សង្គម និងសេដ្ឋកិច្ច - La Reine Media

ការនាំចេញអង្ករទៅចិនកើនឡើងខ្លាំង ខណៈទៅអឺរ៉ុបធ្លាក់ចុះយ៉ាងគំហុកក្នុងត្រីមាសទី1ឆ្នាំនេះ

របាយការណ៍ពីលេខាធិការដ្ឋានច្រកចេញចូលតែមួយបានបង្ហាញថា បរិមាណអង្ករកម្ពុជាដែលបាននាំចេញនៅត្រីមាសទី1ឆ្នាំនេះកើនឡើង 6ភាគរយ បើធៀបនឹងរយៈពេលដូចគ្នាកាលពីឆ្នាំ2018។

ចាប់ពីខែមករា ដល់ខែមីនាឆ្នាំ2019 បរិមាណអង្ករកម្ពុជាដែលបាននាំចេញមានចំនួនជាង 17ម៉ឺនតោន កើនឡើង 6ភាគរយ ពោលគឺកើនពីចំនួនជាង 16ម៉ឺនតោនកាលពីត្រីមាសទី1 នៅឆ្នាំ2018។ នេះបើយោងតាមរបាយការណ៍ចុងក្រោយនេះ។

របាយការណ៍ដដែលបង្ហាញទៀតថា ការនាំចេញអង្កររបស់កម្ពុជាទៅកាន់សហគមន៍អឺរ៉ុបមានការថយចុះច្រើនក្នុងរយៈពេល 3ខែឆ្នាំនេះ ពោលគឺធ្លាក់ចុះ 32ភាគរយ មកនៅត្រឹម 51,552តោន បើធៀបនឹងរយៈពេលដូចគ្នាកាលពីត្រីមាសទី1 ឆ្នាំ2018ដែលមានចំនួនដល់ទៅ 76,762តោន។

ដោយឡែកគេសង្កេតឃើញថា ការនាំចេញអង្ករកម្ពុជាទៅកាន់ទីផ្សារចិនកើនឡើងច្រើនពីចំនួន 41,412តោននៅក្នុងត្រីមាសទី1 ឆ្នាំ2018 ដល់79,595តោននៅក្នុងត្រីមាសទី1 ឆ្នាំ2019 ពោលគឺកើនឡើង 73ភាគរយ។ ម្យ៉ាងវិញទៀត ការនាំចេញអង្ករពីកម្ពុជាទៅកាន់បណ្តាប្រទេសអាស៊ានក៏ កើនឡើងផងដែរ រួមមានប្រទេសប្រ៊ុយណេ ពីចំនួន 4,410តោននៅត្រីមាសទី1 ឆ្នាំ2018 រហូតដល់ 7,770តោននៅត្រីមាសទី1 ឆ្នាំ2019 នេះ។

ការធ្លាក់ចុះបរិមាណអង្ករកម្ពុជាដែលបាននាំចេញទៅកាន់អឺរ៉ុប ត្រូវបានក្រុមហ៊ុនអ្នកនាំចេញអង្ករក្នុងស្រុកលើកឡើងថា មកពីសហគមន៍អឺរ៉ុបសម្រេចដាក់វិធានការការពារ (Safeguard clause measure) ដោយដាក់ពន្ធនាំចូលអង្ករពីកម្ពុជាឡើងវិញ។

យោងតាមសេចក្តីប្រកាសរបស់សហគមន៍អឺរ៉ុបកាលពីដើមឆ្នាំនេះ សហគមន៍អឺរ៉ុបបានសម្រេចយកពន្ធនាំចូលអង្ករពីប្រទេសកម្ពុជាប្រមាណ 175អឺរ៉ូ (199.50ដុល្លារអាមេរិក)ក្នុងអង្ករ 1តោននៅឆ្នាំដំបូង(2019) បន្ទាប់មកអត្រាពន្ធគយនឹងធ្លាក់ចុះក្នុងចំនួន 150អឺរ៉ូនៅឆ្នាំទី2 ហើយនៅឆ្នាំទី3 អត្រាពន្ធគយលើអង្ករនាំចូលពីកម្ពុជា និងមីយ៉ាន់ម៉ានឹងធ្លាក់ចុះមកនៅត្រឹម 125អឺរ៉ូ។

លោក ចាន់ ពេជ្រ ប្រធានគ្រប់គ្រងទូទៅនៃក្រុមហ៊ុន Signatures of Asia បានថ្លែងថា ការនាំចេញអង្ករពីក្រុមហ៊ុនរបស់លោកទៅកាន់សហគមន៍អឺរ៉ុបធ្លាក់ចុះជិត 50ភាគរយ ឬខែខ្លះរហូតដល់ 70ភាគរយនៅក្នុងត្រីមាសទី1 ឆ្នាំនេះ។

លោក ពេជ្រ បញ្ជាក់ថា៖“ការនាំចេញរបស់ក្រុមហ៊ុនរបស់ខ្ញុំទៅកាន់អឺរ៉ុបនៅត្រីមាសទី1 នេះមានតែ 3,349តោន ពោលគឺធ្លាក់ចុះជាង 40ភាគរយ បើធៀបនឹងត្រីមាសទី1 ឆ្នាំ2018 ដែលមានចំនួន 5,706តោន”។

លោកថា នៅក្នុងខែកុម្ភៈ និងខែមីនា ឆ្នាំ2019 នេះការនាំចេញអង្ករទៅកាន់អឺរ៉ុប ធ្លាក់ចុះខ្លាំងពីចំនួន 2,016តោន និង 1,982តោននៅឆ្នាំ2018 មកត្រឹម 629តោន និង843តោន តាមលំដាប់នៅឆ្នាំ2019 នេះ។

លោក ពេជ្រ បានបន្តទៀតថា៖“ការបញ្ជាទិញអង្ករពីអឺរ៉ុបមកកាន់ក្រុមហ៊ុនលោកមានការធ្លាក់ចុះប្រមាណពី50 ទៅ 70ភាគរយតាមខែនីមួយៗក្នុងឆ្នាំនេះ ទោះជាអឺរ៉ុបសម្រេចដាក់ពន្ធនាំចូលអង្ករពីកម្ពុជាក៏ពិតមែនក្តី តែប្រជាកសិករមិនបានរងការប៉ះពាល់នោះទេ ដោយពួកគាត់នៅរក្សាបានតម្លៃស្រូវជាធម្មតា”។ លោក ពេជ្រ បន្ថែមទៀតថា៖“ក្រោយពេល 3ឆ្នាំ ខ្ញុំអត់ច្បាស់ថាគេគិតរបៀបណានោះទេ គេបន្តទៀត ឬគេដាក់ចូលក្នុងប្រព័ន្ធធម្មតាវិញឬមួយយ៉ាងណាយើងមិនទាន់ដឹងទេ”។

លោក កាន់ គន្ធី អគ្គនាយករងក្រុមហ៊ុននាំចេញអង្ករ AmruRice បានថ្លែងថា ក្នុងរយៈពេល 3ខែឆ្នាំនេះ ក្រុមហ៊ុនលោកបាននាំអង្ករចេញ ប្រមាណ 11,370តោន បើប្រៀបធៀបទៅនឹង 8,634តោនក្នុងត្រីមាសទី ឆ្នាំ2018។ ក្នុងនោះការនាំចេញជាប្រភេទអង្ករក្រអូបប្រណីតដែលទីផ្សារសំខាន់ គឺ ចិន និងអូស្ត្រាលី Papua New Guinea និងទីផ្សារផ្សេងៗទៀត។

លោកបន្តថា៖“ការនាំចេញរបស់យើងជារួមមានការកើនឡើង ប៉ុន្តែការលក់អង្ករប្រភេទសរីរាង្គទៅកាន់អឺរ៉ុប គឺយើងមិនអាចលក់បានទៀតទេ ដោយសារអឺរ៉ុបបានដាក់វិធានការពារពាណិជ្ជកម្មរបស់ខ្លួនទៅលើការនាំចូលអង្ករពីកម្ពុជា”។

លោក គន្ធី បានឱ្យដឹងថា លោកមិនទាន់ដឹងថា តើក្រោយពេល 3ឆ្នាំហ្នឹង វាមានអ្វីកើតឡើងនោះទេ តែលោកថា កុំថាឡើយដល់ 3ឆ្នាំបើសូម្បីត្រឹមតែ1ឆ្នាំ ក៏អ្នកនាំចេញអង្ករបាត់បង់ទីផ្សារសឹងតែអស់ហើយនៅសហគមន៍អឺរ៉ុប។ |

លោក គន្ធី បានលើកឡើងថា៖“រឿង EU ជារឿងអយុត្តិធម៌ ខណៈពេលអឺរ៉ុបអត់ផលិតអង្ករក្រអូបនោះទេ បើគិតថា ប៉ះពាល់ វាគួរតែនិយាយទៅលើរឿងអង្ករស យើងអត់បានបាត់បង់ទីផ្សារទេ ប៉ុន្តែការនាំចេញទៅអឺរ៉ុបធ្លាក់ចុះច្រើន ដោយឡែកយើងបាននាំចេញទៅទីផ្សារផ្សេងៗ ដូចជាចិន អូស្ត្រាលី ប៉ាពួ នីវហ្គីណេ និងទីផ្សារផ្សេងៗទៀត ការនាំចេញរបស់ក្រុមហ៊ុនយើងមិនធ្លាក់ចុះក្នុងទំហំណាមួយនោះទេ ដោយសារយើងបានត្រៀម និងធ្វើពិពិធកម្មទីផ្សាររួចហើយ យើងកំពុងធ្វើការលើទីផ្សារផ្សេងៗទៀត ដូចជាទៅប្រទេសកាណាដា ជាដើម”។

អ្នកនាំពាក្យក្រសួងពាណិជ្ជកម្ម លោកឡុង កែមវិចិត្របានឱ្យដឹងថា ក្រសួងពាណិជ្ជកម្មបាននិងកំពុងពិភាក្សាជាមួយអ្នកជំនាញច្បាប់ ទៅលើច្បាប់របស់អង្គការពាណិជ្ជកម្មពិភពលោក និងច្បាប់អឺរ៉ុបដើម្បីកំណត់មធ្យោបាយដ៏ល្អបំផុតមួយសម្រាប់កម្ពុជាបន្តរកដំណោះស្រាយនៃវិធានការពាររបស់សហគមន៍អឺរ៉ុបមកលើអង្ករកម្ពុជា ដូច្នេះកម្ពុជារង់ចាំនូវការណែនាំបន្ថែមដើម្បីចាត់វិធានការទៅលើលិខិតរបស់ក្រសួង។

លោកបន្ថែមថា ការដាក់ពន្ធឡើងវិញរបស់អឺរ៉ុបលើការនាំចូលអង្ករកម្ពុជាទៅកាន់អឺរ៉ុបមានរយៈពេល 3ឆ្នាំ ហើយយោងតាមបទប្បញ្ញត្តិចេញដោយសហគមន៍អឺរ៉ុប វាត្រូវបានគេរំពឹងថា ពន្ធនេះនឹងត្រូវបញ្ចប់នៅចុងឆ្នាំទី3។

លោកបានបន្តថា ការដាក់ពន្ធនេះ មិនប៉ះពាល់កសិករខ្លាំងទេ ខណៈឆ្នាំនេះការនាំចេញអង្ករបានកើនឡើងល្មម ការដាក់វិធានការការពារគឺជាបញ្ហាបច្ចេកទេស និងច្បាប់ ដូច្នេះហើយយើងកំពុងតែវិភាគលើទិសដៅសក្តានុពលដូចជា មជ្ឈិមបូព៌ា និងអឺរ៉ុបខាងកើត។

ថ្មីៗនេះ រដ្ឋមន្ត្រីពាណិជ្ជកម្មកម្ពុជា ឯកឧត្តម ប៉ាន់ សូរស័ក្តិ បានជម្រាបអំពីសំណើរបស់កម្ពុជាទៅកាន់រដ្ឋមន្ត្រីសេដ្ឋកិច្ចអាស៊ាន និងក្រុមប្រឹក្សាធុរកិច្ចអាស៊ានក្នុងការស្នើសុំឱ្យមានសេចក្តីប្រកាសរួមអាស៊ានស្តីពីការដាក់វិធានការការពាររបស់សហភាពអឺរ៉ុបមកលើអង្ករ Indica កម្ពុជា ដែលធ្វើឱ្យប៉ះពាល់ដល់ការនាំចេញអង្កររបស់កម្ពុជា និងស្នើឱ្យប្រទេសជាសមាជិកអាស៊ានណែនាំស្ថានបេសកកម្មរបស់ខ្លួនប្រចាំអង្គការពាណិជ្ជកម្មពិភពលោកនៅទីក្រុងហ្សឺណែវ ប្រទេសស្វីស ដើម្បីចេញសេចក្តីប្រកាសគាំទ្រកម្ពុជា។ ឯកឧត្តមបន្តថា រដ្ឋមន្ត្រីសេដ្ឋកិច្ចអាស៊ានបានឯកភាព និងគាំទ្រសំណើរបស់កម្ពុជានេះ។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម។

យ៉ាងណាមិញ ដើម្បីជំរុញការនាំចេញអង្ករទៅកាន់ទីផ្សារអន្តរជាតិស្របតាមគោលនយោបាយរបស់រាជរដ្ឋាភិបាល និងពង្រឹងកិច្ចសហប្រតិបត្តិការពាណិជ្ជកម្មទ្វេភាគីកម្ពុជា និងចិន។ ក្រសួងពាណិជ្ជកម្មតាមរយៈក្រុមហ៊ុនហ្គ្រីនត្រេដ ដែលជាសេនាធិការបានធ្វើការពិភាក្សាជាមួយក្រុមហ៊ុន COFCO នៃសាធារណរដ្ឋប្រជាមានិតចិនកាលពីថ្ងៃទី12 ខែមេសា ឆ្នាំ2019 លើការរៀបចំអនុស្សរណៈនៃការយោគយល់គ្នាសម្រាប់ពាណិជ្ជកម្មទំនិញអង្ករកម្ពុជាចូលទៅកាន់ទីផ្សារប្រទេសចិន។

ជាក់ស្តែងភាគីទាំង2 បានឯកភាពគ្នាលើសេចក្តីព្រាងអនុស្សរណៈដើម្បីចុះហត្ថលេខានៅក្នុងវេទិកាកំពូលកិច្ចប្រជុំសហប្រតិបត្តិការអន្តរជាតិខ្សែក្រវាត់ និងផ្លូវ លើកទី2 នៅទីក្រុងប៉េកាំង ប្រទេសចិនដែលដឹកនាំដោយសម្តេចនាយករដ្ឋមន្ត្រី ហ៊ុន សែន។ ;

ក្នុងនោះខ្លឹមសារនៃអនុស្សរណៈយោគយល់នោះ ភាគីចិនយល់ព្រមទិញអង្ករផ្កាម្លិះ ;អង្ករក្រអូបអង្ករស និងចុងអង្កររបស់ប្រទេសកម្ពុជាក្នុងបរិមាណ40ម៉ឺនតោន ចាប់ពីខែសីហា ឆ្នាំ2019 រហូតដល់ចុងខែធ្នូ ឆ្នាំ2020។

អនុស្សរណៈយោគយល់គ្នានឹងចូលជាធរមានភ្លាមៗបន្ទាប់ពីភាគីទាំង2 អនុវត្តបញ្ចប់ដោយជោគជ័យនូវអនុស្សរណៈដំបូងដែលបានចុះហត្ថលេខាកាលពីថ្ងៃ11 ខែមករា ឆ្នាំ2018 ស្តីពីការនាំចូលអង្ករចំនួន 30ម៉ឺនតោន។ ; គូភាគីនឹងបង្កើតយន្តការត្រួតពិនិត្យធុរកិច្ចរួមដើម្បីតាមដានការអនុវត្តអនុស្សរណៈយោគយល់គ្នារៀងរាល់ត្រីមាស ដើម្បីដោះស្រាយបញ្ហាប្រឈមដែលអាចកើតឡើងជាយថាហេតុអំឡុងពេលអនុវត្តអនុស្សរណៈនៃការយោគយល់គ្នានេះ៕

May 6, 2019

តារាសម្ដែង គីម សាន ចេញសារបកស្រាយចំពោះឈុតក្នុងថ្ងៃកំណើត

តាមរយៈការចេញផ្សាយព័ត៌មាន គេឃើញថា គីម សាន ប្អូនប្រុសតារាសម្តែង ដេនី ក្វាន់ កំពុងត្រូវរងការរិះគន់ពីសំណាក់មហាជន និងជាពិសេសប្រតិកម្មពីសំណាក់ឯកឧត្តម នុត សវនា អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃ ករណីរឿងឈុតអាវរបស់លោកដែលបានស្លៀកនៅក្នុងពិធីខួបកំណើតកាលពីពេលថ្មីៗនេះ ដោយមានសញ្ញាសក្តិ របស់ស្ថាប័នទំនាក់ទំនងរដ្ឋសភា សម្រាប់ចូលរួមក្នុងព្រះរាជពិធីរបស់ព្រះករុណា។

ឯកឧត្តម នុត សវនា អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃ បានបង្ហោះសារនៅលើបណ្ដាញសង្គមហ្វេសប៊ុកប្រតិកម្មនឹងការប្រើប្រាស់ឈុតអាវរបស់លោក គីម សាន ប្អូនប្រុសតារាសម្តែង ដេនី ក្វាន់ ដែលបានស្លៀកនៅក្នុងពិធីខួបកំណើតកាលពីពេលថ្មីៗនេះ ដោយមានសញ្ញាសក្តិ របស់ស្ថាប័នទំនាក់ទំនងរដ្ឋសភា សម្រាប់ចូលរួមក្នុងព្រះរាជពិធីរបស់ព្រះករុណា។

ដោយឯកឧត្តម នុត សវនា បានសរសេររៀបរាប់យ៉ាងដូច្នេះថា៖ “ការប្រើប្រាស់ សញ្ញាសក្តិ និងឯកសណ្ឋាន របស់ស្ថាប័នសាធារណៈ សុទ្ធតែត្រូវបានកំណត់ដោយព្រះរាជក្រឹត្យ (លើកលែងតែសន្តិសុខខណ្ឌ ដែលជាកម្រិត មូលដ្ឋាន)។ ជាក់ស្តែង បើខ្ញុំមិនច្រលំទេ សញ្ញាសក្តិ និងស្លាកសញ្ញា ដែលនាយប្រុញកំពុងឡង់សេនេះជាប្រភេទត្រូវបានដាក់ឲ្យប្រើជាមួយអាវស ខោស ដោយមន្ត្រីជាន់ខ្ពស់ ថ្នាក់វរមន្ត្រី ឬឧត្តមមន្ត្រី របស់ស្ថាប័នទំនាក់ទំនងរដ្ឋសភា ព្រិទ្ធសភា និងអធិការកិច្ច សម្រាប់ចូលរួមក្នុងព្រះរាជពិធីរបស់ព្រះករុណាជាអង្គម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា។ បើពាក់ថតកុន ឬថតសារអប់រំ យើងគួរប្រើឯកសណ្ឋានឲ្យបានត្រឹមត្រូវតាមច្បាប់កំណត់ តែបើយករបស់ផ្លូវការមកច្នៃតាមការរវើរវាយពេលពុលសារជាតិអ័រម៉ូន ឬបូថក់ វាអាចបង្កគ្រោះថ្នាក់ដល់ខ្លួន។ អញ្ចឹងហើយបានជាគេតែងតែទូន្មានថា “ពេលស្រវឹង សូមកុំបើកបរ”។

ខណៈនេះស្រាប់តែ លោក គីម សាន ក៏បានបកស្រាយថា ឈុតក្រហមដែលលោកពាក់នេះគឺលោកយកម៉ូតតាមបរទេសនោះទេ លោកក៏សុំអភ័យទោសប្រសិនបើឈុតដែលលោកពាក់មានការលើសលុប ប៉ះពាល់ដល់ស្ថាប័នណាមួយ។ ដោយលោក គីម សាន បានសរសេររៀបរាប់ថា៖ “ខ្ញុំបាទសូមបកស្រាយទៅលើឈុតដែលខ្ញុំបាទស្លៀកនេះនៅក្នុងថ្ងៃខួបកំណើតរបស់ខ្ញុំ ព្រោះឈុតមួយនេះខ្ញុំយកម៉ូតតាមបរទេសទេ មិនមែនឈុតធ្វើតាមមន្រ្តីជាន់ខ្ពស់នៅប្រទេសយើងឡើយ។ តែបើសិនជាមានរឿងអ្វីដែលខុសឆ្គងខ្ញុំបាទសូមអភ័យទោសទៅដល់បងៗដូចជាលោកពូឯកឧត្តម នុត សវនា ដែលបាទប្រតិកម្មទៅលើឈុតដែលខ្ញុំបាទស្លៀកនៅក្នុងថ្ងៃខួបកំណើតរបស់ខ្ញុំ ដើម្បីអោយខ្ញុំបាទកាន់តែយល់ដឹងព្រោះនេះខ្ញុំបាទមិនបានលួចម៉ូតរឺកែច្នៃយកម៉ូតតាមមន្រ្តីជាន់ខ្ពស់នៅប្រទេសយើងទេ។ ខ្ញុំបាទសូមអភ័យទោសក្នុងការប្រើប្រាស់សញ្ញាស័ក្តិដោយអចេតនានៅក្នុងថ្ងៃខួបកំណើតរបស់ខ្ញុំបាទ ដោយខ្ញុំបាទ បានឃើញម៉ូតខាងបរទេសប្លែកហើយស្អាតខ្ញុំបាទក៏កាត់និងកែច្នៃតែម្តងទៅ។ តែបេីសិនជាមានរឿងអ្វីដែរលើសលុបនិងប៉ះពាល់ទៅដល់ស្ថាប័ននិងខាងបងៗធ្វើការផ្នែកអ្វីមួយដោយខ្ញុំបាទពុំសូវយល់ដឹងច្បាស់ខ្ញុំបាទសូមអភ័យទោសដោយក្តីគោរពពីខ្ញុំបាទ គឹមសាន ផង”៕

May 6, 2019

CSX បានដាក់ឱ្យដំណើរការ ប្រព័ន្ធជួញដូរចល័ត MTS

ប្រព័ន្ធជួញដូរចល័ត(Mobile Trading System –MTS) ត្រូវបានផ្សារមូលបត្រកម្ពុជា CSX រៀបចំពិធីសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី5 ខែឧសភា ឆ្នាំ2019 ក្រោមអធិបតីភាព ឯកឧត្ដមរដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងឯកអគ្គរដ្ឋទូតស្តីទីនៃស្ថានទូតសាធារណរដ្ឋកូរ៉េ ប្រចំាកម្ពុជា។

គោលបំណងនៃការបើកដំណើរការ ប្រព័ន្ធជួញដូរចល័ត (MTS web-based system) នេះ ដើម្បីបង្កើនភាពងាយស្រួលសម្រាប់វិនិយោគិន និងលើកទឹកចិត្តឱ្យពួកគេធ្វើការជួញដូរបន្ថែមទៀតនៅលើទីផ្សារ។ ប្រព័ន្ធជួញដូរចល័ត MTS នេះនឹងអនុញ្ញាតឱ្យវិនិយោគិនដាក់ការបញ្ជាទិញ ពិនិត្យមើលព័ត៌មានភាគហ៊ុនផ្ទាល់ខ្លួនរបស់ពួកគេ ឬលុបចោលការបញ្ជាទិញបានពីគ្រប់ទីកន្លែង និងគ្រប់ពេលវេលា។

ឯកឧត្តមបណ្ឌិត ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុបានថ្លែងថា៖«ការអភិវឌ្ឍទីផ្សារមូលធន គឺជាម៉ាស៊ីនស្នូលសម្រាប់កំណើនសេដ្ឋកិច្ចរបស់ពិភពលោក។ ទីផ្សារមូលបត្រមានសារៈសំខាន់ ជាពិសេសនៅក្នុងបណ្តាប្រទេសកំពុងអភិវឌ្ឍន៍ ពីព្រោះការបង្កើនមូលនិធិ តាមរយៈទីផ្សារមូលបត្រមានសារៈសំខាន់សម្រាប់កំណើនសេដ្ឋកិច្ចប្រកបដោយចីរភាព»។

ទោះបីជាមានការរីកចម្រើនយ៉ាងឆាប់រហ័សនៅក្នុងផ្នែកផ្សេងៗទៀតដូចជាធនាគារ និងមីក្រូហិរញ្ញវត្ថុក្តី ក៏នៅមានបញ្ហាមួយចំនួនត្រូវដោះស្រាយនៅពេលនេះ ដើម្បីទទួលបានសក្តានុពលពេញលេញនៃទីផ្សារមូលធននៅកម្ពុជារួមទាំងការកើនឡើងនៃទីផ្សារមូលបត្រដែរ។

ការទាក់ទាញ ក្រុមហ៊ុនបោះផ្សាយលក់មូលបត្រសាធារណៈ(IPOs) ពីអង្គភាពនានាទាំងផ្នែកសាធារណៈ និងឯកជន មានសារៈសំខាន់ ជាពិសេសសម្រាប់ការអភិវឌ្ឍទីផ្សារមូលបត្របន្ថែមទៀតនៅក្នុងប្រទេសកម្ពុជា។ នេះបើតាមការបញ្ជាក់របស់ឯកឧត្តមរដ្ឋលេខាធិការ។

ឯកឧត្តម ហ៊ាន សាហ៊ីប ក៏បានឱ្យដឹងដែរថា កម្មវិធីពិព័រណ៍ផ្សារភាគហ៊ុនកម្ពុជា My First Stock ឆ្នាំ2019នេះ ជាគំនិតផ្តួចផ្តើមដ៏ល្អរបស់ក្រុមហ៊ុនផ្សារមូលបត្រកម្ពុជា ក្នុងការលើកកម្ពស់ការ យល់ដឹង និងជំរុញការសិក្សាស្វែងយល់អំពីកាលានុវត្តភាពនៃការវិនិយោគក្នុងផ្សារភាគហ៊ុនកម្ពុជា ពីសំណាក់សាធារណជន។ ទន្ទឹមនេះការពង្រឹងតម្លាភាព ទំនុកចិត្ត និងភាពឤចប៉ាន់ប្រមាណបាន ជាកត្តាចាំបាច់ ដើម្បីអនុញ្ញាតឱ្យទីផ្សារមូលបត្រកម្ពុជាធ្វើដំណើរទៅមុខ និងអភិវឌ្ឍប្រកបដោយ និរន្តរភាព។

សូមបញ្ជាក់ថា ប្រព័ន្ធជួញដូរចល័ត MTS នេះ គឺជាកម្មវិធីមួយដែលបានចូលរួមចំណែកជួយ ពីខាងរដ្ឋាភិបាលកូរ៉េខាងត្បូង តាមរយៈKOICA ដែលជាកម្មវិធីជំនួយដំណាក់កាលទី2។ កូរ៉េ និង កម្ពុជាបានព្រមព្រៀងធ្វើការរួមគ្នាក្នុងការបង្កើតទីផ្សារមូលបត្រនៅកម្ពុជា 2ដំណាក់កាលរួចមកហើយ។ ដំណាក់កាលទី1 ចាប់ពីផ្តើមពីឆ្នាំ2007 ដល់ឆ្នាំ2009 ដោយមានហិរញ្ញប្បទានជាជំនួយឥតសំណង 1លាន 80ម៉ឺនដុល្លារអាមេរិក និងដំណាក់កាលទី2 ចាប់ពីឆ្នាំ2014 ដល់ឆ្នាំ2018 ដោយមានហិរញ្ញប្បទានជាជំនួយឥតសំណងចំនួន 2លាន 50ម៉ឺនដុល្លារអាមេរិក។

សាធារណរដ្ឋកូរ៉េតាមរយៈទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) បាន ជួយរាជរដ្ឋាភិបាលកម្ពុជាក្នុងការបង្កើតក្រុមហ៊ុនផ្សារមូលបត្រកម្ពុជា (ផ.ម.ក-CSX) ដែលបាន បើកឱ្យដំណើរការចាប់តាំងពីឆ្នាំ2012 ហើយបច្ចុប្បន្ននេះមានក្រុមហ៊ុនបាននិងកំពុងចុះបញ្ជីចំនួន 5 រួមមាន 1- រដ្ឋាករទឹកស្វយ័តក្រុងភ្នំពេញ(PWSA) 2- ហ្គ្រែនធ្វីន អ៊ីនធើណេសិនណល(ខេមបូឌា) ភីអិលស៊ី (GTI) 3- កំពង់ផែស្វយ័តភ្នំពេញ (PPAP) 4- ក្រុមហ៊ុនភ្នំពេញអេសអ៊ីហ្សិត (PPSP) និង 5-កំពង់ផែស្វយ័តក្រុងព្រះសីហនុ (PAS)។

តាំងពីឆ្នាំ2007មក KOICA បានជួយដល់ក្រុមហ៊ុនផ្សារមូលបត្រកម្ពុជា ក្នុងការទាក់ទាញ ដល់ក្រុមហ៊ុនបោះផ្សាយលក់មូលបត្រសាធារណៈ (IPOs) ហើយ KOICA បានឈានមុខគេ ក្នុង វិស័យហិរញ្ញវត្ថុនៅក្នុងប្រទេសកម្ពុជា។ គេរំពឹងថា វេទិកាពាណិជ្ជកម្មថ្មីនេះនឹងជួយបង្កើនសាច់ប្រាក់ងាយស្រួលក្នុងទីផ្សារមូលបត្ររបស់កម្ពុជា៕

May 6, 2019

ត្រីមាសទី1 ឆ្នាំ2019 ខុនដូចំនួន3 ត្រូវបានបញ្ចប់ការសាងសង់នឹងជំរុញកំណើនប្រមាណ7.69%

គម្រោងខុនដូចំនួន3 ត្រូវបានបញ្ចប់ការសាងសង់នៅត្រឹមត្រីមាសទី1 ឆ្នាំ2019 ដែលមានចំនួនសរុបរហូតដល់ 1,091យូនីត ធ្វើឱ្យមានការកើនឡើងប្រមាណ 7.69% ក្នុងការផ្គត់ផ្គង់ បើប្រៀបធៀបរយៈពេលដូចគ្នាកាលពីឆ្នាំកន្លងទៅ។ ដូច្នេះការផ្គត់ផ្គង់អគារការិយាល័យនៅក្នុងរាជធានីភ្នំពេញនៅតែបន្តកើនឡើង ស្របពេលដែលតម្រូវការនៅលើទីផ្សារក៏មានការកើនឡើងផងដែរ។ នេះបើយោងតាមរបាយការណ៍ដែលសិក្សា និងស្រាវជ្រាវដោយក្រុមហ៊ុន CBRE Cambodia។

ផ្អែកតាមរបាយការណ៍ដែលចេញដោយក្រុមហ៊ុន CBRE ដែលបានបង្ហាញឱ្យដឹងថា ខុនដូប្រភេទមធ្យមមានចំណែកទីផ្សារប្រមាណ 89.3នៃស្តុកដែលបានបញ្ចប់ការសាងសង់នៅក្នុងត្រីមាសទី1 ឆ្នាំនេះ ដែលក្នុងនោះមានគម្រោង Urban Loft ដែលមាន 182យូនីត និងគម្រោង The Skyline ដែលមាន 792យូនីត។

ក្នុងរបាយការណ៍បានបង្ហាញទៀតថា ខុនដូប្រភេទខ្ពស់ស្ថិតនៅក្នុងគម្រោង Embassy Cen tral ដែលក៏បានបញ្ចប់ការសាងសង់ក្នុងត្រីមាសនេះដែរ មានចំនួន117យូនីតដែលមានទីតាំងនៅក្នុងខណ្ឌចំការមនបានធ្វើឱ្យមានការកើនឡើងនូវការផ្គត់ផ្គង់ចំនួនខុនដូកម្រិតខ្ពស់សរុបប្រមាណ3.8%។

ដោយឡែក ចំពោះទីផ្សារខុនដូកម្រិតសមរម្យក៏មានគម្រោងនឹងត្រូវបញ្ចប់ផងដែរ ដូចជាគម្រោង Phnom Penh Star ដែលបានបន្ថែម 448យូនីតទៅក្នុងស្តុក សរុបស្មើនឹង 29%នៃការផ្គត់ផ្គង់ថ្មីនៅត្រឹមត្រីមាសទី1 ឆ្នាំ2019។ ជាមួយគ្នានេះ ប្រមាណ 51%នៃយូនីតដែលត្រូវបានបើកលក់នៅក្នុងត្រីមាសទី1 នេះ គឺមានទីតាំងនៅក្នុងខណ្ឌសែនសុខ រួមមានអគារទី1 នៃគម្រោង Romduol Cityគម្រោង The Seven Residence និងគម្រោង ថ្មមួយដុំ (Thmor Madom Condominium) ដែលមានចំនួនបន្ទប់សរុប 974យូនីត”។

មន្ត្រីស្រាវជ្រាវផ្នែកអចលនទ្រព្យរបស់ CBRE បានប្រាប់ឱ្យដឹងថា៖ “នៅក្នុងវិស័យខុនដូ មានការចាប់ផ្តើមបើកលក់បន្ទប់ខុនដូថ្មីៗចំនួន 5គម្រោងនៅក្នុងត្រីមាសទី1 នៃឆ្នាំនេះ ដែលក្នុងនោះមានចំនួន 4គម្រោងគឺជាខុនដូប្រភេទសមរម្យដែលបានបង្កើនការផ្គត់ផ្គង់ខុនដូប្រភេទនេះចំនួន 1,169យូនីត។

ចំពោះការផ្គត់ផ្គង់អគារការិយាល័យម្ចាស់ផ្សេងគ្នា ក៏មានការកើនឡើងផងដែរ ដោយសារតែមានការបញ្ចប់ការសាងសង់អគារ Diamond Twin Tower ដែលមានទីតាំងស្ថិតនៅម្ដុំកោះពេជ្រក្នុងខណ្ឌចំការមន។

ការដាក់ឱ្យដំណើរការ Diamond Twin Towerបានបន្ថែមប្រមាណ 19.812ម៉ែត្រការ៉េនៃការផ្គត់ផ្គង់អគារការិយាល័យសរុបកើនឡើង 45,3%។ នៅក្នុងត្រីមាសទី1នេះ ក៏មានការសម្ពោធបើកការដ្ឋានរបស់គម្រោងអគារ Chief Tower ដែលជាអគារការិយាល័យម្ចាស់ផ្សេងគ្នាកម្រិត B ដែលមានផ្ទៃក្រឡា 12.250 ម៉ែត្រការ៉េ និងត្រូវបានបញ្ចុះបឋមសិលាបើកការសាងសង់ក្នុងមីនា ឆ្នាំ2019កន្លងទៅនេះដែរ។

មន្ត្រីស្រាវជ្រាវរបស់ CBRE បានបន្តទៀតថា ពាក់ព័ន្ធទៅនឹងតម្លៃលក់ គឺមានការប្រែប្រួលតិចតួច ដោយទីផ្សារខុនដូកម្រិតខ្ពស់មានការកើនឡើងប្រមាណ 0.4% ហើយខុនដូប្រភេទសមរម្យមានការកើនឡើងប្រមាណ 0.5% ហើយតាមការព្យាករចំពោះតម្លៃដាក់លក់គិតជាមធ្យមទៅលើទីផ្សារខុនដូកម្រិតមធ្យមនឹងមានការថយចុះបន្ដិច ពោលគឺក្នុងតម្លៃ 2,562ដុល្លារក្នុងមួយម៉ែត្រការ៉េ មកនៅត្រឹម 2,559ដុល្លារក្នុងមួយម៉ែត្រការ៉េ។ ដោយឡែកចំពោះទីផ្សារនៃការជួលខុនដូកម្រិតខ្ពស់ និងមធ្យមនៅបន្តស្ថិរភាពដដែល ដោយអត្រាតម្លៃជួលខុនដូកម្រិតខ្ពស់បានកើនឡើងប្រមាណ 1% ចំណែកឯអត្រាការជួលខុនដូប្រភេទមធ្យមមិនមានការប្រែប្រួលនោះទេ៕

May 6, 2019

ភ្នំពេញ អេស អុី ហ្សិត ភីអិលស៊ី (ភីភីអេសភី) រំពឹងបានប្រាក់ចំណេញ 6.4 លានដុល្លារអាមេរិកនៅឆ្នាំនេះ

ប្រាក់ចំណេញសុទ្ធក្រោយពីបង់ពន្ធរួចរបស់ក្រុមហ៊ុន ភ្នំពេញ អេសអុីហ្សិត ភីអិលស៊ី (Phnom Penh SEZ ឬPPSEZ) ដែលជាក្រុមហ៊ុនចុះបញ្ជីលើផ្សារមូលបត្រកម្ពុជា (CSX) បានកើនឡើងប្រមាណជាង 72ភាគរយ ឬប្រមាណ 2,9លានដុល្លារអាមេរិកនៅចុងឆ្នាំ2018 បើធៀបទៅនឹងឆ្នាំ2017 មានតែ 1.68 លានដុល្លារអាមេរិកតែប៉ុណ្ណោះ។ ក្នុងនោះទ្រព្យសកម្មសរុបរបស់ក្រុមហ៊ុន ភ្នំពេញ អេសអុីហ្សិត ភីអិលស៊ី កើនឡើង 54ភាគរយ ឬ87លានដុល្លារអាមេរិក។

លោក Hiroshi Uematsu នាយកប្រតិបត្តិក្រុមហ៊ុន ភ្នំពេញ អេសអុីហ្សិត ភីអិលស៊ី បានថ្លែងនៅក្នុងកិច្ចប្រជុំមហាសន្និបាតភាគហ៊ុនិកប្រចាំឆ្នាំកាលពីថ្ងៃសុក្រទី26 ខែមេសានេះថា សម្ទុះដ៏រឹងមាំនៃកំណើននេះទំនងជានឹងមានបន្តនៅក្នុងការអនុវត្តនៅត្រីមាសទី1 ឆ្នាំ2019។

លោក Hiroshi ថ្លែងថា សម្រាប់ឆ្នាំ2019 នេះ ក្រុមហ៊ុនព្យាករថា ប្រាក់ចំណេញសរុបនឹងកើនឡើង ដល់ 14.7លានដុល្លារអាមេរិក ហើយប្រាក់ចំណេញសុទ្ធក្រោយពីបង់ពន្ធរួច យើងរំពឹងថា នឹងកើនឡើងដល់ 6.4លានដុល្លារអាមេរិក។

លោកបានបន្តថា៖“ក្នុងរយៈពេលជាង 3ឆ្នាំជាក្រុមហ៊ុនដែលបានចុះបញ្ជីក្នុងផ្សារមូលបត្រកម្ពុជា ប្រាក់ចំណេញថ្មីរបស់យើងបានកើនឡើងជាលំដាប់ ហើយយើងរំពឹងថានឹងរក្សានិន្នាការកំណើននេះបាន។ តាមរយៈកំណើននេះ យើងនឹងពង្រីកដីបន្ថែមទៀតក្នុងតំបន់សេដ្ឋកិច្ចពិសេសរបស់យើងហើយខិតខំធ្វើពិពិធកម្មអាជីវកម្មរបស់យើងដើម្បីឈានទៅរកប្រភពប្រាក់ចំណូលប្រកបដោយចីរភាព”។

លោក Hiroshi Uematsu បានឱ្យដឹងទៀតថា ក្រុមហ៊ុន ភ្នំពេញ អេសអុីហ្សិត ភីអិលស៊ីបានកំណត់គោលដៅមួយថានៅឆ្នាំ2023 ក្រុមហ៊ុននឹងបង្កើនប្រាក់ចំណូលដែលមិនមែនបានមកពីការលក់ដីឱ្យបានរហូតដល់ 50ភាគរយ។

លោកថា នាពេលបច្ចុប្បន្ននេះ ក្រុមហ៊ុន ភ្នំពេញ អេសអុីហ្សិត ភីអិលស៊ីបានកំពុងប្រតិបត្តិការតំបន់សេដ្ឋកិច្ចពិសេសមួយទៀតនៅខេត្តបន្ទាយមានជ័យក្រុងប៉ោយប៉ែត ដោយមានឈ្មោះថា តំបន់សេដ្ឋកិច្ចពិសេសប៉ោយប៉ែត ឬប៉ោយប៉ែត អេសអុីហ្សិត ដែលមានទំហំ 70ហិកតា បែងចែកជាមាន 2ដំណាក់កាលក្នុងការអភិវឌ្ឍ និងសាងសង់ដោយចំណាយទឹកប្រាក់ប្រមាណ 15លានដុល្លារក្នុងដំណាក់កាលទី1 នេះ។

លោក Hiroshi និយាយថា៖“យើងមើលឃើញពីសក្តានុពលពីការរីកលូតលាស់នៅប៉ោយប៉ែត ដោយឥឡូវយើងមានក្រុមហ៊ុនជប៉ុនមួយ ឈ្មោះថា Sumitronics បានចូលរួមជាមួយយើងហើយនៅប៉ោយប៉ែត ហើយនៅទីនោះយើងនឹងទាក់ទាញ និងស្វាគមន៍ឧស្សាហកម្មដែលមានតម្លៃបន្ថែមខ្ពស់”។

លោក Hiroshi បន្តថា៖“យើងមិនមានគោលបំណងដើម្បីធ្វើមូលដ្ឋានផលិតដ៏ធំនៅកម្ពុជាទេ យើងត្រូវតែបែងចែក ដោយសារតែប៉ោយប៉ែត អេសអុីហ្សិត នៅជាប់ព្រំដែនប្រទេសថៃ ដូច្នេះវាមានន័យថាមុខងារផលិតកម្មធំនៅថៃ ហើយសកម្មភាពផលិតកម្មផ្សេងទៀតអាចនឹងមាននៅទីនេះ(កម្ពុជា) វាជាផ្នែកមួយនៃបណ្តាញផលិតកម្ម ដែលជាផលិតផលកម្ពុជាអាចរួមបញ្ចូលជាមួយថៃ”។

លោក Hiroshi ថា ក្រុមហ៊ុន ភ្នំពេញ អេសអុីហ្សិតភីអិលស៊ី (ភីភីអេសភី) មានផែនការពង្រីកផ្ទៃដីចំនួន100ហិកតាបន្ថែមទៀតនៅភ្នំពេញ អេសអុីហ្សិត ភីអិលស៊ី ដោយឥឡូវយើងមាន 360ហិកតា ហើយ ភាគច្រើននៃផ្ទៃដី គឺជួលពេញរហូតដល់ 95ភាគរយដែលមានចំនួន 100រោងចក្រ ដែលភាគច្រើនជារោងចក្រកាត់ដេរ និងគ្រឿងអេឡិចត្រូនិកជាដើម។

លោកបន្តថា ក្រុមហ៊ុនភាគច្រើននៅក្នុងតំបន់សេដ្ឋកិច្ចពិសេសភ្នំពេញ គឺមកពីជប៉ុនប្រមាណជា 55ភាគរយ ហើយក្រៅពីនោះមានមកពីប្រទេសចិន តៃវ៉ាន់ ហុងកុង ថៃ វៀតណាម ម៉ាឡេស៊ី ហ្វីលីពិន និងមកពីប្រទេសផ្សេងៗទៀត៕

May 6, 2019

ទំនងលេងណាស់! ហ្គេម Angry Bird បច្ចេកវិទ្យា AR ទើបចេញថ្មី

ឥឡូវនេះហ្គេម Angry Bird AR វគ្គថ្មី យើងអាចទាញយកមកលេងជាផ្លូវការ និងឥតគិតថ្លៃបានហើយ សម្រាប់អ្នកប្រើប្រព័ន្ធប្រតិបត្តិ iOS។

យើងអាចលេងវាបានលើប្រព័ន្ធ iOS 11.0 ឬខ្ពស់ជាងនេះ ដោយអាចចុច Download ចេញពី App Store បាន។ ឆ្លងកាត់ការបង្កើតតាមរយៈបច្ចេកវិទ្យា ARKit របស់ Apple អនុញ្ញាតឱ្យអ្នកលេងអាចប្រើតួអង្គសត្វបក្សីណាមួយទាញបាញ់សម្លាប់ជ្រូកកំណាចពណ៌បៃតងក្នុងពិភពខាងក្រៅពិតៗក៏បាន ពោលគឺអ្នកអាចលេងបាន មិនថាតែលើតុ ឬនៅក្នុងទីតាំងណាមួយក៏ដោយ៕

សូមទស្សនាវីដេអូខាងក្រោម៖

May 6, 2019

តារាសម្ដែង ឈឹម អារីយ៉ា រៀបការជាមួយស្វាមីឯកឧត្តម ត្រៀមខ្លួនមើលថែមុខជំនួញធំៗ

តារាសម្ដែងស្រីល្បីឈ្មោះ ឈឹម អារីយ៉ា បានប្រកាសរៀបការកាលពីថ្ងៃទី 4 ខែឧសភា ឆ្នាំ 2019 នេះ និងបានប្រកាសថា អ្នកនាងគ្រោងនឹងផ្អែកពីសិល្បៈមួយរយៈសិន ព្រោះត្រូវការពេលវេលា សម្រាប់ស្វាមី និងគ្រួសារ។ (more…)

May 6, 2019

ការកែប្រែតម្លៃថ្មី លើការកំណត់មូលដ្ឋានគិតពន្ធប្រថាប់ត្រា ផ្តើមអនុវត្តនៅថ្ងៃទី1 ខែកក្កដា ឆ្នាំនេះ

នៅក្នុងការផ្សព្វផ្សាយពីការប្រមូលពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ពន្ធលើអចលនទ្រព្យ និងការត្រៀមអនុវត្តប្រកាសស្តីពី“ការកំណត់មូលដ្ឋានគិតពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ”ត្រូវបានធ្វើឡើងនៅឯកិច្ចប្រជុំរបស់អគ្គនាយកដ្ឋានពន្ធដារដោយមានស្ថាប័នពាក់ព័ន្ធ រួមទាំងសមាគមផ្នែកលំនៅដ្ឋាន និងសមាគមអចលនទ្រព្យចូលរួមផងដែរ។

ជាកិច្ចប្រជុំផ្សព្វផ្សាយមួយដ៏សំខាន់សម្រាប់ផ្នែកលំនៅដ្ឋាន សំណង់នៃវិស័យអចលនទ្រព្យបើទោះបីជាមានព័ត៌មានស្តីពីការបង់ពន្ធទៅលើអចលនទ្រព្យនៃការប្រមូលពន្ធប្រថាប់ត្រានេះមានតម្លៃ 4%កាលពីមួយរយៈកន្លងមកហើយក៏ដោយ ហើយការចង់ប្រមូលពន្ធឱ្យអស់លទ្ធភាពរបស់រដ្ឋាភិបាល និងការដែលរីកដុះដាលខាងវិស័យអចលនទ្រព្យកាលពី 10ឆ្នាំកន្លងមក ធ្វើឱ្យការគិតថា រដ្ឋាភិបាលនឹងដំឡើងពន្ធខ្ពស់ជាងមុន ដែលអាចធ្វើឱ្យម្ចាស់អចលនទ្រព្យ ឬអ្នកវិនិយោគហាក់នៅមានភាពមន្ទិលពីកាតព្វកិច្ចជាប់ពន្ធនេះ។

យោងទៅតាមការបកស្រាយ ការប្រមូលពន្ធត្រូវអនុវត្តចំពោះអចលនទ្រព្យនៅទូទាំងប្រទេសកម្ពុជា ដោយកំណត់យកពន្ធលើអចលនទ្រព្យទាំងឡាយដែលជាប់ពន្ធ ស្ថិតនៅតម្លៃដដែល ពោលគឺ តម្លៃប្រាក់ពន្ធអចលនទ្រព្យប្រចាំឆ្នាំនៅរក្សាតម្លៃដដែល។ រីឯតម្លៃមូលដ្ឋានគិតពន្ធប្រថាប់ត្រាផ្ទេរកម្មសិទ្ធិអចលនទ្រព្យទើបកែសម្រួលថ្មី ក៏មិនមែនជាការដំឡើងពន្ធដែរ។

ឯកឧត្តម កែន សម្បត្តិ អគ្គនាយករងនៃអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានថ្លែងបញ្ជាក់យ៉ាងច្បាស់ជូនប្រជាពលរដ្ឋ និងសាធារណជនថា៖“អំពីការកំណត់មូលដ្ឋានគិតពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យដែលទើបត្រូវកែសម្រួលថ្មីថាមិនមែនជាការដំឡើងពន្ធរបស់រាជរដ្ឋាភិបាលនោះទេ។ ការកែសម្រួលតម្លៃមូលដ្ឋានគិតពន្ធនេះក៏មិនបានជះឥទ្ធិពលដល់តម្លៃប្រាក់ពន្ធអចលនទ្រព្យប្រចាំឆ្នាំនោះដែរ ពោលគឺនៅរក្សាតម្លៃដដែល។ សម្រាប់ពន្ធអចលនទ្រព្យសម្រាប់ឆ្នាំ2019 នៅតែអនុវត្តជាធរមានមិនមានការប្រែប្រួលទេ គឺធ្លាប់បង់នៅឆ្នាំ2018 ប៉ុន្មាន គឺត្រូវបង់សម្រាប់ឆ្នាំ2019 ប៉ុណ្ណឹងដែរ”។

ឯកឧត្តម អគ្គនាយករងបានបញ្ជាក់ថា៖“តម្លៃអចលនទ្រព្យដែលជាមូលដ្ឋានគិតពន្ធប្រថាប់ត្រា ដែលកំណត់ក្នុងឧបសម្ព័ន្ធនៅតាមរាជធានីខេត្តគឺមានការចូលរួមពិភាក្សាយ៉ាងល្អិតល្អន់ ទាំងស្ថាប័នរដ្ឋ និងវិស័យជន ទើបសម្រេចចេញប្រកាស កាលពីថ្ងៃទី22 ខែមីនា ឆ្នាំ2019 ដោយក្រសួងសេដ្ឋកិច្ចដាក់ឱ្យអនុវត្តចាប់ពីថ្ងៃទី1 ខែកក្កដា ឆ្នាំ2019 តទៅ ស្តីពីការកំណត់មូលដ្ឋានគិតពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ”។

ឯកឧត្តម កែន សម្បត្តិ បានថ្លែងយ៉ាងដូច្នេះថា៖“បើសិនជាយើង មើលមិនបានគិតឱ្យគ្រប់ជ្រុងជ្រោយ អាចគិតថា ជាការដំឡើងពន្ធនៅក្នុងការកំណត់ឧបសម្ព័ន្ធថ្មីសម្រាប់តម្លៃអចលនទ្រព្យកំណត់ថ្មីជាមូលដ្ឋានគិតពន្ធប្រថាប់ត្រា។ ប៉ុន្តែជាគោលការណ៍ រាជរដ្ឋាភិបាលមិនមានដំឡើងពន្ធទេ សម្តេចតេជោ លោកបានមានប្រសាសន៍ហើយថា រាជរដ្ឋាភិបាលគ្មានការដំឡើងពន្ធទេ គឺមានតែយកពន្ធឱ្យអស់សក្តានុពលទៅ យើងនឹងទទួលបានពន្ធច្រើនមិនខាន។ ដោយសារការកំណត់តម្លៃពន្ធនេះ យើងកំណត់តាំងពីឆ្នាំ2010 ដែលមកដល់តម្លៃបច្ចុប្បន្ន វាខុសគ្នាឆ្ងាយណាស់ យើងគ្រាន់តែធ្វើបច្ចុប្បន្នភាពស្តីពីភូមិសាស្ត្រ និងតម្លៃអចលនទ្រព្យប៉ុណ្ណោះ អត្រាពន្ធនៅ 4%ដដែលយើងអត់មានដំឡើងពន្ធអីទេ”។

ឯកឧត្តម កែន សម្បត្តិ បានបញ្ជាក់ឱ្យដឹងដែរថា៖“នៅឆ្នាំ2018 នៅរាជធានីភ្នំពេញ ចំណូលពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យមានចំនួនប្រមាណ 388ប៊ីលានរៀល(ប្រមាណ 97លានដុល្លារ) លើចំនួនអចលនទ្រព្យប្រមាណ 55600មូលដ្ឋាន ស្មើនឹង 134.4%នៃផែនការ។ ដោយឡែកសម្រាប់រយៈពេល 3ខែដើមឆ្នាំ2019 ការប្រមូលចំណូលពន្ធនេះមានចំនួនប្រមាណ 96ប៊ីលានរៀល(ប្រមាណ 24លានដុល្លារ) លើចំនួនអចលនទ្រព្យប្រមាណ 20500មូលដ្ឋាន ស្មើនឹង 33.6% នៃផែនការ”។

អគ្គនាយកដ្ឋានពន្ធដារក៏បានថ្លែងទៀតដែរថា៖“ខ្ញុំរំពឹងថា នៅពេលដែលអនុវត្តការកំណត់មូលដ្ឋានគិតពន្ធប្រថាប់ត្រាថ្មីនឹងធ្វើឱ្យចំណូលពន្ធប្រថាប់ត្រាមានការកើនឡើងខ្ពស់ជាងបណ្តាឆ្នាំមុនៗ ដែលជាការស្របទៅនឹងគោលនយោបាយប្រមូលពន្ធឱ្យអស់សក្តានុពល ដើម្បីកៀរគរថវិកាចូលរួមអភិវឌ្ឍន៍ប្រទេសជាតិ”។

លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជាបានកោតសរសើរចំពោះការដឹកនាំរបស់លោក គង់ វិបុល(អគ្គនាយកនៃអគ្គនាយកដ្ឋានពន្ធដារ)ដែលតែងតែទទួលយកនូវធាតុចូលពីវិស័យឯកជន និងបានដោះស្រាយនូវបញ្ហានានាពាក់ព័ន្ធនឹងពន្ធដារដើម្បីធ្វើការកំណែទម្រង់អគ្គនាយកដ្ឋានឱ្យកាន់តែប្រសើរឡើង ហើយសមាគមរបស់លោកបានត្រៀមខ្លួនជាស្រេចក្នុងការផ្តល់កិច្ចសហការជាមួយអគ្គនាយកដ្ឋានពន្ធដារ។

លោកឧកញ៉ាបានបញ្ជាក់ថា៖ “នេះគ្រាន់តែជាការប្រកាសផ្សព្វផ្សាយ ដូច្នេះវាមិនមែនចាប់ផ្តើមផ្សព្វផ្សាយភ្លាម អនុវត្តភ្លាមៗទេ រដ្ឋនឹងទុកពេលឱ្យមុនចាប់ផ្តើមអនុវត្តប្រកាសនេះ ហើយអ្វីដែលរដ្ឋាភិបាលបានកំណត់ ក៏យើងបានពិភាក្សាច្រើនហើយ។ បញ្ហានេះប្រសិនបើមានការដំឡើងថ្លៃនៃការបង់ពន្ធយើងមិនអាចចេះតែសុំទាមទារបញ្ចុះនោះទេ ត្រូវតែពិនិត្យលើទិដ្ឋភាពជាក់ស្តែង ថាតើតំបន់ណាដែលមានភាពមិនត្រឹមត្រូវ យើងត្រូវជជែកគ្នាទៀត”។

លោកឧកញ៉ា លី ហួរ ក៏បានបញ្ជាក់ទៀតដែរថា៖“នៅក្នុងធ្វើបច្ចុប្បន្នភាពស្តីពីភូមិសាស្ត្រ និងតម្លៃអចលនទ្រព្យទៅលើការកំណត់មូលដ្ឋានគិតពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ វាមិនប៉ះពាល់ដល់តម្លៃទីផ្សារដីធ្លី និងអចលនទ្រព្យរបស់យើងទេ គឺកំណត់ទៅលើយកពន្ធឱ្យស្របនឹងតម្លៃបច្ចុប្បន្ន”។

លោកឧកញ៉ាបានបន្ថែមទៀតថា៖“រដ្ឋាភិបាលត្រូវការប្រមូលពន្ធឱ្យបានច្រើនជាងមុន ដែលតម្លៃកាលមុនយើងបានកំណត់យូរហើយ វាមានតម្លៃទាប។ ឥឡូវអចលនទ្រព្យមានតម្លៃខ្ពស់ រដ្ឋាភិបាលក៏ត្រូវកំណត់តម្លៃទៅតាមទីផ្សារជាក់ស្តែង។ ដូច្នេះវាប៉ះពាល់តែរឿងពន្ធ ហើយកំណើនពន្ធនឹងកើនឡើង វាមិនប៉ះពាល់ដល់តម្លៃដីធ្លី និងអចលនទ្រព្យទេ វាពាក់ព័ន្ធតែផ្នែកប្រមូលពន្ធប៉ុណ្ណោះ”។

ជាមួយគ្នានេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានថ្លែងគូសបញ្ជាក់ពីការត្រៀមលក្ខណៈក្នុងការផ្ដល់កិច្ចសហការជាមួយអគ្គនាយកដ្ឋានពន្ធដារក្នុងការផ្សព្វផ្សាយនូវប្រកាសលេខ343 សហក.ប្រកចុះថ្ងៃទី22 ខែមីនា ឆ្នាំ2019នេះ និងអរគុណដល់អគ្គនាយករងពន្ធដារដែលបានរៀបចំកិច្ចប្រជុំដ៏មានសារៈប្រយោជន៍នេះឡើង។

លោក ច្រឹក សុខនីម បានមានប្រសាសន៍ថា ទោះជាមានការព្រួយបារម្ភខ្លះៗក្តីក៏ជាការប្រកាសឱ្យអនុវត្តនូវការកំណត់ពន្ធប្រថាប់ត្រានេះ មិនអាចកែប្រែអ្វីបានទេ។ លោកថា យើងនឹងរង់ចាំមើលថា តើអាចមានបញ្ហាដែលនឹងលេចចេញនៅពេលអនុវត្ត តែក្តីបារម្ភនោះលោកអគ្គនាយករងពន្ធដារក៏បានលើកឡើងពីការកំណត់ពន្ធនោះក្នុងអង្គប្រជុំរួចហើយ គឺការកំណត់ពន្ធរដ្ឋាភិបាលបានយកតម្លៃត្រឹមតែ70% ឬ60% នៃតម្លៃទីផ្សារប៉ុណ្ណោះ ហើយកន្លែងខ្លះក៏មានតម្លៃមិនដល់50%ផង៕

May 4, 2019

ពន្លកត្រួយថ្មី!! ខេង សម្ជស្ស «ទោះខ្ញុំទៅជាអ្វីសម្រាប់បងស្រី ចន ច័ន្ទលក្ខិណា ជាអ្នកមានគុណជានិច្ច»

ពិតជាការភ្ញាក់ផ្អើលគេឃើញអ្នកនាង ចន ច័ន្ទលក្ខិណា ស្រាប់តែងាកមកជួយយិតយោងតារាចម្រៀងស្រីថ្មីម្នាក់ដើរទៅណាមកណាយកទៅជាមួយ។ អ្វីដែលប្លែកតារាពន្លកថ្មីរូបនេះកាន់តែមានចំណូលចិត្តដល់ ចន ច័ន្ទលក្ខិណា រហូតបង្ហោះឱ្យគេដឹងលើបណ្តាញសង្គមផ្ទាល់ខ្លួននឹងផ្តាំមហាជនជួយគាំទ្រស្នាដៃសិល្បៈដែលទើបតែដុះពន្លកត្រួយ។

មិនដឹងថាពន្លកតារាថ្មី ខេង សម្ជស្ស មានសមត្ថភាពបែបណាឡើយទើបបានជាអាចបន្ទន់ចិត្តអ្នកនាង ចន ច័ន្ទលក្ខិណា រហូតធ្វើឲតារារៀមច្បងរូបនេះប្រកូកប្រកាសឲមហាជនបានដឹងនិងថែមទាំងបានជួយវែកផ្លូវដើរលើវិថីសិល្បៈទៀតផង។ មានតម្រុយឱ្យដឹងថាតារាចម្រៀង ខេង សម្ជស្ស មានប្រភពមកពីខេត្តបន្ទាយមានជ័យគឺជាក្មេងស្រីម្នាក់តស៊ូដើម្បីជីវភាពនាងសុខចិត្តធ្វើការងារហើយដើរសុំគេច្រៀងគ្រប់កន្លែងឱ្យតែរស់និងបានប្រាក់ជួយម្តាយ។

គេស្រាប់តែឃើញនៅលើបណ្តាញសង្គមរបស់អ្នកនាង ចន ច័ន្ទលក្ខិណា បានសរសេរថា«Promote តារាចំរៀងថ្មីម្តង គាត់ក្រ កំសត់ លំបាក ហើយស្លូត អ្នកចំរៀងថ្មីក្នុងផលិតកម្មថ្មីរបស់ខ្ញុំ គ្រាន់រើសយកគាត់ភ្លាមគ្នារំភើបឡើងយំ ហើយរត់ទៅជួបឪពុកម្តាយនៅស្រុក យំឱបគ្នាទាំងម្តាយទាំងកូន ហើយលាឪពុកម្តាយមកនៅទីក្រុងឱ្យពេញលេញខ្ញុំរើសយកអ្នកក្រ អ្នកកំសត់ អ្នកលំបាក ឱ្យមានអនាគតល្អដូចអ្នកសិល្បៈល្បីៗផ្សេងទៀតដើម្បីចូលរួមចំណែកកាត់បន្ថយភាពក្រីក្ររបស់ប្រជាជនយើង ។ សូមបងប្អូនជួយគាំទ្រគាត់ផង 🙏🏻🙏🏻🙏🏻 ខេង សម្ផស្សបើគាត់ច្រៀងខុសទាស់អ្វីសូមកុំប្រកាន់គាត់ គាត់នៅខ្ចីណាស់ ទាំងការរៀបចំខ្លួន ទាំងការរៀបចំអត្តចរិតក្នុងសង្គម»។

នៅលើបណ្តាញសង្គមរបស់ សម្ជស្ស វិញបានសរសេរសាកម្សត់តបវិញថា «ខ្ញុំ ក្រ😢ខ្ញុំលំបាក ខ្ញុំជាក្មេងកំព្រា😢ខ្ញុំខ្វះភាគកក់ក្ដៅ😭 ខ្ញុំខ្វះអ្នកផ្ដាល់កំល្លាំងចិត្ត 😢តែបង ចន ច័ន្ទ នៅតែផ្ដាល់ទាំងកាងាទាំងភាពកក់ក្ដៅទាំងកំល្លាំងចិត្តឱ្យប្អូនតស៊ូឡើងទើបជោគជ័យទាំងដែលខ្ញុំកំពុងតែបាក់ទឹកចិត្តស្ទើតែបោះបង់ចោលឲកាសនេះ មូលហេតុនេះហើយ ទើបខ្ញុំផុសថា នេះជាកាយល់សបិ្តឬក៏ជាកាពិត នាងខ្ញុំ ខេង សម្ផស្ស សុំប្រាប់ថា មិនថាពេលនេះខ្ញុំនៅជាអ្វី ឬពេលក្រោយខ្ញុំក្លាយជាអ្វី ក៏ ខ្ញុំនៅតែ និយាយថា បង ចន ច័នលក្ខណា ជាអ្នកមានគុណរបស់ខ្ញុំជានិច្ច អរគុណគ្រប់យ៉ាងអ្នកមានគុណ»៕

ខេង សម្ជស្ស បានឱ្យដឹងថានាងដូចបានត្រូវរង្វាន់ធំក្រោយពេលដឹងថា បងស្រីចន ច័ន្ទលក្ខិណា រើសយកនាងឱ្យចូលច្រៀងក្នុងផលិតកម្មរបស់គាត់ដោយគាត់អាណិតស្រឡាញ់។ ខ្ញុំចាត់ទុកគាត់ជាអ្នកមានគុណដែលតម្រង់ផ្លូវចូលមកកាន់សិល្បៈក្នុងពេលដែលនាងខំសុំគេដើរច្រៀងតាមហាងយ៉ាងលំបាក។ នាងអររហូតរត់ទៅប្រាបម្តាយអររំភើបយំដោយមិននឹកស្មានថាមានឱកាសបានដូចគេ។ នាងនឹងព្យាយាមដុះខាត់សមត្ថភាពឱ្យប្រសើរដើម្បីពង្រឹងស្នាដៃក្នុងផលិតកម្មថ្មីរបស់បងស្រី ចន ច័ន្ទលក្ខិណា ដែលរមែងលើកស្ទួយអ្នកសិល្បៈអត់ៗលំបាកឱ្យមានអនាគត៕

May 4, 2019

ធនាគារពិភពលោក៖ កំណើនសេដ្ឋកិច្ចកម្ពុជានឹងធ្លាក់មកនៅត្រឹម 7%

ធនាគារពិភពលោក World Bank បានឱ្យដឹងនៅក្នុងរបាយការណ៍សេដ្ឋកិច្ចអាស៊ីអាគ្នេយ៍ របស់ខ្លួនថា នៅឆ្នាំ2019 នេះ សេដ្ឋកិច្ចរបស់កម្ពុជានឹងថយចុះមកនៅត្រឹម 7% ធ្លាក់ចុះពី 7.5%កាលពីឆ្នាំ2018។ ក្រុមការងារធនាគារពិភពលោក (World Bank Group) បានបញ្ជាក់នៅក្នុងរបាយការណ៍នេះថា ការធ្លាក់ចុះនេះ គឺជាលទ្ធផលនៃការព្រួយបារម្ភទាក់ទងនឹងតម្លៃថាមពលខ្ពស់ និងការចំណាយដឹកជញ្ជូននៅក្នុងប្រទេស រួមជាមួយការព្រួយបារម្ភជុំវិញកម្លាំងពលកម្មគ្មានជំនាញ។

ទស្សនវិស័យយូរអង្វែងរបស់ប្រទេសកម្ពុជាពឹងផ្អែកលើសមត្ថភាពរបស់ប្រទេសក្នុងការយកលំហូរចូលវិនិយោគទុនដោយផ្ទាល់ពីបរទេស (FDI) ខណៈកំពុងជំរុញការវិនិយោគក្នុងស្រុក។តម្លៃថាមពល និងការដឹកជញ្ជូនដែលមានតម្លៃថោក កម្លាំងពលកម្មដែលមានជំនាញ និងការផ្សារភ្ជាប់គ្នារវាងខ្សែចង្វាក់ផ្គត់ផ្គង់នឹងមានសារៈសំខាន់ដើម្បីរក្សាការប្រកួតប្រជែង។

ការថមថយអានុភាពនៃកំណើនសេដ្ឋកិច្ចកម្ពុជានៅឆ្នាំ2019 ដល់ឆ្នាំ2021 ត្រូវបានធនាគារពិភពលោកភ្ជាប់ទៅនឹងទីផ្សារសហភាពអឺរ៉ុប។ សហភាពអឺរ៉ុបដែលបានប្រកាសព្យូរជាបណ្តោះ អាសន្ននូវភាពអនុគ្រោះពន្ធសម្រាប់កម្ពុជាលើគ្រប់មុខទំនិញ ឬ Everything-but-arms EBA។ របាយការណ៍ដដែលបានឱ្យដឹងថា៖ “ការបាត់បង់ចំណូលពី EBA ដែលបច្ចុប្បន្នផ្តល់ឱ្យប្រទេសកម្ពុជានូវការមិនបង់ពន្ធនឹងមិនមានកូតាពីសហភាពអឺរ៉ុបអាចនាំឱ្យមានកំណើននាំចេញយឺត”។ បើតាមធនាគារពិភពលោកទីផ្សារសហភាពអឺរ៉ុបបានរួមចំណែកជាង 1ភាគ3 នៃមុខទំនិញនាំចេញសំខាន់ៗរបស់កម្ពុជាដែលមានសម្លៀកបំពាក់ ស្បែកជើង និងទោចក្រយានយន្ត។ អាស្រ័យហេតុនេះការបាត់បង់ភាពអនុគ្រោះ EBA ទំនងជាអាចធ្វើឱ្យកំណើននៃការនាំចេញថយល្បឿនមកវិញ។

ម្យ៉ាងទៀតការថមថយនៃកំណើនសេដ្ឋកិច្ចកម្ពុជាត្រូវបានធនាគារពិភពលោកអះអាងថា ដោយសារតែកម្ពុជាពឹងពាក់ខ្លាំងលើការហូរចូលមូលធនពីប្រទេសចិន ហើយការធ្លាក់ចុះយ៉ាងគំហុករបស់សេដ្ឋកិច្ចក្នុងកាលៈទេសៈណាមួយនឹងជះផលមិនល្អមកលើទស្សនវិស័យនៃកំណើនសេដ្ឋកិច្ចរបស់កម្ពុជាផងដែរ។

លោក លី សុដេត (Ly Sodeth) សេដ្ឋវិទូជាន់ខ្ពស់នៃធនាគារពិភពលោកប្រចាំនៅកម្ពុជា បានថ្លែងថា៖“ជារួមយើងរំពឹងថា កំណើនសេដ្ឋកិច្ចនៅឆ្នាំនេះនឹងយឺតជាងចុងឆ្នាំមុន”។ កំណើនសេដ្ឋកិច្ចរបស់កម្ពុជាបានកើនឡើងកាលពីឆ្នាំមុនដល់ 7.5% ខ្ពស់ជាងការព្យាករដំបូងរបស់ធនាគារ7%”។

លោក លី សុដេត បានបន្ថែមថា៖“ការនាំចេញសម្លៀកបំពាក់ និងស្បែកជើងដែលមានចំនួនជាង2ភាគ3នៃការនាំចេញសរុបរបស់កម្ពុជាបានកើនឡើងខ្ពស់ក្នុងរយៈពេល 4ឆ្នាំ គឺកើនឡើង 17.6%នៅក្នុងឆ្នាំ2018 កើនឡើងពីកំណើន8.3% ដែលបានបង្ហាញនៅក្នុងឆ្នាំ2017”។ កម្មវិធីបញ្ជាទិញសំខាន់ដែលជាការពិត ការនាំចេញសម្លៀកបំពាក់ និងស្បែកជើងទៅសហរដ្ឋអាមេរិក និងសហភាពអឺរ៉ុបបានកើនឡើងយ៉ាងឆាប់រហ័ស ជាមួយនឹងទីផ្សារសហរដ្ឋអាមេរិក កើនឡើងលឿនជាងទីផ្សារអឺរ៉ុប។ នោះជាកត្តាសំខាន់នៅពីក្រោយកំណើនផលិតផលក្នុងស្រុកសរុបដែលរំពឹងទុកកាលពីឆ្នាំមុន”។

លោក Andrew D.Mason ប្រធានសេដ្ឋវិទូប្រចាំតំបន់អាស៊ីបូព៌ា និងប៉ាស៊ីហ្វិករបស់ធនាគារពិភពលោកបានមានប្រសាសន៍ថា កម្ពុជាត្រូវតែយកឈ្នះលើបញ្ហាប្រឈមនេះដើម្បីបន្តមានកំណើនខ្ពស់ក្នុងពេលប៉ុន្មានឆ្នាំខាងមុខនេះ។

លោក Mason បានមានប្រសាសន៍ថា៖“ការសម្លឹងមើលទៅមុខវានឹងមានសារៈសំខាន់ សម្រាប់កម្ពុជាក្នុងការបន្តពង្រឹងភាពប្រកួតប្រជែងរបស់ខ្លួននៅលើទីផ្សារពិភពលោក ដើម្បីរក្សាអត្រាកំណើនខ្ពស់ក្នុងពេលអនាគត។ នេះមានន័យថា វាត្រូវខិតខំកាត់បន្ថយចំណាយលើការធ្វើជំនួញកែលម្អបរិយាកាសធុរកិច្ច ហើយសំខាន់បំផុតគឺពង្រឹងធនធានមនុស្ស និងជំនាញកម្លាំងពលកម្មរបស់ខ្លួន។ ក្នុងរយៈពេលខ្លី ខ្ញុំសូមនិយាយថា វាមិនមែនជាការព្រួយបារម្ភទេ ដែលយើងមើលឃើញពីការធ្លាក់ចុះបន្តិចបន្តួចនៃកំណើននោះទេ”។

នៅចំពោះមុខ ការខ្វះភាពប្រាកដប្រជាបែបនេះវិធានការចាំបាច់រួមមាន ការរក្សាបញ្ជីប្រាក់បៀវត្សរ៍សាធារណៈកុំឱ្យរីកមាឌតទៅទៀត ពង្រឹងសមត្ថភាពឃ្លាំមើល និងត្រៀមឆ្លើយតបវិបត្តិក្នុងវិស័យហិរញ្ញវត្ថុ ចាត់វិធានការប្រុងប្រយ័ត្នផ្នែកម៉ាក្រូសេដ្ឋកិច្ចថែមទៀត ក៏ដូចជាការដាក់កំហិតដល់ធនាគារក្នុងការផ្តល់កម្ចីឲ្យផ្នែកសំណង់ និងអចលនទ្រព្យជាដើម។ នេះជាការលើកឡើងរបស់ធនាគារពិភពលោក។

បើតាមធនាគារពិភពលោក ថ្លៃចំណាយនៅក្នុងការធ្វើធុរកិច្ចក៏ជាឧបសគ្គមួយដល់ការពង្រីកការវិនិយោគ និងសហគ្រិនភាពនៅក្នុងស្រុកផងដែរខណៈកម្ពុជាជាប់លេខរៀងទី183 ក្នុងចំណោម190ប្រទេសនៃការវាស់ស្ទង់ភាពងាយស្រួលក្នុងការចាប់ផ្តើមធុរកិច្ច។

លោកស្រី វិចតូរីយ៉ា ក្វាក្វា អនុប្រធានធនាគារពិភពលោកទទួលបន្ទុកតំបន់អាស៊ីបូព៌ា និងប៉ាស៊ីហ្វិក មានប្រសាសន៍ថា៖ “កំណើនសេដ្ឋកិច្ចមានភាពធន់របស់តំបន់នេះ គួរតែជួយកាត់បន្ថយភាពក្រីក្រដែលបានធ្លាក់នៅកម្រិតទាបរួចទៅហើយក្នុងប្រវត្តិសាស្ត្រ ឱ្យមកនៅកាន់តែទាបថែមទៀត ។ តាមពិតទៅ យើងរំពឹងទុកថា នៅត្រឹមឆ្នាំ2021 ភាពក្រីក្រធ្ងន់ធ្ងរនឹងធ្លាក់ចុះច្រើនមកនៅក្រោម3%”។

លោកស្រីមានប្រសាសន៍បន្តទៀតថា៖ “យ៉ាងណាក៏ដោយ ស្របពេលគ្នានេះពលរដ្ឋប្រហែល 500លាននាក់ក្នុងតំបន់នេះ នៅតែបន្តខ្វះសន្តិសុខផ្នែកសេដ្ឋកិច្ច ហើយប្រឈមនឹងហានិ ភ័យដែលងាយធ្លាក់ចុះទៅក្នុងភាពក្រីក្រវិញ ត្រង់នេះជាការក្រើនរំឭកសំខាន់មួយអំពីទំហំនៃបញ្ហាប្រឈមដែលមានចំពោះអ្នកធ្វើគោលនយោបាយនៅតាមប្រទេសនីមួយៗ”។

របាយការណ៍ធ្វើទឡ្ហីករណ៍ថា ប្រពលភាពរបស់ហានិភ័យមួយចំនួនក៏រំលេចឱ្យឃើញផង ដែរនូវភាពចាំបាច់ក្នុងការបន្តធ្វើការវិនិយោគទៅលើជំនួយឧបត្ថម្ភផ្នែកសង្គមកិច្ច និងកម្មវិធីធានា រ៉ាប់រងដើម្បីការពារពលរដ្ឋដែលងាយរងគ្រោះបំផុត។ បច្ចុប្បន្ននេះ តំបន់អាស៊ីបូព៌ា និងប៉ាស៊ីហ្វិកដែលកំពុងអភិវឌ្ឍន៍មានអត្រាគ្របដណ្តប់របស់ជំនួយផ្នែកសង្គមកិច្ចទាបជាងគេក្នុងចំណោមពលរដ្ឋ20%ដែលក្រីក្របំផុត បើប្រៀបទៅនឹងតំបន់កំពុងអភិវឌ្ឍន៍ដទៃទៀត៕

May 4, 2019

Category: សង្គម និងសេដ្ឋកិច្ច