរត្រង់ពីប្រទេសចិនមកម្ពុជាជាង 10ក្រុមហ៊ុនរួចហើយក្ដី តែជើងហោះហើរត្រង់ថ្មីនេះ នឹងស្រូបយកភ្ញៀវទេសចរចិនកាន់តែច្រើនមកកម្ពុជា ព្រោះថា ខេត្តនីមួយៗរបស់ប្រទេសចិន មានមនុស្សរស់នៅរាប់លាននាក់។ លោកមានប្រសាសន៍ថា «វាក៏ផ្ដល់ភាពងាយស្រួល សម្រាប់ប្រជាជនកម្ពុជាផងដែរ ស្របពេលដែលសព្វថ្ងៃ ប្រជាជនកម្ពុជាបានចេញទៅកម្សាន្តនៅប្រទេសចិនកាន់តែច្រើនឡើង»។
លោកបញ្ជាក់ដែរថា ក្រៅពីផ្ដល់ភាពងាយស្រួលហើយ សម្រាប់ភ្ញៀវទេសចរចិនមកកាន់កម្ពុជា វាជាការបង្ហាញពីទំនាក់ទំនងដ៏ល្អរវាងប្រទេសទាំង2 ក៏ដូចជាទាក់ទាញអ្នកវិនិយោគចិនមកកម្ពុជាបន្ថែម «ការតភ្ជាប់ត្រង់នាពេលខាងមុខនេះ មិនត្រឹមតែជំរុញឱ្យមានភ្ញៀវទេសចរចិនមកកម្ពុជាមានការកើនឡើងនោះទេ តែវាថែមទាំងនាំពាណិជ្ជករ និងការវិនិយោគបន្ថែមមកកម្ពុជាផងដែរ ដែលជាកត្តាជំរុញកំណើនសេដ្ឋកិច្ចកម្ពុជាឱ្យកាន់តែប្រសើរផងដែរ។
លោក ហូ វណ្ឌី បានបញ្ជាក់ដែរថា រាល់ការតភ្ជាប់ត្រង់ពីទីក្រុងធំៗមកកាន់កម្ពុជា សុទ្ធតែជាចំណុចវិជ្ជមាន យើងស្វាគមន៍ទាំងអស់ឱ្យតែមានការហោះហើរត្រង់មកកម្ពុជា មកកាន់តែច្រើន កាន់តែល្អ។ លោកបន្ថែមថា «ការហោះហើរត្រង់ពីទីក្រុងប៉េកាំងក៏ដូចជាទីក្រុងធំៗដទៃទៀតដែរ សុទ្ធតែផ្ដល់ផលចំណេញជាច្រើនដល់កម្ពុជា ជាពិសេសការចំណាយរបស់ភ្ញៀវទេសចរ ដោយពួកគេមិនបានចំណាយថវិកានៅប្រទេសណាមួយនៅពេលមានការឈប់សំចតនោះទេ ដោយថវិកាទាំងអស់នឹងត្រូវចំណាយនៅប្រទេសកម្ពុជា»។
យោងតាមរបាយការណ៍ពីក្រសួងទេសចរណ៍បានឱ្យដឹងថា ជនជាតិចិនជាង1,44លាននាក់បានមកធ្វើទស្សនកិច្ចនៅកម្ពុជាក្នុងរយៈពេល 9ខែនៃឆ្នាំ2018។ ចំនួនអ្នកដំណើរឆ្លងកាត់ព្រលានយន្តហោះអន្តរជាតិទាំង3 នៅក្នុងព្រះរាជាណាចក្រកម្ពុជាបានកើនឡើងដល់10,4 លាននាក់កាលពីឆ្នាំ2018៕
January 14, 2019