សង្គម និងសេដ្ឋកិច្ច - La Reine Media

ក្រុមហ៊ុន Signatures of Asia ចុះ MoU ជាមួយសមាគមកសិកម្ម និងក្រុមហ៊ុន 6ទៀតដើម្បីជួយវិស័យកសិកម្មឱ្យមាននិរន្តរភាព

ដើម្បីលើកកម្ពស់ជីវភាព និងប្រាក់ចំណូលដល់កសិករខ្នាតតូច និងលើកកម្ពស់ចង្វាក់តម្លៃកសិផលប្រកបដោយនិរន្តរភាព ក្រុមហ៊ុន Signatures of Asia ដែលជាក្រុមហ៊ុននាំចេញអង្ករសរីរាង្គ រួមទាំងកសិផលជាច្រើនមុខផ្សេងទៀតនោះ បានចុះអនុស្សរណៈយោគយល់គ្នា (MoU) ជាមួយសមាគម និងក្រុមហ៊ុនចំនួន6 ផ្សេងទៀត ដើម្បីជួយលើកស្ទួយវិស័យកសិកម្មឱ្យកាន់តែរីកចម្រើនរឹងមាំថែមទៀត។

ភាពជាដៃគូលើចង្វាក់តម្លៃ និងកសិកម្មប្រកបដោយនិរន្តរភាពនេះ មានគោលបំណងធ្វើឱ្យមានអ្នកពាក់ព័ន្ធកាន់តែច្រើនដើម្បីចូលរួមក្នុងខ្សែចង្វាក់តម្លៃទាំងមូល និងជួយកាត់បន្ថយបញ្ហាប្រឈមដែលកើតមានឡើងចំពោះកសិករ ដូចជា ការគាំទ្រផ្នែកហិរញ្ញវត្ថុ បច្ចេកវិទ្យា បច្ចេកទេសកសិកម្ម ធាតុចូលកសិកម្ម និងការទទួលបានទីផ្សារថ្មីៗជាដើម។

ភាពជាដៃគូលើចង្វាក់តម្លៃ និងកសិកម្មប្រកបដោយនិរន្តរភាពនេះនឹងមានការចូលរួមពីអ្នកផ្តត់ផ្គង់ធាតុចូល អ្នកគាំទ្រ បច្ចេកទេស បច្ចេកវិទ្យាកសិកម្ម និងម៉ាស៊ីន ការធានារ៉ាប់រងលើដំណាំ អ្នកកែច្នៃ អ្នកនាំចេញ អ្នកនាំចូល និងស្ថាប័នធនាគារ និងហិរញ្ញវត្ថុ។

ម៉ូដែលលើចង្វាក់តម្លៃ និងកសិកម្មដែលមាននិរន្តរភាពនេះត្រូវបានចុះហត្ថលេខាដោយក្រុមហ៊ុន Signatures of Asia ជាមួយសហគមន៍កសិកម្មនៅតាមបណ្ដាខេត្តនានា ក្រុមហ៊ុន Bayon Heritage Holding Group វិទ្យាស្ថានស្រាវជ្រាវ និងអភិវឌ្ឍន៍កម្ពុជា អង្គការទស្សនពិភពលោក ក្រុមហ៊ុនកសិកម្មឈ្លាសវៃ ក្រុមហ៊ុនហ្វូតតេ ក្រុមហ៊ុននាំចូលផលិតផលកសិកម្មសរីរាង្គរបស់ប្រទេសហូឡង់ DOENS Foods International និងគ្រឹះស្ថានមីក្រូហិរញ្ញវត្ថុ AMK។

លោក ចាន់ សុឃាំង អគ្គនាយកនៃក្រុមហ៊ុន Signatures of Asia បានឱ្យដឹងថា ការសហការ ប្រមូលផ្តុំដៃគូទាំងអស់ទាក់ទងនឹងវិស័យកសិកម្មនេះ គឹធ្វើយ៉ាងណាទ្រទ្រង់វិស័យកសិកម្មឱ្យមានចីរភាព ដែលនឹងផ្សារភ្ជាប់តាំងពីការដាំដុះ រហូតដល់ទីផ្សារ ហើយដើម្បីបង្ហាញឱ្យអ្នកដែលបានធ្វើការដាំដុះទាំងអស់ ឱ្យគាត់បានដឹងថា តើគាត់គួរដាំដុះដំណាំប្រភេទណា ដែលមានតម្លៃខ្ពស់ទៀតផង។

លោកបានបន្តទៀតថា ក្រុមហ៊ុន Signatures of Asia បានចុះអនុស្សរណៈយោគយល់គ្នានៅពេលនេះ គឺក្នុងគោលបំណងធ្វើយ៉ាងណាឱ្យមានការអភិវឌ្ឍទៅលើវិស័យកសិកម្មកាន់តែខ្លាំងឡើងថែមទៀត ហើយដៃគូពាក់ព័ន្ធដែលបានចុះ MoU នៅពេលនេះ មានសហគមន៍ខ្លះ ធ្វើកសិកម្មទាក់ទងនឹងស្រូវសរីរាង្គ សហគមន៍ខ្លះធ្វើពាក់ព័ន្ធនឹងស្ករត្នោត និងសហគមន៍ខ្លះទៀត គឺកំពុងតែគិតគូរលើដំណាំសរីរាង្គដូចជា សណ្តែកខៀវ ម្រេច និងស្វាយចន្ទីជាដើម។

លោក សុឃាំង បានបន្តថា នៅពេលដែលក្រុមហ៊ុនបានចាប់ដៃគ្នាជាដៃគូហើយ គឺយើងនឹងមានការទ្រទ្រង់ច្រើនជាងអ្វីដែលធ្លាប់ធ្វើពីមុនៗមក ដែលនៅពេលនេះមានស្ថាប័នមីក្រូហិរញ្ញវត្ថុ AMK បានត្រៀមកញ្ចប់ថវិកាទ្រទ្រង់រួចហើយ សម្រាប់សហគមន៍ទាំង15 ដែលបានចុះអនុស្សរណៈយោគយល់គ្នានេះ ដើម្បីត្រៀមជួយផ្នែកហិរញ្ញប្បទាន ធ្វើយ៉ាងណាឱ្យគាត់អាចមានជាទុនផលិតដំណាំដាំដុះបានជាច្រើនជាងមុនផងដែរ។

លោក សុឃាំង ក៏បានស្នើដល់សហគមន៍ដែលមានសក្តានុពលក្នុងការផលិតកសិផលសរីរាង្គទាំងឡាយអាចមកទំនាក់ទំនងនឹងក្រុមហ៊ុន Signatures of Asia ដើម្បីធ្វើការពិភាក្សា ស្វែងរកផលិតផលដែលមានសក្តានុពលអាចធ្វើការដាំដុះបាន ហើយក្រុមហ៊ុននឹងទទួលទិញក្នុងតម្លៃដែលសមរម្យ និងនាំយកទៅលក់នៅលើទីផ្សារអន្តរជាតិតែម្តង។

លោក សុឃាំង ថ្លែងថា៖“យើងបានចុះហត្ថលេខាលើអនុស្សរណៈយោគយល់គ្នាជាមួយភាគីពាក់ព័ន្ធផ្សេងៗ ហើយនាពេលខាងមុខនេះ យើងនឹងចុះកិច្ចព្រមព្រៀងផលិតកម្មកសិកម្មតាមកិច្ចសន្យាជាមួយសហគមន៍កសិកម្មចំនួន15 ទូទាំងប្រទេស”។

លោកបន្តថា ជាមួយនឹងកិច្ចសហការភាពជាដៃគូនេះ នឹងគាំទ្រកសិករបានច្រើនជាងមុន ខណៈយើងមានដៃគូខាងមីក្រូហិរញ្ញវត្ថុ អេ អឹម ខេ (AMK) ក្នុងការផ្តល់ជាហិរញ្ញប្បទាន ព្រមជាមួយដៃគូបញ្ជាទិញដែលគួរឱ្យទុកចិត្តក្នុងការផ្តល់ទំនុកចិត្តដល់កសិករ និងធានាថា កសិករមានទីផ្សារមួយពិតប្រាកដ។

លោក សុឃាំង បានឱ្យដឹងថា រហូតមកទល់ពេលនេះ ក្រុមហ៊ុនបានធ្វើការជាមួយសហគមន៍កសិកម្ម នៅខេត្តព្រះវិហារ ខេត្តស្ទឹងត្រែង ខេត្តកំពង់ស្ពឺ ខេត្តកំពង់ធំ បន្ទាយមានជ័យ កំពង់ឆ្នាំង តាកែវ ស្វាយរៀង និងកោះកុង។

លោក Joeri Valckenier Von Geusau អ្នកបញ្ជាទិញពីក្រុមហ៊ុន Doens Food Ingredients B.V. របស់ប្រទេសហូឡង់បានឱ្យដឹងថា ក្រុមហ៊ុនរបស់លោកនឹងនាំចូលផលិតផលកសិកម្មពីកម្ពុជាដើម្បីយកទៅកែច្នៃ និងលក់នៅសហគមន៍អឺរ៉ុប និងសហរដ្ឋអាមេរិក ដោយក្រុមហ៊ុនរបស់លោកនឹងស្វែងដំណាំសក្តានុពលនៅកម្ពុជាបន្ថែមទៀត។

លោក Joeri ថ្លែងថា ក្នុងរយៈពេលពី3 ទៅ 3ឆ្នាំទៀត ក្រុមហ៊ុនរបស់លោកនឹងស្វែងរកការនាំចេញដំណាំកសិកម្មសរីរាង្គពីកម្ពុជាដែលមានដូចជា អង្ករសរីរាង្គ ប្រមាណ 7,500 ទៅ 10,000តោន ស្ករត្នោត(100 ទៅ 200តោន) ស្ករអំពៅ (2,500តោន) ស្វាយចន្ទី 1,500 ទៅ 2,000តោន មើមរមៀត 200 ទៅ 500តោន សណ្តែកសៀង 2,500 ទៅ 5,000តោន និងម្រេចប្រមាណជា 500តោន។

លោក Joeri បានបន្តថា៖“អ្វីដែលយើងនឹងធ្វើ គឺធានាថា រាល់ផលិតផលត្រូវតែស្អាត និងមានសុវត្ថិភាពសម្រាប់អតិថិជនបរិភោគ ដូច្នេះយើងបានធ្វើការត្រួតពិនិត្យមុននឹងដឹកជញ្ជូនឡើងកប៉ាល់ ដើម្បីធ្វើឱ្យប្រាកដថា ផលិតផលដែលបានបម្រើដល់អតិថិជនរបស់យើងនឹងទទួលបានសុវត្ថិភាពក្នុងការទទួលទាន ហើយវាក៏ជួយបង្កើនចំណេះដឹងដល់កសិករអំពីតម្រូវការរបស់អឺរ៉ុប និងអាមេរិកផងដែរ”៕

April 22, 2019

IMF ថា សេដ្ឋកិច្ចកម្ពុជាឆ្នាំនេះនឹងសម្រេចបានកំណើនត្រឹម 6.8%

ថ្វីដ្បិតតែសេដ្ឋកិច្ចកម្ពុជាមានកំណើនក្នុងរយៈពេលប៉ុន្មានឆ្នាំកន្លងមកនេះដោយសម្រេចបានប្រមាណជាង7% ក្ដី ប៉ុន្តែមន្ត្រីជាន់ខ្ពស់នៃមូលនិធិរូបិយប័ណ្ណអន្តរជាតិ International Monitary Fund ឬ IMFបានព្យាករថា សេដ្ឋកិច្ចកម្ពុជាក្នុងឆ្នាំ2019 នឹងសម្រេចបានកំណើនត្រឹមតែ 6,8% ដែលជាការថយចុះមួយ ខណៈឆ្នាំ2018 កន្លងមកនេះ សេដ្ឋកិច្ចកម្ពុជាសម្រេចបានកំណើន 7.5%។

ក្នុងជំនួបជាមួយឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ក្រុមបេសកកម្មរបស់មូលនិធិរូបិយវត្ថុអន្តរជាតិដែលដឹកនាំដោយលោក Jarkko Turunen អនុប្រធានការិយាល័យនៃនាយកដ្ឋានអាស៊ីប៉ាស៊ីហ្វិក (APD) ដែលបានមកទស្សនកិច្ចកម្ពុជា បានបង្ហាញសុទិដ្ឋិនិយមលើការរីកចម្រើននៃសេដ្ឋកិច្ចកម្ពុជានាឆ្នាំ2019 និងក្នុងរយៈកាលមធ្យម ដោយប៉ាន់ស្មានថា កំណើនសេដ្ឋកិច្ចកម្ពុជានៅឆ្នាំ2018 សម្រេចបានក្នុងអត្រា7.5% និងព្យាករថា សេដ្ឋកិច្ចកម្ពុជាមានអត្រា6.8% នៅឆ្នាំ2019 និងក្នុងរង្វង់7% នៅឆ្នាំ2020។

មន្ត្រីជំនាញ IMF បានបន្តឱ្យដឹងថា អតិផរណាត្រូវបានព្យាករថា ;នឹងបន្តមានកម្រិតទាបក្នុងរង្វង់ 3% ទាំងក្នុងរយៈកាលខ្លី និងមធ្យមជាមួយនឹងស្ថិរភាពអត្រាប្តូរប្រាក់ល្អប្រសើរ។ ចំណែកឯទុនបម្រុងអន្តរជាតិនឹងបន្តរក្សាបានកម្រិតប្រមាណ 5ខែនៃការនាំចេញទំនិញ និងសេវានៃឆ្នាំបន្ទាប់។ ទន្ទឹមនេះ វិស័យធនាគារនឹងបន្តរក្សាបានវឌ្ឍនភាព និងស្ថិរភាពជាមួយនឹងនិន្នាការកំណើនឥណទានថយចុះសន្សឹមៗ ក្នុងអត្រាសមស្របទៅនឹងការរីកចម្រើនរបស់សេដ្ឋកិច្ច។

ទោះជាយ៉ាងណា កាលពីពេលថ្មីៗនេះលោកស្រី នាវ ច័ន្ទថាណា ទេសាភិបាលរងនៃធនាគារជាតិនៃកម្ពុជាបានអះអាងថា សេដ្ឋកិច្ចកម្ពុជានៅឆ្នាំ2019 នេះនឹងសម្រេចបានកំណើន7%ដោយសារការរីកចម្រើននៃវិស័យទេសចរណ៍ កសិកម្ម វាយនភណ្ឌវិស័យសំណង់ និងអចលនទ្រព្យ និងវិស័យសេវាកម្មដែលកំពុងមានការរីកចម្រើននៅកម្ពុជា។

ជាមួយគ្នានេះដែរ ក្រុមការងាររូបិយវត្ថុអន្តរជាតិក៏បានជម្រាបជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជានៅក្នុងជំនួបដោយឡែកមួយផ្សេងទៀតថា ទោះបីសេដ្ឋកិច្ចកម្ពុជានៅតែបន្តកំណើនរឹងមាំជាមធ្យមប្រមាណត្រឹម 6.5% ទៅ7% ក្នុង 1ឆ្នាំសម្រាប់រយៈពេលខ្លី និងមធ្យមខាងមុខ ស្របទៅនឹងស្ថានភាពល្អប្រសើរនៃលទ្ធផលអនុវត្តន៍ផ្នែកសារពើពន្ធក្ដី តែហានិភ័យសម្រាប់កម្ពុជាកាន់តែមានទំហំធំជាងមុន ដែលរួមមានលទ្ធផលនៃការដក EBA ដោយសហភាពអឺរ៉ុប សង្គ្រាមពាណិជ្ជកម្មរវាងអាមេរិក និងចិន ការចាកចេញរបស់ប្រទេសអង់គ្លេសពីសហភាពអឺរ៉ុប (Brexit) ជាដើម។ ដោយហេតុថា ជាទូទៅផ្អែកលើលទ្ធផលនៃសកម្មភាពសេដ្ឋកិច្ចជារួមនាចុងឆ្នាំ2018 និងដើមឆ្នាំ2019 នេះ កំណើនសេដ្ឋកិច្ចសកល និងក្នុងតំបន់មាននិន្នាការថមថយចុះ។

ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានស្វាគមន៍យ៉ាងកក់ក្តៅចំពោះការសិក្សាវាយតម្លៃបឋមអំពីស្ថានភាពម៉ាក្រូសេដ្ឋកិច្ចកម្ពុជាដែលរៀបចំដោយក្រុមបេសកកម្មការងារនៃមូលនិធិរូបិយវត្ថុអន្តរជាតិ(International Monetary Fund Staff Visit Mission) នៅទីស្តីការក្រសួងសេដ្ឋកិច្ច និងហិរញ្ញវត្ថុ។

ឯកឧត្តមអគ្គបណ្ឌិតសភាចារ្យបានជម្រាបជូនក្រុមការងារអំពីភាពខុសគ្នានៃលទ្ធផលព្យាករកំណើនសេដ្ឋកិច្ចឆ្នាំ2020 របស់រាជរដ្ឋាភិបាល និងលទ្ធផលព្យាកររបស់ក្រុមការងារមូលនិធិរូបិយវត្ថុអន្តរជាតិថា ដោយសារកម្ពុជាបានដាក់បញ្ចូលផលប៉ះពាល់អវិជ្ជមាននៃការដក EBA ដោយសហភាពអឺរ៉ុបទៅក្នុងការព្យាករសេដ្ឋកិច្ចតែម្ដង ដោយរួមទាំងមានរៀបចំជាកញ្ចប់អន្តរាគមន៍ ដើម្បីបង្កើតការងារជូនប្រជាពលរដ្ឋ និងជំរុញសេដ្ឋកិច្ចកម្ពុជាឱ្យមកនៅអត្រា 6.5%វិញ ខណៈមូលនិធិរូបិយវត្ថុអន្តរជាតិចាត់ទុកការដក EBA ត្រឹមតែជាហានិភ័យប៉ុណ្ណោះ ពោលគឺមិនបានដាក់បញ្ចូលផ្ទាល់ទៅក្នុងលទ្ធផលព្យាករនោះទេ។

អគ្គបណ្ឌិតសភាចារ្យ អូន ព័ន្ធមុន្នីរ័ត្ន ក៏បានធ្វើការថ្លែងអំណរគុណ ចំពោះការបន្តផ្តល់ជំនួយបច្ចេកទេសពីសំណាក់មូលនិធិរូបិយវត្ថុអន្តរជាតិ ក្នុងការកសាងសមត្ថភាពមន្ត្រីកម្ពុជាឱ្យកាន់តែមានជំនាញ និងចំណេះដឹងល្អប្រសើរជាងមុន ជាពិសេសការផ្ដល់ជំនួយបច្ចេកទេសលើការចងក្រងស្ថិតិជារួមរបស់រាជរដ្ឋាភិបាលដែលមានសារៈសំខាន់សម្រាប់ការវិភាគ វាយតម្លៃ និងរៀបចំគោលនយោបាយឱ្យកាន់តែមានប្រសិទ្ធភាពជាងមុន៕

April 22, 2019

អ្នកនាង ភីម និយាយអារម្មណ៍ពិតក្រោយនាយ តាក់ស៊ី បើកចិត្តឱ្យយកប្ដីថ្មី

តាមរយៈការបង្ហោះសាររបស់លោក អ៊ឹម ជីវ៉ា នៅបណ្ដាញសង្គមហ្វេសប៊ុកបានឱ្យដឹងថា តារាកំប្លែងនាយតាក់ស៊ីនឹងលាឈប់ពីសិល្បៈដោយសម្រេចបួសអស់មួយជីវិត ហើយនិងបើកផ្លូវឱ្យភរិយារបស់លោក គឺអ្នកនាងភីម យកគ្រួសារថ្មី ដែលធ្វើឱ្យម្នាក់ៗមានការប៉ាន់ស្មានយ៉ាងខ្លាំងថា ជីវិតប្ដីប្រពន្ធមួយគូនេះទំនងជួបវិបត្តិប្រេះស្រាំដល់ថ្នាក់ផ្សះផ្សារលែងបាន ទើបបណ្ដាលឱ្យតារាកំប្លែងនាយតាក់ស៊ីបោះពាក្យបែបនោះប្រាប់លោក អ៊ឹម ជីវ៉ា និងសម្រេចចិត្តបួសឱ្យឆ្ងាយពីប្រពន្ធកូន ដោយគ្មានអាល័យបែបនេះ។ ក្នុងបទសម្ភាសន៍ជាមួយអ្នកនាង ភីម ជាភរិយា អ្នកនាងបញ្ជាក់ប្រាប់ពីជំហររបស់នាយតាក់ស៊ី នៅក្នុងពេលនេះ។

អ្នកនាងភីម និយាយថា រវាងអ្នកនាង និង នាយតាក់ស៊ី អត់មានបញ្ហាគ្រួសារណាមួយកើតឡើងនោះទេ ដោយទោះជាលោកមានវ័យច្រើនជាង ហើយមានជំងឺប្រចាំកាយ ក៏អ្នកនាងមិនដែលមានអារម្មណ៍ធុញទ្រាន់ក្នុងការថែទាំនោះដែរ។ អ្នកនាងថា នាយតាក់ស៊ីសូម្បីតែការធ្វើទុក្ខបុកម្នេញដាក់ភរិយា និងកូនប្រុសដែលជាដំណក់ឈាមក៍មិនមាននោះដែរ ប៉ុន្តែអ្វីដែលធ្វើឱ្យលោកចាប់ផ្ដើមបែកគំនិតចង់តែបួស ហើយមិនចង់រស់នៅជួបជុំជាមួយប្រពន្ធកូននៅក្នុងពេលនេះ គឺដោយសារតែលោកពិបាករឿងជំងឺប្រចាំកាយ និងចង់តែបួស ហើយប្រាប់អោយនាងស្វែងរកគ្រួសារថ្មី ដើម្បីកុំឱ្យបន្តពិបាកជាមួយលោកបន្តទៀតតែម្ដង។ អ្នកនាងថា នាយតាក់ស៊ីលួចទៅបួសរត់ចោលប្រពន្ធកូនព្រោះតែជំងឺបាក់ទឹកចិត្តបែបនេះម្ដងហើយ ប៉ុន្តែក្រោយពេលតាមរកឃើញនៅភ្នំគូលែន ហើយមានការអង្វរករក៏សម្រេចចិត្តសឹកមកវិញ។

អ្នកនាងភីម បន្តថា នៅក្នុងពេលនេះ ស្វាមីរបស់ខ្លួន គឺនាយតាក់ស៊ី ចាប់ផ្ដើមឃាត់លែងជាប់តែម្ដង ដោយលោកប្រកាសថាត្រូវតែទៅបួស បើទោះជាបួសបានតែមួយថ្ងៃហើយត្រូវស្លាប់ក៏លោកប្រកាសថាអស់ចិត្ត។ អ្នកនាងថា ទាំងក្រុមការងារ និង ក្រុមគ្រួសារសុទ្ធតែអង្វរកររាល់ថ្ងៃកុំអោយលោកគិតខ្លី និងស្មើឱ្យលោកបន្តរស់នៅជួបជុំជាមួយគ្រួសារប្រពន្ធកូន តែលោកនៅតែអះអាងថា បើលោកមិនបានទៅបួស នោះលោកនឹងស្លាប់បិទភ្នែកមិនជិត។ លោកអង្វរឱ្យអ្នកនាងបើកសិទ្ធិឱ្យលោកទៅបួស ដោយលោកប្រកាសជំហរថា បើមិនឱ្យទៅបួសតាមសម្រួលទេ គឺលោកនឹងរត់ទៅបួសមិនឱ្យដឹង ហើយបើទោះជាស្លាប់រស់ក្រោយពេលសាងផ្នួស ក៏លោកមិនឱ្យប្រពន្ធកូនដឹង។ អ្នកនាងថា មកទល់ពេលនេះស្ថានភាពពន្យល់ និងអង្វរករចាប់ផ្ដើមអស់ជម្រើស ទើបអ្នកនាងសុខចិត្តឱ្យលោកទៅបួស តែសុំឱ្យលោកបួសនៅវត្តគល់ទទឹងនៅកោះក្របី ដើម្បីអោយកីនប្រពន្ធបានឡើងចុះមើលថែ ប៉ុន្តែលោកទទូចចង់ទៅបួសនៅឯភ្នំគូលែនដូចមុន។

អ្នកនាងនិយាយថា ខ្លួនពិតជាមានសម្ពាធផ្លូវចិត្តខ្លាំងណាស់ ដែលប្ដីចង់តែបួស ចង់តែទៅឆ្ងាយប្រពន្ធកូន ហើយដើរប្រាប់គេឯងថាឱ្យអ្នកនាងយកប្ដីទៀត ឬចិញ្ចឹមកូនបានយ៉ាងមិចក៏ចិញ្ចឹមទៅ ដែលមនុស្សមួយចំនួនស្ដាប់ហើយហាក់ដូចជាអ្នកនាង និងលោកមានបញ្ហាផ្ទៃក្នុង។ នៅក្នុងពេលនេះ អ្នកនាងសម្រេចឱ្យប្ដីទៅបួសនៅចុងខែ៥នេះ តែអ្វីដែលអ្នកនាងអង្វរប្ដីឱ្យធ្វើតាមនាង គឺសុំឱ្យបួសនៅវត្តគល់ទទឹង ដើម្បីឱ្យអ្នកនាង និងកូនតែម្នាក់វ័យជាង១០ឆ្នាំបានមើលថែ។

April 22, 2019

វីជេ អូឡាឡា សម្រេចបំណងចុះកុងត្រាជាមួយប៉ុស្តី៍លេខ៥

លោកអ្នកដែលស្នេហាវិស័យកីឡាប្រដាល់របស់ប៉ុស្តី៍លេខ៥ នាចុងសប្តាហ៍ពិតជាបានស្គាល់វត្តមានពិធីករអត្ថាធិប្បាយសម្បូរវោហារស័ព្ទមិនចេះរីងស្ងួតគឺ លោក វីជេ អូឡាឡា ដោយលោកមានពាក្យពេចន៍និយាយបញ្ចេញបញ្ចូលដ៍ជំនាញមួយ។

ស្ថិតក្នុងការងារប្រចាំស្ថានីយ៍មួយនេះ លោកទើបតែសម្រេចចិត្តចូលស៊ុបពេញទំហឹងនាពេលនេះទេ បន្ទាប់ពីស្វែងយល់ពីលក្ខខណ្ឌដ៍ល្អរួចមក។វីជេអូឡាឡា ទើបតែសម្រេចចិត្តទទួលចំណងលក្ខខណ្ឌជាមួយស្ថានីយ៍ប៉ុស្តី៍លេខ៥ កាលពីពេលថ្មីៗនេះតែប៉ុណ្ណោះ បើទោះជាលោកដំណើរការកម្មវិធីប្រដាល់ប្រចាំសប្តាហ៍រាប់សិបអាទិត្យមកហើយ។ លោក អូឡាឡា បានថ្លែងថា លោកទើបតែចុះកុងត្រា ជាមួយមេកើយនាប៉ុស្តី៍លេខ៥ ក្រោយពេលចរចារគ្នាត្រូវចិត្ត។ អំឡុងពេលលោកយកចំណងនេះ លោកក៏ស្តាយការងារកន្លែងចាស់គ្រាដែលខាងមេចាស់ក៍គាត់ឱ្យតម្លៃការងារប៉ុន្តែនេះជាឱកាសដែលយើងត្រូវសម្រេចចិត្ត។ លោកអះអាងទៀតថា ការចូលពេញទំហឹងជាមួយការងារទូរទស្សន៍ប៉ុស្តី៍លេខ៥ លោកមានតែពង្រឹងស្នាដៃឱ្យល្អតាមតែអាចធ្វើបានក៍ដូចជាដកបទពិសោធន៍ថ្មីៗទៀតទាក់ទិននិងជំនាញ។

មិនត្រឹមតែប៉ុណ្ណឹងទេការសម្រេចចិត្តនេះលោកក៏មើលឃើញពីស្តង់ដារការងារគឺធ្វើឱ្យលោកពេញចិត្តទើបងាកមកទទួលក្រោយពេលមើលឃើញពីរបៀបការងារមក។ យ៉ាងណាមិញរូបលោកមានតែការព្យាយាមឱ្យល្អហើយក៏រីករាយបានរួមសហការជាមួយក្រុមការងារហើយកាន់តែពិសេស លោកក៏កក់ក្តៅក្រោយពេលឃើញទស្សនិកជនជួយគាំទ្រវិស័យកីឡាប្រដាល់របស់ប៉ុស្តី៍លេខ៥ អាចដើរទៅមុខបាន។ ជំហរនេះហើយទើបក៍ជាផ្នែកជួយឲលោកជ្រើសរើសលក្ខខណ្ឌបែបនេះផងដែរ។

April 22, 2019

លើកនេះ សុខ ធី ត្រៀមជួបកំពូលកីឡាករថៃ Rodtang នៅថ្ងៃទី10 ខែឧសភា ឆ្នាំ2019 ខាងមុខនេះ

ជើងខ្លាំងមានដើមកំណើតមកពីខេត្តបន្ទាយមានជ័យ សុខ ធី នឹងត្រូវឡើងប្រកួតជាលក្ខណៈមិត្តភាពអន្តរជាតិជាមួយអ្នកប្រដាល់លំដាប់ជួរមុខរបស់ថៃ គឺកីឡាករ Rodtang នៅថ្ងៃទី10 ខែឧសភា ឆ្នាំ2019 ខាងមុខនេះនៅសង្វៀន One Championship ដែលជាការប្រកួតក្នុងប្រភេទប្រដាល់ក្បាច់គុនបុរាណ។

គួររំឭកផងដែរថា កីឡាករកម្ពុជារូបនេះត្រូវសហព័ន្ធកីឡាប្រដាល់កម្ពុជា ពិន័យមិនឱ្យឡើងសង្វៀនប្រដាល់ទាំងក្នុង និងក្រៅប្រទេសរយៈពេល 6ខែ តែពេលនេះស្រាប់តែមានឈ្មោះផ្គូផ្គងក្នុងការប្រកួតប្រដាល់ ONE Championship ទៅវិញ។ គួររំឭកដែរថា សុខ ធី ធ្លាប់បានឡើងសង្វៀន ONE Championship នេះចំនួន 2លើករួចមកហើយ ដោយចាញ់កីឡាករថៃ Lersila ទាំង 2លើកផ្ទួនៗក្រោយពីការមិនសុខចិត្តហើយចង់សងសឹកកាលពីជួបគ្នាលើកទី1៕

April 20, 2019

ធារី ចន្ថាប៊ីន ជួយ Terenganu FC ឱ្យឡើងទៅវគ្គ 8ក្រុមចុងក្រោយនៃពានរង្វាន់ FA CUP របស់ម៉ាឡេស៊ី

ក្លិប Terenganu FC របស់កីឡាករ ធារី ចន្ថាប៊ីន បានឡើងដល់វគ្គ 8ក្រុមចុងក្រោយនៃពានរង្វាន់ FA CUP របស់ម៉ាឡេស៊ី ស្របពេលដែលក្លិប PKNS FC របស់កីឡាករ ចាន់ វឌ្ឍនាកា ក៏បានឡើងដល់វគ្គនេះដូចគ្នាដែរ។

ចំពោះក្លិប Terenganu FC របស់កីឡាករ ធារី ចន្ថាប៊ីន បានឡើងដល់វគ្គ 8ក្រុមចុងក្រោយនៃពានរង្វាន់ FA CUP របស់ម៉ាឡេស៊ីនេះ គឺក្រោយពីបំបាក់ក្រុម Kelantan United ក្នុងលទ្ធផល 3 ទល់នឹង 1 នៅវគ្គ 16ក្រុមចុងក្រោយ និងលត់ក្រុម Ultimate ដោយលទ្ធផល 5 ទល់នឹង 0 នៅវគ្គ 32ក្រុមនៃពានរង្វាន់មួយនេះ៕

April 20, 2019

លទ្ធផលចាប់ពូល ក្លិបរបស់ ចាន់ វឌ្ឍនាកា និង ធារី ចន្ថាប៊ីន ក្នុងវគ្គ 8ក្រុមចុងក្រោយនៃពានរង្វាន់ FA CUP

ក្លិប PKNS FC របស់កីឡាករ ចាន់ វឌ្ឍនាកា និង ក្លិប Terenganu FC របស់កីឡាករ ធារី ចន្ថាប៊ីន ទាំង 2ក្រុមនេះសុទ្ធតែបានឡើងដល់វគ្គ 8ក្រុមចុងក្រោយនៃពានរង្វាន់ FA CUP របស់ម៉ាឡេស៊ីដូចគ្នា។

ជាលទ្ធផលនៃការចាប់ពូលសម្រាប់ការប្រកួតក្នុងវគ្គនេះ ក្រុម PKNS FC នឹងត្រូវជួបជាមួយនឹងក្រុម Kedah FA ហើយ Terenganu FC នឹងត្រូវជួបជាមួយនឹងក្រុម Pahang FA ហើយការប្រកួតក្នុងវគ្គនេះនឹងត្រូវធ្វើឡើង 2ជើងផ្លាស់ប្តូរទឺកដីគ្នា ដោយជើងទី1 ត្រូវធ្វើឡើងនៅពាក់កណ្តាលខែក្រោយ ហើយជើងទី2 នៅមិនទាន់មានការកំណត់កាលបរិច្ឆេទនៅឡើយទេ៕

April 20, 2019

តារាចម្រៀង វុទ្ធ សុគន្ធា ធ្លាយរឿងត្រូវគេបោកលុយស្រស់ៗអស់800ដុល្លារ

នៅលើបណ្ដាញសង្គមហ្វេសប៊ុកគេមើលឃើញថា ខុសពីតារាភាគច្រើន ដែលក្រោយចូលឆ្នាំបង្ហាញអារម្មណ៍រីករាសម្រាប់តារាចម្រៀងកញ្ញា វុទ្ធ សុគន្ធា ដែលទើបតែធ្វើពិធីឡើងគេហដ្ឋានថ្មី បែរជាផ្ទុះរឿងក្ដៅក្រហាយយ៉ាងរសើប ដោយក្រៅពីត្រូវគេបោកលុយស្រស់ៗអស់800ដុល្លារ កាលពីថ្ងៃទី17 មេសា ក្ដៅៗ បងស្រីធម៌ដែលនាងស្រលាញ់ស្ទើរលេប ក៏ក្លាយជាជនដែលត្រូវយកឈ្មោះទៅបោកអ្នកដទៃយ៉ាងគួរឱ្យបារម្ភផងដែរ។

នាងថាខ្លួនទើបតែភ្ញាក់ច្រង៉ាងនៅពេលខលសួរបងស្រីហើយត្រូវបងស្រីឈ្មោះ លាង ហ៊ុយ ដែលត្រូវគេយករូបមកធ្វើគណនីហ្វេសប៊ុកឈ្មោះគន្ធាដើម្បីបន្លំ ប្រកែកថាមិនមានគណនីនោះទេ និងថាក្រៅពីបោករូបនាងអស់800ដុល្លារហើយ អ្នកផ្សេងក៏ត្រូវអ្នកបន្លំដោយយករូបបងស្រីធ៌របស់នាងនេះ ទៅបោកលុយគេបែបនេះដូចគ្នាផងដែរ។

មូលហេតុដែលនាំឱ្យមានរឿងចាញ់បោកប្រាក់800ដុល្លារនៅមួយថ្ងៃក្រោយចូលឆ្នាំនេះ កញ្ញា វុទ្ធ សុគន្ធា ដែលត្រូវគេស្គាល់ថាជាតារាចម្រៀងឡើងកូដក្នុងក្រុមលោកយ៉ែម សំអូន ក្រុមលោកអេឡិច ចាន់ត្រា និងក្រុមលោកជេកស៍ម្ចាស់បទ”សេដ្ឋីស្រុកស្រែ”បញ្ជាក់ថា គឺនាងបានឃើញគណនីហ្វេសប៊ុកដាក់រូបបងស្រីធម៌របស់នាងហើយដាក់ឈ្មោះ គន្ធាលក់ទូរស័ព្ទ និងបង់រំលោះ ដោយនឹកស្មានថាបងស្រីធម៌របស់នាងបង្កើតគណនីហ្វេសប៊ុកថ្មីផ្សេងទៀតAdd មក ហើយនាងក៍Comfirm យកមិននឹកថាគេយករូបបងស្រីធម៍របស់នាងបន្លំឡើយ។

កញ្ញារៀបរាប់ទៀតថា ម្ចាស់គណនីថ្មីនេះរមែងឆាតសួរសុខទុក្ខចុះឡើងៗ ប្រៀបដូចជាបងស្រីធម៌របស់នាងកន្លងមកអុឺចឹង ហើយដោយសារតែនាងអត់គិតស្មានថា មានមនុស្សយករូបបងស្រីធម៍របស់នាងមកបង្កើតគណនីហ្វេសប៊ុកក្លែងក្លាយបែបនឹងផង ទើបនាងចេះតែឆ្លងឆ្លើយជាមួយ ហើយក៏សួរនាំពីមុខរបរលក់ទូរស័ព្ទនៅខេត្តក្រចេះចុះឡើងៗ ហើយម្ចាស់គណនីក្លែងក្លាយនោះក៍ឆាតចាក់បណ្ដោយប្រៀបដូចជាបងស្រីធម៌នាងមែនទែន។ នាងបន្ដថា នៅថ្ងៃទី17 មេសា ម្ចាស់ហ្វេសប៊ុកក្លែងក្លាយ ដែលយករូបបងស្រីធម៌របស់នាងមកធ្វើជា Profile នោះ បានឆាតខ្ចីលុយនាង800ដុល្លារ ហើយដោយសារតែនាង និងបងស្រីធម៌ក៏ធ្លាប់មានទៅវិញទៅមកនាងកន្លងមកផង ក៏ផ្ញើឱ្យភ្លាម ដោយមិនទាំងចាប់អារម្មណ៍ថា លេខដែលម្ចាស់ហ្វេសប៊ុកនោះតម្រូវឱ្យផ្ញើលុយទៅ គឺជាលេខមិនដែលស្គាល់ផង។ នាងថាស្រឡាំងកាំងយ៉ាងខ្លាំងនៅពេលគ្រាន់តែផ្ញើលុយឱ្យហើយ លេខដែលផ្ញើលុយនោះក៏ខលលេងចូល ហើយហ្វេសប៊ុកដែលដែលបានបន្លំធ្វើជាបងស្រីធម៌នាងនោះ ក៏ប្លក់ហ្វេសប៊ុកនាងចោលរកមើលមិនឃើញ។

តារាចម្រៀងស្រីវ័យក្មេងរូបនេះបានអះអាងថា នៅក្នុងពេលនេះម្ចាស់ហ្វេសប៊ុកក្លែងក្លាយមិនត្រឹមតែយករូបរបស់បងស្រីធម៌ខ្លួន ដើរបោកលុយនាងប៉ុណ្ណោះទេ ប៉ុន្តែក៏បោកអ្នកផ្សេងផងដែរ ខណៈដែលបងស្រីធម៌របស់នាងមិនដឹងរឿងទាំងនោះសោះ។ នាងទទូចឱ្យបងប្អូនអ្នកលេងហ្វេសប៑ុកប្រយ័ត្នប្រយែងលើករណីនេះ និងសូមប្រកាសថា បើឃើញអាក់ខោនឈ្មោះគន្ធាលក់ទូរស័ព្ទឬគណនីហ្វេសប៊ុកផ្សេងទៀត ដែលយករូបបងស្រីធម៌របស់នាងមកបន្លំខ្ចីលុយ សូមកុំជឿឱ្យសោះ។ នាងសង្ស័យថា អ្នកបោកលុយនាង ទំនងជាស្គាល់ទំនាក់ទំនងនិងដឹងរឿងរបស់បងស្រីធម៌របស់នាងដែលជាលក់ទូរស័ព្ទនៅខេត្តក្រចេះនោះច្បាស់ទើបរាល់ពេលឆាតមកគឺនិយាយត្រូវដងត្រូវផ្លែគ្នា ដែលហាក់ដូចជាសាមីខ្លួនមែនទែនឆាតលេងជាមួយនាង។ យ៉ាងណាមិញនាង និងបងស្រីធម៌ដែលជាម្ចាស់រូបឈ្មោះ លាងហ៑ុយ នៅក្រចេះ នៅមិនទាន់មានវិធានការចង់ដាក់បណ្ដឹងដើម្បីវែកមុខអ្នកបោកលុយ និងបន្លំធ្វើជាបងស្រីរបស់នាងដើម្បីបោកគេនោះទេដោយគ្រាន់តែប្រកាសជូនដំណឹងជាសាធារណៈជាមុនថា បើមានអាក់ខោនមួយនេះឆាតខ្ចីលុយគឺជាអាក់ខោនក្លែងក្លាយ និងស្នើឱ្យទូរស័ព្ទសួរសាមីខ្លួនសិនមុននឹងសម្រេចផ្ញើលុយឱ្យ កុំឱ្យចាញ់បោកអស់លុយកាក់ដូចគ្នា៕

April 20, 2019

OnePlus ត្រៀមចេញទូរស័ព្ទ 1លើក 3ស៊េរីតែម្ដងនៅឆ្នាំ2019

ថ្មីៗនេះ មានការលេចធ្លាយនូវរូបភាពជាច្រើនសន្លឹកពីគណនី @OnLeaks លើបណ្តាញសង្គម Twitter ដែលបានបង្ហាញព័ត៌មានយ៉ាងច្បាស់ៗថា OnePlus នឹងធ្វើកម្មវិធីប្រកាសជាផ្លូវការនៅថ្ងៃទី14 ខែឧសភា ឆ្នាំ2019។

OnePlus 7 មានអេក្រង់ 6.4អ៊ិញ រចនាម៉ូដរាងតំណក់ទឹក បង្កប់កាមេរ៉ាខាងមុខ ឯកាមេរ៉ាក្រោយ 3គ្រាប់ទំហំ 48មេហ្គាភិកសែល(ជាកាមេរ៉ាមេ) និងប្រើឈីបSnapdragon 855 SoC។

OnePlus 7 Pro មានអេក្រង់ 6.6អ៊ិញ បំពាក់អេក្រង់កោង កាមេរ៉ាមុខផុសឡើងជាប្រភេទ Pop-up មានកាមេរ៉ាក្រោយ 3គ្រាប់ (4MP+16MP+8MP) ដាក់លេនស៍ Telephoto+Ultra Wide+ Monochrome ប្រើឈីបSnapdragon 855 SoC។

OnePlus 7 Pro មានប្រព័ន្ធ 5G ប្រើឈីប (X50) Snapdragon 855 SoC ចំពោះលក្ខណសម្បត្តិផ្សេងទៀតនៅមិនទាន់ច្បាស់នៅឡើយទេ។

នេះបើតាមការសន្យាកន្លងមករបស់នាយកប្រតិបត្តិនៃក្រុមហ៊ុន OnePlus ផ្ទាល់ដែលធ្លាប់បានលើកឡើងថា ចំពោះតម្លៃជំនាន់ OnePlus 7 ធម្មតាអាចក្បែរ 600ដុល្លារ ប៉ុន្តែក៏មិនដល់ 1ពាន់លានដុល្លារដែរ៕

April 19, 2019

Facebook កំពុងសម្ងំបង្កើតបច្ចេកវិទ្យាសំឡេងដ៏ទំនើបមួយ

ក្រុមហ៊ុនបណ្ដាញសង្គមដ៏មានប្រជាប្រិយភាពជាងគេ Facebok ត្រូវបានគេទម្លាយឱ្យដឹងថា កំពុងសម្ងំបង្កើតបច្ចេកវិទ្យាជំនួយការសំឡេង( AI digital voice assistant) ផ្ទាល់ខ្លួនមួយ។ មុខងារថ្មីនេះអាចនឹងចូលមកជំនួសឱ្យមុខងារសំឡេង M suggestions ដែលបានប្រកាសបិទកាលពីពេលដើមឆ្នាំ2018 ក្រោយពីមិនទទួលបានជោគជ័យ។ នេះយោងតាមសារព័ត៌មាន CNBC។

មុខងារសំឡេងឆ្លាតវៃនេះមិនទាន់ចេញជារូបរាងនៅឡើយទេ កំពុងស្ថិតក្នុងដំណាក់កាលអភិវឌ្ឍន៍ តែយ៉ាងណាមិញ វាអាចនឹងបង្កើតឡើងសម្រាប់ប្រើលើមុខងារជាច្រើនលើ Facebook ដូចជា Messenger និងចំណែកធំជាងគេ គឺលើ Facebook PORTAL និង Oculus products។

Facebook ក៏បានបញ្ជាក់ដែរថា មុខងារសំឡេងឆ្លាតវៃថ្មីនេះ វាជាទម្រង់មួយផ្សេង និងមិនមែនជាគូប្រជែងរបស់ Google Assistant ឬ Alexa នោះទេ៕

April 19, 2019

Category: សង្គម និងសេដ្ឋកិច្ច