កាន់តែកក្រើកខណៈតារាចម្រៀងសម្ដែងរួមមាន លោកនីកូ កញ្ញា រ៉េត ស៊ូហ្សាណា នាយគ្រឿន អ្នកនាងខ្ញុង កញ្ញានីឡា និង លោក ណាខុន ជាដើម បានចាប់ដៃរួមគ្នាត្រៀមខ្លួនមកបង្ហាញឈុតសម្លៀកបំពាក់ពិព័រណ៍អាពាហ៍ពាពាហ៍ជាទ្រង់ទ្រាយធំប្រចាំឆ្នាំលើកទី៦ នៅសាលពិព័ណ៍កោះពេជ្រ។ (more…)
Category: សង្គម និងសេដ្ឋកិច្ច
ម្ចាស់កសិដ្ឋានម្នាក់ចំណេញពីការលក់កូនដូងក្រអូប ខណៈទីផ្សារកំពុងត្រូវការខ្លាំង
នៅក្នុងតំបន់ទេសចរណ៍នៃខេត្តនីមួយៗរបស់ប្រទេសកម្ពុជាគេសង្កេតឃើញមានដាក់លក់យ៉ាងសម្បូរពោរពាសនូវផលដំណាំបន្លែផ្លែឈើធម្មជាតិគ្រប់ប្រភេទដែលម្ចាស់តំបន់ក្នុងស្រុកទាំងនោះបានដាំ និងទទួលបានផលយ៉ាងល្អ និងមានតម្រូវការទីផ្សារច្រើនទៀតផង ដែលរួមមាន ផ្លែក្រូចពោធិ៍សាត់ចេក ល្ហុង មៀន ស្វាយ និងទុរេនជាដើម ប៉ុន្តែដំណាំផ្លែឈើធម្មជាតិដែលមានទីផ្សារជាប់ជានិច្ចមួយទៀតដែលប្រជាជនខ្មែរបានស្គាល់គ្រប់គ្នា គឺដូងក្រអូប ក៏ជាដំណាំកសិផលមួយដែរ ដែលបានលេចវត្តមានក្នុងរយៈពេលប៉ុន្មានឆ្នាំចុងក្រោយនេះ និងបានទទួលបានជោគជ័យក្នុងការរកទីផ្សារ ហើយទទួលបាននូវការគាំទ្រ និងពេញនិយមខ្លាំងពីប្រជាពលរដ្ឋផងដែរ។
ដោយឡែកដូងក្រអូបដែលជាដំណាំហូបផ្លែមួយដែរនោះ ក៏ត្រូវបានកសិករជាច្រើនសម្រេចចិត្តផ្លាស់ប្តូរមកដាំដំណាំដូងក្រអូបនេះវិញ ដោយសារតែដំណាំមួយនេះមិនពិបាកក្នុងការដាំ និងថែទាំទេ និងថែមទាំងងាយស្រួលរកទីផ្សារទៀតផង ហើយជាពិសេសដូងក្រអូបក៏ជាទីពេញនិយមសម្រាប់ប្រជាពលរដ្ឋខ្មែរចូលចិត្តពិសា ដោយសារទឹក និងសាច់របស់វាមានរសជាតិផ្អែមឆ្ងាញ់ និងក្រអូបខុសពីផ្លែដូងដទៃទៀត។
ដោយសារតែកសិករខ្មែរ ងាកមកដាំដំណាំដូងក្រអូប វិញនេះ ធ្វើឱ្យម្ចាស់កសិដ្ឋាននៅខេត្តបាត់ដំបងមានកូនដើមឈើហូបផ្លែគ្រប់ប្រភេទ បានលក់កូនដើមដូងក្រអូប ប៉ុន្មានខែកន្លងមកនេះបានប្រាក់កម្រៃក្នុង1ខែខ្ទង់ពាន់ដុល្លារ។
លោក គួន ឌឿន កសិករអ្នកដាំដើមដូងក្រអូបនៅកសិដ្ឋានកសិកម្មភ្នំព្រឹក បានរៀបរាប់ប្រាប់កាសែតឡារ៉ែនពាណិជ្ជថា៖ មូលហេតុដែលកសិករខ្មែរចាប់អារម្មណ៍មកដាំនូវដំណាំដូងក្រអូបនេះ គឺដោយសារកត្តាតម្លៃទីផ្សារ ព្រោះថា ដំណាំហូបផ្លែដូងក្រអូបនេះ វាពេញនិយមសម្រាប់ការបរិភោគរបស់ពលរដ្ឋទូទៅ ហើយតម្លៃវាក៏មានលក្ខណៈល្អប្រសើរ ពុំមានការធ្លាក់ថ្លៃខ្លាំងដូចដំណាំផ្សេងៗ ឡើយ ដូច្នេះទើបពួកគាត់សម្រេចចិត្តងាកមកដាំដូងក្រអូបនេះវិញ។
អ្នកមានបទពិសោធខាងកសិកម្មរូបនេះបានរៀបរាប់ថា៖“3-4ឆ្នាំមុន នៅស្រុកខ្មែរយើងពុំទាន់មានការបណ្តុះពូជដូងក្រអូបនេះទេ ព្រោះគ្រាប់ពូជបណ្តុះនៅស្រុកយើងធ្វើមិនបានល្អ។ ដូច្នោះហើយទើបយើងតែងនាំពូជពីថៃមកលក់ ដូចជាកសិដ្ឋានរបស់ខ្ញុំ ក៏នាំពូជពីថៃមកលក់បន្តដែរ ដែលតម្លៃយើងលក់ចេញបន្ត គឺពី5$ ទៅ7$។ លោកបានបញ្ជាក់ថា សព្វថ្ងៃពូជដើមដូងប្រភេទដូងក្រអូប ដែលគេនិយមដាំនោះ បច្ចុប្បន្នយើងបណ្តុះនៅក្នុងស្រុកបានល្អហើយ រីឯតម្លៃវាយើងលក់ក្នុងតម្លៃត្រឹម3$ ប៉ុណ្ណោះ”។លោកបន្តថា៖“ប្រជាពលរដ្ឋដែលមានដីទំនេរ គួរតែងាកមកដាំដំណាំប្រភេទដូងក្រអូបនេះវិញ ព្រោះវាមានរយៈពេលខ្លី មិនពិបាកថែទាំ និងមានតម្រូវការខ្ពស់លើទីផ្សារទៀតផង”។
លោកបានឱ្យដឹងទៀតថា៖“ក្នុងរយៈពេលប៉ុន្មានខែកន្លងមកនេះ កសិដ្ឋានរបស់ខ្ញុំបានលក់ដាច់កូនចេកអំបូងលឿង និងទុរេន ដែលមានក្រុមហ៊ុនចិនសហការជាមួយឧកញ៉ាមួយចំនួនបានមកទិញយកទៅដាំជាច្រើននៅតាមកសិដ្ឋានធំៗនៅក្នុងបណ្តាខេត្តមួយចំនួន។ រហូតមកដល់ឥឡូវនេះ ខ្ញុំបានលក់ដាច់កូនដើមដូងក្រអូបវិញ ដោយក្នុង1ខែលក់ដាច់បានទាបបំផុតក៏បាន 5,000ដើមដែរ”។
លោក ឌឿន បានឱ្យដឹងទៀតថា ចំពោះខេត្តដែលបានទិញដើមកូនដូងក្រអូបរបស់លោក យកទៅដាំមានខេត្តរតនគិរី មណ្ឌលគិរី កំពង់ចាម កំពង់ធំ កំពត ត្បូងឃ្មុំ តាកែវ កំពង់សោម កំពង់ស្ពឺ កែប ស្ទឹងត្រែង និងសៀមរាបជាដើម ដែលកសិដ្ឋាននៅបណ្តាខេត្តទាំងនោះមានចំនួនពី5 ទៅ10កសិដ្ឋាន ហើយក្នុងកសិដ្ឋាននីមួយៗមានផ្ទៃដីដាំដុះពី10 ទៅ50 ឬ100ហិកតាឯណោះ។
លោកបានឱ្យដឹងថា ដំណាំដូងក្រអូបនេះមិនពិបាកដាំ និងថែទាំដូចដំណាំផ្សេងៗនោះទេ ពោលគឺវាត្រូវការតែទឹក និងជីបំប៉នគល់តែប៉ុណ្ណោះ។ ជាទូទៅដូងប្រភេទនេះឱ្យផលបានពេញមួយឆ្នាំ។ ប៉ុន្តែការទទួលបានផលពីដូងនេះច្រើន ឬតិច វាក៏អាស្រ័យទៅលើការថែទាំ និងនៅតាមរដូវកាលផងដែរ ដូចជានៅរដូវវស្សា ដូងឱ្យផលបានច្រើន និងល្អតែអាចថយចុះក្នុងរដូវប្រាំង ដោយសារអាកាសធាតុក្តៅ និងទឹកផ្តល់មិនបានគ្រប់គ្រាន់។ “ដូងមួយដើម យ៉ាងហោចណាស់នឹងឱ្យផលក្រោយរយៈពេលថែទាំយ៉ាងយូរ 3-4ឆ្នាំ និងទទួលបានពី180 ទៅ200ផ្លែ ឬលើសពីនេះក្នុង1ឆ្នាំ”។ នេះជាការអះអាងរបស់ លោក គួន ឌឿន។
លោក គួន ឌឿន បានបញ្ជាក់ថា ក្នុងការដាំដូងក្រអូបនេះ លើផ្ទៃដី 1ហិកតា គេអាចរកចំណូលបានចាប់ពី 3,000ដុល្លារ ទៅជាងម៉ឺនដុល្លារ ដោយក្នុងនោះការដាំដុះក្នុង 1ហិកតា ត្រូវប្រើប្រាស់កូនដូងក្រអូបចំនួន 204ដើម ឯផ្លែដូងក្រអូបវិញ គេលក់ក្នុងតម្លៃបោះដុំចាប់ពី 1,500រៀលឡើងទៅក្នុង 1ផ្លែ តែនៅលើទីផ្សារលក់រាយ មានតម្លៃ 3,000-3,500រៀលក្នុង 1ផ្លែ”។
លោកបានប្រាប់ថា កាលពីលោកយកដូងក្រអូបពីថៃមកដាំ គឺយើងបានបង្រៀនពីបច្ចេកទេសដាំដល់កសិករ ដោយពុំបានប្រាប់ឱ្យប្រើជីគីមីទេ គឺឱ្យប្រើជីធម្មជាតិ ដោយមានអ្នកបច្ចេកទេសថៃមកពន្យល់ពីការដាំ និងថែទាំ។ លោកថា ដូងក្រអូបមិនពិបាកដាំប៉ុន្មានទេ តែរយៈពេល 3 ទៅ4ឆ្នាំវានឹងចាប់ផ្ដើមឱ្យផលហើយ ហើយចំពោះការដាំវិញ គឺក្នុង 1ហិកតា គេដាំប្រមាណជា 200ដើម គឺជាទម្លាប់របស់កសិករ។
លោក ឌឿន ក៏បានអំពាវនាវដល់បងប្អូនប្រជាពលរដ្ឋខ្មែរទាំងអស់ដែរថា សុំឱ្យបន្តការគាំទ្រដំណាំធម្មជាតិរបស់កូនខ្មែរ ព្រោះថាប្រជាកសិករយើងបានងាកមកចាប់ផ្ដើមដាំដូងក្រអូបជាបន្តបន្ទាប់ច្រើននៅក្នុងឆ្នាំ2019 នេះ ហើយផ្លែដូងក្រអូបនេះក៏មានតម្លៃសមរម្យ មិនថ្លៃជាងផ្លែដូងក្រអូបនាំចូលពីប្រទេសជិតខាងនោះទេ ហើយដូងក្រអូបថែមទាំងជាដំណាំកសិ-ឧស្សាហកម្មសំខាន់មួយក្នុងចំណោមដំណាំហូបផ្លែជាច្រើនទៀតដែលយើងគួរពង្រីកការដាំដុះនៅកម្ពុជាទៀតផង៕
ប៉ាគីស្ថាន ប្រកួតមិត្តភាពជាមួយ បារ៉ែន មុនប៉ះកម្ពុជា វគ្គជម្រុះដំបូង World Cup
ក្រុមបាល់ទាត់ជម្រើសជាតិប៉ាគីស្ថាន (ក្រុមដែលសហព័ន្ធកីឡាបាល់ទាត់ពិភពលោក FIFA ទទួលស្គាល់ ) នឹងធ្វើការប្រកួតកម្ដៅសាច់ដុំជាមួយ ក្រុមជម្រើសជាតិបារ៉ែន អាយុក្រោម 23ឆ្នាំ នៅរាត្រីនេះ។
ក្រុមបាល់ទាត់ជម្រើសជាតិនៃប្រទេសប៉ាគីស្ថាន បានបញ្ចប់ការធ្វើតេស្តកីឡាករ និងបានបញ្ចេញបញ្ជីឈ្មោះកីឡាករ 23រូបចុងក្រោយដែលនឹងត្រូវមកប្រកួតជាមួយនឹងក្រុមម្ចាស់ផ្ទះកម្ពុជារួចរាល់ហើយ។
គួរបញ្ជាក់ផងដែរថា ក្រុមបាល់ទាត់ជម្រើសជាតិកម្ពុជា មិនទាន់បានត្រៀមអ្វីទាល់តែសោះឡើយ សម្រាប់ការប្រកួតដំបូង វគ្គជម្រុះ World Cup ជាមួយនឹងប៉ាគីស្ថាន ដោយមិនទាន់ទាំងមានសូម្បីតែបញ្ជីឈ្មោះកោះហៅកីឡាករផង៕
អស្ចារ្យ ប្រទេសឥណ្ឌូនេស៊ី ជាប្រទេសដំបូងនៅអាស៊ាន ដែលប្រើប្រាស់បច្ចេកវិទ្យា VAR
លីកកំពូលនៃប្រទេសឥណ្ឌូនេស៊ី អាចក្លាយជាលីកកំពូលដែលទំនើបជាងគេបង្អស់ក្នុងតំបន់អាស៊ាន ក្រោយពេលដែលកិច្ចប្រជុំនៃលីកកំពូលប្រទេសនេះបានសម្រេចដាក់ឱ្យប្រើប្រាស់បច្ចេកវិទ្យាទំនើបបំផុតមួយនេះ (VAR) ក្នុងការកាត់សេចក្តីការប្រកួត។
សហព័ន្ធកីឡាបាល់ទាត់ ឥណ្ឌូនេស៊ី បានបង្ហាញអំពីគោលបំណងនៃការប្រើប្រាស់បច្ចេកវិទ្យានេះថា គឺដោយសារតែចង់ឱ្យការប្រកួតបាល់ទាត់ក្របខ័ណ្ឌលីកកំពូលក្នុងប្រទេសរបស់ខ្លួនមានគុណភាពកាន់តែល្អបន្ថែមឡើងទៀត ក៏ដូចជាដើម្បីអភិវឌ្ឍវិស័យកីឡាបាល់ទាត់ឱ្យដើរទៅតាមបដិវត្តន៍នៃបច្ចេកវិទ្យាផងដែរ។
គួរបញ្ជាក់ផងដែរថា បច្ចេកវិទ្យា VAR នេះត្រូវបាន FIFA សម្រេចដាក់ឱ្យប្រើប្រាស់សាកល្បងក្នុងឆ្នាំ2017 ហើយការប្រើប្រាស់ផ្លូវការលើកដំបូង គឺនៅក្នុងព្រឹត្តិការណ៍ World Cup 2018 នៅប្រទេសរុស្ស៊ី ហើយទទួលបានជោគជ័យ និងទទួលបានការគាំទ្រយ៉ាងខ្លាំងនៅលើពិភពលោក៕
ការអប់រំកុមារតូចៗជាវិធីដ៏សំខាន់ដើម្បីអនាគតធនធានមនុស្សប្រកបដោយគុណភាព និងសក្តានុពល
ការអប់រំកុមារតូចៗ មិនថានៅផ្ទះ ឬនៅសាលារៀនទេ គឺជារឿងសំខាន់ណាស់ដែលអាណាព្យាបាលគួរយកចិត្តទុកដាក់ឱ្យបានច្រើនបំផុតតាមដែលអាចធ្វើទៅបាន ព្រោះពួកគេកំពុងស្ថិតក្នុងវ័យដែលមានថាមពលខួរក្បាលដ៏អស្ចារ្យ និងគ្មានដែនកំណត់…គ្រាន់តែថា ការបណ្តុះបណ្តាល និងអភិវឌ្ឍន៍សមត្ថភាពកុមារនេះ វាទាមទារឱ្យអាណាព្យាបាលត្រូវមានការយកចិត្តទុកដាក់ លះបង់ និងមានភាពអត់ធ្មត់ខ្ពស់ទាំងក្នុងការស្វែងយល់ពីពួកគេ។ ថ្ងៃនេះ កាសែតឡារ៉ែន ពាណិជ្ជបានធ្វើបទសម្ភាសមួយជាមួយលោកស្រី ម៉ក់ វាសនា នាយិកាប្រតិបត្តិក្រុមហ៊ុន “តារារះអាស៊ីអាគ្នេយ៍” ដែលផ្គត់ផ្គង់សម្ភារសិក្សាកុមារបែបថ្មី អំពីចំណុចសំខាន់ៗមួយចំនួនក្នុងការជួយអភិវឌ្ឍសមត្ថភាពរបស់កុមារតូច។
1. តើមូលហេតុអ្វីទើបអាណាព្យាបាលគួរយកចិត្តទុកដាក់ក្នុងការបណ្តុះបណ្តាលកុមារតាំងពីវ័យតូច?
ការបណ្តុះបណ្តាល និងការអប់រំកុមារ គួរចាប់ផ្តើមកាន់តែឆាប់ កាន់តែល្អ។ ជាពិសេស ក្មេងតូចៗវ័យក្រោម3ឆ្នាំ ដោយសារមូលហេតុសំខាន់ 2យ៉ាង៖
មូលហេតុទី1 គឺសរសៃប្រសាទខួរក្បាលក្មេងតូចៗបន្តកើតមានជារៀងរាល់ថ្ងៃបន្ទាប់ពីបានប្រសូតពីផ្ទៃម្តាយ សរសៃប្រសាទទាំងនេះនឹងតភ្ជាប់គ្នាតាមរយៈបទពិសោធ(ពាក្យសម្ដី សកម្មភាព រូបភាព ។ល) ដែលមាតាបិតា និងបុគ្គលជុំវិញផ្តល់ឱ្យ។ ការតភ្ជាប់គ្នានៃសរសៃប្រសាទទាំងនេះនឹងបង្កើនសមត្ថភាពចងចាំនិងភាពឆ្លាតវាងវៃរបស់កុមារលើសពីការស្មាន។ សូមមាតាបិតាធ្វើការសង្កេតមើលបុត្រតូចៗរបស់ខ្លួន ហើយជឿជាក់ចុះថា ពួកគេពិតជាអាចយល់ និងចាប់យកបាននូវភាសា សំឡេង និងរូបភាព មិនថាទាំងអស់នោះជារឿងសាមញ្ញ ឬស្មុគស្មាញនោះទេ។ ពិតណាស់!កុមារតូចៗមិនទាន់អាចបញ្ចេញសមត្ថភាពរបស់ខ្លួនបានភ្លាមៗតាមការចង់បានរបស់មាតាបិតានោះទេក៏ប៉ុន្តែពួកគេអាចទទួលយកបទពិសោធ និងសមត្ថភាពរបស់ពួកគេមកបង្ហាញ ក៏ដូចជាប្រើប្រាស់ក្នុងស្ថានភាពណាមួយនាពេលអនាគតបាន។ សរសៃប្រសាទថ្មីៗទាំងនេះនឹងកាត់បន្ថយបន្តិចម្តងៗនៅពេលកុមារមានវ័យធំឡើង។មូលហេតុទី2 គឺកុមារតូចៗត្រូវបានគ្របដណ្តប់ ឬក៏ទទួលឥទ្ធិពលខ្លាំងពីខួរក្បាលផ្នែកខាងស្តាំ (ផ្តោតលើរូបភាព អារម្មណ៍) ច្រើនលើសលប់ជាងខួរក្បាលផ្នែកខាងឆ្វេង (ភាសា ការពិចារណា តក្កវិជ្ជា) ដូច្នេះហើយបានជាពួកគេមិនទាន់យល់ពីហេតុផល ការទទួលខុសត្រូវ ឬការបកស្រាយអ្វីច្រើនជាងការទាមទារចំណាប់អារម្មណ៍ ការថ្នាក់ថ្នម និងបំពេញតែចិត្តពួកគេខ្លួនឯងនោះទេ ប៉ុន្តែដោយសារតែហេតុផលនេះហើយទើបការបង្វឹកហាត់ការចងចាំ និងសមត្ថភាពពិសេសរបស់ពួកគេ តាមរយៈរូបភាព ការស្រមើស្រមៃការច្នៃប្រឌិត មានភាពងាយស្រួលខ្លាំងពេលនៅជាកុមារភាព។
ហេតុដូចនេះ ការចាប់ផ្តល់បទពិសោធល្អៗឱ្យកុមារតូចៗ គឺជាទម្លាប់សំខាន់មួយក្នុងការចូលរួមបង្កើនសមត្ថភាព និងសក្តានុពលរបស់ពួកគេ។
2. ចុះអ្វីទៅជាបទពិសោធដែលមាតាបិតាគួរផ្តល់ឱ្យកុមារតូច? តើលោកស្រីអាចផ្តល់ជាឧទាហរណ៍ខ្លះៗបានទេ?
ក្រៅពីការបរិភោគម្ហូបអាហារដែលមានប្រយោជន៍ដល់សុខភាពហើយ ការគេងគ្រប់គ្រាន់ ការលម្ហែកម្សាន្តសប្បាយ ការធ្វើលំហាត់ប្រាណ និងបទពិសោធល្អៗ គឺជារឿងដែលមាតាបិតាគួរយកចិត្តទុកដាក់ក្នុងការផ្តល់ឱ្យកុមារតូចៗ រួមទាំងការប្រស្រ័យទាក់ទងរវាងមាតាបិតា និងបុត្រធិតា ការបណ្តុះបណ្តាលនៅសាលារៀនការប្រៀនប្រដៅ និងអប់រំបន្ថែមនៅផ្ទះទៀតផង។ចំណុចទី1 គឺការប្រស្រ័យទាក់ទងរវាងមាតាបិតា និងបុត្រធិតា៖ ពាក្យពេចន៍ផ្អែមល្ហែម ការនិយាយលើកទឹកចិត្ត ការថ្នាក់ថ្នម បបោសអង្អែល ដែលមាតាបិតានិយាយ និងធ្វើដាក់បុត្រធិតារបស់ខ្លួនសុទ្ធតែអាចជួយរំញោច និងតភ្ជាប់ប្រព័ន្ធសរសៃប្រសាទទាំងចាស់ និងថ្មីរបស់ពូកគេឱ្យប្រសើរទ្បើងទាំងអស់។ ការចំណាយពេលវេលាស្តាប់ និងឆ្លើយតបនឹងសំនួរ ឬការហៅរបស់ពួកគេ អាចជួយបង្កើនទំនុកចិត្ត និងជំរុញឱ្យពួកគេក្លាហានក្នុងការប្រស្រ័យទាក់ទងជាមួយអ្នកដទៃ។សូមមាតាបិតាបង្ហាញការយកចិត្តទុកដាក់លើការសួរឬការហៅរបស់បុត្រធិតារបស់ខ្លួន មិនថាពួកគេនៅតូចប៉ុនណាក៏ដោយ ព្រោះបើខ្វះខាតទង្វើទាំងនេះ វាអាចនឹងធ្វើឱ្យពួកគាត់បាក់ទឹកចិត្ត ខ្វះជំនឿចិត្ត និងយល់ខុសពីសារៈសំខាន់នៃទំនាក់ទំនងក្នុងគ្រួសារ និងសង្គម។ បន្ថែមលើនេះទៀត ការចេះបង្ហាញពីការមានអធ្យាស្រ័យ ចេះយោគយល់ និងធ្វើជាគំរូល្អឱ្យពួកគេឃើញពីទំនាក់ទំនងដែលមាតាបិតាមាន ឬបានធ្វើជាមួយពួកគេ ក៏ដូចជាអ្នកដទៃដែរនោះ គឺជាការផ្តល់នូវរូបភាពល្អៗនៃទំនាក់ទំនងរវាងសមាជិកគ្រួសារ និងរវាងអ្នកនៅជុំវិញខ្លួន។
ចំណុចទី2 គឺការបណ្តុះបណ្តាលនៅសាលារៀន៖ការអប់រំនៅសាលារៀនពិតជាចាំបាច់ណាស់ក្នុងការផ្តល់ឱកាសដល់កុមារឱ្យទទួលបាននូវចំណេះដឹង ជំនាញ និងការសម្របសម្រួលខ្លួនជាមួយនឹងបរិស្ថានថ្មីដែលខុសពីនៅផ្ទះរបស់ខ្លួន ដើម្បីត្រៀមខ្លួនជាបណ្តើរៗក្នុងការរស់នៅដោយឯករាជ្យជាមួយនឹងជំនឿចិត្តខ្ពស់។ ហេតុនេះហើយ ការស្វែងយល់អំពីសាលារៀនគឺជាបញ្ហាសំខាន់ណាស់ មុននឹងមាតាបិតាសម្រេចចិត្តបញ្ជូនបុត្រធិតាឱ្យទៅសិក្សានៅសាលាណាមួយ។ ក្នុងន័យនេះកត្តាមួយចំនួនដែលអាណាព្យាបាលគួរយកមកធ្វើជាធាតុផ្សំក្នុងការសម្រេចចិត្តក្នុងរឿងនេះមានដូចជា បរិយាកាស សុវត្តិភាពនៃបរិវេណ ឬឧបករណ៍របស់សាលា អនាម័យម្ហូបអាហារសម្រាប់ក្មេងដែលសម្រាកនៅសាលា ប្រវត្តិរបស់សាលា វិន័យរបស់សាលា គុណភាពរបស់សាលាដែលរួមបញ្ចូលទាំងកម្មវិធីសិក្សា ឧបករណ៍ជំនួយសមត្ថភាព និងបទពិសោធរបស់គ្រូបង្រៀន និងតម្លៃសិក្សាទៅតាមលទ្ធភាពនៃគ្រួសារនីមួយ។ ទាំងអស់នេះ គឺដើម្បីឱ្យប្រាកដក្នុងចិត្តថា បុត្រធិតារបស់លោកអ្នកពិតជាបានទទួលបានការអប់រំប្រកបដោយគុណភាព និងសុវត្ថិភាពប្រាកដមែន។
ចំណុចទី3 ការអប់រំបន្ថែមនៅផ្ទះ៖ មាតាបិតាជាអ្នកបង្រៀនកូនឱ្យចេះនិយាយ ដើរ រត់ គោរពចាស់ទុំទៅតាមវិវឌ្ឍនាការនៃវ័យរបស់បុត្រធិតារបស់ខ្លួន។ ទាំងនាងខ្ញុំទាំងគេមានចិត្តរំភើបណាស់នៅពេលឮកូនតូចៗរបស់ខ្លួនចេះនិយាយ ជាពិសេស គឹពាក្យដំបូងនៃជីវិតរបស់ពួកគេ។ ហើយក៏សប្បាយចិត្តនៅពេលឃើញពួកគេលូតលាស់ទាំងរូបរាងកាយ និងបញ្ញានិងទទួលបានការអប់រំល្អត្រឹមត្រូវនៅឯសាលារៀន។ក៏ប៉ុន្តែ មាតាបិតាអាចនឹងមិនត្រឹមតែសប្បាយចិត្តនោះទេ ថែមទាំងមានមោទនភាពចំពោះបុត្រធិតារបស់ខ្លួនដែលប្រកបដោយសក្តានុពលខ្ពស់ទៀតផង ប្រសិនបើមាតាបិតាអាចប្រឹងប្រែងធ្វើការអប់រំបន្ថែមនៅផ្ទះទៅឱ្យពួកគេ ជាពិសេសបុត្រធិតាតូចៗ ពីព្រោះការអប់រំបន្ថែមនៅផ្ទះអាចជួយពង្រឹងសមត្ថភាពផ្នែកបញ្ញានិងស្មារតី (តាមរយៈការបញ្ជ្រាបការអប់រំអំពីគុណតម្លៃក្នុងការរស់នៅ) បង្កើនភាពស្និទ្ធស្នាលរវាងមាតាបិតា និងបុត្រធិតា ដែលអាចឱ្យមាតាបិតាក្លាយជាមិត្តជាទីទុកចិត្តរបស់បុត្រធិតាខ្លួនក្នុងការពិភាក្សាបញ្ហាតូច ឬធំដែលពួកគេជួបប្រទះ។ គុណប្រយោជន៍នៃការបើកចំហការពិភាក្សានេះនឹងនាំឱ្យមាតាបិតាស្គាល់និងយល់ពីបុត្រធិតារបស់ខ្លួនបានច្រើន និងអាចជួយផ្តល់ជាមតិយោបល់ល្អៗក្នុងការដោះស្រាយបញ្ហារបស់ពួកគេ។
3. ថ្មីៗនេះលោកស្រីបានផ្សព្វផ្សាយអំពីសម្ភារសិក្សាភាសាអង់គ្លេសបែបថ្មីដែលនាំចូលពីបរទេសតើសម្ភារទាំងនោះអាចចូលរួមក្នុងការបណ្តុះបណ្តាលកុមារយ៉ាងដូចម្តេចដែរ?
ដើម្បីឆ្លើយតបទៅនឹងបញ្ហាកង្វះខាតពេលវេលា និងសម្ភារសិក្សាដែលមានលក្ខណៈអប់រំជាប្រព័ន្ធ សម្រាប់កុមារតូចៗ ក្រុមហ៊ុននាងខ្ញុំបាននាំចូលសម្ភារសិក្សាភាសាបែបថ្មីសម្រាប់ជាជម្រើសមួយក្នុងចំណោមជម្រើសផ្សេងៗទៀតដើម្បីជាជំនួយដល់មាតាបិតាក្នុងការអប់រំកុមារតូចៗអាយុពី 3 ទៅ 8ឆ្នាំបន្ថែមនៅផ្ទះ។ វាជាប្រភេទសៀវភៅអង់គ្លេសដែលអាចប្រើប្រាស់ជាមួយប៊ិចអាន (Walter 3) ដោយអាចប្តូរភាសាអង់គ្លេស និងចិន។ វាត្រូវបានគេរៀបរៀងទ្បើងដោយយកចិត្តទុកដាក់ដោយអ្នកជំនាញអប់រំដែលមានបទពិសោធយូរឆ្នាំ។ ដៃគូរបស់យើងឈ្មោះ ETL Learning ជាបុត្រសម្ព័ន្ធរបស់ Time Publishing Group ដែលជាក្រុមហ៊ុនបោះពុម្ពផ្សាយដ៏ល្បីមួយនៅអាស៊ីប៉ាស៊ីហ្វិក។ ETL Learning កំពុងមានដៃគូប្រហែល20ប្រទេសទូទាំងពិភពលោក។ សម្ភារសិក្សាទាំងនេះមាន 5ឈុត ដែលមាតាបិតាអាចជ្រើសរើសយកឈុតណាមួយក៏បាន ដែលសុទ្ធតែឆ្លើយតបទៅនឹងតម្រូវការជាក់ស្តែងរបស់ពួកគាត់ទាំងអស់។ឈុតទី1៖ A Child’s First Library of Learning៖វាជាបណ្ណាល័យដំបូងគេសម្រាប់កុមារដែលគ្របដណ្តប់លើប្រធានបទធំ4 គឺជីវិត វិទ្យាសាស្ត្រ ធម្មជាតិ និងពិភពលោកយើង។ វាអាចផ្តល់អត្ថប្រយោជន៍ដល់កុមារឱ្យទទួលបាននូវចំណេះដឹងទូទៅ តាមរយៈសំណួរ និងចម្លើយ ដែលបង្ហាញតាមរយៈរូបភាពចម្រុះពណ៌ ប្លែកៗ ដែលអាចទាក់ទាញក្មេងៗឱ្យចូលចិត្តមើល និងរៀន ជាមួយប៊ិចអាន (talking pen) ដែលអាចបន្លឺសំឡេងអានរបស់អ្នកជាភាសាដើមបានយ៉ាងច្បាស់។ វាក៏ជួយបង្កើតនូវទម្លាប់ក្នុងការអានសៀវភៅ និងស្រឡាញ់ការសិក្សា ផ្តល់នូវវាក្យស័ព្ទសម្បូរបែប និងអាចបង្រៀនឱ្យកុមារចេះស្វែងរកព័ត៌មាន និងចេះផ្ចង់អារម្មណ៍។
ឈុតទី2៖ English Time៖ ឈុតនេះជាបណ្តុំសៀវភៅដែលបង្រៀនអំពីជំនាញភាសាអង់គ្លេសបានយ៉ាងច្បាស់លាស់។ វាអាចជួយឱ្យកុមារតូចៗសប្បាយរីករាយផង និងទទួលបានចំណេះដឹងខាងផ្នែកភាសាផងទាំងអក្សរ លេខ សញ្ញាណគណិតវិទ្យា គ្រួសារ សម្លៀកបំពាក់ រដូវកាល ទីកន្លែង (ផ្ទះ សាលារៀន ផ្សារ ទីកម្សាន្ត សួនសត្វ រោងភាពយន្ត និងទីក្រុង-ល-) មធ្យោបាយធ្វើដំណើរ និងពណ៌។ល។
ឈុតទី3៖ Early Learning Program៖ ផ្នែកនេះជាផ្នែកដែលបណ្តុះជំនាញជាមូលដ្ឋានសម្រាប់កុមារ។ តាមពិតទៅក្មេងៗគួរតែទទួលបានការបង្ហាត់បង្ហាញពីជំនាញមូលដ្ឋានដំបូងៗច្រើនណាស់ដែលយើងមិនបានចាប់អារម្មណ៍។ ក្នុងនោះរួមមានតាំងពីជំនាញលេខ អក្សរ ពណ៌ ពេលវេលា ជំនាញក្នុងការបង្កើតអ្វីដែលថ្មីៗ ការស្រមើស្រមៃ ការដោះស្រាយបញ្ហា ការគិតបែបស៊ីជម្រៅ (critical thinking) និង social &;emotional skills ជាដើម។
ឈុតទី4៖ Learning Math with Albert៖ ឈុតនេះបង្រៀនអំពីគណិតវិទ្យាតាមវិធីសាស្ត្រប្រទេសសិង្ហបុរី ជាក្បួនដែលត្រូវបានគេចាត់ទុកថា មានប្រសិទ្ធភាពក្នុងការធ្វើឱ្យក្មេងឆាប់យល់ដឹង ចេះ និងចូលចិត្តគណិតវិទ្យា។
ឈុតទី5៖ A Child’s First Library of Values៖ នៅក្នុងផ្នែកនេះមានសៀវភៅរឿងនិទាន 15ក្បាលដែលបង្កប់ដោយអត្ថន័យអប់រំខាងគុណតម្លៃនៃការរស់នៅ ដើម្បីឱ្យក្មេងបានដឹង និងយល់ពីតម្លៃនៃការបើកចិត្តឱ្យទូលាយ ចេះចែករំលែក ទទួលស្គាល់ពីភាពខុសគ្នា រួមទាំងផ្នែកសំខាន់ៗជាច្រើនដែលបណ្តុះផ្នត់គំនិត និងសីលធម៌របស់កុមារតូច។
4. ជាចុងក្រោយតើលោកស្រីមានមតិ ឬយោបល់យ៉ាងណាខ្លះសម្រាប់អាណាព្យាបាល ឬឪពុកម្តាយទាំងឡាយ?
នាងខ្ញុំសូមលើកទឹកចិត្តឱ្យអាណាព្យាបាលទាំងអស់ចំណាយពេលវេលាឱ្យបានច្រើនតាមដែលអាចធ្វើទៅបានជាមួយកូនៗ ជាពិសេសគឺកូនតូចៗ ព្រោះការផ្តល់ភាពកក់ក្តៅ ការបង្កើតភាពស្និទ្ធស្នាល និងការអភិវឌ្ឍពួកគេតាមរយៈការអប់រំបន្ថែមនៅផ្ទះ គឺអាចជួយបង្កើនសក្តានុពលជោគជ័យ ទាំងផ្នែកការសិក្សា ការងារ ទំនាក់ទំនងល្អក្នុងគ្រួសារ និងមនុស្សជុំវិញខ្លួន និងសុខភាពខាងស្មារតីដោយផ្ទាល់ និងចូលរួមចំណែកអភិវឌ្ឍបង្កើនធនធានមនុស្សប្រកបដោយសមត្ថភាពខ្ពស់សម្រាប់ប្រទេសជាតិដោយប្រយោលទៀតផង៕
លោក ម៉ៃ សុគន្ធ បន្តកំណត់ត្រារបស់ខ្លួន ក្រោយគាំទ្រក្លិបសៀមរាបក្នុងពានរង្វាន់សម្តេច ហ៊ុន សែន វគ្គផ្តាច់ព្រ័ត្រ
កាលពីម្សិលមិញនេះ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី13 (ថ្នាក់ខេត្ត) ឆ្នាំ2019 (វគ្គផ្តាច់ព្រ័ត្រ) បានបិទបញ្ចប់ហើយ ដោយលទ្ធផល គឺក្រុមខេត្តសៀមរាប បានចាញ់ក្រុមខេត្តត្បូងឃ្មុំ ដោយលទ្ធផល 1ទល់នឹង០ ដោយកីឡាករខេត្តត្បូងឃ្មុំ រកឃើញគ្រាប់ជ័យជម្នះនៅនាទីទី46។
ដោយឡែក លោក ម៉ៃ សុគន្ធ នៅតែបន្តកំណត់ត្រា “ទាយមិនដែលត្រូវ” របស់ខ្លួន មុនការប្រកួតវគ្គផ្តាច់ព្រ័ត្រពានរង្វាន់មួយនេះដដែល ដោយនៅក្នុងគណនីហ្វេសប៊ុករបស់ខ្លួន លោក ម៉ៃ សុគន្ធ បានបង្ហាញការគាំទ្រយ៉ាងពេញទំហឹងទៅលើក្រុមបាល់ទាត់ខេត្តសៀមរាប ដែលនេះវាហាក់ដូចជាមិនខុសពីការទស្សន៍ទាយដូចសព្វមួយដង របស់លោក ម៉ៃ សុគន្ធឡើយ ដោយរៀងរាល់លើកកន្លងមក ឱ្យតែលោកគាំទ្រក្រុមណាមួយ...ច្បាស់ណាស់! ក្រុមមួយនោះតែងតែបរាជ័យ ហើយនឹងត្រូវធ្លាក់ចេញពីពានរង្វាន់នោះភ្លាមៗ ស្តែងៗតែម្តង៕
ILO ថា រាល់ឆ្នាំកម្មករនិយោជិតលើពិភពលោកប្រមាណ 2.78លាននាក់ស្លាប់ដោយសារគ្រោះថ្នាក់ការងារ
បញ្ហាគ្រោះថ្នាក់ការងារជាបញ្ហាដ៏សំខាន់មួយសម្រាប់ពិភពលោក នាសម័យបច្ចុប្បន្ន ព្រោះវាផ្តល់ផលប៉ះពាល់យ៉ាងខ្លាំងដល់សេដ្ឋកិច្ច និងមនុស្សក្នុងសង្គម។ តាមការប៉ាន់ប្រមាណរបស់អង្គការអន្តរជាតិខាងការងារ (ILO) បានបញ្ជាក់ថា កម្មករនិយោជិតប្រមាណ 2.78លាននាក់លើពិភពលោកបានបាត់បង់ជីវិតដោយសារគ្រោះថ្នាក់ការងារ និងជំងឺវិជ្ជាជីវៈជារៀងរាល់ឆ្នាំ។ ក្នុងនោះកម្មករជិត 2.4លាននាក់បានស្លាប់ដោយជំងឺវិជ្ជាជីវៈ ហើយបន្ថែមពីលើនេះបើគិតពីកម្មករនិយោជិតរងគ្រោះថ្នាក់ការងារតែមិនបណ្តាលឱ្យស្លាប់បាត់បង់ជីវិតមានរហូតដល់ទៅ 374លាននាក់ឯណោះ។
ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ស្ថិតិនៃគ្រោះថ្នាក់ការងារ និងជំងឺវិជ្ជាជីវៈនេះនៅតែបន្តកើនឡើង ដែលក្នុងនោះការកើនឡើងនៃហានិភ័យការងារផ្នែកសុខភាពផ្លូវចិត្តស្មុគស្មាញជាមួយការងារ និងជំងឺមិនឆ្លងបានកើនឡើងគួរឱ្យកត់សម្គាល់នៅគ្រប់ផ្នែកនៃពិភពលោក និងប៉ះពាល់ដល់សេដ្ឋកិច្ចសកលលោកដែលទាមទារឱ្យមានវិធានការការពារសុវត្ថិភាពការងារឱ្យបានគ្រប់ជ្រុងជ្រោយបន្ថែមទៀត។
នៅកម្ពុជាបើតាមរបាយការណ៍របស់បេឡាជាតិរបបសន្តិសុខសង្គម បានឱ្យដឹងថា ករណីគ្រោះថ្នាក់ការងាររហូតដល់ស្លាប់ និងការចំណាយទៅលើសំណងហានិភ័យការងារនៅឆ្នាំ 2018 មានការថយចុះចំនួន18.25% បើធៀបនឹងរយៈពេលដូចគ្នានៅឆ្នាំ 2017។ទិន្នន័យបានបញ្ជាក់ថា គ្រោះថ្នាក់ការងារសរុបចំនួន 34,808ករណី រួមមានគ្រោះថ្នាក់នៅកន្លែងធ្វើការមានចំនួន 25,206នាក់ គ្រោះថ្នាក់ពេលធ្វើដំណើរចំនួន 9,530នាក់ និងផ្សេងៗចំនួន 72នាក់។ ចំណែកឯករណីដួលសន្លប់របស់កម្មករនិយោជិត មានការថយចុះចំនួន 54.55% ដោយកើតឡើងនៅក្នុង 22សហគ្រាសគ្រឹះស្ថាន នៅឆ្នាំ2017 មកត្រឹម 10សហគ្រាស-គ្រឹះស្ថាន នៅឆ្នាំ2018 ដែលនេះបង្ហាញពីការយកចិត្តទុកដាក់ពីគ្រប់ភាគីពាក់ព័ន្ធក្នុងការបង្ការសុវត្ថិភាព និងសុខភាពការងារនៅកន្លែងធ្វើការ។
ដើម្បីដោះស្រាយបញ្ហាសុវត្ថិភាព និងសុខភាពការងារនៅកម្ពុជា ក្រសួងការងារ និងបណ្តុះបណ្តាលវិជ្ជាជីវៈបានខិតខំប្រឹងប្រែងដើម្បីរៀបចំផែនការសកម្មភាពសំខាន់ៗមួយចំនួនដូចជា ដាក់ឱ្យប្រើប្រាស់នូវផែនការមេលើកទី2 ស្តីពីសុវត្ថិភាព និងសុខភាពការងារ ឆ្នាំ2018-2022 ដែលជាផែនទីចង្អុលផ្លូវក្នុងការអភិវឌ្ឍផ្នែកសុវត្ថិភាព និងសុខភាពការងារនៅក្នុងប្រទេសកម្ពុជា។ បន្តយន្តការរបស់គណៈកម្មាធិការជាតិសុវត្ថិភាព និងសុខភាពការងារ ដើម្បីសម្របសម្រួល និងផ្តល់យោបល់ដើម្បីពង្រឹងប្រព័ន្ធគ្រប់គ្រងសុវត្ថិភាព និងសុខភាពការងារថ្នាក់ជាតិ និងសហគ្រាស គ្រឹះស្ថាន។ កែលម្អប្រព័ន្ធអធិការកិច្ចការងារឱ្យកាន់តែមានប្រសិទ្ធភាព និងគុណភាព តាមរយៈការកែលម្អរបាយការណ៍អធិការកិច្ចការងារ ការពង្រឹងសមត្ថភាពមន្ត្រីទទួលបន្ទុកអធិការកិច្ចការងារ និងការបង្កើនការចុះធ្វើអធិការកិច្ចការងារបន្ថែមទៀតទៅដល់វិស័យសំណង់ ឡឥដ្ឋ និងសេវាកម្សាន្ត។ បន្តអនុវត្តគម្រោងលើកកម្ពស់ស្តង់ដាសុវត្ថិភាព និងសុខភាពការងារនៅក្នុងវិស័យសំណង់នៅកម្ពុជា របស់អង្គការអន្តរជាតិខាងការងារជប៉ុន ដោយបានរៀបចំលិខិតបទដ្ឋានគតិយុត្តពាក់ព័ន្ធនឹងវិស័យសំណង់បន្ថែម និងការបណ្តុះបណ្តាលគ្រូបង្គោល និងសិក្ខាកាមស្តីពីការកែលម្អការងារ នៅក្នុងការដ្ឋានសំណង់ខា្នតតូច (WISCON) ព្រមទាំងគ្រោងនឹងរៀបចំគោលនយោបាយជាតិស្តីពីសុវត្ថិភាព និងសុខភាពការងារ និងបានដាក់ចេញនូវផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ2019-2023 ដែលសុវត្ថិភាព និងសុខភាពការងារស្ថិតនៅក្នុងកម្មវិធីទី1 “ការអភិវឌ្ឍលក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវៈ” ដែលផ្តល់នូវកាលានុវត្តភាពជាយុទ្ធសាស្ត្រ ដើម្បីពង្រឹងលក្ខខណ្ឌសុវត្ថិភាព និងសុខភាពការងារ ជាពិសេសការរៀបចំច្បាប់ស្តីពីសុវត្ថិភាពនិងសុខភាពការងារ។ ជំរុញ និងលើកទឹកចិត្តដល់សហគ្រាស គ្រឹះស្ថានដែលអនុវត្តតាមបទដ្ឋានការងារស្នូលសុវត្ថិភាព និងសុខភាពការងារ៕
ការជ្រើសរើសអាជីពនឹងកាន់តែប្រសើរឡើងជាមួយវីដេអូប្រឹក្សាការងារ ដែលផលិតដោយក្រសួងការងារ និង UNDP
ការជ្រើសរើសអាជីពការងារ ជារឿងសំខាន់ខ្លាំងណាស់សម្រាប់មនុស្សម្នាក់ៗ ព្រោះវាមានឥទ្ធិពលដោយផ្ទាល់ចំពោះដំណើរជីវិតបុគ្គល និងមានឥទ្ធិពលជាច្រើនផងដែរដល់ការអភិវឌ្ឍសង្គមទាំងមូល។ ដើម្បីជំរុញឱ្យការជ្រើសរើសអាជីពកាន់តែមានប្រសិទ្ធភាព និងកាន់តែប្រសើរឡើង ក្រសួងការងារ និងបណ្តុះបណ្តាលវិជ្ជាជីវៈ រួមជាមួយអង្គការកម្មវិធីអភិវឌ្ឍន៍សហប្រជាជាតិ (UNDP) បានរៀបចំកម្មវិធីមួយឈ្មោះថា “Dr. Job” ដើម្បីចាក់ផ្សាយ និងផ្តល់ចំណេះដឹងជាច្រើនដល់សិស្សនិស្សិតក្នុងការជ្រើសរើសអាជីពការងារ។
ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ការដាក់ចេញនូវគម្រោងនេះ ពិតជាមានសារៈសំខាន់ និងទាន់ពេលវេលា ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការអភិវឌ្ឍធនធានមនុស្ស និងជំរុញឱ្យដំណើរការទីផ្សារការងារនៅកម្ពុជាកាន់តែមានប្រសិទ្ធភាព តាមរយៈការត្រៀមរៀបចំកម្លាំងពលកម្មប្រកបដោយសក្តានុពល ការកសាងមាគ៌ាអាជីពច្បាស់លាស់ក្នុងជីវិត ការជ្រើសរើសមុខជំនាញសិក្សាស្របតាមតម្រូវការទីផ្សារការងារ ការស្វែងរកការងារប្រកបដោយប្រសិទ្ធភាព និងពិសេសការត្រៀមលក្ខណៈចូលក្នុងទីផ្សារការងារ រួមទាំងបង្កើនលទ្ធភាពក្នុងការទទួលបានការងារកាន់តែងាយស្រួល។ ក្រៅពីនេះ ការរៀបចំផែនការអាជីពល្អ គឺជាមធ្យោបាយដ៏សំខាន់ក្នុងការផ្សារភ្ជាប់សមត្ថភាពរបស់សិស្ស និស្សិត និងកម្មករនិយោជិត ឆ្ពោះទៅរកភាពជោគជ័យនៅថ្ងៃអនាគត។
ឯកឧត្តម អុិត សំហេង មានប្រសាសន៍ថា៖ “មូលហេតុដែលយុវជនចាំបាច់ត្រូវរៀបចំ និងកសាងផែនការអាជីពឱ្យបានល្អ ព្រោះវាអាចជួយកាត់បន្ថយគម្លាតបន្ទាប់ពីក្មួយៗបញ្ចប់ការសិក្សារួចឈានចូលទៅក្នុងទីផ្សារការងារសំដៅទទួលបានការងារកាន់តែឆាប់រហ័ស និងប្រកបដោយភាពប្រកួតប្រជែង”។
ឯកឧត្តមរដ្ឋមន្ត្រី បានមានប្រសាសន៍ផងដែរថាកម្ពុជាកំពុងព្យាយាមគ្រប់លទ្ធភាពដើម្បីជំរុញឱ្យសិស្សនិស្សិតកាន់តែមានប្រភពព័ត៌មានសំខាន់ៗសម្រាប់អភិវឌ្ឍសមត្ថភាព សម្រាប់ឆ្លើយតបជាមួយរបត់ថ្មីនៃបច្ចេកវិទ្យា និងត្រៀមខ្លួនប្រកួតប្រជែងជាមួយទីផ្សារតំបន់។ ហេតុនេះការជ្រើសរើសជំនាញត្រឹមត្រូវជាផ្នែកមួយក្នុងការជំរុញឱ្យធនធានមនុស្សរបស់យើងក្លាយជាកម្លាំងចលករកាន់តែខ្លាំងក្នុងការអភិវឌ្ឍ និងការប្រកួតប្រជែងក្នុងទីផ្សារការងារ។
គួរបញ្ជាក់ផងដែរថា កម្មវិធីវីដេអូស្តីពីអាជីពនេះបានទទួលការគាំទ្រពីទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) តាមរយៈកម្មវិធីអភិវឌ្ឍន៍របស់អង្គការសហប្រជាជាតិ(UNDP) និងទទួលអនុវត្តដោយទីភ្នាក់ងារជាតិមុខរបរ និងការងារ (NEA)។
ប្រធាន UNDP ប្រចាំព្រះរាជាណាចក្រកម្ពុជា លោកNick Beresford បានលើកឡើងថា ការដាក់ឱ្យដំណើរការវីដេអូ “Dr.Job” នេះបង្ហាញឱ្យឃើញពីកិច្ចសហការល្អរវាងអង្គការកម្មវិធីអភិវឌ្ឍន៍របស់សហប្រជាជាតិ (UNDP) និងទីភ្នាក់ងារជាតិមុខរបរ និងការងាររបស់កម្ពុជា។ ខ្សែវីដេអូនេះមានចំនួន 7វគ្គ ដែលវានឹងអាចចូលរួមដោះស្រាយបញ្ហាគម្លាតជំនាញក្នុងចំណោមយុវជនកម្ពុជា ដែលរារាំងក្នុងការទទួលបានការងារសមរម្យនៅក្នុងទីផ្សារកម្ពុជា។ វាជាផ្នែកមួយក្នុងការជំរុញឱ្យយុវជនចេះរៀបចំផែនការអាជីព ការងារ និងត្រៀមលក្ខណសម្បត្តិឱ្យបានល្អដើម្បីចូលទីក្នុងទីផ្សារការងារដោយប្រើប្រាស់ជំនាញវិជ្ជាជីវៈ និងជំនាញទន់។
កន្លងមកបញ្ហាគម្លាតអាជីពនេះ បានក្លាយជាបញ្ហាមួយដែលគ្រប់ភាគីទាំងអស់កំពុងយកចិត្តទុកដាក់ ខណៈជំនាញដែលមានទីផ្សារខ្ពស់ជាច្រើនត្រូវយុវជនបោះបង់មិនជ្រើសរើស ហើយជ្រើសរើសតែជំនាញណាដែលមានមនុស្សសិក្សាច្រើនដែលធ្វើឱ្យទីផ្សារការងារមានភាពចង្អៀត។ បញ្ហានេះបានធ្វើឱ្យទីផ្សារការងារផ្នែកខ្លះសល់មនុស្សច្រើន តែទីផ្សារការងារខ្លះបែរជាខ្វះអ្នកជំនាញទៅធ្វើការទៅវិញ ដែលពេលខ្លះធ្វើឱ្យអ្នកមិនទាន់មានការងារធ្វើត្រូវបង្ខំចិត្តធ្វើការងារខុសជំនាញជាដើម។ ហេតុនេះការដោះស្រាយ និងការជំរុញការអប់រំពីការជ្រើសរើសជំនាញ គឺជាផ្នែកដ៏សំខាន់មួយក្នុងការដោះស្រាយបញ្ហានានាដែលកំពុងប្រឈមនាពេលបច្ចុប្បន្ន៕
នោះ!! ស្ថាបនិកក្រុមហ៊ុន YG Entertainment ត្រូវសង្ស័យថា រកស៊ីផ្លូវភេទយកស្រីៗលក់ឱ្យសេដ្ឋីៗបរទេស
តាមរយៈសារព័ត៌មាន kapook បានចេញផ្សាយនៅពេលមុននេះបន្ដិចបានឱ្យដឹងថា ខណៈនេះមន្ត្រីប៉ូលីសគេកូរ៉េកំពុងបើកការស៊ើបអង្កេតប្រមូលភ័ស្ដុតាង និងកសាងសំនុំរឿងករណីរបស់លោក យ៉ាង ហ្សង់ស៊ុក (Yang Hyun-suk) ត្រូវបានចោទប្រកាន់ និងសង្ស័យបានប្រព្រឹត្តិបទល្មើសរកស៊ីផ្លូវភេទ ដឹកញីប្រស៊ីឈ្មោលយកស្រីៗទៅលក់ឱ្យសេដ្ឋីៗនៅបរទេស ។
បើតាមកម្មវិធី Straight របស់ស្ថានីយទូរទស្សន៍ MBC បានអះអាងថា ភ័ស្ដុតាងមួយចំនួនបានបញ្ជាក់ថា លោក Yang Hyun-suk ដែលជាស្ថាបនិកបង្កើតក្រុមហ៊ុនកម្សាន្ដ YG Entertainment ក៏ដូចជាក្រុមហ៊ុនផលិតកម្មលក់ចម្រៀងធំបំផុតនៅប្រទេសកូរ៉េខាងត្បូង សង្ស័យអាចមានជាប់ពាក់ព័ន្ធជាមួយករណីចាប់ និងជួញនារីៗស្រស់ស្អាត យកទៅលក់បម្រើសេវាកម្មផ្លូវភេទនៅបរទេស ដែលក្នុងនោះភាគច្រើនគឺនារីនៅតំបន់អាស៊ី។ បើទោះបីជាខាងផលិតកម្ម YG ចេញការបដិសេធថា មិនបានប្រព្រឹត្តិបទល្មើសខាងលើនោះក្ដី តែសេចក្ដីប្រកាសចាប់ខ្លួនស្ថាបនិករូបនេះក៏ត្រូវបានធ្វើឡើង និងត្រូវអ្នកលេងបណ្ដាញសង្គមធ្វើការវិភាគរិះគន់យ៉ាងមិនសំចៃ។
យ៉ាងណាមិញ កម្មវិធី Straight ក៏បានបញ្ជាក់បន្ថែមថា អ្នកជំនួញមានមុខមាត់នៅក្នុងសង្គមសិល្បៈដូចគ្នានឹងក្រុមហ៊ុន YG មួយរូបបានផ្ដល់ការបញ្ជាក់ថា បុគ្គលរបស់ YG រូបនេះធ្លាប់បានណាត់ជួបមេខ្យល់នៅក្នុងក្លឹបកម្សាន្ដរាត្រី NB ដែលជាក្រុមអ្នកនាំនារីមកបម្រើសេវាកម្មផ្លូវភេទចំនួន៣ដងរួចមកហើយ ហើយនៅក្នុងនោះក៏មានតារាចម្រៀងល្បីៗ មានបុរស 8 នាក់ និងនារី 25 នាក់ ដែលសុទ្ធសឹងតែជានារីមានឈ្មោះល្បីនៅក្នុងពិភពសិល្បៈផងដែ។ បើទោះបីជាមានការសម្ភាសន៍ និងការសង្ស័យករណីខាងលើនេះក៏ដោយ ក៏លោក Yang Hyun-suk នៅបដិសេធថា ខ្លួនគ្មានជាប់ពាក់ព័ន្ធជាមួយករណីខាងលើជាដាច់ខាត។
សូមជម្រាបថា ខណៈនេះខាងមន្ដ្រីប៉ូលីក្រុងសេអ៊ូល ក៏បានប្រាប់សារព័ត៌មានដែរថា ពួកយើងកំពុងតែព្យាយាមទាក់ទងទៅកាន់ស្ថានីយទូរសទ្សន៍ MBC ដើម្បីធ្វើការស៊ើបអង្កេតរកភ័ស្ដុតាងពិតប្រាកដ និងការសហការពីខាងស្ថានីយទូរទស្សន៍ ដើម្បីកសាងសំណុំរឿង និងស្រាយបំភ្លឺរឿងក្ដីបន្ថែមជូនមហាជន ៕
ក្រុមហ៊ុនដែលបង្កើត TikTok គ្រោងនឹងផលិតទូរស័ព្ទខ្លួនឯង
ByteDance ឬ Beijing ByteDance Technology Co Ltd ជាក្រុមហ៊ុនដែលបានបង្កើតកម្មវិធីវីដេអូខ្លីដ៏ពេញនិយម TikTok ត្រូវបានគេដឹងថា មានគម្រោងចង់ផលិតស្មាតហ្វូនថ្មីមួយដោយខ្លួនឯង។
នាយកប្រតិបត្តិ TikTok លោក Zhang Yiming បានឱ្យដឹងថា វាជាក្ដីស្រមៃដ៏សែនឆ្ងាយរបស់យើង ដែលចង់បង្កើតឧបករណ៍ផ្ទាល់ខ្លួន។ យើងដឹងថា វាពិបាកនឹងទៅរួច តែឥឡូវនេះក្ដីស្រមៃនោះកាន់តែចូលកៀកមកជិតហើយ។ទោះជាយ៉ាងណា រូបរាងស្មាតហ្វូន និងទីតាំងផលិតដែលត្រូវប្រកាសចេញជាផ្លូវការនោះ នៅមិនទាន់ដឹងច្បាស់នៅឡើយទេ ក៏ប៉ុន្តែយោងតាមប្រភពព័ត៌មានដែលស្និទ្ធនឹងនាយកប្រតិបត្តិរូបនោះបានរាយការណ៍ថា TikTok បានស្នើសុំប័ណ្ណប៉ាតង់ស្មាតហ្វូនរួចរាល់ហើយ។ ដូច្នេះ តើស្មាតហ្វូន TikTok នឹងមានរូបរាង និងលក្ខណសម្បត្តិយ៉ាងណានោះ សូមរង់ចាំមើលទាំងអស់គ្នា៕
