សង្គម និងសេដ្ឋកិច្ច - La Reine Media

ស្ងាត់ៗXiaomi បង្ហាញបច្ចេកវិទ្យាថ្មីឈ្មោះ Super Charge Turbo សាក17នាទីបាន 100%

បច្ចុប្បន្នបច្ចេកវិទ្យា SuperVOOC របស់ក្រុមហ៊ុន Oppo ត្រូវបានរាប់បញ្ចូលថាអាចសាកថ្មស្មាតហ្វូនបានរហ័សបំផុតជាមួយកម្លាំង 10V/5A ប៉ុន្តែថ្មីៗនេះក៏ត្រូវបានក្រុមហ៊ុនគូប្រជែងក្នុងស្រុក Xiaomi បង្ហាញនូវបច្ចេកវិទ្យាថ្មីមួយឈ្មោះ Super Charge Turbo ដើម្បីធ្វើការប្រកួតប្រជែងក្នុងទីផ្សារស្មាតហ្វូន។

តាមការផ្សាយរបស់គេហទំព័រ Weibo បានបញ្ជាក់ថាបច្ចេកវិទ្យានោះប្រើប្រាស់ដុំសាកកម្លាំង 100វ៉ាត់ ប្រភេទ 20V/5A យកឈ្នះលើដុំសាកកម្លាំង 50វ៉ាត់របស់ Oppoបាន។

តាមការធ្វើតេស្តប្រៀបធៀបដោយផ្ទាល់ Xiaomi ប្រើពេលត្រឹម 17នាទី ប៉ុណ្ណោះដើម្បីសាកឡើងពី ០ ដល់ 100ភាគរយ ខណៈក្នុងថេរវេលាដដែលដុំសាក Oppo អាចបញ្ចូលថ្មត្រឹមតែ 65ភាគរយប៉ុណ្ណោះ។

បច្ចេកវិទ្យា Super Charge Turbo ធ្វើបានរហ័សជាង ទាំងជាមួយការសាកល្បងលើស្មាតហ្វូនមានថាមពលថ្ម 4,000mAh ខណៈ SuperVOOC ដំណើរការតេស្តលើឧបករណ៍មានថ្ម 3,700mAh។ ជាងនេះបើយើងធៀបនឹង Super Charge របស់ Huawei កម្លាំង 55វ៉ាត់ លើ Mate X ទាមទារថេរវេលាដល់ទៅ 35នាទីឯណោះ៕

សូមទស្សនាវីដេអូខាងក្រោម៖

March 26, 2019

Samsung ចេញទូរស័ព្ទ A70 មួយទៀតតម្លៃសមរម្យ កាមេរ៉ាមុខទំហំ 32MP

ក្រុមហ៊ុន Samsung បានបន្តចេញផ្សាយនូវត្រកូល A មួយម៉ូឌែលទៀត គឺ Galaxy A70 ដែលមានការវិវដ្ដអេក្រង់កាន់តែធំរហូតដល់ 6.7អ៊ីញ ប្រភេទ Super AMOLED ជារចនាប័ទ្មអេក្រង់ Infinity-U បង្កប់កាមេរ៉ាមុខទំហំ 32MP។

កាមេរ៉ា 3 គ្រាប់ខាងក្រោយដោយមួយទំហំ 32MP មាន Aperture f/1.7 ខណៈគ្រាប់ទីពីរមានទំហំ 8MP ប្រភេទ Ultra-Wide Angle (123 ដឺក្រេ) និងគ្រាប់ទីបីប្រភេទ Depth Sensor ទំហំ 5MP។ ទូរស័ព្ទដៃប្រភេទនេះមានមុខងារប្រព័ន្ធសុវត្ថិភាពពីរ រួមមានជម្រើសស្កេនខ្ចៅដៃលើអេក្រង់ ឬស្កេនមុខដោះសោ។

A70 មានថាមពលថ្មធំដល់ 4,500mAh គាំទ្រមុខងារសាកថ្មរហ័សកម្លាំង 25 វ៉ាត់ ដែលធំជាងត្រកូល Galaxy ដទៃៗទៀត ពោលដូចជា Galaxy S10 5G ត្រឹម 18វ៉ាត់តែប៉ុណ្ណោះ។ ប៉ុន្តែទូរស័ព្ទកម្រិតមធ្យម អត់មានគាំទ្រប្រព័ន្ធសាកថ្មឥតខ្សែ Wireless Charging ឡើយ។

ស្ថិតក្នុងជម្រើស RAM 6GB ឬ 8GB អមដោយអង្គផ្ទុក (memory) ក្នុងម៉ាស៊ីនទំហំ 12GB អាចបន្ថែម microSD Card ដល់ទំហំ 512GB នៅអមនឹងប្រអប់ស៊ីមកាតចំនួនពីរ។

អេក្រង់ 6.7 អ៊ីញអាចមើលទៅធំពេក ប៉ុន្តែក្រុមហ៊ុន Samsung បានរចនាតួខ្លួនជារាងទ្រវែងដែលមានបណ្តោយ 76.7 មីលីម៉ែត្រ ពោលគឺកាន់ពេញដៃសមល្មម ឬអាចប្រើប្រាស់មុខងារដៃម្ខាង One Handed Navigation ក៏បាន។

ទូរស័ព្ទដៃ Samsung A70 មាន 4 ពណ៌គឺ Coral, Blue, Black និង White ប៉ុន្តែចំពោះតម្លៃ និងការចេញលក់លម្អិត ខាងក្រុមហ៊ុនសុំលាក់សិន ដោយអាចនឹងបញ្ជាក់បន្ថែមនាថ្ងៃទី10 មេសាខាងមុខ៕

March 26, 2019

ស៊ូ ស៊ីរីកា រាសីឡើងខ្ពស់ ស្រូបយកអ្នកគាំទ្រនៅអាមេរិកបាក់ទឹកបាក់ដី ឥឡូវផ្ទុះបទថ្មីៗត្រៀមចូលឆ្នាំទៀត

ថ្មីៗនេះ ស៊ូ ស៊ីរីកា ទើបតែមានឱកាសសម្ដែងជាលើកដំបូងនៅលើទឹកដីអាមេរិកប៉ុណ្ណោះ ប៉ុន្តែតារាស្រីរូបនេះកញ្ឆក់យកបេះដូងអ្នកគាំទ្រគួរឱ្យសរសើរ បើទោះបីការសម្ដែងទើបតែបញ្ចប់។ ប្រភពពីអ្នកគ្រប់គ្រងកម្មវិធីនៅសហរដ្ឋអាមេរិកបានលើកឡើងថា តារាស្រីនៅផលិតកម្មថោនរូបនេះ មានសន្ទុះខ្លាំងមិនធម្មតាឡើយ ព្រោះថា ទាំងខ្មែរនៅទីនោះ ទាំងបរទេស ទាំងមន្ត្រីស្ថានទូតប្រចាំសហរដ្ឋអាមេរិក សម្រុកទិញសំបុត្រទស្សនាការសម្ដែងរបស់នាងយ៉ាងភ្លូកទឹកភ្លូកដី។ អ្វីដែលពិសេសជាងនេះទៀតគឺ ធ្លាយដំណឹងមកថា មានកន្លង់រូបសង្ហា កំពុងតែចែចង់រូបនាង ហើយនាងក៏កំពុងពិចារណាដែរ។

ប្រភពដដែលអះអាងថា ការបកស្រាយសម្ដែងរាំច្រៀងត្រឹមតែ 6 Shows តែហ្វេននៅលើទឹកដីអាមេរិក សុទ្ធតែលាន់មាត់សរសើរថា នាងជាតារាចម្រៀងខ្មែរ ដែលអាចបកស្រាយបានលន្លង់លន្លោចទាំងបទមនោសញ្ចេតនាជាភាសាខ្មែរ និងបរទេស ខណៈដែលបទចម្រៀងជាចង្វាក់រាំៗដែលនាងបកស្រាយក៏ពោរពេញដោយស្ទីលក្រម៉ិចក្រម៉ើម ធ្វើឱ្យអ្នកទស្សនាដោយផ្ទាល់ជាប់ចិត្ត។ អ្នកគ្រប់គ្នាថា ស៊ូ ស៊ីរីកា ពិតជាមានប្រជាប្រិយភាពនៅលើទឹកដីស៊ីវិល័យនោះមិនធម្មតាមែន ដោយអ្នកធានាយកនាងឱ្យទៅច្រៀងនៅទីនោះញញឹមបិទមាត់មិនជិត និងសរសើរថានាងគឺជាតារាល្បីមកពីកម្ពុជាតែម្នាក់គត់ ដែលចេះសម្របតាមបរិយាសដោយតស៊ូច្រៀងបំពេញតាមសំណូមពរអ្មកគាំទ្រ ដោយមិនកំណត់ចំនួនបទ និងម៉ោងពេល ធ្វើឱ្យកម្មវិធីទាំងមូលកាន់តែរស់រវើកនោះផង។

សូមជម្រាបដែរថា ស្របពេលដែលទទួលបានការជោគជ័យសម្ដែងនៅលើទឹកដីសហរដ្ឋអាមេរិក ខណៈនេះ បទចម្រៀងថ្មីរបស់នាង “ម៉ាឌីហ្សុនឈូសស្បែកជើង” របស់នាងក៏ត្រូវគេចាក់បន្លឺយ៉ាងកងរំពងមិនអន់ដែរ គ្រប់ទិសទីកន្លែង តាមហាងទំនិញ ផ្សារទំនើប និងក្នុងវេទិការាំលេងក្នុងមង្គលការ ស្របគ្នាដែលបទចម្រៀងនេះ ក៏មានអ្នកចូលស្ដាប់ច្រើនមិនធម្មតានៅលើបណ្ដាញយូធូប។ មិនត្រឹមតែកន្ត្រាក់អ្នកនិយមទឹកដមសំឡេងរបស់នាងក្នុងបទ “ម៉ាឌីហ្សុនឈូសស្បែកជើង” នោះតែមួយបទទេ សូម្បីតែបទប្រភេទមរតកដើម ដូចជាបទ “ចាស់ហើយលោកប្ដី” ដែលនាងបកស្រាយរួមគ្នា ជាមួយលោក ម៉ៅ ហាជី ក៏ត្រូវគេបន្លឺតាមវិទ្យុ និងទីសាធារណៈ ដែលធ្វើឱ្យតារាស្រីរូបនេះ ត្រូវគេកត់សម្គាល់ថា ខ្លាំងក្នុងការក្រសោបការគាំទ្រទាំងក្នុងស្រុក និងក្រៅស្រុកក្នុងរយៈពេលនេះផងដែរ៕

March 26, 2019

Sterling អំពាវនាវឱ្យព្យួរកីឡដ្ឋាន ក្រោយមានការរើសអើង ក្នុងពេលអង់គ្លេស ផ្តួល ម៉ុងតេណេហ្គ្រោ

ខ្សែប្រយុទ្ធ Raheem Sterling ជឿជាក់ថា សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA គួរតែដាក់ទណ្ឌកម្ម លើការច្រៀងចម្រៀងបែបរើសអើង ទៅកាន់កីឡាកររបស់ក្រុមជម្រើសជាតិអង់គ្លេស ក្នុងពេលក្រុមខ្លួនបានយកឈ្នះក្នុងលទ្ធផល 5-1 កាលពីថ្ងៃចន្ទ លើក្រុមជម្រើសជាតិម៉ុងតេណេហ្គ្រោ ក្នុងទីក្រុង Podgorica តាមរយៈការបិទកីឡដ្ឋាននៅទីក្រុង Podgorica។

តារាឆ្នើមរបស់ក្លិប Manchester City រូបនេះបានអបអរការរកបានគ្រាប់បាល់ទី5 របស់គេតាមរយៈការយកដៃបាំងត្រចៀករបស់គេ ឆ្ពោះទៅកាន់អ្នកគាំទ្រម្ចាស់ផ្ទះ នៅរាត្រីមួយដែលនៅពេលនោះការដណ្តើមបានជ័យជម្នះមួយផ្សេងទៀតក្នុងយុទ្ធនាការជម្រុះ Euro ឆ្នាំ2020 របស់ក្រុមអង់គ្លេស ត្រូវបានបាំងបិទដោយការរើសអើង។
Sterling បានប្រាប់ទូរទស្សន៍ Sky Sports ថា៖ «ខ្ញុំគ្រាន់តែចង់បង្ហាញឱ្យពួកគេឃើញថា អ្នកត្រូវការលទ្ធផលល្អប្រសើរជាងនេះ ក្នុងការធ្វើឱ្យយើងខកចិត្ត និងបញ្ឈប់យើង។ ពេលនេះឆ្នាំ2019ហើយ ខ្ញុំនៅតែរក្សាការនិយាយបែបនេះ។ វាជារឿងអាម៉ាស់មួយក្នុងការឃើញសកម្មភាពបែបនេះបន្តកើតឡើង ហើយយើងត្រឹមតែអាចដឹងពីស្ថានភាពនេះ»។
ស្របពេលជាមួយគ្នានេះ Gareth Southgate អ្នកចាត់ការទូទៅរបស់ក្រុមជម្រើសជាតិអង់គ្លេស បាននិយាយថា លោកបានឮការស្រែកច្រៀងការរើសអើងជាតិសាសន៍ ដោយមានបំណងទៅលើ Danny Rose។ លោក Southgate បានឱ្យដឹងថា៖ «ខ្ញុំពិតជាបានឮពីការរើសអើងទៅលើ Danny Rose នៅពេលដែលរូបគេបានរងពិន័យកាតលឿងក្នុងពេលជិតបញ្ចប់ការប្រកួត។ វាពិតជាគ្មានការសង្ស័យក្នុងចិត្តខ្ញុំឡើយដែលបញ្ហានោះបានកើតឡើង។ យើងនឹងធ្វើឱ្យប្រាកដថា បញ្ហានោះនឹងត្រូវរាយការណ៍ទៅកាន់ UEFA ដោយសារតែវាមិនអាចទទួលយកបានឡើយ»។ បច្ចុប្បន្ន ក្រុមជម្រើសជាតិអង់គ្លេស បានឈរយ៉ាងរឹងមាំនៅលើកំពូលតារាងនៃពូល A ដោយមាន6ពិន្ទុ និងគ្រាប់បាល់ស៊ុតបញ្ចូលទី10គ្រាប់ ពីការប្រកួតបើកឆាក2លើកដំបូងរបស់ពួកគេ៕

March 26, 2019

ក្រុមតារាហ្វេសប៊ុក យាយសំ យាយសយ ត្រៀមបង្ហាញឃ្លីបថ្មីជាមួយនាយ ក្រូច

កន្លងមកលោកអ្នកធ្លាប់ផ្ទុះសំណើចខ្លាំងជាមួយក្រុមសម្តែងចាស់ៗពូកែញិកញក់គឺ យាយសំ យាយសយ ដែលមានសមាជិកសរុប4នាក់ រួមមានលោកយាយ អ៊ីវ ស៊ាន (ហៅយាយសំ) លោកយាយ អ៊ីវ ស៊ន (ហៅយាយសយ) លោកតា ព្រៃ ឃឹម (ហៅតាសុច) និងលោក មាន ហ៊ (ហៅនាយតយ) ហើយក្នុងនោះលោក ង៉ុង សាន់ ជាអ្នកដឹកនាំក្រុមផ្ទាល់។

នៅក្នុងឆ្នាំ 2019នេះ ក្រុមសម្តែងវ័យចំណាស់មួយនេះ បាននឹងកំពុងរៀបគម្រោងក្នុងការបំផុសឃ្លីបវីដេអូកំប្លែងរបស់ខ្លួនជាថ្មីម្ដងទៀតហើយ ដោយមានផេចនិងឆានែលល្បីៗជាច្រើនដើម្បីគាំទ្រ បូកផ្សំជាមួយនិងសាច់រឿង រួមទាំងការសំរិតសម្រាំងលើបច្ចេកទេសផលិតឱ្យលើសមួយកម្រិតទៀតផងដែរ។ នេះបើតាមការបង្ហើបរបស់អ្នកដឹកនាំក្រុម។

សូមជម្រាបថា កន្លងមកទល់ពេលនេះក្រុមសម្តែងយាយសំ យាយសយ បានបញ្ជេញឃ្លីបខ្លីៗរបស់ខ្លួនបានប្រមាណជាង20ឃ្លីបមកហើយ ហើយឃ្លីបដែលផ្ទុះបន្ទាប់ពីខ្លីបដំបូងនោះគឺ វគ្គ នារីអូតេស ដែលធ្វើឱ្យអ្នកមើលផ្ទុះសំណើចព្រោះនឹកស្មានមិនដល់ ជាពិសេសរូបភាពរបស់គាត់ក្នុងឈុតជាអ្នកបម្រើការលើយន្តហោះ ទទួលបានការគាំទ្រយ៉ាងខ្លាំងសម្បើម រហូតមានផេចល្បីៗជាច្រើនយកទៅត្រូល និងផ្សាយចេញយ៉ាងព្រោងព្រាតលើបណ្ដាញសង្គម។ ការវិលត្រឡប់មកសាជាថ្មីនេះ ជាការសម្ដែងជាមួយតារាកំប្លែងស៊ីធីអិនគឺ នាយក្រូច គេរំពឹងថា ក្រុមយាយសំ យាយសយ និងស្រូបយកអ្នកទស្សនាកាន់តែច្រើនជាងមុន និងរកចំណូលបានបន្ថែមទៀតផងដែរ៕

March 26, 2019

Schulz ជួយឱ្យអាល្លឺម៉ង់ សងសឹកលើក្រុមហូឡង់

ខ្សែបម្រើ Nico Schulz បានរកឃើញគ្រាប់បាល់ឈ្នះនៅនាទីចុងក្រោយ ខណៈដែលក្រុមបាល់ទាត់ជម្រើសជាតិអាល្លឺម៉ង់ បានបំពេញការសងសឹករបស់ពួកគេលើក្រុមជម្រើសជាតិហូឡង់ តាមរយៈការយកឈ្នះយ៉ាងរំភើបក្នុងលទ្ធផល 3-2 ក្នុងការប្រកួតជម្រុះសម្រាប់ Euro ឆ្នាំ2020 ក្នុងទីក្រុង Amsterdam កាលពីថ្ងៃអាទិត្យ។

ក្រុមជម្រើសជាតិហូឡង់ បានឈានទៅប្រកួតក្នុងយុទ្ធនាការ Nations League ក្នុងជុំផ្តាច់ព្រ័ត្រ តាមរយៈការស៊ុតបាល់បញ្ចូលទី 2គ្រាប់ក្នុងចន្លោះពេល 5នាទីកាលពីខែវិច្ឆិកា ឆ្នាំមុន ដើម្បីទម្លាក់ក្រុមអាល្លឺម៉ង់ឱ្យទៅលេងក្នុងពូល B។

វាបានក្លាយជាការដណ្តើមបានជ័យជម្នះជាលើកទី1 របស់ក្រុមអាល្លឺម៉ង់ក្នុងការប្រកួតផ្លូវការមួយ បើគិតចាប់តាំងពីយុទ្ធនាការ World Cup កាលពីឆ្នាំមុន ហើយជ័យជម្នះនេះបានកើតឡើង ក្រោយពីការប្រកួតមួយដែលក្រុមរបស់លោក Loew បានបង្ហាញពីភាពរឹងមាំ និងភាពមុតស្រួចក្នុងតំបន់ប្រយុទ្ធ។

អាល្លឺម៉ង់ លេងបានយ៉ាងល្អក្នុងការប្រកួតរយៈពេល 45នាទីដំបូង ក្នុងទីក្រុង Amsterdam ប៉ុន្តែបានធ្លាក់ចូលក្នុងសម្ពាធវិញក្នុងតង់ទី2 ខណៈដែលក្រុមជម្រើសជាតិហូឡង់ បានវាយបកពីការដេញតាមពីក្រោយ 2-០។

ក្រុមដែលប្រជុំដោយកីឡាករថ្មីៗ អាល្លឺម៉ង់បាននាំមុខយ៉ាងឆាប់រហ័សក្នុងលទ្ធផល 2-០ ក្នុងទីក្រុង Amsterdam តាមរយៈគ្រាប់បាល់ស៊ុតបញ្ចូលទីយ៉ាងល្អពីសំណាក់ Leroy Sane និង Serge Gnabry ប៉ុន្តែ ក្រុមម្ចាស់ផ្ទះបានវាយបកវិញនៅតង់ទី2 តាមរយៈគ្រាប់បាល់ពីសំណាក់កីឡាករ Matthijs De Ligt នៅមុនពេលខ្សែបម្រើស្លាប Memphis Depay រកបានគ្រាប់បាល់តាមស្មើវិញនៅនាទីទី 63។

ស្របពេលជាមួយគ្នានេះ ក្រុមម្ចាស់ជើងឯករង World Cup ក្រូអាស៊ី បានរងបរាជ័យក្នុងលទ្ធផល 2-1 នៅលើទឹកដីក្រុមជម្រើសជាតិហុងគ្រី៕

March 25, 2019

Herta ក្លាយជាអ្នកឈ្នះវ័យក្មេងបំផុតក្នុងប្រវត្តិសាស្ត្រ IndyCar

Colton Herta បានក្លាយជាម្ចាស់ជើងឯកវ័យក្មេងបំផុតក្នុងប្រវត្តិសាស្ត្រនៃកីឡាប្រណាំងរថយន្ត IndyCar កាលពីថ្ងៃអាទិត្យ ខណៈដែលកីឡាករសញ្ជាតិអាមេរិកវ័យ 18ឆ្នាំរូបនេះបានទទួលជ័យជម្នះក្នុងការប្រណាំងជាស៊េរី ជាលើកទី3 របស់គេក្នុងព្រឹត្តិការណ៍ IndyCar Classic។

កូនប្រុសរបស់អតីតកីឡាករ Brian Herta រូបនេះបានទទួលជ័យជម្នះក្នុងការប្រណាំងចំនួន 60ជុំ លើចម្ងាយផ្លូវ 3.41ម៉ាល (ស្មើនឹង 5.48គីឡូម៉ែត្រ) នៅលើទីលានដែលមានផ្លូវបត់ចំនួន 20កន្លែងក្នុងការប្រណាំងជាស៊េរីនៅលើទីលាន Circuit of the Americas ក្នុងទីក្រុង Austin រដ្ឋ Texas។

Herta បាននិយាយថា៖ «វាពិតជាអស្ចារ្យខ្លាំងណាស់។ ខ្ញុំធ្វើបានយ៉ាងល្អ។ ខ្ញុំត្រូវការការសម្រាកបន្តិចនៅពេលនេះ» ។Herta ដែលជាសហម្ចាស់ជើងឯកក្នុងការប្រកួតមួយនាព្រឹត្តិការណ៍ 24 Hours of Daytona កាលពីខែមករានោះ បានបំបែកកំណត់ត្រាអាយុដែលត្រូវបានបង្កើតឡើងដោយកីឡាករអាមេរិកដូចគ្នាគឺ Graham Rahal។

Rahal ដែលជាអ្នកប្រណាំងរថយន្ត IndyCar ស្នងពីឪពុករបស់ខ្លួនម្នាក់ទៀតមានវ័យ19ឆ្នាំ និង 3ខែ ក្នុងពេលរូបគេបានទទួលជ័យជម្នះកាលពីឆ្នាំ2008 នៅទីក្រុង St. Petersburg រដ្ឋ Florida។

Herta ដែលនឹងឈានចូលវ័យ 19ឆ្នាំនៅថ្ងៃសៅរ៍នេះ បានឈប់ប្តូរកង់លើកចុងក្រោយរបស់គេនៅក្បែរបង្អួចកន្លែងចាក់សាំងចុងក្រោយ និងបានដណ្តើមយកការនាំមុខ នៅពេលដែលការប៉ះទង្គិចគ្នាមួយបានបង្ខំឱ្យកីឡាករ Will Power និង Alexander Rossi ពន្យារពេលការឈប់ប្តូរកង់ជាលើកចុងក្រោយរបស់ពួកគេដែរ។

Rahal បានឱ្យដឹងថា៖ «វាពិតជាយុទ្ធសាស្ត្រដ៏ល្អឥតខ្ចោះមែន យើងមិនបានរំពឹងទុកបែបនោះឡើយ។ យើងពិតជាមានល្បឿនដ៏ល្អខ្លាំងណាស់ ហើយយើងក៏មានល្បឿនលឿនក្នុងពេលចាប់ផ្តើមដែរ»៕

March 25, 2019

លោក Southgate សរសើរ Stertling ក្រោយរកបាន 3គ្រាប់ឱ្យអង់គ្លេស

លោក Gareth Southgate អ្នកចាត់ការទូទៅនៃក្រុមបាល់ទាត់ជម្រើសជាតិអង់គ្លេស បានកោតសរសើរទៅលើភាពចាស់ទុំរបស់ខ្សែប្រយុទ្ធ Raheem Sterling ក្នុងការប្រកួតអន្តរជាតិ ក្រោយពីរូបគេបានស៊ុតបាល់បញ្ចូលទី 3គ្រាប់ឱ្យក្រុមដែលមានរហស្សនាមថា តោកំណាចទាំង3 មួយនេះ ក្នុងពេលពួកគេបានយកឈ្នះក្នុងលទ្ធផល 5-០ លើក្រុមជម្រើសជាតិសាធារណរដ្ឋឆែក កាលពីរាត្រីថ្ងៃសុក្រ។

ក្រុមប្រជុំដោយកីឡាករពោរពេញដោយទេពកោសល្យក្នុងក្រុមរបស់លោក Southgate បានបង្ហាញពីសមត្ថភាព ខណៈដែលកីឡាករ Jadon Sancho វ័យ 18ឆ្នាំ និង Callum Hudson-Odoi បានបំពេញតួនាទីយ៉ាងល្អ ក្នុងក្រុមជម្រើសជាតិអង់គ្លេស ដោយបានចាប់ផ្តើមយ៉ាងល្អក្នុងយុទ្ធនាការនៃការប្រកួតជម្រុះ Euro ឆ្នាំ2020។

Sterling វ័យ 24ឆ្នាំ បានរងនូវការរិះគន់ជារឿយៗ ខណៈដែលរូបគេបានស៊ុតបាល់បញ្ចូលទីបានត្រឹមតែ 2គ្រាប់គត់ក្នុងការបង្ហាញខ្លួនជាអន្តរជាតិចំនួន 45លើកដំបូងរបស់គេ។

ប៉ុន្តែ ខ្សែបម្រើស្លាបរបស់ក្លិប Manchester City រូបនេះ បច្ចុប្បន្នរកបាន 5គ្រាប់ក្នុងការប្រកួត 3លើកចុងក្រោយរបស់គេសម្រាប់ក្រុមអង់គ្លេស ក្រោយពីរូបគេបានស៊ុតបាល់បញ្ចូលទី 2គ្រាប់ក្នុងពេលអង់គ្លេសយកឈ្នះលើក្រុមអេស្ប៉ាញ 3-2 ក្នុងការប្រកួត Nations League កាលពីខែវិច្ឆិកា ឆ្នាំមុន។

លោក Southgate បានឱ្យដឹងថា៖ «ខ្ញុំបានគិតថា រូបគេពិតជាមានភាពមុតស្រួចមែននៅរាត្រីនោះ។ ខ្ញុំពិតជាពេញចិត្តរូបគេចំពោះការបង្ហាញពីទម្រង់លេងដ៏ល្អបែបនេះ។ យើងមិនអាចលាក់បាំងការពិតបានថា រូបគេបានជួបពេលវេលាដ៏លំបាកមួយជាមួយនឹងក្រុមអង់គ្លេសឡើយ ហើយរូបគេបានវិលទៅរកភាពខ្លាំងវិញទាំងស្រុងហើយ»។

គ្រូបង្វឹករូបនេះបានបន្ថែមទៀតថា៖ «ខ្ញុំក៏គិតផងដែរថា គ្រាប់បាល់នៅលើទឹកដីក្រុមអេស្ប៉ាញ ពិតជាពេលវេលាដ៏សំខាន់ណាស់សម្រាប់រូបគេ»៕

March 25, 2019

Ronaldo រងពិន័យពី UEFA ក្រោយធ្វើត្រាប់តាមការអបអររបស់លោក Simeone

ខ្សែប្រយុទ្ធ Cristiano Ronaldo របស់ក្លិប Juventus ត្រូវបានពិន័យជាទឹកប្រាក់ចំនួន 2ម៉ឺនអឺរ៉ូ (ស្មើនឹង 22.7ម៉ឺនដុល្លារអាមេរិក) ដោយសហព័ន្ធកីឡាបាល់ទាត់ទ្វីបអឺរ៉ុប ហៅកាត់ថា UEFA សម្រាប់ការអបអរខុសទំនងនៅពេលរកបានគ្រាប់បាល់ 1គ្រាប់ ក្នុងពេលដែលក្រុមខ្លួនបានយកឈ្នះលើក្រុម Atletico Madrid ក្នុងការប្រកួតក្របខ័ណ្ឌ Champions League វគ្គ 16ក្រុមចុងក្រោយ កាលពីសប្តាហ៍មុន។

ខ្សែប្រយុទ្ធអន្តរជាតិព័រទុយហ្គាល់ វ័យ 34ឆ្នាំរូបនេះ ហាក់បានធ្វើត្រាប់តាមគ្រូបង្វឹករបស់ក្រុម Atletico លោក Diego Simeone ដែលបានបែរទៅកាន់អ្នកគាំទ្រ និងបានយកដៃក្តោបក្រលៀនរបស់លោក ក្នុងពេលក្រុមរបស់លោកដណ្តើមបានជ័យជម្នះក្នុងលទ្ធផល 2-០ កាលពីក្រុមទាំង 2 ប្រកួតគ្នានៅជើងទី1។

Ronaldo បានធ្វើកាយវិការបែបនោះ នៅពេលដែលរូបគេបានបំពេញការរកបានគ្រាប់បាល់ 3គ្រាប់តែម្នាក់ឯង ក្នុងការប្រកួតជើងទី2 ដែលធ្វើឱ្យក្រុម Juventus បានយកឈ្នះក្នុងលទ្ធផល 3-០ ដើម្បីឈានទៅវគ្គ 8ក្រុមចុងក្រោយ តាមរយៈការដណ្តើមបានជ័យជម្នះទាំង 2ជើងក្នុងលទ្ធផល 3-2។

គ្រូបង្វឹកសញ្ជាតិអាហ្សង់ទីនលោក Simeone ក៏បានរងការពិន័យជាទឹកប្រាក់ 2ម៉ឺនអឺរ៉ូផងដែរពី UEFA សម្រាប់ការអបអររបស់លោកនៅពេលនោះ ខណៈដែលអង្គភាពគ្រប់គ្រងកីឡាបាល់ទាត់ទ្វីបអឺរ៉ុបមួយនេះ បានដាក់ពិន័យដូចគ្នាក្នុងករណីរបស់ Ronaldo ដែរ។

លោក Simeone បាននិយាយបន្ទាប់ពីការប្រកួតថា៖ «រូបគេប្រាកដជាបានឃើញពីរបៀបដែលខ្ញុំបានធ្វើនៅកីឡដ្ឋាន Wanda Metropolitano ហើយមិនខុសពីខ្ញុំឡើយ រូបគេបានព្យាយាមបង្ហាញពីឥរិយាបថរបស់គេ»។

Ronaldo ដែលបានវិលទៅចូលរួមក្នុងក្រុមជម្រើសជាតិព័រទុយហ្គាល់វិញ ក្រោយពីអវត្តមាន 9ខែ កាលពីរាត្រីថ្ងៃព្រហស្បតិ៍នោះ បានស៊ុតបាល់បញ្ចូលទី 24គ្រាប់ឱ្យក្រុម Juventus ចាប់តាំងពីផ្ទេរមកពីក្លិប Real Madrid សម្រាប់តម្លៃខ្លួន 100លានអឺរ៉ូ កាលពីឆ្នាំមុន៕

March 25, 2019

ការស៊ើបអង្កេតត្រូវបានធ្វើឡើង ក្រោយកីឡាការិនីអាមេរិក ទាត់កីឡាការិនីកូរ៉េខាងត្បូង

អង្គភាពគ្រប់គ្រងកីឡាជិះស្គីនឹងត្រូវធ្វើការស៊ើបអង្កេតទៅលើការចោទប្រកាន់ផ្សេងៗថា កីឡាការិនីអាមេរិក Mariah Bell បានធ្វើឱ្យកីឡាការិនីកូរ៉េខាងត្បូង Lim Eun-soo រងរបួសដោយចេតនា អំឡុងពេលនៃការកម្តៅសាច់ដុំក្នុងព្រឹត្តិការណ៍ប្រកួតដណ្ដើមជើងឯកពិភពលោកនៅក្នុងប្រទេសជប៉ុន។

មន្ត្រីកីឡាកូរ៉េខាងត្បូង បានបញ្ជាក់ប្រាប់កាលពីថ្ងៃព្រហស្បតិ៍ថា ពួកគេបានដាក់ពាក្យបណ្តឹងជាផ្លូវការមួយ ក្រោយពីហេតុការណ៍នេះកើតឡើង ខណៈដែលភ្នាក់ងារចាត់ការទូទៅរបស់ Lim បានចោទប្រកាន់ថា Bell បានទាត់កីឡាការិនី(Lim)របស់ពួកគេ ដែលបណ្ដាលឱ្យនាងដាច់រលាត់ជើង ក្នុងពេលកម្តៅសាច់ដុំសម្រាប់កម្មវិធីប្រកួតលើវិញ្ញាសានារី កាលពីរាត្រីថ្ងៃពុធ។

មន្ត្រីកីឡាទាំងនោះបានបដិសេធក្នុងការបញ្ជាក់ពីសកម្មភាពក្នុងករណីនោះ ស្របពេលដែលសហព័ន្ធកីឡាជិះស្គីអន្តរជាតិហៅកាត់ថា ISU អាចនឹងចាត់វិធានការ ប៉ុន្តែបានទទួលស្គាល់ថា វាពិតជាលំបាកណាស់ក្នុងការបង្ហាញថា Bell មានបំណងធ្វើបែបនោះ។

ក្នុងពេលបន្ថែមថា ឪពុកម្តាយរបស់ Lim ក៏បានគិតថា ការប៉ះទង្គិចនេះគឺជារឿងចេតនាដែរនោះ មន្ត្រីម្នាក់របស់សហព័ន្ធកីឡាជិះស្គីរបស់កូរ៉េខាងត្បូងបានឱ្យដឹងថា៖ «ក្នុងដំណាក់កាលនេះ យើងមិនអាចសរុបបានថា Bell បានបង្កឱ្យ Lim មានរបួសដោយចេតនាឡើយ វាពិតជាលំបាកណាស់ក្នុងការប្រាប់ដោយគ្រាន់តែមើលរូបភាពវីដេអូលើករណីនេះ»។

កីឡាការិនី Lim វ័យ 16ឆ្នាំ ដែលកំពុងតែប្រកួតក្នុងព្រឹត្តិការណ៍ជើងឯកជិះស្គីពិភពលោកជាលើកទី1 របស់នាងបានរុំជើងការពារ នៅមុនពេលរកបាន 72.91ពិន្ទុ ដើម្បីបញ្ចប់ក្នុងចំណាត់ថ្នាក់លេខ5 ពីលើកីឡាការិនី Bell៕

March 25, 2019

Category: សង្គម និងសេដ្ឋកិច្ច