រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ដើម្បីឱ្យកម្លាំងពលកម្ម រីកចម្រើន កម្លាំងពលកម្មទាំងអស់ ជាពិសេសយុវជនចាំបាច់ណាស់ត្រូវតែទទួលបានការអប់រំខាងចំណេះដឹងទូទៅ ការបណ្តុះបណ្តាលបច្ចេកទេស និងវិជ្ជាជីវៈប្រកបដោយគុណភាពបន្ថែមទៀត និងការសិក្សាពេញមួយជីវិត ដើម្បីទទួលបានជំនាញមួយដែលអាចឆ្លើយតបទៅនឹងតម្រូវការទីផ្សារការងារក្នុងស្រុក និងក្នុងតំបន់។
ថ្លែងក្នុងកិច្ចសន្ទនាជាន់ខ្ពស់ថ្នាក់ជាតិ ស្តីពីអនាគតនៃការងារសម្រាប់ប្រទេសកម្ពុជា ឯកឧត្តម អុិត សំហេង បានលើកឡើងថា៖ “ បច្ចុប្បន្នប្រទេសកម្ពុជា មានអត្រាប្រជាជនអាយុក្រោម25ឆ្នាំ ចំនួន 49.5%នៃចំនួនប្រជាជនសរុប ហើយមានអត្រាយុវជនអាយុ15 ដល់ 24ឆ្នាំចំនួន 28.9% នៃចំនួនប្រជាជនដែលស្ថិតក្នុងវ័យធ្វើការ(អាយុ15 ដល់64ឆ្នាំ) ដែលអត្រានេះបានធ្វើឱ្យកម្ពុជា ត្រូវបានចាត់ទុកជាប្រទេសដែលមានប្រជាជនវ័យក្មេងច្រើន”។
ឯកឧត្តមបានបញ្ជាក់ថា រចនាសម្ព័ន្ធប្រជាសាស្ត្រវ័យក្មេងបែបនេះ បានធ្វើឱ្យប្រទេសកម្ពុជា កំពុងទទួលផលចំណេញពីភាគលាភប្រជាសាស្ត្រ ដែលជាកាលានុវត្តភាព សម្រាប់ជំរុញការអភិវឌ្ឍ សង្គម-សេដ្ឋកិច្ច។ ប៉ុន្តែផលចំណេញនេះ នឹងមិនអាចបានសម្រេចនោះទេ ប្រសិនបើប្រជាជនវ័យ ក្មេងទាំងនោះមិនទទួលបានការងារសមរម្យប្រកបដោយផលិតភាព។
ឯកឧត្តមរដ្ឋមន្ដ្រីបានបន្ដថា៖ “ក្នុងន័យនេះ គោលបំណងសំខាន់នៃការរៀបចំកិច្ចសន្ទនានេះ គឺដើម្បីបង្កើតជាវេទិកាមួយសម្រាប់ផ្តួចផ្តើមឱ្យមានកិច្ចពិភាក្សារវាងអ្នករៀបចំគោលនយោបាយ តំណាងកម្មករនិយោជិត តំណាងនិយោជក និងដៃគូអភិវឌ្ឍន៍នានា ក្នុងការត្រៀមខ្លួនរបស់កម្ពុជា ឱ្យកាន់តែប្រសើរឡើង ដើម្បីឆ្លើយតបទៅនឹងពិភពការងារដែលកំពុងផ្លាស់ប្តូរ”។
លោករដ្ឋមន្ត្រីបានលើកឡើងថា ការសិក្សាមួយរបស់អង្គការ ILO ក្នុងឆ្នាំ2016 ស្តីពីអនាគតនៃការងារដែលប្រឈមនឹងហានិភ័យស្វ័យប្រវត្តិកម្មបានបង្ហាញថា 56%នៃការងារសរុបនៅក្នុងប្រទេសអាស៊ានចំនួន5 នឹងប្រឈមហានិភ័យខ្ពស់ជាមួយការធ្វើស្វ័យប្រវត្តិកម្មក្នុងរយៈពេល2ទសវត្សរ៍ខាងមុខនេះ រួមមានប្រទេសវៀតណាម ដោយ 70% នៃកម្លាំងពលកម្មកំពុងប្រឈមនឹងការបាត់បង់ការងារ ដែលបន្ទាប់មក គឺប្រទេសកម្ពុជាមាន 57% ឥណ្ឌូនេស៊ី 56% ហ្វីលីពីនមាន 49% និងថៃមាន 44%។
យោងតាមរបាយការណ៍ របស់វេទិកាសេដ្ឋកិច្ចពិភពលោកស្តីពីការអង្កេតអនាគតនៃការងារ នៅឆ្នាំ2018 បានឱ្យដឹងថា មកទល់ពេលបច្ចុប្បន្ន ការរីកចម្រើននៃបច្ចេកវិទ្យានេះ មិនទាន់បណ្តាលឱ្យមានការកាត់បន្ថយការងារជាទូទៅនៅទ្បើយទេ ខណៈការផ្លាស់ប្តូរនេះបានធ្វើឱ្យប៉ះពាល់ជាអវិជ្ជមានលើវិស័យមួយចំនួន ប៉ុន្តែវាក៏បានបង្កើតជាការងារថ្មីៗជាច្រើនដោយផ្ទាល់ និងដោយប្រយោលនៅក្នុងវិស័យ និងមុខរបរផ្សេងៗផងដែរ។
ជាក់ស្តែង កម្ពុជាកំពុងជួបប្រទះនូវបញ្ហាភាពមិនស៊ីគ្នានៃជំនាញ និងការផ្គត់ផ្គង់ជំនាញ មិនគ្រប់គ្រាន់ដោយសារតែប្រព័ន្ធអប់រំបណ្តុះបណ្តាលនៅមានកម្រិត និងមិនទាន់អាចឆ្លើយតបទៅនឹង តម្រូវការកម្លាំងពលកម្មដែលកំពុងផ្លាស់ប្តូរយ៉ាងឆាប់រហ័ស។
ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងទៀតថា៖“ ការវិវឌ្ឍបច្ចេកវិទ្យានៃបដិវត្តន៍ឧស្សាហកម្មទី4 នឹងបង្កើតឱ្យមានប្រភេទការងារថ្មីៗ ហើយក៏នឹងបណ្តាលឱ្យបាត់បង់ការងាររបស់យុវជនផងដែរ ប្រសិនបើពួកគេមិនទទួលបានការបណ្តុះបណ្តាលជំនាញទ្បើងវិញនិងបង្កើនសមត្ថភាពជំនាញឱ្យស៊ីចង្វាក់ជាមួយតម្រូវការទីផ្សារទេនោះ”។
ដោយបានមើលឃើញអំពីបញ្ហាប្រឈមខាងលើ និងសក្តានុពលផ្នែកប្រជាសាស្ត្ររបស់កម្ពុជា រាជរដ្ឋាភិបាលនីតិកាលទី6 បានដាក់ចេញនូវយុទ្ធសាស្ត្រចតុកោណដំណាក់កាលទី4 សំដៅធានា កំណើនសេដ្ឋកិច្ចខ្ពស់ និងប្រកបដោយចីរភាព តាមរយៈការទាញយកប្រយោជន៍ពីកាលានុវត្តភាព នៅក្នុងតំបន់ចាប់យកបច្ចេកវិទ្យាថ្មីៗ និងចាប់យកឱកាស ក៏ដូចជាជម្នះរាល់ភាពអវិជ្ជមាននៃបដិវត្តន៍ឧស្សាហកម្មទី4ព្រមទាំងលើកកម្ពស់ភាពប្រកួតប្រជែងរបស់កម្ពុជា ក្នុងគោលដៅឈានទៅសម្រេចបានឋានៈជាប្រទេសចំណូលមធ្យមកម្រិតខ្ពស់នៅឆ្នាំ2030 និងចំណូលកម្រិតខ្ពស់នៅឆ្នាំ2050។ ចំណុចនេះរាជរដ្ឋាភិបាលបានផ្តោតជាពិសេសលើអាទិភាពដូចខាងក្រោម៖
*ការអភិវឌ្ឍធនធានមនុស្សរួមមាន៖ ការពង្រឹងគុណភាពវិស័យអប់រំវិទ្យាសាស្ត្រ និងបច្ចេកវិទ្យា ការបណ្តុះបណ្តាលជំនាញបច្ចេកទេស ការលើកកម្ពស់សេវាសុខភាពសាធារណៈ និងអាហារូបត្ថម្ភ និងការពង្រឹងសមភាពយេនឌ័រ និងការគាំពារសង្គម។
*ការធ្វើពិពិធកម្មសេដ្ឋកិច្ច រួមមាន៖ ការកែលម្អប្រព័ន្ធទ្បូជីស្ទីក ការលើកកម្ពស់ការតភ្ជាប់ផ្នែកដឹកជញ្ជូន ថាមពល និងឌីជីថល ការអភិវឌ្ឍប្រភពកំណើនសេដ្ឋកិច្ចគន្លឹះ និងថ្មីៗ ការរៀបចំខ្លួនសម្រាប់ សេដ្ឋកិច្ចឌីជីថល និងការឆ្លើយតបនឹងបដិវត្តន៍ឧស្សាហកម្មទី4និងការជំរុញការអភិវឌ្ឍវិស័យហិរញ្ញវត្ថុ និងធនាគារ។
ឯកឧត្តម អុិត សំហេង បានបន្ថែមទៀតថា៖“យើងមិនមានជម្រើសអ្វីក្រៅពីបង្កើនសមត្ថភាពជំនាញដល់កម្លាំងពលកម្ម បង្កើនផលិតភាព បង្រួមគម្លាតភាពមិនស៊ីគ្នានៃជំនាញ ពង្រឹងសេវាព័ត៌មានទីផ្សារការងារនិងសេវារកការងារឱ្យធ្វើ បង្កើនគុណភាពអប់រំ និងបណ្តុះបណ្តាលវិជ្ជាជីវៈក្នុងទិសដៅ ដើម្បីចាប់យកអត្ថប្រយោជន៍ជាអតិបរមា និងកាត់បន្ថយផលប៉ះពាល់អវិជ្ជមាននៃការប្រែប្រួលពិភពការងារ ដើម្បីឆ្លើយតបទៅនឹងតម្រូវការជំនាញនាពេលអនាគតឱ្យបាន”៕
