សង្គម និងសេដ្ឋកិច្ច - La Reine Media

ឪពុកពែកមី មានជំងឺដាច់សរសៃឈាមក្នុងខួរក្បាល ហើយដង្ហើយហៅរកកូនពៅ

មិត្តអ្នកតាមដានព័ត៌មានសិល្បៈបានជ្រាបដឹងមកហើយថា ឪពុកតារាកំប្លែង ពែកមី កំពុងតែសង្គ្រោះបន្ទាន់នៅក្នុងមន្ទីពេទ្យ ដោយសារតែមានជំងឺដាច់សរសៃឈាមក្នុងខួរក្បាល ធ្វើឱ្យឪពុកលោកស្លាប់មួយចំហៀងខ្លួន។ ដំណឹងនេះធ្វើឱ្យមហាជនក្ដុកក្ដួលនៅក្នុងអារម្មណ៍ និងបារម្ភចំពោះស្ថានភាពគ្រួសារតារាកំប្លែងរូបនេះ។

នៅពេលថ្មីៗនេះ សារព័ត៌មាន ឡារ៉ែន ទទួលបានដំណឹងមកថា លោកពុករបស់តារាកំប្លែង នាយ ពែកមី ពោលចង់ជួបកូនពៅរបស់គាត់ រហូតដល់ថ្នាក់នាយ ពែកមី បង្ហោះសារក្នុងបណ្តាញសង្គមហ្វេសប៊ុក និងបង្ហាញពីអារម្មណ៍ឪពុកកំពុងដេកឈឺនៅមន្ទីពេទ្យថា «ឳពុកខ្ញុំយំនឹកកូនពៅដែលនៅស្រុកអាណិតណាស់»។ រហូតមកទល់ពេលនេះ លោក ពែកមី នៅមិនទាន់បានបញ្ជាក់អំពីស្ថានភាពធូរស្បើយរបស់ឪពុកលោកនៅឡើយទេ និងដោយសារសព្វថ្ងៃនេះ លោកមមារញឹកជាមួយការងារសិល្បៈជាច្រើន ហើយឆ្លៀតពេលមកមើលឪពុកកំពុងសម្រាកព្យាបាលទៀតផង។

ដើម្បីឱ្យកាន់តែជាក់ច្បាស់ សូមទស្សនារូបភាពខាងក្រោមនេះ ៖

February 21, 2019

ភាពភ័យខ្លាចជាឧបសគ្គធំមួយសម្រាប់យុវជនកម្ពុជាក្នុងការអភិវឌ្ឍខ្លួន

ភាពភ័យខ្លាចជាឧបសគ្គដ៏ធំសម្រាប់ប្រជាជនកម្ពុជា និងយុវជនកម្ពុជាក្នុងការអភិវឌ្ឍសមត្ថភាពរបស់ខ្លួនក្នុងសង្គមការងារ និងអាជីវកម្ម។ យុវជនខ្លាចមិនមានការងារធ្វើ ខ្លាចធ្វើហើយមានការរិះគន់ ខ្លាចប្រឈមនឹងការលំបាក និងខ្លាចរឿងជាច្រើនទៀតដែលនាំឱ្យមានគំនិតអវិជ្ជមានរហូតឈានដល់បោះបង់ការងារសំខាន់ៗចោល។

សាស្ត្រាចារ្យផ្នែកពាណិជ្ជកម្ម លោក រិន រ៉ាវុធ បានលើកឡើងថា យុវជនជាច្រើនកំពុងអភិវឌ្ឍសមត្ថភាពបានយ៉ាងល្អទាំងផ្នែកជំនាញបច្ចេកទេស និងសង្គម តែអ្វីដែលជាឧបសគ្គរាំងស្ទះមិនឱ្យពួកគេបង្ហាញស្នាដៃ ឬច្នៃចំណេះដឹងទាំងអស់នោះក្លាយជាផលិតផលដ៏មានសក្តានុពលនោះ គឺភាពភ័យខ្លាច។

ភាពភ័យខ្លាចធ្វើឱ្យមនុស្សម្នាក់ៗរួញរា មិនហ៊ានខិតខំប្រឹងប្រែង និងបញ្ចេញស្នាដៃសំខាន់ៗដើម្បីចាប់យកឱកាសការងារដែលសង្គមកំពុងត្រូវការ ព្រោះគេមានគំនិតអវិជ្ជមានចំពោះអនាគតរបស់ខ្លួន ហើយបណ្តោយឱ្យភាពភ័យខ្លាចទាំងអស់នោះបង្អាក់ការអភិវឌ្ឍរបស់ខ្លួន។ លោកនិយាយថា កត្តាទាំងអស់នេះអាចបណ្តាលមកពីបច្ច័យបរិស្ថាននៃការរស់នៅរបស់ពួកគេកាលពីនៅក្មេងៗ និងទម្លាប់មួយចំនួនរបស់មនុស្សចាស់ពីមុនៗដែលតែងតែឃាត់កូនមិនឱ្យគិតធំ ឬគិតវិជ្ជមានខ្លាំងពេកសម្រាប់អនាគតការងារ។

លោក រិន រ៉ាវុធ បានបន្តថា៖ “មនុស្សចាស់ពីមុន មិនសូវហ៊ានឱ្យក្មេងនិយាយពីក្តីស្រមៃរបស់ខ្លួននោះទេ ព្រោះខ្លាចខ្មាសគេ ឬខ្លាចមានបញ្ហា។ ពួកគាត់គិតថាទាល់តែមានគ្នា មានខ្នង ឬមានខ្សែស្រឡាយទើបអាចធ្វើការងារសំខាន់ៗបាន ហេតុនេះហើយឥទ្ធិពលនៃគំនិតទាំងអស់នោះបានធ្វើឱ្យក្មេងមានការរារែក ហើយមិនហ៊ានធ្វើការប្រឹងប្រែង ព្រោះគ្មានសង្ឃឹមថានឹងអាចធ្វើការងារល្អបាន”។

អ្នកអប់រំខាងលើបានលើកឡើងថា ជាក់ស្តែងនៅក្នុងរដ្ឋធម្មនុញ្ញ គ្មានមាត្រាណាចែងថា កូនអ្នកក្រមិនអាចថ្កុំថ្កើងបាននោះទេ ហេតុនេះកូនអ្នកក្រក៏អាចចាប់យកឱកាសការងារសំខាន់ៗបានដែរ ព្រោះមិនមែនគ្រប់ការងារសុទ្ធតែត្រូវប្រគល់ឱ្យទៅអ្នកមានខ្សែស្រឡាយធំៗនោះទេ តែបច្ចុប្បន្នគេត្រូវការអ្នកមានសមត្ថភាពដើម្បីធ្វើការងារ។ ចំណុចសំខាន់ដែលយើងអាចធ្វើបាន គឺខិតខំប្រឹងប្រែងរហូតសមត្ថភាពរបស់យើងត្រូវបានគេទទួលស្គាល់ ហើយអាចនាំមកនូវការអភិវឌ្ឍបានល្អសម្រាប់ស្ថាប័ន។ ម្យ៉ាងវិញទៀត យុវជនត្រូវផ្លាស់ប្តូរការគិតថា ខ្លួនមិនអាចធ្វើការងារសំខាន់បាន ទៅជាតាំងចិត្តថា ត្រូវតែធ្វើការងារសំខាន់ៗឱ្យបានដោយភាពអំណត់ និងការតស៊ូអភិវឌ្ឍសមត្ថភាពជាប់ជាប្រចាំ។ ប្រសិនបើយើងកំពុងសិក្សា គឺត្រូវសិក្សាឱ្យបានពូកែ ស្វែងរកបទពិសោធជាក់ស្តែងឱ្យបានច្រើន និងធ្វើឱ្យលេចធ្លោរហូតស្ថាប័នស្គាល់ និងទទួលយកដើម្បីជួយគេឱ្យកាន់តែខ្លាំងឡើង។ ហើយប្រសិនបើយើងកំពុងធ្វើការងារ យើងត្រូវប្រឹងប្រែងរៀនសូត្របន្ថែមពីការងារដែលកំពុងធ្វើ អនុវត្តការងារឱ្យបានល្អ និងឆ្លៀតពេលវេលាដើម្បីបន្តអភិវឌ្ឍពីវិធីសាស្ត្រដែលយើងកំពុងធ្វើការងារដើម្បីឱ្យការងារកាន់តែលឿន និងមានប្រសិទ្ធភាព ហើយជួយអ្នកជុំវិញខ្លួនឱ្យខ្លាំងថែមទៀតផង។ នៅពេលនោះយើងនឹងចាប់ផ្តើមក្លាយជាមនុស្សដែលគេត្រូវការ ហើយការងារសំខាន់ៗនឹងលេចចេញមកតាមក្រោយ តែប្រសិនបើយើងនៅត្រាំត្រែងរង់ចាំឱកាស ហើយរវល់តែខ្វាយខ្វល់ច្រើន នោះលទ្ធផលល្អនឹងមិនអាចរត់មករកយើងនោះទេ។

រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងពីបញ្ហាធនធានមនុស្សនៅកម្ពុជាថា យើងត្រូវការមនុស្សដែលមានសេចក្តីក្លាហានក្នុងការធ្វើការងារអភិវឌ្ឍន៍ និងហ៊ានធ្វើការសម្រេចចិត្តប្រកបដោយការគិតពិចារណាស៊ីជម្រៅ។ សម្រាប់សតវត្សរ៍ទី21នេះ មនុស្សម្នាក់ៗត្រូវតែមានសមត្ថភាពកាន់តែខ្លាំងដើម្បីចាប់យកការងារ និងបង្កើនប្រសិទ្ធភាព ជាពិសេសគឺនវានុវត្តន៍។ យុវជនកម្ពុជាត្រូវតែខិតខំប្រឹងប្រែងដោយភាពស្វាហាប់ដើម្បីធ្វើការងារប្រកបដោយភាពជាអ្នកដឹកនាំ ហើយក្លាហានក្នុងការសិក្សាស៊ីជម្រៅ និងបង្កើតជារបកគំហើញថ្មីៗដើម្បីឱ្យការរស់នៅកាន់តែប្រសើរឡើង។

ឯកឧត្តមរដ្ឋមន្ត្រីបានមានប្រសាសន៍ថា៖ ”ភាពជាអ្នកដឹកនាំជារឿងសំខាន់មួយដែលពិភពលោកកំពុងត្រូវការ ហេតុនេះប្រសិនបើប្រជាជនវ័យក្មេងរបស់យើងមានទំនុកចិត្តខ្ពស់ក្នុងការសិក្សាស្រាវជ្រាវ យើងនឹងអាចប្រកួតប្រជែងជាមួយបណ្តាប្រទេសក្នុងតំបន់បានកាន់តែប្រសើរ”។

ឯកឧត្តម បានលើកឡើងថា ជាធម្មតាអ្នកដែលមានភាពជាអ្នកដឹកនាំ គឺជាអ្នកដែលមានសមត្ថភាពធ្វើការងារលើសពីអ្វីដែលស្ថាប័នរំពឹងទុក។ ប្រសិនបើគេគូសវាសការងារឱ្យគាត់ធ្វើក្នុងរង្វង់មួយ មានអ្នកខ្លះធ្វើការងារបានតែត្រឹមរង្វង់នោះ តែមានអ្នកខ្លះប្រើពេលវេលាដូចគ្នា តែអាចធ្វើការងារឆ្លាតវៃ ហើយលើសពីរង្វង់ដែលបានកំណត់នោះថែមទៀតផង។ មនុស្សប្រភេទនេះជាបុគ្គលដែលគ្រប់ស្ថាប័នត្រូវការ ហើយជាមនុស្សដែលអាចទទួលការងារសំខាន់ៗបានយ៉ាងប្រសើរ៕

February 21, 2019

សិល្បករវង់ភ្លេងបុរាណខ្មែរ លោក ស្រី នី ហៅចយ ដាច់សសៃឈាមក្នុងខួក្បាលកំពុងសង្រ្គោះបន្ទាន់នៅមន្ទីពេទ្យមិត្តភាពខ្មែរសូវៀត

ពិតជាមានកាលភ្ញាក់ផ្អើលខ្លាំងមែន ដែលខណៈប៉ុន្មានម៉ោងមុននេះបន្ដិច លោក អ៊ឺម ជីវ៉ា បានសរសេរបង្ហោះក្នុងហ្វេសប៊ុកឱ្យដឹងថា តន្ត្រីករបុរាណលោក ស្រី នី ហៅចយ មានជំងឺដាច់សសៃឈាមក្នុងខួក្បាលកំពុងសង្រ្គោះបន្ទាន់នៅមន្ទីពេទ្យមិត្តភាពខ្មែរសូវៀតហៅ ពេទ្យ រុស្ស៊ី។

តារាសម្ដែងប្រុស ដែលតែងតែមានវត្តមានជួយដល់សិល្បករទាំងទឹកចិត្តសប្បុរសធម៌រូបនេះ បានរៀបរាប់ថា « ទាល់តែថតស្រាតបានមានអ្នកស៊ែ !! បើបង្ហោះរូបសប្បុរសធម៌មិនងាយទេ ..! អាណិតណាស់ តន្ត្រីករបុរាណលោក ស្រី នី ហៅចយ មានជំងឺដាច់សសៃឈាមក្នុងខួក្បាលកំពុងសង្រ្គោះបន្ទាន់នៅមន្ទីពេទ្យមិត្តភាពខ្មែរសូវៀតហៅ ពេទ្យរុស្ស៊ី។ ល្ងាចនេះខ្ញុំបាទ អ៊ឹម ជីវ៉ា តំណាងឱ្យសមាគមសិល្បករខ្មែរដែលមានអ្នកបង ចន ច័ន្ទលក្ខិណា ជាប្រធាន បាននាំយកថវិការមូលនិធិចាស់ជរាចំនួន 1លានរៀល ទៅជួយដល់តន្រ្តីករ លោក នី នៅបន្ទប់លេខ 201 អាគារសម្តេចតេជោ មន្ទីពេទ្យរុស្ស៊ី »។

សូមជម្រាបឱ្យដឹងបន្ថែមថា ខណៈនេះស្ថានភាពរបស់តារាជើងចាស់ខាងលើ កំពុងតែពិបាក រីឯជីវភាពក៏ខ្វះខាតខ្លាំង ធ្វើឱ្យពិបាកនៅក្នុងការព្យាបាលជំងឺឱ្យជាសះស្បើយយ៉ាងខ្លាំងណាស់។ ក្រោយពីបានឃើញបែបនេះ មហាជនជាច្រើនពិតជាក្តុកក្តួល និងអាណិតដល់ សិល្បករខ្មែរ ដែលពោរពេញដោយសមត្ថភាពដូចលោកយ៉ាងខ្លាំង ដែលត្រូវមកធ្លាក់ខ្លួនឈឺ ទាំងលំបាកបែបនេះ។ សូមបញ្ជាក់ថា សិល្បករបុរាណផ្នែកតន្រ្តីករ លោក នី កំពុងសម្រាកព្យាបាលនៅបន្ទប់លេខ 201 អាគារសម្តេចតេជោ មន្ទីរពេទ្យរុស្ស៊ី ៕

February 21, 2019

ឡៅ បញ្ញា អ្នកសម្ដែងល្បុក្កតោទទូចឱ្យមហាជនជួយគាំទ្របោះឆ្នោតឱ្យក្នុងកម្មវិធី Mister Asian International

ក្នុងចំណោមបេក្ខជនដែលបានចេញទៅប្រកួតនៅក្នុងព្រឹត្តិការណ៍បុរសឯក Mister And Miss Asian 2019 គេចាត់ទុកថា បេក្ខភាព ឡៅ បញ្ញា មានកាយសម្បទា និងភាពរឹងមាំទាក់ទាញជាងបេក្ខជនមុនៗ ខណៈដែលលោកគឺក្រៅពីស្អាតសង្ហារ ក៏ជាអ្នកសម្ដែងល្បុក្កតោ និងការសម្ដែងពីអាណាចក្រខ្មែរនៅសៀមរាបដ៏ទាក់ទាញ។

អ៊ីចឹងហើយទើបលោកស័ក្ដសមនឹងការគ្រងឈុតតំណាងជាតិ ក្នុងសម័យអង្គរ ខណៈដែលឈុតដែលលោកបានគ្រងក៏ត្រូវបានគេអះអាងថាកែច្នៃអោយត្រូវទម្រង់អស់ប្រាក់មិនតិចពាន់ដុល្លារ។ ថ្វីដ្បិតថា មិនទាន់បានជាប់ពានអ្វីនៅឡើយ ប៉ុន្តែលោកបានជាប់ Best Talent ក្នុងចំណោម3នាក់ ដែលធ្វើអោយលោកកាន់តែទាក់ទាញក្នុងក្រសែភ្នែកអន្តរជាតិដែលរួមរួមក្នុងព្រឹត្តិការណ៍ជាមួយគ្នា។

បេក្ខភាពរូបនេះ ត្រូវបានគេសរសើរខុសពីបេក្ខភាពតំណាងកម្ពុជាក្នុងការប្រលងបុរសឯកមុនៗ ជាពិសេសនៅពេលលោកគ្រងឈុតតំណាងជាតិ ហើយមានដំណើរ និងកាយសម្បទាពេញតួជាក្ស័ត្រ។ យោងតាមការទម្លាយ លោក ឡៅ បញ្ញា ត្រូវបានបញ្ជូនឱ្យចេញប្រកួតតំណាងកម្ពុជាដោយក្រុមហ៊ុនមួយ ដែលជួយរចនាឈុតតំណាងជាតិដែលលោកស្លៀកយកទៅបង្អួត និងត្រូវគេកត់សម្គាល់ថាឥតខ្ចោះត្រូវតាមទម្រង់វប្បធម៌ និងសម័យកាល។

សូមជម្រាបដែរថា បេក្ខជន ឡៅ បញ្ញា ដែលគេស្គាល់ថាជាអ្នកសម្ដែងល្បុក្កតោ និងឈុតអច្ឆរិយអង្គរនៅសៀមរាប បានថ្លែងទទូចនៅលើហ្វេសប៊ុកដើម្បីអោយមានការបោះឆ្នោតជួយលោក ក្នុងនាមជាតំណាងកម្ពុជា។ លោកត្រូវគេឃើញបង្ហោះសារទទូចហើយទទូចទៀត ដើម្បីឱ្យមានការយកចិត្តទុកដាក់ដល់ខ្លួន ខណៈពេលដែលក្នុងចំណោមបេក្ខជនទាំងអស់ដែលកម្មវិធីតម្រូវឱ្យបោះឆ្នោតដើម្បីឈ្នះពានប្រជាប្រិយភា៕

February 21, 2019

Atletico ផ្តួល Juventus ខណៈ Man City វាយបកផ្តួល Schalke

ក្រុម Atletico Madrid និង Manchester City សុទ្ធសឹងបានជួបភាពរីករាយដូចគ្នាក្នុងការប្រកួតក្របខ័ណ្ឌ Champions League វគ្គ 16ក្រុមចុងក្រោយ ជើងទី1 កាលពីថ្ងៃពុធ ក្រោយពីដណ្តើមបានជ័យជម្នះរៀងៗខ្លួន។

ខ្សែប្រយុទ្ធ Cristiano Ronaldo បានខកខានក្នុងការរកគ្រាប់បាល់បញ្ចូលទី ខណៈដែលក្រុម Atletico បានយកឈ្នះក្នុងលទ្ធផល 2-០។

ដោយឡែក ក្នុងប្រទេសអាល្លឺម៉ង់វិញ ក្រុម Schalke បានស៊ុតបាល់បញ្ចូលទី 2គ្រាប់ ដើម្បីនាំមុខ 2-1 ប៉ុន្តែគ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Leroy Sane និង Raheem Sterling បានជួយឱ្យក្រុមនៅសល់សមាជិកត្រឹមតែ 10នាក់ Man City ដណ្តើមបានជ័យជម្នះក្នុងលទ្ធផល 3-2។

ក្រោយពីការរកបានគ្រាប់បាល់តាមស្មើរបស់គេ Sane បានប្រាប់ទូរទស្សន៍ DAZN ទាំងរីករាយថា៖ «ខ្ញុំបានរង់ចាំឱកាសរបស់ខ្ញុំ និងចង់ស៊ុតបាល់ពីទីនោះ ដោយសារតែខ្ញុំធ្លាប់បានស៊ុតបាល់បញ្ចូលទីពីទីតាំងនោះ ហើយវាបានរក្សាការជឿជាក់របស់យើង»។

លោក Pep Guardiola អ្នកចាត់ការទូទៅរបស់ក្រុម Man City បានឱ្យដឹងថា៖ «យើងនឹងមិនបានឈានទៅវគ្គបន្តក្នុងយុទ្ធនាការនេះឡើយ ប្រសិនបើយើងមិនកែសម្រួលការលេងឱ្យបានល្អប្រសើរឡើងទេនោះ។ ទីបំផុត Sane និង Sterling បានបង្កើតឱ្យមានការប្រែប្រួល»។

លោក Diego Simeone គ្រូបង្វឹករបស់ក្រុម Atletico បានឱ្យដឹងថា៖ «យើងមិនទាន់បានឈានទៅវគ្គបន្តនៅឡើយទេ។ នៅមានការប្រកួត 1លើកទៀតដែលត្រូវលេង ហើយយើងដឹងថា យើងនឹងត្រូវតែជួបបញ្ហា»។

Ronaldo បានវិលទៅកាន់រដ្ឋធានីអេស្ប៉ាញវិញ ក្រោយពីរូបគេបានទទួលភាពជោគជ័យមិនធ្លាប់មានពីមុនមកក្នុងយុទ្ធនាការនេះ ជាមួយនឹងក្រុម Real ប៉ុន្តែគូប្រកួតរបស់ពួកគេគឺជាក្រុមដែលត្រូវអបអរនៅពេលបញ្ចប់ការប្រកួត ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Jose Gimenez និង Diego Godin បានជួយឱ្យក្រុម Atletico ស្ថិតលើផ្លូវឆ្ពោះទៅកាន់វគ្គបន្ត។

លោក Massimiliano Allegri គ្រូបង្វឹករបស់ក្រុម Juventus បានឱ្យដឹងថា៖ «ជាកុសល យើងមិនបានរបូតគ្រាប់បាល់ទី3 ឡើយ ព្រោះការចាញ់ 2-០ គឺជាលទ្ធផលមួយដែលអាចស្រោចស្រង់បាន។ យើងមិនទាន់ធ្លាក់ចេញនៅឡើយទេ»៕

February 21, 2019

អីយ៉ា !! នាយក្តី បញ្ចប់ការសង្ស័យទំនាក់ទំនងស្នេហាជាមួយ នាយចឺម

ចាស់ផលិតកម្ម BKS លោក ឈុន សុវណ្ណភក្តី ហៅ នាយក្តី បានធ្វើឱ្យគ្រប់គ្នាចាប់អារម្មណ៍ជាខ្លាំង បន្ទាប់ពីឃើញលោកធ្លាប់ត្រូវបានគេសង្ស័យថា មានស្នេហាជាមួយ នាយចឺម ដែលស្រឡាញ់ភេទដូចគ្នា បានបង្ហាញខ្លួនជាមួយនឹងឈុតប្រពៃណីខ្មែរ កូនកម្លោះ ឈរថតញញឹមយ៉ាងប្រឹមប្រីយ ក្នុងពិធីភ្ជាប់ពាក្យ ជាមួយនឹងកញ្ញា សុវណ្ណ រ៉ាផា ដែលត្រូវបានគេស្គាល់ថា គឺជាតារាអ្នកសិល្បៈដូចគ្នា។

ពិធីភ្ជាប់ពាក្យរវាងតារាសម្ដែងលោក ឈុន សុវណ្ណភក្ដី ហៅនាយក្ដី ដែលត្រូវគេស្គាល់ថាជាម្ចាស់ផលិតកម្ម BKS និងតារាសម្ដែងកញ្ញា សុវណ្ណ រ៉ាផា ត្រូវបានធ្វើឡើងយ៉ាងអធឹកអធមក្រោមវត្តមានចាស់ទុំទាំងសងខាង និងតារាសិល្បៈដែលមានទំនាក់ទំនងជិតស្និទ្ធិ។ ពិធីនេះមិនត្រូវបានធ្វើឡើងក្រោមវត្តមានអ្នកសារព័ត៌មានកុះករនោះទេ ប៉ុន្តែត្រូវបានបើកចំហរនៅលើបណ្ដាញសង្គមហ្វេសប៊ុក ដោយទិដ្ឋភាពភ្ជាប់ពាក្យរបស់តារាទាំងពីរត្រូវបានបង្ហោះឡើងភ្លាមៗ។ ដំណឹងមង្គលរបស់អ្នកទាំងពីរបានធ្វើឱ្យម្នាក់ៗអបអរសាទរយ៉ាងខ្លាំង ប៉ុន្តែក៏ធ្វើឱ្យគេងឿងឆ្ងល់ផងដែរ ដោយសារតែនាយក្ដី ក្រោយពេលស្អិតរមួតជាមួយគូដណ្ដឹង គេកត់សម្គាល់ថាទំនាក់ទំនងជាមួយនាយចឺម មិនសូវស្អិតដូចមុន។

យ៉ាងណាមិញ លោកឈុន សុវណ្ណភក្ដី បានអះអាងថាហេតុផលដែលនាំឱ្យពួកលោកមិនសូវបានទៅណាមកណាជាមួយគ្នា គឺដោយសារតែហេតុផលរវល់រៀងខ្លួន ស្របគ្នាដែលលោកក៏មានគូស្នេហ៍ហើយចង់ចំណាយពេលឱ្យបានច្រើនជាមួយសុវណ្ណ រ៉ាផាប៉ុណ្ណោះ៕

February 20, 2019

តម្លៃគ្រាប់ស្វាយចន្ទីឆ្នាំនេះធ្លាក់ចុះជាងឆ្នាំមុនខ្លាំង

គ្រាប់ស្វាយចន្ទីនៅដើមឆ្នាំនេះបានធ្លាក់ថ្លៃយ៉ាងខ្លាំងសម្បើម ដែលធ្វើកសិករមានការរអ៊ូរទាំ និងខកចិត្តជាខ្លាំង និងបានអំពាវនាវឱ្យអាជ្ញាធរជួយរិះរកវិធានការទប់ស្កាត់កុំឱ្យឈ្មួញទម្លាក់ថ្លៃដូច្នេះ។

អ្នកស្រី ណេន សេងហ៊ុន ម្ចាស់ចម្ការស្វាយចន្ទីម្នាក់ក្នុងចំណោមកសិករច្រើននាក់ទៀត នៅក្នុងភូមិទើន ឃុំទើន ស្រុកកូនមុំ ខេត្តរតនគិរី បានឱ្យដឹងថា កសិករពិតជាមានការខកចិត្តជាខ្លាំង ដោយសារតម្លៃគ្រាប់ស្វាយចន្ទីនៅឆ្នាំនេះបានធ្លាក់ថ្លៃខ្លាំងខុសពីឆ្នាំកន្លងៗទៅ ដែលធ្វើឱ្យកសិករម្នាក់ៗត្រូវខាតបង់ប្រាក់កាក់អស់ជាច្រើន។ អ្នកស្រីអះអាងថា គ្រាប់ស្វាយចន្ទីកាលពីឆ្នាំមុនមានតម្លៃចន្លោះពី7,000 ទៅ8,000រៀលក្នុងមួយគីឡូក្រាម តែនៅពេលដល់រដូវប្រមូលផលក្នុងឆ្នាំនេះ ស្រាប់តែតម្លៃគ្រាប់ស្វាយចន្ទីបានធ្លាក់ចុះយ៉ាងខ្លាំង រហូតមកនៅត្រឹម 5,000រៀលក្នុងមួយគីឡូក្រាមដែលធ្វើឱ្យពលរដ្ឋខាតបង់ក្នុងការចំណាយកម្លាំងពលកម្ម ក៏ដូចជាខាតបង់ថវិកាក្នុងការទិញថ្នាំបំប៉នមកថែទាំផលិតផលឱ្យបានល្អ។

កសិករខាងលើបានប្រាប់ឱ្យដឹងទៀតដែរថា ឆ្នាំនេះទោះជាមានការថែបំប៉ន បាញ់ថ្នាំ ដាក់ជីឱ្យកាន់តែច្រើនយ៉ាងណាក៏ដោយ ក៏ស្វាយចន្ទីមិនសូវកាន់ផ្លែដូចឆ្នាំមុនដែរ ដោយសារអាកាសធាតុខ្លាំងពេក ធ្វើឱ្យផ្កាជ្រុះស្ទើរអស់ពីដើមដែលជាហេតុធ្វើឱ្យចន្ទីមិនសូវមានផ្លែ និងការប្រមូលទិន្នផលក៏ធ្លាក់ចុះខ្លាំងទៅតាមហ្នឹងដែរ និងដោយសារចង់បានប្រាក់ចំណេញច្រើន កាលពីដើមរដូវគ្រួសារអ្នកស្រីបានសម្រេចចិត្តម៉ៅទិញដើមស្វាយចន្ទីរបស់អ្នកភូមិជាកសិករក្បែរៗនោះប្រមាណជា 6ហិកតាយកមកថែទាំទុកសម្រាប់បេះផ្លែលក់ថែមទៀត តែមិននឹកស្មានថា បែរជាខាតឡុងចុងអស់ប្រាក់រាប់ពាន់ដុល្លារ ដោយសារការប្រមូលផលធ្លាក់ចុះខ្លាំង ថែមទាំងតម្លៃក៏ធ្លាក់ចុះយ៉ាងគំហុកបែបមិនធ្លាប់មានពីមុនៗមកទៀតផង។

ចំណែកលោក នី ស៊ីម កសិករដាំស្វាយចន្ទីនៅស្រុកគូលេន ខេត្តព្រះវិហារ ក៏បានសម្តែងការខកចិត្តខ្លាំងដែរ ដោយសារតែការធ្លាក់ចុះនៃតម្លៃគ្រាប់ស្វាយចន្ទីនេះ។ លោកឱ្យដឹងថាកាលពីឆ្នាំមុន តម្លៃគ្រាប់ស្វាយចន្ទីត្រូវឈ្មួញប្រមូលទិញយកទៅលក់នៅប្រទេសក្រៅ ក្នុងមួយគីឡូក្រាមតម្លៃចន្លោះពី 7,000 ដល់ 8,000រៀល ចំណែកចូលមកដល់ឆ្នាំនេះឈ្មួញ បានទម្លាក់តម្លៃចុះជាងមុនខ្លាំង ដោយទទួលទិញត្រឹមតែតម្លៃ 5,000រៀលប៉ុណ្ណោះក្នុងមួយគីឡូក្រាម។ លោកបន្តថា គ្រាប់ស្វាយចន្ទីនៅក្នុងស្រុកគូលេន ទើបតែចាប់ផ្តើមប្រមូលផល បានត្រឹមមួយសប្តាហ៍ប៉ុណ្ណោះ ក្នុងផ្ទៃដីប្រមាណជា 30ហិកតា អាចប្រមូលផលបានចន្លោះពី 30 ទៅ 40គីឡូក្រាមប៉ុណ្ណោះក្នុងមួយថ្ងៃ ដែលត្រូវចំណាយថ្លៃឈ្នួលពលកម្ម 3 ទៅ4នាក់ដើម្បីដើររើសគ្រាប់ស្វាយចន្ទី ដោយម្នាក់ៗទទួលបានប្រាក់ពី 30,000 ទៅ40,000រៀលក្នុងមួយថ្ងៃ ដែលសរុបទៅមិនមានសល់ប្រាក់ចំណេញឡើយ ទាល់តែចំណាយពេលដើររើសដោយខ្លួនឯង ទើបនៅសល់ប្រាក់ចំណេញខ្លះគ្រាន់បានដោះស្រាយម្ហូបអាហារប្រចាំថ្ងៃ។

លោកបានឱ្យដឹងទៀតថា កាលពីខែវិច្ឆិកា ឆ្នាំ2018កន្លងទៅ ស្វាយចន្ទីចាប់ផ្តើមចេញផ្កាម្តងរួចមកហើយ តែដោយសារអាកាសធាតុក្តៅបានធ្វើឱ្យផ្កាជ្រុះអស់មិនបានប្រមូលផលទេ ហើយកសិករនៅតំបន់នោះក៏ចាប់ផ្តើមបាញ់ថ្នាំ បញ្ជាឱ្យចេញផ្កាម្តងទៀត ទើបចេញផ្កា និងមានផ្លែជាថ្មី ធ្វើឱ្យអាចចាប់ផ្តើមប្រមូលផលបានទៀតមកទល់បច្ចុប្បន្ន រហូតដល់ខែមេសាធ្លាក់ភ្លៀងទើបប្រមូលផលអស់។ លោកប្រាប់ថា គ្រាប់ស្វាយចន្ទីនៅខេត្តព្រះវិហារត្រូវបានឈ្មួញប្រមូលទិញយកទៅលក់នៅប្រទេសវៀតណាម មិនមានឈ្មួញបរទេសចុះមកទិញដូចឆ្នាំមុនៗទៀតឡើយ ទើបជាហេតុធ្វើឱ្យតម្លៃគ្រាប់ស្វាយចន្ទីធ្លាក់ចុះជាងឆ្នាំមុនបែបនេះ។

ជាមួយគ្នានេះលោក ច្រឹក ពិសិដ្ឋ ឈ្មួញទិញគ្រាប់ស្វាយចន្ទីពីស្រុកកូនមុំ ខេត្តរតនគិរី ដឹកយកទៅលក់នៅប្រទេសវៀតណាមក៏បានឱ្យដឹងដែរថា ការធ្លាក់ចុះនៃតម្លៃគ្រាប់ស្វាយចន្ទីនេះ គឺដោយសារតែតម្រូវការគ្រាប់ស្វាយចន្ទីមានការធ្លាក់ចុះនៅលើទីផ្សារបរទេសនៅឆ្នាំនេះ។ លោកបានបន្តឱ្យដឹងថា កាលពីឆ្នាំមុន គ្រាប់ស្វាយចន្ទីមានការបញ្ជាទិញច្រើនពីវិនិយោគិនជនជាតិឥណ្ឌា និងជនជាតិចិន ប៉ុន្តែសម្រាប់ឆ្នាំនេះមិនមានឈ្មួញបរទេសកុងត្រាទិញពីកសិករដូចឆ្នាំមុនៗទៀតឡើយ ហើយលោកថា កសិករគ្មានជម្រើសផ្សេង គឺមានតែលក់ឱ្យតែឈ្មួញប្រទេសវៀតណាមប៉ុណ្ណោះ ដែលដំណាក់កាលដំបូងពេលប្រមូលផល តម្លៃគ្រាប់ស្វាយចន្ទីនៅលក់ចេញបានតម្លៃ 7,000រៀលដែរក្នុងមួយគីឡូក្រាម ប៉ុន្តែដោយសារមិនមានការប្រកួតប្រជែងទិញពីឈ្មួញក្រៅប្រទេសដូចឆ្នាំមុនៗនោះ ទើបធ្វើឱ្យឈ្មូញប្រទេសវៀតណាមទម្លាក់តម្លៃទិន្នផលគ្រាប់ស្វាយចន្ទីរបស់កសិករខ្មែរតែម្តង៕

February 20, 2019

ផ្លែក្រូចពោធិ៍សាត់ចង់ស្វែងរកការក្លាយជាផ្លែឈើសម្គាល់ភូមិសាស្ត្រ

ជាមួយនឹងការសិក្សាមួយដែលកំពុងត្រូវបានអនុវត្តនាពេលបច្ចុប្បន្នដើម្បីកំណត់ថា តើពួកគេសមនឹងទទួលបានការកំណត់ ឬយ៉ាងណានោះ ផ្លែក្រូចពោធិ៍សាត់ដែលបានដាំដុះនៅខេត្តពោធិ៍សាត់ និងខេត្តបាត់ដំបងអាចនឹងក្លាយជាផលិតផលកសិកម្មកម្ពុជាបន្ទាប់ ដើម្បីទទួលបាននូវចំណាត់ថ្នាក់ជាផ្លែឈើសម្គាល់ភូមិសាស្ដ្រ (Geographical Indication ឬ GI)។

ក្រុមអ្នកឯកទេសបាននិយាយថា ការទទួលបានផ្លាកសញ្ញា GI នឹងអាចការពារកេរ្តិ៍ឈ្មោះ និងរសជាតិរបស់ផលិតផលផ្លែក្រូច ខណៈដែលផ្លែក្រូចពោធិ៍សាត់នេះត្រូវបានដាំដុះយ៉ាងច្រើននៅភាគខាងលិចនៃប្រទេសនៅក្នុងខេត្តពោធិ៍សាត់ និងខេត្តបាត់ដំបងដែលបានជួយបង្កើនប្រាក់ចំណូលដ៏ច្រើនដល់កសិករដែលបានដាំដំណាំនេះ។

ចំពោះបំណងនេះក្រសួងពាណិជ្ជកម្ម និងអ្នកដាំដុះដំណាំក្រូចកំពុងពិចារណាលើការបង្កើតជាសមាគមមួយឈ្មោះថា “សមាគមផ្លែក្រូចពោធិ៍សាត់ – បាត់ដំបង” ហើយសង្ឃឹមថា នឹងទទួលបានជាផ្លែឈើចុះបញ្ជីផលិតផល GI។

តាមពិតផលិតផលទាំងអស់នេះមានសក្តានុពល ប៉ុន្តែពួកគេមិនដឹងថា តើក្រសួងពាណិជ្ជកម្មនឹងគាំទ្របេក្ខភាពសម្រាប់ GI ដែរឬទេ?។ ជាអាទិភាពសមាគមនេះត្រូវសិក្សាពីលទ្ធភាពដែលពួកគេកំពុងធ្វើ។ ដោយសារកេរ្តិ៍ឈ្មោះនៃផ្លែក្រូច និងការគាំទ្រពីក្រសួងពាណិជ្ជកម្ម ក្រូចពោធិ៍សាត់ដែលដាំដុះនៅពោធិ៍សាត់ និងបាត់ដំបង គឺអាចនឹងក្លាយជាបេក្ខជនដ៏ខ្លាំងក្លាក្នុងការទទួលបានការចុះបញ្ជីជាផលិតផល GI នេះ។ អ្នកឯកទេសស្តង់ដាគុណភាពផលិតផលកសិកម្មបានឱ្យដឹងថាអង្គការកម្មសិទ្ធិបញ្ញាពិភពលោក the World Intellectual Property Organisation (WIPO) ទំនងជាគាំទ្រដល់កិច្ចខិតខំប្រឹងប្រែងរបស់ក្រសួងការបរទេសផងដែរដើម្បីទទួលបានវិញ្ញាបនបត្រ GI សម្រាប់ផ្លែឈើកម្ពុជា។

លោក ឡាយ វិសិដ្ឋ ប្រធានមន្ទីរកសិកម្ម ខេត្តពោធិ៍សាត់បានមានប្រសាសន៍ប្រាប់កាសែតឡារ៉ែនថា៖ “កាលពីអំឡុងខែមុន មានការធ្វើសិក្ខាសាលាមួយរបស់កសិករអ្នកដាំដំណាំក្រូចពោធិ៍សាត់ និងបាត់ដំបង ដោយមានការអញ្ជើញពីក្រុមអ្នកផលិត និងជាសមាគមចាស់មួយ។ សមាគមនោះចង់ផ្លាស់ឈ្មោះតែមិនអាចធ្វើការសម្រេចចិត្តលើការចុះឈ្មោះផលិតផលក្រូចពោធិ៍សាត់បានទេ”។

លោកប្រធានមន្ទីរបានឱ្យដឹងថា៖ ក្រូចរបស់យើងមានរសជាតិផ្អែមឆ្ងាញ់ និងទទួលបានផលប្រយោជន៍ពីការរីកចម្រើនដ៏ធំដោយសារគ្មានសារធាតុគីមី ដោយបច្ចុប្បន្ននៅក្នុងខេត្តពោធិ៍សាត់យើងមានចម្ការក្រូចប្រមាណជា 5,000 ហិកតាដែលកំពុងទទួលផល។លោកវិសិដ្ឋបានបញ្ជាក់ថា “ប្រសិនបើការទទួលបានវិញ្ញាបនបត្រ GI ផលិតផលក្រូចពោធិ៍សាត់នឹងជួយលើកកម្ពស់កេរ្តិ៍ឈ្មោះរបស់ផ្លែក្រូចខ្មែរយើងនៅបរទេស ទោះបីជាផ្លែក្រូចរបស់យើងភាគច្រើនត្រូវបានគេលក់ដូរតែនៅក្នុងស្រុកក៏ពិតមែន តែយើងក៏បាននាំចេញទៅប្រទេសថៃខ្លះៗដែរ”។

លោក ឡាយ វិសិដ្ឋ បានមានប្រសាសន៍ទៀតថា៖ “បញ្ហាប្រឈមធំបំផុតក្នុងការទទួលបានការចុះបញ្ជី GI នេះ គឺត្រូវសម្រេចលើឈ្មោះដែលត្រូវប្រើដើម្បីចុះបញ្ជីជាមុនសិន”។ លោកបានបន្តថា ក្នុងអំឡុងពេលសិក្ខាសាលាជាមួយអ្នកដាំក្រូចពោធិ៍សាត់ និងបាត់ដំបងកាលពីខែមុន ពួកគេមិនទាន់អាចធ្វើការសម្រេចចិត្តលើឈ្មោះផលិតផលនេះបាននៅឡើយ ព្រោះអ្នកដាំក្រូចមកពីខេត្តពោធិ៍សាត់ទាមទារថា គួរតែដាក់ឈ្មោះថា“ក្រូចពោធិ៍សាត់”ខណៈដែលអ្នកដាំមកពីខេត្តបាត់ដំបងចង់ហៅថា“ផ្លែក្រូចពោធិ៍សាត់-បាត់ដំបង”។ លោកបានបន្ថែមថា ការសម្រេចចិត្តចុងក្រោយនៅលើប្រធានបទនេះនឹងធ្វើឡើងដោយក្រសួងពាណិជ្ជកម្ម”។

ឯកឧត្តម ស៊ាង ថៃ អនុរដ្ឋលេខាធិការក្រសួងពាណិជ្ជកម្មបានប្រាប់ឡារ៉ែនថា៖ “លោកសុំបញ្ជាក់ជូនថា ការសុំចុះបញ្ជីនេះទាល់តែមានគ្រប់លក្ខខណ្ឌដែលគេបានកំណត់យ៉ាងត្រឹមត្រូវ មិនមែនគ្រាន់តែដាក់ពាក្យស្នើសុំ ហើយគេចុះបញ្ជីឱ្យទេ។ ឧទាហរណ៍ដូចជាម្រេចកំពត ដែលយើងបានចុះGIហើយ ក្រូចថ្លុងកោះទ្រង់ខេត្តក្រចេះ ស្ករត្នោតខេត្តកំពង់ស្ពឺដែលក្រសួងផ្តល់GI នោះ សុទ្ធតែមានភា្ជប់លក្ខខណ្ឌទាំងអស់”។

ឯកឧត្តមអនុរដ្ឋលេខាបានបញ្ជាក់ដែរថា ដូច្នេះក្រូចពោធិ៍សាត់ដែលគាត់នឹងដាក់មកក្រសួងនេះត្រូវកំណត់ថា វាស្ថិតនៅភូមិសាស្ត្រតំបន់ណា ខេត្តណា ជាលក្ខណៈបច្ចេកទេសដែលត្រូវការសិក្សាវិភាគពីស្ថានភាពដី និងទីតាំងតំបន់ជាដើម។ តែមកដល់ពេលនេះក្រសួងពុំទាន់បានទទួលពាក្យសុំពីសមាគមដែលមានគម្រោងស្នើសុំនោះនៅឡើយទេ៕

February 20, 2019

លោក Guardiola ជំរុញឱ្យ Man City ប្រើស្មារតីប្រយុទ្ធ លើទឹកដី Schalkeរាត្រីនេះ

លោក Pep Guardiola បានលើកទឹកចិត្តឱ្យក្រុម Manchester City ប្រើប្រាស់បទពិសោធពីការយកឈ្នះក្នុងការប្រកួតដណ្តើមពាន FA Cup នៅលើទឹកដីក្រុម Newport នៅពេលដែលពួកគេប្រកួតជាមួយនឹងក្រុមធ្លាក់ចុះទម្រង់លេង Schalke របស់ក្របខ័ណ្ឌ Bundesliga ក្នុងការប្រកួតក្របខ័ណ្ឌ Champions League នៅរាត្រីនេះ។

ក្រុម Man City របស់លោក Guardiola បានធ្វើដំណើរទៅដល់ប្រទេសអាល្លឺម៉ង់ហើយ ក្នុងនាមជាក្រុមមានក្តីសង្ឃឹមខ្ពស់ក្នុងការឈ្នះក្នុងការប្រកួតវគ្គ 16ក្រុមចុងក្រោយ ជើងទី1 នាកីឡដ្ឋាន Veltins Arena របស់ក្រុម Schalke នៅរាត្រីនេះ។

ស្របពេលក្រុម Man City កំពុងតែនាំមុខលើតារាង Premier League ដោយការមានគ្រាប់់បាល់ច្រើនជាងក្រុម Liverpool នោះ ក្រុម Schalke កំពុងតែជួបភាពត្រដាបត្រដួស ដោយការមិនដែលស្គាល់ឈ្នះសោះពីការប្រកួតក្របខ័ណ្ឌលីកចំនួន 4លើកចុងក្រោយ និងស្ថិតនៅមិនឆ្ងាយពីតំបន់កាត់ចោលនៃក្របខ័ណ្ឌ Bundesliga ប៉ុន្មានឡើយ។

Man City បានយកឈ្នះលើក្រុម Newport County ក្នុងលទ្ធផល 4-1 កាលពីថ្ងៃសៅរ៍មុន ក្រោយពីបានជម្នះលើផ្ទៃទីលានដែលមិនល្អនាកីឡដ្ឋាន Rodney Parade និងការបង្ហាញពីទម្រង់លេងដ៏រឹងមាំរបស់ក្រុមម្ចាស់ផ្ទះ ក្នុងវគ្គ 8ក្រុមចុងក្រោយនៃពាន FA Cup។
ពួកគេអាចនឹងត្រូវជួបការលំបាកទាក់ទងនឹងផ្ទៃនៃទីលានបន្ថែមទៀតក្នុងតំបន់ Gelsenkirchen ប៉ុន្តែលោក Guardiola ចង់ឱ្យក្រុមប្រជុំដោយតារាឆ្នើមៗរបស់លោក បង្ហាញពីកម្រិតលេងដូចនឹងការប្រកួតពាន FA Cup របស់ពួកគេដែរ។

ក្នុងសន្និសីទសារព័ត៌មានមួយ លោក Guardiola បានឱ្យដឹងថា៖ «យើងត្រូវតែបង្ហាញពីសមត្ថភាពរបស់យើង។ ខ្ញុំចង់ឃើញពីស្មារតីប្រកួតដូចគ្នាទៅនឹងការប្រកួតដែលយើងបានលេងនៅ Newport យើងត្រូវតែបង្ហាញពីភាពខ្លាំង និងឈ្នះក្នុងការប្រកួតធំៗបែបនេះ»។ ការប្រកួតនេះនឹងចាប់ផ្តើមនៅម៉ោង3 ទៀបភ្លឺ៕

February 20, 2019

ឥណ្ឌូនេស៊ី ដាក់សំណើដេញថ្លៃជាផ្លូវការ ដើម្បីធ្វើជាម្ចាស់ផ្ទះអូឡាំពិក 2032

មន្ត្រីពាក់ព័ន្ធរបស់ឥណ្ឌូនេស៊ី បានបញ្ជាក់កាលពីថ្ងៃអង្គារ ម្សិលមិញថា ប្រទេសរបស់ខ្លួនបានដាក់សំណើដេញថ្លៃជាផ្លូវការ ដើម្បីធ្វើជាម្ចាស់ផ្ទះព្រឹត្តិការណ៍កីឡាអូឡាំពិកឆ្នាំ2032 ក្រោយពីប្រទេសស្ថិតក្នុងតំបន់អាស៊ីអាគ្នេយ៍មួយនេះ បានទទួលការកោតសរសើរចំពោះការធ្វើជាម្ចាស់ព្រឹត្តិការណ៍កីឡាអាស៊ី (Asian Games) កាលពីរដូវក្តៅមុន។

ក្រសួងការបរទេសរបស់ប្រទេសឥណ្ឌូនេស៊ីបានបញ្ជាក់កាលពីថ្ងៃអង្គារថា លោក Muliaman Hadadឯកអគ្គរដ្ឋទូតរបស់ឥណ្ឌូនេស៊ី ប្រចាំប្រទេសស្វ៊ីស បានទទួលសំណើដេញថ្លៃជាផ្លូវការមួយពីលោកប្រធានាធិបតី Joko Widodo មុននឹងបញ្ជូនទៅកាន់គណៈកម្មាធិការអូឡាំពិកអន្តរជាតិហៅកាត់ថា IOC ក្នុងទីក្រុង Lausanne កាលពីសប្តាហ៍មុន។

លោក Hadad បាននិយាយក្នុងសេចក្តីថ្លែងការណ៍មួយដែលត្រូវបានចេញផ្សាយជាសាធារណៈនៅសប្តាហ៍នេះថា៖ «នេះគឺជាពេលវេលាដ៏ត្រឹមត្រូវក្នុងការបង្ហាញពីសមត្ថភាពរបស់ឥណ្ឌូនេស៊ី ក្នុងនាមជាប្រទេសដ៏ធំមួយ»។

លោក Widodo បានសម្តែងពីការចាប់អារម្មណ៍របស់ឥណ្ឌូនេស៊ី ជាសាធារណៈ ទៅលើការធ្វើជាម្ចាស់ផ្ទះព្រឹត្តិការណ៍កីឡាអូឡាំពិកក្នុងឆ្នាំ2032 នៅរដ្ឋធានីហ្សាការតា អំឡុងពេលប្រទេសរបស់លោកធ្វើជាម្ចាស់ផ្ទះរៀបចំការប្រកួតកីឡាអាស៊ី កាលពីឆ្នាំមុន ដែលជាយុទ្ធនាការកីឡាចម្រុះធំជាងគេបំផុតលំដាប់ទី2 បន្ទាប់ពីអូឡាំពិក។
ប្រទេសឥណ្ឌា ក៏បានសម្តែងនូវការចាប់អារម្មណ៍របស់ខ្លួនក្នុងការធ្វើជាម្ចាស់ផ្ទះរៀបចំព្រឹត្តិការណ៍កីឡាអូឡាំពិក ឆ្នាំ2032 ផងដែរ ស្របពេលដែលប្រទេសកូរ៉េខាងជើង និងខាងត្បូង បានបញ្ជាក់ថា ខ្លួនអាចនឹងចូលខ្លួនក្នុងការដាក់សំណើដេញថ្លៃរួមគ្នាមួយដែរ។ IOC នឹងប្រកាសប្រទេសម្ចាស់ផ្ទះសម្រាប់យុទ្ធនាការប្រកួតកីឡាអូឡាំពិកឆ្នាំ2032 នៅត្រឹមឆ្នាំ2025។

ប្រសិនបើការដេញថ្លៃរបស់ខ្លួនទទួលបានជោគជ័យ ឥណ្ឌូនេស៊ី នឹងក្លាយជាប្រទេសម្ចាស់ផ្ទះអូឡាំពិក និងកីឡាអាស៊ីទី4 បន្ទាប់ពីប្រទេសជប៉ុន កូរ៉េខាងត្បូង និងចិន៕

February 20, 2019

Category: សង្គម និងសេដ្ឋកិច្ច