Category: សង្គម និងសេដ្ឋកិច្ច

កំពត ៖ វឌ្ឍនភាពការរងារនៃគម្រោងស្ដារ និងលើកកម្រិតគុណភាពផ្លូវជាតិលេខ៣១ ប្រវែងសរុប ៥៣,៥៤ គីឡូម៉ែត្រ ចាប់ពីផ្លូវបែកគុស ចំណុចប្រសព្វផ្លូវជាតិលេខ៣ រហូតទៅដល់ទីរួមស្រុកកំពង់ត្រាច ចំណុចតភ្ជាប់ផ្លូវជាតិលេខ៣៣ សម្រេចបាន ៩៨,៦៨% ហើយ គិតត្រឹមចុងខែតុលា ឆ្នាំ២០២៤នេះ។

យោងតាមរបាយការណ៍វឌ្ឍនភាពនៃការស្ដារ និងលើកកម្រិតគុណភាពផ្លូវជាតិលេខ៣១ ដែលត្រូវបានក្រសួងសាធារណៈការ និងដឹកជញ្ជូនផ្សព្វផ្សាយបានឱ្យដឹងថា ការងារអ៊ុតកៅស៊ូ ACទាំង២ស្រទាប់ បានបញ្ចប់១០០ភាគរយ។ ចំពោះការងារបំពាក់សម្ភារសុវត្តិភាពចរាចរណ៍(គំនូសចរាចរណ៍ ផ្លាកសញ្ញា ផ្លាកបង្ហាញទិសផ្លូវ របារ-Guardrail និងការងារចាំបាច់ផ្សេងៗក៏បានបញ្ចប់ស្ទើររួចរាល់ហើយដែរ។

សូមបញ្ជាក់ថា ផ្លូវជាតិលេខ៣១ មានប្រវែងសរុបប្រមាណ ៥៣,៥៣គីឡូម៉ែត្រ គ្រោងចំណាយថវិកាប្រមាណជាង ៦០លានដុល្លារ ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។

សូមជម្រាបដែរថា រាជរដ្ឋាភិបាល មានគម្រោងសាងសង់កែលម្អផ្លូវជាតិលេខ៣១ លេខ៣៣ លេខ៤១ ក្នុងពេលដំណាលគ្នា ដើម្បីឱ្យបណ្តាញហេដ្ឋារចនាសម្ព័ន្ធទាំងនោះប្រទាក់ក្រឡាគ្នា និងតភ្ជាប់ខេត្តកែប ជា​មួយផ្លូវជាតិលេខ៣ ដែលទើបបានសាងសង់ចប់ជាស្ថាពរនាពេលកន្លងទៅថ្មីៗ កំពុងផ្តល់ងាយស្រួលក្នុងការធ្វើដំណើរ និងការដឹកជញ្ជូន កសិផល ជាពិសេស ទាក់ទាញភ្ញៀវទេសចរជាតិ និងអន្តរជាតិ ឱ្យមកទស្សនាខេត្តកែប កាន់តែច្រើនថែមទៀត ៕

ភ្នំពេញ៖ ស្ពានអាកាសក្បាលថ្នល់ «មរតកតេជោ»ដែលប្រសព្វរវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន និងមហាវិថីយោធពលខេមរភូមិន្ទ (ផ្លូវ២៧១) ក្នុងខណ្ឌមានជ័យ និងខណ្ឌចំការមន រាជធានីភ្នំពេញ ជំហានទី២ កំពុងសាងសង់យ៉ាងសស្រាក់សស្រាំ ហើយគ្រោងនឹងបញ្ចប់ការសាងសង់ទាំងស្រុងមុនផែនការប្រមាណ ០៤ខែផងដែរ ពោលគឺជំហានទី២ នឹងបញ្ចប់មុនចូលឆ្នាំថ្មីប្រពៃណីជាតិខ្មែរឆ្នាំ២០២៥(ក្នុងគម្រោងខែសីហា ឆ្នាំ២០២៥)។ នេះបើតាមការឱ្យដឹងរបស់ឯកឧត្តម កើត ឆែ អភិបាលរងសាលារាជធានីភ្នំពេញ។

រដ្ឋាភិបាល បានសម្រេចប្រសិទ្ធនាមស្ពានអាកាសត្រង់ចំណុចប្រសព្វរវាងមហាវិថី សម្តេចតេជោ ហ៊ុន សែន មហាវិថីព្រះមុនីវង្ស និងមហាវិថីកងយោធពលខេមរភូមិន្ទ ស្ថិតនៅខណ្ឌមានជ័យនិងខណ្ឌចំការមន រាជធានីភ្នំពេញជា«ស្ពានអាកាស មរតកតេជោ»។

សូមជម្រាបថា ស្ពានអាកាសមរតកតេជោ មានកម្ពស់ ២ ជាន់ ត្រូវបានបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២។ ជំហានទី១ បានបញ្ចប់ក្នុងឆ្នាំ២០២៤ និង ជំហានទី២ នឹងបញ្ចប់មុនចូលឆ្នាំប្រពៃណីជាតិ ឆ្នាំ២០២៥។

ការសាងសង់ស្ពានអាកាសនេះគឺដើម្បីសម្រួលការធ្វើចរាចរណ៍ក្នុងរាជធានីភ្នំពេញ ដែលមានកំណើនយានយន្ត និងការធ្វើចរាចរណ៍កាន់តែច្រើនឡើងពីមួយឆ្នាំទៅមួយឆ្នាំ។ ស្ពានអាកាសនេះ ស្ថិតក្នុងទឹកដីខណ្ឌចំការមន និងខណ្ឌមានជ័យនិង សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) គ្រោងចំណាយថវិកា ជាងលានដុល្លារ និងចំណាយពេលវេលាសាងសង់ជាង៣០ខែ។

គម្រោងស្ពានអាកាស ព្រះមុនីវង្ស មានសាងសង់ផ្លូវផ្ទាល់ដី ដែលមានរង្វង់មូលបែងចែកទិស និងផ្លូវតភ្ជាប់រវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន វិថីកងយោធពលខេមរភូមិន្ទ ឆ្ពោះទៅស្ពានព្រះមុនីវង្ស និងផ្លូវជាតិលេខ២។ បន្ទាប់មកសាងសង់ស្ពានអាកាសចំនួនពីរជាន់។ ស្ពានអាកាសជាន់ទី១ ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា ទៅកាន់មហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និងវិថីកងយោធពលខេមរភូមិន្ទ។ ស្ពានអាកាសជាន់ទី២ ជាផ្លូវទ្វេទិស មានទិសដៅទៅមក រវាងមហាវិថីព្រះមុនីវង្ស និងមហាវិថីសម្តេចតេជោ ហ៊ុន សែន ៕

មហោស្រពភាពយន្តខ្លីចតុមុខ លើកទី១៣ នាឆ្នាំ២០២៤នេះ បានរៀបចំឡើងដោយក្រុមភាពយន្តឈូករ័ត្ន ដែលជាអង្គការភាពយន្ត ប្រមូលផ្តុំដោយយុវវ័យដែលស្រឡាញ់ចូលចិត្តវិស័យភាពយន្តខ្នាតខ្លី ដើម្បីជួយលើកស្ទួយ និងជួយគាំទ្រដល់យុវជន យុវនារីខ្មែរយើងឱ្យយល់ដឹង និងមានបំណិនប្រសប់នៅក្នុងការផលិតភាពយន្តខ្លីឱ្យមានគុណភាពខ្ពស់ មានការច្នៃប្រឌិត នឹងឈានទៅរកការផលិតភាពយន្តវែងនាពេលអនាគតបានយ៉ាងរលូនល្អ ជោគជ័យ និងមានការទទួលស្គាល់ពីសំណាក់ផលិតករនៅក្នុងស្រុក និងទូទាំងពិភពលោក។

ក្នុងឱកាសនោះដែរ លោក ស៊ុំ ស៊ីថែន ប្រធានមហោស្រពចតុមុខក្នុងឆ្នាំថ្មីនេះក៏បានលើកឡើងថា “មហោស្រពភាពយន្តខ្លីចតុមុខ លើកទី១៣ នាឆ្នាំនេះ ពិតជាមានមោទនភាពក្រៃលែង ដោយមានការគាំទ្រជាខ្លាំងពីសំណាក់ផលិតករភាពយន្តខ្លីជំនាន់ក្រោយ ដោយក្នុងឆ្នាំ២០២៤នេះ មហោស្រពទទួលបានភាពយន្តខ្លីសរុបចំនួន២៥៩រឿង តែយើងសម្រាំងយកតែ៥៧រឿង ដើម្បីប្រកួត និងចាក់បង្ហាញ ជូនទស្សនិកជន។ ក្នុងនោះ រឿងក្នុងស្រុកសម្រាប់ប្រកួតមានចំនួន៥រឿង និងរឿងបរទេសសម្រាប់ប្រកួតមានចំនួន៩រឿង ដោយមានការដាក់ពិន្ទុពីគណៈមេប្រយោគ២ក្រុមផ្សេងគ្នា ដោយមួយផ្តោត លើភាពយន្តខ្លីខ្មែរ និងមួយទៀតផ្តោតលើភាពយន្តខ្លីបរទេស”។

លោកក៏បានបន្តទៀតថា “កម្មវិធីបើកឆ្នាំនេះ មានការសម្តែងពិសេសពី សាលាសិល្បៈ សម្តែង ក៏ដូចជារំលេចនូវឈុតពិសេសៗពីភាពយន្តខ្នាតវែងបែបរន្ធត់ រឿង «អ្នកស្នងអគារ» ដែលសហដឹកនាំដោយ លោក នេត ឥន្ទនរាសុទ្ធីដ្ឋេព ដែលជាម្ចាស់ជ័យលាភីពីមហោស្រពចំនួន២ដង គឺនៅឆ្នាំ២០១៧ និងឆ្នាំ២០១៩។ ការចាក់បង្ហាញនេះ ចង់បង្ហាញថា យុវសមិទ្ធករយើងពិតជាទទួលបាននូវឱកាសអភិវឌ្ឍស្នាដៃរបស់ខ្លួន តាមរយៈវេទិការបស់មហោស្រព ដោយផ្សារភ្ជាប់ជាមួយវិនិយោគិន និងភាគីពាក់ព័ន្ធនានាក្នុងវិស័យភាពយន្ត។ ចំណែក កម្មវិធីបិទ នឹងលើកបង្ហាញពីការវិវិត្តរបស់មហោស្រព តាមរយៈវីដេអូ និងរូបសញ្ញា ក៏ដូចជាប្រកាសពីជ័យលាភីប្រចាំឆ្នាំ២០២៤ ទាំង៧ប្រភេទផងដែរ”។

សូមបងប្អូនយុវវ័យ និងទស្សនិកជនទាំងអស់អញ្ជើញទៅទស្សនាភាពយន្តខ្លីដែលដាក់ប្រកួតប្រជែងនៅក្នុងឆ្នាំនេះដោយឥតគិតថ្លៃ ពីថ្ងៃទី២៥ ដល់ថ្ងៃទី២៨ ខែតុលានេះ ដោយមានរយៈពេល៤ថ្ងៃជាប់ៗគ្នា នៅរោងភាពយន្តទំនើបចំនួន៥ មានដូចជា Legend Cinema ផ្សារទំនើបអូឡាំព្យា, Major Cineplex សាខាផ្សារទំនើបសូរិយា, Fabel Cinema, Workspace 2 នៅ Factory Phnom Penh និងនៅ Cine Hub ក្នុងនោះអ្នកចូលរួមទស្សនាទាំងអស់ក៏មានសិទ្ធិចូលរួមបោះឆ្នោតគាំទ្រភាពយន្តខ្លីដែលអ្នកស្រឡាញ់ពេញចិត្ត ដើម្បីគាំទ្រស្នាដៃភាពយន្តខ្លីនោះឱ្យមានឱកាសឈ្នះពានរង្វាន់ពីមហោស្រពផងដែរ។ ក្រៅពីការចាក់បញ្ចាំងភាពយន្តខ្លី ដែលបានសម្រិតសម្រាំងយ៉ាងពិសេសសម្រាប់ការប្រកួតប្រជែង មហោស្រពភាពយន្តខ្លីចតុមុខ លើកទី១៣ ក៏បានរៀបចំនូវកម្មវិធីជួបជុំជជែកពិភាក្សាពីវិស័យភាពយន្ត និងសិក្ខាសាលាចែករំលែកចំណេះដឹងជុំវិញវិស័យភាពយន្តនេះផងដែរ ដើម្បីជាការលើកទឹកចិត្តដល់យុវវ័យជំនាន់ក្រោយឱ្យចាប់អារម្មណ៍ និងចូលរួមលើកស្ទួយវិស័យផលិតភាពយន្តខ្លីដែលមានគុភាពខ្ពស់នៅក្នុងប្រទេសកម្ពុជាយើងនាពេលអនាគត៕