សង្គម និងសេដ្ឋកិច្ច - La Reine Media

ក្រុមបាល់ទាត់ជម្រើសជាតិ U-22 ថៃ ប្រកាសបញ្ជីឈ្មោះកីឡាករដែលនឹងប្រកួតក្នុងស៊ីហ្គេមនៅកម្ពុជា

នៅក្នុងបញ្ជីឈ្មោះស្ដីពីកីឡាករ 20 រូបរបស់ក្រុម U-22 ថៃ ដែលនឹងចូលរួមប្រកួតនៅស៊ីហ្គេមលើកទី 32 ក៏មានកីឡាករសំខាន់បីរួប រួមមាន Jonathan Khemdee, Teerasak Poeiphimai និង Airafan Doloh ។

សហព័ន្ធបាល់ទាត់ថៃ បានប្រកាសជាផ្លូវការនូវបញ្ជីឈ្មោះកីឡាករ 20 រូបដែលនឹងត្រូវចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 នៅកម្ពុជា។ នៅក្នុងបញ្ជីឈ្មោះនេះ ខ្សែការពារ Jonathan Khemdee, ខ្សែប្រយុទ្ធ Teerasak Poeiphimai និងខ្សែបម្រើ Airafan Doloh សុទ្ធតែមានវត្តមាន។

ក្រៅពីនេះ កីឡាករពីររូបដែលទាត់នៅអឺរ៉ុប គឺ Chayapipat និង Achitpol Keereerom ក៏មានឈ្មោះនៅក្នុងបញ្ជី U-22 ថៃផងដែរ។ គ្រូបង្វឹក Issataro របស់ថៃ នាំយកអ្នកចាំទីមកកាន់ស៊ីហ្គេមតែពីររូបប៉ុណ្ណោះ រួមមាន Thirawoot Sraunson និង Soponwit Rakyart ។

ខ្សែការពាររបស់ U-22 ថៃ នៅស៊ីហ្គេមលើកនេះមាន 7 នាក់ រួមមាន Khemdee, Apisit Saenseekammuan, Chatmongkol Rueangthanarot, Songchai Thongcham, Bukkoree Lemdee, Jakkapong Sanmahung និង Pongsakorn Trisat។ ខ្សែបម្រើរួមមាន Airfan Doloh, Chayapipat Supunpasuch, Purachet Thodsanit, Settasit Suvannaseat, Channarong Promsrikaew, Thirasak Prueangna, Anan Yodsangwal និង Leon James ។ ចំណែកខ្សែប្រយុទ្ធមានបីនាក់ គឺ Teerasak Poeiphimai, Yotsakorn Burapha និង Achitpol Keereerom ។

Teerasak Poeiphimai ក៏មានឈ្មោះក្នុងបញ្ជីផ្លូវការស្ដីពីកីឡាករដែលត្រូវចូលរួមប្រកួតនៅស៊ីហ្គេមកម្ពុជា

យោងតាមផែនការ ថ្ងៃទី 27 មេសានេះ ក្រុម U-22 ថៃ នឹងធ្វើដំណើរមកកម្ពុជា ដើម្បីត្រៀមខ្លួនចូលប្រកួតនៅស៊ីហ្គេម។ គោលដៅរបស់ពួកគេគឺមេដាយមាសកីឡាបាល់ទាត់ ដែលបច្ចុប្បន្នក្រុមវៀតណាមគឺជាអ្នកការពារ។

កាលវិភាគនៃការប្រកួតបង្ហាញថា U-22 ថៃ នឹងចាប់ផ្ដើមដំណើរការឆ្ពោះទៅរកមេដាយដោយការប៉ះនឹងក្រុម U-22 សិង្ហបុរី នៅថ្ងៃទី 30 មេសាខាងមុខ។ បន្ទាប់មក U-22 ថៃ នឹងត្រូវប្រកួតជាមួយ U-22 ម៉ាឡេស៊ីនៅថ្ងៃទី 06 ឧសភា និង ឡាវនៅថ្ងៃទី 08 ឧសភា។ ចំណែកការប្រកួតចុងក្រោយរបស់ថៃនៅវគ្គចែកពូល នឹងធ្វើឡើងនៅថ្ងៃទី 11 ឧសភា ដោយត្រូវប៉ះក្រុមវៀតណាម៕

April 27, 2023

វត្ថុធាតុចម្លងកម្រិតខ្ពស់ជួយរុញច្រានរថយន្តឱ្យបរក្នុងល្បឿនជាង 600 គីឡូម៉ែត្រ/ម៉ោង

ក្រុមអ្នកវិទ្យាសាស្ត្រនៅសាកលវិទ្យាល័យ Houston សហរដ្ឋអាម៉េរិក ស្នើឱ្យប្រើប្រាស់វត្ថុធាតុចម្លងកម្រិតខ្ពស់ដើម្បីរុញច្រានរថយន្តដឹកអ្នកដំណើរ និងទំនិញ ឱ្យរត់ក្នុងល្បឿនយ៉ាងលឿនតាមបណ្ដោយហេដ្ឋារចនាសម្ព័ន្ធដែលបំពាក់ក្នុងផ្លូវល្បឿនលឿននាបច្ចុប្បន្ន។

គំនិតដែលលើកឡើងដោយក្រុមអ្នកស្រាវជ្រាវខាងលើ មិនត្រឹមតែមានសក្ដានុពលក្នុងការកាត់បន្ថយការចំណាយលើដំណើរការរបស់ប្រព័ន្ធនីមួយៗនោះតែ តែថែមទាំងផ្លាស់ប្ដូរវិធីរក្សាទុក និងការដឹកជញ្ជូនអ៊ីដ្រូសែនរាវដែលត្រូវបានចាត់ទុកថាជាប្រភពថាមពលស្អាតសំខាន់មួយក្នុងអនាគត។ អ៊ីដ្រូសែននឹងត្រូវបានប្រើប្រាស់ដើម្បីបញ្ចុះកម្ដៅបណ្ដាញដែលស្ថាបនាពីវត្ថុធាតុចម្លងកម្រិតខ្ពស់ កាត់បន្ថយតម្រូវការស្ថាបនាបណ្ដាញលូពិសេសសម្រាប់បញ្ចុះកម្ដៅវត្ថុធាតុចម្លងបានរហូតដល់ -253.3 អង្សាសេ។ សំណើខាងលើនេះត្រូវបានចុះផ្សាយលើទស្សនាវដ្ដី APL Energy និងត្រូវបានទំព័រ Interesting Engineering ផ្សាយបន្តកាលពីថ្ងៃទី 25 មេសា 2023។

ការភ្ជាប់វត្ថុធាតុចម្លងកម្រិតខ្ពស់ (superconductor) ទៅក្នុងផ្លូវល្បឿនលឿននាបច្ចុប្បន្ន និងការបន្ថែមមេដែកទៅក្នុងរថយន្ត នឹងជួយលុបបំបាត់តម្រូវការបញ្ចុះកម្ដៅវត្ថុធាតុចម្លងកម្រិតខ្ពស់នៅលើរថយន្ត។ រូបមន្តនេះគឺយោងទៅលើអ៊ីដ្រូសែនដើម្បីបញ្ចុះកម្ដៅវត្ថុធាតុចម្លងកម្រិតខ្ពស់ នៅពេលរថយន្តផ្លាស់ទីតាមបណ្ដោយប្រព័ន្ធនេះ។

បច្ចេកវិទ្យាវត្ថុធាតុចម្លងកម្រិតខ្ពស់ (Superconductivity) កំពុងត្រូវបានយកមកប្រើប្រាស់ ព្រោះវាជួយឱ្យវត្ថុមួយអាចអណ្ដែតខ្លួនក្នុងបរិយាកាស

យោងតាមក្រុមអ្នកស្រាវជ្រាវ នៅពេលមធ្យោបាយដឹកជញ្ជូនដែលមានគ្រោងឆ្អឹងបំពាក់ម៉ាញ៉េទិច ចូលដល់បណ្ដាញផ្លូវទំនើបនេះ វានឹងអណ្ដែត និងផ្លាស់ទីក្នុងល្បឿនលឿន ឆ្ពោះទៅកាន់គោលដៅ។ បន្ទាប់ពីមធ្យោបាយដឹកជញ្ជូនបានចាកចេញពីផ្លូវទំនើបនេះ វានឹងធ្វើដំណើរតាមបែបធម្មតា ដូចទៅនឹងរថយន្តបច្ចុប្បន្ន។

ប្រព័ន្ធបែបនេះអាចធ្វើឱ្យចរាចរណ៍ផ្លូវអាកាស និងការដឹកជញ្ជូនទំនិញដូចសព្វថ្ងៃ ក្លាយជារឿងហួសសម័យ ព្រោះថា វាអនុញ្ញាតឱ្យមធ្យោបាយធ្វើដំណើរផ្ទាល់ខ្លួន និងពាណិជ្ជកម្ម ផ្លាស់ទីក្នុងល្បឿន 645 គីឡូម៉ែត្រ/ម៉ោង ហើយអាចលឿនជាងនេះទ្វេដង។ នេះបើតាម Zhifeng Ren ប្រធានមជ្ឈមណ្ឌលវត្ថុធាតុចម្លងកម្រិតខ្ពស់នៅរដ្ឋ Texas សហរដ្ឋអាម៉េរិក។

រថភ្លើងល្បឿនលឿនទំនើបដែលបំពាក់បច្ចេកវិទ្យា Maglev នេះ ក៏ប្រើបច្ចេកវិទ្យា Superconductivity

ប្រព័ន្ធខាងលើក៏នឹងចូលរួមកាត់បន្ថយការប្រើប្រាស់ឥន្ធនៈ ឬអគ្គិសនីបានយ៉ាងច្រើនផងដែរ។ ទន្ទឹមនឹងនេះ រថយន្តដែលបរលើប្រព័ន្ធនេះក៏ជួយកាត់បន្ថយការចំណាយ និងការបំភាយឧស្ម័នពុលទៅក្នុងបរិស្ថាន៕

April 27, 2023

អាជ្ញាធរភ្នំពេញចេញសេចក្ដីជូនដំណឹងស្ដីពីកន្លែងផ្សាយបន្តផ្ទាល់ការប្រកួតបាល់ទាត់របស់ក្រុមកម្ពុជានៅស៊ីហ្គេម

សួនច្បារមុខវត្តបទុមវតី បុរីប៉េងហួតបឹងស្នោរ និងទីលានប្រជាធិបតេយ្យជាដើម នឹងត្រូវបានប្រើប្រាស់ជាកន្លែងសម្រាប់ការចាក់ផ្សាយបន្តផ្ទាល់ការប្រកួតបាល់ទាត់របស់ក្រុមជម្រើសជាតិកម្ពុជា នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32។

ខាងក្រោមនេះគឺជាសេចក្ដីជូនដំណឹងរបស់អាជ្ញាធររាជធានីភ្នំពេញ ស្ដីពីកន្លែងផ្សាយបន្តផ្ទាល់ការប្រកួតបាល់ទាត់របស់ក្រុមកម្ពុជានៅស៊ីហ្គេមលើកទី 32 ៖

April 26, 2023

ម្ចាស់ជើងឯកបាល់ទាត់ស៊ីហ្គេមបានមកដល់កម្ពុជា ត្រៀមខ្លួនដើម្បីការពារមេដាយមាស

ក្រុមបាល់ទាត់អាយុក្រោម 22 ឆ្នាំ (U-22) របស់វៀតណាម បានមកដល់រាជធានីភ្នំពេញហើយ ក្រោយពីធ្វើដំណើរមិនដល់មួយម៉ោង តាមយន្តហោះពីទីក្រុងហូជីមិញ (ព្រៃនគរ)។

ការមកដល់របស់ក្រុម U-22 វៀតណាម បានកើតឡើងមួយថ្ងៃបន្ទាប់ពីក្រុមបុគ្គលិកការិយាល័យជួរមុខរបស់សហព័ន្ធបាល់ទាត់វៀតណាម (VFF) បានមកកាន់ភ្នំពេញដើម្បីធ្វើការជាមួយភាគីកម្ពុជាទាក់ទងនឹងកន្លែងស្នាក់នៅហូបចុក និងរៀបចំកាលវិភាគសម្រាប់ការហ្វឹកហាត់។

សណ្ឋាគារដែលក្រុមជម្រើសជាតិ U-22 វៀតណាមត្រូវស្នាក់នៅក៏ជាកន្លែង «បោះទ័ព» របស់ក្រុមបាល់ទាត់បុរស នារីទាំង 17 ក្រុម ដែលចូលរួមប្រកួតនៅស៊ីហ្គេមលើកទី 32។

ល្ងាចថ្ងៃនេះ កូនសិស្ស និងគ្រូបង្វឹក Philippe Trousier នឹងចាប់ផ្ដើមការហ្វឹកហាត់ដំបូងនៅលើទឹកដីកម្ពុជា ដើម្បីត្រៀមសម្រាប់ការប្រកួតបើកឆាកនៅពូល B ដែល U-22 វៀតណាមត្រូវប៉ះ U-22 ឡាវ នៅថ្ងៃទី 30 មេសា។ ទីលានហ្វឹកហាត់របស់ U-22 វៀតណាម មានចម្ងាយប្រហែលជាង 20 នាទីពីសណ្ឋាគារដែលពួកគេស្នាក់នៅ បើសិនជិះតាមរថយន្តក្រុង៕

គ្រូបង្វឹករបស់ក្រុមបាល់ទាត់វៀតណាម លោក Philippe Troussier (ស្ដាំ)

April 26, 2023

Toyota វិនិយោគ 746 លានដុល្លារដើម្បីផលិតថ្មសម្រាប់រថយន្តអគ្គិសនី

ក្រុមហ៊ុនបុត្រសម្ព័ន្ធរបស់ Toyota Motor នឹងវិនិយោគ 100 ពាន់លានយេន (ប្រហែល 746 លានដុល្លារអាម៉េរិក) ដើម្បីបង្កើនការផលិតឱ្យបាន 40% បន្ថែមទៀត ទៅតាមផែនការដែលបានកំណត់។

ថ្មផ្ទុកថាមពលគឺជាគន្លឹះដើម្បីសម្រេចបានគោលដៅនៅក្នុងការផលិតរថយន្តអគ្គិសនីថ្មីរបស់ Toyota។ ក្រុមហ៊ុននេះមានគម្រោងលក់រថយន្តអគ្គិសនីឱ្យបាន 1.5 លានគ្រឿងនៅឆ្នាំ 2026 កើន 62 ដងធៀបនឹង 24,000 គ្រឿងដែលបានលក់ចេញកាលពីឆ្នាំ 2022។

ដោយមានខ្ទង់វិនិយោគខាងលើ Prime Planet Energy & Solutions ដែលជាក្រុមហ៊ុនបុត្រសម្ព័ន្ធរបស់ Toyota នឹងបង្កើនការផលិតថ្មផ្ទុកថាមពលអគ្គិសនីនៅជប៉ុន។ យោងតាម Nikkei Asia ក្រុមហ៊ុននេះមានគម្រោងជ្រើសរើសបុគ្គលិកបន្ថែមរាប់ពាន់នាក់ទៀត។ ដំណើរការផលិតរបស់ក្រុមហ៊ុន Prime Planet Energy & Solutions នឹងចាប់ផ្ដើមនៅឆ្នាំ 2026។

Toyota មានភាគហ៊ុន 51% នៅក្នុងក្រុមហ៊ុន Prime Planet Energy & Solutions គ្រាដែល Tesla និង Panasonic Holdings ក្ដោបក្ដាប់ភាគហ៊ុន 49%។

យោងតាមក្រុមហ៊ុន Techno Systems Research កាលពីឆ្នាំ 2022 Toyota របស់ជប៉ុន រួមចំណែកតែ 1% ប៉ុណ្ណោះនៅក្នុងទីផ្សារថ្មផ្ទុកថាមពលរបស់ពិភពលោក ខណៈដែលក្រុមហ៊ុនចិន CATL ក្ដោបក្ដាប់ទីផ្សារថ្ម 47.5%, BYD របស់ចិន មាន 15.8%, LG Energy Solution របស់កូរ៉េខាងត្បូងឈរលំដាប់ទីបី និង Panasonic របស់ជប៉ុន ជាប់ចំណាត់ថ្នាក់លេខបួន៕

April 26, 2023

រថភ្លើង «អណ្ដែត» ល្បឿនមហាលឿនដំណើរការសាកល្បងដោយជោគជ័យ

ក្រុមហ៊ុនឧស្សាហកម្ម និងវិទ្យាសាស្ត្រអាកាសចរណ៍អវកាសចិន បានធ្វើតេស្តជោគជ័យនូវរថភ្លើងអណ្ដែត (Maglev Train) ដែលដំណើរការដោយថាមពលម៉ាញ៉េទិច និងអគ្គិសនី ដែលអាចបរក្នុងល្បឿនមហាលឿន។

នេះគឺជាការសាកល្បងដំបូងចំពោះរថភ្លើងអណ្ដែតល្បឿនមហាលឿនគំរូពេញលេញរបស់ក្រុមអ្នកវិទ្យាសាស្ត្រចិន។ នៅពេលសម្រេចជាស្ថាពរ រថភ្លើងប្រភេទ Maglev នេះអាចធ្វើដំណើរបានក្នុងល្បឿន 1,000 គីឡូម៉ែត្រ/ម៉ោងនៅក្នុងលក្ខខណ្ឌល្អ។

ត្រូវបានអភិវឌ្ឍដោយសាជីវកម្មឧស្សាហកម្ម និងវិទ្យាសាស្ត្រអាកាសចរណ៍អវកាសចិន (CASIC) គម្រោងរថភ្លើងអណ្ដែត T-Flight កំពុងឆ្ពោះទៅកាន់គោលដៅដឹកអ្នកដំណើរ និងទំនិញក្នុងល្បឿន 1,000 គីឡូម៉ែត្រ ឬលឿនជាងនេះ នៅក្នុងលំហកម្រិតទាបនៃផ្លូវដែករាងបំពង់។ បើសិនជាជោគជ័យ នេះនឹងក្លាយជាបច្ចេកវិទ្យាដឹកជញ្ជូនលើដីដែលលឿនបំផុតលើពិភពលោក។

រថភ្លើងប្រភេទនេះ នឹងត្រូវបានប្រើប្រាស់ដើម្បីដឹកជញ្ជូនរវាងទីក្រុងទំនើបៗនាពេលអនាគត។ ប៉ុន្តែ ក្រុមអ្នកជំនាញបានឱ្យដឹងថា បច្ចេកវិទ្យានេះត្រូវការធ្វើតេស្តជាច្រើនទៀតដើម្បីសម្រេចបានល្បឿន 1,000 គីឡូម៉ែត្រ/ម៉ោង។ កន្លងមក ក្រុមអ្នកស្រាវជ្រាវខាងលើធ្លាប់បានធ្វើតេស្តល្បឿន 623 គីឡូម៉ែត្រ/ម៉ោង នៅក្នុងលក្ខខណ្ឌធម្មតា។

ក្រុមអ្នកវិទ្យាសាស្ត្រចិន ធ្វើតេស្តរថភ្លើងប្រភេទអណ្ដែត ល្បឿនមហាលឿន

«បន្ទាប់មក យើងនឹងធ្វើតេស្តច្រើនជាងនេះនៅលើផ្លូវសាកល្បងដំណាក់កាលទីមួយនៅខេត្ត Shanxi ដើម្បីបញ្ជាក់អំពីប្រសិទ្ធភាពរបស់ប្រព័ន្ធទាំងមូល។ យើងនឹងពង្រីកបណ្ដាញផ្លូវ និងធ្វើការវាយតម្លៃលើផ្លូវឆ្ងាយ និងល្បឿនលឿនជាងមុន» Li Ping ដែលជាសមាជិករបស់គម្រោងរថភ្លើង T-Flight បញ្ជាក់ដូច្នេះ។

ប្រទេសចិន បច្ចុប្បន្នកំពុងដំណើរការរថភ្លើងល្បឿនលឿនរាងគ្រាប់កាំភ្លើងដែលអាចធ្វើដំណើរបាន 350 គីឡូម៉ែត្រ/ម៉ោង។

April 26, 2023

កម្ដៅរបស់បាល់ទាត់កម្ពុជា និងមហិច្ឆតាក្លាយជាម្ចាស់មេដាយនៅស៊ីហ្គេមលើកទី 32

សំបុត្រជាង 14,000 សម្លឹកត្រូវបានបែងចែកអស់នៅក្នុងរង្វង់មួយម៉ោងកាលពីប៉ុន្មានថ្ងៃមុន ខណៈអ្នកគាំទ្រជាច្រើននៅតែស្វែងរកសំបុត្រចូលទស្សនាពិធីសម្ពោធបើកការប្រកួតបាល់ទាត់បុរសនៅស៊ីហ្គេមលើកទី 32 ដែលមានការប្រកួតរវាង U-22 កម្ពុជា និង U-22 ទីម័រខាងកើត ធ្វើឱ្យបាល់ទាត់នៅកម្ពុជាឡើងកម្ដៅខ្ពស់មិនធ្លាប់មានពីមុនមក។

កម្ពុជាបានចំណាយពេលដប់ឆ្នាំនៅក្នុងការវិនិយោគសម្រាប់ក្រុម U-22 បច្ចុប្បន្ន ដោយសង្ឃឹមថា អាចដណ្ដើមបានមេដាយនៅស៊ីហ្គេមលើកនេះ។ កាលពីបួនឆ្នាំមុន ក្នុងព្រឹត្តិការណ៍ស៊ីហ្គេមលើកទី 30 នៅហ្វ៊ីលីពីន ក្រុមបាល់ទាត់កម្ពុជាបានចូលទៅក្បែរពានរង្វាន់មេដាយសំរឹទ្ធបំផុត ពេលឡើងដល់វគ្គពាក់កណ្ដាលផ្ដាច់ព្រ័ត្រ ប៉ុន្តែត្រូវចាញ់ U-23 វៀតណាម 0-4 ហើយក្រោយមកក៏បានបរាជ័យក្នុងការប្រជែងដណ្ដើមមេដាយសំរឹទ្ធជាមួយនឹង U-23 មីយ៉ាន់ម៉ា។

បច្ចុប្បន្ន U-22 កម្ពុជាកំពុងតែមានប្រៀបជាងក្រុមមួយចំនួនទៀត ដោយសារតែបានទាត់នៅលើទីលានផ្ទាល់ខ្លួន និងស្ថិតក្នុងពូលដែលមើលទៅមិនសូវគ្រោះថ្នាក់ ក៏ដូចជាការទទួលបានការគាំទ្រលើកទឹកចិត្តច្រើនលើសលុបពីពលរដ្ឋក្នុងស្រុក នៅពេលសំបុត្រចូលទស្សនាត្រូវបានលក់ក្នុងតម្លៃ 0 រៀល។ ក៏ប៉ុន្តែ គ្រាប់បាល់មូលនៅលើទីលានប្រកួត អាចកែប្រែស្ថានភាពគ្រប់យ៉ាង។

នៅសល់តែបីថ្ងៃទៀតប៉ុណ្ណោះ ក្រុមបាល់ទាត់ម្ចាស់ផ្ទះកម្ពុជា នឹងត្រូវចូលប្រកួតបើកឆាកជាមួយនឹងក្រុម U-22 ទីម័រខាងកើត។ ការប្រកួតនេះនឹងធ្វើឡើងនៅថ្ងៃទី 29 មេសា 2023៕

April 26, 2023

ថ្មផ្ទុកថាមពលទំនើបជួយឱ្យរថយន្តអគ្គិសនីបើកបរបានរហូតដល់ 1.5 លានគីឡូម៉ែត្រ

(ស៊ុយអែត) – ក្រុមហ៊ុនបច្ចេកវិទ្យាបៃតងចំនួនពីររួមគ្នាអភិវឌ្ឍថ្មផ្ទុកថាមពលសម្រាប់រថយន្តអគ្គិសនីធុនធ្ងន់ ដែលថ្មនេះមានអាយុកាលវែង អាចផ្ដល់អគ្គិសនីឱ្យរថយន្តបរបានជាង 1.5 លានគីឡូម៉ែត្រ។

ថ្មផ្ទុកថាមពលប្រភេទលីចូម (lithium-ion) ថ្មីនេះត្រូវបានផលិតឡើងដោយប្រើអគ្គិសនីមិនមានប្រភពពីផូស៊ីល នៅឯភាគខាងជើងប្រទេសស៊ុយអែត។ ការផលិតថ្មនេះបំភាយឧស្ម័នកាបូនស្មើនឹង 1/3 ធៀបនឹងផលិតផលប្រភេទដូចគ្នានេះរបស់ក្រុមហ៊ុនដទៃ។

ចំណុចពិសេសរបស់ថ្មនេះគឺស្ដើង ផ្ទុកអគ្គិសនីបាន 157 អំពែរម៉ោង និងកម្លាំង 3.6 វ៉ុល។ អាយុកាលរបស់ថ្មទំនើបចុងក្រោយនេះគឺជាង 1.5 លានគីឡូម៉ែត្រចំពោះរថយន្តធុនធ្ងន់។ នេះបើតាមទំព័រ Interesting Engineering ចុះផ្សាយកាលពីថ្ងៃទី 24 មេសា។ ជាធម្មតា អាយុកាលរបស់ថ្មរថយន្តអគ្គិសនីគឺប្រហែល 8 ឆ្នាំ/160,000 គីឡូម៉ែត្រ។

ថ្មផ្ទុកអគ្គិសនីនេះត្រូវបានបង្កើតឡើងដោយកិច្ចសហការរវាងក្រុមហ៊ុនបច្ចេកវិទ្យាបៃតងចំនួនពីរស្ថាប័នគឺ Scania និង Northvolt។ ពួកគេកំពុងផលិតថ្មនេះនៅឯរោងចក្រ Ett របស់ Northvolt ក្នុងប្រទេសស៊ុយអែត ចំណែក Scania វិញក៏នឹងសម្ពោធរោងចក្រផលិតថ្មថ្មីនេះមួយដែរនៅ Sodertalje នៅចុងឆ្នាំនេះ។ នៅទីនោះ ថ្មផ្ទុកអគ្គិសនីនឹងត្រូវបានដំឡើងពេញលេញដើម្បីចាប់ផ្ដើមការផលិតរថយន្តអគ្គិសនីដឹកទំនិញធុនធ្ងន់។

April 26, 2023

ក្នុងប្រវត្តិបាល់ទាត់បុរសនៅស៊ីហ្គេម តើប្រទេសណាដណ្ដើមបានមេដាយមាសច្រើនលើកជាងគេ?

បាល់ទាត់ប្រទេសថៃកំពុងតែគ្រប់គ្រងតំណែងកំពូលនៅក្នុងបញ្ជីចំណាត់ស្ដីពីបណ្ដាប្រទេសដែលដណ្ដើមបានមេដាយមាសរបស់វិញ្ញាសាបាល់ទាត់បុរសច្រើនលើកជាងគេនៅស៊ីហ្គេម។

ឆ្លងកាត់ព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) ចំនួន 31 លើក មានប្រាំប្រទេសដែលធ្លាប់ដណ្ដើមបានមេដាយមាសក្នុងវិញ្ញាសាបាល់ទាត់បុរស រួមមាន ប្រទេសថៃ ម៉ាឡេស៊ី ឥណ្ឌូណេស៊ី មីយ៉ាន់ម៉ា និងវៀតណាម។

ក្រុមបាល់ទាត់ជម្រើសជាតិថៃ កំពុងនាំមុខគេក្នុងបញ្ជីចំណាត់ថ្នាក់ខាងលើ ដោយដណ្ដើមបានមេដាយមាសចំនួន 16 លើក។ ក្រុមជម្រើសជាតិនេះថែមទាំងដណ្ដើមបានមេដាយប្រាក់ចំនួនប្រាំលើក និងមេដាយសំរឹទ្ធចំនួនប្រាំលើកផងដែរ។

ជាប់ចំណាត់ថ្នាក់លេខពីរគឺ ប្រទេសម៉ាឡេស៊ី ដោយដណ្ដើមបានមេដាយមាស 6 លើក។ ក្រៅពីនេះ ពួកគេក៏ដណ្ដើមបានមេដាយប្រាក់ 6 លើក និងមេដាយសំរឹទ្ធ 7 លើក។

បាល់ទាត់មីយ៉ាន់ម៉ាធ្លាប់គ្រប់គ្រងតំបន់អាស៊ីអាគ្នេយ៍ ដោយដណ្ដើមបានមេដាយមាសប្រាំលើក ត្រូវជាប់ចំណាត់ថ្នាក់លេខបី។ មីយ៉ាន់ម៉ាក៏ដណ្ដើមបានមេដាយប្រាក់ចំនួនបួនលើក និងសំរឹទ្ធបួនលើកនៅស៊ីហ្គេម។

ក្រុមបាល់ទាត់ជម្រើសជាតិឥណ្ឌូណេស៊ី រកបានមេដាយមាសពីរលើក មេដាយប្រាក់ពីរលើក និងសំរឹទ្ធប្រាំលើក នៅក្នុងព្រឹត្តិការណ៍ស៊ីហ្គម។

វៀតណាមដែលបច្ចុប្បន្នត្រូវបានចាត់ទុកថាជា «ខ្លាកំណាចបាល់ទាត់» មួយនៅអាស៊ីអាគ្នេយ៍។ ក៏ប៉ុន្តែ ពួកគេ ទើបតែដណ្ដើមបានមេដាយមាសចំនួនពីរលើកប៉ុណ្ណោះនៅស៊ីហ្គេម ដែលស្មើនឹងក្រុមឥណ្ឌូណេស៊ី។ វៀតណាមដណ្ដើមបានមេដាយមាសពីរលើកចុងក្រោយនេះ។ ប្រទេសនេះក៏ធ្លាប់ឡើងដល់វគ្គផ្ដាច់ព្រ័ត្រ U-23 អាស៊ី 2023 និង AFF Cup ផងដែរ។

April 26, 2023

ស្រឡាងអគ្គិសនីដឹកអ្នកដំណើរដោយស្វ័យប្រវត្តដំបូងគេលើពិភពលោក

(ស៊ុយអែត) – ស្តុកខុលបានក្លាយជាទីក្រុងដំបូងគេលើពិភពលោកដែលដាក់ឱ្យប្រើប្រាស់ស្រឡាងដឹកអ្នកដំណើរបែបពាណិជ្ជកម្មស្វ័យប្រវត្តដំណើរការទាំងស្រុងដោយថាមពលអគ្គិសនី។

ម៉ូដែលស្រឡាងមានដងខ្លួនពីរដែលអាចដាក់មនុស្សបាន 25 នាក់នេះនឹងធ្វើសកម្មភាពរវាងបណ្ដាកោះ Kungsholmen និង Soder Mellarstrand នៅរដ្ឋធានីស្តុកខុល ក្នុងរយៈពេល 15 ម៉ោងជាប់ៗគ្នាជារៀងរាល់ថ្ងៃ ចាប់ពីខែមិថុនា 2023។ នេះបើតាមគេហទំព័រ Zeam។

ស្រឡាងទំនើបនេះស្ថិតក្នុងគម្រោងបង្កើតឱ្យមានមធ្យោបាយធ្វើដំណើរដែលមានស្ថិរភាពក្នុងទីក្រុង និងទាក់ទាញចំណាប់អារម្មណ៍ពីសាធារណជនជាងមុន។ គម្រោងដែលបានចាប់ផ្ដើមនៅឯសាកលវិទ្យាល័យវិទ្យាសាស្ត្រ និងបច្ចេកវិទ្យាន័រវែស (NTNU) នៅ Trondheim នេះ បាននាំឱ្យមានវត្តមានក្រុមហ៊ុនបច្ចេកវិទ្យា Zeabuz។ Zeabuz ផ្គត់ផ្គង់ប្រព័ន្ធស្វ័យប្រវត្តសម្រាប់ស្រឡាងដឹកអ្នកដំណើរ។

ដំណើរការរបស់ស្រឡាងប្រវែង 12 ម៉ែត្រនេះ នឹងត្រូវបានតាមដានពីបន្ទប់គ្រប់គ្រងនៅលើដីគោក។ ស្រឡាងនេះមានដំបូល និងច្រកឡើងចុះនៅខាងមុខ និងខាងក្រោយ។ មធ្យោបាយធ្វើដំណើរនេះត្រូវបានផលិតដោយក្រុមហ៊ុនសាងសង់កប៉ាល់ Brodrene Aa ដែលមានវត្តមានតាំងពីឆ្នាំ 1947។

គម្រោងស្រឡាងអគ្គិសនីស្វ័យប្រវត្តរបស់ស៊ុយអែត នឹងជួយជំរុញការធ្វើដំណើរតាមផ្លូវទឹក កាត់បន្ថយការកកស្ទះចរាចរណ៍ផ្លូវគោក និងបន្ថយការបំភាយឧស្ម័នពុល៕

April 25, 2023

Category: សង្គម និងសេដ្ឋកិច្ច