សង្គម និងសេដ្ឋកិច្ច - La Reine Media

ស្រស់ស្អាតរាល់ថ្ងៃ បើធ្វើតាមអត្ថបទនេះ

ពេញមួយថ្ងៃរាងកាយដូចជាមិនអាចគេចផុតពីការបំផ្លាញនៃអាកាសធាតុ និងពេលវេលានោះទេ បើដូច្នេះមែននោះតើធ្វើម៉េចនឹងអាចបង្អួតអ្នកជិតខាងឱ្យឃើញថា អ្នកនៅតែស្អាតតាំងពីព្រលឹមទល់ប្រលប់បានទៅ? ស្អាតរាល់ថ្ងៃ អ្នកណាមិនប្រាថ្នាចង់បាន តែវាទាស់ត្រង់ថាមិនដឹងធ្វើយ៉ាងម៉េចទើបអាចនាំក្តីស្រមៃនេះទៅកាន់ពិភពពិតបានតែប៉ុណ្ណោះ។ មិនស្រួល ហើយក៏មិនពិបាកដែរ ប៉ុន្តែវាតម្រូវឱ្យអ្នកយកចិត្តទុកដាក់ក្នុងការអនុវត្ត មិនមែនធ្វើតែមួយ ឬពីរថ្ងៃនៅមិនទាន់ឃើញពីប្រសិទ្ធភាព ក៏បោះបង់ចោលនោះទេ។ រក្សាឱ្យបានខ្ជាប់ខ្ជួននូវទង្វើមួយចំនួនដូចខាងក្រោម នោះភាពស្រស់ស្អាតនឹងស្ថិតនៅជាមួយអ្នករាល់ថ្ងៃជាមិនខាន។

ព្រឹកព្រលឹម : បន្ទាប់ពីក្រោកពីដំណេកនាពេលព្រឹក សូមកុំទាន់លុបលាងជាតិខ្លាញ់ដែលនៅជាប់លើផ្ទៃមុខ ជាពិសេសនៅជុំវិញច្រមុះ និងចង្កាចេញភ្លាមៗអី សូមប្រើដៃរបស់អ្នកញីវាឱ្យពេញផ្ទៃមុខ រួចទុកមួយសន្ទុះសិនសឹមចាប់ផ្តើមធ្វើអ្វីដែលអ្នកចង់ធ្វើជាបន្តចុះ។ ការរក្សាទុកនូវជាតិខ្លាញ់នៅលើផ្ទៃមុខបែបនេះគឺជាការជួយរក្សាស្បែកឱ្យមានសំណើម(សម្រាប់អ្នកដែលមានស្បែកស្ងួត) និងក្មេងជាងវ័យព្រោះវាជាខ្លាញ់ធម្មជាតិដែលរាងកាយបានបញ្ចេញមកក្រៅ។

មុនអាហារពេលព្រឹក : មុនទទួលទានអាហារពេលព្រឹក ត្រូវទទួលទានទឹកក្ដៅឧណ្ហ2កែវ (លាយជាមួយទឹកឃ្មុំ 1ស្លាបព្រាកាហ្វេ និងទឹកក្រូចឆ្មារបន្ដិចកាន់តែល្អ)។ ការធ្វើបែបនេះអាចជួយសម្អាតក្រពះ ហើយអាចជួយដល់ការរក្សារាងបានទៀតផង (ពេលខ្លះវាអាចនឹងមានការពិបាកបន្តិចសម្រាប់អ្នកក្នុងការទទួលទានពីដំបូង ហេតុនេះអ្នកគួរបង្រៀនខ្លួនឯងឱ្យចាប់ផ្តើមធ្វើវាម្តងបន្តិចៗក៏បាន)។

មិនត្រូវបោះបង់បន្លែបៃតង : រាល់ពេលទទួលទានអាហារអ្នកគួរទទួលទានអាហារដែលមានប្រយោជន៍ចំពោះសុខភាព និងសម្រស់ ដូចជា ផ្លែឈើ ត្រី ស៊ុត និងគ្រប់ធញ្ញជាតិជាដើម។

សម្អាតស្បែក : បន្ទាប់ពីត្រឡប់មកពីធ្វើការងារ ឬការចេញទៅខាងក្រៅផ្ទះអ្នកត្រូវលាងជម្រះ ឬប្រើកន្សែងសើម ដើម្បីសម្អាតសារជាតិកខ្វក់ផ្សេងៗដែលនៅជាប់លើផ្ទៃមុខចេញឱ្យបានស្អាត។

បន្ថែមពីលើសកម្មភាពអស់ទាំងនោះអ្នកត្រូវគិតទៅដល់ទង្វើមួយចំនួនទៀតដូចជា ការទទួលទានទឹកឱ្យបានគ្រប់គ្រាន់ ហើយត្រូវកាត់បន្ថយការបរិភោគអាហារដែលផ្ទុក ឬប្រើសារជាតិ ឬមានខ្លាញ់ច្រើន ដូចជា អាហារចៀន និងបំពងជាដើម។ ហាត់ប្រាណតាមដែលអាចធ្វើទៅបាន (បើទោះជាពេលខ្លះអ្នករវល់នឹងការងារច្រើន រហូតមិនមានពេលវេលាគ្រប់គ្រាន់ដើម្បីទៅហាត់ប្រាណនៅតាមក្លឹប ឬទីកន្លែងផ្សេងៗក៏ដោយ អ្នកគួរតែឆ្លៀតពេលដើរក្នុងកំឡុងពេលធ្វើការ) ព្រមទាំងធ្វើការផ្លាស់ប្តូរឥរិយាបទនៃការអង្គុយ ឈរ គេង និងដកដង្ហើមត្រូវធ្វើឱ្យបានត្រឹមត្រូវ៕

February 26, 2019

គ្រាន់តែនិយាយជាមួយកូនតូច ក៏អាចជួយឱ្យគេក្លាយជាមនុស្សពូកែបានដែរ

វេទិកាសេដ្ឋកិច្ចពិភពលោក បានបង្ហាញការស្រាវជ្រាវមួយស្តីពីការអប់រំកុមារតូចថា គ្រាន់តែអាណាព្យាបាលឧស្សាហ៍និយាយ ឬសន្ទនាជាមួយកូនតូចឱ្យបានច្រើនក៏អាចជំរុញការអភិវឌ្ឍខួរក្បាលរបស់ក្មេងបានយ៉ាងលឿនផងដែរ។

អ្នកវិទ្យាសាស្ត្រនៃស្ថាប័នចិត្តសាស្ត្រ MIT, Psychological Science បានបង្ហាញថាការនិយាយជាមួយក្មេងជារឿយៗនឹងធ្វើឱ្យក្មេងក្លាយជាមនុស្សពូកែសន្ទនា ហើយក៏ជួយអភិវឌ្ឍសមត្ថភាពជាច្រើនផ្សេងទៀតផងដែរ ជាពិសេសផ្នែកភាសា។ កុមារដែលឧស្សាហ៍សន្ទនាជាមួយនឹងមនុស្សធំមានសមត្ថភាពចងចាំ និងយល់ពីការប្រើប្រាស់ពាក្យសំខាន់ៗបានល្អជាងកុមារដែលមិនសូវនិយាយស្តីព្រោះតាមរយៈការស្រាវជ្រាវបានបង្ហាញថា កុមារចន្លោះពី 4ឆ្នាំ ដល់6ឆ្នាំដែលបាននិយាយ និងស្និទ្ធស្នាលជាមួយគ្រួសារច្រើនមានសមត្ថភាពយល់ពីពាក្យ វេយ្យាករណ៍ និងផ្នែកផ្សេងៗនៃភាសា។

ការបកស្រាយរបស់អ្នកចិត្តសាស្ត្រកុមារបានបង្ហាញផងដែរថា អាណាព្យាបាលក៏អាចបង្រៀនកូនប្រកបដោយប្រសិទ្ធភាពផងដែរបើទោះបីជាកូននោះមិនទាន់ដល់វ័យអាចនិយាយបានក៏ដោយ ព្រោះក្មេងអាចព្យាយាមស្វែងយល់បានតាមរយៈសំឡេងដដែលៗ និងការធ្វើមុខធ្វើមាត់របស់មនុស្សធំជាដើម។

ផ្ទុយមកវិញ អាណាព្យាបាលនាពេលបច្ចុប្បន្ននេះបែរជាមិនសូវមានពេលគ្រប់គ្រាន់ក្នុងការសន្ទនាជាមួយកូនទៅវិញ ព្រោះមនុស្សម្នាក់ៗមានការងារច្រើនត្រូវធ្វើប្រចាំថ្ងៃ ហើយមានអ្នកខ្លះទៀតបណ្តែតបណ្តោយឱ្យកូនរស់នៅជាមួយបច្ចេកវិទ្យាច្រើនជ្រុល រហូតធ្វើឱ្យពួកគេឃ្លាតឆ្ងាយពីគ្នា។ បញ្ហានេះធ្វើឱ្យកុមារអាចក្លាយជាមនុស្សធំដែលមានសមត្ថភាពភាសាមិនល្អ សរសេរខុសច្រើន មានការលំបាកក្នុងការអាន និងស្តាប់ចំណុចសំខាន់ៗនានា។ កត្តានេះអាចជាគ្រោះថ្នាក់មួយដែលធ្វើឱ្យកើតមានជាក្តីបារម្ភសម្រាប់អនាគតធនធានមនុស្សដែលកំពុងត្រូវការភាពប៉ិនប្រសប់កាន់តែខ្លាំង។

ឪពុកម្តាយគួរនៅក្បែរកូនឱ្យបានច្រើនបន្ទាប់ពីការងារ ឬយ៉ាងហោចមានពេលវេលាជជែកជាមួយកូនឱ្យបានទៀងទាត់រាល់ពេលល្ងាចដើម្បីបង្កើនភាពស្និទ្ធស្នាល បង្រៀនកូនឱ្យស្វែងយល់ពីការរស់នៅតាមរយៈសកម្មភាពសប្បាយៗ និងនិយាយជាមួយពួកគេឱ្យបានច្រើន ប្រសិនបើចង់ឱ្យកូនៗក្លាយជាមនុស្សខ្លាំងម្នាក់នៅថ្ងៃអនាគត។ សកម្មភាពទាំងអស់នេះមិនមែនជារឿងលំបាកនោះទេ តែវាជារឿងសំខាន់ដែលមិនគួរមើលរំលង៕

February 26, 2019

«សង្សារគេ » បទថ្មីពី ថេណា មកស្អំបេះដូងអ្នកគាំទ្រសាជាថ្មី

លោក ថេណា (Tena) ត្រូវបានមហាជនទទួលស្គាល់ថា ជាតារាចម្រៀង Original song ប្រុសដែលនិយមច្រៀងស្ទាយ RnB មួយរូបដ៏មានប្រជាប្រិយភាពបំផុតនៅលើបណ្ដាញសង្គមយូធូប។ តាមរយៈបទចម្រៀងរបស់លោកផ្ទាល់ មិនត្រឹមនិពន្ធភ្លេង និងទំនុកច្រៀងថ្មីទេ តែសំនៀងក៏ផ្អែមពិរោះថែម ដែលអត្ថន័យក្នុងបទចម្រៀងនិមួយកន្លងមក សុទ្ធតែចាក់ដោយអារម្មណ៍យុវវ័យឱ្យស្លុងទៅតាមន័យ។ មួយរយៈពេលមុននេះ លោកបានចេញបទ«អេម» តែជាអកុសលត្រូវទទូលការិះគន់ពីសំណាក់អ្នកសិស្បៈមួយចំនួន ដែលរហូតធ្វើឱ្យសម្រេចចិត្តលុបចម្រៀងនោះចេញ ហើយងាកសុំទោសជាសាធារណៈផងដែរ។

ដោយឡែកមុននេះបន្តិច ដើម្បីស្អំបេះដូងអ្នកគាំទ្រមិនឱ្យឃ្លាតឆ្ងាយពីលោក តារាចម្រៀង ថេណា បានបញ្ចេញនូវបទចម្រៀងថ្មីរបស់លោកមួយបទថែមទៀត មានចំណងជើងថា «សង្សារគេ » បានស្ដាប់ហើយពិតជាចាក់ដោតអារម្មណ៍ខ្លាំងណាស់ ។ ក្នុងមួយបទចម្រៀងនេះ បានរៀបរាប់អំពីពីស្នេហា ខ្លួនឯងដែលស្រឡាញ់នារីម្នាក់ដែលជាសង្សារបស់គេ ដឹងទាំងដឹងថាសង្សារហើយ តើអារម្មណ៍អត់ធ្មត់ និងការរងចាំវាលំបាកវេទនាប៉ុនណា? សូមទស្សនាវីដេអូខាងក្រោមនេះ៖

February 26, 2019

កម្ពុជា-ជប៉ុន ឈានដល់ការទទួលយកពលករជំនាញទៅធ្វើការនៅជប៉ុនហើយ

កន្លងមកប្រទេសកម្ពុជា និងជប៉ុន បានសហការគ្នាយ៉ាងល្អលើវិស័យការងារ ដែលកិច្ចសហការនេះបានផ្តល់ផលចំណេញជាច្រើនដល់ប្រជាជនកម្ពុជាក្នុងការសិក្សាយកចំណេះ និងជំនាញមកអភិវឌ្ឍប្រទេស។ តែទោះបីជាយ៉ាងនេះក្តី កិច្ចសហការកន្លងមកប្រទេសជប៉ុនបើកទទួលត្រឹមតែកម្មសិក្សាការីរបស់កម្ពុជាតែប៉ុណ្ណោះ មិនទាន់បានទទួលយកពលករកម្ពុជាឱ្យធ្វើការងារពេញសិទ្ធិនៅប្រទេសជប៉ុននៅឡើយទេ។ ហេតុនេះហើយទើបភាគីទាំង2 ខិតខំប្រឹងប្រែងដើម្បីធ្វើយ៉ាងណាជំរុញឱ្យកិច្ចសហការនេះឱ្យកាន់តែមានការអភិវឌ្ឍទៅមុខ រួមទាំងគុណភាពនៃការបណ្តុះបណ្តាល និងការផ្លាស់ប្តូរកម្លាំងពលកម្មឱ្យកាន់តែមានប្រសិទ្ធភាពឡើង។

នាពេលថ្មីៗនេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈរបស់កម្ពុជា ឯកឧត្តម អុិត សំហេង និងឯកឧត្តម Hidehisa Horinouchi ឯកអគ្គរាជទូតជប៉ុនប្រចាំនៅកម្ពុជា បានជួបពិភាក្សាគ្នាដើម្បីឈានទៅដល់ការចុះកិច្ចព្រមព្រៀងសហប្រតិបត្តិការកម្ពុជា-ជប៉ុន ស្តីពីពលកម្មជំនាញ។

នៅក្នុងជំនួបនោះ ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ជប៉ុននឹងកែសម្រួលច្បាប់ថ្មី ដើម្បីអនុញ្ញាតឱ្យពលករកម្ពុជាអាចដាក់ពាក្យស្នើសុំទិដ្ឋាការការងារ (working visa) ដើម្បីទទួលបានសិទ្ធពេញលេញក្នុងការធ្វើការងារនៅប្រទេសជប៉ុន ខណៈដែលកន្លងមកជប៉ុនទទួលយកត្រឹមតែកម្មសិក្សាការីរបស់កម្ពុជាទៅដកពិសោធការងារនៅប្រទេសជប៉ុនតែប៉ុណ្ណោះ។ ច្បាប់ថ្មីនេះនឹងផ្តល់ឱកាសល្អដល់ពលករជំនាញរបស់កម្ពុជា និងពលករបច្ចេកទេស អាចចូលទៅបម្រើការងារពេញច្បាប់ ដើម្បីបំពេញចំណុចខ្វះខាតនូវកម្លាំងពលកម្មដែលជប៉ុនកំពុងត្រូវការ។ ក្នុងនោះដែរឯកឧត្តមក៏បានមានប្រសាសន៍ថ្លែងអំណរគុណដល់រាជរដ្ឋាភិបាលជប៉ុនដែលកន្លងមកបានជួយអភិវឌ្ឍប្រទេសកម្ពុជា តាមរយៈការផ្តល់ឱកាសឱ្យកម្មសិក្សាការីកម្ពុជាបានទៅហាត់ការនៅប្រទេសជប៉ុន ដែលមកដល់បច្ចុប្បន្នមានចំនួន 9ពាន់នាក់ហើយ។

ឯកឧត្តម អុិត សំហេង បានមានប្រសាសន៍ថា៖ “គម្រោងដែលជប៉ុន នឹងដាក់ឱ្យដំណើរការនូវច្បាប់ការងារថ្មី ដើម្បីទទួលយកពលករពីប្រទេសនានាទៅធ្វើការងារនៅប្រទេសជប៉ុននៅក្នុងខែមេសាឆ្នាំ2019 ខាងមុខនេះ កម្ពុជាបានត្រៀមខ្លួនជាស្រេចក្នុងការពង្រឹងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ ព្រោះវាជាឱកាសដ៏ល្អមួយដែលប្រទេសទាំង2 នឹងទទួលបានផលប្រយោជន៍ទៅវិញទៅមក”។

ឯកឧត្តមរដ្ឋមន្ត្រីក្រសួងការងារបានមានប្រសាសន៍បន្តទៀតថា ផលប្រយោជន៍ដែលជប៉ុននឹងទទួលបាន គឺពលករកម្ពុជានឹងទៅបំពេញកង្វះខាតកម្លាំងពលកម្មដែលជប៉ុនកំពុងត្រូវការលើវិស័យជាច្រើន ចំណែកឯកម្ពុជាវិញនឹងមានលទ្ធភាពក្នុងការផ្តល់ឱកាសបន្ថែមដល់ប្រជាជនក្នុងការជ្រើសរើសការងាររបស់ខ្លួនតាមចំណង់ចំណូលចិត្ត ដើម្បីទទួលបានការងារដែលមានប្រាក់ខែខ្ពស់ ហើយថែមទាំងទទួលបានចំណេះដឹង និងជំនាញវិជ្ជាជីវៈសម្រាប់ត្រឡប់មកចូលរួមអភិវឌ្ឍប្រទេសវិញទៀតផង។

បើតាមគម្រោង កម្ពុជា និងជប៉ុននឹងចុះអនុស្សរណៈយោគយល់គ្នាលើកិច្ចសហប្រតិបត្តិការនៅទីក្រុងតូក្យូក្នុងអំឡុងសប្តាហ៍ទី3 នៃខែមីនា ឆ្នាំ2019 ខាងមុខ ព្រោះភាគីទាំង2 បានឯកភាពគ្នារួចជាស្រេចហើយដោយបានជំរុញឱ្យក្រុមការងារបច្ចេកទេសពិនិត្យកែសម្រួលសេចក្តីព្រាងអនុស្សរណៈនៃការយោគយល់គ្នានេះឱ្យបានរួចឆាប់៕

February 26, 2019

កម្ពុជាកំពុងត្រៀមរៀបចំឯកសារស្ដីពីតម្បាញសូត្រខ្មែរ ល្ខោនយីកេ និងគ្រឿងចម្លាក់ប្រាក់ ស្នើរចូលបញ្ជីបេតិកភណ្ឌពិភពលោក

តាមរយៈទំព័រហ្វេសប៊ុកក្រសួងវប្បធម៌ និងវិចិត្រសិល្បៈបានឱ្យដឹងថា កម្ពុជា បានរៀបចំដាក់ ទម្រង់ល្ខោនយីកេ តម្បាញសូត្រខ្មែរ និងគ្រឿងចម្លាក់ប្រាក់ ក្នុងបញ្ជីត្រៀមរបស់ខ្លួនសម្រាប់ស្នើសុំទៅអង្គការយូណេស្កូ ដាក់បញ្ចូលទៅក្នុងបញ្ជីបេតិកភណ្ឌអរូបីនៃមនុស្សជាតិ ។

ថ្លែងប្រាប់ក្រុមអ្នកសារពត័មានក្នុងស្រុក លោកស្រី ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ បានបញ្ជាក់ឱ្យដឹងថា ក្រសួង បានដាក់ឯកសារល្បុក្កតោ ចូលទៅក្នុងបញ្ជីបេតិកភណ្ឌអរូបីនៃមនុស្សជាតិរួចហើយ ដែលកំពុងរង់ចាំការសម្រេចពីគណៈកម្មការយូណេស្កូនៅឆ្នាំ 2020 ។ ទន្ទឹមនឹងនេះដែរ ក្រសួងវប្បធម៌ ក៏កំពុងត្រៀមរៀបចំឯកសារស្ដីពីតម្បាញសូត្រខ្មែរ ល្ខោនយីកេ និងគ្រឿងចម្លាក់ប្រាក់ ចូលទៅក្នុងបញ្ជីត្រៀម សម្រាប់ស្នើសុំទៅគណៈកម្មការយូណេស្កូ ដាក់បញ្ចូលទៅក្នុងបញ្ជីបេតិកភណ្ឌពិភពលោក ។

បើតាមមន្រ្តីជំនាញ បានបញ្ជាក់ដែរថា សម្បត្តិវប្បធម៌អរូបី នៃមនុស្សជាតិ មានច្រើនទម្រង់ ក្នុងនោះ រួមមាន ល្ខោនរបាំ កីឡា ឧបករណ៍ភ្លេង ម្ហូបអាហារ តម្បាញសូត្រ និងគ្រឿងចម្លាក់ប្រាក់ គឺសុទ្ធតែត្រូវបានចាត់ចូលជាសម្បត្តិវប្បធម៌អរូបី ។ ក្នុងចំណោមទម្រង់នៃសិល្បៈទាំងនេះ ក្រសួង បានរៀបចំចងក្រងឯកសារ និងដាក់បញ្ចូលជាសម្បត្តិបេតិកភណ្ឌវប្បធម៌អរូបីរបស់ជាតិ ជាបន្តបន្ទាប់ ដែលរួមបញ្ចូលទាំងតម្បាញសូត្រ ល្ងោនយីកេ គ្រឿងចម្លាក់ប្រាក់ និងទម្រង់សិល្បៈមួយចំនួនទៀត ។ សូមជម្រាបថា គិតត្រឹមឆ្នាំ 2018 កម្ពុជា បានចុះបញ្ជីសម្បត្ដិវប្បធម៌ទាំងរូបី និងអរូបី ទៅក្នុងបញ្ជីសម្បត្ដិបេតិកភណ្ឌពិភពលោក បានចំនួន 8 រួមមាន៖ ប្រាសាទអង្គរវត្ដ,របាំព្រះរាជទ្រព្យ, ល្ខោនស្រមោលស្បែក ឬល្ខោនស្បែកធំ, ប្រាសាទព្រះវិហារ, ល្បែងទាញព្រ័ត្រ, ចាប៉ីដងវែង, ប្រាសាទសំបូរព្រៃគុក និង ល្ខោនខោល ៕

February 26, 2019

Joshua គំរាមដកព្រលឹង Miller ចេញខ្លួន ពេលប្រកួតដណ្ដើមខ្សែក្រវាត់ពិភពលោកទម្ងន់ធ្ងន់

កីឡាករប្រដាល់ Anthony Joshua បានគំរាមចំពោះ Jarrell Miller ថា រូបគេនឹង «ដកយកព្រលឹងចេញពីខ្លួនរបស់ Miller » នៅពេលដែលកីឡាកររូបនេះនឹងត្រូវឡើងការពារខ្សែក្រវាត់ពិភពលោកក្នុងទម្ងន់ធ្ងន់ របស់ខ្លួន ខណៈពេលរូបគេបានឆ្លើយតបទៅនឹងការចំអកផ្សេងៗពីដៃគូប្រកួតសញ្ជាតិអាមេរិករបស់ខ្លួនថា រូបគេគឺជាម្ចាស់ខ្សែក្រវាត់ដ៏អស្ចារ្យម្នាក់។

កីឡាករប្រដាល់ចក្រភពអង់គ្លេស Joshua នឹងទៅប្រកួតនៅលើទឹកដីសហរដ្ឋអាមេរិកជាលើកទី1 នៅពេលដែលរូបគេឡើងត្រូវការពារខ្សែក្រវាត់របស់ស្ថាប័ន IBF, WBA និង WBO របស់គេ នៅលើសង្វៀន Madison Square Garden នៅទីក្រុងញូវយ៉ក ដែលជាទឹកដីកំណើតរបស់ Miller នៅថ្ងៃទី1 ខែមិថុនា ខាងមុខនេះ។
វានឹងក្លាយជាការប្រកួតរវាងកីឡាករប្រដាល់មិនស្គាល់ចាញ់ 2នាក់ ខណៈដែល Joshua មានកំណត់ត្រាផ្តួលដៃគូឱ្យសន្លប់ចំនួន 21លើក ក្នុងចំណោមការឈ្នះទាំង 22លើករបស់គេ ហើយ Miller មានកំណត់ត្រាឈ្នះ 23លើក ស្មើ 1លើក ក្នុងនោះផ្តួលដៃគូឱ្យសន្លប់ 20លើក។

កីឡាករទាំង2 បានរៀបចំសន្និសីទសារព័ត៌មានមួយរួចជាស្រេចក្នុងទីក្រុងញូវយ៉ក កាលពីសប្តាហ៍មុន ខណៈដែល Miller បានចាត់ទុក Joshua ថា «ជាមនុស្សបន្លំ និងកំសាកញី»។
ព្រឹត្តិការណ៍កាលពីថ្ងៃចន្ទ មិនបានស្ថិតក្នុងការចាប់អារម្មណ៍ខ្លាំងឡើយ នៅមុនពេល Miller បានលើកឡើងថា Joshua បានធ្វើឱ្យអ្វីៗកាន់តែមានភាពងាយស្រួលឡើង។

Joshua បានឆ្លើយតបទៅវិញថា៖ «ខ្ញុំនៅមានរយៈពេល 10ឆ្នាំទៀតក្នុងកីឡានេះ។ ខ្ញុំមិនដឹងថាវាយ៉ាងណាឡើយ តែខ្ញុំចង់ផ្តួលកីឡាករជាច្រើនទៀតឱ្យសន្លប់ និងសុំចុះចាញ់»៕

ប្រភពពី៖ Channel News Asia

February 26, 2019

លោក Puel ថា លោកមានកិត្តិយសណាស់ក្នុងការដឹកនាំ Leicester

លោក Claude Puel បាននិយាយថា លោកពិតជាមានកិត្តិយសណាស់ក្នុងការទទួលបានឱកាសដឹកនាំក្រុម Leicester ក្រោយពីលោកត្រូវបានបណ្តេញចេញកាលពីចុងសប្តាហ៍មុន។

អាណត្តិដឹកនាំរយៈពេល 16ខែរបស់គ្រូបង្វឹកសញ្ជាតិបារាំងវ័យ 57ឆ្នាំរូបនេះ បានឈានដល់ទីបញ្ចប់ ក្រោយពីក្រុមរបស់លោកបានរងបរាជ័យក្នុងលទ្ធផល 4-1 លើទឹកដីខ្លួនឯងក្រោមស្នាដៃក្រុម Crystal Palace ដែលជាការរងបរាជ័យលើកទី6 របស់ក្រុម Leicester ក្នុងចំណោមការប្រកួត 7លើក។

អំឡុងពេលនៃការបរាជ័យនោះ ក្រុម Leicester បានធ្លាក់ចេញពីពាន FA Cup ក្រោមស្នាដៃក្រុម Newport និងបានធ្លាក់ទៅឈរក្នុងចំណាត់ថ្នាក់លេខ12 ក្នុងក្របខ័ណ្ឌ Premier League ដោយនាំមុខ 8ពិន្ទុពីលើក្រុមស្ថិតក្នុងតំបន់កាត់ចោល។

លោក Puel បានឱ្យដឹងក្នុងសេចក្តីថ្លែងការណ៍មួយដែលត្រូវបានចេញផ្សាយតាមរយៈសហជីពអ្នកចាត់ការទូទៅក្នុងក្របខ័ណ្ឌលីក កាលពីថ្ងៃចន្ទថា៖ «ខ្ញុំសូមថ្លែងអំណរគុណដល់គ្រប់គ្នាដែលខ្ញុំបានធ្វើការជាមួយនៅឯក្លិបបាល់ទាត់ Leicester City»។

គ្រូបង្វឹករូបនេះបានបន្ថែមទៀតថា៖ «វាគឺជាសិទ្ធិពិសេសមួយក្នុងការធ្វើការជាមួយនឹងកីឡាករ បុគ្គលិក និងក្រុមអ្នកចាត់ការទូទៅ។ វាជាកិត្តិយសរបស់ខ្ញុំក្នុងការបានធ្វើការឱ្យលោក KhunVichai ដែលបានផ្តល់ឱកាសដ៏អស្ចារ្យដល់ខ្ញុំក្នុងការដឹកនាំក្លិបនេះ និងចែករំលែកពេលវេលាដ៏អស្ចារ្យជាមួយនឹងគាត់»។

លោក Puel គឺជាអ្នកចាត់ការទូទៅក្នុងក្របខ័ណ្ឌកំពូលទី5 ដែលបានចាកចេញពីតំណែងរបស់លោក ក្រោយពីលោក Slavisa Jokanovic ត្រូវបានបណ្តេញចេញពីក្លិប Fulham លោក Mark Hughes ពីក្លិប Southampton លោក Jose Mourinho ពីក្លិប Manchester United និងលោក David Wagner ពីក្លិប Huddersfield៕

February 26, 2019

គម្រោងអភិវឌ្ឍន៍សំខាន់2 ត្រូវបានជប៉ុនផ្តល់ជំនួយជាថវិកាជាង 43លានដុល្លារ

រដ្ឋមន្ត្រីក្រសួងការបរទេស និងឯកអគ្គរាជទូតជប៉ុនប្រចាំកម្ពុជាលោក Hidehisa Horinouchi បានចុះហត្ថលេខាលើលិខិតប្តូរសារស្តីពីការបន្តការគាំទ្ររបស់រដ្ឋាភិបាលជប៉ុន សម្រាប់អនុវត្តលើគម្រោងចំនួន2 នៅក្នុងប្រទេសកម្ពុជាដែលមានទឹកប្រាក់ប្រមាណ 43.36លានដុល្លារ។

ពិធីចុះហត្ថលេខាលើជំនួយឥតសំណងរបស់ជប៉ុនក្នុងទឹកប្រាក់សរុបប្រមាណជាង 43.36លានដុល្លារនេះ សម្រាប់ការអនុវត្តគម្រោងចំនួន2 រួមមាន៖
*ទី1- ឥណទានសម្បទាន ដែលមានទឹកប្រាក់សរុប 3,599លានយ៉េន (ប្រមាណ 31.56លានដុល្លារអាមេរិក) សម្រាប់អនុវត្ត “គម្រោងកែលម្អ និងស្តារប្រព័ន្ធស្រោចស្រព និងប្រព័ន្ធរំដោះទឹកភាគខាងលិចបឹងទន្លេសាបជំហានទី2”។

*ទី2- ហិរញ្ញប្បទានឥតសំណង ដែលមានទឹកប្រាក់សរុប 1,340លានយ៉េន (ប្រមាណ 11.8លានដុល្លារអាមេរិក) សម្រាប់អនុវត្ត “គម្រោងអភិវឌ្ឍន៍ប្រព័ន្ធផ្លាស់ប្តូរទិន្នន័យអគ្គិសនី នៅកំពង់ផែ ដើម្បីការធ្វើទំនើបកម្មកំពង់ផែ”។

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានមានប្រសាសន៍ថា ជំនួយឥតសំណង និងឥណទានសម្បទាននេះ ត្រូវបានពង្រីក ដោយរដ្ឋាភិបាលជប៉ុនដើម្បីជំរុញថែមទៀតក្នុងការអភិវឌ្ឍសេដ្ឋកិច្ច និងសង្គមក្នុងប្រទេសកម្ពុជា នឹងបន្តអនុវត្តគោលនយោបាយ “យុទ្ធសាស្ត្រចតុកោណជំហានទី 4” របស់រដ្ឋាភិបាល។

ឯកឧត្តមបានបញ្ជាក់ថា ជំនួយនេះនឹងរួមចំណែកយ៉ាងសំខាន់ក្នុងការបន្តអនុវត្ត “យុទ្ធសាស្ត្រចតុកោណ” ដំណាក់កាលទី4 របស់រាជរដ្ឋាភិបាលកម្ពុជាដែលស្របទៅនឹងមុំទី2 និងទី4 ដែលបានសង្កត់ធ្ងន់លើ “ការកែលម្អប្រព័ន្ធឡូជីស្ទិក ការលើកកម្ពស់ការតភ្ជាប់ផ្នែកដឹកជញ្ជូនថាមពល និងឌីជីថល” និង“ការលើកស្ទួយវិស័យកសិកម្ម និងការអភិវឌ្ឍជនបទការគ្រប់គ្រងធម្មជាតិ និងវប្បធម៌ប្រកបដោយចីរភាព”។ ទាំងអស់នេះជាចលករជួយជំរុញឱ្យកម្ពុជាសម្រេចបាននូវឋានៈ ជាប្រទេសចំណូលមធ្យម កម្រិតខ្ពស់នៅឆ្នាំ2030។

ប្រមុខការទូតកម្ពុជាបានរំឭកថា ក្នុងឆ្នាំសារពើពន្ធជប៉ុន2018 (ដែលគិតចាប់ពីខែមេសា 2018 ដល់ មីនា 2019) សរុបមកកម្ពុជា និងជប៉ុនបានចុះហត្ថលេខាលើឯកសារសី្តពីជំនួយអភិវឌ្ឍន៍ផ្លូវការរបស់ជប៉ុនដែលបានផ្តល់ជូនរាជរដ្ឋាភិបាលកម្ពុជាសរុបចំនួន 134.38លានដុល្លារ ក្នុងនោះជំនួយឥតសំណងប្រមាណ 19.42លានដុល្លារ ឥណទានសម្បទានប្រមាណ 114.96លានដុល្លារ។

ជប៉ុន គឺជាប្រទេសផ្តល់ជំនួយដ៏ធំបំផុតមួយ ដែលបានគាំទ្រគម្រោងអភិវឌ្ឍន៍អាទិភាពរបស់រាជរដ្ឋាភិបាលកម្ពុជាតាំងពីដើមទសវត្សរ៍ឆ្នាំ1990 ជាពិសេសការកែលម្អប្រព័ន្ធឡូជីស្ទិក សុខាភិបាល អប់រំ ការអភិវឌ្ឍធនធានមនុស្ស កសិកម្ម និងលើកកម្ពស់ជីវភាពរស់នៅរបស់ប្រជាជន។

ឯកឧត្ដមឧបនាយករដ្ឋមន្ត្រី ប្រាក់ សុខុន បានឱ្យដឹងថា ឆ្នាំ2018 កម្ពុជា និងជប៉ុនបានប្រារព្វខួបអនុស្សាវរីយ៍លើកទី6 នៃការបង្កើតទំនាក់ទំនងការទូតរវាងប្រទេសទាំង2។ លោកបានកត់សម្គាល់ថា ទំនាក់ទំនងមិត្តភាព និងសហប្រតិបត្តិការក្នុងរយៈពេល 65ឆ្នាំនេះ ទោះជាបានឆ្លងកាត់ពេលវេលា និងការប្រែប្រួលស្ថានភាពក្នុងតំបន់ និងអន្តរជាតិយ៉ាងណាក៏ដោយ វាមិនត្រឹមតែនៅរក្សាបានភាពល្អប្រសើរប៉ុណ្ណោះទេ តែថែមទាំងបន្តមាននិន្នាការរីកចម្រើនថ្មីៗ និងស៊ីជម្រៅទៀតផង។ ដោយការផ្លាស់ប្តូរទស្សនកិច្ចជាន់ខ្ពស់ កំណើនពាណិជ្ជកម្ម និងវិនិយោគ ការប្រាស្រ័យទាក់ទងរវាងប្រជាជន និងប្រជាជនក្នុងរយៈពេលប៉ុន្មានឆ្នាំថ្មីៗនេះ បានពង្រឹងថែមទៀតនូវទំនាក់ទំនងយូរអង្វែង រវាងប្រជាជាតិទាំង2។

ជាមួយគ្នានេះដែរ លោក Hidehisa HORINOUCHI បានថ្លែងថា តាមរយៈហិរញ្ញប្បទានឥតសំណងដែលបានចុះហត្ថលេខានៅថ្ងៃនេះ ប្រព័ន្ធចាំបាច់សម្រាប់ការផ្លាស់ប្តូរទិន្នន័យ Digital នៃការស្នើសុំ និងការជូនដំណឹងទៅកាន់អ្នកគ្រប់គ្រងកំពង់ផែ នឹងត្រូវបានធ្វើឡើងសម្រាប់កំពង់ផែក្រុងព្រះសីហនុ និងកំពង់ផែរាជធានីភ្នំពេញ។ តាមរយៈកិច្ចការនេះ នីតិវិធីសម្រាប់ការចេញ-ចូលកំពង់ផែ របស់នាវានឹងត្រូវប្តូរមកប្រើប្រាស់តាមទិន្នន័យ Digital ហើយការបង្កើនប្រសិទ្ធភាពនៃប្រព័ន្ធ Logistic និងទំនើបកម្មនៃរដ្ឋបាលកំពង់ផែនឹងត្រូវបានអនុវត្ត។

លោក Hidehisa HORINOUCHI បានបន្តទៀតថា៖“ដោយមានប្រាក់កម្ចីសម្បទានបន្ថែមចំនួនប្រមាណ 33.6លានដុល្លារអាមេរិក យើងបានធ្វើទំនើបកម្មប្រព័ន្ធបង្ហូរទឹកស្រោចស្រព តាមរយៈការធ្វើឱ្យប្រសើរឡើងវិញ និងការរៀបចំផ្សេងៗ ហើយបង្កើត និងពង្រឹងសហគមន៍កសិករប្រើ ប្រាស់ទឹក ; និងណែនាំស្តីពីការគ្រប់គ្រងកសិកម្មនៅតាមតំបន់ជនបទចំនួន6 នៃខេត្តចំនួន3 នៅភាគខាងលិចបឹងទន្លេសាប”។

លោកឯកអគ្គរាជទូតបន្ថែមថា សកម្មភាពទាំងនេះនឹងរួមចំណែកបង្កើនផលិតកម្មកសិកម្ម យ៉ាងខ្លាំងនៅក្នុងតំបន់គោលដៅ និងជួយធ្វើឱ្យប្រសើរឡើងនូវស្ថានភាពរស់នៅតាមជនបទកាន់តែខ្លាំងឡើង។ វិស័យកំពង់ផែ និងវិស័យកសិកម្ម រុក្ខា ប្រមាញ់ និងនេសាទរបស់កម្ពុជា គឺជាកិច្ចការអាទិភាពមួយដើម្បីគាំទ្រកំណើនសេដ្ឋកិច្ច។ លោកមានប្រសាសន៍ថា “ខ្ញុំរំពឹងទុកថា គម្រោងទាំង2 ដែលបានចុះហត្ថលេខានៅថ្ងៃនេះ នឹងរួមចំណែកដល់ការអភិវឌ្ឍបន្ថែមទៀតនៃសេដ្ឋកិច្ចកម្ពុជា”។

គួរកត់សម្គាល់ដែរថា ក្នុងក្របខណ្ឌនៃការវិនិយោគផ្ទាល់ពីជប៉ុនរហូតមកដល់បច្ចុប្បន្ន ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនជប៉ុនចំនួន 137គម្រោង ក្នុងទុនវិនិយោគសរុបមានចំនួនប្រមាណ 2.5ប៊ីលានដុល្លារអាមេរិក ដែលក្នុងនោះមានគម្រោងវិនិយោគចំនួន66 ស្ថិតនៅក្នុងតំបន់សេដ្ឋកិច្ចពិសេស៕

February 26, 2019

គ្រាន់តែថ្ងៃដាក់សម្ពោធភ្លាម រឿង «ទារុណកម្មខ្មោច» មហាជនដាក់ពិន្ទុឱ្យ 7/10

ស្នាដៃថ្មីរឿង «ទារុណកម្មខ្មោច» ដែលសម្រិតសម្រាំងយ៉ាងយកចិត្តទុកដាក់របស់ផលិតកម្មសិល្បៈភាពយន្តសហការជាមួយលោក ហ៊ុយ យ៉ាឡេង ផលិតករ និងអ្នកដឹកនាំដ៏ពូកែ ត្រូវបានអ្នកគាំទ្ររំពឹងថា ពិតជាទទួលបានការចាប់អារម្មណ៍ម្តងទៀតហើយ សម្រាប់សង្គមភាពយន្តខ្មែរ។ ការមានជំនឿចិត្តបែបនេះ ព្រោះគេទទួលស្គាល់យ៉ាងពេញទំហឹងលើស្នាដៃលោក ហ៊ុយ យ៉ាឡេង ពូកែផលិតកុន ប្រកបដោយការលាក់ផ្ទៃរឿង។

នាយប់មិញនេះ ស្ថិតក្នុងបរិវេនរោងកុនទំនើបនៅផ្សារទំនើបអ៊ីអន១ រាជធានីភ្នំពេញ ផលិតកម្មសិល្បៈភាពយន្តខ្មែរ សហការជាមួយលោក ហ៊ុយ យ៉ាឡេង អ្នកសម្តែង និងផលិតករ រួមទាំងជាអ្នកដឹកនាំរឿង បានសហការគ្នាជាមួយអ្នកនាង ចន ច័ន្ទលក្ខិណា បានប្រារព្ធពិធីដាក់សម្ពោធខ្សែភាពយន្តរឿង «ទារុណកម្មខ្មោច» ដោយមានវត្តមានតារាសិល្បៈចូលរួមជាច្រើនកុះករ រួមទាំងមហាជនជាអ្នកគាំទ្រស្នាដៃកន្លងមករបស់លោក ហ៊ុយ យ៉ាឡេងផងដែរ។ ការចូលរួមនេះ មិនត្រឹមតែដើម្បីសិក្សាឈ្វេងយល់ពីវិស័យកុនខ្មែរ ជាពិសេសចូលរួមលើកទឹកចិត្តដល់ផលិតករខ្មែរ និងកាន់តែជំរុញឱ្យកុនខ្មែរកាន់តែមានគុណភាពថែមមួយកម្រិតទៀត។

លោក ហ៊ុយ យ៉ាឡេង អ្នកដឹកនាំរឿង និងជាអ្នកនិពន្ធ បានអះអាងថា លោកពិតជាមានអារម្មណ៍រំភើបយ៉ាងខ្លាំង ដែលក្នុងពិធីសម្ពោធរឿង«ទារុណកម្មខ្មោច» មានការចូលរួមពីតារាសិល្បៈយ៉ាងច្រើនកុះករ ដោយក្នុងពិធីនោះ លោក និងក្រុមការងារក៏បានអញ្ជើញវិរៈសិល្បករផ្នែកចាប៉ីដងវែងគឺលោកតា គង់ ណៃ ឱ្យមកចូលរួមផងដែរ ដោយលោកប្រកាសថាដើម្បីឱ្យមហាជនមានការចាប់អារម្មណ៍ចំពោះវិរៈសិល្បករជើងចាស់រូបនេះឱ្យបានច្រើន។ លោកថាភាពយន្តមួយនេះ លោកមិនទាន់រំពឹងពីជោគជ័យខ្លាំងនោះទេ ប៉ុន្តែផ្អែកតាមការគាំទ្រពីតារាសិល្បៈយ៉ាងច្រើនកុះករ លើសពីភាពយន្តមុនៗដែលលោកបានផលិត លោកជឿជាក់ថាស្នាដៃមួយនេះ នឹងជោគជ័យខ្លាំង។ នៅក្នុងការចូលរួមនោះ អ្នកនាង ចន ច័ន្ទលក្ខិណា ដែលមាននាទីជាប្រធានសមាគមសិល្បករខ្មែរ បានចូលរួមឧបត្ថមថវិការចំនួន ១ លាន រៀលជូនព្រឹទ្ធាចារ្យចាប៉ីដងវែង គង់ ណៃ ទៀតផង ដែលនេះជាទឹកចិត្តដ៏សែនល្អពេកក្រៃមួយ។

បើទោះបីជាខាងផលិតករពោលពាក្យដូចខាងលើក្ដី តែក្រោយពីបញ្ចប់ការទស្សនាភាពយន្ដ«ទារុណកម្មខ្មោច»ដាក់សម្ពោធនាយប់មិញនេះ អ្នកគាំទ្រជាច្រើនបានលាន់មាត់សសើរ និយាយមិនដាច់ពីសាច់រឿង ចាប់តាំងពីក្នុងរោងភាពយន្ដ រហូតដល់បរិវេណក្រៅរោង។ ភាគច្រើនមហាជនបានដាក់ពិន្ទុឱ្យរឿងដល់ 7/10 បានសេចក្ដីថា ជាភាពយន្ដមួយដែលមានគុណភាពល្អមើល និងសម្រិតសម្រាំងខ្លាំង ដែលធ្វើឱ្យអ្នកទស្សនាហើយ មិនខកបំណង៕

February 26, 2019

ផលទុនជាតិសរុប (GDP) របស់កម្ពុជានឹងកើនឡើងក្នុងឆ្នាំ2019 នេះ

ផលទុនជាតិសរុប (GDP) របស់កម្ពុជានៅក្នុងឆ្នាំ2019 នេះនឹងកើនឡើងដល់ជាង 27ពាន់លានដុល្លារអាមេរិក ខណៈចំណូលសម្រាប់មនុស្សម្នាក់ៗត្រូវបានរំពឹងថា នឹងកើនឡើងដល់ 1,706ដុល្លារ ធៀបនឹងឆ្នាំ2018 ដែលមានចំនួន 1,563ដុល្លារ។ នេះបើតាមការឱ្យដឹងពីមន្រ្តីជាន់ខ្ពស់នៃក្រសួងពាណិជ្ជកម្ម។

ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្មបានលើកឡើងនៅក្នុងពិធីបើកវគ្គបណ្តុះបណ្តាលស្តីពីមជ្ឈត្តការពាណិជ្ជកម្មនៅកម្ពុជាថា៖“នៅក្នុងឆ្នាំ2019 នេះ ផលិតផលក្នុងស្រុកសរុប(ផ.ស.ស ឬ GDP)របស់កម្ពុជា នឹងកើនឡើងដល់ជាង 27,22ពាន់លានដុល្លារ ខណៈដែលចំណូលក្នុងមនុស្សម្នាក់ៗត្រូវបានរំពឹងថា នឹងកើនឡើងដល់1,706ដុល្លារ ធៀបនឹង1,563ដុល្លារក្នុងឆ្នាំ2018”។ ឯកឧត្តមបានមានប្រសាសន៍ថា៖ “ទាក់ទិននឹងកំណើនដែលត្រូវបានរំពឹងទុកនេះ គឺផ្តោតសំខាន់លើវិស័យសំខាន់ៗចំនួន3 គឺរួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម។

1- កំណើននៃវិស័យឧស្សាហកម្មនឹងនៅបន្តរក្សាភាពរឹងមាំក្នុងអត្រាកំណើនប្រចាំឆ្នាំក្នុងរង្វង់10% ដែលគាំទ្រដោយភាពរឹងមាំនៃវិស័យសំណង់។ 2-វិស័យសេវាកម្មនឹងនៅបន្តកំណើនប្រមាណ 7% ដែលគាំទ្រដោយកំណើននៃអនុវិស័យសណ្ឋាគារ និងភោជនីយដ្ឋាន និងទី3-គឺ វិស័យកសិកម្មអាចសម្រេចបានកំណើនក្នុងរង្វង់ 1.8% ដែលទ្រទ្រង់ដោយអនុវិស័យដំណាំ និងជលផល”។

ឯកឧត្តមរដ្ឋលេខាធិការបានបន្តលើកឡើងថា៖ “ទន្ទឹមនឹងមានការរីកចម្រើននៃសេដ្ឋកិច្ចជាតិដូចបានរៀបរាប់ខាងលើ វិវាទពាណិជ្ជកម្មក៏បានកើនឡើងដែរ។ ដូច្នេះការរៀបចំឱ្យមានវគ្គបណ្តុះបណ្តាលខាងលើ ពិតជាមានសារៈសំខាន់ណាស់ក្នុងការប្រើប្រាស់យន្តការមជ្ឈត្តការពាណិជ្ជកម្ម ដើម្បីដោះស្រាយវិវាទពាណិជ្ជកម្មដែលបាន និងកំពុងកើនឡើង”។

ឯកឧត្តមបានបន្ថែមថា មិនត្រឹមតែជាការបង្កើនប្រសិទ្ធភាពនៃការដោះស្រាយវិវាទប៉ុណ្ណោះទេ ប៉ុន្តែថែមទាំងផ្តល់នូវគុណសម្បតិ្តដល់ប្រពន្ធ័យុត្តិធម៌នៅកម្ពុជា ដើម្បីការពារសិទ្ធិស្របច្បាប់របស់ភាគីវិវាទឱ្យបានត្រឹមត្រូវទៀតផង។ សូមបញ្ជាក់ដែរថា ផលទុនជាតិសរុបក្នុងស្រុកសំដៅដល់ផលចំណូលរបស់ប្រជាជនដែលរកបានប្រចាំឆ្នាំនៅទូទាំងប្រទេស បូកនឹងប្រាក់ចំណូលរបស់រដ្ឋាភិបាលដែលយកពន្ធបានពីវិស័យផ្សេងៗនៅកម្ពុជា។ ផលទុនជាតិសរុបកាលពីឆ្នាំ2018 កន្លងមកនេះ មានប្រមាណ 23ពាន់លានដុល្លារអាមេរិក។

ជាមួយគ្នានេះដែរ ខណៈសេដ្ឋកិច្ចកម្ពុជាត្រូវបានព្យាករពីកំណើនខុសៗគ្នាកន្លងមក ពេលនេះការវាយតម្លៃចុងក្រោយដោយស្ថាប័នអន្តរជាតិបានបង្ហាញថា សេដ្ឋកិច្ចកម្ពុជាសម្រេចបានកំណើន7.5% កាលពីឆ្នាំ2018។ សម្តេចតេជោហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ក្នុងពិធីបិទសន្និបាតការងារក្រសួងមហាផ្ទៃកាលពីថ្ងៃទី14 កុម្ភៈថា មូលនិធិរូបិយប័ណ្ណអន្តរជាតិ IMF សហការជាមួយស្ថាប័នជំនាញរបស់កម្ពុជាបានវាយតម្លៃថា កំណើនសេដ្ឋកិច្ចកម្ពុជា ក្នុងឆ្នាំ2018 មានកំណើនរហូតដល់7.5%។ ជាមួយនឹងលទ្ធផលដ៏ប្រសើរនេះ សម្តេចក៏បានស្នើឱ្យក្រុមប្រឹក្សាអភិវឌ្ឍន៍កម្ពុជា រៀបចំវេទិការវាងរាជរដ្ឋាភិបាល និងវិស័យឯកជននៅខែមីនាខាងមុខនេះ ដើម្បីពិភាក្សាជំរុញល្បឿនសេដ្ឋកិច្ចកម្ពុជាបន្ថែមទៀត។

លោកបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា សេដ្ឋកិច្ចកម្ពុជា និងប្រាក់ចំណូលរបស់ប្រជាពលរដ្ឋបាននិងកំពុងកើនឡើង ហើយការព្យាកររបស់សេដ្ឋវិទូនៅក្រសួងសេដ្ឋកិច្ច និងហិរញ្ញវត្ថុ គឺលោកយល់ស្រប ដោយសារពួកគេមានសមត្ថភាព ហើយការវិភាគរបស់ពួកគេប្រកបដោយលក្ខណៈវិទ្យាសាស្រ្ត៕

February 26, 2019

Category: សង្គម និងសេដ្ឋកិច្ច