Category: សង្គម និងសេដ្ឋកិច្ច

លោក Queiroz ព្រមានពីការភ្លាត់ស្នៀតពេលប៉ះជប៉ុន នៅរាត្រីនេះ
លោក Carlos Queiroz គ្រូបង្វឹកនៃក្រុមបាល់ទាត់ជម្រើសជាតិអ៊ីរ៉ង់ បានព្រមានពីការភ្លាត់ស្នៀត ក្រោយពីបានឈានទៅវគ្គពាក់កណ្តាលផ្តាច់ព្រ័ត្រ ប៉ុន្តែការធ្លាក់ចេញរបស់ក្រុមបាល់ទាត់ជម្រើសជាតិកូរ៉េខាងត្បូង និងអូស្ត្រាលី បានធ្វើឱ្យក្រុមមានរហស្សនាមថា Team Melli មួយនេះ ជាក្រុមមានប្រៀបដាច់ក្នុងការឈ្នះពាន។
ប៉ុន្តែដំបូងឡើយ ពួកគេត្រូវតែយកឈ្នះលើក្រុមម្ចាស់ជើងឯក 4សម័យកាល ជប៉ុន នៅរាត្រីនេះឱ្យបានជាមុនសិន នៅមុនពេលក្រុមម្ចាស់ផ្ទះអេមីរ៉ាតអារ៉ាប់រួម ជួបជាមួយនឹងក្រុមជម្រើសជាតិកាតា ក្នុងរយៈពេល 24ម៉ោងបន្ទាប់។
ក្នុងពេលស្ថិតក្រោមសម្ពាធក្នុងការឈ្នះពានកីឡាបាល់ទាត់ដ៏ធំបំផុតរបស់អាស៊ីជាលើកទី1 បើគិតចាប់តាំងពីឆ្នាំ1976 ក្រុមជម្រើសជាតិអ៊ីរ៉ង់ បានឈានទៅវគ្គបន្តនៃយុទ្ធនាការនេះយ៉ាងងាយ ខណៈដែលគូប្រជែងខ្លាំងៗរបស់ពួកគេជាច្រើន បានជួបការខកចិត្ត។
ក្រោយពីក្រុមជម្រើសជាតិអ៊ីរ៉ង់បានយកឈ្នះលើក្រុមជម្រើសជាតិចិនក្នុងលទ្ធផល 3-០ ក្នុងវគ្គ 8ក្រុមចុងក្រោយដើម្បីបង្ហាញពីភាពខ្លាំងឱ្យក្រុមជប៉ុនឃើញហើយនោះ លោក Queiroz បានបញ្ជាក់ថា៖ «យើងដឹងថា ត្រីឆ្លាមធំៗនឹងតម្រង់មកកាន់យើង។ អ្វីដែលយើងបានធ្វើនៅពេលប្រកួតជាមួយនឹងក្រុមជម្រើសជាតិចិន នឹងមិនគ្រប់គ្រាន់ឡើយ»។
ស្របពេលជាមួយគ្នានេះ លោកគ្រូបង្វឹក Hajime Moriyasu បានបញ្ជាក់កាលពីថ្ងៃអាទិត្យថា ក្រុមជប៉ុនរបស់លោកនឹងប្រើប្រាស់ផែនការបស់ខ្លួនដូចមុនដដែលក្នុងវគ្គពាក់កណ្តាលផ្តាច់ព្រ័ត្រ នៅពេលជួបជាមួយនឹងក្រុមជម្រើសជាតិអ៊ីរ៉ង់។
ការឈ្នះជាប់ៗគ្នាតាមរយៈការរកបានគ្រាប់បាល់តែ 1គ្រាប់ ក្នុងនោះរាប់បញ្ចូលទាំងការយកឈ្នះលើក្រុមជម្រើសជាតិអារ៉ាប៊ីសាអ៊ូឌីត បើទោះបីជប៉ុនមានឱកាសគ្រប់គ្រងបាល់ត្រឹមតែ 23ភាគរយ បានបង្កើតឱ្យមានការចងចាំក្នុងយុទ្ធនាការ Euro ឆ្នាំ2004 ដែលនៅពេលនោះក្រុមជម្រើសជាតិក្រិក បានឈ្នះពានដ៏មិននឹកស្មានដល់តាមរយៈការដណ្តើមបានលទ្ធផលស្រដៀងគ្នានេះ៕

ប្រភពពី៖ France24

January 28, 2019
សពតារាចម្រៀងស្រីក្នុងដួងចិត្ត ខេមរៈ ស្រីពៅ ដឹកពីឥណ្ឌា មកដល់កម្ពុជាព្រឹកស្អែកនេះ
មហាជនជាច្រើនជាអ្នកគាំទ្រ កំពុងសោកសៅ និងអាល័យចំពោះមរណភាពរបស់កញ្ញាខេមរៈ ស្រីពៅ នឹកស្មានមិនដល់ និងគួរឱ្យរន្ធត់ចិត្តជាខ្លាំង ព្រោះកញ្ញាបានលាចាកទៅយ៉ាងស្ងាត់ៗ និងឃ្លាតពីសិល្បះមួយរយៈធំ ហើយស្រាប់តែបាត់បង់ជីវិតដោយសារជំងឺជំងឺសួត និងក្រលៀន និងផុតដង្ហើមនៅរសៀលម៉ោង1 ក្នុងថ្ងៃទី25 ខែមករា ឆ្នាំ2019 នេះ។
ប៉ុន្មានម៉ោងមុននេះ លោក ខេមរៈ ភារុណ ដែលត្រូវជាបងប្រុសរបស់ ខេមរៈ ស្រីពៅ កំពុងតែវិលវុលនឹកអាណិតប្អូនស្រីរបស់លោកជាខ្លាំង ដោយលោកបានបន្ដបង្ហោះសារ និងរូបភាពជាច្រើនអំពីប្អូនស្រី។ ជាក់ស្តែងពេលទៅដល់ប្រទេសឥណ្ឌាដើម្បីនាំសពប្អូនស្រីមកប្រទេសកំណើតវិញ លោកបានយកនំ និងទឹកមួយដប ហើយបានបង្ហោះសារដ៏គួរឱ្យសង្វែកចិត្តថា«អូនផឹកទឹកអោយច្រើនចាំបងនាំអូនទៅផ្ទះយើងទៅជួបបងប្អូនយើងវិញ»។
សូមជម្រាបដែរថា សពរបស់តារាចម្រៀង ខេមរៈ ស្រីពៅ នឹងត្រូវដឹកតាមយន្តហោះ ចេញពីប្រទេសឥណ្ឌានៅម៉ោង12រំលងអាធ្រាត្រ ថ្ងៃទី26 ទី 27 (យប់នេះ) ខែមករានេះ ដោយត្រូវប្រើរយៈពេលហោះហើរ រហូតដល់ទៅ 10ម៉ោង ទើបមកដល់ប្រទេសកម្ពុជា នៅថ្ងៃស្អែកដើម្បីរៀបចំធ្វើបុណ្យតាមប្រពៃណី។ ដោយយកមកធ្វើបុណ្យនៅឯគេហដ្ឋាន នៅមុខសួនសុបិន្តចំការព្រីង ខណ្ឌសែនសុខ រាជធានីភ្នំពេញ៕

January 26, 2019
កក្រើកកម្ពុជាម្ដងទៀត !! ត្រៀមជួបជាមួយកំពូលតារាកំប្លែងថៃលោក កូទី យប់នេះ
នៅរសៀលថ្ងៃទី26 ខែមករា ឆ្នាំ 2018នេះ កំពូលតារាកំប្លែងលោក កូទី បានមកដល់ប្រទេសកម្ពុជាជាថ្មី ដោយការបង្ហាញខ្លួនលើកនេះ ដែលធ្វើឱ្យអ្នកគាំទ្រជាច្រើននាក់ភ្ញើកផ្អើល មានការចាប់អារម្មណ៍ជាងមុន ដោយសារតែបង្ហាញខ្លួនលើកនេះ ជាការសម្ដែងដ៏អស្ចារ្យ។ ខុសពីគ្រាមុនៗ កំពូលតារាកំប្លែងក្នុងរឿង «ខ្មោចត្រឡោកបែក » រូបនេះ មកកម្ពុជាលើកដើម្បីមកសម្ដែងខនសឺតទ្រង់ទ្រាយធំជាមួយតារាខ្មែរ នៅកោះពេជ្រ ។
លោក កូទី បានបង្ហាញអារម្មណ៍សប្បាយរីករាយយ៉ាងខ្លាំង នៅពេលចុះមកដល់ប្រទេសកម្ពុជា ជាពិសេសក្នុងពេលលោកឃើញវត្តមានអ្នកកាសែត និងអ្នកគាំទ្រខ្មែរ មកស្វាគមន៍ដល់ព្រលាន។ លោកថា នេះជាលើកទី3ហើយ ដែលលោកមកដល់ប្រទេសកម្ពុជា ដោយការបង្ហាញខ្លួនកាលពីពីរលើកមុន លោកមិនបានសម្ដែងខនសឺតដូចដំណើរមកកាន់កម្ពុជាលើកនេះទេ ទើបលោកចាត់ទុកថា ឱកាសសម្ដែងលើកដំបូងនៅក្នុងប្រទេសកម្ពុជាលើកនេះ នឹងធ្វើឱ្យលោកទទួលបាននូវបទពិសោធន៍ខ្ពស់ពីសិល្បៈកម្ពុជា។ លោកថា ខ្លួននឹងមានការសម្ដែងពិសេសលើឆាកដំបូងនៅកោះពេជ្រនៅប្រទេសកម្ពុជា ខណៈដែលការសម្ដែងនៅយប់ថ្ងៃទី26 ខែមករា នេះ នឹងទទួលជោគជ័យ ជាពិសេសក្នុងពេលលោកយល់ថា វត្តមានសម្ដែងកំប្លែងរបស់លោកនៅក្នុងភាពយន្តកន្លង ក៏មានអ្នកគាំទ្រខ្មែរស្គាល់លោកភាគច្រើន។ លោកថា ខ្លួននឹងមានគម្រោងទទួលសម្ដែងនៅក្នុងប្រទេសកម្ពុជាជាលើកទី2 ប្រសិនការសម្ដែងលើកដំបូងរបស់លោកនាយប់នេះ នៅកោះពេជ្រទទួលបានការគាំទ្រខ្លាំងក្លា។
លោកកូទី បានបញ្ជាក់ផងដែរថា លោកបានត្រៀមបទចម្រៀងពិរោះៗជាច្រើនបទសម្រាប់កម្សាន្ដអារម្មណ៍អ្នកគាំទ្រនារាត្រីនេះ ព្រមទាំងមានការកំប្លែងលេងជាមួយអ្នកគាំទ្រទៀតផង។ លោក កូទី គឺជាកំពូលតារាកំប្លែងល្បីល្បាញប្រចាំប្រទេសថៃ ដោយវត្តមានចេញសម្ដែងក្រៅប្រទេសរបស់លោកមិនមែនជាលើកទី1នោះទេ ខណៈដែលការសម្ដែងរបស់លោកនៅក្នុងស្រុក និងក្រៅប្រទេសកន្លងមានការគាំទ្រយ៉ាងភ្លូកទឹកភ្លូកដី។ លោកក៏ជាតំណាងផលិតផលភេសជ្ជៈប្រទាលកន្ទុយក្រពើដ៍ល្បីល្បាញមួយប្រចាំប្រទេសថៃ ដែលផលិតផលនេះ ក៏បាននាំមកកាន់ទីផ្សារកម្ពុជាផងដែរ៕

January 26, 2019
សូមចូលរួមរំលែកទុក្ខ កញ្ញាខេមរៈ ស្រីពៅ ប្អូនស្រីលោកខេមរៈ សេរីមន្ត ទទួលមរណភាពនៅថ្ងៃនេះ
មានការភ្ញាក់ផ្អើលយ៉ាងខ្លាំង ក្នុងពេលដែលស្ងាត់ដំណឹងពីបញ្ហាមានជំងឺរបស់ ខេមរៈ ស្រីពៅ ស្រាប់តែមានការទទួលស្គាល់ថា នាងបានស្លាប់ហើត។ លោកខេមរៈ ភារុណ ដែលជាបងប្រុសបង្កើតរបស់កំពូលតារាចម្រៀងលោក ខេមរៈ សេរីមន្ត និងកញ្ញា ខេមរៈ ស្រីពៅ បានបញ្ជាក់នៅលើគណនីហ្វេសប៊ុកផ្ទាល់ខ្លួនរបស់លោកនៅម៉ោងជាង1រសៀលថ្ងៃ25ខែមករា ឆ្នាំ2019 នេះ កញ្ញា ខេមរៈ ស្រីពៅ ដែលជាប្អូនស្រីពៅរបស់លោកបានទទួលមរណភាពហើយ។
លោកខេមរៈ ភារុណ បានសរសេរដោយភ្ជាប់ជាមួយរូបថតរបស់ កញ្ញា ខេមរៈ ស្រីពៅ ដោយសរសេរខ្លីយ៉ាងដូច្នេះថា «ប្អូនពៅបងលាយើងទាំងអស់គ្នាហើយ» ហើយលោកបានរៀបរាប់ដោយក្តុកក្តួលថា «ស្រណោះប្អូនពៅបងសែនល្អណាស់ក្នុងលោកនេះ»។
តាមការបញ្ជាក់ពីប្រភពអ្នកសិល្បៈបានឱ្យដឹងថា សពរបស់តារាចម្រៀងស្រីរូបនេះនិងតម្កល់នៅផ្ទះជិតវត្តសំរោងអណ្ដែត។ ខេមរៈ ស្រីពៅ បានមរណភាពនៅប្រទេស ឥណ្ឌា ។ គួររំឭកផងដែរថា កាលពីអំឡុងខែ កញ្ញា ឆ្នាំ 2018 នេះ លោក ខេមរៈ សិរីមន្ដ បានបង្ហោះសារយ៉ាងក្ដុកក្ដួលចិត្តថា ៖ «ជាច្រើនឆ្នាំមកនេះប្អូនស្រីដ៏កម្សត់ម្នាក់នេះ មិនដែលចង់ឃើញ Fan ដែលគាំទ្រគាត់ពិបាកចិត្ត ព្រោះតែស្ថានភាពជំងឺរបស់គាត់ឡើយ គាត់ចង់ឃើញFan គាត់រីករាយគ្រប់ពេលវេលា តែក្នុងនាមខ្ញុំជាបងប្រុសរបស់គាត់ ចង់ប្រាប់បងប្អូនទាំងអស់គ្នាថានៅពេលខាងមុខនេះគាត់ត្រូវឆ្លងកាត់ការវះកាត់ដ៏គ្រោះថ្នាក់មួយ ខ្ញុំជាបងប្រុសជូនពរប្អូនឲ្យ ឆ្លងផុតពេលវេលាដ៏លំបាកនេះ បើបងប្អូនស្រលាញ់ និងគាំទ្រគាត់សូមជូនពរគាត់ឲ្យឆ្លងផុតគ្រោះនេះផង ដើម្បីគាត់មានសុខភាពល្អមកបំពេញការងារសិល្បៈវិញណា»។
ជាអកុសល ប្អូនស្រីលោកបានមរណភាពហើយ ដែលការស្លាប់របស់ ខេមរៈ ស្រីពៅ បានធ្វើឲ្យមហាជនទាំងក្នុង និងក្រៅសិល្បៈមានការសោកស្ដាយយ៉ាងខ្លាំងពិសេសក្រុមគ្រួសារនាងតែម្ដង។ ទាក់ទងនឹងការស្លាប់នេះដែរប្រពន្ធ ខេមរៈ ភារុណ សូមមិនប្រាប់អំពីមូលហេតុនៃជំងឺឡើយ គ្រាន់តែគេដឹងថា បានធ្លាក់ខ្លួនឈឺរយៈពេល 4ឆ្នាំមកហើយ ។ សូមគោរពវិញ្ញាណក្ខន្ធ ខេមរៈ ស្រីពៅ អញ្ជើញទៅសុគតិភព៕

January 25, 2019
នៅពេលខ្ញុំតាំងគភ៌ ចូលដល់ខែទី9
នៅក្នុងខែនេះ អាចហៅបានថាជាខែចុងក្រោយនៃការតាំងគភ៌ហើយ វិវឌ្ឍនាការផ្សេងៗរបស់ទារកក្នុងផ្ទៃមានដូចជា ប្រវែងខ្លួននឹងមានប្រមាណជា 20អីុញ ទម្ងន់ខ្លួនប្រមាណជា3,000 – 3,400ក្រាម អវយវៈគ្រប់ផ្នែក រួមទាំងសួតផងមានភាពពេញលេញល្អត្រៀមជាស្រេចក្នុងការប្រសូតហើយ។ ផ្នែកនាំមុខ ឬក្បាលនឹងរំកិលចុះមករកម្ដុំឆ្អឹងត្រគាក ហើយទារកក្នុងផ្ទៃមានការកម្រើកតិចជាងមុន។
ក្នុងខែទី 9 នៃការតាំងគភ៌នេះនឹងមានការប្រែប្រួលផ្សេងៗ ដែលស្រ្តីមានផ្ទៃពោះអាចមានអារម្មណ៍ដឹងដូចតទៅ ៖
– ទារកលែងសូវរើ។
– ធ្លាក់សច្រើនឡើង និងរអិលខាប់។ ពេលខ្លះមានឈាមស្លេកៗហូរចេញមកក្រោយការពិនិត្យគភ៌ ឬក្រោយពេលមានភេទសម្ព័ន្ធរួច។
– ឈឺផ្សាក្នុងក្រពះ អាហារមិនរំលាយ ឆ្អល់ពោះ។
– ឈឺក្បាលម្ដងម្កាល ស្រវាំងភ្នែក និងកើតខ្យល់ញឹកញាប់។
– តឹងច្រមុះ អាចមានឈាមហូរចេញមកតាមច្រមុះ និងហ៊ឹងត្រចៀកខ្លះៗ។
– មានឈាមចេញតាមជើងធ្មេញពេលដុសសម្អាតធ្មេញ។
– កើតប្រគ្រីវកាច់នៅលើជើង។
– ហើម-កជើង និងខ្មងជើង និងអាចមានហើមលើមុខ និងដៃផងដែរ។
– រមាស់នៅលើស្បែកក្បាលពោះ។
– កាន់តែឈឺខ្នងឡើង និងឈឺខ្លាំងឡើងៗ។
– កើតសភាវសរសៃឈាមត្បៀតនៅលើជើង។
– កើតឫសដូងបាត។
– ដកដង្ហើមរាងញាប់ឡើង។
– គេងមិនលក់ ឬលក់មិនបានយូរ។
– មានអារម្មណ៍ថា ស្បូនបង្រួញខ្លួនញាប់ឡើង ខ្លាំងឡើង ជួនកាលមានអាការឈឺចាប់ទៀតផង។
– អ៊ីកអ៊ាក ពិបាកកម្រើកខ្លួន និងប្រថុយប្រថាននឹងការរអិលដួល។
– មានទឹកដោះពណ៌លឿងស្លេកៗហូរចេញមកពីក្បាលដោះច្រើនឡើង។
– ឆាប់ហត់ ឬមានអារម្មណ៍ថាមានកម្លាំងថាមពលខ្លាំងឡើង ឬមានទាំង2យ៉ាងឆ្លាស់គ្នា។
– ឆាប់ឃ្លាន ឬឃ្លានញឹកញាប់ ញ៉ាំច្រើន ឬធុញទ្រាន់ចំណីអាហារ ញ៉ាំបានតិចៗ (មិនទៀង)។
– មានអារម្មណ៍ញាប់ញ័រ វិតក្កកង្វល់ ឬភ័យខ្លាចខ្លាំងឡើង។
– មានអារម្មណ៍ធូរស្រាលខ្លាំងឡើង ព្រោះជិតដល់ពេលប្រសូតហើយ។
– ឆាប់មួម៉ៅ ឆាប់ទន់ជ្រាយនឹងពាក្យសម្តីរបស់អ្នកនៅជិតៗខ្លួន ជាពិសេសរឿងពាក់ព័ន្ធនឹងការប្រសូត។
– ឆាប់ខឹង និងមានអារម្មណ៍វិលវល់។
រឿងដែលពេទ្យពិនិត្យតាមដានគភ៌របស់អ្នកចង់ឱ្យអ្នកធ្វើក្នុងអំឡុងខែនេះ មានដូចជា ៖
1. ថ្លឹងទម្ងន់ខ្លួន និងវាស់សម្ពាធឈាម។
2. ពិនិត្យជាតិស្ករ និងសារធាតុស៊ុតសនៅក្នុងទឹកមូត្រ។
3. ស្ដាប់ចង្វាក់បេះដូងរបស់ទារកក្នុងគភ៌។
4. ពិនត្យមើលទំហំ និងរូបរាងរបស់ស្បូន និងឥរិយាបថរបស់ទារកក្នុងគភ៌។
5. កម្ពស់របស់ស្បូន។
6. អាការហើមនៅលើដៃ និងជើង និងសរសៃឈាមនៅលើជើង។
7. វាយតម្លៃសភាពស្បូនដោយការពិនិត្យផ្ទៃក្នុង។
8. ភាពញឹកញាប់ឆ្ងាយពីគ្នា និងភាពខ្លាំងខ្សោយនៃការបង្រួញខ្លួនរបស់ស្បូន។
9. អាការខុសប្រក្រតីផ្សេងៗដែលអាចកើតឡើង។
រឿងដែលត្រូវមើលថែទាំជាពិសេសនៅក្នុងខែនេះ ៖
– ការជ្រើសរើសវិធីប្រសូតបុត្រថា តើត្រូវការប្រសូតតាមបែបធម្មជាតិ ឬការវះកាត់ប្រសូត។
– សាងទម្លាប់ជាមួយមន្ទីរពេទ្យ និងបន្ទប់ប្រសូត ដូចជា អាចនឹងដើរទៅមើលទារកទើបនឹងកើត បន្ទប់សម្រាកក្រោយប្រសូត ឬសុំពេទ្យមើលពីខ្សែវីដេអូពាក់ព័ន្ធនឹងបន្ទប់ប្រសូត ដើម្បីឱ្យមានភាពស៊ាំធ្លាប់ជាមួយវាខ្លាំងឡើង។
– ទារកហួសកំណត់ប្រសូត គឺតាំងគភ៌យូរលើស42សប្ដាហ៍។ ការតាំងគភ៌ដែលយូរជាងប្រក្រតី គឺយូរលើស39សប្ដាហ៍ឡើង គ្រូពេទ្យដែលពិនិត្យតាមដានគភ៌នឹងពិចារណាជាពិសេសថា នឹងត្រូវធ្វើយ៉ាងណាបន្តទៀត។ បើសិនជាគ្រប់42សប្ដាហ៍ គ្រូពេទ្យនឹងជំរុញឱ្យកើតការប្រសូតតាមធម្មជាតិ ឬអាចនឹងត្រូវវះកាត់តាមតែករណីនីមួយៗ។
– ការបែកទឹកភ្លោះ ជាទូទៅច្រើនតែមានការបែកមុនមួយខែ គឺនឹងមានការជ្រាបចេញមកបន្តិចបន្តួច ជាពិសេសពេលក្រោកពីអង្គុយ ឬខណៈពេលធ្វើចលនា ដូច្នេះទើបមិនចាំបាច់ភ័យព្រួយទេ ព្រោះមានតិចតួចណាស់ដែលបែកចេញមកច្រើន។
ពេលវេលាស័ក្តិសមដែលគួរទៅមន្ទីរពេទ្យដើម្បីប្រសូត អាចពិចារណាបានដូចខាងក្រោម ៖
1. នៅពេលចាប់ផ្ដើមមានការឈឺពោះឆ្លងទន្លេមែនទែន ដោយការឈឺនោះនឹងឈឺជាប់រហូត និងឈឺខ្លាំងឡើងៗជារឿយៗ។
2. ការឈឺពោះប្រសូតមិនអាចជ្រើសពេលវេលា ឬដឹងមុនបានឡើយ ដូច្នេះ មិនថានៅទីណា ឬកំពុងធ្វើអ្វីនោះឡើយ គួរប្រញាប់ទៅមន្ទីរពេទ្យ មិនចាំបាច់រង់ចាំឱ្យដល់ពេលម៉ោងពេទ្យធ្វើការនោះទេ។
3. បើមានឈឺពោះតិចៗ គួរសម្រាកនៅផ្ទះ 4 – 8ម៉ោង ដើម្បីឱ្យប្រាកដក្នុងចិត្តថា ពិតជាឈឺពោះឆ្លងទន្លេមែនហើយ ឬអាចនឹងទូរស័ព្ទសុំការណែនាំពីគ្រូពេទ្យ ឬឆ្មបបាន៕
January 25, 2019
កត្តាអ្វីខ្លះដែលជួយឱ្យអ្នកមានកូនភ្លោះបានដូចបំណង?
គូស្វាមីភរិយាខ្លះ នៅពេលរៀបការគ្នារួចរាល់ហើយក៏ធ្វើដំណើរមកដល់ដំណាក់កាលរៀបផែនការដើម្បីមានបុត្រជាមួយគ្នា តែប្រាកដណាស់ថា គ្រួសារខ្លះក៏ចង់មានកូនត្រឹមតែ1នាក់ តែគ្រួសារខ្លះក៏រៀបផែនការចង់បានកូនច្រើនជាងហ្នឹង ដែលក្នុងនោះកូនភ្លោះអាចជាគោលដៅមួយដែលគូស្វាមីភរិយាជាច្រើនគូចង់បាន តែ… តើនឹងធ្វើយ៉ាងណាដើម្បីឱ្យសមបំណងក្នុងការមានកូនភ្លោះដើម្បីឱ្យពួកគេធំឡើងក្លាយជាមិត្តភក្តិផង ជាបងប្អូនផងក្នុងពេលតែមួយ? ថ្ងៃនេះ ឡារ៉ែន បានរួបរួមបច្ច័យជាច្រើនដែលនឹងជួយឱ្យគូស្វាមីភរិយារបស់អ្នកមានកូនភ្លោះបានកាន់តែងាយឡើងមកជម្រាបជូនដូចខាងក្រោម…។
អ្វីខ្លះដែលបើសិនធ្វើទៅហើយ មានឱកាសបានកូនភ្លោះកាន់តែខ្លាំងឡើង?
មើលទៅលើពូជអំបូរ
នេះគឺជាចំណុចសំខាន់ដំបូងគេរបស់ការមានកូនភ្លោះក៏អាចថាបានដែរ ទោះវាជាមិនមែនជាបច្ច័យទាំងអស់ក្ដី តែក៏វាមានចំណែកច្រើនគួរសមដែរ។ បើនៅក្នុងក្រុមគ្រួសាររបស់ទាំងពីរនាក់(ទាំងប្ដី និងប្រពន្ធ)មានប្រវត្តិមានបងប្អូនភ្លោះ នោះឱកាសដែលគូស្វាមីភរិយារបស់អ្នកនឹងបានកូនភ្លោះក៏មានច្រើនទៅតាមនោះដែរយ៉ាងពិតប្រាកដ។
ពូជសាសន៍ក៏សំខាន់
ជាមធ្យម មនុស្សនៅក្នុងពូជសាសន៍អាហ្វ្រិកនឹងមានឱកាសមានកូនភ្លោះខ្លាំងជាងជនជាតិស្បែកស ឬជនជាតិស្បែកលឿង ដោយអត្រាការកើតបានកូនភ្លោះជាមធ្យមនៅលើមនុស្សស្បែកខ្មៅនឹងជួបប្រទះប្រមាណជា 1% – 4% មនុស្សស្បែកសប្រមាណ 0.7% – 1% និងនៅលើមនុស្សស្បែកលឿងប្រមាណជា 0.3%ប៉ុណ្ណោះឯង។
បើជាការពពោះលើកទី2 ឡើងទៅ ឱកាសក៏នឹងមានច្រើនតាមនោះដែរ
ការមានកូនពីមុនមកហើយនឹងអាចជួយបង្កើនឱកាសក្នុងការមានកូនភ្លោះដល់អ្នកបានច្រើនណាស់ ព្រោះថា ស្ត្រីជាម្ដាយនឹងមានការទម្លាក់ស៊ុតកើនឡើងច្រើនហ្នឹងឯង។
អាយុ
ដែលធ្លាប់បានឮមកទាំងអស់គ្នាថា រឹតតែស្ត្រីជាម្ដាយមានអាយុច្រើនឡើង ក៏នឹងរឹតតែប្រថុយប្រថាននឹងការមានកូនហើយជួបនឹងសភាវផ្សេងៗច្រើនឡើងតាមហ្នឹងដែរ តែវាផ្ទុយគ្នានឹងការមានកូនភ្លោះ ព្រោះរឹតតែអ្នកមានអាយុក្នុងអំឡុង 35 – 39ឆ្នាំ រឹតតែមានឱកាសដែលអ្នកនឹងមានកូនភ្លោះច្រើនឡើង។ មូលហេតុ ក៏ព្រោះតែរាងកាយមានស៊ុតនៅសល់ច្រើន ទើបត្រូវបានជំរុញច្រើនឡើងដែរ ធ្វើឱ្យរាងកាយរបស់ស្ត្រីបញ្ចេញអ័រម៉ូន FSH ចេញមកច្រើន ធ្វើឱ្យស៊ុតមានឱកាសធ្លាក់ម្ដងៗច្រើនជាង 1 ហ្នឹងឯង។
ទម្ងន់ខ្លួន និងកម្ពស់
ស្ត្រីដែលកើតរោគធាត់ ឬមានទម្ងន់ខ្លួនច្រើនជាងប្រក្រតីបន្តិច រួមទាំងមានកម្ពស់ដែលខ្ពស់ល្មមសមរម្យនោះ មានឱកាសក្នុងការតាំងគភ៌កូនភ្លោះបានច្រើនតាមនោះដែរ។
ការទទួលទានកាល់ស្យូមអាចជួយអ្នកបាន
ស្ត្រីដែលញ៉ាំទឹកដោះគោជាប់ជាប្រចាំមានចំណែកធ្វើឱ្យតាំងគភ៌បានកូនភ្លោះច្រើនជាងដល់ទៅ5ដង បើប្រៀបធៀបជាមួយអ្នកដែលមិនបរិភោគអាហារប្រភេទសាច់សត្វសោះ នេះគឺដោយសារតែប្រូតេអុីនដែលហៅថា IGF ដែលមាននៅក្នុងទឹកដោះគោ និងផលិតផលពីសត្វផ្សេងៗនោះគឺជាប្រូតេអុីនដែលនឹងជួយឱ្យសំបុកស៊ុតមានប្រតិកម្មរហ័សឡើង និងជួយបង្កើនចំនួនស៊ុតឱ្យច្រើនឡើងហ្នឹងឯង។
ការបំបៅដោះកូន
នៅពេលស្ត្រីមានកូនដំបូងរួចហើយ ការបំបៅដោះកូនយ៉ាងទៀងទាត់រហូតដល់កំណត់ពេលដែលស័ក្តិសម គឺប្រមាណជា12ខែនោះមានចំណែកជួយឱ្យស្ត្រីនោះមានឱកាសតាំងគភ៌បន្ទាប់ទៅទៀតជាកូនភ្លោះបានកាន់ច្រើនឡើងទៀតផង។
ធ្លាប់ញ៉ាំថ្នាំពន្យារកំណើតលើស 3ឆ្នាំ
ហេតុផលស្រដៀងៗនឹងការតាំងគភ៌នៅពេលអាយុ35ឆ្នាំឡើងទៅដែរ ព្រោះស៊ុតនឹងបង្ខំទម្លាក់មកច្រើន ធ្វើឱ្យមានឱកាសដែលអាចធ្វើឱ្យស៊ុតនឹងធ្លាក់មកច្រើនជាង 1ហ្នឹងឯង។
ចង់បានកូនភ្លោះ ត្រូវញ៉ាំឱ្យច្រើន
ការទទួលទានអាហារឱ្យច្រើនៗអាចនឹងធ្វើឱ្យទម្ងន់ខ្លួនរបស់ស្ត្រីកើនឡើងពីប្រក្រតីខ្លះតែនឹងធ្វើឱ្យរាងកាយរបស់ស្ត្រីមាំមួនឥតខ្ចោះ និងធ្វើឱ្យមានឱកាសក្នុងការតាំងគភ៌កូនភ្លោះបានកាន់តែងាយឡើងទៅតាមនោះដែរ តែយ៉ាងណាក៏ដោយ គួរសង្កត់ធ្ងន់លើអាហារដែលមានប្រយោជន៍ មិនមែនចេះតែញ៉ាំអ្វីក៏បាននោះទេ ព្រោះអាចនឹងមានផលអវិជ្ជមានបាន។
នេះគ្រាន់តែជាបច្ច័យដែលអាចនឹងជួយហុចផលឱ្យអ្នកមានកូនភ្លោះបានច្រើនឡើងប៉ុណ្ណោះ តែយ៉ាងណាក៏ដោយ បើចង់បង្កើនឱកាសក្នុងការមានកូនភ្លោះនោះ គួរតែទៅប្រឹក្សាជាមួយគ្រូពេទ្យ ដើម្បីស្វែងរកវិធីដែលពិតប្រាកដច្បាស់លាស់ និងស័ក្តិសមជាមួយសុខភាពរបស់ទាំងស្វាមី និងភរិយា ទើបជាការប្រសើរបំផុត៕
January 25, 2019
លោក Queiroz ព្រួយបារម្ភ ទោះបីអ៊ីរ៉ង់ ទៅជួប ជប៉ុន ក្នុងវគ្គ1/2នៃ Asian Cup
លោក Carlos Queiroz គ្រូបង្វឹកនៃក្រុមបាល់ទាត់ជម្រើសជាតិអ៊ីរ៉ង់បានធ្វើការព្រមានពីការភ្លាត់ស្នៀតក្នុងយុទ្ធនាការ Asian Cup កាលពីថ្ងៃព្រហស្បតិ៍ក្រោយពីក្រុមប្រជែងពានរបស់លោកបានផ្តួលក្រុមជម្រើសជាតិចិន ក្នុងលទ្ធផល 3-០ដើម្បីឈានទៅជួបក្រុមជម្រើសជាតិជប៉ុន ក្នុងវគ្គពាក់កណ្តាលផ្តាច់ព្រ័ត្រ។
ខ្សែបម្រើ Ritsu Doan បានស៊ុតបាល់ពីចំណុច 11ម៉ែត្រ ដើម្បីជួយឱ្យក្រុមជម្រើសជាតិជប៉ុនដណ្តើមបានជ័យជម្នះក្នុងលទ្ធផល 1-០ លើក្រុមជម្រើសជាតិវៀតណាម នៅថ្ងៃដដែលនោះខណៈដែលប្រព័ន្ធវីដេអូជំនួយការអាជ្ញាកណ្តាល បានបង្ហាញខ្លួនជាលើកទី1ក្នុងយុទ្ធនាការនេះ។
ក្រុមជម្រើសជាតិអ៊ីរ៉ង់ បានបន្តដំណើរនៃការស្វែងរករបស់ខ្លួនក្នុងការបញ្ចប់ការមិនស្គាល់ការឈ្នះពានសោះក្នុង Asian Cup ក្នុងរយៈពេល 43ឆ្នាំ ខណៈដែលកីឡាករ Mehdi Taremi, Sardar Azmoun និង Karim Ansarifard សុទ្ធសឹងបានរកគ្រាប់បាល់បញ្ចូលទីក្នុងទីក្រុង Abu Dhabi។
ប៉ុន្តែ លោក Queiroz បានបញ្ជាក់ថា ក្រុមរបស់លោកមិនគួរត្រូវបានចាត់ទុកថាជាក្រុមមានក្តីសង្ឃឹមខ្ពស់ក្នុងការឈ្នះពានឡើយ បើទោះបីបានបញ្ចប់រជ្ជកាលរបស់លោក Marcello Lippi ក្នុងនាមជាគ្រូបង្វឹករបស់ចិន តាមរយៈការយកឈ្នះយ៉ាងកក់ក្តៅក៏ដោយ។
អតីតគ្រូបង្វឹករបស់ក្លិប Real Madrid រូបនេះបានឱ្យដឹងថា៖ «ពេលនេះយើងដឹងថាត្រូវឆ្លាមធំៗហែលសំដៅមកកាន់យើងហើយ។ ការមានឈ្មោះជាក្រុមមានក្តីសង្ឃឹមខ្ពស់ក្នុងការឈ្នះពានមិនស័ក្តិសមជាមួយនឹងយើងឡើយ។ ជប៉ុន កូរ៉េនឹងប្រជែងជាមួយយើង ហេតុនេះយើងត្រូវតែមានការប្រុងប្រយ័ត្នបន្តិចហើយអ្វីដែលយើងបានធ្វើពេលប្រកួតជាមួយនឹងចិន មិនទាន់គ្រប់គ្រាន់នៅឡើយទេ»។
ស្របពេលជាមួយនេះ លោក Hajime Moriyasu គ្រូបង្វឹកនៃក្រុមបាល់ទាត់ជម្រើសជាតិជប៉ុន បានឱ្យដឹងថា៖«វាមិនមានបញ្ហាអ្វីឡើយដែលថា អ្នកនឹងឈ្នះបែបណានោះ ប៉ុន្តែរឿងដ៏សំខាន់បំផុតនោះគឺថាការឈានទៅវគ្គបន្ត។ យើងបានដឹងថា វៀតណាមនឹងក្លាយជាគូប្រជែងដ៏ខ្លាំងប៉ុន្តែកីឡាករទាំងអស់បានរក្សាការផ្តោតអារម្មណ៍ ហើយយើងធ្វើដំណើរទៅមុខទៀត»៕
January 25, 2019
Osaka ទម្លាក់ជើងខ្លាំង Pliskova ដើម្បីទៅជួប Kvitova ក្នុងវគ្គផ្តាច់ព្រ័ត្រ
កីឡាការិនី Naomi Osaka ដែលជាម្ចាស់ជើងឯក US Open បានរារាំងការវាយបកពីសំណាក់កីឡាការិនី Karolina Pliskova ដើម្បីឈានទៅប្រកួតក្នុងព្រឹត្តិការណ៍ Australian Open វគ្គផ្តាច់ព្រ័ត្រ ជាលើកទី1ជាមួយនឹងជ័យជម្នះក្នុងលទ្ធផល 6-4 4-6 និង6-4 កាលពីថ្ងៃព្រហស្បតិ៍ ដើម្បីឈានទៅជួបម្ចាស់ជើងឯកWimbledon 2សម័យកាលគឺ Petra Kvitova។
Osaka បានពង្រឹងកេរិ៍្តឈ្មោះរបស់ខ្លួនក្នុងនាមជាអ្នកវាយកូនបាល់បានយ៉ាងល្អបំផុតក្នុងកីឡាវាយកូនបាល់ផ្នែកនារីតាមរយៈការដណ្តើមបានជ័យជម្នះក្រោមការប្រើប្រាស់ស្នៀតវាយទាំងខ្នង និងបាតដៃរបស់នាងក្រោមដំបូលនៃទីលាន Rod Laver Arena ដែលត្រូវបានបិទ ដោយសារតែកម្តៅថ្ងៃដ៏ក្តៅ។
Osaka បានឱ្យដឹងថា៖ «ខ្ញុំចូលចិត្តកម្តៅហេតុនេះ ខ្ញុំមានការខកចិត្តបន្តិចក្នុងពេលបិទដំបូល។ នៅពេលដែលពួកគេបើកដំបូល ខ្ញុំចូលចិត្ត និងគិតថា វាដល់ពេលរបស់ខ្ញុំហើយក្នុងការបង្ហាញសមត្ថភាព»។ កីឡាការិនីជប៉ុនរូបនេះ ដែលបានឈ្នះតែ 1លើកក្នុងចំណោមការជួបគ្នាទាំង3 លើករវាងកីឡាការិនីទាំង2នៅមុនពេលការប្រកួតកាលពីថ្ងៃព្រហស្បតិ៍នោះ បានបន្ថែមទៀតថា៖ «ខ្ញុំមានន័យថា ខ្ញុំរំពឹងទុកថានឹងមានការវាយបកវិញ»។
ខ្ញុំរំពឹងទុកពីការប្រកួតដ៏ស្វិតស្វាញមួយ។ Osaka នឹងត្រូវប៉ះជាមួយនឹងកីឡាការិនីឆែកមួយរូបផ្សេងទៀតគឺ Kvitova ដែលនឹងប្រកួតក្នុងកម្មវិធី Grand Slam វគ្គផ្តាច់ព្រ័ត្រជាលើកទី1 របស់នាង ក្នុងរយៈពេល 5ឆ្នាំក្រោយពីបានផ្តួលកីឡាការិនីអាមេរិក Danielle Collins ក្នុងលទ្ធផល 7-6 (2) និង6-០ ក្នុងវគ្គពាក់កណ្តាលផ្តាច់ព្រ័ត្រ៕
January 25, 2019
រុន ណាកូ បែកស្នេហ៍ចាស់ មកបណ្ដើរស្នេហ៍ថ្មីកញ្ញា ទេព មុន្នីរក្សា
ខុសពីមួយរយៈមុនដែលតារាសម្ដែងវ័យក្មេង លោករុន ណាកូ រមែងសរសើរពីទឹកចិត្តគូដណ្ដឹងថាបើកទូលាយចំពោះរបស់ខ្លួនក្នុងការងារសិល្បៈ ស្រាប់តែមួយរយៈចុងក្រោយគេកត់សម្គាល់ថាលោកបែរជាប្ដូរជំហរមិនលើកឡើងពីគូដណ្ដឹងដូចមុន។ អ្វីដែលគេកត់សម្គាល់គឺលោកស្រាប់តែឧស្សាហ៍ផុសៗអត្ថន័យបែកបាក់ ខណៈដែលលោកកាន់តែហ៊ានស្និទ្ធិស្នាលជាមួយតារាសម្ដែងកញ្ញា ទេព មុន្នីរក្សា ដូចលែងមានសម្ពាធលែងខ្វល់ពីក្រសែភ្នែកមហាជន។
នៅក្នុងពិធីសម្ពោធរឿង«អន្ទងវិញ្ញាណ»របស់ផលិតកម្ម Wonderfilm Cambodia កាលពីថ្ងៃទី22 ខែមករា គ្មានអ្នកណាមិនកត់សម្គាល់ថានោះទេ ថាតារាសម្ដែងលោក រុន ណាកូ ច្រាសច្រាលរង់វាំស្រីស្អាតតូចច្រលឹងកញ្ញា ទេព មុន្នីរក្សា មិនខុសពីមាន់រកពង ក្នុងពេលដែលនាងស្ទះផ្លូវហើយមកមិនទាន់។ គ្រាន់តែនាងបង្ហាញខ្លួននៅក្នុងពិធីសឹងតែឡើងមិនដល់វេទិកាប្រារព្ធកម្មវិធីផង គេឃើញតារាទាំងពីររត់រកគ្នាដូចចាក់មិនលិច ខណៈដែលអ្នកទាំងពីរក៏មិនខ្លាចពីការប្រមាញ់របស់អ្នកកាសែតជុំវិញទំនាក់ទំនងស្និទ្ធស្នាលនៅក្នុងថ្ងៃនោះ។
ជាមួយនឹងសំណួរចាក់ដោតថាបើលោកស្និទ្ធស្នាលជាមួយកញ្ញា ទេព មុន្នីរក្សា យ៉ាងតិច មិនខ្លាចគូដណ្ដឹងឆេះដុំទេឬ? តារាសម្ដែងលោក រុន ណាកូ បានសារភាពថារវាងលោកនឹង គូដណ្ដឹងសម្រេចចិត្តដើរផ្លូវរាងខ្លួនប្រមាណជិតមួយខែមកហើយ ទើបលោកយល់ថាខ្លួនមានសេរីភាពសម្រាប់ការងារសិល្បៈ ដោយចង់សំដៅថាមិនខ្លាចនឹងបណ្ដើរ ឬកៀកកើយជាមួយតារាស្រីណាមួយនៅក្នុងការងារសិល្បៈ។ យ៉ាងណាមិញ លោកថារវាងខ្លួន និងកញ្ញា ទេព មុន្នីរក្សា នៅមិនទាន់មានអារម្មណ៍ស្រឡាញ់គ្នានទេ ដោយគ្រាន់តែមានអារម្មណ៍ចូលចិត្តគ្នាខ្លាំង ហើយបើបានបណ្ដើរគ្នាទៅណាមកណា គឺហាក់មានភាពកក់ក្ដៅប៉ុណ្ណោះ៕

January 24, 2019
ត្រេកអរផង!! មង្គលការអ្នកវិភាគស្នេហា ឌីជេ ណាណា មិនប្រើប្រាស់គ្រឿងស្រវឹង
ប្រិយមិត្តជាច្រើនច្បាស់ជាស្គាល់អ្នកវិភាគផ្លូវចិត្ត និងរឿងរ៉ាវស្នេហា នោះគឺ ឌីជេ ណាណា (Dj NaNa) ដែលកន្លងមកធ្លាប់តែទទួលបានការសរសើរមិនដាច់ពីមាត់អំពីផ្តល់នៅចំនេះដឹង ដំណោះបញ្ហានាៗក្នុងជីវិត និងដំណោះស្រាយស្នេហា។
ដោយឡែកនៅក្នុងថ្ងៃនេះផងដែរ ពិតជាដំណឹងដ៏ភ្ញាក់ផ្អើលមួយគឺ ឌីជេ រូបស្រស់សោភាមួយនេះ បានបញ្ចប់ភាពនៅលីវរបស់ខ្លួនហើយ ដោយក្រាបផ្ទឹមរៀបមង្គលការតាមប្រពៃណីជាមួយនិងស្វាមីរបស់ខ្លួន។ អ្វីដែលគួរឱ្យសរសើរទៀតនោះគឺ ហេតុតែជាអ្នកអប់រំ និងជាគំរូរបស់មហាជន ក្នុងពិធីជប់លៀងពេលល្ងាចនៃពិធីមង្គលការរបស់ ឌីជេ ណាណា (Dj NaNa) ដែលធ្វើឡើងនៅ មជ្ឍមណ្ឌលសន្និបាត និងពិព័រណ៍កោះពេជ្រ (អគារ K+L) គឺមិនមានប្រើប្រាស់គ្រឿងស្រវឹងឡើយ ជាហេតុធ្វើឱ្យមហាជនពិតជាពេញចិត្តមែនទែន៕

January 24, 2019