សង្គម និងសេដ្ឋកិច្ច - La Reine Media

កម្ពុជា និងឥណ្ឌា ចុះកិច្ចព្រមព្រៀងលើកកម្ពស់វិស័យទូរគមនាគមន៍ និងព័ត៌មាន

ក្រសួងប្រៃសណីយ៍ និងទូរគមនាគមន៍ នៃព្រះរាជាណាចក្រកម្ពុជា និងក្រសួងគមនាគមន៍ នៃសាធារណរដ្ឋឥណ្ឌា បានចុះហត្ថលេខាលើអនុស្សរណៈនៃការយោគយល់គ្នាស្ដីពី “កិច្ចសហប្រតិបត្តិការក្នុងវិស័យគមនាគមន៍” ព្រមជាមួយនឹងអនុស្សរណៈនៃការយោគយល់គ្នារវាងទូរគមនាគមន៍កម្ពុជា ជាមួយនឹងមជ្ឈមណ្ឌលអភិវឌ្ឍន៍ទូរគមនាគមន៍ (C-DOT)ដែលជាស្ថាប័នស្រាវជ្រាវដ៏ល្បីល្បាញមួយនៅឥណ្ឌា។

អនុស្សរណៈនៃការយោគយល់គ្នារវាងក្រសួងប្រៃសណីយ៍ និងទូរគមនាគមន៍ នៃព្រះរាជាណាចក្រកម្ពុជា ជាមួយក្រសួងគមនាគមន៍ នៃសាធារណរដ្ឋឥណ្ឌា មិនត្រឹមតែផ្តោតលើ “កិច្ចសហប្រតិបត្តិការក្នុងវិស័យគមនាគមន៍” ប៉ុណ្ណោះទេ ប៉ុន្តែវាក៏នឹងចូលរួមបង្កើតនូវភូមិឆ្លាតវៃ ឬ“ភូមិឌីជីថល”នៅក្នុងប្រទេសកម្ពុជាទៀតផង។

ដោយឡែកអនុស្សរណៈនៃការយោគយល់គ្នារវាងទូរគមនាគមន៍កម្ពុជា ជាមួយនឹងមជ្ឈមណ្ឌលអភិវឌ្ឍន៍ទូរគមនាគមន៍ (C-DOT) ដែលជាស្ថាប័នស្រាវជ្រាវល្បីមួយនៅឥណ្ឌា នឹងផ្តោតទៅលើការពង្រាយនូវបច្ចេកវិទ្យាទូរគមនាគមន៍ទំនើប និងការបំពាក់ប្រព័ន្ធអុីនធើណិតគ្មានខ្សែនៅតាមជនបទ។

ពិធីចុះហត្ថលេខានេះត្រូវបានធ្វើឡើងដោយឯកឧត្តមរដ្ឋលេខាធិការ សុខ ពុទ្ធិវុធ តំណាងដ៏ខ្ពង់ខ្ពស់របស់ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោក V. Raghunandan អគ្គនាយក នៃក្រសួងទំនាក់ទំនងអន្តរជាតិរបស់សាធារណរដ្ឋឥណ្ឌា លោក សាន្ត វី អគ្គនាយកទូរគមនាគមន៍កម្ពុជា ព្រមជាមួយលោក Shri Vipin Tyagi នាយកប្រតិបត្តិ C-DOT។

ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍បានវាយតម្លៃខ្ពស់អំពីកិច្ចសហប្រតិបត្តិការជាមួយសាធារណរដ្ឋឥណ្ឌានាពេលកន្លងមកលើការបណ្តុះបណ្តាលធនធានមនុស្ស មជ្ឈមណ្ឌលឧត្តមានុវត្តន៍ និងការសិក្សាលើ “ភូមិឌីជីថល។

ឯកឧត្តមរដ្ឋលេខាធិការបានលើកឡើងថា អនុស្សរណៈយោគយល់គ្នាដែលយើងបានចុះហត្ថលេខានៅពេលនេះ គឺជាការបោះជំហានថ្មីមួយទៀតលើកិច្ចសហប្រតិបត្តិការរបស់ប្រទេសយើងទាំង2 លើវិស័យទូរគមនាគមន៍ បន្ថែមលើកិច្ចសហប្រតិបត្តិការដែលយើងមានស្រាប់នាពេលកន្លងមកដើម្បីទាញយកនូវសក្តានុពលនៃការរីកចម្រើនឈានមុខគេមួយលើវិស័យនេះរបស់សាធារណរដ្ឋឥណ្ឌា សម្រាប់ការអភិវឌ្ឍវិស័យទូរគមនាគមន៍នៅព្រះរាជាណាចក្រកម្ពុជា។

ឯកឧត្តម សុខ ពុទ្ធិវុធ បានមានប្រសាសន៍ថា៖“ខ្ញុំមានសុទិដ្ឋនិយមថា កិច្ចសហការនេះ និងជំរុញឱ្យមានគម្រោងជាច្រើនទៀតក្នុងពេលអនាគតរវាងកម្ពុជា និងឥណ្ឌាដើម្បីអភិវឌ្ឍន៍វិស័យព័ត៌មានវិទ្យា និងទូរគមនាគមន៍នៅកម្ពុជា និងឥណ្ឌាដើម្បីលើកកម្ពស់ឱ្យកាន់តែខ្ពស់ និងពង្រឹងនូវសាមគ្គីភាពរវាងប្រជាជាតិទាំង2”។

ឯកឧត្តម សុខ ពុទ្ធិវុធ បន្តថា បន្ទាប់ពីដំណើរទស្សនកិច្ចនៅប្រទេសឥណ្ឌា រួមទាំងការបានចូលរួមក្នូងពិព័រណ៍ទូរគមនាគមន៍ឥណ្ឌា ព្រមទាំងបានធ្វើទស្សនកិច្ចនៅភូមិឌីជីថលនៅរដ្ឋ Karenda និងតំបន់ប្រវត្តិសាស្ត្រ Mewat ក្នុងតំបន់ Haryana នៃរដ្ឋ Rajasthan រួចមក យើងរៀនសូត្របានច្រើនពីប្រជាជាតិអាស៊ីខាងត្បូងមួយនេះទាក់ទងនឹងវិស័យទូរគមនាគមន៍។

ឯកឧត្តម សុខ ពុទ្ធិវុធ ថ្លែងថា៖“យើងពិតជាស្ញប់ស្ញែងជាមួយនឹងវិស័យទូរគមនាគមន៍ឥណ្ឌា ហើយជឿថា វានឹងជួយយើងឱ្យទទួលបានបន្ថែមទៀតនូវសក្តានុពល និងការលើកកម្ពស់ការអភិវឌ្ឍក្នុងវិស័យនេះ ហ្នឹង គឺជាហេតុផលដែលយើងត្រូវចុះហត្ថលេខាជាមួយឥណ្ឌា”។

ឯកឧត្ដមបន្តថា៖“រដ្ឋាភិបាលឥណ្ឌាតាមរយៈក្រសួងទូរគមនាគមន៍របស់គេ នឹងផ្តល់ជំនួយហិរញ្ញវត្ថុប្រមាណជា 10លានដុល្លារអាមេរិកក្នុងការគាំទ្រកម្មវិធីបង្កើតភូមិឌីជីថលនៅកម្ពុជា”។ ឯកឧត្ដមបន្តថា ស្រុកទ្រាំង ខេត្តតាកែវត្រូវបានជ្រើសរើសសម្រាប់គម្រោងនេះ ដែលផ្តោតលើការធ្វើឱ្យប្រសើរឡើងនូវការតភ្ចាប់ឌីជីថលដែលខ្វះខាតនៅទីជនបទ ដូចជាអុីនធើណិត សុខាភិបាលឌីជីថល ការអប់រំតាមអនឡាញ ការធ្វើពាណិជ្ជកម្មតាមអនឡាញ រដ្ឋាភិបាលអេឡិចត្រូនិក និងកសិកម្មអេឡិចត្រូនិក”។

ឯកឧត្ដមបន្តទៀតថា ការជ្រើសរើសខេត្តតាកែវដែលជាទីក្រុងប្រវត្តិសាស្ត្រមួយរបស់កម្ពុជាសម្រាប់អនុវត្តគម្រោងសាកល្បងនេះ គឺដើម្បីរំឭកដល់ទំនាក់ទំនងមិត្តភាពដ៏យូរអង្វែងរវាងប្រទេសទាំង2។

គួរបញ្ជាក់ផងដែរថា នៅក្នុងដំណើរទស្សនកិច្ចនេះ គណៈប្រតិភូសាធារណរដ្ឋឥណ្ឌាបានទៅទស្សនកិច្ចអំពីគម្រោងអភិវឌ្ឍន៍មួយចំនួនរបស់ឥណ្ឌានៅខេត្តសៀមរាប គឺវិទ្យាស្ថានជាតិ NIPTICT និងបានទៅទស្សនកិច្ចទីតាំងសម្រាប់សិក្សាលើគម្រោងសាកល្បងសម្រាប់អភិវឌ្ឍន៍ភូមិឌីជីថលនៅស្រុកទ្រាំង ខេត្តតាកែវ ផងដែរ៕

March 30, 2019

UNDP ភ្ជាប់ទំនាក់ទំនងជាមួយប្រទេសកម្ពុជា តាមរយៈសេវាភ័ស្តុភារឆ្លងដែន និងពាណិជ្ជកម្មតាមប្រព័ន្ធអេឡិចត្រូនិក (e-commerce)

ប្រទេសកម្ពុជាមានសក្តានុពលក្នុងការទាញប្រយោជន៍ពីពាណិជ្ជកម្មតាមប្រព័ន្ធអេឡិចត្រូនិក (e-commerce) ដើម្បីផ្តល់ភាពងាយស្រួល និងបង្កើនប្រសិទ្ធភាពដល់អតិថិជន អ្នកលក់រាយ ទីផ្សារ និងការទទួលបានព័ត៌មានពាណិជ្ជកម្ម។

ដើម្បីជួយឱ្យកម្ពុជាបើកឱកាសបន្ថែមទៀតសម្រាប់ទីផ្សារក្នុងស្រុកដើម្បីការរីកចម្រើន និងការទទួលស្គាល់នៅក្នុងទីផ្សារសកល កម្មវិធីអភិវឌ្ឍន៍អង្គការសហប្រជាជាតិ (UNDP) និងក្រុមហ៊ុន Shenzhen 4PX Express ដែលជាបុត្រសម្ព័ន្ធក្រុមហ៊ុន Alibaba Cainiao Group បានចុះហត្ថលេខាលើអនុស្សរណៈយោគយល់គ្នា នឹងកិច្ចព្រមព្រៀងចែករំលែកតម្លៃដើម្បីចាប់ផ្តើមដំណើរការគម្រោងភាពជាដៃគូ នៃការធ្វើពាណិជ្ជកម្មតាមប្រព័ន្ធអេឡិចត្រូនិកឆ្លងដែនកាលពីពេលថ្មីៗនេះ។

ពាណិជ្ជកម្មតាមប្រព័ន្ធអេឡិចត្រូនិក មានអត្ថប្រយោជន៍ក្នុងការធ្វើពាណិជ្ជកម្មអន្តរជាតិ ព្រមទាំងមានសក្តានុពលក្នុងការជួយលើកកម្ពស់ទីផ្សារក្នុងស្រុកផងដែរ។

សក្តានុពលនៃពាណិជ្ជកម្មអេឡិចត្រូនិកនៅក្នុងប្រទេសកម្ពុជា គឺមានសារៈសំខាន់ និងមានជោគជ័យព្រោះថា អត្ថប្រយោជន៍របស់វាមិនត្រឹមតែមានកម្រិតចំពោះពាណិជ្ជកម្មអន្ដរជាតិនោះទេ ប៉ុន្តែវាក៏សំខាន់សម្រាប់ការជំរុញទីផ្សារក្នុងស្រុកផងដែរ។

លោក Yue (KEVIN) Li ប្រធាននាយកប្រតិបត្តិនៃក្រុមហ៊ុន 4PX Express មានប្រសាសន៍ថា “សេវាភ័ស្តុភារឆ្លងដែននឹងបង្កើតនូវមធ្យោបាយសម្រាប់ឱ្យកម្ពុជាទទួលបានប្រយោជន៍ពីចរន្តដ៏រស់រវើកនៃពាណិជ្ជកម្មតាមប្រព័ន្ធអេឡិចត្រូនិកនៅក្នុងតំបន់ ដោយមានការជំរុញបន្ថែមពីសមាហរណកម្មអាស៊ាន។ វាក៏នឹងជួយឱ្យកម្ពុជាទទួលបានប្រយោជន៍តាមរយៈការវិនិយោគកាន់តែច្រើនពីសំណាក់ក្រុមហ៊ុនអន្តរជាតិធំៗដែលកំពុងផ្តល់សេវាពាណិជ្ជកម្មតាមប្រព័ន្ធអេឡិចត្រូនិក និងភ័ស្តុភារនៅក្នុងប្រទេសនេះ”។

លោក Yue បានថ្លែងថា៖ “ពាណិជ្ជកម្មតាមប្រព័ន្ធអេឡិចត្រូនិកពិតជាមានសក្តានុពលយ៉ាងធំធេងនៅក្នុងប្រទេសកម្ពុជា។ គេគួរចាត់ទុកពាណិជ្ជកម្មតាមប្រព័ន្ធអេឡិចត្រូនិកនេះថា ជាឧបករណ៍កសាងឱកាសដើម្បីបើកទ្វារបន្ថែមទៀតឱ្យទីផ្សារក្នុងស្រុកទទួលបានឱកាសរីកចម្រើន និងទទួលបានការទទួលស្គាល់នៅលើទីផ្សារសកល”។

លោក Nick Beresford អ្នកតំណាង UNDP ប្រចាំប្រទេសកម្ពុជាមានប្រសាសន៍ថា សេដ្ឋកិច្ចឌីជីថល បាន និងកំពុងប្រែក្លាយកម្ពុជាតាមរយៈការផ្លាស់ប្តូរទម្លាប់បញ្ជាទិញអាហារ ទូទាត់ថ្លៃទំនិញ ហៅរ៉ឺម៉កម៉ូតូកង់3 កក់សណ្ឋាគារ ឬទិញសម្លៀកបំពាក់ពីតាមហាងជាដើម។

លោកបន្តថា សេវាទាំងនេះបានជួយសម្រួលដល់ទំនាក់ទំនងរវាងអតិថិជន និងការប្រកបអាជីវកម្មតាមប្រព័ន្ធអនឡាញ។ ប្រការនេះនាំឱ្យមានការអភិវឌ្ឍវិស័យសេដ្ឋកិច្ចដែលអាចរក្សាបាននូវផលិតភាពសេដ្ឋកិច្ចក្នុងកម្រិតមួយខ្ពស់។ ប្រព័ន្ធអេកូ-ស៊ីស្ទឹម (Eco-System) សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិកមានគោលបំណងលើកកម្ពស់បរិយាប័ន្ន និងភាពងាយស្រួលក្នុងការទទួលបានសេវាកម្ម ក្រោមការចូលរួមពីតួអង្គពាក់ព័ន្ធសំខាន់ៗចំនួន3 គឺ រាជរដ្ឋាភិបាល ធុរកិច្ច និងឯកត្តជន ឬអ្នកប្រើប្រាស់។

ប្រព័ន្ធនេះនឹងផ្តល់ឱកាសការងារតាមរយៈការពង្រីកការធ្វើពិពិធកម្ម និងនវានុវត្តន៍ និងបើកចំហឱ្យមានការជួលបុគ្គលិកតាមរបៀបថ្មីសម្រាប់ក្រុមហ៊ុនចាប់ផ្តើមអាជីវកម្មដំបូង (startups) សហគ្រាសខ្នាតតូចបំផុត ខ្នាតតូច និងខ្នាតមធ្យម និងសហគ្រាសប្រភេទផ្សេងទៀត និងគាំទ្រដល់ការអភិវឌ្ឍជំនាញ និងបច្ចេកទេស។

លោក Nick Beresford បានថ្លែងថា “ខណៈពេលដែលប្រទេសកម្ពុជាកំពុងខិតខំពង្រឹងសហគ្រាសខ្នាតតូចបំផុត ខ្នាតតូច និងខ្នាតមធ្យម (MSME) របស់ខ្លួន ការងាកទៅប្រើប្រាស់ប្រព័ន្ធឌីជីថល នឹងជួយឱ្យព្រះរាជាណាចក្រនេះកាន់តែអាចច្បាមយកសក្តានុពលទីផ្សារក្នុងស្រុក និងអន្តរជាតិបន្ថែមទៀត”។

ឯកឧត្តម ស៊ុន ចាន់ថុល រដ្ឋមន្ត្រីនៃក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍នៃក្រុមប្រឹក្សាជាតិភ័ស្តុភារកម្ពុជាមានប្រសាសន៍ថា រាជរដ្ឋាភិបាលកម្ពុជាតាមរយៈក្រសួងសាធារណការនិងដឹកជញ្ជូន និងជាក្រុមប្រឹក្សាភ័ស្ដុភារជាតិបានប្តេជ្ញាចិត្តជំរុញប្រព័ន្ធអេកូដែលមានលក្ខណៈរួសរាយរាក់ទាក់ដើម្បីដោះស្រាយបញ្ហាប្រឈមក្នុងការដឹកជញ្ជូន និងប្រសិទ្ធភាពនៃលំហូរទំនិញ និងសេវាកម្ម និងសម្រួលដល់ក្រុមហ៊ុន Shenzhen 4PX Express បន្តការបន្តឆ្ពោះទៅកាន់តំបន់អាស៊ីអាគ្នេយ៍តាមរយៈការធ្វើឱ្យប្រទេសកម្ពុជាក្លាយជាមណ្ឌលបង្រួបបង្រួមក្នុងតំបន់ដើម្បីបម្រើតំបន់មេគង្គឡានឆាង។

ឯកឧត្ដមបានបន្តថា រាជរដ្ឋាភិបាលកម្ពុជាចង់ឃើញទំនាក់ទំនងដ៏រឹងមាំមួយរវាងការវិនិយោគ និងគម្រោងដឹកជញ្ជូនជាតិជាពិសេសការដឹកជញ្ជូនតាមទីប្រជុំជន និងការដឹកជញ្ជូនចម្ងាយឆ្ងាយ។ លោកក៏សង្ឃឹមផងដែរថា គម្រោងភាពជាដៃគូរដ្ឋ និងឯកជន PPPនេះអាចដោះស្រាយប្រព័ន្ធអេកូពាណិជ្ជកម្មកាន់តែទូលំទូលាយ ហើយការដឹកជញ្ជូនបៃតង គឺជាផ្នែកមួយនៃគោលនយោបាយដែលត្រូវបានពិចារណារួមទាំងការគាំទ្រដល់ការធ្វើពាណិជ្ជកម្មអេឡិចត្រូនិកឆ្លងកាត់ព្រំដែន និងពាណិជ្ជកម្មឆ្លងដែនដោយមិនបាច់ប្រើក្រដាស។

ឯកឧត្ដមបន្តទៀតថា រាជរដ្ឋាភិបាលកម្ពុជាក៏រំពឹងថា នឹងបានឃើញក្រុមហ៊ុន Alibaba ក្នុងការជួយបណ្តុះបណ្តាលសហគ្រិនឱ្យផ្លាស់ប្តូរប្រព័ន្ធអេឡិចត្រូនិកឌីជីថល និងបង្កើតឡើងនូវគំរូអាជីវកម្មថ្មីៗសម្រាប់ការធ្វើភ័ស្តុភារកម្មអេឡិចត្រូនិក។

ឯកឧត្ដមរដ្ឋមន្ត្រីមានប្រសាសន៍ថា៖ “ក្រសួងសាធារណការ និងដឹកជញ្ជូនក៏មានសេចក្តីសោមនស្សរីករាយផងដែរតាមរយៈគម្រោងភាពជាដៃគូឯកជនសាធារណៈនេះ មានការឧបត្ថម្ភគាំទ្រមួយចំនួនក្នុងការជួយយើងកសាងសមត្ថភាពសម្រាប់មជ្ឈមណ្ឌលភ័ស្តុភារស្រាវជ្រាវ និងបណ្តុះបណ្តាលរបស់យើងដែលបានបង្កើតឡើងនាពេលថ្មីៗនេះ”៕

March 30, 2019

រដ្ឋមន្ត្រីឧស្សាហកម្មកោះប្រជុំសហគមន៍ផលិតអំបិលកំពត-កែបនៅថ្ងៃនេះទាក់ទងនឹងការស្នើសុំរំលាយសហគមន៍

មន្ត្រីជាន់ខ្ពស់រាជរដ្ឋាភិបាលនឹងប្រជុំជាមួយនឹងសហគមន៍ផលិតអំបិលខេត្តកំពត-កែប ដែលជាអ្នកផលិត និងផ្គត់ផ្គង់អំបិលតែមួយគត់នៅកម្ពុជា នៅថ្ងៃចន្ទ(ទី25)នេះ ដើម្បីស្វែងរកដំណោះស្រាយបន្ទាប់ពីសហគមន៍អ្នកផលិតអំបិលមួយនេះបានដាក់លិខិតស្នើសុំរំលាយសហគមន៍បន្ទាប់ពីមិនមានសមាជិកគ្រប់គ្រាន់ក្នុងការដំណើរការផលិតកម្មរបស់សហគមន៍។

អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បានឱ្យដឹងថា ក្រសួងបានទទួលលិខិត របស់សហគមន៍អ្នកផលិតអំបិលខេត្តកំពត-កែបហើយ ដោយឡែកក្រសួងឧស្សាហកម្មនឹងធ្វើការកោះប្រ ជុំជាមួយនឹងសហគមន៍អ្នកផលិតអំបិលខេត្តកំពត-កែប និងអភិបាលខេត្តកំពត និងកែប រួមទាំងភាគីពាក់ព័ន្ធទាំងអស់ដើម្បីពិភាក្សាលើបញ្ហានេះ។ លោកបញ្ជាក់ថា កិច្ចប្រជុំនេះនឹងធ្វើនៅថ្ងៃចន្ទ ទី25 នេះ។

លោកសុថា បានថ្លែងថា៖“រឿងនេះមិនទាន់អាចអត្ថាធិប្បាយបានទេ ដោយរង់ចាំការប្រជុំនៅថ្ងៃទី25 នេះសិន ដោយឯកឧត្តមរដ្ឋមន្ត្រីក្រសួងឧស្សាហកម្មនឹងដឹកនាំកិច្ចប្រជុំនេះ ដើម្បីត្រួតពិនិត្យដោះស្រាយឡើងវិញថា តើត្រូវរកមធ្យោបាយណាមួយ ប៉ុន្តែយើងទទួលបានព័ត៌មាននេះហើយ”។

លោកបន្តថា ក្រសួងនឹងស្វែងរកជម្រើសដែលសមស្របមួយ។ ជាគោលគំនិត ក្រសួងគាំទ្រ ប៉ុន្តែត្រូវរកមតិសមូហភាពនៅថ្នាក់មូលដ្ឋានជាមុនសិន។ កិច្ចប្រជុំនឹងស្វែងរកជម្រើសមួយដែលសមស្រប និងត្រូវនឹង ស្ថានភាពជាក់ស្តែងដែលសហគមន៍កំពុងជួបប្រទះ។

លោក ប៊ុន បារាំង សហប្រធានសហគមន៍អ្នកផលិតអំបិលកំពត-កែប បានលើកឡើងពីបញ្ហាមួយចំនួនដែលឈានដល់ការដាក់លិខិតសុំរំលាយសហគមន៍ផលិតអំបិលនេះថា គឺដោយសារឆ្នាំនេះក្រុមអ្នកផលិតអំបិលមិនអាចផលិតអំបិលបាន ខណៈដែលអ្នកផលិតមួយចំនួនមិនបានចុះកុងត្រាជាថ្មីដើម្បីបន្តសមាជិកភាពរបស់សហគមន៍ ដែលមានចំនួនប្រមាណជាង 30ភាគរយ។

លោក បារាំង បានបន្តថា ក្នុងចំណោមអ្នកផលិតអំបិលទាំង 200ក្រុម មានប្រមាណជាង 70ភាគរយបានព្រមព្រៀងចូលជាសមាជិកក្នុងអាណត្តិថ្មីនេះប៉ុន្តែ 30ភាគរយទៀតមិនបានចុះឈ្មោះចូលជាសមាជិកនៅឡើយ ដូចនេះសហគមន៍ពិបាកក្នុងការដំណើរការ។ លោកបញ្ជាក់ថា ការផលិតអំបិលត្រូវការចូលរួមពីសមាជិកទាំងអស់ ដោយសព្វថ្ងៃនេះផ្ទៃដីផលិតអំបិលមានប្រមាណជា 4,800ហិកតា និងមានសមាជិកចំនួន 200ក្រុម។ លោកបន្តថា បើ2ទៅ 3ក្រុមក្នុងចំណោម 200ក្រុមនោះមិនបានចូលរួម ការដំណើរការនៅក្នុងសហគមន៍ក៏ពិបាកដែរ។

លោក បារាំង បានបន្ថែមថា ដោយសារតែបញ្ហា បានធ្វើឱ្យតម្លៃអំបិលឥឡូវមានការធ្លាក់ចុះរហូតដល់ 12,000រៀលក្នុង 1បាវ (50គីឡូក្រាម) ដោយកាលពីពេលមុនៗ មានតម្លៃជាង 20,000រៀលឯណោះ។ លោកបញ្ជាក់ថា តម្លៃនេះនឹងបន្តធ្លាក់ទៀត ដោយសារតែមានអ្នកផលិតអំបិលដែលស្ថិតនៅក្រៅសហគមន៍ធ្វើឱ្យឈ្មួញទម្លាក់តម្លៃតាមអំពើចិត្ត។

លោក បារាំង បានបន្ថែមទៀតថា៖“មកទល់ពេលនេះ មិនមាននៅសល់អំបិលនៅក្នុងឃ្លាំងនោះទេ ដោយសារតែអ្នកផលិតអំបិលមួយចំនួនផលិតបាន ហើយលក់ចេញតែម្តង ដោយពួកគាត់មិនបានស្តុកទុកនោះទេ។ យើងមិនទាន់មានទិន្នន័យច្បាស់លាស់នៅឡើយ ដោយសារតែអ្នកផលិតទាំងនោះមិនទាន់បានចុះបញ្ជីចូលជាសមាជិកក្នុងសហគមន៍ជាថ្មី ដូច្នេះសហគមន៍មិនមានទិន្នន័យនោះទេ ពីមុនសហគមន៍ធ្វើការប្រមូលទិន្នន័យក្នុងរយៈពេល 10ថ្ងៃម្តង”។

លោកបន្តថា នៅថ្ងៃទី25 នេះ រដ្ឋមន្ត្រីក្រសួងឧស្សាហកម្ម នឹងដឹកនាំកិច្ចប្រជុំរួមជាមួយអភិបាលខេត្តកំពត និងកែបដើម្បីពិនិត្យមើលស្ថានការណ៍អំបិលនេះ។ លោកថ្លែងថា បើសិនជាមិនមានសហគមន៍ក្នុងការជួយទ្រទ្រង់ទេនោះ អ្នកផលិតអំបិលនឹងពិបាក ដូច្នេះនឹងមានបញ្ហាប្រឈមច្រើន ខណៈដែលក្រុមតូចៗបានលក់ដីស្រែអំបិលអស់មួយចំនួនទៅហើយ។

លោក បារាំង បានអះអាងថា ការបង្កើតសហគមន៍អ្នកផលិតអំបិល គឺដើម្បីទ្រទ្រង់ដល់អ្នកផលិតទាំងអស់គ្នា តែបើកាលណាម្នាក់ៗមិនចូលរួម វានឹងធ្វើការឱ្យប្រមូល និងផលិតអំបិលមានការលំបាក នឹងបែកបាក់ រួចនឹងដួលរលំទាំងអស់គ្នា។

លោក បារាំង និយាយថា៖“យើងរង់ចាំមើលកិច្ចប្រជុំនេះថា តើនឹងមានដំណោះស្រាយយ៉ាងណា យើងមិនទាន់ដឹងនៅឡើយ យើងក៏មានសំណូមពរផងដែរ ដោយសារតម្លៃប្រកួតប្រជែងខ្លាំង កម្លាំងពលកម្មឡើងថ្លៃ តម្លៃអំបិលចុះថោក និងបើគ្មានសហគមន៍ទៀតនោះ នឹងធ្វើឱ្យមានការបោះបង់”៕

March 29, 2019

រដ្ឋាភិបាលសម្រេចលុបថ្ងៃឈប់ចំនួន 7ថ្ងៃចោលដើម្បីសម្រួលដល់ការធ្វើពាណិជ្ជកម្ម

ដោយសារតែមើលឃើញថានៅកម្ពុជាមានថ្ងៃឈប់សម្រាកច្រើនពេក ដែលធ្វើឱ្យក្លាយជាឧបសគ្គសម្រាប់អ្នកវិនិយោគ និងម្ចាស់អាជីវកម្មនៅកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចប្រកាសលុបចោលថ្ងសឈប់សម្រាកចំនួន 7ថ្ងៃក្នុងមួយឆ្នាំ។

សម្តេចនាយករដ្ឋមន្ត្រី បានលើកឡើងថា ការកាត់បន្ថយថ្ងៃឈប់សម្រាកបុណ្យ និងទិវាផ្សេងៗ ដោយសារយើងពិនិត្យឃើញថា ថ្ងៃឈប់សម្រាកប្រចាំឆ្នាំនៅកម្ពុជា មានចំនួនច្រើនជាងប្រទេសជិតខាង។ សម្រាប់កម្ពុជា នាពេលកន្លងមក យើងមានថ្ងៃឈប់សម្រាក ពី28ថ្ងៃ ទៅ30ថ្ងៃ ក្នុងមួយឆ្នាំ ខណៈប្រទេសជិតខាង ដូចជាវៀតណាមមានតែ13ថ្ងៃ ប្រទេសឡាវមានតែ12ថ្ងៃ ប្រទេសថៃមាន16ថ្ងៃ និងប្រទេសសិង្ហបុរី មាន12ថ្ងៃប៉ុណ្ណោះ។ សម្តេចបានបញ្ជាក់ផងដែរថា សម្តេចបានណែនាំដល់ក្រុមអន្ដក្រសួងស្ថាប័នដែលនៅក្រោមការសម្របសម្រួលរបស់គណៈកម្មាការគោលនយោបាយសេដ្ឋកិច្ច និងហិរញ្ញវត្ថុ ឱ្យពិនិត្យ និងលើកសំណើកាត់បន្ថយចំនួនថ្ងៃឈប់សម្រាក ហើយបានសម្រេចលុបថ្ងៃឈប់សម្រាក សរុបចំនួន7ថ្ងៃ ដែលនឹងត្រូវចាប់ផ្ដើមអនុវត្ដ ចាប់ពីឆ្នាំ2020ទៅ។

សម្តេចតេជោ ហ៊ុន សែន មានប្រសាសាន៍ថា៖ «ខ្ញុំសូមគូសបញ្ជាក់បន្ថែមថា ការកាត់បន្ថយចំនួនថ្ងៃឈប់សម្រាកការងារនេះ គឺមិនមែនមានន័យថា ជាការលុបបំបាត់ចោល ពិធីបុណ្យ ព្រះរាជពិធី និងទិវាជាតិអន្ដរជាតិ ដែលរាជរដ្ឋាភិបាល និងប្រជាជនកម្ពុជា តែងតែប្រារព្ធធ្វើយ៉ាងខ្ជាប់ខ្ជួនកន្លងមកនោះទេ ក៏ប៉ុន្ដែចំថ្ងៃប្រារព្ធពិធីនោះ មន្ដ្រីរាជការ ក្នុងវិស័យសាធារណៈ និងនិយោជិក កម្មករក្នុងវិស័យឯកជនទាំងអស់ ត្រូវបំពេញការងារជាធម្មតា»។

ទោះជាយ៉ាងនេះក្តីប្រមុខរាជរដ្ឋាភិបាលក៏បានស្នើរឱ្យពិចារណាក្នុងការលើកថ្ងៃឈប់សម្រាកនានាទៅបូកជាមួយថ្ងៃបុណ្យចូលឆ្នាំ និងថ្ងៃបុណ្យភ្ជុំឱ្យមានរយៈពេលយូរ។ ចំណែកឯថ្ងៃមួយចំនួនដែលមិនសូវចាំបាច់អាចកាត់បន្ថយថ្ងៃដើម្បីធ្វើយ៉ាងណាឱ្យមានភាពងាយស្រួលដល់ការធ្វើអាជីវកម្មរបស់អ្នកវិនិយោគ៕

March 29, 2019

តម្លៃស្មាតហ្វូនខ្លាំងខាងហ្គេម Xiaomi Black Shark 2

ស្មាតហ្វូន Gaming របស់ Xiaomi ម៉ូឌែល Black Shark 2 នឹងត្រូវដាក់នៅទីផ្សារអឺរ៉ុប ក្នុងចក្រអង់គ្លេសមុនគេ ដែលមានតម្លៃទៅតាមជម្រើសដូចជា៖

ជម្រើស RAM 6GB មេម៉ូរី 128GB តម្លៃ 549ដុល្លារ ជម្រើស RAM 8GB មេម៉ូរី 128GB តម្លៃ 599ដុល្លារ ជម្រើស RAM 8GB មេម៉ូរី 256GB តម្លៃ 649ដុល្លារ ជម្រើស RAM 12GB មេម៉ូរី 256GB តម្លៃ 848ដុល្លារ។

មុនការប្រកាសប៉ុន្មានថ្ងៃ ក៏ស្រាប់តែមានការបញ្ជាក់ជាមុនពីលក្ខណៈសម្បត្តិមួយផ្នែកតូច និងវីដេអូបង្ហាញឈុតខ្លីៗនៅលើបណ្តាញសង្គម។

https://www.youtube.com/watch?v=WxfP24j1o1o

Black Shark ដែលជាក្រុមហ៊ុនសម្ព័ន្ធរបស់ Xiaomi បានប្រកាសចេញផ្សាយ Gaming Smartphone ម៉ូឌែលថ្មី Black Shark 2 កាលពីថ្ងៃទី18 ខែមីនា ឆ្នាំ2019៕

March 29, 2019

Apple Watch Series 5 លេចចេញមុខបណ្តើរៗហើយ ក្នុងតម្លៃដ៏ខ្ពស់គួរសម

បន្ទាប់ពីប្រកាសចេញលក់ Apple Watch Series 4 រួចមក ឥឡូវនេះដល់វេន Apple Watch Series 5 ឬជំនាន់ 5របស់ក្រុមហ៊ុន Apple ត្រូវបានលេចចេញព័ត៌មានបណ្តើរៗហើយ ដែលមានសមត្ថភាពខ្ពស់ជាងមុន ឯតម្លៃក៏ខ្ពស់ផងដែរ។

តាមប្រភពបានឱ្យដឹងថា Series 5 នៅមិនទាន់ជានាឡិកាដៃឥតខ្ចោះនោះទេ តែវានឹងបំពាក់ដោយបច្ចេកវិទ្យាថ្មី មានប្រយោជន៍ជួយតាមដានសុខភាពអ្នកប្រើប្រាស់។ បំពាក់ដោយអេក្រង់ 1.7 អ៊ីញបែបថ្មី មានបច្ចេកវិទ្យាការពារការជ្រាបទឹក ជាមួយនឹងការបច្ចេកវិទ្យាអាចភ្ជាប់អ៊ីនធើណិត Wi-Fi ឬ Cellular បាន និងមុខងារ SOS ដ៏ពេញនិយមអាចជួយសង្គ្រោះជីវិតបានច្រើន នៅសហរដ្ឋអាមេរិក។

បើធៀបតម្លៃ Series 4 (40mm) គឺ $399 ខណៈទំហំ 44mm គឺ $429 រីឯប្រភេទWi-Fi + cellular គឺ $499 ចំណែកទំហំ 40mm និង44mm តម្លៃ $529។ ដូចនេះ Series 5 អាចនឹងថ្លៃលើសនេះបន្តិច៕

March 29, 2019

លោក Solskjaer សន្យាជួយឱ្យ Man Utd ឈ្នះពាន ក្រោយក្លាយជាគ្រូបង្វឹកពេញសិទ្ធិ

លោក Ole Gunnar Solskjaer បានសន្យាថា នឹងជួយឱ្យក្រុម Manchester United ឱ្យក្លាយជាម្ចាស់ជើងឯកម្តងទៀត ក្រោយពីបានផ្តល់ការជឿជាក់ដល់ម្ចាស់ក្លិបថា រូបលោកគឺជាអ្នកដែលអាចនាំថ្ងៃនៃភាពជ័យទៅឱ្យក្លិបនេះវិញ។

ក្រោយពីត្រូវបានប្រកាសតែងតាំងថា ជាអ្នកចាត់ការទូទៅអចិន្ត្រៃយ៍ក្នុងកិច្ចសន្យារយៈពេល៣ឆ្នាំ ដែលនឹងផ្តល់ចំណូលប្រចាំឆ្នាំចំនួន7លានផោន (ស្មើនឹង9.14លានដុល្លារអាមេរិក) កាលពីថ្ងៃព្រហស្បតិ៍ លោក Solskjaer មិនបានព្យាយាមលាក់បាំងពីបញ្ហាប្រឈមនៅចំពោះមុខរបស់លោកឡើយ ខណៈដែលលោកបានរំឭកឱ្យកីឡាករចាប់ផ្តើមខិតខំព្យាយាមបន្ថែមទៀតចាប់ពីពេលនេះទៅ។

លោក Solskjaer បានឱ្យដឹងថា៖ «យើងកំពុងតែសម្លឹងឆ្ពោះទៅមុខ យើងត្រូវតែធ្វើការងារឱ្យកាន់តែខ្លាំង។ ខ្ញុំចង់ឱ្យ Man United ក្លាយជាក្រុមមួយក្នុងចំណោមក្រុមដែលខិតខំធ្វើការងារបំផុត និងក្លាយជាក្រុមខ្លាំងបំផុត ដែលអាចដណ្តើមយកលទ្ធផលផ្សេងៗ។ ពេលនេះកីឡាករដឹងថា ខ្ញុំស្ថិតនៅទីនេះជាងការរំពឹងទុក។ កីឡាករដែលមានមោទនភាពលើខ្លួនឯងពេក នឹងមិនរក្សាកៅអីក្នុងក្លិបនេះបានឡើយ»។

គ្រូបង្វឹករូបនេះបានប្រាប់អ្នកយកព័ត៌មាននៅ Old Trafford ថា៖ «ការឈ្នះពាន Premier League ម្តងទៀតគឺជាគោលដៅដែលយើងរំពឹងទុក ព្រោះវាជាគោលដៅដែលយើងស៊ាំ និងជាគោលដៅដែលយើងធ្វើបានសម្រេចជាច្រើនលើក»។

ក្នុងការដឹកនាំក្នុងរយៈពេលដ៏ខ្លីរបស់លោក លោក Solskjaer បានជួយឱ្យក្រុមបិសាចក្រហម វិលទៅកាន់ការប្រជែងដណ្តើមចំណាត់ថ្នាក់កំពូលទាំង4របស់ក្របខ័ណ្ឌ Premier League និងកំពុងត្រៀមលក្ខខណៈសម្រាប់ការប្រកួតក្របខ័ណ្ឌ Champions League វគ្គ8ក្រុមចុងក្រោយ ជាមួយនឹងក្រុម Barcelona នៅខែក្រោយ។ បើទោះបីវិលទៅរកទម្រង់លេងយ៉ាងល្អក៏ដោយ ប៉ុន្តែ Man Utd បានរក្សាការដេញតាមពីក្រោយក្រុមកំពុងនាំមុខ Liverpool ចំនួន18ពិន្ទុ និងតាមពីក្រោយក្រុមស្ថិតក្នុងទីក្រុងតែមួយ Manchester City ចំនួន16ពិន្ទុ៕

March 29, 2019

ស្មាតហ្វូនអេក្រង់បត់បានរបស់ Samsung ធន់នឹងការបត់ចុះឡើងដល់ 5ឆ្នាំ

ថ្មីៗនេះមានការសាកល្បងធ្វើតេស្តមួយដោយយកស្មាតហ្វូនបត់បានរបស់ Samsung ដើម្បីធ្វើការសាកល្បងដើម្បីដឹងពីគុណភាព។ ការធ្វើតេស្តនេះមានឈ្មោះថា ”Folding Test” ដែលប្រើប្រាស់ម៉ាស៊ីនពិសេសដើម្បីបត់ Galaxy Fold ចុះឡើង ដោយមិនឈប់សម្រាកឡើយ។ តាមការធ្វើតេស្តនេះ Samsung អាចប្រាកដបានថា Galaxy Fold អាចបត់ចុះឡើងបាន 200,000 ដង ដោយគ្មានបញ្ហា។ ការធ្វើតេស្តលើគុណភាពអេក្រង់បត់បាននេះត្រូវប្រើពេលរហូតដល់ 7ជាប់គ្នា។

តាមការសន្និដ្ឋានរបស់អ្នកជំនាញបានបញ្ជាក់ថាជាមធ្យមប្រសិនបើអ្នកប្រើបត់ Galaxy Fold 100 ដងក្នុងមួយថ្ងៃ នោះមានន័យថា Galaxy Fold នេះអាចប្រើប្រាស់បានរហូតដល់ 5ឆ្នាំ។

Galaxy Fold នឹងចេញលក់លើទីផ្សារដំបូងនៅថ្ងៃទី 26ខែមេសា លើទីផ្សារសហរដ្ឋអាមេរិក ក្នុងតម្លៃ 1,980ដុល្លារ៕

ទស្សនាវីដេអូការធ្វើតេស្តបត់ខាងក្រោម៖
https://www.gadgetmatch.com/samsung-galaxy-fold-endurance-test-video/

March 29, 2019

TOYOTA ប្រកាសចេញតម្លៃ PRIUS ឆ្នាំ 2019

ក្រុមហ៊ុន Toyota បានប្រកាសបញ្ចេញម៉ូឌែល Prius C ឆ្នាំ 2019 មកលើទីផ្សារជាផ្លូវការ ដោយបានបន្ថែមប្រព័ន្ធសុវត្ថិភាពនិងបច្ចេកវិទ្យាទំនើបៗ និងការរចនារូបរាងស្អាតប្លែកច្រើនជាងមុន។

ប្រព័ន្ធបច្ចេកវិទ្យាបំពាក់លើ Prius 2019 នេះមានដូចជា បំពាក់អេក្រង់ទំហំ 7អ៊ីញ អាចភ្ជាប់ជាមួយទូរសព្ទបាន អាចប្រើភ្ជាប់ជាមួយអ៊ីនធឺណិត Siri ឬ Google Assistant អាចចុចលើអេក្រង់ផ្ញើសារ មានបាស JBL Premium និងពិនិត្យមើលអាកាសធាតុ ឬកំណត់ reminder ក៏បាន។

ផ្នែកខាងមុខមានបំពាក់អំពូល LED headlights វាក៏មានបំពាក់ហ្វ្រាំងAMB (ប្រព័ន្ធហ្វ្រាំងជំនួយពេលជួបបញ្ហាបន្ទាន់) ប្រព័ន្ធជំនួយចូលចត និងប្រព័ន្ធសុវត្ថិភាពផ្តល់ដំណឹងពីល្បឿនរថយន្តខាងមុខ (active cruise control)។

ចំពោះលក្ខណៈបច្ចេកទេស Prius 2019 កម្លាំងម៉ាស៊ីន 1.8-លីត្រ រត់ល្បឿន 100 គីឡូម៉ែត្រស៊ីសាំងត្រឹមតែ 3.4លីត្រតែប៉ុណ្ណោះ។ រថយន្តប្រភេទនេះមានពោងសុវត្ថិភាព 7 និងកាមេរ៉ាមើលក្រោយច្បាស់ល្អ។

ចំពោះតម្លៃដាក់លក់ផ្លូវការមាន2 ប្រភេទលើទីផ្សារអឺរ៉ុបគឺ ប្រភេទធម្មតា តម្លៃ $36,590ដុល្លារនិងប្រភេទ Prius i-Tech តម្លៃ$44,050ដុល្លារ។ ក្នុងនោះក្រុមហ៊ុនក៏នឹងមានសេវាកម្មជាកញ្ចប់លើការថែទាំ ការធានារយៈពេល 3ឆ្នាំ ឬ 100,000 គីឡូម៉ែត្រ៕

March 29, 2019

វិស័យអចលនទ្រព្យនៅតែមានតម្រូវការទីផ្សារធម្មតា និងកំពុងផ្ដោតការពង្រឹងលើផ្លូវច្បាប់

ទីផ្សារអចលនទ្រព្យនៅក្នុងប្រទេសកម្ពុជា នៅតែមានភាពទាក់ទាញ ហើយស្ថិតនៅក្នុងតម្រូវការខ្ពស់ដដែល ដោយគម្រោងអភិវឌ្ឍន៍ជាច្រើនកំពុងតែមមាញឹកទាំងនៅរាជធានីភ្នំពេញ និងទាំងនៅបណ្តាខេត្តមួយចំនួនដែលកំពុងធ្វើការអភិវឌ្ឍលើវិស័យអចលនទ្រព្យជាច្រើនប្រភេទ រួមមានៈ ការអភិវឌ្ឍចម្រុះ បុរីលំនៅឋាន អាផាតមិន សេវាកម្មខុនដូ ការិយាល័យ សណ្ឋាគារ និងនៅរមណីយដ្ឋានដែលមាននៅកម្ពុជា។ នេះបើតាមការដឹងពីអ្នកវិនិយោគលើវិស័យអចលនទ្រព្យ។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) បានប្រាប់កាសែតឡារ៉ែនពាណិជ្ជថា រាជធានីភ្នំពេញនៅតែជាតំបន់អភិវឌ្ឍន៍ដ៏ធំបំផុត។ គ្រប់ខណ្ឌភាគកណ្តាលនៃរដ្ឋធានីបច្ចុប្បន្នមានការអភិវឌ្ឍដែលយ៉ាងហោចណាស់ក៏កំពុងត្រូវបានសាងសង់ខុនដូ អាផាតមិន(Apartment) និងអគារខ្ពស់ធំៗពិសេសតំបន់ក្រវាត់ក្រុង ដែលមានគម្រោងជាច្រើនកំពុងប្រជែងគ្នា ខណៈតំបន់ខាងក្រៅក្រុងត្រូវបានគ្របដណ្តប់ដោយសហគមន៍ដែលមានជាបុរីផ្ទះល្វែង និងគម្រោងសាងសង់លំនៅឋានសមរម្យជាដើម។

លោកឧកញ៉ាបានបង្ហើបឱ្យដឹងពីសម្ទុះក្នុងវិស័យនេះថា គម្រោងអចលនទ្រព្យនៅតាមតំបន់ក្រវាត់ក្រុងដែលបានសម្ពោធដោយរដ្ឋាភិបាលថ្មីៗនេះ មិនបង្ហាញនូវការកើនឡើងនៃវិស័យអចលនទ្រព្យបែបពុះកញ្ជ្រោលខ្លាំងនោះទេ តែវានៅតែអភិវឌ្ឍទៅមុខជាធម្មតាក្នុងអំឡុង 2ខែកន្លងមកនេះ។ តែការជួលខុនដូ អាផាតមិនដោយជនបរទេសនៅស្ទើរគ្រប់ប៉ូលសេដ្ឋកិច្ចនៅតែមានកំណើនគួរឱ្យកត់សម្គាល់ ដោយមើលទៅលើចំនួនប្រជាជនចំនួនជនបរទេស និន្នាការរស់នៅ ចំនួនអ្នកទិញផ្គត់ផ្គង់ និងតម្រូវការទិញ-ជួលពីមុន និងបច្ចុប្បន្ន។

លោកឧកញ៉ាបានបន្តថា ពាក់ព័ន្ធនឹងតំបន់ក្រវាត់ក្រុង គេឃើញមានសកម្មភាពផុលផុសចាប់ពីរង្វង់មូលកួរស្រូវ និងតំបន់កំពង់កន្ទួត និងមានការ-ផ្គត់ផ្គង់ថ្មីៗនៅតំបន់ស្រុកមុខកំពូលក្នុងគម្រោងលំនៅឋានសមរម្យ ដែលនៅកម្ពុជាគម្រោងបែបនេះកំពុងមានកំណើនគួរឱ្យកត់សម្គាល់ ហេតុដូច្នេះហើយទើបអ្នកវិនិយោគក្នុងស្រុកបានសម្លឹងឃើញថា ទីផ្សារលំនៅឋានសមរម្យ គឺជាគោលដៅទាក់ទាញបំផុត និងងាយស្រួលលក់ ទើបអ្នកវិនិយោគវិស័យអចលនទ្រព្យ ជាពិសេសអ្នកអភិវឌ្ឍន៍តែម្ដង បានបោះទុនវិនិយោគទៅលើវិស័យមួយនេះច្រើនដែរ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ធ្លាប់មានប្រសាសន៍ឱ្យដឹងនាពេលកន្លងមកថា អ្នកវិនិយោគតែងតែសម្លឹងមើលពីឱកាសដែលទទួលបានប្រាក់ចំណេញ ដូច្នេះនៅពេលតម្រូវការមានការកើនឡើងខ្លាំងនូវប្រភេទសំណង់ណាមួយ គេត្រូវតែពង្រីកការផ្គត់ផ្គង់ដើម្បីឆ្លើយតបទៅនឹងតម្រូវការទីផ្សារ។ ជាក់ស្តែងកម្រិតជីវភាពរបស់ប្រជាជនកម្ពុជាភាគច្រើន មិនទាន់មានលទ្ធភាពអាចទិញលំនៅឋានប្រណីតដែលមានតម្លៃខ្ពស់នៅឡើយទេ ដូច្នេះតម្រូវការទីផ្សារសំណង់ប្រភេទខ្លះ ឬលំនៅឋានសមរម្យ គឺនៅតែមាន ហើយនឹងយូរអង្វែងទៅមុខទៀត ព្រោះវាមិនបង្កហានិភ័យដល់អ្នកវិនិយោគវិស័យសំណង់បែបនោះទេ។

ប៉ុន្តែលោកឧកញ៉ា នួន រិទ្ធី ក៏បានប្រាប់ឱ្យដឹងបន្ថែមដែរថា ពាក់ព័ន្ធនឹងបញ្ហាជួញដូរវិស័យអចលនទ្រព្យនេះ យើងឃើញថា ហាក់ដូចជានៅទ្រឹងបន្តិចដោយសារតែមានការរឹតបន្តឹងប្រព័ន្ធច្បាប់ក្នុងវិស័យអចលនទ្រព្យ។ លោកឧកញ៉ាបានបញ្ជាក់ថា៖ “ពោលគឺមានឧបសគ្គអ្វីខ្លះក្នុងទីផ្សារ? បច្ចុប្បន្នអចលនទ្រព្យកម្ពុជាកំពុងប្រឈមនឹងការលំបាកខ្លះៗក្នុងគោលនយោបាយគ្រប់គ្រងដីធ្លី និងច្បាប់សំណង់។ បញ្ហាប្រឈមធំៗនៅទូទាំងក្រុមប្រឹក្សាភិបាល គឺហេដ្ឋារចនាសម្ព័ន្ធ ដូចជាផ្លូវថ្នល់ស្ពានអគ្គិសនី ការគ្រប់គ្រងកាកសំណល់ និងទឹក។ ទោះជាយ៉ាងណាក៏ដោយ ក៏រដ្ឋាភិបាលមានការលើកទឹកចិត្តយ៉ាងខ្លាំងក្នុងការដោះស្រាយបញ្ហាទាំងអស់នេះ និងលើកកម្ពស់បរិយាកាសវិនិយោគ”។

លោកស្រី តាំង ហួរ អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជានាយិកាក្រុមហ៊ុន Amatak Prorperty service បានមានប្រសាសន៍ប្រាប់ឡារ៉ែនពាណិជ្ជថា ក្នុងរយៈពេល 2ខែកន្លងមកនេះ វិស័យអចលនទ្រព្យ ថ្វីដ្បិតតែពុំមានការកើនឡើងគួរឱ្យកត់សម្គាល់ក្ដី តែវិស័យនេះក៏នៅតែមានសកម្មភាពផុលផុសដដែល ឯដីធ្លី និងដីឡូត៍ក៏នៅមានសម្ទុះល្អ នៅតែបន្តសកម្មភាពទៅមុខជាធម្មតា មានសមត្ថភាព និងជំនាញគ្រប់គ្រាន់ដើម្បីកសាងទំនុកចិត្តជាមួយអ្នកទិញ-អ្នកលក់ និងក្នុងទីផ្សារអចលនទ្រព្យទាំងមូល។លោកស្រីអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍បញ្ជាក់ទៀតថា៖ “អ្នកវិនិយោគ គេធ្វើឡើងតម្រូវទៅតាមទីផ្សារ និងអតិថិជនគោលដៅ។ ចំពោះទីផ្សារសំណង់ ពិសេសការពុះឡូត៍លក់ គឺនៅមានភាពទូលាយនៅឡើយ ដោយសារតែពាក់ព័ន្ធទៅនឹងកម្រិតជីវភាពរបស់អតិថិជន”។

បច្ចុប្បន្នសម្ទុះនៃការវិនិយោគលើការពុះឡូត៍លក់ ភាគច្រើនតាមតំបន់ជាយក្រុងនៅតែមាននៅឡើយ ព្រោះតំបន់ទាំងនោះទើបតែចាប់ផ្តើមរីកចម្រើន និងចាប់ផ្ដើមអភិវឌ្ឍបន្តចេញពីទីក្រុង ដូច្នេះតម្លៃដីនៅមានកម្រិត ដែលអាចផ្តល់ឱកាសចំណេញដល់អ្នកវិនិយោគក្នុងពេលដ៏ខ្លីខាងមុខ។ អ្នកវិនិយោគមានឱកាសច្រើនក្នុងការទទួលបានប្រាក់ចំណេញ ហើយអ្នកទិញអាចមានលទ្ធភាពទទួលបានដីដែលមានសុវត្ថិភាពពុំមានបញ្ហា។

លោកស្រី តាំង ហួរ បានមានមតិក្នុងបញ្ហានេះថា៖“ដូចនេះ អ្នករកស៊ីពុះដីឡូត៍លក់ត្រូវតែសិក្សាគម្រោងមេ ក្នុងតំបន់ដែលយើងធ្វើការជួញដូរ ព្រោះនិន្នាការនៃការជួញដូរអចលនទ្រព្យនេះ បើយើងសិក្សាទិដ្ឋភាពផ្នែកច្បាប់មិនដល់ វានឹងនាំឱ្យមានបញ្ហាដល់អ្នកទិញ ដែលជាធម្មតានៅពេលទិញ-លក់តែងមានប្លង់រឹង ឬមានលិខិតបទដ្ឋានសម្រាប់ជាសំអាងក្នុងការជួញដូរ ដើម្បីជាភាពស្របច្បាប់”។

លោកស្រីបានសង្កត់ធ្ងន់ថា៖“យើងចង់មិនឱ្យមានបញ្ហាជាមួយនឹងព័ត៌មានដែលថា ការពុះឡូត៍លក់មិនមានភាពស្របច្បាប់ អនាធិបតេយ្យនោះទេ ព្រោះអ្នកទិញភាគច្រើនជាអ្នកក្រ អ្នកមធ្យម មិនជាមានប្រាក់ប៉ុន្មានទេ ប្រសិនបើគាត់ទិញទៅកាត់ប្លង់រឹងជូនគាត់មិនបាន នាំឱ្យមានបញ្ហាប៉ះពាល់ដល់គម្រោងទាំងមូល”។

លោកស្រីបានបន្ថែមទៀតថា៖“អ្វីដែលយើងចង់បាននោះ គឺទី1- កុំឱ្យប៉ះពាល់ដល់គម្រោងដី។ ទី2-ពេលលក់ដីជូនអតិថិជន យើងមាន ឬអាចកាត់ប្លង់រឹងបានស្របច្បាប់ ទី3-បើកាត់ប្លង់រឹងជូនអតិថិជនបាន នោះជាការអនុវត្តទៅតាមច្បាប់ដីធ្លី។ ទាំងនេះគឺដើម្បីសុវត្តិភាពនៃការជួញដូរដីធ្លី ឬការពុះឡូត៍លក់ ពោលការអនុវត្តស្របទៅតាមច្បាប់ដីធ្លីដែលក្រសួងបានដាក់ឱ្យអនុវត្ត និងមិនមានហានិភ័យ”។

លោកឧកញ៉ា នួន រិទ្ធី បានបញ្ជាក់បន្ថែមថា ដូច្នេះហើយទើបយើងឃើញថា វិស័យអចលនទ្រព្យសព្វថ្ងៃកំពុងតែពង្រឹងខ្លួន ដោយផ្តោតទៅលើការអនុវត្តប្រព័ន្ធច្បាប់ក្នុងវិស័យអចលនទ្រព្យ ដើម្បីឱ្យវិស័យនេះអាចរីកចម្រើនក្នុងការជំរុញដល់វិស័យសេដ្ឋកិច្ចរបស់ជាតិមានលក្ខណៈស្របគ្នា។ ពោលគឺ សេដ្ឋកិច្ចមានកំណើនដោយការទទួលបានពីកំណើននៃវិស័យអចលនទ្រព្យដោយស្របទៅនឹងប្រព័ន្ធច្បាប់វិនិយោគ ដែលចំណុចនេះហើយទើបវិនិយោគិនបរទេសមានជំនឿលើវិស័យអចលនទ្រព្យនៅកម្ពុជា និងចូលរួមអភិវឌ្ឍកាន់តែច្រើនឡើង៕

March 29, 2019

Category: សង្គម និងសេដ្ឋកិច្ច