សង្គម និងសេដ្ឋកិច្ច - La Reine Media

អាន វិសាល ត្រូវក្រុមក្មេងស្ទាវព្រួតគ្នាវាយមួយញញួរបែកក្បាល បែរជាសុខចិត្តសំងំស្ងៀមលាក់ព័ត៌មាន

ថ្មីៗនេះមានរឿងរ៉ាវភ្ញាក់ផ្អើលយ៉ាងខ្លាំងនៅក្នុងបណ្តាញសង្គមហ្វេសប៊ុក ដោយមានការស៊ែរតៗគ្នាយ៉ាងច្រើនទាក់ទងនឹងករណី តារាចម្រៀងប្រុសនៅក្នុងផលិតកម្ម M គឺលោក អាន វិសាល ត្រូវបានក្រុមក្មេងស្ទាវព្រួតគ្នាវាយមួយញញួរចំក្បាលមកលើរូបលោក បណ្តាលឱ្យបែកក្បាលហូរឈាមស្រោចខ្លួនតែម្តង។

ហេតុការណ៍នេះបានកើតឡើងនៅវេលាម៉ោង11 និង30នាទីយប់ថ្ងៃ7 ខែមីនា ឆ្នាំ2019 តាមបណ្ដោយ នៅផ្លូវលេខ 113 ស្ថិតក្នុងសង្កាត់បឹងកេងកងទី2 ខណ្ឌចំការមន រាជធានីភ្នំពេញ។ ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញលោក អាន វិសាល បានធ្វើដំណើរជិះម៉ូតូ សេដេ ចុះទៅទិញអីហូប ស្រាប់តែពេលនោះមានក្រុមក្មេងស្ទាវជិះម៉ូតូមកជិះគាត់បើករ៉េពេញផ្លូវ ហើយពេលនោះលោក អាន វិសាល បានប្រាប់ទៅក្រុមក្មេងស្ទាវកុំឲ្យជិះម៉ូតូលឿនៗពេកខ្លាចប៉ះគេបង្កជាគ្រោះថ្នាក់ ក៏ស្រាប់តែក្រុមក្មេងស្ទាវខឹង ជិះមកឈប់នៅមុខតូបលក់ឥវ៉ាន់នោះ ដែលគេស្គាល់ថា ជាកន្លែងម្តាយរបស់ក្មេងស្ទាវនោះ ហើយដើរចូលទាញញញួរវាយមកលើលោក អាន វិសាល បណ្តាលឱ្យបែកក្បាលហូរឈាមតែម្តង។ឭ

ការបកស្រាយបង្ហោះពីលោក ចាន់ មករា អ្នកផលិតស្ពត និងជាគូស្នេហ៍កញ្ញា ដេនី ក្វាន់ បានបង្ហោះថា លោក អាន វិសាល បែកក្បាលដោយសារត្រូវគេវាយក្បាលនឹងញញួរ។ លោកបានបង្ហោះថា ”តារាចម្រៀង អាន វិសាល ត្រូវគេវាយក្បាលនឹងញញួរ ម្ចាស់ខ្លួន (អាន វិសាល) បែរជាសុខចិត្ត សំងំស្ងៀម ព្យាយាមលាក់ព័ត៌មានទៅវិញ។ តោះជួយshare និង ជួយឈឺឆ្អាល ដើម្បីជួយគាត់ផង។ ទោះបីគាត់មិនចង់ Ann Visal II”។ ការបង្ហោះរបស់សាមីខ្លួន និងលោក ចាន់ មករា ធ្វើឱ្យម្នាក់ៗមានការភ្ញាក់ផ្អើលយ៉ាងខ្លាំង ខណៈដែលម្ចាស់បទ«ទឹកភ្នែកខ្ទើយ»រូបនេះ នៅមិនទាន់ចេញមុខបកស្រាយនៅឡើយ ក្រៅពីឆ្លើយតបអ្នក Comment ថាលោកឈឺក្បាលយ៉ាងខ្លាំង ក្រោយត្រូវវាយបែកក្បាលហូរឈាម។ លោក ចាន់ មករា បានទទូចឱ្យមានការអន្តរាគមន៍ជួយដល់លោក អាន វិសាល ដោយលោកអះអាងថា លោក អាន វិសាល ពិតជាគួរឱ្យសង្វេគក្រោយធ្លាក់ប្រជាប្រិយភាព។

លោក អាន វិសាល ទៅបានគេដឹកទៅសង្គ្រោះនៅមន្ទីរពេទ្យភ្លាមៗ តែនៅមិនទាន់ដឹងថានឹងមានសភាពបែបណាឡើយក្នុងពេលនេះ៕

March 9, 2019

មិនអន់ជាង ឱក សុគន្ធកញ្ញា!!! ព្រាប សុវត្ថិ រឹតតែខ្លាំងក្នុងព្រឹត្តិការណ៍”ឋានព្រះឥន្ទ” នៅប៉ោយប៉ែត

លើសពីឱក សុគន្ធកញ្ញា ដែលធ្វើឱ្យកក្រើកពិធីជប់លៀង អមដោយបើកសម្ពោធគម្រោងលក់ចម្ការមិនធ្លាប់មាននៅក្នុងប្រទេសកម្ពុជាកាលពីយប់ថ្ងៃទី27 ខែកុម្ភៈ នៅភ្នំពេញ តារាចម្រៀងល្បីល្បាញលោក ព្រាប សុវត្ថិ ឯណោះវិញ គឺរឹតតែធ្វើអោយកញ្ជ្រោលព្រឹត្តិការណ៍ដែលមានឈ្មោះថា”ឋានព្រះឥន្ទ” ដែលបានធ្វើនៅក្រុងប៉ោយប៉ែត កាលពីថ្ងៃទី7 ខែមីនា នោះទៅទៀត។ គ្រាន់តែមានការប្រកាសថា លោកឡើងឆាកមិនទាន់ទាំងបកស្រាយបទចម្រៀង គឺមានអ្នកគាំទ្រឡោមព័ទ្ធកកកុញពេញឆាកតែម្ដង។

លោក ព្រាប សុវត្ថិ ដែលត្រូវគេស្គាល់ថាជាម្ចាស់គម្រោងដីឡូតិ៍មួយរូបដែរ បានអះអាងថា គឺជាដំណឹងល្អខ្លាំងណាស់ ដែលប្រទេសកម្ពុជាមានក្រុមហ៊ុនស្របច្បាប់ពុះលក់ចម្ការជាហិកតារារ ហើយថែមទាំងមានសេវាបង់រំលោះមិនគិតការប្រាក់ និងមានទាំងការមើលថែដំណាំឱ្យផងដោយមិនបាច់ខ្វល់រឿងដាំដុះខ្លួនឯង។ លោកទទូចឱ្យគាំទ្រគម្រោងមួយនេះ ដើម្បីលើកស្ទួយដល់វិស័យកសិកម្មនៅកម្ពុជា ក៏ដូចជាដើម្បីមានចម្ការដែលជាកំណប់ទ្រព្យតកូនតចៅ។ លោកថា ជារឿងសប្បាយចិត្តណាស់ ដែលលោកបានច្រៀងបើកសម្ពោធគម្រោងលក់ចម្ការដូងក្រអូបរបស់ក្រុមហ៊ុននេះស្ថិតនៅខេត្តសៀមរាប ដោយកាន់តែសប្បាយ នៅពេលគ្រាន់តែឡើងឆាកភ្លាម ក៏មានម្ចាស់ចម្ការយ៉ាងកុះករមកគាំទ្រលោកពេញមុខឆាក។

លោក ហង្ស ព្រីន្សយ៉ា ម្ចាស់គម្រោង និងជាប្រធានគម្រោងឈ្មោះឋានព្រះឥន្ទ បានអះអាងថា ក្រោយពីលោកទទួលជោគជ័យក្នុងគម្រោងពុះលក់ចម្ការធុរ៉េន ចម្ការបឺ និងចម្ការដូងក្រអូប នៅខេត្តពោធិសាត់ មណ្ឌលគីរី និងកំពត ពេលនេះក្រុមហ៊ុនរបស់លោកសម្រេចបើកលក់ចម្ការដូងក្រអូបនៅខេត្តសៀមរាប ក្នុងគម្រោងទី8ទៀតហើយ ដោយធ្វើពិធីសម្ពោធនៅក្រុងប៉ោយប៉ែត ក្រោមវត្តមានអភិបាលក្រុង និងតារាល្បីៗរួមមានលោក ព្រាប សុវត្ថិ នាយពែកមី និងក្រុមកំប្លែងល្បីៗ។

លោកថាគម្រោងនេះ ត្រូវបានប្រកាសលក់ បន្ទាប់ពីក្រុមហ៊ុប្រមូលទិញដីចម្ការពីពលរដ្ឋនៅឃុំស្លែង ស្រុកស្រីស្នំ ខេត្តសៀមរាប បានជាង1ពាន់ហិកតារ ហើយសម្រេចដាំជាចម្ការដូងក្រអូប ស្របតាមសណ្ឋានដី ដើម្បីពុះជាឡូតិ៍លក់វិញ ដោយក្នុងមួយឡូតិ៍មានទំហំ50ម៉ែត្រ គុណនឹង200ម៉ែត្រ ស្មើនឹងមួយហិកតារ ដោយលក់ក្នុងតម្លៃដី14000 និងតម្រូវឱ្យបង់រំលោះ ដោយគ្មានតម្កល់ប្រាក់កក់ ឬ ឯកសារ។ អ្វីដែលសំខាន់គឺក្រុមហ៊ុនធានាផ្ដល់ប្លង់រឹងពេលបង់រំលោះចប់ និងធានាមើលថែផលដំណាំឱ្យពេញរយៈពេល4ឆ្នាំ ដោយក្រោយ4ឆ្នាំគឺមើលថែខ្លួនឯង ឬ ម៉ៅផ្លែឱ្យក្រុមហ៊ុនមើលថែ៕

March 9, 2019

តើគួរទិញដីនៅក្បែរព្រលានយន្តហោះ ឬមិនគួរទិញ?

ស្របពេលដែលរាជរដ្ឋាភិបាលបានប្រកាសបង្កើតគណៈកម្មការសិក្សាគម្រោងសាងសង់ព្រលានយន្តហោះថ្មីនៅក្នុងទឹកដីនៃខេត្តកណ្តាលរួចមក គេសង្កេតឃើញថា ដីនៅតំបន់នោះបាន និងកំពុងតែមានតម្លៃកើនឡើងគួរឱ្យកត់សម្គាល់ ហើយប្រជាពលរដ្ឋទូទៅ ក៏ដូចជាឈ្មួញមួយចំនួនកំពុងនាំគ្នាសម្រុកទិញដីនៅតំបន់នោះផងដែរ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា គួរមានការសិក្សាឱ្យបានច្បាស់លាស់ជាមុនសិន មុននឹងសម្រេចទិញដីវិនិយោគនៅក្បែរព្រលានយន្តហោះ ព្រោះថា ការសាងសង់អគារនៅក្បែរព្រលានយន្តហោះអាចមានទាំងផលវិជ្ជមាន និងអវិជ្ជមានទន្ទឹមគ្នា។ ផលវិជ្ជមានគឺស្ថិតនៅត្រង់ថា បើយើងទិញដីសង់ខុនដូ សណ្ឋាគារ ផ្ទះសំណាក់ ឬភោជនីយដ្ឋាននៅឆ្ងាយពីព្រលានបន្តិច វាមិនសូវឮសំឡេងយន្តហោះប៉ុន្មានទេ ហើយអាចមានភ្ញៀវមកស្នាក់នៅ ឬចូលទទួលទានអាហារច្រើនផងដែរ ដោយសារភ្ញៀវដែលទើបចុះពីយន្តហោះ ជួនកាលយប់ជ្រៅ មិនមានបងប្អូនមកទទួលយក ឬមកដល់នៅពេលយប់ មិនហ៊ានធ្វើដំណើរទៅផ្ទះ គាត់ត្រូវស្នាក់នៅ និងទទួលទានអាហារនៅក្នុងសណ្ឋាគារបណ្តោះអាសន្នសិន ដូច្នេះការទិញដីនៅក្បែរព្រលានយន្តហោះ ក៏អាចធ្វើអាជីវកម្មទទួលបានផលចំណេញ និងរកប្រាក់ចំណូលប្រចាំថ្ងៃបានផងដែរ។ ចំណែកផលអវិជ្ជមានវិញ បើសិនជាទិញដីនៅកៀកនឹងរបងព្រលានយន្តហោះ ឬទិញដីសង់ផ្ទះនៅក្បែរផ្លូវយន្តហោះឡើង-ចុះ នោះប្រាកដជាលំបាកក្នុងការរស់នៅមិនខាន ដោយសារតែអាជ្ញាធរមិនអនុញ្ញាតឱ្យសង់ផ្ទះខ្ពស់ច្រើនជាន់ទេ ហើយអ្វីដែលសំខាន់ខ្លាំងជាងនេះទៀតនោះ គឺការរស់នៅជិតព្រលានយន្តហោះនឹងត្រូវរងផលប៉ះពាល់ខ្លាំងពីសំឡេងយន្តហោះ មិនថាយប់ ឬថ្ងៃនោះទេ គឺព្រលានយន្តហោះអន្តរជាតិប្រាកដជាមានយន្តហោះចុះ-ឡើងឥតឈប់ឈរមិនខាន សូម្បីតែព្រលានយន្តហោះបច្ចុប្បន្ន(អាកាសយានដ្ឋានអន្តរជាតិភ្នំពេញ)ក៏មានជើងយន្តហោះឡើង-ចុះដល់ទៅជិត 60ជើងដែរក្នុងមួយថ្ងៃ។

លោក ពុជ វណ្ណៈ អាជីវករសង់ផ្ទះល្វែងលក់នៅខេត្តកណ្តាលក៏មានប្រសាសន៍ទទួលស្គាល់ក្រោយពីរដ្ឋាភិបាលប្រកាសឱ្យសិក្សាគម្រោងសាងសង់ព្រលានយន្តហោះឡើងវិញនោះដែរថា តម្លៃដីនៅក្នុងស្រុកកណ្តាលស្ទឹងរហូតទៅដល់ភូមិសាស្ត្រស្រុកស្អាង ពិតជាកំពុងមានសម្ទុះកើនឡើងគួរកត់សម្គាល់ ហើយបានបង្កជាទំនាស់រវាងឈ្មួញ និងប្រជាពលរដ្ឋទៀតផង។

លោកបានលើកជាឧទាហរហ៍ថា ដូចជាដីបឹងជាប់ព្រំប្រទល់រវាងស្រុកកណ្តាលស្ទឹង និងស្រុកស្អាង កាលពីមិនទាន់ប្រកាសសាងសង់ព្រលានយន្តហោះ ប្រជាពលរដ្ឋប្រកាសលក់មួយម៉ែត្រការ៉េក្នុងតម្លៃតែ 4ដុល្លារក៏មិនមានឈ្មួញណាទិញផង ប៉ុន្តែមកទល់ពេលនេះ ទីតាំងនោះឈ្មួញសុំទិញដោយឱ្យតម្លៃដល់ទៅ 20ដុល្លារក្នុងមួយម៉ែត្រការ៉េ ក៏ប្រជាពលរដ្ឋមិនលក់ដែរ។

លោកបន្តថា តម្លៃដីក្បែរគម្រោងព្រលាននោះបានឡើងថ្លៃក្រឺតៗទាំងអស់ គ្រាន់តែថាតំបន់ខ្លះឡើងថ្លៃខ្លាំងហើយតំបន់ខ្លះឡើងតិចតួច ទៅតាមទីតាំងដែលមានសក្តានុពលខ្លាំង និងទីតាំងមិនសូវមានសក្តានុពលប៉ុណ្ណោះ និងឡើងថ្លៃក្នុងចន្លោះពី 20ដុល្លារទៅដល់ជាង100ដុល្លារក្នុង 1ម៉ែត្រការ៉េក៏មាន ជាពិសេសឡើងថ្លៃខ្លាំងនៅក្នុងឃុំកណ្តោក ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ជាដីដែលមានទីតាំងនៅកៀកនឹងព្រលានជាងគេ ឬមានទីតាំងដីនៅជាប់ផ្លូវ60ម៉ែត្រ ស្របតាមបណ្តោយផ្លូវក្រវាត់ក្រុងទី3។

គួរបញ្ជាក់ដែរថា កាលពីសប្តាហ៍មុននេះរដ្ឋាភិបាលបានចេញសេចក្តីសម្រេចថ្មីមួយ ដើម្បីបង្កើតគណៈកម្មការរៀបចំទីតាំងគម្រោងសាងសង់អាកាសយានដ្ឋានអន្តរជាតិថ្មី ដើម្បី៖ 1.ពិនិត្យ និងកំណត់និយាមការទីតាំង សម្រាប់គម្រោងសាងសង់អាកាសយានដ្ឋានអន្តរជាតិថ្មី។ 2.សិក្សាវាយតម្លៃថ្លៃដីនៅតំបន់គម្រោងសាងសង់អាកាសយានដ្ឋានថ្មី។ 3.សម្របសម្រួលដោះស្រាយបញ្ហាពាក់ព័ន្ធនឹងទីតាំងដី ដើម្បីបង្កលក្ខណៈងាយស្រួលដល់ដំណើការគម្រោងសាងសង់អាកាសយានដ្ឋានថ្មីនេះ។ 4.សម្របសម្រួលជាមួយក្រសួង ស្ថាប័ន និងអង្គភាពពាក់ព័ន្ធរបស់រាជរដ្ឋាភិបាល និងក្រុមហ៊ុនដើម្បីដំណើរការអនុវត្តឱ្យគម្រោងប្រព្រឹត្តទៅដោយជោគជ័យ។ 5.ផ្តល់អនុសាសន៍ដល់ក្រុមហ៊ុនក្នុងការបំពេញបែបបទផ្សេងៗ ដើម្បីឆ្លើយតបបានតាមតម្រូវការ សម្រាប់អនុវត្តគម្រោង ក៏ដូចជាសំណូមពរផ្សេងៗរបស់ក្រុមហ៊ុន។ 6.ពិនិត្យ និងផ្តល់យោបល់លើផែនការមេ របស់គម្រោង ក៏ដូចជាសំណូមពរផ្សេងៗរបស់ក្រុមហ៊ុន តាមដាន និងត្រួតពិនិត្យការអនុវត្តគម្រោង សាងសង់អាកាសយានដ្ឋានថ្មី និងហេដ្ឋារចនាសម្ព័ន្ធពាក់ព័ន្ធ និងទី7.ធ្វើរបាយការណ៍អំពីលទ្ធផលជូននាយករដ្ឋមន្ត្រី ដើម្បីពិនិត្យ និងសម្រេច៕

March 7, 2019

រុន ណាកូ ទម្លាយឱ្យដឹងពីទំនាក់ទំនងក្រៅសិល្បៈជាមួយ ទេព មុន្នីរក្សា

នៅពេលថ្មីៗកន្លងមកតារាសម្ដែងលោក រុន ណាកូ បានឱ្យដឹងថារវាងលោក និងគូដណ្ដឹងសម្រេចបែកផ្លូវគ្នាហើយ ។ បែបនេះហើយទើបលោកមានសេរីភាពគ្រប់គ្រាន់សម្រាប់ការងារសិល្បៈ ដោយចង់សម្តៅថាមិនខ្លាចនឹងបណ្ដើរ ឬកៀកកើយជាមួយតារាស្រីណាមួយនៅក្នុងការងារសិល្បៈទៀតឡើយ ។ ចំពោះភាពស្និទ្ធស្នាលជាមួយកញ្ញាទេព មុន្នីរក្សា នោះ លោករុន ណាកូ អះអាងថានៅមិនទាន់មានអារម្មណ៍ស្រឡាញ់គ្នាទេ ដោយគ្រាន់តែមានអារម្មណ៍ចូលចិត្តគ្នា ច្រើនឡើងៗប៉ុណ្ណោះ។

ចំណែកកញ្ញាទេព មុន្នីរក្សា វិញនិយាយថា កាលពីមុនលោករុន ណាកូ មិនទាន់បែកពីគូដណ្ដឹងនាងគ្រាន់តែហ៊ានស្និទ្ធស្នាលក្នុងនាមសិល្បៈប៉ុណ្ណោះ ប៉ុន្តែនៅពេលដឹងថាលោកបែកគ្នាហើយទើបធ្វើឱ្យនាងហ៊ានស្និទ្ធស្នាលជាងមុន និងគ្មានក្តីបារម្ភ ។ កញ្ញាទេព មុន្នីរក្សា និយាយថា «នៅមិនទាន់ដឹងថាអារម្មណ៍ចូលចិត្តដែលបានកើតឡើងគឺជាអារម្មណ៍ស្នេហា ឬគ្រាន់តែចង់ស្និទ្ធស្នាលដើម្បីឱ្យកាន់តែយល់ចិត្តគ្នាក្នុងការរាប់អាននោះទេ ក្នុងពេលដែលនាងខ្ញុំក៏មិនទាន់រកឃើញបុរសណាម្នាក់ជាម្ចាស់បេះដូង »។

លោករុន ណាកូ និយាយថា«ខ្ញុំមិនទាន់ចង់មានស្នេហាថ្មីជំនួសគូដណ្ដឹងនោះឡើយ ដោយសារតែរវាងខ្ញុំ និងគូដណ្ដឹងដ្បិតថាបានសម្រេចចិត្តបញ្ចប់គ្នា តែអនុស្សាវរីយ៍គឺនៅ ក្ដៅៗដែលធ្វើឱ្យខ្ញុំមិនទាន់អាចបំភ្លេចបាន និងយល់ថាមិនទាន់ចង់បានគូស្នេហ៍មកជាប់ដៃជាប់ជើងក្រោយបែកបាក់អ្នកចាស់បែបនេះនោះឡើយ»៕

March 7, 2019

ដើម្បីទ្រទ្រង់កំណើនសេដ្ឋកិច្ចសង្គម កម្ពុជាត្រូវជំរុញវិស័យទេសចរណ៍

វិស័យទេសចរណ៍ គឺជាវិស័យមួយដែលចូលរួមទ្រទ្រង់កំណើនសេដ្ឋកិច្ច-សង្គម បង្កើតការងារ និងកាត់បន្ថយភាពក្រីក្ររបស់ប្រជាពលរដ្ឋ ជាការនាំចេញនៅនឹងកន្លែងព្រមទាំងដើរតួនាទីយ៉ាងសំខាន់ក្នុងការចូលរួមថែរក្សា និងអភិរក្សបរិស្ថាន រួមទាំងឆ្លើយតបនឹងបម្រែបម្រួលអាកាសធាតុប្រកបដោយប្រសិទ្ធភាព ដោយហេតុដូច្នេះហើយ ទើបរាជរដ្ឋាភិបាលបានចាត់ទុកវិស័យនេះថាជា មាសបៃតង។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍នៅក្នុង “ទិវាជាតិទីក្រុងស្អាត” លើកទី7 ក្រោមប្រធានបទ “ទីក្រុងស្អាត៖ ទីក្រុងផ្តល់ភាពកក់ក្តៅ” បានថ្លែងបញ្ជាក់ថា៖ “នៅឆ្នាំ2018កន្លងទៅ វិស័យទេសចរណ៍យើងសម្រេចបានកំណើនក្នុងអត្រា10.7% ជាមួយនឹងការមកដល់នៃភ្ញៀវទេសចរអន្តរជាតិជាង 6.2លាននាក់ និងនាំប្រាក់ចំណូលប្រមាណ 4,356លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ” ដែលជាការកើនឡើងប្រហែល 20%។

ឯកឧត្តមរដ្ឋមន្ត្រី បន្តថា នៅឆ្នាំ2019 កម្ពុជារំពឹងថា នឹងទទួលបានភ្ញៀវទេសចរអន្តរជាតិប្រមាណ6លាន 7សែននាក់ ហើយនៅឆ្នាំ2020 នឹងទទួលបានប្រមាណជាជាង 7លាននាក់ និងនាំមកនូវចំណូលប្រមាណ 5ពាន់លានដុល្លារអាមេរិក ដែលនឹងបង្កើតឱកាសការងារបានប្រមាណជិត 1លាននាក់ និងនៅឆ្នាំ2030 អាចនឹងទទួលបានភ្ញៀវទេសចរអន្តរជាតិប្រមាណ 15លាននាក់ ដែលនឹងនាំមកនូវចំណូលប្រមាណ 10ពាន់លានដុល្លាអាមេរិក ដោយនឹងបង្កើតឱកាសការងារបានប្រមាណជិត 2លាននាក់។

ឯកឧត្តម បន្តថា ដើម្បីត្រៀមទទួលស្វាគមន៍ភ្ញៀវទេសចរអន្តរជាតិដូចដែលបានជម្រាបជូនខាងលើ ជាយុទ្ធសាស្ត្រ គឺត្រូវធ្វើឱ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរតាមរយៈការបង្កើតឱ្យមានផលិតផលទេសចរណ៍ថ្មីៗ និងប្រកបដោយភាពវៃឆ្លាត ស្អាត និងបៃតង (Smart, Clean & Green)។ឯកឧត្តម ថោង ខុន បានបញ្ជាក់ទៀតថា៖ “ក្នុងចលនាប្រឡងប្រណាំងទីក្រុងស្អាត រដ្ឋាភិបាលបានកំណត់យកថ្ងៃទី27 ខែកុម្ភៈ ជារៀងរាល់ឆ្នាំដើម្បីប្រារព្ធពិធីអបអរសាទរ “ទិវាជាតិទីក្រុងស្អាត” ហើយផ្តើមចេញពីចលនាប្រឡងប្រណាំងនេះ គឺដើម្បីលើកទឹកចិត្ត និងទទួលស្គាល់កិច្ចខិតខំប្រឹងប្រែង របស់ផ្នែកឯកជនក្នុងវិស័យទេសចរណ៍ និងវិស័យពាក់ព័ន្ធដែលមានស្នាដៃល្អចូលរួមទ្រទ្រង់ដល់ចលនាប្រឡងប្រណាំង“ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” និងជាការលើកកម្ពស់ភាពស្អាត និងបៃតងនៅកម្ពុជា”។

សម្តេចតេជោនាយករដ្ឋមន្ត្រីបានមានប្រសាសន៍ពាក់ព័ន្ធនឹងវិស័យទេសចរណ៍ថា៖“បើធ្វើជាអ្នកជំនួញ ឬអ្នកលក់ដូរវិញ ការរកអតិថិជនម្នាក់មកទិញរបស់យើងនោះ គឺជារឿងលំបាកហើយ តែរឿងដែលពិបាកជាងហ្នឹងទៀតនោះគឺ អ្នកលក់ត្រូវធានាយ៉ាងណាដល់អតិថិជនដែលជាអ្នកទិញទំនិញរបស់យើងនោះឱ្យថ្ងៃក្រោយគេមកទិញទៀត”។

សម្តេចតេជោបន្តថា៖ “មិនត្រឹមតែគេមកទិញខ្លួនឯងទេ គេថែមទាំងហៅមិត្តភក្តិរបស់គេឱ្យមកជួយទិញថែមទៀត ទើបជាបញ្ហាជោគជ័យនៃមុខជំនួញ កុំឱ្យគេមកទិញម្តងហើយរាងចាល មុខគេមិនមើល ដោយសារតែការកាត់តម្លៃខ្ពស់ សម្តីគំរោះគំរើយ អ៊ីចឹងថ្ងៃក្រោយរកស៊ីខាត កុំថាមកពីរដ្ឋាភិបាលត្រូវពិនិត្យមើលឡើងវិញ”។សម្តេចតេជោនាយករដ្ឋមន្ត្រី ក៏បានជំរុញឱ្យវិស័យទេសចរណ៍ត្រូវមានការផ្សារភ្ជាប់ ឬទាញផលប្រយោជន៍ពីវិស័យកសិកម្ម តាមរយៈការជំរុញឱ្យកសិករ ម្ចាស់រមណីយដ្ឋាន និងភោជនីយដ្ឋាន បង្កើនការដាំដុះដំណាំកសិកម្មបែបធម្មជាតិឱ្យបានច្រើន ដើម្បីបំពេញតម្រូវការបរិភោគរបស់ទាំងភ្ញៀវជាតិ និងអន្តរជាតិ។

បន្ថែមលើនេះសម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា៖“ក្រសួងប្រៃសណីយ៍ និងទូរគមនាគមន៍ត្រូវរៀបចំដាក់ Free WiFi នៅតាមគោលដៅតំបន់ទេសចរណ៍ទូទាំងប្រទេស ពិសេសរាជធានីភ្នំពេញ ខេត្តសៀមរាប ខេត្តបាត់ដំបង និងខេត្តព្រះសីហនុ ជាដើម ឱ្យបានមុនឆ្នាំ2023។

សម្ដេចក៏បានក្រើនរំឭកដល់ក្រសួងប្រៃសណីយ៍ និងទូរគមនាគមន៍ត្រូវតាមពិនិត្យឱ្យបានហ្មត់ចត់ទៅលើបញ្ហា Free WiFi ព្រោះស្ថានភាពការប្រើ WiFi ដែលយើងបានធ្វើនៅទីក្រុងភ្នំពេញ មិនទាន់មានប្រសិទ្ធភាពនៅឡើយទេ ពោលមាន WiFi តែអត់មានអុីនធើណិត”។

លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានមានប្រសាសន៍ថាប្រតិបត្តិករទេសចរណ៍ និងរដ្ឋាភិបាលបានកំណត់ទិសដៅសម្រាប់អ្នកទេសចរអន្តរជាតិ ជាពិសេសអ្នកទេសចរចិនក្នុងប៉ុន្មានឆ្នាំថ្មីៗនេះ ដែលនេះជាមូលហេតុចម្បងដែលពួកគេបានធ្វើដំណើរមកកាន់ប្រទេសកម្ពុជា។

លោកស្រីបានមានប្រសាសន៍ថា ៖“ដោយសារតែកិច្ចខិតខំប្រឹងប្រែងដើម្បីលើកកម្ពស់ប្រទេស ក្នុងវិស័យទេសចរណ៍ដើម្បីឱ្យអ្នកទេសចរកាន់តែច្រើនបានមកធ្វើទស្សនាចរនៅកម្ពុជា នឹងនាំឱ្យគោលនយោបាយរបស់ក្រសួងទេសចរណ៍ បានទទួលជោគជ័យ និងមានប្រសិទ្ធភាព”។ លោកស្រីបានបន្តថាបច្ចុប្បន្នអ្នកពាក់ព័ន្ធនឹងឧស្សាហកម្មទេសចរណ៍គួរតែរួមគ្នាក្នុងគោលបំណងតែមួយដើម្បីបង្កើតឱ្យមានកំណើនប្រកបដោយចីរភាពនៅក្នុងវិស័យនេះ៕

March 7, 2019

កម្ពុជាគ្រោងដំឡើងប្រព័ន្ធអុីនធើណិត WiFi នៅតាមតំបន់ទេសចរណ៍ទូទាំងប្រទេស

រដ្ឋាភិបាលកម្ពុជា កាលពីពេលថ្មីៗនេះបានប្រកាសពីគម្រោងដំឡើងប្រព័ន្ធអុីនធើណិតគ្មានខ្សែ (WiFi) នៅតាមតំបន់ទេសចរណ៍ទូទាំងប្រទេសដើម្បីសម្រួលដល់អ្នកទេសចរក្នុងស្រុក និងបរទេសដែលបានទៅទស្សនាតំបន់ទេសចរណ៍នៅក្នុងប្រទេសកម្ពុជា ហើយគម្រោងនេះត្រូវធ្វើយ៉ាងណាបញ្ចប់ឱ្យបានមុនឆ្នាំ2023។

នៅក្នុងពិធី “ទិវាជាតិទីក្រុងស្អាត” លើកទី7 នៅសណ្ឋាគារសុខាភ្នំពេញ ដែលបានប្រារព្ធធ្វើឡើងកាលពីព្រឹកថ្ងៃទី25 ខែកុម្ភៈ ឆ្នាំ2019 នេះ សម្ដេចនាយករដ្ឋមន្ត្រី ហ៊ុន សែន បានប្រាប់ឱ្យក្រសួងប្រៃសណីយ៍ និងទូរគមនាគមន៍រៀបចំដំឡើងប្រព័ន្ធអុីនធើណិតគ្មានខ្សែ ឬWiFi នៅតាមបណ្ដាតំបន់ទេសចរណ៍ទូទាំងប្រទេស ពិសេសរាជធានីភ្នំពេញ ខេត្តសៀមរាប និងខេត្តព្រះសីហនុជាដើម។ សម្តេចនាយករដ្ឋមន្ត្រីបញ្ជាក់ថា គម្រោងនេះត្រូវតែធ្វើឱ្យបានមុនឆ្នាំ2023។

សម្ដេចតេជោ ហ៊ុន សែន ក៏បានប្រាប់ក្រសួងប្រៃសណីយ៍ និងទូរគមនាគមន៍ឱ្យតាមពិនិត្យឱ្យបានហ្មត់ចត់ទៅលើបញ្ហា ប្រព័ន្ធអុីនធើណិតគ្មានខ្សែ ឬ WiFi នេះ ព្រោះការប្រើ WiFi ពេលខ្លះហាក់មិនទាន់មានប្រសិទ្ធភាពនៅឡើយទេ ដោយជួនកាលមិនអាចតភ្ចាប់ជាមួយនឹងអុីនធើណិតបាន។

សម្ដេចនាយករដ្ឋមន្ត្រីបានមានប្រសាសន៍យ៉ាងដូច្នេះថា៖ “ទន្ទឹមនឹងនេះ ក្រសួងប្រៃសណីយ៍ និងទូរគមនាគមន៍ត្រូវបំពាក់ឱ្យមានប្រព័ន្ធ Free WiFi នៅតាមគោលដៅទេសចរណ៍នីមួយៗ ពិសេសនៅរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តបាត់ដំបងត្រូវដំឡើងឱ្យបានមុនឆ្នាំ2023។ ចំណុចនេះ ខ្ញុំក៏សូមទាក់ទាញឱ្យមានការយកចិត្តទុកដាក់ ព្រោះស្ថានភាពដែលយើងបានធ្វើនៅទីក្រុងភ្នំពេញប៉ុន្មានកន្លែងនេះហាក់ដូចជាមិនទាន់មានប្រសិទ្ធភាពនៅឡើយទេ”។

លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជាបានស្វាគមន៍ចំពោះគម្រោងទាក់ទងនឹងការដំឡើងប្រព័ន្ធអុីនធើណិតគ្មានខ្សែ(WiFi) នៅតាមបណ្ដាតំបន់ទេសចរណ៍ទូទាំងប្រទេសនេះ។ លោកបានលើកឡើងថា គម្រោងនេះត្រូវបានរដ្ឋាភិបាលគិតគូរប្រមាណ 5ឆ្នាំមកហើយ។ លោក វណ្ឌី សង្ឃឹមថា ប្រព័ន្ធអុីនធើណិតគ្មានខ្សែ (WiFi) នៅតាមបណ្ដាតំបន់ទេសចរណ៍នេះនឹងផ្តល់ភាពងាយស្រួលដល់អ្នកទេសចរជាតិ និងអន្តរជាតិដើម្បីស្វែងរកទីតំបន់ទេសចរណ៍នានា ស្វែងរកកន្លែងសម្រាក និងប្រើប្រាស់សម្រាប់មធ្យោយបាយផ្សេងៗទៀត។

លោក វណ្ឌី បានបន្តថា៖“ប្រព័ន្ធអុីនធើណិតគ្មានខ្សែ WiFi នេះ នៅតាមបណ្ដាតំបន់ទេសចរណ៍ទូទាំងប្រទេសនឹងទាក់ទាញទេសចរឱ្យស្នាក់នៅកម្ពុជាកាន់តែយូរថ្ងៃឡើង ដោយសារតែគេចូលចិត្តសេវាកម្មជាច្រើនដែលយើងបានផ្តល់ជូនគេ”។

ដោយឡែកកាលពីពេលថ្មីៗនេះដែរ ក្រសួងប្រៃសណីយ៍ និងទូរគមនាគមន៍បានសម្របសម្រួលរៀបចំដំឡើងប្រព័ន្ធអុីនធើណិតគ្មានខ្សែ WiFi (5G)នៅតំបន់អង្គរផងដែរ ដើម្បីបង្កភាពងាយស្រួលសម្រាប់ការប្រើប្រាស់សេវាអុីនធើណិតដល់ភ្ញៀវទេសចរ និងបម្រើសេវាសាធារណ:ផ្សេងៗទៀត សំដៅលើកកម្ពស់សុខុមាលភាព និងកម្រិតជីវភាពរបស់ប្រជាពលរដ្ឋ។

គួរបញ្ជាក់ថា កាលពីខែឧសភា ឆ្នាំ2018 ក្រសួងប្រៃសណីយ៍ និងទូរគមនាគមន៍បានសហការជាមួយសាជីវកម្មទូរគមនាគមន៍កូរ៉េដាក់ឱ្យដំណើរការប្រព័ន្ធ WiFi នៅតាមទីសាធារណៈ នៅសួនច្បារសម្តេចហ៊ុនសែន និងនៅតាមសាលារៀនមួយចំនួន ដូចជានៅខេត្តកំពង់ឆ្នាំង និងកំពង់ស្ពឺ។ល។ ប្រព័ន្ធ WiFi សាធារណៈនេះត្រូវបានផ្តត់ផ្គង់ដោយទូរគមនាគមន៍កម្ពុជា។

ប្រព័ន្ធនេះ ដំបូងបានដាក់ឱ្យប្រើប្រាស់នៅបរិវេណសួនច្បារសម្តេចហ៊ុនសែន ហើយក្រសួងនឹងពិចារណាលើទីតាំងផ្សេងៗទៀត ដូចជានៅវត្តភ្នំ សួនច្បារមុខទីស្តីការគណៈរដ្ឋមន្ត្រី និងសួនច្បារវត្តបទុម ព្រមជាមួយៗសួនច្បារនៅតាមបណ្តាខេត្តនានាផងដែរ។

បើយោងតាមរបាយការណ៍របស់ក្រសួងទេសចរណ៍ ក្នុងឆ្នាំ2018 វិសយទេសចរណ៍រកចំណូលបានប្រមាណ 4.3ប៊ីលានដុល្លារអាមេរិក កើនប្រមាណជា 20ភាគរយ។ ដោយឡែក ចំនួនភ្ញៀវទេសចរមកទស្សនាកម្ពុជាមានប្រមាណ 6.2លាននាក់កាលពីឆ្នាំមុន ដែលកើនឡើង 10.7ភាគរយ។

កម្ពុជារំពឹងថា នឹងស្វាគមន៍ភ្ញៀវទេសចរអន្តរជាតិចំនួន 6.7លាននាក់ក្នុងឆ្នាំ2019 នេះ ហើយនៅឆ្នាំ2020កម្ពុជារំពឹងថា នឹងទាក់ទាញភ្ញៀវទេសចរបរទេសបានប្រមាណ 7លាននាក់ និងបង្កើតប្រាក់ចំណូលជាង 5ប៊ីលានដុល្លារអាមេរិក និងបង្កើតការងារបានប្រមាណជា 1លាននាក់៕

March 7, 2019

ការអនុវត្តស្តង់ដាគណនេយ្យអន្តរជាតិ IFRS 17 ជាជំហានថ្មីមួយនៃវិស័យហិរញ្ញវត្ថុ

ការអនុវត្តស្តង់ដារបាយការណ៍គណនេយ្យអន្តរជាតិ IFRS 17 ក្នុងវិស័យធានារ៉ាប់រង និងធនាគារនឹងជួយដល់ក្រុមហ៊ុន និងធនាគារទាំងនោះឱ្យមានលក្ខណៈស្តង់ដាអន្តរជាតិផ្នែកហិរញ្ញវត្ថុ និងផ្តល់ផលប្រយោជន៍ដ៏សំខាន់ដល់លំនឹងនៃការរីកចម្រើនវិស័យហិរញ្ញវត្ថុរបស់កម្ពុជានាពេលបច្ចុប្បន្ន។

លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រងហ្វ័រតេបានប្រាប់ឡារ៉ែនថា ការអនុវត្តស្តង់ដារគណនេយ្យ IFRS 17(International Financial Report section version17) ក្នុងវិស័យធានារ៉ាប់រងនៅកម្ពុជា ជាកម្មវិធីថ្មីមួយសម្រាប់កម្ពុជា ព្រោះជាស្តង់ដារបាយការណ៍ហិរញ្ញវត្ថុខ្នាតអន្តរជាតិដែលទើបកែសម្រួលថ្មី។

លោកអគ្គនាយកបានបញ្ជាក់ថា កាលណាក្រុមហ៊ុនធានារ៉ាប់រង និងធនាគារដែលបានទទួលស្គាល់ ឬអនុវត្តស្តង់ដាគណនេយ្យ IFRS17 ក្រុមហ៊ុនធានារ៉ាប់រងនោះនឹងមានលក្ខណៈស្តង់ដារអន្តរជាតិផ្នែកហិរញ្ញវត្ថុទាំងអស់ ដូចនេះមិនអាចក្លែងបន្លំ ឬបំភ័ន្តចំណុចណាមួយនៃហិរញ្ញវត្ថុរបស់ក្រុមហ៊ុនបានឡើយ។

លោក ចំរើនឬទ្ធិ បានពន្យល់ថា៖ “ព្រោះវាជាស្តង់ដានៃរង្វាស់រង្វាល់ខាងផ្នែកហិរញ្ញវត្ថុរបស់ក្រុមហ៊ុនធានារា់ប់រង ឬធនាគារថា តើក្រុមហ៊ុន ឬធនាគារទាំងនោះមានស្តង់ដារគណនេយ្យស្របតាមស្តង់ដាអន្តរជាតិដែរឬអត់? ព្រោះសព្វថ្ងៃដែលយើងនៅប្រើនៅឡើយ គឺស្តង់ដាគណនេយ្យកម្ពុជាដែលកម្មវិធីនេះមិនទាន់លម្អិតពីបញ្ហាអស់ទេ ដោយសារវាមាន version ទាបនៅឡើយ។ សព្វថ្ងៃប្រទេសជាច្រើនដែលប្រកាន់យករបបសេដ្ឋកិច្ចទីផ្សារ បានប្រើប្រាស់គណនេយ្យ IFRS 17 នេះហើយ”។

លោក ប៊ូ ចន្ទភីរូ អគ្គនាយករងនៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុបានប្រាប់ឡារ៉ែនពាណិជ្ជថា ស្តង់ដាគណនេយ្យអន្តរជាតិ IFRS នេះត្រូវបានយកមកប្រើប្រាស់ស្របទៅតាមស្តង់ដាគណនេយ្យជាតិរបស់យើង ហើយដើម្បីឆ្លើយតបទៅនឹងតម្រូវការស្តង់ដាគណនេយ្យអន្តរជាតិ IFRS នេះ ស្តង់ដាគណនេយ្យជាតិនាពេលបច្ចុប្បន្នបានអនុវត្តទៅតាមស្តង់ដាគណនេយ្យអន្តរជាតិ IFRS 4។

លោកអគ្គនាយករងបានបញ្ជាក់ថា៖ “សម្រាប់ប្រព័ន្ធស្តង់ដាគណនេយ្យ IFRS 17 នេះ គេបានផ្តល់ឱ្យយើងពិចារណាសិន តែការអនុវត្តនឹងចាប់ផ្តើមនៅ2ឆ្នាំក្រោយ។ ចង់បញ្ជាក់ថា ចំពោះស្តង់ដាគណនេយ្យជាតិរបស់យើង តែកាលណាអន្តរជាតិគេធ្វើអ្វីថ្មី យើងនឹងអនុវត្តទៅតាមគេ គឺទទួលយក ដើម្បីឱ្យទាន់សភាពការណ៍អន្តរជាតិ តែចំពោះស្តង់ដាគណនេយ្យ IFRS 17 នេះ អន្តរជាតិគេទើបរកឃើញ គេទើបនឹងដាក់ឱ្យប្រើប្រាស់”។

លោកបានបន្តថា ដូច្នេះប្រទេសនីមួយៗ បើមុននឹងត្រូវអនុវត្ត ត្រូវតែកែសម្រួលសិនដែរ ហេតុនេះ2ឆ្នាំទៀត បើត្រូវអនុវត្ត IFRS17 នេះទើបយើងជូនដំណឹងទៅក្រុមហ៊ុនគ្រឹះស្ថានហិរញ្ញវត្ថុ និងធ្វើសិក្ខាសាលាដើម្បី៖ ទី1-ផ្សព្វផ្សាយពីកាលបរិច្ឆេទថា នឹងត្រូវអនុវត្តនៅប៉ុន្មានឆ្នាំខាងមុខ។ ទី2-គឺជាការជូនដំណឹងឱ្យក្រុមហ៊ុននីមួយៗរៀបចំខ្លួនឱ្យបានទាន់សភាពការណ៍។លោកបានបន្តទៀតថា ការសម្រេចចិត្តអនុវត្តប្រព័ន្ធស្តង់ដាគណនេយ្យ IFRS 17 នេះ ទី1-ដោយសារយើងចូលជាសមាជិករបស់គេហើយ បើគេអនុវត្តស្តង់ដាគណនេយ្យនេះ យើងត្រូវតែអនុវត្តដែរ។ ទី2-ចំពោះក្រុមហ៊ុនបរទេស ដែលគេមកវិនិយោគនៅប្រទេសយើង គេមើលទៅតាមស្តង់ដាអន្តរជាតិស្តង់ដាគណនេយ្យ IFRS17 នេះ។ ដូច្នេះក្រុមហ៊ុនភាគច្រើនផ្នែកធានារ៉ាប់រងជាក្រុមហ៊ុនរបស់បរទេស បើគេអនុវត្តប្រព័ន្ធនេះ គឺមិនជាលំបាកទេសម្រាប់គេ ហើយគេចង់បានស្តង់ដាអន្តរជាតិនេះ ព្រោះវាមានតម្លាភាព។ ហេតុនេះការអនុវត្តទៅតាមបទដ្ឋានអន្តរជាតិនេះចាំបាច់ត្រូវតែទៅតាមហ្នឹងហើយ ប៉ុន្តែសម្រាប់យើង យើងត្រូវការពេលវេលា។

សម្រាប់លោក យក់ ចំរើនឬទ្ធិ បានមើលឃើញអំពីប្រព័ន្ធស្តង់ដាគណនេយ្យ IFRS 17 នេះចំនួន7ចំណុចដែលល្អ៖
ទី1- វាឆ្លុះបញ្ចាំងពីតថភាព និងស្ថានភាពហិរញ្ញវត្ថុជាក់ស្តែងរបស់ក្រុមហ៊ុន។

ទី2- IFRS17នៅលើពិភពលោកនឹងក្លាយជាប្រព័ន្ធមួយដូចគ្នាទាំងអស់ ដោយមិនចាំបាច់អ្នកពិនិត្យ មើលទៅស្តង់ដាគណនេយ្យរបស់ប្រទេសណាមួយទេ ព្រោះប្រទេសនីមួយៗមានស្តង់ដាគណនេយ្យផ្សេងគ្នា។ ដូចនេះវាជួយឱ្យរបាយការណ៍ហិរញ្ញវត្ថុមានតម្លាភាព។

ទី3- IFRS 17 ជួយដល់ការគ្រប់គ្រងរបស់រដ្ឋាភិបាលនៅក្នុងវិស័យហិរញ្ញវត្ថុបានច្រើន ទៅតាមស្ថានភាពជាក់ស្តែងនៅតាមក្រុមហ៊ុន។ វាជួយរដ្ឋាភិបាលក្នុងការដឹងពីហិរញ្ញវត្ថុរបស់ក្រុមហ៊ុនមួយថាមានសក្តានុពលត្រឹមណា? ទិសដៅក្រុមហ៊ុនដល់ណា ឬអាចក្ស័យធន? រដ្ឋាភិបាលមានប្រព័ន្ធនេះគឺអាចគ្រប់គ្រងបានស្រួល។

ទី4- ផ្តល់ទំនុកចិត្តដល់អតិថិជនកាលណាមាន IFRS 17 គឺអ្វីៗមានស្តង់ដា ជាអត្ថប្រយោជន៍ដល់អតិថិជនឱ្យមានទំនុកចិត្ត ព្រោះនៅពេលគាត់បានឃើញថា ក្រុមហ៊ុនមានស្តង់ដាដែលឆ្លុះបញ្ចាំងតថភាពជាក់ស្តែង ដូចនេះអតិថិជនគាត់ដឹងថា ក្រុមហ៊ុនដែលគាត់រកស៊ីជាមួយនោះខ្លាំង ឬខ្សោយកម្រិតណា។

ទី5- ការប្រើប្រព័ន្ធ IFRS17 គឺឥតកេងបន្លំប្រាក់ចំណេញ និងមិនបំប៉ោងតួលេខប្រាក់ចំណេញ ព្រោះមានស្តង់ដាហ្នឹង គាត់មិនអាចបន្លំក្នុងការបង់ពន្ធបានទេ វាបានឆ្លុះបញ្ចាំងនូវប្រាក់ចំណេញជាក់ស្តែង។

ទី6- បង្កទំនុកចិត្តដល់អ្នកវិនិយោគ។ ក្រុមហ៊ុន ឬធនាគារដែលប្រើ IFRS 17 នឹងធ្វើឱ្យវិនិយោគិនចង់វិនិយោគជាមួយធនាគារនោះ ដោយគាត់មានទំនុកចិត្ត ព្រោះវាបង្ហាញនូវភាពច្បាស់លាស់។

ទី7- កត្តាសំខាន់មួយនៅក្នុងទីផ្សារហិរញ្ញវត្ថុ គឺជាក្រុមហិរញ្ញវត្ថុដែលធ្វើពិពិធកម្មហិរញ្ញវត្ថុ។ ការគិតពីភាពច្បាស់លាស់នៃតម្លៃដែលយកពីអតិថិជនថា តើយើងមានលទ្ធភាពធ្វើសំណងទៅអតិថិជនវិញឬអត់? ដូច្នេះក្រុមពិពិធកម្មហិរញ្ញវត្ថុ គាត់មានកិច្ចសហការគ្នាដើម្បីឆ្លុះបញ្ចាំង ថាតើស្ថានភាពហិរញ្ញវត្ថុក្រុមហ៊ុន តើមានលទ្ធភាពធ្វើសំណងខាងលើដែរឬទេ?។

លោក ប៊ូ ចន្ទភីរូ ក៏បានបញ្ជាក់ពីចំណុចល្អ និងចំណុចមិនល្អរបស់ប្រព័ន្ធស្តង់ដាគណនេយ្យ IFRS 17 ដែរថា ចំណុចល្អរបស់ប្រព័ន្ធស្តង់ដាគណនេយ្យ IFRS 17 នេះ ជាទូទៅ គឺពេលគេអនុវត្តដល់ណា យើងក៏នឹងអនុវត្តដល់នោះដែរ គឺយើងក៏ចូលចុះនឹងស្តង់ដារបស់គេដែរ។ ឯចំណុចមិនល្អ របស់ប្រព័ន្ធស្តង់ដាគណនេយ្យ IFRS17 នេះ គឺការជំរុញឱ្យក្រុមហ៊ុនដែលមិនទាន់មានស្តង់ដានេះឱ្យគាត់ខំប្រឹង បើគាត់លំបាកខ្លាំង ត្រូវខំប្រឹងឱ្យខ្លាំងដើម្បីឱ្យទាន់គេ។

លោកអគ្គនាយកក្រុមហ៊ុនធានារ៉ាប់រងហ្វ័រតេបានបញ្ជាក់ថា៖ “ក្រុមហ៊ុនហ្វ័រតេយើងបានរៀបចំ ប្រើប្រាស់គណនេយ្យ IFRS 17 នៅក្នុងឆ្នាំ2019 នេះ។ ប្រសិនបើស្តង់ដានេះត្រូវបានដាក់ឱ្យអនុវត្ត វាអាចនឹងមានផលប៉ះពាល់ដល់ក្រុមហ៊ុនមួយចំនួនដែលពុំទាន់បានត្រៀមខ្លួន។ ដូច្នេះការត្រៀមខ្លួនក្នុងការប្រើប្រព័ន្ធនេះ គឺដើម្បីឱ្យក្រុមហ៊ុនធានារ៉ាប់រងទាំងអស់ដែលនៅប្រើស្តង់ដារគណនេយ្យមិនមានភាពត្រឹមត្រូវ ត្រូវតែកែសម្រួលមកប្រើស្តង់ដាថ្មី ឬត្រូវតែងាកមកប្រើ IFRS 17នេះ បើពុំដូច្នោះទេវាអាចនឹងប៉ះពាល់ដល់របាយការណ៍ហិរញ្ញវត្ថុរបស់គាត់ ដែលនាំឱ្យមានផលលំបាកដល់ក្រុមហ៊ុនជាមិនខាន”៕

March 7, 2019

លោក Solskjaer ថា Man Utd អាចជម្នះរាល់ឧបសគ្គទាំងអស់ ក្រោយទម្លាក់ PSG

លោក Ole Gunnar Solskjaer អ្នកចាត់ការទូទៅរបស់ក្រុម Manchester United បាននិយាយថា ក្រុមរបស់លោកអាចជម្នះរាល់ឧបសគ្គទាំងអស់ ក្នុងក្របខ័ណ្ឌ Champions League ក្រោយពីគ្រាប់បាល់ប៉េណាល់ទីនៅជិតបញ្ចប់ការប្រកួតរបស់ Marcus Rashford បានជួយឱ្យពួកគេ ដណ្តើមបានជ័យជម្នះដ៏មិននឹកនឹកស្មានដល់ក្នុងលទ្ធផល 3-1 លើទឹកដីក្រុម Paris Saint-Germain កាលពីថ្ងៃពុធ ខណៈដែលពួកគេបានឈានទៅវគ្គ 8ក្រុម ដោយសារតែគ្រាប់បាល់ក្រៅទឹកដី។

ក្រុម Man United ហាក់មិនអាចបង្កើតការភ្ញាក់ផ្អើលបានឡើយ ក្រោយពីចាញ់ក្នុងការប្រកួតជើងទី1 នៃវគ្គ 16ក្រុមចុងក្រោយក្នុងលទ្ធផល 2-០ កាលពីខែមុន ប៉ុន្តែ RomeluLukaku បានស៊ុតបាល់បញ្ចូលទី 2គ្រាប់ក្នុងតង់ទី1 នាកីឡដ្ឋាន Parc des Princes ដើម្បីផ្តល់ឱ្យក្រុមរបស់ខ្លួននូវក្តីសង្ឃឹម។ បើទោះបីកីឡាករ Juan Bernat បានរកគ្រាប់បាល់តាមស្មើវិញនៅចន្លោះគ្រាប់បាល់របស់ Lukaku ក៏ដោយ ប៉ុន្តែ Rashford បានស៊ុតបាល់ប៉េណាល់ទីនៅជិតបញ្ចប់ការប្រកួតដែលត្រូវបានផ្តល់ឱ្យដោយប្រព័ន្ធវីដេអូជំនួយការអាជ្ញាកណ្តាល (VAR) ដើម្បីជួយឱ្យក្រុម Man United ឈានទៅវគ្គបន្តតែម្តង។

លោក Solskjaer បានឱ្យដឹងថា៖ «យើងតែងតែជឿជាក់លើលទ្ធផលនោះ។ ផែនការប្រកួតគឺការរកឱ្យបានគ្រាប់បាល់ទី1 ក្នុងការប្រកួតនេះឱ្យបានក្នុងរយៈពេលត្រឹមតែ5 ឬ 10នាទីដំបូង ហើយយើងក៏ធ្វើបានមែន»។
លោក Solskjaer បានប្រាប់ទូរទស្សន៍ BT Sport ថា៖ «ការជឿជាក់លើកីឡាករ គឺជាក្តីសង្ឃឹមរបស់យើងតែមួយប៉ុណ្ណោះ។ វាពិតជាអស្ចារ្យណាស់ អ្នកតែងតែដឹងថា វាពិតជាអាចទៅរួច។ ជាមួយនឹងក្លិបមួយនេះ នេះគឺជាអ្វីដែលយើងបានធ្វើ។ យើងជាក្រុម Man United។ វាជាការប្រកួតក្នុងក្របខ័ណ្ឌ Champoins League ហើយនោះ គឺជាលទ្ធផលដែលយើងធ្វើបាន»។

ជាមួយគ្នានេះ ខ្សែការពារ Alex Telles បានស៊ុតបាល់ប៉េណាល់ទី1 ដែលត្រូវបានផ្តល់ឱ្យដោយប្រព័ន្ធវីដេអូជំនួយការអាជ្ញាកណ្តាល (VAR) នៅជិតបញ្ចប់ការប្រកួតនៃនាទីបន្ថែម 15នាទី 2ដង ខណៈដែលក្រុម Porto បានផ្តួលក្រុម Roma ក្នុងលទ្ធផល 3-1 កាលពីថ្ងៃពុធ ដើម្បីឈានទៅវគ្គ 8ក្រុមចុងក្រោយនៃក្របខ័ណ្ឌ Champions Leagu បន្ទាប់ពីយកឈ្នះទាំង 2ជើង 4-3៕

March 7, 2019

ក្រុមចម្រៀងស្រីថៃ BNK48 ធ្វើឱ្យកក្រើកហ្វេនកម្ពុជាជាលើកដំបូង

សំឡេងហ្វេនៗស្រែកហ៑ោកញ្ជ្រៀវកងរំពងពេញនៅផ្សារទំនើបអ៊ីអន១ ខណៈក្រុមចម្រៀងស្រីថៃ BNK48 ដ៍ល្បីល្បាញរបស់ថៃ មកសម្ដែងដំបូងនៅក្នុងប្រទេសកម្ពុជា ធ្វើឱ្យហ្វេនពុះកញ្ជ្រោលសឹងទប់បំពង់កមិនជាប់ទៅហើយ។ BNK48 មានសមាជិកមកមកកាន់កម្ពុជាចំនួន 6 រូប ដើម្បីតបតាមការអញ្ជើញរបស់ភាគីកម្ពុជានិងថៃ ក្នុងពិធីចុះអនុស្សារណៈយោគយល់គ្នា ដើម្បីចាប់ដៃគ្នារវាងប៉ុស្តិ៍លេខ៥កម្ពុជា និងក្រុមចម្រៀងនេះ ក្នុងគោលបំណងពង្រីកប្រជាប្រិយភាពគ្នាទៅវិញទៅមក។

ពិធីចុះហត្ថលេខាគេឃើញក្រុមនេះ បង្ហាញខ្លួនលើកដំបូងធ្វើឱ្យកក្រើកផ្សារទំនើបអ៊ីអន១តែម្ដង ដោយមានបកស្រាយបទចម្រៀងខ្មែររួមគ្នាមានចំណងជើងថា « ស្នេហ៍ឆ្លងវេហារ» ធ្វើឱ្យអ្នកទស្សនាជាហ្វេនកម្ពុជាស្រែកចង់ដាច់ក្រឡើតនៅក្នុងថ្ងៃនោះ។ តារាចម្រៀងស្រីមេក្រុម BNK48 បានអះអាងថា ក្រុមរបស់ខ្លួនបានចំណាយពេលហាត់សមបទចម្រៀងខ្មែរអស់រយៈពេលជាច្រើនម៉ោង និងត្រូវពិនិត្យការបកស្រាយឱ្យត្រូវសំនៀងផងដែរ។ ដូច្នោះហើយ វាពិតជាមានការលំបាកខ្លាំងណាស់ និងរំពឹងទុកថា គ្មានអ្នកគាំទ្រមកទស្សនាទេ ព្រោះជាដំណើរសម្ដែងក្រៅប្រទេសដំបូង។ តែអ្វីដែលនឹកស្មានមិនដល់នោះ គឺ ក្ដីរំពឹងទុកផ្ទុយខុសស្រឡះ ពោលគឺ មានអ្នកគាំទ្រមករង់ចាំការសម្ដែង និងចូលរួមជាច្រៀងឡើងច្រើននាក់នឹកស្មានមិនដល់។ យ៉ាងណាមិញ នាងថា ក្រុមនាងមានតែបេសកកម្មមកសម្ដែងនៅក្នុងពេលនោះតែប៉ុណ្ណោះ គឺមិនមានគម្រោងទៅសម្ដែងកន្លែងផ្សេងទៀត ឬដើរកម្សាន្តក្នុងដំណើរមកលើកនេះទេ គឺលើកលែងតែគម្រោងក្រោយៗ។

លោក ហួង តារាមុន្នី នាយកផលិតកម្មវិធីប្រចាំនៅប៉ុស្តិ៍លេខ៥ បានអះអាងថា ក្រុមចម្រៀងនារី BNK48 មិនមែនគ្រាន់តែល្បីនៅក្នុងប្រទេសថៃនោះទេ តែក៏ល្បីនៅក្នុងតំបន់អាស៊ី និងបណ្ដាប្រភាគភាគច្រើននៅលើពិភពលោកផងដែរ ដោយក្រុមមួយនេះបានកៀរគរសមាជិករហូតដល់58 នាក់ដែលមកពីប្រទេសថៃ និងជប៉ុន។ ដោយសារតែក្រុមមួយនេះ កាន់តែល្បី និងមានការគាំទ្រជាសាកលខ្លាំងឡើងៗបែបហ្នឹងនោះហើយ ទើបប៉ុស្តិ៍លេខ៥ ឈានដល់ការចុះMOU ឬ អនុស្សារណៈយោគយល់គ្នា ដើម្បីបង្កើតកម្មវិធីមួយបង្ហាញពីសកម្មភាពរបស់ក្រុម BNK48 នៅTV5 ក្នុងរយៈពេល5ឆ្នាំ ដោយTV5 ក៏មានសិទ្ធិអញ្ជើញក្រុមនេះឱ្យមកសម្ដែងនៅពេលណាក៏បាន។

លោកថាក្នុងកិច្ចព្រមព្រៀងនេះ កម្ពុជានឹងមានសិទ្ធិស្នើរអ្នកមានសមត្ថភាពមួយរូបឱ្យក្លាយជាសមាជិកថ្មីក្នុងក្រុមចម្រៀង BNK48 ដើម្បីឱ្យក្លាយជាសមាជិកថ្មីមួយដូចគ្នា។ លោកថាគោលបំណងនៃកិច្ចព្រមព្រៀងនេះ គឺ ក្រុមBNK48 នឹងកាន់តែល្បីនៅកម្ពុជា តែកម្ពុជាក៏អាចដាក់បញ្ចូលសមាសភាពតំណាងខ្លួនក្នុងក្រុម ដើម្បីឱ្យកាន់តែស្គាល់ពីការរីកចំរើននៃវិស័យចម្រៀងខ្មែរ។ លោកនឹងជ្រើសយកយុវវតីវ័យក្មេងកម្ពុជាមួយរូបឱ្យទទួលការបណ្ដុះបណ្ដាលនៅក្នុងក្រុមនេះ ដើម្បីឱ្យក្លាយជាសមាជិកក្រុមពេញសិទ្ធិក្នុងពេលខាងមុខ៕

March 7, 2019

ទិវារវប្បធម៌ជាតិលើកទី២១ឆ្នាំនេះ តារាសិល្បៈបង្ហាញខ្លួនយ៉ាងស្អេកស្អះ

នៅថ្ងៃទី6 មិនា មុននេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីប្រារព្ធពិធីបើកទិវាវប្បធម៌ជាតិ ០៣មីនា លើកទី២១ និងបិទមហោស្រពសិល្បៈយុវជនទូទាំងប្រទេសឆ្នាំទី5 ។

ប្រទេសកម្ពុជាបានប្រារព្ធពិធីទិវារវប្បធម៌ យ៉ាអធឹកអធម អមដោយពិធីអាហារសាមគ្គីជាមួយសម្ដេចនាយករដ្ឋមន្ត្រី ដោយមានតារាសិល្បៈយ៉ាងច្រើនកុះករចូលរួម។ ពិធីនេះត្រូវគេឃើញមានការបង្ហាញសិល្បៈចម្រុះរហូតដល់45ក្រុមផ្សេងគ្នា ដែលក្រុមសិល្បៈនីមួយៗតំណាងឱ្យខេត្តក្រុងទាំង25 និងស្ថាប័នសិល្បៈធំធំ ដែលមាននៅក្នុងប្រទេសកម្ពុជា។

ទិវារដែលបានធ្វើឡើងនៅអាគារកោះពេជ្រ ក្រោមវត្តមានថ្នាក់ដឹកនាំ និងតារាសិល្បៈក្នុងឆ្នាំទីពីរនេះ ត្រូវគេកត់សម្គាល់ថារៀបចំបានល្អជាងកាលពីឆ្នាំមុន ខណៈដែលតារាសិល្បៈចូលរួមនៅក្នុងឆ្នាំនេះ ក៍ត្រូវបានសម្រិតសម្រាំង ខុសប្លែកពីឆ្នាំទី១។ តារាសិល្បៈមិនត្រឹមបង្ហាញខ្លួនយ៉ាងស្អេកស្អះ ទាំងតារាជើងចាស់ និងជើងថ្មីប៉ុណ្ណោះទេ ប៉ុន្តែក៏បានបង្អួតស៊ីវិល័យ និងរូបសម្រស់ ធ្វើឱ្យវេទិកាទាំងមូលទទួលបានការចាប់អារម្មណ៍មិនធម្មតានោះផងដែរ។

ចង់ដឹងថា ព្រិត្តិការណ៍ទិវាវប្បធម៌ជាតិលើកទី២១អឹកធឹកយ៉ាងណានោះ សូមទស្សនារូបភាពខាងក្រោមនេះ៖