សង្គម និងសេដ្ឋកិច្ច - La Reine Media

មានបញ្ហាក្លិនមាត់ អាចបញ្ជាក់ពីសញ្ញានៃជំងឺទាំង6 ដែលអ្នកមិនបានកត់សម្គាល់

មនុស្សមួយចំនួនដែលមានបញ្ហាក្លិនមាត់មិនល្អ ពួកគេតែងតែរកវិធីដើម្បីបំបាត់វាដូចជា ការដុសសម្អាតធ្មេញភ្លាមៗ ការប្រើឧបករណ៍បាញ់បំបាត់ក្លិនក្នុងមាត់ ការខ្ពុរមាត់ ឬការទំពាស្ករកៅស៊ូជាដើម។ មានមនុស្សមិនច្រើននោះទេដែលជួបនឹងបញ្ហានេះ ហើយព្យាយាមរកមូលហេតុដែលបណ្ដាលឱ្យមានក្លិនមាត់មិនល្អ និងរកដំណោះស្រាយ ដើម្បីបំបាត់វាជារៀងរហូត។ តើអ្នកធ្លាប់គិតទេថា ក្លិនមាត់របស់អ្នកអាចប្រាប់អំពីសុខភាពរាងកាយរបស់អ្នក? ជំងឺទូទៅមួយចំនួន ដែលរោគសញ្ញាអាចត្រូវបានបង្ហាញដំបូងតាមរយៈក្លិនមាត់របស់អ្នក។ ទស្សនាវដ្តី ឡារ៉ែន សូមជម្រាបអំពីជំងឺទាំង6 ដែលមានរោគសញ្ញាដំបូងតាមរយៈក្លិនមាត់ដូចខាងក្រោមនេះ។

1. ជំងឺអញ្ចាញធ្មេញ
គឺជាជំងឺដែលបណ្ដាលឱ្យមានការរលាកហើមដល់អញ្ចាញធ្មេញ ឆ្អឹង និងសាច់ជុំវិញធ្មេញ។ វាបណ្តាលមកពីមេរោគតូចៗ ដែលយើងតែងតែហៅថា បាក់តេរី ដែលតោងជាប់ធ្មេញ និងអញ្ចាញធ្មេញ។ បាក់តេរីទាំងនេះគឺជាកំណកកំបោរដែលតោងជាប់នឹងធ្មេញរបស់អ្នក។ វាមិនមានពណ៌ ស្អិតៗដែលបង្កឡើងពីកត្តាចំណីអាហារ។ បាក់តេរីដែលតោងជាប់ក្លាយជាកំណកកំបោរបានមកពីសារជាតិស្ករ ដែលបំលែងពីចំណីអាហារ វាបង្កើតទៅជាជាតិពុល និងសារធាតុគីមីផ្សេងៗ។ ជាតិពុលទាំងនោះ ធ្វើឱ្យរលាកអញ្ចាញធ្មេញដែលបណ្តាលឱ្យហើម សណ្តក និងងាយចេញឈាមនៅពេលដុសធ្មេញ។ យូរៗទៅវានឹងធ្វើឱ្យធ្មេញរបូតចេញពីអញ្ចាញតែម្តង។

2. ជំងឺរលាកផ្លូវដង្ហើម
ក្លិនមាត់មានភាពមិនប្រក្រតីអាចបណ្តាលមកពីការឆ្លងមេរោគរលាកផ្លូវដង្ហើមដូចជា ជំងឺផ្តាសាយ និងជំងឺរលាកប្រហោងឆ្អឹងមុខសងខាងច្រមុះជាដើម។ វាបណ្តាលមកពីបាក់តេរីជាច្រើន ដែលមាននៅក្នុងរន្ធច្រមុះ និងប្រហោងឆ្អឹងមុខសងខាងច្រមុះដែលធ្វើឱ្យមានក្លិនមិនល្អ។ ក្នុងករណីខ្លះ ក្លិនមាត់របស់អ្នកក៏អាចបង្ហាញអំពីជំងឺដុះសាច់បំពង់កផងដែរ ។

3. ជំងឺធាត់
ខ្យល់ដង្ហើមមិនល្អ ត្រូវបានអ្នកស្រាវជ្រាវអះអាងថា មានភាគរយពីជាតិខ្លាញ់ខ្ពស់ ដែលមានសារធាតុមេតាន និងអុីដ្រូសែនច្រើនជាង បើប្រៀបធៀបទៅនឹងអ្នកដែលមានសុខភាពល្អ។ ឧស្ម័នទាំងពីរនេះបណ្តាលឱ្យមានក្លិនស្អុយស្រដៀងនឹងក្លិនបង្គន់ដែរ។ ហើយឧស្ម័នទាំងពីរនេះវាងាយនឹងធ្វើឱ្យរាងកាយរបស់អ្នកវិវឌ្ឍទៅរកភាពធាត់ដោយមិនដឹងខ្លួន។

4. ជំងឺប្រេះមាត់
ជំងឺប្រេះមាត់ គឺជាបញ្ហាមួយដែលបណ្តាលមកពីបញ្ហានៅក្នុងក្រពេញទឹកមាត់ ឬការដកដង្ហើមតាមមាត់។ ប្រសិនបើអ្នកមានជំងឺប្រេះមាត់ ហើយស្ងួតមាត់ ក្លិនមាត់របស់អ្នកនឹងមានក្លិនមិនល្អខ្លាំង រួមជាមួយនឹងរោគសញ្ញាដទៃទៀត។

5. ខ្សោយថ្លើម
ជំងឺថ្លើមអាចកត់សម្គាល់បានយ៉ាងងាយស្រួល ដោយរោគសញ្ញាខ្យល់ដង្ហើមរបស់អ្នកមានក្លិនមិនល្អខ្លាំង។ នៅពេលដែលថ្លើមដំណើរការមិនល្អ ជាតិពុលនៅក្នុងរាងកាយបញ្ចេញមកតាមសួត ដែលបណ្តាលឱ្យក្លិនមានមិនល្អ។ បើអ្នកសង្ស័យខ្លាំង សូមពិគ្រោះជាមួយគ្រូពេទ្យជំនាញ ដើម្បីធ្វើតេស្ត៍ឈាមរកមេរោគថ្លើម។

6. ជំងឺទឹកនោមផ្អែម
ជំងឺទឹកនោមផ្អែម និងជំងឺអញ្ចាញធ្មេញអាចកើតឡើងជាមួយគ្នា ហើយក៏អាចធ្វើឱ្យជំងឺស្ដែងចេញមកតាមរយៈក្លិនមាត់មិនល្អផងដែរ។ យ៉ាងណាមិញ សញ្ញាព្រមានរបស់ជំងឺអញ្ចាញធ្មេញ មានដូចជា៖
– អញ្ចាញធ្មេញដែលហូរឈាម ក្រោយពីប្រើអំបោះរូសធ្មេញ ឬដុសសម្អាតធ្មេញរួច។
– អញ្ចាញធ្មេញដែលតឹងឈឺ ហើម ឬក្រហម
– សឹកអញ្ចាញធ្មេញ ដែលធ្វើឱ្យធ្មេញមើលទៅវែងជាងមុន
– ក្លិនមាត់មិនល្អ
– មានខ្ទុះចេញមកនៅពេលសង្កត់អញ្ចាញធ្មេញប៉ះគ្នា
– បាត់បង់ធ្មេញ ឬធ្មេញរង្គើ។ល៕

February 28, 2019

ធ្វើម៉េចដើម្បីទទួលបានត្រគាកស្រឡូនស្អាត?

ជាតិជាស្ត្រីយើងស្ទើរតែអាចនិយាយថាមិនមានអ្នកណាម្នាក់ដែលថាមិនចង់បានដៃជើង ភ្លៅ ចង្កេះ និងត្រគាកដ៏ស្រស់ស្អាត សិចស៊ីគួរជាទីទាក់ភ្នែកនៃអ្នកផងទាំងពួងនោះទេ។ ចង្កេះ និងត្រគាកស្រឡូនស្អាតកាន់តែជួយឱ្យរាងកាយទាំងមូលរបស់អ្នកមើលទៅសមសួនពោរពេញដោយមន្តស្នេហ៍ទ្វេដង។ ដើម្បីឱ្យមានត្រគាកស្រស់ស្អាតដូចប៉ងប្រាថ្នានោះអ្នកគួរតែអនុវត្តតាមចំណុចមួយចំនួនដូចខាងក្រោម៖

ម៉ាស្សា : ពេលដែលអ្នកងូតទឹកម្តងៗអ្នកគួរចំណាយពេលបន្តិចធ្វើការម៉ាស្សាត្រង់ចង្កេះ និងត្រគាកឱ្យបានជាប្រចាំ។ ប្រើដៃរបស់អ្នកម៉ាស្សាពីបរិវេណចង្កេះចុះមកត្រគាកទៅមកៗ ព្រោះការធ្វើបែបនេះអាចជួយកាត់បន្ថយសារធាតុខ្លាញ់ដែលផ្ទុកនៅម្តុំនោះចេញបានខ្លះ។

ហាត់ប្រាណ : រាល់ពេលដែលអ្នកហាត់ប្រាណ អ្នកត្រូវចំណាយពេលប្រហែល5ទៅ10នាទីដើម្បីធ្វើចលនាត្រគាក និងភ្លៅ។ គេងផ្អៀង ហើយលើកជើងចុះឡើងៗ (យ៉ាងហោចណាស់15ដងនៃជើងម្ខាង)។ វិធីនេះជួយកាត់បន្ថយខ្លាញ់ និងរឹតបន្តឹងសាច់ដុំភ្លៅ និងត្រគាកឱ្យមានភាពតឹងណែនល្អ។ លំហាត់ប្រាណបែបនេះគួរតែធ្វើឡើងរៀងរាល់ពេលព្រឹក។ ក្រៅពីជួយឱ្យអ្នកទទួលបានការសម្រកខ្លាញ់ក្នុងរាងកាយហើយនោះ ការហាត់ប្រាណឱ្យបានទៀងទាត់ក៏អាចជួយឱ្យអ្នកបញ្ចេញចោលរាល់សារធាតុពុលទាំងឡាយក្នុងរាងកាយចេញមកក្រៅបានយ៉ាងល្អទៀតផង ហើយការបញ្ចេញជាតិពុលអស់ទាំងនេះគឺពិតជាល្អខ្លាំងណាស់សម្រាប់សុខភាព និងសម្រស់របស់អ្នក។ បន្ទាប់ពីការហាត់ប្រាណបញ្ចេញញើសរួចនោះ អ្នកចាំបាច់ត្រូវទទួលទានទឹកឱ្យបានច្រើនផងដែរ។ បើទោះជាអ្នកមិនចូលចិត្ត ឬមិនចង់អនុវត្តវិធីហាត់ប្រាណតាមបែបខាងលើក៏មិនមានបញ្ហាដែរ ព្រោះការពិតទៅហាត់ប្រាណបែបណាក៏បានប្រយោជន៍ចំពោះសុខភាព និងអាចជួយសម្រកទម្ងន់បានដែរ សុំតែម្យ៉ាងគឺកុំខ្ចិលទៅបានហើយ។

អាហារ : ការហាត់ប្រាណជាផ្នែកមួយដែលធ្វើឱ្យភ្លៅរបស់អ្នកមានភាពស្រឡូនស្អាតជាងមុន ប៉ុន្តែសូមចងចាំចំណុចមួយទៀត គឺ ការហាត់ប្រាណអាចនឹងមិនមានប្រសិទ្ធភាពនោះទេ ប្រសិនបើរបបអាហារដែលអ្នកទទួលទានចូលទៅមានភាពមិនសមស្រប។ មានប្រភេទអាហារជាច្រើនដែលអាចកាត់បន្ថយសារធាតុខ្លាញ់តាមបរិវេណចង្កេះ ភ្លៅ និងត្រគាកបាន។ ប្រភេទអាហារទាំងនោះមានដូចជា អង្ករសំរូប ត្រាវ ខ្លាញ់ត្រី និងសណ្កែកជាដើម។ ក្រៅពីទទួលទានអាហារមានប្រយោជន៍ហើយនោះ ឡារ៉ែន ក៏ចង់ឱ្យអ្នកពោលពាក្យលាចំពោះអាហារមួយចំនួនដូចជា ប្រភេទអាហារដែលមានជាតិស្ករខ្ពស់ អាហារមានរសជាតិផ្អែម ប៊័រ កាហ្វេអុីន និងអាហារខ្លាញ់ ចៀនបំពងជាដើម ព្រោះវាជាមូលហេតុធ្វើឱ្យមានខ្លាញ់ផ្ទុកនៅក្នុងរាងកាយរបស់អ្នកកាន់តែច្រើន៕

February 28, 2019

គុណប្រយោជន៍3យ៉ាងដែលស៊ុតផ្នែកព័ណសជួយដល់សម្រស់

ស៊ុត ជាអាហារប្រចាំផ្ទះដែលមានលក្ខណៈធម្មតា និងតម្លៃមិនថ្លៃ ដែលទិញបានដោយងាយស្រួល។ មិនតែប៉ុណ្ណោះ ស៊ុត មានសារធាតុចិញ្ចឹម ព្រមទាំងសមាសធាតុរ៉ែជាច្រើនទៀតដែលល្អសម្រាប់សុខភាព។ ក្រៅពីយកស៊ុតទៅចម្អិនជាអាហារហើយនោះ ស៊ុតត្រូវបានគេមើលឃើញថា មានគុណប្រយោជន៍ចំពោះផ្នែករក្សាសម្រស់ រហូតដល់អ្នកខ្លះទទួលទានស៊ុតឆៅ ដើម្បីរក្សាសម្រស់ តែផ្ទុយទៅវិញ ស៊ុតឆៅ បើទទួលទានលើសកំណត់វាក៏មិនល្អចំពោះសម្រស់ និងសុខភាពដែរ។ ស៊ុតមានគុណសម្បត្តិក្នុងការថែរក្សាសម្រស់ជាច្រើនដូចជា ជួយកម្ចាត់មុនតូចៗ ជួយបន្តឹងស្បែកមុខ ជួយបំបាត់ស្នាមជ្រួញលើផ្ទៃមុខ ជួយធ្វើឱ្យមុខស្អាតផូរផង់ និងសភ្លឺរលោងជាដើម។ តែថ្ងៃនេះ ទស្សនាវដ្ដី ឡារ៉ែន សូមជម្រាបជូននូវគុណប្រយោជន៍សំខាន់3យ៉ាងរបស់ស៊ុតផ្នែកព័ណសក្នុងការថែរក្សាសម្ផស្ស។

1. កម្ចាត់ជាតិពុលជួយឱ្យស្បែកតឹងណែនគ្រាន់តែឧស្សាហ៍បំពោកមុខដោយស៊ុតផ្នែកពណ៌សជាប្រចាំរាល់ថ្ងៃប្រមាណមួយសប្តាហ៍ នោះអ្នកនឹងសង្កេតឃើញការប្រែប្រួលនៃស្បែកមុខរបស់អ្នក គឺស្បែកមុខរបស់អ្នកនឹងតឹងហាប់ណែន ស ភ្លឺថ្លា ហើយក្មេងជាងវ័យ។ អ្នកអាចថែទាំស្បែកមុខរបស់អ្នកដោយប្រើស៊ុតផ្នែកពណ៌សដើម្បីឱ្យស៊ុតសបឺតស្រូប និងកម្ចាត់សារធាតុពុលចេញពីរន្ធរោមឱ្យអស់។ គ្រាន់តែបំពោកផ្នែកពណ៌សនៃស៊ុតនៅលើផ្ទៃមុខរបស់អ្នកទុកចោលប្រមាណ20នាទី ហើយលាងសម្អាតចេញវិញដោយទឹកស្អាត ដើម្បីជួយកម្ចាត់ជាតិពុលពីស្បែកមុខ និងជួយសម្រួលដល់តុល្យភាពនៃស្បែកធានាថានឹងផ្តល់នូវប្រសិទ្ធភាពជាទីគាប់ចិត្តដល់ផ្ទៃមុខរបស់អ្នកជាមិនខាន។

2. ជួយកម្ចាស់មុនខ្សាច់ការបកមុនខ្សាច់នៅលើផ្ទៃមុខ ដោយមិនភ័យព្រួយចំពោះការប៉ះពាល់ដល់សុខភាពស្បែកមុខ ដោយប្រើផ្នែកពណ៌សនៃស៊ុត ដែលមិនត្រឹមតែមិនប៉ះពាល់ដល់សុខភាពស្បែកមុខនោះទេ ថែមទាំងជួយបន្តឹងរន្ធរោម ជម្រុញដល់ការផលិតកោសិកាថ្មី កម្ចាត់ជាតិពុលពីស្បែកមុខ និងធ្វើស្បែកមុខស ភ្លឺថ្លា ហាប់តឹងណែន ដោយអ្នកគ្រាន់តែយកស៊ុតពណ៌សមកអនុវត្តតាមការណែនាំខាងក្រោមនេះជាការស្រេច។
– យកស៊ុតមាន់ផ្នែកពណ៌ស មកលាបបំពោកនៅលើផ្ទៃមុខដែលមានមុន ឬត្រង់បរិវេណដែលអ្នកចង់បកមុនខ្សាច់។
– យកក្រដាសស្អាតបិតពីលើស៊ុតមាន់ ដែលអ្នកបានលាបនៅលើផ្ទៃមុខនោះ។
– អ្នកអាចបន្ថែមទឹកក្រូចឆ្មារ 2ទៅ3តំណក់ ឬមិនបាច់ក៏បាន។
– ពេលស៊ុតមាន់ផ្នែកពណ៌សស្ងួត សូមបកបន្ទះក្រដាសដែលបិតនៅលើផ្ទៃមុខនោះចេញ នោះមុនខ្សាច់នឹងមកតាមស៊ុតពណ៌សនោះអស់ជាមិនខាន។

3. ស៊ុតផ្នែកពណ៌ស ជួយបឺតស្រូបគ្រាប់មុនស៊ុតផ្នែកពណ៌ស មានប្រយោជន៍ចំពោះស្បែកមុខ ជាពិសេសប្រសិនបើអ្នកត្រូវការកម្ចាត់មុនខ្សាច់ ឬមុនក្បាលខ្មៅ ដោយពុំចាំបាច់ប្រើដៃសង្កត់ ឬច្របាច់ឱ្យស្បែកជាំឡើយ គ្រាន់តែលាងស្បែកត្រង់កន្លែងដែលមានមុនឱ្យស្អាត ផ្ដិតឱ្យស្ងួតទឹក ហើយប្រើបន្ទះសំឡីជ្រសក់ស៊ុតផ្នែកពណ៌សរួចហើយបិទនៅលើផ្ទៃមុខ (លើកលែងបិរវេណជុំវិញភ្នែក និងបបូរមាត់) រួចរង់ចាំឱ្យស្ងួត។ ពេលសំឡីដែលជ្រលក់ស៊ុតពណ៌សនោះស្ងួតហើយ សឹមបកវាចេញ នោះអ្នកនឹងឃើញមុនក្បាលខ្មៅជាប់មកជាមួយនឹងសំឡី និងក្បាលមុនពណ៌ស លៀនចេញមក។ បន្ទាប់មកទៀត សូមប្រើទឹកក្ដៅឧណ្ហៗជូតលើផ្ទៃមុខរបស់អ្នក ហើយលាងដោយទឹកត្រជាក់ ដើម្បីបិទរន្ធរោមមកវិញជាការស្រេច៕

February 28, 2019

ឥឡូវនេះ អ្នកឈប់រៀនយូរឆ្នាំក៏អាចត្រឡប់មករៀន និងបានសញ្ញាបត្រដូចសិស្សក្នុងសាលាដែរ

ការអប់រំជាមូលដ្ឋានយ៉ាងសំខាន់ក្នុងការជំរុញឱ្យមានការអភិវឌ្ឍក្នុងសង្គម និងជាចំណុចដែលមិនអាចខ្វះបាននៃគោលដៅអភិវឌ្ឍន៍ប្រកបដោយចីរភាពសម្រាប់ពិភពលោក។ ហេតុនេះការជំរុញមនុស្សទាំងឡាយណាដែលរៀនមិនទាន់ចប់ថ្នាក់មូលដ្ឋាន ឱ្យទទួលបានការអប់រំឡើងវិញសម្រាប់បន្តអាជីពជំនាញនៅថ្ងៃអនាគត គឺជាផែនការសកម្មភាពប្រកបដោយភាពវិជ្ជមានមួយដើម្បីជួយសង្គមផង និងដោះស្រាយបញ្ហាជាសកលផង។

នៅកម្ពុជា ក្រសួងអប់រំ យុវជន និងកីឡា បានសហការជាមួយក្រសួងការងារ និងបណ្តុះបណ្តាលវិជ្ជាជីវៈ អង្គការ UNESCO ក្រុមហ៊ុនឯកជន និងដៃគូពាក់ព័ន្ធ បង្កើតកម្មវិធីមួយឈ្មោះថា កម្មវិធីសមមូលអប់រំកម្រិតមូលដ្ឋានតាមអុីនធើណិត (Basic Education Equivalency Program ឬ BEEP) ដើម្បីជួយដល់សិស្សដែលបានបោះបង់ចោលការសិក្សាឱ្យបានត្រឡប់មកសិក្សាវិញតាមរយៈបច្ចេកវិទ្យា។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា កម្មវិធីនេះមានគោលដៅសំខាន់សម្រាប់ជួយដល់សិស្សដែលមិនមានលទ្ធភាពគ្រប់គ្រាន់សម្រាប់ការសិក្សាបន្តឱ្យចប់ថ្នាក់ទី9 ឬអ្នកដែលបានបោះបង់ចោលការសិក្សាឱ្យវិលត្រឡប់មកសិក្សាឡើងវិញ។ មូលហេតុសំខាន់ៗដែលសិស្សគួរតែត្រឡប់មកសិក្សាវិញនោះ គឺទី1 យុវជនម្នាក់ៗនឹងមិនអាចមានការងារល្អធ្វើបានទេ ប្រសិនបើមិនបានចប់ថ្នាក់សិក្សាមូលដ្ឋានហើយបើទោះបីជាមានការងារធ្វើក៏បានត្រឹមតែការងារ និងជំនាញសាមញ្ញៗតែប៉ុណ្ណោះ។ ទី2 គឺក្នុងក្របខ័ណ្ឌអន្តរជាតិ យើងមានគោលដៅអភិវឌ្ឍន៍ប្រកបដោយចីរភាព (SDG) ដែលចង់ឱ្យប្រជាជនទាំងអស់រៀនចប់យ៉ាងហោចណាស់ត្រឹមថ្នាក់ទី9 ហេតុនេះដើម្បីសម្រេចបានគោលដៅនេះ យើងនឹងព្យាយាមសម្រួលគ្រប់លទ្ធភាពឱ្យយុវជនជាច្រើនដែលមិនបានចូលសាលា បានមកសិក្សាឱ្យចប់ថ្នាក់មូលដ្ឋាន ហើយគាត់ក៏នឹងទទួលបានសញ្ញាបត្រសមមូលមានតម្លៃស្មើនឹងសញ្ញាបត្រមធ្យមសិក្សាទុតិយភូមិផងដែរ។

ឯកឧត្តម ហង់ ជួនណារ៉ុន កំពុងសាកល្បងប្រើកម្មវិធី BEEP

ឯកឧត្តម ហង់ ជួនណារ៉ុន មានប្រសាសន៍ថា៖ “កម្មវិធី BEEP នេះយើងមានបញ្ចូលមុខវិជ្ជាជាច្រើនដូចជារូបវិទ្យា គីមីវិទ្យា ភាសាខ្មែរ គណិតវិទ្យា ភាសាអង់គ្លេស ព័ត៌មានវិទ្យា និងជំនាញមួយចំនួនផ្សេងៗទៀត ដូចជាសហគ្រិនភាព យេនឌ័រ និងទេសចរណ៍ជាដើម។ បន្ទាប់ពីរៀនចប់កម្មវិធីទាំងអស់នេះ សិស្សអាចបន្តថ្នាក់វិទ្យាល័យ ឬជំនាញវិជ្ជាជីវៈរយៈពេល 3ឆ្នាំបន្ថែមទៀតបាន ដូចជានៅសៀមរាបអាចបន្តមុខវិជ្ជាទេសចរណ៍ ហើយទទួលបានសញ្ញាបត្រសមមូលស្មើនឹងសញ្ញាបត្របាក់ឌុបដែរ”។

រដ្ឋមន្ត្រីក្រសួងអប់រំ យុវជន និងកីឡា បានលើកឡើងផងដែរថា យុវជនយើងបច្ចុប្បន្នចូលចិត្តប្រើប្រាស់បណ្តាញអនឡាញ ហើយគ្រប់ៗគ្នាសុទ្ធតែមានទូរស័ព្ទដៃទំនើប ហេតុនេះសូមប្រើប្រាស់បណ្តាញអនឡាញឱ្យមានប្រយោជន៍។ ប្រសិនបើចង់សិក្សាបន្ត សិស្សអាចចុះឈ្មោះរៀនបានគ្រប់ទីកន្លែង គ្រប់ពេលវេលា តាមរយៈទូរស័ព្ទដៃ ឬបើខ្វះឧបករណ៍ ពួកគេអាចមកសិក្សានៅមជ្ឈមណ្ឌលនានាបាន ព្រោះក្នុងកម្មវីធីនេះសុទ្ធតែផលិត និងថតដោយគ្រូចំណានៗ និងពូកែ។

លោក Santosh Khatri ប្រធានផ្នែកអប់រំនៃអង្គការយូណេស្កូ បានលើកឡើងថា ការសម្រេចគោលដៅដើម្បីការអភិវឌ្ឍប្រកបដោយចីរភាពឆ្នាំ2030 មានឧបសគ្គជាច្រើន តែយើងសង្ឃឹមថា តាមរយៈការធ្វើការងារជាដៃគូជាមួយក្រសួងអប់រំ និងស្ថាប័នពាក់ព័ន្ធដើម្បីបន្តបណ្តុះបណ្តាលជំនាញ និងវិជ្ជាជីវៈផ្សេងៗនៅពេលនេះនឹងអាចធ្វើឱ្យយើងសម្រេចបាននូវគោលដៅដ៏សំខាន់នេះ។

ឯកឧត្តម ចឹក លីម អគ្គលេខាធិការង នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីអភិវឌ្ឍយុវជនបានលើកឡើងថា កម្មវិធី BEEP ត្រូវបានបង្កើតឡើងដោយមើលឃើញថា សិស្សកម្ពុជាកំពុងសិក្សាជាមធ្យមនៅថ្នាក់បឋមសិក្សាមានចំនួន 95% តែសម្រាប់អ្នកបញ្ចប់ការសិក្សានៅកម្រិតមធ្យមសិក្សាបឋមភូមិវិញមានទាបជាង 45% នេះបើយោងតាមសូចនាករសាធារណៈឆ្នាំ2015-2016 និងឆ្នាំ2016-2017។ អត្រានេះជាចំនួនមួយដែលយើងត្រូវយកចិត្តទុកដាក់ដើម្បីធ្វើយ៉ាងណាឱ្យសិស្សដែលបានបញ្ចប់ការសិក្សាថ្នាក់ទី6 ហើយមិនបានបន្តការសិក្សា ឬអ្នកបោះបង់ការសិក្សាត្រឹមថ្នាក់ទី 7 ទី8 ឬទី9 បានសិក្សាឡើងវិញ យ៉ាងហោចណាស់ចប់ថ្នាក់មធ្យមសិក្សាទុតិយភូមិដែរដើម្បីជាទុនមូលដ្ឋានសម្រាប់ឱ្យពួកគាត់បន្តចាប់យកជំនាញដែលប្រសើរជាងមុនធ្វើជាអាជីពចិញ្ចឹមជីវិត។

ឯកឧត្តម ចឹក លីម បានមានប្រសាសន៍ថា៖ “ដើម្បីជួយដល់សិស្សដែលបានបោះបង់ចោលការសិក្សានៅកម្រិតមធ្យមសិក្សាបឋមភូមិឱ្យបានចូលរៀនវិញតាមបច្ចេកវិទ្យា ឥឡូវនេះយើងមានបង្កើតមជ្ឈមណ្ឌលសិក្សាចំនួន 10ទីតាំង ដែល 5ទីតាំងនៅរាជធានីភ្នំពេញ និង 5ទីតាំងផ្សេងទៀតស្ថិតនៅខេត្តសៀមរាប។ នៅក្នុងមជ្ឈមណ្ឌលទាំងនោះមានបំពាក់សម្ភារបរិក្ខារ និងឧបករណ៍អេឡិចត្រូនិក (Tablets) ដើម្បីឱ្យសិស្សបានចូលរៀនដោយឥតគិតថ្លៃ”។

ឯកឧត្តមអគ្គលេខាធិការរង បានលើកឡើងផងដែរថាមជ្ឈមណ្ឌលទាំង10 នេះ មានមជ្ឈមណ្ឌល2 នៅរាជធានីភ្នំពេញ និង 3នៅខេត្តសៀមរាបគ្រប់គ្រងដោយក្រសួងអប់រំ យុវជន និងកីឡា និងមជ្ឈមណ្ឌល 2 នៅភ្នំពេញ និង 3នៅសៀមរាប គ្រប់គ្រងដោយក្រសួងការងារ និងបណ្តុះបណ្តាលវិជ្ជាជីវៈ។ បច្ចុប្បន្ននេះយើងកំពុងព្យាយាមគ្រប់លទ្ធភាពដើម្បីបង្កើតគណៈកម្មការទទួលស្គាល់ និងវាយតម្លៃ រួមទាំងបណ្តុះបណ្តាលបន្ថែម ដើម្បីពង្រីកវិសាលភាពនៃការផ្តល់សេវា BEEP ឱ្យកាន់តែប្រសើរឡើង។ ហើយជាទិសដៅបន្ទាប់យើងនឹងបញ្ចប់ការថតសកម្មភាពបង្រៀនលើមុខវិជ្ជាដែលនៅសេសសល់ដើម្បីដាក់បញ្ចូលទៅក្នុងប្រព័ន្ធសម្រាប់សិស្សសិក្សា បន្តបំពាក់សម្ភារបន្ថែមនៅមណ្ឌលសិក្សាទាំងអស់នៅទូទាំងប្រទេស និងផ្សព្វផ្សាយឱ្យកាន់តែទូលំទូលាយដើម្បីលើកទឹកចិត្តដល់យុវជនក្រៅសាលាឱ្យចូលរួមកម្មវិធី BEEP និងនិស្សិតស្ម័គ្រចិត្តដើម្បីធ្វើជាអ្នកសម្របសម្រួល ឬជួយបង្រៀនជាដើម។ ក្រៅពីនេះក្រសួងនឹងមានផែនការក្នុងការរៀបចំកិច្ចប្រជុំគណៈកម្មការវាយតម្លៃ និងការទទួលសញ្ញាបត្រ ដើម្បីធានាថា សិស្សដែលបានចេញពីកម្មវិធីនេះមានសមត្ថភាពគ្រប់គ្រាន់ជាមូលដ្ឋាន រួមទាំងសកម្មភាពសំខាន់ៗមួយចំនួនបន្ថែមទៀតលើការងារបង្រៀនតាមបច្ចេកវិទ្យា និងការជំរុញឱ្យកាន់តែមានប្រសិទ្ធភាព៕

February 28, 2019

ស្ងាត់ពីសិល្បៈមែន វីជេ រតនា រីកមុខជំនួញក្នុងដៃកាក់កបដល់ម្លឹងៗ

កាលពីពេលថ្មីៗនេះ ពិធីករ និងជាអ្នកជំនួញកូនពីរ វីជេ រតនា បានទទួលនូវសមាជិកទី2 កូនប្រុសដ៏គួរឱ្យស្រលាញ់ថែមម្នាក់ទៀត ធ្វើឱ្យគ្រួសារមួយនេះកាន់តែមានសុភមង្គល នឹងគ្នាកាន់តែខ្លាំងឡើង គួរឱ្យសរសើរតែម្តង។ តែអ្វីដែលចាប់អារម្មណ៍នោះគឺ មុខមាត់កូនប្រុសទី2 ដែលទើបនឹងកើតរបស់តារារូបនេះ ទើបតែកើតបានប៉ុន្មានថ្ងៃនោះទេ តែមុខមាត់របស់កូនលោកប្រែជាស្រស់សង្ហា គួរឱ្យស្រលាញ់តាំងតែពីក្មេង មិនចាញ់កាលកូនច្បងប៉ុន្មាននោះទេ។

ជីវិតឯកជនរបស់ពិធីករនិងជាវីជេរូបនេះ ត្រូវបានមហាជនចាប់អារម្មណ៍និងកត់សម្គាល់ថា លោកបាត់មុខឈឹងតែម្ដងពីកញ្ចក់ទូរទស្សន៍My TV ដែលធ្លាប់កាន់ក្បាលមេក្រូ ហើយងាកមកបង្ហោះតែរឿងរកស៊ី និងធ្វើជំនួញជាជំនួស។ ប៉ុន្ដែយ៉ាងណាមិញ លោកប្រាប់ឡារ៉ែនថា លោកមិនបានផ្ដាច់ខ្លួនពីសិល្បៈនោះឡើយ គឺនៅតែបានបង្ហាញខ្លួនចូលរួមក្នុងកម្មវិធីរបស់តារាសិល្បៈ ខណៈដែលក្រៅពីបង្អួតសុភមង្គលជាមួយប្រពន្ធកូន លោកក៏សប្បាយលើសពីពេលនៅប្រឡូកជាពិធីករនោះផងដែរ។

វីជេ រតនា ក៏ត្រូវគេសរសើរថា ជាអតីតពិធីករមួយរូប ដែលក្រៅពីឡើងកាលីបផ្នែកជីវភាពក្រោយរៀបការ ក៏មានសុភមង្គលជាមួយភរិយាគួរឱ្យសរសើរផងដែរ ខណៈដែលលោកទើបតែត្រូវបានគេសរសើរថា ជាស្វាមីល្អដែលចេះឱ្យតម្លៃភរិយា ដែលខុសពីបុរសមួយចំនួនដែលក្រោយពេលបើកជំនួញហើយកាន់ប្រាក់ម៉ឺនដុល្លារក្នុងដៃ ក៏មានការប្រែប្រួលចំពោះនារីដែលខ្លួនរៀបការជាមួយនោះ។ សារដែលលោកត្រូវបានមហាជនកោតសរសើរមិនដាច់ពីមាត់នោះ គឺ«មានគេសួរខ្ញុំថា រតនា ហេតុអីបានខ្លាចប្រពន្ធម៉េស? ខ្ញុំឆ្លើយថាខ្ញុំមិនដែរខ្លាចប្រពន្ធទេ ខ្ញុំមានតែគោរពប្រពន្ធ (លើលោកនេះគ្មានមនុស្សប្រុសណាខ្លាចប្រពន្ធទេ មានតែគោរពប្រពន្ធ) គេសួរបន្តទៀតថា ហេតុអីរតនា ឯងឃើញចាញ់ប្រពន្ធគ្រប់រឿងចឹង? ខ្ញុំឆ្លើយថា បើតាំងខ្លួនជាប្ដីគេហើយ បើចង់យកចាញ់យកឈ្នះជាមួយ ប្រពន្ធតើវាបានផលប្រយោជន៍អី? លើលោកនេះខ្ញុំមិនដែរចាញ់អ្នកណាទេ តែខ្ញុំសុំចាញ់ប្រពន្ធខ្ញុំមួយ» ដែលសារបែបនេះ បង្ហាញយ៉ាងច្បាស់ថាលោក និងភរិយា ស្ថិតក្នុងភាពល្អូកល្អិនគ្នាខ្លាំង។

ប្រភពពីអ្នកសិល្ប:ក៏បានបង្ហើបប្រាប់ឡារ៉ែនថា លោកវីជេ រតនា នឹងមិនត្រលប់មកកាន់អាជីពពិធីករវិញទេ ដោយសារតែក្រោយពី លោកមានភរិយា ហើយមានមុខជំនួញក្នុងដៃ គឺលោកមិនខុសពីអ្នកជំនួញធំដុំមួយរូប ក្នុងពេលដែលលោក ក៏រកពេលគ្រប់គ្រងមុខជំនួញមិនបានផង ដែលមិនអាចមកហែរហៃជាមួយអាជីពពិធីករបានដូចមុន។ លោកត្រូវគេឃើញ បើកជំនួញបើកការ៉ាស់ចាក់សាំងធំមួយ នៅមាត់ច្រកផ្សារចាក់អង្រែ ដោយប្រភពផ្លូវការថា ក្រៅពីបើកការ៉ាស់សាំងខ្លួនឯង លោកក៏ជាអ្នកចាយចាយសាំង ទៅកាន់ដៃគូផងដែរ ទើបធ្វើឱ្យលោក និងភរិយាកាក់កបដល់ម្លឹង។ លោក វីជេរតនា ត្រូវគេបញ្ជាក់ថា លោកក៏មានមុខជំនួញនាំចូលរថយន្ត មកពីប្រទេសមកលក់ឱ្យតាមការ៉ាសលក់ឡាន និងលក់ផ្ទាល់ខ្លួនផងដែរ ខណ:ដែលមុខរបរនាំចូលរថយន្ត របស់លោកត្រូវគេដឹងថា មានដើមទុនដល់សែនដុល្លារ។

ភរិយារបស់លោកក៏ត្រូវគេដឹងថា គឺជាអ្នកនាំចូលផលិតផលថែរក្សាសម្រស់មកពីក្រៅប្រទេស ដែលរកចំណូលបានច្រើនពាន់ដុល្លារ ក្នុងមួយខែផងដែរ។ អ្នកសិល្ប:ភាគច្រើននិយាយថា លោក វីជេរតនា ជោគជ័យមុខជំនួញខ្លាំងណាស់ ដោយលោកមិនខុសពីសេដ្ឋី វ័យក្មេងនោះទេ ដោយល្បីថាគ្រួសាររបស់លោក នឹងទិញងារឧកញ៉ាឱ្យលោក ដើម្បីឱ្យលោកកាន់តែងាយស្រួលធ្វើជំនួញ៕

February 28, 2019

កំពូលតារាចម្រៀង ឱក សុគន្ធកញ្ញា ប្រាប់ពីគម្រោងអស្ចារ្យឋានព្រះឥន្ទ

ខណៈដែលដំណឹងរៀបការកាន់តែខិតជិតដល់ តារាចម្រៀងល្បីល្បាញកញ្ញា ឱក សុគន្ធកញ្ញា នៅតែត្រូវបានគេកត់សម្គាល់ថាស្រស់ស្អាត និងមានភាពទាក់ទាញទ្វេរដងគ្រប់ពេលដែលនាងបង្ហាញខ្លួន។ ជាក់ស្ដែងនាងបានធ្វើឱ្យកញ្ជ្រោលយ៉ាងខ្លាំងនៅក្នុងកម្មវិធីបើកសម្ពោធដីចម្ការប្រភេទពុះជាហិកតារកាលពីថ្ងៃទី27 កុម្ភៈ ដោយកញ្ញាបកស្រាយបទចម្រៀងតែប៉ុន្មានបទ អមដោយក្បាច់រាំប៉ុណ្ណោះ តែអាចធ្វើឱ្យភ្ញៀវកត្តិយសផ្ដោតការចាប់អារម្មណ៍នឹងការបង្ហាញខ្លួនមិនធម្មតា។

អ្វីដែលគេកាន់តែកត់សម្គាល់ខ្លាំងជាងការបង្អួតរូបសម្រស់ និងភាពរស់រវើកនៃក្បាច់រាំទៀតនោះ គឺកញ្ញាបានប្រកាសគម្រោងគួរឱ្យចាប់អារម្មណ៍មួយរបស់គម្រោងឋានព្រះឥន្ទដែលបានប្រកាសឡើងនាយប់នោះ។ ឱក សុគន្ធកញ្ញា ប្រាប់អ្នកសារព័ត៌មានឡារ៉ែនថា នាងមិនធ្លាប់បានឮគម្រោងពុះដីឡូតិ៍ណាដែលលក់ជាចម្ការមួយហិកតារៗ ហើយក្រុមហ៊ុនមានទាំងសេវាបង់រំលោះ និងសេវាថែទាំងដំណាំឱ្យរហូតដល់បានផល ហើយជាប្រភេទដីចម្ការដែលមានប្លង់កម្មសិទ្ធិបែបនេះនោះទេ ទើបកញ្ញាយល់ថា នាងខ្ញុំនឹងសិក្សាទិញចម្ការធុរ៉េនពីក្រុមហ៊ុននេះឱ្យបានមួយចំនួន អាស្រ័យទៅតាមការចង់បានជាក់ស្ដែង។

កញ្ញាបានបន្ដទៀតថាខ្លួនចង់បានដីចម្ការធុរ៉េបែបនេះជាយូរមកហើយ ប៉ុន្តែបណ្ដាលមកពីខ្វះអ្នកមើលថែទាំដំណាំ និងមិនចង់ចំណាយថវិកាទាំងដុលតែម្ដង ទើបកញ្ញាចេះតែឃ្វាងៗរឿងទិញចម្ការនេះ។ កញ្ញាបញ្ជាក់ថាក្រោយពេលបានចូលរួមក្នុងពិធីប្រកាសលក់ចម្ការរបស់គម្រោង«ឋានព្រះឥន្ទជាតិធី»បានធ្វើឱ្យនាងចាប់អារម្មណ៍តែម្ដង ដោយក្នុងចំណោមប្រភេទចម្ការទាំងអស់គឺនាងពេញចិត្តគម្រោងចម្ការធុរ៉េន និងខេត្តកំពត។ នៅក្នុងពិធីនោះ នាងថាខ្លួនទទួលបានតម្លៃខ្លួនខ្ពស់ ទើបនាងនៅកំដរពិធីតាំងពីព្រលប់រហូតដល់ចាប់រង្វាន់ធំហើយ ហើយថែមទាំងបកស្រាយបទចម្រៀងច្រើនបទ ធ្វើឱ្យពិធីទាំងមូលកញ្ជ្រោលខ្លាំង។

យ៉ាងណាមិញលោក ហង្ស ព្រីន្សយ៉ា ម្ចាស់គម្រោង និងជាប្រធានគម្រោងឈ្មោះឋានព្រះឥន្ទ បានបញ្ជាក់ប្រាប់ឡារ៉ែនថា រយៈពេលច្រើនឆ្នាំមកហើយ ដែលក្រុមហ៊ុនរបស់លោកសម្ងំទិញបានចម្ការអ្នកស្រីរហូតដល់រាប់ពាន់ហិកតារ នៅខេត្តមណ្ឌលគីរី រតនៈគីរី កំពត និង ពោធិសាត់ជាដើម ហើយបានវិនិយោគដាំជាដំណាំផ្សេងអាស្រ័យទៅតាមសណ្ឋានដី។ ប៉ុន្តែដោយសារក្រុមហ៊ុនយល់ថាបើក្រុមហ៊ុនបន្តវិនិយោគដំណាំធុរ៉េន ដូងក្រអូប និងប័រ តែម្នាក់ឯងរបៀបនេះ គឺនៅថ្ងៃណាមួយពិតជាមានហានិភ័យ អ៊ីចឹងហើយទើបក្រុមហ៊ុនសម្រេចពុះដីចម្ការដែលខ្លួនទិញបានរហូតដល់រាប់ពាន់ហិកតារនោះ ជាឡូតិ៍តូចៗវិញ ដោយក្នុងឡូតិ៍មានទំហ៊ំ1ហិកតារៗ ហើយលក់បង់រំលោះ។ ប៉ុន្តែក្រុមហ៊ុននៅតែបន្តផ្ដល់ជូននូវពូជដំណាំ និងការថែទាំដោយបុគ្គលិកជំនាញរហូតដល់4ឆ្នាំ ឬ6ឆ្នាំ ដែលជារយៈពេលឱ្យបង់រំលោះនោះ ដើម្បីឱ្យចម្ការទាំងឡាយនៅតែមានដំណាំចេញផ្លែចេញផ្កា ងាយស្រួលអោយក្រុមហ៊ុនទទួលទិញផល។ លោកថាគម្រោងដីចម្ការពុះឡូតិ៍របស់ខ្លួន មានតម្លៃពី14,000 រហូតដល់ជាង4ម៉ឺនក្នុងមួយហិកតារ ដោយនៅទឹកដីខេត្តមណ្ឌលគីរី គឺជាចម្ការប័រ នៅកំពតជាចម្ការធុរ៉េន និងនៅខេត្តពោធិ៍សាត់គឺជាចម្ការដូងក្រអូប។ ក្នុងនោះក្រុមហ៊ុនក៏នឹងពុះលកក់ចម្ការក្រូច និងចម្ការឬស្សី ជាហិកតារៗអោយបង់រំលោះបែបនេះ ក្នុងពេលខាងមុខផងដែរ៕

February 28, 2019

Chelsea ផ្តួល Spurs ធ្វើឱ្យលោក Sarri ធូរស្រាល ខណៈ Liverpool លត់ Watford

ក្រុម Chelsea បាននាំយកស្នាមញញឹមវិលទៅកាន់ផ្ទៃមុខរបស់លោក Maurizio Sarri វិញ តាមរយៈការយកឈ្នះក្នុងលទ្ធផល 2-០ លើក្រុម Tottenham ដើម្បីកាត់បន្ថយសម្ពាធផ្សេងៗពីលើអ្នកចាត់ការទូទៅរបស់ពួកគេ ក្រោយពីអ្នកចាំទី KepaArrizabalaga មិនត្រូវបានដាក់ឱ្យចូលលេង បន្ទាប់ពីភាពចម្រូងចម្រាស់នៅកីឡដ្ឋាន Wembley។

គ្រាប់បាល់ស៊ុតបញ្ចូលទីនៅតង់ទី2 របស់ខ្សែប្រយុទ្ធ Pedro និងការធ្វើឱ្យបាល់ចូលទីខ្លួនឯងពីសំណាក់ខ្សែការពារ Kieran Trippier បានបង្កើតការជឿជាក់ឡើងវិញសម្រាប់លោក Sarri ខណៈដែលអ្នកចាត់ការទូទៅរូបនេះ កំពុងតែប្រយុទ្ធដើម្បីគេចឱ្យផុតពីការបណ្តេញចេញ ក្រោយពីជួបភាពជ្រួលច្របល់ក្នុងរដូវកាលទី1 របស់លោកក្នុងនាមជាគ្រូបង្វឹក។

ជំហររបស់លោក Sarri ត្រូវបានកម្ទេចដោយអ្នកចាំទី Kepa ក្រោយពីអ្នកចាំទីរូបនេះបានបង្កើតឱ្យមានការផ្ទុះកំហឹងពីគ្រូបង្វឹកសញ្ជាតិអ៊ីតាលីរូបនេះ នៅពេលដែលរូបគេបានបដិសេធក្នុងការប្តូរចេញ ក្នុងពេលប្រកួតពាន League Cup វគ្គផ្តាច់ព្រ័ត្រកាលពីថ្ងៃអាទិត្យ។ ស្របពេលជាមួយគ្នានេះ ខ្សែប្រយុទ្ធ Sadio Mane បានស៊ុតបាល់បញ្ចូលទី 2គ្រាប់ ខណៈដែលក្រុម Liverpool បានរក្សាការនាំមុខរបស់ខ្លួនពីលើក្រុម Manchester City នៅលើកំពូលតារាងនៃក្របខ័ណ្ឌ Premier League ក្រោយពីកម្មវិធីប្រកួតដ៏មមាញឹកកាលពីថ្ងៃពុធ ដែលមានក្រុមកំពូលទាំង7 ចូលរួម។

ក្រុមរបស់លោក Jurgen Klopp បានយកឈ្នះលើក្រុមឡើងទម្រង់លេង Watford យ៉ាងងាយក្នុងលទ្ធផល 5-០ នៅកីឡដ្ឋាន Anfield ដើម្បីលុបចោលការបារម្ភផ្សេងៗជុំវិញការរក្សាភាពខ្លាំងរបស់ពួកគេ ខណៈដែលពួកគេកំពុងតែប្រជែងយកពានក្របខ័ណ្ឌកំពូលជាលើកទី1 បើគិតចាប់តាំងពីឆ្នាំ1990។

ដោយឡែក ក្រុម Man City បានបំបែកតំបន់ការពារដ៏រឹងមាំរបស់ក្រុម West Ham នាកីឡដ្ឋាន Etihad ក្នុងការប្រកួតតង់ទី2 ដើម្បីរក្សាការដេញតាមពីក្រោយក្រុម Liverpool ចំនួន 1ពិន្ទុឱ្យនៅដដែល៕

February 28, 2019

Fury ប្រកាសពីការឡើងសង្វៀនប្រកួត 1លើក មុនប្រកួតសងសឹក Wilder

ស្ថាប័ន WBCបានបញ្ជាក់ថា កីឡាករប្រដាល់ Tyson Fury បានបញ្ជាក់ប្រាប់ក្រុមប្រឹក្សាកីឡាប្រដាល់ពិភពលោក (WBC) ថា រូបគេមានគម្រោងក្នុងការប្រកួតជាមួយនឹងដៃគូមិនទាន់ស្គាល់ឈ្មោះម្នាក់ជាមុនសិន មុននឹងធ្វើការប្រកួតសងសឹកជាមួយនឹងម្ចាស់ខ្សែក្រវាត់ទម្ងន់ធ្ងន់ Deontay Wilder។

WBC បានឱ្យដឹងនៅលើបណ្តាញសង្គម Twitter ថា WBC ទទួលបានការបញ្ជាក់ប្រាប់ពីក្រុមការងាររបស់ Furyថា រូបគេកំពុងតែមានគម្រោងឡើងប្រកួត 1លើកទៀត មុនពេលវិលទៅកាន់សង្វៀនប្រកួតសងសឹកជាមួយនឹងWilder។
កីឡាករ Wilder និង Fury បានទទួលត្រឹមលទ្ធផលស្មើ ក្នុងការប្រកួតនៅទីក្រុង Los Angeles កាលពីខែធ្នូ កន្លងទៅ ក្រោយពីបានតស៊ូគ្នាចំនួន 12ទឹកនៅលើសង្វៀន Staples Center។

ការប្រកួតសងសឹករបស់ពួកគេអាចនឹងក្លាយជាការប្រកួតមួយក្នុងចំណោមការប្រកួតដ៏រំភើបបំផុតប្រចាំឆ្នាំ ក្រោយពីការជួបប្រកួតជាលើកទី1 បានបង្កើតឱ្យមានការចាប់អារម្មណ៍ឡើងវិញទៅលើកកីឡាប្រដាល់ទម្ងន់ធ្ងន់។ ប៉ុន្តែ ទោះបីជាយ៉ាងណា ភាពមិនច្បាស់ការផ្សេងៗទៅលើការប្រកួតសងសឹកដែលអាចទៅរួចមួយនេះ បានផ្ទុះឡើងកាលពីសប្តាហ៍មុន នៅពេលដែល Fury បានចុះកិច្ចព្រមព្រៀងមួយជាមួយនឹងក្រុមហ៊ុនរៀបចំការប្រកួតរបស់អាមេរិក Top Rank និងទូរទស្សន៍ ESPN ដែលបង្កើតឱ្យមានភាពស្មុគស្មាញខ្លាំងលើការចរចាផ្សេងៗជាមួយនឹង Wilder។

កាលពីថ្ងៃអង្គារកន្លងទៅ ស្ថាប័ន WBC បានប្រកាសថា ក្រុមការងាររបស់កីឡាករ Fury បានបញ្ជាក់ប្រាប់ដល់អង្គភាពនេះថា ពួកគេមានគម្រោងឱ្យ Fury ឡើងប្រកួតយ៉ាងហោចណាស់ 1លើកទៀត មុនពេលរៀបចំការប្រកួតសងសឹកជាមួយ Wilder ។

Wilder សញ្ជាតិអាមេរិក វ័យ 33ឆ្នាំរូបនេះ មានកំណត់ត្រាឈ្នះ 40លើក មិនដែលចាញ់ និងស្មើ 1លើក ក្នុងនោះផ្តួលដៃគូឱ្យសន្លប់ដល់ទៅ 39លើក។ កីឡាករ Fury វ័យ 30ឆ្នាំ មានកំណត់ត្រាមិនស្គាល់ចាញ់ដូចគ្នា ដោយឈ្នះ 27លើក ស្មើ 1លើក ក្នុងនោះផ្តួលដៃគូឱ្យសន្លប់ចំនួន 19លើក៕

February 28, 2019

ឱកាសស្វែងយល់ពីអចលនទ្រព្យនៅអូស្ត្រាលី

យោងតាមតួលេខគណនេយ្យជាតិចុងក្រោយបង្អស់ដែលចេញផ្សាយដោយការិយាល័យស្ថិតិ អូស្ត្រាលី (The Australian Bureau of Statistics ឬ ABS) បានបង្ហាញថា បន្ទាប់ពីកំណើន 2.1%ក្នុងឆ្នាំ2016-17 ផលិតផលក្នុងស្រុកសរុបពិតប្រាកដរបស់ប្រទេសអូស្ត្រាលីបានកើនឡើង 2.9% ក្នុងឆ្នាំ2017-18។

បច្ចុប្បន្នអូស្ត្រាលីកំពុងឈានដល់ឆ្នាំទី28 នៃកំណើនសេដ្ឋកិច្ចជាប់ៗគ្នា ហើយក្នុងចន្លោះឆ្នាំ2019 និងឆ្នាំ2023 សេដ្ឋកិច្ចរបស់ប្រទេសអូស្ត្រាលីត្រូវបានព្យាករថា នឹងមានភាពប្រសើរជាងសេដ្ឋកិច្ចរបស់ប្រទេសជឿនលឿនធំៗដទៃទៀត។ នេះបើយោងតាមរបាយការណ៍ទស្សនវិស័យសេដ្ឋកិច្ចពិភពលោករបស់មូលនិធិរូបិយវត្ថុអន្តរជាតិ (IMF) កាលពីខែមេសា ឆ្នាំ2018។

ដោយឡែកតំបន់ ហ្គោលខូស្ត (Gold Coast) ឬឆ្នេរសមុទ្រមាស គឺជាទិសដៅរបស់អ្នកទេសចរអូស្ត្រាលីដែលមានចំនួនប្រហែល 11លាននាក់ក្នុងមួយឆ្នាំ។ គួរឱ្យភ្ញាក់ផ្អើលណាស់ ទីក្រុងនេះមានសមត្ថភាពផលិតទ្វេដងនៃផលិតផលក្នុងស្រុកសរុបរបស់ខ្លួនប្រហែល18,9ដុល្លារអូស្ត្រាលីក្នុងរយៈពេល10ឆ្នាំ។ វាក៏ចង្អុលបង្ហាញផងដែរនូវការអភិវឌ្ឍ GDP 5% យ៉ាងជាប់លាប់។ ខាងក្រោមនេះគឺជាកិច្ចសម្ភាសន៍រវាងលោក Duke Vaughan នាយកគ្រប់គ្រងនៃក្រុមហ៊ុន Crown Realty International អំពីអចលនទ្រព្យនៅតំបន់ ហ្គោលខូស្ត (Gold Coast City)។

1- តើបច្ចុប្បន្នអចលនទ្រព្យនៅប្រទេសអូស្ត្រាលីមានការរីកចម្រើនកម្រិតណាដែរ?
ប្រទេសអូស្ត្រាលី ជាប្រទេសអភិវឌ្ឍន៍ហើយក៏ពិតមែន តែវិនិយោគិនក៏នៅតែមានឱកាសវិនិយោគដែរ ព្រោះមនុស្សតែងមានកំណើនរហូតជាមួយនឹងការរីកចម្រើន។ បើមនុស្សមានការកើនឡើង ដូច្នេះតែងតែត្រូវការឧបករណ៍ប្រើប្រាស់ និងអចលនទ្រព្យ ដូច្នេះធ្វើឱ្យវិស័យនេះមានការរីកចម្រើនខ្ពស់មែនទែននៅអូស្ត្រាលី ដែលគេអាចបានហៅថា អចលនទ្រព្យបែបឡាយហ្វ៍ស្តាយល៍។

2- តើការរីកចម្រើនអចលនទ្រព្យនោះមានកំណើនប៉ុន្មានភាគរយបើប្រៀបធៀបទៅនឹង GDP?
វិស័យអចលនទ្រព្យនៅប្រទេសអូស្ត្រាលី បើនិយាយពីការប្រៀបធៀប ផ.ស.ស (GDP) វាមានទីផ្សារខុសៗគ្នាទាំងអស់ពីតំបន់1 ទៅតំបន់1 ដូចជា ហ្គោលខូស្ត គឺជាតំបន់មួយដែលមានការរីកចម្រើន GDP លើសច្រើនដែលយើងអាចបញ្ជាក់បានថា មានការកើនឡើងចំនួនភាគរយ គឺលើសពី GDP នៃប្រទេសអូស្ត្រាលីទាំងមូល។ផលិតផលក្នុងស្រុកសរុបរបស់ប្រទេសអូស្ត្រាលីបានកើនឡើង 2.8% ក្នុងឆ្នាំ2017 បើប្រៀបធៀបទៅនឹងឆ្នាំមុន។ អត្រានេះគឺ 5/10នៃចំនួនមួយខ្ពស់ជាងតួលេខនៃការកើនឡើង 2.3% នៅឆ្នាំ2016។ តួលេខផលិតផលក្នុងស្រុកសរុបក្នុងឆ្នាំ2017 មានចំនួន 1,323,421លានដុល្លារអូស្ត្រាលីជាប់ចំណាត់ថ្នាក់លេខ13 នៅក្នុងចំណាត់ថ្នាក់ GDP នៃប្រទេសចំនួន196។ ចំណែកតំបន់ ហ្គោលខូស្ត (Gold Coast) បានបង្ហាញនូវកំណើនការអភិវឌ្ឍ GDP 5%យ៉ាងជាប់លាប់។

3- តើហេតុផលអ្វីដែលធ្វើឱ្យប្រជាជនកម្ពុជាត្រូវវិនិយោគអចលនទ្រព្យនៅប្រទេសអូស្ត្រាលី?
ហេតុផលដែលធ្វើឱ្យប្រជាជនកម្ពុជាត្រូវវិនិយោគអចលនទ្រព្យនៅប្រទេសអូស្ត្រាលី គឺទាក់ទិននឹងការសិក្សារៀនសូត្រតែមួយគត់ ដែលបច្ចុប្បន្នមាននៅអូស្ត្រាលី តែពុំទាន់មានការវិនិយោគជាទ្រង់ទ្រាយធំ ឬជាការបណ្តាក់ទុននៅឡើយទេ ដោយគ្រាន់តែមានការទិញ រួចដាក់ជួល គឺមានជនជាតិខ្មែរច្រើនដែរ ព្រោះការដាក់ជួលវាបានចំណេញ (ក្នុង1សប្តាហ៍ 500 x 4(1ខែ)=2,000ដុល្លារអូស្ត្រាលី។ ពោលគ្រាន់តែជាការទិញផ្ទះដាក់ជួល ពុំទាន់ថាជាការបណ្តាក់ទុននៅឡើយ។ ជារួមមានអ្នកវិនិយោគមកពីប្រទេសចិន វៀតណាម សិង្ហបុរី ញូវហ្ស៊ីលែន។ល។

ក្នុងហេតុផលមួយទៀត គឺគាត់ទិញដើម្បីចង់បានសញ្ជាតិ(តែមិនមែនបានន័យថា ទិញផ្ទះបានសញ្ជាតិទេ ទាល់តែមានលិខិតបទដ្ឋាន និងការរស់នៅរយៈពេល 5ឆ្នាំ)។

4- ទាក់ទងនឹងការទិញផ្ទះនៅប្រទេសអូស្ត្រាលី តើរដ្ឋាភិបាលរបស់ប្រទេសអូស្ត្រាលីមានផ្តល់ការលើកទឹកចិត្ត និងលក្ខខណ្ឌអ្វីខ្លះសម្រាប់ប្រជាជនកម្ពុជាដែលចង់ទៅរស់នៅក្នុងប្រទេសអូស្ត្រាលី?
ក្នុងច្បាប់ប្រទេសអូស្ត្រាលី ពុំមានការចែងច្បាស់ពីការលើកទឹកចិត្តយ៉ាងម៉េចទេ តែបើការអនុវត្តផ្ទាល់វិញ មានការលើកទឹកចិត្តរួចជាស្រេច គឺរដ្ឋាភិបាលអូស្ត្រាលីមានគោលនយោបាយលើកទឹកចិត្តដល់វិនិយោគិនដូចនៅស្រុកខ្មែរដែរ។

ពោលគឺ ជនបរទេសមានសិទ្ធិទិញដី ទិញផ្ទះ ជាម្ចាស់កម្មសិទ្ធិលើអចលនទ្រព្យបាន ដោយរដ្ឋាភិបាលនឹងផ្តល់ប្លង់រឹងដល់អ្នកទិញអចលនទ្រព្យ គាត់ក៏អាចចេញចូលប្រទេសអូស្ត្រាលីដោយការផ្តល់វីសា និងអ្នកដែលមានបំណងចង់ទិញ ដី ផ្ទះ ឬខុនដូគាត់អាចរកអ្នកណាដែលផ្តល់ដំបូន្មានពីទីតាំង កន្លែង ឬតំបន់អភិវឌ្ឍន៍ថ្មីបាន ដែលកន្លែងទាំងនោះធ្វើឱ្យគាត់ចូលចិត្ត និងមានភាពងាយស្រួលក្នុងការរស់នៅ ឬសម្រាប់ការសិក្សារៀនសូត្ររបស់កូនៗរបស់គាត់។

5- រវាងផ្ទះ និងខុនដូនៅប្រទេសអូស្ត្រាលី តើមួយណាដែលប្រជាជនកម្ពុជាចាប់អារម្មណ៍ទិញច្រើនជាងគេ?
រវាងផ្ទះ និងខុនដូនៅប្រទេសអូស្ត្រាលី ប្រជាជនកម្ពុជាចាប់អារម្មណ៍ទិញច្រើនជាងគេ គឺផ្ទះ(គេហដ្ឋាន)ប៉ុន្តែគេមើលឃើញភាពខុសគ្នារវាងអាយុ បើអាយុចាប់ពី 40ឆ្នាំឡើងគេបានទិញផ្ទះទុកសម្រាប់ឱ្យកូនស្នាក់នៅ ងាយស្រួលក្នុងការរៀនសូត្រ។ តែបើអ្នកទិញនោះអាយុត្រឹម30ឆ្នាំឡើង គាត់តែងទិញខុនដូ។ ប៉ុន្តែការទិញផ្ទះ និងខុនដូពុំមានតម្លៃខុសគ្នាប៉ុន្មានទេ។

6- ប្រសិនបើចង់វិនិយោគលើវិស័យអចលនទ្រព្យនៅប្រទេសអូស្ត្រាលី តើយើងគួរតែទិញផ្ទះ ឬទិញដី ឬទិញខុនដូ? និងតើមួយណាអាចមានឱកាសចំណេញលុយបានច្រើនជាង?
តាមពិតទៅ វាមានលក្ខណៈផ្សេងគ្នាបន្តិច នៅស្រុកគេៗចង់រស់នៅខុនដូជាង ព្រោះបើយើងចង់ដាក់ជួល វាលឿនជាង តែបើយើងលក់ខុនដូ វាមិនចំណេញច្រើនដូចលក់ផ្ទះទេ។ តែប្រសិនបើឱ្យគេទិញផ្ទះ គេមិនចង់ទិញទេ ព្រោះបើដាក់ជួល វារាងតឹងតែងបន្តិច(តែនៅតែអាចជួលបាន) ហើយបើយើងទុកផ្ទះនោះឱ្យយូរ វានឹងបានថ្លៃជាងខុនដូ ហើយនៅពេលយើងចង់លក់ ក៏វាចំណេញច្រើនជាងលក់ខុនដូដែរ។

7- តើការទិញផ្ទះ ឬទិញខុនដូនៅទីក្រុង និងជនបទខុសគ្នាដូចម្តេចខ្លះ?
ដោយសារនៅ ហ្គោលខូស (Gold Coast) ជារដ្ឋមួយនៅប្រទេសអូស្ត្រាលី ដែលបើប្រៀបធៀបមកស្រុកខ្មែរ ដូចជាតំបន់អភិវឌ្ឍន៍ថ្មី ដូចនេះហ្គោលខូស្តជាតំបន់ទើបអភិវឌ្ឍន៍ មិនដូចនៅទីក្រុងមែលប៊ន ឬស៊ីដនីនៃប្រទេសអូស្ត្រាលីដែលបានក្លាយជាតំបន់អភិវឌ្ឍន៍ជឿនលឿនយូរហើយនោះទេ។

ដូច្នេះមានការកើនឡើងនៃចំនួនមនុស្សដែលចង់ទៅរស់នៅ ហើយសេចក្តីត្រូវការក៏កើនឡើងដែរព្រោះវានៅមានសល់ចន្លោះនៃការអភិវឌ្ឍច្រើន ខុសពីទីតាំងនៃតំបន់ជឿនលឿនមួយចំនួន បានន័យថា នៅ Gold Coast នៅមានសល់ចន្លោះនៃការអភិវឌ្ឍច្រើន វាទូលាយ និងជាតំបន់សមុទ្រ ជាតំបន់អភិវឌ្ឍន៍របស់រដ្ឋាភិបាលអូស្ត្រាលីដែលបានផ្តល់ភាពងាយស្រួលដល់អ្នកចង់ទិញខុនដូ ផ្ទះ ឬចង់វិនិយោគ។ នៅទីក្រុង Gold Coast City សេវាកម្មជួល និងអចលនទ្រព្យមានការលក់ក្នុងស្រុកខ្ពស់បំផុត ដោយបង្កើតបាន 12,637លានដុល្លារក្នុងឆ្នាំ2017/18។

8- ប្រសិនបើយើងមិនមានលុយគ្រប់ក្នុងការទិញអចលនទ្រព្យនៅប្រទេសអូស្ត្រាលី តើធនាគារនៅប្រទេសអូស្ត្រាលីអាចឱ្យយើងខ្ចីបង់រំលស់លើអចលនទ្រព្យនោះទេ? ហើយត្រូវមានលក្ខខណ្ឌអ្វីខ្លះ?
ក្នុងការទិញអចលនទ្រព្យនៅប្រទេសអូស្ត្រាលីបើយើងមិនមានលុយគ្រប់ យើងអាចដាក់ការស្នើសុំបាន តែសម្រាប់ជនបរទេស ឬជនជាតិខ្មែរជាការលំបាក ព្រោះជាការឆ្លងប្រទេស និងដោយសារតែគេមិនស្គាល់ប្រវត្តិរបស់យើង។ ប៉ុន្តែគេមាន 2កម្រិត គឺធនាគារ និងរបៀបជាមីក្រូហិរញ្ញវត្ថុដូចនៅស្រុកយើងដែរ ដែលគេអាចពិចារណាលើសំណើដែលយើងបានស្នើសុំ។

តែយើងត្រូវឱ្យយល់ពីរបៀបទិញរបស់គេ គឺនៅអូស្ត្រាលីវាខុសពីស្រុកយើង ការទិញដីធ្លី ផ្ទះសំបែងមិនមានការបង់រំលស់ទេ។ បើយើងមានប្រាក់ត្រឹម 20% (ដែលជាប្រាក់ Diposit គេដាក់ក្នុងធនាគារ)យើងអាចកក់ប្រាក់ទិញផ្ទះបាន។ រហូតដល់កាលបរិច្ឆេទចុងក្រោយ (ក្នុងពេលបញ្ចប់គម្រោង)យើងនៅមានពេលវេលា ដូចជាការបង់រំលស់ដែរ ទើបយើងបង់ផ្តាច់ 80% ដោយទទួលលិខិតផ្ទេរ-ប្រគល់ និងបានគេហដ្ឋានដែលយើងបានទិញនោះ។

9- ប្រសិនបើឪពុកម្តាយដែលចង់ឱ្យកូនចូលរៀននៅប្រទេសអូស្ត្រាលី តើការទិញផ្ទះនៅទីនោះដើម្បីទុកឱ្យកូនស្នាក់នៅ និងជួលផ្ទះឱ្យកូនស្នាក់នៅដើម្បីរៀន តើមួយណាចំណេញជាង?
តាមពិត ការទិញផ្ទះវាតែងតែល្អជាងការជួលផ្ទះ តែសួរថា តើគាត់មានលុយដែរទេ? ប្រសិនបើយើងមានលុយគ្រប់សម្រាប់ទិញផ្ទះ។ ឧទាហរណ៍យើងទិញផ្ទះមាន 3បន្ទប់។ យើងរស់នៅមិនអស់ទេ ដូច្នេះយើងអាចជួល 2បន្ទប់ដើម្បីយកប្រាក់នោះមកបង្គ្រប់ការបង់ថ្លៃការសិក្សា និងថ្លៃការរស់នៅរបស់កូនបាន ពីព្រោះផ្ទះអាចជួលបានថ្លៃ ទម្រាំកូនរៀនចប់។ លុះដល់ពេលរៀនចប់ បើយើងចង់លក់ក៏បានចំណេញលើការរៀនសូត្ររបស់កូនដែរ។ ដូច្នេះទិញផ្ទះល្អជាង និងចំណេញជាង។

ចំពោះខុនដូវិញក៏ល្អម្យ៉ាងដែរ តែសួរថា តើយើងមានលុយសម្រាប់ទិញដែរឬទេ? ព្រោះបើគាត់មិនមានលុយសម្រាប់ទិញផ្ទះ គាត់អាចជួលខុនដូរស់នៅបាន(1បន្ទប់)គាត់អាចរស់នៅបានដោយសុខស្រួលក្នុងបរិយាកាសនៅទីនោះ ឬដើម្បីការរៀនសូត្រ៕

February 28, 2019

តារាចម្រៀងមិនភ្លេចអតីតកាលពលករជូរជត់ ឡេង ណាវ៉ាត្រា ប្រកាសសាងសង់អគារសិក្សាភាសាកូរ៉េ

ប្រិយមិត្តអ្នកអានប្រាកដជាបានជ្រាបយ៉ាងច្បាស់មកហើយថា តារាចម្រៀង និងជាផលិតករភាពយន្ដ ដែលត្រូវគេស្គាល់ថាបានឡើងជាឧកញ៉ាវ័យក្មេងលោក ឡេង ណាវ៉ាត្រា ធ្លាប់មានប្រវត្តិជូរចត់ខ្លាំងណាស់ទម្រាំបានក្លាយទៅជាមនុស្សជោគជ័យដូចសព្វថ្ងៃនេះ សឹងតែគ្មានអ្នកណានឹកស្មានដល់ឡើយ។ ជាងនេះទៅទៀតក្រៅពី ជំនួញដ៏ធំលោកក៏លះបង់មកធ្វើការងារជារមនុស្សធម៌ជាញឹកញាប់ផងដែរ។

គ្មានអ្នកណាមិនដឹងនោះទេថា តារាចម្រៀងរូបនេះ ល្បីខាងផ្នែកសប្បុរសធម៌រហូតដល់ថ្នាក់បំភ្លេចការបញ្ចេញស្នាដៃសិល្បៈ ដែលធ្លាប់ជួយឱ្យលោកទទួលបានប្រជាប្រិយភាពមុនក្លាយជាអ្នកជំនួញ។ យ៉ាងណាមិញនៅមុននេះបន្តិច លោកបានបញ្ជាក់ប្រាប់ពីគម្រោងធំ2ដែលគេនឹកស្មានមិនដល់ គឺប្រកាសដំណើរការផលិតកម្ម Galaxy ឡើងវិញ និង ប្រកាសសង់សាលាបណ្ដុះបណ្ដាលភាសាកូរ៉េដល់ទៅ3កន្លែងផ្សេងគ្នាក្នុងពេលខាងមុខ ដើម្បីអោយកូនខ្មែរដែលចង់ចេះភាសាកូរ៉េ និងចង់ប្រលងទៅធ្វើការនៅក្នុងប្រទេសកូរ៉េ មានលទ្ធភាពគ្រប់គ្រាន់ ដោយមិនចំណាយប្រាក់។

លោក ឡេង ណាវ៉ាត្រា បានថ្លែងបញ្ជាក់ថា ក្នុងពេលដ៍ខ្លីនេះ ក្រៅពីធ្វើឱ្យផលិតកម្ម Galaxy ដំណើរការឡើងវិញលោកនឹងសម្រេចបោះទុនក្នុងគម្រោងសាងសង់អគារសិក្សាភាសាកូរ៉េចំនួន1 ក្នុងចំណោម3កន្លែងដែលគ្រោងសាងសង់ ឬ អាចសង់ទាំង3កន្លែងតែម្ដង ជូនដល់អ្នកចង់សិក្សាកូរ៉េ ដែលចង់ស្វែងរកការងារនៅក្នុងប្រទេសកូរ៉េ និងនៅក្នុងស្រុកថែមទៀត ដើម្បីឱ្យលោកបានរួមចំណែកលើកស្ទួយទាំងក្នុងវិស័យសិល្បៈ និងលើកស្ទួយធនធានមនុស្សឱ្យបានទន្ទឹមគ្នា។ លោកនឹងកំណត់យកទីតាំង3ក្នុងការសាងសង់សាលាភាសាកូរ៉េនោះ ដោយទី1នឹងសង់នៅខេត្តព្រះសីហនុ ទី2នៅជាយរាជធានីភ្នំពេញ និងទី3នៅក្នុងតំបន់ប៉ោយប៉ែត ព្រំប្រទល់ខ្មែរថៃ ដោយគ្រោងប្រើថវិកាប្រហាក់ប្រហែល1លានដុល្លារ និងគ្រោងសាងសង់ឆាប់ៗ។

លោកបន្ដថា ហេតុផលដែលលោកសម្រេចចិត្តចំណាយទុន លើគម្រោងបង្កើតសាលាកូរ៉េ គឺដោយសារតែលោកយល់ថាតម្រូវការភាសាកូរ៉េមានភាពចាំបាច់ចំពោះពលរដ្ឋ ហើយតម្រូវការពលករពីកម្ពុជាទៅធ្វើការនៅក្នុងប្រទេសកូរ៉េក៏នៅមានច្រើន ដែលចាំបាច់ឱ្យលោកដែលជាអតីតពលករនៅក្នុងប្រទេសកូរ៉េ ដែលបានមានឱកាសបានទទួលការសិក្សានាពេលនោះទាំងលំបាក គួរតែងាកមកយកចិត្តទុកដាក់ដល់ចំណុចនេះ ក្រោយពេលជោគជ័យ។

លោកថា សាលាដែលគ្រោងបង្កើតនោះ មិនត្រឹមតែបង្កើតតែអាគារ និងបំពាក់គ្រឿងបរិក្ខាពេញលក្ខណៈជាសាលាប៉ុណ្ណោះទេ សូម្បីតែគ្រូដែលមកសិក្សាក៏លោកនឹងរ៉ាប់រងលើការចំណាយទាំងស្រុង ដែលមានន័យថា កូនសិស្សដែលចុះឈ្មោះសិក្សានឹងមិនខ្វល់លើការចំណាយសូម្បីមួយសេនតាំងពីដើមរហូតដល់ចប់។ លោកក៏នឹងសង់អគារសម្រាប់អ្នកខេត្តស្នាក់នៅ រហូតដល់សិស្សទាំងនោះទទួលបានជំនាញអាចធ្វើការបានផងដែរ៕

February 27, 2019

Category: សង្គម និងសេដ្ឋកិច្ច