សង្គម និងសេដ្ឋកិច្ច - La Reine Media

អាហារកាត់បន្ថយគ្រោះថ្នាក់នៃការច្រាលអាស៊ីតពីក្រពះទៅបំពង់ក

តើអ្វីជាមូលហេតុបណ្តាលឱ្យមានជំងឺច្រាលទឹកក្រពះ? មូលហេតុចម្បង និងកើតឡើងញឹកញាប់នោះគឺជាភាពមិនប្រក្រតីនៃក្រពះ។ បញ្ហានេះកើតឡើងនៅពេលដែល ផ្នែកខាងលើនៃក្រពះ និងសន្ទះបិទបើករបស់ក្រពះលយទៅលើសាច់ដុំឌីយ៉ាហ្វ្រាម (សាច់ដុំឌីយ៉ាហ្វ្រាម ជាសាច់ដុំដែលបែងចែកក្រពះ របស់អ្នកពីទ្រូង)។ ជាធម្មតាសាច់ដុំនោះវាបានជួយទប់ជាតិអាស៊ីតក្នុងក្រពះ។ ប៉ុន្តែប្រសិនបើ អ្នកមានបញ្ហាជំងឺច្រាលទឹកអាស៊ីតក្រពះ ទឹកអាស៊ីតអាចនឹងរត់ ឬច្រាលទៅកាន់បំពង់អាហារ ហើយវាជាសញ្ញាដំបូងនៃជំងឺក្រពះ។

តើយើងអាចដោះស្រាយបញ្ហាច្រាលទឹកអាស៊ីតក្រពះតាមបែបធម្មជាតិ ងាយៗបានដែរឬទេ ?
វិធីព្យាបាលជំងឺច្រាលទឹកអាស៊ីតក្រពះគឺអាចធ្វើបានតាមរយៈការទទួលទានអាហារមួយចំនួនដូចខាងក្រោម ៖
1. ម្រះព្រៅ
គឺជាឱសថបែបធម្មជាតិដ៏ល្អសម្រាប់ព្យាបាលជំងឺច្រាលទឹកអាស៊ីតក្រពះ។ អ្វីដែលអ្នកត្រូវធ្វើនោះ គឺគ្រាន់តែទំពាស្លឹកម្រះព្រៅស្រស់ចំនួន5ស្លឹកជាការស្រេច។ អ្នកក៏អាចយកស្លឹកម្រះព្រៅទៅឆុងជាតែ រួចសឹមទទួលទានក៏បាន។

2. ទឹកក្ដៅឧណ្ហៗ
ការពិសាទឹកក្ដៅឧណ្ហៗ ដែលមានប្រសិទ្ធភាពធ្វើឱ្យទឹកអាស៊ីតក្រពះស្រាល ឬខ្សោយ គឺទទួលទាននាពេលព្រឹក ហើយដើម្បីឱ្យកាន់តែប្រសើរនោះ ចូរទទួលទាន1ទៅ2កែវ ខណៈពេលពោះទទេ។

3. ទឹកប្រទាលកន្ទុយក្រពើ
ទឹកប្រទាលកន្ទុយក្រពើ គឺជាឱសថធម្មជាតិ ដែលជួយព្យាបាលជំងឺក្រពះរ៉ាំរ៉ៃ និងជួយបន្ថយជាតិអាស៊ីតនៅក្នុងក្រពះបានផងដែរ។ វាពិតជាមានអត្ថប្រយោជន៍ចំពោះសុខភាពណាស់។ ដើម្បីជួយគ្របបាំងស្រទាប់បំពង់អាហារ និងក្រពះ ទប់ស្កាត់ការរលាក លោកអ្នកអាចយកទឹកប្រទាលកន្ទុយក្រពើយកមកទទួលទាន គឺទទួលទានសុទ្ធ100%កាន់តែល្អ។

4. ផ្លែចេក
ដូចប្រិយមិត្តអ្នកអានបានជ្រាបរួចមកហើយថា ផ្លែចេកមានគុណសម្បត្តិច្រើនយ៉ាងណាសម្រាប់អ្នកជួបប្រទះបញ្ហាច្រាលទឹក-អាស៊ីតក្រពះ។ ជាតិម្សៅដែលមាននៅក្នុងផ្លែចេកនឹងធ្វើឱ្យអ្នកធូរស្រាលពីអាការនៃជំងឺនេះបានយ៉ាងឆាប់រហ័ស ប៉ុន្តែត្រូវប្រាកដថា ចេកដែលអ្នកយកមកទទួលទាន គឺជាចេកទុំល្អ។

5. ផ្លែប៉ោម
អ្នកនិយមតមអាហារសម្រកទម្ងន់ មុនចូលគេងត្រូវទទួលទានផ្លែប៉ោម 1ផ្លែសម្រាប់ចម្អែតក្រពះ គឺដើម្បីកាត់បន្ថយការឡើងទឹកអាស៊ីតក្រពះ បើអ្នកមានជំងឺទឹកនោមផ្អែម ឬធាត់ពេក អ្នកត្រូវទទួលទានផ្លែប៉ោមពណ៌បៃតងទើបល្អ។

វិធីការពារជំងឺ រលាកក្រពះរ៉ាំរ៉ៃ ដំបៅក្រពះ មហារីកក្រពះ និងជំងឺច្រាលទឹកអាស៊ីតក្រពះ
1. ត្រូវពិនិត្យ និងព្យាបាលឱ្យជាដាច់នូវមេរោគ ដែលជាដើមហេតុដ៏ធំក្នុងការបង្កជំងឺមហារីក ដំបៅក្រពះ ឈាមក្រពះ ឬរលាកក្រពះរ៉ាំរ៉ៃ។
2. ត្រូវទំពាអាហារឱ្យម៉ដ្ឋល្អ ហើយត្រូវទទួលទានទឹកឱ្យបានមួយកែវផង ដើម្បីឱ្យអាហាររំលាយបានល្អ និងបន្សាបទឹកអាស៊ីតបានល្អ។
3. ត្រូវទទួលទានឱ្យយឺតៗ ដោយក្នុងមួយពេលត្រូវចំណាយពេលប្រមាណ15នាទី។
4. ត្រូវទទួលទានអាហារតិចៗ តែច្រើនដង កុំឱ្យទំនេរក្រពះលើសពី3ម៉ោង។
5. ចៀសវាងការទទួលទានអាហារចៀន បំពង និងឆា កុំបំពងខ្ទឹម ដាក់ខ្ទឹមពេលឆាឆ្អិន ហើយកុំប្រើខ្ទឹមលីងដាក់ក្នុងគុយទាវ បបរ និងសម្លម្ជូរ ឬអាហារជូរផ្អាប់។
6. កុំផឹកស្រា ឬគ្រឿងស្រាវឹងផ្សេងៗច្រើន ឬញឹកញាប់ពេក។
7. កុំជក់បារី និងនៅក្បែរអ្នកដែលជក់បារី ឬកុំឱ្យអ្នកជក់បារីនៅក្បែរ។
8. កាត់បន្ថយការបន្ថែមស្ករត្នោត ស្ករស ស្ករពោត ឬស្ករអំពៅក្នុងម្ហូបអាហារ និងកាត់បន្ថយការទទួលទានបង្អែម។
9. ចៀសវាងការទទួលទានត្រីខ សាច់ខ អាហារកំប៉ុង និងអាហារកញ្ចប់។
10. មុនចូលគេងត្រូវចាំឱ្យស្រកពោះសិន ប្រមាណជា1ម៉ោងក្រោយទទួលទានអាហារពេលល្ងាច។
11. មុនចូលគេង ត្រូវលោតតិចៗ ហើយលើកដៃឡើងលើប្រមាណ1ទៅ2នាទីសិន ដើម្បីឱ្យក្រពះដំណើរការបានល្អ៕

March 6, 2019

10យ៉ាងរបស់ “ជីវ៉ាន់ស៊ុយ” អុីចឹងបានជាជនជាតិជប៉ុនចូលចិត្តញ៉ាំេម្ល៉ះ!

បច្ចុប្បន្ននេះនៅឯប្រទេសជប៉ុន “ជីវ៉ាន់ស៊ុយ” បានក្លាយជាបន្លែដែលមនុស្សជាច្រើននាំគ្នានិយមចូលចិត្តទទួលទានយ៉ាងខ្លាំង នាំគ្នាញ៉ាំទាំងក្ដាប់ៗ (ទាំងតម្លៃជីវ៉ាន់ស៊ុយនៅប្រទេសគេមិនមែនថោកៗដូចស្រុកយើងផង) ដល់ថ្នាក់មានអ្នកចម្រៀងប៊យប៊ែនដ៍របស់ជប៉ុនតែងបទចម្រៀងច្រៀងដែលមានឈ្មោះថា “ជីវ៉ាន់ស៊ុយ ហេវិន” (ជីវ៉ាន់ស៊ុយស្ថានសួគ៌) ដែលបង្ហាញអំពីការនិយមចូលចិត្តញ៉ាំជីវ៉ាន់ស៊ុយដ៏ខ្លាំងក្លារបស់ជនជាតិជប៉ុនទៀតផង។

តាមរយៈការចូលចិត្តញ៉ាំជីវ៉ាន់ស៊ុយដ៏ខ្លាំងក្លានេះ ទើបធ្វើឱ្យនៅប្រទេសជប៉ុនមានភោជនីយដ្ឋានដែលល្បីល្បាញរឿងមុខម្ហូបដែលមានបន្លែជីវ៉ាន់ស៊ុយជាចំណែកផ្សំចម្បង មិនមែនគ្រាន់តែហាន់តូចៗរោយពីលើម្ហូបអាហារដូចនៅស្រុកយើងនោះទេ។ ពួកគេនាំគ្នាញ៉ាំជីវ៉ាន់ស៊ុយទាំងបាច់ៗតែម្ដងហើយថែមទាំងមានភោជនីយដ្ឋានដែលលក់តែមុខម្ហូបដែលផ្សំតែពីបន្លែជីវ៉ាន់ស៊ុយសុទ្ធទៀតផង។ ក្រៅពីនេះ មុខម្ហូបជីវ៉ាន់ស៊ុយ ថែមទាំងជាមុខម្ហូបប្រចាំឆ្នាំរបស់ប្រទេសជប៉ុន(ឆ្នាំ2016) ដែលបញ្ជាក់ច្បាស់ពីការនិយមចូលចិត្តញ៉ាំជីវ៉ាន់ស៊ុយរបស់ជនជាតិជប៉ុនយ៉ាងច្បាស់ទៀតផង។បើនិយាយអំពីរសជាតិ ប្រហែលជារឿងពិសេសដោយឡែកពិតៗមិនខាន ព្រោះអ្នកខ្លះអាចនឹងចូលចិត្ត អ្នកខ្លះទៀតអាចនឹងមិនចូលចិត្ត ដូចគ្នានឹងផ្លែទុរេននៅប្រទេសយើងដែរ ដែលអ្នកណាចូលចិត្ត ក៏ចូលចិត្តខ្លាំង តែអ្នកដែលមិនចូលចិត្ត ក៏ស្អប់តែម្ដង ព្រោះរសជាតិ និងក្លិនរបស់វាដែលខ្លាំងក្លា និងជាឯកលក្ខណៈពិសេសដោយឡែកពិតៗហ្នឹងឯង។ តែបើនិយាយអំពីប្រយោជន៍របស់ជីវ៉ាន់ស៊ុយវិញនោះ សូមជម្រាបថាមានច្រើនណាស់ រហូតដល់មិត្តអ្នកអានអាចនឹងត្រូវងាកមកនិយមចូលចិត្តញ៉ាំជីវ៉ាន់ស៊ុយខ្លាំងដូចជនជាតិជប៉ុនដែរមិនខាន។

សារធាតុអាហារនៅក្នុងបន្លែជីវ៉ាន់ស៊ុយ
- វីតាមីន A
– វីតាមីន B
– វីតាមីន C
– សារធាតុដែក
- បេតាឃែរ៉ូធីន
- កាល់ស្យូម និងផ្សេងៗទៀតជាច្រើន។

ប្រយោជន៍ល្អៗរបស់ “ជីវ៉ាន់ស៊ុយ”
1. ជួយបញ្ចុះជាតិស្ករនៅក្នុងឈាម ត្រូវនឹងអ្នកជំងឺទឹកនោមផ្អែម និងអ្នកដែលកំពុងសម្រកទម្ងន់
2. ការពារជំងឺផ្ដាសាយ3. បំបាត់អាការស្រេកទឹក
4. តតាំង ប្រឆាំងមេរោគផ្សេងៗនៅក្នុងពោះវៀន
5. ជួយបណ្ដេញខ្យល់នៅក្នុងក្រពះអាហារ
6. មានសារធាតុប្រឆាំងរ៉ាឌីកាល់សេរី ជួយកាត់បន្ថយភាពប្រថុយប្រថានក្នុងការកើតជំងឺមហារីក
7. ជាឱសថបន្ទន់លាមក ជួយឱ្យបន្ទោបង់ស្រួល
8. បំបាត់អាការវិលមុខ
9. ថែបំប៉នភ្នែក
10. ជួយជំរុញការធ្វើការងាររបស់ឈាម និងសាច់ដុំ

ទោះជាបន្លែជីវ៉ាន់ស៊ុយមានក្លិនហាក់ដូចជាឈួលខ្លាំង តែក៏មិនចាំបាច់ទៅកង្វល់អ្វីដែរ ព្រោះក្លិនរបស់បន្លែជីវ៉ាន់ស៊ុយនេះនឹងត្រូវបញ្ចេញចោលមកតាមទឹកមូត្រហើយបើមិនទទួលទានក្នុងបរិមាណច្រើនជ្រុលពេកទេនោះវានឹងមិនធ្វើឱ្យធុំក្លិនខ្លួនដូចដែលមនុស្សជាច្រើនអាចធ្លាប់បានឮនោះទេតែទោះជាយ៉ាងណាក៏ដោយ ការដែលនាំគ្នាងាកមកទទួលទានបន្លែជីវ៉ាន់ស៊ុយដើម្បីឱ្យទទួលបានប្រយោជន៍ល្អៗដល់រាងកាយនោះ ក៏មិនគួរទទួលទានច្រើនជ្រុលពេកដែរ ព្រោះមិនថាអាហារប្រភេទណាដែលថាល្អៗនោះទេ បើយើងទទួលទានច្រើនជ្រុលពេក ក៏វាហុចគុណវិបត្តិដល់យើងដែរ៕

March 6, 2019

កាសរបស់ Apple AirPods អាចប្រើលួចស្តាប់ការសន្ទនាបាន

នៅក្នុងកំណែទម្រង់ iOS 12 ក្រុមហ៊ុន Apple បានបន្ថែមមុខងារ Live Listen ទៅក្នុងកាស AirPods ដែលមុខងារនេះអាចធ្វើឱ្យ iPhone ក្លាយជាឧបករណ៍ស្រូបសំឡេង និងប្រើកាសស្តាប់។

ក្នុងការបើកដំណើរការមុខងារនេះ អ្នកប្រើប្រាស់ត្រូវចូលទៅកាន់ Settings > Control Center > ចុចយក Customize Controls ហើយចុចយកសញ្ញាបូកនៅក្បែរនឹង icon រូបត្រចៀកដើម្បីបន្ថែមមុខងារទៅកាន់ Control Center។

គណនី Twitter មួយ បានបង្ហោះពីការប្រើប្រាស់កាស AirPods ជាឧបករណ៍លួចស្តាប់បាន ដោយអ្នកប្រើប្រាស់គ្រាន់តែបើកដំណើរការមុខងារ Live Listen ហើយទុក iPhone នៅក្បែរនឹងនរណាម្នាក់ នោះរាល់ការសន្ទនារបស់គេ យើងនឹងអាចស្តាប់ឮបាន។ នេះជាការព្រួយបារម្ភមួយទាក់ទងនឹងព័ត៌មានឯកជន៕

March 6, 2019

Real ធ្លាក់ចេញទាំងអាម៉ាស់ ខណៈ Spurs ទៅវគ្គ 8ក្រុមចុងក្រោយ

ក្រុមម្ចាស់ការពារតំណែងជើងឯក Real Madrid បានធ្លាក់ចេញពីក្របខ័ណ្ឌ Champions League កាលពីថ្ងៃអង្គារ ក្រោយពីបានចាញ់យ៉ាងអាម៉ាស់ក្នុងលទ្ធផល 4-1 នៅលើទឹកដីខ្លួនឯងក្រោមស្នាដៃក្រុម Ajax Amsterdam ដែលបានលុបចោលការចាញ់ក្នុងជើងទី1 ដើម្បីឈានទៅវគ្គ 8ក្រុមចុងក្រោយ ជាមួយនឹងលទ្ធផលឈ្នះទាំង 2ជើង 5-3។

ការរងបរាជ័យដ៏ខកចិត្តនេះ បានបំពេញសប្តាហ៍ដ៏សោកសៅសម្រាប់ក្រុម Real ដែលបានគ្រប់គ្រងយុទ្ធនាការនេះតាំងពីឆ្នាំ2016 ហើយបច្ចុប្បន្ន ពួកគេមិនមាននៅសល់ពានអ្វីដែលត្រូវដណ្តើមយកឡើយនៅរដូវកាលនេះ ក្រោយពីការចាញ់ 2លើកជាប់ៗគ្នាក្រោមស្នាដៃក្រុម Barcelona ដែលបានធ្វើឱ្យពួកគេធ្លាក់ចេញពីពាន Copa del Rey និងបញ្ចប់ក្តីសង្ឃឹមក្នុងការប្រជែងពាន La Liga។

ស្របពេលជាមួយគ្នានេះ លោក Mauricio Pochettino អ្នកចាត់ការទូទៅរបស់ក្រុម Tottenham បានសាទរដល់ក្រុមរបស់លោកសម្រាប់ការនៅតែរក្សាភាពរឹងមាំទល់នឹងការវាយសម្រុករបស់ក្រុម Borussia Dortmund និងបានផ្តួលក្រុមស្ថិតក្នុងក្របខ័ណ្ឌ Bundesliga មួយនេះ ក្នុងលទ្ធផល 1-០ កាលពីថ្ងៃអង្គារ និងទទួលជ័យជម្នះទាំង 2ជើង 4-០ ក្នុងការប្រកួតក្របខ័ណ្ឌ Champions League វគ្គ 16ក្រុមចុងក្រោយ។

គ្រាប់បាល់ស៊ុតបញ្ចូលទីនៅដើមតង់ទី2 របស់ខ្សែប្រយុទ្ធ Harry Kane បានជួយឱ្យក្រុម Spurs ឈ្នះកៅអីទៅលេងក្នុងវគ្គ 8ក្រុមចុងក្រោយជាលើកទី1 ក្នុងចំណោមការដឹកនាំរយៈពេល 5ឆ្នាំរបស់លោក Pochettino ប៉ុន្តែគ្រាប់បាល់នោះបានកើតឡើង ក្រោយពីការសង្គ្រោះបាល់យ៉ាងល្អរបស់អ្នកចាំទី Hugo Lloris ជាបន្តបន្ទាប់ មុនពេលសម្រាកតង់ទី1 ដើម្បីរារាំងមិនឱ្យក្រុម Dortmund បំពេញការវាយបកវិញ។

លោក Pochettino បានឱ្យដឹងថា៖ «វាពិតជាអស្ចារ្យខ្លាំងណាស់ ការងារបានបំពេញបញ្ចប់ហើយ។ យើងកំពុងតែស្ថិតក្នុងវគ្គ 8ក្រុមចុងក្រោយហើយ។ ខ្ញុំគិតថា វាពិតជាការទទួលបានជ័យជម្នះដ៏សំខាន់មែនទែននៅរាត្រីនេះ»៕

March 6, 2019

លោក ប៉ិច ប៉ូឡែន៖ ចង់សម្រេចគោលដៅអភិវឌ្ឍន៍ខ្លាំងក្លា លុះត្រាប្រជាជនមានចរិតល្អ និងប្រសិទ្ធភាពការងារខ្ពស់

អត្តចរិត និងការគិតជាឫសគល់សំខាន់នៃសកម្មភាព និងលទ្ធផលរបស់មនុស្សម្នាក់ៗដែលជាកោសិការបស់សង្គម។ ប្រសិនបើមនុស្សម្នាក់ៗមានអត្តចរិតល្អ ជាមនុស្សដែលមានការទទួលខុសត្រូវខ្ពស់ មានភាពហ្មត់ចត់ ស្មោះត្រង់ និងប្រសិទ្ធភាព នោះសង្គមនឹងទទួលបានការរីកចម្រើនយ៉ាងឆាប់រហ័ស តែប្រសិនបើប្រជាជនមិនគោរពពេលវេលា មិនចេះធ្វើការជាក្រុម ឬនិយាយដោយខ្លីថា អត្តចរិតមិនទាន់ល្អ នោះការអភិវឌ្ឍទៅរកគោលដៅសំខាន់ណាមួយក៏មានការលំបាកទៅតាមនោះដែរ។

លោក ប៉ិច ប៉ូឡែន អគ្គនាយកនៃក្រុមហ៊ុនវេសឡាញ អេឌ្យូខេសិន គ្រុប បានលើកឡើងថា វិស័យធនធានមនុស្ស គឺជាចំណុចសំខាន់មួយក្នុងការសម្រេចគោលដៅអភិវឌ្ឍន៍ឱ្យក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ2030 និងប្រទេសដែលមានចំណូលខ្ពស់នៅឆ្នាំ2050 ព្រោះនៅពេលដែលប្រជាជនមានកម្រិតនៃការយល់ដឹងល្អ មានផលិតភាពការងារខ្ពស់ នៅពេលនោះយើងអាចមានភាពជាម្ចាស់ការ និងមានឱកាសទាញយកការងារសំខាន់ៗបានជាច្រើនទៀត។ ក្រោយពេលយើងទាញបានឱកាសការងារ និងឱកាសអាជីវកម្មរបស់យើង ធ្វើឱ្យចំណូលរបស់យើងម្នាក់ៗកើនឡើង ដែលរុញច្រាន GDP ឱ្យកើនឡើងពីជាង1,000ដុល្លារក្នុង 1ឆ្នាំ ទៅជាង3,000ដុល្លារ និងកើនឡើងខ្ពស់ជាងនេះជាដើម។

លោក ប៉ិច ប៉ូឡែន បាននិយាយថា៖ “បច្ចុប្បន្ននេះយើងឃើញថា មានបងប្អូនយើងខ្លះទៅបរទេសដើម្បីទិញទំនិញមកលក់បន្ត ហើយនៅថ្ងៃអនាគតការរីកចម្រើនកាន់តែខ្លាំង ការប្រកួតប្រជែងកាន់តែខ្លាំង ដែលធ្វើឱ្យទំនិញខ្លះយើងលែងនាំចូលមកបានទៀត គឺគេយកមកលក់ដល់ទីផ្សាររបស់យើងផ្ទាល់តែម្តង ហេតុនេះយើងត្រូវអភិវឌ្ឍសមត្ថភាព និងបង្កើនភាពម្ចាស់ការលើទីផ្សាររបស់យើង”។

អ្នកជំនាញអប់រំខាងលើបានលើកឡើងផងដែរថាដើម្បីទទួលបានភាពជាម្ចាស់ការនេះ លុះត្រាតែយើងម្នាក់ៗមានអត្តចរិត និងផ្នត់គំនិតល្អជាមុនសិន។ មូលហេតុសំខាន់ដែលយើងគួររៀបចំអត្តចរិត និងបន្តបណ្តុះក្មេងៗជំនាន់ក្រោយឱ្យមានអត្តចរិត និងផ្នត់គំនិតល្អនោះ ព្រោះវាជាផ្នែកសំខាន់មួយដែលភាគីសំខាន់ៗទាំងអស់បានលើកឡើង។ យើងអាចមើលឃើញបានតាមរយៈរបាយការណ៍របស់ធនាគារពិភពលោក ធនាគារអភិវឌ្ឍន៍អាស៊ី និងរបាយការណ៍ក្នុងប្រទេសយើង យើងឃើញថា ភាពរួមគ្នាមួយដែលជាកត្តាប្រឈមសម្រាប់ប្រជាជនកម្ពុជា គឺនៅខ្វះភាពជាអ្នកដឹកនាំ ការធ្វើការងារជាក្រុម ការទំនាក់ទំនង និងការដោះស្រាយបញ្ហាជាដើម។ ចំណុចទាំងអស់នេះបើស្ដាប់មួយភ្លែតគឺ មិនសូវអាក្រក់ស្តាប់ពេកទេ តែបើយើងយកមកពិចារណាតែបន្តិចយើងនឹងដឹងថា គេចង់ថាឱ្យយើងនៅមិនទាន់មានចរិតល្អនៅឡើយហ្នឹងឯង។ ហេតុនេះយើងត្រូវតែធ្វើការផ្លាស់ប្តូរឱ្យកាន់តែប្រសើរឡើង ដើម្បីចូលរួមចំណែកយ៉ាងសំខាន់ក្នុងការអភិវឌ្ឍសង្គម កុំឱ្យគេបន្តវាយតម្លៃមិនល្អមកលើយើងតទៅទៀត។

លោក ប៉ូឡែន បានលើកឡើងផងដែរថា មូលហេតុនេះហើយទើបយើងនាំចូលកម្មវិធីទម្លាប់ទាំង7 ដ៏មានប្រសិទ្ធភាព (7 habits for highly effective people) និងកម្មវិធី Leader in me មកកម្ពុជាដើម្បីព្យាយាមផ្លាស់ប្តូរគ្រប់លទ្ធភាពដល់ប្រជាជនកម្ពុជាឱ្យលុបបំបាត់ទម្លាប់អវិជ្ជមានចាស់ៗចោល ហើយបង្កើតទម្លាប់ថ្មីដើម្បីលើកតម្លៃរបស់យើងឡើងវិញ។ កន្លងមកបញ្ហាដែលយើងគ្រប់គ្នាសុទ្ធតែបានដឹងគឺ ប្រជាជនយើងខ្លះមិនទាន់មានទម្លាប់នៃការទទួលខុសត្រូវល្អ និយាយមិនច្បាស់លាស់ គ្មានផែនការក្នុងការធ្វើការ ព្រោះមានអ្នកខ្លះដល់ពេលចូលធ្វើការហើយទើបរកនឹកថា ថ្ងៃនេះត្រូវធ្វើអ្វី ហើយសម្បីតែផែនការជីវិតក៏គ្មានដែរដែលធ្វើឱ្យពួកគេលំបាកក្នុងការអភិវឌ្ឍខ្លួន។ ដោយសារតែមូលហេតុនេះហើយទើបយុវជនយើងមួយចំនួនមានតែបំណង តែប៉ងអ្វីបរាជ័យនោះ និងមិនចេះបែងចែកចំណុចអាទិភាពសម្រាប់ការងារ គ្រួសារ និងការរស់នៅជាដើម។ លើសពីនេះទៅទៀតមានមនុស្សខ្លះឆ្នើមតែបុគ្គល តែមិនចេះធ្វើការងារជាក្រុម ដាក់ចូលក្រុមណា ឈ្លោះគ្នាក្រុមនោះ ជាដើម។

លោក ប៉ិច ប៉ូឡែន បាននិយាយថា៖ “បញ្ហាប្រឈមមួយផ្សេងទៀតដែលជាចំណុចអវិជ្ជមាន គឺប្រជាជនយើងខ្លះទទួលផ្នត់គំនិតចង់ចាញ់ចង់ឈ្នះតាំងពីតូចមិនចេះស្តាប់គ្នា ហេតុនេះហើយទើបធំឡើងពេលធ្វើការងារចង់មានបានតែឯង បំបាក់គ្នាយកតែឈ្នះ ដែលជាហេតុធ្វើឱ្យយើងមិនអាចរីកចម្រើនជាមួយគ្នាបាន។ ដោយមើលឃើញពីកត្តាទាំងនេះហើយ ទើបសាលាយើងមិនបង្រៀនឱ្យមានលេខ1 លេខ2 នោះទេ គឺយើងចង់បណ្តុះគំនិតពួកគេឱ្យខំប្រឹងតែមិនមែនចង់ចាញ់ចង់ឈ្នះនោះទេ”។

ពាក់ព័ន្ធនឹងអ្នកធ្វើការងារវិញ លោក ប៉ិច ប៉ូឡែនបានលើកឡើងផងដែរថា ដោយសារតែយើងមានទម្លាប់មិនសូវល្អ និងស្ថានភាពអសកម្មទាំងនេះហើយទើបធ្វើឱ្យពេលខ្លះទាំងបុគ្គលិករដ្ឋ និងឯកជន នៅមានបញ្ហាប្រសិទ្ធភាពការងារ ព្រោះធ្វើការច្រើនតែម៉ោង តែលទ្ធផលទទួលបាននៅទាបនៅឡើយ ដែលជាចំណុចលំបាកក្នុងការជំរុញឱ្យមានការកើនប្រាក់ចំណូល ដែលឈានទៅដល់ស្ថានភាពលំបាកក្នុងការសម្រេចគោលដៅអភិវឌ្ឍន៍។ ហេតុនេះដល់ពេលហើយ ដែលយើងត្រូវធ្វើការផ្សព្វផ្សាយ និងបណ្តុះទម្លាប់ល្អឡើងវិញឱ្យបានទូទាំងប្រទេស ដោយសហការគ្រប់លទ្ធភាព ដើម្បីសម្រួលដល់គ្រឹះស្ថានអប់រំ និងស្ថាប័ននានាទទួលបានកម្មវិធីល្អៗជាច្រើនសម្រាប់ជាប្រយោជន៍សម្រាប់បុគ្គលិកផង សម្រាប់ស្ថាប័នផង និងសម្រាប់សង្គមផង ព្រោះក្រោយពេលបុគ្គលិកមានទម្លាប់ល្អ គាត់នឹងមានភាពទទួលខុសត្រូវច្រើនជាងមុន ការងារល្អជាងមុន ការចំណាយរបស់ស្ថាប័នលើភាពខ្ជះខ្ជាយក៏តិចជាងមុនដែរ ដែលធ្វើឱ្យយើងម្នាក់ៗអាចពង្រីកខ្លួន និងចូលរួមអភិវឌ្ឍបានយ៉ាងល្អ៕

March 6, 2019

គូស្នេហ៍សិល្បៈច្រើនគូ ធ្លាយរឿងអាថ៌កំបាំងក្នុងថ្ងៃសម្ពោធរឿង«លោកប្តី»

ផលិតកម្មអិលឌីភាពយន្តបានដាក់សម្ពោធជាផ្លូវការនូវវណ្ណកម្មថ្មីរឿង «លោកប្តី»ក្រោមវត្តមានតារាចូលរួម អ្នកនាង ចន ចន្ទ័លក្ខិណា និងស្វាមី លោក ឡេង ណាវ៉ាត្រា និងភរិយា លោកតា វ៉ិច ទ័រ និងភរិយា កញ្ញា ដេនី ក្វាន់ និងគូស្នេហ៍ លោក មួន ម៉ារ៉ា និងភរិយា លោក រ៉ូណាន លោក ទ្រី តារាវុធ កញ្ញា សម សុជាតារ៍ លោក ឈុន សុវណ្ណភក្តី និង សុវណ្ណ រ៉ាផា កញ្ញា នីឡា កញ្ញា ចាន់ថា នាយគ្រឿន លោក សឿន វិតា សុខ ស្រីលក្ខណ៍ និងស្វាមី ព្រមទាំងតួជាច្រើនទៀត នាបរិវេណរោងភាពយន្តទំនើប ស្ថិតនៅក្នុងផ្សារទំនើបអ៊ីអន១។

យប់មិញនេះ អ្នកនាងខ្ញុងបានបង្ហាញវត្តមាន ដែលធ្វើឱ្យទស្សនិកជនចាប់អារម្មណ៍ចំពោះអ្នកនាងយ៉ាងខ្លាំង ដោយសារតែអ្នកនាងតួអង្គសំខាន់នៅក្នុងរឿងនេះផង និងទើបតែបង្ហាញមុខមាត់ថ្មី ក្រោយពីកែច្រមុះ។ នាងបានប្រាប់ឡារ៉ែនថា នាងសម្រេចចិត្តសម្តែងរឿង«លោកប្តី» គឺព្រោះតែចង់បង្ហាញឱ្យបុរសទាំងឡាយ គួរពិចារណាគិតដល់ចិត្តប្រពន្ធផង ធ្វើអ្វីត្រូវយល់គ្នា។ ក្នុងសាច់រឿងនោះ នាងដើរតួឆាល់ដែរ តែទប់អត់ជាប់ជាមួយប្តី ដែលខូចពោរពេញដោយល្បិចច្រើនបំផុត។ ខ្ញុងបន្តថា មនុស្សស្រីជាមេផ្ទះ ទោះបែបណា គឺទ្រាំ ហើយចុងបញ្ចប់ប្តីដឹងខ្លួនកែ តែនៅឆ្លៀតខិលខ្លះៗ យ៉ាងណាក៏គិតពីប្រពន្ធ និងកូនឱ្យច្រើន។

មុនពេលសរសំនួរចាក់ដោតក៏មានការសម្ដែងចម្រៀងពាក់ព័ន្ធនឹង លោកប្ដី ដោយអ្នកនាង ទូច ស្រីលក្ខណ៍ ជាច្រៀងជាកិត្តិយស និងបង្ហាញពីការពេញអំពីសារនិយាយទៅកាន់ស្ត្រី និងស្វាមី។ ក្រៅពីនោះ លោក ពែក មី ដែលសម្ដែងជាតួឯកប្រុសនៅក្នុងរឿង ក៏បានអញ្ជើញគូស្នេហ៍សិល្បៈ ស្វាមីភរិយាមានដូចជា អ្នកនាង ដេននី ក្វាន់និង ស្វាមី លោក ឡេង ណាវ៉ាត្រា និងភរិយា លោកតា វ៉ិច ទ័រ និងភរិយា លោក មួន ម៉ារ៉ា និងភរិយា និងជាច្រើនគូទៀត ឡើងលើឆាកសម្ដែង ដើម្បីឆ្លើយនូវសំនួរចាក់ដោតពីជីវិតគូស្វាមីភរិយា ខណៈដែលស្វាមីដើរលេងក្រៅផ្ទះ និងលួចលាក់មានស្រី ជាដើម។ អ្វីដែលគួរឱ្យចាប់អារម្មណ៍ខ្លាំងឃើញថា គ្រាន់តែបានឮសំនួរភ្លាម ស្វាមីម្នាក់ៗចំហមាត់ថ្លុងតែម្ដង ហើយមើលមុខភរិយារបស់ខ្លួន ព្រោះថា គ្រប់សំនួរសុទ្ធតែត្រូវនឹងសាច់រឿងពិតៗ ( ស្វាមីកំហូចនោះអី ....ហិហិ )។

សូមជម្រាប រឿង«លោកប្តី» និងធ្វើការចាក់បញ្ចាំងជាផ្លូវការនៅថ្ងៃទី7 មីនា ឆ្នាំ2019 ស្អែកនេះតទៅដោយអ្នកស្នេហាជឿទុកចិត្តលើផលិតកម្មអិលឌី អាចទិញ និងកក់សំបុត្រឲ្យហើយ ព្រោះការបញ្ចាំងនេះ ក៏ដើម្បីអបអរទិវាសិទ្ធិនារីអន្តរជាតិ ៨ មិនាផងដែរ។ រឿង«លោកប្តី»ជាភាពយន្តដែលនិយាយពីស្វាមីខិលខួច មានល្បិចដាក់ប្រពន្ធ មិនបានប្រើហឹង្សាអ្វីនោះទេ តែចិត្តស្ត្រីជាប្រពន្ធ គឺគ្រាំចិត្តស្ទើរតែក្អួតឈាម ព្រោះទង្វើប្តីកំហូច។

រូបភាព៖ Neth Udom Princess Little

March 6, 2019

ការអនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែនគោកក្នុងក្របខ័ណ្ឌមហាអនុតំបន់មេគង្គ ត្រូវការពេល2ឆ្នាំទៀត

បើទោះបីជាកិច្ចព្រមព្រៀងដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ (GMS-CBTA) ត្រូវបានចុះហត្ថលេខា និងចូលជាធរមានតាំងពីឆ្នាំ2015 រួចរាល់ក៏ពិតមែន តែការអនុវត្តពេញលេញលើកិច្ចព្រមព្រៀងនេះហាក់ត្រូវបានអូសបន្លាយពេលជាង 2ឆ្នាំទៀត។

កិច្ចព្រមព្រៀងស្តីពីការដឹកជញ្ជូនឆ្លងកាត់ព្រំដែនក្រោមក្របខ័ណ្ឌមហាអនុតំបន់មេគង្គ (GMS-CBTA) មានប្រទេស6 ជាសមាជិក ក្នុងនោះរួមមាន វៀតណាមកម្ពុជា ឡាវ មីយ៉ាន់ម៉ា ថៃ និងចិន។ កិច្ចព្រមព្រៀងនេះនឹងជួយលុបបំបាត់ឈ្មួញកណ្តាល បង្កើន និងលើកកម្ពស់សកម្មភាពពាណិជ្ជកម្មដោយកាត់បន្ថយចំនួនពេលវេលាដែលចំណាយក្នុងការឆ្លងកាត់ព្រំដែន។ កិច្ចព្រមព្រៀងស្តីពីការដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ (GMS-CBTA) នឹងអនុញាតឱ្យប្រទេសជាសមាជិកនីមួយៗ អាចប្រើប្រាស់រថយន្តបានចំនួន 500គ្រឿង សម្រាប់ការដឹកជញ្ជូនឆ្លងកាត់គ្នាទៅវិញទៅមកតាមច្រកព្រំដែនដែលបានកំណត់។

លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ថា ការអនុវត្តកិច្ចព្រមព្រៀង GMS-CBTA នេះមិនទាន់អាចធ្វើបានទាំងស្រុងនៅឡើយទេ ពោលគឺប្រទេសមួយចំនួនក្នុងមហាអនុតំបន់មេគង្គ ដូចជា ឡាវ និងមីយ៉ាន់ម៉ា មិនទាន់បើកច្រកព្រំដែនរបស់ខ្លួនចំពោះការដឹកជញ្ជូនឆ្លងកាត់នៅឡើយ ដោយប្រទេសទាំង2 នេះស្នើសុំរយៈពេល 2ឆ្នាំទៀត។

យ៉ាងណាមិញ ប្រទេសកម្ពុជាដែលប្រកាសថា ខ្លួនបានត្រៀមរួចរាល់អស់ហើយក្នុងការបើកច្រកព្រំដែន ដើម្បីឱ្យមានការដឹកជញ្ជូនឆ្លងកាត់ពីបណ្តាប្រទេសនៅក្នុងមហាអនុតំបន់មេគង្គនោះ ក៏មិនទាន់មានរថយន្តគ្រប់គ្រាន់ចំនួន 500គ្រឿងដើម្បីដឹកជញ្ជូនទំនិញ និងអ្នកដំណើរទៅកាន់ប្រទេសក្នុងមហាតំបន់មេគង្គនោះដែរ។ នេះបើយោងតាមអ្នកនាំពាក្យក្រសួងសាធារណការ។

លោក សូរិយា បានថ្លែងថា៖ “ឥឡូវប្រទេសថៃវៀតណាម និងប្រទេសចិន អាចអនុវត្តកិច្ចព្រមព្រៀងបានដោយគេមានរថយន្តគ្រប់ចំនួន 500គ្រឿង ប៉ុន្តែកម្ពុជា បើទោះបីជាបានត្រៀមរួចរាល់ហើយក្ដី តែមិនមានរថយន្តគ្រប់ចំនួន 500គ្រឿងនោះក្នុងការដឹកជញ្ជូនឆ្លងកាត់ប្រទេសទាំងនោះទេ ខណៈពេលដែលប្រទេសមីយ៉ាន់ម៉ាសុំពិចារណា 2ឆ្នាំទៀតដើម្បីអនុញាតឱ្យមានការដឹកញ្ជូនឆ្លងកាត់ប្រទេសរបស់ខ្លួន ខណៈប្រទេសឡាវក៏សុំពេលពិចារណា 2ឆ្នាំទៀតដែរ ដោយលើកហេតុផលថា ផ្លូវខូច ត្រូវការថវិកាជុសជុលផ្លូវខូច និងគិតសេវាដឹកជញ្ជូនឆ្លងកាត់ប្រទេសឡាវ”។

លោក សូរិយា បន្តថា កម្ពុជាបានត្រៀមរួចរាល់អស់ហើយ និងកំពុងតែអនុវត្តកិច្ចព្រមព្រៀងនេះដោយអនុញ្ញាតឱ្យរថយន្តរបស់ថៃចំនួន 500គ្រឿង និងវៀតណាម 500គ្រឿងដឹកញ្ជូនទំនិញ និងអ្នកដំណើរចូលមក និងឆ្លងកាត់កម្ពុជាជារៀងរាល់ថ្ងៃ។

លោកបានបន្តទៀតថា ប្រទេសកម្ពុជាស្ថិតនៅចំកណ្តាលនៃមហាអនុតំបន់មេគង្គ ដូច្នេះកម្ពុជាជាប្រទេស ដែលមានការដឹកជញ្ជូនឆ្លងកាត់ច្រើនពីប្រទេសជិតខាង ដូចជាវៀតណាម និងថៃជាដើម។ លោកបន្ថែមថា ក្រៅពីកិច្ចព្រមព្រៀង GMS-CBTA នេះ កម្ពុជាបានចុះអនុស្សរណៈយោគយល់គ្នាដោយឡែកមួយទៀតជាលក្ខណៈទ្វេភាគី ជាមួយប្រទេសវៀតណាម និងថៃ។

លោកបន្ថែមទៀតថា អនុស្សរណៈយោគយល់គ្នាមួយទៀតជាលក្ខណៈទ្វេភាគីរវាងថៃ និងកម្ពុជា គឺមានរថយន្តចំនួនតែ 150គ្រឿងប៉ុណ្ណោះដែលអាចឆ្លងកាត់ទៅវិញទៅមករវាងកម្ពុជា និងថៃ ដោយប្រើប្រាស់ច្រកព្រំដែនដែនតែមួយប៉ុណ្ណោះ គឺច្រកព្រំដែនអន្តរជាតិ ប៉ោយប៉ែត។ ដោយឡែកកម្ពុជាបានចុះកិច្ចព្រមព្រៀងទ្វេភាគីជាមួយប្រទេសវៀតណាម ដោយបើកចំហឱ្យមានរថយន្ត 500គ្រឿងទៅវិញទៅមក ហើយប្រើប្រាស់ និងបើកច្រកព្រំដែន 6កន្លែង។

លោក ស៊ីន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាមានប្រសាសន៍ថា បណ្តាប្រទេសនៅក្នុង មហាអនុតំបន់មេគង្គបានចុះកិច្ចព្រមព្រៀងរួចរាល់អស់ហើយស្តីពីការដឹកជញ្ជូនឆ្លងកាត់តាមបណ្តាប្រទេសនៅក្នុង GMS នេះ តែដោយឡែកប្រទេសនីមួយៗមិនទាន់បានអនុវត្តពេញលេញនូវកិច្ចព្រមព្រៀងនេះនៅឡើយ ហើយប្រទេសខ្លះមិនចង់អនុវត្តកិច្ចព្រមព្រៀងនេះទៀតផង។

លោកថា ប្រទេសវៀតណាម និង ប្រទេសថៃមានច្បាប់រៀងៗខ្លួន ដែលធ្វើជារនាំងឧបសគ្គ ពីព្រោះប្រទេសនីមួយៗមិនចង់ឲ្យរថយន្ត ឆ្លងកាត់ប្រទេសរបស់ខ្លួន ដោយសារគេគិតថា ខួចផ្លូវ ខាតនេះ ខាតនោះ ប៉ុន្តែជារួមរដ្ឋាភិបាលនៃប្រទេស ជាសមាជិក GMSបានចុះកិច្ចព្រមព្រៀងរួចរាល់ហើយ។

លោក ចន្ធី បានបន្តថា៖ “ខ្ញុំគិតថា បើសិនជាការដឹកជញ្ជូនឆ្លងកាត់ក្នុងបណ្តាប្រទេស GMS បាន វាជារឿងល្អណាស់ ដូចជានៅសហគមន៍អឺរ៉ុបដែលអាចធ្វើឱ្យមានការដឹកជញ្ជូនឆ្លងកាត់ពីប្រទេសមួយទៅប្រទេសមួយបាន ជាពិសេសវាល្អក្នុងការធ្វើពាណិជ្ជកម្ម”។

លោក ចន្ធី បញ្ជាក់ថា៖ “ប្រទេសនីមួយៗនៅតែបង្កនូវឧបសគ្គរៀងៗខ្លួន ដោយលើកពីបញ្ហាលើច្បាប់ទម្លាប់អ្នកបើកបរជាដើម តែជាគោលការណ៍រួម បើអាចធ្វើទៅបាន ចំពោះសេដ្ឋកិច្ចគឺ ពិតជាល្អ ប៉ុន្តែប្រទេសមួយចំនួនមិនមានឆន្ទៈធ្វើនោះទេ ដូច្នេះវានឹងមិនអាចទៅរួចទេក្នុងពេលឆាប់ៗខាងមុខនេះ”។

គួរបញ្ជាក់ថា កម្ពុជានឹងទទួលធ្វើជាម្ចាស់ផ្ទះក្នុងការរៀបចំ និងធ្វើជាប្រធានបន្តវេនតាមលំដាប់តួអក្សរឡាតាំងនូវកិច្ចប្រជុំលើកទី7 នៃគណៈកម្មាធិការរួមសម្រាប់អនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន ក្រោមក្របខណ្ឌមហាអនុតំបន់មេគង្គ និងកិច្ចប្រជុំគណៈកម្មាធិការជាតិសម្រួលការដឹកជញ្ជូនឆ្លងដែនដែលនឹងប្រព្រឹត្តទៅនៅថ្ងៃទី12-13 ខែមីនា ឆ្នាំ2019 ខាងមុខ នៅទីក្រុងសៀមរាប ខេត្តសៀមរាប។

កិច្ចប្រជុំនៅខែក្រោយនេះនៅសៀមរាប យើងនឹងជជែកពីកិច្ចព្រមព្រៀង GMS ដែលបានធ្វើតាំងពីឆ្នាំ2015 ប្រទេសទាំងអស់ផ្តល់សច្ចាប័នហើយ តែប្រទេសមួយចំនួនត្រូវបង្ហើយ ជាពិសេសនៅលើច្រករបៀងឆ្លងកាត់ និងច្រកទ្វារព្រំដែន និងនិតិវិធីផ្សេង និងធ្វើពិធីចុះហត្ថលេខាលើកិច្ចព្រមព្រៀងមួយទៀត ដើម្បីបន្ថែមច្រករបៀង ច្រកទ្វារថែមទៀត៕

March 6, 2019

អតីតតារាកីឡាកាសអាជីព King Kong ស្លាប់ក្នុងវ័យ 61ឆ្នាំ

លោក Christopher Pallies ដែលត្រូវបានគេស្គាល់ថា មានឈ្មោះ King Kong Bundy ក្នុងកីឡាកាសអាជីពនោះ បានស្លាប់កាលពីថ្ងៃចន្ទ ក្នុងវ័យ 61ឆ្នាំ។ នេះបើយោងតាមការប្រកាសរបស់អង្គភាពរៀបចំកីឡាកាសពិភពលោកបែបកម្សាន្តហៅកាត់ថា WWE។

មូលហេតុនេះនៃការស្លាប់នេះនៅមិនទាន់ត្រូវបានប្រកាសឱ្យដឹងភ្លាមៗឡើយ។ លោក Bundy ដែលក៏ទទួលបានរហស្សនាមថា «ខុនដូដើរបាន» ដោយសារតែការមានកម្ពស់ដល់ទៅ 1.9ម៉ែត្រ និងទម្ងន់ 207គីឡូក្រាមរបស់គេនោះ។
«ខុនដូដើរបាន»បានបង្ហាញខ្លួនក្នុងការប្រកួតអាជីពរបស់គេក្នុងឆ្នាំ1981 ដោយការប្រើប្រាស់ឈ្មោះថា Chris Canyon។ Chris Canyon ឬ King Kong Bundy មានភាពល្បីល្បាញក្នុងការប្រកួតវាយដាក់ទ្រុងដែកជាមួយនឹងកីឡាករ Hulk Hogan ក្នុងកម្មវិធី WrestleMania 2 កាលពីឆ្នាំ1986 ខណៈដែលការប្រកួតនោះត្រូវបានឈ្នះដោយកីឡាករ Hogan។ រូបគេក៏ធ្លាប់បានប្រឆាំងនឹងការរាប់ត្រឹមតែ 3លើកផងដែរ ដោយធ្លាប់បានទាមទារឱ្យអាជ្ញាកណ្តាលរាប់ដល់ទៅ 5លើក ដើម្បីបង្ហាញពីភាពខ្លាំងរបស់គេទៅលើគូប្រកួត។

លោក Hogan រួមជាមួយនឹងតារាកីឡាកាសផ្សេងទៀត បានប្រើប្រាស់បណ្តាញសង្គម Twitter កាលពីថ្ងៃអង្គារ ដើម្បីសម្តែងនូវការរំលែកទុក្ខរបស់លោក។ លោកបានឱ្យដឹងថា៖ «King Kong Bundy គឺជាតារាឆ្នើមដ៏អស្ចារ្យកាលពីមុន និងបានបង្កើតការចងចាំដ៏អស្ចារ្យជាច្រើន។ សូមទៅឱ្យបានសុខណា៎ បុរសមាឌធំ»។ Bundy បានបង្ហាញខ្លួនជាលើកទី1 ក្នុងកម្មវិធីប្រកួត WWF និងបានចូលរួមប្រកួតក្នុងកម្មវិធី WrestleMani ជាលើកទី1 នៅលើសង្វៀន Madison Square Garden ក្នុងឆ្នាំ1985។ Bundy ធ្លាប់បានប្រកួតជាមួយនឹងតារាឆ្នើមៗជាច្រើន ក្នុងនោះរាប់បញ្ចូលទាំងកីឡាករ Andre The Giant, The Undertaker, “Million Dollar Man” Ted DiBiaseនិង Bobby “The Brain” Heenan ផងដែរ៕

March 6, 2019

ចូលសិល្បៈរយៈពេលខ្លី អ៊ុក ចំប៉ារ័ត្ន ឡើងកាលីបថតថ្វាយព្រះករុណា

ទើបតែលេចមុខមាត់ក្នុងពិភពសិល្បៈតែមួយរយៈពេលខ្លី តារាសម្ដែង និងជាតារាបង្ហាញម៉ូដ លោក អ៊ុក ចំប៉ារ័ត្ន ហៅ Da Make ត្រូវគេកត់សម្គាល់ថាឈានឡើងកេរ្តិ៍ឈ្មោះយ៉ាងខ្លាំង ដោយបានតំណែងតួឯកក្នុងភាពយន្តនៅប៉ុស្តិ៍លេខ៥គួរឱ្យកត់សម្គាល់នោះផង។ អ្វីដែលកាន់តែសរសើរទៅទៀត គឺលោកត្រូវបានផលិតករជ្រើសឱ្យសម្ដែងបទថ្វាយករុណា ដែលជាទឹកដមសំលេងរបស់តារាចម្រៀង កញ្ញា ទៀង មុំសុធាវី ក្ដៅៗនោះផង។

លោក អ៊ុក ចំប៉ារ័ត្ន និយាយថា ក្នុងចំណោមការសម្ដែងទាំងអស់ដែលលោកបានប្រឡូក លោកហាក់មានអារម្មណ៍ចំពោះការសម្ដែងជាមួយតារាចម្រៀង កញ្ញា ទៀង មុំសុធាវី ជាងការសម្ដែងកន្លងមក ដោយសារតែការសម្ដែងរបស់លោកជាមួយនាង គឺជាកាសម្ដែងក្នុងបទចម្រៀងថ្វាយដល់ព្រះករុណា ដែលលោកបានចាត់ទុកថានោះជាស្នាដៃមួយ ដែលលោកមិនធ្លាប់ថត។ លោកបដិសេធបង្ហើបឱ្យដឹងពីចំណងជើងបទចម្រៀង ដោយគ្រាន់តែអះអាងថា នេះជាបទរបស់ព្រះករុណា និងជាការសម្ដែងដ៍ផ្លួវការមួយ បើធៀបនឹងការសម្ដែងផ្សេងៗ។ ក្នុងនោះសម្រាប់ការសម្ដែងទាំងស្រុង ក៏ត្រូវប្រិតព្រៀងពីក្រុមផលិតករ ដែលធ្វើឱ្យលោកប្រយ័ត្នប្រយែងចំពោះការសម្ដែងរបស់ខ្លួននោះផងដែរ។ អ្វីដែលកាន់តែសប្បាយចិត្តទៅទៀត គឺលោកបានសម្ដែងជាមួយកញ្ញា ទៀង មុំសុធាវី ដែលជាតារាចម្រៀងសំនៀងផ្អែម និងស្រទន់ម្នាក់ ដែលលោកគឺជាហ្វេនជាយូរមកហើយ។

តារាសម្ដែងប្រុសរូបនេះបានអះអាងថា ការងារសម្ដែង នៅក្នុងរយៈពេលចុងក្រោយ បានជួយឱ្យលោកកាន់តែមានកេរ្តិ៍ឈ្មោះបោះសំឡេងជាងមុន ដោយតាំងពីលោកឈានឡើងតួឯកមក គឺមិនមានផលិតករណាម្នាក់ឱ្យលោកសម្ដែងជាតួរាយរងទៀតទេ។ លោកថា មិនមែនរើសអើងមិនថតជាតួកំប៉ុកកំប៉ុកនោះទេ តែបើមានផលិតករទាក់ទង ក៏លោកអាចនឹងមិនថតនោះដែរ បើការសម្ដែងនោះចេញមុខត្រឹមមួយប្លង់ឬ ២ប្លង់ ហើយបានត្រឹមតម្លៃខ្លួនដូចការថតកន្លងមក។ ម្យ៉ាងមកពីលោកកាក់កប និងមមាញឹកនឹងជំនួញលក់ឡាននោះផង ទើបលោកប្រកាសថា បើការសម្ដែងដែលទាក់ទងមកមិនឱ្យតម្លៃដល់ខ្លួន គឺសុខចិត្តទំនេរគួកជេរឡានល្អជាង។ លោកចំប៉ារ័ត្ន បន្ថែមថា នៅក្នុងភាពយន្តលោកបានសម្ដែងច្រើនរឿងមកហើយ ដូចជារឿង”ឈាមស្នេហ៍ក្បត់បេះដូង” រឿង ”ឋានសួគ៍វណ្ណៈ” រឿង”គំនុំស្នេហ៍ភ្លើងអាឃាត” រឿង”លោហិតរនាំងស្នេហ៍” រឿង”ភរិយាឈ្លើយស្នេហ៍” រឿង”បន្តោងខ្សែកពេជ្រ” និងរឿង”ស្នេហ៍បញ្ច្រាសទិស”ជាដើម ដោយការងារបង្ហាញម៉ូដក៍មានទីផ្សារមិនអន់ដែរ៕

March 6, 2019

តើយុវជនយល់យ៉ាងណាអំពីទិវាអំណានជាតិនៅឆ្នាំ2019នេះ?

ទិវាអំណាន ជាទិវាដ៏មានសារៈសំខាន់សម្រាប់សង្គមកម្ពុជា ព្រោះបច្ចុប្បន្នកំពុងត្រូវការធនធានមនុស្សលើគ្រប់ផ្នែកទាំងអស់។ ហេតុនេះការបំផុសឱ្យប្រជាជនចាប់ផ្តើមអាន គឺជាយន្តការដ៏សំខាន់មួយដែលកំពុងស្ថិតក្នុងការយកចិត្តទុកដាក់របស់ស្ថាប័នពាក់ព័ន្ធនានា។

នៅថ្ងៃទី18 ខែមីនា ឆ្នាំ2019 ខាងមុខនេះកម្ពុជានឹងប្រារព្ធទិវាអំណានធំប្រចាំឆ្នាំ ស្របទៅតាមអនុក្រឹត្យបង្កើតទិវាអំណានជាតិឆ្នាំ2015 ដែលកំណត់យកថ្ងៃទី18 ខែមីនា រៀងរាល់ឆ្នាំជាទិវាអំណាន ដែលថ្ងៃនេះគឺត្រូវចំនឹងថ្ងៃកំណើតរបស់សម្តេចព្រះមហាសង្ឃរាជ ជួន ណាត ដែលត្រូវបានគេស្គាល់ថា ជាស្ថាបនិកដ៏សំខាន់លើវិស័យអក្សរសាស្ត្រជាតិ។

ស្ថាបនិក My BOOKSHOPCambodia លោក ប៊ួយ សុធន យល់ឃើញថា ទិវាអំណានជាតិ គឺជាព្រឹត្តិការណ៍ជាវិជ្ជមានមួយដែលជំរុញឱ្យប្រជាជនកម្ពុជាកាន់តែច្រើនចូលចិត្តអាន។ ដើម្បីលើកស្ទួយការអាន នៅកម្ពុជាយើងត្រូវការធាតុផ្សំជាច្រើន ក្នុងនោះការរៀបចំព្រឹត្តិការណ៍ថ្នាក់ជាតិ គឺជាយន្តការមួយសំខាន់ក្នុងចំណោមកត្តាគន្លឹះសម្រាប់អភិវឌ្ឍការអាននៅកម្ពុជា។ បច្ចុប្បន្ននេះថ្វីដ្បិតតែចំនួននាក់អាននៅកម្ពុជានៅមានកម្រិតក៏ពិតមែន តែចំនួនអ្នកចាប់អារម្មណ៍ពីការអានមានការកើនឡើង ហេតុនេះទិវាអំណានជាតិឆ្នាំនេះអាចនឹងមានកំណើនអ្នកចូលរួមច្រើនជាងឆ្នាំមុនៗ តែទន្ទឹមនឹងនេះក៏សូមឱ្យមានការរៀបចំ និងច្នៃប្រឌិតឱ្យបានកាន់តែទាក់ទាញឡើង បើទោះបីជាមានមនុស្សចូលរួមច្រើនហើយក៏ដោយ។

លោក ប៊ួយ សុធន បាននិយាយថា៖ “ការចែកសៀវភៅ និងសកម្មភាពច្នៃប្រឌិតនៅក្នុងព្រឹត្តិការណ៍ធំៗពាក់ព័ន្ធនឹងអំណាន គឺជារឿងល្អមួយដែលអាចទាក់ទាញមនុស្សឱ្យបានចូលរួមកាន់តែច្រើន។ សកម្មភាពបែបនេះ គឺជារឿងវិជ្ជមាន ព្រោះពេលខ្លះគោលបំណងសំខាន់ មិនមែនគ្រាន់តែទៅចូលរួមកម្មវិធីនោះទេ តែគាត់អាចទៅដើម្បីកម្សាន្ត ឬចង់បានសៀវភៅ ហើយអ្វីដែលសំខាន់នោះ យ៉ាងហោចណាស់ក៏យើងអាចទាក់ទាញមនុស្សថ្មីៗដែលមិនទាន់ចាប់អារម្មណ៍លើការអានឱ្យចូលទៅក្នុងបរិស្ថានល្អមួយ និងកាន់តែយល់ច្បាស់ពីផលប្រយោជន៍នៃអំណានដែរ”។

លោក សុធន ក៏បានលើកឡើងផងដែរថា ព្រឹត្តិការណ៍ដ៏មានសារៈសំខាន់នេះក៏ជាផ្នែកយ៉ាងសំខាន់មួយសម្រាប់ជួយដល់អ្នកនិពន្ធផងដែរ ព្រោះវាជាឱកាសក្នុងការតាំងបង្ហាញសៀវភៅល្អៗ និងជាទីផ្សារដ៏សំខាន់មួយផងដែរសម្រាប់ឱ្យប្រជាជនបានស្គាល់ស្នាដៃរបស់អ្នកនិពន្ធថ្មី។

សហស្ថាបនិកបណ្ណាគារមួយរូប លោក ហម សុខនី បានបង្ហាញការយល់ឃើញថា លោកគាំទ្រឱ្យមានការប្រារព្ធទិវាអំណាននេះ ហើយវាក៏ជាព្រឹត្តិការណ៍នៃការចងចាំមួយដែលបានដាស់ស្មារតីប្រជាជនថា ប្រទេសកម្ពុជាយើងមានទិវាដ៏ពិសេសមួយជារៀងរាល់ឆ្នាំ គឺទិវាអំណានជាតិ។ ទិវានេះក៏ជាឱកាសមួយល្អផងដែរសម្រាប់អាណាព្យាបាលដែលចង់ឱ្យកូនក្លាយជាមនុស្សពូកែ និងមានទម្លាប់ល្អនៅថ្ងៃអនាគត ព្រោះគាត់អាចនាំកូនឱ្យឃើញពីពិភពដ៏ធំមួយដែលពោរពេញទៅដោយមនុស្សស្រឡាញ់ការអប់រំ។ ការនាំកូនតូចៗទៅកាន់ទិវាអំណាន ជាការអប់រំដោយផ្ទាល់ដើម្បីឱ្យក្មេងរីករាយជាមួយនឹងការអាន ហើយជំរុញឱ្យប្រជាជនខ្មែរជំនាន់ថ្មីកាន់តែច្រើនចូលចិត្តអាន និងក្លាយជាធនធានមនុស្សដែលមានចំណេះដឹង ទាំងផ្នែករឹង និងទន់។

លោក ហម សុខនី និយាយថា៖ “នៅពេលក្មេងតូចៗចូលចិត្តអាននោះ ពួកគេនឹងអាចទទួលបានចំណេះដឹងពីផ្នត់គំនិតអប់រំជាច្រើនដែលបង្កប់នៅក្នុងស្នាដៃនិពន្ធទាំងប្រលោមលោក សៀវភៅកុមារ សៀវភៅអប់រំ ឬសៀវភៅស្តីពីជំនាញក៏ដោយ”។

កញ្ញា ប៉ា សុខេង ជាអ្នកស្រឡាញ់ការអានមួយរូបបានលើកឡើងថា ការរៀបចំទិវាអំណានជាតិលើកទី4 នេះនឹងមានភាពផុសផុល និងប្រសិទ្ធភាពជាងមុន ព្រោះមួយរយៈពេលចុងក្រោយនេះមានការពេញនិយមការអានសៀវភៅច្រើនដែលយើងទាំងអស់គ្នាសុទ្ធតែបានមើលឃើញថា កម្មវិធីធំៗនានាមានកំណើនល្អ។ ចំណុចដែលនាំឱ្យមានកំណើនអ្នកចូលរួមនេះព្រោះមានសារព័ត៌មានចុះផ្សព្វផ្សាយយ៉ាងផុសផុល ហើយសម្រាប់ឆ្នាំនេះក៏មានសារាចរណែនាំពីរាជរដ្ឋាភិបាលឱ្យមានការផ្សព្វផ្សាយកាន់តែទូលំទូលាយឡើងដើម្បីបញ្ជ្រាបការយល់ដឹងដល់យុវជនលើអំណានឱ្យកាន់តែមានប្រសិទ្ធភាពផងដែរ។ ក្នុងសារាចរក៏បានកំណត់ពីផែនការសកម្មភាពមួយចំនួនដែលក្រសួង ស្ថាប័នពាក់ព័ន្ធ មានដូចជាក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ រួមទាំងក្រសួងព័ត៌មានគួរធ្វើដើម្បីជំរុញវិស័យអំណាន៕

March 5, 2019

Category: សង្គម និងសេដ្ឋកិច្ច