សង្គម និងសេដ្ឋកិច្ច - La Reine Media

ការយល់ឃើញផ្សេងៗ រឿងសហភាពអឺរ៉ុបកំណត់ពន្ធលើអង្ករពីកម្ពុជា

គណៈកម្មការអឺរ៉ុបEurope Committee (EC) បានដាក់ពន្ធលើអង្ករមកពីប្រទេសកម្ពុជា និងមី-យ៉ាន់ម៉ាដោយអនុវត្តវិធានការការពារប្លុកអឺរ៉ុបរបស់ខ្លួន ព្រោះថា ការនាំចូលអង្ករ Indica ទៅកាន់សហភាពអឺរ៉ុបបណ្ដាលឱ្យខូចខាតដល់សេដ្ឋកិច្ចរបស់ក្រុមហ៊ុនផលិតអង្ករនៅប្លុកអឺរ៉ុប។

EC បានឱ្យដឹងនៅក្នុងសេចក្តីប្រកាសព័ត៌មានមួយកាលពីថ្ងៃ16 ខែមករាថា ការកើនឡើងគួរឱ្យកត់សម្គាល់នៃការនាំចូលអង្ករ Indica ពីប្រទេសកម្ពុជា និងមីយ៉ាន់ម៉ាទៅកាន់សហភាពអឺរ៉ុបបណ្ដាលឱ្យខូចខាតសេដ្ឋកិច្ចដល់ផលិតករសហភាពអឺរ៉ុប។

យោងតាមសេចក្ដីសម្រេចរបស់គណៈកម្មការអឺរ៉ុប បានឱ្យដឹងថា ក្នុងអំឡុងពេលនៃការស៊ើបអង្កេតកាលពីខែមីនា គណៈកម្មការបានរកឃើញថាការនាំចូលអង្ករ Indica ពីប្រទេសទាំង2បានកើនឡើង 89%ក្នុងរយៈពេល 5ឆ្នាំកន្លងមកនេះ។ ការ-ស៊ើបអង្កេតបានរកឃើញថា តម្លៃត្រូវបានថយចុះខ្លាំងជាងទីផ្សារនៅសហភាពអឺរ៉ុប ហើយបានថយចុះក្នុងរយៈពេលដូចគ្នា។ ការកើនឡើងនៃការនាំចូលតម្លៃទាបបណ្តាលឱ្យមានការលំបាកយ៉ាងខ្លាំងសម្រាប់អ្នកផលិតអង្ករនៅសហភាពអឺរ៉ុបក្នុងកម្រិតដែលចំណែកទីផ្សាររបស់ខ្លួននៅសហភាពអឺរ៉ុបបានធ្លាក់ចុះពី61% មកនៅ29%។

សេចក្តីថ្លែងការណ៍បានឱ្យដឹងថា “ដូច្នេះគណៈកម្មការសហភាពអឺរ៉ុបបានសម្រេចចិត្តធ្វើការណែនាំឡើងវិញនូវពន្ធនាំចូលដែលនឹងត្រូវកាត់បន្ថយជាលំដាប់ក្នុងរយៈពេល 3ឆ្នាំ”។

ចំពោះការគិតពន្ធនាំចូលអង្កររបស់ប្រទេសទាំង2 (កម្ពុជា និងមីយ៉ាន់ម៉ា) ដែលនាំចូលទៅកាន់ប្រទេសជាសមាជិក EU 28ប្រទេសនឹងត្រូវធ្វើឡើងសម្រាប់រយៈពេល3ឆ្នាំ គិតចាប់ពីឆ្នាំ2019 ដល់ឆ្នាំ2021 ដែលនឹងត្រូវចាប់ផ្តើមអនុវត្តពីថ្ងៃទី18 ខែមករា ឆ្នាំ2019តទៅ ដោយឆ្នាំដំបូង តម្លៃពន្ធនាំចូលនឹងគិតក្នុងតម្លៃ 175អឺរ៉ូ (199,5ដុល្លារអាមេរិក)ក្នុង1តោន។ ឆ្នាំទី2 តម្លៃ 150អឺរ៉ូ(171ដុល្លារ)ក្នុង1តោន និងឆ្នាំទី3 តម្លៃ 125អឺរ៉ូ(142,5 ដុល្លារ)ក្នុង1តោន។

ទិន្នន័យពីលេខាធិការដ្ឋាននៃច្រកចេញចូលតែមួយសម្រាប់ការនាំចេញអង្ករបានបង្ហាញថានៅចន្លោះខែមករា និងខែវិច្ឆិកា ឆ្នាំ2018 ប្រទេសកម្ពុជាបាននាំចេញចំនួន 497,420តោន ធ្លាក់ចុះ13% បើប្រៀបធៀបទៅនឹងឆ្នាំ2017 ដោយការនាំចេញអង្ករនៅឆ្នាំនោះ(2017)បានកើនឡើង 17.21% ស្មើនឹង635,325តោន ក្នុងតម្លៃ 333.1 លានដុល្លារ។ ក្រុមហ៊ុនក្នុងស្រុកបាននាំចេញអង្ករ 3ប្រភេទ គឺអង្ករក្រអូប (493,597 តោន ឬ78.82% នៃការនាំអង្ករចេញសរុប) អង្ករសម្រូប (105,990តោន ឬ16.93%) និងអង្ករគ្រាប់វែង 26,638 តោន ឬ4.25 %)។

ការនាំចេញអង្កររបស់កម្ពុជាក្នុងឆ្នាំ2017 មានចំនួន1.6% នៃការនាំចេញអង្ករសរុបពិភពលោក។ នៅឆ្នាំនោះកម្ពុជា គឺជាប្រទេសនាំចេញធំជាងគេទី9 នៅលើពិភពលោក ខណៈមីយ៉ាន់ម៉ាជាប់ចំណាត់-ថ្នាក់លេខ10 បន្ទាប់ពីកម្ពុជា។

គួរជម្រាបដែរថា សំណើឱ្យមានការកំណត់ពន្ធនេះបានធ្វើឡើងដោយរដ្ឋាភិបាលអុីតាលី កាលពីខែកុម្ភៈ ឆ្នាំ2018 ដោយមានការគាំទ្រពីប្រទេសអឺរ៉ុបដែលផលិតអង្ករចំនួន 7ផ្សេងទៀត រួមមានអេស្ប៉ាញ បារាំង ព័រទុយហ្គាល់ ក្រិក ហុងគ្រី រ៉ូម៉ានី និងប៊ុលហ្គារី។

រដ្ឋលេខាធិការក្រសួងពាណិជ្ជកម្ម ឯកឧត្តម សុខ សុភ័ក្ត្រ បានថ្លែងក្នុងសន្និសីទសារព័ត៌មានកាលពីថ្ងៃទី18 ខែមករាកន្លងទៅថា រឿងការកំណត់ពន្ធរបស់សហគមន៍អឺរ៉ុបនេះមិនមានពាក់ព័ន្ធនឹងបញ្ហានយោបាយឡើយ ហើយសូម្បីតែបញ្ហាប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ(Everything But Arms ឬEBA)ក៏មិនជាប់ពាក់ព័ន្ធដែរ។ ព្រោះប្រទេសមួយចំនួនធំនៅក្នុងពិភពលោកដែលជាសមាជិកអង្គការពាណិជ្ជកម្មពិភពលោក(WTO)ក៏អឺរ៉ុបធ្លាប់ប្រើការកំណត់ពន្ធនេះស្របតាមកិច្ចព្រមព្រៀង និងច្បាប់ជាតិរបស់ពួកគេផងដែរ ដើម្បីការពារនូវផលប្រយោជន៍នៃឧស្សាហកម្មក្នុងស្រុក”។

ឯកឧត្តម បានថ្លែងទៀតថា៖“វិធានការនេះ គេដំឡើងពន្ធពីលើពន្ធដែលយើងកំពុងតែចូលជាធរមានស្រាប់ហើយ។ ឧទាហរណ៍ថា បើយើងនាំចេញអង្ករទៅអឺរ៉ុប ហើយពន្ធយើងនាំចេញទៅក្នុង100ដុល្លារ ក្នុង1តោន គេដាក់វិធានការការពារនេះ គឺបូកលើពន្ធដែលមានស្រាប់ តែបើនៅក្រោមប្រព័ន្ធEBA ពន្ធរបស់យើងគឺស្មើសូន្យ អុីចឹងគេបូកថែមលើពន្ធសូន្យនេះ”។

ឯកឧត្ដមបានចាត់ទុកថា ការដាក់ពន្ធនេះ គឺអឺរ៉ុបបានបង្កើនពន្ធគយនាំចូលរបស់គេរហូតដល់12ខ្ទង់ ដើម្បីទាញអង្ករកម្ពុជាចូលទៅក្នុងប្រភេទដែលដូចទៅនឹងប្រភេទអង្កររបស់អុីតាលីដែរ ដូច្នេះអឺរ៉ុបបានយកបច្ចេកទេសទៅបំភ័ន្តតាមរយៈបញ្ញត្តិក្នុងស្រុករបស់ពួកគេ។

ឯកឧត្តម ចាត់ទុកថា ការដាក់ពន្ធលើការនាំចេញអង្ករកម្ពុជានេះ មានបច្ច័យល្អផង និងបច្ច័យមិនល្អផងដែរ។ បច្ច័យមិនល្អត្រូវបានមន្ត្រីជាន់ខ្ពស់រូបនេះលើកឡើងថា ការដាក់ពន្ធនេះអាចនឹងធ្វើឱ្យកម្ពុជាខាតបង់ប្រាក់ប្រហែលជា 50លានដុល្លារ ធ្វើឱ្យតម្លៃស្រូវអង្កររបស់កសិករអាចធ្លាក់ចុះជាងមុននៅពេលអ្នកនាំចេញត្រូវដំឡើងថ្លៃទប់ទល់នឹងបញ្ហាពន្ធនេះ។

លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានបង្ហាញទស្សនៈលើហ្វេសប៊ុករបស់លោកលើរឿងអឺរ៉ុបដាក់ពន្ធលើអង្ករកម្ពុជានេះថា បើយោងតាមព័ត៌មានផ្សេងៗទាក់ទងនឹងរឿងការដាក់ពន្ធលើអង្ករកម្ពុជាដោយគណៈគណៈកម្មការអឺរ៉ុបនេះអាចធ្វើឱ្យដល់អ្នកតាមដានវិលវល់។

លោក សុផល បានបញ្ជាក់ថា៖“ខ្ញុំយល់ឃើញថាដូចជាមិនធ្ងន់ធ្ងរពេកទេ អឺរ៉ុបមិនអាចសម្លាប់កសិករខ្មែរតាមរបៀបនេះទេ បើគេឆ្ងាញ់នឹងអង្ករខ្មែរ គេក៏ទំនងជានៅតែទិញដដែល បើទោះបីជាថ្លៃជាងមុនបន្តិចក៏ដោយ ដូច្នេះប៉ុន្មានខែទៀតនឹងដឹងរឿងច្រើនជាងនេះហើយ”។

លោក សុផល យល់ថា កម្ពុជាអាចដោះស្រាយបាន ប្រសិនបើរដ្ឋជួយបន្ថែមដល់វិស័យស្រូវអង្ករ ដូចជាជួយបន្ថយថ្លៃអគ្គិសនីដល់រោងម៉ាស៊ីនស្រូវ បន្ថយថ្លៃកំពង់ផែ កសាងផ្លូវរឹងមាំនៅតាមជនបទ និងមិនយកពន្ធកាត់ទុកប្រចាំខែ។ ការកាត់បន្ថយថ្លៃដើមនឹងជំរុញឱ្យអង្ករកម្ពុជាកាន់តែមានភាពប្រជែងឈ្នះនៅលើទីផ្សារផ្សេងៗក្រៅពីអឺរ៉ុបផងដែរ។ លោកបានបន្ថែមទៀតថា កសិករអាចលក់ស្រូវ IR ឱ្យវៀតណាមដូចសព្វដង ឬក៏ជួយកសិករឱ្យផលិតស្រូវក្រអូបវិញ។

ចំណែកឯកឧត្ដម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានថ្លែងឱ្យដឹងថា កម្ពុជាពុំមានអ្វីទើសទាល់ទេចំពោះការយកពន្ធនាំចូលអង្ករពីកម្ពុជារបស់សហភាពអឺរ៉ុបនេះ។ លោកថា កម្ពុជាក៏អាចមានលទ្ធភាពក្នុងការចាត់ចែងបង់ពន្ធបានដែរ។

យោងតាមប្រទេសនីមួយៗ អ្នកទិញអង្ករធំបំផុតពីកម្ពុជា គឺប្រទេសចិន (170,000តោន) បន្ទាប់មកប្រទេសបារាំង (90,000តោន) ម៉ាឡេស៊ី(40,000តោន) ហ្គាបុង (30,000តោន) និងហូឡង់ (26,000តោន)។ សហគមន៍អឺរ៉ុប គឺជាទីផ្សារដ៏សំខាន់សម្រាប់អង្ករកម្ពុជានៅឆ្នាំ2018 ដោយកម្ពុជាបាននាំចេញអង្ករទៅអឺរ៉ុបជិត 30ម៉ឺនតោន(270,000តោន)ស្មើនឹង42,98% នៃការនាំចេញសរុបទាំងអស់ចំនួន 62ម៉ឺនតោន៕

January 23, 2019

នៅដើមឆ្នាំនេះ ក្រសួងទេសចរណ៍ជំរុញការបណ្តុះបណ្តាលកាន់តែខ្លាំង ដើម្បីសម្រេចគោលដៅ (SDG) 2030

គោលដៅអភិវឌ្ឍន៍ប្រកបដោយនិរន្តរភាព (SDG) សម្រាប់ឆ្នាំ2030 ជាគោលដៅសកលមួយដែលពិភពលោកបានដាក់ចេញដើម្បីឱ្យប្រទេសទាំងអស់លើពិភពលោកព្យាយាមគ្រប់លទ្ធភាពដើម្បីសម្រេចបាននូវសកម្មភាពសំខាន់ៗ ដូចជា ការបញ្ចប់ភាពអត់ឃ្លាន ធ្វើឱ្យសេដ្ឋកិច្ចកាន់តែប្រសើរឡើង និងសកម្មភាពសំខាន់ៗជាច្រើនទៀតដែលក្នុងនោះក៏មានវិស័យទេសចរណ៍មួយផងដែរ។

ឆ្លើយតបនឹងបញ្ហាទាំងអស់នេះ ក្រសួងទេសចរណ៍សហការជាមួយដៃគូពាក់ព័ន្ធជាច្រើនផ្សេង ទៀតបានបើកកិច្ចប្រជុំមួយកាលពីដើមខែមករានេះដើម្បីបង្កើត“បណ្តាញអ្នកជំនាញនិងសាស្ត្រាចារ្យក្នុងវិស័យទេសចរណ៍” នៅកម្ពុជា។គោលដៅសំខាន់ក្នុងការបង្កើតបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍នេះ ដោយ ធ្វើឡើងក្នុងគោលបំណងជំរុញឱ្យមានកិច្ចសហការល្អរវាងគ្រប់ភាគីទាំងអស់ក្នុងវិស័យទេសចរណ៍នៅកម្ពុជាដើម្បីរួមគ្នាសម្រេចគោលដៅអភិវឌ្ឍន៍ប្រកបដោយ និរន្តរភាពឆ្នាំ2030 និងឆ្លើយតបជាមួយតម្រូវការជាក់ស្តែងរបស់កម្ពុជានាពេលបច្ចុប្បន្ន និងអនាគត។

រដ្ឋមន្ត្រីក្រសួងទេសចរណ៍ ឯកឧត្តម ថោង ខុន បានលើកឡើងថា កម្ពុជាកំពុងមានស្ថានភាពវិជ្ជមានខ្លាំងលើវិស័យទេសចរណ៍ តែបញ្ហាប្រឈមដែលយើងកំពុងជួបប្រទះ គឺធនធានមនុស្សក្នុងវិស័យនេះ ដែលទាមទារឱ្យយើងត្រូវពង្រឹងការអប់រំឱ្យបានច្រើនបន្ថែមទៀត។ កម្ពុជាត្រូវការអ្នកជំនាញអប់រំ សាលាបណ្តុះបណ្តាលវិស័យទេសចរណ៍ និងការចូលរួមរបស់ប្រតិបត្តិការទេសចរណ៍ដើម្បីធ្វើការបណ្តុះបណ្តាលបុគ្គលិកដែលមានស្រាប់ឱ្យកាន់តែមានសមត្ថភាពខ្ពស់ដើម្បីបំពេញតម្រូវការការងារនៅក្នុងប្រទេស និងប្រកួតប្រជែងជាមួយបណ្តាប្រទេសនានាក្នុងតំបន់។

ជាផែនការសកម្មភាពដើម្បីសម្រេចគោលដៅពង្រឹងការអភិវឌ្ឍធនធានមនុស្សផ្នែកទេសចរណ៍នៅកម្ពុជា អ្នកជំនាញទាំងអស់បានកំណត់ថា ឆ្នាំ2020ចាំបាច់ត្រូវព្យាយាមបង្កើតការងារផ្ទាល់ផ្នែកទេសចរណ៍ឱ្យបាន 1លាននាក់ ហើយត្រូវជំរុញឱ្យមានអ្នកជំនាញបន្ថែមយ៉ាងតិច50% ដែលមានសញ្ញាបត្រ ឬមានវិញ្ញាបនបត្របញ្ជាក់សមត្ថភាពស្តង់ដាជាតិ និងអាស៊ាន ដោយមានការបណ្តុះបណ្តាល និងវាយតម្លៃត្រឹមត្រូវ ព្រោះបច្ចុប្បន្ននេះអ្នកកំពុងធ្វើការងារផ្នែកទេសចរណ៍មួយចំនួនមានសញ្ញាបត្រ និងទទួលបានការអប់រំពីផ្នែកផ្សេងៗទៀតដែលមិនមែនជាជំនាញទេសចរណ៍។

ជាគោលដៅបន្ត សម្រាប់ឆ្នាំ2025 កម្ពុជាបានកំណត់ផែនការបង្កើតការងារផ្ទាល់លើវិស័យទេសចរណ៍ឱ្យបាន 1.2លាននាក់ និងត្រូវសម្រេចឱ្យបាននូវយុទ្ធនាការ “បុគ្គលិកម្នាក់ ជំនាញមួយ” ដើម្បីជំរុញឱ្យអ្នកជំនាញទេសចរណ៍ទាំងអស់មានសមត្ថភាព និងសញ្ញាបត្រត្រឹមត្រូវដើម្បីប្រើប្រាស់ក្នុងវិជ្ជាជីវៈរបស់ខ្លួន។ ចំណែកឯគោលដៅចម្បងចុងក្រោយនៅឆ្នាំ2030 គឺត្រូវសម្រេចឱ្យបាននូវគោលដៅអភិវឌ្ឍន៍ប្រកបដោយនិរន្តរភាព (SDG) ផ្នែកទី4 ដែលធានាឱ្យទទួលបាននូវការបណ្តុះបណ្តាលប្រកបដោយគុណភាព សមធម៌ និងបរិយាបន្ន ព្រមទាំងលើកកម្ពស់ឱកាសសិក្សាពេញមួយជីវិត និងគោលដៅ SDG ទី8 ដែលជំរុញកំណើនសេដ្ឋកិច្ច និងការងារសមរម្យដល់ជនគ្រប់រូបក្នុងវិស័យទេសចរណ៍តាមរយៈការបណ្តុះបណ្តាលធនធានមនុស្សឱ្យមានកម្រិតស្តង់ដារទាំងជាតិ និងអន្តរជាតិ។

បណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍ ជាបុគ្គលដែលមានតួនាទីយ៉ាងសំខាន់ក្នុងការជំរុញឱ្យគោលដៅសំខាន់នានានៅកម្ពុជាទទួលបានជោគជ័យ។ ជាផែនការសកម្មភាពរបស់ស្ថាប័ននេះ គឺតម្រូវឱ្យមានកិច្ចប្រជុំជាប្រចាំតាមពេលវេលាកំណត់ជាក់លាក់ និងរៀបចំកម្មវិធីសំខាន់ៗជាច្រើនផ្សេងទៀតដើម្បីផ្តល់ឱកាសឱ្យស្ថាប័នអប់រំផ្នែកទេសចរណ៍ សិស្ស-និស្សិត និងប្រតិបត្តិករទេសចរណ៍មានឱកាសចែករំលែក និងទទួលបានចំណេះដឹងយ៉ាងទូលំទូលាយ។

សម្រាប់គម្រោងក្នុងឆ្នាំ2019 នេះ បណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍គ្រោងនឹងរៀបចំឱ្យមានអ្នកផ្តល់ការបណ្តុះបណ្តាលគំរូពិព័រណ៍ម្ហូបអាហារ និងការប្រឡងប្រណាំងអាហារស្អាតតាមដងផ្លូវ រួមទាំងការប្រឡងប្រណាំងសរសេរអត្ថបទស្រាវជ្រាវក្នុងវិស័យទេសចរណ៍ប្រចាំឆ្នាំ ដើម្បីចូលរួមលើកកម្ពស់ការបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍ថែមទៀតផង។ លើសពីនេះទៅទៀតក៏បានគ្រោងនឹងដាក់ឱ្យផ្សព្វផ្សាយសៀវភៅតម្រង់ទិសការសិក្សា និងអាជីពក្នុងវិស័យទេសចរណ៍ ព្រមទាំងបានប្រកាសផ្សព្វផ្សាយជាផ្លូវការនូវចលនាប្រឡងប្រណាំងអ្នកជំនាញទេសចរណ៍គំរូ ប្រចាំឆ្នាំ2019 លើផ្នែកការិយាល័យជួរមុខ ផ្នែកម្ហូបអាហារ និងភេសជ្ជៈ ដែលលទ្ធផលជយលាភីនៃការប្រឡងប្រណាំងនេះគ្រោងនឹងប្រកាសផ្សព្វផ្សាយនៅពេលចុងឆ្នាំ៕

January 23, 2019

រាជរដ្ឋាភិបាលផ្តល់ការលើកទឹកចិត្តពន្ធក្នុងវិស័យមូលបត្រ

ដើម្បីអភិវឌ្ឍវិស័យមូលបត្រកម្ពុជា និងជំរុញឱ្យមានការចុះបញ្ជីក្នុងផ្សារមូលបត្រកម្ពុជាពីសំណាក់ក្រុមហ៊ុននានា ថ្មីៗនេះរាជរដ្ឋាភិបាលកម្ពុជាបានដាក់ចេញនូវអនុក្រឹត្យស្តីពីការលើកទឹកចិត្តពន្ធក្នុងវិស័យមូលបត្រ។

យោងតាមអនុក្រឹត្យលេខ០១ អនក្រ.បក ចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន កាលពីថ្ងៃ4 ខែមករា ឆ្នាំ2019 ស្តីពីការលើកទឹកចិត្តពន្ធដារក្នុងវិស័យមូលបត្រ និងបើកផ្លូវឱ្យមានក្រុមហ៊ុនជាច្រើនមកចុះបញ្ជីក្នុងផ្សារមូលបត្រកម្ពុជាដើម្បីអភិវឌ្ឍវិស័យមួយនេះឱ្យមានភាព-រីកចម្រើនទៅមុខ។

អនុក្រឹត្យនេះមានវិសាលភាពអនុវត្តចំពោះក្រុមហ៊ុន ឬសហគ្រាសបោះផ្សាយមូលបត្រកម្មសិទ្ធិ ឬមូលបត្របំណុលលើកដំបូងជាសាធារណៈដែលទទួលបានការអនុញ្ញាតពីគណៈកម្មការមូលបត្រ ហៅថា គ.ម.ក និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត។

ការលើកទឹកចិត្តពន្ធដារក្នុងវិស័យមូលបត្របានផ្តល់ជូនអ្នកវិនិយោគសាធារណៈដែលកាន់កាប់ និងឬ ទិញ-លក់មូលបត្ររដ្ឋ មូលបត្រកម្មសិទ្ធិ និងឬមូលបត្របំណុលដែលបានបោះផ្សាយលក់ជាសាធារណៈ និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត។ សម្រាប់គោលដៅនៃអនុក្រឹត្យនេះ គឺអ្នកវិនិយោគសាធារណៈ រួមទាំងអ្នកវិនិយោគនិវាសនជន និងអនិវាសនជន។

ក្រុមហ៊ុន ឬសហគ្រាស បោះផ្សាយមូលបត្រកម្មសិទ្ធិ និងឬមូលបត្របំណុលលើកដំបូងជាសាធារណៈ ដែលទទួលបានការអនុញ្ញាតពីគណៈកម្មការមូលបត្រ ហៅថា គ.ម.ក និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត គិតចាប់ពីថ្ងៃដែលអនុក្រឹត្យនេះចូលជាធរមាន ត្រូវបំពេញបែបបទជូនអគ្គនាយកដ្ឋានពន្ធដារតាមរយៈ គ.ម.ក នៅរាល់មុនការិយបរិច្ឆេទបង់ពន្ធសម្រាប់ឆ្នាំសារពើពន្ធនីមួយៗដើម្បីទទួលបានការលើកទឹកចិត្តដោយបន្ថយពន្ធលើប្រាក់ចំណូលចំនួន 50ភាគរយនៃពន្ធលើប្រាក់ចំណូល ត្រូវបង់ក្នុងរយៈពេលនៃការទទួលបានការលើកទឹកចិត្តពន្ធដារ។

ការលើកទឹកចិត្តពន្ធដារមានរយៈពេល 3ឆ្នាំ និងត្រូវគិតចាប់ផ្តើមពីដើមឆ្នាំជាប់ពន្ធដែលមូលបត្រនោះត្រូវបានបោះផ្សាយលក់ជាសាធារណៈក្នុងករណីដែលការបោះផ្សាយលក់នោះធ្វើឡើងក្នុងអំឡុងពេល 6ខែ ដើមឆ្នាំជាប់ពន្ធនោះ ឬក៏ដើមឆ្នាំជាប់ពន្ធបន្ទាប់ពីឆ្នាំជាប់ពន្ធដែលមូលបត្រនោះត្រូវបោះផ្សាយលក់ជាសាធារណៈក្នុងករណីដែលការបោះផ្សាយលក់នោះធ្វើឡើងក្នុងអំឡុងពេល 6ខែចុងឆ្នាំជាប់ពន្ធ និងអំឡុងពេលណាមួយដែលទទួលបានការអនុញ្ញាតពីរដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ។

ចំពោះ “ក្រុមហ៊ុន ឬសហគ្រាសបោះផ្សាយមូលបត្រកម្មសិទ្ធិ និងឬមូលបត្របំណុលលើកដំបូងជាសាធារណៈដែលទទួលបានការអនុញ្ញាតពីគណៈកម្មការមូលបត្រ ហៅថា គ.ម.ក និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត ក្នុងរយៈពេល 3ឆ្នាំ គិតចាប់ពីថ្ងៃដែលអនុក្រឹត្យនេះចូលជាធរមាន ត្រូវទទួលបានការអនុគ្រោះបំណុលពន្ធដែលរួមបញ្ជូលពន្ធលើប្រាក់ចំណូលទាំងស្រុង ពន្ធកាត់ទុក អាករលើតម្លៃបន្ថែម អាករពិសេសលើទំនិញ និងសេវាមួយចំនួន អាករស្នាក់នៅ អាករបំភ្លឺសាធារណៈ”។

ការអនុគ្រោះបំណុលពន្ធទាំងស្រុង គឺបំណុលពន្ធចាប់ពីកាលបរិច្ឆេទ N-2 ដល់ N-10 សម្រាប់ក្រុមហ៊ុន ឬសហគ្រាសដែលបានបំពេញលក្ខខណ្ឌក្នុងការចុះបញ្ជីនៅទីផ្សារគោល។ បំណុលពន្ធចាប់ពីកាលបរិច្ឆេទ N-2 ដល់ N-10 សម្រាប់សហគ្រាសធុនតូច និងមធ្យមដែលបានបំពេញលក្ខខណ្ឌក្នុងការចុះបញ្ជីនៅទីផ្សារកំណើន។ (ឆ្នាំ N គឺជាឆ្នាំដែលក្រុមហ៊ុន ឬសហគ្រាសធ្វើការបោះផ្សាយមូលបត្រកម្មសិទ្ធិ និងឬមូលបត្របំណុលជាសាធារណៈជាលើកដំបូង)។

អនុក្រឹត្យក៏បានលើកទឹកចិត្តពន្ធកាត់ទុកដល់អ្នកវិនិយោគមូលបត្រផងដែរ ដោយអ្នកវិនិយោគសាធារណៈ ត្រូវទទួលបានការបន្ថយពន្ធកាត់ទុក50ភាគរយលើប្រាក់ និងឬភាគលាភដែលបានមកពីការកាន់កាប់ និងឬទិញមូលបត្ររដ្ឋ មូលបត្រកម្មសិទ្ធិ និងមូលបត្របំណុលសម្រាប់រយៈពេល3ឆ្នាំ គិតចាប់ពីថ្ងៃដែល អនុក្រឹត្យនេះចូលជាធរមាន។

ដោយឡែកក្រុមហ៊ុន ឬសហគ្រាសដែលមិនត្រូវបានទទួលការលើកទឹកចិត្តពន្ធលើប្រាក់ចំណូលក្នុងករណីក្រុមហ៊ុននោះជាសហគ្រាសវិនិយោគមានលក្ខណសម្បត្តិគ្រប់គ្រាន់ដែលកំពុងស្ថិតនៅក្នុងរយៈពេលលើកលែងពន្ធលើប្រាក់ចំណូល ដូចមានចែងក្នុងច្បាប់ និងបទប្បញ្ញត្តិស្តីពីការវិនិយោគនៃព្រះរាជាណាចក្រកម្ពុជា។

អគ្គនាយកដ្ឋានពន្ធដារអាចស្នើសុំទៅក្រសួងសេដ្ឋកិច្ច និងហិរញ្ញវត្ថុតាមរយៈ គ.ម.ក ដើម្បីបញ្ឈប់ការលើកទឹកចិត្តពន្ធដារ និងការអនុគ្រោះបំណុលពន្ធ ក្នុងករណីក្រុមហ៊ុន ឬសហគ្រាសបោះផ្សាយមូលបត្រកម្មសិទ្ធិ ឬមូលបត្របំណុលលើកដំបូងជាសាធារណៈមិនបានដាក់លិខិតប្រកាសសារពើពន្ធប្រចាំខែ តាមកាលកំណត់របស់រដ្ឋបាលសារពើពន្ធ។ មិនបានដាក់លិខិតប្រកាសសារពើពន្ធប្រចាំឆ្នាំសម្រាប់ឆ្នាំសារពើពន្ធ និងបង់ប្រាក់ពន្ធតាមកាលកំណត់ នឹងមិនអនុញ្ញាតឱ្យរដ្ឋបាលសារពើពន្ធធ្វើសវនកម្មលើបញ្ជីកាគណនេយ្យ ឬឯកសារផ្សេងៗនិងមិនបានបង់ពន្ធអាករទាំងអស់ ពន្ធបន្ថែម និងការប្រាក់ដែលបានកំណត់សម្រាប់រយៈពេលជាប់ពន្ធ ដែលបានធ្វើសវនកម្មរួចដោយរដ្ឋបាលសារពើពន្ធ។

ដោយឡែកក្រុមហ៊ុន ឬសហគ្រាសដែលទទួលបានការលើកទឹកចិត្តពន្ធលើប្រាក់ចំណូលមិនបានអនុវត្តតាមច្បាប់ស្តីពីការបោះផ្សាយ និងការជួញដូរមូលបត្រមហាជន និងបទប្បញ្ញត្តិនានាពាក់ព័ន្ធនឹងវិស័យ មូលបត្រ គ.ម.ក អាចស្នើសុំទៅក្រសួងសេដ្ឋកិច្ច និងហរិញ្ញវត្ថុ ដើម្បីបញ្ឈប់ការលើកទឹកចិត្តពន្ធបាន។

ចំពោះក្រុមហ៊ុនដែលបានបោះផ្សាយមូលបត្រកម្មសិទ្ធិ ឬមូលបត្របំណុលលើកដំបូងសាធារណៈ និងដែលបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុតរួចហើយ តែមិនទាន់ទទួលបានការលើកទឹកចិត្តពន្ធដារនោះ ក៏ត្រូវបានផ្តល់ការលើកទឹកចិត្តពន្ធដារផងដែរ។

លោកឧកញ៉ា ហួត អៀងតុង ប្រធានអគ្គនាយកនៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីតដែលជាស្ថាប័នហិរញ្ញវត្ថុដំបូងគេដែលបានបោះផ្សាយលក់មូលបត្របំណុលនៅក្នុងផ្សារមូលបត្រកម្ពុជា បានថ្លែងថា វាជារឿងល្អ ដែលអាចជួយជំរុញផ្សារហ៊ុននៅកម្ពុជាកាន់តែល្អប្រសើរឡើង។

លោកឧកញ៉ាបន្ថែមថា ការអនុគ្រោះពន្ធនេះ គឺជាការចាប់ផ្តើមដ៏ត្រឹមត្រូវ ដោយសារតែក្រុមហ៊ុនមួយចំនួនធំបានចាប់ផ្តើមអនុវត្តតាមច្បាប់ តាមទម្លាប់ គោលការណ៍បានត្រឹមត្រូវច្រើនហើយ ដូចជាទៅលើប្រព័ន្ធគណនេយ្យ ប្រព័ន្ធគ្រប់គ្រង និងអភិបាលកិច្ចល្អ។ លោកឧកញ៉ាបន្តថា ក្រុមហ៊ុនទាំងអស់នោះបានបំពេញបានល្អច្រើនទៅលើគុណវុឌ្ឍិ ជាពិសេសទៅលើប្រព័ន្ធគ្រប់គ្រង ហិរញ្ញវត្ថុ និងអភិបាលកិច្ចល្អ។

លោកឧកញ៉ាបន្តទៀតថា៖“វាជាការលើកទឹកចិត្តមួយដ៏ល្អពីសំណាក់រដ្ឋាភិបាលកម្ពុជា ការលើកទឹកចិត្តនេះអាចនឹងជំរុញឱ្យមានក្រុមហ៊ុនច្រើនឡើងក្នុងទីផ្សារហ៊ុន ហើយខ្ញុំជឿថា ប្រជាជនចាប់ផ្តើមយល់ និងមានទំនុកចិត្តលើផ្សារហ៊ុន ដូចនេះវាជាការចាប់ផ្តើមដ៏ល្អមួយ”៕

January 23, 2019

ដឹងអត់ ?? នាយ ចឺម សល់មួយខែដល់ទៅម៉ឺនៗដុល្លារ

នាយ ចឺម អតីតអ្នកកំប្លែងក្រុមនាយ ពែកមី និងជាតារាចម្រៀងប្រចាំផលិតកម្មសាន់ដេ ត្រូវបានគេដឹងថា ថ្មីៗនេះវីឡាថ្មីសន្លាង ដែលមានទីតាំងស្ថិតនៅឃុំមហាឫស្ស៊ី ស្រុកគងពិសី ខេត្តកំពង់ស្ពឺ ចំណាយទឹកប្រាក់បុកគ្រិះអស់ជាង 14 ម៉ឺនដុល្លារសហរដ្ឋអាមេរិក របស់នាយ ចឹម នោះ មានសភាពជិតរួចរាល់ហើយ ។ ថ្វីបើនៅមានវ័យក្មេងខ្ចីក៏ពិតមែន ប៉ុន្តែតារាចម្រៀងនាយ ចឺម ដែលជាអតីតតារាកំប្លែង ទទួលបានការគាំទ្រខ្លាំងពីសំណាក់ទស្សនិកជន ហើយសម្រាប់ការគាំទ្រដ៏លើសលប់នេះ បានធ្វើឱ្យនាយ ចឺម គេចចេញពីភាពក្រ រហូតក្លាយជាអ្នកមានទ្រព្យសម្បត្តិស្ដុកស្ដម ជួយទំនុកបម្រុងក្រុមគ្រួសារសព្វបែបយ៉ាង។

មួយរយៈចុងក្រោយនេះ គឺនាយរវល់ខ្លំាងមែនទែន ទៅលើការថតចំរៀង សំរាប់ចូលឆ្នំាខ្មែរ នាយ ចឺម បញ្ចាក់ឱ្យសារព័តមានក្នុងស្រុកមួយដឹងថា នាយ អាចរកបានលុយច្រើនដែរមួយខែៗ តែត្រូវចំនាយក៏ច្រើនដែលលើអ្នករំា ទៅ លើការធ្វើដំនើរ ទៅលើឡាន និងថ្លៃចំនាយផ្សេងៗទៀត ។ រហូតដល់ចុងក្រោយនាយទម្លាយការពិតថា ក្នងមួយខែអាចសល់បាន 2ម៉ឺនដុល្លារ ឬ លើសនេះផងដែរ ។ ហើយបច្ចុប្បន្ននេះដែរនាយ កំពុងមមាញឹកចំពោះផ្នែកចំរៀង ដោយឡែកចំពោះអាជីពកំប្លែងគឺសំរាកមួយរយះសិន ៕

January 22, 2019

វិស័យឧស្សាហកម្មក្នុងឆ្នាំ2018 រួមចំណែកក្នុងកំណើន ផ.ស.ស 32.4%

ឆ្នាំ2018 កន្លងទៅ វិស័យឧស្សាហកម្មបានចូលរួមក្នុងកំណើននៃផលិតផលក្នុងស្រុកសរុប(ផ.ស.ស)មានប្រមាណ 32.4% ដែលសម្ទុះនៃការរីកចម្រើនក្នុងវិស័យឧស្សាហកម្មនេះបានរួមចំណែកមួយផ្នែកធំដល់កំណើនសេដ្ឋកិច្ចជាតិ និងរួមចំណែកដល់ការផ្លាស់ប្តូររចនាសម្ព័ន្ធសេដ្ឋកិច្ចពីប្រទេសដែលពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្ម។

ឯកឧត្តមកិត្តិសេដ្ឋាបណ្ឌិត ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានលើកឡើងនៅក្នុងសន្និបាតក្រសួងស្ដីពីសមិទ្ធផលសំខាន់ៗជាច្រើនដែលក្រសួងឧស្សាហកម្ម និងសិប្បកម្ម សម្រេចបានក្នុងការជំរុញ និងអភិវឌ្ឍវិស័យឧស្សាហកម្មកម្ពុជាក្នុងឆ្នាំ2018 និងក្នុងរយៈពេលមួយអាណត្តិកន្លងទៅ ដែលកាលពីឆ្នាំមុន(2017)មានត្រឹម 30.9% តែកំណើននៃផ.ស.សក្នុងឆ្នាំ2018 កន្លងទៅមាន 32.4% ហើយបានបង្កើនអនុបាតវិស័យឧស្សាហកម្ម ប្រមាណជា 10.9% (ឆ្នាំ2017 មានតែ 9.5%)។

ឯកឧត្តមបណ្ឌិត បានបន្តថា ក្រសួងឧស្សាហកម្ម និងសិប្បកម្ម ក៏មានឆន្ទៈសិក្សាស្រាវជ្រាវ និងចាប់យកឱកាសពីការរីកចម្រើន នៃបដិវត្តន៍ឧស្សាហកម្មទី4 ដែលស្តែងឱ្យឃើញពីការវិវឌ្ឍនៃភាពរីកចម្រើនបច្ចេកវិទ្យានៃពិភពលោកហើយដែលអាចជះឥទ្ធិពលដល់ការធ្វើឱ្យមានការផ្លាស់ប្តូរយ៉ាងលឿន ដល់វិស័យផលិតកម្ម ឧស្សាហកម្ម សំដៅជំរុញឱ្យមានការកែលម្អខ្សែចង្វាក់ផលិតកម្ម ការបង្កើនផលិតភាព និងប្រសិទ្ធភាពការងារ នៅក្នុងវិស័យឧស្សាហកម្ម សហគ្រាសធុនតូច និងមធ្យមនៅកម្ពុជា។

នៅក្នុងរបាយការណ៍បានបង្ហាញថា ចំនួនរោងចក្រសរុបនៅក្នុងឆ្នាំ2018 កន្លងទៅមានចំនួន1,528ដោយចំនួននេះបានកើនលើសឆ្នាំ2017 ចំនួន 28រោងចក្រ។ ចំណែកឯកម្លាំងពលកម្មសរុបក្នុងឆ្នាំ2018 មានចំនួន 973,129នាក់ ដែលកាលពីឆ្នាំ1998 មានត្រឹមតែ 98,153នាក់ប៉ុណ្ណោះ។

ចំពោះតម្លៃសរុបបរិមាណផលិតផលក្នុងឆ្នាំ2018កន្លងទៅ មានចំនួនប្រមាណ 13,538លានដុល្លារអាមេរិក កើនឡើងប្រមាណ26% បើធៀបនឹងឆ្នាំ2017 ដែលបរិមាណផលិតផលនាំចេញមានប្រមាណតែ 10,137លានដុល្លារអាមេរិក និងតម្លៃសរុបបរិមាណផលិតផលលក់ក្នុងស្រុកមានប្រមាណ3,401លានដុល្លារអាមេរិក។

នៅក្នុងវិស័យសហគ្រាសធុនតូច និងមធ្យម និងសិប្បកម្មផ្នែកកម្មន្តសាល SMEs វិញក្នុងឆ្នាំ2018 មានចំនួនសរុប 156,853មូលដ្ឋាន(ទីតាំងអាជីវកម្ម) និងផ្តល់ការងារបានចំនួន1,123,333កន្លែង ធៀបនឹងឆ្នាំ2017 មានចំនួន 155,640មូលដ្ឋាន ដែលក្នុងនោះមានកំណើនចំនួន 1,213មូលដ្ឋាន ស្មើនឹង0.78%។

ឯកឧត្តម ចម ប្រសិទ្ធ បានថ្លែងប្រាប់អ្នកសារព័ត៌មានថា នៅក្នុងវិស័យសហគ្រាសធុនតូច និងមធ្យម និងសិប្បកម្មផ្នែកកម្មន្តសាលនេះ រាជរដ្ឋាភិបាលបានយកចិត្តទុកដាក់យ៉ាងខ្លាំង ដោយបានលើកទឹកចិត្តក្នុងការអនុគ្រោះពន្ធ ដែល SMEs អាចចាប់យកនូវអត្ថប្រយោជន៍ពីការលើកទឹកចិត្តផ្នែកពន្ធដារ ដែលរាជរដ្ឋាភិបាលបានដាក់ចេញនេះ ដើម្បីលើកកម្ពស់ការអភិវឌ្ឍ SMEs ដែលជាចលករមួយដ៏សំខាន់ក្នុងការអភិវឌ្ឍវិស័យសេដ្ឋកិច្ច បង្កើតការងារបន្ថែម និងបង្កើនសមត្ថភាពផលិតកម្មក្នុងស្រុក។

សម្រាប់ការផ្តល់ការលើកទឹកចិត្តផ្នែកពន្ធដារចំពោះអាជីវកម្ម សហគ្រាសអាចទទួលបាននូវការលើកទឹកចិត្តដូចជា៖

1- លើកលែងពន្ធលើប្រាក់ចំណូលចំនួន 3ឆ្នាំដោយគិតចាប់ពីថ្ងៃដែលចុះបញ្ជីពន្ធដារសម្រាប់សហគ្រាសចុះបញ្ជីថ្មី ឬចាប់ពីថ្ងៃដែលសហគ្រាសមកធ្វើបច្ចុប្បន្នកម្មសម្រាប់សហគ្រាសដែលបានចុះបញ្ជីពន្ធដាររួចហើយ ចាប់ពីពេលអនុក្រឹត្យនេះចូលជាធរមាន។

2- លើកលែងពន្ធលើប្រាក់ចំណូលរយៈពេល5ឆ្នាំ ដោយគិតចាប់ពីថ្ងៃដែលចុះបញ្ជីពន្ធដារសម្រាប់សហគ្រាសចុះបញ្ជីថ្មី ឬចាប់ពីថ្ងៃដែលសហគ្រាសមកធ្វើបច្ចុប្បន្នកម្មសម្រាប់សហគ្រាសដែលបានចុះបញ្ជីពន្ធដាររួចហើយ ចាប់ពីពេលអនុក្រឹត្យនេះចូលជាធរមាន និងបានបំពេញលក្ខខណ្ឌណាមួយដូចខាងក្រោម ដូចជាការប្រើវត្ថុធាតុដើមក្នុងស្រុកចាប់ពី 60%ឡើងទៅ ឬបង្កើនចំនួននិយោជិតបន្ថែមយ៉ាងតិច 20% ឬមានទីតាំងក្នុងតំបន់ប្រមូលផ្តុំសហគ្រាសធុនតូច និងមធ្យម (SME Cluster)។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្នឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានផ្តល់ការកោតសរសើរខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងឧស្សាហកម្ម និងសិប្បកម្ម ក្នុងការអនុវត្តគោលនយោបាយ និងយុទ្ធសាស្ត្រដែលបានដាក់ចេញដោយរាជរដ្ឋាភិបាល នៅក្នុងនីតិកាលទី5 កន្លងទៅ រួមទាំងយុទ្ធសាស្ត្រចតុកោណដំណាក់កាលទី3 គោលនយោបាយអភិវឌ្ឍន៍វិស័យឧស្សាហកម្ម ឆ្នាំ2015-2025។

ឯកឧត្តមអគ្គបណ្ឌិត អូន ព័ន្ធមុនីរ័ត្ន បានបញ្ជាក់ថា កិច្ចខិតខំទាំងអស់នោះ បាននាំមកនូវសមិទ្ធផលនានាគួរជាទីមោទនៈ និងបានធ្វើឱ្យវិស័យឧស្សាហកម្មកម្ពុជា មានការអភិវឌ្ឍរីកចម្រើនពីដំណាក់កាលមួយ ទៅដំណាក់កាលមួយ ដែលបានចូលរួមវិភាគទានយ៉ាងសំខាន់ ដល់ការរក្សាកំណើនសេដ្ឋកិច្ចជាតិ៕

January 22, 2019

ដឹងហើយ!! នី រតនា ដឹកដៃភរិយាទៅក្រេបច័ន្ទទឹកឃ្មុំនៅកោះម៉ាឌីវ

ប្រិយមិត្តជាច្រើនប្រាកដជាបានដឹងហើយថា តារាចម្រៀងប្រចាំផលិតកម្មហង្សមាស លោកនី រតនា បានរៀបចំពិធីមង្គលការរបស់ខ្លួនយ៉ាងអធិកអធម កាលពីថ្ងៃទី18 ខែមករា កន្លងទៅនេះ ដែលមានការចូលរួមពីសំណាក់មិត្តរួមសិល្បៈជាច្រើនដួង បានចូលរួមអបអរដល់គូភរិយាថ្មីមួយគូនេះ។ យ៉ាងណាមិញនៅពេលថ្មីនេះ លោកនី រតនា បានបង្ហោះរូបភាពជាមួយនិងភរិយារបស់លោក និងបានសរសេរថា “ទាយមើលថាពួកខ្ញុំកំពុងទៅណា?” ។ អ្នកគាំទ្រទ្រាំមិនបានក៏បានធ្វើការខម្មិន្តថា៖ “Honey moon, ទៅក្រេបទឹកឃ្មុំ” ។

មានអ្នកខ្លះទស្សទាយថា ទៅក្រេបទឹកឃ្មុំ នៅឯប្រទេសថៃ ហើយបានសរសេរសារជូនពរអ្នកទាំងពីរប្រកបដោយសុខសុវត្តិភាពនឹងរីករាយក្នុងការធ្វើដំណើរកម្សាន្ដនេះផងដែរ ។ ជាការពិតណាស់ លោក នី រតនា បាន Live វីដេអូ ដោយបញ្ជាក់ថា លោកបានធ្វើដំណើរមកកាន់កោះ ម៉ាឌីវ ប្រហែលម៉ោង2រសៀល។ គ្រាន់តែមកដល់ទីនេះភ្លាម អ្នកទាំងពីរពិតជាភ្ញាក់ផ្អើលនឹងទេសភាពស្អាតមិនធម្មតា ទឹកថ្លាឆ្លុះដល់បាត រួមទាំងអាកាសធាតុត្រជាក់ បរិសុទ្ធ ថែមទៀត កាន់តែធ្វើឲ្យដំណើរកម្សាន្តមួយនេះ រ៉ូមែនទិក។ លើសពីនេះ លោកសន្យាជាមួយអ្នកគាំទ្រថា នឹងបង្ហោះរូបស្អាតៗនៅកោះម៉ាឌីវ ឱ្យបានទស្សនា។

ទស្សនារូបភាពទៅក្រេបច័ន្ទទឹកឃ្មុំនៅកោះម៉ាឌីវ របស់តារាចម្រៀង នី រតនា និងភរិយា៖

January 22, 2019

ស្ករត្នោតកំពង់ស្ពឺរំពឹងថា នឹងទទួលបានការចុះបញ្ជីក្នុងសហគមន៍អឺរ៉ុបនៅដើមឆ្នាំ2019នេះ

រហូតមកទល់ពេលនេះ សហគមន៍អឺរ៉ុបមិនទាន់បានចុះបញ្ជីស្ករត្នោតកំពង់ស្ពឺ ដែលជាផលិតផលសម្គាល់ភូមិសាស្ត្ររបស់កម្ពុជានៅក្នុងទីផ្សារសហគមន៍អឺរ៉ុបនៅឡើយទេ បើទោះបីជាវិវាទ និងការប្តឹងជំទាស់ពីសំណាក់ក្រុមហ៊ុនមួយចំនួននៅអឺរ៉ុបត្រូវបានដោះស្រាយរួចហើយក្តី។ នេះបើយោងតាមមន្ត្រីនៃក្រសួងពាណិជ្ជកម្ម។

ស្ករត្នោតកំពង់ស្ពឺ ដែលជាផលិតផលសម្គាល់ភូមិសាស្ត្រ (GI)នៅកម្ពុជាត្រូវបានគេរំពឹងថា នឹងទទួលបានការចុះបញ្ជីទទួលស្គាល់ជាផលិតផលប្រចាំភូមិសាស្ត្រនៅសហគមន៍អឺរ៉ុបនៅដើមឆ្នាំនេះ ប៉ុន្តែកម្ពុជាមិនទាន់ទទួលបានដំណឹងល្អណាមួយនៅឡើយទេអំពីការចុះបញ្ជីនេះ។ នេះបើយោងតាមសម្តីលោក អប់ រ៉ាឌីប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម។

លោកបានថ្លែងថា ស្ករត្នោតកំពង់ស្ពឺដែលត្រូវបានទទួលស្គាល់ និងចុះបញ្ជីជាផលិតផលសម្គាល់ភូមិសាស្ត្រនៅក្នុងព្រះរាជាណាចក្រកម្ពុជារួចហើយនោះ នឹងក្លាយជាផលិតផលទី2 ដែលនឹងត្រូវបានសហគមន៍អឺរ៉ុបទទួលចុះបញ្ជីជាផលិតផលសម្គាល់ភូមិសាស្ត្រនៅសហគមន៍អឺរ៉ុបបន្ទាប់ពីផលិតផលម្រេចខេត្តកំពតដោយការចុះបញ្ជីនេះអាចនឹងធ្វើឡើងនៅក្នុងឆ្នាំនេះ។

លោក រ៉ាឌី បានរៀបរានប់៖“ស្ករត្នោតកំពង់ស្ពឺត្រូវបានគេរំពឹងថា នឹងទទួលបានការចុះបញ្ជីកាលពីខែមេសា ឆ្នាំ2018កន្លងទៅ ប៉ុន្តែដោយសារមានបញ្ហាមួយចំនួនទាក់ទងនឹងនិយមន័យនៃពាក្យថា “ស្ករត្នោត” នៅក្នុងច្បាប់ GI របស់សហគមន៍អឺរ៉ុប ទើបធ្វើឱ្យដំណើរការចុះបញ្ជីមានការពន្យារពេល”។

លោក រ៉ាឌី បានបន្តថា៖“អ្វីៗទាំងអស់យើងបានដោះស្រាយរួចអស់ហើយ ហើយយើងក៏បានកែសៀវភៅបន្ទុកនៃស្ករត្នោតរបស់យើងដែរ ដើម្បីឱ្យស្របទៅនឹងច្បាប់របស់សហគមន៍អឺរ៉ុប”។ លោកបន្ថែមថា៖“ការទទួលស្គាល់របស់សហគមន៍អឺរ៉ុប និងជួយការពារផលិតផលស្ករត្នោតកម្ពុជាពីការបន្លំម៉ាកនៅលើទីផ្សារសហគមន៍អឺរ៉ុប និងម្យ៉ាងវិញទៀត វានឹងជួយឱ្យតម្លៃស្ករត្នោតកំពង់ស្ពឺទទួលបានតម្លៃខ្ពស់ផងដែរ”។

គួរបញ្ជាក់ថា កាលពីខែកុម្ភៈ ឆ្នាំ2017 ម្រេចកំពតបានក្លាយជាផលិតផលទី1 របស់កម្ពុជាដែលទទួលបានវិញ្ញាបនបត្រផលិតផលសម្គាល់ភូមិសាស្ត្រ(GI) ពីសហគមន៍អឺរ៉ុប។ ក្នុងន័យថា រាល់ផលិតផលដែលបានលក់នៅអឺរ៉ុប គឺមានឈ្មោះថា ម្រេចកំពត ដែលមានប្រភពដើមនៅខេត្តកំពត និងខេត្តជាប់គ្នា គឺខេត្តកែប។

លោក សំ សារឿន ប្រធានសមាគមអភិវឌ្ឍន៍ស្ករត្នោតខេត្តកំពង់ស្ពឺ (KSPSPA)បានឱ្យដឹងថាចំពោះស្ករត្នោតកំពង់ស្ពឺដែលស្នើចុះបញ្ជីជាផលិតផលសម្គាល់ភូមិសាស្ត្រនៅអឺរ៉ុបនោះ គឺមិនមានបញ្ហាអ្វីនោះទេនៅពេលនេះ។

លោក សារឿន មានប្រសាសន៍ថា៖“គេទទួលយកហើយ គ្មានការប្តឹងជំទាស់ទៀតទេ ពីមុនមានក្រុមហ៊ុននៅស្វ៊ីស និងក្រុមហ៊ុននៅបែលហ្ស៊ិក គេប្តឹងជំទាស់ពីការចុះបញ្ជីនេះ តែឥឡូវគេដកពាក្យបណ្តឹងហើយ យើងអាចចុះបានហើយ។ យើងសង្ឃឹម100ភាគរយថា អាចចុះបាន តែបាន ឬមិនបានទាល់តែយើងទទួលបានវិញ្ញាបនបត្រសិន ទើបយើងអាចនិយាយបានថា ជោគជ័យ ឥឡូវគ្រាន់តែទទួលបានការចុះបញ្ជី ប៉ុន្តែមិនទាន់ដល់ដៃយើងទេ ទាល់តែដល់ដៃយើងសិន ទើបជោគជ័យ”។

លោកបានបញ្ជាក់ទៀតថា៖“នៅពេលយើងទទួលបានវិញ្ញាបនបត្រការទទួលស្គាល់របស់សហគមន៍អឺរ៉ុបហើយ យើងនឹងស្នើទៅក្រសួងដើម្បីឆែកមើលសណ្ឋានដីក្នុងស្រុកផ្សេងទៀតនៅក្នុងខេត្តកំពង់ស្ពឺ ព្រោះយើងមានសក្តានុពលផលិតច្រើនដោយពង្រីកតំបន់ផលិត យើងត្រូវពិនិត្យដី ស្ថានភាពដី ដែលបច្ចុប្បន្នយើងមានឧដុង្គ សំរោងទង អង្គស្នួល តែយើងនៅខ្វះ 6ស្រុកទៀតដែលយើងកំពុងសិក្សាបន្ត”។

លោកប្រធានសមាគមអភិវឌ្ឍន៍ស្ករត្នោតខេត្តកំពង់ស្ពឺបានបន្តថា នៅឆ្នាំ2018 សមាគមរបស់លោក ដែលមានសមាជិកប្រមាណជា 250នាក់បានផលិតស្ករត្នោតបានចំនួន 300តោន។ ក្នុងនោះស្ករសាច់មានចំនួន 55តោន និងស្ករម្សៅចំនួន 245តោន។

លោកបន្តថា ក្រុមហ៊ុន ខនហ្វីរែល បានបញ្ជាទិញប្រមាណជា 145តោន និងក្រុមហ៊ុន Signatures of Aisa បានបញ្ជាទិញចំនួន 58តោន ហើយក្រៅពីនោះ គឺទិញដោយក្រុមហ៊ុនតូចៗនៅក្នុងស្រុក។

លោកសារឿន បានបន្តថា បច្ចុប្បន្ននេះតាមរយៈការចុះកិច្ចព្រមព្រៀងជាមួយក្រុមហ៊ុនក្នុងស្រុកនានា ធ្វើឱ្យតម្លៃស្ករត្នោតកំពង់ស្ពឺមានទីផ្សារល្អ ដោយលោកបញ្ជាក់ថា ក្នុង1គីឡូក្រាមស្ករត្នោត កសិករអាចលក់ បានចាប់ពី 5,200រៀល ដល់6,០០០រៀលតាមតំបន់ និងតាមក្រុមហ៊ុនបញ្ជាទិញ។

បើតាមលោក សារឿន ក្នុង1គីឡូស្ករត្នោតកសិករត្រូវចំណាយថ្លៃដើមប្រមាណជា 5,050រៀល។ លោកមានប្រសាសន៍ថា នៅពេលនេះតម្រូវការស្ករត្នោតសរីរាង្គមានជាង 75ភាគរយ ដោយហេតុថា ការនាំចេញភាគច្រើនទៅបរទេស ដូច្នេះអ្នកបញ្ជាទិញអត់ស្គាល់ស្ករ GI ដែលជាផលិតផលស្ករត្នោតសម្គាល់ភូមិសាស្ត្រទេ។ លោកបញ្ជាក់ថា ដើម្បីបំពេញតម្រូវការទីផ្សារ លោកបានបែងចែកប្រភេទដើមត្នោតដែលចាត់ទុកជាត្នោតសរីរាង្គ និងGI។

លោកបានពន្យល់ថា៖“បរទេសស្គាល់ GI តិចតួច តែគេស្គាល់សិរីរាង្គ អត់មានជាតិពុល អត់មានប្រើប្រាស់សារធាតុគីមីនៅពេលកែច្នៃ ចេញពីដើមយកមករម្ងាស់អត់គីមី គេខ្លាចកន្លែងហ្នឹង អុីចឹងនៅបរទេស ស្ករសរិរាង្គ គឺនៅក្នុងព្រៃ ចេញពីព្រៃ បើមានស្រែអត់ទេ ហើយបើនៅក្នុងស្រែ តែនៅឆ្ងាយពីភ្លឺស្រែ 3ម៉ែត្រ ឬ1ម៉ែត្រ យើងប្រើឈ្មោះសរីរាង្គបាន“។

លោកសារឿនបានពន្យល់ថា៖“សំខាន់កសិករដឹងតែផលិតទេ ពេលយើងចុះទៅជួបពួកគាត់ យើងពន្យល់គាត់ ប្រាប់គាត់ពីហេតុផលនៃដើមត្នោតដែលអាចធ្វើជាសរីរាង្គបាន ដោយឡែករម្ងាស់ស្ករដូចគ្នា អ្វីៗដូចគ្នាទាំងអស់ ដូច្នេះយើងនិយាយពីដើមត្នោត និងរុក្ខជាតិពពេល ជារុក្ខជាតិដែលយកមកកូរលាយ គ្មានសារធាតុគីមីទេ”។

លោកបន្តថា៖“បើកសិករណាមួយចង់ផលិតស្ករសរីរាង្គ សមាគមនឹងពិនិត្យមើលដើមត្នោតក្នុងចម្ការ ក្នុងព្រៃ បើដើមត្នោតអត់ជាប់នឹងស្រែដែលកសិករធ្វើការបាចជីដាក់ស្រែទេ អុីចឹងគេត្រូវធ្វើតាមសៀវភៅបន្ទុក សរីរាង្គ ដោយឡែកដើមត្នោត GI វិញ បានន័យថា ឱ្យតែនៅក្នុងស្រែ ហើយស្ថិតនៅក្នុងខេត្តកំពង់ស្ពឺ គឺជា GI យើងពិនិត្យតែតំបន់ដែលដើមត្នោតដុះនៅលើដីនោះទេ។

លោក ចាន់ ពេជ្រ អ្នកគ្រប់គ្រងទូទៅនៃក្រុមហ៊ុន Signatures of Asia បានថ្លែងថា ឆ្នាំនេះយើងនឹងបញ្ជាទិញ 130តោន ក្នុងនោះស្ករម្សៅយើងនឹងបញ្ជាទិញ 100តោន និងស្ករសាច់ចំនួន 30តោន។ លោកពេជ្រ និយាយថា ការចុះបញ្ជីស្ករត្នោតនៅសហគមន៍អឺរ៉ុបអាចនឹងជួយដល់អាជីវកម្មរបស់យើង ដរាបណាយើងមានកញ្ចប់ថវិកាក្នុងការផ្សព្វផ្សាយ។

លោកបន្តថា GI គឺជាផលិតផលសម្គាល់ភូមិសាស្ត្រ ដែលធ្វើឱ្យផលិតផលនេះមានគុណភាពពិសេសជាងគេ តែបើសិនជាយើងខ្វះការផ្សព្វផ្សាយអតិថិជននៅសហគមន៍អឺរ៉ុបមិនបានយល់ពីផលិតផលរបស់កម្ពុជាទេ ជាពិសេសផលិតផលសម្គាល់ភូមិសាស្ត្រ។

លោកពេជ្របានបន្ថែមទៀតថា៖“វាមានផលប្រយោជន៍ គ្រាន់តែថា ភ្លាមៗវាមានភាពលំបាកតិចតួច វាផ្តល់នូវអត្ថប្រយោជន៍តិច ប៉ុន្តែអនាគតវានឹងល្អ”។ លោកថា ក្រុមហ៊ុនយើងមានដៃគូចំនួន3ទៅ4ប្រទេសដែរ ដូចជា អុីតាលី ហូឡង់ អាមេរិក”។ លោកបញ្ជាក់ថា តម្រូវការមានច្រើនជាងនេះ តែក្រុមហ៊ុនយើងមានការពិបាកក្នុងការប្រមូល ដោយសារកសិករផ្គត់ផ្គង់មិនគ្រប់។

យ៉ាងណាក៏ដោយលោក សារឿន បានបន្តថា ក្នុងឆ្នាំ2009 ពេលដែលសមាគមបង្កើតឡើង ដើមត្នោតមានជាង 1លានដើមនៅស្រុកឧដុង្គ ស្រុកសំរោងទង និងស្រុកអង្គស្នួល ដោយឡែកនៅ2010 ដើមត្នោតបានថយចុះ ព្រោះនៅពេលដែលគេទិញដីធ្វើការអភិវឌ្ឍ អុីចឹងគេកាប់ដើមត្នោតជាអត្តសញ្ញាណនោះចោល ព្រោះវាមិនមែនជាសម្បត្តិរដ្ឋទេ ដូច្នេះយើងមានតែការអប់រំ។

លោកថា ដើម្បីបានស្ករ 300តោនយើងត្រូវមានសមាជិកជាង 200គ្រួសារ ទៅ 250គ្រួសារ តែយើងមានរួចហើយ។ យើងគ្រោងពង្រីកបន្ថែមទៀត ព្រោះសមត្ថភាពរបស់ខេត្តកំពង់ស្ពឺអាចផលិតបានលើស 500តោន នេះបើរាប់បញ្ចូលទាំងការផលិតតាមស្តង់ដារ និងមិនតាមស្តង់ដារ ប៉ុន្តែសមាគមផ្តោតតែតួលេខផលិតរបស់កសិករដែលស្ថិតក្នុងសមាគមប៉ុណ្ណោះ។ លោកប្រាប់ថា ស្ករម្សៅពិបាកផលិតជាងស្ករធម្មតា ព្រោះត្រូវការកម្លាំងពលកម្មច្រើនដើម្បីហាល និងសម្ងួត។

លោកសារឿនក៏បានលើកពីហានិភ័យផងដែរទាក់ទងនឹងការធ្វើចំណាកស្រុក ការបញ្ឈប់របរឡើងត្នោតរបស់កសិករ ខណៈពេលឧស្សាហកម្មកើនឡើង ដែលនេះជាហានិភ័យមួយក្នុងការផ្គត់ផ្គង់ស្ករ ដោយសារតែការបោះបង់ចោល។

ដោយឡែកលោកបានប្រាប់ដែរថា បើតម្លៃស្ករត្នោតខ្ពស់រហូតដល់ 2ដុល្លារក្នុង1គីឡូ អាចនឹងមានការធ្វើត្នោតច្រើន ព្រោះពួកគេនឹងត្រឡប់មកធ្វើវិញ តែនៅពេលនេះកន្លែងខ្លះលក់បាន 1ដុល្លារ 25សេន និងខ្លះលក់បាន 1ដុល្លារកន្លះ៕

January 22, 2019

អ្នកនាង ចាន់ តារាទី បង្ហើបពីទំនាក់ទំនងជាមួយអ្នកគ្រូ គង់ ណារី និងនិយាយរឿងហួសចិត្តមួយ

ក្រោយពីទទួលបាន ដំណឹងយ៉ាងរន្ធត់មួយ របស់អ្នកគ្រូ គង់ ណារី ដែលរូបគាត់ គឺជាវិរៈសិល្បការនី ដែលបានទទួល មរណៈភាពទៅហើយនោះ កាលពីថ្ងៃទី20 ខែមករា ឆ្នាំ2019 សពរបស់អ្នកគ្រូ គង់ ណារី ក៏ត្រូវបានយកទៅតម្កល់ និងបូជានៅឯវត្ដស្រះចក រាជធានី ភ្នំពេញ នាថ្ងៃពុធនេះ។

ប៉ុន្តែអ្វីដែលធ្វើឱ្យកាន់តែរន្ធត់ចិត្តជាងនេះ ទៅទៀតនោះ ដោយក្នុងពិធីបុណ្យសព របស់អ្នកគ្រូ គង់ ណារី ហាក់មានភាព ស្ងាត់ជ្រងំយ៉ាងខ្លាំង ដោយពុំសូវឃើញវត្តមាន អ្នកសិល្បៈករ និងកូនសិស្សចំនួន ដែលអ្នកគ្រូ ធ្លាប់បានបង្ហាត់បង្រៀននោះឡើយ ដោយមានត្រឹមវត្តមាន ប្រធានសមាគមសិល្បករ ខ្មែរ អ្នកនាង ចន ច័ន្ទលក្ខិណា ព្រមទាំងសមាជិក សិល្បៈករប៉ុន្មាននាក់តែប៉ុណ្ណោះ។ដោយឃើញ ពីភាពមិនអើពើ និងសុខទុក្ខរបស់តារាខ្មែរជើងចាស់ ដូចតារាបរទេសនោះ ក្នុងឱកាស ដ៏សែនក្រៀមក្រំ មួយនេះ តារាសម្ដែងជើងចាស់ អ្នកនាង ចាន់ តារាទី អតីតតារាទឹកភ្នែកនិងជាតារាស្រីដែលទទួលបានចំណាត់ថ្នាក់លេខ1 ខាងផ្នែកសិល្បះការនីឆ្នើមនៅឆ្នាំ 1990 នៅក្នុងឱកាសមហោស្រពភាពយន្តជាតិ នៅសាលមហោស្រព ព្រះសុរាម្រិត ក៏បានបង្ហាញអារម្មណ៍ ហួសចិត្តឱ្យមហាជនដឹងថា៖

«ខ្ញុំ ពិតជាសឹងមិនជឿថា កម្មវិធីបុណ្យសាស្រ្តាចារ្យអក្សរសាស្រ្តខ្មែរ និងបណ្តុះបណ្តាលកូនស្រីច្រើនរាប់មិនអស់ បែរជាគ្មានអ្នកចូលរួមយ៉ាងនេះឡើយ តើពិតជាលំបាក ណាស់ទៅគ្រាន់តែ មកចូលរួមជូនដំណើរអ្នកគ្រូ គង់ ណារី លើកចុងក្រោយ។ ផ្តាំផ្ញើទៅកាន់មហាជនទូទៅទាំងកូនសិស្សអ្នកគ្រូ គង់ ណារី និងមិនមែនក្តី សូមមេត្តាចូលរួមជូនដំណើរ លើកចុងក្រោយ នៅ ថ្ងៃពុធ ទី23 វេលាម៉ោង3រសៀល ដើម្បីបង្ហាញពីភាពសាមគ្គីក្នុងវិស័យសិល្បៈ និងឱ្យសក្តិសម នឹង កេរ្តិ៍ឈ្មោះ និងស្នាដៃច្រើនរាប់មិនអស់របស់អ្នកគ្រូ គង់ ណារី»។

គួរបញ្ជាក់ផងដែរថា អ្នកនាង ចាន់ តារាទី បានថ្លែងបញ្ជាក់ក្នុងពេលចូលរួមគោរពសព និងទទួលភ្ញៀវក្នុងពិធីបុណ្យសពអ្នកគ្រូ គង់ ណារី ថា អ្នកគ្រូ គង់ ណារី និងអ្នកនាងគឺជាបងប្អូនជីទួតមួយនឹងគ្នា ដោយមិនមែនជាអ្នកឆ្ងាយពីគ្នានោះទេ ប៉ុន្តែបណ្ដាលមកពីអ្នកនាងក៏រវល់ ហើយអ្នកគ្រូគង់ ណារី ក្នុងពេលនៅមានជីវិតក៏រវល់មិនសូវបានជួបគ្នា ទើបរវាងអ្នកនាង និងអ្នកគ្រូ មិនសូវស្និទ្ធគ្នា។ អ្នកនាងថា ម្ដាយរបស់អ្នកនាង និងម្ដាយរបស់អ្នកគ្រូ គង់ ណារី គឺជាបងប្អូនជីដូនមួយនឹងគ្នា ហើយសម្រាប់ទំនាក់ទំនងគឺមិនខុសពីបងប្អូនបង្កើតនោះទេ ប៉ុន្តែដល់ជំនាន់កូនៗគឺទាល់តែបានជួបគ្នា ទើបរាក់ទាក់គ្នា។ អ្នកនាងថាក្នុងពេលអ្នកគ្រូគង់ ណារី នៅរស់ អ្នកនាងកម្របានជួបអ្នកគ្រូខ្លាំងណាស់ ដោយទាល់តែក្នុងគ្រួសារមានកម្មវិធីធំៗ ទើបរវាអ្នកនាង និងអ្នកគ្រូ បានជួបមុខគ្នា ហើយសំណេះសំណាលក្នុងនាមជាអ្នកសិល្បៈដូចគ្នាបន្ថែម។ អ្នកនាងនិយាយថា«ខ្ញុំ និងបងណារី ជាបងប្អូនគ្នាតើ ប៉ុន្តែបើម៉ាក់ខ្ញុំ និងម៉ាក់គាត់បានជិតស្និទ្ធគ្នា តែមកដល់កូនៗមិនសូវស្និទ្ធគ្នា គឺបានជួបតែមុខគ្នាក្នុងពេលបុណ្យទានហ្នឹងឯង!»។ អ្នកនាង ចាន់ តារាទីថា អ្នកគ្រូគង់ ណារី គឺជាបងស្រីជីទួតមួយ ដែលស្រឡាញ់រាប់អានបងប្អូនគ្រប់គ្នា ប៉ុន្តែបណ្ដាលមកពីអ្នកនាងក៏រវល់ ហើយអ្នកគ្រូក៏រវល់ ទើបយូរៗបានជួបគ្នាម្ដង ហើយមិនសូវបានជួបក្នុងនាមការងារសិល្បៈនោះដែរគឺទាល់តែក្នុងកម្មវិធីគ្រួសារ៕

January 22, 2019

ក្រុម Pitou FC លើកពាន Tiger Street Football Festival 2019 ប្រចាំមណ្ឌលកំពង់ស្ពឺ

ខេត្តកំពង់ស្ពឺ៖ក្រុម Pitou FC បានគ្រងតំណែងជើងឯកក្នុងព្រឹត្តិការណ៍ការប្រកួតនៃក្របខ័ណ្ឌពានរង្វាន់ Tiger Street Football Festival 2019 ប្រចាំមណ្ឌលខេត្តកំពង់ស្ពឺ ក្រោយពីយកឈ្នះលើក្រុម AVATA ក្នុងលទ្ធផល២ទល់១ នៅវគ្គផ្តាច់ព្រ័ត្រនាយប់ថ្ងៃទី ២0 ខែមករា ឆ្នាំ២០១៩នេះនៅដីឡូត៍ ឧកញ៉ា ឈួន គឹមសាន្ត ទីរួមខេត្តកំពង់ស្ពឺ។

មុនឈានមកដល់វគ្គផ្ដាច់ព្រ័ត្រនេះ ក្រុម Pitou FC បានយកឈ្នះលើក្រុម Black Lion A ដោយលទ្ធផល៣ទល់២ ចំណែកក្រុម AVATA បានយកឈ្នះលើក្រុម ត្រពាំងលើក លទ្ធផល៥ទល់២ មិនបានទទួលជ័យជម្នះរបស់ក្រុមទាំង២ត្រូវប្រកួតជាមួយក្រុមដើម្បីដណ្តើមលេខ៣ និង លេខ៤ ។ ជាលទ្ធផល ក្រុម Black Lion A ដណ្តើមបានលេខ៣ ក្រោយឈ្នះក្រុមត្រពាំងលើក ១ទល់២ ។

សម្រាប់រង្វាន់ក្រុមជើងឯកប្រចាំមណ្ឌលខេត្តកំពង់ស្ពឺ គឺក្រុម Pitou FC ទទួលបានប្រាក់រង្វាន់១០០០ដុល្លារ ក្រុមជើងឯករងបានទៅលើក្រុម AVATA ប្រាក់រង្វាន់៧០០ដុល្លារ ក្រុមចំណាត់ថ្នាក់លេខ៣បានទៅលើក្រុម Black Lion A ប្រាក់រង្វាន់៣៥០ដុល្លារ ក្រុមចំណាត់ថ្នាក់លេខ៤ បានទៅលើក្រុម ត្រពាំងលើក ប្រាក់រង្វាន់ ១៥០ ដុល្លារ និងស្រាបៀរថៃហ្គ័រ ។

ដោយឡែកសម្រាប់ខេត្តកំពង់ស្ពឺដែលជាមណ្ឌលទី៣នេះ គណៈកម្មាធិការរៀបចំការប្រកួត យកតែ៤ក្រុមតែប៉ុណ្ណោះ ដើម្បីឲ្យទៅចូលរួមការប្រកួតវគ្គផ្តាច់ព្រ័ត្រទូទាំងប្រទេស នៅរាជធានីភ្នំពេញ ថ្ងៃទី១៦ និងទី១៧ មីនា ២០១៩ ខាងមុខនេះ ជាពិសេសមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិលោក Ronaldinho។

ការប្រកួតជម្រុះក្នុងកម្មវិធី Tiger street Football Festival 2019 នឹងធ្វើឡើងនៅមណ្ឌល បន្ទាប់គឺ ខេត្តបាត់ដំបងនៅថ្ងៃទី២៦-២៧ ខែមករា ឆ្នាំ២០១៩ នៅពហុកីឡដ្ឋានស្តាតចាស់ វាលបែកចានទីរួមខេត្តបាត់ដំបង ។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។

សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH

ពិសាដោយការទទួលខុសត្រូវ…

January 22, 2019

គ្រូបង្វឹកអារ៉ាប៊ីសាអ៊ូឌីត លាលែងពីតំណែង ខណៈជប៉ុន អូស្ត្រាលី និងអេមីរ៉ាត អារ៉ាប់រួម ទៅវគ្គបន្ត

ក្រោយពីការធ្លាក់ចេញយ៉ាងខកចិត្តពីយុទ្ធនាការ AFC Asian Cup ឆ្នាំ2019 លោក Juan Antonio Pizzi គ្រូបង្វឹកនៃក្រុមបាល់ទាត់ជម្រើសជាតិអារ៉ាប៊ីសាអ៊ូឌីត បានលាលែងពីតំណែងរបស់លោកកាលពីថ្ងៃចន្ទ។

ក្រុមជម្រើសជាតិអារ៉ាប៊ីសាអ៊ូឌី បានចាញ់ក្នុងលទ្ធផល 1-0 ក្រោមស្នាដៃក្រុមជម្រើសជាតិជប៉ុន ក្នុងវគ្គ16ក្រុមចុងក្រោយ ហើយលោក Pizzi បានបង្ហាញពីការសម្រេចចិត្តរបស់លោកក្នុងការចាកចេញភ្លាមៗ ដែរបន្ទាប់ពីការប្រកួតនោះ។

លោកបានប្រាប់អ្នកយកព័ត៌មានថា៖ «ខ្ញុំពិតជារីករាយ និងដឹងគុណដល់កីឡាកររបស់ខ្ញុំ ពួកគេបានធ្វើអ្វីដែលខ្ញុំបានស្នើសុំឱ្យធ្វើ។ ពិតណាស់ យើងបានប្រព្រឹត្តកំហុសមួយចំនួន ប៉ុន្តែយើងនឹងរៀនពីកំហុសទាំងនោះ»។

គ្រូបង្វឹករូបនេះបានបន្ថែមទៀតថា៖ «ការងាររបស់ខ្ញុំជាមួយនឹងក្រុមជម្រើសជាតិ គឺបញ្ចប់ហើយ គ្មាននរណាម្នាក់បាននិយាយជាមួយនឹងខ្ញុំពីការបន្តកុងត្រាថ្មីឡើយ។ ខ្ញុំនៅតែមិនដឹងពីការប្រជែងបន្ទាប់នោះឡើយ»។

ក្រុមជម្រើសជាតិជប៉ុន ដែលម្ចាស់ជើងឯក Asian Cup 4សម័យកាល នឹងត្រូវធ្វើដំណើរទៅកាន់វគ្គ 8ក្រុមចុងក្រោយ ដើម្បីជួបជាមួយនឹងក្រុមម្ចាស់ជើងឯកអាស៊ីអាគ្នេយ៍ វៀតណាម បើទោះបីមិនបានស្ថិតក្នុងទម្រង់លេងដ៏ល្អរបស់ខ្លួនក្នុងយុទ្ធនាការនេះក៏ដោយ។

ក្រុមម្ចាស់ផ្ទះអេមីរ៉ាត អារ៉ាប់រួម បានបញ្ចប់ដំណើរផ្សងព្រេងរបស់ក្រុមបាល់ទាត់ជម្រើសជាតិគៀហ្ស៊ីគីស្ថាន ជាមួយនឹងគ្រាប់បាល់ប៉េណាល់ទីដ៏ចម្រូងចម្រាសនៅនាទីបន្ថែម 15នាទី 2ដង ដើម្បីឈានទៅវគ្គ 8ក្រុមចុងក្រោយនៃព្រឹត្តិការណ៍ Asian Cup កាលពីថ្ងៃចន្ទ។

ជាមួយគ្នានេះ អ្នកចាំទី Mathew Ryan បានសង្គ្រោះបាល់ប៉េណាល់ទី 2គ្រាប់ ខណៈដែលក្រុមជម្រើសជាតិអូស្ត្រាលី បានផ្តួលក្រុមជម្រើសជាតិអ៊ូសបេគីស្ថាន ក្នុងការស៊ុតបាល់ប៉េណាល់ទីកាត់សេចក្តី។ ក្រុមម្ចាស់ផ្ទះ អេមីរ៉ាត អារ៉ាប់រួម ដែលបានផ្តួលគៀហ្ស៊ីគីស្ថាន 3-2 នៅនាទីបន្ថែម 15នាទី 2ដង នឹងត្រូវប៉ះជាមួយអូស្ត្រាលី ក្នុងវគ្គ 8ក្រុមចុងក្រោយ៕

January 22, 2019

Category: សង្គម និងសេដ្ឋកិច្ច