សង្គម និងសេដ្ឋកិច្ច - La Reine Media

Tiger Street Football Festival 2019 នៅមណ្ឌលខេត្តកណ្តាលរើសជើងខ្លាំង៤ក្រុមឡើងទៅភ្នំពេញ

ខេត្តកណ្តាល ៖ នារសៀលថ្ងៃទី២ ខែ មីនា ឆ្នាំ២០១៩ ក្រុមការងារ Tiger Street Football Festival 2019 បានធ្វើ សន្និសីទសារព័ត៌មានប្រកាសជាផ្លូវការនៃការប្រកួត Tiger Street Football Festival 2019 នៅសណ្ឋាគារ តាខ្មៅហ្គូដហ៊ែល ចំពោះការប្រកួតផ្លូវការប្រព្រឹត្តនាព្រឹកថ្ងៃទី៣ ខែកុម្ភៈ ឆ្នាំ២០១៩ នៅសួនច្បារមាត់ទន្លេ ច្រមុះជ្រូក ក្រុងតាខ្មៅ ខេត្តកណ្តាល។

លោកស្រី ថោង បវរលក្ខិណា តំណាងឲ្យក្រមហ៊ុនស្រាបៀរ Tiger (CBL) បានមានប្រសាសន៍ថា ក្រុមហ៊ុន ស្រាបៀរថៃហ្គ័របានសហការជាមួយសហព័ន្ធបាល់ទាត់កម្ពុជាក្នុងការបង្កើតព្រឹត្តិការណ៍ប្រកួតបាល់ទាត់ Tiger Street Football Festival ២០១៩ ដើម្បីឲ្យបងៗប្អូនៗជាកីឡាករចេះធ្វើការជាក្រុម ចេះសាមគ្គីភាពគ្នាក្នុងការប្រកួត ឲ្យទទួលជ័យជម្នះលើកគូប្រកួត។ហើយអ្វីដែលកាន់តែពិសេសក្នុងឆ្នាំនេះយើងបានបង្កើនមណ្ឌលប្រកួតដល់៩ទីតាំង និងប្រាក់រង្វាន់សរុបទូទាំងប្រទេសកាន់តែធំអស្ចារ្យរហូតដល់៥០,០០០ដុល្លារ។

លោកស្រីបាននិយាយលើកទឹកចិត្តដល់ក្រុមកីឡាករទាំងអស់ត្រូវខិតខំលេងឲ្យអស់ពីកម្លាំងកាយចិត្តតែត្រូវចេះអត់ឱនអធ្យាស្រ័យឲ្យគ្នាទៅវិញទៅមកជាពិសេសត្រូវខិតខំដើម្បីដណ្តើមយកពានទូទាំងប្រទេសយកមកទឹក ដីខេត្តកណ្តាល។ការប្រកួតមណ្ឌលខេត្តកណ្តាលដោយមានការចូលរួមក្រុម ៤៦ ខណៈមណ្ឌលនេះយក៤ក្រុម ដើម្បីឡើងទៅវគ្គផ្តាច់ព្រ័ត្រ នៅរាជធានីភ្នំពេញថ្ងៃទី១៦ និងទី១៧ មីនា ២០១៩ ខាងមុខនេះជាពិសេស មានឱកាសជួបផ្ទាល់ជាមួយកំពូលតារាបាល់ទាត់ពិភពលោក គឺកីឡាករបាល់ទាត់ Ronaldinho។

ចំណែកមណ្ឌលខេត្តព្រះសីហនុ ជ្រើសរើសក្រុមខ្លាំងចំនួន៦ក្រុម មណ្ឌលខេត្តតាកែវយក៤ក្រុម មណ្ឌលខេត្ត កំពង់ស្ពឺយក៤ក្រុម មណ្ឌលបាត់ដំបងយក៩ក្រុម មណ្ឌលក្រុងប៉ោយប៉ែត យក៦ក្រុម មណ្ឌលខេត្តសៀមរាប យក១២ក្រុម ខេត្តកំពង់ចាមយក៧ក្រុម មណ្ឌលខេត្តកណ្តាល៤ក្រុម និងមណ្ឌលរាជធានីភ្នំពេញ ១២ក្រុមរួចហើយ ក្រុមខ្លាំងទាំង៩មណ្ឌល ដែលមាន៦៤ក្រុម និងធ្វើការប្រកួតផ្តាច់ព្រ័ត្រ នៅថ្ងៃទី១៦ដល់១៧ ខែមករា ឆ្នាំ២០១៩ ស្វែងរកជើងឯកតែម្តង។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
ពិសាដោយការទទួលខុសត្រូវ៕

March 4, 2019

រកឃើញម្ចាស់មកុដកញ្ញាឯកភពផែនដីអន្តរជាតិ Miss Planet International

បេក្ខនារីមកពីលើពិភពលោកជាង40ប្រទេសបានមកប្រកួតសម្រស់ និងសមត្ថភាពគ្នាក្នុងកម្មវិធី ប្រកួតកញ្ញាឯកភពផែនដីអន្តរជាតិ ឬ Miss Planet International រដូវកាលទី១ ដោយបេក្ខនារីកម្ពុជា បើទោះមិនបានជាប់ក្នុងជម្រើស6នាក់ តែក៏បានឈ្នះតំណែងជាបេក្ខនារី ដែលគ្រងឈុតប្រចាំជាតិបានលេចធ្លោជាងគេ។

បេក្ខនារីដែលទទួលបានចំណាត់ថ្នាក់លេខ1 នាយប់នោះបានលើ បេក្ខនារីមកពីប្រទេសអាហ្វ្រិកខាងត្បូង លេខ2បានលើថៃ និង លេខ3បានលើម៉ាឡេស៊ី។ ការប្រកួតនៅក្នុងយប់នោះ គេតម្រូវឱ្យបេក្ខនារីតំណាងប្រទេសនីមួយៗ ប្រកួតគ្នា4វគ្គ គឺវគ្គប្រកួតឈុតតំណាងជាតិ ប្រកួតឈុតហែលទឹក ប្រកួតឈុតរាត្រីសមោស និងប្រកួតឈុតបែបខ្មែរ អមដោយការសួរសំនួរ ដើម្បីស្វែងរកម្ចាស់ពាន។

ការប្រលងដ៏អស្ចារ្យនេះ បានបន្សល់នូវទិដ្ឋភាពរស់រវើកជាច្រើនក្រោយពេលប្រកាសមកុដ ខណៈដែលក្រោយប្រកួតចប់ ក៏ធ្វើឱ្យលើកមុខលើកមាត់របស់ប្រទេសកម្ពុជាផងដែរ ជាពិសេសនៅពេលឈុតតំណាងជាតិរបស់ខ្មែរ ស្រាប់តែវាយបំបាក់ស្នាដៃរបស់បរទេសបាននោះ។ សូមទស្សនារូបភាពការប្រកួតMiss Planet International ខាងក្រោមនេះ៖

March 2, 2019

សាទរកម្ពុជា ឈ្នះឈុតតំណាងជាតិ ក្នុងកម្មវិធី Miss Planet International

នៅរាត្រីថ្ងៃទី01 ខែ មីនា ឆ្នាំ 2019 ប្រទេសកម្ពុជា បានធ្វើជាម្ចាស់ផ្ទះរៀបចំការប្រកួតកញ្ញាឯកភពផែនដីអន្តរជាតិ ឬ Miss Planet International រដូវកាលទី១ នៅលើពិភពលោក ដោយព្រឹត្តិការណ៍បានធ្វើឱ្យមានការចាប់អារម្មណ៍យ៉ាងខ្លាំងទាំងនៅសាលមហោស្រពកោះពេជ្រ និងតាមការផ្សាយបន្តផ្ទាល់។

បេក្ខនារីមកពីលើពិភពលោកជាង40ប្រទេសបានមកប្រកួតសម្រស់ និងសមត្ថភាពគ្នា ដោយបេក្ខនារីកម្ពុជា បើទោះមិនបានជាប់ក្នុងជម្រើស6នាក់ តែក៏បានឈ្នះតំណែងជាបេក្ខនារីដែលគ្រងឈុតប្រចាំជាតិបានលេចធ្លោជាងគេ។

ក្នុងចំណោមការប្រកួតកញ្ញាឯកអន្តរជាតិ គឺមានតែឈុតប្រពៃណីប្រចាំជាតិប៉ុណ្ណោះ ដែលត្រូវបានគេតាមដានថា តើបេក្ខភាពមកពីប្រទេសណា ដែលឈ្នះតំណែងជាបេក្ខនារីមានឈុតប្រចាំជាតិអស្ចារ្យជាងគេ។ អ៊ីចឹងហើយទើបការប្រកួត Miss Planet International យប់មិញនេះ បានធ្វើឱ្យម្នាក់ៗភ្ញាក់ផ្អើលយ៉ាងខ្លាំង ដោតសារតែឈុតប្រចាំជាតិរបស់ខ្មែរ បានគ្រងតំណែងជាឈុតល្អផ្ដាច់គេ ខណៈដែលឈុតមួយនេះ នៅពេលស្លៀកបង្ហាញ គឺបេក្ខនារីរបស់ខ្មែរពិតជាលេចធ្លោរនាំមុខបណ្ដាឈុតដ៏អស្ចារ្យៗរបស់បណ្ដាប្រទេសដទៃមែន។

ជ័យលាភីឈុតដែលឈ្នះតំណែងជាឈុតប្រចាំជាតិអស្ខារ្យជាងគេនេះ ជាឈុតដែលច្នៃដោយកញ្ញា រំដួលលិចទឹក និងជាឈុតដែលតំណាងឱ្យទេពធីតាមហាសង្ក្រាន ដែលជាទេវតាក្នុងជំនឿរបស់ខ្មែរ។ មួយឈុតនេះនៅពេលថតបង្ហោះមុនពេលចូលប្រកួត ហាក់មិនសូវមានការចាប់អារម្មណ៍នោះទេ ប៉ុន្តែនៅដើរសម្ញែងជាមួយបណ្ដាបេក្ខនារីផ្សេងទៀតនៅលើឆាក Miss Planet International ក្នុងវគ្គប្រកួតឈុតតំណាងជាតិ ។ ឈុតនេះ ត្រូវបានបង្ហាញខ្លួនដោយ កញ្ញា រីចំណាន កល្យាណ មានទម្ងន់ជាង10គីឡូក្រាមនេះ បានសមឥតខ្ចោះ ដែលបានច្នៃដោយវត្ថុធាតុដើមមានតម្លៃដល់ម៉ឺនដុល្លារ ដូចឈុតខ្លះរបស់បេក្ខនារីមួយចំនួន៕

March 2, 2019

សារព័ត៌មានធំៗលើពិភពលោកកំពុងផ្សព្វផ្សាយពីហ្គេម Momo Challenge ដែលណែនាំឱ្យក្មេងសម្លាប់ខ្លួន និងអ្នកក្នុងផ្ទះ តាមវីដេអូ

នៅពេលថ្មីៗនេះ សារព័ត៌មានធំៗទាំងអស់លើពិភពលោកកំពុងចេញផ្សាយព័ត៌មានព្រមៗគ្នាអំពីបញ្ហាក្តៅមួយដែលអាណាព្យាបាលនៅក្នុងប្រទេសជាច្រើនលើពិភពលោកកំពុងព្រួយបារម្ភ គឺកម្មវិធី Momo Challenge ដែលជាវីដេអូណែនាំឱ្យក្មេងតូចៗសម្លាប់ខ្លួន ឬណែនាំឱ្យពួកគេសម្លាប់បងប្អូន និងគ្រួសារជាដើម។

សារព័ត៌មានអន្តរជាតិធំៗបញ្ជាក់ថា វីដេអូរបស់ Momo challenge នេះភាគច្រើនចេញពីក្នុងវីដេអូតុក្កតាល្បីៗនៅក្នុងបណ្តាញសង្គមដូចជា Youtube, WhatsApp និងបណ្តាញផ្សេងទៀត។ វាចេញមកនៅពាក់កណ្តាលវីដេអូតុក្កតា ឬវីដេអូដែលកុមារចូលចិត្ត ហើយបំភ័យកុមារឱ្យចូលរួមតាមការណែនាំបើមិនដូច្នោះទេ Momoដែលភាគច្រើនជារូបភាពគួរឱ្យខ្លាចនោះ នឹងមកសម្លាប់ពួកគេនៅពេលយប់។ ក្រោយពេលក្មេងតូចៗភ័យ និងជឿលើវីដេអូបំភ័យនោះហើយ ពួកគេមានវីដេអូណែនាំបន្ថែមឱ្យក្មេងតូចៗយកកាំបិត ឬរបស់មុតស្រួចមកចាក់ខ្លួនឯង និងចាក់សមាជិកគ្រួសារជាដើម។

កម្មវិធីប្រភេទនេះ កាលពីពេលមុនៗត្រូវបានគេចែកចាយម្តងរួចមកហើយ ដែលបានធ្វើឱ្យអាណាព្យាបាលព្រួយបារម្ភ តែកាលនោះបានប្រើប្រាស់ឈ្មោះផ្សេងគ្នា។ នៅឆ្នាំនេះ Momoបានចេញមកជាថ្មីដើម្បីបំភ័យ និងលុកលុយយកព័ត៌មានសំខាន់ៗជាច្រើនពីគ្រួសាររបស់ក្មេងតូចៗដែលនៅស្និទ្ធជាមួយបណ្តាញសង្គម និងឧបករណ៍អេឡិចត្រូនិក។

ថ្មីៗនេះសារព័ត៌មានធំៗលើពិភពលោក ដូចជា The Gauardian, CNN, BBC, ABC បានផ្សព្វផ្សាយដំណាលៗគ្នាអំពីក្តីកង្វល់របស់អាណាព្យាបាល អំពីវិធីសាស្ត្រការពាររបស់អាណាព្យាបាល និងក្រុមគ្រួសារ តែស្របពេលជាមួយគ្នានេះសារព័ត៌មានខ្លះក៏បញ្ជាក់ថានេះជាព័ត៌មានមិនច្បាស់លាស់ព្រោះគ្មានសញ្ញាណណាមួយបញ្ជាក់ថាក្មេងទទួលបានសារពី កម្មវិធីដែលណែនាំក្មេងឱ្យធ្វើអត្តឃាត Momo Challenge game នេះ តែក៏សូមឱ្យមានការប្រុងប្រយ័ត្នឱ្យបានខ្ពស់។

ក្នុងនោះសារព័ត៌មាន ABC បានផ្សាយថានេះជាព័ត៌មានមិនច្បាស់ការ តែក៏បានធ្វើការណែនាំឱ្យអាណាព្យាបាលត្រូវប្រុងប្រយ័ត្នចំពោះកុមារតូចៗកុំឱ្យប្រើប្រាស់ ឬកំណត់ពេលសម្រាប់តាមដាន និងប្រើប្រាស់បណ្តាញសង្គមឱ្យបានត្រឹមត្រូវ ហើយឃាត់មិនឱ្យកូនតូចៗមើលវីដេអូតែម្នាក់ឯងដើម្បីចៀសវាងគ្រោះថ្នាក់។

ចំពោះ CNN វិញ ក៏បានដកស្រង់ការណែនាំរបស់ទីភ្នាក់ងារសន្តិសុខអនឡាញ ដែលបានណែនាំអាណាព្យាបាលឱ្យស្គាល់ និងធ្វើកំណត់ចំណាំឱ្យបានច្បាស់ពីអ្វីដែលជា Momo Challenge ដែលបានបំភ័យសិស្សសាលា និងអាណាព្យាបាលរាប់រយនាក់ឱ្យប្រុងប្រយ័ត្ន ហើយ Report និង Block គណនីទាំងឡាយណាដែលបានបង្ហាញពីវីដេអូ Momo Challenge ដល់ក្មេងៗ ដើម្បីចូលរួមទប់ស្កាត់។

ចំណែកឯ BBC និងសារព័ត៌មានធំៗមួយចំនួនទៀតបានបញ្ជាក់ថានេះជាព័ត៌មានមិនពិតតែក៏បានណែនាំឱ្យអាណាព្យាបាលត្រូវបង្រៀនកុមារតូចៗឱ្យយល់ច្បាស់ពីចំណេះដឹងផ្នែកសុវត្ថិភាពលើបណ្តាញអនឡាញ ដើម្បីការពារខ្លួនពីគ្រប់សកម្មភាពមិនល្អទាំងអស់របស់ក្រុម Hacker ក្រៅពី Momo Challenge ផងដែរ៕

March 1, 2019

YouTube ប្រើបច្ចេកវិទ្យាពិសេស បិទមិនឱ្យក្មេងៗ comment បាន

YouTube បានដាក់បច្ចេកវិទ្យា AI comment filtering ដែលមានសមត្ថភាពអាចបិទ comment ក្មេងៗបានដោយស្វ័យប្រវត្តិនៅលើវីដេអូ។

យ៉ាងតិចណាស់ក៏មាន 10លានcomment ដែរនៅលើវីដេអូឃ្លីបរបស់ YouTube ដែលត្រូវបានបិទមិនឱ្យឃើញកាលពីសប្តាហ៍មុន។ ការធ្វើបែបនេះ ព្រោះតែ YouTube ចង់ឱ្យកុមារទទួលបានចំណេះដឹងពីការមើលវីដេអូ មិនមែនជាការបញ្ចេញមតិមិនល្អ ពាក្យអសុរោះប៉ះពាល់ដល់ឥរិយាបថរបស់ពួកគេនោះទេ។

បច្ចេកវិទ្យា AI នឹងធ្វើការគណនាចាត់ចំណាត់ថ្នាក់យ៉ាងល្អិតល្អន់លើគណនីអ្នកចូល comment។ តែយ៉ាងណាក្ដី ចំណាត់ការនេះធ្វើឱ្យ YouTube កំពុងប៉ះពាល់ទៅដល់ហ្គេមដ៏ល្បីមួយគឺ Epic Game (Fornite,...) និងពាណិជ្ជកម្មដែលដាក់លើសេវាកម្មរបស់ខ្លួនដូចជាក្រុមហ៊ុន Disney និងក្រុមហ៊ុនដទៃទៀត៕

March 1, 2019

ការលើកទឹកចិត្តផ្នែកពន្ធដារក្នុងវិស័យមូលបត្រ ជាកាតាលីករជំរុញការអភិវឌ្ឍសេដ្ឋកិច្ចជាតិ

ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា The Cambodia Securities Exchange (CSX)បានមានប្រសាសន៍ថា អនុលោមតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ2016-2025 របស់រាជរដ្ឋាភិបាលកម្ពុជា ដែលក្នុងនោះវិស័យមូលបត្រជាចលករមួយក្នុងចំណោមចលករសំខាន់ៗទាំងឡាយសម្រាប់បង្កើនល្បឿនសេដ្ឋកិច្ចជាតិ។

ដូច្នេះការលើកទឹកចិត្តផ្នែកពន្ធដារក្នុងវិស័យមូលបត្រ និងបទប្បញ្ញត្តិថ្មីៗក្នុងវិស័យមូលបត្រ ជាបទដ្ឋានក្នុងការធ្វើឱ្យប្រសើរឡើងចំពោះការលើកទឹកចិត្ត ការចូលរួមនៅក្នុងទីផ្សារមូលធនសម្រាប់ក្រុមហ៊ុន/សហគ្រាសដែលមានសក្តានុពល ក៏ដូចជាវិនិយោគិនសាធារណៈ ជាកត្តាចាំបាច់មិនអាចខ្វះបានសម្រាប់អភិវឌ្ឍវិស័យមូលបត្ររបស់ព្រះរាជាណាចក្រកម្ពុជា។

ឯកឧត្តមអគ្គនាយកបានបញ្ជាក់ថា៖ បច្ចុប្បន្ននេះ ក្រុមហ៊ុនដែលបានចុះបញ្ជីក្នុងផ្សារមូលបត្រកម្ពុជា មានក្រុមហ៊ុន/សហគ្រាស ចំនួន5 (ប្រាំ)រួមនឹងបុគ្គលចុះបញ្ជីលក់មូលបត្រកម្មសិទ្ធិចំនួន1(មួយ)គឺទី1 រដ្ឋាករទឹកស្វយ័តក្រុងភ្នំពេញ(PWSA) ទី2 ក្រុមហ៊ុនហ្គ្រេនធ្វីន អុីនធើណេសិនណល(ខេមបូឌា)ភីអិលស៊ី(GTI) ទី3 កំពង់ផែស្វយ័តភ្នំពេញ (PPAP) ទី4 ភ្នំពេញអេសអុីហ្សិត ភីអិលស៊ី(PPSP) និងទី5 កំពង់ផែស្វយ័តក្រុងព្រះសីហនុ (PAS)។ ចំណែកបុគ្គលចុះបញ្ជីលក់មូលបត្របំណុលចំនួន1 គឺគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីតដែលទើបតែចុះបញ្ជីនៅផ្សារមូលបត្រកម្ពុជា (ផ.ម.ក)កាលពីថ្ងៃ5 ខែធ្នូ ឆ្នាំ2018 កន្លងទៅ។ គិតត្រឹមដំណាច់ឆ្នាំ2018 ទំហំជួញដូរសរុបមានចំនួន 3,781,231ភាគហ៊ុនប្រហែល នឹង 25 ពាន់លានរៀល(ប្រហែលជាង 6លានដុល្លារ និងមានមូលធនីយកម្មទីផ្សារចំនួន 1,771,678លានរៀល(ប្រហែល443ដុល្លារ)ហើយគណៈកម្មការមូលបត្រកម្ពុជាបានផ្តល់អត្តសញ្ញាណវិនិយោគិន ដល់អ្នកវិនិយោគបានចំនួន 20,549នាក់ (17,300នាក់ជាសញ្ជាតិខ្មែរ)។

ដោយឡែកគិតត្រឹមថ្ងៃទី8 ខែកុម្ភៈ ឆ្នាំ2019 ទំហំជួញដូរសរុបមានចំនួន 755,568ភាគហ៊ុន សើ្មនឹង 5ពាន់លានរៀល (ប្រហែលជាង 1លានដុល្លារ) និងមានមូលធនីយកម្មទីផ្សារចំនួន 2,297,853លានរៀល (574.46លានដុល្លារ) ហើយគណៈកម្មការមូលបត្រកម្ពុជា បានផ្តល់អត្តសញ្ញាណវិនិយោគិនដល់អ្នកវិនិយោគចំនួន 20,750នាក់។

នាពេលថ្មីៗនេះ រាជរដ្ឋាភិបាលបានចេញអនុក្រឹត្យស្តីពីការលើកទឹកចិត្តផ្នែកពន្ធដារក្នុងវិស័យ មូលបត្រដែលក្នុងអនុក្រឹត្យនោះមានគោលបំណងលើកទឹកចិត្តដល់ក្រុមហ៊ុន/សហគ្រាស បោះផ្សាយ មូល-បត្រកម្មសិទ្ធិ និង/ឬ មូលបត្របំណុលលើកដំបូងជាសាធារណៈ ដែលបានទទួលការអនុញ្ញាតពីគណៈកម្មការមូលបត្រកម្ពុជា និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត និងលើកទឹកចិត្តដល់វិនិយោគិនសាធារដែលកាន់កាប់ាប់ និង/ឬ ទិញ-លក់មូលបត្ររដ្ឋ មូលបត្រកម្មសិទ្ធិ និង/ឬ មូលបត្របំណុល ដែលបានបោះផ្សាយលក់ជាសាធារណៈ និងបានចុះបញ្ជីជួញដូរមូលបត្រនៅទីផ្សារមូលបត្រ ។

លោក អ៊ុន សុធន តំណាងក្រុមហ៊ុនមកពីខេត្តព្រៃវែងបានមានចំណាប់អារម្មណ៍ថា៖ “ទី1- រដ្ឋាភិបាលមានការលើកទឹកចិត្តពន្ធរយៈពេល 3ឆ្នាំ ; ដូច្នេះបើមានការអនុគ្រោះផ្សេងៗទៀត ជាការល្អ ហើយខ្ញុំត្រូវការការគាំទ្រឱ្យខ្លាំងក្លាពីរដ្ឋាភិបាល ប្រសិនបើរដ្ឋាភិបាលអាចសម្រេចបាន។ ទី2- ក្រុមហ៊ុនដែលមានសក្តានុពលមកចុះបញ្ជី គាត់មើលឃើញអត្ថប្រយោជន៍នៃការមិនយកពន្ធ គាត់នឹងព្យាយាមពង្រីកវិស័យហិរញ្ញវត្ថុរបស់គាត់ ដោយងាកមកលើទីផ្សារមូលបត្រឱ្យបានច្រើន។ ទី3-នៅពេលណាដែលស្រុកយើងមានក្រុមហ៊ុនចុះបញ្ជីនៅក្នុងផ្សាររបស់យើងច្រើន ប្រជាពលររដ្ឋរបស់យើងមានឱកាសក្នុងការវិនិយោគ ការលេងភាគហ៊ុនក្នុងទីផ្សារមូលបត្រ គ្រប់វិស័យណាដែលគាត់ចូលរួមទិញភាគហ៊ុន”។

លោក សុធន បានបន្ថែមថា៖ “ដូច្នេះចំណុចនេះធ្វើឱ្យពលរដ្ឋកម្ពុជាងាកមកមើលវិស័យមូលបត្រហើយគាត់នឹងធ្វើការវិនិយោគ ទៅតាមវិស័យដែលគាត់ប្រកបអាជីវកម្មបច្ចុប្បន្ន។ ជីវភាពគាត់នឹងកើន ឡើងបន្តិចម្តងៗ ព្រោះគាត់មានប្រាក់តិចតួចមែនតែគាត់មានឱកាសវិនិយោគ គាត់មិនបានទុកលុយចោលក្នុងផ្ទះទេ នេះគឺជាចំណុចល្អរបស់រាជរដ្ឋាភិបាលកម្ពុជាក្នុងការលើកទឹកចិត្តផ្សារមូលបត្រកម្ពុជា”។

លោក យុន សុវណ្ណា នាយកប្រតិបត្តិនៃសមាគមគ្រឹះស្ថានមីក្រូហិរញ្ញវត្ថុ បានបង្ហាញចំណាប់អារម្មណ៍ដល់កាសែត ឡារ៉ែនពាណិជ្ជថា នេះជាការជំរុញវិស័យឯកជនយើងឱ្យចូលរួមកាន់តែសកម្មនៅក្នុងទីផ្សារ គឺដើម្បី ទី1-ទាញយកផលប្រយោជន៍ពីទីផ្សារបំណុល និងទីផ្សារមូលបត្រកម្ពុជា ដើម្បីពង្រឹងកិច្ចសហប្រតិបត្តិការរបស់ខ្លួន ពង្រីកអាជីវកម្ម។ ទី2-ដើម្បីពង្រឹងប្រព័ន្ធហិរញ្ញវត្ថុរបស់យើងឱ្យកាន់តែរឹងមាំនិងមានភាពទូលំទូលាយ ដោយយើងឃើញថា បច្ចុប្បន្នមានតែស្ថាប័នធនាគារប៉ុណ្ណោះដែលសកម្ម។

លោកបានបន្ដថា៖ ការមានការចូលរួមច្រើនពិវិស័យឯកជននៅក្នុងទីផ្សារមូលបត្រ និងការលក់មូលបត្របំណុល គឺជាការចាប់អារម្មណ៍ពីការលើកទឹកចិត្ត ការផ្តល់ជូនសម្រាប់គ្រឹះស្ថាន និងក្រុមហ៊ុននានាដែលបានចូលរួមក្នងការបោះផ្សាយសញ្ញាណប័ណ្ណ ឬមូលបត្របំណុល។

លោក សុវណ្ណា បានបញ្ជាក់ដែរថា៖ “ការចូលរួមរបស់គ្រឹះស្ថានមីក្រូហិរញ្ញវត្ថុនៅក្នុងវិស័យផ្សារមូលបត្រនេះ វាអាស្រ័យលើមូលនិធិ(ថ្លៃដើម)ពោលសម្រាប់វិស័យមីក្រូហិរញ្ញវត្ថុរបស់យើង នៅមានចំណុចខ្ពស់ បើប្រៀបធៀបទៅនឹងប្រទេសនានាផ្សេងទៀត(ដោយមិនគិតដល់ប្រទេសអភិវឌ្ឍន៍ទេ)ដោយថ្លៃដើមរបស់យើងមានតម្លៃ 8% ទៅ11% និងប្រែប្រួលអាស្រ័យលើប្រាក់ដុល្លារ និងប្រាក់រៀល។ ដូច្នេះការចូលរួមរបស់វិស័យមីក្រូហិរញ្ញវត្ថុ(ដែលជាស្ថាប័នស្ថិតក្រោមអាណាព្យាបាលរបស់ធនាគារ)ទៅក្នុងទីផ្សារមូលបត្រ ជាឆន្ទៈ យើងគិតថា ធនាគារ និងគ្រឹះស្ថានហិរញ្ញវត្ថុនៅមានច្បាប់ បទប្បញ្ញត្តិ ប្រទាក់ក្រឡាគ្នាដែលតម្រូវឱ្យមានការជជែកគ្នាច្រើនទៀត”។

លោកនាយកប្រតិបត្តិបានបញ្ជាក់ទៀតថា៖“ប៉ុន្តែកត្តាដែលជំរុញខ្លាំងសម្រាប់វិស័យមីក្រូហិរញ្ញវត្ថុឱ្យចូលរួម គឺការទាក់ទាញ និងការមើលឃើញគឺគ្រឹះស្ថានមីក្រូហិរញ្ញវត្ថុហត្ថាកសិករលីមីតធីត ដែលទើបតែចុះបញ្ជីនៅផ្សារមូលបត្រកម្ពុជាកាលពីថ្ងៃ5 ខែធ្នូ ឆ្នាំ2018 ថ្មីៗនេះ បានក្លាយជាបុគ្គលលក់មូលបត្របំណុលលើផ្សារមូលបត្រកម្ពុជា។ ដូច្នេះគ្រឹះស្ថានមីក្រូហិរញ្ញវត្ថុដទៃទៀតក៏នឹងពិចារណាសិក្សាអំពីតម្រូវការ និងស្វែងរកនីតិវិធី ដើម្បីឈានដល់ការចូលរួមក្នុងទីផ្សារមូលបត្រនេះ”។

ជាមួយគ្នានេះដែរ CSX បានឱ្យដឹងថា ក្រុមហ៊ុនចុះបញ្ជីជាសាធារណៈទាំងអស់បានបង្ហាញពីការអនុវត្តអាជីវកម្មដ៏រឹងមាំក្នុងឆ្នាំ2018។ មូលធនបត្រទីផ្សារសរុប បានកើនឡើង 86,2% ពី 303,8លានដុល្លារកាលពីថ្ងៃទី2 ខែមករា ឆ្នាំ2018 ដល់ 565,6លានដុល្លារនៅថ្ងៃទី7 ខែកុម្ភៈ ឆ្នាំនេះ។

តម្លៃភាគហ៊ុននៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ បានកើនឡើងយ៉ាងខ្លាំង ជាពិសេសគឺ កើនឡើង 96,5% និង161,4 %។តម្លៃភាគហ៊ុននៅរដ្ឋាករទឹកស្វយ័តក្រុងភ្នំពេញបានកើនឡើងជាង59% ខណៈតំបន់សេដ្ឋកិច្ច ពិសេស Grand Twins និងតំបន់សេដ្ឋកិច្ចពិសេសភ្នំពេញមានកំណើនតិចតួចជាមួយតម្លៃភាគហ៊ុនកើន ឡើង 5,1% និង14,8 %។ បើតាម CSX បានឱ្យដឹងទៀតថា ជាមធ្យមតម្លៃភាគហ៊ុនបានកើនឡើង 66% ។

តម្លៃភាគហ៊ុនឆ្លុះបញ្ចាំងពីតម្លៃរបស់ក្រុមហ៊ុន ហើយតម្លៃនេះជួយបង្កើនស្ថានភាព និងកិត្តិនាមរបស់ក្រុមហ៊ុននៅក្នុងឧស្សាហកម្មមូលបត្រ។ ដោយសារតែតម្លៃរបស់វាបន្តកើនឡើង ក្រុមហ៊ុនមួយអាចបង្កើនប្រាក់ចំណូលកាន់តែច្រើន ពេលដែលការផ្តល់ភាគហ៊ុនកាន់តែតិច។

ទីផ្សារមូលបត្រ គឺជាប្រភពដ៏ល្អបំផុតនៃការផ្តល់មូលនិធិសម្រាប់កំណើនរយៈពេលវែងសម្រាប់ក្រុមហ៊ុនភាគច្រើន។ មិនដូចការខ្ចីប្រាក់ជាមួយស្ថាប័នហិរញ្ញវត្ថុទេ ការចូលរួមក្នុងផ្សារហ៊ុន មិនតម្រូវឱ្យមានការបង់ប្រាក់តាមកាលកំណត់ ការធានា ឬកាតព្វកិច្ចណាមួយឡើយ។ លោក សុវណ្ណា បន្តថា“អ្វីដែលសំខាន់បំផុតនោះ គឺក្រុមហ៊ុនដែលទើបបានចុះបញ្ជីថ្មី អាចទទួលបានការលើកទឹកចិត្តពន្ធរយៈពេល3ឆ្នាំ នេះបើយោងតាមអនុក្រឹត្យស្ដីពីការលើកទឹកចិត្តពន្ធសម្រាប់វិស័យមូលបត្រ ដែលមានប្រសិទ្ធភាពចាប់ពីថ្ងៃទី4 ខែមករា ឆ្នាំ2019 រហូតមក”។ជារួម វិស័យមូលបត្រជាកាតាលីករដ៏សំខាន់មួយក្នុងការជំរុញឱ្យសេដ្ឋកិច្ចជាតិអភិវឌ្ឍបាន លឿនដូច្នេះការចូលរួមពីក្រុមហ៊ុន/សហគ្រាសសក្តានុពល ក៏ដូចជាវិនិយោគិនសាធារណៈ ជាកត្តាចាំបាច់ មិនអាចខ្វះបានសម្រាប់អភិវឌ្ឍវិស័យមូលបត្រនៅព្រះរាជាណាចក្រកម្ពុជា៕

March 1, 2019

លោក Ranieri ត្រូវបានបណ្តេញចេញពី Fulham ក្រោយពីដឹកនាំបាន 16ប្រកួត

លោក Claudio Ranieri ត្រូវបានបណ្តេញចេញដោយក្លិប Fulham ក្រោយពីប្រធានក្លិប និងអ្នកគាំទ្របានបាត់បង់ការជឿជាក់លើរូបលោក។ ចំណុចកាត់សេចក្តីចុងក្រោយសម្រាប់អ្នកចាត់ការទូទៅរូបនេះ បានកើតឡើងក្នុងការប្រកួតដើម្បីគេចឱ្យផុតពីតំបន់កាត់ចោលនៅលើទឹកដីក្រុម Southampton កាលពីថ្ងៃពុធ ដែលនៅពេលនោះពួកគេបានចាញ់ក្នុងលទ្ធផល 2-០ ហើយក្រុមអ្នកគាំទ្ររបស់ក្រុមភ្ញៀវបានស្រែកច្រៀងទៅកាន់លោក Ranieri ថា «អ្នកមិនដឹងពីអ្វីដែលអ្នកកំពុងតែធ្វើឡើយ»។

វាគឺជាការបរាជ័យលើកទី7 ក្នុងចំណោមការប្រកួត 8លើកនៃក្របខ័ណ្ឌ Premier League។ លោក Scott Parker គ្រូបង្វឹកបង្គោលក្រុមជម្រើសទី1 ត្រូវបានតែងតាំងឱ្យដឹកនាំក្នុងតួនាទីបណ្ដោះអាសន្ន។លោក Shahid Khan ម្ចាស់ក្លិប Fulham បានឱ្យដឹងថា៖ «លោក Claudio Ranieri បានយល់ស្របជាមួយនឹងការសម្រេចចិត្តរបស់ខ្ញុំថា ការផ្លាស់ប្តូរ គឺជាការផ្តល់ផលប្រយោជន៍ដ៏ល្អបំផុតសម្រាប់គ្រប់គ្នា។ វាគ្មានអ្វីដែលខ្ញុំត្រូវភ្ញាក់ផ្អើលឡើយ ខណៈដែលលោក Claudio គឺជាសរុបភាពបុរសម្នាក់។ គាត់មិនមែនជាមនុស្សតែម្នាក់ដែលត្រូវស្តីបន្ទោសចំពោះការដែលយើងកំពុងតែស្ថិតក្នុងចំណាត់ថ្នាក់មិនល្អនៅពេលនេះឡើយ»។

លោក Ranieri បានដឹកនាំក្នុងការប្រកួតក្របខ័ណ្ឌលីកត្រឹមតែ 16ប្រកួត ប៉ុន្តែបានទទួលជ័យជម្នះត្រឹមតែ 3ប្រកួតគត់ ហើយការរងបរាជ័យកាលពីថ្ងៃពុធក្រោមស្នាដៃក្រុម Southampton បានធ្វើឱ្យពួកគេស្ថិតក្នុងចំណាត់ថ្នាក់លេខ2 នៅបាតតារាង ដោយដេញតាមពីក្រោយក្រុមស្ថិតក្នុងតំបន់សុវត្ថិភាពដល់ទៅ 10ពិន្ទុ ខណៈដែលនៅសល់ការប្រកួតត្រឹមតែ 10លើកទៀតប៉ុណ្ណោះ៕

March 1, 2019

Federer ត្រូវការឈ្នះតែ 2លើកទៀតប៉ុណ្ណោះ ដើម្បីលើកពានទី100 ក្រោយទៅដល់វគ្គ1/2នៅឌូបៃ

កីឡាករវាយកូនបាល់ Roger Federer ត្រូវការជ័យជម្នះត្រឹមតែ 2លើកទៀតប៉ុណ្ណោះក្នុងការឈ្នះពានជាលើកទី100 ក្នុងអាជីពរបស់គេ កាលពីថ្ងៃព្រហស្បតិ៍ ក្រោយពីបានឆ្លងផុតការប្រកួតដ៏ស្វិតស្វាញមួយក្នុងលក្ខខណ្ឌដ៏លំបាកនៅពេលប្រកួតជាមួយនឹងកីឡាករ MartonFucsovics ដើម្បីឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Dubai Championships។

ម្ចាស់ជើងឯក 7សម័យកាលរូបនេះ បានផ្តួលគូប្រកួតសញ្ជាតិហុងគ្រីរបស់គេក្នុងលទ្ធផល 7-6 (8/6) និង6-4 ក្នុងលក្ខខណ្ឌដ៏លំបាក ដោយសារតែមានខ្យល់បក់ខ្លាំង និងការពន្យារពេលដោយសារតែភ្លៀង។ Federer បានឱ្យដឹងថា៖ «អ្នកត្រូវតែប្រកួតនៅទីនោះ និងប្រឹងឱ្យអស់ពីសមត្ថភាពរបស់អ្នក។ ពេលខ្លះ អ្នកទទួលបានពិន្ទុនាំមុខ ពេលខ្លះអ្នកមិនដណ្តើមបានពិន្ទុនាំមុខ។ វាពិតជាសំខាន់ណាស់ក្នុងការមិនចាញ់យ៉ាងឆាប់រហ័ស»។

កីឡាករសញ្ជាតិស្វ៊ីសរូបនេះបានប្រាប់បន្តទៀតថា៖ «វាជាការប្រកួតដ៏ស្វិតស្វាញមួយ។ ការពន្យារពេលដោយសារតែភ្លៀង 2លើក ជាពិសេស ខ្ញុំត្រូវវិលទៅប្រកួតភ្លាមៗ ដោយមិនមានពេលត្រៀមខ្លួនឱ្យបានល្អឡើយ»។ Federer បានបន្ថែមទៀតថា៖ «ថាមពលក្នុងរាងកាយ ការរំភើប បច្ចេកទេស សុទ្ធសឹងបានធ្លាក់ចុះដោយសារតែបញ្ហាពន្យារពេលដោយសារតែភ្លៀងធ្លាក់។ ខ្ញុំបានព្យាយាមធ្វើឱ្យបានល្អ ហើយការប្រកួតពិតជាស្វិតស្វាញមែន។ ខ្ញុំពិតជារីករាយណាស់ដែលខ្ញុំបានរកឃើញផ្លូវមួយក្នុងការឆ្លងផុតការប្រកួតនោះ។ វាជាការប្រកួតដ៏រំភើបមួយ»។

ម្ចាស់ជើងឯកពាន Grand Slam 20សម័យកាលរូបនេះ នឹងត្រូវជួបជាមួយនឹងកីឡាករ BornaCoric នៅជុំបន្ទាប់ ក្រោយពី Coric តារាឆ្នើមរបស់ក្រូអាស៊ីរូបនេះ បានផ្តួលកីឡាករ NikolozBasilashvili របស់ហ្ស៊កហ្ស៊ី ក្នុងលទ្ធផល 4-6 6-2 និង7-6 (7/1)៕

March 1, 2019

ខ្មែរ-ថៃចុះហត្ថលេខាលើអនុស្សរណៈនៃការយោគយល់លើវិស័យវប្បធម៌ របាំ តូរ្យតន្រ្តី និងវិចិត្រសិល្បៈ

តាមការបញ្ជាក់របស់ទំព័រក្រសួងវប្បធម៌និងវិចិត្រសិល្បៈ បានឱ្យដឹងថា នៅពេលថ្មីៗនេះ សាកលវិទ្យាល័យភូមិន្ទវិចិត្រសិល្បៈ និងវិទ្យាស្ថានបណ្ឌិតប៉ាតាណាសិល្បៈ (Bunditpatanasilpa Institute) នៃព្រះរាជាណាចក្រថៃ បានចុះហត្ថលេខាលើអនុស្សរណៈនៃការយោគយល់គ្នា ដោយផ្តោតលើវិស័យមួយចំនួនដូចជា ការផ្លាស់ប្តូរគ្នាទៅវិញទៅមកលើវិស័យវប្បធម៌ របាំ តូរ្យតន្រ្តី និងវិចិត្រសិល្បៈ ការបង្កើតពិព័រណ៍រួមគ្នា ការបង្កើតសិក្ខាសាលានិងសន្និសីទរួមគ្នា ការផ្លាស់ប្តូរនិស្សិតនិង សាស្ត្រាចារ្យ ការផ្លាស់ប្តូរគម្រោងស្រាវជ្រាវផេ្សងទៀត និងការផ្លាស់ប្តូរបទពិសោធន៍ផ្នែកបណ្ណាល័យ។

សូមជម្រាបថា ពិធីចុះហត្ថលេខានេះបានធ្វើឡើងក្រោមអធិបតីភាពឯកឧត្តម សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ តំណាងដ៏ខ្ពង់ខ្ពស់លោក ជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ឯកឧត្តម Panyarak Poolthup ឯកអគ្គរាជទូតព្រះរាជាណាចក្រថៃប្រចាំនៅព្រះរាជាណាចក្រកម្ពុជា លោកបណ្ឌិត ហេង សុផាឌី សាកលវិទ្យាធិការស្តីទី នៃសាកលវិទ្យាល័យភូមិន្ទវិចិត្រសិល្បៈ និងលោកស្រីសាស្ត្រាចារ្យ Nipha Sophasamrith នាយកវិទ្យាស្ថានបណ្ឌិតប៉ាតាណាសិល្បៈ៕

March 1, 2019

រឿង«ផ្កាយមារ» ភាពយន្ដភាគបុរាណខ្មែរសម័យលង្វែក ត្រៀមបញ្ចាំងក្នុងខែមីនា

ស្នាដៃថ្មីមួយទៀត«ផ្កាយមារ»ជាភាពយន្តខ្មែរត្រូវបានផលិតករនិងក្រុមការងារផ្នែកភាពយន្តនៅស៊ីធីអិនយកចិត្តទុកដាក់ខ្ពស់ដោយសង្ឃឹមមុតមាំថាពិតជារឿងភាគបែបរុរាណទាក់ទាញនៅដើមខែមីនានេះ។ រឿង«ផ្កាយមារ»ត្រូវបានផលិតករលើកឡើងថា ពិតជាល្អមើលក្រោយការចូលរួមពីតារាមានទេពកោសល្យខ្ពស់ឆ្អិនឆ្អៅលើរបៀបសម្តែង។

វណ្ណកម្មថ្មីនេះបានរៀបចំធ្វើពិធីសម្ពោធជាផ្លូវការកាលពីយប់មិញក្នុងបរិវេណរោងភាពយន្តលេជេនអេដិនបឹងកក់រាជធានីភ្នំពេញ។ ក្រៅពីផលិតករអ្នកដឹកនាំរឿង គេឃើញមានវត្តមានតារាសិល្បៈមួយចំនួនចូលរួមសម្តែងការផលិតដូចជា អ្នកនាង យុគ ចិន្តា រ៉ូលីន តូតា ញ៉ែម សុគន្ឋ ប៉ែន សារ៉ាវ លោក ដាស៊ីធីអិន លោកជុន ណារ៉ា លោកសាក់សាឌី កញ្ញានីឡា លោកម៉ាដូណា លោកឆាលី កញ្ញាកែវ ធីតា លោកស៊ូ រតនៈ លោកសុខ ដែន ពិធីករសាហារ៉ា។

អ្នកនាង យុគ ចិន្តា បានឱ្យដឹងថាខ្សែភាពយន្តភាគរឿង«ផ្កាយមារ»និងចាក់បញ្ចាំងនាដើមខែមីនានេះ ដែលតាមអ្នកនាងដឹងគឺ ត្រូវក្រុមការងារខំរៀបចំទាំងតួសម្តែងទាំងបច្ចេកទេសព្រមទាំងសាច់រឿង គឺត្រូវមើលឃើញថាព្យាយាមច្រើនណាស់។ អ្នកនាងបន្តថា ក្នុងពេលដែលថ្នាក់ដឹកនាំសម្រេចយកម៉ោង7យប់ដល់9យប់ចាក់ផ្សាយកុនខ្មែរ អ្នកនាងចង់ឱ្យបងប្អូនទស្សនិកជនទាំងអស់ជួយគាំទ្រកុនភាគខ្មែរកម្មវិធីខ្មែរយើងផលិតនេះឱ្យបានកាន់តែច្រើន ដើម្បីជាការលើកទឹកចិត្ត។ យើងកំពុងតែឃើញថា រលកក្រោយបានព្យាយាមកសាងភាពយន្តខ្មែរជាបន្តបន្ទាប់ ដើម្បីទស្សនិកជនខុសឆ្គងបែបណា ហើយជួយកែតម្រូវឱ្យកាន់តែរកឃើញនូវភាពវិជ្ជមានបន្តទៀត។

តាមការឱ្យដឹងពីខាងអ្នកផលិតក៏ដូចជាអ្នកដឹកនាំរឿងរឿង«ផ្កាយមារ»នេះបានសម្រិតសម្រាំងខ្លាំងឆាកទាំងអស់សុទ្ឋតែសម្រិតសម្រាំងជាទីបំផុតដោយសារតែជារឿងបែបបុរាណឈុតសម្លៀកបំពាក់បែបសម័យលង្វែក។ ជាពិសេសមានរំលេចក្បាច់គុនភ្លេងបុរាណចូលរួមដោយគ្រូភ្លេងល្បីៗមានជំនាញ។ រយៈពេលតាំងពីក្រុងពលីរឿងនេះមានរយៈពេល24ខែគិតជារយៈពេលថ្ងៃថតចំនួន168ថ្ងៃ។ រឿងនេះកំណត់ភាពច្បាស់លាស់ដូចជារើសតួសរសេរអត្ថបទគឺគិតច្រើនលើកច្រើនសារធ្វើយ៉ាងណាឱ្យសាច់រឿងមានកំហុសតិចបំផុតតាមលទ្ឋភាពដែលអាចធ្វើទៅបាន៕

March 1, 2019

Category: សង្គម និងសេដ្ឋកិច្ច