សង្គម និងសេដ្ឋកិច្ច - La Reine Media

ក្រុមបុរាណវិទូបន្តរកឃើញស្លាកស្នាមវប្បធម៌មានអាយុកាលចាស់ជាងគេនៅម្តុំជើងឯក

ក្រុមបុរាណវិទូ នៃក្រសួងវប្បធម៌ និងវិចិត្រសិល្បៈ បានបន្តរកឃើញស្លាកស្នាមវប្បធម៌មានអាយុកាលចាស់ជាងគេបំផុតនៅភូមិមូល ម្តុំជើងឯក ស្ថិតនៅប៉ែកខាងត្បូង នៃរាជធានីភ្នំពេញបច្ចុប្បន្ន ស្ថានីយជើងឯក គឺជាទីប្រជុំជន ឬ ជាទីក្រុងនាសម័យបុរេប្រវត្តិសាស្ត្រ ដែលមានរាងមូល ហើយហ៊ុំព័ទ្ធជុំវិញដោយគូរទឹក។ ស្ថានីយជើងឯកនេះ មានផ្ចិតដល់ 800ម៉ែត្រ ហើយក្នុងបរិវេណមួយដែលមានទំហំប្រមាណជា 50ហិកតា។

លោកជំទាវ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ល្ងាចថ្ងៃទី5 ខែកុម្ភៈ 2019 ក៏បាន ចុះពិនិត្យ សកម្មភាពអ្នកបុរាណវិទូជាតិ និងអន្តរជាតិ សហការគ្នាធ្វើកំណាយនៅស្ថានីយភូមិមូលជើងឯក ស្ថិតក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញនេះដែរ។

លោកជំទាវ រដ្ឋមន្រី្ត បានថ្លែងថា ការធ្វើកំណាយស្រាវជ្រាវប្រវត្តិសាស្ត្រ រយៈពេលជាង01ខែនេះ ក្នុងគោលបំណង ដើម្បីប្រមែប្រមូលវត្ថុសិល្បៈទាំងអស់នោះ យកមកថែរក្សាទុកជាទ្រព្យសម្បតិ្តជាតិ ដាក់តាំងក្នុងសារមន្ទីរជាតិកម្ពុជា សម្រាប់ទុកបង្ហាញកូនចៅជំនាន់ក្រោយ ឱ្យបានយល់ដឹង និងបានស្គាល់ ព្រោះសម្ភារទាំងអស់នោះ គឺសម្គាល់នូវដួង ព្រលឹង អត្តសញ្ញាណរបស់ជាតិខ្មែរ ដែលកូនខ្មែរគ្រប់រូប គ្រប់ជំនាន់ត្រូវស្គាល់ និងចូលរួមថែការពារឱ្យបានគត់មុត។ ភូមិមូលជើងឯកនេះ មានតែមួយគត់ នៅលើទីតាំងនេះ។ ហើយការធ្វើកំណាយនេះ មានប្រើប្រាស់បច្ចេកទេសទំនើប ដោយមានម៉ាសស៊ីនស្គែនរកវត្ថុសិល្បៈ មាននៅក្រោមដី។ ហើយគម្រោងកំណាយស្រាវជ្រាវនៅស្ថានីយភូមិមូលជើងឯកនេះ អនុវត្តគម្រោងដោយក្រសួងវប្បធម៌ និងវិចិត្រសិល្បៈ អគ្គនាយកដ្ឋានបេតិកភណ្ឌ នាយកដ្ឋានបុរាណវិទ្យា និងបុរេប្រវត្តិវិទ្យា រួមសហការជាមួយសាលារាជធានីភ្នំពេញ នគរបាលបេតិកភណ្ឌ និងរាជបណ្ឌិត្យសភាកម្ពុជា៕

February 6, 2019

Sirloin Steak ស្តេកសាច់គោអូស្ត្រាលីដ៏ឆ្ងាញ់ពិសា

Sirloin Steak ស្តេកសាច់គោអូស្ត្រាលីដ៏មានឱជារសឈ្ងុយឆ្ងាញ់ប្រចាំភោជនីយដ្ឋាន ស្លា (Slla Sky Bar) ដែលស្ថិតនៅជាន់ទី9 នៃសណ្ឋាគារ AQUARIUS Hotel & Urban Resort។ ស្តេកសាច់គោអូស្ត្រាលីនេះគឺជាមុខម្ហូបដ៏ពេញនិយម ជាពិសេសបើបានទទួលទានជាមួយនឹងស្រាក្រហមទៀតនោះគឺកាន់តែត្រូវមាត់តែម្តង។ ដូច្នេះ តោះរៀនចម្អិន ស្តេកសាច់គោអូស្ត្រាលី Sirloin Steak ជាមួយនឹងលោក ចាន់ វ៉ាន់ផល មេចុងភៅប្រចាំភោជនីយដ្ឋាន Slla Sky Bar ដូចខាងក្រោមនេះ។

គ្រឿងផ្សំ
– សាច់គោអូស្ត្រាលី (Sirloin Steak) 200g
– ប្រេងអូលីវ 15 ml
– ប៊័រ (សាប) 30g
– ខ្ទឹមបារាំងពណ៌ស 15g
– មើមការ៉ុត 30g
– សណ្តែកបារាំង 15g
– ននោងបារាំង (Zucchini) 20g
– ផ្កាខាត់ណា ប្រូខូលី 40g
– ផ្កាខាត់ណាពណ៌ស 40g
– ស្រាក្រហមសម្រាប់ចម្អិនអាហារ 20ml
– ខ្ទឹមក្រហម 10g
– ម្រេចខ្ចី 10g
– ម្រេចខ្មៅម៉ដ្ឋ 2ml
– គ្រីមសម្រាប់ចម្អិនអាហារ 10g
– ម្សៅ Demi Glace 10g
– ស្លឹកជីវ៉ាន់ស៊ុយ 2g

វិធីចម្អិន
ដំបូងត្រូវយកសាច់គោអូស្ត្រាលីមួយដុំ ដែលមានទម្ងន់200g មកប្រឡាក់ជាមួយនឹងអំបិល និងម្រេចម៉ដ្ឋ រួចយកទៅប្រឡាក់ជាមួយនឹងប្រេងអូលីវ ហើយយកទៅចៀននៅក្នុងខ្ទះស្ងួត (មិនមានបន្ថែមប្រេង ឬខ្លាញ់ទេ) ដោយបើកភ្លើងឱ្យក្តៅខ្លាំង រួចចៀនឱ្យឆ្អិនតាមកម្រិតដែលអ្នកចូលចិត្ត (ចំពោះកម្រិតឆ្អិន50% ត្រូវចម្អិនរយៈពេល1នាទីក្នុងមួយចំហៀង រួចសឹមប្រែសាច់ទៅម្ខាងទៀត)។ ចំណែកបន្លែវិញ ត្រូវយកបន្លែទាំងអស់ដែលមានដូចជា ផ្កាខាត់ណា ប្រូខូលី ការ៉ុត ខ្ទឹមក្រហម សណ្តែកបារាំងខ្ទឹមបារាំងពណ៌ស និងននោងបារាំង យកទៅស្រុះជាមុនសិន រួចសឹមយកមកចៀនជាមួយប៊័រ ដោយបន្ថែមម្រេចម៉ដ្ឋ និងអំបិលចូលបន្តិច ចៀនឱ្យរាងទន់បន្តិចជាការស្រេច រួចដួសដាក់នៅក្នុងចានជាមួយនឹងសាច់គោអូស្ត្រាលី ដែលបានចៀនរួចនោះជាការស្រេច ដោយទទួលទានជាមួយនឹងទឹកម្រេច ឬទឹកសុសផ្សិត ឬទឹកសុសស្រាក្រហមក៏បាន៕

February 6, 2019

ភ្នំក្ងោកមាសខេត្តស្ទឹងត្រែង ត្រូវបានចុះបញ្ជីទុកជាសម្បត្តិបេតិកភណ្ឌជាតិ

តាមការចេញផ្សាយរបស់ក្រសួងព័ត៌មាន បានឱ្យដឹងថា មន្ត្រីមន្ទីរវប្បធ៌មនឹងវិចិត្តសិល្បៈខេត្តស្ទឹងត្រែង រួមជាមួយមន្ត្រីស្ថាប័នពាក់ព័ន្ធចុះពិនិត្យសម្បត្តិវប្បធ៌មនៅ (ភ្នំក្ងោកមាស) ដែលមានអាយុកាលមុនសម័យអង្គរ នឹងមានប្រវត្តិពាក់ព័ន្ធទៅនឹងអ្នកក្លាហានការពារទឹកដីរបស់មនុស្សជំនាន់ដើម ដើម្បីធ្វើការចុះបញ្ជីទុកជាសម្បតិជាតិ ។

ក្នុងឱកាសចុះពិនិត្យសម្បត្តិវប្បធ៌មនៅ(ភ្នំក្ងោកមាស)នៅភូមិឆ្វាំងឃុំសំអាងស្រុកថាឡាបរិវ៉ាត់ ខេត្តស្ទឹងត្រែង កាលពីថ្ងៃទី17 ខែមករា ឆ្នាំ2019 លោកស្រី ញ៉ោច សារឿនប្រធានស្តីទីមន្ទីរវប្បធ៌មនឹងវិចិត្រសិល្បៈខេត្តបានបញ្ជាក់ថា នេះជាសម្បត្តិមហាសាលមួយដែលយើងត្រូវតែរួមគ្នាអភិរក្ស ហើយមន្ទីរនឹងចុះទៅក្នុងបញ្ជីរក្សាទុកជាសម្បត្តិជាតិកុំឱ្យជនខិលខូចឡើងទៅជីកកកាយរាវរកវត្ថុបុរាណ។ លោកស្រីថា បន្ទាប់ពីបានមកពិនិត្យជាក់ស្តែងយើងឃើញមានភស្តុតាងបង្ហាញថានៅក្នុងភ្នំនេះ ជាទីកន្លែងលាក់ខ្លួន ដែលយើងអាចចាត់ទុកថាជាកន្លែងមនុស្សជំនាន់ដើមរស់នៅ។ លោកស្រីបន្ដថា នាងខ្ញុំទៅវិញនិងធ្វើរបាយការណ៍ ផ្ញើទៅក្រសួងដើម្បីអភិរក្យតំបន់នេះ ដោយសារបន្សល់ទុកមកជាយូរឆ្នាំមកហើយ ដើម្បីថែរក្សាទុកតំបន់នេះទុក តទៅអនាគត ។

លោកកែវ សុភាព អនុប្រធានសហគមន៍អភិរក្សធនធានធម្មជាតិឆ្វាំង បានបញ្ជាក់ថាៈប្រជាសហគមន៍សាទរ ចំពោះការយកចិត្តទុកដាក់របស់មន្ទីរវប្បធម៌ ព្រោះវាជាមែកធាងមួយថ្មីទៀតនាំទៅរកការអភិរក្សសម្បត្តិធនធានដ៏មានតម្លៃនេះ ឱ្យស្ថិតនៅគង់វង្សជាដ៏រាប ។ លោកបញ្ជាក់ថា បើតាមការនិយាយតៗគ្នាមកតំបន់នេះមានអ្នកក្លាហានប្រើសត្វដំរីជាយានជំនិះនិងប្រើដាវជាអាវុធការពារទឹកដីរបស់ខ្មែរយើង ព្រោះមានបន្សល់ទុកនៅស្លាកស្នាមផ្សេងៗជាច្រើន ដូចយើងបានមកឃើញនេះ ។ លោកអះអាងថា សម្បត្តិធនធានដែលមាននេះ លោកនឹងចូលរួមសហការជាមួយសមត្ថកិច្ចពាក់ពន្ធ ជួយថែរក្សាឱ្យបានគង់វង្សមិនឱ្យជនខិលខូចមកគាស់កកាយទេ ព្រោះវាមានប្រយោជន៍ចំបងសំរាប់បំរើឱ្យវិស័យទេសចរណ៍ ។ សូមបញ្ជាក់ថា តំបន់ភ្នំក្ងោកមាសមានល្អាងថ្មចំនួន29កន្លែង ហើយ មន្ទីរវប្បធម៌ និងសិល្បៈខេត្ត ដាក់បញ្ចូលក្នុងបញ្ជីជាសម្បត្តិបិតិកភណ្ឌជាតិ ដើម្បី រួមគ្នាទុកឲ្យកូនចៅជំនាន់ក្រោយ ក៏ដូចជាភ្ញៀវជាតិ អន្តរជាតិ បានឃើញនិងបានស្គាល់ ៕

February 6, 2019

ប្រទេសបារាំងថា នឹងជួយអភិវឌ្ឍវិស័យកសិកម្មនៅកម្ពុជាឱ្យរីកចម្រើន

ឯកអគ្គរដ្ឋទូតបារាំងប្រចាំកម្ពុជាបានសន្យាថា នឹងធ្វើយ៉ាងណាអភិវឌ្ឍវិស័យកសិកម្មនៅកម្ពុជា ឱ្យមានការរីកចម្រើនសមស្របតាមចក្ខុវិស័យរបស់រាជរដ្ឋាភិបាលកម្ពុជា ដោយនឹងខិតខំផ្តល់កិច្ចសហការបន្ថែមទៀតជាមួយក្រសួងកសិកម្ម ។
កិច្ចពិភាក្សាការងារអំពីការពង្រឹង និងពង្រីកកិច្ចសហប្រតិបត្តិការរវាងប្រទេសបារំាង -កម្ពុជានេះត្រូវបានធ្វើឡើងក្នុងឱកាសជំនួបរវាងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ ជាមួយលោកស្រី អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំនៅព្រះរាជាណាចក្រកម្ពុជា។

ឯកឧត្តមរដ្ឋមន្ត្រី បានសម្តែងការកោតសរសើរចំពោះរដ្ឋាភិបាលបារាំង ដែលកន្លងមកបានជួយឧបត្ថម្ភគាំទ្រដល់ការអភិវឌ្ឍរបស់ប្រទេសកម្ពុជាជារួម និងដោយឡែកការអភិវឌ្ឍវិស័យកសិកម្ម ដែលមានជំនួយឧបត្ថម្ភទាំងហិរញ្ញវត្ថុ និងបច្ចេកទេសរបស់រដ្ឋាភិបាលបារាំងបានចូលរួមចំណែកធ្វើឱ្យវិស័យកសិកម្មមានការរីកចម្រើនគួរឱ្យមោទនភាព ។
ឯកឧត្តមសង្ឃឹមថា រដ្ឋាភិបាលបារាំងនឹងបន្តជួយអភិវឌ្ឍវិស័យកសិកម្មបន្ថែមទៀត ជាពិសេសដល់វិស័យកៅស៊ូគ្រួសារឱ្យកាន់តែមានការរីកចម្រើនសមស្របតាមនិន្នាការរីកចម្រើនផ្នែកសេដ្ឋកិច្ច កំណើនប្រជាជន និងការប្រកួតប្រជែងទីផ្សារ។
លោកស្រីឯកអគ្គរដ្ឋទូតក៏បានលើកឡើង ទាក់ទងនឹងការរីកចម្រើនរបស់ប្រទេសកម្ពុជា ជាពិសេសការរីកចម្រើនលើវិស័យកសិកម្ម ដែលបានចូលរួមចំណែកជំរុញកំណើនសេដ្ឋកិច្ចជាតិ កែលម្អកម្រិតជីវភាពរបស់ប្រជាពលរដ្ឋ និងកាត់បន្ថយភាពក្រីក្រ។
លោកស្រីបានបន្តថា ជំនួបនាពេលនេះ គឺជាឱកាសនៃការផ្លាស់ប្តូរព័ត៌មាន បទពិសោធល្អៗ និងធ្វើការសិក្សា លើកទិសដៅបន្តអនុវត្តគម្រោងដែលពាក់ព័ន្ធនឹងវិស័យកសិកម្ម។ ទោះជាយ៉ាងណា លោកស្រីថា នឹងខិតខំផ្តល់កិច្ចសហការបន្ថែមទៀតជាមួយក្រសួងកសិកម្ម រុក្ខាប្រមាញ់ និងនេសាទ ធ្វើយ៉ាងណាអភិវឌ្ឍវិស័យកសិកម្មនៅកម្ពុជាឱ្យមានការរីកចម្រើន សមស្របតាមចក្ខុវិស័យរបស់រាជរដ្ឋាភិបាលកម្ពុជា។

នៅក្នុងឱកាសនេះដែរ ភាគីទាំង2 ក៏បានលើកយកប្រធានបទសំខាន់ៗមកពិភាក្សាផងដែរ ដែលមានជាអាទិ៍៖ទី1-ការអភិវឌ្ឍវិស័យកៅស៊ូគ្រួសារ ទី2-ការធ្វើឱ្យប្រសើរឡើងនូវហេដ្ឋរចនាសម្ព័ន្ធគាំទ្រដល់វិស័យស្រូវ អង្កកម្ពុជា ទី3-ការលើកកម្ពស់ផលិតភាពផលិតកម្មកសិកម្ម ការកែច្នៃ ការវេចខ្ចប់ ការធានាគុណភាព សុវត្ថិភាព អនាម័យ និងភូតគាមអនាម័យ (SPS) ឆ្លើយតបតាមនិយាមក្នុងតំបន់ និងនៅលើពិភពលោក ទី4-ការលើកកម្ពស់ប្រសិទ្ធភាពនៃការប្រើប្រាស់ដីកសិកម្មឱ្យមាននិរន្តរភាព និងទី5-វិធានការការពារ និងទប់ស្កាត់ជំងឺគ្រុនជ្រូកអាហ្វិ្រក (African Swine Fever)៕

February 6, 2019

ថៃប្រកាស «ត្រីក្រឹមជល់» ជាមច្ឆាតំណាងជាតិថៃ និងជាសម្បត្តិបេតិកភណ្ឌជាតិ

តាមរយៈសារព័ត៌មាន kapook នៅថ្ងៃទី6 ខែកុម្ភៈ ឆ្នាំ2018 នេះ បានចេញផ្សាយថា វរសេនីយ៍ឯក ឆៃយ៍នុវ័តិ អ្នកនាំពាក្យគណៈរដ្ឋមន្ដ្រី បានប្រកាសនៅថ្ងៃទី5 ខែកុម្ភៈម្សិលមិញថា គណៈរដ្ឋមន្ត្រីថៃ បានដាក់សំណើឱ្យត្រីក្រឹមជល់របស់ថៃ ជាមច្ឆជាតិតំណាងប្រទេសថៃ និងជាសម្បត្តិបេតិកភណ្ឌជាតិ ព្រោះសត្វត្រីប្រភេទនេះ មានពណ៌សម្បុរ និងឯកលក្ខណៈជាជាតិថៃ ជាសត្វត្រីប្រចាំជាតិដោយនាំមកនូវទិដ្ឋភាពវប្បធម៌ និងប្រវត្តិសាស្រ្ត។ ការដាក់សំណើនេះ ស្ថិតក្រោមការពិចារណា និងប្រកាសដោយក្រសួងមរតកវប្បធម៌ជាតិថៃ និងបានចុះចូលក្នុងបញ្ជីសម្បត្តិបេតិកភណ្ឌជាតិ។

ក្រៅពីនេះ ត្រីក្រឹមជល់ថៃ មានអត្ថប្រយោជន៍ជាច្រើន ជាពិសេសនៅក្នុងការលើកកម្ពស់វប្បធម៌ ហើយការបង្កើត ការច្នៃប្រឌិតក្នុងការបង្កាត់ពូជ ដែលគេជឿថា នាំមកនូវភាពរីកចម្រើនខាងពាណិជ្ជកម្ម និងបណ្តាលឱ្យសេដ្ឋកិច្ចពង្រីកតម្លៃបានយ៉ាងមហាសាល។ ជាមួយគ្នានោះដែរ សត្វត្រីនេះក៏ជានិមិត្ដរូបនៃការនេសាទដែលឆ្លុះបញ្ចាំងពីអត្តសញ្ញាណរបស់ថៃ និងឯកអត្តសញ្ញាណនៃសិល្បៈការតស៊ូ។

គួរបញ្ជាក់ផងដែរថា អ្នកវិទ្យាសាស្ត្រនៃទេសាភិបាលសកល Betta splendensបានឱ្យឈ្មោះត្រីក្រឹមជល់នេះថា «Siamese Fighting Fish » ឬ « Siamese Betta » ដែលសម្គាល់ថា ត្រីក្រឹមនេះមានដើមកំណើតនៅប្រទេសថៃ និងអាចពិសោធបានថា ថៃ គឺជាប្រទេសម្ចាស់ត្រីក្រឹមជល់ ដោយសារមានជាប់ឈ្មោះ សៀម (Siam) នៅខាងមុខ៕

February 6, 2019

វិស័យបច្ចេកវិទ្យាហិរញ្ញវត្ថុនៅកម្ពុជាមានការរីកចម្រើនបង្គួរ ខណៈការប្រើសេវានេះនៅមានកម្រិត

បើទោះបីជាសេវាបច្ចេកវិទ្យាហិរញ្ញវត្ថុនៅកម្ពុជាមានការរីកចម្រើនយ៉ាងឆាប់រហ័សក្នុងរយៈពេល 2 – 3ឆ្នាំចុងក្រោយនេះក្តី តែការអភិវឌ្ឍសេវាបច្ចេកវិទ្យាហិរញ្ញវត្ថុ និងការប្រើប្រាស់សេវាមួយនេះក៏ហាក់នៅមិនទាន់មានភាពទូលំទូលាយនៅឡើយ។ នេះបើយោងតាមមន្ត្រីជំនាញនៅក្នុងវិស័យហិរញ្ញវត្ថុ។

លោក អ៊ុក សារ៉ាត ប្រធាននាយកដ្ឋានប្រព័ន្ធទូទាត់សងប្រាក់នៃធនាគារជាតិនៃកម្ពុជា បានថ្លែងក្នុងឱកាសសន្និបាតបូកសរុបលទ្ធផលការងារប្រចាំឆ្នាំ2018 របស់ធនាគារជាតិនៃកម្ពុជាកាលពីពេលថ្មីៗនេះ ថា ការរីកចម្រើននៃបច្ចេកវិទ្យាដែលរួមមានទូរស័ព្ទចល័តឆ្លាតវៃ ប្រព័ន្ធអុីនធើណិត បច្ចេកវិទ្យាប្លុកឆេន បញ្ញាសិប្បនិម្មិត ឃ្លាំងទិន្នន័យ ការវិភាគទិន្នន័យ បច្ចេកវិទ្យាជីវមាត្រ រួមទាំងបច្ចេកវិទ្យាសម្រួលដល់ការត្រួតពិនិត្យផ្សេងៗ បានជំរុញឱ្យមានការរីកចម្រើនក្នុងវិស័យហិរញ្ញវត្ថុ ដែលការណ៍នេះត្រូវបានទទួលស្គាល់ជាទូទៅថា ជាបច្ចេកវិទ្យាហិរញ្ញវត្ថុ។

លោក សារ៉ាត បានបន្តថា បច្ចេកវិទ្យាហិរញ្ញវត្ថុនៅក្នុងប្រទេសកម្ពុជាមានការរីកចម្រើនបង្គួរនៅក្នុងសេវា មួយចំនួនដូចជា ប្រព័ន្ធទូទាត់ ការផ្ទេរប្រាក់ឆ្លងដែន និងការផ្តល់ឥណទានជាដើម ប៉ុន្តែសេវាផ្សេងទៀតមានការលូតលាស់តិចតួចប៉ុណ្ណោះ។

លោកបានបញ្ជាក់យ៉ាងដូច្នេះថា៖“សេវាកម្មផ្សេងៗទៀតនៅក្នុងបច្ចេកវិទ្យាហិរញ្ញវត្ថុដូចជា បញ្ញាសិប្បនិម្មិត និងឃ្លាំងទិន្នន័យ នៅតែមិនទាន់មានប្រតិបត្តិការនៅក្នុងប្រទេសកម្ពុជានៅឡើយទេ”។ លោកបន្តថា៖“ទោះជាស្មាតហ្វូន និងអុីនធើណិតដែលបម្រើដល់បច្ចេកវិទ្យារីកចម្រើនខ្លាំងក៏ដោយ តែយើងមិនទាន់ឃើញមានការប្រើប្រាស់បច្ចេកវិទ្យាហិរញ្ញវត្ថុដទៃទៀតនៅឡើយ។ ខ្ញុំមិនទាន់ឃើញមានការរីកចម្រើនខ្លាំងទេ នៅពេលដែលយើងនិយាយពីបច្ចេកវិទ្យាហិរញ្ញវត្ថុ”។

លោកប្រធាននាយកដ្ឋានបានបន្ថែមថា ជាទូទៅការយល់ដឹងរបស់ប្រជាជនកម្ពុជានៅមានកម្រិតនៅឡើយទៅលើបច្ចេកវិទ្យាហិរញ្ញវត្ថុ ខណៈដែលវាមានសារៈសំខាន់ដើម្បីជំរុញ និងលើកកម្ពស់ការយល់ដឹងផ្នែកបច្ចេកវិទ្យា និងការប្រើប្រាស់អ្វីទាំងអស់នោះ។

លោកបន្តថា៖ “មានប្រជាជនកម្ពុជាជាច្រើនប្រើបាស់ស្មាតហ្វូន ហើយភាគច្រើននៅក្នុងទីក្រុង និងទីប្រជុំជន ប៉ុន្តែពួកគេមានការខ្វះខាតការយល់ដឹងលើបច្ចេកវិទ្យាហិរញ្ញវត្ថុ ខណៈពេលដែលវិនិយោគិនក្នុងស្រុក មិនចាប់អារម្មណ៍នៅក្នុងការវិនិយោគលើវិស័យនេះ”។

លោក គីមទី កោមលី អគ្គនាយករងបច្ចេកទេសទី1 នៃធនាគារជាតិនៃកម្ពុជា បានឱ្យដឹងថា ការដាក់ចេញនូវបច្ចេកវិទ្យាទាំងនេះបានផ្តល់នូវកាលានុវត្តភាពក្នុងការជំរុញឱ្យមានប្រសិទ្ធភាពថែមឡើងទៀតនៅក្នុងវិស័យហិរញ្ញវត្ថុពាក់ព័ន្ធការចំណាយថ្លៃដើមល្បឿន សុវត្ថិភាព និងតម្លាភាព ការជំរុញលទ្ធភាពក្នុងការទទួលបានសេវាកម្មហិរញ្ញវត្ថុ ក៏ដូចជាការជំរុញឱ្យមានបរិវត្តន៍នៃសេវាកម្មហិរញ្ញវត្ថុ និងធ្វើឱ្យប្រសើរឡើងនូវប្រព័ន្ធទូទាត់ជាអេឡិចត្រូនិក និងកាត់បន្ថយការចំណាយលើប្រតិបត្តិការសម្រាប់អតិថិជន។

លោកបន្តថា៖“បច្ចេកវិទ្យាហិរញ្ញវត្ថុអនុញ្ញាតឱ្យធនាគារកាត់បន្ថយតម្លៃ និងបញ្ជូនសេវាកម្មរបស់ពួកគេឱ្យកាន់តែមានប្រសិទ្ធភាពជាងមុន”។

លោក អុិន ចាន់នី ប្រធាននាយកប្រតិបត្តិនៃធនាគារអេស៊ីលីដា បាននិយាយថា បច្ចេកវិទ្យា-ហិរញ្ញវត្ថុ និងដើរតួនាទីយ៉ាងសំខាន់ក្នុងការអភិវឌ្ឍវិស័យធនាគារក្នុងស្រុក និងឧស្សាហកម្មផ្សេងៗទៀតនៅក្នុងប្រទេសកម្ពុជា។

លោក ចាន់នី បន្តថា៖ “បច្ចេកវិទ្យាអាចកាត់បន្ថយហានិភ័យសម្រាប់ធនាគារ និងគ្រឹះស្ថានមីក្រូហិរញ្ញវត្ថុ និងជួយបង្កើនភាពងាយស្រួលដល់អតិថិជន”។

បើយោងតាមរបាយការណ៍របស់ធនាគារជាតិនៃកម្ពុជា ការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជាកំពុងស្ថិតក្នុងដំណាក់កាលដំបូងនៅឡើយ ដោយប្រតិបត្តិការភាគច្រើនមានដូចជា កាបូបអេឡិចត្រូនិក ការទូទាត់តាមរយៈប្រព័ន្ធទូរស័ព្ទ និងការទូទាត់ឆ្លងប្រទេស ជាដើម។

របាយការណ៍ដដែលបន្តថា ធនាគារកណ្តាលកំពុងតែរៀបចំក្របខណ្ឌបទប្បញ្ញតិ្ត និងគោលនយោបាយផ្សេងៗទៀតដើម្បីជំរុញវិស័យនេះ តែទោះជាយ៉ាងនេះក្តី បច្ចេកវិទ្យាហិរញ្ញវត្ថុក៏ជំរុញឱ្យមានបញ្ហាប្រឈមមួយចំនួនផងដែរពាក់ព័ន្ធនឹងបទល្មើសតាមប្រព័ន្ធអុីនធើណិត កិច្ចការពារអតិថិជន និងការប្រឆាំងការសម្អាតប្រាក់ និងហិរញ្ញប្បទានភេរវកម្ម។

ម្យ៉ាងវិញទៀត បច្ច័យ និងឥទ្ធិពលនៃបច្ចេកវិទ្យាហិរញ្ញវត្ថុចំពោះការអនុវត្តគោលនយោបាយរូបិយវត្ថុ និងស្ថិរភាពហិរញ្ញវត្ថុរបស់ធនាគារកណ្តាល មិនទាន់មានភាពច្បាស់លាស់នៅឡើយ តែធនាគារជាតិនៃកម្ពុជាបានខិតខំដាក់ចេញនូវគោលនយោបាយសមស្រប ដើម្បីលើកកម្ពស់បច្ចេកវិទ្យាហិរញ្ញវត្ថុ ក៏ដូចជាបន្ធូរបន្ថយហានិភ័យនានាដែលអាចកើតមានឡើង។

ជាមួយគ្នានេះ ធនាគារជាតិនៃកម្ពុជាបានសហការជាមួយដៃគូអភិវឌ្ឍន៍ក្នុងការកសាងបរិស្ថានសមស្របមួយសម្រាប់អភិវឌ្ឍបច្ចេកវិទ្យាហិរញ្ញវត្ថុនៅកម្ពុជា។

បើយោងតាមរបាយការណ៍ ធនាគារជាតិនៃកម្ពុជាបាននិងកំពុងខិតខំអភិវឌ្ឍលើគម្រោង“បាគង ឬរូបិយបណ្ណឌីជីថល” ដែលជាផ្នែកមួយក្នុងការជំរុញបច្ចេកវិទ្យាហិរញ្ញវត្ថុ ក្នុងគោលដៅលើកកម្ពស់សុវត្ថិភាព និងប្រសិទ្ធភាពប្រព័ន្ធទូទាត់សងប្រាក់នៅប្រទេសកម្ពុជា។ គោលបំណងនៃការអភិវឌ្ឍប្រព័ន្ធនេះ គឺដើម្បីឆ្លើយតបទៅនឹងការរីកចម្រើនសេដ្ឋកិច្ច និងបច្ចេកវិទ្យាហិរញ្ញវត្ថុនាពេលបច្ចុប្បន្ន កាត់បន្ថយការប្រើប្រាស់សាច់ប្រាក់ក្នុងទីផ្សារ និងចូលរួមលើកកម្ពស់បរិយាប័ន្នហិរញ្ញវត្ថុ។

គួររំឭកដែរថា នៅក្នុងឆ្នាំ2018 គ្រឹះស្ថានធនាគារ និងហរិញ្ញវត្ថុចំនួន24 បានផ្តល់សេវាកម្មធនាគារតាមអនឡាញ (Internet Banking) និង 19គ្រឹះស្ថានទៀតបានផ្តល់សេវា Mobile Banking ដល់អតិថិជន។ ទំហំប្រតិបត្តិការទូទាត់ធ្វើឡើងតាម Internet banking មានចំនួនសរុប 80ម៉ឺនប្រតិបត្តិការ គិតជាទឹកប្រាក់ស្មើនឹង 3.9ប៊ីលានដុល្លារអាមេរិក ចំណែកឯប្រតិបត្តិការ Mobile Banking មានចំនួន 12.3លានប្រតិបត្តិការ គិតជាទឹកប្រាក់ស្មើ 5.7ប៊ីលានដុល្លារអាមេរិក៕

February 6, 2019

រដ្ឋាភិបាលផ្ដល់ការអនុគ្រោះ ដោយព្យួរទុកជាបណ្តោះអាសន្ននូវការបង់ប្រាក់រំដោះពន្ធលើប្រាក់ចំណូលប្រចាំខែរបស់សហគ្រាសកែច្នៃកសិផល

រាជរដ្ឋាភិបាលកម្ពុជាកាលពីចុងខែមករា បានសម្រេចផ្តល់ការអនុគ្រោះព្យួរទុកជាបណ្តោះអាសន្ននូវ ការបង់ប្រាក់រំដោះពន្ធលើប្រាក់ចំណូលប្រចាំខែរយៈពេល 5ឆ្នាំដល់សហគ្រាសប្រកបអាជីវកម្មក្នុងវិស័យ កសិកម្ម។ នេះបើយោងតាមសេចក្តីប្រកាសក្រសួងសេដ្ឋកិច្ច និងហិរញ្ញវត្ថុ។

ប្រកាសស្តីពីការព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសប្រកបអាជីវកម្មក្នុងវិស័យកសិកម្ម ដែលបានចុះហត្ថលេខាដោយឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ដើម្បីជំរុញ និងគាំទ្រដល់ផលិតកម្ម និងការនាំចេញផលិតផលកសិកម្មស្របតាមគោលនយោបាយរបស់រាជរដ្ឋាភិបាលកម្ពុជា។

ការសម្រេចនេះមានគោលដៅព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសប្រកបអាជីវកម្មផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន ដោយនឹងអនុវត្តចំពោះសហគ្រាសដាំដុះ ផលិត និងផ្តត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន។ ប្រកាសនេះបានកំណត់នូវផលិតផលកសិកម្មមួយចំនួន ដូចជា ស្រូវ អង្ករ ពោត សណ្តែក ម្រេច គ្រាប់ស្វាយចន្ទី ដំឡូងមី និងកៅស៊ូ។

សេចក្តីសម្រេចរបស់ក្រសួងសេដ្ឋកិច្ចបានបញ្ជាក់ថា៖“ចំពោះសហគ្រាសដាំដុះ ផលិត និងផ្តត់ផ្គង់ក្នុងស្រុក ឬនាំចេញផលិតផលកសិកម្ម ត្រូវបានអនុគ្រោះព្យួរទុកជាបណ្តោះអាសន្ននូវការបង់ប្រាក់រំដោះពន្ធ(ដែលមានចំនួន 1ភាគរយ) លើប្រាក់ចំណូលប្រចាំខែរយៈពេល 5ឆ្នាំ គិតចាប់ពីខែមករា ឆ្នាំ2019 តរៀងទៅ”។

ប្រកាសនេះបានបន្តថា ការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ ត្រូវផ្សារភ្ជាប់ជាមួយនឹងអនុលោមភាពសារពើពន្ធ ស្របតាមច្បាប់ និងបទប្បញ្ញត្តិស្តីពីពន្ធដារដោយក្រុមហ៊ុនកាន់បញ្ជិកាគណនេយ្យឱ្យបានត្រឹមត្រូវតាមបទបញ្ញត្តិនៃច្បាប់ស្តីពីសារពើពន្ធ និងបទប្បញ្ញត្តិនៃច្បាប់ស្តីពីគណនេយ្យជាធរមាន និងប្រកាសបង់ពន្ធអាករដទៃទៀតជាធរមានទៅតាមកាលកំណត់។ ប្រកាសនេះទៀតសោតបានបញ្ជាក់ថា ក្នុងករណីសហគ្រាសមិនគោរពតាមលក្ខខណ្ឌទាំង2 ខាងលើ ការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ អាចត្រូវបានដកហូត ហើយសហគ្រាសត្រូវទទួលរងទោសទណ្ឌនានាតាមច្បាប់ជាធរមាន។

លោក សុង សារ៉ន អគ្គនាយកនៃក្រុមហ៊ុន អេមរុរាយស៍ ខេមបូឌា ខូអិលធីឌី (AMRU Rice Cambodia Co.,Ltd) បានឱ្យដឹងថា លោកស្វាគមន៍លើចំណាត់ការរបស់រដ្ឋាភិបាលលើការលើកកម្ពស់ភាពប្រកួតប្រជែង ក្នុងការកែច្នៃផលិតផលកសិកម្មនៅក្នុងប្រទេសកម្ពុជាយើង។

លោកបន្តថា វាជាជំហានមួយដ៏ប្រសើរក្នុងការជួយដល់សហគ្រិនកម្ពុជា និងជួយឱ្យរោងចក្រកែច្នៃមានលទ្ធភាពប្រកួតប្រជែងបាននៅលើទីផ្សារអន្តរជាតិ។

លោក សារ៉ន ឱ្យដឹងទៀតថា៖“យើងស្នើសុំរដ្ឋាភិបាលជួយពិនិត្យបន្ថែមទៀត និងកែសម្រួលនីតិវិធីផ្សេងៗទៀតក្រៅពីពន្ធនេះ”។

លោកអគ្គនាយកក្រុមហ៊ុនបានបន្តថា ពន្ធនេះមានចំនួន 1ភាគរយនៃប្រាក់ចំណូលរបស់ក្រុមហ៊ុនតែមានពន្ធជាច្រើនទៀតបន្តនៅជាប់ដូចជា សម្ភារម៉ាស៊ីនផ្សេងៗដែលយកមកដំឡើងសម្រាប់កែច្នៃលើកសិផលរបស់កម្ពុជាដែលនៅតែមានការជាប់ពន្ធ និងពន្ធកាត់ទុកផ្សេងៗនៅតែមាន ដោយយើងពិនិត្យឃើញថា កម្ពុជានាំចេញផលិតផលវត្ថុធាតុដើម 100ភាគរយ។

លោក សារ៉ន បញ្ជាក់ថា៖“វាជារឿងល្អ ការណ៍នេះវានឹងជួយលើកកម្ពស់ភាពប្រកួតប្រជែងរបស់វិស័យឯកជន ជាពិសេសឧស្សាហកម្មកែច្នៃផលិតផលកសិកម្ម ហើយយើងចង់ឱ្យរដ្ឋាភិបាលពិនិត្យមើលពន្ធផ្សេងៗទៀតផងដើម្បីជួយទាក់ទាញវិនិយោគិនមកវិនិយោគនៅកម្ពុជាលើវិស័យឧស្សាហកម្មកែច្នៃផលិតផលកសិកម្ម ដើម្បីបង្កើនតម្លៃបន្ថែម កាត់បន្ថយការនាំចេញវត្ថុធាតុដើម និងលើកកម្ពស់ភាពប្រកួតប្រជែង”។

គួរបញ្ជាក់ថា ថ្មីៗនេះ រដ្ឋាភិបាលបានប្រកាសលុបចោលស្ថាប័នជាន់គ្នាមួយចំនួន ព្រមទាំងភ្នាក់ងារកម្ពុជានាវាចរណ៍កាំសាប ដើម្បីកាត់បន្ថយការចំណាយលើការធ្វើធុរកិច្ច និងធ្វើឱ្យផលិតផលកម្ពុជាមានភាពប្រកួតប្រជែងខ្ពស់៕

February 6, 2019

តារាសម្ដែង គន់ រៀមរតនៈ ចេញសារពន្លះស្បែក ចំប៉ីខ្មៅ

តារាសម្ដែង គន់ រៀមរតនៈ ហៅចែរ៉ូហ្សា ដែលគេស្គាល់តាមរយៈការសម្តែងបែបភេទទី3 បានបង្ហោះសារយ៉ាងភ្ញាក់ផ្អើល ក្រោយកើតករណី នាងចំប៉ីខ្មៅ ត្រូវរិះគន់យ៉ាងចាស់ដៃនៅលើបណ្ដាញសង្គមហ្វេសប៊ុក។ ដូចដែលបានដឹងហើយកាលពីយប់ថ្ងៃទី4 ខែកុម្ភៈ ឆ្នាំ 2019 ថ្ងៃម្សិលមិញនេះ គណនីហ្វេសប៊ុកឈ្មោះ ហេង យិន ដែលគេស្គាល់ថាជា ចំប៉ីខ្មៅ បានចេញវីដេអូជេរមួយទៅកាន់បុរសបីនាក់ ដែលបានជិះម៉ូតូមកខោកក្បាលខ្លួន ហើយអ្វី ដែលមហាជនជាច្រើនសម្ដែងការខឹងសប្បារជាខ្លាំងនោះគឺក្នុងវីដេអូនោះ បុគ្គលរូបនេះបានប្រើពាក្យសម្តីអសុរស ដៀលប្រមាថ ទៅលើពូជសាសន៏ខ្មែរ ដែលខ្លួនឯងផ្ទាល់កំពុងតែរស់នៅលើទឹកដីមួយនេះ។

អ្នកលេងបណ្ដាញសង្គមខ្មែរ មិនព្រមទទួលយកនូវការសុំទោសរបស់នាង ចំប៉ីខ្មៅ នេះទេ ព្រមទាំងទទូចឱ្យអាជ្ញាធរពាក់ព័ន្ធគ្រប់ផ្នែក មានវិធានការក្ដៅចំពោះរូបនាងជាបន្ទាន់។ នៅក្នុងនោះ តារាសម្ដែង គន់ រៀមរតនៈ បានដាក់សារមួយប្រយោគពន្លះនាង ចំប៉ីខ្មៅថា «គួរតែបណ្ដេញចេញពីទឹកដីខ្មែរ ព្រោះវាកំពុងជ្រកកោនរស់នៅលើទឹកដីខ្មែរ តែវាបែរជាជេប្រមាថ មាក់ងាយទឹកដីដែរវាកំពុងតែជ្រកកោនរស់នៅទៅវិញ »។

សូមជម្រាបថា ពេលកំដៅចិត្តរបស់អ្នកលេងបណ្ដាញសង្គមក្នុងប្រទេសកម្ពុជា កំពុងតែពុះកញ្ជ្រេលឡើង និងទាមទាមឱ្យមានវិធានការក្ដៅចំពោះបុគ្គលជេរប្រមាថជាតិសាសន៍ខ្មែរមួយនេះ។ តើប្រិយមិត្តទាំងអស់គ្នាយល់យ៉ាងណាដែរ??

February 5, 2019

ADB ៖ គម្រោង2 មានទឹកប្រាក់សរុប 380លានដុល្លារ ដើម្បីជួយកម្ពុជាលើវិស័យធារាសាស្ដ្រ

ក្រសួងធនធានទឹក និងធនាគារអភិវឌ្ឍន៍អាស៊ី(ADB)នៅកម្ពុជានឹងអនុវត្តគម្រោងធំៗ2 គឺគម្រោងកែលម្អកសិកម្ម និងប្រព័ន្ធគម្រោងគ្រប់គ្រងធារាសាស្ត្រ និងធនធានទឹក ដែលមានទឹកប្រាក់សរុបចំនួន 380លានដុល្លារដើម្បីកែលម្អការគ្រប់គ្រងទឹកនៅកម្ពុជាក្នុងឆ្នាំនេះ។ នេះបើយោងតាមសេចក្តីថ្លែងការណ៍របស់ក្រសួងធនធានទឹក និងឧតុនិយម។
លោកស្រី Sunniya Durrani-Jamal ប្រធាននៃស្ថានតំណាងធនាគារអភិវឌ្ឍន៍អាស៊ី(ADB)ប្រចាំកម្ពុជាបានលើកឡើងថា៖«គម្រោងសំខាន់ចំនួន2 គឺគម្រោងធ្វើឱ្យប្រសើរឡើងនូវប្រព័ន្ធធារាសាស្ត្រកសិកម្ម (Irrigated Agriculture Improvement Project) និងគម្រោងបរិធានហិរញ្ញប្បទានច្រើនយ៉ាង ស្តីពីធារាសាស្រ្ត និងការគ្រប់គ្រងធនធានទឹក(Multiple Financing Facility on Irrigation and Water Resources Management Project)នឹងត្រូវបានអនុវត្តឆាប់ៗក្នុងឆ្នាំ2019នេះសម្រាប់ជួយដល់កម្ពុជា»។

លោកស្រី Sunniya Durrani-Jama ក្នុងឱកាសជួបជាមួយឯកឧត្តម លឹម គានហោ រដ្ឋមន្រ្តីធនធានទឹកបានបើកកិច្ចប្រជុំដើម្បីពិភាក្សាពីគម្រោងទាំង2នោះ ដោយលោកស្រី Durrani-Jamaបានមានប្រសាសន៍ថា ADBនឹងបន្តរួមចំណែកដល់កំណើនសេដ្ឋកិច្ច និងផ្តល់ជំនួយរបស់ខ្លួនដើម្បីអភិវឌ្ឍលើវិស័យធារាសាស្ត្ររបស់ប្រទេសកម្ពុជា។
លោកស្រីបានបញ្ជាក់ថា៖«ADBនឹងផ្តោតលើសន្តិសុខទឹក កែលម្អប្រសិទ្ធភាពប្រព័ន្ធធារាសាស្រ្ត កាត់បន្ថយទឹកជំនន់ ការគ្រប់គ្រងគ្រោះរាំងស្ងួត ការគ្រប់គ្រងធនធានទឹកចម្រុះសម្រាប់អាងទន្លេ និងពង្រឹងស្ថាប័នពាក់ព័ន្ធនឹងវិស័យធារាសាស្ត្រ ដែលផ្នែកទាំងនេះត្រូវបានកំណត់នៅក្នុងយុទ្ធសាស្រ្ត ភាពជាដៃគូប្រចាំប្រទេសកម្ពុជាឆ្នាំ2019-2023»។
លោកជំទាវបានបន្ដថា ADB កន្លងមកក៏ដូចជាពេលបច្ចុប្បន្ន និងការងារជាអាទិភាព ក៏ដូចជាកិច្ចសហប្រតិបត្តិការដែលត្រូវរួមគ្នាបន្តយកចិត្តទុកដាក់អនុវត្តឱ្យបានកាន់តែសកម្ម និងមានប្រសិទ្ធភាពថែមទៀត សំដៅរួមចំណែកជំរុញកំណើន និងការរីកចម្រើនប្រកបដាយនិរន្តរភាពនៃសេដ្ឋកិច្ចកម្ពុជាសម្រាប់ពេលបច្ចុប្បន្ន និងទៅអនាគត។
ឯកឧត្តម លឹម គានហោ បានកត់សម្គាល់ថា ការរួមចំណែករបស់ADB និងការគាំទ្រចំពោះកំណើនសេដ្ឋកិច្ចរបស់ប្រទេសកម្ពុជា ជាការឆ្លុះបញ្ចាំងក្នុងការជំរុញកំណើន និងនិរន្តរភាពនៃការអភិវឌ្ឍសេដ្ឋកិច្ចកម្ពុជាឱ្យមានសម្ទុះទៅមុខជានិច្ច។

ដោយឡែកសម្រាប់វិស័យធនធានទឹក និងឧតុនិយមវិញ ADBបានរួមចំណែកក្នុងការពង្រឹងនិងអភិវឌ្ឍស្ថាប័ន ការកសាងសមត្ថភាព ការរៀបចំគោលនយោបាយ និងបទប្បញ្ញត្តិ ព្រមទាំងការគ្រប់គ្រង និងអភិវឌ្ឍធនធានទឹក ដូចជាប្រព័ន្ធធារាសាស្រ្តជាដើម។
កាលពីខែធ្នូ ក្រសួងធនធានទឹកបានអំពាវនាវដល់ក្រសួងស្ថាប័ន អាជ្ញាធរមូលដ្ឋាន និងប្រជាពលរដ្ឋ ជាពិសេសកសិករដើម្បីអភិរក្សទឹក ដោយសារតែសីតុណ្ហភាពត្រូវបានគេរំពឹងថា នឹងកើនឡើងនៅឆ្នាំនេះដោយសារតែបាតុភូត El Nino។
ក្រសួងក៏បានស្នើដល់អាជ្ញាធរខេត្តក្រុង ស្រុក ខណ្ឌ និងអាជ្ញាធរភូមិឱ្យសហការគ្នាដើម្បីគ្រប់គ្រងប្រភពទឹកដែលមានស្រាប់ និងបាននិយាយថា មន្រ្តីរបស់ខ្លួនកំពុងចាត់វិធានការដើម្បីជួយដល់កសិករនៅក្នុងតំបន់ដែលខ្វះខាតទឹក។
ឯកឧត្តមជឿជាក់ថា៖«ADB នៅតែជាដៃគូសហប្រតិបត្តិការដ៏សំខាន់មួយរបស់ប្រទេសកម្ពុជា ហើយក្រសួងក៏បានត្រៀមខ្លួនជានិច្ចក្នុងការបន្តធ្វើការជាមួយធនាគារADB ដើម្បីធ្វើឱ្យការគ្រប់គ្រង និងអភិវឌ្ឍន៍ធនធានទឹកមានប្រសិទ្ធភាព និងមាននិរន្តរភាពសម្រាប់ការអភិវឌ្ឍ និងការរីកលូតលាស់សេដ្ឋកិច្ចសង្គមនៃកម្ពុជាប្រកបដោយចីរភាព»៕

February 5, 2019

អ្នកជំនាញថា វិស័យធានារ៉ាប់រងនៅកម្ពុជាគួរប្រើស្តង់ដារគណនេយ្យ IFRS 17

រាជរដ្ឋាភិបាលបានចាត់ទុកវិស័យធានារ៉ាប់រងជាសសរស្តម្ភមួយនៃវិស័យហិរញ្ញវត្ថុ នៅក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុសម្រាប់ឆ្នាំ2016-2025 ដែលក្នុងនោះសកម្មភាពអាទិភាពចម្បងៗមួយចំនួនត្រូវបានដាក់ចេញយ៉ាងច្បាស់ ដូចជាការលើកកម្ពស់បរិស្ថាន បទប្បញ្ញត្តិកាន់តែប្រសើរ ការពង្រឹងយន្តការគ្រប់គ្រង និងត្រួតពិនិត្យទីផ្សារឱ្យកាន់តែមានស្តង់ដារខ្ពស់ ស្របតាមភាពចាំបាច់នៃការអភិវឌ្ឍទីផ្សារធានារ៉ាប់រងនៅកម្ពុជា។

ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាគណនេយ្យជាតិ បានជំរុញគ្រឹះស្ថានធានារ៉ាប់រងនានាឱ្យបង្កើនការយល់ដឹងដល់សាធារណជន និងពង្រីកទីផ្សារធានារ៉ាប់រងតាមរយៈការជំរុញការផ្សព្វផ្សាយអំពីអត្ថប្រយោជន៍នៃការធានារ៉ាប់រងជូនប្រជាពលរដ្ឋ និងការលើកកម្ពស់សមត្ថភាពវិជ្ជាជីវៈ ទាំងនិយតករ ទាំងប្រតិបត្តិករ។

ឯកឧត្តមក៏បានលើកទឹកចិត្ដដល់គ្រឹះស្ថានធានារ៉ាប់រងទាំងអស់ឱ្យបង្កើនការគាំទ្រ និងចូលរួមចំណែកដល់ការលើកកម្ពស់សមត្ថភាពវិជ្ជាជីវៈរបស់បុគ្គលិកជំនាញរបស់ខ្លួនឱ្យបានកាន់តែច្រើន ដែលនេះជាកត្តាគន្លឹះមួយដែលមិនត្រឹមតែនាំទៅរកភាពជោគជ័យនៃធុរកិច្ចរបស់គ្រឹះស្ថានធានារ៉ាប់រងនីមួយៗប៉ុណ្ណោះទេ ប៉ុន្តែថែមទាំងផ្ដល់នូវមូលដ្ឋានរឹងមាំសម្រាប់ការអភិវឌ្ឍទីផ្សារធានារ៉ាប់រង ប្រកបដោយចីរភាព និងជំរុញអានុភាពនៃប្រព័ន្ធសេដ្ឋកិច្ចកម្ពុជាដែលមិនគាំទ្រដល់កំណើននៃសេដ្ឋកិច្ចជាតិ។

លោក យក់ ចំរើនរិទ្ធិ អគ្គនាយកក្រុមហ៊ុនធានារ៉ាប់រងហ្វ័រតេ បានប្រាប់ឡារ៉ែនពាណិជ្ជថា ការអនុវត្តស្តង់ដាគណនេយ្យ IFRS 17(International Financial Report section)version17 ក្នុងវិស័យធានារ៉ាប់រងនៅកម្ពុជា ជាកម្មវិធីថ្មីមួយសម្រាប់កម្ពុជា ព្រោះជាស្តង់ដាបាយការណ៍ហិរញ្ញវត្ថុខ្នាតអន្តរជាតិដែលទើបកែសម្រួល។

លោកអគ្គនាយកបានបន្តថា កាលណាក្រុមហ៊ុនធានារ៉ាប់រង និងធនាគារដែលបានទទួលស្គាល់ឬអនុវត្តស្តង់ដាគណនេយ្យ IFRS 17 ក្រុមហ៊ុនធានារ៉ាប់រងនោះនឹងមានលក្ខណៈស្តង់ដាអន្តរជាតិផ្នែកហិរញ្ញវត្ថុទាំងអស់ ដូចនេះមិនអាចក្លែងបន្លំ ឬបំភ័ន្តចំណុចណាមួយនៃហិរញ្ញវត្ថុក្រុមហ៊ុនបានឡើយ។ ឧទាហរណ៍ ដូចជាក្រុមហ៊ុនអសោធនភាព បានន័យថា ក្រុមហ៊ុនខ្វះធន គឺវាចេញបង្ហាញនៅក្នុងរបាយការណ៍នោះតែម្តង។

លោក ចំរើនឫទ្ធិ បានពន្យល់ថា៖“ការអនុវត្តស្តង់ដាបាយការណ៍គណនេយ្យអន្តរជាតិ IFRS 17 ក្នុងវិស័យធានារ៉ាប់រងវាផ្តល់ផលប្រយោជន៍ ព្រោះវាជាស្តង់ដានៃរង្វាស់រង្វាល់ខាងផ្នែកហិរញ្ញវត្ថុក្រុមហ៊ុនធានារា់ប់រងថា តើក្រុមហ៊ុននោះមានតាមស្តង់ដាអន្តរជាតិដែរឬអត់? ព្រោះសព្វថ្ងៃអ្វីដែលយើងនៅប្រើនៅឡើយ គឺស្តង់ដាគណនេយ្យកម្ពុជាដែលកម្មវិធីនេះមិនទាន់លម្អិតពីបញ្ហាអស់ទេ។ សព្វថ្ងៃប្រទេសជាច្រើនដែលប្រកាន់យករបបសេដ្ឋកិច្ចទីផ្សារបានប្រើប្រាស់គណនេយ្យ IFRS 17 នេះហើយ”។

លោកបានបញ្ជាក់ថា យើងបានរៀបចំប្រើប្រាស់ក្នុងឆ្នាំនេះ តែវាអាចនឹងមានផលប៉ះពាល់ដល់ក្រុម-ហ៊ុនមួយចំនួនដែលពុំទាន់បានត្រៀមខ្លួន ដូច្នេះដើម្បីឱ្យក្រុមហ៊ុនធានារ៉ាប់រងទាំងអស់ដែលនៅប្រើស្តង់ដាគណនេយ្យកម្ពុជាកែសម្រួលមកប្រើស្តង់ដាថ្មី គួរតែងាកមកប្រើគណនេយ្យ IFRS 17នេះ តែវាក៏អាចប៉ះពាល់ដល់របាយការណ៍ហិរញ្ញវត្ថុរបស់គាត់ដែរ។

លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានមានប្រសាសន៍ថា ផលប៉ះពាល់នៃការអនុវត្តស្តង់ដាគណនេយ្យ IFRS 17 ក្នុងវិស័យធានារ៉ាប់រងនៅកម្ពុជា ត្រូវបានចាត់ទុកថាជាបញ្ហាចម្បងដែលបានលើកឡើងនៅក្នុងសិក្ខាសាលាស្ដីពី ការអនុវត្តស្តង់ដាគណនេយ្យ IFRS 17 ក្នុងគោលបំណងដើម្បីចែករំលែកព័ត៌មាន ចំណេះដឹង និងបញ្ហាប្រឈមនៃការអនុវត្តស្តង់ដាថ្មីនេះ ព្រមទាំងផលប៉ះពាល់ដែលអាចកើតមានឡើងសម្រាប់ជាមូលដ្ឋានជួយដល់ក្រុមហ៊ុនធានារ៉ាប់រងទាំងអស់ឱ្យត្រៀមរៀបចំខ្លួនអនុវត្តឱ្យបានរលូន។

លោកប្រធានសមាគមបានបញ្ជាក់បន្ថែមថាវិស័យធានារ៉ាប់រងនៅកម្ពុជាមានការរីកចម្រើនយ៉ាងខ្លាំង និងជាវិស័យដែលកំពុងទទួលបាននូវទំនុកចិត្តកាន់តែខ្លាំងពីសាធារណជនលើការ-ធានារ៉ាប់រងអាយុជីវិត និងទ្រព្យសម្បត្តិ ជាពិសេសទំនុកចិត្តចំពោះក្រុមហ៊ុនធានារ៉ាប់រងនីមួយៗក្នុងការផ្តល់សេវា និងអត្ថប្រយោជន៍ធានារ៉ាប់រង ជូនអតិថិជនប្រកបដោយតម្លាភាព និងគណនេយ្យភាព។

លោកក៏បានលើកឡើងដែរថា ភាពជឿនលឿនគួរឱ្យកត់សម្គាល់នៃទីផ្សារធានារ៉ាប់រងកម្ពុជា ក្នុងរយៈពេល 3ឆ្នាំចុងក្រោយនេះ(2014-2017) ក្នុងនោះចំនួនក្រុមហ៊ុនធានារ៉ាប់រងមានការកើនឡើងជាង 2ដង គឺកើនពី 12ក្រុមហ៊ុននៅឆ្នាំ2014 ទៅ26ក្រុមហ៊ុននៅឆ្នាំ2017។ បុព្វលាភសរុបនៃទីផ្សារធានារ៉ាប់រងក៏បានកើនឡើងជាទ្វេដងផងដែរ ពោលគឺក្នុងរយៈពេលនេះបានកើនពី 61លានដុល្លារនៅឆ្នាំ2014 ដល់ប្រមាណ 152,5លានដុល្លារនៅឆ្នាំ2017៕

February 5, 2019

Category: សង្គម និងសេដ្ឋកិច្ច