សង្គម និងសេដ្ឋកិច្ច - La Reine Media

យាយគ្រវីសក់ ចូលរោងការក្នុងវ័យ 60ឆ្នាំ

តាមយរៈសារព័ត៌មាន Tvpool នៅថ្ងៃទី 11 ខែកុម្ភៈ ឆ្នាំ 2018 នេះ បានចេញផ្សាយថា បន្ទាប់ពីមានទាក់ទងជាមួយគូស្នេហ៍អស់រយៈពេល 10ឆ្នាំមកហើយ ខណៈនេះយាយគ្រវីសក់ ឬមានឈ្មោះពិត ស៊ិតាង បួថង បានសម្រេចចិត្តចូលរោងការហើយ។

នេះជាបំណងប្រាថ្នាធំរបស់ យាយគ្រវីសក់ ដែលបានរៀបការជាមួយគូស្នេហ៍ក្នុងឆាកជីវិត ហើយបណ្ដាលឱ្យមហាជនទាំងក្នុងប្រទេសថៃ និងប្រទេសជិតខាងមានការភ្ញាក់ផ្អើលខ្លាំងមែនទែន។ កម្មវិធីរៀបអាពាហ៍ពិពាហ៍ របស់យាយ គ្រវីសក់ បានរៀបចំឡើងយ៉ាងអធិកអធម និងមានការចូលរួមយ៉ាងច្រើនពីមហាជនទូទៅ ដែលជាការបង្កឱ្យពិធីនេះ កាន់តែមានភាពសប្បាយរីករាយ និងសាទរមែនទែន។

គួរឱ្យដឹងផងដែរថា ពិធីមង្គលការមួយនេះ បានរៀបចំឡើងចំពោះគូស្នេហ៍ ចំនួន 4គូ ដែលក្នុងនោះ យាយគ្រវីសក់ ក៏ជាគូមួយដែលត្រូវបានគេកត់សម្គាល់ជាងគេ និងទទួលបានការជូនពរពីអ្នកគាំទ្រយ៉ាងច្រើន ចំពោះគូស្នេហ៍វ័យចំណាស់មួយនេះផងដែរ។

February 11, 2019

អាការជំងឺលោកពូ សានម៉ៅ ធ្ងន់ធ្ងរហើយនិយាយមិនសូវបានទេ

ដូចដែរបងប្អូនប្រិយមិត្តធ្លាប់បានទទួលជ្រាបរួចមកហើយយអំពីស្ថានភាពជំងឺរបស់តារាកំប្លែងជើងចាស់លោកពូ សានម៉ៅ ដែលលោកបានជួបប្រទះនូវជំងឺច្រើនមុខណាស់ មានដូចជា លើសឈាម ទឹកនោមផ្អែម ជាពិសេសជំងឺសួត ដ៏ធ្ងន់ធ្ងរមួយ ដែលតម្រូវឱ្យដាក់អុកហ្ស៊ីហ្ស៊ែនជាប្រចាំ កាលពីកន្លងទៅនោះ ។

នៅពេលថ្មីៗនេះ នាង កា ឆយ បានទៅសួរសុខទុក្ខលោកពូ សានម៉ៅ និងបានប្រាប់ឱ្យដឹងអំពីស្ថានភាពរបស់តារាកំប្លែងរូបនេះ។ ខណៈអ្នកនាងបានមកធ្វើការសួរសុខទុក្ខដល់នៅមន្ទីរពេទ្យមួយកន្លែង អ្នកនាង បានថតវីដេអូ និងរៀបរាប់ឱ្យដឹងថា « ថ្ងៃនេះបានមកសួរសុខទុកបងសានម៉ៅនៅពេទ្យជោរី ជំងឺគាត់មិនទាន់ធូទេ សូមឱ្យវត្តុសមានរិទ្ធបារមី សូមឱ្យបងឆាប់ជា ខ្ញុំអាណិតគាត់ខ្លាំងណាស់ »។ សូមរំឭកដែរថា ចំពោះប្រភេទជំងឺរបស់នាយ សាន ម៉ៅ ត្រូវបានក្រុមគ្រួសារមានក្តីព្រួយបារម្ភជាខ្លាំង និងដោយខ្វះលទ្ធភាពក្នុងការព្យាបាលទៀតនោះ ទើបក្រុមគ្រួសារបានយករថយន្ត និងប្លង់ផ្ទះទៅដាក់បញ្ចាំ ដើម្បីយកលុយបន្តសម្រាកព្យាបាល ។

តាមរយៈវីដេអូនោះដែរ គេឃើញថា លោកពូ សានម៉ៅ ហាក់បីដូចជានិយាយមិនបានច្រើនទេ និងបានបន្ដោងខ្យល់អ៊ុកស៊ីសែនជាប់ជានិច្ច។ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ ៖

February 11, 2019

ក្រសួងវប្បធម៌៖ យុវជនខ្មែរគួរស្វែងយល់ពីខ្លួនឯងឱ្យច្បាស់ កុំឱ្យថ្ងៃទី14 កុម្ភៈ ប៉ះពាល់ដល់អត្ថិភាពជាប្រជាជាតិថ្លៃថ្នូរ

ក្រសួងវប្បធម៌ និងវិចិត្រសិល្បៈ បានចេញសេចក្តីអំពាវនាវថ្មីមួយនៅថ្ងៃទី11 ខែកុម្ភៈនេះ ដើម្បីទប់ស្កាត់ផលប៉ះពាល់អវិជ្ជមានចំពោះវប្បធម៌ប្រពៃណីជាតិ ដែលកើតឡើងដោយការយល់ខុសរបស់ប្រជាជន ជាពិសេសយុវវ័យ។
នៅក្នុងសេចក្តីអំពាវនាវនេះ ក្រសួងបានបញ្ជាក់ថា ថ្ងៃទី14 កុម្ភៈ ដែលមនុស្សមួយចំនួន ជាពិសេសគ្រិស្តសាសនិកជនបានកំណត់ថា ជាទិវានៃក្តីស្រឡាញ់ ជិតឈានចូលមកដល់ហើយ។ បច្ចុប្បន្ន ទិវានេះបាន និងកំពុងជ្រៀតចូលមកក្នុងសង្គមកម្ពុជា ជាពិសេសស្រទាប់យុវជន បណ្តាលឱ្យមនុស្សមួយចំនួនបានទទួលយក និងប្រើប្រាស់ដោយភាពភ័ន្តច្រឡំ នាំឱ្យមានផលប៉ះពាល់ដល់វប្បធម៌ទំនៀមទម្លាប់ប្រពៃណីជាតិទៀតផង។

ក្នុងបរិការណ៍នេះ ប្រជាជនជាពិសេសយុវជនកម្ពុជា ត្រូវសិក្សាស្វែងយល់ឱ្យស៊ីជម្រៅចំពោះវប្បធម៌ ប្រពៃណី ដែលជាមរតកដ៏ថ្លៃថ្លារបស់ដូនតាយើង ព្រមទាំងត្រូវសិក្សាស្វែងយល់ឱ្យគ្រប់ជ្រុងជ្រោយពីខ្លឹមសារ និងឥទ្ធិពលនៃវប្បធម៌ ទំនៀមទម្លាប់ពីខាងក្រៅ ដើម្បីបន្ស៊ីចូលទៅក្នុងឥរិយាបថ និងបរិបទនៃសង្គមរបស់ខ្លួន ក្នុងគោលដៅរក្សាឱ្យបាននូវអត្ថិភាពជាប្រជាជាតិថ្លៃថ្នូរមួយដែលមានវ័យចំណាស់រាប់ពាន់ឆ្នាំមកហើយនៅទ្វីបអាស៊ីនេះ។

ទិវានៃក្តីស្រឡាញ់នៅកម្ពុជា គួរតែជាឱកាសក្នុងការចែកចាយ និងធានាក្តីស្រឡាញ់ប្រកបដោយភាពទូលំទូលាយ និងសន្តានចិត្តស្មោះស ចំពោះមនុស្សដែលនៅជុំវិញខ្លួនមានជាអាទិ៍៖ ក្រុមគ្រួសារ ឪពុកម្តាយ ប្តីប្រពន្ធ កូនចៅ និងចំពោះអ្នកនៅក្នុងសង្គមជាមួយគ្នាដូចជា ជនពិការ កុមារកំព្រា និងអ្នកដែលខ្សត់ខ្សោយជាងខ្លួន ជាដើម ក្រោមរូបភាព ការជួបជុំពិភាក្សាគ្នា ឬទទួលទានអាហាររូមគ្នាដោយក្តីសោមនស្សរីករាយ ការសរសេរលិខិតជូនពរ ការជូនអំណោយផ្សេងៗ ដើម្បីបញ្ជាក់ពីភាពកត្តញ្ញូតាធម៌ ពីក្តីស្រឡាញ់ និងការយកចិត្តទុកដាក់របស់ខ្លួនចំពោះអ្នកមានគុណបុព្វការីជនចំពោះមនុស្សដែលខ្លួនស្រឡាញ់ និងចំពោះសង្គមជាតិ។

ក្នុងឱកាសនេះ ក្រសួងវប្បធម៌ និងវិចិត្រសិល្បៈ សូមអំពាវនាវដល់មាតា បិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេសយុវជន សូមចូលរួមផ្សព្វផ្សាយ អប់រំ ពន្យល់ណែនាំ ក្រើនរំឭកដល់បងប្អូន កូន ចៅ ក្នុងគោលដៅប្រើប្រាស់ទិវានេះ ឱ្យស្របតាមគន្លងប្រពៃណីដ៏ត្រកាលរបស់ខ្មែរដើម្បីកិត្តិយស និងសេចក្តីថ្លៃថ្នូររបស់ខ្លួន របស់ក្រុមគ្រួសារ ជាពិសេសដើម្បីរួមចំណែកលើកកម្ពស់កិត្យានុភាពនៃសង្គមជាតិ៕

February 11, 2019

គ្រូបង្វឹកក្រុម Chelsea ថា Man City ជាក្រុមខ្លាំងបំផុតនៅអឺរ៉ុប

លោក Maurizio Sarri អ្នកចាត់ការទូទៅរបស់ក្រុម Chelsea ជឿជាក់ថា Manchester City នៅតែជាក្រុមខ្លាំងបំផុតក្នុងទ្វីបអឺរ៉ុប នៅមុនពេលក្រុមរបស់លោកធ្វើដំណើរទៅប្រកួតក្របខ័ណ្ឌ Premier League នាកីឡដ្ឋាន Etihad នៅថ្ងៃអាទិត្យ សប្តាហ៍នេះ។

ក្រុម Chelsea របស់លោក Sarri គឺជាក្រុមដំបូងគេដែលបានផ្តួលក្រុម Man City ក្នុងការប្រកួតក្របខ័ណ្ឌលីក នៅរដូវកាលនេះ នៅពេលដែលពួកគេបានយកឈ្នះក្នុងលទ្ធផល 2-០ លើក្រុមម្ចាស់ជើងឯកមួយនេះ នាកីឡដ្ឋាន Stamford Bridge កាលពីខែធ្នូ។
Man City បានរងបរាជ័យ 2លើកបន្ថែមទៀតក្នុងអំឡុងថ្ងៃបុណ្យណូអែល ប៉ុន្តែពេលនេះ ពួកគេបានវិលទៅឈរលើកំពូលតារាងវិញ ពីលើក្រុម Liverpool តាមរយៈការមានគ្រាប់បាល់ស៊ុតបញ្ចូលទីច្រើនជាង។

លោក Sarri បានប្រាប់អ្នកយកព័ត៌មាន កាលពីថ្ងៃសុក្រថា៖ «នៅពេលនេះ បើតាមមតិរបស់ខ្ញុំ Manchester City គឺជាក្រុមខ្លាំងបំផុតក្នុងទ្វីបអឺរ៉ុប។ លោក (Pep) Guardiola កំពុងតែស្ថិតក្នុងរដូវកាលទី3 ក្នុងក្របខ័ណ្ឌ Premier League។ យើងត្រូវតែព្យាយាមកាត់បន្ថយគម្លាតតាមពីក្រោយ»។

លោក Guardiola គ្រូបង្វឹករបស់ក្រុម Man City បានចាត់ទុកក្រុមឈរលេខ4 Chelsea ស្ថិតក្នុងចំណោមបេក្ខភាពប្រជែងពាននៅសប្តាហ៍នេះ ប៉ុន្តែ លោក Sarri បានច្រានចោលឱកាសរបស់ក្រុមខ្លួន តាមរយៈការចាត់ទុកថា វាជាការប្រជែងរវាងតែក្រុម2ប៉ុណ្ណោះ។
លោក Sarri បានឱ្យដឹងថា៖ «នៅពេលនេះ ខ្ញុំគិតថា យើងមិនអាចឈ្នះពានបានឡើយ។ យើងអាចត្រឹមតែប្រជែងយកចំណាត់ថ្នាក់កំពូលទាំង4 នៅរដូវកាលនេះប៉ុណ្ណោះ។ ខ្ញុំគិតថា វាគ្មានអ្វីលើសហ្នឹងឡើយ»៕

February 11, 2019

គម្រោង GOLD TOWER 42 នឹងបញ្ចប់សំណង់អគារទាំងស្រុងនៅដើមឆ្នាំ2020

គ្រោងអគារ Gold Tower 42ជាន់បានបញ្ចប់ការសាងសង់ហើយកាលពីចុងខែមករា) បន្ទាប់ពីសំណង់អគារមួយនេះត្រូវបានពន្យារពេលសាងសង់បន្តអស់ជាច្រើនឆ្នាំកន្លងមក។

ក្រុមហ៊ុន Yon Woo Cambodia ដែលជាក្រុមហ៊ុនកាន់កាប់អគារ Gold Tower 42ជាន់នេះ បានចុះកិច្ចព្រមព្រៀងកាលពីខែវិច្ឆិកា ឆ្នាំ2017 កន្លងទៅជាមួយក្រុមហ៊ុន Shenzhen Hongtao Co.,Ltd និងក្រុមហ៊ុនវិស្វកម្មសំណង់ Hongtao Weimin ក្នុងការទទួលខុសត្រូវបញ្ចប់គម្រោងនេះ។

សំណង់អគារ 42ជាន់ ស្ថិតនៅចំបេះដូងនៃរាជធានីភ្នំពេញត្រង់ចំណុចប្រសព្វរវាងមហាវិថីព្រះមុនីវង្ស និងមហាវិថីព្រះសីហនុ។ គម្រោងនេះបានចាប់ផ្តើមនៅឆ្នាំ2008 ហើយបានពន្យារពេល 3ដងមកហើយ ពោលគឺ ម្តងនៅក្នុងឆ្នាំ2009 ដោយសារតែវិបត្តិហិរញ្ញវត្ថុសកល និងម្តងទៀតនៅឆ្នាំ2012។ បន្ទាប់មកសំណង់នេះបានសាងសង់ឡើងវិញនៅឆ្នាំ2013 ក្រោយមកបានបញ្ឈប់ទៅវិញម្តងទៀតនៅឆ្នាំ2017។

ក្រុមហ៊ុន Yon Woo Cambodia ធ្លាប់បានប្រកាសកាលពីឆ្នាំ2018 ថា សំណង់អគារ 42ជាន់នេះបានចំណាយទុនវិនិយោគអស់ប្រមាណជា100លានដុល្លារអាមេរិករួចមកហើយ ហើយទឹកប្រាក់ជាង 140លានដុល្លារអាមេរិកទៀតនឹងត្រូវវិនិយោគបន្ថែមដើម្បីបញ្ចប់គម្រោងទាំងមូល។

ដោយឡែកនៅថ្ងៃទី28 ខែមករាកន្លងមកថ្មីៗនេះ គម្រោងសាងសង់ Gold Tower 42ជាន់នៅប្រទេសកម្ពុជាដែលបានចុះហត្ថលេខាដោយក្រុមហ៊ុនវិស្វកម្មសំណង់ Hongtao Weimin (ខេមបូឌា)បានធ្វើការបញ្ចប់គ្រោងអគារនេះជាផ្លូវការហើយ។

លោក Liu Nianxin ប្រធានក្រុមហ៊ុនវិស្វកម្មសំណង់ Hongtao Weimin (ខេមបូឌា) Co., Ltd បានថ្លែងថា គម្រោងអគារដ៏ខ្ពស់នៅរាជធានីភ្នំពេញមួយនេះត្រូវបានចុះកិច្ចសន្យាដោយក្រុមហ៊ុន Hongtao Weimin ដែលមានការខិតខំប្រឹងប្រែងរួមគ្នាជាមួយដៃគូសហការទាំងអស់នោះ គឺជាសមិទ្ធផលដ៏សំខាន់នៃភាគហ៊ុនទាំងអស់របស់ក្រុមហ៊ុន Hongtao និងស្ថាបត្យកម្មរបស់ម៉ាកាវ Weimin ដែលទទួលបានភាពជោគជ័យនៅក្នុងទីផ្សារតុបតែងស្ថាបត្យកម្មខ្ពស់បំផុតនៅអាស៊ីអាគ្នេយ៍។

លោក Liu បានលើកឡើងថា៖“វាមានសារៈសំខាន់ណាស់ ដែលក្នុងនាមជាអ្នកម៉ៅការទូទៅ យើងមានកិត្តិយសយ៉ាងខ្ពង់ខ្ពស់ក្នុងការចូលរួមសាងសង់ និងអភិវឌ្ឍទីក្រុងរបស់ប្រទេសកម្ពុជាឱ្យមានភាពរឹងមាំ និងទំនុកចិត្តគ្រប់គ្រាន់ក្នុងការកសាងបញ្ចប់គម្រោងប្រកបដោយគុណភាពនៅអាស៊ីអាគ្នេយ៍ និងនៅជុំវិញពិភពលោក ដើម្បីរួមចំណែកដល់កិច្ចសហប្រតិបត្តិការពាណិជ្ជកម្ម និងការផ្លាស់ប្តូររវាងទំនាក់ទំនងចិន និងកម្ពុជាផងដែរ។

លោក Liu ថ្លែងថា ឆ្នាំ2019 ទើបចូលមកដល់ ហើយអគាររបស់យើងបានបញ្ចប់ការសាងសង់ គឺជារឿងល្អមួយដែលបង្ហាញពីចំណងមិត្តភាពចិន កូរ៉េ និងកម្ពុជា។ លោកបានបញ្ជាក់ថា៖“យើងបានដំណើរការសាងសង់នៅខែមីនា ឆ្នាំ2018 ហើយត្រឹមតែរយៈពេល 10ខែប៉ុណ្ណោះ យើងបានបញ្ចប់គ្រោងអគារទាំងមូល ហើយនៅពេលនេះជញ្ជាំងរបស់អគារត្រូវបានសាងសង់បានពាក់កណ្តាលហើយ វាមានល្បឿនលឿនក្នុងការសាងសង់ និងថែមទាំងបង្ហាញពីសមត្ថភាពនៃការសាងសង់ផងដែរ”។

លោក Liu បានបន្តថា៖“យើងកំពុងតែធ្វើការតុបតែងផ្ទៃខាងក្នុងអគារ ការតុបតែងរបស់យើងនឹងស្របតាមស្តង់ដារ យើងខ្ញុំនឹងបញ្ចប់ជញ្ជាំងខាងក្រោយនៅខែមិថុនា ហើយក្នុងឆ្នាំ2019 យើងនឹងបញ្ចប់សំណង់អគារទាំងមូល រួចប្រគល់ជូនអតិថិជន”។

ឯកឧត្តម លាង មុនីរិទ្ធ រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់បានថ្លែងក្នុងពិធីបញ្ចប់គម្រោងសាងសង់នេះថា បើទោះបីជាគ្រោងអគារ Gold Tower 42 នេះបានផ្អាកការសាងសង់នៅចុងឆ្នាំ2010 រហូតដល់ឆ្នាំ2018ក្ដី ក៏ក្នុងរយៈពេលផ្អាកនេះ ក្រសួងបានចុះមកពិនិត្យការដ្ឋានទូទៅ ក្នុង 1ឆ្នាំពី 2ទៅ3ដងដែរ លើសុវត្ថិភាព និងណែនាំឱ្យបន្តការសាងសង់។

ឯកឧត្តមបន្តថា ក្រសួងក៏តែងតែជួយសម្របសម្រួលជាមួយថ្នាក់ដឹកនាំនៃក្រសួងផ្សេងៗ និងរដ្ឋាភិបាលដើម្បីជួយរកដៃគូមកអភិវឌ្ឍ។ នៅពេលនោះ ក្រុមហ៊ុន Yon Woo Cambodia បានចាប់ដៃគូជាមួយចិនក្នុងការបន្តសាងសង់ គឺមកទល់ពេលនេះបានបញ្ចប់គ្រោងអគារទាំងស្រុងហើយ។

ឯកឧត្តម មុន្នីរិទ្ធ បញ្ជាក់ថា៖“ខ្ញុំជឿជាក់ថា គម្រោងនេះនឹងទទួលបានជោគជ័យ និងផ្តល់មុខមាត់ដល់ប្រទេសកម្ពុជា ក៏ដូចជាជនរួមជាតិប្រជាពលរដ្ឋកម្ពុជាដែរ”។

ឯកឧត្តម បានបញ្ជាក់ទៀតថា ជារៀងរាល់ឆ្នាំ យើងតែងតែមានគម្រោងធំៗជាច្រើន ជាក់ស្តែងនៅដើមឆ្នាំ2019 យើងមានគម្រោងមួយចំនួនដែលមានកម្ពស់ខ្ពស់ៗ ជាពិសេសនៅរាជធានីភ្នំពេញ និងក្រុងព្រះសីហនុ និងគម្រោងមួយទៀតដែលមានកម្ពស់ជាង 44ជាន់នៅក្នុងតំបន់ជ្រោយចង្វារដោយក្រុមហ៊ុនពហុមុខងាររបស់ប្រទេសចិន។
ឯកឧត្តម មុន្នីរិទ្ធ បន្តថា៖“ការងារបញ្ចប់គ្រោង
អគារមួយនេះក្រសួងតែងតែជំរុញឱ្យក្រុមហ៊ុនសាងសង់ធ្វើតាមស្តង់ដារបច្ចេកទេស និងជំរុញឱ្យបញ្ចប់តាមការប្រកាសឱ្យកាន់តែឆាប់ ព្រោះនៅពេលអគារនេះបញ្ចប់ វានឹងជួយដល់សេដ្ឋកិច្ច ហើយខ្ញុំអាចបញ្ជាក់បានថា ដោយសារការសហការនេះ គម្រោងនេះ នឹងទទួលបានជោគជ័យ ហើយអ្វីដែលក្រុមហ៊ុនកំពុងធ្វើនៅពេលនេះ គឺបញ្ចប់ការតុបតែងខាងក្នុង”។

សូមរំឭកថា គម្រោងអគារ Gold Tower ស្ថិតនៅចំកណ្ដាលតំបន់ដ៏មមាញឹកនៃរាជធានីភ្នំពេញ គឺជាគម្រោងដ៏មានឥទ្ធិពលបំផុតសម្រាប់សហគ្រាសនៅក្រុង Shenzhen និងម៉ាកាវដើម្បីចូលរួមក្នុងការសាងសង់ និងអភិវឌ្ឍរាជធានីរបស់ប្រទេសកម្ពុជា។

បន្ទាប់ពីបញ្ចប់គម្រោងអគារដែលមានកម្ពស់ខ្ពស់ជាង 200ម៉ែត្រ និងមានចំនួន 42ជាន់នេះហើយ អគារនេះ គឺជាអគារដ៏ខ្ពស់មួយដែលរួមបញ្ចូលទាំងមជ្ឈមណ្ឌលពាណិជ្ជកម្ម ការិយាល័យ និងលំនៅឋាននៅក្នុងទីតាំងតែមួយ ហើយអគារនេះមានក្រឡាផ្ទៃសរុបទំហំ 129,300ម៉ែត្រការ៉េ។ បន្ទាប់ពីបានបញ្ចប់គ្រោងអគារហើយ គម្រោងនេះនឹងត្រូវបានកំណត់ នឹងពន្លឿនការវិនិយោគយ៉ាងទូលំទូលាយបន្ថែមទៀតក្នុងការសាងសង់ជញ្ជាំងកញ្ចក់ បំពាក់គ្រឿងបរិក្ខារអគ្គិសនី និងស្ថាបត្យកម្មតុបតែងផ្នែកខាងក្នុង ដោយនឹងត្រូវបញ្ចប់ការសាងសង់គម្រោងនេះជាស្ថាពរនៅដើមឆ្នាំ2020៕

February 11, 2019

អីយ៉ា..!! កុល ដាវី និង សុខ រក្សា មានដំណឹងល្អហើយ

អស់រយៈពេលជាង 5 ឆ្នាំមកហើយដែលតារាស្រីចាយរាងសិចស៊ីអ្នកនាង កុល ដាវី និងលោក សុខ រក្សា បានរស់នៅជាមួយគ្នាដូចប្តីប្រពន្ធស្របច្បាប់ទៅហើយ ដោយសារតែគេសង្កេតឃើញអ្នកទាំងពីរទៅដល់ទីណាឃើញមានវត្តមានទាំងគូព្រមគ្នាតែម្តង ខណៈដំណឹងភ្ជាប់ពាក្យ និងដំណឹងដឹកដៃគ្នាចូលរោងការស្ថិតក្នុងភាពស្ងាត់ជ្រងំ ក៏ប៉ុន្ដែ ទាំងអ្នកសិល្បៈ និងមហាជនអ្នកគាំទ្រ សុទ្ធតែបានដឹងអំពីទំនាក់ទំនងរបស់ពួកគេ។

នៅពេលថ្មីៗនេះ ស្រាប់តែភ្ញាក់ផ្អើលខ្លាំងបំផុត ដោយគេបានមើលឃើញមិត្តរួមការងាររបស់តារាស្រីរូបនេះអបអរសាទរនិងសប្បាយរីករាយក្រោយឃើញធៀបការរបស់នាងតែម្ដង។ បើតាមគណនីហ្វេសប៊ុកអ្នកនាង កុល ដាវី ក៏បានឃើញបង្ហោះប្រាប់ពីដំណឹងល្អនេះ ដែលគ្រោងរៀបការនៅថ្ងៃទី 08 ខែមីនា ឆ្នាំ 2019 ។ នេះក៏ជាដំណឹងដ៏ល្អសម្រាប់ហ្វេនៗរបស់នាង ក៏ដូចជាកាដូសម្រាប់ពួកគាត់ដែរ។

សូមជម្រាបបន្ថែមថា តារាសម្តែងស្រីឆ្នាស់ កុល ដាវី បានសាងស្នាដៃថ្មីៗ នឹងធ្វើឱ្យទស្សនិកជន ស្អប់ ក្នាញ់ ស្រលាញ់ផង នឹងអាណិតផង។ ស្នាដៃដែល កញ្ញា កុល ដាវី បានបង្ហាញដែលធ្វើឱ្យទស្សនិកជនចងចាំនឹងបំភ្លេចមិនបានកាលពីថ្មីៗនេះ គឺ រឿង ផ្កាថ្ម និងរឿង រវាងយើង។ បើទោះអាយុកាន់តែច្រើនតែសម្រស់ នឹងភាពប៉ិនប្រសព្វនៃការសម្តែងរបស់ កុល ដាវី មិនបានធ្វើឱ្យបងប្អូនអ្នកនិយមរឿងភាគអស់សង្ឃឹមម្តងណាឡើយ ពោលគេតែងនិយាយថា ខ្ញីចាស់កាន់តែហិល មិនតែថាការងារ ការរកស៊ី ស្នេហា គឺ កុល ដាវី មានភាពរលូនទៅមុខជានិច្ច៕

February 9, 2019

រិទ្ធ អូមេហ្កា លាតត្រដាងសាច់រឿងឃាតកម្មដ៏សាហាវក្នុងបទ “អ្នកណាឱ្យអូនទៅ”របស់ខេម

តារាចម្រៀង លោកខេម តារាចម្រៀងប្រចាំផលិតកម្មថោន ជាតារាចម្រៀងជួរមុខមួយរូប ដែលគួរឱ្យកត់សម្គាល់ថា គ្រប់បទចម្រៀងដែលលោកចេញផ្សាយ សុទ្ធតែទទួលបានការគាំទ្រ យ៉ាងខ្លាំង។ បទចម្រៀងដែលបានចេញផ្សាយ ក្នុងផលិតកម្មថោនរបស់លោក សុទ្ធតែត្រូវសាច់រឿងយុវវ័យ ដូចជាបទ ម៉ែមានតែមួយ, ទឹកភ្នែកក្មេងពាល, ជិតអ្នកក្រ និងបទចម្រៀងជាច្រើនបទទៀត។

កាលពីប៉ុន្មានថ្ងៃមុន តារាចម្រៀងសំឡេងស្អករូបនេះបានបង្ហោះវីដេអូមួយ នៃការថតបទចម្រៀង “អ្នកណាឱ្យអូនទៅ” ដោយក្នុងឈុតអាវពណ៌ស ប្រឡាក់ឈាមពណ៌ក្រហម អមជាមួយបទចម្រៀងដ៏ពីរោះ ចាក់ដោតអារម្មណ៍ខ្លាំងមែនទែន ហើយគ្រោងនឹងចេញផ្សាយក្នុងកំឡុងថ្ងៃទិវានៃក្ដីស្រលាញ់ ។ ការសម្ដែងបទចម្រៀងនេះ លោកខេម បានសម្ដែងយ៉ាងសម ដោយសារ បទចម្រៀងប្រភេទមនោសញ្ចេតនា ជាជំនាញរបស់លោកទៅហើយ។

មានការភ្ញាក់ផ្អើលមិនតិចទេ បន្ទាប់ពីឈុតឆាកខ្លីក្នុងបទរបស់ខេម ដែលត្រូវបានផលិតករ លោក រិទ្ធ អូមេហ្កា (Rith Omega) ជាអ្នកដឹកនាំសម្ដែងល្បីឈ្មោះរបស់ថោន បង្ហើបថា ជាសាច់រឿងពិតនៃករណីឃាតកម្មរំលោភសម្លាប់ញាត់ចូលក្នុងធុងទឹកកកដែលធ្លាប់ល្បីកក្រើកកាលពីមុន។ តារាចម្រៀង ខេម ម្ចាស់បទ”អ្នកណាអោយអូនទៅ” រំពឹងថា នឹងផ្ទុះយ៉ាងខ្លាំង ជាពិសេសក្នុងពេលឈុតខ្លីរបស់បទនេះ គ្រាន់តែចេញបង្ហោះភ្លាមគឺទទួលការចាប់អារម្មណ៍ញាក់សាច់។

លោក ខេម បានប្រាប់ក្រោយបង្ហោះ Trailer បទ”អ្នកណាឱ្យអូនទៅ” យ៉ាងទាក់ភ្នែកនោះថា លោកពិតជាមានអារម្មណ៍សប្បាយចិត្ត យ៉ាងខ្លាំង ដែលបទចម្រៀងរបស់លោក ត្រូវបានលោក Rith Omega កែច្នៃសាច់រឿងឃាតកម្មករណីរំលោភសម្លាប់ហើយញាត់ដាក់ចូលធុងទឹកកក ធ្វើជាសាច់រឿងក្នុងបទរបស់ខ្លួន គឺបទ”អ្នកណាឱ្យអូនទៅ”។ ការផលិតសាច់រឿងឃាតកម្មនេះ លោកថា មិនមែនចង់បង្ហាញករណីឃាតកម្មសាហាវ ដើម្បីបំផុសរឿងរ៉ាវអវិជ្ជមានក្នុងសង្គមនោះទេ តែចង់អបរំឱ្យមនុស្សយល់ដឹងពីល្បិចដ៏សាហាវរបស់មនុស្សអគតិហើយ ចេះការពារខ្លួនពីល្បិចអស់ទាំងនោះច្រើនជាង។

ក្នុងនោះលោកថា ក្នុងសាច់រឿងនៃបទចម្រៀង”អ្នកណាឱ្យអូនទៅ” ក៏មិនសូវបង្ហាញពីសកម្មភាពឃាតកម្មនោះ តែបានបង្ហាញពីល្បិច និងពីភាពអន្តរាយរបស់ជនបង្ក ដែលបានធ្វើរឿងអគតិមួយនោះច្រើនជាង។ លោកថាសាច់មួយនេះ នឹងរំពឹងថាទទួលបានការគាំទ្រខ្លាំង ដោយសារតែនោះគឺជាបទចម្រៀងរបស់លោកខេម ដែលមានអ្នកគាំទ្រច្រើនមកហើយតាំងពីបទ”អ្នកណាឱ្យអូនទៅ” មិនទាន់គម្រោងផលិតMV ។

សូមជម្រាបបញ្ជាក់ថា សាច់រឿងនេះមានការសម្ដែងដោយផ្ទាល់ពីតារាចម្រៀង ខេម នេះគឺជារសជាតិថ្មី ដែលនឹងធ្វើអ្នកទស្សនាប្លែកភ្នែក។ ឈុតឆាកនេះ នឹងក្លាយជាចំណងដៃមួយក្នុង14 កុម្ភៈ ដែលជាថ្ងៃនៃក្ដីស្រលាញ់ ដែលបញ្ជាក់ថាបទនេះនឹងចងដៃទិវារនៃក្ដីស្រលាញ់ ដើម្បីójyមនុស្សទាំងឡាយមានតែក្ដីស្រលាញ់ចំពោះគ្នា ហើយមិនគិតអាក្រក់ចំពោះគ្នា។ លោកមិនទាន់ច្បាស់ថា MV បទ”អ្នកណាឱ្យអូនទៅ” នឹងត្រូវបង្ហោះផ្លូវការម៉ោងណានោះទេ ប៉ុន្តែធ្វើទាន់មុនថ្ងៃ14 កុម្ភៈ ដើម្បីទុកជាកាដូរជូនហ្វេនៗ៕

February 9, 2019

តារាសិល្បៈនិងផលិតករជួបជុំកម្មវិធីជប់លៀងប្រចាំឆ្នាំស្ថានីយ៍ទូរទស្សប៉ុស្តិ៍៥

នៅរាត្រីថ្ងៃទី 08 ខែកុម្ភៈ នេះស្ថានីយ៍ទូរទស្សន៍ប៉ុស្តិ៍លេខ៥ បានរៀបចំពិធីជប់លៀងយ៉ាងអធឹកអធមនៅភោជនីយដ្ឋានទន្លេបាសាក់2 ដោយក្នុងពិធីនោះ តារាសិល្បៈបានចូលរួមនៅក្នុងពិធីនោះរួមមានផលិតករស្ទើរគ្រប់ផលិតករ ដែលធ្លាប់ផលិតរឿងឱ្យប៉ុស្តិ៍លេខ៥ តារាសម្ដែងលោក សុធា ពិសិដ្ឋ លោក យន សុភ័ក្រ កញ្ញា ញឹម ចាន់ថន លោក សូ ឆានី កញ្ញា ព្រះកាយ ច័ន្ទ លោក អៀង ចេនឡា និងតារាៗដែលមានឈ្មោះបោះសំលេងយ៉ាងច្រើនកុះករ។ នៅក្នុងពិធីនោះ ក៏មានប្រកាសចាប់ឆ្នោតផ្ដល់រង្វាន់ធំជាច្រើន ដើម្បីលើកទឹកចិត្តដល់ភ្ញៀវកិត្តិយសដែលបានចូលរួមនោះផងដែរ។

លោក ហួង តារាមុន្នី ប្រធានផលិតកម្មវិធីប្រចាំនៅប៉ុស្តិ៍លេខ៥ បានថ្លែងបញ្ជាក់ថា នេះជាឆ្នាំទី4ហើយ ដែលប៉ុស្តិ៍លេខ៥រៀបចំពិធីជប់លៀងប្រចាំឆ្នាំ ដោយក្រៅពីចំណាយថវិកាជប់លៀង ដើម្បីឱ្យបុគ្គលិក និងក្រុមការងារជួបជុំសប្បាយចិត្ត ក៏បានចំណាយអញ្ជើញតារាសម្ដែងទាំងអស់ ដែលធ្លាប់សម្ដែងនៅប៉ុស្តិ៍លេខ៥ ក៏អញ្ជើញផលិតករគ្រប់ផ្នែកឱ្យចូលរួមផងដែរ។ ក្នុងពិធីនោះលោកថា ស្ថាប័នក៏បានចំណាយមិនតិចទិញជារង្វាន់ដូចជាទូរទឹកកកជាច្រើនគ្រឿង ទូរទស្សន៍42អ៊ីងចំនួន២គ្រឿង ទូរទស្សន៍32អ៊ីង និងរង្វាន់ធំៗជាច្រើនផ្សេងទៀត លើកទឹកចិត្តដល់ក្រុមការងារ និង តារាសិល្បៈដែលបានចូលរួម។

លោកថាពិធីនោះ នឹងប្រារព្ធធ្វើឡើងរៀងរាល់1ឆ្នាំ ដោយលោកចាត់ទុកថា ការជួបជុំមួយឆ្នាំម្ដងនេះ បើទោះជាត្រូវចំណាយច្រើន ក៏ដើម្បីឱ្យក្រុមការងារបានជួបគ្នាសប្បាយចិត្ត និងបង្កើនចំណងមិត្តភាព។ ក្នុងពិធីនោះ លោកថាអញ្ជើញតារា និងផលិតករច្រើននាក់ ដោយកុំបណ្ដាភ្ញៀវជាអ្នកសិល្បៈមួយចំនួនរវល់ថត គឺនឹងមានតារាច្រើនជាងនេះទៅទៀតចូលរួម៕

February 9, 2019

សេកខៀវក្នុងខ្សែភាពយន្តគំនូរជីវចលរឿង «Rio» ផុតពូជហើយ

បើតាមចេញផ្សាយរបស់គេហទំព័រ Healthy Food House នៅរសៀលថ្ងៃសុក្រ ទី8 ខែកុម្ភៈ ឆ្នាំ2019 បានឱ្យដឹងថា សត្វសេកពណ៌ខៀវដែលដូចនៅក្នុងខ្សែភាពយន្តគំនូរជីវចល 3D ចំណងជើងថា «Rio» ទីបំផុតបានផុតពូជជាផ្លូវការហើយនៅក្នុងព្រៃ។

ការសិក្សាថ្មីមួយដោយអង្គការអភិរក្សាសត្វបក្សីអន្តរជាតិ BirdLife International បានរកឃើញថា អម្បូរសត្វសេកខាងលើនេះ លែងត្រូវគេប្រទះភ្នែកឃើញនៅក្នុងព្រៃព្រឹក្សាទៀតហើយ ខណៈការផុតពូជនៃសត្វស្លាបនេះបានកើតមានឡើង ដោយសារតែកំណើននៃអត្រាបាត់បង់ព្រៃឈើនិងទីជម្រករបស់ពួកវា។ គួរជម្រាបថា អង្គការ BirdLife International បានប្រកាសពីការដាច់ពូជនៃអម្បូរសត្វបក្សី 7ប្រភេទទៀតផងដែរ ដោយ5ក្នុងចំណោមនោះ ស្ថិតនៅតំបន់អាមេរិកខាងត្បូង។

នៅក្នុងរឿង «Rio» ដែលចាក់បញ្ចាំងកាលពីឆ្នាំ2011 សត្វសេកខៀវមួយក្បាលឈ្មោះ Blu ដែលជាអម្បូរ Spix’s Macaw ឬ Blue Macaw នៅប្រេស៊ីល បានហោះពីរដ្ឋ Minnesota សហរដ្ឋអាមេរិក ទៅកាន់ទីក្រុងរីយ៉ូ (Rio de Janeiro) របស់ប្រទេសប្រេស៊ីល ក្នុងនាមជាសត្វសេកឈ្មោលចុងក្រោយនៃអម្បូររបស់ខ្លួន ដោយនៅទីនោះ Blu បានជួបជាមួយ Jewel ដែលជាអម្បូរ Spix’s Macwa ញីតែមួយគត់ចុងក្រោយគេ ហើយ Blu និង Jewel ក៏មានកូន និងសង្រ្គោះអម្បូរសេកពណ៌ខៀវនេះពីការផុតពូជ៕

February 8, 2019

នៅមិនសុខ.. យាយខ្លា ចេញចម្រៀងឌឺដងចំប៉ីខ្មៅ «ថាគុកៗមែន »

ដូចប្រិយមិត្តអ្នកអានបានជ្រាបដឹងមកហើយថា ករណីរបស់លោក ហេង យិន ហៅ ចំប៉ីខ្មៅ នៅលើបណ្ដាញសង្គមហ្វេសប៊ុក ត្រូវបានព្រះរាជអាជ្ញាអមសាលាដំបូងរាជធានីភ្នំពេញ បានសម្រេចចោទប្រកាន់ពីបទ «ញុះញង់ឲ្យមានការរើសអើង»តាមមាត្រា494 និងមាត្រា496 នៃក្រមព្រហ្មទណ្ឌ ហើយបញ្ជូនទៅចៅក្រមស៊ើបសួរ ដើម្បីចាត់ការបន្តតាមនីតិវិធី។ ចំពោះបទល្មើស «ញុះញង់ឲ្យមានការរើសអើង» អាចមានទោសជាប់ពន្ធនាគារ ពី1ឆ្នាំ ទៅ3ឆ្នាំ ។

អ្វីដែលភ្ញាក់ផ្អើលនៅពេលថ្មីៗគឺ លោកយាយខ្លា ដែលមហាជនគ្រប់រូបធ្លាប់ស្គាល់គាត់តាមរយៈបទចម្រៀង និងសម្ដែងកំប្លែងបង្ហោះនៅលើបណ្ដាញសង្គមហ្វេសប៊ុកនោះ ទន្ទឹមគ្នានេះស្រាប់តែ តាក់តែងនិពន្ធបទចម្រៀងឌឺដងដល់ចំប៉ីខ្មៅ ហលយច្រៀងបង្ហោះភ្លាមៗតែម្ដង។ បទថ្មីចុងក្រោយទើបបញ្ចេញមានចំណងជើងថា «ថាគុកៗមែន » យាយខ្លាបានសរសេរសាររៀបរាប់នៅលើចម្រៀងរបស់គាត់ថា«បទថ្មីក្តៅៗ ៖ ថាគុកៗមែន!ប្រទេសមានច្បាប់គ្រួសារមានវិន័យ ហេតុអីបានជាចៅឯងផ្គើនម្តងហើយម្តងទៀតបែបនេះ !!!យាយថាអីចេះខុស ឃើញទេសាងអីបានហ្នឹងមែន!!!ហ្នឹងហើយជាលទ្ធផលដែលចៅឯងមើលងាយខ្មែរ លើកក្រោយឱ្យរាងផងណាចៅ !!!និពន្ធបទភ្លេង៖ យាយខ្លា ច្រៀងដោយ៖ យាយខ្លា »។

គួរគត់សម្គាល់ណាស់ កាលកើតហេតុ ទេព បូព្រឹក្ស ត្រូវបានបុរសម្នាក់គប់កំប៉ុង និងជះស្រាបៀរលើរូបនាង អ្នកកំប្លែង យាយខ្លា នេះក៏បានចេញបទចម្រៀងរៀបរាប់ពីហេតុការណ៍នោះ ដែលមានចំណងជើងថា « សម្រួលឬមិនសម្រួល? បើមិនសម្រួលចេញ »។ តារានៅបណ្ដាញសង្គមហ្វេសប៊ុកមួយនេះ ហាក់បីដូចជាទាញប្រជាប្រិយភាពរបស់ខ្លួនតាមរយៈការច្រៀងចម្រៀងរៀរាប់ហេតុការណ៍កក្រើកៗនៅបណ្ដាញសង្គម ឱ្យមហាជនបានចាប់អារម្មណ៍៕

សូមទស្សនាវីដេអូខាងក្រោមនេះ ៖

February 8, 2019

Category: សង្គម និងសេដ្ឋកិច្ច