Category: សង្គម និងសេដ្ឋកិច្ច

  • នៅ ស្រីពៅ និងចាន់ រតនា ត្រៀមឡើងសង្វៀនជាថ្មី ប៉ះគូប្រកួតម្ចាស់ផ្ទះឥណ្ឌូនេស៊ីនៅទីក្រុងហ្សាការតា

    នៅ ស្រីពៅ និងចាន់ រតនា ត្រៀមឡើងសង្វៀនជាថ្មី ប៉ះគូប្រកួតម្ចាស់ផ្ទះឥណ្ឌូនេស៊ីនៅទីក្រុងហ្សាការតា

    ការប្រកួតប្រដាល់ក្បាច់គុនចម្រុះ MMA របស់ ONE CHAMPIONSHIP (ONE FOR HONOR)នឹងធ្វើឡើងនៅទីក្រុងហ្សាការតា ប្រទេសឥណ្ឌូនេស៊ីនៅថ្ងៃទី3 ខែឧសភា ឆ្នាំ2019។ ក្នុងនោះដែរក៏មានកីឡាករកម្ពុជា 2រូប គឺកីឡាការិនី នៅ ស្រីពៅ  និងកីឡាករ ចាន់ រតនា ដែលត្រូវជួបនឹងកីឡាករ-កីឡាការិនីម្ចាស់ផ្ទះឥណ្ឌូនេស៊ីទាំង​ 2រូប ខណៈដែលការប្រកួតរបស់កីឡាករកម្ពុជាទាំង​ 2រូបនេះគឺ សុទ្ធតែស្ថិតនៅក្នុងការប្រកួតគូពិសេសទាំងអស់។

    គួរបញ្ជាក់ផងដែរថា កីឡាករ និងកីឡាការិនីកម្ពុជាទាំង 2នាក់នេះបានបាត់មុខពីសង្វៀននេះអស់រយៈពេលជាង​ 3ខែមកហើយ ទើបតែខែឧសភាមានការផ្គូផ្គងជាថ្មី ដោយដាក់សុទ្ធតែកីឡាករ និងកីឡាការិនីកំពូលៗរបស់កម្ពុជា៕


  • ការប្រកួតពានរង្វាន់ HUN SEN CUP នៅសៀមរាបត្រូវលើកពេល ដោយសារសៀមរាប មិនអាចរកទីលានកណ្តាលប្រកួតបាន

    ការប្រកួតពានរង្វាន់ HUN SEN CUP នៅសៀមរាបត្រូវលើកពេល ដោយសារសៀមរាប មិនអាចរកទីលានកណ្តាលប្រកួតបាន

    ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី13 ឆ្នាំ2019 ថ្នាក់ខេត្ត រវាងខេត្តសៀមរាប និងព្រះវិហារ ដែលក្រុមខេត្តសៀមរាបត្រូវធ្វើជាម្ចាស់ផ្ទះនោះ បានសម្រេចលើកពេលវេលាហើយ ដោយសារតែក្រុមមួយនេះមិនអាចរកទីលានប្រកួតបានទាន់ពេលវេលា។

    ចំពោះមូលហេតុនៃការមិនឱ្យប្រកួតលើទីលានរបស់ខេត្តសៀមរាបនោះគឺ ដោយសារតែក្រុមមួយនេះបានរងការពិន័យមិនឱ្យធ្វើជាម្ចាស់ផ្ទះចំនួន 1ប្រកួត ដោយសារតែមានអំពើហិង្សាកើតឡើងក្នុងអំឡុងពេលប្រកួតនៅក្នុងកីឡដ្ឋាននេះរវាងខេត្តសៀមរាប និងឧត្តរមានជ័យ និងមិនមានអាជ្ញាធរជួយសម្របសម្រួលអំពើហិង្សាទាន់ពេលវេលា។

    ដូចនេះក្រុមខេត្តសៀមរាបត្រូវស្វែងរកកីឡដ្ឋានផ្សេងក្រៅពីកីឡដ្ឋានខេត្តសៀមរាបដើម្បីរៀបចំការប្រកួតមួយនេះ ហើយការប្រកួតអាចនឹងត្រូវធ្វើនៅក្រោយពិធីចូលឆ្នាំខ្មែររួចវិញ៕

  • ចេញហើយ លទ្ធផលចាប់គូវគ្គ1/8 ពានរង្វាន់សម្តេចអគ្គមហាសេនាបតីតេជោ ហ៊ុន សែន

    ចេញហើយ លទ្ធផលចាប់គូវគ្គ1/8 ពានរង្វាន់សម្តេចអគ្គមហាសេនាបតីតេជោ ហ៊ុន សែន

    នៅព្រឹកថ្ងៃព្រហស្បតិ៍ 7កើត ខែចេត្រ ឆ្នាំច សំរឹទ្ធិស័ក ពុទ្ធសករាជ2562 ត្រូវនឹងថ្ងៃទី11 ខែមេសា ឆ្នាំ2019 វេលាម៉ោង11:០០ព្រឹក នៅពហុកីឡដ្ឋានជាតិមានការរៀបចំការចាប់គូសម្រាប់វគ្គ 16ក្រុមចុងក្រោយ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី13 ឆ្នាំ2019។

    ក្រោមអធិបតីភាពរបស់ប្រធានគណៈកម្មការប្រកួតបាល់ទាត់កម្ពុជា លោក ឆាំង ពិសិដ្ឋ បានធ្វើការចាប់គូគ្នាប្រកួតជាបន្តដោយមានក្រុមឡើងមកវគ្គនេះចំនួន 16ក្រុម ត្រូវជា 8គូដែលនឹងធ្វើការប្រកួតចំនួន​ 3ថ្ងៃ គឺថ្ងៃទី23 ដល់ទី25 ខែមេសា ឆ្នាំ2019។

    ក្នុងនោះដែរ ថ្ងៃដំបូង(ទី23) និងថ្ងៃទី2(ទី24) នឹងមានការប្រកួតក្នុង 1ថ្ងៃ 3គូដូចគ្នា ដោយឡែកថ្ងៃទី3 ចុងក្រោយ (ទី25) នឹងមានការប្រកួតចំនួន 2គូ ហើយការប្រកួតនឹងប្រព្រឹត្តទៅនៅវេលាម៉ោង 3រសៀលទាំងអស់៕

  • ដឹងតែកក្រើកខណ្ឌច្បារអំពៅដែលនាំតារាសិល្បៈច្រើននាក់សម្តែងសង្ក្រាន្តឆ្នាំថ្មី!

    ដឹងតែកក្រើកខណ្ឌច្បារអំពៅដែលនាំតារាសិល្បៈច្រើននាក់សម្តែងសង្ក្រាន្តឆ្នាំថ្មី!

    នេះជាលើកទី១ហើយដែលខណ្ឌច្បារអំពៅបានរៀបចំរំលេចព្រឹត្តិការណ៍សង្ក្រាន្តឆ្នាំថ្មីឆ្នាំកុររយៈពេល៣ថ្ងៃពេញដោយផុសឡើងនៅទម្រង់សិល្បៈសម័យបុរាណជាច្រើនផងដែរ។ ដូចនេះគេរំពឹងថាអ្នកនៅច្បារអំពៅឬតាមផ្លូវជាតិលេខ១ពិតជាមកចូលរួមច្រើនរៀបចំនៅវត្តវាលស្បូវរាជធានីភ្នំពេញ។

    លោក ចេង មុន្នីរ៉ា អភិបាលនៃគណអភិបាលខណ្ឌច្បារអំពៅ បានមានប្រសាសន៍ថា ដោយសារប្រទេសយើងមានសុខសន្តិភាព និងការអភិវឌ្ឍន៍ រីកចំរើនគ្រប់វិស័យ ក្រោមការដឹកនាំប្រកបដោយគត្តិបណ្ឌិតរបស់ម្តេចអគ្គមហាសេនាបតីតេជោហ៊ុនសែនជានាយករដ្ឋមន្រ្តី ដែលធ្វើអោយប្រជាពលរដ្ឋយើងរស់នៅសុខស្រួល និងចង់ទៅណាមកណាម៉ោងណាក៏បាន វាមិនលំបាក ចង់ទៅចូលរួមកម្មវិធីណាក៏ស្រួលធ្វើតំណើរ ដូចនេះស្របតាមទិសដៅនៃភាពរីកចំរើនរបស់ប្រទេសជាតិយើង និងដើម្បីអបអរសាទរក្នុងឱកាសពិធីបុណ្យចូលឆ្នាំថ្មីប្រពៃណីខ្មែរយើងនេះ រដ្ឋបាលខណ្ឌច្បារអំពៅ ក៏បានធ្វើកមហមវិធីរយៈពេល៣ថ្ងៃ គឺកម្មវិធី សង្ក្រាន្តច្បារអំពៅ និងមានកម្មវិធីជាច្រើនដូចជា ពិធីស្រង់ព្រះ ពិធីរាប់បាត្រ លេងល្បែងប្រជាប្រិយ តំបន់ត្រជាក់ចិត្ត ការរាំលេងកម្សាន្ត ការការប្រគុំតន្រ្តី សម្តែងប្លែកៗ មានការដើបង្ហាញម៉ូត ក្រុមកំប្លែង និងតារាចំរៀងល្បីៗចូលរួមជាច្រើនរូប ។

    ដូចនេះលោកអភិបាលខណ្ឌសូមគោរពអញ្ជើញបងប្អូនប្រជាពលរដ្ឋទាំងអស់មកចូលរួមកម្មវិធីសង្ក្រាន្តច្បារអំពៅនេះអោយបានច្រើនកុះករ ។ ដោយឡែកលោក អ៊ឹម ជីវ៉ា ដែលជាអ្នកចាត់ចែងរៀបចំកម្មវិធីផ្នែកសិល្បៈក្នុងសង្ក្រាន្ត ច្បារអំពៅ បាននិយាយថា នេះ កម្មវិធីសិល្បៈមានច្រើនទម្រង់មែនទែនដែលមានការចូលរួមពីសិល្បករគ្រប់ផ្នែក ក្នុងនោះយើងមានការការបង្ហាញម៉ូតទៅតាមសម័យកាល ហើយការលេងល្បែងប្រជាប្រិយចាប់ពីព្រឹក ការលេងនៅតំបន់ត្រជាក់ចិត្តចាប់ផ្តើមពីម៉ោង១រសៀល ការប្រគុំតន្រ្តីនិងការចាប់ផ្តើមពីម៉ោង៦ដល់ម៉ោង១០យប់ និងមានកម្មវិធីសប្បាយជាច្រើនទៀត។

  • ទស្សនាវីដេអូអប់រំពីការប្រព្រឹត្តិខ្លួននាឱកាសបុណ្យចូលឆ្នាំ

    ទស្សនាវីដេអូអប់រំពីការប្រព្រឹត្តិខ្លួននាឱកាសបុណ្យចូលឆ្នាំ

    វិដេអូ១ដែលចេញផ្សាយប៉ុន្មានថ្ងៃមកនេះត្រូវបានគេមើលឃើញថាមានការរៀបរាប់យ៉ាងលម្អិតពីអាកប្បកិរិយាយុវជនគួរធ្វើខ្លួនយ៉ាងណាឱ្យត្រឹមត្រូវជុំវិញព្រឹត្តិការណ៍បុណ្យចូលឆ្នាំប្រពៃណីជាតិខ្មែរ។ បើតាមការឱ្យដឹងវីដេអូមានបង្កប់អត្ថន័យខ្ពស់នេះនិងចាក់ផ្សាយជាបន្តបន្ទាប់នៅលើកញ្ចក់ទូរទស្សន៍ជាតិកម្ពុជាក្នុងន័យបំផុសការយល់ដឹងបន្តទៀត។

    ការលើកយកកម្មវិធីខាងលើនេះមកសម្តែងដើម្បីចូលរួមមួយផ្នែកទប់ទល់ការរាំច្រៀងច្រើនពេកហើយភាពសប្បាយរីករាយអំណរឆ្នាំថ្មីមានពិតមែនក៍មនុស្សទាំងអស់មិនត្រូវភ្លេចខ្លួនបង្ហាញនូវគុណធម៌សីលធម៌ដាក់គ្នាសមជាប្រទេសមានអរិយធម៌ខ្ពស់។ ម្ល៉ោះហើយបើទោះជាយើងមិនអាចបកក្រោយបានយើងក៏នៅតែរំលេចរំលឹកខ្លះៗ អប់រំយុវវ័យជំនាន់ក្រោយមានការយល់ដឹងជាបន្តជៀសវាងភ្លេចខ្លួនបង្កអំពើណាមួយស្មានមិនដល់ពេលចូលឆ្នាំ។ វីដេអូនេះជួយការគាំទ្រដោយព្រះវិជ្ជារង្សី ឈឹម សំអាត កល្យាណសិរីព្រះគណៈថ្នាក់កិត្តិយសគណៈមហានិកាយទីប្រឹក្សាសម្តេចព្រះសង្ឃនាយកនៃព្រះរាជាណាចក្រកម្ពុជាប្រធានពុទ្ឋិកសមាគមនិងជាព្រះចៅអាវាសវត្តព្រះសង្ឃខ្មែរនៃរដ្ឋវ៉ាស៊ីនតោន។ តោះទស្សនាវិដេអេមានអត្ថន័យអប់រំដូចម្តេចទាំងអស់គ្នា៖

  • ADB​៖ គុណភាព​ធនធានមនុស្ស​ ជា​កត្តា​គន្លឹះ​ដើម្បី​ទាក់ទាញ​ និង​រក្សា​កំណើន​សេដ្ឋកិច្ច​រយៈពេល​វែង​

    ADB​៖ គុណភាព​ធនធានមនុស្ស​ ជា​កត្តា​គន្លឹះ​ដើម្បី​ទាក់ទាញ​ និង​រក្សា​កំណើន​សេដ្ឋកិច្ច​រយៈពេល​វែង​

    ដំណាលគ្នា​នឹង​ពេល​ដែល​ប្រទេស​កម្ពុជា​បាន​កំណត់​គោលដៅ​អភិវឌ្ឍន៍​ឱ្យ​ក្លាយជា​ប្រទេស​មាន​ចំណូល​មធ្យម​កម្រិតខ្ពស់​នៅ​ឆ្នាំ2030​ និង​ឆ្នាំ2050​ រួម​ទាំង​រក្សា​បាន​កំណើន​សេដ្ឋកិច្ច​ប្រមាណ7​% ក្នុង​ 1ឆ្នាំ​ យើង​ក៏​ជួបប្រទះ​នូវ​បញ្ហា​ជាច្រើន​ដែល​រាំងស្ទះ​ដល់​ការ​អភិវឌ្ឍ​សេដ្ឋកិច្ច​ ដូចជា​ការ​ដក​ប្រព័ន្ធ​អនុគ្រោះ​ពន្ធ​អ្វី​ៗគ្រប់យ៉ាង​លើកលែងតែ​អាវុធ​ (EBA​) សង្គ្រាម​ពាណិជ្ជកម្ម​នៅក្នុង​តំបន់​ រួម​ទាំង​បញ្ហា​មួយចំនួន​ផ្សេងទៀត​។

    ស្ថិត​ក្នុង​បរិបទ​បែបនេះ​ ធនាគារ​អភិវឌ្ឍន៍​អាស៊ី​បាន​ចេញ​សេចក្ដីបញ្ជាក់​ថា​ កំណើន​សេដ្ឋកិច្ច​ទំនងជា​នឹង​ថមថយ​ចុះ​បន្តិច​ ប៉ុន្តែ​នៅតែ​ជា​កំណើន​ដ៏​រឹងមាំ​។យោង​តាម​របាយការណ៍​ថ្មី​មួយ​របស់​ធនាគារ​អភិវឌ្ឍន៍​អាស៊ី​ (ADB​) ដែល​ចេញផ្សាយ​នា​ពេល​ថ្មី​ៗនេះ​បាន​បញ្ជាក់​ថា​ កំណើន​សេដ្ឋកិច្ច​របស់​កម្ពុជា​ ត្រូវ​បាន​រំពឹង​ទុក​ថា​នឹង​កើនឡើង​ប្រមាណ​ 7%នៅ​ឆ្នាំ2019​ នេះ​ ហើយនឹង​ថយ​ចុះ​មក​ត្រឹម​ 6.8​%នៅ​ឆ្នាំក្រោយ​។ បញ្ហា​នៃ​ការ​ថយ​ចុះ​បន្តិច​នៃ​កំណើន​សេដ្ឋកិច្ច​នេះ​ ត្រូវ​បាន​គេ​មើលឃើញ​ថា​ កើត​ចេញពី​ចរន្ត​នៃ​ការ​ថយ​ចុះ​កំណើន​របស់​ប្រទេស​អភិវឌ្ឍន៍​ជឿនលឿន​ និង​ប្រទេស​ដែល​ជាទី​ផ្សារ​នាំចេញ​របស់​កម្ពុជា​មានការ​ថយ​ចុះ​ ហើយ​ភ្ញៀវ​ទេសចរ​ក៏​មានការ​ថយ​ចុះ​ខ្លះ​ផង​ដែរ​។ ទោះជា​យ៉ាងនេះ​ក្តី​ ក៏​គេ​សង្កេតឃើញ​ថា​ កម្ពុជា​នៅតែ​អាច​ដោះស្រាយ​បញ្ហា​ប្រឈម​សំ​ខាន់​ៗទាំងអស់​នោះ​បាន​ដែរ​ តាមរយៈ​ការរៀបចំ​ និង​ពង្រឹង​វិស័យ​ធនធានមនុស្ស​។

    លោកស្រី​ Sunniya​ Darrani​-Jamal​ នាយិកា​ធនាគារ​អភិវឌ្ឍន៍​អាស៊ី​ (ADB​) ប្រចាំ​នៅ​កម្ពុជា​បាន​លើកឡើង​ថា​ ប្រទេស​កម្ពុជា​នឹង​រក្សា​បាន​នូវ​កំណើន​សេដ្ឋកិច្ច​រឹងមាំ​ក្នុងរយៈពេល​ 2ឆ្នាំទៅ​មុខ​ទៀត​ បើ​ទោះបីជា​ប្រឈម​នឹង​បញ្ហា​មួយចំនួន​ក៏ដោយ​។ កត្តា​សំខាន់​ដែល​អាច​ទាក់ទាញ​ និង​រក្សា​ឱ្យ​បាន​នូវ​កំណើន​ក្នុងរយៈពេល​វែង​ គឺ​កត្តា​ធនធានមនុស្ស​របស់​កម្ពុជា​ដែល​រួមបញ្ចូល​ទាំង​ជំនាញ​បច្ចេក​ទេ​ ស និង​ជំនាញ​វិជ្ជាជីវៈ​ដែល​អាច​ឆ្លើយតប​នឹង​តម្រូវការ​របស់​វិស័យ​ឯកជន​។

    ទាក់​ទឹង​នឹង​បញ្ហា​ធនធានមនុស្ស​ យោង​តាម​របាយការណ៍​របស់​ធនាគារ​អភិវឌ្ឍន៍​អាស៊ី​ (ADB​) ឆ្នាំ2019​ បាន​បញ្ជាក់​ថា​ វា​ជា​បញ្ហា​ដ៏​សំខាន់​មួយ​សម្រាប់​កម្ពុជា​ ព្រោះ​កម្ពុជា​នៅ​មាន​បញ្ហា​គម្លាត​ជំនាញ​ដែល​កើតឡើង​ដោយសារ​ភាព​មិន​ស៊ីចង្វាក់​គ្នា​រវាង​ជំនាញ​របស់​ប្រជាជន​កម្ពុជា​ និង​ទីផ្សារ​ការងារ​ជាក់ស្តែង​។ បញ្ហា​នេះ​កើតឡើង​ដោយសារតែ​ការ​ជ្រើសរើស​ជំនាញ​មិន​ស៊ីចង្វាក់​គ្នា​ជាមួយនឹង​តម្រូវការ​ជាក់ស្តែង​ដែល​កំពុង​ត្រូវការ​ក្នុង​ទីផ្សារ​ជាក់ស្តែង​។

    របាយការណ៍​ដដែល​បាន​បញ្ជាក់​ផង​ដែរ​ថា​ កម្ពុជា​ត្រូវការ​គ្រូបង្រៀន​ដែល​មានគុណ​ភាព​ខ្ពស់​ច្រើន​នាក់​បន្ថែម​ទៀត​ និង​ត្រូវការ​ការ​គាំទ្រ​ផ្នែក​ហិរញ្ញវត្ថុ​ដល់​សិស្ស​ក្រីក្រ​ដែល​រៀន​ពូកែ​ និង​រៀន​ជំនាញ​ដែល​ត្រូវ​នឹង​យុគសម័យ​ឌីជីថល​។

    រដ្ឋលេខាធិការ​ក្រសួង​អប់រំ​ យុវជន​ និងកីឡា​ ឯកឧត្តម​ អុឹម​ កុច​ បាន​បញ្ជាក់​ថា​ កម្ពុជា​កំពុង​ព្យាយាម​គ្រប់​លទ្ធភាព​ដើម្បី​ធ្វើ​កំណែទម្រង់​ប្រព័ន្ធ​អប់រំ​ឱ្យ​មាន​លក្ខណៈ​កាន់តែ​ខ្លាំង​ តាមរយៈ​ការ​បណ្តុះបណ្តាល​គ្រូ​បន្ថែម​ និង​ការ​បញ្ចូល​ជំនាញ​សម្រាប់​សតវត្សរ៍​ទី21​ ដើម្បី​ឱ្យ​សិស្ស​អាច​មាន​ជំនាញ​ឆ្លើយតប​ជាមួយនឹង​ទីផ្សារ​ការងារ​ដែល​សង្គម​ត្រូវការ​ជាក់ស្តែង​។ ក្រៅពី​នេះ​នៅ​តាម​សាលារៀន​យើង​ក៏បាន​ចំណាយ​ថវិកា​ជាច្រើន​ដើម្បី​លើកកម្ពស់​មុខវិជ្ជា​ វិទ្យាសាស្ត្រ​ បច្ចេកវិទ្យា​វិស្វកម្ម​ និង​គណិតវិទ្យា​ (STEM​) ដើម្បី​ឱ្យ​សិស្ស​បាន​យល់​ពី​តម្លៃ​សំខាន់​នៃ​មុខវិជ្ជា​ទាំងអស់​នេះ​នៅក្នុង​សង្គម​កម្ពុជា​ដែល​កំពុងតែ​ត្រូវការ​កម្លាំង​ពលកម្ម​ប្រភេទ​នេះ​ដើម្បី​អភិវឌ្ឍ​ឱ្យ​កាន់តែ​ខ្លាំង​។

    ឯកឧត្តម​ អុឹម​ កុច​ មានប្រសាសន៍​ថា​៖ “កម្ពុជា​កំពុង​ជំរុញ​ឱ្យ​សិស្ស​ទាំងអស់​ចេះ​ទាំង​ជំនាញ​វិជ្ជាជីវៈ​សម្រាប់​ចិញ្ចឹមជីវិត​ និង​ចេះ​ទាំង​ជំនាញ​ទន់​ដើម្បី​ធ្វើការងារ​ប្រកបដោយ​ប្រសិទ្ធភាព​ខ្ពស់​ ព្រោះ​ជំនាញ​បច្ចេកទេស​ជា​ជំនាញ​ដែល​អាច​ឱ្យ​មនុស្ស​ធ្វើការងារ​បាន​ តែ​មិន​ប្រាកដ​ថា​អាច​ឱ្យ​មនុស្ស​អភិវឌ្ឍ​បាន​លឿន​នោះ​ទេ​ ហេតុនេះ​ការ​ត្រូវការ​ជំនាញ​សម្រាប់​សតវត្សរ៍​ទី21​ ដើម្បី​បន្ថែម​ឱ្យ​ពួកគេ​ក្លាយជា​មនុស្ស​ស្វាហាប់​ ចេះ​សហការ​ល្អ​ និង​មាន​ភាព​ច្នៃប្រឌិត​កាន់តែ​ខ្ពស់​”។

    ពាក់ព័ន្ធ​នឹង​បញ្ហា​ជំនាញ​នេះ​ផង​ដែរ​ ឯកឧត្តម​ ពេជ​ សោភ័ន​ រដ្ឋលេខាធិការ​នៃ​ក្រសួងការងារ​ និង​បណ្តុះបណ្តាល​វិជ្ជាជីវៈ​ ក៏បាន​លើកឡើង​ផង​ដែរ​ថា​ កម្ពុជា​ពិតជា​ត្រូវការ​អ្នកជំនាញ​បច្ចេកទេស​ ដើម្បី​ឆ្លើយតប​ជាមួយនឹង​ចរន្ត​របស់​សង្គម​ដែល​កំពុង​មាន​ភាព​រីកចម្រើន​ខ្លាំង​ផ្នែក​សំណង់​ បច្ចេកទេស​អេឡិចត្រូនិក​ ម្ហូបអាហារ​ និង​ផ្នែក​ផ្សេង​ៗទៀត​។ ការ​អភិវឌ្ឍ​នៃ​វិស័យ​ទាំងអស់​នោះ​ បាន​បង្កើត​ឱ្យ​មាន​តម្រូវការ​ធនធានមនុស្ស​ជាច្រើន​នាក់​ ដើម្បី​ចាក់​បញ្ចូល​ឱ្យ​បាន​គ្រប់គ្រាន់​ទៅ​ក្នុង​ទីផ្សារ​។

    ឯកឧត្តម​ ពេជ​ សោភ័ន​ បាន​មានប្រសាសន៍​ថា​៖ “កម្ពុជា​ត្រូវការ​អ្នកជំនាញ​ ហើយ​បើ​គិត​ឱ្យ​លម្អិត​យើង​មើលឃើញ​ថា​ អ្នកជំនាញ​ដែល​យើង​ត្រូវការ​មិនមែន​មានតែ​កម្រិត​ឧត្តម​សិក្សា​ខ្ពស់​ៗដូចជា​វិស្វករ​ ឬអ្នក​ជំ​នាញ​ខ្ពស់​ៗខ្លាំង​នោះ​ទេ​ តែ​យើង​ក៏​ត្រូវការ​ផង​ដែរ​នូវ​អ្នកជំនាញ​បច្ចេកទេស​ អ្នកបច្ចេកទេស​ជាន់ខ្ពស់​ និង​កម្លាំង​ពលកម្ម​ជំនាញ​ដែល​បច្ចុប្បន្ន​នេះ​យើង​នៅ​ត្រូវការ​ជាច្រើន​បន្ថែម​ទៀត​”។

    ឯកឧត្តម​រដ្ឋលេខាធិការ​ក៏បាន​លើកឡើង​នូវ​កត្តា​ប្រឈម​មួយចំនួន​ផង​ដែរ​ដែល​យើង​កំពុង​ជួបប្រទះ​ និង​ខិតខំ​ដោះស្រាយ​ នោះ​គឺ​កង្វះខាត​កម្លាំង​ពលកម្ម​ជំនាញ​ ធ្វើ​ឱ្យ​យើង​ត្រូវ​ចំណាយធនធាន​ដើម្បី​ជួល​អ្នកជំនាញ​ពី​ខាងក្រៅ​។ ឯកឧត្តម​បាន​បញ្ជាក់​ថា​ ដោយ​មើលឃើញ​ពី​បញ្ហា​នេះ​ហើយ​ ទើប​កម្ពុជា​បាន​ជំរុញ​យ៉ាងសកម្ម​លើ​ការ​បណ្តុះបណ្តាល​បច្ចេកទេស​ និង​វិជ្ជាជីវៈ​ (TVET​) ដើម្បី​ឱ្យ​យុវជន​កម្ពុជា​អាច​ចាប់​យក​ឱកាស​អភិវឌ្ឍន៍​សមត្ថភាព​ ហើយ​បំពេញ​ក្នុង​ទីផ្សារ​ការងារ​ ព្រោះ​ជំនាញ​ខ្លះ​ប្រជាជន​ខ្មែរយើង​អាច​ធ្វើ​បាន​មិន​ចាំបាច់​ពឹង​កម្លាំង​ពលកម្ម​ពី​ខាងក្រៅ​នោះ​ទេ​ តែ​យុវជន​របស់​យើង​ខ្លះ​រៀន​ផុត​អស់​ ឬទាប​ជាងជំនាញ​ដែល​ត្រូវការ​។ ទោះជា​យ៉ាងនេះ​ក្តី​ យើង​ឃើញថា​ អ្នកជំនាញ​បច្ចេកទេស​របស់​យើង​ក៏​ត្រូវ​បាន​បណ្តុះបណ្តាល​ច្រើន​ផង​ដែរ​ពី​ 1ឆ្នាំទៅ​ 1ឆ្នាំ​ ដើម្បី​សម្រេច​គោលដៅ​យូរអង្វែង​៕

  • បាត់ដំបង​ផលិត​ពូជ​ដំឡូងមី​ដែល​គ្មាន​ជំងឺ​ និង​សត្វល្អិត​ បាន​ទិន្នផល​រហូតដល់​ 30តោន​ក្នុង​ 1ហិ​កតា​

    បាត់ដំបង​ផលិត​ពូជ​ដំឡូងមី​ដែល​គ្មាន​ជំងឺ​ និង​សត្វល្អិត​ បាន​ទិន្នផល​រហូតដល់​ 30តោន​ក្នុង​ 1ហិ​កតា​

    មជ្ឈមណ្ឌល​បណ្តុះ​ និង​ចែកចាយ​ពូជ​ដំឡូងមី​ នៃ​សាកល​វិទ្យាល័យ​បាត់ដំបង​ទទួល​បាន​ជោគជ័យ​ក្នុង​ការស្រាវជ្រាវ​ និង​ផលិត​ពូជ​ដំឡូងមី​ដែល​គ្មាន​ជំងឺ​ និង​សត្វល្អិត​ ហើយ​ទិន្នផល​ទទួល​បាន​លើស​ដំឡូងមី​ធម្មតា​រហូតដល់​ 30ភាគរយ​។

    មជ្ឈមណ្ឌល​បណ្តុះ​ និង​ចែកចាយ​ពូជ​ដំឡូងមី​ នៃ​សាកល​វិទ្យាល័យ​បាត់ដំបង​ស្ថិត​ក្រោម​គម្រោង​អភិវឌ្ឍន៍​ និង​ផ្សព្វផ្សាយ​ប្រព័ន្ធ​ផលិតកម្ម​ប្រកបដោយ​និរន្តរភាព​តាមរយៈ​ការគ្រប់គ្រង​សត្វល្អិត​ចង្រៃ​លើ​ដំណាំ​ដំឡូងមី​នៅ​ប្រទេស​វៀតណាម​កម្ពុជា​ និង​ថៃ​របស់​ប្រទេស​ជប៉ុន​។ គម្រោង​នេះ​មាន​រយៈពេល​ 5ឆ្នាំ​ដែល​ចាប់ផ្តើម​នៅ​ឆ្នាំ2015​ នឹង​បញ្ចប់​នៅ​ឆ្នាំ2020​ ដែល​មាន​ទឹកប្រាក់​ប្រមាណ​ជិត​ 5លាន​ដុល្លារ​ ជា​ជំនួយឥតសំណង​ពី​រដ្ឋាភិបាល​ជប៉ុន​។

    លោក​បណ្ឌិត​ ស្រ៊ា​ន ពៅ​ ព្រឹទ្ធបុរស​នៃ​មហាវិទ្យាល័យ​កសិកម្ម​ និង​កែច្នៃ​អាហារ​ នៃ​សាកល​វិទ្យាល័យ​បាត់ដំបង​ និង​ជា​អ្នក​អនុវត្ត​គម្រោង​ផ្ទាល់​បានឱ្យ​ដឹង​ថា​ ដំឡូងមី​ជាដំណាំ​យុទ្ធ​សាស្រ្ត​លំដាប់​ទី2​ បន្ទាប់ពី​ស្រូវ​ ហើយ​បច្ចុប្បន្ន​វា​ក្លាយជា​ដំណាំ​ឧស្សាហកម្ម​លើកស្ទួយ​វិស័យ​សេដ្ឋកិច្ច​ជាតិ​របស់​ប្រទេស​កម្ពុជា​។

    លោក​បណ្ឌិត​ថ្លែង​ថា​ បច្ចុប្បន្ន​តាមរយៈ​គម្រោង​អភិវឌ្ឍន៍​ និង​ផ្សព្វផ្សាយ​ប្រព័ន្ធ​ផលិតកម្ម​ប្រកបដោយ​និរន្តរភាព​ តាមរយៈ​ការគ្រប់គ្រង​សត្វល្អិត​ចង្រៃ​លើ​ដំណាំ​ដំឡូងមី​ មជ្ឈមណ្ឌល​បាន​និង​កំពុងតែ​ធ្វើការ​អនុវត្ត​ការសិក្សា​ស្រាវជ្រាវ​ទៅលើ​រឿង4សំ​ខាន់​ៗ។ ទី1​ ការសិក្សា​លើក​ត្តា​សត្វល្អិត​ដែល​មាននៅ​លើ​ដំឡូងមី​។ ទី2​ ផ្តោត​លើ​ជំងឺ​ដែល​បង្កឡើង​ទៅលើ​ដំណាំ​ដំឡូងមី​។ ទី3​ បច្ចេកទេស​ផលិត​ពូជ​ដែល​គ្មាន​ជំងឺ​ ដើម្បី​ក្លាយជា​ពូជ​មួយ​ដែល​ដាំដុះ​លើ​ដី​កសិករ​ឱ្យ​មានប្រសិទ្ធភាព​ខ្ពស់​ និង​ប្រាកដ​ថា​គ្មាន​ជំងឺ​ និង​ទី4​ ផ្តោត​ទៅលើ​បច្ចេកទេស​នៃ​ការ​ផ្សព្វផ្សាយ​បច្ចេកទេស​គ្រប់គ្រង​សត្វល្អិត​លើ​ដំឡូងមី​ថា​ តើ​យើង​គួរ​ផ្សព្វផ្សាយ​ចែករំលែក​នូវ​ចំណេះដឹង​បែប​ណា​ឱ្យ​កសិករ​ទទួល​បាន​ប្រសិទ្ធភាព​ខ្ពស់​?។

    លោក​បណ្ឌិត​បាន​រៀបរាប់​ថា​ មកដល់ពេលនេះ​វា​ជា​ឆ្នាំទី3​ របស់​គម្រោង​ហើយដែល​ផលិត​ពូជ​ដំឡូង​-មី​ដែល​គ្មាន​ជំងឺ​ ដែល​ពូជ​នោះ​យើង​ផលិត​បាន​ 1ឆ្នាំ​មក​ហើយ​។ លោក​បន្ត​ថា​ មជ្ឈមណ្ឌល​មានពូជ​សំ​ខាន់​ៗដែល​កសិករ​និយម​ដាំដុះ​ ដូចជា​ ពូជ​រ៉ា​យ៉ង79​ និង60​ ដែល​ពូជ​ទាំងអស់​នេះ​ មជ្ឈមណ្ឌល​ផលិត​ឡើង​ដោយ​គ្មាន​ជំងឺ​ និង​សត្វល្អិត​។

    លោក​បណ្ឌិត​បាន​បន្ថែម​ថា​៖ “យើង​ចុះ​តាមដាន​រៀងរាល់​ 2សប្តាហ៍​ម្តង​ យើង​ផលិត​ពូជ​មួយ​ដែល​មាន​សុខភាព​ល្អ​ និង​គ្មាន​ជំងឺ​ជា​ប្រភព​ឱ្យ​កសិករ​យក​ទៅ​ដាំដុះ​នៅ​លើ​ដីចម្ការ​របស់​ពួកគាត់​”។

    លោក​បណ្ឌិត​បាន​បន្ថែម​ទៀត​ថា​ មជ្ឈមណ្ឌល​បាន​ចែកចាយ​ទៅ​ឱ្យ​កសិករ​ដើម្បី​ដាំដុះ​បន្ត​។ បើ​ប្រៀបធៀប​ជាមួយ​ពូជ​ធម្មតា​ ពូជ​ដែល​មជ្ឈមណ្ឌល​ផលិត​នេះ​ មាន​មើម​ធំ​ល្អ​ មាន​ទិន្នផល​កើនឡើង​ពី​ 20ទៅ​ 30ភាគរយ​ ធៀប​នឹង​ដំឡូងមី​ធម្មតា​។

    លោក​បណ្ឌិត​ ស្រ៊ា​ន ពៅ​ ក៏បាន​ឱ្យ​ដឹង​ដែរ​ថា​ នៅ​កម្ពុជា​មានពូជ​ដំឡូងមី​ជាង​ 20ពូជ​ ប៉ុន្តែ​ការ​ដាំដុះ​អាស្រ័យ​តាម​តំបន់​ ដែល​ភាគច្រើន​នៅ​ពាយព្យ​ ប្រជាជន​ដាំ​ពូជ​រ៉ា​យ៉ង​ ពី​ប្រទេស​ថៃ​ និង​ភាគ​ខាងត្បូង​ និង​កើត​ ពួកគេ​ភាគច្រើន​យក​ពូជ​មក​ពី​ប្រទេស​វៀតណាម​។

    បើ​តាម​លោក​បណ្ឌិត​ ស្រ៊ា​ន ពៅ​ ដំឡូងមី​មិន​អាច​ដាំដុះ​នៅ​លើ​ដី​ដែល​ជាំទឹក​បានទេ​ ដូច្នេះ​យើង​ឃើញថា​ នៅ​តំបន់​ខ្ពង់រាប​ ការ​ដាំដុះ​ដំឡូងមី​នៅ​លើ​ដី​ដែល​មិន​ជាំទឹក​ និង​មាន​ដីក្រហម​ល្បាយខ្សាច់​ និង​ដីខ្មៅ​ គឺ​ស័ក្តិសម​បំផុត​សម្រាប់​ដំណាំ​ដំឡូងមី​។

    លោក​បន្ត​ថា​ គម្រោង​នេះ​ គឺ​ផ្អែកលើ​ការស្រាវជ្រាវ​ ហើយ​ភាគី​ JICA​ បាន​ជួយ​លើ​ការ​កសាង​សមត្ថភាព​ បង្កើន​សមត្ថភាព​សិក្សា​ស្រាវជ្រាវ​ និង​បណ្តុះបណ្តាល​នៅ​ប្រទេស​ជប៉ុន​ នៅ​សាកល​វិទ្យាល័យ​នានា​នៅ​ប្រទេស​ជប៉ុន​ និង​ឧបត្ថម្ភ​ឧបករណ៍​មួយចំនួន​សម្រាប់​ធ្វើការ​ពិសោធ​ និង​មន្ទីរពិសោធន៍​មួយ​ផង​ដែរ​ ដើម្បី​វិភាគ​ជំងឺ​ដែល​កើតឡើង​លើ​ដំឡូងមី​។

    លោក​បណ្ឌិត​បាន​បញ្ជាក់​ថា​ ឆ្នាំនេះ​ មជ្ឈមណ្ឌល​គ្រោង​ឱ្យ​គាត់​ពង្រីក​ការចែកចាយ​ពូជ​បន្ត​ទៀត​គឺ​ធ្វើ​យ៉ាងណា​សហការ​ជាមួយ​កសិករ​ បង្កើន​ការ​ដាំដុះ​ពូជ​ពី​មជ្ឈមណ្ឌល​ឱ្យ​បាន​ 100ហិ​កតា​នៅ​ប៉ុន្មាន​ឆ្នាំខាងមុខ​ ព្រោះ​ពូជ​ដែល​ផលិត​ដោយ​មជ្ឈមណ្ឌល​អាច​ទទួល​ទិន្នផល​បាន​ប្រមាណ​ 30តោន​ក្នុង​ 1ហិ​កតា​។ លោក​បន្ថែម​ថា​ ក្នុង​ 1ហិ​កតា​ កសិករ​អាច​ដាំ​បាន​ជាង​ 10,000គុម្ព​ ដោយ​កសិករ​នឹង​ចំណាយ​អស់​ជាមធ្យម​ 1,000ដុល្លារ​អាមេរិក​ រាប់ទាំង​ការរៀបចំ​ដី​ ពូជ​ និង​ជី​ផង​។ ដោយឡែក​កសិករ​អាច​រកចំណូល​បាន​មកវិញ​ប្រមាណ​ពី​ 2ទៅ​ 3ពាន់​ដុល្លារ​។

    លោក​បន្ត​ថា​ “ខ្ញុំ​គិតថា​ 2ឆ្នាំ​ចុងក្រោយ​នេះ​ ទីផ្សារ​ដំឡូងមី​មានតម្លៃ​ខ្ពស់​មែនទែន​។ កសិករ​គាត់​សប្បាយចិត្ត​លើ​តម្លៃ​របស់​ដំឡូងមី​។ សម្រាប់​ប៉ុន្មាន​ឆ្នាំមុន​ តម្លៃ​វា​ធ្លាក់ចុះ​មែន​ ប៉ុន្តែ​ឥឡូវ​ 2ឆ្នាំ​ចុងក្រោយ​នេះ​ តម្លៃ​ល្អ​ឡើងវិញ​ ប៉ុន្តែ​កសិករ​ប្រឈមមុខនឹង​ជំងឺ​លើ​ដំណាំ​ ដូច្នេះ​កសិករ​មិន​អាច​លក់​បាន​ថ្លៃ​ ហើយ​ទិន្នផល​ក៏​ធ្លាក់ចុះ​។ ខ្ញុំ​គិតថា​ សាកល​វិទ្យាល័យ​បាត់ដំបង​ជាសាកល​វិទ្យាល័យ​ដែល​កំពុង​សិក្សា​លើ​ជំងឺ​ដំឡូងមី​នោះ​មានការ​សប្បាយចិត្ត​ក្នុង​ការ​ផ្តល់​ជំនាញ​ និង​បច្ចេកទេស​ពាក់ព័ន្ធ​នឹង​ដំឡូងមី​។ យើង​មាន​បច្ចេក​ទេស​ថ្មី​ៗទៀត​ដើម្បី​ការពារ​ដី​”។

    គួរ​បញ្ជាក់​ថា​ ដំឡូងមី​ត្រូវ​បាន​ដាំដុះ​នៅ​តំបន់​ត្រូពិក​ និង​អនុ​តំបន់​ត្រូពិក​។ បច្ចុប្បន្ន​ ប្រទេស​នៅក្នុង​តំបន់​អាស៊ី​ គឺជា​តំបន់​ដាំដុះ​ធំ​ទី2​ បន្ទាប់ពី​ប្រទេស​ក្នុង​តំបន់​អាហ្វ្រិក​ ហើយ​ការប្រើ​ប្រាស់​ដំឡូងមី​កំពុង​កើនឡើង​ខ្លាំង​សម្រាប់​ឧស្សាហកម្ម​ចំណីអាហារ​ និង​សម្ភារ​ឧស្សាហ​កម្ម​ផ្សេង​ៗដែល​ប្រើប្រាស់​ម្សៅដំឡូង​មី​ រួមមាន​ដូចជា​ ក្រដាស​ ប្លាស្ទិក​ និង​ធ្វើជា​វត្ថុធាតុដើម​សម្រាប់​ផលិតកម្ម​ជីវៈ​អេតាណុល​។

    មូលហេតុ​មួយ​នៃ​ការ​កើនឡើង​ចំពោះ​ការ​ដាំដុះ​ដំឡូងមី​ គឺ​ដោយសារ​ការ​កើនឡើង​នូវ​ផលិតកម្ម​ប្រើប្រាស់​ដំឡូងមី​នៅក្នុង​ប្រទេស​ថៃ​ វៀតណាម​ និង​កម្ពុជា​។ដំឡូងមី​ក្នុង​ប្រទេស​ទាំងនេះ​បាន​ចូលរួម​ចំណែក​យ៉ាង​សំខាន់​ក្នុង​ការ​ធ្វើ​ឱ្យ​ប្រសើរ​ឡើង​ដល់​ជីវភាព​កសិករ​ខ្នាត​តូច​តាមរយៈ​ដំណាំ​ដ៏​មានគុណ​តម្លៃ​នេះ​ និង​បាន​ធ្វើ​ឱ្យ​វិស័យ​ឧស្សាហកម្ម​អាចប​ង្កើត​ការងារ​បាន​ច្រើន​ឆ្ពោះទៅ​រក​ការ​អភិវឌ្ឍ​ប្រកបដោយ​ចីរភាព​ និង​ការ​អភិវឌ្ឍ​សេដ្ឋកិច្ច​ជាតិ​ទាំងមូល​៕

  • នៅ​ឆ្នាំ2021​ បន្ទប់​សណ្ឋាគារ​នៅ​ខេត្ត​ព្រះសីហនុ​ នឹង​កើន​ដល់​ជិត​ 1ម៉ឺន​បន្ទប់​

    នៅ​ឆ្នាំ2021​ បន្ទប់​សណ្ឋាគារ​នៅ​ខេត្ត​ព្រះសីហនុ​ នឹង​កើន​ដល់​ជិត​ 1ម៉ឺន​បន្ទប់​

    រដ្ឋមន្ត្រី​ក្រសួងទេសចរណ៍​ បាន​ព្យាករ​ថា​ តាម​សន្ទស្សន៍​នៃ​សក្តា​នុ​ពល​ និង​ការ​វិនិយោគ​លើ​ វិស័យ​សេវា​ស្នាក់នៅ​ខេត្ត​ព្រះសីហនុ​នឹង​មាន​បន្ទប់​សណ្ឋាគារ​កើនឡើង​ដល់​ជិត​ 1ម៉ឺន​បន្ទប់​ក្នុង​ឆ្នាំ2021​ ដើម្បី​ឆ្ពោះទៅ​ដល់​ការរៀបចំ​ និង​អភិវឌ្ឍ​ខេត្ត​ព្រះសីហនុ​ក្នុង​ការ​ត្រៀមខ្លួន​ធ្វើជា​ម្ចាស់ផ្ទះ​ក្នុង​ការរៀបចំ​ពិធីបុណ្យ​សមុទ្រ​ឆ្នាំ2020​ និង​កិច្ចប្រជុំ​កំពូល​អាស៊ាន​ (ASEAN​ Summit​) ក្នុង​ឆ្នាំ2022​។

    ឯកឧត្តម​ ថោង​ ខុន​ រដ្ឋមន្ត្រី​ក្រសួងទេសចរណ៍​ បាន​ថ្លែង​ឱ្យ​ដឹង​ថា​៖“ការ​វិនិយោគ​លើ​វិស័យ​សេវា​ស្នាក់នៅ​ និង​សណ្ឋាគារ​បាន​កើនឡើង​ជាមធ្យម​ 3.5ពាន់​បន្ទប់​ក្នុង​ 1ឆ្នាំ​ ដែល​បន្ទប់​សណ្ឋាគារ​ អាច​នឹង​កើនឡើង​ដល់​ជិត​ 1ម៉ឺន​បន្ទប់​ក្នុង​ឆ្នាំ2021​ ដើម្បី​គាំទ្រ​ដល់​ការ​រីកចម្រើន​វិស័យ​ទេសចរណ៍​យ៉ាង​លឿន​រហ័ស​ និង​ជាបន្តបន្ទាប់​នៅ​ខេត្ត​ព្រះសីហនុ​”។

    ឯកឧត្តម​បន្ត​ថា​ ខណៈ​ដែល​វិស័យ​ទេសចរណ៍​កម្ពុជា​បាន​នាំមក​នូវ​ចំណូល​ក្នុង​សេដ្ឋកិច្ច​ជាតិប្រមាណ​ជាង​ 4ពាន់​លាន​ដុល្លារ​កាលពី​ឆ្នាំ2018​ កន្លងមក​នេះ​ យើង​ក៏​ត្រូវ​គិតគូរ​ពី​ការ​ធ្លុះធ្លាយ​សេដ្ឋកិច្ច​ (Econo​ mic​ Leakages​) ក្នុង​វិស័យ​ទេសចរណ៍​ ដោយ​ចំណូល​ទេសចរណ៍​ប្រមាណ​ 25​% ត្រូវ​បាន​ធ្លាយ​ចេញទៅ​វិញ​ ដែល​ភាគច្រើន​កើតឡើង​ដោយសារ​ការនាំចូល​ផលិតផល​ពី​បរទេស​ ដូចជា​ បន្លែ​ផ្លែឈើ​ សាច់​ ស្រា​ គ្រឿងសង្ហារិម​ វត្ថុ​សិប្ប​កម្ម​ផ្សេង​ៗ-ល- ដើម្បី​ទ្រទ្រង់​ដល់​កំណើន​យ៉ាង​ខ្លាំង​នៃ​ការ​អភិវឌ្ឍ​វិស័យ​ទេសចរណ៍​នៅ​កម្ពុជា​។

    ជាមួយគ្នា​នេះ​ ឯកឧត្តម​ ថោង​ ខុន​ បាន​ដាក់ទិស​ដៅ​ដោយ​ត្រូវ​ព្យាយាម​កាត់បន្ថយ​អត្រា​នៃ​ការ​ធ្លុះធ្លាយ​ឱ្យ​បាន​យ៉ាងតិច​ 10​%បន្ថែម​ទៀត​(ឱ្យមក​នៅ​ត្រឹម​ 5%ដែល​ជា​កម្រិត​ទូទៅ​របស់​បណ្តា​ប្រទេស​គោលដៅ​ទេសចរណ៍​នានា​)។ ឯកឧត្តម​រដ្ឋមន្ត្រី​ បាន​បញ្ជាក់​៖“បើ​យើង​អាច​កាត់បន្ថយ​ការ​ធ្លុះធ្លាយ​បាន​ប្រមាណ​ 10​% បន្ថែម​ទៀត​ គឺ​យើង​អាច​ចំណេញ​បាន​ប្រមាណ​ 400លាន​ដុល្លារ​ពី​ការនាំចូល​របស់​ទាំងនេះ​សម្រាប់​តែ​បម្រើ​ឧស្សាហកម្ម​ទេសចរណ៍​”។

    ឯកឧត្តម​រដ្ឋមន្ត្រី​ក្រសួងទេសចរណ៍​បាន​បន្ត​ទៀត​ថា​ ការជំរុញ​ការប្រើ​ប្រាស់​ផលិតផល​ក្នុង​ស្រុកក្នុង​ឧស្សាហកម្ម​ទេសចរណ៍​នឹង​ឆ្លើយតប​នឹង​កំណើន​តម្រូវការ​ តាមរយៈ​កំណើន​នៃ​ការ​មកដល់​នៃ​ភ្ញៀវ​ទេសចរ​អន្តរជាតិ​ និង​កំណើន​នៃ​ការ​ធ្វើដំណើរ​របស់​ភ្ញៀវ​ទេសចរ​ក្នុង​ស្រុក​ គឺ​ពិតជា​មាន​សារៈសំខាន់​ជា​យុទ្ធ​សាស្រ្ត​ដែល​ទាមទារ​ឱ្យ​មានការ​ចូលរួម​ពី​គ្រប់​ភាគី​ពាក់ព័ន្ធ​ទាំងអស់​ ទាំង​ផ្នែក​រដ្ឋ​ ផ្នែកឯកជន​ និង​ដៃគូ​អភិវឌ្ឍន៍​។

    ផ្នែកឯកជន​នៅក្នុង​វិស័យ​ទេសចរណ៍​ត្រូវ​បន្ត​គាំ​ទ្រ​ និង​ប្រើប្រាស់​ផលិតផល​ក្នុង​ស្រុក​ឱ្យ​បាន​ជា​អតិបរមា​ ខណៈ​ដែល​ផលិតករ​ក្នុង​ស្រុក​បាន​និង​កំពុង​បន្ត​ពង្រឹង​ផលិតកម្ម​ ទាំង​លើ​ទិដ្ឋភាព​បរិមាណ​ និង​គុណភាព​ ប្រកបដោយ​តម្លៃ​ប្រកួតប្រជែង​។ ការរៀបចំ​“អន្តរការី​” ក៏​មាន​សារៈសំខាន់​ក្នុង​ការ​ដើរតួ​ជា​អ្នក​ផ្គូផ្គង​ភ្ជាប់​ទំនាក់ទំនង​រវាង​ផ្នែក​ផ្គត់ផ្គង់​ និង​ផ្នែក​តម្រូវការ​ ដោយធ្វើ​ជា​អ្នកធានា​សម្រាប់​ភាគី​ទាំង2​។ ឯកឧត្តម​រដ្ឋមន្ត្រី​ក៏​បាន​សើ្ន​ឱ្យ​មានការ​ជំរុញ​រៀបចំ​ខ្សែក្រវាត់​បៃតង​នៅ​ជុំវិញ​តំបន់​ គោលដៅ​ទេសចរណ៍​សំ​ខាន់​ៗក្នុង​ព្រះរាជាណាចក្រ​កម្ពុជា​ តាមរយៈ​ការ​ដាំដំណាំ​ ការ​ចិញ្ចឹមសត្វ​ វារីវប្បកម្ម​ ការជំរុញ​សកម្មភាព​សិប្បកម្ម​ សហគ្រាស​ធុន​តូច​ និង​មធ្យម​ ដើម្បី​ធានា​ដល់​ការ​ផ្គត់ផ្គង់​ផលិតផល​ក្នុង​ស្រុក​សម្រាប់​ឧស្សាហកម្ម​ទេសចរណ៍​ ពិសេស​នៅ​តាម​រមណីយដ្ឋាន​ សណ្ឋាគារ​ និង​ភោជនីយដ្ឋាន​នានា​។

    ឯកឧត្ដម​រដ្ឋមន្ត្រី​ក៏បាន​ផ្តល់​អនុសាសន៍​ដល់​រដ្ឋបាល​ខេត្ត​ រដ្ឋបាល​ក្រុង​ មន្ទីរ​ទេសចរណ៍​ ក្រុមការងារ​ទាំង5​ ព្រមទាំង​មន្ទីរ​ និង​អង្គភាព​ពាក់ព័ន្ធ​ត្រូវ​សហការ​គ្នា​បន្ត​អនុវត្ត​ភារកិច្ច​ និង​ដោះស្រាយ​បញ្ហា​ប្រឈម​តាម​ជំនាញ​ និង​អនុវត្ត​ច្បាប់​ជាចម្បង​ប្រកបដោយ​ប្រសិទ្ធភាព​។ ក្រសួងទេសចរណ៍​បាន​ និង​កំពុង​រៀបចំផែនការ​បណ្តុះបណ្តាល​ធនធានមនុស្ស​ និង​ពង្រឹងគុណភាព​បុគ្គលិក​ជំនាញ​តាមរយៈ​ការ​បើក​វគ្គ​បណ្តុះបណ្តាល​ជាប្រចាំ​ និង​ជំរុញ​ដល់​គ្រប់​មូលដ្ឋាន​អាជីវកម្ម​ទេសចរណ៍​ធ្វើការ​បើក​វគ្គ​ពង្រឹង​សមត្ថភាព​នៅ​មូលដ្ឋាន​ផ្ទាល់​ (In​ house​ training​)។

    សូម​បញ្ជាក់​ថា​ នៅ​ឆ្នាំ2018​ កន្លងមក​នេះ​ ចំនួន​ភ្ញៀវ​ទេសចរ​បរទេស​ មក​កម្ពុជា​មាន​ចំនួន​ 6.2លាន​នាក់​កើនឡើង11​% ដោយឡែក​ទេសចរ​អន្តរជាតិ​មក​ខេត្ត​ព្រះសីហនុ​មាន​ចំនួន​ 58ម៉ឺន​នាក់​កើន24​% ដែល​បង្កើត​ការងារ​ដោយ​ផ្ទាល់​ចំពោះ​ប្រជាពលរដ្ឋ​ចំនួន​ 17ម៉ឺន​នាក់​ ចំណែក​ទេសចរណ៍​បរទេស​ សម្រាប់​ 3ខែ​ដើមឆ្នាំ2019​ នេះ​ មាន​ចំនួន​ 20ម៉ឺន​នាក់​ កើនឡើង25​%។ បច្ចុប្បន្ន​ មូលដ្ឋាន​សេវា​ស្នាក់នៅ​មាន​ចំនួន​ 9,697បន្ទប់​ ក្នុង​នោះ​សណ្ឋាគារ​កម្រិត​ផ្កាយ5​ មាន​ចំនួន​ប្រមាណ​ 2,000បន្ទប់​៕

  • មក​ពី​ចូលឆ្នាំ​វិញ​ ​ប្រជាជន​ខ្មែរ​អាច​ជិះ​រថភ្លើង​ពី​កម្ពុជា​ទៅលេង​សិង្ហបុរី​បាន​ហើយ​

    មក​ពី​ចូលឆ្នាំ​វិញ​ ​ប្រជាជន​ខ្មែរ​អាច​ជិះ​រថភ្លើង​ពី​កម្ពុជា​ទៅលេង​សិង្ហបុរី​បាន​ហើយ​

    ​ចាប់ពី​ចុងខែ​មេសា​នេះ​ទៅ​ ​ប្រជាជន​កម្ពុជា​នឹងអាច​ជិះ​រថភ្លើង​ពី​កម្ពុជា​ឆ្លងកាត់​តំបន់​អាស៊ាន​បាន​ហើយ​ ​នេះ​បើ​តាម​ការ​បញ្ជាក់​របស់​ឯកឧត្តម​ទេស​រដ្ឋមន្ត្រី​ ​ស៊ុន​ ​ចាន់​ថុល​ ​រដ្ឋមន្ត្រី​ក្រសួងសាធារណការ​ ​និង​ដឹកជញ្ជូន​។​ ​

    ​ឯកឧត្តម​ ​ស៊ុន​ ​ចាន់​ថុល​ ​បាន​លើកឡើង​ថា​ ​កម្ពុជា​-​ថៃ​ ​បាន​រៀបចំ​រួចរាល់​ហើយ​នូវ​កិច្ច​ព្រមព្រៀង​តភ្ជាប់​ផ្លូវដែក​សម្រាប់​ប្រមុខ​រាជរដ្ឋាភិបាល​នៃ​ប្រទេស​ទាំង2​ ​ចុះហត្ថលេខា​។​ ​ហេតុនេះ​ចាប់ពី​ថ្ងៃទី22​ ​ខែមេសា​ ​ឆ្នាំ2019​ ​ខាងមុខនេះ​ ​ក្រោយ​ចុះ​កិច្ច​ព្រមព្រៀង​ជា​ផ្លូវការ​ ​ប្រជាជន​កម្ពុជា​នឹងអាច​ធ្វើដំណើរ​តាមផ្លូវ​ដែក​ឆ្លង​ប្រទេស​បាន​ហើយ​ ​និង​សម្រាប់​កម្មករ​ ​កម្មការិនី​អាច​ធ្វើដំណើរ​ពី​បាងកក​មកដល់​ភ្នំពេញ​បាន​យ៉ាង​ងាយ​។​ ​ចំណែក​ឯ​អ្នកធ្វើ​ដំណើរ​តាម​រថភ្លើង​ពី​ខេត្ត​ព្រះសីហនុ​ ​និង​ពី​រាជធានី​ភ្នំពេញ​ ​ពេល​ទៅដល់​ប៉ោយប៉ែត​អាច​បន្តដំណើរ​តាម​រថភ្លើង​ទៅដល់​បាងកក​ ​ម៉ាឡេស៊ី​ ​ឬ​សិង្ហបុរី​ក៏បាន​។​ ​

    ​គួរ​បញ្ជាក់​ថា​ ​ការ​ដឹកជញ្ជូន​តាមផ្លូវ​ដែក​នេះ​ ​វិនិយោគ​ដោយក្រុម​ហ៊ុន​ ​Royal​ ​Railway​ ​ដោយ​ក្នុង​នោះ​ក្រុមហ៊ុន​បាន​បញ្ជាទិញ​រថភ្លើង​ពី​ប្រទេស​ម៉ិកស៊ិក​ចំនួន​ ​3គ្រឿង​ ​ដោយ​ក្នុង​ ​1គ្រឿង​ៗ​តម្លៃ​ ​2លាន​ដុល្លារ​។​ ​រថភ្លើង​ថ្មីនេះ​អាច​ផ្ទុក​មនុស្ស​បាន​ចំនួន​ ​56នាក់​ ​មាន​ម៉ាស៊ីន​ត្រជាក់​ ​មាន​បំពាក់​ប្រព័ន្ធ​ ​Wi​-​Fi​ ​និង​ល្បឿន​រហូតដល់​ ​80​ ​ទៅ​ ​90គីឡូម៉ែត្រ​ក្នុង​មួយ​ម៉ោង​ ​ព្រមទាំង​មាន​ទូរទស្សន៍​ ​បង្គន់​អនាម័យ​ ​រួម​ទាំង​បច្ចេកវិទ្យា​ដើម្បី​កុំឱ្យ​រលាក់​ថែមទៀត​ផង​៕​ ​
    ​
    ​

  • កីឡដ្ឋានខេត្តសៀមរាប រងពិន័យមិនអនុញ្ញាតឱ្យរៀបចំការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន

    កីឡដ្ឋានខេត្តសៀមរាប រងពិន័យមិនអនុញ្ញាតឱ្យរៀបចំការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន

    កាលពីការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី13 ឆ្នាំ2019 ថ្នាក់ខេត្ត រវាងខេត្តសៀមរាប និងខេត្តឧត្តរមានជ័យកាលពីសប្តាហ៍មុន មានអំពើហិង្សាកើតឡើងក្នុងអំឡុងការប្រកួតរវាងក្រុមទាំង2 ធ្វើឱ្យផ្អើលពេញទាំងទីលាន។

    ដោយសារតែមូលហេតុនេះហើយ ទើបគណៈកម្មការរៀបចំការប្រកួតបាល់ទាត់ជាតិកម្ពុជាបានអនុវត្តតាមច្បាប់ពិន័យទៅលើកីឡដ្ឋានខេត្តសៀមរាប​មិនឱ្យធ្វើជាម្ចាស់ផ្ទះក្នុងការប្រកួតដណ្ដើមពានរង្វាន់នេះចំនួន 1ប្រកួត ដោយឱ្យខេត្តសៀមរាបស្វែងរកទឹកដីកណ្តាលណាមួយសម្រាប់ប្រកួតលើកក្រោយ។

    ដូច្នេះហើយ នៅសប្តាហ៍ក្រោយនេះ ការប្រកួតសប្តាហ៍ទី6 រវាងខេត្តសៀមរាប និងខេត្តព្រះវិហារ ដែលខេត្តសៀមរាបត្រូវធ្វើជាម្ចាស់ផ្ទះនោះ នឹងត្រូវលើកទៅធ្វើនៅក្នុងទឹកដីខេត្តផ្សេងក្រៅពីខេត្តសៀមរាបវិញ៕