សង្គម និងសេដ្ឋកិច្ច - La Reine Media

ទំនើបណាស់! សូម្បីស្រោមអនាម័យ ក៏មានបច្ចេកវិទ្យាអាចវាស់ល្បឿននៃការវាយលុកដែរ

i.Con Smart Condom គឺជាស្រោមអនាម័យឆ្លាតវៃដំបូងគេក្នុងពិភពលោកដែលបានប្រកាសចេញកាលពីខែកក្កដា ឆ្នាំ2017 កន្លងទៅ។ ស្រោមអនាម័យនេះមានបើកទទួលការកុម្ម៉ង់ទិញលើវេបសាយ British Condoms ដែលមានតម្លៃប្រហែល 79ដុល្លារ ដោយរំពឹងថានឹងចេញលក់នៅអំឡុងត្រីមាសទី3 ឆ្នាំ2019 នេះ។

ដោយឡែកមុខងាររបស់ i.Con គឺវានឹងកត់ត្រានូវទិន្នន័យដូចខាងក្រោម៖

ចំនួនកាឡូរីដែលបានដុតបំផ្លាញនៅពេលរួមភេទ
ល្បឿននៃការវាយលុក និងចំនួនសរុបនៃការវាយលុក
ចលនានៃវគ្គនីមួយៗ
រយៈពេលសរុបនៃវគ្គនីមួយៗ
ល្បឿនមធ្យមនៃការវាយលុក
សីតុណ្ហភាពជាមធ្យមរបស់ស្បែក និងទិន្នន័យដទៃទៀត។

ក្រុមហ៊ុនផលិតស្រោមអនាម័យនេះនៅមិនទាន់ប្រាប់ពីថ្ងៃខែចេញលក់ជាផ្លូវការនៅឡើយទេ។ យោងតាមវេបសាយទទួលការកុម្ម៉ង់ទិញបានឱ្យដឹងថា i.Con មិនមែនជាស្រោមអនាម័យមែនទែនឡើយ វាគឺកងដែលពាក់លើផ្នែកគល់នៃស្រោមអនាម័យដែលអាចប្រើបានម្ដងហើយម្ដងទៀត៕

March 4, 2019

តារាឆ្នើមកូរ៉េខាងត្បូង Park ឈ្នះពាន HSBC Women’s World Championship

កីឡាការិនីវាយកូនគោល Park Sung-hyun ដែលមានចំណាត់ថ្នាក់លេខ2 ក្នុងពិភពលោក បានវាយកូនគោលយ៉ាងល្អបំផុតប្រចាំសប្តាហ៍ ដើម្បីរកបាន 64ពិន្ទុ កាលពីថ្ងៃអាទិត្យ និងដើម្បីឈ្នះពាន HSBC Women’s World Championship តាមរយៈការនាំមុខ 2ឈើ។

កីឡាការិនីរបស់កូរ៉េខាងត្បូងវ័យ 25ឆ្នាំរូបនេះ បានផ្តួលកីឡាការិនីអូស្ត្រាលី Minjee Lee តាមរយៈការវាយកូនគោលយ៉ាងល្អចំនួន 4លើក នៅលើរន្ធទី9 ដើម្បីឈ្នះពានដែលមានប្រាក់រង្វាន់ 1.5លានដុល្លារអាមេរិក ខណៈដែល Lee រកបាន 69ពិន្ទុនៅថ្ងៃចុងក្រោយ។

Park បានឱ្យដឹងថា៖ «ខ្ញុំពិតជារីករាយណាស់ និងរំភើបជាមួយនឹងការលេងរបស់ខ្ញុំនៅថ្ងៃនេះ ហើយខ្ញុំគិតថា ថ្ងៃនេះគឺជាថ្ងៃមួយក្នុងចំណោមថ្ងៃដ៏ល្អបំផុតរបស់ខ្ញុំ និងក្នុងចំណោមការលេងក្នុងកម្មវិធី LPGA Tour មកទល់ពេលនេះ»។

កីឡាការិនីរូបនេះបានបន្ថែមទៀតថា៖ «ខ្ញុំគិតថា វានឹងមិនទទួលជ័យជម្នះយ៉ាងលឿនបែបនេះឡើយ ហើយខ្ញុំពិតជារីករាយណាស់។ ខ្ញុំធ្លាប់មានការចាប់ផ្តើមដ៏តានតឹង កាលពីឆ្នាំមុន ហើយការឈ្នះជាលើកទី 1នេះ ពិតជាលឿនមែនទែន។ ខ្ញុំគិតថា ខ្ញុំនឹងលេងយ៉ាងល្អក្នុងការប្រកួតបន្ទាប់ទៀតនៃរដូវកាលនេះ»។

ការប្រជែងរបស់កីឡាការិនីមានចំណាត់ថ្នាក់លេខ1 ក្នុងពិភពលោក Lee បានជួបការខកចិត្ត ក្រោយពីការវាយមិនបានល្អលើរន្ធទី14។

ដោយឡែក កីឡាការិនី KoJin-young របស់កូរ៉េខាងត្បូង និង Zahara Munoz របស់អេស្ប៉ាញ សុទ្ធសឹងបានបញ្ចប់ដោយស្ថិតក្នុងចំណាត់ថ្នាក់លេខ3 ដូចគ្នា ក្រោយពីរកបាន 69ពិន្ទុ ក្នុងការប្រកួតជុំចុងក្រោយដូចគ្នា៕

March 4, 2019

លោក Klopp នៅតែជឿជាក់លើ Liverpool ទោះបីបាត់បង់ការនាំមុខលើតារាង

ក្រុម Liverpool បានជួបការសោកស្តាយយ៉ាងខ្លាំងចំពោះការខ្ជះខ្ជាយឱកាសដ៏ល្អចំនួន 2លើក ពីសំណាក់ខ្សែប្រយុទ្ធ Mohamed Salah ខណៈដែលក្រុម Everton បានធ្វើឱ្យពួកគេទទួលបានត្រឹមលទ្ធផលស្មើ ០-០ ក្នុងការប្រកួតរវាងក្រុមស្ថិតក្នុងទីក្រុង Merseyside កាលពីថ្ងៃអាទិត្យ។

បច្ចុប្បន្នក្រុមរបស់លោក Jurgen Klopp ដេញតាមពីក្រោយក្រុមម្ចាស់ការពារតំណែងជើងឯក Manchester City ចំនួន 1ពិន្ទុ នៅលើកំពូលតារាងនៃក្របខ័ណ្ឌ Premier League ខណៈដែលនៅសល់ការប្រកួតត្រឹមតែ 9លើកទៀតប៉ុណ្ណោះ។

ការស៊ុតបាល់របស់ Salah ត្រូវបានជួយសង្គ្រោះដោយអ្នកចាំទី Jordan Pickford របស់ Everton ខណៈដែលក្រុម Liverpool បានបាត់បង់ពិន្ទុជាលើកទី4 ក្នុងចំណោមការប្រកួតលីក 4លើកចុងក្រោយរបស់ពួកគេ។

លោក Klopp បានឱ្យដឹងថា៖ «ខ្ញុំមិនចាំបាច់ត្រូវផ្តល់ដំបូន្មានដល់កីឡាកររបស់ខ្ញុំឡើយ ព្រោះពួកគេដឹងរួចទៅហើយ។ ពួកគេមិនមែននៅក្មេងទៀតឡើយ»។

គ្រូបង្វឹករូបនេះបានបន្ថែមទៀតថា៖ «ខ្ញុំជឿជាក់ 100ភាគរយទៅលើឱកាសរបស់យើង។ ខ្ញុំដឹងថា ពីការប្រកួត 1លើក ទៅការប្រកួត 1លើកទៀត អារម្មណ៍របស់ខ្ញុំកាន់តែល្អប្រសើរអំពីកីឡាករ ពីព្រោះពួកគេហាក់ដូចជាត្រៀមខ្លួនរួចរាល់ហើយ»។

ដោយឡែក ការមិនស្គាល់ឈ្នះរបស់ក្រុម Everton ក្នុងការប្រកួតរវាងក្រុមស្ថិតក្នុងតំបន់តែមួយ បានបន្តរហូតដល់ 19ប្រកួត បើគិតចាប់តាំងពីឆ្នាំ2010។ ប៉ុន្តែ ទោះបីជាយ៉ាងណា ការអបអរផ្សេងៗពីសំណាក់អ្នកគាំទ្រនៃក្រុមម្ចាស់ផ្ទះ ក្នុងពេលបញ្ចប់ការប្រកួតបានបង្ហាញថា ពួកគេជឿជាក់ថា ពួកគេបានកម្ទេចក្តីសង្ឃឹមរបស់ Liverpool ក្នុងការឈ្នះពានលីកជាលើកទី1 ក្នុងរយៈពេល 29ឆ្នាំ៕

March 4, 2019

រូបគំរូផ្លូវល្បឿនលឿន ភ្នំពេញ-ព្រះសីហនុ ត្រូវបានដាក់បង្ហាញ!

រូបគំរូផ្លូវល្បឿនលឿន ភ្នំពេញ-ព្រះសីហនុ ប្រវែងជាង 190គីឡូម៉ែត្រ ត្រូវបានដាក់បង្ហាញដោយក្រសួងសាធារណការ និងដឹកជញ្ជូន នៅថ្ងៃទី4 ខែមីនា ឆ្នាំ2019 នេះ ខណៈដែលថ្ងៃបើកការដ្ឋានសាងសង់ជាផ្លូវការនឹងត្រូវធ្វើឡើងនៅថ្ងៃទី22 ខែមីនា ឆ្នាំ2019 ខាងមុខនេះ។

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ផ្លូវល្បឿនលឿនមួយខ្សែនេះនឹងរួមចំណែកកាន់តែខ្លាំងក្នុងការជំរុញសេដ្ឋកិច្ចរបស់កម្ពុជា ព្រោះថា ផ្លូវល្បឿនលឿនភ្នំពេញ-ព្រះសីហនុនេះនឹងដើរតួនាទីយ៉ាងសំខាន់ក្នុងការដឹកជញ្ជូនទំនិញរវាងតំបន់ប៉ូលសេដ្ឋកិច្ចដ៏សំខាន់2 គឺរាជធានីភ្នំពេញ និងខេត្តព្រះសីហនុ។

ជាពិសេសការដឹកទំនិញពីបណ្តារោងចក្រនានាទៅកាន់កំពង់ផែស្វយ័តព្រះសីហនុ សម្រាប់ការនាំចេញទៅក្រៅប្រទេស ក៏ដូចជាការដឹកទំនិញពីកំពង់ផែស្វយ័តព្រះសីហនុមកតំបន់ដទៃទៀតក្នុងកម្ពុជាដែរ។

គម្រោងផ្លូវល្បឿនលឿននេះ ឆ្លងកាត់ 4រាជធានី-ខេត្ត រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តព្រះសីហនុ ក្នុងនោះគឺឆ្លងកាត់ 6ស្រុក 1ខណ្ឌ 2ក្រុង 31ឃុំ/សង្កាត់ និង110ភូមិ។

ផ្លូវនេះមានប្រវែងសរុប 190.365គីឡូម៉ែត្រ។ សាងសង់ជា 4គន្លងផ្លូវ សម្រាប់រថយន្ត (2ទៅ 2មក) និង 2គន្លងសម្រាប់ម៉ូតូ (1ទៅ 1មក)។ ជាប្រភេទផ្លូវក្រាលបេតុងកៅស៊ូ (AC) កម្រាស់ 10ស.ម និងថ្មលាយកៅស៊ូ (ATB)12ស.ម។ ពង្រីកទទឹងផ្លូវដល់ 24.5ម៉ែត្រ ខណ្ឌដោយសួនច្បារនៅកណ្ដាលទ្រូងផ្លូវ និងមានរបាំងអមសងខាងផ្លូវ ការពារសត្វ ឬមនុស្សឆ្លងកាត់។ មានកន្លែងសម្រាប់ឈប់សម្រាកចំនួន 4កន្លែង និងស្ថានីយប្រេងឥន្ធនៈ 3កន្លែង។ រយៈពេលសាងសង់ 48ខែ។

លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ឱ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជានឹងអញ្ជើញជាអធិបតីក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-ខេត្តព្រះសីហនុនៅថ្ងៃទី22 ខែមីនាខាងមុខនេះ។

លោកបានបន្តថា ផ្លូវល្បឿនលឿនភ្នំពេញ-ក្រុងព្រះសីហនុនេះមានប្រវែងជាង 190គីឡូម៉ែត្រ(190.365គ.ម) ដែលចេញពីម្តុំផ្លូវរថភ្លើងនៃតំបន់ទំនប់កប់ស្រូវ ស្ថិតនៅខាងស្តាំដៃផ្លូវជាតិលេខ4 និងសាងសង់ស្របគ្នានឹងផ្លូវជាតិនេះ រហូតជិតដល់ទីរួមខេត្តកំពង់ស្ពឺ ទើបផ្លូវនេះឆ្លងកាត់ផ្លូវជាតិលេខ4ងាកមកខាងឆ្វេងដៃវិញ ហើយបន្តរហូតដល់ស្រុកព្រៃនប់ ទើបផ្លូវនេះងាកមកស្តាំដៃ រហូតដល់មាត់សមុទ្រនៃក្រុងព្រះសីហនុតែម្ដង។

អ្នកនាំពាក្យរូបនេះបានមានប្រសាសន៍ឱ្យដឹងទៀតថា ផ្លូវល្បឿនលឿននេះនឹងមានការធ្វើរបងអមសងខាងផ្លូវ លើកលែងតែចំណុចឆ្លងកាត់មួយចំនួនដែលមានស្ពានអាកាស និងស្ថានីយឈប់សំចត ព្រោះវាជាផ្លូវលឿនដែលអាចបើកបរក្នុងល្បឿនពី120 ទៅ160គីឡូម៉ែត្រក្នុងមួយម៉ោង ហេតុនេះទើបផ្លូវនេះមិនតម្រូវឱ្យមានចំណុចឆ្លងកាត់ច្រើនទេ៕

March 4, 2019

ទឹកប្រាក់ 36លានដុល្លារជាជំនួយរបស់ជប៉ុន ជួយសាងសង់ប្រព័ន្ធការពារទឹកជំនន់

គម្រោងសាងសង់ប្រព័ន្ធការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី4 ក្រោមហិរញ្ញប្បទានឥតសំណងរបស់ប្រទេសជប៉ុន ត្រូវបានបើកការដ្ឋានស្ថាបនាហើយ នៅព្រឹថ្ងៃចន្ទ 13រោច ខែមាឃ ឆ្នាំច សំរឹទ្ធិស័ក ព.ស2562 ត្រូវនឹងថ្ងៃទី4 ខែមីនា ឆ្នាំ2019 ក្រោមអធិតីភាព សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយលោក HORINOUCHI Hidehisa ឯកអគ្គរាជទូតជប៉ុនប្រចាំនៅកម្ពុជា។

ឯកឧត្ដម ឃួង ស្រេង អភិបាលរាជធានីភ្នំពេញបានឱ្យដឹងថា គម្រោងការពារទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញ ជំហានទី4នេះ មានទឹកប្រាក់សរុបប្រមាណ 36លានដុល្លារអាមេរិក ជាជំនួយឥតសំណងរបស់រាជរដ្ឋាភិបាលជប៉ុន។

គម្រោងនេះរួមមាន ការដាក់បណ្តាញលូមេនៅក្នុងភូមិសាស្ត្រខណ្ឌទួលគោកប្រវែង 8.2គីឡូម៉ែត្រ ដាក់បណ្តាញលូមេនៅក្នុងភូមិសាស្ត្រខណ្ឌដូនពេញប្រវែង 4.4គីឡូម៉ែត្រ សាងសង់អាងស្តុកទឹកក្រោមដី និងសាងសង់ស្ថានីយបូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC ដំឡើងរបារមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគម្លង់1 ព្រះគម្លង់2 និងផ្សារចាស់ និងផ្តល់រថយន្តបូមទឹកចល័តចំនួន 2គ្រឿង។

ឯកឧត្តមអភិបាលរាជធានីភ្នំពេញបានឱ្យដឹងទៀតថា គម្រោងសាងសង់សំណង់ផ្សេងៗក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញជំហានទី4នេះ ប្រើរយៈពេលប្រមាណជា 36ខែ ដោយចាប់ផ្តើមគម្រោងពីថ្ងៃទី1 ខែធ្នូ ឆ្នាំ2018 ហើយគ្រោងបញ្ចប់នៅថ្ងៃទី31 ខែតុលា ឆ្នាំ2021។ ឯកឧត្តមបានបង្ហាញក្តីសង្ឃឹមថា គម្រោងនេះនឹងរួមចំណែកស្តារ និងអភិវឌ្ឍសេដ្ឋកិច្ច-សង្គម ក៏ដូចជាធ្វើឱ្យបរិស្ថាននៃការរស់នៅរបស់ប្រជាពលរដ្ឋក្នុងរាជធានីភ្នំពេញប្រមាណជាង 2លាននាក់ល្អប្រសើរឡើងដែរ។

ឯកឧត្ដមបានបន្ថែមទៀតថា តាមរយៈកិច្ចសហប្រតិបត្តិការរវាងសាលារាជធានី ភ្នំពេញ ជាមួយដៃគូអភិវឌ្ឍន៍នានា ជាពិសេសជាមួយទីភ្នាក់ងារសហប្រតិបត្តិការអន្តរជាតិ ជប៉ុន(JICA) ក្រោមជំនួយរបស់រដ្ឋាភិបាលជប៉ុននោះ បានអនុវត្តគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញចំនួន 3លើករួចមកហើយ ដែលតាមរយៈគម្រោងទាំង3 កន្លងមកបានជួយឱ្យរាជធានីភ្នំពេញគេចផុតពីការគំរាមកំហែងដោយទឹកជំនន់ និងបានជួយកសាងប្រព័ន្ធលូកាន់តែល្អប្រសើរសម្រាប់រំដោះជំនន់ទឹកភ្លៀង។

ឯកឧត្តម Hidehisa HORINOUCHI ឯកអគ្គរដ្ឋទូតប្រទេសជប៉ុនប្រចាំនៅកម្ពុជាបានមានប្រសាសន៍ថា បន្ទាប់ពីការអនុវត្តដ៏ជោគជ័យនូវជំហានទី1 ជំហានទី2 និងជំហានទី3 នៃគម្រោងនៅក្នុងឆ្នាំ2004 ឆ្នាំ2010 និងឆ្នាំ2015 ; ក្រោមគម្រោងហិរញ្ញប្បទានឥតសំណងរបស់ប្រទេសជប៉ុន ដើម្បីកែលម្អប្រព័ន្ធប្រឡាយលូនៅភាគនិរតី ភាគឦសាន និងភាគអាគ្នេយ៍នៃរាជធានីភ្នំពេញរួចមក ការជន់លិចនៅតំបន់ទាំងនោះត្រូវបានកាត់បន្ថយយ៉ាងច្រើននៅក្នុងទីក្រុងភ្នំពេញ។

ឯកឧត្ដមបានបញ្ជាក់ថា ទោះជាយ៉ាងណាក៏នៅមានតំបន់មួយចំនួននៅក្នុងរាជធានីភ្នំពេញ នៅតែទទួលរងការខូចខាតដោយទឹកជំនន់ តែរដ្ឋាភិបាល ជប៉ុនបានផ្តល់ហិរញ្ញប្បទានឥតសំណងសម្រាប់ការអនុវត្តជំហានទី4 នៃគម្រោងដែលគ្របដណ្តប់ភាគច្រើននៅភាគខាងជើងនៃរាជធានីភ្នំពេញ។ ឯកឧត្ដមឯកអគ្គរដ្ឋទូត មានជំនឿយ៉ាងមុតមាំថា ការបញ្ចប់គម្រោងនេះដោយជោគជ័យ នឹងរួមចំណែកដល់ ការអភិវឌ្ឍសេដ្ឋកិច្ចរបស់កម្ពុជា ក៏ដូចជាពង្រឹងថែមទៀតនូវចំណងមិត្តភាពរវាងប្រទេសជប៉ុន និងព្រះរាជាណាចក្រកម្ពុជាដែរ៕

March 4, 2019

លោក Klopp នៅតែជឿជាក់លើ Liverpool ទោះបីបាត់បង់ការនាំមុខលើតារាង

ក្រុម Liverpool បានជួបការសោកស្តាយយ៉ាងខ្លាំងចំពោះការខ្ជះខ្ជាយឱកាសដ៏ល្អចំនួន 2លើក ពីសំណាក់ខ្សែប្រយុទ្ធ Mohamed Salah ខណៈដែលក្រុម Everton បានធ្វើឱ្យពួកគេទទួលបានត្រឹមលទ្ធផលស្មើ ០-០ ក្នុងការប្រកួតរវាងក្រុមស្ថិតក្នុងទីក្រុង Merseyside កាលពីថ្ងៃអាទិត្យ។

បច្ចុប្បន្នក្រុមរបស់លោក Jurgen Klopp ដេញតាមពីក្រោយក្រុមម្ចាស់ការពារតំណែងជើងឯក Manchester City ចំនួន 1ពិន្ទុ នៅលើកំពូលតារាងនៃក្របខ័ណ្ឌ Premier League ខណៈដែលនៅសល់ការប្រកួតត្រឹមតែ 9លើកទៀតប៉ុណ្ណោះ។

ការស៊ុតបាល់របស់ Salah ត្រូវបានជួយសង្គ្រោះដោយអ្នកចាំទី Jordan Pickford របស់ Everton ខណៈដែលក្រុម Liverpool បានបាត់បង់ពិន្ទុជាលើកទី4 ក្នុងចំណោមការប្រកួតលីក 4លើកចុងក្រោយរបស់ពួកគេ។

លោក Klopp បានឱ្យដឹងថា៖ «ខ្ញុំមិនចាំបាច់ត្រូវផ្តល់ដំបូន្មានដល់កីឡាកររបស់ខ្ញុំទេ ព្រោះពួកគេដឹងរួចទៅហើយ។ ពួកគេមិនមែននៅក្មេងទៀតទេ»។ គ្រូបង្វឹករូបនេះបានបន្ថែមទៀតថា៖ «ខ្ញុំជឿជាក់ 100ភាគរយទៅលើឱកាសរបស់យើង។ ខ្ញុំដឹងថា ពីការប្រកួត 1លើកទៅការប្រកួត 1លើកទៀត អារម្មណ៍របស់ខ្ញុំកាន់តែល្អប្រសើរចំពោះកីឡាករ ពីព្រោះពួកគេហាក់ដូចជាត្រៀមខ្លួនរួចរាល់ហើយ»។

ដោយឡែក ការមិនស្គាល់ឈ្នះរបស់ក្រុម Everton ក្នុងការប្រកួតរវាងក្រុមស្ថិតក្នុងតំបន់តែមួយ បានបន្តរហូតដល់ 19ប្រកួត បើគិតចាប់តាំងពីឆ្នាំ2010 មក។ ប៉ុន្តែ ទោះបីជាយ៉ាងណា ការអបអរផ្សេងៗពីសំណាក់អ្នកគាំទ្រនៃក្រុមម្ចាស់ផ្ទះក្នុងពេលបញ្ចប់ការប្រកួតបានបង្ហាញថា ពួកគេជឿជាក់ថា ពួកគេបានកម្ទេចក្តីសង្ឃឹមរបស់ Liverpool ក្នុងការឈ្នះពានលីកជាលើកទី1 ក្នុងរយៈពេល 29ឆ្នាំ៕

March 4, 2019

ក្រសួងការងារចាប់ផ្តើមប្រើរថយន្តចល័តដើម្បីផ្សព្វផ្សាយទីផ្សារការងារនៅតំបន់ឆ្ងាយៗ

ដើម្បីជំរុញការផ្តល់ព័ត៌មានផ្នែកទីផ្សារការងារឱ្យកាន់តែទូលំទូលាយនៅទូទាំងប្រទេសដល់និស្សិត និងប្រជាជននៅគ្រប់ទីកន្លែងក្នុងប្រទេសកម្ពុជា ក្រសួងការងារ និងបណ្តុះបណ្តាលវិជ្ជាជីវៈបានសម្ពោធដាក់ឱ្យប្រើប្រាស់រថយន្តមជ្ឈមណ្ឌលការងារចល័ត ដែលមានសេវាប្រឹក្សា និងបច្ចេកវិទ្យាសម្រួលដល់ការដាក់ពាក្យធ្វើការងារ។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា រថយន្តដែលជាមជ្ឈមណ្ឌលការងារចល័តនេះមានសារៈសំខាន់ខ្លាំងណាស់ក្នុងការអភិវឌ្ឍធនធានមនុស្ស និងទីផ្សារការងារនៅតាមតំបន់ជនបទ និងខេត្តឆ្ងាយៗដែលមិនទាន់មានមណ្ឌលការងារ។ តាមរយៈសកម្មភាពនេះ យុវជនកាន់តែមានភាពងាយស្រួលក្នុងការស្វែងរកការងារធ្វើបានយ៉ាងឆាប់រហ័ស ចំណេញពេលវេលា និងចំណាយតិច។ សកម្មភាពនេះជាគម្រោងដែលមានកិច្ចសហការជាមួយទីភ្នាក់ងារអភិវឌ្ឍន៍អន្តរជាតិស៊ុយអែត (SIDA) និងទីភ្នាក់ងារផ្តល់សេវាសាធារណៈស៊ុយអែត (SPES)ដែលស្របតាមក្របខ័ណ្ឌគោលនយោបាយ និងយុទ្ធសាស្ត្រអភិវឌ្ឍន៍វិស័យការងាររបស់រាជរដ្ឋាភិបាលកម្ពុជាក្នុងការខិតខំបង្កើតឱកាសការងារឱ្យកាន់តែច្រើន និងបង្ខិតសេវាស្វែងរកការងារឱ្យទៅដល់តំបន់ជនបទឆ្ងាយៗនៅទូទាំងប្រទេសកម្ពុជា។

ឯកឧត្តម អុិត សំហេង មានប្រសាសន៍ថា៖“ក្រសួងការងារបានខិតខំបង្កើតឱកាសការងារកាន់តែច្រើន និងជួយបែងចែកឱកាសទាំងនេះឱ្យបានទៅដល់ប្រជាជនគ្រប់រូបប្រកបដោយតម្លាភាព និងសមធម៌ សំដៅប្រែក្លាយឱកាសការងារដែលមានទាំងអស់ឱ្យទៅជាមុខរបរកាន់តែល្អសម្រាប់ប្រជាជនគ្រប់រូប”។

ឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈក៏បានលើកឡើងផងដែរថា អ្នកដែលទទួលបានផលប្រយោជន៍ច្រើនជាងគេអំពីគម្រោងដ៏មានសារៈសំខាន់នេះគឺ យុវជន និស្សិត ជនពិការ រួមទាំងស្ត្រីដែលទទួលបានការបណ្តុះបណ្តាលអភិវឌ្ឍន៍ជំនាញ និងទទួលបានឱកាសការងារ។ កន្លងមកគម្រោងនេះធ្លាប់បានធ្វើការងារបណ្តុះបណ្តាលជំនាញទន់ និងសហគ្រិនភាពដល់អ្នកចូលរួមប្រមាណ3,450នាក់ និងទទួលបានអ្នកចុះឈ្មោះស្វែងរកការងារប្រមាណ 90,000នាក់ ដោយក្នុងនោះអ្នកដែលទទួលបានការងារធ្វើប្រមាណ 2ម៉ឺននាក់ និងយុវជនដែលបានចុះធ្វើកម្មសិក្សាផ្ទាល់ចំនួន 749នាក់ក្នុងទីផ្សារការងារ។

បើតាមឯកឧត្តមរដ្ឋមន្ត្រី រថយន្តមជ្ឈមណ្ឌលការងារចល័តនេះជាប្រភេទរថយន្តវ៉ែន (ven) ដែលមានមុខងារផ្តល់សេវាកម្មសំខាន់ៗដូចជាមជ្ឈមណ្ឌលការងារ សម្រាប់ជួយដល់សេវាស្វែងរកការងារ ការចុះឈ្មោះស្វែងរកការងារទាំងលើឯកសារ (off line) និងលើអុីនធើណិត (online) សេវាទទួលប្រឹក្សាយោបល់ការងារ និងមានផ្តល់ជូននូវបណ្ណាល័យការងារថែមទៀតផង៕

March 4, 2019

បួនថ្ងៃប៉ុនណោះ ទារុណកម្មខ្មោច ធ្វើឱ្យយុវវ័យផ្អើលលោះព្រលឹង

ថ្មីៗនេះភាពយន្តខ្មែររឿងទារុណកម្មខ្មោចបានដាក់បញ្ចាំងពេញរោងកុនទីក្រុងភ្នំពេញនិងសៀមរាប ចាប់ពីថ្ងៃ28 រហូតមកដល់ថ្ងៃនេះ4ថ្ងៃពេញ រោងភាពយន្តពេញលក់សំបុត្រគ្មានសល់ ពិសេសយុវវ័យផ្អើលទះដៃអបអរសាទរស្នាដៃដ៏អស្ចារ្យមួយនេះដែលដឹកនាំដោយកូនខ្មែរលោក ហ៊ុយ យ៉ាឡេង(មាតុចក្រ) ដែលយុវវ័យតែងសម្គាល់ឃើញថាភាពយន្តអ្នកដឹកនាំម្នាក់នេះតែងនាំភាពយន្តខ្មែរទៅក្រៅប្រទេស ពិសេសថ្មីៗនេះលោកទើបតែនាំភាពយន្តខ្មែរទៅដាក់បញ្ចាំងនៅប្រទេសបារាំងនិងសហរដ្ឋអាមេរិកហើយដែរ។

ហើយភាពយន្តក្រោយរបស់លោករឿងទារុណកម្មខ្មោចដែលកំពុងបញ្ចាំងបាន4ថ្ងៃនេះ កំពុងតែកក្រើកទស្សនិកជនយ៉ាងខ្លាំងហើយអ្នកទស្សនាក្រោយទស្សនាចប់ទះដៃនិងកោតសរសើរគាំទ្រពេញទំហឹងតែម្តង កូនខ្មែរភាពយន្តខ្មែរកំពុងទៅមុខហើយ ដូចនេះអ្នកដែលមិនទាន់ទស្សនាសូមទៅទស្សនាដើម្បីគាំទ្រភាពយន្តខ្មែរមួយនេះ ដែលកំពុងគ្រងធ្វើដំណើរទៅក្រៅប្រទេសផងដែរ ក្នុងនោះលោកហ៊ុយយ៉ាឡេងបានប្រាប់ថា ថ្ងៃទី17 ខែមីនា លោកនិងនាំយករឿងទារុណកម្មខ្មោចទៅចូលទីផ្សារលក់ភាពយន្តពិភពលោកនៅទីក្រុងហុងលោក បន្ទាប់មកទៀតចូលទៅមហោស្រពភាពយន្តនៅម៉ាឡេ បន្ទាប់មកទៀតចូលទៅសាកល្បងទីផ្សារថ្មីនៅប្រទេសភូមានិងវៀតណាមផងដែរ៕

March 4, 2019

អ៊ឹម ជីវ៉ា បកស្រាយក្រោយផ្ទុះមតិរិះគន់រឿងស្លៀកសារ៉ុងរាំនៅត្រពាំងឈូក

ក្រោយមានការរិះគន់ខ្លាំងរហូតដល់ថាលោកកើតជម្ងឺ Depression លើបទចម្រៀងមួយបទរបស់លោក អ៊ឹម ជីវ៉ា ចំណងជើង «ពាក់ពណ៌ដិត ៗៗៗ» នោះ ពេលនេះលោកអ៊ឹម ជីវ៉ា បានបកស្រាយទៅមហាជនវិញថា « សិល្បៈត្រូវរកគំនិតអ្វីដែលថ្មីហើយទាក់ទាញ បើនិយាយអោយចំប្លែកខុសពីគេក៏មិនមែនបានន័យថាថតរហូតអោយចេញក្បាលដោះនោះទេ ធៀបទៅនឹងបច្ចឹមប្រទេសវិញគេរាំនៅមាត់សមុទ្រពាក់វាលជាងហ្នឹងផងម៉េចនៅគាំទ្រគេម្លេះ ??? គេថតបទចំរៀងគឺគេយកចង្វាក់មករាំ មិនមែនថតមកអោយចងពង់រាំតាមទេកុំច្រលំ ..!! ចុះបទត្រពាំងពាយអើយ ថតចងពង់អោយរិតគ្នាក្នុងទឹក ដែលជាចង្វាក់រាំក្បាច់ម៉េចមិនចង់ពង់រាំក្នុងទឹកដែរទៅ ដូចនេះគឺគេមិនមែនយកការសំដែងមករាំទេគឺគេយកចង្វាក់មករាំ , ការស្លៀកខោខ្លី ចងពង់សារ៉ុងរាំកម្សាន្តបែបលេបខាយ គឺជាចរិកពិតបងប្អូនប្រជាពលរដ្ឋមួយចំនួនគឺគាត់សប្បាយរីការាយច្រៀងរាំលេងនៅមាង់បឹង ត្រពាំងឬកំពង់ទឹក ..! អ្នកខ្លះរាំច្រៀងលេងលេងនៅក្រោមដើមឈើ លើភ្លឺស្រែ ក្នុងវាលស្រែ ..ល.។

អ្វីដែលសំខាន់កុំអោយតែខ្ញុំយកយកការមេរ៉ាទៅថតដើមទ្រូងឬZoomដើមទ្រូងតួស្រីឬបញ្ចេញវិដេអូស្រើបស្រាលទៅបានហើយ..! ថតចង់ពង់រាំខុស ចុះគេថតកុនឈុតបឺតមាត់ ឈុតចាប់រំលោភ និងឈុតស្រើបស្រាលដាក់តាមរោងកុនឬទូរទស្សន៍ម៉េចមិនមើលផង …, វប្បធម៌រលាយមិនមែនដោយសារមនុស្ស4 ,10នាក់ទៅរាំចង់ពង់នោះទេ អស់លោក !! ម្នាក់ៗថាស្រលាញ់វប្បធម៌ណាស់តែមិនសូវឃើញអ្នកណា ហើយយកបទចំរៀងខ្មែរមកចាក់ស្តាប់ផង យកបទគេមកស្តាប់ហើយចាក់ផ្សាយទៀត ជាពិសេខ្សែភាពយន្តខ្មែរ សួថាមានមនុសកសប៉ុន្មាននាក់ដែលគាំទ្រ???។

បទចំរៀងមិនទាន់ចេញផងវាយតម្លៃគេបាត់ហើយ នេះហើយគេហៅថារិះគន់ជាន់ពន្លិច បើរិះគន់ដើម្បីស្ថាបនាគេមិនមែនប្រើភាសាបែបនេះឡើយ … អស់លោកអើយ ប្រទេសគេដើដល់ណាហើយ… ឆាប់ភ្ញាក់ពីដំណេកឡើង..! កុំយប់យន់សុបិន្តច្រើនពេក … បើមិនដែលទៅបច្ចឹមប្រទេសគួមើលប្រទេសជិតខាងផងថា វិស័យសិល្បៈបទចំរៀង និងភាពយន្តគេដើរដល់ណា រីកចំរើនបែបណាហើយ …, !! សូមជំរាបមួយផង ខ្ញុំមិនមែនផលិតMV ដើម្បីប្រកួតប្រជែងជាមួយផលិតកម្មណាឬប្រកួតជាមួយតារាណានោះទេគឺធ្វើអ្វីតាមចំនង់ចូលចិត្តរបស់ខ្ញុំដែលខ្ញុំស្រលាញ់ ហើយខ្ញុំធ្វើMV នេះក៏មិនបានទៅផ្គាប់ចិត្តអ្នកណាទេ គឺធ្វើសំរាប់ខ្លួនឯងនិងសំរាន់មនុស្សមួយចំនួនដែលគាត់ចូលចិត្តខ្ញុំ មិនមែនធ្វើមកអោយពួកលោកឯងមើលនោះទេ … អ្នកមើលបានមើលទៅ..អ្នកមើលមិនបានអូសំលងទៅចប់ហើយ …ហើយខ្ញុំក៏មិនបានវៃខ្នោះយកអស់លោកមកគាំទ្រខ្ញុំឯណា… សំខាន់កុំអោយតែខ្ញុំចេញវិដេអូអាសអាភាសស្រើបស្រាលទៅបានហើយ ។

ត្រូវចាំផងកុំមើលរូបភាព ប្រៀបធៀបនិងវិដេអូវាមិនដូចគ្នាទេ.. កុំអានតែចំនងជើងដោយមិនមើលអត្ថបទណា…!! ដោយក្តីគោរពអំពីខ្ញុំបាទៈអ៊ឹម ជីវ៉ា » ៕

March 4, 2019

កញ្ញាឯកភពផែនដីទាំង 5 រូប សន្យានាំយកប្រពៃណី វប្បធម៌ និងជួយផ្សាយពីអង្ករកម្ពុជាទៅដល់ពិភពលោក

កញ្ញាឯកភពផែនដីដែលបានជាប់លំដាប់ថ្នាក់ទាំង5 បានបង្ហាញខ្លួនជាថ្មីម្ដង ក្នុងជំនួបជាមួយអ្នកសារព័ត៌មាន ដែលក្នុងនោះរួមមាន កញ្ញា Monique Best មកពីប្រទេសអាហ្វ្រិកខាងត្បូង ជាម្ចាស់ជ័យលាភីលេខ1 កញ្ញា Marisa Phon Thirat មកពីប្រទេសថៃ ជាប់ជ័យលាភីលេខ2 កញ្ញា Viviana Lin Ak Winfton មកពីប្រទេសម៉ាឡេស៊ី ជាប់ចំណាត់ថ្នាក់លេខ3 កញ្ញា Nicole Cano មកពីប្រទេសប៉ារ៉ាហ្គាយ ចំណាត់ថ្នាក់លេខ4 និងកញ្ញា Nicole Vargas មកពីប្រទេសហ្វីលីពីន ចំណាត់ថ្នាក់លេខ5 សុទ្ធតែបានកោតសរសើរពីការរៀបចំការប្រកួត Miss Planet International ក្រោមការចាត់ចែងរបស់កម្ពុជា ខណៈដែលព្រឹត្តិការណ៍នេះជាការប្រកួតកម្រិតអន្តរជាតិ ប៉ុន្តែកម្ពុជានៅតែរៀបចំបានល្អ។

ជាមួយគ្នានេះដែរ កញ្ញាឯកទាំង5បានទាំងប្រកាសថា នឹងនាំយកប្រពៃណី វប្បធម៌ និងរបៀបរបបរស់នៅរបស់ពលរដ្ឋកម្ពុជា ទៅផ្សព្វផ្សាយដល់ជាតិសាសន៍របស់ខ្លួន និងពិភពលោកឱ្យកាន់តែទូលំទូលាយនោះផង។ ក្រោយជាប់លេខ១ខាងបវរកញ្ញាអាហ្វ្រិកខាងត្បូង និងបន្តបេសកកម្មមួយចំនួនទៀតក្នុងការងាររបស់ខ្លួនដូចជា ជួបសំណេះសំណាលជាមួយមណ្ឌលកុមារកំព្រាជាដើម។

បើតាមការអះអាងរបស់ម្ចាស់មកុដបានបញ្ជាក់នាកម្មវិធីសន្និសីទសារព័ត៌មាននាព្រឹកថ្ងៃទី3 មិនា ឆ្នាំ2019មុននេះ នាងបានប្រាប់ថានាងបានមកដល់កម្ពុជាក្រៅមានភាពអស្ចារ្យ លើប្រាសាទអង្គរវត្ត និងតំបន់ផ្សេងទៀតនាងពិតជាសរសើរពីរបៀបធ្វើស្រូវអង្ករកម្ពុជាផលិតចេញមកគឺមានភាពស្អាតអនាម័យល្អ។ បេសកកម្មរបស់នាងដើម្បីកម្ពុជាជួយផ្សាយពីអង្ករកម្ពុជាព្រមទាំងអាហារនៅលើពិភពលោក។ នាងនឹងបន្តឱ្យគេដឹងគេស្គាល់ប្រទេសកម្ពុជា និងប្រទេសនាងក៏ដូចជាពិភពលោកទាំងមូល ហើយចង់និយាយនាងពិតជាចូលចិត្តរបៀបធ្វើស្រូវអង្ករកម្ពុជាមើលទៅអនាម័យល្អ។

សូមជម្រាបបន្ថែមថា កញ្ញា Marisa Phon Thirat មកពីប្រទេសថៃ ជាប់ជ័យលាភីលេខ2 ក៏បានប្រាប់អ្នកសារព័ត៌មានថា អ្វីដែលនាងបានសង្កេត និងសិក្សាអំពីប្រទេសកម្ពុជា ក្នុងអំឡុងពេលមកប្រកួតនេះ គឺចាប់អារម្មណ៍ពាក់ព័ន្ធជាមួយ វប្បធម៌របស់ខ្មែរយើង។ នាងថា បើទោះបីជាមានភាពស្រដៀងគ្នាបន្ដិចមែន តែនាងស្រឡាញ់វប្បធម៌ខ្មែរដ៏ផូផង់។ នាងថា នាងក៏ជាម្នាក់ដែលជួយផ្សាយវប្បធម៌ខ្មែរទៅកាន់ពិភពលោកផងដែរ ព្រោះថា នាងរស់នៅក្នុងតំបន់ភូមិភាគឥសាន ដែលមានទំនៀមទំលាប់មួយចំនួនដូចប្រទេសកម្ពុជាដែរ។ ការធ្វើដំណើរមកកាន់កម្ពុជានេះ នាងបានទុកប្រទេសកម្ពុជា ជាផ្ទះទី2 របស់នាង ដែលមានភាពកក់ក្ដៅបំផុត៕

March 4, 2019

Category: សង្គម និងសេដ្ឋកិច្ច