ក្នុងថ្ងៃប្រកាសចេញស្មាតហ្វូន Huawei P30 និង P30 Pro នៅយប់ថ្ងៃទី 26ខែមីនានេះ ក្រុមហ៊ុន Huawei បានឆ្លៀតបញ្ចេញផលិតផលបច្ចេកវិទ្យាថ្មីមួយគឺ វ៉ែនតា Smart glasses ដែលមានបង្កប់បច្ចេកវិទ្យាទំនើបដូចរឿងហូលីវូដ។ 
វ៉ែនតា Smart glasses នេះមានឈ្មោះថា Gentle Monster ជាប្រភេទវ៉ែនតាប្រណីត ដែលមានបច្ចេកវិទ្យាការពារជម្រាបទឹកកម្រិត IP67 សាកភ្លើងឥតខ្សែ មានថាមពលថ្ម 222mAh សាកតាមរយៈUSB -C(រន្ធសាកភ្លើងលឿន) ជាពិសេសប្រើកញ្ចក់ដូចទូរសព្ទ អាចបង្ហាញដំណឹង ឬទទួលទូរសព្ទបាន និងមាន mics អាចនិយាយឆ្លងឆ្លើយគ្នាបានទៀតផង។ 
ចំពោះតម្លៃនៅមិនទាន់ប្រកាសនៅឡើយទេ រង់ចាំដល់ពាក់កណ្ដាលខែឧសភា ឬមិថុនាឆ្នាំ 2019៕
Category: សង្គម និងសេដ្ឋកិច្ច
វ៉ែនតា បំពាក់បច្ចេកវិទ្យាទំនើបរបស់ Huawei មើលទៅដូចក្នុងរឿងហូលីវូដ
ពលករជំនាញកម្ពុជា នឹងអាចចាប់យកឱកាសមាស ទៅធ្វើការនៅជប៉ុន
ក្រសួងការងារ និងបណ្តុះបណ្តាលវិជ្ជាជីវៈកម្ពុជា និងក្រសួងយុត្តិធម៌ជប៉ុន បានចុះអនុស្ស រណៈនៃការយោគយល់គ្នាស្តីពីកិច្ចសហប្រតិបត្តិការ ការបញ្ជូនពលករជំនាញទៅធ្វើការនៅប្រទេសជប៉ុន។ ពិធីចុះហត្ថលេខានេះ ធ្វើឡើងកាលពីថ្ងៃទី25 ខែមីនា ឆ្នាំ2019 នៅប្រទេសជប៉ុនក្រោមអធិ បតីភាពឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងលោក Takashi YAMA SHITA រដ្ឋមន្រ្តីក្រសួងយុត្តិធម៌ជប៉ុន។
ឯកឧត្តម អ៊ិត សំហេង បញ្ជាក់ថា ពលករជំនាញកម្ពុជា នឹងមានលទ្ធភាពគ្រប់គ្រាន់ក្នុងការចាប់យកឱកាសមាសនេះ ដើម្បីជាផលប្រយោជន៍សម្រាប់ខ្លួនឯងផង សម្រាប់កម្ពុជាផង ក៏ដូចជាចូលរួមចំណែកដោះស្រាយបញ្ហាកង្វះកម្លាំងពលកម្មរបស់ជប៉ុន ជាពិសេសសម្រេចឱ្យបាននូវចក្ខុវិស័យគ្រប់ជ្រុងជ្រោយជាយុទ្ធសាស្រ្តនៃប្រទេសទាំងពីរ។ឯកឧត្តមរដ្ឋមន្រ្តី បានមានប្រសាសន៍លើកឡើងថា៖ «បច្ចុប្បន្ននេះ ប្រជាពលរដ្ឋកម្ពុជាកំពុងរស់នៅ សិក្សា និងធ្វើការនៅប្រទេសជប៉ុនមានចំនួនប្រមាណ 11,000នាក់ ក្នុងនោះកម្មសិក្សាការីមានប្រមាណជិត 7ពាន់នាក់»។
លោក Takashi YAMASHITA បានលើកឡើងថា កាលពីឆ្នាំកន្លងទៅកម្ពុជា-ជប៉ុន បានប្រារព្ធពិធីអបអរសាទរខួបលើកទី65 នៃទំនាក់ទំនងការទូតកម្ពុជា-ជប៉ុន។ ការចុះអនុស្សរណៈ នៃ កិច្ចសហប្រតិបត្តិការស្តីពីពលករជំនាញនេះ ជាភស្តុតាងបញ្ជាក់យ៉ាងច្បាស់ពីទំនាក់ទំនងដ៏ស្អិត រមួតរវាងប្រទេសទាំងពីរឱ្យកាន់តែរឹងមាំថែមទៀត។សូមជម្រាបថា ជប៉ុនគ្រោងទទួលយកពលករជំនាញទាំង 2ប្រភេទពីប្រទេសចំនួន8 រួមមាន កម្ពុជា ចិន វៀតណាម ហ្វីលីពីន ឥណ្ឌូណេស៊ី ថៃ មីយ៉ាន់ម៉ា និងនេប៉ាល់ ចំនួន 345,150នាក់ ក្នុងរយៈពេល5ឆ្នាំដំបូង។ ក្នុងនោះពលករជំនាញសម្រាប់ការងារចំនួន14ប្រភេទ រួមមានផ្នែកថែទាំមនុស្សចាស់ ការសម្អាតអាគារ ការផលិតគ្រឿងបន្លាស់ ការផលិតគ្រឿងម៉ាស៊ីន ការផលិតគ្រឿងអគ្គិសនី និងគ្រឿងអេឡិចត្រូនិច ការងារសំណង់ ការផលិតនាវា ការជួសជុល និងដំឡើងរថយន្ត ការងារអាកាសចរណ៍ ការរៀបចំបន្ទប់ស្នាក់នៅ កសិកម្ម នេសាទ និងវារីវប្បកម្ម ការផលិតអាហារ និងភេសជ្ជៈ និងការងារនៅភោនីយដ្ឋាន។
សូមបញ្ជាក់ថា កម្ពុជាជាប្រទេសទី2ដែលបានចុះអនុស្សារណៈនេះ នៅថ្ងៃទី25 ខែមីនា ឆ្នាំ2019 បន្ទាប់ពីហ្វីលីពីនដែលបានចុះនៅថ្ងៃទី19 ខែមីនា ឆ្នាំ2019។
ក្នុងការជំរុញការងារនេះរដ្ឋាភិបាលជប៉ុនបានធ្វើវិសោធនកម្មច្បាប់ស្តីពីការទទួលជនភៀសខ្លួន និងការគ្រប់គ្រងជនអន្តោប្រវេសន៍ នៅថ្ងៃទី8 ខែធ្នូ ឆ្នាំ2018ដោយបង្កើតទិដ្ឋាកាការងារថ្មីចំនួន2ប្រភេទគឺ “ពលករ ជំនាញ 1” និង “ពលករជំនាញ2”។ ច្បាប់នេះនឹងចាប់ផ្តើមអនុវត្តនៅថ្ងៃទី01 ខែមេសា ឆ្នាំ2019។ ដោយឡែកប្រព័ន្ធបញ្ជូនកម្មសិក្សាការីនៅអនុវត្តដដែល៕
Quagliarella ក្លាយជាកីឡាករចាស់ជាងគេរបស់អ៊ីតាលីក្នុងរកគ្រាប់បាល់
ខ្សែប្រយុទ្ធ Fabio Quagliarella បានក្លាយជាកីឡាករវ័យចាស់ជាងគេបំផុតក្នុងការស៊ុតបាល់បញ្ចូលទីសម្រាប់ក្រុមបាល់ទាត់ជម្រើសជាតិអ៊ីតាលី ខណៈដែលកីឡាករវ័យ36ឆ្នាំរូបនេះ បានស៊ុតបាល់ប៉េណាល់ទី2គ្រាប់ ក្នុងពេលក្រុមខ្លួនបានយកឈ្នះលើក្រុមជម្រើសជាតិលិចតិនស្តាញ ក្នុងលទ្ធផល 6-០ ក្នុងការប្រកួតជម្រុះ Euro ឆ្នាំ2020។
ក្រុមជម្រើសជាតិអ៊ីតាលី កំពុងតែនាំមុខលើកំពូលតារាងនៃពូល J ដោយមាន6ពិន្ទុ ក្រោយពីបានផ្តួលក្រុមជម្រើសជាតិហ្វាំងឡង់ ក្នុងលទ្ធផល 2-០ ក្នុងទីក្រុង Udine កាលពីថ្ងៃសៅរ៍ តាមរយៈគ្រាប់បាល់ស៊ុតបញ្ចូលទីពីសំណាក់កីឡាករ Nicolo Barella និង Moise Kean។ ស្របពេលជាមួយគ្នានេះ ក្រុមជម្រើសជាតិបូស្ន៊ីបានរបូតគ្រាប់បាល់នាំមុខ២គ្រាប់ ដើម្បីបញ្ចប់ក្នុងលទ្ធផលស្មើជាមួយនឹងក្រុមជម្រើសជាតិក្រិក ហើយក្រុមទាំងពីរកំពុងតែដេញតាមពីក្រោយក្រុមអ៊ីតាលី ដោយមាន4ពិន្ទុ ខណៈដែលក្រុមហ្វាំងឡង់ មាន3ពិន្ទុ។
លោក Roberto Mancini គ្រូបង្វឹកនៃក្រុមបាល់ទាត់ជម្រើសជាតិអ៊ីតាលី បានឱ្យដឹងថា៖ «បេសកកម្មត្រូវបានបញ្ចប់ដោយជោគជ័យ។ លទ្ធផលនេះពិតជាល្អ ហើយវាពិតជាសំខាន់ណាស់ដែលយើងបានរកគ្រាប់បាល់ ច្រើន»។ ខ្សែប្រយុទ្ធ Alvaro Morata របស់ក្លិប Atletico Madrid ដែលខ្ចីជើងពីក្លិប Chelsea បានស៊ុតបាល់បញ្ចូលទីទាំង2គ្រាប់ ខណៈក្រុមបាល់ទាត់ជម្រើសជាតិអេស្ប៉ាញ បានដណ្តើមជ័យជម្នះក្នុងការប្រកួតជម្រុះ Euro ឆ្នាំ2020 ទាំងលំបាកក្នុងលទ្ធផល 2-០ លើក្រុមជម្រើសជាតិម៉ាល់ត៍កាលពីថ្ងៃអង្គារ។ ស្របពេលដែលមានគម្លាតចំណាត់ថ្នាក់រហូតដល់ទៅ173លេខរវាងក្រុមទាំង2លើតារាងចំណាត់ថ្នាក់ពិភពលោក ក្រុមបាល់ទាត់ជម្រើសជាតិអេស្ប៉ាញ បានគ្រប់គ្រងការប្រកួតស្ទើរតែទាំងស្រុង ប៉ុន្តែបានជួបការលំបាកក្នុងការទម្លុះតំបន់ការពារនៃក្រុមម្ចាស់ផ្ទះ។ Morata បានស៊ុតបាល់បញ្ចូលទីយ៉ាងល្អចេញពីជ្រុងម្ខាងនៃប្រអប់ទី1 ក្នុងតង់ទី1 នៅមុនពេលបន្ថែមគ្រាប់បាល់ទី2 របស់គេតាមរយៈការតែតបាល់ចូលទីយ៉ាងល្អ ក្រោយពីការបញ្ជូនបាល់ពីខ្សែបម្រើ Jesus Navas៕
McGregor ស្ថិតក្រោមការស៊ើបអង្កេតលើករណីបំពានផ្លូវភេទ
តារាឆ្នើមក្បាច់គុនចម្រុះ Conor McGregor កំពុងតែស្ថិតក្រោមការស៊ើបអង្កេតក្នុងប្រទេសកំណើតរបស់គេគឺ អៀរឡង់ លើការចោទប្រកាន់ទាក់ទងនឹងករណីបំពានផ្លូវភេទ។ នេះបើយោងទៅតាមការចេញផ្សាយរបស់កាសែត New York Times កាលពីថ្ងៃអង្គារ។
ព័ត៌មាននេះ ដែលកាសែត New York Times បានបង្ហើបពីប្រភពសុំមិនបញ្ចេញឈ្មោះម្នាក់ ក្នុងរយៈពេល1ថ្ងៃ ក្រោយពីតារាឆ្នើមរបស់អង្គភាពរៀបចំការប្រកួតក្បាច់គុណចម្រុះ Ultimate Fighting Championship រូបនេះ បានសរសេរនៅលើបណ្តាញសង្គម Twitter ថា រូបគេបានសម្រេចចិត្តចូលនិវត្តន៍ពីអាជីពរបស់គេក្នុងសង្វៀនដាក់ទ្រុង។
McGregor បានសរសេរថា៖ «ហេ អ្នកទាំងអស់គ្នា សូមស្តាប់សេចក្តីប្រកាសភ្លាមៗក្នុងពេលនេះ ដោយខ្ញុំបានសម្រេចចិត្តក្នុងការចូលនិវត្តន៍ពីកីឡាក្បាច់គុណចម្រុះជាផ្លូវការនៅថ្ងៃនេះ»។ កាសែត New York Times បានបញ្ជាក់ថា Conor McGregor មិនត្រូវបានចោទប្រកាន់ពីបទឧក្រិដ្ឋឡើយ ហើយថា ការស៊ើបអង្កេតកំពុងតែបន្ត ដែលមិនមែនមានន័យថាគាត់មានកំហុសលើករណីឧក្រិដ្ឋកម្មនោះទេ។ ប៉ុន្តែកាសែតដដែលបានចេញផ្សាយថា រូបគេត្រូវបានចោទសួរដោយអាជ្ញាធរកាលពីខែមករា ក្រោយពីស្ត្រីម្នាក់បានចោទប្រកាន់ថា រូបគេបានបំពានផ្លូវភេទកាលពីខែធ្នូ។ បើយោងទៅតាម New York Times ស្ត្រីដែលបានចោទប្រកាន់នោះ បានបញ្ជាក់ថា ករណីបំពានផ្លូវភេទបានកើតឡើងនៅសណ្ឋាគារ Beacon ដែលពេលនោះ McGregor ចូលទៅក្នុងនាមជាភ្ញៀវ៕
តារាសិល្បៈច្រើនដួង ដុតដៃដុតជើង និងរំភើបចិត្តបានចូលរួមសកម្មភាពសប្បុរធម៌ជាមួយម្ចាស់ហាងស៊ុបកូនកាត់
អ្នកនាង គង់ វណ្ណា ម្ចាស់ហាងស៊ុបកូនកាត់ត្រូវគេស្គាល់ថាជាអ្នកនិពន្ធ ជាអ្នកចម្រៀង ជាអ្នកសម្ដែង និងជាផលិតចម្រៀងឱ្យតារាខ្មែរមួយចំនួន បានដឹកនាំសកម្មភាពជាមួយតារាល្បីៗជាច្រើនរូប ចែកថវិកា ទឹកស៊ីអ៊ីវនិងគ្រឿងឧបភោគបរិភោគច្រើនមុខជូនដល់ចាស់ជរាៗប្រមាណជាង២០រូប នៅកោះពេជ្រ ដែលមានតារាសិល្បៈចុះជួយដូចជាអ្នកនាង គ្រត, នាយតាក់ស៊ី ,អ្នកនាងភីម, លោក យន សុភ័ក្រ, លោក ជ័យ សុវ៉ាត, កញ្ញា ឆឹម ស្រីលក្ខណ៍, កញ្ញា ហេង ស្រីពេជ្រ, លោក ផុន ផានិត និង លោក ហង្ស សុវណ្ណារិទ្ធិ ព្រមទាំងសប្បុរសជនជាច្រើនទៀត។
អ្នកនាង គង់ វណ្ណា បានថ្លែងបញ្ជាក់ក្រោយប្រគល់អំណោយជូនដល់ចាស់ៗនាថ្ងៃនោះថា ដោយសារតែអ្នកនាងបានឃើញពីការលំបាករបស់ចាស់ៗមួយចំនួននៅម្ដុំច្បារអំពៅ និងនៅម្ដុំមុខវាំង ទើបអ្នកនាងរៀបចំជាមធ្យោបាយដើម្បីឱ្យដឹកអុំស្រីចាស់ៗទាំងនោះ មកកាន់ហាងស៊ុបកូនកាត់ឆឹងឆឹងរបស់ខ្លួន ដើម្បីបានទទួលទានអាហារមួយឆ្អែតៗម្នាក់នៅកោះពេជ្រ ហើយប្រមែប្រមូលតារាសិល្បៈដែលអ្នកស្រីមានទំនាក់ទំនងឱ្យបានចូលរួមរំលែកនូវក្ដីសប្បុរធម៌នេះ។
អ្នកនាងថា តាំងពីខ្លួនក្លាយជាម្ចាស់ហាងស្រីលើអាជីវកម្មបើកហាងអាហារ៤ទីតាំងផ្សេងគ្នាយ៉ាងជោគជ័យមក អ្នកនាងឧស្សាហ៍បែងចែកផលចំណេញដែលខ្លួនទទួលបាន ធ្វើទានជួយដល់សង្គមខ្លាំងណាស់ ដោយសារតែអ្នកស្រីយល់ថា ទោះជាខ្លួនមានបាន និងឡើងខ្ពស់យ៉ាងណាក៏ដោយត្រូវតែចែករំក្ដីស្រលាញ់ជួយដល់ចាស់ៗជរា ក្មេងកំព្រា និងសហគមន៍ខ្វះខាត ដែលអ្នកស្រីបានឃើញ។ អ្នកនាងប្រកាសអោយអ្នកដែលមានទុក្ខលំបាក ឬ បានស្គាល់ពីអ្នកមានទុក្ខលំបាក ហើយត្រូវការជំនួយជដោយទោះតិចឬច្រើន គឺអ្នកនាង នឹងរួមចំណែក។ ជាមួយនឹងការជួបជុំចែកអំណោយដល់ចាស់ៗ អ្នកនាង គង់ វណ្ណា ហៅថៅកែស៊ុបកូនកាត់ ក៏បានបង្ហើបថា អ្នកនាងនឹងបន្តផលិតបទចម្រៀងបន្តទៀត ជួយដល់សិល្បករមួយចំនួនឱ្យបានច្រៀង ដោយអ្នកនាងក៏នឹងមានបទចម្រៀងផ្ទាល់ខ្លួន និងសម្ដែងខ្លួនឯងទុកជាអនុស្សាវរីយ៍ផងដែរ ដើម្បីបំពេញក្ដីស្រលាញ់វិស័យសិល្បៈរបស់ខ្លួន។
លោក ផុន ផានិត និង លោក ហង្ស សុវណ្ណារិទ្ធិ ដែលតារាសិល្បៈក្រោមការជ្រោមជ្រែងរបស់ម្ចាស់ហាងស៊ុបនេះ ក៏បានបញ្ជាក់ដែរថា ពួកលោកទទួលបានការជួយលើកទឹកចិត្តឱ្យបន្ដដំណើរលើវិថីសិល្បៈនេះ ក៏ព្រោះតែថៅកែស្រីមានចិត្តសប្បុរស និងឧបថត្ថម្ភការផលិតបទចម្រៀងជាច្រើនបទ។ មិនតែប៉ុណ្ណោះ ម្ចាស់ហាងរូបនេះ ក៏ជាអ្នកដឹកនាំ និងនិពន្ធបទចម្រៀងឱ្យពួកលោកច្រៀងផ្ទាល់ផងដែរ។ ក្រៅពីជំរុញការងារសិល្បៈហើយ ពួកលោក រំភើបចិត្តយ៉ាងខ្លាំងដែរ អ្នកនាង គង់ វណ្ណា តែងតែដឹកនាំសកម្មភាពសប្បុរសធម៌ជួយដល់សង្គម។ លោក ផុន ផានិត បានអះអាងថា លោកមានអារម្មណ៍អរគុណចំពោះការជួយយ៉ាងពេញទំហឹងរបស់ថៅកែស្រី និងសូមឱ្យមហាជនទាំងអស់ជួយគាំទ្រ ស៊ុបកូនកាត់ នៅកោះពេជ្រ ផងដែរ៕
សហគមន៍ស្វាយទាបចំណេញពីដំណាំបន្លែសាលាដ និងស្ពៃចង្កឹះខ្ទង់ម៉ឺនដុល្លារក្នុង1ឆ្នាំ
ដំណាំបន្លែគ្រប់ប្រភេទត្រូវបានកសិករកម្ពុជានាំគ្នាដាំដើម្បីស្វែងរកតម្លៃលក់ក្នុងទីផ្សារឱ្យបានល្អប្រសើរ និងសម្រាប់ការជួយផ្គត់ផ្គង់ដល់ជីវភាពរបស់ខ្លួនផងដែរ ប៉ុន្តែដំណាំបន្លែទាំងនោះច្រើនតែផ្តល់ទៅតាមរដូវកាលរបស់វា ធ្វើឱ្យតម្លៃទីផ្សារមិនស្ថិតស្ថេរទៅតាមនោះដែរ ទើបធ្វើឱ្យបន្លែមួយចំនួនបានទទួលបរាជ័យ(ជន់ច្រើនលើទីផ្សារលក់មិនចេញ) ឬលក់មិនបានតម្លៃខ្ពស់ក្នុងទីផ្សារ ធ្វើឱ្យសហគមន៍កសិករមួយចំនួនតែងស្វែងរកដំណាំបន្លែណាដែលអាចទទួលបានជោគជ័យក្នុងការរកទីផ្សារផង(លក់បានថ្លៃ)និងទទួលបានការគាំទ្រច្រើនពីអ្នកបរិភោគផង។
ហេតុដូច្នេះហើយទើបគេសង្កេតឃើញដំណាំបន្លែមួយចំនួនមានការពេញនិយមផលិត ដូចជាស្ពៃក្តោប ស្ពៃចង្កឹះ សាលាដ ខាត់ណា ស្ពៃតឿ ស្ពៃក្រញាញ់ និងបន្លែជាច្រើនមុខទៀតដែលសុទ្ធតែជាដំណាំបន្លែដែលងាយស្រួលដាំត្រូវបានកសិករជាច្រើននាំគ្នាដាំដុះ ដើម្បីផ្គត់ផ្គង់ជីវភាពគ្រួសារ។
ដោយឡែកបន្លែស្ពៃចង្កឹះ និងសាលាដ ដែលជាដំណាំបន្លែក្នុងចំណោមដំណាំបន្លែជាច្រើនមុខនោះ ជាដំណាំប្រភេទងាយស្រួលដាំ ងាយស្រួលថែទាំ និងមានរយៈពេលខ្លី ឆាប់បានទទួលផល មានទីផ្សារ និងជាទីពេញនិយម និងចូលចិត្តពិសាសម្រាប់ប្រជាពលរដ្ឋខ្មែរផងដែរ។
ដោយសារតែជាបន្លែដែលងាយស្រួលដាំ ឆាប់ទទួលបានផល ទើបធ្វើឱ្យសហគមន៍ដាំបន្លែនៅខេត្តកំពង់ចាមមួយ គឺសហគមន៍ស្វាយទាបបាននាំគ្នាដាំបន្លែស្ពៃចង្កឹះ និងសាលាដនេះពេញមួយឆ្នាំទល់មួយឆ្នាំ រួមនឹងបន្លែគួបផ្សំដទៃទៀត ដូចជាត្រកួន ត្រប់ប៉េងប៉ោះ ត្រសក់ ត្រឡាច ល្ពៅ ននោង ស្លឹកគ្រៃ ស្ពៃតឿ និងខាត់ណា ជាដើម។
លោក ស៊ុន សុខខេង ប្រធានសហគមន៍ស្វាយទាប នៅភូមិវ៉ារីខាងលិច ឃុំស្វាយទាប ស្រុកចំការលើ ខេត្តកំពង់ចាម បានរៀបរាប់ប្រាប់កាសែតឡារ៉ែនពាណិជ្ជថា៖“មូលហេតុដែលកសិករខ្មែរយើងនៅទីនេះចាប់អារម្មណ៍ងាកមកដាំដំណាំបន្លែទាំង 2មុខនេះ គឺដោយសារកឃើញថា ជាបន្លែដែលងាយស្រួលដាំ និងតម្លៃក្នុងទីផ្សារក៏បានថ្លៃគួរសមដែរ ព្រោះថា បន្លែប្រភេទនេះវាពេញនិយមសម្រាប់ការបរិភោគរបស់ពលរដ្ឋទូទៅ ធ្វើឱ្យមានតម្រូវការឥតឈប់ឈរ ហើយតម្លៃវាក៏ពុំមានការធ្លាក់ថ្លៃខ្លាំងពេកដូចដំណាំផ្សេងៗដែរ ដូច្នេះហើយទើបពួកគាត់សម្រេចចិត្តដាំបន្លែស្ពៃចង្កឹះ សាលាដ ពេញ 1ឆ្នាំតែម្តង”។
លោកប្រធានសហគមន៍រូបនេះបានរៀបរាប់ថា៖“ទោះបីជាសហគមន៍របស់យើងបច្ចុប្បន្ននៅពុំទាន់មានការដាំដុះក្នុងទំហំផ្ទៃដីធំក៏ពិតមែន ប៉ុន្តែសហគមន៍ដែលមានសមាជិក 27គ្រួសារ ដែលក្នុង 1គ្រួសារមានដីត្រឹមតែ 40អា ឬ 20អា និងខ្លះទៀតមានដីត្រឹមតែ10អានេះ បានធ្វើចម្ការដាំដុះរួមគ្នាទៅធ្វើឱ្យយើងមានផ្ទៃដីដាំដុះបន្លែស្ពៃចង្កឹះបានជាង 1ហិកតា និងសាលាដបានជាង 1ហិកតាដូចគ្នាដែរ”។
លោក សុខខេង បានបញ្ជាក់ថា៖“សព្វថ្ងៃពូជបន្លែ ដែលសហគមន៍យើងនាំមកដាំមានតែ 2ប្រភេទទេដែលយើងនិយមដាំ គឺពូជបន្លែមកពីប្រទេសថៃ និងពូជបន្លែមកពីប្រទេសវៀតណាម។ ប្រភេទទាំង2នេះយើងនិយមដាំពូជបន្លែមកពីប្រទេសថៃខ្លាំងជាង”។
លោកបានលើកឡើងថា សហគមន៍របស់លោកបានសម្រេចចិត្តដាំបន្លែស្ពៃចង្កឹះ និងសាលាដ គឺដោយសារតែដំណាំនេះឆាប់បានប្រមូលផល និងលក់បានចំណេញជាងដំណាំដទៃទៀត។ លោកបានបញ្ជាក់ថា ដូចជាបន្លែស្ពៃចង្កឹះ យើងប្រើពេលតែ20ថ្ងៃប៉ុណ្ណោះ(សម្រាប់កូនដកដាំ(ស្ទូង))យើងអាចប្រមូលផលបានហើយ តែសម្រាប់កូនសាបដាំវិញ យើងត្រូវការរយៈពេល 40ថ្ងៃឯណោះទម្រាំប្រមូលផលបាន។ ចំណែកបន្លែសាលាដ យើងអាចប្រមូលផលបានក្នុងរយៈពេល 1ខែ ទៅ1ខែកន្លះ និងទទួលបានប្រាក់ចំណូលភ្លាមៗសម្រាប់ផ្គត់ផ្គង់ជីវភាពរបស់សមាជិក ដែលធ្វើឱ្យមុខរបរដាំដុះបន្លែរបស់សហគមន៍លោកកាន់តែមានភាពធូរធារ និងល្អប្រសើរឡើងមួយកម្រិតទៀត។
លោកបានឱ្យដឹងទៀតថា៖“ក្នុងរយៈពេលកន្លងមកនេះ សហគមន៍របស់យើងបានលក់បន្លែសាលាដ និងស្ពៃចង្កឹះដែលប្រមូលផលក្នុង 1ថ្ងៃ បានប្រមាណ 300-400គីឡូក្រាមដែរ និងបើគិតទាំង2មុខ គឺបានជិត800គីឡូក្រាមដែរ ដោយក្នុង 1គីឡូក្រាមយើងលក់បានតម្លៃ 2,000រៀល។ បើគិតជាសរុបទៅ យើងទទួលបានប្រាក់កម្រៃ ក្នុង1ឆ្នាំ ខ្ទង់ម៉ឺនដុល្លារដែរ”។
លោកបានប្រាប់ទៀតថា ការដែលសមាជិកសហគមន៍របស់លោកងាកមកដាំបន្លែពពួកស្ពៃទាំងនេះ គឺដោយសារទាំងអស់គ្នាបានទទួលការបង្ហាត់បង្រៀនពីបច្ចេកទេសដាំបន្លែមកពីមន្ទីរកសិកម្មខេត្ត ដោយពុំបានប្រាប់ឱ្យប្រើជីគីមីទេ គឺឱ្យប្រើជីធម្មជាតិ ប៉ុន្តែបើមានការប្រើថ្នាំគីមីសម្រាប់សម្លាប់សត្វល្អិត ក៏ត្រូវប្រើក្នុងកម្រិតមួយ និងពេលជិតប្រមូលផល ក៏ត្រូវទុកពេលយ៉ាងហោចណាស់ 2សប្តាហ៍ដែរ ទើបអាចប្រមូលផលយកទៅលក់បាន ដើម្បីចៀសវាងអ្នកទិញយកទៅបរិភោគមានផលប៉ះពាល់ដល់សុខភាព។
លោកបញ្ជាក់ថា ដោយទទួលបានការពន្យល់ពីការដាំដុះ និងការថែទាំផងនោះ សហគមន៍របស់លោកក៏បានធ្វើការដាំដុះសាកល្បង និងប្រកបរបរដាំបន្លែប្រភេទនេះរហូតមក។ លោកបន្តថា ថ្វីដ្បិតតែបន្លែប្រភេទស្ពៃងាយស្រួលដាំមែន តែនៅពេលដែលយើងដាំដុះក្នុងអំឡុងពេលដែលមិនមែនជាក្នុងរដូវកាលរបស់វានោះ បន្លែសាលាដ និងស្ពៃចង្កឹះនេះមិនងាយស្រួលថែទាំប៉ុន្មានទេ ទោះបីត្រឹមតែរយៈពេលខ្លីដែលបន្លែនេះឱ្យផលក៏ដោយ ប៉ុន្តែក្នុងអំឡុងពេលនោះយើងនឹងលក់វាបានថ្លៃ។
លោកប្រធានសហគមន៍បានត្អូញត្អែរឱ្យដឹងថាបច្ចុប្បន្នគាត់មានលំបាកក្នុងការរកទីផ្សារបន្លែសម្រាប់សហគមន៍របស់គាត់ ដោយសព្វថ្ងៃគាត់មានទីផ្សារតែនៅក្នុងខេត្តកំពង់ធំ និងកំពង់ចាមប៉ុណ្ណោះដែលមានឈ្មួញមកយកដល់កន្លែងតែម្តងមិនលំបាកទេ។
លោក សុខខេង បានបន្ថែមថា៖ “ប្រសិនបើមានទីផ្សារច្រើន និងតម្លៃមានលំនឹងល្អ សម្រាប់បន្លែទាំង2មុខនេះ លោកមានបំណងពង្រីកការដាំដុះបន្លែស្ពៃចង្កឹះ និងសាលាដនេះឱ្យបានធំ និងច្រើនជាងនេះប្រមាណជា 3-4ហិកតាថែមទៀត។
លោកប្រធានសហគមន៍ក៏បានអំពាវនាវដល់បងប្អូនប្រជាពលរដ្ឋខ្មែរយើងទាំងអស់ សុំឱ្យបន្តគាំទ្រដំណាំបន្លែរបស់ខ្មែរយើង ព្រោះថា ប្រជាកសិករយើងឥឡូវបានងាកមកចាប់ផ្ដើមដាំដំណាំបន្លែបែបធម្មជាតិជាបន្តបន្ទាប់ហើយ ដើម្បីផ្គត់ផ្គង់ក្នុងស្រុកផង និងកាត់បន្ថយការនាំចូលពីប្រទេសជិតខាងផង ដែលនេះគឺជាការជំរុញឱ្យកសិផល និងបន្លែក្នុងស្រុកយើងដែលជាបន្លែធម្មជាតិកាន់តែមានតម្លៃខ្ពស់ជាងកសិផលនាំចូលពីប្រទេសជិតខាង និងទទួលបានការនិយមទទួលទានកាន់តែច្រើន៕
ការនាំចេញទៅកាន់សហរដ្ឋអាមេរិកកើនឡើងក្នុងឆ្នាំ2018
នៅក្នុងឆ្នាំ2018 បើទោះបីជាទំនាក់ទំនងការទូតមានការធ្លាក់ចុះក្ដី ក៏ការនាំចេញទៅកាន់សហរដ្ឋអាមេរិកដែលជាប្រទេសមានសេដ្ឋកិច្ចធំបំផុតក្នុងពិភពលោកបានកើនឡើង 25% ដែលនេះជាការកើនឡើងដ៏គួរឱ្យកត់សម្គាល់នៅក្នុងវិស័យពាណិជ្ជកម្ម។
ទិន្នន័យពីការិយាល័យពាណិជ្ជកម្មអាមេរិកបង្ហាញថា ការនាំចេញសរុបទៅសហរដ្ឋអាមេរិកមានចំនួន 3.82ពាន់លានដុល្លារ គឺកើនឡើងពី 3.06ពាន់លានដុល្លារក្នុងឆ្នាំ2017។
ការនាំចេញរបស់សហរដ្ឋអាមេរិកមកកាន់ព្រះរាជាណាចក្រកម្ពុជាមានចំនួន 446.6លានដុល្លារនៅឆ្នាំ2018 ពោលគឺកើនឡើង 11% ធៀបនឹងឆ្នាំ2017 ដែលមានចំនួនត្រឹមតែ 400.2លានដុល្លារ។
ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ឡារ៉ែន ពាណិជ្ជថា ការប្រើប្រាស់ប្រព័ន្ធអនុគ្រោះទូទៅ (The Generalized System of Preferences ឬ GSP)សម្រាប់កម្ពុជា ការធ្វើចរាចរទំនិញ គឺជាការរួមចំណែកយ៉ាងសំខាន់ដល់កំណើននាំចេញទៅអាមេរិក។
ឯកឧត្តមបានមានប្រសាសន៍ថា កន្លងមកជាច្រើនឆ្នាំនេះ ប្រទេសកម្ពុជាត្រូវបានផ្តល់អត្ថប្រយោជន៍ដោយមិនគិតពន្ធលើការនាំចេញទំនិញជាច្រើនទៅសហរដ្ឋអាមេរិកក្រោមគម្រោង GSP ដូចជាសម្លៀកបំពាក់ កាបូបស្ពាយ និងថ្មីៗនេះបានផ្តល់ការមិនគិតពន្ធលើទំនិញកាបូបធ្វើដំណើរថែមទៀត(តែចំនួនមិនច្រើនទេ)។ឯកឧត្តម ស៊ាង ថៃ បានបញ្ជាក់ថា៖“សិទ្ធិ GSP របស់កម្ពុជាមិនមែនថា ការនាំចូលទំនិញ ដោយមិនបង់ពន្ធនោះទេ គឺត្រូវបង់ពន្ធ តែដោយសារទំនិញភាគច្រើនដែលនាំទៅអាមេរិកនោះបានរួចពន្ធ គ្រាន់តែមិនទាំងស្រុង វារាងធូរជាងគេ”។
ឯកឧត្តមបន្តថា ថ្មីៗនេះមានព័ត៌មានទាក់ទងអំពីការស្នើឱ្យមានការកំណត់សិទ្ធិ GSP របស់កម្ពុជា(ឱ្យដកការអនុគ្រោះពន្ធ GSP)ដែលតាមន័យនេះ ចំពោះផលប្រយោជន៍សេដ្ឋកិច្ច វាមានការបាត់បង់ខ្លះហើយ ព្រោះយើងធ្លាប់ទទួលបានការអនុគ្រោះពន្ធ នាំទំនិញទៅគេ បង់ពន្ធតិច បើគេដក GSP ចេញ យើងត្រូវបង់ពន្ធច្រើន វានឹងបាត់ថវិកាចំណេញរបស់យើង”។
ឯកឧត្តមបានបញ្ជាក់ទៀតថា យើងសង្ឃឹមថាសហរដ្ឋអាមេរិកនឹងគិតអំពីរឿងនេះ ដោយសារយើងមានកិច្ចសហការជាមួយបណ្តាប្រទេសជាច្រើន ពិសេសអាមេរិកក៏បានធ្វើជាមួយគ្នាច្រើនដែរហើយ។ ជាមួយគ្នានេះដែរ សភាអាមេរិកប្រចាំនៅកម្ពុជាក៏បានធ្វើលិខិតទៅកាន់រដ្ឋាភិបាលរបស់ខ្លួនឱ្យជំរុញការជួយមកកម្ពុជាបន្តទៀត ព្រោះអាមេរិកមានគោលនយោបាយជួយប្រទេសក្រីក្រ ដោយមិនត្រូវដកការអនុគ្រោះពន្ធទេ ព្រោះកម្ពុជាមិនទាន់ឆ្លងផុតពីការ-ត្រូវការរកជំនួយនៅឡើយ។
ចំពោះពាណិជ្ជករ និងវិនិយោគិនអាមេរិកជាច្រើនដែលកំពុងរកស៊ីនៅកម្ពុជា ក៏បានយល់ពីស្ថានភាពរបស់កម្ពុជា និងសប្បាយចិត្តក្នុងការរកស៊ីនៅកម្ពុជានាពេលបច្ចុប្បន្នដែរ។ យើងក៏ពុំទាន់មានដាក់ញត្តិ ឬលិខិតអ្វីទៅកាន់សហរដ្ឋអាមេរិកនៅឡើយទេក្នុងបញ្ហា GSP នេះ ព្រោះមិនទាន់ដល់ពេល ឬមិនទាន់មានហេតុផលណាដែលត្រូវដាក់លិខិតអ្វីដែរ ព្រោះថា ការនាំចេញរបស់កម្ពុជាទៅកាន់សហរដ្ឋអាមេរិក មិនត្រឹមតែមានការរីកចម្រើនប៉ុណ្ណោះទេ តែថែមទាំងបានធ្វើពិពិធកម្មទៀតផង”។ នេះបើតាមប្រសាសន៍របស់ឯកឧត្តម ស៊ាង ថៃ។
ក្នុងរយៈពេល 11ខែនៃឆ្នាំ2018 ការនាំចេញសរុបរបស់កម្ពុជាទៅកាន់សហរដ្ឋអាមេរិកក្រោមគម្រោង GSP មានតម្លៃ 675លានដុល្លារ។ ការនាំចេញទំនិញក្រៅពីទំនិញធ្វើដំណើរក្រោម GSP មានចំនួន 321លានដុល្លារ។ ក្នុងអំឡុងពេលនោះជាមួយនឹងការនាំចេញផលិតផលប្លាស្ទិកដែលមានតម្លៃ 133លានដុល្លារ ផលិតផលឈើមាន 78លានដុល្លារគ្រឿងសង្ហារិម ចំនួន 51លានដុល្លារដែក និងផលិតផលដែកថែបមានចំនួន 21លានដុល្លារ និងគ្រឿងបន្លាស់រថយន្ត មានចំនួន 14លានដុល្លារ៕
ថ្ងៃបុណ្យ និងថ្ងៃឈប់សម្រាកសាធារណៈអាចនឹងត្រូវបានកាត់បន្ថយដើម្បីបង្កើនភាពប្រកួតប្រជែង និងផលិតភាព
រាជរដ្ឋាភិបាលនឹងកាត់បន្ថយថ្ងៃឈប់សម្រាកសាធារណៈមួយចំនួនដើម្បីជំរុញ និងលើកកម្ពស់ផលិតភាព និងភាពប្រកួតប្រជែង និងបង្កើនឯករាជភាពផ្នែកសេដ្ឋកិច្ចរបស់កម្ពុជាដើម្បីជំរុញកំណើនសេដ្ឋកិច្ចនិងកាត់បន្ថយការពឹងផ្អែកទៅលើទីផ្សារសហគមន៍អឺរ៉ុប និងអាមេរិក។
ថ្លែងក្នុងសន្និសីទជាតិស្តីពីការអភិវឌ្ឍវិស័យកសិពាណិជ្ជកម្មប្រកបដោយនិរន្តរភាព និងភាពប្រកួតប្រជែងនៅកម្ពុជា ឯកឧត្តម ចម ប្រសិទ្ធ រដ្ឋមន្ត្រីឧស្សាហកម្ម និងសិប្បកម្មបានថ្លែងថា រដ្ឋាភិបាលនឹងកាត់បន្ថយថ្ងៃឈប់សម្រាកសាធារណៈមួយចំនួនដើម្បីឱ្យក្រុមហ៊ុន សហគ្រាស រោងចក្រឧស្សាហកម្មបង្កើនភាពប្រកួតប្រជែង និងផលិតភាពរបស់ខ្លួនក្នុងការផលិតទំនិញផ្គត់ផ្គង់ឱ្យអ្នកនាំចេញ និងទាន់ពេលវេលានៅលើទីផ្សារ។
ឯកឧត្ដមរដ្ឋមន្ត្រីបានមានប្រសាសន៍ថា៖“ថ្មីៗនេះយើងមានកិច្ចប្រជុំមួយក្រោមការដឹកនាំរបស់ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន យើងប្រជុំជជែកគ្នានូវវិធានការមួយចំនួនដើម្បីពង្រឹងសេដ្ឋកិច្ចរបស់យើងថែមទៀត ទោះបីអឺរ៉ុបគំរាមដកប្រព័ន្ធអនុគ្រោះពន្ធលើមុខទំនិញអ្វីៗទាំងអស់លើកលែងតែអាវុធ (EBA)ឬមិនដកក្ដី យើងអត់បញ្ហាទេ កាលណាយើងពង្រឹងខ្លួនយើងបាន អត់ EBAក៏យើងនៅតែរស់ បើយើងពង្រឹងហើយ គេនៅរក្សា (EBA) យើងកាន់តែរឹងមាំ និងកាន់តែខ្លាំងជាងមុន ប៉ុន្តែបញ្ហារបស់យើង គឺនៅត្រង់ការបង្កើនផលិតភាព”។
ឯកឧត្តម ចម ប្រសិទ្ធ បន្ថែមថា ផលិតភាពនៅលើវិស័យកសិកម្មក៏សំខាន់ដែរ វិស័យកសិកម្មកម្ពុជាមានកំណើនទាប បើប្រៀបធៀបនឹងវិស័យសំណង់ សេវាកម្ម និងឧស្សាហកម្ម។ លោកថា ពលកម្មនៅក្នុងវិស័យកសិកម្ម ចូលមកវិស័យសេវាកម្ម ដូច្នេះវិស័យកសិកម្មក៏ត្រូវពង្រឹងផលិតភាពដែរ។ ឯកឧត្ដមរដ្ឋមន្ត្រីបញ្ជាក់ថា៖“ដើម្បីបង្កើនផលិតភាព រដ្ឋាភិបាលប្រហែលជាត្រូវកាត់ថ្ងៃបុណ្យឈប់សម្រាក ប្រមាណពី 7 ទៅ 8ថ្ងៃ ចាំមើលអនុក្រឹត្យចុងក្រោយរបស់រដ្ឋាភិបាលសិន ចាំមើលពីថ្ងៃនេះរហូតដាច់ខែនឹងមានចេញផ្សាយហើយ តើយើងអាចកាត់ចំនួនថ្ងៃបុណ្យទានប៉ុន្មាន មិនបាច់ឱ្យកម្មករឈប់ដើម្បីឱ្យមានពេលវេលា គ្រប់គ្រាន់ដើម្បីផលិតឱ្យគេយកទៅលក់”។
លោក កាន់ គន្ធី អគ្គនាយករងនៃក្រុមហ៊ុន AMRU RICE បានថ្លែងថា លោកស្វាគមន៍ចំពោះចំណាត់ការរបស់រាជរដ្ឋាភិបាលលើការកាត់បន្ថយថ្ងៃបុណ្យឈប់សម្រាកសាធារណៈ ពីព្រោះវានឹងជួយដល់អ្នកនាំចេញបានច្រើន។ លោកបន្ថែមថា អំឡុងពេលបុណ្យឈប់សម្រាកម្តងៗ កំពង់ផែ ក្រុមហ៊ុនដឹកជញ្ជូន និងមន្ត្រីរាជការត្រូវឈប់សម្រាកដែរខណៈពេលដែលបុគ្គលិក កម្មករនាពេលនេះមិនចាប់អារម្មណ៍នឹងការធ្វើការថែមម៉ោងទេ ដូច្នេះវាធ្វើឱ្យមានការកកស្ទះដល់ដំណើរការនាំចេញ-នាំចូល។
លោក គន្ធី ថ្លែងថា៖“ខ្ញុំគាំទ្រការកាត់បន្ថយថ្ងៃឈប់សម្រាក ខណៈវានឹងជួយវិស័យជាច្រើន ជាពិសេសវិស័យកសិពាណិជ្ជកម្មដែលធ្វើការនាំចេញ និងនាំចូល និងវិស័យសម្លៀកបំពាក់ ស្បែកជើង នៅក្នុងប្រទេសឱ្យមានភាពប្រកួតប្រជែងខ្ពស់ជាងមុន។ បច្ចុប្បន្ន យើងមានថ្ងៃឈប់សម្រាកពី 27ទៅ 28ថ្ងៃក្នុងមួយឆ្នាំ ខណៈវៀតណាមមានតែជាង 10ថ្ងៃប៉ុណ្ណោះ ម្យ៉ាងយើងមើលឃើញថា ប្រាក់ឈ្នូលកើនឡើងជាប្រចាំ ដូច្នេះវាបញ្ច្រាស់គ្នា”។
ដោយឡែក អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) លោក កាំង ម៉ូនីកា បានឱ្យដឹងថា លោកពិតជាមានភាពរីករាយទៅលើការពិចារណាដ៏ត្រឹមត្រូវរបស់រដ្ឋាភិបាលនៅពេលនេះ នៅក្នុងបរិបទនៃការប្រកួតប្រជែងសកលកាន់តែខ្លាំងឡើងៗនេះ។
លោក ម៉ូនីកា មានប្រសាសន៍ថា៖“នេះជាអ្វីដែលវិស័យឯកជនបានស្នើសុំយូរមកហើយ ថ្ងៃបុណ្យឈប់សម្រាកកាន់តែតិច មានន័យថា យើងមានថ្ងៃផលិតកាន់តែច្រើន”។
លោកបន្តថា ប្រាក់ឈ្នូលកម្មករកាន់តែកើនឡើងខណៈថ្ងៃឈប់សម្រាកសាធារណៈមានច្រើនព្រោងព្រាត រួមទាំងអំណាចសហជីពខ្លាំងរួមផ្សំ មិនបានធ្វើឱ្យមានកំណើនផលិតភាពទេ ម្យ៉ាងវិញទៀតថ្ងៃឈប់សម្រាកនីមួយៗមានរយៈពេលវែង ដែលធ្វើឱ្យចង្វាក់ផលិតកម្មមានការថមថយចុះ។
ឯកឧត្តម ចម ប្រសិទ្ធបានមានប្រសាសន៍ថារដ្ឋាភិបាលនឹងដាក់ចេញនូវវិធានការមួយចំនួនផ្សេងៗទៀត ដើម្បីពង្រឹងភាពប្រកួតប្រជែងសេដ្ឋកិច្ចរបស់ខ្លួន។ ឯកឧត្ដមបញ្ជាក់ថា បើទោះបីជាសហគមន៍អឺរ៉ុបគំរាមដក ប្រព័ន្ធអនុគ្រោះពន្ធពីកម្ពុជា ឬទុកនៅដដែល ក៏កម្ពុជានៅតែខ្លាំង។ វិធានការនានានឹងត្រូវបានដាក់ចេញ ជាពិសេសទាក់ទងនឹងការលើកកម្ពស់ផលិតភាព។
គួរបញ្ជាក់ថា នៅដើមឆ្នាំ2019នេះ រដ្ឋាភិបាលបានសម្រេចដាក់ចេញវិធានការជាច្រើនដើម្បីពង្រឹងភាពប្រកួតប្រជែង និងបង្កើនផលិតភាពរបស់វិស័យឯកជន ជាក់ស្តែងរដ្ឋាភិបាលបានលុបចោល ស្ថាប័នកាំសាប ដែលជាភ្នាក់ងារដឹកជញ្ជូនទំនិញកម្ពុជា ដើម្បីកាត់បន្ថយការចំណាយរបស់ក្រុមហ៊ុន និងវិស័យឯកជន។ មិនតែប៉ុណ្ណោះ រដ្ឋាភិបាលបានផ្ទេរការឈរជើងរបស់កាំកុងត្រូល ចេញពីគ្រប់ច្រកព្រំដែនទាំងអស់ កាត់បន្ថយតម្លៃស្គែនកុងតឺន័រសម្រាប់ការនាំចេញ-នាំចូលចំនួនពាក់កណ្តាល ដែលការសម្រេចនេះនឹងចាប់ផ្តើមអនុវត្តនៅខែក្រោយនេះ(ខែមេសា)។
បន្ថែមលើនេះ រដ្ឋាភិបាលបានព្យួរទុកនូវការបង់ប្រាក់រំដោះពន្ធលើប្រាក់ចំណូលចំនួន 5ឆ្នាំចំពោះក្រុមហ៊ុន សហគ្រាសដែលធ្វើការដាំដុះ ផលិត កែច្នៃ និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួនដូចជា អង្ករ ពោត សណ្តែក ម្រេច គ្រាប់ស្វាយចន្ទី ដំឡូងមី និងកៅស៊ូ។ មួយវិញទៀត អ្នកនាំចេញទាំងអស់ពុំចាំបាច់ធ្វើការដាក់ពាក្យស្នើសុំលិខិតបញ្ជាក់ប្រភពដើមទំនិញទេ បើសិនជាដៃគូបញ្ជាទិញ ឬអាជ្ញាធរប្រទេសគោលដៅនាំចេញមិនបានតម្រូវឱ្យមាន៕
យុទ្ធសាស្ត្រជាតិស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ2019-2023 ត្រូវដាក់ឱ្យប្រើប្រាស់ផ្លូវការ
កម្ពុជាប្រកាសដាក់ឱ្យប្រើប្រាស់យុទ្ធសាស្ត្រជាតិស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ2019-2020 ដើម្បីចាកចេញពីបញ្ជីប្រផេះរបស់ក្រុមការងារហិរញ្ញវត្ថុពីក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់ និងហិរញ្ញប្បទានភេរវកម្ម។
យុទ្ធសាស្ត្រជាតិស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ2019-2020 មានគោលបំណងផ្តល់ការយល់ដឹង និងការគ្រប់គ្រងហានិភ័យ ការផ្តល់អាជ្ញាប័ណ្ណ និងការត្រួតពិនិត្យគ្រឹះស្ថានហិរញ្ញវត្ថុ និងមុខរបរ និងវិជ្ជាជីវៈមិនមែនហិរញ្ញវត្ថុ និងការអនុវត្តវិធានការទប់ស្កាត់ ការពង្រឹងតម្លាភាពស្ថាប័ន ការប្រមូល ការវិភាគ និងការបញ្ជូនរបាយការណ៍ស៊ើបការណ៍ហិរញ្ញវត្ថុដែលមានគុណភាព ការកាត់ទោសសំអាងបទល្មើស និងបទសម្អាតប្រាក់ប្រាកដដោយប្រសិទ្ធភាព ការរឹបអូសផលនៃសំអាងបទល្មើស និងបទសម្អាតប្រាក់ប្រកបដោយប្រសិទ្ធភាព កិច្ចសហប្រតិបត្តិការអន្តរជាតិប្រកបដោយប្រសិទ្ធភាព ការស្វែងរក និងការលុបបំបាត់ចោលហិរញ្ញប្បទានភេរវកម្ម និងហិរញ្ញប្បទាននៃការរីកសាយភាយ អាវុធមហាប្រល័យ និងការគ្រប់គ្រងកម្មវិធីជាតិស្តីពីការប្រឆាំង ស.ប.ហ.ភ។
រដ្ឋាភិបាលបានកំណត់គោលបំណងទាំងនេះដើម្បីការពារប្រទេសកម្ពុជាកុំឱ្យទទួលរងគ្រោះខូចខាតដោយសារឧក្រិដ្ឋជនប្រព្រឹត្តបទល្មើសដើម្បីកេងយកប្រាក់ចំណេញ។ រដ្ឋាភិបាលក៏បានកំណត់គោលបំណងទាំងនេះដើម្បីអនុវត្តតាមកាតព្វកិច្ចអន្តរជាតិដែលមានក្នុងសន្ធិសញ្ញាអន្តរជាតិនានា និងអនុសាសន៍ទាំង 40របស់ក្រុមការងារហិរញ្ញវត្ថុ (FATF)។
បើយោងតាមរបាយការណ៍វាយតម្លៃហានិភ័យថ្នាក់ជាតិ បានចាត់ថ្នាក់ហានិភ័យសម្អាតប្រាក់នៅប្រទេសកម្ពុជាមានកម្រិតមធ្យមខ្ពស់។ កត្តាដែលមានទម្ងន់ធ្វើឱ្យហានិភ័យសម្អាតប្រាក់កើនខ្ពស់រួមមាន សេដ្ឋកិច្ចដុល្លារូបនីយកម្ម និងប្រើប្រាស់សាច់ប្រាក់សុទ្ធច្រើន ការប្រើប្រាស់សេវាហិរញ្ញវត្ថុក្រៅផ្លូវការច្រើន ការរីកចម្រើនខ្លាំងនៃវិស័យអចលនទ្រព្យ និងវិស័យល្បែងស៊ីសង តាមកាស៊ីណូដែលមានទំហំធំ។
របាយការណ៍វាយតម្លៃហានិភ័យថ្នាក់ជាតិបានបង្ហាញថា បទល្មើសដែលបង្កើតឱ្យមានផលនៃបទល្មើស ច្រើនជាងគេរួមមាន បទល្មើសបោកបញ្ជោត និងបន្លំលួចដែលបង្កដោយជនល្មើសទាំងក្នុង និងក្រៅស្រុក បទល្មើសពុករលួយ និងស៊ីសំណូកសូកប៉ាន់ បទល្មើសព្រៃឈើ និងសត្វព្រៃ បទល្មើសជួញដូរមនុស្ស បទល្មើសជួញដូរគ្រឿងញៀនណាកូទិក និងសារធាតុញៀន បទល្មើសរត់ពន្ធទំនិញ និងសាច់ប្រាក់ឆ្លងដែន។
បន្ថែមលើនេះ បទល្មើសបោកបញ្ឆោត និងបន្លំលួច និងបទល្មើសពុករលួយ មានការគំរាមកំហែងលើការសម្អាតប្រាក់ខ្ពស់ជាងគេ គឺមានកម្រិតហានិភ័យខ្ពស់ និងមធ្យមខ្ពស់តាមលំដាប់។ របាយការណ៍វាយតម្លៃហានិភ័យថ្នាក់ជាតិបានកំណត់វិស័យដែលមានភាពងាយរងគ្រោះខ្លាំងជាងគេ រួមមាន វិស័យធនាគារ វិស័យផ្ទេរប្រាក់ វិស័យកាស៊ីណូ និងវិស័យអចលនទ្រព្យ។
គួរបញ្ជាក់ថា តាមរយៈការវាយតម្លៃអញ្ញមញ្ញភាពទៅលើគោលនយោបាយនៃប្រទេសកម្ពុជាលើការប្រឆាំងការសម្អាតប្រាក់ និងហិរញ្ញប្បទានភេរវកម្ម (គ.ស.ហ) ឆ្នាំ2017 ដោយក្រុមការងារហិរញ្ញវត្ថុ (Financial Action Task Force) បានដាក់កម្ពុជាក្នុងបញ្ជីប្រផេះ ដែលជាប្រទេសមានការលាងលុយខ្ពស់ ដោយបានបង្ហាញថា ប្រព័ន្ធតុលាការកម្ពុជាមានអំពើពុករលួយខ្ពស់ ដែលខ្វះនូវឆន្ទៈក្នុងការស៊ើបអង្កេតបទល្មើសហិរញ្ញវត្ថុ។ របាយការណ៍ក៏បានបញ្ជាក់ដែរថា គ្មានករណីលាងលុយណាមួយត្រូវបានយកមកកាត់ទោសទេនៅកម្ពុជា។
យ៉ាងណាក៏ដោយ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា និងជាប្រធានគណៈកម្មាធិការសម្របសម្រួលថ្នាក់ជាតិ ប្រឆាំងការសម្អាតប្រាក់ និងហិរញ្ញប្បទានភេរវកម្ម មានប្រសាសន៍ថា ក្នុងពិធីសម្ពោធដាក់ឱ្យប្រើប្រាស់ យុទ្ធសាស្ត្រជាតិស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ2019-2020ថា ការព្យាករថ្មីៗតាមការប៉ាន់ស្មានរបស់ការិយាល័យអង្គការសហប្រជាជាតិសម្រាប់ត្រួតពិនិត្យគ្រឿងញៀន និងបទឧក្រិដ្ឋបានប៉ាន់ស្មានចំនួនទឹកប្រាក់ដែលឧក្រិដ្ឋជនបានសម្អាតផលនៃបទល្មើសមានប្រមាណពី2 ទៅ 5ភាគរយនៃផលិតផលក្នុងស្រុកសរុបរបស់សកលលោក ឬប្រមាណពី 800ប៊ីលាន ទៅ 3.5ទ្រីលានដុល្លារអាមេរិកក្នុង 1ឆ្នាំៗ ពោលគឺប្រមាណ 10ប៊ីលានដុល្លារអាមេរិកក្នុង 1ថ្ងៃ។
ឯកឧត្ដមបន្តថា ទិន្នន័យនេះបង្ហាញពីផលប៉ះពាល់យ៉ាងខ្លាំងដល់ស្ថិរភាពសង្គម និងសេដ្ឋកិច្ច ដែលរដ្ឋាភិបាលនៃបណ្តាប្រទេសទាំងឡាយត្រូវយកចិត្តទុកដាក់ ទប់ស្កាត់ និងបង្ក្រាបឱ្យបានទាន់ពេលវេលា តាមរយៈការស្វែងរកបទល្មើស ដើម្បីបង្កក និងរឹបអូសផល និងឧបករណ៍នៃបទល្មើសទាំងនេះ ហើយអាជ្ញាធរពាក់ព័ន្ធក៏បាននិងកំពុងដាក់ចេញនូវវិធានការជាបន្តបន្ទាប់ដើម្បីពង្រឹង និងបង្កើនប្រសិទ្ធភាពការងារប្រឆាំងបទល្មើសទាំងនេះ រួមទាំងបទល្មើសសម្អាតប្រាក់ និងហិរញ្ញប្បទានភេរវកម្ម។
ឯកឧត្តមបន្តទៀតថា៖“កម្ពុជាបានដាក់ចេញឱ្យអនុវត្តក្របខ័ណ្ឌគតិយុត្តជាបន្តបន្ទាប់ដើម្បីទប់ស្កាត់ និងបង្ក្រាបរាល់សកម្មភាពបទល្មើសសម្អាតប្រាក់ និងហិរញ្ញប្បទានភេរវកម្ម រួមទាំងបទល្មើសឆ្លងដែន ឱ្យប្រកបដោយប្រសិទ្ធភាព”។
ឯកឧត្ដមបានបន្តទៀតថា៖“ក្នុងបរិបទនៃបទល្មើសសម្អាតប្រាក់ និងហិរញ្ញប្បទានភេរវកម្ម តែងតែវិវឌ្ឍជារូបភាពថ្មីៗ និងកាន់តែសាំញុំា និងបន្ទាប់ពីឯកសារយុទ្ធសាស្ត្រជាតិឆ្នាំ2013-2017ផុតកាលកំណត់ ប្រទេសកម្ពុជាបានរៀបចំធ្វើបច្ចុប្បន្នភាពឯកសារផ្សេងៗទៀតដែលកំពុងគំរាមគំហែងដល់សេដ្ឋកិច្ច និងសង្គមនៅកម្រិតជាតិ តំបន់ និងសកលលោក”។
ឯកឧត្ដមបញ្ជាក់ថា យុទ្ធសាស្ត្រជាតិនេះ កើតចេញពីកិច្ចសហការរវាងក្រសួងស្ថាប័នពាក់ព័ន្ធទាំងអស់ចំនួន22 និងការគាំទ្របច្ចេកទេសពីមូលនិធិរូបិយវត្ថុអន្តរជាតិ ហើយគោលបំណងជាយុទ្ធសាស្ត្រនេះ នឹងបង្ហាញពីផែនការសកម្មភាពជាអាទិភាព និងពេលវេលាច្បាស់លាស់ដែលអាជ្ញាធរពាក់ព័ន្ធសហការជាមួយវិស័យឯកជន ដើម្បីធានាប្រសិទ្ធភាពនៃការប្រឆាំងការសម្អាតប្រាក់ និងហិរញ្ញប្បទានភេរវកម្មឱ្យទទួលបានជោគជ័យ។
ឯកឧត្ដមបន្តថា យុទ្ធសាស្ត្រជាតិនេះនឹងធ្វើឱ្យគ្រឹះស្ថានហិរញ្ញវត្ថុ និងមុខរបរ និងវិជ្ជាជីវៈមិនមែនហិរញ្ញវត្ថុ គេចផុតពីការប្រើប្រាស់ក្នុងការសម្អាតប្រាក់ និងស្វែងរកផលនៃបទល្មើស និងទ្រព្យសម្បត្តិពាក់ព័ន្ធ និងហិរញ្ញប្បទានភេរវកម្ម និងធានាឱ្យអាជ្ញាធរអនុវត្តច្បាប់ទាំងអស់រួមគ្នាធ្វើការស៊ើបអង្កេត ចោទប្រកាន់ដាក់ទណ្ឌកម្ម និងរឹបអូសផល និងឧបករណ៍នៃសំអាងបទល្មើស និងបទសម្អាតប្រាក់ និងហិរញ្ញប្បទានភេរវកម្មប្រកបដោយប្រសិទ្ធភាព។
ឯកឧត្តមទេសាភិបាលបានបញ្ជាក់ជាចុងក្រោយថា៖“គ្រប់ភាគីពាក់ព័ន្ធទាំងអស់ចាំបាច់ត្រូវបន្តសាមគ្គីអនុវត្តការងារបន្ថែមទៀត ដើម្បីឱ្យកម្ពុជាបានចេញពីបញ្ជីប្រផេះក្នុងពេលវេលាដ៏ឆាប់បំផុត ដើម្បីពង្រឹងប្រសិទ្ធភាពអនុវត្តច្បាប់”។
លោកបណ្ឌិត ប៊ុន មុនី អគ្គនាយក វិថីម៉ាយក្រូហ្វាយនែន ;មានប្រសាសន៍ថា កម្ពុជាស្ថិតនៅក្នុងបញ្ជីប្រផេះ ដែលពីមុន គឺក្នុងបញ្ជីខ្មៅ តែកម្ពុជាចង់ក្លាយជាប្រទេសដែលស្ថិតក្នុងបញ្ជីពណ៌ស ដូច្នេះដើម្បីធ្វើឱ្យទៅជាពណ៌សបាន កម្ពុជាត្រូវមានវិធានការត្រឹមត្រូវដូចប្រទេសគេ។ លោកបញ្ជាក់ថា អ្វីដែលរដ្ឋាភិបាលធ្វើ គឺនាំកម្ពុជាចូលទៅយ៉ាងពេញលេញក្នុងទីផ្សារអន្តរជាតិ។
លោក មុនី ថ្លែងថា៖“យើងត្រូវពង្រឹងខ្លួនឯង និងបំពេញតម្រូវការរបស់អន្តរជាតិ ព្រោះការប្រឆាំងសម្អាតប្រាក់ គឺល្អសម្រាប់កម្ពុជា ដោយយើងមិនចង់ឱ្យការធ្វើហិរញ្ញប្បទានភេរវកម្មចូលមកកម្ពុជាដើម្បីការពារ សេដ្ឋកិច្ចកម្ពូជា។ ពីមុនហិរញ្ញវត្ថុរបស់យើងធ្វើមិនទាន់ត្រឹមត្រូវតាមស្តង់ដារអន្តរជាតិមានតែសម្អាតសាច់ប្រាក់មួយទេ ដោយឡែកនៅមានច្រើនទៀតដែលយើងមិនទាន់បំពេញបាន។ ប៉ុន្តែពេលនេះយើងបានធ្វើអស់ហើយ គេរង់ចាំតែដាក់យើងក្នុងបញ្ជីសប៉ុណ្ណោះ ដូច្នេះយើងត្រូវខិតខំប្រឹងប្រែងធ្វើ”។
លោកបន្តថា គ្រប់គ្រឹះស្ថានធនាគារ និងមីក្រូហិរញ្ញវត្ថុទាំងអស់ត្រូវចូលរួមប្រឆាំងការសម្អាតសាច់ប្រាក់នៅកម្ពុជា ដើម្បីធានាថា យើងធ្វើការអភិវឌ្ឍទៅមុខប្រកបដោយជោគជ័យ៕
“បែកគ្នាព្រោះចង់សាកចិត្ត” ម៉ា ច័ន្ទបញ្ញា ដាក់មួយបទនេះចាក់ដោតអារម្មណ៍យុវវ័យខ្លាំង
គេមើលឃើញថា បទថ្មីរបស់តារាចម្រៀងប្រុសសំឡេងផ្អែមជាងទឹកឃ្មុំ ម៉ា ច័ន្ទបញ្ញា ដែលមានចំណងជើងថា “បែកគ្នាព្រោះចង់សាកចិត្ត” បានធ្វើឱ្យយុវវ័យស្លុងអារម្មណ៍ទៅតាម និងមានអត្ថន័យចាក់ដោតខ្លាំងមែនទែន។ គ្រាន់តែឃើញចំណងជើងភ្លាម ហ្វេនៗស្រាប់តែគិតថា អាយដលរូបនេះទើបតែបង្ហោះរូបភាពស្វីតៗជាមួយគូស្នេហ៍នៅលើកោះបាលីសោះ ម៉េចក៏ចេញចំណងជើងអីប្លែកបែបនេះ ។
លោក ម៉ា ច័ន្ទបញ្ញា ប្រាប់អ្នកសារព័ត៌មានឡារ៉ែនថា ចម្រៀងមួយបទនេះ លោកនិពន្ធ ទាំងសាច់ភ្លេង និង ប៉ារ៉ូលប្រមាណជា3ឆ្នាំមកហើយ ប៉ុន្តែមកពីលោកមិនទាន់មានឱកាសផលិតឱ្យចេញជារូបរាង ទើបធ្វើឱ្យបទ”បែកគ្នាព្រោះចង់សាកចិត្ត” ទើបតែអាចផលិតចេញបាន។ លោករំពឹងថាបទចម្រៀងមួយបទនេះ នឹងទទួលបសនការគាំទ្រ ដោយសារតែមុននេះបន្តិច លោកក៍បានបកស្រាយបទចម្រៀងរួមគ្នាជាមួយតារាចម្រៀងខ្មែរមួយជីវិត ធ្វើឱ្យមានការចាប់អារម្មណ៍ផងដែរ។
ជាការពិតណាស់ចម្រៀងOriginal Song មួយបទនេះជាបទនិពន្ធថ្មី គ្រាន់តែចេញបង្ហោះមិនទាន់បានប៉ុន្មានម៉ោងផង ត្រូវគេឃើញកើនViews និង Share ចេញគួរឱ្យកត់សម្គាល់។ មិនត្រឹមជាបទនិពន្ធភ្លេងថ្មីទេ តែលោករំលេចអត្ថន័យឡើងនូវស្នេហាល្អូកល្អិន ហើយចង់សាកចិត្តគូស្នេហ៍ ក៏ផ្ទុះចំពេលដែលអ្នកគាំទ្ររបស់លោកជាច្រើនទន្ទឹងចង់ស្ដាប់បទថ្មីរបស់លោក។
ចង់ដឹងរ៉ូមែនទិកបែបណានោះ សូមទស្សនាបទចម្រៀងខាងក្រោមនេះ ៖
