សង្គម និងសេដ្ឋកិច្ច - La Reine Media

ខ្សែប្រយុទ្ធ Martial និង Lingard របស់ Man Utd នឹងត្រូវអវត្តមាន 3សប្តាហ៍

ខ្សែប្រយុទ្ធ Anthony Martial និង Jesse Lingard របស់ក្លិប Manchester United នឹងត្រូវអវត្តមានរហូតដល់រយៈពេល 3សប្តាហ៍ ដោយសារតែបញ្ហារបួស ហើយនិងត្រូវអវត្តមានសម្រាប់ការប្រកួត 2លើកបន្ទាប់របស់ពួកគេ នៅពេលជួបក្រុម Chelsea និង Liverpool។ នេះបើយោងទៅតាមការប្រកាសរបស់លោកគ្រូបង្វឹក Ole Gunnar Solskjaer កាលពីថ្ងៃសុក្រ។

Lingard និង Martial បានរងរបួសសាច់ដុំ ក្នុងតង់ទី1នៅពេលប្រកួតជាមួយនឹងក្រុម Paris St Germain ក្នុងក្របខ័ណ្ឌ Champions League នាកីឡដ្ឋាន Old Trafford កាលពីថ្ងៃអង្គារ។

នៅមុនពេលការប្រកួតពាន FA Cupជុំទី5 ជាមួយនឹងក្រុមម្ចាស់ការពារជើងឯក Chelsea នៅរាត្រីថ្ងៃចន្ទនេះ លោក Solskjaer បានប្រាប់សន្និសីទសារព័ត៌មានមួយថា៖ «ខ្ញុំគិតថា ពួកគេនឹងអវត្តមានសម្រាប់រយៈពេល2 ទៅ3សប្តាហ៍ បើគិតចាប់ពីនេះទៅ»។

បញ្ហារបួសនេះគឺជារឿងដ៏ខកចិត្តមួយសម្រាប់ក្រុម Man United ដែលបានឈ្នះការប្រកួត 10លើកក្នុងចំណោមការប្រកួត 12លើក ក្រោមការដឹកនាំរបស់លោកគ្រូបង្វឹកបណ្តោះអាសន្ន Solskjaer ប៉ុន្តែការរបួសនេះនឹងផ្តល់ឱកាសឱ្យខ្សែប្រយុទ្ធ Alexis Sanchez និង Romelu Lukaku រកឃើញនូវភាពមុតស្រួចរបស់ពួកគេត្រឡប់មកវិញ។

លោក Solskjaer បានបញ្ជាក់ថា របួសរបស់កីឡាករទាំង2 ក៏នឹងបើកផ្លូវឱ្យខ្សែប្រយុទ្ធវ័យក្មេង Angel Gomes និង Tahith Chong ដែលកំពុងតែខិតខំព្យាយាមប្រជែងយកកៅអីក្នុងក្រុមជម្រើសដំបូងនៅរដូវកាលនេះផងដែរ។ គ្រូបង្វឹកសញ្ជាតិន័រវែសរូបនេះបានបន្ថែមទៀតថា៖ «វាជាឱកាសល្អមួយសម្រាប់គ្រប់គ្នាដែលលេង មិនថា Alexis, Romelu ឬ Angel (Gomes) ឡើយ»៕

February 18, 2019

ឌីជេ ខេក បង្ហាញទង្វើសប្បុរធម៌ចែកអំណោយដើម្បីចែករំលែកក្ដីស្រឡាញ់

នៅថ្ងៃទី17 កុម្ភៈ តារាចម្រៀងរ៉េបលោកឌីជេ ខេក បានបង្ហាញទង្វើសប្បុរសធម៌ចុះចែកអំណោយជូនដល់ក្រុមអ្នកធាក់ស៊ីក្លូប្រមាណជាង60ស៊ីក្លូនៅមុខវត្តឧណ្ណាលោម។ ហេតុផលដែលនាំឱ្យមានពិធីចែកអំណោយដើម្បីចែករំលែកក្ដីស្រឡាញ់ដល់ក្រុមអ្នកធ្លាក់ស៊ីក្លូ ។

យ៉ាងណាមិញ ធៀបនឹងក្រុមដែលធ្លាប់ចុះចែកអំណោយដល់ក្រុមអ្នកធាក់ក្លូដូចគ្នាកន្លងមក គឺក្រុមសប្បុរសធម៌មួយក្រុមនេះដែលដឹកនាំដោយលោក ខេក ទទួលបានការសរសើរជាងគេ ដោយសារតែពួកលោកមកចែកអំណោយជូនអ្នកធាក់ស៊ីក្លូ ដោយមិនបានអោយដំណឹងជាមុន ហើយដោយតែចុះមកបែប Surprise បែបនោះ ទើបទម្រាំរកបានអ្នកមកទទួលអំណោយតាមការចង់បាន គឺត្រូវកៀគរកណ្ដាលថ្ងៃ ហើយត្រូវឈរចែកអំណោយកណ្ដាលថ្ងៃក្ដៅហែងទៅទៀត។

សកម្មភាពនៅក្នុងថ្ងៃនោះ គេឃើញលោកឌីជេខេក និងដៃគូបានដើរកៀគរ ក្រុមអ្នកធ្លាក់ស៊ីក្លូ គួរឱ្យសរសើរនៅបរិវេណវត្តបុទម ដោយក្រៅពីចែកបាយទឹក មី និងអង្ករ ជាដើម ក៏មានចែកចាយលុយកាក់ដើម្បីអោយក្រុមអ្នកធាក់ស៊ីក្លូ ដែលត្រូវបានគេចាត់ទុកថាជាក្រុមអ្នករកលុយយ៉ាងលំបាកនៅភ្នំពេញបានសប្បាយចិត្ត។ លោកឌីជេ ខេក បានរួមគ្នាយកអំណោយចែករំលែកក្ដីស្រឡាញ់ដល់ក្រុមអ្នកធាក់ស៊ីក្លូ ប៉ុន្តែជាការធ្វើទានច្រើនលើកមកហើយ ដែលក្រុមរបស់លោកបានធ្វើចំពោះក្មេងក្រីក្រ និងអ្នកខ្វះខាត៕

February 18, 2019

ដឹងមូលហេតុពិត ក្រោយបាត់ខ្លួន តា ហ្វុយហ្សូ...

នៅព្រឹកថ្ងៃនេះ មានការភ្ញាក់ផ្អើលនៅលើបណ្ដាញសង្គមហ្វេសប៊ុកមានការប្រកាស់ស្វែងរកលោកតា ប៊ុយ ហ្សូ អាយុ 75ឆ្នាំ ចេញទៅរថយន្ដពណ៌ស ស្លាកលេខ 2AY 8814 បានចេញទៅក្រៅ មិនឃើញត្រលប់មកវិញណាមួយគាត់មានជម្ងឺប្រចាំកាយដែលគួរឱ្យព្រួយបារម្ភខ្លាំងថែមទៀត។

យ៉ាងណាមិញ ផ្អែកលើគណនីហ្វេសប៊ុកឈ្មោះថា Vannak Sou បានបញ្ចក់ឱ្យដឹងថាភ្លាមៗមុននេះថា ពេលនេះលោក តា ហ្វុយហ្សូ បានត្រលប់មកផ្ទះវិញហើយ សូមមេត្តាជួយស៊ែរឱ្យបានដឹងផងនឹងកុំមានការព្រួយបារម្ភអ្វីទៀត និង សូមអរគុណដល់សារព័ត៌មានបងប្អូនគ្រប់ៗគ្នា។

ជាក់ស្ដែងនោះ គណនីដដែលបានបញ្ចាក់ទៀតថា ចំពោះការបាត់ខ្លួនរបស់តារាកំប្លែង លោក តា ប៊ុយ ហ្សូ គឺគាត់បានទៅហាត់ប្រាណរួច ក៏បានឈានចូលទៅលេងផ្ទះមិត្តគាត់បន្តិច ដោយគ្រាន់តែពិសារអីបន្ដិចបន្តួចប៉ុណ្ណោះ ហើយសំខាន់នោះគឺទូសព្ទអស់ថ្មទៀត ទើបគាត់ធ្វើឱ្យកូនចៅអ្នកនៅផ្ទះទាក់ទងមិនបាន។ ជាពិសេសដោយសារតែគាត់មានជម្ងឺប្រចាំកាយ ទើបបានជាគ្រួសារមានការព្រួយបារម្មណ៏ក៏មានការប្រកាស់ពេញបណ្ដាញហ្វេសប៊ុក និងទាក់ទងគ្រប់បណ្ដាញសារព័ត៌មាន៕

February 16, 2019

អេឡិច ចាន់ត្រា ចែករំលែកក្ដីស្រឡាញ់ដល់កុមារក្នុងមណ្ឌលសុម៉ាលីម៉ម

អ្នកលេងហ្វេសប៊ុកជាច្រើន បានលាន់មាត់សរសើរថាលោក អេឡិច ចាន់ត្រា គឺជាតារាគំរូម្នាក់ ដោយសារតែលោក បានបង្ហាញក្ដីស្រឡាញ់ ទៅកាន់មនុស្សដែលចំគោលដៅ ដែលខុសពីយុវវ័យ និងអ្នកមួយចំនួនដែលសុខចិត្តយកពេលទៅចំណាយលើរឿងផ្ទាល់ខ្លួន ជាមួយនឹងបុរស ឬនារីជាសង្សារជំនួសវិញ។

លោកបានចំណាយពេលញាំបាយជាមួយគ្រួសារ ដែលលោកប្រកាសថា កម្របានញាំបាយជុំគ្នា ព្រោះតែការងារ ដោយក្រៅពីញាំអាហារជុំគ្នា លោកក៏បានបង្ហាញការគោរព និងយកចិត្តទុកដាក់ចំពោះអ្នកមានគុណទាំងនោះដែរ។ អ្វីដែលគេកាន់តែលាន់មាត់ទៅទៀត គឺលោកបានឆ្លៀតទៅចែកទឹកចិត្ត និងចំណីចំណុក ហើយចំណាយពេលលេងជាមួយប្អូនៗ នៅក្នុងមណ្ឌលកុមារកំព្រាសុម៉ាលីម៉ម ដែលតារាមួយចំនួន មើលរំលងក្នុងថ្ងៃនៃក្ដីស្រឡាញ់។ នៅក្នុងមណ្ឌលនេះ គេកត់សម្គាល់ថា វត្តមានតារាច្រើននាក់មកហើយ ទៅលើកទឹកចិត្តក្មេងៗ ប៉ុន្តែមិនមែនក្នុងថ្ងៃ14 កុម្ភ:នោះទេ ដោយសារតែថ្ងៃទិវារនៃក្ដីស្រឡាញ់នោះ គេផ្ដោតជាធំតែលើការចំណាយពេលជាមួយគូស្នេហ៍ និងជាមួយមួយចំនួន ដែលខ្លួនគិតថា សំខាន់ច្រើនជាង។

លោក អេឡិច ចាន់ត្រា បានអះអាងថា ហេតុផលដែលលោកចំណាយពេលទៅមើលក្មេងៗ នៅក្នុងមណ្ឌលសុម៉ាលីម៉មនោះ គឺបណ្ដាលមកពីពេលកន្លងមក លោករមែងទៅលេងជាមួយក្មេងធ្វើឱ្យមានទំនាក់ទំនងជាប្រចាំ ហើយដោយសារតែលោកគិតថា ក្នុងថ្ងៃ14 កុម្ភ: ក្មេងទាំងនេះ ត្រូវការការយកចិត្តទុកដាក់ខ្លាំងជាងថ្ងៃណាៗ ទាំងអស់ ទើបលោករវល់ប៉ុណ្ណា ក៏នៅតែចំណាយពេល ជាមួយក្មេងៗនៅក្នុងមណ្ឌលនោះ ដោយលោកកាន់តែរំភើបចិត្តខ្លាំងឡើង នៅពេលបានឃើញក្មេងៗទាំងនោះសប្បាយរីករាយ ដូចបានកាដូពីឋានសួគ៍៕

February 16, 2019

ធនាគារ អេស៊ីលីដា បោះជំហានកាន់តែលឿនក្នុងការបម្រើអតិថិជននៅគ្រប់ទីកន្លែងក្នុងពិភពលោក

ធនាគារអេស៊ីលីដា ភីអិលស៊ី ជាធនាគារដែលកំពុងមានប្រតិបត្តិការល្អ និងមានភាពទូលំទូលាយក្នុងការផ្តល់សេវាកម្មធនាគារដល់អតិថិជនទាំងក្នុងប្រទេស និងនៅតាមបណ្តាប្រទេសនានាលើពិភពលោក តាមរយៈការបង្កើនកិច្ចសហការជាមួយធនាគារ និងស្ថាប័នអន្តរជាតិដៃគូធំៗជាច្រើន។

នៅថ្ងៃទី5 ខែកុម្ភៈ ឆ្នាំ2019 នេះ ធនាគារអេស៊ីលីដាភីអិលស៊ី និងក្រុមហ៊ុន JCB International Co., Ltd. (JCBI) ជាក្រុមហ៊ុនបុត្រសម្ព័ន្ធ JCB Co., Ltd. បានប្រកាសជាសាធារណៈស្តីពីពិធីដាក់ឱ្យប្រើប្រាស់ជាផ្លូវការនូវបណ្ណឥណពន្ធ អេស៊ីលីដា JCB នៅប្រទេសកម្ពុជា។ បណ្ណឥណពន្ធ អេស៊ីលីដា JCB នេះផ្តល់ជូនអតិថិជននូវមុខងារ ឌីជីថល ជាច្រើនដែលអាចឱ្យអតិថិជនមានជម្រើសក្នុងការទូទាត់ប្រាក់ដុល្លារ និងប្រាក់រៀល អាស្រ័យលើប្រភេទប័ណ្ណ និងជាប័ណ្ណដែលមានប្រព័ន្ធការពារខ្ពស់ចំពោះសុវត្ថិភាពហិរញ្ញវត្ថុសម្រាប់អតិថិជនទាំងអស់។

អតិថិជនដែលជាម្ចាស់បណ្ណឥណពន្ធ អេស៊ីលីដា JCB មិនត្រឹមតែអាចប្រើប្រាស់នៅតាមបណ្ដាញភ្នាក់ងារទូទាត់ JCB ប្រមាណ 30លានទីតាំងទូទាំងសកលលោកនោះទេ ថែមទាំងអាចធ្វើប្រតិបត្តិការដែល JCB ផ្តល់សិទ្ធិ និងការបញ្ចុះតម្លៃនៅតាមភោជនីយដ្ឋាន និងបណ្ដាហាងទំនិញនានា នៅក្នុងសកលលោកទៀតផង។

លោកបណ្ឌិត អុិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយដែលក្រុមហ៊ុន JCBI លំដាប់ពិភពលោកផ្នែកសេវាកម្មទូទាត់មានគុណភាពខ្ពស់លំដាប់អន្តរជាតិ មានទីតាំងនៅប្រទេសជប៉ុនបានជ្រើសរើសយកធនាគារ អេស៊ីលីដា ភីអិលស៊ី ជាដៃគូយុទ្ធសាស្រ្តក្នុងការធ្វើសហប្រត្តិបត្តិការបម្រើសេវាកម្មទូទាត់។ តាមរយៈកិច្ចព្រមព្រៀងនេះ អតិថិជន ឬសមាជិកប័ណ្ណ និងភ្នាក់ងារទូទាត់របស់ធនាគារ អេស៊ីលីដា ភីអិលស៊ី និង JCBI អាចពង្រីកប្រតិបត្តិការទូទាត់ជាសកលនៅតាមបណ្តាញធនាគារ អេស៊ីលីដា និងJCBI ជាង 30លានទីតាំង និងទីតាំងសម្រាប់ការធ្វើប្រតិបត្តិការដកប្រាក់បុរេប្រទានជាង 1លានកន្លែងនៅក្នុងសកលលោក។

លោកបណ្ឌិត អុិន ចាន់នី បានមានប្រសាសន៍ថា៖“ចំណុចសំខាន់នៃកិច្ចព្រមព្រៀងនេះគឺសមាជិកប័ណ្ណអេធីអឹមរបស់ធនាគារ អេស៊ីលីដា ភីអិលស៊ី អាចទទួលបានប័ណ្ណសហនិមិត្តសញ្ញារវាង ធនាគារ អេស៊ីលីដា ភីអិលស៊ី និង JCBI តាមរយៈការស្នើសុំ។ ម្យ៉ាងវិញទៀត ប័ណ្ណនេះមិនត្រឹមតែជួយសម្រួលដល់ការធ្វើប្រតិបត្តិការទូទាត់នៅក្នុង និងក្រៅប្រទេសប៉ុណ្ណោះទេ ថែមទាំងសម្រួលដល់សមាជិកប័ណ្ណ និងភ្នាក់ងារទូទាត់ របស់ធនាគារ អេស៊ីលីដា ភីអិលស៊ី និង JCBI ក្នុងការធ្វើប្រតិបត្តិការទូទាត់យ៉ាងសម្បូរបែប ធ្វើប្រតិបត្តិការទូទាត់លើសកលលោកនៅគ្រប់ទីកន្លែង និងគ្រប់ពេលវេលា តាមតម្រូវការ”។

លោកបណ្ឌិត អុិន ចាន់នី បានលើកឡើងផងដែរថាធនាគារ អេស៊ីលីដា ភីអិលស៊ី បានសហការជាមួយបណ្តាដៃគូសំខាន់ៗជាច្រើនរួចមកហើយ ហើយដៃគូដែលយើងបានប្រកាសសហការគ្នានេះគឺមានលក្ខណពិសេសត្រង់គាត់មានសមាជិកច្រើនរហូតដល់ជាង 30លាននាក់លើពិភពលោក។ ម្យ៉ាងវិញទៀតដូចយើងបានដឹងហើយថា JCBI គឺជាស្ថាប័នមកពីប្រទេសជប៉ុន ដែលផលិតផលជប៉ុន គឺតែងតែភ្ជាប់ជាមួយនឹងកេរ្តិ៍ឈ្មោះ គុណភាព និងភាពដែលអាចជឿជាក់បាន។

លោក គីមីហ៊ីសា អ៊ីម៉ាដា អគ្គនាយក និងជាប្រធាននាយកប្រតិបត្តិរបស់ JCBI បានមានប្រសាសន៍ថា៖ “ក្រុមហ៊ុន JCB International Co., Ltd. (JCBI) មានសេចក្តីសោមនស្សរីករាយ ដែលធនាគារអេស៊ីលីដា ភីអិលស៊ី ជាធនាគារឈានមុខធំបំផុតក្នុងប្រទេសកម្ពុជាបានក្លាយជាដៃគូពាណិជ្ជកម្មជាមួយ JCB ក្នុងការបម្រើសេវាបណ្ណឥណ្ណពន្ធដល់អតិថិជនរបស់ស្ថាប័នទាំង2 និងសាធារណជនទូទាំងពិភពលោក។ ខ្ញុំជឿជាក់ថា ភាពជាដៃគូដ៏ល្អនេះ នឹងផ្តល់ឱកាសជាច្រើនបន្ថែមទៀតដល់ធនាគារ អេស៊ីលីដា ភីអិលស៊ី និង JCBI ក្នុងការពង្រីកពាណិជ្ជកម្មក្នុងប្រទេសកម្ពុជាដែលនេះជាការបង្ហាញពីសក្តានុពលខ្ពស់នាថ្ងៃអនាគត ខណៈសេដ្ឋកិច្ចកំពុងបោះជំហានលូតលាស់យ៉ាងរលូន”។

គួរបញ្ជាក់ថា ធនាគារ អេស៊ីលីដា ភីអិលស៊ីមានទ្រព្យសកម្មសរុបចំនួនជាង 5.7ពាន់លានដុល្លារអាមេរិក សមតុល្យឥណទានសរុបចំនួន 3.63ពាន់លានដុល្លារអាមេរិក និងប្រាក់បញ្ញើសន្សំសរុបចំនួន3.84ពាន់លានដុល្លារ និងមានអតិថិជនប្រមាណជាង2.5លាននាក់ គិតត្រឹមដំណាច់ខែធ្នូ ឆ្នាំ2018 នេះ។ ចំណែកឯក្រុមហ៊ុន JCB ជាក្រុមហ៊ុនដែលមាន យីហោសេវាកម្មទូទាត់លំដាប់ពិភពលោក និងជាអ្នកចេញ និងទទួលបណ្ណឥណទាន ឈានមុខគេនៅជប៉ុនដែលមានប្រតិបត្តិការចាប់តាំងពីឆ្នាំ1961 មកម៉្លេះ៕

February 16, 2019

អាងចិញ្ចឹមចង្រិតបែបថ្មី ប្រើបច្ចេកវិទ្យាជួយអ្នកចិញ្ចឹមចង្រិតនៅតំបន់ឆ្ងាយៗ

ការចិញ្ចឹមចង្រិតជាមុខរបរថ្មីមួយដែលធ្វើឱ្យប្រជាជនខ្មែរមួយចំនួនទទួលបានប្រាក់កម្រៃរាប់រយដុល្លារក្នុងមួយខែៗ តែអ្វីដែលជាបញ្ហាប្រឈមរបស់អ្នកចិញ្ចឹមនោះ គឺបញ្ហាបច្ចេកទេសគ្រប់គ្រងកន្លែងចិញ្ចឹម និងបញ្ហាភ្លើងអគ្គិសនី ព្រោះអ្នកដែលអាចចិញ្ចឹមចង្រិតបាន លុះត្រាតែស្ថិតក្នុងតំបន់ដែលមានភ្លើងរដ្ឋប្រើប្រាស់ ចំណែកឯអ្នកនៅជនបទឆ្ងាយៗមិនអាចចិញ្ចឹមបានទេ។

ដោយមើលឃើញពីបញ្ហាប្រឈមនេះ និងចំណុចពិសេសជាច្រើនផ្សេងទៀត អ្នកជំនាញផ្នែកអគ្គិសនីមួយក្រុមមកពីវិទ្យាស្ថានបច្ចេកវិទ្យាកម្ពុជា (ITC) បានរួមគ្នាបង្កើតគម្រោងមួយឈ្មោះថា The Licht ដើម្បីបង្កើតអាងចិញ្ចឹមចង្រិតដែលមានលក្ខណៈឆ្លាតវៃ គ្រប់គ្រងសីតុណ្ហភាពដោយប្រើបច្ចេកវិទ្យា និងអាចប្រើប្រាស់ជាមួយអាគុយ ឬផ្ទាំងសូឡាបានយ៉ាងងាយសម្រាប់ប្រជាជននៅតំបន់គ្មានភ្លើងអគ្គិសនីប្រើប្រាស់។

លោក ស្វែងឌី សិទ្ធិផន ជាអ្នកជំនាញផ្នែកអគ្គិសនី និងជាសហស្ថាបនិកគម្រោង The Licht បានលើកឡើងថា មូលហេតុដែលលោកចាប់ផ្តើមផលិតអាងចិញ្ចឹមចង្រិតនេះឡើង ព្រោះលោកយល់ឃើញថា ចង្រិតជាសត្វដែលងាយស្រួលចិញ្ចឹម ចំណាយទុនតិច ហើយទទួលបានផលច្រើន រួមទាំងមានប្រូតេអុីនខ្ពស់ ល្អសម្រាប់សុខភាពមនុស្សទៀតផង។

ការចិញ្ចឹមចង្រិត ប្រសិនបើចិញ្ចឹមដោយការភ្ញាស់ពង ត្រឹមតែ 1សប្តាហ៍ វាអាចញាស់ចេញមកជាកូនចង្រិត រួចហើយចំណាយពេលត្រឹមតែ6 ទៅ7សប្តាហ៍ទៀត យើងអាចប្រមូលផលបានហើយ។ ចំណែកឯចំណីទៀតសោត ក៏មិនចំណាយប្រាក់ច្រើនដែរ ដែលកត្តានេះផ្តល់ឱកាសល្អសម្រាប់កសិករដែលធ្វើឱ្យមានភាពងាយស្រួល ចំណាយតិច និងចំណេញច្រើន។ តែទោះជាយ៉ាងនេះក្តី កសិករខ្មែរអ្នកចិញ្ចឹមចង្រិតបច្ចុប្បន្ន ក៏មានកត្តាប្រឈមមួយចំនួនផងដែរ ដូចជាបញ្ហាអាងចិញ្ចឹមដែលត្រូវការទំហំដីធំ ប្រើប្រាស់ភ្លើងអគ្គិសនីច្រើន ហើយការគ្រប់គ្រងសីតុណ្ហភាពសម្រាប់អ្នកចិញ្ចឹមបែបប្រពៃណីក៏នៅមិនទាន់ធ្វើបានល្អដែរ។

ចង្រិតជាសត្វដែលមិនលំបាកថែទាំពេកទេ តែវាត្រូវការភាពសើម និងសីតុណ្ហភាពល្អ ចន្លោះពី 27 ទៅ 30អង្សារCប្រសិនបើក្តៅពេក ឬត្រជាក់ពេក វានឹងងាប់ ហេតុនេះការចិញ្ចឹមបែបធម្មជាតិអាចប្រឈមនឹងបាត់បង់ចង្រិតច្រើនទៅតាមការប្រែប្រួលរបស់អាកាសធាតុ។

លោក ស្វែងឌី សិទ្ធិផន បាននិយាយថា៖ “ដោយមើលឃើញពីផលចំណេញ និងកត្តាប្រឈមទាំងនេះ ទើបក្រុមរបស់ខ្ញុំសម្រេចចិត្តបង្កើតអាងចិញ្ចឹមចង្រិតឆ្លាតវៃ ដែលមុខងាររបស់វាអាចដោះស្រាយបញ្ហារបស់កសិករចិញ្ចឹមចង្រិតបានយ៉ាងច្រើន ទាំងបញ្ហាបច្ចេកទេស និងថវិកា”។

អ្នកជំនាញខាងលើបានលើកឡើងផងដែរថា អាងចិញ្ចឹមចង្រិតឆ្លាតវៃនេះមានបំពាក់ដោយបន្ទះបញ្ជរ (controller Board) ដែលមានមុខងារគ្រប់គ្រងសីតុណ្ហភាពឱ្យនៅល្មមសម្រាប់ការថែរក្សាចង្រិត និងចេះប្រែប្រួលទៅតាមអាកាសធាតុ ប្រសិនបើអាកាសធាតុត្រជាក់ក្រោម 27អង្សាC វានឹងប្រើម៉ាស៊ីនកម្តៅឱ្យមានសីតុណ្ហភាពល្មមឡើងវិញ តែប្រសិនបើមានសីតុណ្ហភាពលើស 30អង្សាC វានឹងបញ្ចេញសារធាតុសំណើមដើម្បីបន្ថយសីតុណ្ហភាពឱ្យមកល្មមវិញ។ ក្រៅពីនេះ វាមានបំពាក់ Sensor ជាមួយធុងទឹក និងគ្រប់គ្រងចំណីរបស់សត្វចង្រិតបានល្អផងដែរ ហើយឧបករណ៍មួយនេះថែមទាំងស៊ីភ្លើងតិច ដែលអនុញ្ញាតឱ្យអ្នក-ចិញ្ចឹមចង្រិតអាចប្រើប្រាស់អាគុយ ឬថាមពលពន្លឺព្រះអាទិត្យ(ផ្ទាំងសូឡា)បានយ៉ាងងាយស្រួល មិនលំបាកដូចកាលពីមុនដែលត្រូវការតែភ្លើងរដ្ឋទើបអាចចិញ្ចឹមបាននោះទេ។ ម្យ៉ាងវិញទៀត ការចិញ្ចឹមក្នុងអាងចិញ្ចឹមចង្រិតឆ្លាតវៃនេះធ្វើឱ្យកសិករយើងចំណេញដី ព្រោះទំហំរបស់វាប្រហែលជា 3ម៉ែត្រ 4ជ្រុងតែប៉ុណ្ណោះ មានកម្ពស់ 3ជាន់ និងមាន 6អាងត្រួតលើគ្នា។ ហេតុនេះប្រជាជនដែលមានទីកន្លែងតូចក៏អាចចិញ្ចឹមបានដែរ មិនចាំបាច់ចំណាយទីធ្លាធ្វើអាងធំដល់ទៅ 10ម៉ែត្រ 4ជ្រុង ឬធំជាងនេះដើម្បីចិញ្ចឹមនោះទេ។

លោក សុង វែហ្សឺនីឡងឌី អ្នកជំនាញអគ្គិសនី និងជាសហស្ថាបនិកគម្រោងអាងចិញ្ចឹមចង្រិតឆ្លាតវៃនេះបានលើកឡើងថា អាងចិញ្ចឹមចង្រិតតាមបែបបច្ចេកវិទ្យានេះ ក្រៅពីការរក្សាសីតុណ្ហភាព និងលក្ខខណ្ឌបច្ចេកទេសមួយចំនួនហើយ អាងនេះអាចជួយប្រជាជនឱ្យមានភាពងាយស្រួលខ្លាំងជាងមុនលើការប្រមូលផលផងដែរ ព្រោះពីមុន អ្នកចិញ្ចឹមតាមបែបប្រពៃណីត្រូវចុះទៅប្រមូលចាប់ចង្រិតនៅក្នុងអាងចិញ្ចឹមធំៗដែលធ្វើឱ្យត្រូវចំណាយពេលយូរ និងចំណាយធនធានច្រើនទៀតផងតែសម្រាប់អាងចិញ្ចឹមចង្រិតឆ្លាតវៃនេះវិញ គឺមិនលំបាកទេ ពេលប្រមូលផល គាត់គ្រាន់តែទាញថតចិញ្ចឹមនីមួយៗដែលមានចង្រិតចិញ្ចឹមនៅក្នុងនោះចេញមក គឺអាចប្រមូលផលចង្រិតបានយ៉ាងងាយ។

ចំពោះតម្លៃនៃការធ្វើអាងចិញ្ចឹមចង្រិតឆ្លាតវៃនេះវិញ ក៏ធូរថ្លៃជាងដែរ ទោះជាស្ថិតក្នុងចំនួនចិញ្ចឹមប៉ុនគ្នាក៏ដោយ ដូចជាអាងចិញ្ចឹមតាមបែបប្រពៃណីត្រូវចំណាយលុយប្រមាណជាង 1ពាន់ដុល្លារ តែអាងចិញ្ចឹមចង្រិតឆ្លាតវៃនេះត្រូវចំណាយត្រឹមតែជាង 700ដុល្លារតែប៉ុណ្ណោះ ដោយកសិករអាចប្រមូលផលពីការចិញ្ចឹមមួយលើកៗបានជាមធ្យម 180គីឡូក្រាមក្នុងអាងមួយ និងបើគិតជាសាច់ប្រាក់ក៏ប្រហែលជា 360ដុល្លារ។

លោក សុង វែហ្សឺនីឡងឌី បាននិយាយថា៖ “គម្រោងបង្កើតអាងចិញ្ចឹមចង្រិតឆ្លាតវៃនេះ មិនមែនត្រឹមតែជាគំនិតអាជីវកម្មនោះទេ តែវាក៏ជាគម្រោងមួយដែលជួយដល់បរិស្ថានផងដែរ ព្រោះគោលបំណងរបស់យើង គឺកាត់បន្ថយការប្រមូលចាប់សត្វចង្រិតពីក្នុងព្រៃ ដែលមិនយូរមិនឆាប់វានឹងប៉ះពាល់ដល់ជីវចម្រុះ ហើយវាថែមទាំងអាចសន្សំសំចៃភ្លើងអគ្គិសនីដែលជាផ្នែកមួយក្នុងការជួយដល់ភពផែនដីយើងថែមទៀតផង”។

ឆ្លើយតបចំពោះការយល់ឃើញខុសគ្នារវាងចង្រិតចិញ្ចឹម និងចង្រិតធម្មជាតិ លោក វែហ្សឺនីឡងឌី បានលើកឡើងថា តាមពិតមនុស្សភាគច្រើនមិនចូលចិត្តរបស់ចិញ្ចឹមនោះទេ ហើយចូលចិត្តចង្រិតធម្មជាតិ តែស្ថានភាពពិត ចង្រិតចិញ្ចឹមតាមអាងចិញ្ចឹមឆ្លាតវៃអាចមានអនាម័យជាងចង្រិតនៅក្នុងព្រៃ ព្រោះអាហាររបស់វាត្រូវបានផ្សំចេញពីបន្លែ និងអាហារមួយចំនួនទៀតដែលគ្មានជាតិគីមី ដែលរកបាននៅក្នុងភូមិ។ ចំណែកឯចង្រិតនៅក្នុងព្រៃ វាអាចមានបញ្ហាមួយចំនួនលើរឿងចំណី ព្រោះយើងមិនអាចគ្រប់គ្រងវាបាន៕

February 16, 2019

ឆ្នាំ2019 វិស័យនាំចេញសម្លៀកបំពាក់ និងស្បែកជើងនឹងចំណេញពីការលុបចេញ CO ប្រមាណ 13លានដុល្លារ

ការនាំចេញផលិតផលកាត់ដេរសម្លៀកបំពាក់ និងស្បែកជើងក្នុងឆ្នាំ2018 របស់កម្ពុជាទៅកាន់ទីផ្សារអន្តរជាតិមានកំណើនឡើង 24.7% (គិតជាទឹកប្រាក់ប្រមាណ 10ប៊ីលានដុល្លារ) បើធៀបនឹងឆ្នាំ2017។ នេះបើតាមរបាយការណ៍របស់ធនាគារជាតិនៃកម្ពុជា។

របាយការណ៍នេះបានបញ្ជាក់ថា ការនាំចេញសម្លៀកបំពាក់ និងស្បែកជើងបានកើនឡើង24.7% ស្របពេលការនាំចេញផលិតផលចម្បងៗផ្សេងទៀត ដូចជា ទោចក្រយាន បរិក្ខារអគ្គិសនី និងគ្រឿងបន្លាស់យានយន្តក៏បានរួមចំណែកដល់កំណើននាំចេញសរុបដែរ។ ការធ្វើពិពិធកម្មលើមុខទំនិញនាំចេញបាននិងកំពុងកាត់បន្ថយការពឹងផ្អែកទាំងស្រុងលើផលិតផលសម្លៀកបំពាក់ និងស្បែកជើងជាលំដាប់ បើទោះបីជាការនាំចេញផលិតផលទាំងនេះបន្តមានសមាមាត្រធំនៅក្នុងការនាំចេញសរុបក៏ដោយ។

របាយការណ៍បានលើកឡើងថា៖ “ការនាំចេញផលិតផលកាត់ដេរ និងស្បែកជើងក្នុងឆ្នាំ2018មានប្រមាណជាង 73.7%នៃការនាំចេញសរុប ក្នុងនោះសម្រាប់ផលិតផលសម្លៀកបំពាក់មាន 66% និងស្បែកជើងមាន 8%។ សមាមាត្រនៃការនាំចេញផលិតផលកាត់ដេរបានថយចុះពី69% មក76%ក្នុងរយៈពេល10ឆ្នាំចុងក្រោយនេះ”។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានបង្ហាញពីការដាក់ចេញនូវវិធានការកែទម្រង់ធំថ្មីៗ នៅក្នុងកិច្ចប្រជុំនៃវេទិការាជរដ្ឋាភិបាលផ្នែកឯកជនដែលក្នុងនោះ វិធានការជាក់ស្តែងក្នុងការលុបចោលនូវការចេញវិញ្ញាបនបត្របញ្ជាក់ប្រភពដើម(Certificate of Origin ឬCO)នឹងធ្វើឱ្យវិស័យកាត់ដេរសម្លៀកបំពាក់ និងស្បែកជើងចំណេញជាទឹកប្រាក់ប្រមាណ 13លានដុល្លារអាមេរិក។

ឯកឧត្តមបានបញ្ជាក់ទៀតថា ជាមួយគ្នានេះ ដើម្បីកាត់បន្ថយថ្លៃនាំចេញ និងនាំចូលឱ្យបានជាអតិបរិមាដល់អ្នកធុរកិច្ចក្នុងវិស័យនេះ សម្រាប់ថ្លៃស្គែនកុងតឺន័រទាំងនាំចេញ និងនាំចូលត្រូវបានបញ្ចុះដូចគ្នានឹងការនាំចេញអង្ករដែរគឺ 10ដុល្លារសម្រាប់កុងតឺន័រទំហំ 20ហ្វ៊ីត និង16ដុល្លារសម្រាប់កុងតឺន័រទំហំ 40ហ្វ៊ីត ដោយចាប់អនុវត្តពីថ្ងៃទី1 ខែមេសា ឆ្នាំ2019 តទៅ។

ក្នុងការលុបបំបាត់នូវបញ្ហាចំណាយនេះ វិស័យកាត់ដេរសម្លៀកបំពាក់ និងស្បែកជើងនឹងទទួលបានការចំណេញជាទឹកប្រាក់ប្រមាណពី 80លានដុល្លារអាមេរិក និងចំណេញពីការកាត់បន្ថយថ្លៃស្គែនកុងតឺន័រប្រមាណពី 3.2លានដុល្លារអាមេរិក។

ជាមួយគ្នានេះដែរ រាជរដ្ឋាភិបាលក៏នឹងទទួលរងនូវការបាត់បង់ចំណូលប្រមាណ 32លានដុល្លារអាមេរិក។ តែ វិស័យឯកជននឹងចំណេញជាទឹកប្រាក់ប្រមាណ 43លានដុល្លារអាមេរិក ពីការបញ្ចប់តួនាទីអចិន្ត្រៃយ៍របស់អគ្គនាយកដ្ឋានកាំកុងត្រូល ពីមាត់ច្រកអន្តរជាតិ ព្រំដែនគោក អាកាសយានដ្ឋាន និងកំពង់ផែ។

យោងតាមរបាយការណ៍ធនាគារជាតិនៃកម្ពុជាបានបញ្ជាក់ថា៖ “បច្ចុប្បន្នពលកម្មក្នុងផ្នែកកាត់ដេរសម្លៀកបំពាក់ និងស្បែកជើងមានចំនួនកម្មករ-កម្មការិនីប្រមាណ 80ម៉ឺននាក់។ ចំនួនរោងចក្រសរុបមានប្រមាណ 1,585រោងចក្រ កើនឡើង 4.1% បើធៀបនឹងឆ្នាំ2017 ក្នុងនោះរោងចក្រដែលបើកថ្មីមានចំនួន 146រោងចក្រ។ ទន្ទឹមនឹងនេះ រោងចក្រផលិតទំនិញសម្រាប់នាំចេញបានកើនឡើងគួរឱ្យកត់សម្គាល់ដែលបង្ហាញពីឥទ្ធិពលវិជ្ជមានពីសង្គ្រាមពាណិជ្ជកម្មរវាងសហរដ្ឋអាមេរិក និងចិនមកលើវិស័យនេះ ”។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា (GMAC) បានមានប្រសាសន៍កាលពីពេលកន្លងមកថា៖ “មកដល់បច្ចុប្បន្ន សមាគមមានរោងចក្រជាសមាជិកប្រហែល600រោងចក្រ ដែលបានផ្តល់ការងារទៅដល់ពលរដ្ឋខ្មែរប្រមាណជា 78ម៉ឺននាក់ ហើយផលិតផលក្នុងវិស័យកាត់ដេររបស់កម្ពុជាដែលនាំចេញទៅទីផ្សារអឺរ៉ុប មានរហូតជាង 40% បន្ទាប់មកមាន អាមេរិក កាណាដា និងជប៉ុន”។

ទោះជាយ៉ាងណា បច្ចុប្បន្ន ក្រៅពីទីផ្សារនាំចេញទៅអឺរ៉ុប និងអាមេរិកហើយ សមាគមរោងចក្រកាត់ដេរក៏បាននិងកំពុងជំរុញដល់ក្រសួងពាណិជ្ជកម្មព្យាយាមជួយរកទីផ្សារ និងឱ្យជួយចរចាជាមួយប្រទេសផ្សេងៗ ដូចជាប្រទេសរុស្ស៊ី និងចិនជាដើម ដើម្បីអាចទទួលបានការលើកលែង ឬអនុគ្រោះពន្ធនាំចូល ដោយសង្ឃឹមថា នឹងមានលទ្ធផលជាផ្លែផ្កានាពេលឆាប់ៗខាងមុខ៕

February 16, 2019

ថ្មីទៀតហើយ!! មាស សុខសោភា ៖ «រឿងចូលហង្សមាសនេះ ខ្ញុំកំពុងតែពិចារណាហើយ»

តារាស្រី មាស សុខសោភា នាពេលថ្មីៗនេះ កំពុងតែមានសកម្មភាពមមាញឹកជាមួយកម្មវិធី ស្នាដៃកូនខ្មែរសម្រាប់មាស សុខសោភា ដែលគេមើលឃើញថា តារាស្រីទឹកដមសំឡេងផ្អែមជាងទឹកឃ្មុំមួយដួងនេះ មានបទចម្រៀងនិពន្ធថ្មីនៅក្នុងដៃយ៉ាងច្រើន ដែលបេក្ខជនប្រលងក្នុងកម្មវិធី និពន្ធដើម្បីឱ្យនាងបានច្រៀង និងក៏កំពុងទទួលបានពីប្រជាប្រិយភាពបទចម្រៀងក្នុងចំណោមចំណាត់ថ្នាក់ទាំង 5 ផងដែរ។ ស្របពេលដែលកំពុងឡើងកូដជាមួយបទនិពន្ធថ្មីៗ ស្រាប់តែ ធ្លាយដំណឹងមកថា នាងកំពុងពិចារណាចូលទ្រនំហង្សមាសមែនទែនហើយ។

សូមរំឭកថា កន្លងទៅក្នុងអំឡុងខែ កុម្ភៈ ឆ្នាំ 2018 មាស សុខសោភា ត្រូវបានអ្នកសារព័ត៌មានទម្លាយរឿង វេចបង្វិចចេញពីថោន ក៏ប៉ុន្ដែនាងបានចេញមុខបកស្រាយចំពោះព័ត៌មានដែលបានសុះសាយថា រូបនាងបានបញ្ចប់កុងត្រាកិច្ចសន្យាជាមួយផលិតកម្មថោន ប៉ុន្ដែមិនរត់ចូលទៅផលិតកម្មធំគឺ រស្មីហង្សមាស នោះទេ ពោលគឺនាងបានធ្វើការបដិសេធ និងច្រាណចោលរាល់ព័ត៌ដែលបានចេញមក ដែលធ្វើមហាជនមានការងឿងឆ្ងល់ រួមទាំងខាងផលិតកម្មសាមីខ្លួនផ្ទាល់ មានប្រិតកម្មខ្លាំងលើរូបនាង។ យ៉ាងណាមិញ នាងបានសង្កត់ធ្ងន់ កាលដែលគ្មានកុងត្រានៅថោន និងមិនព្រមចាកចេញនោះ គឺនាងខិតខំប្រឹងប្រែងធ្វើការដោយកម្លាំងចិត្ត និងការយោគយល់ទុកចិត្តគ្នាទៅវិញទៅមក។

ចូលមកដល់ខែកុម្ភៈ ឆ្នាំ 2019 នេះវិញម្ដង ស្រាប់តែសារព័ត៌មានក្នុងស្រុកមួយបានទម្លាយម្ដងទៀតថា មាស សុខសោភា ពិចារណាចូលផលិតកម្មហង្សមាសទៀតហើយ។ ខណៈមហាជនជាច្រើនកំពុងចាប់អារម្មណ៍ថា តើពិតមែន100% ឬមិនទៅហង្សមាស ទេ? ព្រោះថា មហាជនជាច្រើនគេរំពឹងថា ប្រសិនបើនាងទៅហង្សមាសពិតនោះ គឺជារឿងល្អសម្រាប់នាង និងបានក្ដោបឱកាសការងារសិល្បៈច្រើនទៀតផង តាមរយៈកម្មវិធីច្រើននៅទូរទស្សន៍ហង្សមាស។

មាស សុខសោភា បានតបទៅអ្នកសារព័ត៌មានវិញថា ចំពោះរឿងចូលហង្សមាស នេះ ខ្ញុំកំពុងតែពិចារណាហើយ។ យើងត្រូវការពេលវេលាគិតឱ្យបានច្បាស់លាស់ជាមុនសិន។ ខ្ញុំមានមិត្តភក្តិនៅទីនោះ (ហង្សមាស) គាត់ចង់ឱ្យខ្ញុំទៅហ្នុងដែរ ព្រោះគាត់ចង់ឃើញសកម្មភាពថ្មីៗរបស់យើងនៅឆ្នាំថ្មីនេះ ហើយខ្ញុំគិតថា ហង្សមាស ពេលនេះ គាត់ក៏មានការងារសិល្បៈច្រើនដែរ។ ប៉ុន្តែខ្ញុំត្រូវការលក្ខខណ្ឌរបស់ខ្ញុំដែរ គឺដូចខ្ញុំធ្លាប់ប្រាប់អ៊ីចឹងថា ខ្ញុំត្រូវការសិទ្ធិសេរីភាព។ ខ្ញុំយល់ថា បើហង្សមាស គាត់ចង់បានខ្ញុំមែន គាត់នឹងយល់ស្របតាមសំណើរបស់យើង ដែលចង់បានជាមិនខាន៕

February 16, 2019

ស្រូវ 3ប្រភេទ ទទួលបានជយលាភីជាស្រូវល្អបំផុតប្រចាំប្រទេសកម្ពុជា

ការប្រកួតស្រូវថ្នាក់ជាតិ លើកទី3 បានបញ្ចប់កាលពីដើមខែនេះ ដោយមានស្រូវ 3ប្រភេទទទួលបានជយលាភីជាស្រូវល្អបំផុតប្រចាំប្រទេសកម្ពុជា។

បើយោងតាមលទ្ធផលជយលាភីនៃការប្រកួតស្រូវល្អបំផុតលើកទី3 ប្រចាំកម្ពុជា ស្រូវដែលល្អបំផុតប្រចាំកម្ពុជានោះរួមមាន ស្រូវផ្ការំដួល បានទៅលើសហគមន៍ស្វាយរន្ធអមត:ស្រូវពូជ ខេត្តតាកែវ។ ស្រូវសែនក្រអូប បានទៅលើសហគមន៍ជ្រៃសាមគ្គីបង្កើនផល ខេត្តបាត់ដំបង។ ស្រូវអុីអ៊ែរបានទៅលើសហគមន៍អភិវឌ្ឍន៍សង្គមកម្ពុជា ខេត្តកំពង់ឆ្នាំង។ សហគមន៍ដែលបានទទួលជយលាភីទាំងនោះ ទទួលបានម៉ាស៊ីនដាំគ្រាប់ស្រូវ (Eli Seeders) ម្នាក់ 1គ្រឿង សរុបជាទឹកប្រាក់ប្រមាណ 15លានរៀលពីសហព័ន្ធស្រូវអង្ករកម្ពុជា និងសមាជិក-សមាជិកា។

លោក សុខ ពុទ្ធិវុធ ប្រធានសហព័ន្ធស្រូវអង្ករកម្ពុជា បានឱ្យដឹងថា គោលបំណងដែលសហព័ន្ធស្រូវអង្ករកម្ពុជារៀបចំការប្រកួតស្រូវល្អបំផុតលើកទី3 នេះឡើង គឺដើម្បីស្វែងរកសហគមន៍ដែលបានផលិតស្រូវមានគុណភាពល្អបំផុតប្រចាំកម្ពុជាក្នុងឆ្នាំ2018 ដោយទទួលបាននូវពានរង្វាន់លើកទឹកចិត្តពីសហព័ន្ធស្រូវអង្ករកម្ពុជា និងរាជរដ្ឋាភិបាលកម្ពុជា។

លោកប្រធានសហព័ន្ធ បានមានប្រសាសន៍ថា៖ “កម្មវិធីនេះទៀតសោត ក៏មានការលើកទឹកចិត្តដល់សហគមន៍កសិករទាំងអស់ឱ្យបន្តខិតខំអភិវឌ្ឍសហគមន៍របស់ខ្លួន ដើម្បីក្លាយជាសហគមន៍គំរូប្រចាំប្រទេសកម្ពុជា និងសហគមន៍ដែលផលិតស្រូវចំតម្រូវការទីផ្សារ នឹងពង្រឹង និងពង្រីកការទំនាក់ទំនងរវាងសហគមន៍ និងភាគីពាក់ព័ន្ធនៅក្នុងខ្សែចង្វាក់ផលិតកម្មស្រូវអង្ករកម្ពុជា ជាពិសេសរវាងសមាជិកសហព័ន្ធ ដែលមានទាំងក្រុមហ៊ុននាំចេញ រោងម៉ាស៊ីនកិនស្រូវ ហើយនិងសហគមន៍កសិករ”។

លោក ពុទ្ធិវុធ បានបន្តថា ការប្រកួតប្រជែងនេះនឹងជួយពង្រឹងគុណភាពស្រូវអង្ករ និងធ្វើឱ្យស្រូវអង្ករកម្ពុជាទទួលបានការប្រកួតប្រជែងខ្ពស់នៅក្នុងទីផ្សារអន្តរជាតិ។

លោកបន្ថែមថា៖ “តម្រូវការអង្ករដែលមានគុណភាព មានច្រើនណាស់នៅលើទីផ្សារអន្តរជាតិ ហើយការប្រារព្ធពិធីប្រកួតប្រជែងស្រូវល្អបំផុតនេះ យើងសង្ឃឹមថា នឹងផ្សព្វផ្សាយស្រូវអង្ករកម្ពុជា និងជួយបង្កើនគុណភាពចំពោះស្រូវអង្កររបស់យើង ដូច្នេះយើងអាចប្រកួតនៅលើទីផ្សារអន្តរជាតិបាន”។

បើយោងតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជាបានឱ្យដឹងថា ការប្រកួតស្រូវថ្នាក់ជាតិលើកទី3 នេះក៏មានការធ្វើបទបង្ហាញរបស់សហព័ន្ធស្រូវអង្ករកម្ពុជាស្តីពីបច្ចុប្បន្នភាពនៃវិស័យស្រូវអង្ករកម្ពុជា មានកិច្ចពិភាក្សាពិគ្រោះយោបល់ និងស្វែងរកដំណោះស្រាយជាមួយសមាជិក សមាជិកាទាក់ទងទៅនឹងវិស័យស្រូវអង្ករកម្ពុជាទាំងមូល បន្ទាប់ពីសហគមន៍អឺរ៉ុបបានសម្រេចដាក់ពន្ធមកលើការនាំចូលអង្ករពីកម្ពុជា ដែលសហព័ន្ធបានអញ្ជើញវាគ្មិនជាតិ អន្តរជាតិមកផ្លាស់ប្តូរទស្សនៈ និងចែករំលែកនូវបទពិសោធលើចំណុចសំខាន់ជាច្រើន។

ក្នុងនោះមានការពិភាក្សាថា តើការដាក់ពន្ធរបស់សហគមន៍អឺរ៉ុបលើការនាំចូលអង្ករពីកម្ពុជា បាននិងកំពុងធ្វើឱ្យប៉ះពាល់ដល់វិស័យស្រូវអង្ករកម្ពុជាដូចម្តេចខ្លះ? តើកម្ពុជាគួរធ្វើពិពិធកម្មទីផ្សារអន្តរជាតិដូចម្តេចសម្រាប់វិស័យស្រូវអង្កររបស់កម្ពុជា ក្រៅពីការជួយសម្រួលពាណិជ្ជកម្មក្នុងប្រទេសរបស់រដ្ឋាភិបាល? និងថាតើកម្ពុជាគួររៀបចំផែនការយុទ្ធសាស្ត្រទីផ្សារយ៉ាងដូចម្តេច ដើម្បីផ្សព្វផ្សាយ និងជំរុញការប្រើប្រាស់ម៉ាកវិញ្ញាតកម្ម “ម្លិះអង្គរ” ដោយផ្សារភ្ជាប់ជាមួយពានរង្វាន់អង្ករពិភពលោក?។

គួរបញ្ជាក់ថា កាលពីឆ្នាំមុន ការនាំចេញអង្កររបស់កម្ពុជាបានធ្លាក់ចុះប្រមាណជា 1.5ភាគរយ ដែលមានចំនួន 626ពាន់តោន។ ក្នុងនោះប្រទេសចិនជាទីផ្សារដ៏ធំបំផុតរបស់កម្ពុជា ដោយបានស្រូបយកអង្ករប្រមាណជា 270ពាន់តោននៅឆ្នាំ2018។

ដោយឡែកកាលពីខែមុននេះ លោកប្រធានាធិបតីចិន ស៊ី ជីន ភីង បានប្រកាសបន្ថែមកូតានាំចូលអង្ករពីកម្ពុជាប្រមាណជា 100ពាន់តោនបន្ថែមទៀត ដែលនឹងធ្វើឱ្យការនាំចេញអង្ករពីកម្ពុជាទៅចិនមានប្រមាណជា 400ពាន់តោននៅឆ្នាំ2019 នេះ។

អង្ករក្រអូបប្រណីតកម្ពុជាដែលមានម៉ាក ម្លិះអង្គរ (Malys Angkor) បានទទួលពានរង្វាន់អង្ករល្អបំផុតរបស់ពិភពលោកប្រចាំឆ្នាំ2018 ជាឆ្នាំទី4 ហើយដែលកម្ពុជាបានគ្រងតំណែងជើងឯកអង្ករល្អបំផុតរបស់ពិភពលោក 4ឆ្នាំជាប់ៗគ្នា ពោលគឺនៅឆ្នាំ2012 - 2013 និង2014 ដោយឡែកអង្ករកម្ពុជាក៏ទទួលបានតំណែងជារងជើងឯកចំនួន 3ឆ្នាំជាប់គ្នាផងដែរ។

បើយោងតាមរបាយការណ៍ពីក្រសួងកសិកម្ម នៅឆ្នាំ2018 កន្លងទៅនេះ កម្ពុជាផលិតស្រូវបានចំនួន 7.4លានតោន។ ផ្ទៃដីច្រូតកាត់បានប្រមាណជា 2.4លានហិកតាក្នុងចំណោមផ្ទៃដីដាំដុះ 2.7លានហិកតា។ របាយការណ៍បានបញ្ជាក់ថា ជាមធ្យមក្នុង 1ហិកតាកសិករអាចផលិតបានស្រូវចំនួន 3.07តោន ដែលកាលពីឆ្នាំ2006 បានតែប្រមាណ 2.6តោនជាមធ្យមប៉ុណ្ណោះក្នុង 1ហិកតា៕

February 15, 2019

NBC និងធនាគារកណ្ដាលថៃ នឹងសាកល្បងដាក់ឱ្យដំណើរការប្រព័ន្ធទូទាត់ QR code ដើម្បីបន្ថយចំណាយលើការផ្ទេរប្រាក់ឆ្លងប្រទេស

ធនាគារជាតិនៃកម្ពុជា(NBC) និងធនាគារកណ្តាលថៃបានចុះកិច្ចព្រមព្រៀងដាក់ឱ្យដំណើរការសាកល្បងគម្រោងអភិវឌ្ឍន៍ប្រព័ន្ធ QR code ដើម្បីជួយសម្រួលដល់សេវាទូទាត់រាយនៅកម្ពុជា និងនៅប្រទេសថៃ។

ការចុះអនុស្សរណៈយោគយល់ស្តីពីកិច្ចសហប្រតិបត្តិការលើនវានុវត្តន៍នៃការទូទាត់ និងហិរញ្ញវត្ថុនេះ ធ្វើឡើងក្នុងគោលបំណងពង្រឹងកិច្ចសហប្រតិបត្តិការក្នុងវិស័យធនាគារ និងហិរញ្ញវត្ថុ និងជំរុញកំណើនសេដ្ឋកិច្ចនៃប្រទេសទាំង2 ប្រកបដោយចីរភាព។

អនុស្សរណៈយោគយល់នេះសំដៅគាំទ្រដល់កិច្ចសហការក្នុងការអភិវឌ្ឍអន្តរប្រតិបត្តិការនៃស្តង់ដាប្រព័ន្ធ QR code សម្រាប់ការទូទាត់ក្នុងប្រទេស និងក្រៅប្រទេសប្រកបដោយប្រសិទ្ធភាព និងមានសុវត្ថិភាព ព្រមទាំងជំរុញដល់ការប្រើប្រាស់រូបិយវត្ថុជាតិ និងនវានុវត្តន៍នៃវិស័យហិរញ្ញវត្ថុក្នុងប្រទេសទាំង2។

អនុស្សរណៈយោគយល់ស្តីពីកិច្ចសហប្រតិបត្តិការលើនវានុវត្តន៍នៃការទូទាត់ និងហិរញ្ញវត្ថុនេះត្រូវបានចុះហត្ថលេខាដោយឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជា និងលោកVeerathai Santiprabhob ទេសាភិបាលនៃធនាគារកណ្តាលថៃ។ ពិធីចុះហត្ថលេខានេះធ្វើឡើងនៅក្នុងកិច្ចប្រជុំទ្វេភាគីប្រចាំឆ្នាំរវាងធនាគារកណ្តាលទាំងពីរ នៅរាជធានីភ្នំពេញ កាលពីដើមខែកុម្ភៈ ឆ្នាំ2019 កន្លងទៅ។ គួរបញ្ជាក់ដែរថា កិច្ចប្រជុំទ្វេភាគីប្រចាំឆ្នាំនេះមានគោលបំណងពង្រឹងកិច្ចសហប្រតិបត្តិការ និងបង្កើនទំនាក់ទំនងជាមិត្តភាពរវាងធនាគារកណ្តាលនៃប្រទេសទាំង2ឱ្យកាន់តែជិតស្និទ្ធ។ កន្លងមកកិច្ចប្រជុំប្រចាំឆ្នាំនេះបានរួមចំណែកពង្រឹងកិច្ចសហប្រតិបត្តិការក្នុងវិស័យធនាគារ និងហិរញ្ញវត្ថុ និងជំរុញកំណើនសេដ្ឋកិច្ចនៃប្រទេសទាំង2 ប្រកបដោយចីរភាព។

ឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជាបានមានប្រសាសន៍ឱ្យដឹងថា នេះជាកិច្ចប្រជុំប្រចាំឆ្នាំរវាងធនាគារកណ្តាលនៃប្រទេសទាំងពីរ ដែលកាលពីឆ្នាំកន្លងទៅយើងបានធ្វើឡើងនៅទីក្រុងឈៀងម៉ៃ ប្រទេសថៃ ដោយឡែកនៅឆ្នាំ2019 កិច្ចប្រជុំនេះបានធ្វើឡើងនៅទីក្រុងភ្នំពេញ ប្រទេសកម្ពុជា។

ឯកឧត្ដមទេសាភិបាលបានមានប្រសាសន៍ថា៖ “វត្តមានរបស់ទេសាភិបាលថៃនៅកម្ពុជា គឺមានសារៈសំខាន់ណាស់សម្រាប់ពង្រឹងកិច្ចសហប្រតិបត្តិរវាងធនាគារកណ្តាលនៃប្រទេសទាំងពីរ ខ្ញុំសូមវាយតម្លៃខ្ពស់នូវកិច្ចសហប្រតិបត្តិការដ៏ល្អនេះដែលសម្រេចបាន និងបន្តនូវស្មារតីកិច្ចសហប្រតិបត្តិការ”។ ឯកឧត្ដមបន្តថា ធនាគារកណ្តាលថៃបានជួយចែករំលែកបទពិសោធដល់មន្ត្រីធនាគារកណ្តាលកម្ពុជា ដូចជាការត្រួតពិនិត្យបច្ចេកវិទ្យាហិរញ្ញវត្ថុ ប្រព័ន្ធទូទាត់ និងការអនុវត្តគោលនយោបាយរូបិយវត្ថុជាដើម។

គួរបញ្ជាក់ដែរថា ការដាក់ឱ្យដំណើរការសាកល្បងគម្រោងអភិវឌ្ឍន៍ប្រព័ន្ធ QR code នេះ គឺដើម្បីជួយសម្រួលដល់សេវាទូទាត់រាយនៅកម្ពុជា និងរវាងប្រទេសថៃ និងកម្ពុជា ដោយប្រព័ន្ធនេះនឹងត្រូវដាក់ឱ្យដំណើរការនៅពាក់កណ្តាលឆ្នាំនេះ។

លោក Apisak Tantivorawong រដ្ឋមន្ត្រីហិរញ្ញវត្ថុរបស់ប្រទេសថៃបានថ្លែងប្រាប់សារព័ត៌មានរបស់ប្រទេសថៃថា ធនាគារកណ្តាលថៃបានផ្តួចផ្តើមការផ្ទេរប្រាក់ឆ្លងប្រទេសជាមួយកម្ពុជា ឡាវ និងវៀតណាមដោយប្រើប្រាស់ប្រព័ន្ធ QR Code ដើម្បីសម្រួលដល់ការធ្វើសមាហរណកម្មវិស័យធនាគារឱ្យកាន់តែស៊ីជម្រៅនៅក្នុងតំបន់។

លោក Tantivorawong បានបន្តថា៖“សេវាកម្មទូទាត់តាមរយៈប្រព័ន្ធ QR code នេះនឹងមានការចំណាយតិចក្នុងការផ្ទេរប្រាក់នៅក្នុងតំបន់ ជាពិសេសសម្រាប់ជួយដល់កម្មករចំណាកស្រុកមកពីប្រទេសកម្ពុជា ឡាវ មីយ៉ាន់ម៉ា និងវៀតណាមដែលកំពុងធ្វើការនៅក្នុងប្រទេសថៃ ដែលសព្វថ្ងៃពួកគេត្រូវបានគិតថ្លៃសេវាផ្ទេរប្រមាណជា 10ភាគរយនៃចំនួនទឹកប្រាក់ដែលផ្ទេរសម្រាប់សេវាកម្មផ្ទេរប្រាក់ឆ្លងប្រទេសមួយដង”។

ថ្លែងក្នុងសិក្ខាសាលាកាលពីពេលកន្លងទៅលោកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា ក៏បានឱ្យដឹងដែរថា អ្នកប្រើប្រាស់ប្រព័ន្ធនេះតម្រូវឱ្យមានគណនីធនាគារជាប្រាក់រៀល ហើយគេអាចធ្វើការទូទាត់ទំនិញនៅប្រទេសថៃបាននៅពេលទិញទំនិញ ខណៈដែលជនជាតិថៃធ្វើដំណើរមកកម្ពុជា ក៏គេអាចធ្វើការទូទាត់ជាលុយបាតថៃផងដែរនៅកម្ពុជា។

លោកស្រីអគ្គនាយិកាបានថ្លែងថា៖ “យើងមានសុទិដ្ឋិនិយមថា នៅពាក់កណ្តាលឆ្នាំនេះ ប្រព័ន្ធនេះនឹងអាចប្រើប្រាស់បាន នេះជាជំហានមួយទៀតនៃផែនការរបស់យើងសម្រាប់ធ្វើសមាហរណកម្មតាមរយៈកិច្ចសហប្រតិបត្តិការទ្វេភាគី យើងមានគម្រោងពង្រីកប្រព័ន្ធនេះទៅបណ្តាប្រទេសដទៃទៀតនៅអាស៊ាន”។

លោកស្រីបន្តថា ប្រព័ន្ធ QR Codeនេះនឹងជំរុញឱ្យប្រជាជនកម្ពុជាកាន់តែច្រើនបើកគណនីធនាគារជាប្រាក់រៀល ដោយសារតែពួកគេគិតថា វាមានអត្ថប្រយោជន៍ទាំងក្នុង និងក្រៅប្រទេស។

បើយោងតាមសេចក្តីប្រកាសព័ត៌មានរបស់ធនាគារជាតិនៃកម្ពុជា ប្រព័ន្ធ QR code នេះមានភាពងាយស្រួល លឿន រហ័ស និងសន្សំសំចៃខ្ពស់ ហើយប្រជាជនកម្ពុជានឹងមិនខ្លាចក្នុងការខាតបង់នូវអាត្រាប្តូរប្រាក់នៅពេលដែលពួកគេចាយលុយរៀលនៅក្នុងប្រទេសថៃឡើយ។ ម្យ៉ាងវិញទៀត អ្នកប្រើប្រាស់នឹងមិនបារម្ភពីការខ្វះខាតលុយបាតនៅក្នុងកាបូបនៅពេលដែលពួកគេទៅទស្សនាប្រទេសថៃឡើយ៕

February 15, 2019

Category: សង្គម និងសេដ្ឋកិច្ច