រដ្ឋាភិបាលស៊ុយអែត តាមរយៈស្ថានទូតស៊ុយអែតប្រចាំនៅកម្ពុជា បានចុះហត្ថលេខាលើកិច្ចព្រមព្រៀងស្តីពីការផ្តល់ជំនួយឥតសំណងដល់មូលនិធិក្រុមប្រឹក្សាអាជ្ញាកណ្តាលប្រមាណ 2.5លានក្រូអាត ឬ268,000ដុល្លារអាមេរិក ដើម្បីពង្រឹងទំនាក់ទំនងវិជ្ជាជីវៈ និងលក្ខខណ្ឌទីផ្សារការងារនៅកម្ពុជា។
លោក Samuel Hurtig ប្រធានផ្នែកសហប្រតិបត្តិការអភិវឌ្ឍន៍នៃស្ថានទូតស៊ុយអែតនៅរាជធានីភ្នំពេញបានលើកឡើងថា ការអប់រំ និងទីផ្សារការងារគឺជាវិស័យអាទិភាពមួយក្នុងចំណោមអាទិភាពដទៃទៀតរបស់កិច្ចសហប្រតិបតិ្តការអភិវឌ្ឍន៍អន្តរជាតិរបស់ប្រទេសស៊ុយអែតនៅកម្ពុជា។ មូលនិធិក្រុមប្រឹក្សាអាជ្ញាកណ្តាលបានចូលរួមចំណែកយ៉ាងសកម្មក្នុងការដោះស្រាយវិវាទការងារកន្លងមកប្រកបដោយយុត្តិធម៌ និងសមធម៌។ ចាប់តាំងពីឆ្នាំ 2014 មករដ្ឋាភិបាលស៊ុយអែតបានផ្តល់ថវិកាគាំទ្រដល់ក្រុមប្រឹក្សាអាជ្ញាកណ្តាល និងមូលនិធិក្រុមប្រឹក្សាអាជ្ញាកណ្តាលដើម្បីបន្តដោះស្រាយវិវាទការងារ និងលើកកម្ពស់កិច្ចសន្ទនាក្នុងគោលដៅរួមចំណែកបង្កើតបរិយាកាសទំនាក់ទំនងវិជ្ជាជីវៈប្រកបដោយប្រសិទ្ធភាពនៅកម្ពុជា។
លោក Samuel Hurtig បាននិយាយថា៖ “ក្រុមប្រឹក្សាអាជ្ញាកណ្តាល និងមូលនិធិក្រុមប្រឹក្សាអាជ្ញាកណ្តាល គឺជាតួអង្គយ៉ាងមានសារៈសំខាន់ក្នុងការរៀបចំ និងដោះស្រាយទំនាស់វិវាទការងារនៅកម្ពុជា”។
បើតាមលោក Samuel Hurtig ការដោះស្រាយវិវាទការងារក្នុងសង្គមមានសារៈសំខាន់ខ្លាំងណាស់ចំពោះគ្រប់ប្រទេសទាំងអស់មិនត្រឹមតែកម្ពុជានោះទេ ព្រោះប្រទេសស៊ុយអែតក៏បានចំណាយពេលវេលា និងថវិកាជាច្រើនដើម្បីរៀបចំធ្វើយ៉ាងណាឱ្យដំណើរការនៃការដោះស្រាយបញ្ហារវាងនិយោជក និងនិយោជិតមានភាពរលូន សំដៅរួមគ្នាជំរុញឱ្យមានភាពសុខដុមរមនា និងសន្តិភាពក្នុងការធ្វើការងារ។ ប្រសិនបើភាគីទាំងអស់ក្នុងទីផ្សារការងារមានភាពស្រុះស្រួលគ្នាទាំងនិយោជក និយោជិត សហជីព រួមទាំងដៃគូពាក់ព័ន្ធនានាផ្សេងទៀត សេដ្ឋកិច្ចនឹងអាចរីកលូតលាស់បានល្អប្រសើរ ហេតុនេះរដ្ឋាភិបាលមានតួនាទីយ៉ាងសំខាន់ក្នុងការរៀបចំគោលនយោបាយសំដៅបង្កើនការយកចិត្តទុកដាក់ និងលើកទឹកចិត្តឱ្យមានយន្តការល្អក្នុងការដោះស្រាយវិវាទការងារ។
មូលនិធិក្រុមប្រឹក្សាអាជ្ញាកណ្តាល ជាស្ថាប័នដែលលើកកម្ពស់ឱ្យមានទំនាក់ទំនងវិជ្ជាជីវៈប្រកបដោយប្រសិទ្ធភាពតាមរយៈការផ្តល់ជាវេទិកាសម្រាប់កម្មករនិយោជិត និងនិយោជកនៅកម្ពុជា ក្នុងការស្វែងរកដំណោះស្រាយប្រកបដោយយុត្តិធម៌ និងសមធម៌ចំពោះវិវាទការងារដែលកើតមាន។ វិវាទការងារ ត្រូវបានដោះស្រាយដោយផ្ទាល់ និងទាន់ពេលវេលាប្រកបដោយតម្លាភាព តាមរយៈការធ្វើសវនាការ និងការចេញសេចក្តីបង្គាប់ដែលមានយុត្តិធម៌ តុល្យភាព និងមានហេតុផល យោងតាមច្បាប់។
លោក ម៉ែន និម្មិត នាយកប្រតិបត្តិមូលនិធិក្រុមប្រឹក្សាអាជ្ញាកណ្តាលបានលើកឡើងថា ក្រុមប្រឹក្សាអាជ្ញាកណ្តាល ដើរតួនាទីយ៉ាងសំខាន់ និងបំពេញកិច្ចការបានល្អដោយសម្រេចនូវសមិទ្ធផលជាច្រើនក្នុងការដោះស្រាយវិវាទការងារកន្លងមក។ មកដល់ឆ្នាំ2018 ក្រុមប្រឹក្សាអាជ្ញាកណ្តាលបានទទួលសំណុំរឿងចុះបញ្ជីចំនួន 2,765ករណី ដែលមានកម្មករនិយោជិតពាក់ព័ន្ធជាង 1លាននាក់។ ក្នុងចំណោមសំណុំរឿងទាំងអស់នោះ ក្រុមប្រឹក្សាអាជ្ញាកណ្តាលបានដោះស្រាយដោយជោគជ័យប្រមាណ 73.20%។ ហេតុនេះការផ្តល់ជំនួយរបស់ប្រទេសស៊ុយអែត និងដៃគូពាក់ព័ន្ធនានានៅពេលនេះ គឺជាការចូលរួមចំណែកយ៉ាងសំខាន់ក្នុងការបន្តដោះស្រាយវិវាទការងារនៅកម្ពុជាឱ្យកាន់តែមានប្រសិទ្ធភាព។
លោក ម៉ែន និម្មិត បាននិយាយថា៖ “ចាប់តាំងពីឆ្នាំ 2014 មកដល់បច្ចុប្បន្ននេះ ប្រទេសស៊ុយអែតបានផ្តល់ជំនួយដល់ក្រុមប្រឹក្សាអាជ្ញាកណ្តាលប្រមាណជាង 1.2លានដុល្លារអាមេរិក ដើម្បីលើកកម្ពស់អភិបាលកិច្ច ទីផ្សារការងារ ប្រកបដោយប្រសិទ្ធភាពសម្រាប់វិស័យឯកជន និងការអភិវឌ្ឍសង្គមតាមរយៈប្រព័ន្ធមជ្ឈត្តវិនិច្ឆ័យដោះស្រាយវិវាទការងារដោយអាជ្ញាកណ្តាលដែលអាចជឿជាក់បាន”។
លោកជំទាវ សុវណ្ណ វណ្ណារ័តន៍ អនុរដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ការបន្តរក្សាឱ្យបាននូវយន្តការក្នុងការដោះស្រាយវិវាទការងារប្រកបដោយភាពសុខដុម គឺជាការចូលរួមចំណែកយ៉ាងសំខាន់ក្នុងការជំរុញការអភិវឌ្ឍ ក៏ដូចជាការបង្កើនផលិតភាពក្នុងសហគ្រាស និងគ្រឹះស្ថាននានាឱ្យកាន់តែមានភាពរលូនទៅមុខ។ ដូចដែលបានបញ្ជាក់ហើយថាការបង្កើតក្រុមប្រឹក្សាអាជ្ញាកណ្តាល បើទោះបីជាបង្កើតតាមច្បាប់ការងារ និងជាផ្នែកមួយនៃរាជរដ្ឋាភិបាល តែស្ថាប័ននេះនៅតែរក្សាបាននូវឯករាជភាពរបស់ខ្លួន ដោយក្នុងនោះយើងបានបង្កើតជាមូលនិធិក្រុមប្រឹក្សាអាជ្ញាកណ្តាលដែលជាស្ថាប័នធានានិរន្តរភាពនៃស្ថាប័នក្រុមប្រឹក្សាអាជ្ញាកណ្តាល។
លោកជំទាវ សុវណ្ណ វណ្ណារ័តន៍៖ “បើទោះបីជាយើងឃើញថា ក្រុមប្រឹក្សាអាជ្ញាកណ្តាលជាស្ថាប័នសំខាន់ដែលសម្រេចបាននូវភាពអព្យាក្រឹត តម្លាភាព និងប្រសិទ្ធភាព តែយើងក៏មានបញ្ហាប្រឈមក្នុងការបន្តនិរន្តរភាពលើការប្រើប្រាស់មូលនិធិដើម្បីបន្តដំណើរការក្រុមប្រឹក្សាអាជ្ញាកណ្តាល”។
លោកជំទាវ បានបន្ថែមផងដែរថា យើងបានជជែកជាមួយស្ថាប័នពាក់ព័ន្ធក្នុងការចូលរួមចំណែកជាហិរញ្ញវត្ថុដល់ស្ថាប័នយ៉ាងសំខាន់នេះដើម្បីធានាឯករាជភាព និងប្រសិទ្ធភាព។ យើងក៏ធ្លាប់ទទួលមតិផងដែរថា រាជរដ្ឋាភិបាលមិនសូវយកចិត្តទុកដាក់លើផ្នែកហិរញ្ញវត្ថុសម្រាប់បន្តការងាររបស់ក្រុមប្រឹក្សាអាជ្ញាកណ្តាល តែជាក់ស្តែងយើងបានត្រៀមខ្លួនរួចជាស្រេចក្នុងការផ្តល់ថវិកាដល់ក្រុមប្រឹក្សាអាជ្ញកណ្តាលដោយមានការឯកភាពពីភាគីពាក់ព័ន្ធ និងដៃគូនានាក្នុងការទទួលផលប្រយោជន៍ពីដំណោះស្រាយរបស់ក្រុមប្រឹក្សាអាជ្ញាកណ្តាលនេះ។ យើងបើកចំហសម្រាប់ការពិភាក្សា ដើម្បីរកវិធីយ៉ាងណាដើម្បីបន្តនិរន្តរភាពរបស់ក្រុមប្រឹក្សាអាជ្ញាកណ្តាលពាក់ព័ន្ធនឹងហិរញ្ញវត្ថុ ដើម្បីធានាឱ្យបាននូវចំណុចសំខាន់គឺ ឯករាជភាពក្នុងការដោះស្រាយវិវាទ៕
