សង្គម និងសេដ្ឋកិច្ច - La Reine Media

ការរីកចម្រើនក្នុងវិស័យសំណង់ជំរុញឱ្យតម្លៃអចលនទ្រព្យកម្ពុជាកើនជារៀងរាល់ឆ្នាំ

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងបញ្ជាក់ថា វិស័យអចលនទ្រព្យកម្ពុជានឹងនៅតែរឹងមាំល្អសម្រាប់ 5ឆ្នាំទៅមុខទៀត ហើយតម្លៃអចលនទ្រព្យនៅកម្ពុជានឹងតែបន្តកើនឡើង ដែលគិតជាមធ្យម កើនពី10% ទៅ15% ជារៀងរាល់ឆ្នាំដោយស្ថានភាពអចលនទ្រព្យនៅកម្ពុជានឹងនៅតែមានភាពរឹងមាំខ្លាំងក្លា ហើយវិស័យនេះវាអាចជាក្ដីរំពឹងសម្រាប់អ្នកដែលត្រូវការវិនិយោគលើវិស័យអចលនទ្រព្យ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងបញ្ជាក់ថា៖ “មូលហេតុដែលអចលនទ្រព្យបន្តឡើងថ្លៃពី10% ទៅ15% បន្ថែមនោះ គឺមានកត្តាចំនួន3។ ទី1- វិស័យលំនៅឋាន ទី2- វិស័យដីធ្លី និងទី3 វិស័យទិញ-ជួលផ្សេងៗ ដែលកត្តាទាំងនេះហើយ ដែលនាំឱ្យកម្ពុជាបន្តការឡើងថ្លៃអចលនទ្រព្យនៅរៀងរាល់ឆ្នាំតទៅមុខទៀត។ បើធៀបនឹងប្រទេសជិតខាង ដូចជាប្រទេសថៃ វៀតណាម និងបណ្ដាប្រទេសផ្សេងៗនៅក្នុងតំបន់អាស៊ាននេះ សម្រាប់កម្ពុជាតម្លៃអចលនទ្រព្យនៅមិនទាន់ខ្ពស់នៅឡើយទេ បើទោះបីមានការកើនឡើងឥតឈប់ឈរក្តី”។

លោកបានបន្តថា សម្រាប់វិស័យលំនៅឋាននៅកម្ពុជា គឺត្រូវការបន្ថែមទៀត ព្រោះថា បើធៀបចំនួនប្រជាជន និងចំនួនខ្នងផ្ទះ គឺមិនទាន់សមាមាត្រគ្នានៅឡើយទេ។ ចំពោះចំនួនខ្នងផ្ទះនៅរាជធានីភ្នំពេញ មានប្រហែលជា 1លានខ្នងផ្ទះ និងចំនួនប្រជាជនដែលមានប្រហាក់ប្រហែលជាជាង 2លាននាក់ ដូចនេះសម្រាប់កម្រិតនៃការកើនឡើង គឺនៅតែកើនឡើងបន្តទៀតដដែល។

លោកបានបន្ថែមថា មួយវិញទៀតចំនួនខ្នងផ្ទះនេះ គឺត្រូវការបន្ថែមទៀត ដោយសារតែចំនួនប្រជាជនមានការកើនឡើងជារៀងរាល់ថ្ងៃ និងត្រូវរៀបការ ហើយត្រូវការផ្ទះថ្មីសម្រាប់គ្រួសារថ្មីផងដែរ ទើបត្រូវទាមទារឱ្យមានផ្ទះបន្ថែមទៀត ដូចនេះលំនៅឋាននៅតែជាកត្តាសំខាន់សម្រាប់ ការអភិវឌ្ឍនៅកម្ពុជា ជាពិសេសលំនៅឋានសាងសង់ថ្មីៗដូចជា បុរីផ្ទះល្វែង និងវីឡាជាដើម។

លោក ច្រឹក សុខនីម ក៏បានបញ្ជាក់ផងដែរថា វិស័យអចលនទ្រព្យរបស់កម្ពុជានឹងនៅតែមានភាពរឹងមាំសម្រាប់រយៈពេល 5ឆ្នាំទៅមុខទៀត ដោយផ្អែកទៅលើមូលដ្ឋានតម្លៃសេដ្ឋកិច្ចក្នុងកំណើនរង្វង់7% ជាមួយនឹងមូលដ្ឋាននៃការគាំពារពីរាជរដ្ឋាភិបាល ដោយមានស្ថិរភាពនយោបាយល្អ និងមូលដ្ឋានតម្លៃនៃការវិនិយោគពីក្រៅប្រទេសផងដែរ។

ទន្ទឹមនេះផងដែរមូលនិធិរូបិយវត្ថុអន្ដរជាតិ IMF (International Monetary Fund) បានកោតសរសើរដល់ការបោះជំហានរបស់ប្រទេសកម្ពុជាក្នុងការបង្កើនបរិយាប័ន្នហិរញ្ញវត្ថុដែលមានកំណើនឥណទានក្នុងវិស័យអចលនទ្រព្យជាបណ្តាញគន្លឹះទាក់ទងនឹងឥណទាន និងកំណើនសេដ្ឋកិច្ចដែលជំរុញដោយធនាគារ។ នេះបើយោងតាម លោកស្រី Christine Lagarde នាយិកាគ្រប់គ្រងរបស់ IMF។

ទាក់ទងទៅនឹងលំនឹងនៃលំហូរទុនអចលនទ្រព្យវិញ របាយការណ៍របស់ IMF ដែលបានចេញផ្សាយថ្មីៗនេះបានរកឃើញថា ដើមទុនបានបន្តហូរចូលក្នុងវិស័យសំណង់យ៉ាងគំហុក។ ការវិនិយោគលើផ្នែកសំណង់នៅក្នុងវិស័យអចលនទ្រព្យ គិតជាទឹកប្រាក់ជាង 1.36ពាន់លានដុល្លារនៅក្នុងត្រីមាសទី1ដើមឆ្នាំនេះ។ ការវិនិយោគអចលនទ្រព្យនៅកម្ពុជាបានទទួលផលប្រយោជន៍ពី7% ទៅ8% ត្រឡប់មកវិញសម្រាប់ការវិនិយោគ។ របាយការណ៍ដដែលក៏បានឱ្យដឹងដែរថា កំណើនឥណទានក្នុងវិស័យអចលនទ្រព្យដែលជាបណ្តាញគន្លឹះទាក់ទងនឹងឥណទាន និងកំណើនសេដ្ឋកិច្ចមានកម្រិតជាមធ្យមប្រហែល35% ចាប់តាំងពីឆ្នាំ2016 ដែលជំរុញដោយធនាគារមួយចំនួន។

របាយការណ៍ក៏បានបង្ហាញផងដែរថា អ្នកអភិវឌ្ឍន៍ត្រូវផ្តល់លក្ខខណ្ឌកម្ចីងាយស្រួលសម្រាប់អ្នកទិញក្នុងស្រុក ដើម្បីឈានជើងចូលទីផ្សារ ហើយវិធានការត្រួតពិនិត្យតឹងរ៉ឹងចាំបាច់ត្រូវធ្វើនៅពេលអនាគត។ វិស័យធនាគារ ក៏បានកើនឡើងខ្លាំងដោយសារផ្នែកអចលនទ្រព្យនៅកម្ពុជា ហើយការវិនិយោគលើអចលនទ្រព្យ និងគម្រោងអភិវឌ្ឍន៍ គឺជាកត្តាជំរុញ ដ៏សំខាន់សម្រាប់កំណើនរបស់ធនាគារ។

ជាមួយគ្នានេះដែរ ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ថា៖“កំណើននគរូបនីយកម្ម និងសំណង់បានកើនឡើងយ៉ាងឆាប់រហ័ស ជាក់ស្តែងចំនួនប្រជាជននៅក្នុងរាជធានី-ក្រុង និងទីប្រជុំជនមានចំនួនប្រមាណ 4.5លាននាក់ និងនៅឆ្នាំ2030 នឹងបន្តកើនដល់ 7.92លាននាក់ស្មើនឹង54%។ ទិន្នន័យនេះបង្ហាញថា ក្នុងរយៈពេល 15ឆ្នាំ តម្រូវការលំនៅឋាន សំណង់អគារ និងទីប្រជុំជននឹងមានចំនួនប្រមាណ 80ម៉ឺនលំនៅឋានដែលគិតជាមធ្យម គឺ 5ម៉ឺនលំនៅឋានសម្រាប់ 1ឆ្នាំ”។

ឯកឧត្តមរដ្ឋលេខាធិការ បានបន្ថែមថា ដើម្បីគាំទ្រដល់ការរីកចម្រើននគរូបនីយកម្មនេះ រាជរដ្ឋាភិបាលបានដាក់ឱ្យអនុវត្ត ដោយបានកំណត់ច្បាស់លាស់ពីតំបន់ដែលមានសក្តានុពលសម្រាប់ការអភិវឌ្ឍ និងតំបន់អភិវឌ្ឍន៍អចលនទ្រព្យឱ្យឆ្លើយតបទៅនឹងកំណើនប្រជាជន និងការអភិវឌ្ឍសេដ្ឋកិច្ច ដែលមានជាអាទិ៍ ប៉ូលអភិវឌ្ឍន៍រាជធានីភ្នំពេញ ប៉ូលអភិវឌ្ឍន៍សៀមរាប ប៉ូលអភិវឌ្ឍន៍ខេត្តព្រះសីហនុ ប៉ូលអភិវឌ្ឍន៍ក្រុង និងទីប្រជុំជនតាមបណ្តោយព្រំដែន តាមបណ្តោយអ័ក្សនៃការអភិវឌ្ឍ ដោយបានសម្រេចនិងដាក់ឱ្យប្រើប្រាស់ជាបន្តបន្ទាប់នូវគោលការណ៍ប្រើប្រាស់ដីតាមលំដាប់អាទិភាព។

ឯកឧត្តម ប៉ែន សុផល បានបន្តថា ឆ្លើយតបនឹងតម្រូវការខាងលើ យើងទទួលបានកំណើនប្រកបដោយប្រសិទ្ធភាព ដើម្បីការអភិវឌ្ឍប្រកបដោយចីរភាព ដោយយើងទទួលបាននូវច្បាប់នគរូបនីយកម្ម ច្បាប់សំណង់ថ្មី និងការធ្វើវិសោធនកម្មច្បាប់ភូមិបាល អនុក្រឹត្យស្តីពីការជួសជុល និងអភិវឌ្ឍន៍ឆ្នេរសមុទ្រ និងក្របខ័ណ្ឌគតិយុត្ត និងបទប្បញ្ញត្តិ បទដ្ឋានជាច្រើនទៀត ដើម្បីឱ្យស្របទៅនឹងការអភិវឌ្ឍបច្ចេកវិទ្យាសេដ្ឋកិច្ចសង្គម វប្បធម៌ និងកិច្ចការពារបរិស្ថាន ក្នុងបរិបទសមាហរណកម្ម និងគោលដៅអភិវឌ្ឍន៍ប្រកបដោយចីរភាព។

ឯកឧត្តមក៏បានបញ្ជាក់បន្ថែមផងដែរថា៖“ជាផ្លែផ្កានៃនគរូបនីយកម្ម ការអភិវឌ្ឍអចលនទ្រព្យ និងសំណង់បានក្លាយជាសសរស្តម្ភជំរុញកំណើនសេដ្ឋកិច្ចកម្ពុជា ជាក់ស្តែងទុនវិនិយោគសំណង់ក្នុងរយៈពេល 10ឆ្នាំ គិតពីឆ្នាំ2000 ដល់ឆ្នាំ2019 មានកំណើន 4.3ពាន់លានដុល្លារ។ ក្នុងឆ្នាំ2018 មាន5,755លានដុល្លារ និងក្នុងរយៈពេល 4ខែដើមឆ្នាំ2019 នេះមាន 2,742លានដុល្លារ គឺមានកំណើន67% បើធៀបទៅនឹងរយៈពេលដូចគ្នាក្នុងឆ្នាំ2018”។

ជាមួយគ្នានេះក្រសួងបានធ្វើទំនើបកម្មក្នុងការ-ផ្តល់ព័ត៌មាន ដោយបានដាក់ឱ្យប្រើប្រាស់កម្មវិធីព័ត៌មានវិទ្យា“សំណង់នៅកម្ពុជា (Cambodia Construction App)” ដើម្បីលើកកម្ពស់ព័ត៌មាន សាធារណៈ ព័ត៌មានអំពីការអភិវឌ្ឍសំណង់អចលន-ទ្រព្យគ្រប់ជ្រុងជ្រោយនៅក្នុង APP របស់ក្រសួង។

ឯកឧត្តម ប៉ែន សុផល បានបញ្ជាក់ទៀតថា៖“ការរីកចម្រើន និងការវិនិយោគវិស័យអចលនទ្រព្យបានបង្ហាញឱ្យឃើញថា កម្ពុជាបន្តស្ថិតនៅលើវិថីដ៏ត្រឹមត្រូវ មានវិបុលភាពលើគ្រប់វិស័យ និងលើកកម្ពស់តួនាទីវិស័យឯកជន និងការអភិវឌ្ឍវិស័យអចលនទ្រព្យ ធ្វើឱ្យទីផ្សារអចលនទ្រព្យនៅកម្ពុជាមានកំណើនយ៉ាងឆាប់រហ័សប្រដំប្រសងនឹងទីផ្សារក្នុងតំបន់អាស៊ានដែរ”៕

May 27, 2019

GMAC ៖ ការវិនិយោគកំពុងកើនឡើង ប៉ុន្តែមានល្បឿនយឺត

យោងតាមមន្ត្រីសមាគមរោងចក្រកាត់ដេរនៅកម្ពុជា (The Garment Manufacturers Association in Cambodia ឬGMAC) បានឱ្យដឹងថា ការវិនិយោគលើវិស័យកាត់ដេរ និងស្បែកជើងដែលជាសសរស្ដម្ភមួយនៃសេដ្ឋកិច្ចកម្ពុជាកំពុងកើនឡើងយឺតៗ ក្នុងឆ្នាំ2019 ធៀបនឹងឆ្នាំ2018។

ការកើនឡើងដ៏យឺតនេះ ទំនងជាលទ្ធផលនៃការសម្រេចចិត្តរបស់សហភាពអឺរ៉ុបក្នុងការពិនិត្យឡើងវិញនូវស្ថានភាពរបស់ប្រព័ន្ធអនុគ្រោះពន្ធ អ្វីៗគ្រប់យ៉ាងលើកលែងតែអាវុធ (Everything-but-arms ឬEBA) របស់កម្ពុជាក៏ដូចជាការបង្កើនប្រាក់ឈ្នួលអប្បបរមារបស់វិស័យនេះផងដែរ។

លោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជាបានឱ្យដឹងថា វិនិយោគិនមួយចំនួនអាចចាប់ផ្តើមអនុវត្តវិធីសាស្ត្រតាមនីតិវិធីរបស់ខ្លួន។លោកបានថ្លែងថា ឧស្សាហកម្មនេះនៅតែទទួលបានការវិនិយោគផ្ទាល់ពីបរទេស (foreign direct investment ឬ FDI) ប៉ុន្តែកំណើននេះបានថយចុះ។

លោកម៉ូនីកាមានប្រសាសន៍ថា៖“ ជាការពិតយើងកំពុងប្រឈមនឹងបញ្ហាផ្ទៃក្នុងដ៏សំខាន់មួយចំនួន ប៉ុន្តែមានកត្តាខាងក្រៅមួយចំនួនដែលកំពុងជួយប្រទេសកម្ពុជា។ ការបង្កើតសង្គ្រាមពាណិជ្ជកម្ម រវាងសហរដ្ឋអាមេរិក និងចិន គឺជាក្តីព្រួយបារម្ភទូទាំងពិភពលោក ប៉ុន្ដែវាបានធ្វើឱ្យកម្ពុជាមានការពេញនិយម ដោយសារតែរោងចក្រដែលត្រូវបំផ្លាស់ប្តូរទីចេញពីប្រទេសចិន ដើម្បីចៀសវាងពីការបង់ពន្ធ”។ លោកបានថ្លែងបន្តថា កត្តាផ្សេងទៀតដែលនាំឱ្យក្រុមហ៊ុនបំផ្លាស់ទីចេញពីប្រទេសចិន គឺការដំឡើងប្រាក់ឈ្នួល និងការផ្គត់ផ្គង់កម្លាំងពលកម្មមិនគ្រប់គ្រាន់ ជាពិសេសនៅក្នុងឧស្សាហកម្មមានតម្លៃទាបដូចជាសម្លៀកបំពាក់ និងស្បែកជើង។ ក្នុងអំឡុងពេល 4ខែដំបូងនៃឆ្នាំនេះ រោងចក្រថ្មីចំនួន25 បានចូលរួមក្នុងសមាគម បើប្រៀបធៀបទៅនឹងអំឡុងពេលដូចគ្នានេះក្នុងឆ្នាំ 2018 ដែលមានចំនួនដល់ទៅ40។ ចំនួនសមាជិកដែល រួមបញ្ចូលទាំងសហគ្រាស រោងចក្រកាត់ដេរសម្លៀកបំពាក់-ស្បែកជើង និងទំនិញសម្ភារធ្វើដំណើរ គឺមានជិតដល់ 600។ ខណៈពេលដែលវិស័យកាត់ដេរនៅតែធ្វើបានល្អ វិស័យស្បែកជើងក៏កំពុងធ្វើឱ្យប្រសើរឡើងជាមួយនឹងការពង្រីករោងចក្រក្នុងស្រុកដែលមានស្រាប់ និងកំពុងជ្រើសរើសពលករបន្ថែមទៀត។

លោកបានបន្ថែមទៀតថា ការនាំចេញទំនិញទៅកាន់សហរដ្ឋអាមេរិក នៅក្រោមជំពូក 42 បានកើនឡើង100% ក្នុងរយៈពេល 2ខែដំបូងនៃឆ្នាំនេះ បើប្រៀបធៀបទៅនឹងរយៈពេលដូចគ្នា កាលពីឆ្នាំ2018 ដែលសរុបជាទឹកប្រាក់ មានប្រមាណ 111លានដុល្លារអាមេរិក។

ក្នុងអំឡុងឆ្នាំ2017 ទំនិញដែលមានតម្លៃ 186លានដុល្លារត្រូវបាននាំចេញពីកម្ពុជាទៅកាន់សហរដ្ឋអាមេរិក ខណៈនៅឆ្នាំ2018 តួលេខនេះបានកើនឡើងដល់ 416លានដុល្លារ។ លោក ម៉ូនីកា បានមានប្រសាសន៍ថា សម្រាប់ឆ្នាំនេះវាអាចលើសពី 600លានដុល្លារ។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរកម្ពុជាបានថ្លែងក្នុងអំឡុងកិច្ចប្រជុំប្រចាំឆ្នាំរបស់សមាគមនេះថា ការវិនិយោគលើការផលិតទំនិញសម្ភារធ្វើដំណើរនឹងកើនឡើង 2ខ្ទង់ក្នុងរយៈពេល 2ឆ្នាំខាងមុខ។

លោកឧកញ៉ាបានបន្តថា៖“នៅពេលដែលការរៀបចំគម្រោងចម្រុះ (The Multifibre Arrangement ឬ MFA) ត្រូវបានលុបចោល គេមានការព្រួយបារម្ភថា វិស័យកាត់ដេរនៅកម្ពុជានឹងមិនរួចខ្លួនទេ ប៉ុន្តែក្រុមហ៊ុននៅអឺរ៉ុប កាណាដា ហុងកុង និងអាមេរិក នៅតែរក្សាការទិញពីកម្ពុជា ដោយផ្អែកលើការប្តេជ្ញាចិត្តយ៉ាងរឹងមាំរបស់រដ្ឋាភិបាលចំពោះបទដ្ឋានពលកម្មខ្ពស់ដែលត្រូវបានបញ្ចូលក្នុងការអនុវត្តកម្មវិធីរបស់គម្រោងរោងចក្រកាន់តែប្រសើរនៅកម្ពុជារបស់អង្គការពលកម្មអន្តរជាតិ(Better Factories Cambodia ឬ BFC)”។

ជាមួយគ្នានេះការងាររបស់ក្រុមហ៊ុនជាមួយអ្នកផ្គត់ផ្គង់នៅកម្ពុជាបានរួមចំណែកដល់ការនាំចេញសម្លៀកបំពាក់ ស្បែកជើង និងទំនិញសម្ភារធ្វើដំណើរ 9.5ពាន់លានដុល្លារពីប្រទេសកម្ពុជាកាលពីឆ្នាំមុន។ សព្វថ្ងៃនេះការនាំចេញសម្លៀកបំពាក់ ស្បែកជើង និងទំនិញសម្ភារធ្វើដំណើរ មានចំនួនជាង 1ភាគ3 នៃផលិតផលក្នុងស្រុកសរុបរបស់កម្ពុជា។ វាតំណាងឱ្យពាក់កណ្តាលនៃការនាំចេញសរុបរបស់កម្ពុជា។

បើតាមឯកឧត្តម អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងបញ្ជាក់ថា៖“កម្ពុជាជាប់ចំណាត់ថ្នាក់ទី 5 ក្នុងតំបន់អាស៊ាននៅពេលមានប្រាក់ខែអប្បបរមាខ្ពស់។ នៅក្នុងប្រទេសកម្ពុជាប្រាក់ឈ្នួលអប្បបរមាសម្រាប់វិស័យកាត់ដេរបច្ចុប្បន្នមានតម្លៃ 182ដុល្លារក្នុង 1ខែ”។

យោងតាមរបាយការណ៍ចុងក្រោយរបស់ BFCបានបង្ហាញថា ចំនួនកម្មករមិនទាន់គ្រប់អាយុនៅក្នុងវិស័យកាត់ដេរបានធ្លាក់ចុះច្រើន ពី 74ករណីនៅឆ្នាំ2014 ដល់10ករណីគិតត្រឹមឆ្នាំមុន។ គម្រោងរោងចក្រកាន់តែប្រសើរនៅកម្ពុជា (BFC) បាននិយាយថាវានឹងមិនអាចទៅរួចទេបើគ្មានការចូលរួមពីក្រសួងការងារ និងក្រសួងពាណិជ្ជកម្ម ក៏ដូចជាសមាគមរោងចក្រកាត់ដេរនៅកម្ពុជា (GMAC) នោះ។

តាមរបាយការណ៍រដ្ឋាភិបាលកម្ពុជាបានបង្ហាញថា ក្នុងឆ្នាំ2018 កន្លងទៅ ការនាំចេញសរុបរបស់កម្ពុជា ទៅកាន់សហភាពអឺរ៉ុប មានទឹកប្រាក់សរុបប្រមាណ 4,670លានដុល្លារអាមេរិក ក្នុងនោះសម្លៀកបំពាក់មានប្រមាណ 3,653លានដុល្លារអាមេរិក ស្បែកជើងមានប្រមាណ 508លានដុល្លារអាមេរិក អង្ករ 177លានដុល្លារអាមេរិក និងទោចក្រយាន មានប្រមាណ 331លានដុល្លារអាមេរិក។

គួរបញ្ជាក់ថា ការប៉ាន់ស្មានរបស់ធនាគារពិភពលោកលើកំណើនសេដ្ឋកិច្ចកម្ពុជារយៈពេល 3ឆ្នាំខាងមុខនេះបានព្យាករថា កំណើននាំចេញនឹងកើន9%ក្នុងឆ្នាំ2019 កើន 8.6%នៅឆ្នាំ2020 និង 8.1%នៅឆ្នាំ2021។ ក្នុងនោះដែរ ធនាគារពិភពលោកក៏បានព្យាករដែរថា ការវិនិយោគផ្ទាល់ពីបរទេស (FDI)រំពឹងថា នឹងកើន 10.4%នៅឆ្នាំ2019 ឆ្នាំ2020រំពឹងថា កើន 9.3% និងកើន 9.2% នៅឆ្នាំ2021៕

May 27, 2019

ការនាំចូលប្រេងឥន្ធនៈកើនឡើង 10% នៅឆ្នាំ2018

យោងតាមក្រសួងរ៉ែ និងថាមពលបានឱ្យដឹងថា កម្ពុជាបាននាំចូលផលិតផលប្រេងចំនួន 2.5 លានតោននៅឆ្នាំ2018 ពោលគឺកើនឡើង10% បើធៀបនឹងរយៈពេលដូចគ្នាកាលពីឆ្នាំមុន។

ឯកឧត្តម សុខ ខាវ៉ាន រដ្ឋលេខាធិការក្រសួងរ៉ែនិងថាមពលបានថ្លែងនៅក្នុងសន្និសីទមួយស្តីពីវិស័យប្រេង និងឧស្ម័ននៅសណ្ឋាគារសុខាថា ប្រេងម៉ាស៊ូត និងប្រេងសាំង គឺជាផលិតផលប្រេងដែលនាំចូលច្រើនបំផុតមកពីប្រទេសសិង្ហបុរី ថៃ និងវៀតណាម។

ឯកឧត្តមបានបន្ថែមថា បច្ចុប្បន្នក្រុមហ៊ុនប្រេងក្នុងស្រុក និងអន្តរជាតិចំនួន 15 ជាក្រុមហ៊ុននាំចូលផលិតផលប្រេងពីបរទេស។ ក្រុមហ៊ុនទាំងនេះបានចែកចាយផលិតផលដល់អ្នកប្រើប្រាស់តាមរយៈស្ថានីយប្រេងសាំងតូចៗចំនួន 3,778ទីតាំង និងស្ថានីយប្រេងធំៗចំនួន 29ទីតាំងនៅទូទាំងប្រទេស និងមានស្ថានីយប្រេងឥន្ធនៈ ;liquefied petroleum gasLPG ចំនួន 103ទីតាំង។

ឯកឧត្តម សុខ ខាវ៉ាន បានចង្អុលបង្ហាញថា៖“រដ្ឋាភិបាលបានបើកចំហទីផ្សារដែលអនុញ្ញាតឱ្យវិស័យឯកជន និងដៃគូអភិវឌ្ឍន៍ចូលរួមក្នុងការវិនិយោគ ការរុករក ការផលិត ការចម្រាញ់ ការនាំចេញ ការដឹកជញ្ជូន និងការចែកចាយប្រេង និងផលិតផលប្រេងកាត។ ឥឡូវនេះសម្រាប់ខ្សែទឹកខាងលើ យើងមានប្លុក A ដែលកំពុងស្ថិតនៅក្រោមការអភិវឌ្ឍ។ យើងក៏មានប្លុកផ្សេងទៀតជាច្រើន ដែលផលិតកម្មនឹងមកដល់ ដោយស្ថិតក្រោមការចរចាក្នុងតំបន់ទាមទារ ត្រួតស៊ីគ្នា”។

ឯកឧត្តម បានបន្ថែមថា៖“យើងជឿជាក់យ៉ាងមុតមាំថា នៅលើឆ្នេរសមុទ្ររបស់យើង យើងមានការរំពឹងទុកដ៏គួរឱ្យរំភើបសម្រាប់ការស្រាវជ្រាវបន្ថែម។ សកម្មភាពរុករកភាគច្រើន គឺនៅឈូងសមុទ្រដោយមានជម្រើសនៅតាមឆ្នេរសមុទ្រដែលមិនត្រូវបានរុករក”។

យោងតាមការសិក្សាមួយពីវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា ឬ ERIA) (The Economic Research Institute for Asean and East Asia) ពីឆ្នាំ2012 ដល់ឆ្នាំ2016 តម្រូវការផលិតផលប្រេងបានកើនឡើងជាមធ្យម7.2% ក្នុង 1ឆ្នាំ ដែលនេះបើយោងតាមសន្ទស្សន៍ វាជាអត្រាកំណើនខ្ពស់ បើប្រៀបធៀបទៅនឹងតំបន់ និងផ្នែកផ្សេងទៀតនៃពិភពលោក។

លោក Shigeru Kimura អ្នកផ្តល់ប្រឹក្សារបស់ERIA ស្តីពីកិច្ចការថាមពលបានមានប្រសាសន៍ថា៖“តម្រូវការប្រេងនៅកម្ពុជាមាន 1.9MTOE(one million tonne of oil equivalent) ស្មើនឹង 1លានតោននៅឆ្នាំ2015 ហើយនឹងកើនឡើងដល់ 4,8 MTOE នៅត្រឹមឆ្នាំ2040”។លោកបានបន្តថា ចាប់ពីឆ្នាំ2015 ដល់ឆ្នាំ2040 ឧស្ម័ន LPG ទំនងជាជួបប្រទះតម្រូវការកើនឡើងខ្ពស់បំផុត និងតាមក្រោយដោយប្រេងសាំង ប្រេងម៉ាស៊ូត និងប្រេងឥន្ធនៈដទៃទៀត។

ប្រទេសកម្ពុជារំពឹងថា នឹងកាត់បន្ថយប្រេងឆៅ ដំបូងរបស់ខ្លួននៅចុងឆ្នាំនេះ។ ប្រេងនឹងត្រូវបានគេយកចេញពីអណ្តូងប្រេងអប្សរា ដែលមានទីតាំងស្ថិតនៅក្នុងប្លុក A នៃអាងប្រេងរបស់ខ្មែរនៅឈូងសមុទ្រថៃ ដែលត្រូវបានគេស្គាល់ថា ជាតំបន់ផលិតប្រេងដំបូងគេបង្អស់នៅកម្ពុជា។

ប៉ុន្តែជារឿងដែលគួរឱ្យសោកស្តាយ ដែលការសាងសង់រោងចក្រចម្រាញ់ប្រេងឆៅ តម្លៃ 620 លានដុល្លារត្រូវបានពន្យារពេល។ បើតាមក្រសួងរ៉ែ និងថាមពលបានឱ្យដឹងថា ការសាងសង់រោងចក្រចម្រាញ់ប្រេងកំពុងដំណើរការយឺតជាងការរំពឹងទុក ខណៈគម្រោងនេះគ្រោងនឹងបញ្ចប់នៅឆ្នាំ2022។

លោក កូ ស៊ីឡា អនុប្រធាននាយកដ្ឋានបច្ចេកវិទ្យាប្រេង បានឱ្យដឹងថា ដំណាក់កាលដំបូងនៃរោងចក្រចម្រាញ់ប្រេងកាតដែលមានទីតាំងនៅលើផ្ទៃដីចំនួន 365ម៉ែត្រការ៉េនៅខេត្តព្រះសីហនុ និងខេត្តកំពតដែលនឹងត្រូវបញ្ចប់នៅចុងឆ្នាំ2019 នឹងត្រូវពន្យារពេល។

លោកបានថ្លែងឱ្យដឹងនៅក្នុងសន្និសីទស្តីពីវិស័យប្រេង និងឧស្ម័នថា រោងចក្រនេះបានចាប់ផ្តើមសាងសង់នៅឆ្នាំ2017 ដោយដំណើរការមានភាពយឺតយ៉ាវ។ រោងចក្រនេះនឹងចំណាយអស់ប្រមាណ 620លានដុល្លារ ហើយនឹងអាចដំណើរការប្រេងឆៅបាន 3លានតោនក្នុង 1ឆ្នាំ ដែលនឹងត្រូវប្រើប្រាស់សម្រាប់ការផ្គត់ផ្គង់ទីផ្សារក្នុងស្រុក។

លោកស៊ីឡាក៏បានបញ្ជាក់ដែរថា៖“រោងចក្រដែលកំពុងត្រូវបានបង្កើតឡើងដោយក្រុមហ៊ុនប្រេងឥន្ទនៈគីមីកម្ពុជា នឹងទំនងជាដំណើរការប្រេងដែលបានមកពីតំបន់ប្រេងអប្សរា ដោយត្រូវបានកំណត់ថា ជាទុនបម្រុងប្រេងដំបូងគេរបស់ប្រទេសនេះ។ ប្រសិនបើរោងចក្រចម្រាញ់ប្រេងមិនទាន់បញ្ចប់ នៅពេលតំបន់ប្រេងអប្សរាក្លាយជាផលិតផលដែលរំពឹងថា នឹងកើតឡើងក្នុងឆ្នាំនេះ ប្រេងឆៅនឹងត្រូវលក់ចេញទៅក្រៅប្រទេស។ ប៉ុន្តែមិនទាន់មានផែនការនៅឡើយទេ ក្នុងការកសាងហេដ្ឋារចនាសម្ព័ន្ធដែលត្រូវការតភ្ជាប់តំបន់អប្សរា និងរោងចក្រចម្រាញ់ប្រេង”។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានបញ្ជាក់ឱ្យដឹងថា បច្ចុប្បន្ននេះកម្ពុជាបាននាំចូលប្រេងឥន្ធនៈពីប្រទេសជាច្រើនមកផ្គត់ផ្គង់លើទីផ្សារប្រទេសកម្ពុជា ដូចជាមកពីប្រទេស វៀតណាម ប្រទេសថៃ ប្រទេសសិង្ហបុរី ប្រទេសម៉ាឡេស៊ី ប្រទេសអារ៉ាប់រួម សហរដ្ឋអាមេរិក ចិន កូរ៉េ ប្រទេសអាល្លឺម៉ង់ ហុងកុង ហ្វីលីពីន ជប៉ុន អូស្ត្រាលី អេស្ប៉ាញឥណ្ឌា អុីតាលី ហូឡង់ តួកគី ប៉ូឡូញ ចក្រភពអង់គ្លេស កាណាដា ប្រទេសអារ៉ាប៊ីសាអូ៊ឌីត និងប្រទេសប៊ែលហ្ស៊ិក។ ក្នុង 1ឆ្នាំ កម្ពុជានាំចូលប្រេងឥន្ធនៈប្រមាណជាង 2លានតោនគិតជាទឹកប្រាក់ប្រមាណជាង 1ពាន់លានដុល្លារអាមេរិក៕

May 27, 2019

រថយន្ត Land Cruiser ឆ្នាំ2020 អាចនឹងមានរាងបែបនេះដែរទេ មើលទៅ?

កាលពីពេលថ្មីៗនេះ គេបានឃើញរូបភាពប៉ុន្មានសន្លឹកជារថយន្តម៉ូដែល Land Cruiser របស់ក្រុមហ៊ុន Toyota ដែលជាការរចនាទៅតាមព័ត៌មានបែកធ្លាយនានារបស់អ្នកឌីហ្សាញជនជាតិរុស្សីមួយក្រុម ដែលហាក់ដូចជាទទួលបានការចាប់អារម្មណ៍ខ្លាំងមែនទែន។

រថយន្តដ៏ពេញនិយមតាំងពីឆ្នាំ2007មកនោះ ត្រូវបានគេផ្លាស់ប្តូររូបរាងយ៉ាងច្រើនបែប(ដូចរូបភាព)។ តែយ៉ាងណាមិញ រូបភាព render មិនផ្លូវការនេះ ត្រូវបានគេលើកជាសំណួរថា តើក្រុមហ៊ុន Toyota នឹងសម្រេចចិត្តបញ្ចេញម៉ូដែលពិសេស Land Cruiser LWB2020 ជាប្រភេទរថយន្ត SUV ដែលមានដល់ទៅ 7កៅអី បែបហ្នឹងមកលើទីផ្សាររថយន្តដែរឬអត់?

ដូច្នេះ សូមរង់ចាំតាមដានទាំងអស់គ្នា។

May 27, 2019

រថយន្តម៉ូដែលថ្មីរបស់ Hyundai មួយនេះ ស្អាតប្លែក!

រថយន្ត Hyundai ម៉ូដែល Venue ជាប្រភេទរថយន្ត SUV ស៊េរីឆ្នាំ2020 ត្រូវបានគេយកទៅកែកុនបន្ថែមពណ៌ខាងក្រៅ ឱ្យកាន់តែទាក់ទាញជាងពណ៌កំណើតចេញពីក្រុមហ៊ុន។

រថយន្ត Hyundai ម៉ូដែល Venue ត្រូវបានបង្ហាញលើវេបសាយផ្លូវការរបស់ក្រុមហ៊ុនហើយ ចំនួន 2ពណ៌ គឺខៀវ និងក្រហម។ តែយ៉ាងណាក្ដី គេបានយកវាទៅច្នៃចេញជា 3ពណ៌ទៀត គឺក្រហម លាយខ្មៅ ខៀវលាយស និងពណ៌សសុទ្ធ យ៉ាងសាមញ្ញៗ តែស្អាតប្លែកជាងមុន។

រថយន្តដែលបំពាក់ដោយប្រព័ន្ធជំនួយសុវត្ថិភាពជាច្រើនមួយនេះ មានកន្លែងសាកថ្មឥតខ្សែ(រន្ធសាកភ្លើង USB) មានអេក្រង់បង្ហាញព័ត៌មានទំហំ 13អ៊ីញ កាមេរ៉ាមើលក្រោយ និងបំពាក់ប្រព័ន្ធសំឡេងជាតន្ត្រីកំដរអារម្មណ៍លាន់រងំពេញរថយន្តថែមទៀតផង។

ចំពោះតម្លៃ និងការចេញលក់នៅលើទីផ្សារសហរដ្ឋអាមេរិក Hyundai នឹងបង្ហាញឱ្យដឹងនៅអំឡុងចុងឆ្នាំនេះ៕

May 27, 2019

ពីង រ៉ូហ្សា តួស្រីល្បីក្នុងរឿង «ទឹកភ្នែកព្រោះសម្រស់» ផ្អាកថតកុនមួយរយៈ ព្រោះមូលហេតុតែមួយនេះ...

កញ្ញាពីង រ៉ូហ្សា ត្រូវបានគេស្គាល់ តាមរយៈការសម្ដែងនៅភាពយន្តមួយចំនួន ដូចជារឿង «ណារ៉ូនិងសូម៉ាលី,ម្ចាស់ចម្ការ,ទឹកភ្នែកព្រោះសម្រស់» និងភាពយន្តជាច្រើនទៀត រួមទាំងរឿងអប់រំមួយចំនួន។ (more…)

May 27, 2019

អាចទេ?? ស៊ែរលើកទឹកចិត្តលោកគ្រូ អុល សំអាង តស៊ូអភិរក្សល្ខោនបាសាក់ទាំងត្រដាបត្រដួស

មកទល់ពេលនេះ គេកាន់តែកត់សម្គាល់ថា វង់ល្ខោនបាសាក់ ស្ទើរតែឈានដល់ដង្ហើមចង្រឹតទៅហើយ ដោយសារតែខ្វះការគាំទ្រ និងខ្វះការជ្រោមជ្រែងពីប្រព័ន្ធផ្សព្វផ្សាយនៅក្នុងកម្មវិធីទូរទស្សន៍។ យ៉ាងណាមិញ គេនៅតែឃើញមេក្រុមវង់ល្ខោនមួយចំនួន បន្តការតស៊ូក្នុងការអភិរក្សទម្រង់សិល្បៈនេះ បើទោះជាទីផ្សារល្ខោនបាសាក់កាន់តែចុះខ្សោយខ្លាំង។

លោកគ្រូ អុល សំអាង មេក្រុមល្ខោនបាសាក់វង់អុលសំអាង រាជធានីភ្នំពេញ បានរៀបរាប់ទាំងអារម្មណ៍ក្ដុកក្ដួលថា ទីផ្សារល្ខោនបាសាក់នាពេលបច្ចុប្បន្នស្ទើរតែត្រូវមហាជនបំភ្លេចជាបណ្ដើរទៅហើយ ខណៈដែលវង់ល្ខោនបាសាក់ដែលធ្លាប់តែរកកម្លាំងចេញសម្ដែងមិនបាន បែរជារកទីផ្សារដើម្បីចេញសម្ដែងលែងចង់ឃើញ។ នោះគឺដោយសារតែសិល្បៈបុរាណមួយនេះ កាន់តែត្រូវបានមហាជនមើលរំលង ស្របគ្នាដែលប្រពន្ធផ្សព្វផ្សាយនៅលើកញ្ចក់ទូរទស្សន៍ក៏គ្មានម៉ោងសម្រាប់ចាក់ផ្សាយល្ខោនបាសាក់ ដើម្បីផ្សព្វផ្សាយឱ្យក្មេងៗ និងយុវជនគាំទ្រ។ ធៀបនឹងអំឡុងទស្សន៍វត្សរ៍ឆ្នាំ80 លោកថាធ្លាក់ចុះស្ទើរតែដល់100 ដឺក្រេ តែលោកមិនបាក់ទឹកចិត្តហើយបោះបង់វង់ល្ខោនដែលខំបង្កើតឡើងនោះទេ គឺនៅតែបន្តតស៊ូ បើទោះជាអាជីពវង់ល្ខោននៅក្នុងពេលនេះ កាន់តែពិបាកប្រកួតប្រជែងនឹងសិល្បៈសម័យ។

លោកគ្រូ អុល សំអាង ក៏បន្តថា កាលពីឱ្យតែមានបុណ្យទានក្នុងវត្ត គេនិយមឱ្យតម្លៃលើល្ខោនបាសាក់ ប៉ុន្តែក្នុងមួយរយៈចុងក្រោយ គេងាកទៅដាក់ធុងបាស់ ឬ តន្ត្រីសម័យវិញ ដោយសារតែហេតុផលយុវវ័យដែលទៅលេងបុណ្យវត្តគាំទ្រតន្ត្រីសម័យខ្លាំងជាង ទើបទីផ្សារល្ខោនបាសាក់ចុះខ្សោយ។ លោកទទូចឱ្យតាមកញ្ចក់ទូរទស្សន៍ មានកម្មវិធីចាក់ផ្សាយពីល្ខោនបាសាក់ ដើម្បីបំផុសឱ្យក្រុមយុវវ័យងាកមកស្រលាញ់ និងគាំទ្រសិល្បៈបុរាណនេះ ទើបជំរុញឱ្យអ្នករៀបចំកម្មវិធីហ៊ានចំណាយជួលល្ខោនបាសាក់ច្រើនឡើងវិញ ដែលអាចឱ្យល្ខោនបាសាក់រស់ឡើងវិញ។ លោកថាល្ខោនបាសាក់មិនត្រឹមតែខ្សត់ទីផ្សារនោះទេ សូម្បីតែយុវជនដែលចាប់អារម្មណ៍មកស្នងសិល្បៈបុរាណនេះ ក៏ខ្សត់ណាស់ដែរ៕

May 27, 2019

ADB ផ្ដល់ឥណទានសម្បទានចំនួន7.64 លានដុល្លារ កសាងឧទ្យានថាមពលពន្លឺព្រះអាទិត្យ កម្លាំង100មេហ្គាវ៉ាត់

ធនាគារអភិវឌ្ឍន៍អាស៊ី ឬAsian Development bank(ADB) បានអនុម័តឥណទានសម្ប ទានចំនួន 7.64លានដុល្លារអាមេរិក ដើម្បីគាំទ្រដល់ការកសាងឧទ្យានថាមពលពន្លឺព្រះអាទិត្យ កម្លាំង100មេហ្គាវ៉ាត់នៅកម្ពុជាដែលគម្រោងនេះនឹងជួយកម្ពុជាអភិវឌ្ឍន៍ធនធានថាមពលកកើត ឡើងវិញ ធ្វើពិពិធកម្មប្រភពថាមពល និងពង្រឹងការប្រកួតប្រជែងនៃសេដ្ឋកិច្ចសង្គមរបស់ខ្លួន។ នេះ បើយោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ីចេញផ្សាយថ្ងៃទី24 ខែឧសភា ឆ្នាំ 2019។

សេចក្ដីប្រកាសព័ត៌មានបានឱ្យដឹងទៀតថា បន្ថែមពីលើឥណទានសម្បទានរបស់ ADB កញ្ចប់ហិរញ្ញប្បទានសម្រាប់គម្រោងឧទ្យានជាតិថាមពលពន្លឺព្រះអាទិត្យនេះ ក៏មានឥណទាន សម្បទានចំនួន 11លានដុល្លារ និង3លានដុល្លារជាហិរញ្ញប្បទានឥតសំណងផងដែរ។ ហិរញ្ញប្ប ទានឥតសំណងនេះទទួលបានពីមូលនិធិអាកាសធាតុយុទ្ធសាស្ត្រ តាមរយៈកម្មវិធីពង្រីកថាមពលកកើតឡើងវិញ។

បន្ថែមពីនេះទៀត ក៏មានហិរញ្ញប្បទានឥតសំណងសម្រាប់ជំនួយបច្ចេកទេសចំនួន 500, 000ដុល្លារដែលផ្ដល់ដោយមូលនិធិ e-Asia និងភាពជាដៃគូចំណេះដឹងនៃសាធារណរដ្ឋកូរ៉េ ដើម្បីគាំទ្រដល់ការអភិវឌ្ឍសមត្ថភាពរបស់អគ្គិសនីកម្ពុជា (EDC) និងអាជ្ញាធរអគ្គិសនីកម្ពុជា (EAC) ដែលជានិយតករអគ្គិសនីជាតិអំពីបច្ចេកវិទ្យាបំប្លែងពន្លឺទៅជាថាមពលអគ្គិសនី និងការរៀបចំផែនការឧទ្យានថាមពលពន្លឺព្រះអាទិត្យ។ ADB នឹងគ្រប់គ្រងធនធានទាំងអស់នេះ។

គម្រោងឧទ្យានជាតិថាមពលពន្លឺព្រះអាទិត្យនឹងជួយដល់ EDC ដែលជាសេវាផ្គត់ផ្គង់អគ្គិសនីជាតិរបស់កម្ពុជា អាចសាងសង់ឧទ្យានជាតិថាមពលពន្លឺព្រះអាទិត្យដែលមានកម្លាំង 100មេហ្គាវ៉ាត់ ព្រមទាំងហេដ្ឋារចនាសម្ព័ន្ធពាក់ព័ន្ធដទៃទៀត រួមមានជាអាទិ៍ ផ្លូវចេញចូល របង និងប្រព័ន្ធបង្ហូរទឹក ក្នុងខេត្តកំពង់ឆ្នាំង។ ADB បានជួយរៀបចំគម្រោងឧទ្យានជាតិថាមពលពន្លឺព្រះអាទិត្យនេះក្រោម ហិរញ្ញប្បទានឥតសំណងពីររដ្ឋាភិបាលកាណាដា និងសិង្ហបុរី។

គម្រោងនេះក៏នឹងកសាងប្រព័ន្ធបញ្ជូនអគ្គិសនីដែលតភ្ជាប់ទៅនឹងបណ្ដាញចែកចាយចម្បង នៅក្បែររាជធានីភ្នំពេញ ដែលនឹងអនុញ្ញាតឱ្យគម្រោងនេះអាចផ្គត់ផ្គង់ថាមពលទៅបណ្ដាញចែកចាយជាតិផងដែរ។

លោក Pradeep Tharakan ប្រធានក្រុមអ្នកឯកទេសខាងផ្នែកការប្រែប្រួលអាកាសធាតុរបស់ ADB មានប្រសាសន៍ឱ្យដឹងថា៖«ការមានប្រភពថាមពលដែលគួរឱ្យជឿជាក់បាន មាននិរន្តរភាព និងតម្លៃសមរម្យ មានសារៈសំខាន់ខ្លាំងណាស់ សម្រាប់ការអភិវឌ្ឍសេដ្ឋកិច្ច របស់ប្រទេសដែលកំពុងមានការរីកចម្រើនឆាប់រហ័សដូចកម្ពុជា។ ជំនួយរបស់ ADB នឹងមិនគ្រាន់តែជួយធ្វើពិពិធកម្មប្រភពថាមពលរបស់កម្ពុជាតាមរយៈការអភិវឌ្ឍថាមពលព្រះអាទិត្យប៉ុណ្ណោះទេ តែវាក៏នឹងជួយឱ្យកម្ពុជាសម្រេចបាននូវគោលដៅ កាត់បន្ថយឧស្ម័នផ្ទះកញ្ចក់របស់ខ្លួន យោងតាមកិច្ចព្រមព្រៀងស្ដីពីការប្រែប្រួលអាកាសធាតុនៅទីក្រុងប៉ារីសផងដែរ»។

ទោះបីជាមានវឌ្ឍនភាពគួរឱ្យកត់សម្គាល់ក្នុងការអភិវឌ្ឍបណ្ដាញថាមពលនៅកម្ពុជាក៏ដោយ ក៏ប្រជាពលរដ្ឋកម្ពុជាជិត 5លាននាក់នៅតែខ្វះលទ្ធភាពទទួលអគ្គិសនីប្រើប្រាស់ ព្រោះថាបើទោះបីកម្ពុជាមានពន្លឺព្រះអាទិត្យច្រើនក៏ដោយ ប៉ុន្តែសមត្ថភាពផលិតថាមពលអគ្គិសនីពីពន្លឺព្រះអាទិត្យ នាពេលបច្ចុប្បន្ន គឺបានត្រឹមតែ 10មេហ្គាវ៉ាត់ប៉ុណ្ណោះ។

ក្នុងឆ្នាំ2018 កម្ពុជាអាចផ្គត់ផ្គង់អគ្គិសនីតាមរយៈបណ្ដាញដែលបានដំឡើងរួចរាល់សរុបចំនួន 2175មេហ្គាវ៉ាត់ ដែលក្នុងនោះថាមពលពីវារីអគ្គិសនីមានចំនួន 1330មេហ្គាវ៉ាត់ ឬប្រមាណ62% និងការផលិតថាមពលអគ្គិសនីពីឥន្ធនៈហ្វូស៊ីលមានចំនួន 780មេហ្គាវ៉ាត់ ឬប្រមាណ36%។

តាមការសិក្សា ADBបានបង្ហាញឱ្យដឹងថា ប្រទេសកម្ពុជាអាចបន្ថែមថាមពលពន្លឺព្រះអាទិត្យ ប្រមាណ 200មេហ្គាវ៉ាត់ទៅក្នុងបណ្ដាញចែកចាយត្រឹមឆ្នាំ2021 ដោយប្រើប្រាស់បច្ចេកវិទ្យាដែល មានស្រាប់ និងដោយមិនប៉ះពាល់ដល់បណ្ដាញចែកចាយ៕

May 27, 2019

សាលារាជធានីភ្នំពេញ - អង្គការ JICA ចុះហត្ថលេខាលើគម្រោងអភិវឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯក

ឯកឧត្ដម ឃួង ស្រេង អភិបាលរាជធានីភ្នំពេញ និងលោកបណ្ឌិត អ៊ីតូ មិមប៉េអ៊ិ (Dr.lto Mimpei) ប្រធានដឹកនាំក្រុមការងារត្រៀមការសិក្សាស្រាវជ្រាវ នៃទីភ្នាក់ងារសហប្រតិបត្តិការ អន្តរជាតិជប៉ុន(JICA) របស់ប្រទេសជប៉ុន បានចុះហត្ថលេខាលើគម្រោងអភិវឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯកក្រោយពីការសិក្សាស្រាវជ្រាវអស់រយៈពេល12ខែ ត្រូវបានបញ្ចប់។

ឯកឧត្ដម ឃួង ស្រេង អភិបាលរាជធានីភ្នំពេញ បានបញ្ជាក់ថា៖ ឯកឧត្តមសូមអគុណចំពោះដៃគូអភិវឌ្ឍន៍ ទីភ្នាក់ងារសហប្រតិបត្តិការអន្តរជាតិជប៉ុនJICA ដែលតែងតែបន្ដជួយដល់កិច្ចដំណើរការអភិវឌ្ឍន៍សំខាន់ៗ និងបានថ្លែងអំណរគុណចំពោះរាជរដ្ឋាភិបាលជប៉ុន ដែលតែងតែលើកទឹកចិត្តបន្ដជួយឧបត្ថម្ភគាំទ្រដល់រដ្ឋបាលរាជធានីភ្នំពេញលើការអភិវឌ្ឍកសាងហេរដ្ឋារចនាសម្ព័ន្ធមួយចំនួន តាមរយៈកិច្ចសហប្រតិបត្តិការជំនួយហិរញ្ញប្បទាន កិច្ចសហប្រតិបត្តិការជំនួយបច្ចេកទេស និងកិច្ចសហប្រតិបត្តិការការទូតដែលជាការរួមចំណែកយ៉ាងសកម្មក្នុងការស្តារ និងអភិវឌ្ឍន៍រាជធានីភ្នំពេញកាន់តែរីកចម្រើនថែមទៀត។

ជាក់ស្តែងគម្រោងកែលម្អប្រព័ន្ធទឹកកខ្វក់ក្នុងរាជធានី ភ្នំពេញ ដែលគម្រោងនេះបានផ្តោតសំខាន់ទៅលើការធ្វើឱ្យប្រសើរឡើង និងការកែលម្អបរិស្ថានទីក្រុងប្រកបដោយប្រសិទ្ធភាព និរន្តរភាព ព្រមទាំងបានលើកកម្ពស់ដល់សោភណភាពរាជធានីភ្នំពេញក្នុងបរិស្ថានស្អាតប្រកបដោយផាសុកភាព និងសម្រួលដល់ការរស់នៅរបស់ប្រជាពលរដ្ឋ ជាពិសេសផ្តល់ភាពរីករាយដល់ប្រជាពលរដ្ឋទៀតផង។

ឯកឧត្ដម ឃួង ស្រេង បានបញ្ជាក់ថា រដ្ឋបាលរាជធានីភ្នំពេញ នៅតែបន្ដចាប់ដៃគូអភិវឌ្ឍន៍ដ៏ល្អជាមួយក្រុមការងារគម្រោងរបស់JICA រួមជាមួយមន្ទីរសាធារណការ និងដឹកជញ្ជូនរាជធានីភ្នំពេញ មន្ត្រីសាលារាជធានីភ្នំពេញ និងក្រុមហ៊ុនស៊ីធីអាយ(CTI) ដែលបានខិតខំប្រឹងប្រែងសិក្សាស្រាវជ្រាវអស់រយៈពេល 12ខែ រហូតបានបញ្ចប់ការសិក្សា និងដាក់ចេញជារបាយការណ៍បញ្ចប់សម្រាប់គម្រោងអភិវឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯកហើយឈានមកដល់ការចុះហត្ថលេខាលើព្រមព្រៀងរវាងភាគីទាំង2 នាពេលនេះ។

ឯកឧត្ដមបន្ដថា គម្រោងអភិវិឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯកនឹង ត្រូវក្លាយជាគម្រោងគំរូដំបូងបង្អស់ សម្រាប់រដ្ឋបាលរាជធានីភ្នំពេញ លើការកែច្នៃទឹកកខ្វក់ ក្នុងបរិមាណ 5000ម៉ែត្រគុបក្នុង 1ថ្ងៃ ដែលមានតួនាទីសំខាន់ក្នុងការកាត់បន្ថយការបំពុល បរិស្ថានមួយកម្រិតធំនៅភាគខាងជើងនៃរាជធានីភ្នំពេញ។ ឯកឧត្តមសង្ឃឹមថា គម្រោងនេះនឹងត្រូវបានអនុម័តជាផ្លូវការពីរាជរដ្ឋាភិបាលជប៉ុននាពេលឆាប់ៗខាងមុខនេះ។

លោកបណ្ឌិត អ៊ីតូ មិមប៉េអ៊ិ (Dr. lto Mimpei) បានមានប្រសាសន៍បន្ថែមថា ជាតិពុលដែលហូរចូលទៅក្នុងទន្លេបឹងបួ ធ្វើឱ្យប៉ះពាល់ដល់បរិស្ថាន និងសុខភាពប្រជាពលរដ្ឋ និងសត្វយ៉ាងខ្លាំងក្លា។ តាមលទ្ធផលនៃការស្រាវជ្រាវ ការស្តារបរិស្ថានឡើងវិញនេះ គឺត្រូវចំណាយថវិកាច្រើនលើសពីការវិនិយោគ។ បញ្ហានេះ ចំណុចសំខាន់យើងត្រូវធ្វើប្រព័ន្ធលូបង្ហូរទឹកនៅដំណាក់កាលបឋម ដើម្បីទប់ទល់នឹងការចំណាយច្រើននេះ។

លោកបានបន្តទៀតថា គម្រោងអភិវឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯកនេះអាចបន្សុទ្ធទឹកកខ្វក់បានក្នុង 1ថ្ងៃ 5,000ម៉ែត្រគុប។ ក្រៅពីការអភិវឌ្ឍផ្នែកខាងត្បូងហើយផ្នែកខាងជើងយើងក៏នឹងចូលរួមធ្វើការអភិវឌ្ឍផងដែរ។ លោកបានបញ្ជាក់ថា ក្រោយការចុះហត្ថលេខាលើ គម្រោងអភិវឌ្ឍន៍ប្រព័ន្ធប្រឡាយលូទឹកកខ្វក់នៅបឹងជើងឯកនេះរួច យើងនឹងបញ្ជូនទៅឱ្យរាជរដ្ឋាភិបាលជប៉ុនដើម្បីធ្វើការអនុម័តជាចុងក្រោយ៕

May 27, 2019

Sony Xperia 10 ដាក់លក់ក្នុងតម្លៃធូរថ្លៃ លើ Amazon និង Best Buy

Sony Xperia 10 បានដាក់លក់នៅលើវេបសាយលក់រាយ Amazon និង Best Buyក្នុងតម្លៃ 300 ទៅ 350ដុល្លារ ព្រមទាំងមានជម្រើស RAM 3GB មេម៉ូរី 64GBទៀតផង។ លោកអ្នកអាចកម្ម៉ង់ទិញតាម link ខាងក្រោមនេះបាន៖

https://www.amazon.com/gp/offer-listing/B07QJDCMPZ?SubscriptionId=AKIAJV7NECSNR3W5NIWA&tag=phone1e1d-20&linkCode=xm2&camp=2025&creative=386001&creativeASIN=B07QJDCMPZ

ស្មាតហ្វូនស៊េរី Xperia 10 នេះបានបង្ហាញខ្លួនកាលពីដើមឆ្នាំ2019 មានមុខងារពិសេសលើកាមេរ៉ា ជាពិសេសអេក្រង់។ កាមេរ៉ាក្រោយភ្លោះ 13MP+5MP អាចថតវីដេអូ 4K UHD ប្រើឈីប Snapdragon 630 លើសពីនេះបើលោកអ្នកកុម្ម៉ង់ទិញតាមអនឡាញ នឹងមានថែមមេម៉ូរីកាត 128GB មួយសន្លឹកទៀតផង៕

May 27, 2019

Category: សង្គម និងសេដ្ឋកិច្ច